رواية جرح الأيهم الفصل الثاني و الاربعون 42 - بقلم أيلان
"الجُــرح الثاني و أربعون"
مُلاذ : بـ شنو؟
سارت دمعتي من عيني على جانب وجهي ،
بلعت غصتي و حجيت
هتان : بـ حبي
مُلاذ : شنو رده ؟
هتان : ما جاوبني
لان ما انطيته مجال يجاوب
مُلاذ : احسج تايهه
عاينت بـ وجهها ، ضميت شفتي ،
اول مره شخص يفهمني
و يحجي كلمه فعلاً تناسبني
هتان : ما اريد ابجي
رح تشوفيني ابالغ بـ الموضوع
رح تفكرين هو بـ النهاية شعور
ليش كل هالبجي و الحزن
رفعت اكتافي و حجيت
هتان : بس انه هيج من طفولتي
روحي تحترك من اصغر شي يصير الي
الحب و المشاعر چان شي كلش بعيد عني
حتى الثقة بسبب تشديد أيهم عليه
انو ما اثق بـ اي شخص صرت فعلاً ... ما اثق
هتان : بس انطيت حبي و ثقتي
و كل شي بـ داخلي لـ شخص
اعرف ما رح يكون الي ابد
خصوصاً يحب وحدة ثانية
و هالشي مو هين ابد من تتعلقين بـ شخص
رجعت ظهرها ع المرجوحه
تجتفت و حچت
مُلاذ : الشخص جسار
انداريت دحگتلها حجيت بسرعه : لا ...
قاطعتني قبل لا اكمل كلامي
مُلاذ : لا تنكرين ، شفتج مساع
تدحگيله ، عرفتي يحب نور؟
درت وجهي ساكته
مُلاذ : مو مبالغة
بس الي يعرف هالشعور يحس بيج
ابد لا تنتقصين من نفسج و من مشاعرج
وحدج الي تعرفين الي بـ داخلج شنو
بس هسه اهدي لان البجي مارح يفيد
سكتت و مسحت عيوني
هزيت راسي بـ قبول ، بقينا كاعدين برا
شويه و انفتح الباب ، دخلوا الولد و بـ ايدهم اكل
رحت اخذتهم من ايديهم
دخلت لـ جوا لگيتهم يحضرون بـ السفره
خليت العلاليك ، دخل جسار لـ المطبخ
درت وجهي ناحية الباب اريد اطلع
دحگت مُلاذ كدامي اشرت الي بـ عيونها
بـ معنى "ابقي بـ مكانج لا تطلعين"
درت وجهي منزله راسي و افتح بـ العلاليك
رفعت نظري دحگتله يدحگلي
رجعت نظري ع العلاليك بسرعه و هو طلع
شوي و رجع دخل جسار يحاجي خالة فيروز
جسار : خاله انا و سلطان رح نروح
من تريدون تردون لـ البيت خابرولي
مُلاذ : ليش ترجع هسه رح نصب عشا؟
جسار : باسط خابرنا امي تعبانه
نروح نشوف شبيها
فيروز : يا شبيها خو ما بيها شي ؟؟
جسار : لا مابيها بس ظهرها تعرفين بـ امي
فيروز : زين شوفها و طمنني عليها
بس اوكف خل اسويلكم لفات لا ترحون هيج
جسار : تسلمين خاله ما نريد
هسه ناخذ ويانا من برا و يمكن امي مسوية عشا
فيروز : لا لا يمه انتظر اسوي الكم لفات بسرعه
جسار : مو تنسين تخابريني
لمن تريدون ترحون
فيروز : نرجع وي أيهم
جسار : و عمه منارس و ..
سكت ما كمل انا اذاني يمهم
عرفت جان رح يگول نور
بس اتذكر وجودي و سكت
مُلاذ : نشمرهم بـ الشارع
غير نرجعهم ويانا هم
جسار : اذا السيارة ما كفت
نفخت مُلاذ بـ ضجر
مُلاذ : يمه ورمت گلبي شبيك
شكد تفكر السيارة تكفي
هي ملاك و انا و نور و عمه لو امي بـ الورا
و وحدة تصعد بـ الصدر
ظلوا يحجون بعدين طلع جسار
درت وجهي دحگت ورا
رجعت عيني لـ مُلاذ تدحگلي
اجت لـ يمي و حجت
مُلاذ : امسحي دموعج و اهدئي
عوفي الاكل انا هسه اخذه وياهم
روحي غسلي و تعالي
ما حجيت اي شي نفذت الي گالته
مُلاذ :-
كعدنا نتعشى ، دحگت ادور على أبيل
و انا ادور عليه بـ عيوني دحگت
دخل من الباب يضحك ، اجا كعد يمي
شاله أيهم خلا بـ حضنه
عكد حواجبه يدحگله بـ استغراب
أيهم : شجنت تسوي؟
دحگله و هز راسه بـ رفض
أبيل : ما اسوي
أيهم : مخلي عطر؟
ارتبك أبيل هز راسه بـ رفض
أيهم : متأكد؟؟
هز راسه بـ قبول ، سكت أيهم و كعد يوكله
ظلينا نسولف و نضحك ع سوالف أيمن
كل شويه يگول خل نوكل الطفل أدهم كباب
خلا باهر يتخبل
و احنا نحجي انداريت لـ أبيل
يلي يحك جسمه حيل و صار مطبع احمر
عكدت حواجبي ، كام يكح كحه قويه
دحگله أيهم يدك على ظهره
أيهم : أبيل بابا شبيك غصيت ؟
اشرب مي
انطينا مي ما يكدر يشرب
كحته قويه كلش وجهه صار احمر دم
عيونه كامت تدمع ، اختنك و بقى بس يشهك
اخترعت من حالته
مُلاذ : أبييييل
درته الي اضرب خده راشديات خفيفة
جره أيهم من ايدي بسرعه و كام يركض بي
گمنا كلنا وراه
يغسل وجهه و يدك على ظهره
دخلت ويا اخذت مي مسحت على وجه أبيل
صاح على الواكفين يجيبون مي
ركضو يجيبون كعد ع القنفه
و شرب أبيل المي ، بعده مختنك و يكح
جر أيهم ملابسه يشمهن
رفع راسه و صاح بـ اهله
أيهم : منو مخلييييله عطر
ام أيهم : يمه سووووده بوجهي
أبيل يمه وليدي ، و الله محد خلاله ما خلينا
نزعه أيهم تشيرته ، صاح لـ امه تجيب دوا
كعد أبيل بـ حضنه صار صدره احمر
عيونه متروس دموع و ايديه طكع حمر
لان جان يحكهم حيل
اجت ام أيهم تركض انطته الدوا
أيهم : أبيل افتح حلكك اشرب الدوا
أبيييل عاينلي
داره عليه و فتح حلگه
شربه الدوا و رجع شربه مي
دقايق كلنا كاعدين و صافنين عليه
و أيهم مخلي بـ حضنه و يدحك بـ وجهه
خفت كحته بس وجهه احمر دم
رفع راسه يدحك لـ أيهم
خزره أيهم حجا بـ عصبية
أيهم : مخلي عطررر؟
هز راسه بـ قبول
نزل راسه و كام يبجي و ايديه على عيونه
و أيهم على خزرته اله
ام أيهم : و الله ما ادري بي
شوكت مخلي عطر
أيهم : شمي تشيرته تارس روحه ترس
انه مو گايلك لا تخلي عطرر عندك حساسيه!
بقى أبيل يبجي خايف من نظرات ابو
و خايف من اختنك و ظل يكح
گمت من مكاني
اخذت أبيل شلته من حضن أيهم
جلب بـ رگبتي و خلا راسه على جتفي
رجع يكح بس كحه خفيفه
انداريت لـ هتان
مُلاذ : انطيني تشيرت اله
راحت هتان تركض اجت جايبه الي تشيرت
لبسته لـ أبيل ، اخذته و طلعنا لـ الحديقة
وكفت ، رفع راسه مسحت دموعه
مُلاذ : يلا كافي لا تبجي عيونك صارت حمر
أبيل : طيبه ريحتي عطر طيب
مُلاذ : انت بدون عطر ريحتك تخبل
ليش تخلي ؟
أبيل : عمو باهر خلا و انه خليت ورا
مُلاذ : ما يصير حبيبي ماطول بابا گايلك
لا تخلي فـ لا تخلي لان بابا ما يريدك تتاذى
دحگت لمن اجا أيهم وكف يمي دحك لـ أبيل
مد ايديه لـ أبيل و گبل أبيل شمر روحه بـ حضنه
ابتسمت ادحگلهم أيهم
باس خد أبيل بوسات متتالية
أيهم : انه مو دوم اگلك لا تخلي عطر
مو زين عليك و نظل تكح و جسمك يصير احمر
هز راسه أبيل بـ قبول
أيهم : بعد تعيدها؟
هز راسه أبيل بـ رفض
ابتسم أيهم و رجع حضنه و أبيل لازم بـ رگبته
محاوط بـ رجلية بطن أيهم ،
أيهم خلا ايده ع راس أبيل من ورا
درت وجهي اريد ارجع ادخل جوا
جرني من ايدي ، صاير سد كدامي
بحيث ما انشاف ، سحب وجهي و باسني بـ خفه
أبيل مخلي راسه بـ رگبة أيهم ما يشوفنا
دفعته خازرته ، دحگلي بـ طرف عينه
لزم ايدي ، اريد افلتها ما يقبل يعوفها
اخذني و دخلنا جوا اول ما خَفت لزمته
نترت ايدي من عنده
شافوا أبيل صار زين وراها رجعنا لـ البيت
دخلت الغرفة جريت شالي من رگبتي
ذبيته ع الجرباية ، و كعدت
رفعت تلفوني ، دزيت بصمة لـ صافي
مُلاذ : صافي باجر نفتح المكتب
لحظات و ردت عليه بـ مسج
صافي : تمام قلبي
نزلت التلفون و سديته ، نزعت عبايتي
انداريت لـ أيهم يلي دخل الغرفة
درت وجهي عنه ، رحت تمددت بـ جهتي
جريت الغطى على راسي ، مغمضه
أيهم : رح تظلين زعلانه ؟
ما جاوبته ، انجر الغطى من وجهي
فتحت عيوني دحگتله واكف كدامي
سحبت الغطى من ايده ،
درت نفسي ع الجهه الثانية ، رجعت غمضت
كعد يمي لزم ايدي يريد يدورني عليه
نترت ايدي و بقيت مغمضه
كام من يمي ، اسمع صوت خطواته
صارت صوت ضربه قويه و ضربه ثانيه
اختفى صوته لـ ثواني
درت وجهي دحگتله بـ برود
درت عيوني الميز يلي يمي
بالگاع و بابه بـ الگاع ،
دحگت لـ صندوقي يلي مشمور
و غراضي متطشره
مُلاذ : شسووويت !
كمت بسرعه من مكاني
رحت ع الصندوق مالتي يلي بـ الگاع
اخذت الظرف و كلشي يخص ابوي
خليتهن بي دحگت لـ النستله
شمرتها بـ الصندوك ، دحگت لـ التشيرت
شلته من الگاع ظل بـ ايدي ، ضميت الصندوق
أيهم : شنو هذا؟
رفعت عيني دحگتله
عفته و گمت ، رجعت تمددت بـ مكاني
حضنت التشيرت لـ صدري ،
رغم مابي ريحة بابا بس احب هالتشيرت
لان بقت ريحة ابوي بي سنين
جنت كل ليلة احضنه و انام
و لمن اتدمر تراب و صارت كله ريحة تراب
بطلت انام و احضنه لان راح العطر يلي بي
أيهم : شنوو هذا؟
درت وجهي دحگتله
مُلاذ : شتريد؟
أيهم : شنو هذا ؟
مُلاذ : تشيرت شتشوف ؟
أيهم : تشيرت منو؟
مُلاذ : تشيرتي
أيهم : كله تراب ؟ ليش محتفظه بي؟
مُلاذ : بابا حضنني اخر مره و انا لابسته
و بقى عطره بي و احتفظت بي عندك بعد سؤال؟
سكت يدحك بـ وجهي
درت وجهي عنه و رجعت غمضت
اريد انام ما يخليني ، كعد يم راسي
أيهم : مُلاذ عاينيلي
ما حاجيته بقيت مغمضه
أيهم : مُلاذ
سكت ثواني سمعت صوت جداحته
يلي ورث بيها الجكاره من بعدها
صارت ريحة الدخان بـ خشمي
فتحت عيوني لمن حسيت
انرفع الفراش من الجهه الثانية
طبگت شفتي حاصرة ضحكتي عليه
و هو يفتر يروح و يرجع بـ الغرفة حاير
خلص جكارته طفاها و ذبها
راح كعد ع القنفه كدامي ، غمضت عيوني
كم دقيقه و غفيت لان نعسانه
فزيت على صوته يم راسي يندسني
أيهم : مُلاذ ، لَـذه اكعدي
مُلاذ : استغفرالله العظيم
أيهم : كعدتي ؟ عايني سمعت شغله
رجع ندسني مره ثانية
أيهم : لَـذه تسمعيني ؟
عايني تعرفين شنو عرفت ؟
الي تزعل من رجلها تتحول علاگه بعدين
تصير علاكه تمشي بـ الشارع
هاي التزعل من رجلها
مُلاذ : يا رب اصير علاكه
يا رب بـ جاه كلمن عنده جاه
اصير علاكه و اخلص منك ؟
اشتريها بـ روحي لو تصير
أيهم : هاي هيج تكرهيني ؟
مُلاذ : لان چذاب اكبر چذاب انت
يلا وخر عني اصلاً صوجي انام هنا
أيهم : و الله ما تكومين
مُلاذ : عوفني خليني انام شتريددد
باجر عندي كعده من الصبح
أيهم : صالحيني و تنامين
مُلاذ : يلا صالحتك اعتقني
دحگلي و گال بـ فرح
أيهم : و الله؟
مُلاذ : بس عوفني انام
بـ داعة اهلك بـ داعة ابوك عوفني انام
أيهم : ههههههه لا حلفتيني بـ العزيز
دحگتله بـ طرف عيني
درت وجهي اريد تغمض عيني و انام
بعدني هستوني غمضت جر وجهي يبوس خدي
و محاصر رجلَيه بين رِجليه
مُلاذ : ساعة السوده التزوجت بيها
طلع روحي يلا عافني بـ حالي
ثاني يوم كعدت لگيت أبيل نايم
و أيهم كاعد قبلي و طالع
ما ردت اكعده علمود الروضه
شلت أبيل نزلته يم اهلي و تريكت يمهم
بعدين صعدت بدلت و رحت لـ الشغل
هكذا مرت الاشهر و نور ولدت
صار عدها ولد سمته " راكان"
و غاده اتحسنت بس تركت الشغل
لان جانت ما تكدر توازن بين شغلها و ابنها
جسار انقطع عنا ما شفته غير بـ ولادة نور
و بعد ما شفته ، أيهم ايام طويلة ما يرجع لـ البيت
و طبعاً انا و أبيل نكضي الوقت كله سويه
نسوي حلويات او نطلع نشتري
او ننزل يم اهلي نكعد يمهم و نتونس وياهم
من بعدها نصعد ،
لمن اتصل بـ أيهم يگلي شغل و خفارات
و يشتغل بـ اكثر من مستشفى
رجعت مثل صغري متعلقة بـ تشيرتي
و دائماً احضنه و انام ...
و طبعاً لحد هاللحظة الكوابيس ملاحكتني
اعرف عشت اشياء مو زينه
و باقية بـ عقلي حتى لو ما افكر بيها
و بـ نهاية اليوم الكوابيس
تذكرني بـ كلشي صار الي
و هذا الشي استمر لـ سنوات
كل يوم نفس الكوابيس و بدون انقطاع
بـ البداية جنت افز و بعد ما انام
بس بعدين كد ما تعودت ع الاشوفه بـ احلامي
صرت افز و ارجع انام كلش طبيعي
بعد فترة انصدمت بـ خبر وفاة عمي محمد
و رحنا لـ الفاتحه هناك شفت عمي احمد
و نور جانت ويانا خليتها يمي
ما اخليها تخطي اي خطوة وحدها
و ابنها ويانا لو انا شايلته لو هي
و طبعاً امها هم موجوده
شفتها كم مره تحوم حوالين نور
منعت نور تخلي امها تعرف صار عدها طفل
لذالك ظليت انا اشيل الطفل و اخلي نور بعيده عنه
بـ الاماكن يلي موجوده بيها علياء
لـ العصر و رَجعت نور هي و ابنها لـ بيتهم
ابد ما أمن عليها يمهم
اعرف علياء تظل تبحوش ورا هالطفل
اذا عرفت حفيدها رح تعرف من سقراط
و رح تگول لـ ام سقراط
و اذا طلع سقراط و عرف هذا ابنه
بعد ما رح يعوف نور بـ حالها
جنت حاسبه لـ كلشي حساب
و مفكرة حتى بـ ادق التفاصيل
لان حسيت مسؤولية نور و ابنها
صارت عليه و لازم احميهم من كل احد ياذيهم
عدت ايام الفاتحة
و رجع كلمن لـ بيته
دخلت ادور على أيهم تعودت اصيح اله الچذاب
بحيث مرات بدون قصد اصيح اله هيج
مُلاذ : الجذاب
أيهم : ها؟
دحگتله طلع من المطبخ
مُلاذ : شجاي تسوي ؟
أيهم : سويت اكل گلت تجين جوعانه
ابتسمت و تقدمت عليه
مُلاذ : شوكت رجعت؟
أيهم : العصر
مُلاذ : و اجيت گبل سويت اكل ؟
بـ ايده وصله لزمها بـ ايده الثانية
ابتسم و تدنى عليه ، هز راسه بـ قبول
اتوسعت ابتسامتي ،
ندست صدره بـ خفه و حجيت
مُلاذ : رغم انت اكبر چذاب
بس عندك ايجابيات
ضحك قرب وجهه الي حجا بـ ابتسامة
أيهم : چذاب بس يمج و صريح يم الكل
مُلاذ : نوع نادر من انواع الحب محد يريده
أيهم : هههههه اصدمج انه
مُلاذ : زين و اذا تجرأت شويه على حضرتك
و اصدمك انا بدال ما انت تصدمني بـ كل مره
أيهم : اصدميني جعل محد يصدمني غيرج
ابتسمت ابتسامة ظاهره اسناني
تدنيت عليه نزلت راسه الي بـ ايديه
دحگلي ما فاهم بست خده تحت عينه
بوسه قويه ،
ابتعدت بـ هدوء دحگتله مغمض
فتح عيونه دحگلي ، عبرته متجهه لـ غرفة أبيل
التفتت دحگتله و انا اضحك حجيت
مُلاذ : هاي مكافئة العشا الي سويته
اندار دحگلي عض شفته وضحك
أيهم : انعل ساسج شسويتي بيه و عفتيني
ضحكت من كل گلبي على تعابيرة
دخلت لـ غرفة أبيل لگيته كاعد يشخبط بـ ورقة
مُلاذ : انا اجيت
اندار دحگلي و ابتسم
رحت لـ يمه حضنته و بست شعره
مُلاذ : شصار اليوم بـ الروضه
أبيل : ما صار
مُلاذ : ليش ضايج؟
هز راسه بـ رفض
مُلاذ : زين البنية الاسمها مينا شصار عليها؟
أبيل : اليوم هم اجت تبجي
ابوها صيح عليها
رفعت حواجبي
مُلاذ : و المعلمات يلي هناك شسون؟
أبيل : حاجن ابوها و اخذنها يلعبنها
و انه اخذت العابي و رحت العب وياها
مُلاذ : عفيه و هي شسوت؟
أبيل : ضحكت و لعبت وياي
بس كسرت سيارتي و گامت تبجي
مُلاذ : انت صيحت عليها لان كسرت سيارتك؟
أبيل : لا هي تبجي
مُلاذ : بجت من وحدها؟
هز راسه بـ قبول
عبست شفتي بـ استغراب
شوي و صاح النا أيهم على العشا
بدلت ملابسي و غسلت
رحت يمهم و كعدنا تعشينا ...
نور :-
من بعد ما ولدت راكان
يلي صرت ما اكدر دقيقة اكعد بدونه
اربعه و عشرين ساعه شايلته و افتر بـ البيت
اشبعه بوس بحيث خدودة تصير حمر
و هو يخبل هادء كلش يشبهني حيل
عمتي و عزوز طبعاً مساعديني بـ تربيته
الدنيا صبح و هستوني مسبحته و ملبسته
دخلت عمتي الغرفة دحگتلها
رجعت عيني على راكان ،
رفعت ايديه اسوي بيهن حركة "هلو" حجيت
نور : هلو بيبي شوفي انا شلون نظيف
و ماما سبحتني و عطرتني و مشطت شعري
منارس : هههههه اي شفت تخبل
نور : شكراً بيبي انتِ هم تخبلين
ضحكت عمتي و تقدمت عليه
دحگت لـ تعابيرها متوتره
نور : شصاير ؟
رفعت راكان من الجرباية
كعدته بـ حضني ، اتقدمت عمتي كعدت يمي
تفرك بـ ايديها و متوترة
نور : عمه شصاير لا تخوفيني ؟
منارس : لا لا تخافين
بلعت ريگها ورا ثواني حجت
منارس : يعني انا جبيرة بـ العمر انتِ تعرفين
نور : اي ؟
منارس : احم دحگي رح احجي لا تضحكين
نور : يا عمه احجي مو شلعتي گلبي
منارس : العميد خطبني
نور : اي الله يتمملكم وافقتي؟
حجيتها ورا ثواني استوعبت
درت وجهي مصدومة ادحگلها
نور : شنوووو؟ يا عميد ؟
منارس : الي طلعنا انا و عزيز
من جان ابوج حابسنا
خليت ايدي على حلگي مصدومة
تعابير عمتي توحي انحراجها
گامت و گالت
منارس : يووو عمه شو انسي السالفه
لزمت بـ ايدها كعدتها حاصرة ضحكتي
نور : شنو شلون فهميني
وين شافج شوكت گلج؟
منارس : هو يعرف عزيز
و بسببه عزيز گام يشتغل بـ شركه
وي جسار لان هو اتوسطلنا
نور : اي اعرف
منارس : اي وراها كم مره اطلع لـ السوك
و اتسوك فـ اشوفه هناك صدفة
رفعت حاجبي ما اتحملت وضحكت
حجت عمتي بسرعه
منارس : و الله صدفه و الله
قابل انا شعرفني بالزلمه و روح امي صدفه
نور : اي عمه اعرف قابل شحجيت انا
اي كملي كلامج
منارس : لا شو عوفي السالفه
نور : لا عمه كملي يلا حبابه
دارت عيونها متوتره و رجعت كملت
منارس : اي كم مره وصلني
لان علاليك هواي و ماكدر اشيلهن
اي جان اي اليوم طلعت و شفته
و هم طلب مني اصعد ويا و اصر
عيب ارفض ورا اصراره
هيج جاي ينحجي و گلي اخطبج
طبعاً ما وافقت ، اي خل اروح اكمل الغدا انا
نور : ههههه لا عمه اكعدي اكعدي احاجيج
ليش رفضتي ؟ ترا الرجال مبين خوش رجال
و همين عنده وظيفه و عائلته مبينه زينين
و انتِ ما متزوجة و هو مرته ميته الله يرحمها
منارس : لا لا شنو يا زواج
كبرت انا على هاي السوالف تالي عمري اتزوج
و اخوي بعد ما عدا على وفاته سنه
نور : اسمعيني عمه هو شگلج ؟
منارس : گلي انا شفتج من زمان
و بالبداية جنت متردد و حاجيت بناتي و ابني
و گلولي ماعدهم مشكله و بالعكس كيفوا
لان انا گضيت عمري علمودهم
و ما قصرت وياهم
و لا جبت الهم مرة اب مو زينه
نور : اي انا احاجي عزوز
هو عزوز اصلاً ماعليه ما يرفض شحده
و انتِ اذا مرتاحه وافقي و روحوا اعقدوا
منارس : لا عمه كبرت على هاي السوالف
لزمت ايدها بـ ايدي و حجيت
نور : عمه كضيتي عمرج وي بيبي
لا حبيتي و لا تزوجتي
و لا سويتي اي شي لـ نفسج
و محد نصحج حتى و لا احد ذكرج بـ نفسج
ترا هاي سنة الحياة و لو بعد سنين
انتِ لازم تتزوجين و تصير عندج عائلة
نور : و اذا جبيره ؟ قابل عيب ؟ مو عيب
شي بـ الحلال و حياتج انتِ
و ادري بيج رح تشوفين العرس عيب
و لان جبيره و هو مو عيب لان هالشي حقج
فـ وافقي عمه انتِ قابل رح تسوين حفله
رح تروحون تعقدون و تجون
رفعت اكتافها بـ عدم معرفه
ابتسمت و ظليت اسولف وياها و اقنعها
ادري بالعميد خوش رجال من مواقفه ويانا
بالاخير عافتني و گامت طلعت
درت وجهي لـ راكان
يلي يلعب ايديه بـ الهوا
ضحكت و دنكت اله
نور : سمعت ريري بيبي رح تتزوج هههه
ضحك و ظل يحرك ايديه
دخل عزيز لـ الغرفة يركض
اخذ راكان بوسه و طلع يركض لـ الشغل
ضحكت ، شلت راكان حجيت و انا امشي
نور : هذا شبي عمو مخبل ؟
افتر و احجي وي راكان
لو يعرف ينطق جان گلي " عليج الله اسكتي "
لـ العصر قررت اروح اشتري اله ملابس
گلت لـ عمتي و طلعنا انا وياها
دخلت لـ المحلات اشترينا
صدريه لـ راكان و اشتريت هواي اشياء
بحيث طلعت ما اعرف اشيل راكان لو العلاليك
شايلته بـ ايد و بالايد الثانية علاليك
و بـ ايد عمتي هم علاليك
وكفنا يم محل رادت عمتي منه شغلات
خلت العلاليك يمي و دخلت تشوف
شلتهن كلهن بـ ايدي و تمشيت ادحك لـ المحلات
رجعت درت وجهي
وكفت يم المحل يلي دخلت اله عمتي
و انا واكفه درت وجهي ادحك
بـ البداية ما انتبهت بس بعدين استوعبت
و رجعت نظري ع الشخص يلي يمشي
جمد الدم بـ رجليه حسيتهن اوتاد ثبتت بـ الگاع ...
نور : اركان !
مستحيل رح انسى منظره
دحگتله مزين شعره ، ايديه بـ جيبه
لابس قمصله جلد سوده
رفعت عيوني لـ وجهه دحگتله
لحظات التفت و نزل راسه يلي رافعه بـ شموخ
و هو يمشي استقر نظره عليه ،
صدمته ما تختلف عن صدمتي
ما جنت متوقعه رح اشوفه
بلعت ريكي دحگتله
بقينا ساكنين بـ مكاننا لـ لحظات
وكع نظره على راكان دحگله بـ استغراب
عكد حواجبه مستغرب ،
لحظات شفته اتقدم ناحيتي
بدال لا اوكف بـ مكاني
لزمت العلاليك كل قوتي و مشيت بسرعه
نسيت حتى عمتي يلي بـ المحل
انداريت دحگت يمشي وراي سريع
اركان : نووور
سرعت خطواتي اكثر سويت نفسي ما اسمعه
دخلت بـ نص هوسة الناس
من بعدها شفت محل ، دخلتله بسرعه
ختلت بي ، ما ردت اشوف اركان و اواجهه
و اگله انا تزوجت و عندي طفل
هو العافني لـ كل هذا
مديت راسي دحگت
دخل من بين الناس و همَ هواي
كوه دخل من بيناتهم ، دور بـ عيونه عليه
ظل واكف لحظات يتلفت بـ مكانه يريد يشوفني
انداريت لمن حاجاني ابو المحل
- اتفضلي خويه محتاجه شي ؟
نور : لا شكراً هسه رح اطلع
- لا على راحتج بس لان شفتج هيج
خفت يكون صايرلج شي
فـ سألتج في حال تريدين مساعدة
نور : لا شكراً ما تقصر
هز راسه و راح
مديت راسي دحگت لـ ظهر اركان
و هو يروح من المكان يلي اجا منه
ضميت شفتي و نزلت دموعي
مسحتهن بـ رداني ، انداريت و طلعت
لمن تأكدت هو راح ،
رجعت لـ المكان الي بي عمتي
لگيتها واكفه منتظرتنا ، استغربت مني
بس ما حجيت الها يلي صار
جنت ناويه اشتري بعد بس راح كل واهسي
گلتلها نرجع لـ البيت و رجعنا
الليل كله ما كدرت اطلع اركان من عقلي
منظره و مشيته ، عيونه يلي تمركزت عليه
ركضته وراي و ليش راد يوكفني
نظرته لـ راكان و استغرابه
كل ما اتذكر احس گلبي رح يطلع من صدري
انقهرت كلش لمن اتذكرت اخر لقاء صار بيننا
نزلت دموعي اتحسب ع الجان السبب
بـ خراب فرحتنا ، و الي دمرني
مستحيل اكو بنيه حبت شخص
مثل ما انا حبيت اركان
رغم جان حبي اله خالي من كل شجاعه
بس حبيته بـ كل روحي
رغم ما اعترفت بـ هالشي
و لا وكفت بـ وجهه اهلي علموده
و هو يلي عافني بينهم و يعرفهم مو زينين وياي
بس ارجع و افكر قابل شنو يكدر يسويلي
التناقضات حرگت عقلي
دحگت لـ راكان يلي نايم
يمكن لو نرجع و يخطبني ما رح يتقبل راكان
و انا بـ ذاك الوقت مستحيل اترك راكان
علمود اي شخص او لـ خاطر اي شخص
ابني هذا ! مستحيل اتخلى عنه بـ يوم
ما اعرف ليش هيج فكرت
نفضت افكاري و گمت من جربايتي
شربت مي و رجعت لـ فراشي
احاول انام طر الفجر و نمت بـ صعوبه
ثاني يوم رحت لـ المدرسة
صح المفروض اجازتي تكون طويله
لان جنت حامل و ولدت
بس ما احب كعدة البيت و عمتي يم راكان
دخلت المدرسه عقلي مو وياي
المدرسات يحاجني
اجاوب عليهن بـ كلمة و اسكت
انزعجت كلش من الاصوات العاليه
كمت و طلعت من الادارة
بقيت افتر بـ المدرسه
و بـ النهاية استقر بيه الوضع
كاعده بـ حديقة المدرسه
ما اعرف شكد مر وقت على صفنتي
عودة اركان خربطت كل عقلي
رفعت نفسي لمن شخص ندسني
دحگت لـ الطالبه
- ست بدا درسج
مسحت عيوني بسرعه و حجيت
نور : تمام جايه اكعدوا بـ اماكنكم
و رتبوا السبوره ، هسه اجيكم
هزت راسها بـ قبول و راحت
گمت اشتريت مي من الحانوت
شربت قبل لا ادخل الدرس
طلعت تلفوني دحگت لـ وجهي
اهم شي عيوني مو حمر
فتحت الباب و دخلت
دحگت الكل ركض يكعد بـ مكانه
بـ طبعي زينه وي طالباتي و يحبن درسي
لمن يصير الدرس يجن هنه يگللي
عكس غير مدرسات ما يگولن الهن
و يخلن الدرس يصير شاغر
وكفت اشرح الهم ، احاول اركز وياهم
و اسمع صوت وشوشه و حجي
سكتت و رجعت اشرح ،
بـ الاخير انداريت و صيحت
نور : اكطعععععن الصووووت
سكتن كلهن هادئات بـ مكانهن
درت وجهي عنهن ما ردت اطلع عصبيتي بيهن
بس ما يحترمن الدرس و يظلن يحجن
گوه كملت الدرس و طلعت
عندي دروس ثانية بـ غير صفوف
خلصت و طلعت من المدرسه
اتمشيت لـ المكان يلي انتظر بي السايق
و انا واكفه فزيت مفزوعه
لمن اتكمم حلگي بـ ايد و انسحبت لـ ورا
صيحت بـ صوت مكتوم ، موسعه عيوني
لازمه بـ الايد يلي على حلگي
صرنا بـ داخل مكان ضيق
قريب ع المكان الجنت واكفه بي
رجعت اصيح بـ صوت مكتوم
و لازمه بـ الايد يلي على وجهي كل قوتي
اريد اوخرها ، ثواني حتى سمعت صوته
-اششش
من صوته هدأت ،
كل اطرافي حسيت بيها بروده
صوته يم اذاني و هو يهمس
و لازمني و ساد حلگي
سارت دمعه حاره على خدي
خفف لزمت عليه
دارني بـ هدوء اله ، دحك بـ وجهي
ما كدرت الزم بجيتي هالكم دقيقه
نزلت دموعي بسرعه و انا ادحك بـ وجهه
درت وجهي اريد اروح
لزمني انداريت عليه و حجيت بـ عصبية
نور : لا تلزمني !!
اركان : لا تشردين حتى ما الزمج!
نور : ما شارده هياتني واكفه
احجي و صوتي يرجف
اركان : ليش شردتي مني البارحه ؟
نور : ما شردت ما شفتك اصلاً
اركان : عيني صارت بـ نص عينج
و تگليلي ما شفتك ؟
نور : حتى لو شفتك شسوي قابل ؟
اركان : هيج صرنا !
نور : ليش شنو جنا ؟
اتقدم عليه انلزكت بـ الحايط
حجا و هو يدحك بـ عيوني
اركان : الطفل يلي شايلته البارحة
دحگلي بـ نظرات متردده
و حجا بـ صوت متردد
اركان : منو؟
دحگت بـ عيونه و حجيت
صدري بي غصة بس الله يعلم بيها
نور : ابني
وسع عيونه يدحگلي
اركان : تـ ... تزوجتي؟
نور : اي
اركان : تحجين صدك؟
ضحكت بـ استهزاء
عبرت اريد اطلع انجريت من ايدي
و انضرب ظهري بـ الحايط
كتمت صوتي متأذيه
وكف كدامي و حاصرني بين ايديه
اركان : حاجييييني
نور : لاا تصيح و وخر مني
احنا بـ الشارع !
اركان : مااا يهمني
منوو تزوووجتي ؟ شوكت تزوجتي !
نور : شلك دخل شعلييك؟
اركان : ياااا **** تزوجتي
نور : شنو انت تحاسبني ؟؟
اركان : اي احاسبج
راد يحجي قاطعته و انا دموعي تنزل
و خانكه غصتي احجي بـ حرگة
نور : هسه ذكرتني ؟؟ مرت فوك السنه !
هسه ذكرت نور يلي خطبتها
و من رفضوك عفتها بين ايديهم
و انت تعرف بـ اهلي شنو
تعرف بيهم كلش زين ما حاولت و لا اجيت بعد !
اركان : و انتِ رحتي
و وافقتي على الـ**** الخطبج وراي
نور : ليش تريدني انتظرك ؟!
انتظر شوكت استاذ اركان يتشجع شويه
و يجي يصارحني و يخطبني وينهي هالمهزله
اركان : جنتِ تگولين انتظرك عمر كامل !
ههههه شنو اتوقع قابل بس حجي
نور : ليش انتظر شخص
يعرف كل شي الا المحبه
هز راسه بـ اسف وحجا
اركان : صدمتيني ... يا خسارة
الاشهر يلي كضيتها بـ السجن لـ أجلج
وسعت عيوني مصدومة ادحگله
دفعت صدره بـ كل قوتي و حجيت بـ حرگة
نور : تعايرني انت
تعايرني على شي سوا ابوك !
اركان : يا ابوي يا **** انتِ شتحجين
انتِ تعرفين بـ الصار بيه كلش زين
و هسه تستغبين و رحتي تزوجتي
و عدج طفل انا الظليت منتظرج
انا البقيت وحدي متلوع عليج !
نور : اي رحت اتزوجت
لان حضرة جنابك ما كدرت تحميني من اهلي
رحت اتزوجت حتى احمي نفسي
اركان : ويييين احميج و اخوج الـ ****
سجنني وييين احميج ؟؟؟
دحگت بـ وجهه مصدومه : شنو؟
اركان : تعرفين الصار و تعرفين بـ اخوج
نور : مااا اعرف ما اعرف اي شي
شنو اخوي سجنك منووو سجنك ليش؟
اركان : نور !
نور : و الله ما اعرف و روح بيبي
اركان : وين جنتي عنهم !
اخوج من درا بيه خاطبج اجا هداده
تعاركنا انا ويا صارت مكاتل بيناتنا
حلفت اله اخطبج و اخذج منهم
غصباً على كل شارب ،
اركان : دقيقتين طبكت الدوريات
و اخذوني كدام اهلي و سجنوني
اشهر انا بـ السجن
اجاني ضرغام گلتله يطلع اهلي لـ غير مكان
لان اخوج الـ **** ما يعوفهم بـ حالهم
و مشهودتله
نور : ما جنت اعرف !
اركان : لان رحتي تزوجتي
طبعاً ما رح تعرفين تحيرين بـ تجهيزات العرس
لو تحيرين بـ اركان الما اله مكان بـ حياتج !
نور : ما تعرف اي شي انت
اركان : اعرف شلون قبلتي و تزوجتي؟
اصلاً الغلط غلطي من البداية
نور : ما تعرف شي
قدم وجهه عليه يحجي بـ حرگة گلب
اركان : حبج مثل ما انا حبيتج؟
تحبي مو ؟ فرحانه لان تزوجتي
طبعاً ما تسألين على اركان
اركان منو اصلاً خليتيني احبچ
و رحتي تزوجتي يا خساره بيج
يا خساره اكثر انسانه ما تستاهلين
و انا الچنت شايل همج غبي
ندس عقله ، يكز على اسنانه و يحجي بـ عصبية
گمت ابجي بـ صوت و كل جسمي يرجف
كممت حلگي و الناس تدحگلنا
اركان : تبجين تخافين يجي يشوفج وياي
نور : شتريددد مني عوووفني
فووووك ضيمي تجي انت تحجي من وحدك
غطيت وجهي بـ ايديه
بجيت محروك گلبي ، دفعته اريد اطلع
جر ايدي يلي على صدره
عصرها بـ ايده و حجا
اركان : الظاهر زوجج ما يدقق ع الحلقة
لان **** عادي عنده يشوفوج بدون حلقة
و عبالهم بعدج ما متزوجة
نور : كااافي عوفني شتريد من عندي
ما متزوووجه شمدريك انت بـ اللي عشته
اركان : تلعبين وياي انتِ ؟
ساعه تگليلي متزوجة ساعه لا
اعتلى صوت بجيي لان ايدي تاذيني
و هو تخبل عليه ما يقبل يعوف ايدي
و خازرني و صوته عالي
نور : فضحتنا اسكت اسكت كافي
اركان : تزوجتيمن ؟
نور : تطلكت ما متزوجه
بس اسكت كافي عوف ايدي
و احنا واكفين اجو يمنا زلم
دفعوا اركان عني و وكفوا ويا طول بـ طول
اتعاركوا و صارت هوسه
و اركان يضربهم و همَ يضربونه
صرنا فرجه لـ امة محمد
ناس لازمه بـ اركان و ناس لازمه بـ الزلم
و انا بـ نصهم و هم على بالهم اركان يزعجني
لان شافوني ابجي و هو يصيح عليه
رجع اركان يريد يروحلهم لزمت بي صادته
نور : كااافي تخبببلت
اسمع صوت تلفوني يرن من الجنطه
لازمه بـ اركان و ادفع بي
و الزلم يسألوني اذا جاي يزعجني
و هو يصيح
اركان : ازعجها ما ازعجها
شلك علااااقه
- زينهن الشوارب اذا تخوف مره و تبجيها
دفعني اركان و چفت عَليه
اركان : ازينهن و لا يهمك
بس قبلها ازين شواربك بـ القندره
خلاني ادك و الطم
متخبل فد مره عكس قبل جان بي مجال
راسي انصكع صكع من الهوسه
دخت كلش ، گبل وكعت من طولي
فتحت عيوني من حسيت مي على وجهي
درت عيوني لگيت نفسي بـ سيارة
رجعت عيني على مره فوك راسي
و اسمع صوت اركان يحجي
المره : كعدددت كعدت
اندار اركان يدحگلي
و حجا بسرعه : وكف السياره وكفها
صفت السيارة
انفتح الباب يلي يم راسي
رفعت نظري دحگت لـ اركان
اركان : نوره نوره باعيلي
مسح المي من وجهي
رفعت راسي بـ ثكل تلمست كصتي
نزلت ايدي بيها دم قليل
دحگت لـ اركان لحظات و اتذكرت الصار
همست بـ تعب
نور : اريد انزل
اركان : لا لا وين اكعدي
رح نوديج نضمد كصتج و نشوفج
هزيت راسي بـ رفض
المره : خليها خل تنزل تشم هوا
نزلت هي من السياره
و انا تدنيت و نزلت وراها بـ صعوبه
اول ما نزلت دخت لزم بيه اركان و المره
درت وجهي لازمه بـ باب السيارة
سديتها و اتقدمت وكفت ع الرصيف
و المره لازمه بيه و تساعدني
اركان : كصتج متعوره
المره : شبيج خاله حبيبه
بعدج دايخة ، تكعدين ع الرصيف؟
هزيت راسي بـ رفض ، دارتني الها و حضنتني
ما صدكت احد يحضنني انفجرت بـ البجي
اتذكرت كل شي صار بيه من اتزوجت سقراط
و المسوينه بيه و بـ اركان و شلون دمرونا
اركان : نور
المره : اشش خليها خاله
البنيه واضح متعوبه
وخرت وجهي من حضنها
خليت ابهامي على مدامعي
اريد اسكت روحي ما اكدر
جسمي يرجف مو بـ انصاف و ابجي
اتقدم اركان ، صار كدامي
درت وجهي عنه امسح بـ دموعي
اركان : لا تمشين وحدج لا تطيحين!
بس حجا ، درت وجهي اله و رحت حضنته
بـ البداية عافني ما حضنني و انا مجلبه بـ رگبته
و المره تدور وجهها تسوي روحها ما تشوف
و ابو التكسي دار وجهه و صعد بـ السيارة
اركان : نوره لا تسوين هيج لا تأذيني
نور : ما مأذيتك انا انت الي جاي تأذيني
همس بـ اذاني صوته يرجف
و ايديه محاوطتني بـ خفة
اركان : اريد المج بـ كل حيلي
بس حرام انتِ مو الي ، نور متزوجه انتِ
هزيت راسي بـ رفض
مجلبه بي و حاضنته
نور : ما متزوجة
اركان : الطفل ؟
نور : احجي الك كل شي
بس ما تصيح و لا تتعارك ما تسوي اي شي
اركان : شصار نور شصارلج؟
نزلت راسي من رگبته دحگت بـ عيونه
عاكد حواجبة بـ استغراب و يدحك بـ وجهي
نور : المره تنتظر
اركان : دايخة ؟
نور : لا
اندار اركان اتشكر من المره
و انطا فلوس لـ ابو التكسي
ما قبلت المره بس اركان اصر عليها
هو يدفع الكروه ، اتشكرتها و راحت
التفت اركان دحگلي
اركان : كصتج مجروحه
نور : عوفها اريد احجي الك كل شي و اخلص
تعبت من هالوضع تعبت من الاعيشه صارلي سنين
لا احنا يلي متقدمين خطوة و لا راجعين خطوة
اركان : احجي اسمعج
كعدنا على مسطبه حجيت اله كل شي
من الالف لـ الياء و دموعي تصب
و هو مصدوم كل ما احجي شي يوسع عيونه اكثر
بـ الاخير مثل ما توقعت كام متخبل
يريد يروح لـ اهلي وكفته مچلبه بي
و هو وكف تكسي يريد يروح
خليت ابو التكسي يروح و لزمت بـ اركان
نور : قوتي ما جاي تكفيلك
الله يخليك اوكف كافي تعبت
اركان : دمرووونا نوووور
اهلج دمرونا موتونا و احنا عايشين
نور : اعرف و الله اعرف
مو بس انا اذوني حتى انت اذوك
بس الله يخليك عوفهم ما اريد اسمع شي عنهم
نور : ما يعرفون بـ ابني
و لا يدرون بي من سقراط
اذا عرفوا امي رح تگول الهم
و سقراط بعد ما يعوفني
فشر فشاير على سقراط
و ظل يتحلف بي و يگول شحده يوصلج بعد
من بعد هالهوسه و اخيراً كعد و هدء
بعد فترة طويله من محاولاتي ويا
گمنا انا ويا وكفنا تكسي
صعدنا بـ التكسي ، طلعت تلفوني من الجنطة
كومة اتصالات من عمتي و من السايق
دخلت لـ المكالمات
دحگت اكو اتصال مجاوبين عليه
نور : اركان انت مجاوب على عمتي؟
اركان : اي
نور : شگلتلها ؟
اركان : گلتلها رح اخذج يم اهلي و تتاخرين
نور : شگلتلك ؟
اركان : عزمتنا الكم
سكتت و هزيت راسي بـ قبول
بـ البداية رحنا لـ مضمد ضمد كصتي
بعدين رحنا لـ البيت
لمن وصلنا لـ البيت بدا يصير الغروب
نزلت من السيارة و اركان نزل وياي
دحگت سيارة جسار كدام بيتنا
اركان : سيارتمن هاي؟
نور : جسار
و انا احجي طلع جسار من البيت
دحكت لـ اركان و رجعت دحگتله
بلعت ريكي مرتبكة ،
اندار طاح نظره علينا
دحگت لـ تعابيره المصدومة
و تدريجياً رجعت لـ طبيعتها
اتقدم ناحيتنا صرت ورا اركان
مد ايده يسلم على اركان و اركان سلم عليه
جسار : شتسوي هنا؟
اركان : جبت نور
جسار : منين لگيت نور؟
اركان : انتظرتها يم مدرستها
رفع حواجبة جسار و هز راسه بـ تعجب
جسار : انتطرتها يم مدرستها !
اركان : اي اكو مانع ؟
جسار : و ليش منتظرها يم مدرستها ؟
اركان : اريد احاجيها
جسار : بـ شنو تحاجيها ؟
اركان : بيني و بينها
جسار : ها حلو ، تمام
اركان : ادخلي نور خل اروح
دحگت بـ وجههم و عبرت بسرعه
وصلت يم الباب و انداريت
لمن جسار صاح لـ اركان
جسار : اركان
هستوه فاتح باب السيارة يريد يصعد
اندار دحك لـ جسار ،
دحكت لـ جسار ايده بـ جيبه
واكف بـ استقامة ، زفر دخان الجكاره
و نزلها ، كمل كلامه
جسار : اذا تريد تخطبها
جر حسره و كمل
جسار : جيب اهلك و تعال ، انتظرك ...
- يتبع الفصل التالي اضغط على ( رواية جرح الأيهم ) اسم الرواية