رواية جرح الأيهم الفصل الخامس و الاربعون 45 - بقلم أيلان
" الجُــرح الخامس و أربعون"
مُلاذ : بيش الساعه؟
أيهم : ما اعرف
صادف يوم جمعه و عندي عطلة
دحك أيهم بـ عيوني و يلعب بـ رموشي
مُلاذ : تعبانه
أيهم : اسم الله عليج من التعب
ابتسمت و هو حضنني لـ صدرة
مُلاذ : أيهم
أيهم : جَرحه
مُلاذ : البارحه ليش هيج سويت وي ابوك؟
أيهم : انه اكرهه و هو يكرهني
مُلاذ : لعد ليش كل ما تحجي
تگول وداعته اذا تكرهه؟
أيهم : اتشاقى وياج بس انتِ تصدكين
مُلاذ : لا ما اصدك بس اعبر الي تسوي
هواي اشياء ضام عليه انت
و هواي اكو اسئله بـ بالي
بس اعرف اجوبتك رح تحيرني اكثر
أيهم : عوفي كل شي يمشي حسب مجراه
رفعت عيوني دحگتله و حجيت
مُلاذ : أيهم
أيهم : امم؟
مُلاذ : ما مرتاحة
أيهم : ليش؟
مُلاذ : ما اعرف اكو شي ما مرتاح بـ داخلي
سكت ، رفعت عيوني ادحگله
نزلت نظري ع الفراغ و انا هم سكتت
مُلاذ : أيهم
أيهم : ها
مُلاذ : ليش عندك سلاح ؟
أيهم : گلتلج مال صاحبي
مُلاذ : بلا چذب ؟
أيهم : ما مچذب
مُلاذ : يعني بـ ذاك اليوم
الرصاصه الواكعه يم الباب لان سويت السلاح
و ردت تودي لـ صاحبك؟
أيهم : اي مو گلتلج
مُلاذ : ما اثق بـ كلامك
أيهم : اخابرلجيا ؟
مُلاذ : لا خابرته مرتين و سألته نفس السؤال
بس انا اوهوس من ورا چذبك گمت ما اصدكك
أيهم : انتِ الحقيقة الوحيدة بـ حياتي
مُلاذ : بس هم ما اريد تچذب عليه !
أيهم : ما مچذب عليج اتطمني
عوفي الچذب تعالي خل اراويج
مُلاذ : شتراويني ؟
اخذ تلفونه ، طلعلي صورة طفل
مُلاذ : منو هذا ؟
أيهم : علي
مُلاذ : علي؟
أيهم : ابن نارا
رفعت حواجبي و ابتسمت
مُلاذ : فدوة شكد حلوو
أيهم : أبيل يموت عليه
مُلاذ : يعرفه ؟
أيهم : اي
مُلاذ : لعد شعجب ما فاضحك؟
أيهم : ما يفضح بالسوالف الي بيها مصلحته
ضحكت و أيهم گال
أيهم : شوفي صورة خل اروح اكعد أبيل
هزيت راسي بـ قبول و هو كام من يمي
كعدت ادحك لـ صورة و أيهم ماخذ ويا صور
مصورله فيديو يلعب بالالعاب و امه طالعه بـ الفيديو
كلش حلوه ، شكلها يجذب و ملامحها لطيفة
و انا ادحك لـ الفيديو
رفعت نظري لـ الشاشه من فوك
لمن اجا اشعار لـ أيهم ، مرسول اله فيديو
و وراها اجا اشعار ثاني مكتوب
"فدوة لا تحظرني خل احاجيك"
دخلت على الاشعار بسرعه
دحگت صورة بنيه و مكتوب اسم مزغرف
دخلت ع الفيديو وسعت عيوني بـ صدمة عليه
عگدت حواجبي ، طلعت من الفيديو بسرعه
همست بـ عصبيه متنرفزه : لينا
ردت ارزلها بس اجت بـ بالي فكرة افضل
سويتها و بسرعه حذفت المحادثه
سديت التلفون خليته يمي ،
گمت اشوف أيهم وين
رحت لـ الغرفة لگيته يجر بـ أبيل من الفراش
و أبيل بعده نايم شاله و گام عبرني وداه للحمام
غسل اله يلا صحى
حجا أيهم و هو شايل أبيل و يمشي لـ الصاله
و انا امشي وراهم
أيهم : شفتي صوره؟
مُلاذ : اي كلش حلو
كعد على القنفه و نزل أبيل يعدل بـ ملابسة
و انا واكفه ادحگلهم ، اجاني اتصال
اخذت تلفوني من القنفه ، أيهم يدحگلي
أيهم : منو؟
مُلاذ : نور
رديت ع الاتصال
مُلاذ : الو
نور : مُلاذ عفيه مادري شسوي
مُلاذ : شكو شصار؟
نور : امي جايه لـ البيت
و عمتي موجودة بـ بيتنا
لان البارحة من رجعنا باتت يمنا
و طالعه الها عمتي تگللها اريد اشوف نور
مُلاذ ما اريدهم يعرفون بـ راكان
و انا هسه ماخذته لـ الصيدلية لان كعد مريض
مُلاذ : تمام لمن اخابرج ارجعي
لا ترجعين هسه انا رايحة الهم
نور : من الصباحيات اجيبلج مشاكل
مُلاذ : و الله عيب تخليني اغلط و انتِ اكبر مني
سكتت و انا سديت الاتصال
انداريت لـ أيهم لمن گال
أيهم : ها رايحة تتعاركين؟
ضحكت و گلت
مُلاذ : أيهم لازم اطلع
أيهم : شكو؟
مُلاذ : ايديه تحكني اريد اكتل واحد
فـ رايحة اكتل علياء و اجي
أيهم : علياء منو؟
مُلاذ : ام نور رايحة لـ بيتهم
عو عووود تريد تشوف نور بس هي جذب
ذاك اليوم بـ فاتحة عمي محمد شافت راكان
نور شايلته و كامت تحوص تريد تسوي مشكله
أيهم : مُلاذ كعدي راحة و عوفيها
مُلاذ : لا لا ما يصير خل اروح و اجي بسرعه
أيهم : ما تتاخرين !
مُلاذ : ما اتأخر
أيهم : ترا رح انتظرج ع الاكل
هزيت راسي بـ قبول
رحت غسلت و بدلت ملابسي
ضلوعي توجعني من نومة القنفة
طلعت من الغرفة ، شلت أبيل بسته حيل
أيهم : و انه؟
مُلاذ : ماكو
أيهم : مُلاذ يگولون لمن تحطين حمره
يموت رجلج ترضين تصيرين ارمله؟
مُلاذ : اي رجلي هسه خطية بالانعاش
لان حطيت حمره طگته جلطه
ضحك و اتقدم عليه بـ ايدة كلنس
خففتها و طلعت من يمهم
لگيت امي لابسه عبايتها و تمشي
جايه ناحية البيت ، وصلت يمي تدحگلي
مُلاذ : فيروز خيرج؟
فيروز : رحت اجيب منا ريوك ما عدنا
مُلاذ : و ليش ما تگليلي؟
فيروز : ردت اتمشى شويه ضجت من الگعده
انتِ وين رايحة ؟
ابتسمت بـ وسع وحجيت
مُلاذ : رايحة اتعارك
وسعت امي عيونها عليه
و انا رحت لـ جهة السايق ، صعدت
امي بدون نقاش صعدت وياي
فيروز : ويامن تتعاركين ؟؟
يمه مُلاذ تردين تخبليني
مُلاذ : هسه عرفتي ويامن رح اتعارك؟
فيروز : ويامن ؟
مُلاذ : وي علياء
فيروز : شنو شبيها علياء
سولفت الها مختصر
فيروز : و انتِ خابرتج نور حتى ترحين تتعاركين
لو حتى تلگين الها حل
مُلاذ : مشتاقة اتعارك يمه
صارلي هواي ما متعاركة
طلعت الحمره من الجنطة خليت على شفتي
اخذت مناظري لبستهم ، ابتسمت
اتوجهت لـ بيت نور و امي تدردم عليه
خابرت على ملاك حاجتها حتى ما تخاف وحدها
وصلت طفيت السيارة و نزلت
و امي نزلت وياي ، اتقدمت دگيت الباب
شويه و فتحت الباب عمتي
مُلاذ : بعدها جوا ؟
منارس : اي
عبرتها و دخلت
فتحت باب الصاله دحگت لـ علياء
هي و شعرها المعطب كاعدة ع القنفه
عبالك البيت بيتها ، تشبهه كل شي الا البشر
مُلاذ : ها علياااااء شخبارج شلونج؟ شكو ماكو ؟
علياء : اجت ام المصايب
ابتسمت و رفعت مناظري
ركصت الها حواجبي و حجيت
مُلاذ : ام مصايب و لا ام زلم
لطمت امي خدها مصدومة
علياء عيونها صارت بـ كصتها
علياء : ادبسز مااا متربييييه
مُلاذ : ديلا خليت التربايه الج
شفنا تربايتج لـ اسكندر شلونها
يسكر و يتزوج متعه و ينسجن و ينكتل
و متحرش و مجلوب ، علياء بس عدها شوارب
اجت امي يمي تسكتني
علياء : انتِ شتسوين جايه لـ هنا
يعني انا ما اخلص منج !
مُلاذ : دكووومي لج انتِ الشتسوين هنا
اجيت اطردج شعندي غير اطرد بـ الجلاب
فيروز : مُلاذذ
مُلاذ : فيروز هسه هاي هم خلقة بشر
علياء : جايييه لـ بيت بتي و ابني
يا ما متربيه ما عليج عتب لا اب و لا ام ربوج
مُلاذ : ترحين فدوة لـ تربايتي و لـ إلياس
ضحكت بـ استهزاء
علياء : ليش اروح اله فدوة
شو خلص عمره يتعارك و ما عرف يربيجن
و يركض ورا الـمـ ...
هي تحجي و انا نزعت الشال
و صرفنت رداناتي ، امي ما قبلت على حجيها
هي و عمتي ، بعدها تحجي و جريتها من شعرها
مُلاذ : دتعالي خل اراويج ترباية إلياس شلونها
كامت تصيح ، لزمت شعري تريد تملخني
و انا اطول منها حطيتها و كتلتها
من زمان گلبي محمل عليها
و امي و عمتي يصيحن يريدن يلزمني
لزمت حلكها و لويته بـ اصابعي
مُلاذ : و الله اذا جبتي اسمه على لسانج القذر
اكصه لـ لسانج و اخلي بـ ايدج ام الزلم الوصخه
لزمتني امي توخرني عنها
و هي شعرها كفش وخدودها حمر
وخرني عنها و هي تصيح و تتوع
ردت ارجع عليها
بس امي و عمتي ثنينهن لازماتني
راحت لـ الباب تصيح و رافعه اصبعها
علياء : ادبسززز ما متربيه
محد مربيج انا اعلممممج
اذا ما اخلي ابني يربيج
مُلاذ : طييييط دمشي لج لا اجيج
وصلت لـ الباب تريد تطلع
نست عبايتها طالعه بـ طرك الدشداشه
تيهت مشرادها حصرتني الضحكه
اجت وكفت كدامنا
عمتي و امي بعدهن لازماتني و يسكتن بيه
حجت بـ عصبيه
علياء : اريد عباااتي
دحگت عباتها على القنفه يلي يمي
حصرت ضحكتي و گلت
مُلاذ : بس توصلين يمي اكتلج
علياء : و خاااايفه منج انا
مُلاذ : يلا بَطله انتِ تعالي
اتدنت على كيف جرت العباية من طرفها
حركت روحي عود اروحلها
اخذت العباية و طكتها ركضه
حجيت بـ صوت عالي
مُلاذ : اذا شفتج هناااا بعد و الله اكتلج
اختفى صوتها عافني عمتي و امي
راحت عمتي و رجعت ميته من الضحك
منارس : عايفه الباب مفتوح و طالعه
ادحگلها تركض بـ الشارع جنها بطريق
انهاريت من الضحك
و عمتي ايدها على حلگها و تضحك
حتى امي المعصبه مني كامت تضحك
علياء قصيرة و شعرها برتقالي و قصير
واصل لحد اذاناتها و دشاديشها كبار عليها
ضحكني شكلها و هي تركض تريد تطلع
كعدت ع القنفه زفرت نفس
حجيت و انا اضحك
مُلاذ : ارتاحيت
دحگتلي امي معصبه و عمتي ما تكدر تسكت
كل شوية تگول جنها بطريق تركض و تضحك
گلت لـ عمتي تجي ويانا
لان البيت فارغ بس هي كاعده
ما قبلت گالت عزيز مخابرها و رح يجي
خابرت نور گلتلها ترجع
ودعنا عمتي و طلعنا ،
امي خلصت الطريق كله ترزل بيه
اتعاركنا انا وياها و رجعت ترزلني
لحد ما وصلت لـ البيت
اتلگانا أيهم يدحگلنا بـ استغراب
أيهم : خيرج خاله؟
فيروز : تگول زعطوطه شكدها و شطولها
ما تكدر تلزم لسانها طفله انتِ و تتعاركين !
مُلاذ : يمه شبيج و الله تستاهل
فيروز : اسكتي مُلاذ اسكتي
الحجي وياج ضياع وكت اروح احسن الي
اندارت لـ أيهم
فيروز : ما اكول غير الله بساعدك
عافتني وراحت
أيهم عگد حواجبه يدحگلي بـ استغراب
أيهم : شكو؟
مُلاذ : علياء گلتلي ام المصايب
أيهم : اي ؟
مُلاذ : و انا گلتلها ام مصايب و لا ام زلم
رفع حواجبه و انا كملت
مُلاذ : و كتلتها
رفع حواجبه اكثر و وسع عيونه اكثر
ضحكت بـ هدوء على نظراته
أيهم : عبالي تتشاقين من گلتي اتعارك !
مُلاذ : لا اناا ناويه اكتلها و اتعارك
فد ارتاحيت أيهم مي بارد نزل على گلبي
ضحك و حضنني لـ صدره
صعدنا لـ شقتنا دخلت
دحگت أبيل يدحك لـ التلفزيون
أيهم فاتح اله كارتون
رحت بدلت ملابسي و طلعت
أيهم يسوي ريوك ، اتقدمت كعدت ع الكرسي
أيهم : شسويتي لـ علياء بعد ؟
ضحكت و سولفتله
و هو يضحك وياي
أيهم : كامت تخاف منج
مُلاذ : و الله أيهم حصرتني الضحكه عليها
طلعت لـ الباب بدون شال و عباية
و رجعت وكفت بنص خازره عمتي
عود تسوي روحها ما خايفه تكللها اريد عبايتي
خليت ايدي على حلگي
و ضحكت بـ صوت
مُلاذ : النوب أيهم شايف ذني البطات الصفر
من يركضن تشبهن و الله
اندار يدحگلي يضحك
أيهم : لو مصورتها
مُلاذ : و الله لو بـ أيدي تلفون الا اصورها
تحجي على ابوي ام الزلم
اتقدم أيهم عليه
انا كاعدة ع الكرسي و هو واكف كدامي
وخر شعري عن متوني ، يحجي
أيهم : ختولي معليج بيها
مُلاذ : اليضحك عائلة احمد كلهم كاتلتهم
احمد طفيت عينة و اسكندر و علياء
و عزيز من جان صغير كتلته
بس نور كافية خيرها شرها
شوكت ما تشوفها تلكاها تبجي
أيهم : يستاهلون منچلبين على مرتي
ابتسمت و هو دنك باس خدي
و رجع باس طرف اذاني
حجيت و هوه بعده مدنك يبوسني
مُلاذ : بس عزيز حباب
جان صغير و ضوجني
و رحت لويت ايده و هو نايم
ضحك ايهم وجهه بـ ركبتي
سند ايده ع الميز يلي يمي ،
رفع راسه من رگبتي ، مال راسه من الجهه الثانيه
مشى اصابيعه من خدي لـ شفتي
أيهم : فوصه كلش انتِ
ابتسمت و هو تقرب باسني حيل
لزمت بـ زنده ، لمن ابتعد حجيت
مُلاذ : لاا تبوسني ادوخ
أيهم حباب انثول
ضحك و رجع باسني و انا اضربه
اتنرفز اظل مسطوره و صافنه
اول ما عافني دفعته و گمت
مُلاذ : اكعد يم أبيل احسن
انت ما ينكعد يمك
ردت اطلع من يمه
لزم خصري و قيدني
رفعت عيوني دحگتله
مُلاذ : لا لا ماكو
سديت حلگي و هو يضحك عليه
رفع ايديه حاوط ضلوعي
رفع ايده الثانيه وخر ايدي من شفتي و باسني
ظليت هادئه لحد ما وخر عني
أيهم : انسطرت الفوصه
لو البوس هيج يسطرج جان سويتها من زمان
دفعته و طلعت من المطبخ
رحت كعدت يم أبيل
لحد ما صاح النا أيهم حتى نتريك
شلت أبيل و رحت اله
كعدت ع الكرسي رفعت ايدي اريد اشد شعري
أيهم : انطيني
اخذ الگيتر من ايدي لم شعري
و شده ، دنك باس شعري
أبيل عينه ع الميز ما منتبه
راح اله و باس شعره ، رفع راسه مبتسم
أيهم : شو هادء اليوم مالك حس
أبيل : نعسان
أيهم : ما يصير تنام هواي
هز راسه بـ قبول
كعد أيهم و تريگنا خابرت نور حاجيتها
گالت رجعت لـ البيت هي و راكان و بعد محد اجا
نزلت دگيت الباب على اهلي
فتحت الي الباب شمس
مُلاذ : وين فيروز ؟
ملاك : بـ المطبخ تسوي غدا
مُلاذ : اشم ريحة دولمة
ملاك : من هاي التعجبج
ابتسمت رحت لـ المطبخ
مديت راسي
مُلاذ : شوف رفعة الحاجب
عرفت بيه اجيت ، فيروزة العصبية كلش كلش
سوت روحها ما تشوفني
رحت وكفت يم الجدر فتحته
مُلاذ : دزولنا ماعون
ملاك : سوت جدر ثاني يا ماعون
انداريت دحگت صدك مسوية جدر ثاني
مُلاذ : ههههههه تعرف سوالفي
لسا ما سويت غدا
ملاك : و الله زين عمو أيهم من ما يشكي
مُلاذ : عمو أيهم شني كون يسمعج
ملاك : لان چبير فـ اگله عمو
مُلاذ : لا عادي گولي أيهم
ما يهتم بهالسوالف هو
ملاك : نفس الشي
مُلاذ : هسه فيروز ترضين لو اروح اتعارك؟
اندارت عليه خازرتني
فيروز : شكد وصل عمرج
لـ شوكت تظلين تتعاركين ؟
مُلاذ : يمه يضوجوني ما يفيد وياهم
فيروز : مره بگد امج تحطيها تكتليها؟
مهما كانت تبقى مره جبيرة
مُلاذ : كتلتها بدون سبب؟
مو حجت على ابوي كدامج
فيروز : و انتِ كل اليحجي على ابوج تكتلي؟
مُلاذ : اي لا تدحگيلي هيج
يعرفون بيه اتخبل من واحد يحجي عليه
و يرجعون و يحجون عليه يستاهلون
فيروز : يعني من يحجون علينا
انا و ملاك تسكتين؟
مُلاذ : لا هم اكتلهم بس ما يجيبون طاريكم
خل يجيبون طاريكم و الله اطيح حظهم
فيروز : مُلاذ معليج بيهم
انا الاعرفة المحامي ما يتعارك هو اليحل العركه
بس ويين الحجي وياج ضياع وكت
مُلاذ : امي انا محامية
بس مو معناها امنع نفسي عن الكتل
هوايتي اكتل اليستاهلون الكتله
فيروز : طاحظج و حظ هيج هوايه
ملاك : امي طلعت عن صمتها
مُلاذ : ههههه عسل فيروز مقبولة منج
اندارت دحگتلي و انا گلت
مُلاذ : ضحكت ضحكت ضحكت
لحد ما صدك خليتها تضحك
هزت ايدها ساكته
مُلاذ : يلا تصاحبنا فيروز
خل ارجع يم رجلي ، وين جدر الدولمة
انداريت اخذته من الطباخ
فيروز : ديربالج لا تنجوين
مُلاذ : ما انجوي
فيروز : بالعافية
حجيت و انا امشي لـ الباب
مُلاذ : الله يعافيج
شكراً فيروز يوم الافرح بـ عرسج
عاطت امي بيه و انا ضحكت و طلعت
صعدت خليت الجدر ع النار و رحت يم أيهم
مُلاذ : امي مسويتلنا دولمة
أيهم : عاشت ايدها
وكفت كدامه دحگتله
مشيت اصابيعي على زندة
و هو يدحگلي بـ استغراب
مُلاذ : شنو رأيك تودي أبيل بليل يم اهلك
عكد حواجبة مستغرب
أيهم : خاف الدولمة بيها شي ؟
ضحكت و هزيت راسي بـ رفض
اريد انفذ الخطه يلي ببالي
و ما اريد أبيل يكون موجود
مُلاذ : ها شتگول ؟
أيهم : ليش اودي يم اهلي ؟
مُلاذ : هيج نتعشى سويه نسولف
أيهم : نتعشى ويا و نسولف ويا
مُلاذ : اليوم وحدنا و باجر ويا
اتدنى عليه خلا ايده ورا ظهري
و قربني عليه اكثر ،
حرك ارنبة خشمة على خشمي
أيهم : مُلاذ على شنو ناوية ؟
مُلاذ : ما ناوية على شي
من زمان ما باقيين لـ وحدنا
أيهم : صدكت
مُلاذ : انا صوجي اريد اتقدم خطوة وياك
عوفني وخر ايديك عني
لزمني اقوى و ثبتني
خلا ايده على خدي ، باس خدي و حجا
أيهم : هالخطوة ما اريدها لا تسويها
عكدت حواجبي بـ استغراب دحگت بـ وجهه
أيهم : تأذيج هالخطوة هواي بعدين
و انه اخاف عليج حتى من اسم الأذيه
دحگت بـ وجهه ما فاهمه
مُلاذ : بس انت جنت قابل
أيهم : ما قابل اسوي روحي قابل
لان ادري بيج ما تقبلين انتِ
و احب اشوفج تصديني
هسه لا تخليني اضعف يمج
و انه رايدج اكثر من كل شي
مُلاذ : بكيفك وخر عني
أيهم : نودي أبيل يم اهلنا
و نكعد نتعشى و لا يهمج
مُلاذ : تمام
فتح شعري نثره على متوني
اخذه بـ ايده و باسه حيل
أيهم : تعالي اضفرلج
هزيت راسي بـ قبول
و هو وكف وراي يضفر شعري
خلص و باس الظفيرة
دحگتله مبتسمه ، عفته و طلعت من الغرفة
شويه و صبيت غدا و تغدينا
لـ المغرب اخذت تلفوني و رديت ع الرساله
رحت ادور أيهم لگيته واكف يصلي
ابتسمت ، عابت الج مُلاذ اتعلمي
اتقدمت كعدت ع الجرباية ادحگله
كعد يسبح اندار دحگلي
أيهم : روحي اتوضي و تعالي
مُلاذ : ما اعرف اصلي عدل خاف اغلط
أيهم : انه اعلمج توضي و تعالي
كمت من يمه توضيت هواي بـ خاطري اصلي
بس ما متعلمة عدل بس اعرف اتوضى
و اخاف اغلط بـ الصلاة
اتوضيت و رحت اله
وكف يعلمني شلون اصلي
مُلاذ : و الله كرهت روحي
شنو ما اعرف اصلي بهالعمر
أيهم : عادي حبيبتي امج علمتج ؟
مُلاذ : علمتني و بابا هم جان يصلي
و هسه ملاك همين تصلي بس انا
أيهم : عادي هسه ابدي صلي
مُلاذ : كل يوم اتندم لان ما جنت اصلي
أيهم : تقضيهن حبيبتي
ابدي من هسه قابل شنو وراج؟
هزيت راسي بـ قبول
و هو وكف يعلمني ع الصلاة
بعدين طلع و عافني بـ الغرفة صليت وحدي
كملت و كعدت ع السجادة بـ داخلي شعور مرتاح
سبحت مثل ما سوا أيهم و لميت السجاده و گمت
رحت اطفر حضنت أيهم حيل
أيهم : ههههه شبيج؟
مُلاذ : معليك لا تسألني
عجبني احضنك و حضنتك
أيهم : الملائكة هسه دايرين وجههم
مستحين من عدنا
ضربت زنده و ضحكت
رفعت تلفوني لمن اجتني رساله دحگتلها
نزلت التلفون بسرعه دحگت لـ أيهم
مُلاذ : شوكت تودي أبيل ؟
أيهم : و الله فلا مرتاح لـ سالفتج مو من عوايدج
مُلاذ : شبيك أيهم اريد اكون على طبيعتي وياك
و ما اخاف من بعدين شنو الراح يصيرلنا
دحك بـ وجهي ساكت ، هز راسه بـ قبول
مُلاذ : خل اجي وياك
أيهم : تعالي
رحنا لـ أبيل لبسناه و وديناه يم اهل أيهم
نزل أيهم يشوفهم و انا نزلت ويا
ام أيهم : كل الهلا بيكم
أيهم : عدنا شغل ساعه تقريب
و نجي على أبيل
ام أيهم : خلو يبات يمنا اليوم
مُلاذ : لا نشتاقله
اجا أبيل حضن رجلية
شلته و بوست خدودة
مُلاذ : ما نتأخر عليك
أبيل : اخذوني
هزيت راسي بـ قبول
مُلاذ : طبعاً ناخذك ما نتأخر عليك
طلع أيمن لـ الباب سلم عليه
و سلم على أيهم بس أيهم ما رد اله السلام
أيهم : يلا يمه انه اروح
ام أيهم : الله وياك حبيبي
دخلوا أبيل و ام أيهم جوا
و أيهم اندار يريد يصعد السيارة
استوقفه أيمن
أيمن : شنو زعلان مني ؟
عافه أيهم و فتح باب السيارة
سدها أيمن و وكف بـ الباب و أيهم يدحگله بـ برود
مُلاذ : انا راح اصعد
أيهم : اصعدي
صعدت بـ السيارة ادحگلهم
أيهم خزره : وخر عن الباب
أيمن : شبيك أيهم لا تصير نحس
تدري بيه ما جان قصدي
أيهم : وخر گلتلك
أيمن : اعتذر صالحني
بقى أيهم يدحك بـ وجهه
و أيمن حضنه أيهم منزل ايديه ما رجع حضنه
وخر أيمن و صفن على أيهم
أيمن : ترا اعتبرك ابوي و الله
لا تسوي هيج أيهم انه ما جان قصدي
جنت معصب لان امي ما گالتلي
أيهم : تقصد امي لان هي مو امك
أيمن : لا امي هم ، يلا اشبكني خل نتصالح
چا بس مُلاذ تشبكها و تصالحها
رجع حضن أيهم مره ثانية
و أيهم ما حضنه ،
وخر أيمن و گال بـ صوت واضح بي انقهر
أيمن : براحتك
عافه و دخل جوا ، صعد أيهم بـ السيارة
ضرب بابها حيل متنرفز ، خلا ايده على كصته
مُلاذ : ليش هيج سويت مبين متندم؟
أيهم : اكثر من مره عاد هالكلام
و هسه يتمسكن عليه ابن الكلب
يدري بيه شلون اتخبل من هذا الكلام
و كل ما ينجلب يعيده
صفن و دحك بـ وجهي
أيهم : انتِ شمدريج؟
مُلاذ : سمعتكم البارحه
أيهم : تنصتي علينا؟
مُلاذ : لا بس سمعتكم بالغلط
اجيت اصيحك و سمعتك تتعارك ويا
زفر انفاسه بـ عصبية ، فرك وجهه و شغل السياره
رجعنا لـ البيت ، دخلت و هو شمر روحه ع القنفه
رحت سويت نفسي احضر العشا
فتحت تلفوني دحگت لـ الرساله رديت عليها
كم دقيقة و اندك الباب
مُلاذ : أيهم افتح الباب
أيهم : تمام
سمعت الباب انفتح
و انكطع صوت أيهم ، طلعت من المطبخ
فززن عيوني على لينا ادحگلها تبوس أيهم
ما جنت متوقعتها هيج تسوي ، صرفنت رداناتي
نار اشتعلت بـ دماغي
مُلاذ : حي الله من جانا
وخرت مصدومة تدحگلي
أيهم دفعها و يدحگلي وياها مصدوم
اتقدمت عليها بـ هدوء
مُلاذ : اذا ما اخليج اليوم
فرجة لـ امة محمد ما اتسمى مُلاذ
جريتها من شالها و هي كامت تصيح
و أيهم يريد يلزمني
مُلاذ : حيووووانه تدزين بـ صورج
و فيديواتج لـ رجال متزوج و الله اربيج
اعلمج شلون تدزين اله هيج و فوكاها تبوسي
حطيتها و كتلتها كتله و أيهم لازم خصري
يريد يشيلني منها
و انا عقلي محترك ع الفيديوات الدازتها
و منظرها و هي تبوس أيهم ،
هي تصيح و تخرمش بيه
اندكت الباب و صوت امي تصيح مخترعه
فتح أيهم الباب ، لزمت لينا من شعرها
لينا : حقييييره انتِ الاخذتي مني و تزوجتي
انا مرته الاولى بواگة الزلم
مُلاذ : اراويج بواگة الزلم شتسوي
بواگة زلم و لا **** ادز صوري و صور جسمي
و الله اذا لكيتج بعد دازتله ما اخليج تجين بـ رجليج
اجيج انا و اطيح حظ حظج حيوانه و فيديواتج
الا انشرها وجهج طالع بيها و الا اكتب رقمج
اراويج شلون تدزيله
شالني أيهم من خصري عنها
و انا اصيح وجهي يحترك من العصبيه
كمت ارافس و هو لازمني صاح بـ لينا
أيهم : كووووومي اطلعي بررررا
مُلاذ : جلببببه ادبسززز نوب لابسه اله
فستان صلوخ
سد أيهم حلگي و شايلني بـ تك ايد
و انا ارافس بـ رجليه
امي لزمت لينا هي و ملاك طلعنها من البيت
رافست بـ رجلية اصيح متنرفزه
مُلاذ : عوووووفني و الله اكتلها
تدزلك صور جسمها و صورها
و فوكاها تتوسل ما تحضرها الادبسز
و الله اذا الزمج انتِ بيج خير ارجعي دزيله
و الله اطيح حظج
سد حلگي بـ ايده و يمشي بيه لـ القنفه
كعدني على القنفه ساد حلگي و مقيد ايديه
أيهم : اسكتتتي كاااافي
دخلت امي تركض ،
شالت عباية لينا و شالها و طلعت
وخر ايده من حلگي و حاط ركبة رجله فوك رجليه
مُلاذ : ما تدزلك صورها ما تدزلك فيديواتها
أيهم : ما محاجيها و الله ما محاجيهااا
مُلاذ : انا الحاجيتها و دليتها على البيت
سويت روحي انت و گلتلها مُلاذ طالعه
حتى اكتلها و اتوبها
دحك بـ وجهي عاكد حواجبه
مُلاذ : لا تدحگلي هيج
الادبسز عينها الصلفه افكسها و تبوسك فوكاها
سمعت صوتها تصيح من بيت اهلي
ردت اكوم أيهم دفعني على تجوة القنفه يثبتني
خزرني و گال بـ حدة : كافي
مُلاذ : ما اخاف منك تدزلك صورها عادي
اصلاً تكيف انت
أيهم : انجبي و احجي عدل
بـ وجهها ما اعاين ، اعاين لـ جسمها؟
لان **** انه
خزرته و سكتت
كام بـ هدوء كعد يمي
مُلاذ : گول لـ امي تطلعها من البيت
و الله انزل اكتلها
أيهم : عاينيلي ما جان اكو داعي تتصرفين هيج
و تجيبيها لـ هنا و تكتلينها جنت بكل بساطة
تكدرين ترزليها على التلفون
مُلاذ : تستاهل و الله ارجع و اكتلها
ردت اكوم لزمني و كعدني ع القنفه
اتقرب باسني ، رفع رجليه من الگاع
كعدني بـ حضنه ، لزمت بـ رگبته
بعد وجهه من وجهي يمسح على شعري
أيهم : ابقي هنا اروح اطردها و اجيج
لا تنزلين و لا تتعاركين
وخرت وكعدت ع القنفه
گلبي عطب من شفت فيديواتها و انقهرت
ما ادري غيره لو شبيه بس ضجت كلش
عافني أيهم و نزل ، سمعت صوت صياحهم
صعدت ملاك يمي هي و امي
مُلاذ : لييييش عفتوهم وحدهم!
فيروز : اسكتي راح اموت من وراج اسكتي
جايبه البنية لحد هنا و مخليتها تجي بـ رجليها
و كاتلتها مخبله انتِ كافي هاي التصرفات !
مُلاذ : معليكم بيه انا الكتلتها
و انا الي جبتها لـ هنا معليكم
فيروز : تصرفاتج كلش مدري شلونها
الطفله ما تسوي سواياتج
مُلاذ : لو وحده دازه صورها
و هي كما خلقني ربي لـ بابا تقبلين ؟؟؟
فيروز : شنو كما خلقني ربي
دحگتلها و ردت اكوم اروحلهم
لزمتني امي كعدتني بـ مكاني
مُلاذ : و الله ما اعوفهم وحدهم ادبسز هاي
فيروز : مُلاذ اول ما نزل أيهم ضربها راشدي
كافي صدك تحجون انتوا!
مُلاذ : تستاهل و الله حيل وياها
بعد ايدي ايده اروحله فدوة خوش يسوي
دحگت لـ ملاك حاصرتها الضحكه عليه
خزرتها و دنكت لحد ما اجا
اتقدم حاجا امي و ملاك و انا مو يمهم
عفتهم و گمت لـ الغرفه اتمددت
شويه و دخل أيهم ، اتقدم جر كرسي كعد كدامي
أيهم : ليش هيج سويتي ؟
انا باعدها عن حياتنا و احظرها منين ما تجي
مخليلها اخر ذرة احترام لان ام ابني
مُلاذ : انت تحبها انا ادري بيك
أيهم : انجبي لذه هذا اسمه خريطي
لو احبها ما جان تزوجتج و لا جان طلگتها
و جان هسه عدنا درزن جهال انه وياها
مُلاذ : انا ما بالغت بـ ردة فعلي
يعني اشوف وحدة تبوسك عادي ؟
أيهم : ما گلتلج بالغتي
بس ما جان اكو داعي تخليها تجي لـ هنا
مُلاذ : بكيفي عجبني اكتلها حتى تبطل
أيهم : اتدني
اتقدم عليه اتمدد يمي
و حضنني لـ صدره وخر شعري من وجهي
أيهم : شلون بـ سوادي اليغار
و ما يشوف الكدامه بعد
مُلاذ : ما غرت
أيهم : ابد انه الغرت
مُلاذ : لا تسوي هيج اسكت
ضحك و باس شعري
دخل اصابيعه بين خصلات شعري
حك فروة راسي و حجا
أيهم : وليدي الوكح شو ارفع راسك ابوسك
مُلاذ : ما اريد ولي عني اظل دايخه
أيهم : عادي حبيبي دوخ شويه مثل ما دوختني
رفع وجهي بـ ايده باسني حول ايده على ظهري
و انا وخرت راسي من صدره
اندار صار فوكاي لزم ايديه من الجهتين ، يبوسني
رفع وجهه وزع بوساته على كل وجهي و رگبتي
بلعت ريگي هادئه و ساكته
مُلاذ : أبيل جيب أبيل
أيهم : خيولي أبيل
مُلاذ : لا اشتاقيت اله
أيهم : اشتاقيله شوي بعد ، اتحمليني
نعست بحيث بس اريد انام
و ايدي تتحرك بـ حركه دائرية على شعر أيهم
رفع ايديه خلاهن على زنودي و يجذبني اكثر اله
فتحت عيوني دحگتله و رجعت غمضت
حضنني لـ صدرة يلعب بـ شعري
و يمسح على ايديه
أيهم : نمتي؟
مُلاذ : لا
أيهم : انتِ صدك تدوخين من الزمج
شوف شلون هادئه هههههه
مُلاذ : وخر اريد انام
أيهم : نامي يلا خل اطلع اجيب أبيل
سكتت فتحت عيوني ذبلانات
و رجعت غمضت ،
أيهم يمسح على زندي بـ هدوء
و النومه دافية ، بحيث گبل غفيت
كعدت ثاني يوم
اخذت ملاك لـ دوامها و رحت انا لـ شغلي
خلصت و رجعت لـ البيت أيهم گلي نروح لـ بيت نارا
خلينا أبيل يم اهلي و رحنا انا و أيهم
طلعت النا بنيه تجنن سلمت عليها و دخلنا
راحت جابت النا مي قدمته النا
كعدت كدامنا ، على وجهها ابتسامة
نارا : و الله طلعت لذتك بكد ما گلت
دحگت لـ أيهم و أيهم ابتسم
أيهم : مو گلتلج تخبل
نارا : ما شاء الله تجنن الله يحفظكم لـ بعض
مُلاذ : حياتي تسلمين
نارا : ليش ما جبتو أبيل وياكم
أيهم : بارده عفته بالبيت
نارا : علي جان كيف عليه لو جايبه
أيهم : اجيبه ان شاء الله وين علي ؟
نارا : خل اصيحه
كامت من يمنا انداريت لـ أيهم
مُلاذ : شكد حلوة
أيهم : مو احلى منج
ابتسمت و هو يدحگلي مبتسم
اندارينا لمن اجا ويا نارا طفل
نفسه يلي بالصور ، ركض على أيهم فرحان
علي : باباااااااا
شاله أيهم يبوس بي
أيهم : روح ابوك
كعده بـ حضنه
يبوسه حيل و يشمه
علي : وين أبيل ؟
أيهم : ما جبته وياي
علي : ليش؟
أيهم : باردة يتمرض بعدين اجيبه و اجي
شوف منو جبت وياي
اشر عليه دحگلي علي و انا سويتله هلو
و هو ابتسم سوالي نفس الحركه مستحي
ضحك أيهم و گله
أيهم : هاي الحلوة الخابصك بيها أبيل
مُلاذ : اوووو طلعت معروفه
أيهم : ابني مستهتر يسولف عنج بكل مكان
مُلاذ : هههههه
كامت نارا فرشت سفرة
ما قبلنا لان اتأخر الوقت بس اصرت و بقينا
اتعرفت عليها بنية حبابه و نقيه واضح من وجهها
و الابتسامة مرسومة على ثغرها
و ابنها متعلق بيها كلش كل شوية يبوسها
ظليت مبتسمه على منظرهم
كملنا عشا و ودعناهم و طلعنا من يمهم
صعدنا انا و أيهم بـ السيارة
دار وجهه الي دحگلي رفع ايديه باسهن
أيهم : بردتي ؟
مُلاذ : بس اطرافي
عصر اصابيعي بـ ايده و باسهم
رجع باس كف ايدي مال راسه
و خلا ايدي تحت خدة ، دحگلي
ابتسمت ابتسامة ظاهره اسناني
مُلاذ : احب من تسوي هيج
أيهم : شسوي ؟
مُلاذ : مادري بس هسه
من حطيت ايدي جوا خدك
حركاتك نظراتك بيها حنية
لزم ايدي و ظل لازمها
شغل السياره ، فتح اغنية شمسين
دحگتله عاصر ايدي بـ ايده
و يسوق بـ الايد الثانية
أيهم : عيون الناس تحسد كل حبيبين
يردوني أبتعد عنك وأعوفك
وإذا أنت جرح ما أريدك تطيب
اروف بصفك ولا ما أعوفك
رفع ايدي باسها
أيهم : من أحضنك أحضن الدنيا بـ ايديه
حبيبي وغالية عيونك عليّ
بسرعة الوقت صاير يخلص وياك
الهوا إنت و اذا رحت اختنگنا
نزلت قطرات الندى على السيارة
مُلاذ : اهو رح تمطر
وصلنا لـ البيت رحت لـ الحديقة
اخذت الغطى و طلعت ركض غطيت سيارتي
أيهم هم غطى سيارته لزم ايدي و ركضنا
نريد ندخل رعدت الدنيا و زخت فوكانا
رحت وكفت بـ الباب يلي يودي لـ الشقق
مُلاذ : اكرهه المطر اكرهه
أيهم : ليش تكرهينه؟ العالم تحب المطر
مُلاذ : ما احبه من صغري
أيهم : ليش؟
مُلاذ : من جنت صغيرة جنت اتمرض بسببه
و اظل ايام ما طالعه لـ الشغل
جان ضرره اكثر من نفعه الناس يشوفونه حلو
بس انا احسه يوم اسود اذا مطرت
أيهم : ذكرياتج كلها سيئه بي؟
هزيت راسي بـ قبول
أيهم : تعالي
لزم ايدي و طلعنا جوا المطر
مُلاذ : أيهم رح نتمررض
أيهم : نتمرض بس رح يبقى موقف بـ عقلج للابد
مُلاذ : يمه أيهم باردده
شالني من بطني يفرني
مُلاذ : يمه أيهم و علي نوكع
ضحك بـ صوت عالي
و انا لزمت بـ اكتافه و كمت اضحك
صرنا جنا زعاطيط نلعب بـ الـمطر
و انا فحطانه من الضحك ، مو لان الموقف مضحك
بس بـ داخلي شعور حلو يخليني اضحك لا ارادياً ...
ملاك :-
ركضنا ع الشباك لمن سمعنا صوت مُلاذ و أيهم
دحگنالهم من الشباك أيهم يشمر المي على مُلاذ
بـ رجله و مُلاذ ترجع تدفر المي عليه
فلت شالها همزين اكو سياج
فيروز : يا راح يتمرضووون
دحگنا لـ مُلاذ انا و امي مصدومين
تضحك بـ صوت و لازمه بـ أيهم
ضحكاتها ضحكت طفله
اول مره اشوفها هيج تضحك
أيهم لزم ايديها يثبتها رفع ايدها و ظل يفرها
و هي الابتسامه ظاهره اسنانها
دحگنا انا و امي لـ بعض مصدومين
اول مره مُلاذ هيج تضحك و هيج تكون فرحانه
وكفت مُلاذ عكس أيهم و دخلت ايدها بـ ايده
كاموا يكمزون و يفترون
أيهم : لعبيني و العبج لا اكسر اصبعج
مُلاذ : هههههههههه
رفعت عيونها مُلاذ لـ أيهم حضنت رگبته
أبيل واكف يمنا و يكمز يريد يطلع يمهم
رفعت ملاذ ايديها خربطت شعر أيهم
مُلاذ :-
ضحكت من كل گلبي
رغم شكد جنت اكرهه المطر
بس سوالف أيهم تفرحني
ثبتني و گال
أيهم : يلا كافي خل نصير حبابين
مُلاذ : أيهم صرت جنك عصفور مهلس
أيهم : و انتِ شعرج انلطش على وجهج
والشال فلت
مُلاذ : و الله بردت يمه
أيهم : يالجذابه تگولين ما احب المطر
و هي رح تموت من الضحك
مُلاذ : اضحك على سوالفك
أيهم : عفا عليج مسويتني مضحكه؟
مُلاذ : ههههههه لاا لا
ابتسم على ضحكتي
و انا لازمه بـ اكتافه بردانه و ارجف
بس احاول اوكف و لازمه بـ اكتافة
خلا ايديه على خصري
أيهم : ندخل ؟ جسمج كام يرجف
مُلاذ : خل نظل شوي بعد احاول احب المطر
أيهم : يلا حاولي تحبي
بس ديربالج لا توكعين عَليّ و انتِ تحاولين
حضن ظهري بـ ايديه
و سند كصته على كصتي
مُلاذ : احلى شي باجر نتمرض
و الله نشوف محبة المطر شلونها
ضحك أيهم
و هو ساند كصته على كصتي
أيهم : ديلا حَبي عاد مو جمدنا
مُلاذ : اعلمك شلون تجذب عليه
عقاب الك نبقى جوا المطر
أيهم : جوا المطر و وياج احلى عقاب
مُلاذ : ههههه ما يغزر وياك و الله
أيهم : ابد احلى عقاب اتعاقبته
سكتت هادئة گلبي احسه كام يرفرف
و كل يلي بـ عقلي أيهم يحاول يغير الذكريات السيئه لـ ذكريات حلوه ،
اتذكرت مره قريت نصوص كاتبهم ابوي بـ دفتر دحگت بـ عيونه ، صرت كُتلة من المشاعر كدام أيهم
لزمت بـ كف ايده غمضت همست صوتي رايح
مُلاذ : ها انا أعلن هزيمة قلبي ...
فتحت عيوني دحگتله
كملت بـ نفس النبرة
مُلاذ : احد نصوص ألياس
اتقربنا بـ نفس اللحظه و بسنا بعض
ناسيين المكان يلي احنا بي
بـ وسط هذا البرد ، دفو يحتل گلبي الثلج
ملاك :-
غطيت عيون أبيل بـ ايدي
كممت حلگي و ضحكت و امي تدحك بـ صدمه
فيروز : دوري وجهج ولج دوري وجهج
ذوله فلتو كلش ، اتخزينا كدام الجيران
ضحكت و امي تدور وجهها و تستغفر
جرتني وياها تدور بـ وجهي ، طردتني لـ الغرفة
اخذت إبيل و دخلت الغرفة اضحك على صدمة امي
و على منظرهم ، اندمجوا كلش
مُلاذ :-
ابتعد أيهم يدحك بـ عيوني
و انا وخرت احك بـ حاجبي
دحگلي و ضحك ضحكه ظاهره اسنانه
اندارينا من انفتحت الباب عفت متون أيهم
و عاف ظهري ،
انداريت دحگت امي طلعت النا
بـ ايدها مناشف و مغطيه روحها
ركضت علينا تنطينا مناشف و تگللنا ندخل جوا
دخلنا نركض و ننشف رواحنا
مُلاذ : يمه راح اصعد لـ بيتنا
فيروز : اتدفوا اتدفوا
مُلاذ : تمام
أيهم : خاله هسه اجي اخذ أبيل
بس انشف روحي
فيروز : على راحتكم
لا تصعدون ركض لا تزلگون
هزينا راسنا بـ قبول و صعدنا
دخلت سبحت و طلعت نشفت شعري
رحت اتلفلفت بـ اللحاف بردانه
أيهم سبح و لبس ، نزل يجيب أبيل
صعد أبيل يبجي و هو يسكت بي
لان شايفنه من الشباك دحگت لـ أيهم
و هو هم دحگلي بـ نفس النظرة
أيهم : وحدك شفتنا
لو بيبي فيروز و ملاك وياك؟
مسح دموعه و گال
أبيل : وياي و انت بس الحلوه
لطم أيهم كصته
و انا درت وجهي اسوي روحي مادري
أيهم : باجر من تمطر اطلعك وياي
أبيل : جذاب
همست
مُلاذ : حتى ابنك عرفك جذاب
أيهم : انجبي
خزرته ردلي الخزره
أيهم : أبيل اكعد بـ الصاله
هسه اشغل الك كارتون حتى بعدين تنام ، اتفقنا؟
هز راسه بـ قبول راح و هو يمسح دموعه
رفع عينه أيهم الي
مُلاذ : لا تدحگلي انت بستني
أيهم : انتِ هم بستيني لا تجذبين
مُلاذ : أيهم معليه انت مستهتر
أيهم : انجبي فوصه
و الله فواصتج هاي رح تموتني
مُلاذ : و الله مستهتر
بستني و ذبيتها بـ راسي
أيهم : شكد اخلاقج سز
منو تگول لـ رجلها مستهتر
مُلاذ : و منو يگل لـ مرته فوصه
انفتح الباب دحگت لـ أبيل ك
أيهم شال أبيل و طلع
مُلاذ : مستهتر
جريت غطاي و نمت
و هكذا مرت الايام ظلت سيارتي تعطل
و بـ نص الطريق توكف بعد ما تشتغل
صلحتها اكثر من مره اخير شي كلش ضجت منها
كل يوميه عاطلة بس ما اكدر ابيعها
لأن هدية من بيبي ،
حجيت لـ أيهم
گلي بيعيها احسن صح هدية بس بعد ما تفيد
ما قبلت گلت اظل اصلحها حتى لو
بس أيهم كان اله رأي اخر و اشترالي سيارة
فد فرحت بيها ، لونها اسود و حديثه
و السياره الي اشترتها بيبي
خليتها بـ گراج المكتب و غطيتها
أيمن و أيهم تصالحوا بس أيهم مثگل وجهه عليه
يگلي حتى يتعلم ما يحجي هيج بعد
كل ما اسئله عن شي يخصه
يطلعلي جواب يخليني محتارة اكثر
مرات ما يجاوبني
احياناً يظل ايام ما يرجع البيت بسبب شغلة
و أبيل يظل يبجي يكطع روحه من البجي
متعلق بـ ابو كلش
اما نور و اركان ف تمت خطوبتهم اخيراً
راح اركان خطبها من جسار بعد ما اتحسن
لان جسار منعه يروح بـ غير واحد
و گله اخطبها مني بس اصير زين
بس حارت نور بـ عزيز شون تعوفه وحدة
لذالك قررت تأجل الزواج و يبقون مخطوبين
اما هتان و جسار فـ هذول الاثنين
علاقتهم ما معروفه
جسار العصبي البارد و هتان اللطيفة الحساسه
و علاقتهم شبه قنبلة حاطيها ثنين بالوسط
هي تحبه و هو ما يحبها
بس يكره يشوفها تبجي و مقهوره
و لا يتقبل شخص يحاول ياذيها
حسب ما عرفت من جسار هتان مراسلته
و معتذرة عن كلامها ويا يلي ما اعرف شنو كان
و بـ نفس اللحظة حاضرته قبل لا يجاوبها
ملاك حسيتها بدت تتعلق بـ سلطان
دائماً تسولفلي عنه و عن الصار بينهم
و انا احاول اكون هاديه و ما اعصب عليها
و اگللها تبقي علاقتها بـ سلطان سطحيه
و احاول اقلل التواصل يلي بينهم
حسيت روحي كلش غلطت
من خليت سلطان يوصلها لـ المدرسه و يرجعها
اما صافيناز و أيمن فـ انقى حب شافته عيني
أيمن اكثر من مره اشوفه يجون هو و صافي
صافيناز فرحانه بـ وجود أيمن
تدخل المكتب الضحكه تارسه وجهها
مره شفتهم يتمشون بالشارع لـ المكتب
و أيمن حاضنها و يبوس شعرها
اجت بـ يوم مريضة اجا أيمن و ظل كاعد يمنا
كل شوية يوصيني عليها و يجيب اكل و علاجات
منظرهم يخليني لا ارادياً ابتسم
غاده و باهر ملتهين بـ ابنهم ادهم
و طبعاً التقي بيها بس مو هواي مثل قبل
تجيني ايام اذكر طفولتنا انا وياها و اضحك
شكد جنا و بعدنا متراهمين
جريت ورقة و قلم و بديت ارسم
هوايتي يلي محد يعرف بيها
و رسمي حلو بس ما احب اراوي
المجر يلي بالميز مالتي بـ المكتب كله رسومات
اتذكرت انا و أيهم شلون جنا جوا المطر
انرسمت ابتسامة على شفتي و رسمت
لـ ساعات انا كاعدة بـ المكتب و ارسم
رفعت راسي لمن حسيت احد يدحك وياي
دحگت لـ صافيناز گالت منبهره
هتان : واووووو
ضميت الورقة بـ المجر
و رجعت القلم بـ مكانه
مُلاذ : شنو واو؟
صافيناز : رسمك يجنن ليه ما تقولي ؟
مُلاذ : شخبطه
صافيناز : ولك أي شبخطا بتجنن
ذول عم يرقصو جوا المطر ما ؟
مُلاذ : صحيح
ضربت كتفي و گالت
صافيناز : و ليه ما تقولي عندي رفيقه رسامه
رحت قبل اسبوع عند وحده ع الانستا
قلتلها بدي ترسم أيمن قامت
قلتلي الرسمه ب ٣٥ الف
عاد شدعوا قلتلها تمام
لانو بدي رسمه لـ أيمن حبيب روحي
مُلاذ : و الله تضحكيني من تحجين عراقي
صافيناز : و الله خيه شدعواكِ ترسمي بـ ٣٥ الف
شو أيمن بيتحرك بـ الرسمه و انا ما بعرف
و لا بيخرج منها و يقلي بحبك
مُلاذ : هو أيمن زين من ما يطلع من الرسمه
و يگلج احبج يسويها يتلبس الرسمه
صافيناز : ما تحكي على حبيبو لـ قلبي
نيالها الرسمه لو اتلبسها و صار بداخلها
مُلاذ : اي حبيبو لـ قلبج طالعه عينج و الله
صافيناز : عنجد مُلاذ شو في بينو بين أيهم
كثير أيمن مزعوج و ع طول حزنان
ليه هيك يساوي معو ، هو شو ذنبو
اذا ابو مش منيح
مُلاذ : تعرفين بـ مشكلتهم؟
صافيناز : اي حكالي
قلي ام أيهم مش امي بس هي ربتني
و امي وحده ثانيه بس ماتت
و ابو انسان كثير سيء و كان بيأذي امو
و امو بعدين مرضت و هو صغير كثير و ماتت
قلتلو رح اخذك جنبي ما تخاف من بعدها ماتت
عبست شفتي مقهوره عليه
ما جنت اعرف و لا أيهم سولفلي
شكد يضحك و يشاقي
بس مبين شايل حزن الدنيا كلها
مُلاذ : أيهم ضايج منه لان يحجي هيج
يگول اكثر من مره عادها عليه و انا اسكت اله
صافيناز : بس نجي لـ الحقيقة
مكانها لـ الام ما بيتعوض لو مهما كان
مُلاذ : صحيح بس أيهم ينقهر من يحجي هيج
ترا هو يموت على أيمن يگلي انا معتبره ابني
مو اخوي و هو غير عن هتان و باهر
بس أيمن يقهره من يگله امك مو امي
صافيناز : هو بيعصب و يحكي هيك
هو يحكيلي كثير بيحب امو لـ أيهم
ما بيكذب أيمن عَليّ يحكيلي كل شي
ضميت شفتي لداخل حلگي
بـ عدم معرفه ، عدت الاشهر
بـ يوم اجت امي الي الصبح
گلتلي نروح لـ المكبره
صارلها هواي ما زايره ابوي مقهوره تگول
فيروز : تحلمت بي يگلي ليش ما تجيني
كلتلها العصر اخلص شغلي
و احاجي أيهم و نطلع انا وياها
ماخذتها من قبل و كل مره نروح
انا اظل واكفه برا و امي تدخل المگبره
اوتد رجليه ع الگاع في سبيل ما اروح
و اشوف گبره مالي روحه اله قبل لا الگا الچتال
مالي روحه اله و لا كعده يم كبره اذا ما خليت الچتال بـ المكان يلي يستحقه
نزلت امي من السياره و دخلت المگبره
لزمت بـ السيارة اتمنى اروح و اشوف گبره
و اكعد يمه و اشكي اله بس اذا رحت انهار
و مستحيل ارجع مثل قبل
خليت ايدي على گلبي اليوجعني
انا اعرف جوا ذاك التراب عزيزي
بس ما اكدر اروح
كنبصت بـ الگاع سندت ظهري للـ السيارة
و ايديه على وجهي
يا روحها لـ مُلاذ يا گلبها
اشتاقيت الك و الله اشتاقيت بس وعدتك
مالي جيه الك قبل لا الگا الاخذك مني
و انا بنت ألياس عيب عليه ما اوفي بـ وعدي
كمت كعدت بـ السيارة
و نار مشعوله بـ صدري
اختنكت خنكه بس الله اليعلم بيها
كتمت روحي و سكتت لحد ما اجت امي
و عيونها مورمه واضح باجيه
اساساً كل ما تجي تشبع بجي
بـ مرور الايام بديت الاحظ
اشياء غريبه تصير بيه
هواي اتقيء و غثيان و صداع
و عندي صعوبة بـ التنفس
جسمي دائماً نحلان بس اتغاضيت
بـ يوم طلعت من المكتب
و رحت لـ المحلات اتسوك
نزلت من السيارة ، هستوني نزلت
دخت كلش ، صرت گوه اجر النفس
اختنكت ، حطيت ايدي على صدري
لزمت بـ بنيد السياره اغمض حيل
و افتح عيوني ، احاول اوضح نظري
رفعت نظري
دحگت لـ الضويات المتغاوشه بـ عيني
فقدت سيطرتي و اغمى عليه
فتحت عيوني دحگت
انا بـ المستشفى و فوك راسي دكتور
-الحمدلله ع السلامه بنتي
لزمت راسي بـ وجع وحجيت
مُلاذ : شسوي هنا؟
-مغمي عليج بالشارع و جابوج لـ هنا
اتذكرت هزيت راسي بـ قبول
كمت اريد اكعد و هو بدء يسألني اسئله غريبه
ما افتهمت دحگت بـ وجهه ، و انا اجاوبه
- بنتي انا اگول من الافضل نسوي الج تحاليل
مُلاذ : ليش؟
-افضل و ان شاء الله ماكو شي
بس من واجبنا المحافظة على صحتكم
مُلاذ : لا دكتور ماكو داعي لان تعبانه طحت
- مع ذالك خل نسوي تحاليل
مُلاذ : تحاليل شنو؟
- تحليل دم
بدا يحجيلي عن التحاليل الاسويها
و فعلاً سويت التحليل
گلي انتظر على ما يخلصون
اتقدمت كعدت يم غرفة التحليل
صاح ممرض لـ الدكتور
و گلي من يطلع التحليل ادز اله ممرضه تصيحه
هزيت راسي بـ قبول و بقيت كاعده انتظر
اتصل بيه أيهم ما ردت اخوفه
گلتله شغلي طول و هسه جاي اتسوك
سديت الاتصال ، ظليت منتظره
رفعت عيني لمن طلعت ممرضه صاحت اسمي
دحگتلها و رحت الها انطتني ورقة التحليل
ردت اگللها تصيح الدكتور بس بسرعه راحت
دحگت لـ التحليل ، فتحته اقرا كل شي ما فهمت
رفعت عيني دحگت
لمن اجت دكتوره بـ اتجاهي ، استوقفتها
مُلاذ : دكتوره انا مسويه تحليل
و ما اعرف اقرا تكدرين تقرينه الي و تفهميني
انا اعرف مابيه شي بس اغمى عليه
و الدكتور اصر اسوي تحليل
الدكتوره : طبعاً ، الاحتياط واجب
ما دام طلب تحليل فـ معناها شك بـ شي
ابتسمت بـ هدوء و بقيت ساكته
و هي اخذت ورقة التحليل تقراه
ظلت عيونها تتمشى ع الكلمات
و تهمس بيهم ، رفعت راسها دحگتلي
- اعتذر ع يلي رح تسمعي
بس ...
هزيت راسي بـ معنى"شكو؟"
الدكتوره : التحاليل تظهر
انتِ مصابه بـ الكانسر
عكدت حواجبي همست : كانسر ؟
الدكتوره : يعني ، انتِ مصابه بـ السرطان ...
وسعت عيوني مصدومه ، احس عقلي جمد
نزلت نظري لـ ورقة التحليل
رجعت نظري بـ صدمة على الدكتورة ...
- يتبع الفصل التالي اضغط على ( رواية جرح الأيهم ) اسم الرواية