رواية جرح الأيهم الفصل السادس و الاربعون 46 - بقلم أيلان
"الجُــرح السادس و أربعون"
-التحليل صحيح
مُلاذ : غلطانين بـ النتيجة
-اعرف صعب تقبل هذا الموضوع
بس النتيجه صحيحه و التحليل ما يغلط
مُلاذ : كلكم تحجون نفس الشي
عيدي الي التحليل انا مو مريضة انا ما بيه شي
-ست مُلاذ التحليل نتيجته صحيحه
مابي اي غلط
مُلاذ : عيدي الي التحليييل
اندارو يدحگولنا بـ استغراب
مُلاذ : انا مو مريييضة و هذا الشي مستحيل
انااا ما بيه شي مو مريضة ما بيه سرطااان
هزت راسها بـ قبول
-تمام اتفضلي
اشرت الي ع الكرسي ، رحت كعدت
هي وكفت تعيد التحليل كدامي
اجاني اتصال ، رفعت تلفوني دحگت رقم أيهم
اخذت التلفون غلقته و رجعته بـ الجنطة
رفعت عيني لـ الممرضه اراقبها
لحد ما خلصت و انا انتظرت لـ فترة
اجت ، خلت ورقة التحليل مره ثانية بـ ايدي
اخذتها قارنتها وي الاولى نفس الشي
مُلاذ : اكو غلط !
- ست مُلاذ انا هنا اشتغل من سنين
التحاليل صحيحه ما بيها اي غلط
الله ينطيج الصحه و العافيه و يرفع هالبلاء عنج
بس هذا المكتوب بـ التحليل
نزلت عيوني تدور بـ الفراغ
رفعت عيني دحگتلها ، كمت بـ هدوء
بـ ايدي جنطتي و امشي
عقلي حسيته متخدر
و الورقات عاصرتهم بـ ايدي
امشي بـ ثكل ، عقلي ثگيل ، جسمي
كل شي بيه ثگيل على روحي
سرطان ؟ سرطان شنو سرطان
غلطانين انا زينه قبل لا اجيهم انا مابيه شي
انا زينه قبل لا اجيهم
لگيت نفسي خارج المستشفى
خليت ايدي على صدري المخنوك
بس احاول اكمل مشي لـ السيارة
بس ما اعرف ما اعرف رجلية وين جاي تاخذني
عقلي ، عقلي ثگيل عقلي ثگيل عليه
شمرت روحي بـ السيارة اتنفس بـ صعوبه
صدري يرتفع و ينخفض رفعت التحاليل ادحگلهم
اقراهم ما اعرف شمكتوب بس اقراهم
شغلت سيارتي و طلعت ما اعرف وين اروح
ايدي على كصتي و صافنه اريد استوعب
روحي تعبت روحي تعبانه يا مرض ؟؟
انا اكدر احمل هم مرض جذابين ما يعرفون
ما يفهمون بـ التحليل ، وكفت السياره على صفحه
ايديه ميتات ما اكدر اسوق
نزلت من السياره سانده روحي عليها
كعدت وراها صايره سد بيني و بين الشارع
مديت رجلي و ظليت كاعده و صافنه
و أيدي مهدلات منا و منا
نزلت عيني ع التحاليل ، صفنت عليهن
استغرق مني وقت طويل حتى استوعب
اخذت تلفوني من الجنطة و ايديه تعبانه
اول شخص اجا بـ عقلي أيهم شلون رح اگله
انا بعدني ما مدركه لـ نفسي
ما مستوعبه انا مريضة و مرض مو عادي
فتحت التلفون و دكيت بـ صعوبه على رقمه
جاوبني متخبل
أيهم : مُلاذ صايرررلج شي مُلاذ جاوبي؟؟
مُلاذ : أيهم
حجا و صوته واضح حيله مهدود
أيهم : مُلاذ وينج مُلاذ ليش ما تجاوبيني
صارلج شي حاجيني لا تسكتين حاجيني
مُلاذ : أيهم تعال
أيهم : وين انتِ شصاير؟؟
طلعت ادور عليج خفت عليج شصاير وينج؟
اتلفتت ادحك گلتله مكاني
و سديت الاتصال و هو يسأل ليش هيج صوتي
ذبيت التلفون بـ الگاع و صافنه
مُلاذ : إلياس تعال و شوف عزيزتك
شوف عزيزتك ش... شصار بيها بغيابك
احجي ما مستوعبه
بس كلمات يطلعن من حلگي
دحگت لـ بزونه اجت نامت بـ حضني
خليت ايدي عليها امسد على راسها
و انا عيني ع الفراغ و عقلي فارغ
احتاجيت شخص يصحيني
ظليت هيج كاعده بـ الشارع
و السياره حاجزتني عن رؤية الناس
رفعت ايدي الترجف مسحت وجهي المحترك نار
فزت مسامعي على صوته و هو يدور عليه
فتح باب السايق يدورني
أيهم : مُلاذ ، مُلاذ وينج؟؟
اندار حول السياره لحد ما لگاني
نزل لـ مستواي مرعوب و يحجي
أيهم : مُلاذ شبيييج؟ مُلاذ !
صار شيي؟
درت دحگتله ، البزونه شردت من حضني
رفعت عيني لـ أيهم كُتله من انعدام المشاعر
نظراتي توضح انعدام مشاعري بـ هاللحظة
حضنته بدون وعي بس اريد احضنه
لزمت بي و هو ما بادلني الحضن
لحد ما اشتدت ايديه على ضلوعي
يهمس بـ اذاني بـ خوف
أيهم : لَـذه لذة روحي شصاير ؟
ها حبيبتي شصار؟ صار شي ؟
غمضت عيوني حاضنته حيل
يمسح على شعري ، انا هنا صار اماني
ما كدرت ابعد عنه الشعور الاحتاجه
صارلي اكثر من ساعه هسه لكيته
و ما اريد هالشعور ينتهي
اريد احس بـ هذا الدفو ، الامان
ما اريد افكر ما اريد
شددت ايديه حيل عليه و اشم رگبته
گلبي يدك حيل و هو حاضنني
أيهم : شصار يا روحي شصار؟
همست
مُلاذ : خلينا هيج لا تعوفني
خلينا هيج
أيهم : بس فهميني شصار
بعد وجهي من رگبته يدحگلي
هزيت راسي بـ رفض و بسرعه رجعت حضنته
مُلاذ : ما اريد ما صار شي ما صار
مخليه وجهي بـ ركبته
و لازمه بـ ظهره بـ ثنين ايديه حاضنته حيل
حضنني ساكت ، فتح الباب الورا
مال السياره مالتي ، دخلني بيها و دخل وياي
سد الباب و انا ادحگله ،
رفع ايده حتى اخلي راسي على صدره
أيهم : تعالي
اتقربت عليه اكثر و خليت راسي على صدرة
حاوط ضلوعي ساكت ، وخر الشال من شعري
الدنيا ظلمه و ما ننشاف ظل يمسد شعري
و انا عقلي متخدر ما افكر بـ اي شي
غير بـ شعوري هسه وي أيهم و لمساته
حك فروة راسي بـ اصابعه
حركت راسي نعسانه ، من احس بـ الامان
يجتاحني شعور النعاس ، فتحت عيوني بـ ثگل
رفعتهن دحگت لـ وجهه و هو منزل راسه يدحگلي
حجا بـ صوت هادء
أيهم : شصار ؟
مُلاذ : ما صار
طخت ارنبة خشمه بـ خشمي
و هو يحركها على خشمي
غمضت عيوني هادئه
دنك اكثر و انا رفعت راسي
لحد ما صارت شفته الدافيه على شفتي
لزمت بـ ايديه حيل ، رفع ايده من ايدي
خلاها على خدي يبوسني
و انا رفعت ايدي خليتها على رگبته
كمت من مكاني كعدت بـ حضنه
و هو يبوسني ، وخر كذلتي عن وجهي
يبوسني بـ شوغه و انا اندمجت ويا
فتحت عيوني الذبلانات خليت راسي على كتفه
مسح على ظهري و ايده الثانية على راسي
يمسح على خدي و خصلات شعري
أيهم : شصار حبيبتي سولفيلي ؟
مُلاذ : ما صار شي
درت وجهي و انا راسي على كتفه
دحگتله ، رفعت راسي سندت كصتي على كصته
و انا اعلى منه لان كاعده بـ حضنه
مُلاذ : أيهم
أيهم : لَـذة گلبه
حجيت اول كلمه اجت ببالي من دون تفكير
مُلاذ : انا احبك
اتوضحت عيونه الفززهن عليه
و انا نزلت راسي بسته مره ثانية و هو بادلني
يمسح على ظهري ، اتجرء بـ لمساته اكثر
بعدين فز و وخر ايديه عني بسرعه
دحگلي عيونه ذبلانه ، يحجي بـ صوت تعبان
أيهم : ليش هسه گلتي شصاير ؟
منزله عيوني عنه رفع وجهي من حنجي بـ ايده
اتنقل نظري بين عيونه ، رجعت نزلت راسي
قرب وجهه الي ، انفاسنا تختلط يرفع وجهي
أيهم : شصار ها ؟ لا تأذيني هيج
و تسلميني روحج أذيتج انه وجع گلبج انه
بس لا تستسلمين الي ، ها لذة؟ حاجيني
مُلاذ : انت الشخص الوحيد يلي أمنت بي
من بين كل هذا الخطر
دحك بـ عيوني ساكت
و انا همست
مُلاذ : احـ ... احبك انا
زفر نفس بـ حسرة
أيهم : انا هم احبج ، تعالي يا روحي
تعالي نرجع لـ البيت ، عوفي سيارتج هنا
باجر اودي أيمن ياخذها
عدل شالي و ملابسي
و سد دكم قميصه الفتحهم لمن جنت بـ حضنه
مسح عرك كصته بـ كف ايده
فتح باب السيارة و نزل و انا نزلت وياه
اخذ غراضي و السويج يلي بيها و قفلها
لزمني حاضنني لـ صدرة
و اخذني لـ سيارته ، صعدنا و انا صافنه
و التحاليل بعدها بـ ايدي بس ما شافهم ايهم
عاصرتهم بـ ايدي ، رفعت عيني دحگتله
و هو يسوق ، حاولت احجي بـ صعوبه
مُلاذ : أيهم
التفت دحگلي تعابيرة قلقانه
أيهم : شصاير لَـذه ؟
لزم كف ايدي يدحگلي
ردت احجي و اجا اله اتصال
عاف ايدي اخذ التلفون جاوب ع الاتصال
أيهم : هسه جاي راح اخذة ، اي لكيتها ماكو شي
انطينيا ، أبيل اذا اجي احرك والديك هسه رح اجي
اتاددددب أبييييل
عاط بي بـ صوت عالي
سد التلفون متنرفز ، دحگتله بـ استغراب
مُلاذ : شكو؟
أيهم : وديت أبيل يم اهلي جان نايم من وديته
و هسه فاز و كايم يبجي و ضارب امي
و هي تسكته و يصيح عليهم
مكسر غراض هتان
مُلاذ : ليش ما نزلته يم اهلي ؟
أيهم : عيب ادك الباب عليهم هسه
و ما ردت اقلقهم عليج ، ادك عليج ما تجاوبيني
وديته و طلعت ادور عليج ، اتخبلت من خوفي عليج
لا تسوين بيه هيج مره ثانية خلي تلفونج مفتوح
هزيت راسي بـ قبول ساكته
وصلنا يم بيت اهل أيهم ، نزل أيهم وحدة
و انا احس عقلي مو وياي بعدين يلا انتبهت
هو نزل و انا وحدي بـ السيارة
دحكت لـ اوراق التحليل ، خليتهن بـ جنطتي ساكته
لزمت بـ راسي بـ ثنين ايديه ، احسه رح ينفجر
درت عيني على صوت بجي
دحكت أيهم لازم أبيل من ايده و أبيل يبجي
و يضرب بـ ايد أيهم و أيهم على اعصابه
عاط بي بـ صوت عالي بـ الشارع
أيهم : رح اكتلك صيررر عاقل
زاد بجي أبيل و أيهم راد يصعده بـ الورا
بس أبيل شافني و گام يبجي اكثر يريد يصعد يمي
اخذته من أيهم كعدته بـ حضني اسكت بي
و أيهم رجع دخل لـ اهله
مُلاذ : ليش ضارب بيبيتك ؟
كام يبجي اكثر و يغطي وجهه
مبين متنحس لان كاعد من النوم
انقهرت عليه حضنته و هو لازم بـ ملابسي
يگلي بابا يصيح عليه گوه افتهمه يبجي و يحجي
صعد أيهم بـ السيارة ، اندار لـ أبيل خزره
و أبيل ضام وجهه بـ صدري و يناشغ
رفع اصبعه يحجي بـ عصبية
أيهم : مرة الثانية اطيح حظك اذا سمعت
ضارب احد اكبر منك لو رافع صوتك علية
گالولك رح يجي يعني راح اجي
ما تضربهم و لا تصيح
مُلاذ : أيهم كافي شبيك ترا طفل ؟!
أيهم : لا يتعلم من هسه
لا امي و لا هتان و لا أيمن بكده
حتى يضربهم و يصيح عليهم
رفع راسه أبيل من صدري
و كام يصيح على أيهم و يبجي
حتى ما فهمت حجيه و أيهم خازره
راد ياخذه من عندي ما خليته
بقيت ادفع بـ ايدين أيهم عنه
و أبيل لازم بـ ملابسي و يبجي
مُلاذ : كاااافي شبيك
شنو تريد تضربه شبيك انت !
أيهم : من شووووكت اضربه انه ؟؟
ما تشوفي شلون صاير ادبسز و يصيح و يضرررب
مُلاذ : اي عوفه هسه متنحس لان كاعد هستوه
لا تظل تلح و تزيد الطين بله عوفه تخلي يبجي اكثر
أيهم : انتِ لا تتدخلين
يتمادى بعدين و تطلع عينه
مُلاذ : عوفه أيهم
شنو هاي الملحه وي الطفل عوفه
دار وجهه ساكت متنرفز
و انا حضنت أبيل اسكت بي
لحد ما هدء ، انطيته تلفوني يلعب العاب
أيهم ظل ساكت طول الطريق ،
لحد ما وصلنا
فتحت باب السيارة ، نزلت شايلة أبيل
أيهم قفل السيارة و اندار الي اخذ أبيل مني
و انطاني التلفون مالتي ، حضن أبيل رگبة أيهم
فتحنا الباب و صعدنا لـ شقتنا
أيهم اخذ أبيل ووداه لـ غرفته ينومه
انا نزعت شالي و كعدت ع القنفه
لميت رجلية لـ صدري و حاوطتهم بـ ايدية
غمضت عيوني بـ هدوء ،
حلم هذا مستحيل يكون واقع
فتحت عيوني بـ تعب و رجعت اخذت الاوراق
فتحت تلفوني ادور على رقم دكتورة اعرفها
دزيت الها التحاليل و حجيت الها ، حاسه اكو غلط
رفعت عيني دحگت لـ أيهم يلي اجا ناحيتي
كعد يمي و حضنني لـ صدرة ، باس شعري
مُلاذ : صالحت أبيل؟
أيهم : امم
مُلاذ : لا تخوفه
أيهم : يخليني اصير عصبي بسبب تصرفاته
لازم يتعلم غلط يتعارك و يصيح مهما كان السبب
امي تنهضم و تنقهر اذا هيج يسوي
مُلاذ : تعرفه طفل ما تضوج منه
أيهم : تضوج لان هي تحبه كلش
و بس تريد ترضي
مُلاذ : أيهم لا تخلي يحسك مثل لينا
ترا هي لينا جانت تكتله و انت جنت ما تقبل
مو هسه انت تكتله بدالها
أيهم : ما اكتله انه مستحيل اكتله
اكسر ايديه انه بـ نفسي اذا كتلته
بس جزعني ، نزلت احاجي حتى انه ضربني
يتدلع اذا ظليت انطي على مايه و الله طفل
لازم يشوف من عندي حدة بالكلام ويا
سكتت ما عندي شي احجي
خلا أيهم ايده على خدي يمسح عليه بـ كفا ايده
غمضت عيوني هادئه على اثر لمساته
نزل اصابعه لـ رگبتي قشعر جسمي
أيهم : بالنسبه لـ اعتراف مساع ؟
و هو يحجي التفتنا على صوت أبيل
أبيل : بابا
ابتعدت عن أيهم ، دحك لـ أبيل
أيهم : ليش كعدت؟
أبيل : اخاف
اتقدم ناحيتنا شاله أيهم باس خدة
أيهم : منين تخاف احنا يمك
فرك عينه ساكت
وخر من أيهم خلا راسه على رجلي
ابتسمت دنكت بس شعره ،
خليت ايدي على راسه العب بـ شعره
ظلينا هيج لحد ما أبيل غفى
أيهم شاله من حضني وداه نومه بـ مكانه
دحگت لـ أيهم لمن اجاني كعد يمي
ورا كم ثانية دنك ، خلا راسه على رجلي
دار وجهه دحگلي ، قلصت عيوني ادحگله
حاصره ضحكتي عليه
اخذ ايدي خلاها على شعره
رجع دار وجهه لـ التلفزيون
ابتسمت ابتسامة ظاهره اسناني ، گلت
مُلاذ : انت تغار من أبيل؟
ظل ساكت و انا اضحك
أيهم : ما اغار العبي بـ شعري مثله
دنكت وجهي قريب من وجهه
لزمت وجهه و هو يدحگلي
هزيته بـ ايدي حجيته و انا اضحك
مُلاذ : أبيل صغير انت جبير
أيهم : شبيه جبير ويني جبير
مو جبير انه
مُلاذ : ههههه ولك أيهم دحك رجليك
طالعه من القنفه هي بكيفك
أيهم : معليج عندي نمو زايد بالطول
انه مو جبير سوي شعري
مُلاذ : كوم لك كوم رجليه تكسرن
أيهم : و الله ما اكوم منا
اذا ما تلعبين بـ شعري و انام مثل أبيل
مُلاذ : غيار و الله
أيهم : معليج انه و ابني اغار منه يغار مني بيناتنا ، العبي بـ شعري خليني انام
رجعت ظهري ع القنفه مبتسمه
كعدت العب بـ شعره
دار وجهه من التلفزيون لان صاير ضوه عَليه
خلا وجهه بـ بطني رفع اصبعه حجا و هو مغمض
أيهم : و خاف عبالج نسيت تأخيرج اليوم
باجر حسابج و تگليلي شكو
اختفت ابتسامتي من وجهي
لمن تذكرت التحاليل لازم اگله
مُلاذ : أيهم
أيهم : اش خليني انام
ما اوخر راسي من رجلج
ورا ثواني فتح عيونه
أيهم : تعالي خل احضنج
ما اريد انام على رجلج
ابتسمت و هو كام وكف
دنك عليه و انا كاعده ع القنفه حضنني
شالني من خصري و انا لزمت برگبته
طفى الغراض ، يمشي و يحجي
أيهم : فكرة انام و انه حاضنج احلى
مُلاذ : أيهم اريد احاجيك بـ شغلة
أيهم : هسه نتحاسب هم على سالفة الاعتراف
غمضت عيوني بـ هدوء ساكته
نزلني ع الجربايه و گام
مُلاذ : وين رايح ؟
أيهم : ابدل ملابسي
مُلاذ : انا هم خل ابدل
كمت بدلت ملابسي و غسلت وجهي
و انا اغسل وجهي و سادة المي ، اجتني كحه قويه
ظليت اكح هواي ، فتحت المي حتى لا يسمع أيهم
وجهي احسه صار نار و اكح بدون انقطاع
لحد ما دحگت لـ المغسله البيضه
تلونت بـ اللون الاحمر ،
و صارت اكثر من مره هاي الكحه
غسلت بسرعه ، حاولت اوكف كحتي
وكفت مستنده ع الحايط و اغسل المغسله
دحگت لـ وجهي بـ المراية شكد تعبان
انا بعدني ما مصدكه الموضوع
شلون رح اخلي اهلي و أيهم يصدكون؟
غسلت وجهي و مسحت بـ المي على رگبتي
دحگت لـ وجهي بـ المرايه
مُلاذ : شنو الما صار بيج بعد؟
درت وجهي و طلعت من الحمام ، رحت يم أيهم
دحگتله لابس فانيله داخليه سوده و بجامه
أيهم : تأخرتي ؟
هزيت راسي ساكته
فتح الي ايده دحگتله و دحگت لـ ايده
رحت ناحيته شالني من خصري نومني يمه
خليت راسي على صدرة
مُلاذ : أيهم
أيهم : جَرحه
مُلاذ : السرطان ...
أيهم : شبي ؟
مُلاذ : من شنو يصير ؟
أيهم : ليش سألتي ؟
مُلاذ : مو سألتني اليوم شصاير؟
أيهم : اي ؟
مُلاذ : عرفت صديقتي بيها سرطان
رفع حواجبه ، هز راسه بـ قبول
أيهم : الله يشافيها ، خطيه
مُلاذ : اي ما جاوبتني
بعدين ليش ما خفت من كلت سرطان
يعني انا لمن يكولون سرطان كدامي
يقشعر بدني ما اعرف شيصير
و امي جانت ما تقبل احجي بـ هالمرض
أيهم : لَـذه الانسان العادي
طبيعي يخاف من اسم هالمرض
لان هو اساساً مو مرض هو آفة
تقتل الانسان تدريجياً اذا ما لگيتي علاج
حتى من تگولين اسمه تحسينه مشؤوم
أيهم : بس انه دكتور و هالحالات هواي شايفها
و كلمة السرطان هواي سامعها
سواء من المرضى او من الدكاتره
فـ متعود على هالاسم
مُلاذ : زين ما جاوبتني اسبابه شنو؟
احجي و اكرص بـ ايدي
اعرف الاشياء الرح اعرفها تخلي گلبي يحترك
أيهم : مرات يكون من التدخين
او مرات يكون وراثة او تعرضتي لـ فد اشعاع
اسبابه هواي
مُلاذ : اله علاج ؟
أيهم : حسب
مُلاذ : شنو حسب ؟
أيهم : اكو سرطان دم اكو سرطان ثدي
اكو سرطان رئه ، سرطان الكلى أو القولون
و كلها مراحل اكو مرحلة خطرة و اكو لا
مُلاذ : زين علاجهم؟
أيهم : كيمياوي و جراحه
سكتت و هزيت راسي بـ قبول
رفعت راسي مره ثانية وحجيت
مُلاذ : اذا انا بيه سرطان شراح تسوي ؟
خزرني و ضرب خدي بـ خفه
أيهم : احجي عدل
مُلاذ : شبيك احجي ؟!
أيهم : انجبي مُلاذ لا اطيح حظج
مُلاذ : ما گلتلك انا بيه
گلتلك اذا بيه شراح تسوي
غمض عيونه حيل
حجا بـ عصبية يكز على سنونه
أيهم : مُلاذذذذ لا تحجين هيج
لا تحجين اسكتي
مُلاذ : شي الكل يتعرض اله
و انا جاي اسألك عادي
احجي و بـ داخلي ارجف
اذا فكرة ما يتقبلها شلون راح يتقبل
انو انا صدك مريضة
أيهم : لا تسألين هيج اسئله!
مُلاذ : جاوبني و ما راح اسأل
أيهم : مُلاذ لا تاذيني اسكتي
عكدت حواجبي ادحگله
أيهم : من اتخيلج متاذيه اتاذى
روحي تحترك لا تحجين هيج حجي
و تفاولين على روحج اسكتي
جر راسي و حضنني لـ صدره
ردت احجي سد حلگي بـ ايده
راسي صاير على صدره
دنك لـ ركبتي طبع بوسه قويه عليها
يشم رگبتي حيل
أيهم : لا تفتحين هالموضوع بعد
رفع ايدي بـ ايده باسها
انداريت على ركبي ، دحگت بـ عيونه
لزم خصري بـ اثنين ايديه
يدحك لـ عيوني و يرجع نظره لـ شفتي
نزل شعري على وجهي
خلل اصابيعه بين الخصل
رفع شعري من وجهي رجعه ورا اذاني
أيهم : تحبيني لَـذه ؟
هزيت راسي بـ قبول متردده
رمش عيونه و نظراته ذبلانه
توقعت اذا عرف انا احبه رح يفرح
بس جانت كل تعابيره توحي كأنو هو تعبان
حاوطني حاضنني وجهه بـ رگبتي
الأيهم : شلون بينا لَـذه گليلي شلون ؟
دنكت راسي اله بسته
احس كل شي اسوي بدون وعي
عقلي غايب عقلي مو وياي
و عيوني افتحها و ارجع اغمضها
خليت ايدي على رگبته
و هو لازم بـ خصري كل قوته
بَعد راسه يدحك بـ وجهي
أيهم : نامي لَـذه
حجاها صوته تعبان
جر تشيرته من طرف الجرباية
عاف الغرفة و طلع ، دحگت وراه مستغربه
كل ما اقترب خطوة يبعدني و يعوفني و يروح
ما رجع دخل لـ الغرفة و لا انا نمت
بقيت كاعدة لـ الصبح
و بابا بـ عقلي شكد مشتاقتله
تعب عقلي و انا تعبت حيل
كمت لگيت أيهم كاعد بـ الصاله ، ما نايم
درت وجهي و رحت غسلت ،
دحگت لـ جسمي مورم مدري شبي
هي بقت عليك ، غلست و طلعت
اتقدمت لـ يم أيهم ، ابتسم لمن شافني
أيهم : شوكت كعدتي ؟
مُلاذ : ما نمت
أيهم : ليش؟
مُلاذ : ما نعسانه
انت ليش ما اجيت للغرفة بعد
أيهم : جنت طالع مساع رجعت
مُلاذ : وين طالع؟
أيهم : رحت شفت اهلي و تطمنت عليه
و رحت لـ بيت باهر هم
مُلاذ : الفجر ؟؟
أيهم : اي بس ما دخلت لـ بيته
بس شفت سيارته كدام بابهم و اجيت
مُلاذ : ليش؟
أيهم : هيج و جبت سيارتج هم
هزيت راسي بـ قبول ، لبست و طلعنا لـ الشغل
وصلت ملاك لـ دوامها، مالي طاقة لـ اي شي
وصلت لـ المكتب نزلت ، فتحت الباب،
دخلت ، دورت صافيناز ، لگيتها بعدها ما جاية
خابرت عليها گلتلي رح تجي
كعدت بـ مكاني و اشتغل
اجت صافيناز و تتحرك يمي و تسولف
و انا ماكو عقلي مو وياها
شفت الدكتوره ردت عليه
حجت نفس الحجي الگالوه الدكاترة
سديت التلفون ، غطيت وجهي بـ اثنين ايدية
شلون راح احجي لـ اهلي شلون راح اگول لـ أيهم
راح اشفى لو راح اتمرض و يتعلعل گلبي
نار استقرت بـ روحي
امنية حياتي صارت تمر فترة
اكون انا مستقرة بيها بدون وجع بدون تفكير
تمنيت اكدر اتخلى عن هاي الروح
الي تتحمل كل شي و اترك نفسي لـ كل وجع
بس هالشي ما مكتوب بـ قانوني
الانهيار و الاحساس بالوجع حرام عليه
جريت جنطتي و طلعت رايحة لـ المستشفى
هاهيه راح احجي لـ أيهم و لـ اهلي
اذا مو هسه يعرفون بعدين رح يعرفون
و انا طالعه من المكتب كحيت هواي
و كل اليطلع دم ، روحي تكطعت
كعدت بـ الگاع روحي لايبه
رفعت عيني على اثر خطوات شخص
مُلاذ : أيمن ؟
كنبص كدامي و انطاني مي
أيمن : مُلاذ شصاير خوفتيني عليج ؟!!
غطيت وجهي بـ ثنين ايديه
اخذت بطل المي غسلت و اتمضمضت
و أيمن يمي يمسح وجهي بـ الكلنس
و يسأل شصاير يريد يخابر لـ أيهم
خاف كلش من منظري و حالتي
لزمت بـ السيارة و وكفت
كام بسرعه فتح الباب و انا كعدت صفح بيها
كنبص كعد كدامي
أيمن : شبيج مُلاذ شصايررر؟
حجيت اله كل شي
و هو موسع عيونه عليه بـ صدمة ضحك و گال
أيمن : مُلاذ.. مُلاذ بلا شقة ، شقة ماصخ هذا
مسحت وجهي ساكته ،
لمن ما شاف ردة فعل مني
نظراته و تعابير وجهه تغيرت تدريجياً
لـ الصدمة و الدهشه و الخوف
أيمن : مُلاذ مستوعبه التحجينه ؟؟؟
مُلاذ : لحد هسه محد يدري
أيمن : زين شنو لييييش؟
مُلاذ : ما سألت بعد و لا رحت فحصت
و لا شفت اي شي ثاني ما اريد
ما اريد هذا الوجع يصيب روحي
أيمن : عقلي وكف والله عقلي وكف
و الله انه اتكفل فلوس علاجج بس صيري زينه
شنو سرطان شنو !
ظل كاعد كدامي مصدوم
و عينه عليه مقهور
أيمن : رغم انتِ عصبية بس و الله انه فهمتج
انتِ صح تسوين روحج عصبيه
بس انتِ احن انسانه و الله و انقى وحدة
أيمن : من يوم المزرعه عرفتج هيج
و صافيناز دوم تحجي على مواقفج
و على الاطفال الي تروحين الهم
مُلاذ : تعبت كلش أيمن
صدري مخنوك و روحي محترگه
ما ماذيتني سالفة المرض كد اذيتي
لمن افكر بـ اهلي و شنو رح احجي الهم
أيمن : يابه ماعليج بـ اهلج
هسه عليج بـ صحتج زين گليلي انه شسوي ؟
ها؟ نحجز طيارة هسه نروح انه وياج
لـ خوش دولة تعلاجج
أيمن : و الله انه اعرف ناس بـ كل الدول
انتِ بس گولي يا دولة و هناك نخابر أيهم
و نگله و يجي ورانا
ابتسمت و ضحكت
مُلاذ : تسلم أيمن
بس أيهم و اهلي لازم يعرفون مني
أيمن : مساع خابرت لـ أيهم بـالمستشفى
روحي اله و حاجي و اذا تريدين اجي وياج
اختصر الموضوع و احجي بسرعه
مُلاذ : لا انا اروح انت جاي لـ صافي ؟
أيمن : اي اجيت اشوف حبيبة روحي و اروح
مُلاذ : ما تتعاملون غير بالحبيب و الروح
ضحك و گال
أيمن : حبيبة روحي بعد
ما اكدر اروح بدون ما اودعها
مُلاذ : وين تروح ؟
أيمن : عندي شغل و يمكن اطول يلا ارجع
بس ان شاء الله ما اطول فد اسبوع
مُلاذ : شنو شغليش؟
أيمن : رح يفيدنا كلنا
مُلاذ : حتى انا ؟
أيمن : حتى انتِ
مُلاذ : اتحمست اعرف
رح تستلم راتب و توزعه علينا؟
أيمن : هههههه لا الراتب عزيز گلبي
مُلاذ : نحس و الله طلعلك ٢٥ بالجذب
ابتسم و ضحك
أيمن : شكد روحج حلوة
رغم الصاير بعدج تشاقين
لو انه جان نمت بـ الفراش
و كعدت اتنحب و ابجي
مُلاذ : عقلي تعبان من خبالي اضحك
و الا الي غيري و الانسان الطبيعي
رح يسوي مثلك
أيمن : لا تخافين انه عندي ثقة رح تتشافين
و انه موجود و اذكرج
ابتسمت و هزيت راسي بـ قبول
أيمن : رح ترحين هسه ؟
مُلاذ : اي
أيمن :انتظريني اودع صافيناز
و انزل اودعج عيب ما اودع مرة اخوي
مُلاذ : تمام
دخل المكتب و انا كاعدة بـ السيارة انتظر
لحد ما اجا و هو مبتسم و على خدة مطبوعه حمره ، ضحكت على منظره
أيمن : اي مرة اخوي
مُلاذ : خزيتنا باع الحمره
تلمس خده و مسحها و هو يضحك
أيمن : غلسي
مُلاذ : أيهم يدري بيك رايح مو؟
أيمن : لا اريد اسويله مفاجئه حتى يشتاقلي
مُلاذ : لا خطية
أيمن : خيولي هو يطردني يگلي ارجع سافر
انه اعلمه الا اسافر و اخذ صوصه
و ما ارجع اله بعد
مُلاذ : ههههه لا صوصه مالتنا
أيمن : بكيفج هي هاي صوصايتي
بوسيلياها حيل من ترجعين
مُلاذ : ان شاء الله
ودعته و اوصي على نفسه
راح لـ يم السياره اندار و ضحكلي
أيمن : انتبهي على نفسج لج الوكيحه
مُلاذ : صار
أيمن : و انتبهي على صوصايتي
و لا توجعين گلب أيهم
ترا حتى شيب طالع بـ راسه
مُلاذ : صار
أيمن : كون ارجع الگاج متشافيه خوش ؟
و ما گلت لـ احد سرج بـ بير
مُلاذ : ان شاء الله
أيمن : ديربالج على حبيبة روحي ولج
مُلاذ : أيمن مَلحه گلنالك ايي
أيمن : ما اسمحلج سوبر أيمن انه
ضحكت و گلت
مُلاذ : خوش سوبر أيمن
ابتسم و حرك الي ايده بـ معنى باي
صعد سيارته و راح و انا هم
اتوجهت لـ المستشفى ، خابرت على أيهم
دلاني بـ مكانه ، وصلت
خابرت لـ أيهم گلتله انا انتظرة
اجاني بسرعه ، قبل لا يحجي حجيت
مُلاذ : أيهم لازم اگلك شي
الله يخليك لا تقاطعني خل احجي و اخلص
أيهم : احجي شصاير ؟؟ لا تخوفيني
اريد احجي و صار صوت صيحة عالي
درت عيني سيارات الاسعاف بـ الباب
مره واكفه بـ الباب تصيح بـ صوت عالي
و تبجي ، انفتحت سيارة الاسعاف
نزلوا منها بنية يركضون بيها بـ السدية
و السيارة الثانية هم بنية ثانية بس صغيرة
ركض أيهم يلزم بـ السديات
البنيه بـ رجلها سجين و زندها ينزف
و هي تريد تفقد ، تغمض عيونها بـ وجع
الثانيه متعوره و وجههم كله دم و كدمات
المره وياها رجال دخلوا يركضون و يبجون
حجت البنية الي مضروبة بـ سجينه بـ صعوبة
-هند وينج هندد؟
غمضت عيونها حيل موجوعه
-هنا انا
دارت عيونها التعبانات
دحگت لـ البنية الصغيرة و غمضت بـ وجع
سمعت المره تصيح و تبجي
- ربيتهن بـ تعب تالي يخطفوهم مني
و هيج يرجعن الي سودة بوجهي سودة بوجهي
بجت رايحه روحها ، رادت توكع
ركضت اهدي بيها و الزمها
مر كدامي كل الصار بينا انا و ملاك
المضروبه سجينه تصيح بـ اسم هند و تبجي
و الثانيه تطمنها بـ وجودها و تبجي وياها
سندت المره و الرجال عليه و مشينا وراهم
و طفل صغير لازم بـ عباة المره ما مفتهم
گلبي حسيته انفطر على هذا المنظر
بقيت واكفه و منتظرة أيهم
رحت اشتريت مي لـ المره و الرجال
و حلويات لـ الطفل احاول اهديهم
طلع أيهم من يم المريضة وكف يحاجيهم
و هم اشتد بجيهم و ما قبَل يدخلون الهن
هسه گاللهم خل يرتاحن و ادخلوا يمهن
كعدوا اهلهم ينتظرون اجا ولد يركض
حاجا اهل البنات و اخذ الطفل و راح
أيهم اتلفت ، دحگلي و اجاني
أيهم : لَـذه انتِ لسا هنا ؟؟
مُلاذ : اي
أيهم : شصاير ؟
مُلاذ : انسى بعدين احجي الك
أيهم خلي اهلهن يدخلون بس يشوفوهم بخير
و يطلعون ترا هيج يظل محروك گلبهم
و ما مرتاحين
أيهم : ما يصير لازم يرتاحن
و هنه اصلاً معرضات للامراض هسه
و اهلهم لا معقمين و جايين من برا
لازم يستقر وضعهن و نعالجهن يلا يشوفوهن
مُلاذ : اي ما رح يكعدون يمهن
مجرد يشوفوهن
سكت يدحگلهم المره تبجي
و الرجال يصبر بيها
أيهم : انتظريني هنا
هزيت راسي بـ قبول
راح الهم يحاجيهم كامت المره بسرعه
و هو اخذهم و دخلهم لـ الغرفة
كاعدة و صافنه مر ولد من كدامي
ورا بنية تمشي سريع تريد تلحگه
-ألياس أليااس
فززت مسامعي بهتت تعابير وجهي ادحگلهم
و هو وكف و اندار الها مبتسم
رفعت نظري دحگتلهم ، غمضت عيني حيل
- امشي ع كيف كل رجل شطولها
- و الله طلع لسانج الا اگل لـ ابوي عليج
- ألياس حباب بطل تمشي سريع
- يلا امشي امشي
- ألياس
- هااا
- شبيك تصيح ، اسمع خل نروح نشتري لفات
اول و الله متت من الجوع
-مو ألياس شوفير الخلفوج ام راس
دمغها على راسها بـ خفه و هي ضحكت
حضنت ايده و راحوا مبتعدين عني
خليت ايدي على كصتي ، مسحت وجهي
احس الغصة ، انزرعت بـ بلعومي
اذا ما اتعالجت و متت شلون؟
شلون و انا ما شايفة كبرك
و لا منفذة وعدي الك شلون يا روح مُلاذ ؟
دليني على طريق دليني مثل لمن جنت صغيرة
علمني و راويني الصح من الغلط يا روحي
فتطع تفكيري لمن اجاني اتصال ، جاوبت
مُلاذ : الو
- الو مُلاذ
مُلاذ : ملاك شكو؟ رقمن هذا ؟
ملاك : انا طلعت و منتظرتج تاخرتي كلش
فرغت المدرسة بس انا واكفه
مُلاذ : يوووو نسيتج جايتلج
ملاك : تمام انتظرج
مُلاذ : اكعدي بـ المدرسة لا تطلعين للشارع
ملاك : تمام
دحگت لـ الغرفة و لـ التلفون
ما مقسوم الي احجي الك لو شنو السالفة
طلعت من المستشفى و رحت لـ مدرسة ملاك
نزلت من السيارة ، ادور ملاك صاحلها الحارس
اجتني بسرعه
مُلاذ : اتاخرت عليج ؟؟
ملاك : اي نسيتيني ؟
مُلاذ : بالغلط جان عندي شغل و الله
ملاك : لا عادي
راحت صعدت بـ السيارة
و انا هم صعدت ، درت عيني دحگتلها
مُلاذ : اي ما سولفتيلي شصار بالدوام؟
ملاك : ست صعقه تشمر عليه
مُلاذ : عابت للاسم صعقة
منو يسمي صعقة ، شبيها وياج؟
ملاك : و الله مُلاذ منقصتني
كعدت تبجي ع درجتها و تحجيلي
مُلاذ : لا تبجين سولفي بدون بجي
شبيها وياج انا باجر اجي وياج اطيح حظها
ملاك : منقصتني 3 درجات ع كلمتين
كلمتين منقصتني 3 درجات
و لان عندي نقص بـ جملة
منقصتني اربع درجات و تكلي املائج غلط
منقصتني هم اربعه
ملاك : و الله اقارن ورقتي وي البنات
كلهن منطيتهن صح الا انا تگلي استحقاقج
بـ كل الدروس درجتي ما تقل عن الـ90
بـ الانگليزي الماكو اسهل منه اخذ 89؟؟
مُلاذ : خاف عدج بعد غلط ؟
ملاك : لا كله صح و قارنت وي البنات الشاطرات
كل درجاتهم تسعين رقية عدها املاء غلط بـ 4 كلمات منقصتها بس درجتين
و عدها سؤال ما مجاوبته منقصتها ثنين
و كلمة غلط منقصتها درجه ، لان تحبها
مُلاذ : حبتها حيه المصعوقة
معليج باجر اروحلها و اعلمها
مسحت دموعها ساكته
انطيتها مي شربت ، دحگتلها مقهوره
وكفتها يم محل نزلت اشترت و اجت
ملاك : سلطان ليش صار ما يوصلني ؟
شغلت السيارة و حجيت
مُلاذ : انا ما اخلي
ملاك : ليش ؟
مُلاذ : احسن ، جاي يتمادى وياج
ملاك : لا و الله كل شي ما مسوي
مُلاذ : ملاك انتِ بعد مو صغيرة
و انا افتهم عليج و انتِ تفهمين عليه
ملاك : اي
مُلاذ : سلطان تدرين بي يحبج
و انتِ مو فارغه ادري بيج انا
انا ما اريد هسه ترتكبين فد غلط
اعرفج ما تغلطين بس بالج يظل ويا
و تلتهين عن دراستج و حياتج
و هالشي يضررج كلش بعدين
مُلاذ : امي جاي تشك من تسمعج تحجين بي
اكثر من مرة اجتني گلتلي مُلاذ دربالج على ملاك
ملاك : امي ما تثق بيه؟
مُلاذ : لا فهمتي غلط امي تثق بيج
بس تعرفج فطيرة و على نياتج انتِ
اذا واحد يشتريلج نستله تحبي
ضحكت و انا دحگتلها
ضحكت على ضحكتها و كملت
مُلاذ : و تعرفني انا شنو
تعرف لساني و تعرف ما انطي لـ احد مجال
لذالك من جنت صغيرة جانت ما مخليه بالها هلكد
تدري بيه ايدي و الكفخه و صوتي شعلوه
بس انتِ مو هيج فـ هي وصتني عليج
و انا قبل لا توصيني عليج انا ماريدلج شي ياذيج
ملاك : بس سلطان ما ماذيني
مُلاذ : التفكير بي ياذيج
يخليج ما تركزين لا بـ دراسة و لا بـ حياتج
كل عقلج يصير يمه و هالشخص اليوم هيج سوالي و هيج انطاني و تفرحين بـ اصغر تصرف منه
بحيث تظلين ٣ ايام حاصرة روحج بالموقف
ابتسمت ملاك ساكته
ملاك : احسج هيج صار بيج وي أيهم
ابتسمت ابتسامة ظاهره اسنانه
مُلاذ : انجبي
ضحكت ملاك بـ صوت و انا ضحكت
مدري شبيه طك عدي عرج المستحه فجأه
ضربت ايدها بـ خفة و ضحكت اسكتها
ملاك : و الله شلون تزوجتي لسا مستغربة
مُلاذ : سوالي سحر
ملاك : هههههه يم ام عباس
ضحكت بـ هدوء وصلت ملاك لـ البيت
رحت جبت مسواك و رجعت
دكيت على امي اخذته مني و دخلته لـ البيت
طلعت من يمها خابرتني صافي
صافيناز : ولِك وينك شو قصتك انتِ؟
مُلاذ : يووو صافي نسيت اكلج سدي المكتب
صافيناز : بالله؟ و انا هون جبت مندي
و منتظرتك تجي بناكل سوا و الله انك ما بتستحي
مُلاذ : نسيتج اكلي بالعافية
صافيناز : عابتلك سَكري سَكري
باخذ الاكل و بروح اكل مع بابا احسن
انا صوكي انتظرك
مُلاذ : صوكي هههههههه
صافيناز : ما عليكِ انا و العراقي بـ نحلها
انتِ روحي عابتلك و الله ماني ماكله معك مره ثانيه
خليكِ تاكلي وحدك
مُلاذ : لا صافي لا شهالقسوة
صافيناز : عابتلك سَكري عابتلك
مُلاذ : هههههه عابتلك انتِ
سديت الاتصال منها
خابرت لـ أيهم ، گال رح يبقى بـ المستشفى
مُلاذ : تمام
رحت اخذت أبيل من الروضه
وديته لـ المحل نزلنا نشتري
درت عيني لمن سمعت صوت من وراي
- ست مُلاذ
دحگت لـ اخر شخص توقعت اشوفه هنا
و أبيل فوراً ضم روحه وراي ....
هتان :-
أيمن ما موجود بالبيت ، امي تخابرة ما يجاوب
اجا باهر و بقى يمنا ، خابرنا لـ أيهم گلناله
سد التلفون متنرفز و معصب ما نعرف شكو
اتقدم باهر حضنني ، ابنه أدهم
نايم بـ حضن غاده و امي تحضر السفرة
هتان : كلش مشتاقتلك
باهر : شبيها هتانيزو ضايجة؟
هتان : هتانيزو ما بقت هتانيزو صارت هتان
باهر : لا لا هتانيزو دوم رح تبقى هتانيزو
ابتسمت ادحگله ، و هو باس خدودي
سولفتله على اخير مره اجا بيها ابوي و يلي صار
باهر : ليش ما خابرتوني ؟ و لا گلتولي
هتان : امي ما خلتني
كالت هسه يخاف علينا خلي وي مرته و ابنه
باهر : لا هتانه اي شي يصير خابريني
و هسه أيمن الادبسز وين؟
هتان : ما اعرف
باهر : و الله هالولد يجلطني تاليها
طلعاته العوجة هاي شوكت يبطلها
هتان : امي قلقانه هيج
تعرف أيمن عنده حس الانعزال
لازم يكعد وحدة بـ فترة بس هم تخاف
باهر : حقها هو أيمن عاقل
هتان : محد بينا عاقل كلنا مخابيل
باهر : صدقتي و الله
ابتسمت ساكته
رفعت تلفوني لمن اجاني اشعار
دحگت من حساب غريب مكتوب "سلام"
جاوبت بـ استغراب "سلام ، منو؟"
رفعت راسي لمن صاحتني امي
سديت التلفون و رحت الها
لـ الليل اجانا أيهم وحدة
امي : ما جاوبك أيمن ؟؟
أيهم : جاوبني الچلب
رايح وي صاحبة يشترون سيارة عود
امي : هسه يا امي
ليش ما يگللنا و لا يجاوبني
و احنا نحجي اجا اتصال لـ امي
اخذت تلفونها و گالت : ابن حلال
حجا أيهم متنرفز
أيهم : ابن نعال مو ابن حلال
فتحت الاتصال تحاجي
و أيهم يأشرلها افتحي الحاكيه
و هي ما تعرف ظلت تدور ، فتحتها انا
امي : شوكت ترجع؟
أيمن : ما اطول
امي : ما گلتلي تخليني قلقانه عليك
أيمن : اريد اشوفج تحبيني لا؟
امي : اكو ام ماتحب ابنها
شهالحجي الماصخ؟
أيمن : گلت خاف يعني ، اگلج يمه
امي : ها حبيبي
أيمن : انه احبج يمه
اتفززن نظرات امي و هو حجاها بـ نبرة
خلت امي دمعتها بـ طرف عينها
امي بس تدور سبب تبجي عليه و هسه لگت
امي : حبيب گلبي انت شعندي غيرك
أيهم : خااايس تحبها مو ؟
دتعال اذا ما ازوركك
أيمن : قل اعوذ بالله انت منين طلعت ؟
أيهم : الخايس انه اعلمك تروح بدون ما تگلي
دحگت لـ غاده تضحك ابتسمت
باهر : و الله ثنينكم خياس
و لا واحد بيكم بي خير ما تخابرني اجي انه
طالع من زرف الحايط لو مو اهلي ؟؟
أيمن : اااا هاي شني ابو ادهم هم يمكم
شلونك عيني ابو أدهم ؟ عاش من سمع صوتك
باهر : انجب چلب بالچذب ما تخابرني
أيمن : يبوي عليج يا مليحه يالماكعد حظج
و الله اخابرك بس انت ما تجاوبني
كاعدلي وي محامي و انه مجرم
عكدنا حواجبنا مستغربين
و باهر ضحك
أيهم : دتعال خل اراويك الاجرام شلونه
أيمن : هههههههه حبيبي ابو أبيل
كلكم ابهات بس انه
هتان : انه ادورلك مره لا تخاف
أيمن : مره و من عندج ما اريد
هتان : و الله مو صوجك
أيمن : دولي مثل ودق عطوبها حمر
و تجيني تركض هي و عطوبها حبيبي أيمو
عابتلج و عابت لـ أيمو ع هالقسمة الزفرة
أيهم : أيمو تعجبه صوصي
أيمن : جؤ جؤ جؤ ما اسمحلك
ضحكت انا و غاده تضحك
و صوت أدهم كام يبجي
أيمن : حتى أدهم يمكم الله اكبر عليكم
صارلي شكد كاعد و لا سويتولكم لمه
من رحت انه التميتو تدرون بيه احب اللمات
أيهم : ما نكعد وي الچلاب
سكت شويه أيمن و گال بـ نبرة ضايجه
أيمن : أيهم
أيهم : خير
أيمن : الله يساعد گلبك حبيبي
عكد حواجبه أيهم مستغرب
و أيمن سد الاتصال
أيهم : هذا شبي ؟
باهر : يتشاقى
أيهم : لا ما سمعت نبرته شلون؟
باهر : يتشاقى ما تدري بسوالفة
سكت أيهم مستغرب
گال لازم يرجع لـ المستشفى ودعنا و راح
و هو طالع خابر على واحد سمعته يحجي
أيهم : الو مازن ...
اختفى صوته لمن ابتعد عنا
درت وجهي و خليت ادهم بحضني ابوسه
كعدت غادة يمي
هتان : مشتاقتلج غدوز
غاده : انا هم و الله
بس أدهم ما يخليني احك راسي
ينام ساعه و يكعد يبجي
هتان : الله يساعدج
ابتسمت
غاده : أيمن هيج يطلع و يروح دوم؟
هتان : اي
غاده : احس باهر يختلف عن أيهم و أيمن
يعني ما يتعارك و هادء
هتان : انه گلتلج من قبل
هواي جانت تصير مشاكل بين أيمن و أيهم و بابا
بس باهر يخاف على امي كلش
فـ بقى الشخص الوحيد يلي يبعد عن المشاكل
علمود امي و حتى ما تبجي و تتاذى
غاده : اي
هتان : هم تلاثتهم كل واحد عندة شخصية
باهر هادء و حباب و حنون كلش
أيمن شخصيته غامضه اكثر شي و يشاقي
يعني انه اخته اكو اشياء ما اعرفها عنه
و دائماً يذبله كلمه شكبرها و يسويها بـ ضحك
اما أيهم فـ هو كُتلة الغموض و العصبية و الحنية
جامعهم كلهن سوا ، هواي اشياء عده غريبة
غاده : مثل شنو؟
هتان : يعني مره لكيته حاط كيكه بالحديقة
و يگول عيدك بالجنة و نفخ الشمعه
وراها كام يبجي و روحه جانت محروگه
هتان : لو جان على طول عنده صور يعاين الها
او دائماً جان يتعارك وي ابوي
و من يشوفه يمنا يتخبل ، أيمن مثله
جان يمنعني اطلع بـ وجود ابوي بـ البيت
ما جنت اعرف ليش و بعدني ما اعرف
غاده : زين لحظة ابوج ليش ما عايش وياكم؟
احس علاقتكم مو قوية بي ابد
هتان : هذا بيت أيهم
و أيهم يكره بابا فـ طاردة منا
و بابا اساساً يسافر هواي فـ مو دائماً يمنا
و أيهم عنده كم بيت يشتري و يبيع
غاده : حتى بالعقارات يشتغل أيهم
هتان : ههههه اي
ابتسمت غاده
غاده : زين من ما صرتي ولد مثلهم
لان العيشة وي 3 زلم و انتِ البنية الوحيدة
احسها تكمش الانوثة و تضربها دفرة
هتان : هههههه اي و الله
بس الاصعب اذا اخوانج الـ 3 شافوا واحد يمج
غاده : يعني؟
هتان : يعني مره جنت بالمرحلة الاولى
ف اتفقنا انا و أيهم و باهر و أيمن نطلع سوية
ف همَ طبعاً راح يجون سوية و لان أيمن مو دوم يمنا جان دائماً بـ الخارج يدرس
غاده : اي
هتان : فـ اكو ولد اسمه مُصدق
و يا طلابة مُصدق كل يوميه يوگفلي يم القسم
لحد ما اطلع من الكُلية هو يفتر وراي
و يگلي "هتان احبج"
هتان : انه اتنرفز اتنرفز حيل من هالنوعيات
اروح للنادي يلحگني اروح للمحاضرة يلحگني
لك يابه هاي مو مكانك اطلع من يمي
لا يظل لازك يمي و جان يجي و ينطيني وردة
و منو شافة؟
غاده : أيهم و باهر و أيمن
هتان : بالضبط التمولج ع الولد
شككو ملابسه عليه و اجو الحراس يركضون
و سجنوهم و الولد سنه مكسور
و اصبعه دايسين عليه و باهر عود هو محامي
كاموا سجنوا و انه اركض منا و منا
تالي رحت اتوسل بـ مُصدق يسحب شكوته
و سحبها كام يشوفني منا يدير وجهه منا
غاده : ههههههههه يستاهل
شهالملحه عاد لازم تصير اله لوية اذن
هتان : لا و نوب الزم بـ باهر اريده يعوفة
اگله انت محامي يگلي هيج من الخلفج
و الخلف المحامي اروح لـ أيهم اگله انت دكتور
يگلي هيج من الدكتور و من شهادته
اروح لـ أيمن اگله انت طيار
يگلي اي راح اطير روحه هسه
غاده : يمه متتتتت عزززززه
ضحكت على ضحكها
كامت ترافس من الضحك ، اجا باهر كعد يمنا
صافن علينا و يضحك ما مفتهم ، سولفتله
كعدنا نسولف لـ غاده عن مواقفنا
و هي فحطانه من الضحك
مُلاذ :-
درت عيني لـ أبيل امسح على شعره
رجعت عيني على ابو أيهم
مُلاذ : اتفضل؟
- شفتج صدفة اجيت اسلم عليج
مُلاذ : اهلاً بيك ، اجيت اشتري لـ أبيل انا
اتقدم يريد يحضن أبيل
و أبيل بسرعه ابتعد ، حكيت حاجبي و ابتسمت
مُلاذ : طفل
- طبعاً بـ النهاية الاطفال يتعلمون من ابائهم
و هو صار يخاف مني لمن يشوف تعامل ابو وياي
هزيت راسي ساكته
درت وجهي ، ادور على النستله اليحبها أبيل
احاول اتلافى ابو أيهم لان أيهم يصير عصبي
اذا عرف ابو يمنا و انا محاجيته و السبب مجهول
هو هم وكف يشتري من يمي و حجا بـ تساؤل
- ست مُلاذ ردت اسألج من زمان
تسمحين الي اروي فضولي هههه؟
مُلاذ : اي اسأل عادي
- والدج وين ؟
دحگتله و درت عيوني
حجيت و انا اخلي الاغراض بـ السلة
مُلاذ : متوفي
درت وجهي دحگتله
رفع حواجبة بـ دهشة
- اوووو اعتذر جداً منج ، الله يرحمه
ما جنت رايد اذكرج
مُلاذ : لا عادي
- اذا ماكو مانع بعد سؤال؟
زفرت نَفس احاول اكون هادئة
مُلاذ : طبعاً اتفضل
- شلون مات ؟ و اذا هالشي يقهـ...
قاطعته قبل لا يكمل
مُلاذ : كتلو كدام بيتنا
رفع حواجبه مصدوم
-كان عنده عداوات ؟
مُلاذ : ما اعرف
-ما دورتي ؟
رمشت بـ عيوني و اتحمحمت
مُلاذ : انا مستعجله و لازم اروح
اعذرني بس ان شاء الله على غير مره
عبرته و مشيت استوقفني لمن گال
- ست مُلاذ
درت وجهي دحگتله و أبيل لازم ايدي حيل
ابتسم ابتسامة ظاهره اسنانه و حجا
- اتمنى من جوف قلبي تجتمعون بالجنه
حجاها بـ طريقة دحگتله بـ استغراب
و فوراً صفك ايد بـ ايد و گال
-طبعاً الج طولة العمر بس المقصـ..
قاطعته قبل لا يكمل هزيت راسي بـ قبول
مُلاذ : شكراً الك
درت وجهي و اخذت أبيل
رحنا نحاسب ، اخذت علاكة الاغراض شلتها
انداريت لمن حسيت ايد لمست ايدي
اتحركت مرعوبة ، متراجعه لـ ورا
تعثرت خطواتي وكفت بـ صعوبة
دحگتله ابو أيهم
و الناس التفتو يدحگولنا بـ استغراب
- اعتذر رعبتج بس كل نيتي اساعدج
و اشيل العلاليك وياج
غمضت عيوني متنرفزه ، يا ربي انطيني الصبر
اليخليني اطلع منا و انا هادئة
مُلاذ : لا شكراً السيارة قريبه انا اشيلهم
هز راسه بـ قبول و على ثغرة ابتسامة
من عرفت هو جان يضرب ام أيهم
صرت ما اتعاطف ويا
لمن اشوف تصرفات أيهم ويا
و انا طالعه صار فلاش عليه اتلفتت مستغربة
ماكو احد فاتح فلاش ، رجعت نظري ع الجهه المقابيلي هم ماكو احد بـ ايده ضوا أو فلاش
درت عيني دحگت لـ ابو أيهم يلوح الي بـ ايده
سويت نفس الشي صعدت أبيل بـ السيارة
خليت الغراض يمه و صعدت انا هم
شغلت السيارة و رجعنا لـ البيت
عيوني مشوشه طول الطريق و احس روحي تعبانه
اول ما رجعت ، رحت اول شي على اهلي
سلمت عليهم و صعدت نومت أبيل و بدلت و نمت
ما اريد افكر بـ اي شي
كعدت ثاني يوم الصح
اخذت أبيل لـ الروضة و ملاك لـ مدرستها
طلعت لـ المستشفى اشوف أيهم
و هاهيه رح احجي اله وراها احجي لـ اهلي
دخلت المستشفى رحت لـ غرفة أيهم ادورة
طلعت من غرفته دحگت لـ ممرض
سألته عن أيهم گال ما يعرف
شفت الممرضة أسيل و سألتها
أسيل : انا هستوني جايه من يم الدكتور
تعالي اخذج اله
اخذتني و رحنا انا وياها لـ أيهم
دكيت باب الغرفة و دخلت
دحگت لـ أيهم واكف يم البنية الصغيرة
يلي اسمها "هند"
طلعلها من جيبه كيكه و يگللها
أيهم : هاي المن ؟
فتحت عيونها هند و اتسعت ضحكتها فرحانه
البنية تدحگلهم مبتسمه ، اتشكروا منه الاهل
اتقدمت أسيل ، تحاجي أيهم اليدحك لـ الطفلة
أسيل : دكتور اجت زوجتك
التفت أيهم دحگلي
اتقدم ناحيتي مبتسم
أيهم : لَـذه
ابتسمت و سلمت ع الگاعدين
ردوا الي السلام ، دحگت لـ أيهم
مُلاذ : ردت احاجيك
و انا احجي گال ابو البنية
-دكتور الشرطة يجون لـ هنا مو؟
أيهم : يجون
دحگت لـ البنية تكرص بـ ايدها
غطت وجهها و تمسح بـ دموعها
دحگتلها و رجعت عيني على أيهم
همست بـ صوت ناصي
مُلاذ : أيهم اتوقع البنية خايفه
دار عيونه الها و هز راسه بـ قبول
أيهم : يريدون يشتكون
و البنية خايفة يصيرلها شي
مُلاذ : دحك اخذ اهلها طلعهم
خلينا بس انا وياها
رفع حاجبه و انا اندسه بـ معنى "يلا"
فعلاً طلع حجه لـ اهلها و لـ البنية الصغيرة
طلعهم كلهم من الغرفة بقاني بس انا وياها
گاللهم انتوا ابقوا برا حتى ترتاح المريضة
و خل نفر البنية الصغيرة شويه حتى ما تضوج
و همَ فوراً اقتنعوا و وافقوا
دحگتلي البنية بـ استغراب
اخذت الكرسي كعدت يمها
- بس الدكتور برا
مُلاذ : اعرف اجيت احاجيج الج
-منو انتِ؟
طلعت هويتي اراويها و احجي
مُلاذ : انا المحامية مُلاذ
دحگتلي ساكته و انا كملت
مُلاذ : اتوقع انتِ جنتي مخطوفة؟ و اختج هم
هزت راسها بـ قبول و بجت
كملت كلامي
مُلاذ : قبل سنين انا هم جنت بـ مكانج
دحگتلي ما فاهمه
مُلاذ : يعني انا هم انخطفت
و جنت بـ نفس الوضع تماماً
و اختي مخطوفة وياي
حكيت حاجبي و كملت
مُلاذ : شكد الفترة الانخطفتي بيها؟
- شهر و نص
مُلاذ : انا قرابة السنتين
وسعت عيونها مصدومه
و انا كملت
مُلاذ : خطفوني عصابة و باعوني
و خلوني اشتغل كـ رقاصة بـ ملهى
و اختي وياي يهددوني بيها
مُلاذ : لمن لگيت حل حتى ارجع لـ اهلي
و اقتربت من طريق الحريه
رموا عليه رصاصتين بـ بطني
و جنت متوقعه رح اموت ، بس عالجوني
و العالجني الدكتور أيهم
- زوجج!
مُلاذ : اي ، اشتكيت على الاعصابة
و هواي ناس نقذوهم مناك و طلعوا
بعد ما ظلمت الدنيا بـ عينهم
اشتكيت عليهم بدون ما ارتجف ذرة
و بعدني ما لگيت رئيسهم بس رح الگا
مُلاذ : على كُلاً اذا ما اشتكيتي
و انتِ تعرفيهم همَ منو و وين مكانهم
رح تكونين سبب بـ خطف
بنية ثانية و ثالثة و رابعه و الاعداد في ازدياد
مُلاذ : لذالك حلي الامر من جذرة
اذا تريدين اصير محاميتكم مجاني او بـ فلوس
ما يفرق يمي اشتكي عليهم و انا بـ كل خطوة
رح اكون وياكم فكري زين و اتصلي بيه
خليت الكارت يلي بي رقمي يمها
كمت و انا ألبس جنطتي ، حجيت
مُلاذ : عندج العافية
هزت راسها ساكته و الدموع متحجره بـ عيونها
طلعت من يمها دحگولي اهلها بـ استغراب
و انا عفتهم و رحت ادور أيهم
لحد ما لگيته حجيت بسرعه كافي طلعت روحي
مُلاذ : أيهم انا مر...
بعدني احجي و اجاني اتصال
زفرت نَفس بـ عصبية شنو حالفين ما احجي !
اخذت تلفوني اريد اغلقة
اتوقفت لمن دحگت لـ رسالة جايتني من أيمن
أيمن : تعالي انتِ و أيهم
اريد احاجيكم بـ شي مهم
اجت رساله لـ تلفون أيهم
رفع راسه دحگلي بـ استغراب درت تلفوني اله
مُلاذ : شكو ؟!!
أيهم : شنو شيريد يحاجينا هذا ؟
رجعت اجت رساله مره ثانية
أيمن : يخصكم ثنينكم مهم
و أيهم نفس الشي وصل اله
عكدنا حواجبنا مستغربين
و دازلنا المكان همين و كاتب انتظركم
خابرنا عليه ما يجاوب ،
معقولة رح يگول لـ أيهم على مرضي !
دحگت لـ أيهم يلي اتجهه نحو السيارة بسرعه
يسب بـ أيمن و يخابر عليه ما يجاوب
مُلاذ : شكو أيهم ؟؟
أيهم : و الله اذا طلع علمود سالفة تافهه
اذا ما اطيح حظه و انعل والديه
مُلاذ : شنو شي يخصنا شكو ؟؟
أيهم : هسه نعرف
سقنا لـ مسافة طويلة ، بحيث صرنا نعبر اللافتات
دحگت لـ أيهم بـ استغراب
و تعابيرة ما تفرق عن تعابيري فتح تلفونه و اتصل
أيهم : مازززن هذا أيمن شبي ليش ما يجاوب؟؟
مازن : مو يمي هو
أيهم : ابن الكلب أيمن ابن الستين كلب
سد الاتصال من مازن متنرفز
أيهم : لاااازم يخليني اطيح حظة لازم
مُلاذ : خل نفتهم شكو؟؟
أيهم : شنو الي يخصنا شنو الي يخصنا
و يدز الرسالة النا ثنينا تعاال و خابرنا و احجي
كام يفشر متنرفز من أيمن
انا ساكته خايفة يقصد مرضي
و راح يحجي لـ أيهم ، الطريق كله ساكته
خابر أيهم على باهر گله ياخذ هتان و أبيل
يوديهم لـ بيت اهله و سد الاتصال
وكفنا لمن وصلنا لـ المكان
نزلنا ندحك و ندور على أيمن سايدين فارغات
وكفت اتلفت بـ مكاني
أيهم : أيمن أيممممن لا تحرك اعصابي
ماكو احد المكان فارغ
اكو حاجز بين السايدين عبرته و انا ادحك
درت وجهي لـ أيهم و حجيت
مُلاذ : أيهم ماكو احد هنا المكان فارغ ؟
درت عيوني بـ استغراب
دحگت لـ الكاع عليها تلفون
درت عيني لـ أيهم الفزز عيونه عليه
و صوت سياره قريب
سمعت صوت أيهم و هو يصيح
أيهم : أيمممن شبيك أيممممممن؟
درت نفسي اريد اشوف أيمن
و بـ لحظتها صاحوا ثنينهم بـ اسمي
ركض أيهم و أيمن قبله عبروا الحاجز
بعدني ما فاهمه شي
اندفعت بـ قوة و ارتطمت بـ الگاع
خليت ايديه كدامي انداريت بـ فزع
وسعت عيوني مصدومة ، جمد جسمي
لمن دحگت لـ أيمن يلي انرفعت ركبات رجلية
ايديه مفتوحه انضربن و انضرب صدرة
بـ شاحنه جبيره
انشمر لـ فوك و انضرب بـ الگاع بـ قوة
و الشاحنه داست عليه و عبرت
فاتحه حلگي و عيوني بـ وسع مصدومه
و جسمي جامد ما اكدر احرك لا ايدي و لا رجلي
رفعت عيني لـ أيهم يلي طاح على رجليه
و ايده على صدره عيونه مفتوحه بـ وسع على أيمن
رجعت عيني على أيمن يلي مفتح عيونه
و الدم يسيل من حلگه و من كصته
وجهه كله كدمات ،
لحظات هي لحظات و انا اريد اوصل اله
رفعت عيني لـ أيهم من صاح بـ صوت عالي
أيهم : ايممممممممن
يريد يروح اله و ما يكدر رجليه ما تعينه
جره من ايده يريد يوصل
و انا اريد اوكف ما اكدر ،
كمت ازحف بس اريد اوصل اله
دحكت لـ أيهم يكوم و يوكع يريد بس يوصل
وكع على ركبه يم أيمن جر راسه خلا بـ حضنه
يشهك و يحجي
أيهم : أيمن أيمن ابوس ايدك
لزم ايده باسها و يبجي
حجا أيمن بـ صعوبة
أيمن : ام...امك انه اح.. احبها ... و الله
روحي تكطعت و انا اشوفه يحجي گوه
مُلاذ : أيمن أيمن لا تگول هيج
اندار دحگلي ابتسم و حجا يهز راسه
و يحجي بـ صعوبه و حلگه بكل مره يندار
أيمن : رح ...صي...صيرين زينه
مر... مرة ..اخوي ..اعرفج
يحجي بـ صعوبة و أيهم يبجي و يحاجي
ابتسم بـ صعوبه يحجي
أيمن : حبيب... حبيبة رو.. حبيبة روحي
در... دربالكم ... عليها
انعادت لحظة لحظة كدامي مثل موت ابوي
اريد اسكته اريد ابقي عندة نَفس
و هو يوخر ايدي و يحجي بـ صعوبة
أيمن : لا ... تگل.. تگلولها .. ترا تب.. تبجي
لا.. لا تبج .. تبجوها .. حبيبة ... روحي .
طلع دم زايد من حلگه
ايديه طاحن ، عيونه ظلت مفتح ع السما
و أيهم لازم بي حاضنه و يبجي بـ حرگه
صاح أيهم لمن شافه سكت
أيهم : أيممممممن أيممممن
أيمن عاينلي أيمن حبيبي ابوس ايدك عاينلي
هاي شبگتك شبگتك و الله مو ردت اشبكك
شبگتك هاي انه شابكك أيمن أيمممن
دك على خدة يصيح و يبجي
و أيمن ... أيمن مفتوح عيونه بدون ما يتحركن
جسمه الجامد و الدم مستمر ينزل من حلگه
خليت ايدي الترجف على مكان النبض
اتوقف نَبضه مُعلن مَوته ...
كُتِـب في حق الأيمن :-
"أنه الـمَا شَم عطر أمَـه
انه الـمَات وانهِدَر دمَـه
أنه المعذَب الـما شايَف مَحنَه
انه الدوم ظليت بـ وسَط أزمه
انه الروحَيّ نار تضَوي بـ الظَلمه
انه الـمُجرم الـمَشبوه
علَه أُمي أدور بـ كل الوجوه ،
ألـ ماعنده أم فَلس مايسوه
و ينچوي من يسمع كلمة الـ يـمـه
فَاگد امي انه ، دنياكُم ولا تهمني
التعب خذه ثلثين الحيل من حيلي
كلمن يگول ياروحَيّ و انه أردف بـ أمي
حَسيت بـ وجَع يوم الطحَت بـ الگاع
و ما صاحتنَي أمي و گالت أسم الله
انه الـ مَا نام يوم بـ حَضن أمه
انه الـ روحَي نار تحرگها من جَوه . "
- زينَب أسعَد ، أيلان .
- يتبع الفصل التالي اضغط على ( رواية جرح الأيهم ) اسم الرواية