رواية جرح الأيهم الفصل الرابع و الاربعون 44 - بقلم أيلان
"الجُــرح الرابع و أربعون"
جريت ايده احركه كدامي ، طفر من الشباك
مديت راسي من الشباك ، اباوعله راح يركض
لحد ما ابتعد ، ابتعدت بسرعه و سديت الشباك
درت وجهي لـ الباب ، اتقدمت وكفت بـ نص الغرفة
بدن الغراض ينزاحن من ورا الباب
بلعت ريكي بـ استسلام و خوف
لمن انفتح الباب و اندفعت الغراض ،
رفعت نظري اله يتقدم عليه
حجا بـ صوت سكران
-وينه ؟
رفعت راسي باوعت بـ نص عينه
حجيت احاول اسيطر على صوتي اليرجف
-راح
صاح بـ غَضب ، رفع الخشبه يلي بـ أيده
ضربني بـ كل قوته على راسي
جرَح المسمار يلي بـ الخشبه راسي
لزمت بـ مكان الجَرح نزلت أيدي كلها دم
تغاوشن عيوني من الوجَع ، وگعت مغمي عَليّ ...
مُلاذ :-
رفعت عيني من الگاع لـ امي المصدومة
و نور فاتحه حلگها و عمتي و ام جسار
يصيحن و يزلغن خدودهن
يريدني احجي و انا لساني ثگل
بعد ما اكدر أنطق ، أتداركت الوضع
جريت التلفون من الگاع ، اخذت شالي
طلعت اركض و همَ يركضون وراي
فتحت باب الاستقبال و دخلت
دحگت كاعد اركان و رياجيل كبار معممين
و أيهم كاعد يمهم ، كاموا بسرعه وكفو مصدومين
ركضت على أيهم عيوني ما تشوف غيره
مُلاذ : أيهم أيهم جساااار سوا حادث
دحك بـ وجهي مصدوم
و الكل كاموا مصدومين و يصيحون
و يسألون شلون ، فزيت على صيحة سلطان
سلطان : شنوووو حاددددث؟
شتحجين مساع خابرته مابي شي !
حجيت اتلعثم و گلبي يرجف
مُلاذ : خ ... خابرته سألته سألته شوكت يجي
گلي جاي و هو يحجي صار صوت ضربات قويه
گلت ... گلت جسار جسار تسمعني ما جاوبني
رجعت عيني على أيهم
يلي لزم ايديه يثبتني بـ مكاني
كل جسمي يرجف ، ما اكدر اسيطر على روحي
صارت هوسه ، أيهم جَرني من ايدي
طلعنا من الأستقبال و الكل طلعوا ورانا
و سلطان يصيح و ام سلطان نفس الحال
و نور واكفه بـ الزاوية ترجف و تبجي
اندار أيهم بـ عصبية و صاح بيهم
أيهم : يمعووووودين خل نفتهم!
سكتو و صار هدوء اندار عليه لازمني من اكتافي
و يحاجيني بـ هدوء لان ارجف مو بـ انصاف
أيهم : بس فهميني هو وين من خابرج ؟!
مُلاذ : ما اعرف ما اعرف بس گلي جاي
أيهم : تلفونج وين ؟؟
مُلاذ : بـ .. بالغرفة
ملاك : مُلاذ تلفونج بـ ايدج !
رفعت ايدي ترجف دحگت بيها التلفون
اخذ أيهم التلفون مني و حجا بسرعه
أيهم : الووو جساررر
قربت اذاني صوت هوسه
نزل أيهم التلفون سد الاتصال
و رجع اتصل على رقم جسار
طلعوا سلطان و اركان يركضون للسيارات
يروحون يشوفونه اذا ع الطريق
و عزيز واكف يم نور يثبت بيها
فزينا من أيهم
خلا التلفون على اذنه و حجا
أيهم : الو ، خويه اي اي اعرف بس وين گلي ؟؟
تمام جايكم ، رحمه لوالديك بس وضعه گلي شنو
حجا و هو يطلع بـ اتجاه باب المطبخ
و انا اركض ورا، انداريت لـ عزيز
مُلاذ : ابقى يمهم لا تعوفهم ابد
انداريت و لحگت أيهم اركض
صعدنا بـ السيارة و أيهم يحجي بـ عصبيه
أيهم : ساعددده على ما تجي الاسعاف
شنو اليتبلون عليك انسان مسوي حادث
عايفه حتى لا يصيرلك شي وتبتلي !
خوش خويه خوش مشكور
مشى سريع صارت سيارة سلطان كدامنا
اشرلهم يلحكونه و طلع گبل
اندار عليه دحگلي ايدي ترجف
و كاتمه صوتي ما اريد احجي و اخوف روحي
و بـ داخلي ادعي لـ جسار ما بي شي
روحي راحت من الخوف
سد الاتصال و ذب التلفون بسرعه
لزم ايدي حيل
أيهم : بس اهدي اهدددي مابي شي
مُلاذ : أيهم أيهم شگلك الرجال ؟؟
الله يخليك لا تجذب عليه
أيهم : بس اهدي هسه نشوفه
بس لا تخبليني و تخبلين نفسج
و احنا نحجي صار كدامنا
الحادث وكف أيهم السيارة بسرعه
نزلنا نركض انا وياه ، حيلي انهد
دحگت الناس ملتمه و دعامية السيارة
ضاربه الباب الي بـ صفحة جسار
و لازكه السيارة وي الرصيف و التيل
ركض سلطان يصيح خايف
حتى بجي كام يبجي ، لحگو أيهم و اركان
ركضت وراهم ، السيارة مضروبه
بـ الباب مال جسار
و ما نكدر نفتح الباب و نطلعه
ركض أيهم لـ جهة الصدر
فتح الباب انكردت بـ الرصيف كوه انفتحت
جرو جسار من داخل السيارة هو و اركان
و سلطان راح كعد يمه مهدود حيله
اتقربت خطواتي ترجف ، خلو جسار ع الرصيف
دحگتله كصته تنزف و بـ عينه كدمه
و مشمر ايديه منا و منا
عافه أيهم و رجع ع السيارة مال الشخص الثاني
عاط بـ الواكفين و يتنقلون الحجي بينهم
حتى محد من عدهم راح و ساعده
أيهم : خوش منظر و هم يموتون كدام عينكم !!
سكتوا و اتقدموا يساعدونه
يطلع الشخص الثاني من السيارة
خلاه ع الكاع ، جاس نبضه
رجع اندار عليهم
أيهم : شوكت خابرتوا الاسعاف ؟؟
- من اول ما صار الحادث خابرتهم
هز راسه أيهم ساكت
رجع شال الرجال هو و اركان
أيهم : على كيفك على كيفك رگبته
خلو الشخص الثاني يم جسار
كعد بيناتهم يفحصهم ، اندار عليه صاح الي
رحت يمه كنبصت و عيني عليهم
مُلاذ : شسوي ؟
أيهم : لا ترحين لـ مكان اكعدي يمي
گال لـ اركان يجيب اله جنطة الاسعافات الاولية
راح اركان يجيبها و اجانا انطاها لـ أيهم
جاس أيهم نبض جسار ،
رجع طلع شاش و ضغط على مكان النزف
رفعنا راسنا لمن اجت الاسعاف
نزلوا من السيارة و أيهم يستعجلهم
رفعوا جسار و المصاب الثاني
و سلطان متخبل و اركان يمه يهدي بي
راح أيهم بسرعه جاب التلفونات و غراضه
قفل السيارة و اجاني بسرعه
اندار لـ اركان حجا بـ استعجال
أيهم : اركان جيب سلطان و تعال ورانا
هز راسه بـ قبول
جر سلطان من ايده و اخذه لـ السيارة
صعده و هو صعد يسوق
أيهم لزم ايدي و اخذني وياه
لـ سيارة الاسعاف صعدت و عيني على جسار
أيهم راواهم هويته خلوه المسعفين يصعد
أيهم : جفوف بسرعه
انطاه المسعف يلي يمه
و وكف يعالجه ، بلعت ريگي
رفعت عيني لـ أيهم ، حجيت بـ هدوء
مُلاذ : بس هو اخوي ما عندي اخو غيره
أيهم اخوي الوحيد رح يموووت
أيهم : اشش بلا هالحجي مابي شي
هسه نعالجه و يرجع مثل الورد
انتِ بس أهدي ، رجفتج خبلتني
حضنت نفسي ادحك لـ جسار
و لـ تعابير وجهه حتى و هو بهالحال مبين عليه التعب عينه زكره و كصته تنزف و حاجبه مشكوك عبست شفايفي ساكته
فزيت لمن فتح عيونه دحك لـ أيهم
مُلاذ : أيهم كعددد
أيهم : أهدي
دنك يحاجي جسار
و جسار يفر عيونه بـ تعب و يرجع يغمض
و أيهم يرجع يصحي ، ون بـ وجع و حجه
جسار : نور وياي انضربت نور
أيهم : مو وياك نور جنت وحدك
جسار : هتان ، رمانه
بلعت ريگي ادحك لـ أيهم العكد حواجبه
و جسار رجع غمض ، يون بـ وجع
رفع عينه أيهم دحگلي
مُلاذ : لان شافك تذكر هتان ما يعرفها عدل هو
سكت أيهم يهز بـ راسه
نزل نظرة لـ جسار ، لحد ما وصلنا المستشفى طلعت روحي نزلوه ع السديه دخلوا المستشفى
اركض اريد الحك عليهم و جسار يهمس
جسار : رمانه ، رمانه تبجي مني
نزل نظرة الي يحجي
حجا يهلوس
جسار : تأذت شوفيها ، شوفـ... رمانه ويينج
غمض عيونه بـ تعب ، دخلوا لـ الردهات يعالجونه
و انا كعدت انتظر ، دحگت لـ تلفوني امي تخابرني
سديت التلفون و درته دحگت لـ سلطان متخبل
و يريد يدخل لـ الغرفة الي بيها جسار ما يخلونه
واحد من الدكاترة كام يصيح عليه
رحت انا بسرعه الهم و أيهم طلع من الغرفة
لزم سلطان و حاجا الدكتور ،
عافهم و مشى بـ سلطان
لحگناه انا و اركان وكف و گال
أيهم : سلطاان انطينا صبر اخوك كعد
بس خل نشوفه شبي انت رجال و جبير
و اخوك ما بي شي لا تخبل روحك
هسه نعالجه و نطلعه ، بس انتظر
سكت سلطان و وكف يمسح بـ وجهه
عافه أيهم و رجع لـ الغرفة يلي بيها جسار
مُلاذ : سلطان كعد و حجا
بس الحادث ماثر عليه ما يكدر يظل كاعد
لا تخاف ما بي شي
فرك كصته بـ وجع و عيونه حمر محصوره دموعه بيهن انا دخلت عليهم صدمتهم كلهم و هو مصدوم بعده ، ابتعد و گال و هو يبتعد
سلطان : رح اخابر باسط ... و اجي
هزينا راسنا بـ قبول
اندار اركان دحگلي
اركان : ما عرفو سبب الحادث ؟؟
مُلاذ : لا ، بس من خابرته
جان صوته تعبان و گوه يحجي
اركان : مُلاذ .. اخاف اسأل و الله
مُلاذ : شنو؟
عكد حواجبه فرك وجهه
انطاني ظهره ، رجع اجاني حجا بـ عصبيه
اركان : جسار عنده شي لـ نور؟؟ يعني..
سكت متنرفز و رجع گال
اركان : افهميييني و فهميني
مُلاذ : لا لا ليش هيج تفكر ؟؟
اركان : شايفه اكثر من مره شلون يباوع لـ نور
و يوم الگلي اخطبها ما يحجيها متأكد
مُلاذ انا مو غبي حاجيني !
مُلاذ : لاا ما يحبها يحب وحدة ثانيه
اركان : متأكده ؟
هزيت راسي بـ قبول و گلت
مُلاذ : يحب هتان
أيهم : شنووو؟!
فزيت متيبسه بـ مكاني
رجليه احسها نملت و عيوني متوسعه
شجابك حظي بس من حجيت سمعتني
درت وجهي اله و حجيت
مُلاذ : شنو؟
دحگتله عاكد حواجبه
أيهم : منوووو يحب هتان؟؟؟
مُلاذ : انت
حكيت وجهي و گلت متوتره
مُلاذ : انت تحبها جنت اسولف لـ اركان
على علاقتكم وياها انت و باهر و أيمن
گلتله انت تحب هتان كلش تحبها مو صح اركان؟
اركان : اي صح
دحگلنا بـ شك و حجا
أيهم : و شجاب حديثكم على حبي لـ هتان؟
مُلاذ : مو .. مو تذكرت تذكرت
انت من سويت حادث و سولفت اله
لمن هتان خافت
ظل يدحك بـ وجهي
سويت روحي دايخه و حجيت
مُلاذ : أيهم جسمي يرجف رح اوكع
لزم بيه و وداني لـ الكراسي كعدت
رفعت راسي و حجيت
مُلاذ : اريد مي
أيهم : اكعدي لا تتحركين اجيبلج و اجي
و هسه نقيس ضغطج زين حبيبي ؟
هزيت راسي بـ قبول و هو راح
رفعت عيني لـ اركان
اركان : صدك دختي ؟
هزيت راسي بـ رفض
اركان : چا ليش كلتي دخت؟
مُلاذ : حتى يضيع السالفه و يخاف عليه
ابتسم اركان تك خد و گال
اركان : شهادة دبلوم عندج مال چذب
مُلاذ : غير هتان اخته
اركان : هاي الجانت ويانا بـ بيت المزرعه؟
مُلاذ : اي نفسها
اركان : هنه ثنين وحدة اعتقد زوجته جانت
مُلاذ : اي لينا بس طلگها
اركان : و هسه شنو السالفه انتوا تزوجتوا؟
مُلاذ : اي نور ما سولفتلك؟
اركان : لا ، اگلج
مُلاذ : ها گول
اركان : هذا الاتزوجها التزوج نور
مُلاذ : شبي ؟
اركان : وين الگا ؟
مُلاذ : شتسوي بي
مسح على لحيته و حجا
اركان : اصير صاحبه
مُلاذ : اي صحيح
اركان : اي وين الگا؟
مُلاذ : ما تلگا بـ السجن
اركان : ها زين شنو اسمه؟
مُلاذ : تطلع اله جنسيه؟
اركان : لا اريد اطلع اله شهادة وفاة
مُلاذ : اي و ارجع للسجن حتى نور تتخبل
الناس تتخرج من الجامعات
انت تتخرج من السجون ، عوف العالم و اكعد
اركان : من عمري 18سنه كل يوميه بـ سجن
بعد ما يأثر بيه
مُلاذ : ليش؟
اركان : اكتل ابوي لو اتعارك بـ الشارع
مُلاذ : خبره خبره ما شاء الله
اركان : و كتلت اسكندر مره علمودج
مُلاذ : يا ليش؟
اركان : جنتي صغيرة و بـ الشارع واكفه
باوعتله طكج و يريد يدخلج جوه
كمتي تصيحين و تبجين
بـ الليل لگيته كاعد وحدة كتلته
مُلاذ : يا و هو شسوا ؟
اركان : ظلمة ما شافني
افتريت اله من فوك الصبه وكفت ورا
و صلخته راشدي و طحتله دك كتل
و هو يصيح و ما يشوفني
تالي وكع على وجهه و انا عفته و رحت لـ بيتي
بعدين رجعت طلعت سويت روحي اساعدة
رغم الوضع بس حصرتني الضحكه
دحكت لـ أيهم اجاني و جايب المي و العصير
و وياه ممرضه بـ ايدها جهاز الضغط
مُلاذ : سلطان وين صار؟
اركان : خل اروح اشوفه و اجيكم
هزيت راسي بـ قبول
و أيهم كنبص كدامي دحگلي
أيهم : بعدج دايخه ؟
مُلاذ : لا
انطاني مي شربت
اخذ جهاز قياس الضغط يقيس ضغطي
أيهم : نازل ، اشربي عصير
اخذت العصير اشربه
و هو وخر جهاز الضغط و اتشكر الممرضه
اتقدم كعد يمي حضنني ، خليت راسي ع متنه
مُلاذ : شنو وضع جسار؟
أيهم : زين هسه نايم عوفو يرتاح
مُلاذ : اريد اشوفه
أيهم : عوفي خل يرتاح شويه ، اگلج
مُلاذ : ها
رفعت عيني دحگتله
دحگلي بـ شك و حجا
أيهم : جسار شعنده وي هتان؟
مُلاذ : ما عنده شي ؟
حجا بـ هدوء مبطن بـ العصبية
و هو يهز راسه يمين و يسار
و يدحك بـ عيوني
أيهم : مُلاذ جسار صارله ساعه جوا
يصيح بـ اسم هتان
وسعت عيوني عليه مصدومة
نزلت راسي مسحت كصتي
رفعت راسي شفته گام وكف و عيونه كلها شر
وكفت بسرعه لزمت زندة
مُلاذ : يا عود انت من كل عقلك
ترا ما بيناتهم شي و جسار
تدنيت على أيهم و شاورته
مُلاذ : يحب نور
دحك بـ وجهي عاكد حواجبة
كز على سنونه و گال
أيهم : لا تجذبيين بطلي الجذب وياي بطلي !
مُلاذ : و الله ما مجذبة يحب نور
من الطفوله هو يحبها و يصيح الها زاجل
ما تشوفه اندعم و هو جاي حتى يرد بـ موافقة
لـ اركان على خطوبته من البنية الي يحبها
أيهم : مُلاذ اذا طلعتي تجذبين ...
مُلاذ : لا تهددني
أيهم : ما مهددج لا تجذبين عليه!
مُلاذ : ما مجذبه انا مو أيهم
أيهم : ليش يصييح بـ اسمها جوه ليش؟
مُلاذ : أيهم شافك و اتذكر اختك طبيعي
أيهم : منين يعرف اختي و يعرف اسمها !
مُلاذ : يا جا غير يعرفها من بيت المزرعه
و بعرسنا جانت موجوده و هو موجود
و احنا نصيحها كدامة طبيعي يعرف اسمها
سكت متنرفز
أيهم : خل يصيح اسمها و ينطقه بعد
و تشوفين شسوي
مُلاذ : شبيك شبيك هو اسم ؟؟
أيهم : لا تسودنيني هتان صغيرة
مُلاذ : ترا مهندسه رح تصير
بالكليه هي حتى مو اعداديه
أيهم : انعل ابو الكليه و الاعداديه
هتاان صغيرة و اختي الوحيده
مُلاذ : و من تزوج بعدين شلون؟
أيهم : ما ازوجها
مُلاذ : بكيفك هي تسد قسمة البنيه
كز على سنونه متنرفز
لزم ايدي و اخذني ويا للـ الغرفة
كعدت ع الكرسي يم جسار ادحگله
و هو حط كرسي ثاني كدام جسار
دحگت عين جسار زركه و ايده مجبسيها
عبست شفتي مقهوره عليه ، رفعت عيني لـ أيهم
اتقدم دنى كرسيه خلاه يم جسار
ندسه ندستين يحاجي
أيهم : جسار شو اكعد خل افحصك ؟
فتح عيونه جسار بـ تعب و انا خازره أيهم
مُلاذ : هستوك تگول خلو يرتاح
أيهم : اي ارتاح نام اله شويه خل افحصه
سكتت و هو رجع عينه لـ جسار
طلع لايت من جيبه خلاهن بـ عين جسار
رجع ضم اللايت ، خلا ابره بـ المغذي
اندار لـ جسار
أيهم : جسار بعدك كاعد ؟
جسار : راسي
أيهم : هسه يصير زين انت وين كاعد ؟
جسار : بالسيارة
دحگتله عاكده حواجبي
اندار أيهم لـ جسار و حجا
بلعت ريگي لمن گله
أيهم : ها حلو ، هتان كاعده يمك
بـ الصدر لو بـ الورا؟
وسعت عيوني على أيهم ، جسار مغمض و ساكت
أمنت گلت مارح يحجي ، فتح عيونه بـ تعب
دحك لـ الضوا الفوكاه و رجع غمض
جسار : بـ الصدر
وسعت عيوني و لطمته على حلگه بالغلط
اريد اسد حلگه و ضربته حيل من صدمتي
دحگت لـ أيهم يلي اندار الي خزرني
بـ لحظتها دخلوا باسط و سلطان و اركان
حاجاهم أيهم و گاللهم وضع جسار
أيهم : انه عندي كم شغلة راجع الكم
اندار لـ جسار دحگله و هو نايم
دحگت لـ نظرته ما تتفسر دار وجهه و طلع
رحت لـ يم سلطان شاورته
مُلاذ : لا تسأله اي شي ترا ما يدري شيحجي
و اذا جاب طاري نور كدام اركان سكته
سلطان : ليش حجا شي ؟
مُلاذ : قصدك شنو الما حجا
رايحه انا و رح ارجع الكم
هز راسه بـ قبول سلطان
و انا طلعت ركض ورا أيهم
شايله عبايتي الاسلامية
و اركض اريد الحك عليه
دحگتله واكف يدور تكسي
مُلاذ : أيهم
اندار عليه متنرفز
أيهم : جسااار شيسوي وي هتان ؟؟
احجي شكو بينهم ؟
مُلاذ : انت صاحي تشك بـ اختك ؟؟
أيهم : ما اشك انه يگلج صاااعده ويا
مُلاذ : ترا ما يعرف شيحجي بسبب الحادث
أيهم : و هتان الي اسمها صارله ساعه بـ حلگه
مُلاذ : اگلك انت منو و على شنو تحاسب ؟
شو حتى غرفتي طفرت الها و كعدت بيها
ما خليت شي بـ نفسك و جسار عرف بيك تحبني
خاف عبالك جسار ابن عمي بس
ترا هو يتخبل اذا صارلي شي و حاسبني اخته
و هم سكت و ما حجا شي لمن عرف
أيهم : هتااان صغيرة
انه غلط و تصرفاتي كلها جانت غلط وياج
اصلاً جنت محرم على نفسي شوفتج
بس ما جنت اكدر اقاوم اكون بعيد عنج
انه غلط و اعترف بـ نفسي
أيهم : لا تقارنيني وي هتان
من صغرها حساسه و تبجي اذا دغيتيها
هتان ما ترهم وي جسار و لا اي شخص ثاني
من تكبر كلش و تنضج يلا وقتها اخليها
هسه ماكو ممنوع حتى يخطر بـ بالها هالشي
مُلاذ : و انت ششفتهم بس لان نطق اسمها؟!
أيهم : ماكو حتى اسمها ما ينطقة
مُلاذ : أيهم حجيك مو معقول !
أيهم : جانت صاعدة ويا بالسيارة
شتسوووي هتان ويا بالسيارة !
مُلاذ : انا شجنت اسوي وياك من اصعد بـ السيارة جنا نسوي شي غلط ؟ لو عادي ما نتمادى ؟!
انت ما تعرف اختك شنو و شنو تضرفاتها؟!
أيهم : لهالسبب انه ما اريد واحد يطخها
تتأثر بسرعه و تتعلق و ...
ضغط حيل على محاجر عيونه
حتى ما يقبل يفكر بـ هالطريقة
من كل عقلة متخبل
شلون جسار ينطق اسم هتان
وكف تكسي و صعدنا ثنينا
راح لـ بيت اهله ، نزلنا فتح الباب بـ المفتاح
دخلنا ، امه تسأل منو اجا
أيهم : احنا
اجت تركض علينا تبوس و تهلي بينا
و أبيل بس سمع حسنا اجا طيارة علينا
حضنته ابوس بي و شابكته
نزلته بـ الگاع لمن أيهم گال لـ امه
أيهم : وين هتان ؟
ام أيهم : اوكف اصيحهم هي و أيمن
أيهم : لا لا تصيحيهم انه اصعدلهم
ام أيهم : ها ليش ؟
أيهم : هيج افاجئ هتان
سكتت خاله و هزت راسها
حسيتها متوتره و تحجي بـ استعجال
و كل شويه عينها تروح على باب البيت
عگدت حواجبي مستغربة
دحگت لـ أيهم يلي صعد الدرج بـ هدوء
لحگته ركض ، شلع گلبي
وصلت يمه فتح باب الغرفة و دخل
دحگت هتان كاعده على الجرباية
خلا ايديه بـ جيبه و گال
أيهم : رمانه ؟
اندارت هتان مصدومة
تدحك لـ أيهم ، رفعت الها حواجبي
لا تنطين ردة فعل يكشفج
دحگتلي و رجعت دحگت لـ أيهم
اندارلي أيهم نزلت عيوني و حكيت كصتي
رجع دار وجهه دحگلها كامت من فراشها
هتان : أيهم شوكت اجيت مادري بيك
حضنته و تأشرلي "شكو"
رفعت حواجبي حطيت اصبعي على حلگي
اسكتها و أيهم حضنها ، وخرت من حضنه
دحگتلي و رجعت عيونها لـ أيهم
اتقدمت سلمت عليه اندارت لـ أيهم و ابتسمت
هتان : جبت رمان وياك؟
أيهم : لا ليش؟
هتان : ها مو گلت رمانه
أيهم : يعني انتِ ما تعرفين هالكلمة؟
هتان: لـ .. لا منين اعرفها ليش شبيها ؟
هز راسه بـ قبول ساكت
كعد على جربايتها و گال
أيهم : جسار گلي هتان اليوم صعدت وياي
اندارت الي هتان تدحگلي
ما اكدر اشرلها ، أيهم يدحگلي وياها
مُلاذ : اي صحيح جسار گاللنا
گلتله حرامات جنا الصبح يمهم و ما شفتها
أيهم : اي و ضاجت مُلاذ لان ما شافتج
گلت نجي نشوفج و نروح ضوجة مُلاذ
حجاها و دحگلي بـ تك عين
هتان : ها اي صحيح ...
هو جنت امشي بـ الشارع
يعني طلعت من الكلية و خابرت أيمن
گلتله ما يجيني و ظليت اتمشى
بعدين هو شافني بـ الطريق
جان مار من الشارع الـ انه بي
گلي اصعد ، استحيت ارده و وافقت
رفع حاجبه أيهم هز راسه بـ قبول
أيهم : وين رحتوا بعدين ؟
هتان : ما رحنا جابني للـ البيت
أيهم : زين ، اگلج شو تلفونج
اريد اشوف التحديث اجا يمج لو لا
هزت راسها بـ قبول
ايديها صارن حمر
كد ما كرصت بـ روحها لان متوتره
راحت على تلفونها يلي على الميز
اخذته و انطته لـ أيهم
كعد أبيل بـ حضن أيهم
و أيهم ساند ايده ع المخدة و يگلب بـ التلفون
رفع عينه دحك لـ هتان و رجعها لـ التلفون
أيهم : منو طاهر ؟
هتان : الـممثل مالتنا
أيهم : خو ما يحاجيج؟
هتان : لا ما يحاجيني
بس حافظة رقمه لان هو ممثل
هز راسه أيهم بـ قبول و رجع عينه ع التلفون
شوي و سده و انطاه لـ هتان
خازرته خزره ، اخته و من حقه يخاف عليها
بس ليش ياخذ تلفونها ابد ما حبيت تصرفه
رفع نفسه و گام وكف
أيهم : ما واصل الج التحديث
هتان : بالايام الجايه يوصل
أيهم : اي ، جسار مسوي حادث
شهكت هتان مصدومة ، حالف يموت البنية
خلت ايدها على حلگها
و انا عيوني علگت بـ كصتي
كد ما اشرت الها حتى ما تنطي ردة فعل
دحگتلي عيونها مغوركه ، حجت تسيطر ع نفسها
هتان : خطيه ما يستاهل
أيهم : اي خطيه
نزلت راسها و بلعت ريگها
هتان : الله يگومه بـ السلامة
أيهم حاط عينه بـ نص عينها
و يدحك لـ وجهها بـ تركيز
مُلاذ : امين ، هو كعد الحمدلله
الباقي سهل ما دامه كعد
اندار أيهم دحگلي
أيهم : بس بعده وضعه خطر
رفعت عينها هتان تدحگلنا
لكيتها مدمعه ، أيهم داير وجهه الي
مسحت دموعها بسرعه و صعدت ام أيهم
بـ ايدها صينيه بيها كاسات عصير ، قدمتها النا
أيهم : لا يمه ما اريد خل اشوف أيمن و اجي
ام أيهم : دشرب شويه مو صارلي ساعه اسوي
أيهم : ما اشتهي حبيبتي عاشت ايدج
سكتت امه مبتسمه
طلع و عافنا ، اتقدمت الي انطتني عصير
مُلاذ : و الله عمه ما اشتهي شي هسه
عاشت ايدج تعبناج
ام أيهم : شبيج عمه مخطوف لونج شو؟
لزمت وجهي تدير بي منا و منا
بانت على ثغرها ابتسامة و گالت
- خاف حامل
انتفضت و گلت : لا عمه مو حامل گولي يا الله
- لا ليش حلو الطفل
مُلاذ : بعد انا ماكدر هسه
ان شاء الله بـ المستقبل
- بس اشوف اخو لـ أبيل مو ؟
هزيت راسي بـ قبول ساكته
اتقدمت على هتان و حجيت بـ صوت ناصي
مُلاذ : لا تخافين جسار ما بي شي
هو لان مسوي الحادث كام يحجي
كل شي يجي بـ باله و گال اسمج اكثر من مره
و أيهم يمه عباله بينكم شي
رفعت راسها دموعها على خدها
و عابسه شفتها
هتان : ما بيننا شي و الله
مُلاذ : اعرف بس أيهم يخاف عليج
ما يريدج تتاذين و راد يتأكد
لا تبجين هسه امسحي دموعج
رفعت عينها الي و ما كدرت
دموعها نزلت اكثر ، غطت حلگها و دارت وجهها
ام أيهم انتبهت النا
-شكو عمه صاير شي؟
مُلاذ : لا ما صاير ابن عمي مسوي حادث
انصدمت ام أيهم ظليت احاجيها
و بعدين اجا أيهم ، اتقدم من بيناتنا
حضن هتان ، هي هم حضنته
دحگت لـ عيونها رح تموت من القهر
و كاتمه روحها كدام أيهم ، ابتعد و حاجا أبيل
أيهم : أبيل حبيبي انت هسه ظل يم بيبي
بعد شوي نجي و ناخذك هسه عدنا شغل
هز راسه بـ قبول و حضن ابو
كوه يلا طلعت أيهم من يمهم
اخذنا تكسي ، رحنا لـ المكان العفنا بي سيارته
صعدنا بيها و رحنا لـ المستشفى
مُلاذ : تصرفك ابد ما عجبني
دار عينه لـ الطريق و حجا
أيهم : عندج اخت اصغر منج
و مقاربه لـ عمر هتان و تصرفاتها مثل هتان
و قيسيها على نفسج بعد ،
أيهم : تشوفين تصرفي مبالغ بي
بس ما تعرفين هتان شكد تعنيلي
و شنو تحملت علمودها و شلون اخاف عليها
و انه مو گرن حتى اخلي اختي تصعد وي واحد
لو تحب الها واحد و اظل وجهي وجهه فاهي
و هتان بعدها صغيرة اعيد و اكرر
لا تحجين على شعور انتِ ما تعرفي
سكتت و درت وجهي عنه
هو يغار من كل شي ،
عوزه يحنطنا انا و هتان الا شويه
تذكرت ملاك و شون اخاف عليها
حسيت بـ شعوره و سكتت
هتان :-
طلعوا من يمي و انه انفجرت بـ البجي
قفلت باب الغرفة و نمت بـ فراشي
الغصه مكطعتني و ابجي بـ حرگه
مسحت دموعي و اتذكر اليوم الصبح
لمن شفته و شكد اتعاركت ويا
نمت على ظهري عيني ع السكف
و دموعي تنزل منا و منا و انا اتذكر كل لحظة ...
طلعت اتمشى من الكُلية
ايديه بـ جيبي و سماعاتي بـ اذني
امشي و احس روحي ميته من التعب
بـ بالي الف شغلة
خصوصاً البارحه لمن شفت امي تبجي
و حذرتني احجي الصار لـ أيهم و أيمن
رفعت عيني لمن حسيت بـ شخص يمي
فزيت مبتعده لمن دحگت لـ هادي واكف يمي
وخرت السماعات من اذني و هو مبتسم
هتان : شتسوي هناا؟
هادي : اهدي ما اسوي شفتج و اجيتج
تعالي وياي عازمج على اكل
هتان : شكراً ما اريد رح ارجع لـ البيت
درت وجهي اريد اخابر أيمن
التفتت فازه على لزمة هادي الي
هتان : خيرررر وخر ايدك
دفعت ايده و دفعته عني
عاين الي مصدوم ، مشيت اريد ارجع
اتقدم لزمني مره ثانية
هادي : خل احاجيج انا ارجعج زين !
هتان : ماا اريد هادي عوف ايدي
هادي : هتان ارحمي بـ حالي
هتان : عوفنني و الله أيهم اذا درا بيك يشنقك
هادي : يا أيهم هذا ههههه
اسمعيني هتان اريددج و الله اريدج
هتان : عوفني يا اخي فك ياخه عني
و انه احجي فزيت على صوت جسار
جسار : رمانه
انداريت دحگتله و ايدي لازمها هادي
نزع مناظرة و اتقدم عليه
هادي : منو هذا ؟
جسار : انت المنو؟
نترت ايدي من ايد هادي
و حجيت كلامي يتلعثم كوه احجي
هتان : هادي روح منا
راد يحجي و جسار دفعه عني
قبل لا يكمل كلامه هادي
رفع ايده جسار و ضربه
عطت بي مصدومة
هتان : شسوووووويت؟
اندار دحگلي خزرني ، حجا بـ عصبية
جسار : امشي اصعددي
هتان : هااادي
صاح هادي بـ عصبيه
هادي : لك كـ...
قبل لا يكمل اندار جسار
ضربه مره ثانيه و الناس التمت يمنا
و انا عيني رح تطلع من مكانها من صدمتي
جسار : اصعدددي گللللت
لا اكضي بي التوبه هنا
هتان : ما اصعدد
دفعني و اتقدم بسرعه لزم ايدي
غمضت عيوني حيل متوجعه من لزمته
و ما اريد اصعد بـ السيارة
هادي هم رجع صيح ، عافني و راح عليه
الناس الي هناك لزموا ما يخلونه يوصل لـ هادي
ركضت الزم بي و اجر زنده
اندار عليه دحگلي دفعني لـ السيارة و يصيح
جسار : اصعددي
و انه ما اريد اصعد ، دفعني بـ داخل السيارة
سد الباب ، لبس مناظرة و اجا من الجهه الثانية
صعد انداريت عليه بـ كل جسمي
معصبة من تصرفه
هتان : شسوويت انت نزززلني
انداريت افتح باب السيارة
اول ما فتحتها جرها سدها حيل
الا شوية تنكسر
دار وجهه عني و رجع ظهره ع الكشن
انا ظليت افتح بـ الباب ما تفتح
لگيته قافلها من يمه ، دحگتله
هتان : نزلني
جسار : يعرف أيهم بهذا الـ***؟
هتان : لاا تفشررر لا تفشر
جسار : الظاهر ما تقبلين نفشر ع العزيز الـ***
هتان : شتريد شتريد شعليك ؟
نزلني راح يروح يگول لـ أيهم نزززلني
جسار : و هسه خفتي من أيهم
ما عرفتي تخافين و انتِ تفترين وي هالـ ****
وسعت عيوني عليه ادحگله
رفعت ايدي و ضربته راشدي مصدومة
دار عيونه الي متنرفز و خازرني
جر ايدي الضربته بيها لواها ورا ظهري
صار هو وراي ، غمضت عيوني متاذيه و بجيت
هتان : عوف ايددددي توجعني عوفها
ثواني و انفكت ايده من ايدي
درت وجهي دحگتله ابجي ،
هو عاكد حواجبة يدحك بـ الفراغ
رفع نظرة دحگلي ، رفع اصبعه بـ وجهي
حجا بـ تحذير
جسار : مرة الثانية ديرباااالج ترفعين ايدج
لا تتجاوزين حدج وياي
هتان : شنوو ما خفتي
شنو ما خفتي من طلعتي ويا
انت تعرف هذا منوو ؟ شفتني اضحك ويا؟؟
لو انا جنت اتعارك حتى يعوفني
جسار : و ليييش ما قبلتي عليه؟
هتان : اخوو لينا لان اخو لينا طليقة أيهم
رح يروح و يگول لـ أيهم و أيهم رح يفهم غلط
بعدين انت شعليييك انه ويا انت شكو ؟؟
اجيت و ضربته بـ نص الشاااارع
جسار : و شيريد هذا منج ؟
هتان : معليك ما يخصك
احجي و ابجي و دموعي عشرة عشرة
جسار : احجي لا انا الاروح و اگول لـ أيهم
هتان : شعليك شلك علاقة
اروح اگول لـ اخو نور لو لـ نور انت تحبها؟؟
ما عليك بيه ماا عليك
دحك بـ وجهي ذبلت نظراته
دار وجهه يدحك لـ الطريق
حجا بـ هدوء بعد ما بلع ريگه
و عينه مملية دموعه
جسار : رايح لـ بيتهم حتى يخطبوها مني
نزلت دمعته دار وجهه يمسحها
ردت احجي دحگلي و گال بـ عصبية
جسار : هادي منو؟
هتان : يحبني من زمان
دحك بـ وجهي و رجع عينه ع الطريق
اتنرفز و حجا بـ عصبية
جسار : طبعاً يحبج اذا انتِ هاي فرتج
و زرورج الطالعه طبعاً يحبج
كل مره انصدم بـ اسلوبه
انداريت افتح الباب و ابجي ما يفتح
رجعت انداريت على جسار ضربته
روحي شاطت من كلامه
حجيت بـ حرگه و انه اضرب بي و ابجي
هتان : تستااااهل تستاهل كل اليصير بيك
نقذت روحهاا نور من ما قبلت بيك ، حيل ويااك
كون يتهنون سويه و يحترك گلبك
مثل السويته بيه هسه
الله ياخذك الله ياخذك انت وهااادي نزلني
دحك بـ وجهي ساكت و انه روحي مفرفحه
دحگتله دموعه بـ عينه و ساكت
استوعبت كلامي بس كلامه كلش قهرني
و انه ما مسويه اله اي شي ،
كمل يسوق و انه اكرض بـ اظافري
و دموعي تنزل ، اجاني اتصال
ما طلعت التلفون و لا جاوبت
رجع الاتصال مره ثانية
جريت الجنطة بـ عصبية طلعت تلفوني منها
دحگت رقم أيمن غطيت وجهي ابجي
انداريت دحگتله ، حجيت و انه ابجي بـ صوت
هتان : نزلني خل يجي أيمن ياااخذني
ما جاوبني عينه ع الطريق
انداريت احاول افتح الباب ما تفتح
ردت انزل الجامات ماكدر ، رديت على أيمن
احاول اخفي الغصة الي بـ صوتي
هتان : ها أيمن
أيمن : هتانيزو وير ار يو ؟
هتان : رح توصلني عنود لـ البيت
أيمن : ياهي عنود ؟
هتان : صديقتي ما تعرفها
أيمن : وين جنتن؟
هتان : رحنا لـ مطعم و هسه جايين
أيمن : گلتي الي لو لـ أيهم لو لـ باهر؟
هتان : لا عبالي تقبلون
أيمن : لا هتان مرة الثانية لا تعيديها
خلي عدنا علم ، امي بالبيت وحدها
استعجلي بـ رجعتج اخلص شغلي و اجي
هتان : تمام
سديت الاتصال امسح دموعي
و عابسه شفتي كوه مسكته روحي
رفعت تلفوني لمن اجاني اتصال ثاني
عبالي أيمن دحگت لـ رقم هادي يتصل
بعدني ادحك انسحب التلفون من ايدي
جاوبه جسار يحجي بـ عصبية
جسار : شتريد ؟
اسمع هادي يتعارك ع التلفون
و جسار يسمع اله اخير شي
وسعت عيوني بـ صدمة
على جسار لمن عفط اله
جسار : اوصل يمها و شوف اذا ما اكسر رجليك
و اخلي اخوانها يكسروهن وياي
اندار دحگلي خازرني
رجع يحجي بـ عصبية
جسار : اوصل يمها بعد و شوف
شاربي مو عليه اذا ما اكسرك
سد التلفون و شمره بـ حضني
و انا اعصابي محترگه شعليه هو شعليه
تجى ايده ع الجامة يمسح على شواربه
جر باكيت الجكاير يدخن
اجا اله اتصال
جاوب و گال جاي بـ الطريق
سد الاتصال و شمر التلفون
جسار : وين ما تشوفي تخابريني
هتان : شعليك انت شعليك بيني وبينه
يمكن عجبته زروري مثل ما تكول شعليييك؟
انت تحب الشريفات يعجبنك الشريفات
الي من راسها لـ رجليها متغطيه روح عليهن
انا اطلع زروري مو شريفة
اسوي هيج حتى هادي ينعجب بيه معليك انت
جسار : هتان احجي عدددل
انا مااا جاي اگلج انتِ مو شريفة
ما عندج اخوان يشوفوج من تطلعين انتِ؟
عميان لو شنو سالفتهم
ادحگله عينه على جسمج و رجليج
هتان : و انت هم عينك على رجليه و جسمي
كل ما تحجي تذكر لبسي !
جسار : شهالكلان خرا !!
تعرفين روحج شجاااي تحجين
انا انبهج لان انتِ غبيه ما تفكرين
هتان : اي انا غبيه نزلني
و روح لـ نور الذكيه المحتشمه
جسار : ما مسويتلج شيي لا تحجين عليها!
هتان : انه ما جاي احجي عليها
انه احجي عليك تتدخل بـ اشياء ما تخصك
لا اختك و لا امك و لا بت عمك
كل شي ما اقرب الك ، لذالك معليك بيه !
جسار : انتِ شجاي تسوين؟
انتقام هذا لو شنو ؟
حتى من اعترفتي سويت روحي ما ادري
لان ادري بيج تخجلين و تتاذين من هيج موقف
و لا ردت اخرب علاقتي بيج
بس انتِ جاي تنتقمين مني على لا شيء !
هتان : ما انتقم منك
تتدخل بيه و انه ما اخصك و لا اعود الك
و على سالفة الاعتراف جنت غلطانه
ما عندي شي اتجاهك انه
ظنيته حب بس طلع مجرد اعجاب و انتهى
جسار : احسن
دار وجهه مني ساكت
و رجعوا يدكون عليه اخير شي عصب
كام يصيح بـ اللي يدك عليه
نزلني بـ باب البيت بعدني اريد انزل گال
جسار : انا لـ هالدرجة سيء ؟
درت ادحگله ساكته و هو يدحك بـ وجهي
ما جاوبت ، هز راسه ساكت و انه نزلت
عافني و راح ...
اندكت باب الغرفة
ما جاوبت و لا فتحتها
سمعت صوت أيمن
أيمن : هتان
سكتت بلعت ريگي
رجع كرر اسمي و انه ساكته
أيمن : نايمة؟
هم ما جاوبت
دك الباب اكثر من مره
بـ الاخير سويت روحي فزيت و حجيت
هتان : نعسانه خلوني اناام
أيمن : ليش قافله الباب ؟
هتان : حتى ما تدخلون عليه الصبح
أيمن : اگلج شوفي صورتي حلوة؟
ما شفتها سكتت ثواني
و هو رجع گال
أيمن : ها حلوة ؟
هتان : اي
اختفى صوته و ابتعد عن الغرفة
كعدت على حيلي امسح بـ دموعي
عاينت لـ رسائل من مُلاذ
دازتلي صورة جسار و جواها تطمني
دخلت ع الصورة ، اعاين بـ وجهه
ايدي على حلگي و ابجي ، الوم روحي
ضميت روحي بـ الفراش
و التلفون بـ ايدي اعاين لـ صورته
جسار كان عبارة عن جمره
شلتها بـ نفسي و خليتها وسط گلبي
و هالجمره حرگتني و حرگت روحي...
مُلاذ :-
اهل جسار و اهلي و نور و عمتي
ضرغام و اركان و اهله
الكل ملتمين بـ بيت اهل جسار
و يتحمدون اله بـ السلامة
اجت نور طايرة سلمت على جسار
و تبجي خلتني ادك و الطم
و الكل يدحگولها بـ استغراب
دخلت لـ يم جسار انطيته مي و حجيت
مُلاذ : لا تظل تجاوب على كل الي يحاجيك
هز بـ راسك و اسكت
حجا بـ صعوبه
جسار : نور لا تبجي
مُلاذ : معليك بيها هاي المخبلة
عبالها من وراها سويت الحادث
انا اعلمها و اعلمك
صارلي هواي فاكه ياخه عنكم اصبرولي
ابتسم جسار ساكت
و انا طلعت لمن دخل سلطان
گال اصدقاء جسار بالباب رح يدخلون
هزيت راسي و طلعت من الباب الثاني
دخلت لـ المطبخ خليت الصينية
طلعت من المطبخ رحت لـ نور دحگتلها
مُلاذ : انتِ تحجين صددك؟؟
نور : من وراي كله من وراي
همزين الغرفة فارغه حجيت متنرفزه
مُلاذ : نور ترا جاي تشككين الكل بيج
اسكتي لا تبجين مو ذنبج
هذا حكم رب العالمين مقسوم يصيرله حادث !
شهالتمسلت شنو من وراج و مكطعه روحج
نور : اعرف بي جان يحبني
و وافقت يجي اركان يخطبني منه!
مُلاذ : هاي اسمها مسلته
انتِ گلتي "جان" هسه ما عده شي وياچ
لا تتصرفين هيج كدام اركان
مُلاذ : قابل راح انتحر لان رح يخطبج واحد منه؟
ترا تصرفات زعاطيط هاي و تعرفين جسار شنو
سكتت و مسحت دموعها
و ايديها ترجف
مُلاذ : كومي غسلي بسرعه
رفعت عينها تدحك بـ عيني
مُلاذ : كومي غسلي و خل يروحون الخطار
راح اخذج انا لـ يم جسار و اخلي يشيل هالفكرة السخيفة من بالج
كامت تمسح بـ دموعها
اخذتها تغسل ، جريتها وياي لـ المطبخ
قبل لا ندخل المطبخ حجيت بـ تحذير
مُلاذ : انتِ مره ابجي بعد
عفتها و دخلت اضوج من تبجي
اتنرفز كلش من تفكيرها تلوم روحها على كلشي
و صارلها من اجت لـ هسه على هل رنه
راكان يبجي اخذته نور من عمتي
و راحت لـ الغرفة تنومه ، درت عيني لـ ملاك
ملاك : اذا يحللون دم الخطار يطلعلهم جاي
هاي رابع مره اصب الهم
مُلاذ : دعوفيهم خيولون
ملاك : حاجي امي ايديه راحت
فيروز : عيب ماما غير خطار
مُلاذ : خطار مستهترين
منو يشرب اربع مرات چاي
حتى اذا الخطار ياكلون و يشربون هواي
ينوعون عصير كيكه فد شي ذولة لطشو بـ الچاي
فيروز : انا اسكت احسن
لان انتِ ما اكدر اجادلج بـ هاي الهوسه
مشت تريد تطلع من المطبخ
حجيت و انا متخصرة
مُلاذ : على كيفج عيني ست فيروز
اسفين ما نحجي بعد
دحگتلي و ضحكت
ابتسمت و هي طلعت
رحت لـ يم عمتي
مُلاذ : نوروسه تزوجت و صارت معدله
و ام بيت عيني لو ندري هيج
جان زوجناج من زمان
اندارت عمتي تضحك و تمسح بـ عيونها
مُلاذ : ترا حرام عليكم تبجون و جسار زين
المفروض تحمدون رب العالمين عايش و ما بي شي
منارس : خطيه كل ما اشوفه انقهر
مُلاذ : اي كم يوم و يصير زين ، امه وين ؟
منارس : تنظف غرفته حتى ينام بيها
مُلاذ : زين روحي عمه ارتاحي
و انتِ هم خاله انا و ملاك نكمل
ام اركان : لالي و ليان
ابقن وي البنات مو تعوفنهن
هزن راسهن بـ قبول
و طلعت عمتي و ام اركان
انداريت لمن دخل عزيز
عزيز : چاي
مُلاذ : عزيز شنو السالفه !
هاي خامس مره ؟
عزيز : سلطان كل ما يسكتون
يگللهم تشربون چاي؟
و همَ يهزون راسهم و انا مسويني ابو توصيل
اجيب و اودي
مُلاذ : افتح مكالمة افتح و من تدخل يمهم
انطي التلفون لـ سلطان
عزيز : بـ شارب الله و شاربج احنا
رزلي لعبي بي لعب لا تقصرين
ضحكن البنات و انا دكيت على رقم عزيز
جاوب على الاتصال و هو يضحك
صبت ليان چاي و ودته لـ عزيز
دحگلها مبتسم ، و هي مدنگه ، راحت لالي وراها
لالي : يلا ليان تعالي امسحي الطباخ يلا
اخذ عزيز الجاي و راح
و ليان راحت تمسح الطباخ و عينها ع الباب
لالي : عدل عدل امسحي عوفي الباب
ليان : جاي امسح
لالي : عدل
درت عيني لـ ملاك
تذكرت روحي شسوي بيها من اشوفها يم سلطان
خليت التلفون على اذني ،
شويه و سمعت صوت سلطان
سلطان : الو؟
مُلاذ : تعال تعال لـ المطبخ
سلطان : ليش شكو؟
مُلاذ : تعال و اگلك شكو
سلطان : جاي
سديت الاتصال
شويه و دخل سلطان ، دحگلنا و دحك لـ ملاك
اتقدمت و انا احجي
مُلاذ : تعال احاجيك برا
سلطان : شكو؟
طلع من المطبخ
وكفنا بـ صف باب المطبخ
مُلاذ : الله يخزيك سلطان شبييك شبيك
شنو كل شوية تگللهم تريدون چاي هاي خامس مره
سلطان : مال الوجع شحاجي قابل ؟
مُلاذ : لك يمعود الچاي خلص و احنا خلصت روحنا
عاجبك تشربهم چاي اخذ القوري يمكم
و افتر عليهم و صب الهم
سلطان : وجعة امي شبيج متحلفة
مُلاذ : البنات تعبن و انا تعبت
و انت تسوي عروض مال چاي
ترا جسار تعبان صاير جنه ليمونه من التعب
من يسكتون عوفهم خل يسكتون
سلطان : لو ما اخت مرتي المستقبلية اعلمج انا
مُلاذ : ماكو الك مره
سلطان : بكيفج هيه
مُلاذ : چا بكيفك
سلطان : عوفي مرتي لا تتعبيها
مُلاذ : ايع دمشي روح منا
و لا تدزون واحد ع الچاي بعد
سلطان : التلفزيون القديم
مُلاذ : تلفزيون قديم و لا مكناسة
غمني رجع غميته عافني و راح
انداريت ، دخلت المطبخ
لالي : ترا صار اكو تجسس
مُلاذ : اعرف اعرف
ملاك شنو رأيج تمسحين الطباخ وي ليان
ملاك : لالي الفتانه و الله ما سمعت هواي
قليل كلش كلش
مُلاذ : ملاك تمسحين الطباخ
و ترحين تكعدين يم امي
وين ما تروح ترحين وراها زين؟
سكتت مغندبه
ملاك : مو طفله انا
مُلاذ : طفلة و ما تبقين وحدج
لا تخليني اعيد و اكرر
ملاك : ما مسوية شي
مُلاذ : اعرف ما تسوين شي
و ما جاي اگلج تسوين شي
بس چاي اگلج خلصي و روحي يم امي
هزت راسها و سكتت
و انا كملت الشغل و الخطار راحوا
طلعوا الكل من المطبخ
سولفلنا جسار عن الحادث
جاي يمشي بـ سايدة و طالعله ابو السيارة صفح
اساساً ابو السيارة عايش و گال هو الغلطان
جانت عينه بـ التلفون و هو يسوق
اهل الولد زينين و اتعذروا من جسار
لان اتضرر بسبب ابنهم و انحلت المشكلة ...
نور :-
فتحت تلفوني لمن اجتني رساله
دحگت من اركان دازلي
اركان : وين كاعدة؟
نور : بـ الغرفة يم امك و عمتي و خاله فيروز
اركان : راكان نايم ؟
نور : لا يشرب مميه
اركان : جيبليا
نور : شتسوي بي ؟
اركان : اريد اشوفه
نور : تمام
اركان : انتظرج بـ الاستقبال
نور : غير جسار و الولد هناك؟
اركان : لا طلعوا كلهم بس أيهم يمي
اذا تحاجي مُلاذ يتبخر
ضحكت و گلتله تمام
شلت راكان و گمت
منارس : وين ؟
استحيت اگللها رايحه لـ اركان كدامهم
هسه يگولون بعدهز ما مخطوبه و تركض اله
نور : رگبة راكان تدمرت حليب اريد اغسل اله
هزت راسها عمتي
و انا طلعت حاجيت مُلاذ تصيح لـ أيهم
خابرته شوي و طلع من الاستقبال
و انا واكفه على صفحه ما شافني
راح گبل على مُلاذ ، و راحوا بـ اتجاه المطبخ
فتحت الباب مديت راسي ادور اركان
دحگتله كاعد ع القنفه
دخلنا انا و راكان رفعت ايد راكان
احركها بـ معنى "هلو" و احجي
نور : انا اجيت عمو اركان
رفع راسه اركان مبتسم
اتقدم علينا و انا شايله راكان
اشر اله بـ ايديه تعال
خلا راكان راسه على متني و يدحك لـ اركان
اركان : اخذه لو يبجي
نور : ما اتوقع يبجي جرب حظك
ابتسم اركان و اخذ راكان من ايدي شاله
بوس خدودة ادحگله و مبتسمه
گلبي حسيته يرفرف على منظرهم
راكان ما انطا ردة فعل يدحك بـ وجهه اركان
اركان : يشبهه عزيز مدري يشبهج
مادري بس يشبهكم
نور : اي الكل يگولون
اركان : ما طالع على ابو الكـ*** يمكن
نور : جؤ جؤ جؤ اركان شبيك
قبل ما جنت هيج تفشر شبيك هسه
اركان : السجن فسدني
نور : لا و الله صاير عدواني كلش
رفع حاجبه و انا سكتت
نور : يعني اقصد تتعارك هواي و تغلط
اركان : عدواني شتتوقعين مني ؟
نور : بالغلط گلتها ما اقصد
هز راسه ساكت
اندار و كرص خشم راكان بـ خفة
اركان : اگلج ابو وين بيا سجن ؟
نور : ما اعرف
اقترب و انا تراجعت بـ خطواتي
بلعت ريكي معلگه عيوني عليه
اركان : نور
نور : شتريد من عنده ؟
اركان : ما اريد شي اريد اعرف
نور : ما اعرف و الله
سكت يدحك بـ عيوني و انا توترت
ما يسأل هو هيج اذا ما عنده فد شي بـ عقله
انطاني راكان بـ ايدي اخذته
نور : ضرغام راح؟
اركان : لا بعده واكف برا يريد يوصلنا
نور : ها تمام
اركان : ليش سألتي؟
نور : هيج خاله منارس كالت ضرغام
اجا وي العميد و سألت ، عبالي راح
هز راسه ساكت
اركان : شوكت ترحون انتوا؟
نور: هسه شويه و نروح
اركان : من تريدون تروحون گليلي
نور : ليش؟
اركان : حتى احنا هم نروح
نور : منتظرني اروح حتى تروح؟
هز راسه بـ قبول ابتسمت
نور : تمام انا رح اطلع
اركان : نونه
نور : ها
اركان : احبچ
دحگتله فازه ، ابتسامة واسعة
انرسمت على شفتي
نور : انا هم
حجيتها و بسرعه طلعت من يمه
شلعت خدود راكان من گد ما بسته
كل ما افرح ابوسه اخلي خدودة يصيرن حمر
و من يضوج يكوم يبجي
دخلت لـ الغرفة دحگت ام جسار واكفه
و عمتي و حاله فيروز و الكل يعدلون بحجاباتهم
نور : شكو؟
منارس : خل نصعد نشوف جسار و نروح
هزيت راسي بـ قبول
صعدنا يم جسار و حتى الولد صعدوا
دخل العميد خالد يسلم على جسار
و اتحمد اله بـ السلامة و وياه ضرغام
سلطان : اكعدوا شويه بعد
مُلاذ : لا حتى جسار تعب
جسار : ابقوا شوية و روحوا
مُلاذ : هاي بعدنا ما رايحين
ظلوا يسولفون ويا و ينبهونه على نفسه
انداريت لـ لالي واكفه يمي ، همست
لالي : هذا شبي يباوعلي؟!
نور : منو؟
لالي : هذا الي وي رجل عمتج
ضرغام مدري شسمه
رفعت عيني ادحك لـ ضرغام
عينه مو عليها يدحك لـ مُلاذ الواكفه يمها
و تحجي وي جسار
نور : يدحك لـ مُلاذ
لالي : مساع جان يباوعلي
نور : يمكن بالغلط
رفعت اكتافها بـ عدم معرفة و سكتت
دورت بـ عيونها ، دحگنا لـ ليان يلي دخلت
اتقدمت وكفت يم لالي ،خزرتها لالي خزره
ما افتهمت شكو
دغتها و تحاجيها بـ همس ما اسمعها
الكل يحجي وي جسار
بس احنا على صفحة واكفين
اركان : شكو؟
اندارت لالي تدحگله و ليان واكفه وراها
همست لالي بـ صوت ناصي
لالي : نريد نروح لـ الحمام
اركان : تعالن
لالي : لا نروح وحدنا هسه بسرعه و نجي
اركان : خل اجي وياجن الجوا فارغ
لالي : بكيفك بس احنا بسرعه نجي
و امي هنا تظل وحدها عبالها شو شصاير
و رحنا كلنا اذا تريد ابقى يمها
اركان : بس لا تتأخرن
لالي : طبعاً
لزمت بـ ليان و طلعن من الغرفة
عگدت حواجبي مستغربة لالي معصبه من ليان
طلعت امشي وراهم بـ هدوء ما مرتاحة
- امشي كدامي
ليان : شبيج لا تجرين بيه هييج
ايدي گامت توجعني !
لالي : و عساها توجعج تحررركي
نزلن و انا وراهن وكفت بـ الباب
و هنَ طلعن لـ الحديقة
اول ما صارن خارج البيت و بعيدين عن اهلهن
رفعت ايدها لالي و فرت وجه ليان بـ راشدي
ردت اركض عليها و اوكفها بس ثبتت خطواتي
لمن سمعت صوت ضرغام يمي
ضرغام : عوفيها
نور : بس ضربتها
سكتنا لمن حجت لالي بـ صوت واضح
لالي : شووووكت تتوبين انتِ؟؟
الا من يعرف بيج اركان و يطيح حظج
ليان : معليييج انتِ ما مأثرة عليج
و لا طفلة حتى تضربيني
لالي : ثوله انتِ مو طفله
شمي ريحة ملابسج السم هذا منين تجيبي
ليان : معليييج
رجعت ضربتها مره ثانية كامت تبجي
تريد تضرب لالي ، لزمت لالي ايديها
لالي : و الله اروح و اگول لـ اركان تدخنين
اذا ما بطلتي و الله اروح و احجي اله
كافي التصرفات القذرة هاي
الله خلا عندج عقل استخدمي
كممت حلگي مصدومة ليان تدخن؟
ليان : معليييج شلج علاقه
لالي : من يصير حالج حال الجلب
و تتمرضين عود كليلي شلج علاقه
لج بابا اصحي اصحي التدخين ياذيج
ذاك اليوم مو اجيتيني فحطانه و گلبج يوجعج
ليش هيج تسوين بـ اركان ليش ؟!
بيش مقصر وياج احنا بيش مقصرين وياج
ليان : عاجبني
لالي : انتِ اشربي بعد
اذا ما اشوفج الاعجاب على اصولة
و اخلي اركان يراويج نجوم الظهر
لان انتِ ما يفيد وياج اليوم تشربين جكاير
باجر شتشربين ؟ اتصرفي عدل انتِ مو صغيرة!
سكت تباوع بـ وجهها
لالي : جيبي الباكيت
ما قبلت تنطيهيا
ظلن يتعاركن بالاخير لالي طيحتها بـ الگاع
ودت اروحلهن ضرغام ما خلاني
ضرغام : انتظري خليهن
تريد تاخذ الباكيت منها
اخذت لالي الباكيت منها ، گامت بسرعه
شمرته من السياج و هي كامت تبجي
كامت ليان ضربت لالي و هي تبجي
رجعت عليها لالي شبعتها راشديات
طلع ضرغام بسرعه من يمي
راح الهن اندارت لمن انلزمت ايديها
ضرغام : كاااااافي
خزرته و نترت ايديه
لالي : كومي ادخلي جوا
ليان : معليييج بيه انتِ
لالي : كومي ادخلي
لا تخليني اسحلج و ادخلج
كامت ليان معصبه و تبجي
انا ضميت روحي هسه يگولن تتجسس علينا
دخلت ليان تبجي و راحت لـ الحمام
رجعت وكفت يم الباب ادحك لـ ضرغام و لالي
لالي : خير ؟ اعرفك تعرفني تلزم ايدي ؟
ضرغام : الظاهر ما تتذكريني
لالي : اتذكرك بس من اتذكرك مو معناها
اخليك تاخذ راحتك و تلزمني !
عاف ايديها
و رفع ايديه بـ استسلام
ضرغام : العفو بـ الغلط
بس ردت اوكفج
لالي : شتريد موكفني ؟
ضرغام : علميها بدون ضرب
لالي : ما فهمت؟
ضرغام : علمي اختج الصح من الغلط
بدون ضرب و اذية
لالي : انت من شوكت هنا؟
ضرغام : من البداية بس لحظة
انتِ ليش عصبيه تكدرين تحجين بـ هدوء
لالي : جاي احجي بـ هدوء
تشوفني جاي اصيح
ضرغام : على كلاً اجيت انصحج
لالي : ما احتاج نصيحه اختي و اعرف الها
ضرغام : تعرفين الها بالضرب؟
لالي : اي لان حجيت وياها و ما فاد
و انا مو متوحشه و مخبله حتى اضرب اختي
بس لان تدخن لو ما مراويتني الويل
و ما تتصرف عدل لحد ما خلتني اضربها
حتى تفهم هالشي مو بـ صالحها
ضرغام : انتِ اكبر منها
لالي : اي .
ضرغام : حاجيتيها بـ هدوء؟
لالي : لا گبل رحت كتلتها
اگله بزعتني و خلتني اخير شي اضربها
يگلي حاجيتيها بـ هدوء ، طبعاً حاجيتها !
ضرغام : شگلتلج؟
لالي : تاكل تبن
حجت لالي تقلد عليها
لالي : احب ادخن
ابتسم ضرغام يدحگلها و هي عصبيه
عافته و اتقدمت ع الباب ، دخلت بسرعه جوا
هستوني داخله و شفت اركان و ليان جايين لـ الباب
و دخلت لالي دحگلها اركان اتقدم عليها و خزرها
اركان : ليش ضاربه ليان ؟
دحگت لالي لـ ليان و النا
ليان : ما ضربتني اركان
اركان : خدج مطبع
لالي : اي ضربتها
اركان : ليش اريد اعرف السبب
لالي : ما قبلت تنتظرني
رادت تصعد يمكم و ضربتها بـ الشقة
حجا اركان بـ حدة
اركان : هاي اخير مرره
لالي سمعتيني لو لا اخير مره تضربيها
هزت راسها ساكته
و هو خازرها اندار لـ ليان و حجا
اركان : و نفس الكلام يجري عليج
ديربالجن اشوف وحدة تضرب الثانية
لو اشوفجن تتعاركن و الله اركعجن راس بـ راس
لا تطلعن سوالف من جوا الگاع
هزن راسهن ساكتات
اندار على لالي
اركان : امشي اعتذري
راحت لالي بدون كلام اعتذرت من ليان
و ليان ما حجت شي
اركان : شجنتي تسوين برا؟
نور : اني صحتها و كعدت اسولف وياها
نسيناكم جوا
سكت اركان يدحك بـ وجهي
دنكت لالي تمسح عيونها و ساكته
لزم ايدها اركان و حضنها لـ صدرة
اركان : ليش تخليني احاجيج بـ هالطريقة
انتِ جبيره و تفتهمين و محذرجن ما تتضاربن
تدرن بيه اموت من هاي الحاله
لالي : عادي
اركان : يلا امشن اصعدن
هزن راسهن و راحن كدامه
اندار دحگلي مشيت كدامه صعدت
شويه و كمنا نرجع لـ البيت
مُلاذ :-
طلعنا من يمهم ودعت اهل جسار و جسار
ظلوا واحد يودع الثاني و انا واكفه انتظرهم
اتقدم أيهم يمي
أيهم : تعبتي
مُلاذ : كلش ظهري حيتكسر
أيهم : من نرجع انه اسويلج مساج
و انتِ سويلي مساج لان انه هم ظهري اتكسر
ضحكت و گلت
مُلاذ : عليمن خلينا متكسرين احسن
ابتسم يدحك لـ ضحكتي
اتقدم ضرغام يسولف وي أيهم
و يسلم عليه اجا ورانا و ما سلمنا على بعض
ضرغام : شلونج مُلاذ
مُلاذ : الحمدلله انت شلونك ؟
نقل اللاسلكي يلي بـ ايده لـ ايده الثانية
ابتسم ابتسامة ظاهره اسنانه و گال
ضرغام : عايشين
رجع يسولف وي أيهم و انا رحت احاجي اهلي
يخلصون وداعهم الي صارلة عشر دقايق
اخذت اهلي وياي
و نور و عزيز راحو وي عمه منارس
و بيت اركان راحوا وي ضرغام
وصلنا اهلي لـ بيتهم
أيهم : يلا انزلي
مُلاذ : و انت؟
أيهم : اروح اجيب أبيل
مُلاذ : نسيت هو مو هنا
يلا خل اروح وياك
أيهم : لا انزلي تعبانه انتِ
مُلاذ : عادي اريد اروح وياك
اتدنى باس خدي
أيهم : بكيفج
اتوجهنا لـ بيت اهله
نزلنا فتح الباب بـ المفتاح و دخل
دخلت وراه گال
أيهم : أيمن سيارته ماكو
وين طالع و عايفهم وحدهم بالليل
اتقدم فتح باب المطبخ و دخل
رحنا لـ الصاله هستونا دخلنا
و أيهم ثبتت خطواته ، دحگت
ابو أيهم مكعد أبيل بـ حضنه
و ام أيهم وجهها احمر و عيونها جمر صايرات
و هتان يمه و هو حاضنها لـ صدرة
أيهم : انت شتسوي هنا ؟
فزت ام أيهم تدحك لـ أيهم
راح أيهم بسرعه عليه جر هتان و ابيل من ايده
و ابو گام وكف ام أيهم ركضت صارت بـ نصهم
أيهم : اطلع برررا
رجليييك اكسرررهم اذا خطيت منا بعد اطلع
وخر امه و راح على ابو
ضربه و ابو أيهم رجع ضرب أيهم
خليت ايدي على حلگي مصدومة
و كلنا نريد نفرقهم و أبيل گام يبجي مخترع
جر أيهم ابو من ياخته شاله وكفه و ضربه
مُلاذ : أيهم أيهمممم
لزمت بـ ايده اريد يعوفه
رفع رجله و دفر بطن ابو حيل
صيحت بـ صوت عالي مصدومة : أيهمممممم
ابو وكع بـ الگاع و يصيح بي
ابو أيهم : اندمممممك و الله
أيهم : امشي **** يندمني
تعرف الله انت حتى تحلف بي اطلع برا
شاله من ياخته شمره بـ الباب مال شارع
و راح عليه شبعه بوكسات
و انا اركض و ام أيهم تصيح و تبجي
كام ابو أيهم وكف ، رفع اصبعه بـ تهديد
ابو أيهم : على سوايتك هاي رح تتندم هواي
راد أيهم يروح اله لزمته
اتوسل بي بس اريد يوكف و اهله كلهم يبجون
مُلاذ : أيهم أيهم ابووووك كااافي
شجاااي تسوي انت اكو واحد يضرب ابو !
انداريت على ابو لمن گال
ابو أيهم : طبعاً الاباء عزيزين
ما تنعرف قيمتهم الا بعد ما يموتون مو صح أيهم ؟
نار استقرت بـ عيونه
دفعني و راح على ابو متخبل
شبعه ضرب اريد اكوم ما اكدر
و طلعوا الجيران ع الصوت بس و لا اهتموا
خلوا و دخلوا جوه ، و أيهم خلص ابو بـ ايده
كمت بـ صعوبة من الگاع رحت الزم أيهم
و هو يدفعني و خانك ابو حيل ، لزمت بـ ايده
مُلاذ : أيهم الله يخليك لخااطري عوفه
لا تسوي هيج عوووفه أيهم
اجت امه تسحبه وياي
كام ابو وكف بـ صعوبه
و انا و خاله لازمين بـ أيهم
رفع اصبعه ابو و حجا بـ توعد
ابو أيهم : انتظر و رح تشوف
درت وجهي ادحگله ابتسامه شر على وجهه
دار عيونه يدحگلي و خده مورم و حاجبه ينزف
ابو أيهم : شكراً ست مُــلاذ
حجاها بـ تأكيد
دحك لـ أيهم بـ نظره اخير و راح
و أيهم اتخبل يريد يروح اله
بس هو بسرعه ابتعد
وكف گوه يجر النفس و خاله لازمه بي
دحگتله ، نظراتي ينقري بيها الخوف
رفع عيونه يدحگلي ، حجا بـ صوت مخنوك
أيهم : مُـ ... مُلاذ
حضنته بـ هدوء
و هو بقى ما حاضنني و مختنك
مُلاذ : اهدء
حاوطت ايده ظهري بس بـ خفه
و ايده الثانيه امه لازمه بيها و تبجي
مال راسه و صوته يم اذاني همس
أيهم : لا تعوفيني
مُلاذ : ما اعوفك أيهم أبيل و اختك يبجون
سكت و انا امسح وجهه بـ ايدي
مُلاذ : ادخلي خاله رح نجي وراج
هزت راسها ساكته
و راحت بـ خطوات تعبانه دخلت البيت
دحگتله ، بست عيونه رجعت حضنته
شويه و هدء و دخلنا جوا
كعد كدامهم يسكت بيهم
باس شعر هتان و يحضنها لـ صدرة
و مكعد أبيل بـ حضنه يمسح دموعه
دحك لـ امه ، نزل أبيل يم هتان
و اخذ امه و راحوا لـ المطبخ
كعدت يم هتان هدأت و أبيل هم سكت
شلت أبيل كعدته على رجلي
مُلاذ : شهالخدود الحلوة
رفع عيونه الي و ابتسم
انداريت لـ هتان و حجيت
مُلاذ : ليش هيج سوا؟
هتان : يكرهه ابوي و ما يريده يتواجد يمنا
و ما يتحمل يشوفه حاضنني يعصب
مُلاذ : ليش ؟
رفعت اكتافها و حجت
هتان : من زمان مشاكل بيناتهم
سكتت و كم دقيقة و اجا أيهم متنرفز
و يخابر على أيمن يصيح عليه
لحد ما اجا أيمن و اتعارك ويا
لان طالع و عايف اهله
أيمن ما فاهم شصاير طلع هو و أيهم برا
و انا كعدت صافنه انتظر أيهم و الهي بـ أبيل
شويه ودخل أيهم من برا و أيمن هم دخل معصب
اندار على امه و گال بـ عصبية
أيمن : ليش مااا تكليلي يجي لـ هنا؟؟؟
- ما اريدكم تتعاركون
أيمن : خافي على ولدج ما يتعاركون لا تخافين عَليّ
من يجي تعالي و گليلي !
أيهم : أيمن احجي عدل!
أيمن : ما حاجي شي غلط
دار وجهه و طلع برا و ام أيهم كامت تدمع
اتقدم أيهم عليها حضنها لـ صدره
انداريت لـ هتان مستغربه مثلي
مُلاذ : انتوا غير من نفس الام؟
هتان : اي
مُلاذ : چا ليش يگول هيج؟
هتان : ما اعرف لان عصبي ما يعرف شيحجي
طلع أيهم لـ برا
كعدت أبيل ع القنفه و طلعت وراه
دحگتله واكف يم أيمن
أيهم : لحد اليوم ما فرقتك عني و عن باهر
لا تحجي هالكلام التافهه و تضوجها!
أيمن : مان عليه ؟
أيهم : شنو مان عليك انت شبيك متعاطي ؟
جره يشم ملابسه و يدور بـ وجهه
أيمن : مابيه شي انه هاي الحقيقة
أيهم : روح ، روح يلا كمل ونستك
مادام امي مو امك يلاااا روح
دفعه ع السياره
اتقدم أيهم و فتح باب السياره
أيهم : يلا امي مو امك ليش ظال يمها تحميها
اصعد بـ سيارتك كمل ونستك و تعال لـ بيتك
و مالك علاقه بيهم اطلع و عوفهم
انه رح ارجع و اكعد يمهم ،
تريد تحمي هتان احميها اختك
أيمن : ما جاااان قصدي هيج
أيهم : لعد شنو قصدك؟
امي مو امك خلص ما تخصك و لا من اهلك
أيمن : امك اعزها اكثر من ما اعز روحي
بس امك الك مو امي و حمايتها رح تظل واجبي
شلون ما واجب عليك واجب عليه هم
ما ولدتني هي بس ربتني ما تحكم انت بكيفك
أيهم : ربتك و تعبت عليك و بعدين تگلك
ابوك الـ **** اجا تعال اتكاتل ويا
و تعرفك شنو و تعرفه شنو هاي امي
هيج انانية امي حتى تذبك بالخطر و تحمينا
بجا أيمن اتقدم أيهم لزم وجهه بـ اثنين ايديه
عصر وجهه أيمن بـ ايديه و يحجي بـ حرگه
أيهم : لحظة وحدة لحظة ما تطلع انت من بالها
انت ابنها انت روحها ، من جنت صغير
غص أيهم و حجا
أيهم : اذا كتلك هذاك الـ ****
الليل كله ما تنامه و تكعد تبجي لان ضربك
و لان ما كدرت تخلصك من ايده
اذا انجرح اصبعك اذا تمرضت ما تنام
أيهم : راد ياخذك منها خلته يضربها
و يورم وجهها اسابيع
و يكسر ايدها في سبيل ما تروح انت
امي الي ما حاسبها امك و فرفحت روحها
على كلمة الـ يمه منك !
عافه أيهم و أيمن خلا ايديه على وجهه
نزل لـ الگاع جسمه يهتز و يبجي
عيوني ظليت مفتحتهم بـ صدمة عليهم
ام أيهم مو نفسها ام أيمن !!!
- يتبع الفصل التالي اضغط على ( رواية جرح الأيهم ) اسم الرواية