رواية جرح الأيهم الفصل الثالث و الاربعون 43 - بقلم أيلان
"الجُــرح الثالث و أربعون"
نشف شعري بـ المنشفه
نزلها لـ شعري من جوا ينشف بي
اتقدم عليه اكثر رجعت لـ ورا
انحصرت بـ الزويه يلي يم الحمام
بلعت ريگي ، غمضت عيوني
أيهم : شو فتحي عاينيلي بـ عيونج المكحله
فتحت عيوني دحگتله
النفس گمت گوه اجره
مُلاذ : أيهم و الله انسطر و انثول
حباب عوفني ادوخ كلش
أيهم : بايسج لو مخليج تكبسلين
ضحكت و انا راسي مسطور
گوه افتح عيوني و هو ايده تتحرك على ظهري
اتقرب عليه اكثر بـ هدوء
غمضت عيوني حيل كل ذرة بجسمي ترجف
شكد اتخبل من هالشعور و بـ نفس الوقت حلو
اريد افتح عيوني و ادفعه لو اسوي اي شي
بسرعة همس و انا مغضمة
-اشش مُلاذ ظلي وياي
فتحت عيوني دحگتله
نزل شفايفة عض حنجي بس مو حيل
و فوراً رفعهن و باسني
حاوط ركبتي بايدة مثل الخانكني
بس مرخي ايدة كلش
ما اعرف اذا بادلته لو لا
حسيت بعد لا عندي ايد و لا رجل
رفعت ايدي على صدرة اريد ادفعه
كمشها و انا گبل فلتت
ثواني و ابتعد و هو يضحك
فتحت عيوني ادحگله فهيت و انثولت فرد نوب
ايهم : ها تريدين بعد ؟
عبرت بسرعة من يمه
احاول اتدارك الوضع و ما افهي
مُلاذ : لا تلح شنو ما شايف عضيتني
ايهم : غير الصدك
ما شايف هيج براطم حلوة ما عولت ابوسهن
تنهد و يدحگلي بـ نظرات ادبسزية
ايهم : تعالي يمي
خزرته ، درت وجهي
مشيت للـ الباب مال غرفتنا
لسا احس جسمي منمل انثولت
مدنكه راسي عيني بـ الگاع و انا امشي
ما حسيت غير على ضربة قويه بـ كصتي
عطت بوجع رفعت عيني دحگت لـ الباب
اتصادر لـ مسامعي صوت ضحكته العالي
دحگتله معصبة و خازرته
دخلت الغرفة مغلسة على الفشله الصارت هسه
بدلت بسرعه قبل لا يجي
وكفت اريد امشط شعري و هو دخل
بعده ما حاجي گلت
مُلاذ : كافي حباب
صفك ايديه بـ بعضهم
ضحك بـ صوت
أيهم : شمسويلج ؟
مُلاذ : لا تبوسني ادوخ
أيهم : هههههههههه هاهيه مابوسج بعد
بس لا تدوخين انتِ و تنركعين بـ الباب
مُلاذ : بـ الغلط لا تلزمها عليه و تصير نحس
أيهم : لا يابه ما الزمها
اهم شي ما تنركعين بـ الباب
دحگتله بـ عصبية
ضحك و اتقدم عليه
مُلاذ : الچذاب ام سوادي
أيهم : فوووصتي فوصتي فداچ الچذاب
اخذت المشط امشط اخذه من ايدي
شالني من خصري و مشا بيه لـ الجرباية
كعدني و كعد هو وراي ، يمشط شعري
مُلاذ : لا تخربط شعري
أيهم : عفا عليج و الله عيب
انه اخربط شعرج؟ دعايني شلون رح اظفره
ظفر شعري و شده اريد اكوم
بس ظليت مكاني لمن باس ظفيرتي
اتذكرت ابوي شلون جان يبوس ظفيرتي
ظل يبوس بيها ، درت وجهي دحگتله
مُلاذ : كل شي تسوي يذكرني بـ بابا
عاف ظفيرتي من ايده يدحگلي بـ نظرات ذبلانه
گام من وراي بـ هدوء و طلع من الغرفة
عجزت افهم شبي كل ما اذكر موضوع ابوي
يعوفني و يروح لو يبطل يلزمني
اخذت تلفوني لمن اجاني اتصال
فتحت التلفون دحگت لـ الاتصال
من نور ، اخذته و جاوبت
مُلاذ : الو
نور : عاش من سمع صوتج ولج
مُلاذ : هههه تعذريني مالحك اجيكم
نور : مُلاذ اسمعي صارت اشياء
رح اموت اذا ما حجيتهن لـ احد
مُلاذ : مبين من صوتج الفرحان و يرجف
راكان شلونه ؟
نور : زين زين
مُلاذ : سولفي سريع اسمعج
حجيتها و كمت وكفت كدام الشباك
دحگت لـ الحديقة ايهم كاعد بيها
اكو حديقه برا محاوطه المكان الكاعدين بي
مرات نكعد بيها
رفع تلفونه و اتصل بـ شخص
ظل يحجي بـ التلفون ، رجع يدخن
ركزت مسامعي وي نور لمن حجت
نور : عمتي خاطبها العميد
مُلاذ : عزززه اوكفي يمعوده بـ هداي عليه
نور : هههه و الله و مساع جاي جسار
و هي گايلتله و گايللها انا ما اعارض طبعاً
و حياتج هاي و من حقج تتزوجين نفس كلامي
الي گلته الها و بعد اسبوع يعقدون
بس گلتلي باجر نجي و نسولفلكم
هسه من خابرتج ماكدرت اضم السالفه
مُلاذ : هههههه و الله و طلعت نوروسه مو هينه
وكعت العميد على وجهه
نور : ههههههه لج اي
نوب ما اكدر اضحك كدامها
هي اصلاً خجلانه من تسولف
مُلاذ : خليها يمعوده تعيش حياتها
خطيه كلشي ما شافت لا من اهل
و لا اتزوجت و لا عدها اطفال
كضت عمرها كله هي مداريتنا و مداريه بيبي
نور : اي و الله مساع احاجيها
گلتلها النسوان الي بـ عائلتنا
كل وحده ضيمها شكل و ما فد يوم ارتاحينا
مُلاذ : صايبتنا اللعنه
نور : ههههههه اي و الله
مُلاذ : عدج بس امج المابيها خير مرتاحه
نور : لا هاي متنحسب من عدنا
مُلاذ : اتفق
نور : و اكو شي ثاني صار
مُلاذ : سولفي لا تشلعين گلبي
كعدت تسولفلي عن اركان
و الي صار و كلام جسار وياه
هي فرحانه لان جسار گايل اله هيج
و انا عيوني صارت بـ كصتي
جسار يحبها ليش هيج يسوي بـ روحه!
ع الرغم من حزني على جسار
بس كلش فرحت الها لان هي تموت على اركان
و من صغرها جانت هواي تسولف الي عليه
و اهلها حتى ما خلولهم فرصه
سديت الاتصال منها
دخلت على حساب جسار
دحگت ناشر صوره و كاتب
"ها أنا اعلن قلبي
ها أنا أعلن أن الجرح يمتد "
نفخت بـ ضجر و سديت تلفوني
دخل أيهم الغرفة دحگتله
شمر باكيت الجگاير و نزع قميصه
سد الضوا ، اتقدم شمر نفسه على الجرباية
نام على بطنه داير وجهه عني ،
عكدت حواجبي بـ استغراب
دائماً يحضنني لمن ينام
عفته ، درت نفسي و نمت
ثاني يوم رجعت العصر
و رحت لـ اهلي اخذ أبيل منهم
ما اخذته لـ الروضه لان ما كعد من النوم
دخلت دحگت عمتي موجوده
و نور مبتسمه و حاصره ضحكتها
و الكل مثل حالها ، عرفت السالفة
دخلت سلمت و كعدت وياهم
لگيتها مسولفة الهم
و گالت بعد اسبوع يروحون يعقدون
كلنا فرحانين الها و مكيفين
فعلاً بعد اسبوع راحوا و عقدوا
دحگت لـ جسار يلي واكف يبارك لـ عمتي
اتقدمت عليهم ، سلمت عليه
شويه و عافتنا عمتي راحت تحاجي نور
انداريت لـ جسار دحگتله
مُلاذ : ليش گلت لـ اركان يخطب نور منك؟
جسار : ابوها **** ما ينطيها
و ماكو احد يطلبها منه و انا اكبر شخص و گلتله
مُلاذ : جسار غلط هالشي !
تعذرني انا هم اريدهم ينخطبون
بس ما اريد يخطبها منك انت
ليش هيج تاذي روحك
جسار : انا ديره محترگه
و هي طير بـ وسط هالديره
خليها تطير بعيد عني لا تلوحها ناري
مُلاذ : زين شراح تستفاد ؟
اجو و خطبوها منك شنو تستفاد ؟
جسار : خطبوها مني و وافقت
عندي عذر بعد ؟ لا خلص
اعيش الي اعيشة بـ داخلي
و ما الومها على شي
مُلاذ : و الله جسار يجي يوم و تجلطني
و هاي اكتبلكياها هنا
جسار : و الله شايله همي
مُلاذ : طبعاً اشيل همك
اذا انت كل طركاعه تسويها اكبر من راسي
جر نفس من جكارته
و نزل ايده ساكت ، زفر الدخان
گلت بـ حيرة
مُلاذ : و هتان ؟
جسار : شبيها هتان؟
مُلاذ : ترا اعرف الصار بينكم
دحگلي و رجع نظره لـ گدام
جسار : تموت يمي هاي البنية
مُلاذ : الله اكبر شطلعت
مو رح ادك على راسي
وحدة تحترك يمك و الثانية تموت
جداحه انت و انا ما ادري
زين ع الاقل دحك لـ البنية ترا هتان تخبل
جسار : بويه انتِ شرايده ؟
مُلاذ : اريد ازوجك كافي عزوبيه
گمت ما تعرف تتصرف
جسار : كاعد على گلبج بت الاوادم؟
مُلاذ : كاعد على خوانيكي مو بس گلبي
مو هذا ضيمك خنكني خنك موتني
جسار : انا اشرد من الهموم
تجي مُلاذ تحطهن كدامي عمي وخري عني
لا افرج بـ راشدي خليني حاير بـ زماني
مُلاذ : و الله الا ادورلك مره انتظرني
و اول مرشحه هتان
جسار : اگلج هيدي مو تزوجتي و تسودنتي علينا
مُلاذ : جسار اتزوج حباب خل نفرح بيك
جسار : عمي عوفيني وين رجلج عنج؟
دحك يدور بـ عيونه
جسار : أيهم
انداريت دحگت ، أيهم اندار النا
اجا بـ اتجاهنا
أيهم : ها خيركم؟
جسار : ما تاخذ مرتك من يمي
أيهم : عفا عليك شبيك وي مرتي
جسار : مرتك الي شبيها وياي
أيهم : ههههه ليش شسويتيله ولج
حتى جسار ما سلم من ايدج؟
جسار : تريد تزوجني ابنها انا
مُلاذ : و الله مو صوجك
ادورلك خوش قسمه بس انت ما تريد
يلا ظل بـ كيفك عزابي ع گلب امك
جسار : من اريد اتزوج اخابرلج و دوريلي
مُلاذ : لا هاهيه خلصت فرصك
ضحك و انا هم ضحكت
رحنا شفنا عمتي تودع نور و تبجي
و العميد خالد يمها مبتسم
نور : عمه و الله جبيرة انا
و هم عزيز وياي قابل باقية وحدي
منارس : المفروض ما اعوفج هسه
ابنج لساته صغير
خالد : لا يهمج منارس نروحلهم كل يوم
او تجيب ابنها يمنا شلون ما وده گلبكم
لا تشيلون هم مستحيل اقطع تواصلكم وي عمتكم
مُلاذ : تسلم سيدي الله يكثر من امثالك
مبروك ع الزواج و ان شاء الله تشوفون كل الخير
خالد : الله يسلمج بنيتي الله يبارك بيج
و يحفظلج زوجج و ابنج
عباله أبيل ابني
ابتسمت و هزيت راسي
اجت عمتي حضنتني و تبوس بيه
باركت الها و بعد فترة رجعنا لـ بيتنا
اما اركان و نور
نور ما تريد اركان يخطبها بـ هالوقت
لان عمي ميت و ما مار سنه عليه
مُلاذ : ترا الميت ما يرجع
اذا انتِ توكفين حياتج عليه
نور : بس عيب احنا اهله و حزنانين عليه!
مُلاذ : ليش شدخل الحزن بالخطوبه!
و انتِ تعرفين مرة عمي محمد
اذا سمعت بـ خطوبتج بالعكس تفرح الج
نور : چا عيب مُلاذ
مُلاذ : نور اخير فرصة هاي اخير فرصة
انا من يمي گمت اخاف عليكم
خاف يصير شي هم و يبعدكم
نور : و الله انا هم خايفه بس عيب احس
مُلاذ : هي بس يخطبج وين العيب
رفعت اكتافها بـ عدم معرفة
و حاجينا مرة عمي محمد فرحت لـ نور
و گلتلها
- انتِ مو غريبه و اعرفج حزنانه عليه
لا توقفين حياتج و مر الاربعين
اخطبوا و كملوا حياتكم سويه
بيت عمه منارس
بقت بي بس نور و عزيز
اجت ام اركان و حاجت عمه منارس
و طبعاً ردت عليهم بـ الموافقة
گالوا بعد كم يوم المشايه مال زلم
جانت الفرحة ما سايعه نور
و لازمه بـ ايدي مخليتها على گلبها
كل شوية تروح تبوس راكان من فرحتها
رجعنا لـ البيت ميتين تعب
أبيل من اخذناهمن الروضه
جان كلش تعبان
و بسرعه نام بـ السيارة
دخلت غسلت و بدلت و اكلنا انا و أيهم
من بعدها شمرت روحي بـ سبات عميق
فزيت على صوت أيهم
أيهم : لَـذه نامي عدل حلمانه نامي عدل
تمتمت بـ اشياء ما اتذكرها
بس جنت حلمانه بـ حروك جسمي
ما اعرف حجيت شي عنها لو غير شي
فزيت من حسيت ايد تتلمس بطني
فتحت عيوني بـ نعاس دحگت لـ أيهم
يلي مشخص عيونه على چويات بطني
انامله تتحرك عليهم و تتحسسهم ، همست
مُلاذ : عوفهم
رفع عينه دحگلي و رجع عينه عليهن
لزمت ايده اريد اوخرها
مُلاذ : ملمسهم مقرف وخر ايدك عنهم
لزم ايديه بـ تك ايد و وخرهم
دنك راسه بـ هدوء طبع بوسات عليهم
و رجع باس اثر العملية مال كليتي
غمضت عيوني حيل ،
نَفسه الحار صار عليهم
جسمي يقشعر لمن تنطبع بوساته فوگهم
حَركت نفسي و انا محبوسه جواه
مُلاذ : أيهم لا ملمسهم ...
سكتت ، فلتت ايدي خليتها على عيوني
بقى هيج بين الثانية و الثانية يبوسهن
و انا جسمي يجمد من الشعور
رفع راسه من بطني دحگلي
أيهم : شصاير بيچ شسوو بيچ؟
مُلاذ : أيهم خليني انام
انا بدون شي الكوابيس ملاحكتني
أيهم : حاجيني مُلاذ شسوولج
مُلاذ : ما رح يتحمل عقلك اسكت
أيهم : الي اتحمله جسمج
و روحج الي تشبه روح طفلة
ما رح يتحمله عقلي ؟
بلع ريك و عيونه بينت بيها شرايين حمر
اشوفه من التيبل لامب يلي مفتوح يم راسي
أيهم : احجي !
مُلاذ : أيهم خاطفيني يعني شنو يسوون الي؟
أيهم : احجي كلشي من البداية
و شلون كل شي صار
عايني بـ عيوني و احجي
نزلت عيني و حجيت
مُلاذ : جنا انا و ملاك بس بـ البيت
رفع وجهي من حنچي بـ ايده
أيهم : عايني بـ نص عيوني و احجي
لا تزيحين عيونج ابد عايني بـ نص عيني !
حجيت بـ هدوء
مخليه عيني نص عينه
مُلاذ : جنا بس انا و ملاك بـ البيت
انطفت الكهرباء ، دخلت البيت لان ملاك وحدها
و سمعت صرختها بـ صوت عالي
نزلت عيوني اريد احجي
رفع وجهي بـ ايده
أيهم : لا تزيحين عيونج
حسيت نَفسي يـرجف
ما اريد اتذكر المريت بي
ما اعرف عليش جاي يجبرني
مُلاذ : خطفونا خلونا بـ مكان
كله نسوان كبار و اطفال و بنات مراهقات
ريحته قذرة و ضواه طافي
عذبونا هواي و جان اكو اصوات ثانية
كل يوم يصير صوت رمي و صياح ...
حجيت اله كل شي ، نظراته كل مره تذبل
لحد ما وصلت لـ الجزء يلي صعقوا بي جسمي
مُلاذ : اخذوني كعدوني على كرسي
جابو سطل بي مي خلو بي اسلاك
بلعت ريك كملت بـ صوت يرجف
عيوني تحجرت بيها دموعي بس ما بجيت
بسرعه مسحت وجهي و رجعت كملت ادحگله
مُلاذ : صعقوا جسمي
رمش بـ ثكل ، عيونه مملية دموع
نزلت دمعته على خدي
بقيت ادور عيوني و هو ساكت
و يرجع يخليني ادحك بـ عيونه و احجي
عيونه صارن حمر
و نظراته تذبل اكثر بـ كل مره احجي بيها
حسيته رح ينفجر اذا كملت اكثر
بس كل ما اسكت يكز على اسنانه
يجبرني اكمل ، حجيت اله عن لمن حبسوني
و حجيت اله عن شعري يلي زينوه
عن الجثه يلي خلوها يمي لـ اشهر
ظل مشخص عيونه بـ وجهي
و دموعه نار تنزل على خدي و وجهي
حجيت اله عن لمن اخذوا كليتي
و من بعدها المن باعوني و وين
و شنو صار بيه كل هذا و هو فوكاي
ايد لازم بيها ايديه و الايد الثانية على بطني
رجعني لـ نقطة الصفر
و رجعت اتذكرت كل شي بـ وضوح
و حسيت كل شي يتكسر داخل روحي
حسيت داخلي متهشم و صدري اختنك
من بعد ما حجيت اله كلشي
بقى يدور عيونه بين عيوني
يريدين يطلعن من محجرهن
كام من فوكاي بسرعه
مُلاذ : وين رايح؟
أيهم : عندي شغل نامي ، اتاخر
كعدت على حيلي بـ صعوبه
مُلاذ : شغل شنو؟
أيهم : بـ المستشفى
مُلاذ : بـ هذا الوقت !
أيهم : امم
مُلاذ : تچذب عليه؟
أيهم : لا
مُلاذ : وين رايح ؟
أيهم : لـ المستشفى
مُلاذ : و الله انت اكبر جذاب
فتح تلفونه خلاه ع الميز
فتح حاكية سمعت صوت
جاوب واحد و هو يگول
- ها رماد ؟
أيهم : مازن انت وين
- ها ... بـ المستشفى
أيهم : اعرف الي وضع المريض شنو
و دزلي بـ رساله بعده تحت المراقبة مو؟
- اي
أيهم : استعجل و خليله مغذي
حجاها و سد الاتصال منه
اندار دحگلي دار وجهه بدل ملابسه
لبس كل شي اسود و خلا شفقه على راسه
لبس جفوف سود ، دحگتله مستغربه
مُلاذ : أيهم ؟
اتقدم عليه باس شفتي بسرعه اتقدم راح يم الباب
دار وجهه الي دحگلي بـ نظرات ما عرفت افسرها
و طلع ، ما ارتاحيت ابد لـ حالته
كمت اريد الحكه ، دحگتله و هو يم الباب
فتح الباب و طلع من البيت
درت وجهي و رجعت لـ الغرفة
ظليت كاعده لـ الصبح انتظره
خابرته ما جاوبني ،
رجعت خابرت مره ثانية هم ما جاوب
بـ المرة الثالثه صار الخط مغلق
انقلقت كلش
گلت يمكن اكو حالة طارئه بـ المستشفى
و بقيت الوب وحدي
دخلت غرفة أبيل
كعدت يم راسه بوست خدودة
مُلاذ : أبيل يا حلو اكعد
بقى نايم شلته بـ حضني
سويت مثل ما يسوي أيهم
اخذته لـ الحمام غسلت وجهه
فتح عيونه بـ نعاس و رجع غمض
رجعت غسلت اله مره ثانية
مُلاذ : أبيلو يلا كافي نوم اكعد
رفع راسه من متني
فتح عيونه بـ نعاس
ابتسمت ابتسامة ظاهره اسناني
و بست خده حيل
مُلاذ : احبك ولك
ضحك و گال
أبيل : انه هم
كعدنا تريكنا و اخذته غسلنا
بدلت ملابسه و رحت انا بدلت
لبست قميص ابيض ، فوكاه ستره ورديه
و بنطرون ابيض ، و شال ابيض
لبست مناظري ، اخذت جنطتي
صحت لـ أبيل
اجاني يركض و جنطته بـ ظهره
كعدت ع ميز صغير يم الباب مخلينه
لبست أبيل حذاءه (تكرمون)
مُلاذ : انتظرني بـ الباب
البس حذائي و اجيك
هز راسه بـ قبول و طلع وكف بـ الباب
اخذت كَعبي الوردي لبسته
و انا البسه صار نظري على الكاع
عكدت حواجبي مستغربه و مصدومة
مديت ايدي شلت الرصاصه يلي بـ الگاع
قريبه ع الباب
رفعتها من الگاع ادحگلها
رفعت راسي لمن صاحني أبيل
خليتها بـ جنطتي و طلعت من البيت
اخذت أبيل لـ الروضه و انا رايحه لـ شغلي
سحبت الجنطة و اخذت الرصاصة
دحگتلها ، اخذت سلاحي من الجنطه
الرصاص يلي بـ مخزن المسدس كامل
ما عندي غيرة ،
اخذت وحدة من الي بـ سلاحي
قارنتها وي الي شفتها يم الباب
الي يم الباب اكبر من يلي بـ سلاحي
وكفت السياره ع الطريق
دارت عيوني بـ استغراب و حيرة ، حجيت
مُلاذ : منين اجت هاي الرصاصة !
نزلت عيني الها
تذكرت أيهم و هو واكف يم الباب البارحة
ازدادت العقدة ياي بين حواجبي اكثر
مُلاذ : أيهم !
رفعت تلفوني بسرعة اتصل عليه
ما يجاوبني و تلفونه مغلق
هالشي مو غريب على أيهم
خصوصاً نظراته الاخيرة الي قبل لا يطلع!
عرف بـ كل شي صار الي
ما معقولة راح يدور على جماعة الچتال
و الچتال يلي انا بـ نفسي ما لگيته
و يريد ينتقم منهم ع الي سوو بيه !
مُلاذ : مستحيل منين يلگا الچتال
منين يريد يلگا !!
درت وجهي جريت تلفوني
خابرت على أيمن
اكثر من مره اتصلت ماكو اي جواب
بـ المره الاخيرة جاوبني أيمن
أيمن : يعني لو انتِ لو رجلج
تكعدوني من عز نومي !
مُلاذ : أيمن لا تچذب عليه و احجي بسرعه
أيهم البارحه خابرك راد عنوان شخص ؟؟
أيمن : لا
مُلاذ : لا تجذذذذذب
أيمن : يا يمه اذاني و العباس لا
مُلاذ : أيمن شنو اسماء المستشفيات
الي يداوم بيهن أيهم ؟؟
أيمن : شمدريني انه
مُلاذ : غيرر اخووو؟
أيمن : اخو لو امه بويه شني السالفه
مُلاذ : كوم اسأل امك
أيمن : وين الگا امي هسه
مُلاذ : أيمن استعجل !
أيمن : اوكفي شصاير ؟
مُلاذ : عرف كل شي سوا بيه الچتال
بس ما معقوله راح يدور ع الچتال !
أيمن : شنووو؟ اوكفي
الچتال شبي شسوا لـ أيهم ؟؟
مُلاذ : ما سوا اله
جريت نَفس بـ تعب و فهمته الصار
مُلاذ : انا ما جاي اكدر اتاكد
حتى من هالاحتمال
الچتال لا انا و لا الشرطه لگينا
أيهم طبعاً ما رح يلگاه !
يا ربي وين راح ، أيمن ...
جاي احجي و انسد الاتصال بـ وجهي
عكدت حواجبي مستغربه
درت سيارتي و رجعت من الطريق الاجيت منه
اكيد أيمن رح يعرف مكانه
فتره و وصلت لـ الباب
دحگت أيمن طلع من البيته
ردت انزل احاجي
بس هو بسرعه صعد بـ السيارة
و شخطها و مشى ، لحگته اسوق وراه
ظليت اتبعه ، فجأه سرع سيارته
و صار يدخل بين السيارات و انا وراه
لحد ما ضاع من كدام عيني
خابرت عليه ما يجاوبني
لزمت راسي يلي صار يوجعني
رحت لـ شغلي ما بـ ايدي شي اسوي
أيمن غلق تلفونه و أيهم غالق تلفونه
ما يطلع الي لا موقعهم و لا شي
و مرت الساعات و انا عقلي مو يم الشغل
كل شويه اتصل بـ أيهم يطلع الي مغلق
عقلي كلش تعب و انا انتظر
لحد ما فزيت على صوت اتصال
جريت تلفوني بسرعه ، دحكت رقم أيمن
جاوبت بسرعة و هو حجا
أيمن : مُلاذ
مُلاذ : شصار؟
أيمن : لا تخافين أيهم زين
مُلاذ : وين جان ؟؟
أيمن : جان بـ المستشفى و المريض العنده وضعه خطر ما جان يكدر يجاوبج .... المريض مات
و أيهم تعبان هسه جايبه لـ البيت و جاي
مُلاذ : أيمن حباب لا تجذب عليه !
أيمن : اي صحيح انا اجذب عليج
أيهم راح لـ الچتال و لحگت بـ اخر لحظة
ظليت ساكنه بـ مكاني ما كدرت اتوقع
ما كدرت حتى اخلي احتمال
انو كلام أيمن جان حقيقه مو شقه ...
مُلاذ : يوووو أيمن شمدريني
تمام يلا رح ارجع لـ البيت
أيمن : تمام .
سديت الخط اخذت جنطتي
كلت لـ صافي تلغي كل الاجتماعات
و كل الشغل العندي اليوم
و ترجع لـ بيتها ، رحت انا لـ البيت
دخلت لـ الصاله ، ثگلت خطواتي
دحگت الصاله عباره عن كزاز و متكسرة كلها
وحده من القنفات مگلوبه و تحفية مكسورة
دحگت لـ أيهم بـ الگاع
متمدد بـ نص الصاله على ظهره
صدره يرتفع و ينخفض ، درت عيني
أيمن كاعد بـ الگاع ساند ظهره ع الحايط
لام رجلية لـ صدرة ، صافن ع الگاع
رفع عينه لـ أيهم يدحگله نزلت دمعته
ما فهمت شبيهم و شصاير
رفع راسه أيمن دحگلي ، مسح وجهه
كام وكف بـ صعوبة شفته مجروحه
و حاجبة ينزف ، اتقدم عليه
حجا بـ صوت ناصي
أيمن : أيهم اتاذى لان مات المريض
و بـ الشارع تعاركنا وي واحد و تضاربنا
لذالك وجهي هيج ، أيهم مقهور ع المريض
مُلاذ : تريدني اصدك الحجيته؟
أيمن : ليش ما تصدكين؟
مثلاً احنا رحنا لـ الچتال ؟
على حسب ما تگولين
الچتال الشرطه و انتِ ما لگيتو
انه و أيهم راح نلگاه ؟
مُلاذ : ما جاي اقصد هيج طبعاً ما رح تلگونه
بس عبالك صاير شي اقوى !
أيمن : أيهم ينسحن گلبه من يموت المريض
و يطلع عن سيطرته
سكتت ادحك بـ وجهه
تذكرت لمن أيهم گال اذا يومين ما نمت
اسوي اشياء خارج سيطرتي
هزيت راسي بـ قبول و أيمن راح
طلع و سد الباب ، حجا أيهم بـ تعب
أيهم : أيمن لا تبجي لا تخاف
ما مات انه اعالجه انسى الشفته أيمن
گلبي كام يدك حيل من كلامه
حسيته طفل و يحجي ، يوصي بـ أيمن
اتقدمت لـ يمه صرت يم راسه
دحگتله مغمض عيونه و يدمع
خليت ايدي على خده مسحت دمعته
فتح عيونه دحگلي ، عيونه حمر
واضح بيها شرايين عينه
مُلاذ : انا يمك
خلا ايده على صدره
يأشر على نفسه و يبجي
أيهم : ما چان شي غلطي و الله ما جان ذنبي
كله ذنبه هو هو السوا كل شي بس انه التعاقبت
مُلاذ : أيهم أيهم دحگلي انا يمك
أيهم : مُلاذ و الله مو ذنبي
انه ما سويت شي
مُلاذ : اعرف مو ذنبك
انت مالك ذنب بـ شي
أيهم : انه ردت احميهم
ما ردت يصيرله شي
عابس شفتي يناشغ
و تنزل دموعه على جانب وجهه
صدرة ينزل و يصعد ، امسح دموعه و ينزلن
أيهم : گلبي مات انه
عبست شفتي ما بـ ايدي شي اسوي
و هو يدمع ، حجيت بـ همس
مُلاذ : منو انت أيهم ؟ شصاير بيك؟
فتح عيونه يدحك لـ السكف عيونه ذبلانه
حجا بـ تعب صوته مبحوح و يجر بـ الكلمة
أيهم : انــه ... انه تَعب السِــنين
انه الما لَمه حضن دافي و حَـنين
رفع راسه من رجلي
كعد على حيله ، تجى ظهره ع القنفه
اتقدمت صرت بين رجليه
كام يشهك و يحجي ، يأشر على صدرة
أيهم : اختنـ...
ماكدر يكمل ظل يشهك
اتخبلت بعد ما اعرف شسوي
و هو گوه يجر النفس
ركضت اخذت اله بطل مي
لزمت راسه بـ ايديه و احجي مرعوبه
مُلاذ : أيهم أيهم حبيبي الله يخليك
اشرب مي اهدء كوم خل نروح لـ المستشفى
هز راسه بـ رفض يشهك
لزمت البطل شربته مي
مُلاذ : أيهم حباب جاي اخااف
أيهم كوم خل اخذك لـ المستشفى
هز راسه بـ رفض ، يشهك
كعدت اسوي مساج لـ صدرة بـ ايدي
لحد ما رجع يجر النفس و خفت شهكته
درت مي بـ ايدي و مسحت وجهه
دقايق بقينا على حالنا ،
ممركز عيونه عليه و يدحگلي همس
أيهم : خل نتطلك
وسعت عيوني ادحك بـ وجهه
مُلاذ : أيهم !
لزم ايدي و سحبني اله من زندي بـ هدوء
أيهم : اريد انام تعبت
مُلاذ : نام
هز راسه بـ رفض و لزم كصته
أيهم : ما جاي اگدر عقلي عقلي يأذيني
رح ينفطر يأذيني عقلي كلش
يتمتم و يحجي
وخرت ايديه من راسه
گمت وكفت و حجيت
مُلاذ : تعال
فتح عيونه و رفعهن يدحگلي
حجا بـ نبرة حسيته طفل
أيهم : رح تعوفيني ؟
مديت ايدي اله
لزم بيها و گام بـ صعوبه
مُلاذ : ما اعوفك انا
دحك بـ وجهي
نزل راسه خلاه على چتفي
مُلاذ : تعال نام يلا
حجيت و لزمته من اكتافه
كعدته على القنفه ، نزعت شالي و الستره
مشيت بـ صعوبه من بين الكزاز
رحت لـ الغرفة اخذت غطى و رجعت
لگيت أيهم يدخن و على كعدته ،
نظره ع الگاع اتقدمت عليه ، جرني من بطني
سندت نفسي و لزمت بـ تجوة القنفه
قَبل لا اوكع فوكاه ،
نزلت بـ هدوء على ركبي بين رجلية
و وجهي كدام وجهه ،
مديت ايدي اريد اوخر الجكاره
لزمها و منعني ، لزم الجكاره هو و دارها
قربها لـ شفتي
مُلاذ : ما احب ريحتها
سكت يدحك بـ وجهي
و الجكاره بعدها كدام شفتي
راد يوخرها لزمت ايده و اخذتها
سحبت نفس منها لعبت نفسي
حسيتها حرگت بلاعيمي
راد ياخذها لزمت ايده و نزلتها
مُلاذ : لا كافي عوف التدخين
راسك يوجعك
تجى راسه ع القنفه ساكت
و انا طفيت الجكاره و شمرتها بـ النفاضه يلي يمه
رفعت النفاضة خليتها بـ الگاع
أيهم : وين رح تعوفيني
مُلاذ : ما عايفتك تعال ننام
خليته يتمدد و انا اتمددت يمه
حضن بطني و حجا بـ صوت رايح
أيهم : لا تعوفيني
مُلاذ : ما عايفتك
شدد لزمته عليه اكثر
خلا وجهه بـ صدري و نَفسه حار
مسحت على شعره ، خليت ايدي جوا راسي
و بـ الايد الثانيه امسح شعره
نزلت ايدي خليتها على لحيته
دحگتله بـ حزن احسه عايش اشياء ابد مو سهله
و طول اليوم يتحمل انواع الحالات بـ المستشفى
لمن يوصل يمي يطلع كل تعبه و يصير مثل الطفل
لزم زندي يتحسسه و هو مغمض عيونه
رجع ايده يمشيها على رگبتي
شالها من رگبتي خلاها على خصري
و حضنني اكثر ، يقربني اله
شال ايده من بطني ، فتح عيونه دحگلي
لزم ايديه باسهم حيل، رجع لزم تشيرتي
رفعه من يم بطني
قشعر جسمي لمن خلا ايده ع الچويات
و خياط العملية تمنيت لو موخرتهم بـ عملية تجميل
و لا مخليته يشوفهم
ظل يتحسسهن و عينه عليهن و يدمع
مسحت دموعه و هو حجا
أيهم : شلون تحملتي ؟
مُلاذ : انساهم أيهم نام يلا
تعبت لان صارلك هواي كاعد
أيهم : ريتهم بيه و لا بيج
مُلاذ : اسم الله اش كافي نام
أيهم : احرگي الاخضر و اليابس
احرگي العالم كله حتى و ان كنت انه بي
مُلاذ : احرك العالم كله
بس قبلها اطلعك من بين هالعالم
و نشوفه شلون يحترك سويه
رفع عيونه دحگلي و رجع غمضهم
رجع فتحهم و يغفي
مُلاذ : نام جاي تغفي ليش ترجع تفتح عيونك
أيهم : اريد احفظ عيونج
مُلاذ : ميخالف نام و من تكعد دحگلهن
أيهم : تروحين
مُلاذ : ما اروح و الله يمك اناا
غمض عيونه ، غطيته اكثر
لحد ما نام و غفى كلش ، بقيت يمه
نزلت راسي بست خدة ، كمت بـ هدوء
لميت الكزاز المتطشر و كنست الصاله
تذكرت أبيل ، خابرت على أيمن يجيبه و يجي
نظفت البيت كله و أيهم غافي
كل شويه تروح عيني عليه و اصفن
تطن جملته بـ راسي لمن گال
"انــه ... انه تَعب السِــنين
انه الما لَمه حضن دافي و حَـنين"
كملت تنظيف ، بدلت ملابسي
رحت كعدت يمه بـ الگاع
سندت راسي على ايديه ،
ظليت ادحگله و هو نايم
ملامحه مبين بيها التعب حتى و هو نايم
شكد يتشاقى و يضحك و يخنكني بـ سوالفه
بس بعدين الگا تعبان حتى لو ما يحجي
من ملامحه واضح ، و من نظراته
كل ما افز بـ الليل
الگا كاعد كدامي ع الكرسي يدحگلي و يدخن
لمن اسأله : ليش كاعد هيج و تدحگلي؟
يجاوبني : ما گدرت انام
و ما عندي شي افضل من انو اتأملج و انتِ نايمه
ابتسمت ادحگله لمن اتذكر كلامه
الشخص الوحيد يلي حَبني هيج ابوي
و هسه بس أيهم احس بـ حبه صدك
درت وجهي لمن اندكت الباب
گمت بسرعه لبست شالي
و فتحتها ما اريد أيهم يفز
دخل أبيل يريد يصيح سديت حلگه
مُلاذ : بابا نايم
هز راسه بـ قبول
شلته بوست وجهه و خدوده
دحگت لـ أيمن ، داير وجهه مني
مُلاذ : ادخل
أيمن : لا خل اروح يلا مع السلامة
حتى ما خلاني احجي
حجا بسرعه و نزل راح من يمنا
عگدت حواجبي بـ استغراب ادحك وراه
درت وجهي ، دخلت جوا
نزلت أبيل بـ الكاع
مُلاذ : انا ما مسويه اكل تنتظرني مو؟
أبيل : اسوي وياج ؟
مُلاذ : تعال يلا بس اول شي بدل و غسل
هز راسه بـ قبول
اخذته لـ الحمام غسل و راح لـ الغرفة بدلت اله
اخذته و طلعنا من الغرفة ، كعد ع الميز
صفنت شنو اسوي غدا خابرتني امي ، جاوبتها
مُلاذ : ها امي
فيروز : مُلاذ خو ما صاير شي ؟
مُلاذ : لا ، ليش شكو؟
فيروز : انا جنت طالعه رحت لـ السوك اجيب قماشات اريد اخيط اجا جسار اخذني
و ملاك تكول سامعه صوت تكسير من بيتكم
مُلاذ : لا ماكو شي
فيروز : اكيد ؟
مُلاذ : اي
فيروز : لعد شنو هالصوت؟
مُلاذ : أبيل يلعب بـ العابه و يطلع اصوات عاليه
فيروز : ها خوش عبالي صاير شي
مُلاذ : لا ما صاير ، بالليل انزل اشوفكم
و هم ردت اتسوك الكم تحتاجون شي ؟
فيروز : ننتظرج ، لا يمه سلامتج ما نحتاج
مُلاذ : تمام اذا ردتوا شي خابروني
فيروز : تمام
سديت الاتصال
ورا ثواني رجعت امي اتصلت مره ثانية
مُلاذ : ها فوفو
فيروز : اگلج مُلاذ تغديتو؟
مُلاذ : لا ليش؟
فيروز : بقى دجاج و تمن احمر هواي
ردت اصعد الكم بس نسيت
اذا ما ماكلين تعاي اخذي
مُلاذ : يعني و الله العظيم
انتِ اكبر شخص منقذ شفته بـ حياتي
هسه صفنت شنو اسوي غده و خابرتيني
فيروز : هههههه تعالي يلا
مُلاذ : اجيتج
سديت الاتصال
انداريت لـ أبيل دحگتله
مُلاذ : فنك وين نروح ؟
أبيل : وين ؟
مُلاذ : لـ امي تعال ناخذ منها الغده
أبيل : بيبي فرنوزه
فحطت من الضحك يعرف اسم امي فيروز
و يسمعني مرات اصيحلها فيروزة
ما يعرف يلفظ عدل فـ يگول بيبي فرنوزه
شلته نزلت من الميز ، لبست عبايتي
نزلنا انا وياه دگينا الباب ع بيت اهلي
طلعت الي امي بـ ايدها الجدر
و بـ الايد الثانية صينيه مال دجاج
دحگتلها بطني تقرقر من الجوع
مُلاذ : بويه معت باع الريييحة
فيروز : ههههههه دوم احسب حسابكم انتِ و أيهم
مُلاذ : تدرين بـ اكلي يسوي تسمم
اقوى شي اعرف اسوي حميسة دجاج
فيروز : ما خليتيني اعلمج ع الاكل
مُلاذ : الي خلك يا فوفو
بس لا تخافين من انخطفت علموني كلشي
حتى غسل الزوالي
سكتت امي مختفيه الابتسامه من وجهها
مُلاذ : اضحكي يمعوده
لا تندميني لان ذكرتج
ابتسمت ساكته
فيروز : بالعافية
مُلاذ : الله يعافيج فيروزه
أبيل : بيبي فرنوزه
ضحكت امي و دنكت كرصت خدود أبيل
تبوس بي منا و منا و تگله ينزل يمهم من يضوج
صعدنا انا و أبيل ، دخلت خليت الاكل
دحگت لـ أيهم ما ردت اكعده
وكلت أبيل و انا ما اكلت بقيت منتظرة أيهم
خلص أبيل غسلت اله و راح اتمدد بـ غرفته
دحگت لـ أيهم رفعت الغطى و نمت يمه
اتحرك و خلا وجهه بـ صدري و كمل نومته
ظليت على هالوضع لحد ما غفيت نعسانه
كعدت لمن حسيت بـ شي على شفتي
فتحت عيوني بـ نعاس دحگتله أيهم
الصاله ظلمه و انا بردانه
شديت الغطى الي اكثر و هو ما ابتعد
يحرك بـ شفته ع شفتي بـ هدوء
ظليت ساكنه بـ مكاني مثوله و مسطوره
عابت الج مُلاذ
كل عمرج تكولين عن روحج ثگيله
و انا بس يلزمني أيهم انسطر سطر
ما يبقى بيه ذرة ثگل
و اخاف ابادله و ياخذه الواهس
أيهم دوم لو وجهه حار لو ركبته لو صدرة دمه حار
و انا على طول جسمي عباره عن ثلجه
و اطرافي كلش باردات هو عكسي تماماً
من يحضني احس روحي حاضنه صوبه
مُلاذ : أيهم اختنكت
بس حجيت باسني
عباله انا نايمه و من سمع حسي انطلق
لزمت بـ زنده حيل عصرته بـ ايدي
لمن زاد ضغط أيهم عليه
اول ما بعد وجهه من وجهي حجيت بسرعه
مُلاذ : لا تأذيني
أيهم : نار تچوي گلبي اذيتچ
مُلاذ : شلون صرت؟
أيهم : ليش ؟
مُلاذ : الصبح جنت تعبان كلش غير؟
أيهم : شوكت؟
مُلاذ : الصبح
أيهم : ما اتذكر شي؟
مُلاذ : ترا جنت تعبان و كسرت كل شي
و ظليت تحجي و تمتمت بعدين اختنكت
ما اعرف شصار بيك !
حجا بـ فزع
أيهم : شحجيييت ؟
مُلاذ : ما حجيت شي
بس تگول أيمن لا تخاف و تگلي لا تعوفيني
كام كعد على حيله لزم راسه بـ تعب
كمت كعدت انا هم دحگتله
مُلاذ : شكو؟
أيهم : ما اعرف ما اذكر
مُلاذ : انت دوم هيج؟
أيهم : اي
مُلاذ : ليش ؟
أيهم : من ما انام اكثر من يوم
مرات توصل بيه اكثر من 3 ايام
غمض و فرك وجهه و كمل
أيهم : و هذا الشي صعب كلش على عقل الانسان
الي ما ينامون اكثر من يومين ممكن يتخبلون
تصير افعالهم مو متوازنه و يتعبون
خليت ايدي على خدة و حجيت
مُلاذ : و انت؟
فتح عيونه دحگلي بـ نظرة تعبانه
أيهم : انه ... انه عقلي يرحع لـ ذكريات قديمه
حك رگبته و حجا
أيهم : يربط بينهم و بين الواقع
و احس نفسي بـ الموقف الاتذكرة
مُلاذ : دوم تنسى تصرفاتك؟
أيهم : لا مرات انساها
مرات من انام و اكعد اتذكر
هزيت راسي بـ قبول ساكته
كمنا اكلنا انا وياه و أبيل كعد
ردت اروح اجيب مسواك لـ اهلي
أيهم ما خلاني لان دنيا ليل طلع هو يجيب
راح اتسوك النا و الهم و رجع
بعدين نمنا بس أيهم بقى كاعد
ثاني يوم رجعت من شغلي
أيهم ما موجود ، سويت غدا
و كعدنا اكلنا انا و أبيل
لـ الليل خابرت اهلي يصعدون يمي
حسيت نفسي رح اموت من الملل
و أيهم ماكو بـ المستشفيات يفتر
كعدوا امي و ملاك بـ المطبخ
و أبيل كاعد ع الميز بيناتهم
رحت كعدت يمهم
فيروز : اسوي الكم حلاوه؟
مُلاذ : لا لاتتعبين روحج
گليلي شلون تسويها و انا اسويها
فيروز : لا هسه انا اسويها عدكم مواد؟
مُلاذ : اي أيهم كل شي يجيب
النحتاجه و الما نحتاجه البارحه مو طلع اتسوك
فيروز : اي ؟
مُلاذ : من رجع لكيته جايب اكل مال بزازين
اگله شنسوي بي احنا ماعدنا بزونه
يگلي شفته رخيص جبته ، خلاني الطم
فيروز : هههههههه يحسب حساب
كامت امي تسوي الحلاوة
و شويه و سمعت صوت الباب انفتح
و گبل وراها صوت أيهم العاط
أيهم : لَـذه الفووووصه وينج؟
دحگت لـ امي و ملاك
انحمست وجوههن من الضحك
و نوب هو مستمر يصيح
أيهم : مرتي مرة بزووون عدها سبع عيوون
ملاك حطت ايدها على حلگها
و أبيل خلا امي تنزله و راح ركض لـ ابو
طلعت ركض ورا أبيل
قبل لا يحجي أيهم شي ثاني سديت حلگه
مُلاذ : الله يخزيك اهلي عدنا
رفع حواجبه و انا ساده حلگه
ضحك ، باس كف ايدي
أيهم : خل اسلم عليهم
مُلاذ : امشي يالبزون
أيهم : ما عيب عليج تسميني بزون؟
مُلاذ : مو انت تگول
مرتي مرة بزون عدها سبع عيون
بس الكدامي مو بزون عتوي
اهتز جسمه يضحك ، دخل يسلم على اهلي
لـ الليل كلش احنا كاعدين سويه و نسولف
بعدين نزلوا لـ بيتهم ...
عدت الايام و احنا نركض بـ خطوبة نور
باجر يجي اركان وي ناس مشايه عليها
و يخطبها من جسار
بعدها يمشون بـ سالفة العقد و الزواج
رحت الصبح الهم نظفنا البيت
و بخرنا و رتبنا المكان
انداريت لـ راكان يلي يبجي بـ ايد نور
و هي حايرة بي
مُلاذ : شبي؟
نور : مادري و الله رح ابجي
هسه شبي يبجي غيرر اعرف
مُلاذ : صابه اكتئاب من عرف امه رح تتزوج
نور : يمه ابني حبيبي خيووولي الزواج
ما اريده اذا راكان يظل يبجي ما اتزوج و الله
ركوني حبيبي و الله ما اتزوج هاي اكعد يمك
مُلاذ : عمي و العباس انت اكبر فطيرة
من كل عقلج الطفل يبجي ع الزواج
نور : شمدريني غير انتِ تگولين
اخذت راكان من ايدها و حجيت
مُلاذ : مصيبتكم تصدكون بـ كل شي اگوله
ضحكت نور و انا اخذت راكان و طلعت
نور : وين؟؟
مُلاذ : جوعان لذالك يبجي
نور : ياااا صدك نسيت اشربه حليييب
مُلاذ : حايرة بـ حبيب الروح وين تذكرين الطفل
عكدت حواجبها و گالت : مُلاذ
ضحكت و عفتها ، رحت لـ المطبخ
احضر حليب راكان
جاوبت لمن اجاني اتصال من أيهم
أيهم : لَـذه
مُلاذ : ها
أيهم : وينج شجاي تسوين؟
مُلاذ : بعدنا نحضر انا و نور
بعد شوي رح تجي المشيه
أيهم : جان سوو عقد فد مرة؟
مُلاذ : نور ما تقبل تگلي عمي هستوه ميت
أيهم : نور اكعدي راحة و اعقدي
مُلاذ : مو يمي ما تسمعك
أيهم : منو يمج ؟
مُلاذ : بس انا و ركوووني
أيهم : ركوني ياهو؟
مُلاذ : راكان ابن نور
أيهم : شنو خنكتي الطفل شو ما اله صوت؟
مُلاذ : لااا جاي اسوي اله مميه
أيهم : دربالج لا يتسمم
مُلاذ : الچذاب اسممه و لا اچذب عليه ابو الچذب
أيهم : الفوصه ام المصايب
مُلاذ : و الله انت ابو المصايب
أيهم : اشش يلا افتحيلي كاميرا خل اشوفكم
مُلاذ : تحلم
أيهم : ليش احلم هذا ويا بيت نور
اجيج و اشوفج
مُلاذ : اهو يلا رح افتح كاميرا
أيهم : سباعيه
فتحت اله كاميرا ، دحگتله
مثبت التلفون بالسيارة يسوق
و انا شايله راكان بـ ايد
و اسوي حليب بـ الايد الثانية
أيهم : يوم التشيلين ابننا هيج
دحگتله و رجعت عيني ع المميه خضيتها
مُلاذ : لا تتأمل ما رح يصير عدك طفل مني
أيهم : ليش؟
مُلاذ : ما اريد
أيهم : افا لَـذه ما عرفتج تخافين من الحمل
مُلاذ : ترا جاي احجي صدك
انا ما اريد طفل و لا رح اولد طفل
أيهم : يعني ما تريدين طفل يربطنا بـ بعض اكثر؟!
مُلاذ : لا ما اريد
أيهم : تمام ، عندي شغل رح اروح
مُلاذ : روح
حسيته ضاج بس قابل اجذب عليه
اخذت تلفوني سديت الاتصال
نومت راكان بـ مكانه و انطيته المميه و غطيته
لـ العصر اجو اهل راكان
و احنا خابرنا لـ جسار گاللنا
جسار : جايكم بـ الطريق
سدينا الاتصال ننتظر ، راح عزيز يتعذر منهم
لان رح ينتظرون جسار شوية
و نور ميته من التوتر روحها تريد تطلع
خابرني أيهم
مُلاذ : ها ايهومه
أيهم : ما عيب عليج
رجال شكدني شكبرني تگليلي ايهومه ؟
مُلاذ : عبالي زعلت مساع
أيهم : عليمن ؟
مُلاذ : على سالفة الطفل
أيهم : انه هم ما اريد
على يا ضيم نجيب طفل
مُلاذ : انا هم هيج افكر
أيهم : لَـذه انه بـ بيت نور
مُلاذ : شتسووي؟
أيهم : مشايه وي اركان
مُلاذ : يوول ليش ما گلتلي؟
أيهم : اسويلج مفاجعه
مُلاذ : هههههه صدك مفاجعه
ضحك و گال
أيهم : تعالي اشوفج
مُلاذ : اجيت
سديت الاتصال و طلعت اله
دحگتله مبتسمه
مُلاذ : زوجي الچذاب
أيهم : مرتي الفوصه
مُلاذ : مو تفشل اركان مثل ما سويت من اجيت تحاجي امي و تگله اركان يحب بتكم
أيهم : هههههههه متفقين
ابتسمت ظليت شويه يمه
بعدين دخلت جوا سألتني امي وين رحت
گلتلها أيهم جاي وي اركان
خلتني اخابرة و طلعت سلمت عليه
دخليت لگيت نور صايرة حمره و ايديها يرجفن
مُلاذ : يا ولج اهدي شجاج
نور : خاف هم تخرب
مُلاذ : لا ما تخرب ان شاء الله
نور : جسار لسا ما اجا
مُلاذ : هسه يجي انتظري
سكتت و هي تعض شفتها و لازمه ايد بـ ايد
فعلاً تأخر جسار ، رفعت تلفوني خابرته
مُلاذ : وين صرت عسى ما شر
جاوبني وصوته تعبان حيل
جسار : جاي
اريد احجي ما سمعت غير صيحه
و صوت ضربات قوية ، مثل شي يتكسر و ينگلب
من بعدها صار هدوء تام و انا موسعه عيوني
گلبي ينبض بـ خوف ، روحي راحت
خفت انطق و ما يجاوبني ، حجيت بـ نبرة خوف
مُلاذ : جسار؟
رجف كل جسمي من ما جاوبني
رجلية ماتن وكفت بـ صعوبه ،
النفس ضاك بـ صدري
همست مره ثانية متمنيه يجاوبني
مُلاذ : جسار تسمعني؟
ما جاوب روحي راحت ، جمدت بـ مكاني
ايدي ترجف طيحت التلفون منها
الكل يركضون الي و يسألون شصار
لزمتني امي تخضني بـ ايديها و تسأل
همست صوتي رايح كل جسمي يرجف
مُلاذ : جسار ... جسار سوا حادث ...
- يتبع الفصل التالي اضغط على ( رواية جرح الأيهم ) اسم الرواية