رواية جرح الأيهم الفصل الحادي و الاربعون 41 - بقلم أيلان
"الجُــرح الواحد و أربعون"
كاعد بـ الحديقة ع الكرسي ، رافع راسه
طلعت كعدت انا ع الصبه ، بس بعيد عنه
و هو منطيني ظهره ، ما يدري بـ وجودي
ظليت لـ فترة تقريب العشر دقايق
انا كاعده و هو كاعد ما اتحرك
كمت بـ هدوء تقدمت عليه
لحد ما صرت اكدر اشوف وجهه
دحگتله رافع راسه لـ السما
مغمض عيونه ، دموعه تجري بـ هدوء
تسير على خده ، ملامحه جامده
تفاحة ادم يلي عنده تصعد و تنزل
عبالك الغصة محصورة بـ بلعومه
يتنفس بـ صعوبه صدرة ينخفض و يرتفع
فتح عيونه ذبلانه ، الشمس متسلطه عليهم
وكفت كدامه و هو على نفس حاله
عيونه حسيته گوه مفتحها و ذبلانات
استقر نظره عليه ،
اتقدمت ناحيته ، خليت ايديه على خده ،
حضنت راسه لـ بطني
حاوط بطني و حضنني ، مسدت على شعره
مُلاذ : اسأل؟
جاوب بـ هدوء
أيهم : أسالي
ظليت حاضنه راسه لـ بطني
گلت بـ تساؤل
مُلاذ : ليش ما سولفتلي عنه؟
أيهم : محد يعرف بي
مُلاذ : مفهمت؟
وخر راسه من بطني و دحگلي
مُلاذ : تعال ندخل جوا و تسولفلي؟
ظل ساكت يدحگلي
لزمت ايده ، و سحبته وياي
كام يمشي و انا لازمه بـ ايده
دخلنا لـ البيت ، اتقدمت كعدت ع القنفه
و كعدته يمي ، ردت اكوم اجيب اله مي
مُلاذ : خل اجيب الك مي و اجي
لزم ايدي ، اندرايت دحگتله
هز راسه بـ رفض
أيهم : ما اريد
رجعت كعدت بـ مكاني
دحگت لـ وجهه مسحت دموعه بـ اصابعي
تدنيت عليه اكثر
مُلاذ : عوف الاسئله ما اريد اسأل
أيهم : اسألي
مُلاذ : لا ما اريد
أيهم : اسألي من حقج تعرفين
مُلاذ : ما اريد تتذكر شي
لو ياذيك هالموضوع بسببي
لان احس بـ شعورك
هز راسه بـ رفض
أيهم : مر عليها فوك العشر سنين
من طول الزمن حتى ما اعرف
احسب الوقت يلي مر عدل
عكدت حواجبي
مُلاذ : گلت مساع محد يعرف بي؟
غير اخوك ؟ و اهلك يعرفون بي
دحگلي عيونه تعبانه
غمضهن حيل و عصر عيونه
مُلاذ : عوفـ...
بعدني اريد احجي
قاطعني و گال
أيهم : عيوني جاي تاذيني من الضوه
راسي يدك بي وجع
مُلاذ : انتظر
كمت من يمه ، رحت سديت البردات
صار المكان اضاءته خفيفة
رجعت يم أيهم ، حضنت راسه لـ صدري
انتجيت لـ ورا ، خليت ايديه على عيونه
و امسح بـ ابهامي على گصته
مُلاذ : هسه احسن؟
أيهم : اممم
ردت احجي و گال قبلي
أيهم : أدهم اكبر مني بـ بـ سنتين
لان اخواني الباقين كلهم اصغر مني
ما يعرفونه عدل و ما جان ويانا
مُلاذ : لعد وين جان؟؟
أيهم : وي ابوي
مُلاذ : و ابوك وين؟
أيهم : مو يمنا
عكدت حواجبي مستغربة و هو كمل
أيهم : سنين ما شفته و لا شافني
امي .. امي مرت بـ اكتئاب
أدهم ما موجود و ابوي ما يجيبه يمنا
مُلاذ : زين ليش ما جاي افهم؟؟
دحك بـ وجهي
و ظل ساكت بلع ريك و همس
أيهم : امي جانت ما تريد ابوي
تريد تتطلك من عنده
ابوي اخذ أدهم و راح
أيهم : امي انهارت ورا أدهم مرت بـ اكتئاب
سنين احنا ما نشوفه ، يجي ابوي
ما يجي أدهم ويا ، لحد ما بـ مره
اجا أدهم بس وحدة كبران و طالعله شوارب
انه شفته محد شافه غيري
مُلاذ : شلون شفته و ابوك ضامه عنكم؟
أيهم : أدهم اجا لـ مدرستي
اندلني و اجاني لمن اخذه ابوي من يمنا
عمره ٩ سنين و لمن رجع ، رجع شاب
مدور عليه و عارف مدرستي اجاني
ما عرفته بـ البداية الا ورا ما گال هو
بـ صغري قبل لا ابوي ياخذ أدهم
مسحت دموعه النازله
و هو كمل بـ صعوبه
أيهم : جان كل وقتي ويا
جنت اعرف كل شي عنه
و يعرف كل شي عني
أيهم : جنا من كد ما نتشابهه انه و أدهم
عبالهم تؤام بس أدهم جانت عيونه خضر
جنت اضحك عليه اصيح اله خضراوي
جان يضحك من كل گلبه على هالكلمة
أيهم : و هو يصيحلي الاسيود
جنت اضوج عكسه
انه مو اسيود جنت احس هالكلمة مسبة
و اعرفه يتشاقى بس هم تضوجني
أيهم : بس هو انضج مني افهم مني
افضل مني و بـ هواي ، امي خلت روحها بيه
جانت مرات هه مو بس مرات
دائماً جانت تصيحلي بـ اسم أدهم
أيهم : لمن اجاني فرحت راح اروح لـ امي
و راح ابشرها أدهم الي جنت انه بديله
رجعلج تكدرين تصيحينه أدهم
و ما تصيحيني بـ اسمه و تبجين
أيهم : بس أدهم
ما جان يريد امي تعرف هو رجع ،
حاولت ويا ما قبل
أيهم : سولفلي عن بنيه يحبها
احلامه الجبيرة وياها
حباها و رادها و حبته بس راد يكبر اكثر
و يروح و يتقدم الها و يخليها تحت جنحه
أيهم : كتلني الفضول اريد اشوفها و شفتها
بنيه تليق بـ الأدهم "نارا الأدهم "
اسمها نارا سامع اسمها من اخوها بـ الاسواق
و حابها و حاب اسمها هههههه تخيلي
أيهم : احلام چبيره هادمها الواقع
فلان شي رح اسويلها اعيشها ملكه
رح اخليها تحمد ربها و تشكره ما تعتاز شي
اخليها تسمي جهالنا و تختار مرتك هي
اتداهرت ويا ، انه شلي دخل حتى مرتي تختارها
ضحك ضحك هواي من كل گلبه
نزلت راسي دحگت بـ وجهه
شعره مخربط و عيونه حمر و يدمعن
و على ثغرة ضحكه واسعه
اختفت ضحكته و حجا
أيهم : بـ يوم عيد ميلاده طالعين انه وياه
ضحك من بين دموع و گال
أيهم : محضر كيكه ام الربع ما عندي فلوس
اشتري اله كيكه جبيرة
شمعه شويه و تنقسم
المهم احتفل بـ عيد ميلاده ،
أيهم : كل فكري و هَمي
خاف ما اشوفه بعد و خاف ما افرحه بـ يوم
خاف ما اخلي اله ذكرى مني اذا اختفى عني
خاف ما يحب يوم عيد ميلاده ، انه احببه بي
تحولت ملامحه لـ الجمود و كمل
أيهم : قبل لا نوصل قبل لا اسوي عيد ميلاده
لگينا رجال جبير بـ الطريق
سيارته عطلانه أدهم راح اله و انه وياه
رفع راسه من صدري
حجا و هو ياشر بـ ايديه و يشرح
دموعه ما وگفت دقيقة و هو يحجي
أيهم : السياره عطلانه راح أدهم يساعده
لان أدهم يساعد ، أدهم حنين
أدهم نقي ، أدهم رجال ، أدهم أدهم ما ينوصف
حاجا الرجال گله سيارتي عطلانه
أدهم يعرف بـ السيارات دخل جوا سيارته يصلحها
مسح خشمه ، جر نفس ، حجا
و هو يأشر بـ ايديه
كأنو الموقف هسه جاي يصير
يذكرة بـ كل التفاصيل
أيهم : اعاين لـ الرجال ابتعد و راح من يمنا
عاينت مستغرب گلت أدهم
اريد اگله الرجال راح بـ ... بـ لحظتها
اشر على اذانه
يحجي بـ طريقة هستيريه و يوصف
أيهم : بـ اذني صار صوت عالي
بووووووف صوت انفجار ، السيارة انفجرت
انفجرت و أدهم ، أدهم اخوي جواها
انه طرت و انركعت بـ الگاع بعيد و أدهم ...
أدهم تطشر جسمه راسه ما يلاگي رگبته
شهكت و ايدي على حلگي
عبس شفته أيهم و الغصه ذبحته ذبح
اهتز جسمه يبجي بـ حرگه
أيهم : مات بـ يوم الي انولد بي
ابوي يعرف أدهم انفجر و مات
اما امي ... امي ما تدري ادهمها انفجر
ما تدري أدهمها اتطشر و ما اله حتى گبر
أيهم : كل التعرفه عنده عائلة و عايش بـ غير دوله
طبعاً سمعت هالخبر من ابنها التثق بي
جان لازم يجذب عليها حتى لا تتخبل و تموت
اندار يبجي دحك بـ وجهي
عيونه مغوركه دموع
أيهم : و انه بقيت بـ عين امي بديل الأدهم
انعصر گلبي ، ادحگله يبجي
دموعي ما يرضن ينزلن و لا اگدر ابجي
كد ما عودت نفسي ما ابجي
بحيث صرت اذا اريد ابجي ما اكدر
حتى دمعتي ما تنزل ممكن هالشي
اكثر شي اذاني و تعبني بـ حياتي
ما اعرف حتى اعبر عن حزني
صرت عبارة عن جلمود
احتاريت شنو اسوي و اواسي أيهم
انهار كدام عيني ، اتقدمت صرت بين رجليه
حضنته كل قوتي ، بادلني
ظل ضاغط ع ظهري بـ اصابيعه
و يبجي بـ حرگه ، عبست شفتي
حجيت بـ همس صوتي مبحوح
مُلاذ : اسفه اسفه لان ذكرتك
بقى ساكت ، دموعه نكعت تشيرتي
ما اعرف شكد ظلينا على هالحال
حاضنته و هو روحه رايحه من البجي
لحد ما أيهم تعب كلش و وخر راسه من حضني
دحگت بـ وجهه ، لزمت بـ وجهه من الجهتين
مُلاذ : ليش خليتني اسأل
ليش گلتلي ما تتاذى من هالموضوع؟
أيهم : أذيتي لو يمر دهر ما رح تنتهي
كَسرتي چبيره ما تنجبر
سكتت ادحك بـ وجهه
ما اعرف شنو احجي حتى
يا كلمه يلي تواسي و يا فعل يلي ينَسي
أيهم : راسي
ضرب ايديه بـ راسه حيل
لزمت بيهم
مُلاذ : يوجعك؟
أيهم : دماغي رح يطلع من مكانه
ظليت ادحگله ما اعرف شسوي
و عيونه محاوطها الاحمرار
تخبل من وجع راسه ظل يلوب
ماكو لا ادوية عدنا و لا شي
هو يفتر و انا افتر وراه خايفه عليه
المكان الي احنا بي ما بي بشر
عباره عن مكان بـ نص مزرعه
بس ماكو يمنا بشر واحد
رحت ع التلفون اريد اخابر أيمن
حتى ينطيني رقم صديقة الي هنا و يجينا
فتحت التلفون دحگت ماكو شبكه
عكدت حواجبي بـ استغراب الشبكه مكطوعه
قبل فترة جانت اكو و هسه انكطعت مدري ليش
ظليت افتر منا و منا بس اريد توصل اشارة
أيهم كعد بـ الگاع و لازم بـ راسه
انداريت دحگت اله
مُلاذ : الشبكه مكطوعه؟؟
ما جاوبني بقيت حايرة
و هو يعصر بـ عيونه حيل
شمرت تلفوني و كعدت كدامه ع الگاع
مُلاذ : أيهم أيهم دحگلي شسوي
لزمت بـ وجهه بحيث راسي كد ما يوجعه
نطت دمارات وجهه و هو متخبل من الوجع
مُلاذ : تسبح؟؟ ها تسبح حتى يخف الوجع؟
ها أيهم دحگلي تسبح؟
سكت يدحگلي
لزمت بـ ايده سحبته من الكاع
انطيته ملابس و دخل لـ الحمام
ظليت كاعده انتظر
و ادور الاشاره بس ماكو ابد
رحت على الثلاجة
طلعت المسواك يلي جابه
و رجعت لـ المطبخ اسوي اكل
كل شي ما اندل
سويت الاكل بسرعة بسرعة
و سديت النار و غطيته
كعدت انتظر أيهم يطلع
طول بـ الحمام خفت صاير اله شي
رحت ادك باب الحمام
بعدني هستوني اريد ادكها
انفتحت الباب و طلع بـ وجهي
مُلاذ : صرت احسن؟
هز راسه بـ قبول
دحگت لـ صدرة و الوشم
لاف المنشفه على بطنه
مُلاذ : ليش طالع هيج ؟
البس بارده عليك اصلاً راسك ياذيك
دحگتله هادء و ساكت
مُلاذ : انتظر هنا
ركضت لـ الغرفة
اخذت منشفتي و رحت اله
خليتها على ظهره و اغطي صدرة
و انا اخليها دنك باسني
لزمت بـ ايده بارده ثلج
لمن كطع بوستنا، دحگت بـ عيونه ، همست
مُلاذ : ايدك بارده سبحت بـ مي بارد ؟
أيهم : اي
مُلاذ : ليش هسه تتمرض ؟
هز راسه بـ رفض
ابتعد عني و راح لـ الغرفه
شويه و طلع لابس بجامه
و فانيلة داخلية سوده
مُلاذ : أيهم شبيك و الله هسه تتمرض
أيهم : ما تمرض لا تخافين
مُلاذ : سويت اكل تاكل مو؟
هز راسه بـ رفض
أيهم : ما اريد
مُلاذ : لعد و انا جوعانه
و حالي حال ما اعرف اكل وحدي
تقبلها اظل جوعانه ؟
أيهم : اكلي
مُلاذ : لا اريد تاكل وياي
أيهم : ما اشتهي
مُلاذ : يلا انت ما ماكل من طبخي
تعال يلا خل ناكل
لزمت بـ ايده ، اخذته وياي لـ المطبخ
و هو ماله خلك بس يسايرني
كعد ع الميز و انا وكفت اصب الاكل
انداريت دحگتله صافن رجعت درت وجهي
اخذت الماعين خليتهم على الميز
مُلاذ : يلا اكل
اكلت الاكل ماصخ ما ينوكل
گمت جبت ملح خليتله
ظل ياكل لگمه و يصفن
و انا اصفن ويا لحد ما يرجع ياكل
خلصنا غسلت الماعين بسرعه
أيهم كاعد يمي عقلة مو وياي
كل ما ادحگله الكاه صافن و ماله خلك
انا اصلاً عقلي ما مستوعب الحجاه
بس احاول ما ازيدها عليه
مُلاذ : أيهم ماكو شبكه
أيهم : تنكطع مرات
مُلاذ : زين شلون؟ خاف يخابرون النا
و شلون نخابر لـ صديقك؟
أيهم : جاب الي سيارة
حتى نطلع بيها
مُلاذ : تندل انت؟
أيهم : امم
مُلاذ نطلع هسه ؟
أيهم : بدلي
مُلاذ : أيهم دحگلي لا تسايرني
انا ما اعرف شنو اسوي
بس ما اريد تظل مقهور و متأذي
اعرف مالك خلك تطلع و ما اريد نطلع
اذا انت تعبان ، ساعدني ما اعرف شسوي
انا ما ما متعودة عليك هيج
أيهم : لا تسوين شي
يلا كومي خل نطلع
مُلاذ : لا ما اريد
أيهم : امشي بدلي
مُلاذ : لا عوفها انت تعبان
أيهم : مابيه شي يلا
هزيت راسي بـ رفض
زفر نَفس تعبان
مُلاذ : تنام؟
أيهم : ما اكدر
مُلاذ : ليش؟
أيهم : ما اكدر
مُلاذ : ليش ؟
فرك وجهه ، نزل راسه و حجا
أيهم : من يوم الي اتوفى
لـ هذا اليوم اتحلم بي
ما اكدر انام اذا ما يعدي يومين كاعد
يتعب عقلي و اغفى و ما احلم بـ شي
مُلاذ : بس غلط!
أيهم : من زمان معود روحي هيج
مُلاذ : ما منتبهتلك
كم مره اتصل بيك تكون نايم
أيهم : ما نايم بس صوتي يصير تعبان
عقلي احسه يخدر اسوي اشياء مرات
خارج عن سيطرتي
مُلاذ : بس يأثر على شغلك
هز راسه بـ رفض
أيهم : متعود
ظليت صافنه و ساكته
دنيت الكرسي مالتي خليته كدامه
مُلاذ : لمن تنعس گلي
هز راسه ساكت دحگتله بـ استغراب
لمن سحب الكرسي مالتي اله
صرت انا و الكرسي بين رجلية
مُلاذ : شكو؟
كومني من مكاني كعدني بين رجليه
و حضن راسي لـ صدرة
أيهم : شيلي نظرات الحيرة و القلق من عيونج
رفعت راسي دحگتله
مُلاذ : اذا ما احير بيك احير بيمن ؟
تجولت عيونه بين عيوني
أيهم : مُلاذ
مُلاذ : امم
خلا راسه بـ شعري همس بـ صوت ناصي
أيهم : اذا انجبرت اعوفج و اروح تخافين؟
رفعت راسي دحگت بـ وجهه
متشكله عقدة بين حواجبي
مُلاذ : شنوو؟
أيهم : افتراض ما جاي احجي شي صدك
اذا عفتج و رحت تخافين؟
مُلاذ : وين تروح؟
أيهم : لـ مكان بعيد
مُلاذ : أيهم ..
أيهم : اشش جاي نسولف
قابل انه رح اعوفج؟ بس جاي اسألج
مُلاذ : ليش تسألني هيج اسئله؟
أيهم : هيج اجا بـ عقلي
تنتظريني اذا اختفيت؟
دحگت بـ وجهه ما قانعه بـ كلامه
و بـ نفس اللحظات گلبي دكاته صارت سريعه
توضح قلقي من كلامه ، راحتي انسلبت
رفعت راسي اله ، همست بـ هدوء
مُلاذ : وين رح تروح؟
رفع ايدي باس كفها
و انا ادحگله ، هز راسه بـ رفض
أيهم : ما رايح ، انسي
حضنني لـ صدرة اكثر ساكت
حسيت ضلوعي تكسرن ع قوة حضنته
مُلاذ : اي
أيهم : شنو؟
مُلاذ : اذا اختفيت بـ يوم
رح انتظرك
رفعت نظري دحگت بـ عيونه
أيهم : مُلاذ
هزيت راسي بـ معنى "ها"
أيهم : لا تعاينيلي هيج تموتيني
رجع راسي ع صدرة
و انا ظليت ساكته
أيهم : مُلاذ تحسين بالأمان يمي؟
مُلاذ : ليش حتى ما احس بالأمان يمك؟
أيهم : يعني مأمنه على نفسج يمي ؟
مُلاذ : انت اول شخص من بعد سنين
يحميني و ما يفكر بـ اللي يسوي علمودي
يمكن حتى احس بـ هاي الكمية من الامان
اول مره و بعد سنين ،
تخيل جاي اعترف بـ هذا الشعور
و اگول بسببك انا هيج احس
أيهم : الشخص الي مأمنه بي
هو بـ حذ ذاته الخطر
رفعت حواجبي ساكته ، هزيت راسي بـ قبول
فكيت ايديه الي مقيدني بيها
گمت بسرعه من حضنه ، دحگلي مستغرب
ما اعرف ليش لحظتها اجتني مشاعر عصبيه
حسيته يخليني اوصل لـ بر الامان
و بعدين يشمرني بـ نص القلق مثل اللعبه
مُلاذ : ليش كل ما افكر اتقدم خطوة
و احاول اعيش مشاعري بـ شكل طبيعي
حالي حال الناس و ما ارفض احاسيسي
انت تدفعني عنك بـ كلامك
و تخليني ارجع الف خطوة لـ ورا
و احس نفسي مسويه شي غلط بـ ثقتي بيك
أيهم : مُلاذ ...
مُلاذ : خلص انا هم بعد ما رح احجي شي
ردت اطلع من المطبخ
گام بسرعه لزمني و حجزني عن الباب
أيهم : ليش عصبتي انه جاي احاجيج طبيعي!
مُلاذ : لا أيهم دائماً تلمح الي ما لازم اثق بيك
انا مو غبيه كل ما احاول اطلع من البرود هذا
و اصير حالي حال الناس ، انت تخرب كل شي
كل ما اريد اقترب منك و اكون شخص طبيعي وياك
و ما اخلي بيناتنا حواجز انت جاي تقلقني
اتقدم عليه بـ هدوء ، حضن وجهي بـ ايديه
لزمت ايديه اريد اوخرهم و اطلع من يمه
بس هو ما وخرهم ، دنك راسه الي و حجا
أيهم : اخاف تثقين بيه
و تنكسرين اذا خيبت ظنج بـ يوم
تتندمين على كل شي حسيتي بي وياي
مُلاذ : انا محد يكدر يكسرني
محد يكدر يخليني احس بـ الخيبه
و محد يكدر يخليني اندم
انا اذا سويت شي رح اتحمل مسؤوليته
و ما راح اخلي مجال لـ مشاعري تسيطر عليه
مُلاذ : و ليش تزوجتني و ربطتنا بـ بعض
اذا انت هيج ما تثق بـ نفسك و تخاف تاذيني!
لو عايفني من البداية
أكون وي الشخص يلي يستحقني
هز راسه بـ رفض
أيهم : محد يستحقج و يحبج غيري
اكتشفت بـ أيهم طبع مثل اسكندر
ما يتقبل فكرة انو جان ممكن القدر يتغير
و أكون وي شخص ثاني او حتى لـ وحدي
دائماً يتخبل من هالفكرة
بس الفرق الشاسع أيهم حسيت بـ حبه
و يتخبل اذا اتأذيت و لو شعره
على عكس اسكندر يريدني مجرد تملك
و حتى يفرض نفسه عليه و يگول
"اخذتها غصباً عليها"
أيهم : انه ما اعوفج
مُلاذ : تمام
هز راسه بـ قبول
رجع حضنني ، طلعنا غسلنا
و بقينا ندور اشارة بـ التلفونات و مكطوعه
ما لگينا و لا طلعنا من البيت
أيهم بقى طول اليوم تعبان و خملان
تندمت لان سألته عن اخو
و رغم حجا الي بقت هواي اسئله بـ عقلي
اصلاً ما توقعت هو عايش هيج شي
ما جنت اعرف المخفي اسوء ...
نزلت تلفوني بـ يأس لـ اخير مره
من ما حصلت اي اشارة
انداريت و دخلت البيت
دحگت لـ أيهم متمدد ع القنفه ، على ظهره
مخلي ايده على عيونه و مغمض
اتقدمت كعدت ع القنفه يلي كدامه
مظلمين البيت أيهم راسه يوجعه
سديت كل الضويات
لان يظل راسه يأذي بسببهن
من الجو الكئيب و الظلمة
حطيت راسي على تجوة القنفه و غفيت
ما اعرف شكد مر وقت
حسيت على نفسي انرفعت
فتحت عيوني بـ نعاس ماكدر اشوف شي ظلمة
خليت ايدي على صدره
مُلاذ : أيهم
اتطمنت لمن گال بـ حس ناصي
أيهم : انه لا تخافين نامي
رجعت غمضت عيوني
نزلني ع الفراش تمددت ، غطاني
جسمي برد حسيت روحي ثلجت
شديت الغطى اكثر عليه بس بقيت بردانه
كوابيس مثل كل مره ، بس هالمره جانت اسوء
بقيت اتحلم بـ امي و ملاك
صوت ابوي يصيح ، ضرب و ظلمة و هوسه
و انفجار ، صوت اشياء تنرگع مثل بيبان
روحي حسيتها رح تطلع كأنو الحلم واقع
افز و ارجع اغفى و يرجع نفس الكابوس
اختنكت كلش و فزيت لـ اخير مره
گلبي يريد يطلع من صدري
من كد السوء يلي بـ الكابوس
حجيت بـ نعاس و انا مغمضه
مُلاذ : أيهم
ما جاوبني
رجعت مره ثانية كررت
مُلاذ : أيهم
حسيت بـ ايد دافية
و ملمسها خشن على خدي
أيهم : جَرحه ، هنا انه
حجا بـ حيرة بعد ما زفر نَفس عالي
أيهم : شجاي تحلمين
جاوبته بـ نفس الهدوء
بعدني مغمضه عيوني
مُلاذ : احلام مو زينه
اريد انام بس گلبي يوجعني منهن
ما اريد ارجع احلم بيهم
أيهم : انه يمج اهدئي و نامي
فتحت عيوني اريد اشوفه بس ظلمه
اخذت ايده لزمت بيها بـ اثنين ايديه
مُلاذ : خل انام و وخرها مني
أيهم : خليها عندج ما اريدها
ابتسمت و ظليت ساكته
حضنني من ظهري ،
خلا ايده الثانيه على كصتي
اتصادر لـ مسامعي صوته يهمس بـ اذاني
أيهم : بِسۡمِ ٱللَّهِ ٱلرَّحۡمَٰنِ ٱلرَّحِيمِ
قُلۡ هُوَ ٱللَّهُ أَحَدٌ (١) ٱللَّهُ ٱلصَّمَدُ(٢)
لَمۡ يَلِدۡ وَلَمۡ يُولَدۡ (٣) وَلَمۡ يَكُن لَّهُ كُفُوًا أَحَدُۢ
صدق الله العظيم
رجع يكرر بـ السور
يهمس بـ اذاني ، ايده على گصتي
انداريت اله ، خليت راسي بـ صدرة
لميت روحي و كرفصت نفسي بردانه
حاوطني بـ ايدة الثانيه لان الاولى انا لازمتها
لحد ما غفيت ، مع ذالك افز على اثر بوساته
اخير شي فزيت عليه لمن باسني بـ رگبتي
بـ شوغه و اسمعه يجر حسرات
مُلاذ : اذا الكوابيس تعوفني و انام
انت ما تخليني ، اريد انام
أيهم : نامي ما مأثر عليج جاي ابوس بـ مرتي
مُلاذ : باجر بوس مرتك هسه خليها تنام
أيهم : لَـذه
مُلاذ : امم
أيهم : عاينيلي
فتحت عيوني دحگتله
دنك و باسهم ، عگدت حواجبي مستغربه
اخذ ايديه باس كفوف ايديه
مُلاذ : اكو شي؟
أيهم : احس روحي طفل بـ حضن امه
مُلاذ : طفل مستهتر ما يهجع و ينام
ضحك بـ خفوت
دنك راسه و ضم وجهه بـ رگبتي
أيهم : تعرفين اسوي كل شي علمودج
مُلاذ : اعرف ، أيهم
بقى راسه على صدري
همهم بـ معنى "ها"
مُلاذ : اشتاقيت لـ بابا
بقى هادء لحظات و جاوب
أيهم : انه هم
مُلاذ : شنو؟
أيهم : اشتاقيت لـ العزيز الما لمه لا گبر
و لا مچان اتعناله
مُلاذ : تعرف شغله ؟
أيهم : شنو؟
مُلاذ : انا ابد ما رايحة لـ كبر بابا
همس
أيهم : ليش ؟
مُلاذ : ما نفذت وصيته بـ أتم شكل
و حلفت مالي روحه اذا ما اخذت بـ حقه
أيهم : لمن تلگين الچتال رح تروحين اله
هزيت راسي همست : اي
أيهم : ان شاء الله تلگينه بـ اسرع وقت
و تروحين لـ كبر ابوج
مُلاذ : امنيتي
أيهم : ان شاء الله تتحقق عن قريب
مُلاذ : تتوقع رح الگاه ؟
أيهم : تلگينه
مُلاذ : تدري لسا ما اعرف ليش قتل ابوي
أيهم : ما دورتي؟
مُلاذ : يلي عرفته بس
جان اكو ولد يم بابا و بابا يحمي من الچتال
الچتال هدد بابا بينا انا و امي و ملاك
بس بعدين ما اعرف شصار بقى كلشي مجهول
أيهم : شتتوقعين ليش حمى الولد؟
مُلاذ : الچتال قاتل ممكن الولد شاف عليه شي
و احتمى بـ بابا و الچتال عرف
أيهم : شلون رح تگدرين تعرفين منو هو؟
مُلاذ : لابد يجيبه الحظ بـ يوم كدامي
ما جاوبني انا هم سكتت
وخر راسه من على صدري ، نام بـ مكانه
مُلاذ : اذا فزيت من وراك ما انام يمك بعد
ابتسم و هز راسه بـ رفض
أيهم : ما اكعدج بعد
مُلاذ : عفيه
درت وجهي و شديت الغطى اكثر
حضنني أيهم من ظهري ، غفيت
فتحت عيوني الصبح بـ نعاس
صار الضوا يلي يمر من البرده بـ نص عيني
غمضتهم بـ وجع و رجعت فتحت عيوني
مطيت روحي ، درت عيوني ادور على أيهم
ما لگيته بـ الغرفة
كمت من الفراش طلعت من الغرفة
و انا انادي بـ اسمه
مُلاذ : أيهم
دخلت المطبخ ادور عليه ما لكيته
طلعت للصاله هم ما موجود
رحت للحمام دكيت الباب ماكو جواب
فتحت باب الحمام دحگت فارغ
طلعت للحديقة دورت بيها هم ما موجود
درت عيوني بـ استغراب طلعت من الباب الرئيسي
دحگت محد اكو ،
رفعت اكتافي بـ عدم معرفة و استغراب
رجعت دخلت جوا گلت يمكن طلع يجيب غراض
كعدت ع القنفه و اشرت لـ نينو
مُلاذ : تعال تعال
اجاني يركض ، يريد يصعد على رجليه
ابتسمت و شلته من الگاع
مُلاذ : بالبداية ما حبيتك
بس هسه يمكن شويه حبيتك
ظل يدحگلي
مُلاذ : انت هم حقك ما تفتهم
تركي و هيج و بالك عنه
نزلته بـ الگاع و اشرت اله يلحگني
ظل الجلب يفتر وراي
خليت اله اكل بـ مكانه الخاص عافني
اصلاً بعد ما يتذكرني ، مصلحجي
اخذت تلفوني اشوف اذا اجت اشارة
بس هم ماكو ، ضجت كلش ، عفت التلفون
رحت غسلت و بدلت ملابسي ، رتبت البيت
حسيت روحي متروسه نشاط
عكس لمن جنت بـ بيتنا جان كل يومي شغل
حتى اطلع بدون ريوك و اظل فترات طويله
انا بس اشتغل و مخبوصه
هالكم يوم حسيتهم فارغات و ما عندي شي
لذالك اريد بس املي يومي اسوي اي شي ببالي
طلعت بيض و وكفت سويت ريوك
ترست الطاولة اجبان و ريوك بقى بس اصب الجاي
ما صبيت كعدت ع الكرسي ، انتظر أيهم
انداريت لمن اجاني نينو يلعب يمي
ابتسمت و ظليت ادحگله
تجيت ايدي ع الميز و خليتها على خدي
مرت فترة طويله و أيهم ما اجا و الاكل برد
اتضايقت كلش وين راح و هلكد اتأخر
گلت خل انتظر بعد شويه
خليت تلفوني يمي ادحك لـ الساعه
مر الوقت دقيقة ، دقيقة كدام عيني
اخذت تلفوني و طلعت للـحديقة
ادور على اشارة ما لگيت ابد
نفخت بـ ضجر و رجعت لـ المطبخ
خليت تلفوني ع الميز و كعدت
كمت لميت الماعين و ذبيت كل شي
و غسلتهم ، لميت شعري كبايه مخربطه
شلون ما جان شديته اخذت كوب جاي
رحت لـ الصالة كعدت ، ظليت صافنه
صار الظهر و أيهم ماكو
كلت يمكن شغلته تطول رحت اخذت غطى
و تمددت بـ الصاله انتظر
كمت افتر بـ البيت اروح و ارجع اختنكت وحدي
بس هو جان وياي و مونسني و يسولف وياي
رجعت تغطيت و تمددت
بداخلي شعور سيء و مكروهه
لـ العصر انا على كعدتي
الا شويه اموت من الخنكه هاي
وخرت الغطى و طلعت ادور برا
حتى ما احتاجيت البس شال
و لا بشر يمنا و المكان فارغ عبارة عن خضار
و البيت يلي احنا كاعدين بي
ما لكيت أيهم ، رجعت اروح و ارجع و افتر
الف فكرة اجت بـ عقلي بس جنت اهدي نفسي
كعدت بـ الباب انتظر
من العصر لحد ما غربت الدنيا و صار الظلام
بـ عقلي الف فكرة و الف سالفه
تذكرت شلون جنت هيج انتظر ابوي اذا يتأخر
اكعد نفس هاي كعدتي بـ الباب و اتاني بدون ملل
المهم اعرف نهاية هذا الانتظار جيته الي
و مشيته بـ شارعنا بـ كل شموخ و فخر
العيون يلي جانت تراقب جيته جانت تلمع ...
انتظرت هواي و عيوني بدت تذبل بـ تعب
بس ماعفت الباب ابد ، كل جسمي يرجف
لان ما ماكله و ما جوعانه
ما هامني شي غير أيهم يلي اختفى
لـ نص الليل و انا انتظر
التم خوف الدنيا كلها بـ گلبي
خاف صار اله شي و انا هنا بـ دوله ما اعرفها
و لا اعرف حتى لغتهم و لا تلفوني بي شبكه
حتى اتصل على احد و اگله
دخلت لـ البيت افتر و ادور على غراضه
ملابسه موجوده بس تلفونه و غراضه الثانيه ماكو
اخذت عبايتي و طلعت امشي ما ادري وين اروح
الدنيا ظلمه و وحدي امشي
اريد الگا شبكه اخابر أيمن ع الأقل اسأله
مشيت هواي ، بـ نفس الوقت
احاول احفظ طريق البيت خاف اضيع
لازمه ايد بـ ايد و امشي و عيني تفتر بكل المكان
بعد فتره من المشي شفت محلات ثنين
دخلت الهم بسرعه ، دحگت مكان كله زلم
كاعدين ياكلون اول ما دخلت
رفعوا عينهم يدحگولي
دورت بـ عيوني على أيهم من بينهم ماكو
انداريت لمن اجاني واحد يحاجيني
كل شي ما افهم عليه
طلعت بسرعه من يمهم دخلت المحل الثاني
محل حلويات حاجاني صاحب المحل
دحگتله ما فاهمه
مُلاذ : I'm arabic not turkish
I don't understand what you say
(الترجمة : انا عربيه لست تركيه
لا افهم الذي تقوله)
-?What do you want, sister
(الترجمة : ماذا تريدين يا اختي؟)
مُلاذ : I want to call my husband
?but I can't. Can you help me
(الترجمة : اريد ان اتصل بـ زوجي
لكن لا استطيع هل يمكنك مساعدتي؟)
-no network here
(الترجمة : لا توجد شبكه هنا)
مُلاذ : ?So what do people here
( الترجمة : أذن ما الذي يفعلونه الناس هنا؟)
- ?Did you read the piece outside
(الترجمة : هل قرأت القطعة في الخارج؟)
مُلاذ : no
طلع لـ برا طلعت وراه
دحگت لـ قطعه مكتوبه بـ التركي
دحگتله و هو ينطقها و يأشر
- It means rest your mind
(الترجمة : معناها ارح عقلك )
اندار و كمل كلامه
-People come here to have fun
We eat , sing, play
and people buy from me
We stay away from our phones
and sit in a place full of green
and contemplate nature
(الترجمة : الناس يأتون إلى هنا
للحصول على المتعة ، نحن نأكل و نغني و نلعب
و الناس يشترون مني
نبتعد عن هواتفنا ونجلس في مكان
مليء بالخضار و نتأمل الطبيعة )
هزيت راسي بـ قبول
تشكرته و مشيت ارجع من الطريق الاجيت منه
أيهم شامرنا بـ نهاية الدنيا
هاي تركيا بـ كبرها ما لگا غير هالمكان
و بقى هذا حالي كاعده لـ وحدي و اتصفن
اتذكرت كلامه و تلميحه لمن يگول
"اذا اعوفج شنو تسوين؟"
هزيت راسي بـ رفض ، فركت كصتي
حجيت بـ همس رافضة افكاري
مُلاذ : أيهم ما يسويها ما يعوفني
ما يعوفني وحدي و يروح
غطيت وجهي بـ ايدية و هزيت راسي بـ رفض
ما قابلة على افكاري و الي يدور بـ راسي
مُلاذ : مستحيييل مُلاذ اصحي
أيهم ما يعوفج مستحيل يعوفج ليش حتى يعوفج
ما غمضت عيني الليل كله
عيني على الباب و كاعده
بـ داخلي قلق مو طبيعي خاف صارله شي
شلون رح اعرف منين رح اعرف !
اخذت تلفوني احاول بس اتصل
ماكو لا شبكه و لا صخام و لا كل شي
اذا اروح لـ هذا الرجال يلي حاجيته
و طلبت المساعدة منه شمدريني
ما رح يضرني بعدين و يوديني لـ مكان ثاني
الدنيا ليل و اصلاً مكانهم بعيد
اساساً بـ صعوبة حفظت الطريق لـ البيت
اماكنهم جبيرة و واسعه و بيها فروع
كعدت بـ الگاع سندت ظهري ع القنفه
لميت رجلية لـ صدري ، لميت شعري كباية مخربطة
غرست اصابعي بين خصلات شعري
دحگت لـ نينو لمن اجا انبطح ع الگاع و نام يمي
مسحت على راسه ، رجعت راسي بـ تعب لـ ورا
بقى هذا حالي
للصبح انا انتظرة ، ما اجا ....
جريت نفس عميق ما يكفي لـ صدري المخنوك
القلق كبر بـ داخلي و عيوني بدت تتعب
بس ماكدرت انام و لا ارتاح
و لا حتى افكر بـ شي غيرة
لزمت بـ القنفه ، گمت بـ صعوبه
مشيت لـ الغرفة بـ ثگل، فتحت الكنتور دحگتله
كل ملابسه موجودة ، كل شي اله موجود
عدا اغراضه الي يحتاجها ما موجودات
خليت ايدي ع گلبي
يلي صار بي وجع مو طبيعي
احساس سيء لـ ابعد حد استقر بـ داخلي
مثل الاحساس يلي حسيته لمن فقدت ابوي...
وضعي يحير ، الحيرة اكلت عقلي
من جهه أيهم و من جهه المكان الي انا بي
و من جهه اهلي ممكن يقلقون علينا اذا ما حصلونا
رجعت عاجزه كعدت ع القنفه
گمت مره ثانيه رحت لـ المطبخ
دحگت لـ الثلاجة متروسه
رحت لـ الغرفة ادور بالمجرات
گلبت الغرفة گلاب
ما لكيت اي شي من أيهم الي
يبلغني انو هو راح يروح لـ مكان
انتهى اليوم و انا لو افتر بـ البيت روحه و رجعه
لو كاعدة و صافنه و انتظر و أيهم ماكو ما اجا
لا اكلت و لا نمت ، بس مي اشرب
انتهى اليوم و راسي يحاوطه صداع لا يُطاق
حاولت اغفى حاولت انام ما كدرت
طلعت من البيت و اخذت نينو وياي
رحت مشي لـ مكان البارحة دحگت مقفلين المكان
لان دنيا الصبح بعدها ،
كملت مشي مكان فارغ بـ المعنى الحرفي
و لـ وراه اكو مسطبات لـ الكعدة
و بايسكلات و اشياء لـ الترفيهه
ما استفاديت شي خليت و رجعت
و طبعاً على خطى نينو يلي يركض كدامي
و مر هذا اليوم هم بـ الحيرة و القلق
اول مره اخاف ع شخص بـ هالطريقة
غير امي و ملاك يلي هم اكثر اشخاص
خفت عليهم بـ كل حياتي
و هسه اختفاء أيهم عادل كل خوفي عليهم
دحگت ايديه ترجف حسيت
رح اوكع من طولي بـ لحظة
لا اكل و لا شرب و لا نوم و تفكير دوم
دحگت لـ وجهي بـ المراية شاحب
اسوء سَفرة ، لو ما مسافرين
و باقيين بـ مكاننا هواي افضل
گمت اكلت اي شي بس حتى اسند طولي
حاولت ارتب و اعدل البيت و الهي نفسي
و ما ادخل بـ هاي دوامة التفكير
صرت اشوف كل شي عبالك خيال كدام عيني
نظفت البيت ، دحگت لـ وجهي بالمراية
عيوني صارن حمر دم
دخلت سبحت ، طلعت خليت اكل لـ نينو
تمددت ع القنفه يلي كدام الباب
و عيني ع الباب و بداخلي الف سؤال اكو
غمضت عيوني بـ أرهاق و غفيت
ما اعرف شكد مر حتى فزيت
حسيت ع ايد تتلمس وجهي
فتحت عيوني بـ تعب ، رفعت نظري
دحگت لـ أيهم يلي يدحك بـ عيوني
و يمسح على خدي ، همست
مُلاذ : اجيت
أيهم : اجيت
رجعت غمضت و غفيت حسيته حلم
ما اعرف شكد مر و رجعت صحيت
فتحت عيوني بـ صعوبه ادحك
بـ اطراف المكان ، دحكت نايمة بـ الغرفة
اخير مره مو نمت ع القنفه !
نزلت عيني دحگت لـ دخان بـ الغرفة
و ريحة الجگاير القوية
عكدت حواجبي بـ استغراب ، درت وجهي
دحگت لـ أيهم كاعد ، ساند ظهره ع تاجية الجربايه و يدخن ، فزيت من مكاني ما مستوعبه
مُلاذ : ايييهم !
دحك بـ عيوني
زفر الدخان و جاوب بـ هدوء
أيهم : لَـذة گلبة
ظليت ادحك بـ وجهه مستغربه
معقولة جنت حلمانه !
مُلاذ : أيهم انت رحت عني ؟
أيهم : رجعتلج .
دحگت بـ عيونه
تيقنت العشته واقع من جوابة
حضنته حضنه اجيت اخنگه من قوتها
من كد الخوف يلي جان بـ گلبي
و لمن شفته كدام عيني و بخير
حضنته من كل گلبي ، بادلني بـ نفس القوة و اكثر
بـ العادة احضن الناس لان هم يخافون
بس هاي الـمرة حضنته و انا يلي خفت
وخرت وجهي من رگبته
لزمت بـ وجهه من الجهتين حجيت بـ قلق
مُلاذ : صارلك شي ؟؟؟ بيك شي
هز راسه بـ رفض
و بعده ع نفس كعدت و يدحك بـ نص عيني
استوعبت عافني و راح و هو مابي اي شي
دفعته بسرعه ، وكعت لـ ورا و انا ع الجرباية
مُلاذ : لعدد وين عفتني ؟
أيهم : تعالي
مد ايده يريد يحضن راسي لـ صدرة
دفعت ايده حجيت بـ عصبية
مُلاذ : أيهم وين جنت صارلك يوميييين؟؟
أيهم : يم مرتي الثانية
خزرته ، دفعته و گمت
مُلاذ : يم مرتك الثانيه !
هز راسه بـ قبول
و يحجي بـ كل جدية
مُلاذ : تحجي صدك؟!!
راد يلزمني دفعت ايده
دفع ايدي ، لزمني من زندي جرني اله
بحيث انضرب جتفي بـ صدره
و انا كاعده ع ركبي بين رجليه
همس بـ صوت ناصي
أيهم : شتسوين اذا طلعت متزوج
نزل نظرة دحك لـ شفتي
و رجع دحك بـ عيوني ،
هسهست من بين اسناني
مُلاذ : احفر گبرك و گبرها و ادفنكم بي
و اخلص منك و من شرك و من سوالفك!
ابتسم و ضحك
أيهم : احه هيج انتِ ما تنگدرين
مُلاذ : وين جنت؟
أيهم : مشتاگلج نامي بـ حضني و اسولف الج
مُلاذ : احجي !
أيهم : اشش نامي بسرعه يلا
دفعته عني ردت اكوم
رجع سحبني و غصب حضنني
انا ادفع بي و هو حاضنني حيل
أيهم : صديق أيمن الي وصلنا لـ هنا
سوا حادث و خابروني طلعت مستعجل
ما ردت اكعدج جانت دنيا فجر
ظل الولد حالته صعبة و ما كدرت ارجع
جنت اساعدهم على طول ، اليوم يلا كدرت
مُلاذ : اكبر جذاب انت
عندي احساس يگلي انت جاي تجذب
أيهم : و داعة ابوي احجي صدك
مُلاذ : انت تحب ابوك؟
أيهم : اموت عليه اعشقه
مُلاذ : و الله؟
أيهم : و داعته
دحكت بـ وجهه ما مقتنعه
مُلاذ : و الله اذا طلعت تجذب عليه
لو تموت بعد ما رح اثق بيك و لا رح اتقبلك
رح احرمك مني و الله ، لان اكثر شي اكرهه
الجذب و انت مجذب عليه هواي من قبل
أيهم : رح ابقى محروم منج طول عمري
اذا جذبت لو لا
مُلاذ : ليش تنحرم اذا ما ماذيني !
أيهم : ما اعرف هيج اجا بـ بالي
مُلاذ : الولد شلون وضعه؟
أيهم : صار احسن بـ هواي
مُلاذ : منو ياخذنا و يرجعنا بعد؟
أيهم : اخذت سياره منهم
مُلاذ : انت ليش مكعدنا بـ مكان بـ اخر الدنيا!!
شايف شكد مشيت حتى اشوف الي بشر
و لا شبكه و لا محلات كل شي ماكو
أيهم : أيمن جان كاعد هنا ، انه شلي علاقه
مُلاذ : أيمن شنو ما يحب البشر لو شسالفته
أيهم : يحب الهدوء هيج
مُلاذ : من جرمنه ما يعرف يتعامل وي البشر
و لا يلح و لا يحاول وياهم اذا كاعد بـ اخر الدنيا
و بس هالجلب المسكين يمه حتى هو مسبب اله
اكتئاب
أيهم : ههههههه
مُلاذ : و الله
أيهم : خفتي عليه ؟
مُلاذ : و الله أيهم اذا عدتها مره ثانية
و الله اعوفك و ارجع لـ العراق
ابتسم و هز راسه بـ قبول
أيهم : صار بس من تندلين الطريق عود ارجعي
ضربت جتفه
ضحك و حضنني اقوى ،
وزع بوسات متفرقه على وجهي
يبوسني شايغه روحه
سند كصته ع جانب وجهي و حجا
أيهم : گلبي مستحيل رح يكدر
يحب شخص غيرج بـ هالكميه و بـ هذا الشعور
درت وجهي اله
صارت كصتي على كصته
مُلاذ : رغم ما احب الاهتمام هيج
و لا الـمحبه المبالغ بيها الي
لان ما استاهل كل هالحب
ما سويت الك شي ينفعك حتى هيج تحبني
بس ممكن اكون محظوظه بـ محبة شخص الي
بـ هالطريقة ، و ممكن غيري تتمنى
شخص مثلك يحبها
أيهم : اعتراف خطير من لَـذة أيهم و فوصته
بس نوضح نقطه
انتِ تستاهلين كل ذرة حب بـ گلبي الج
و مستحيل رح تفهمين شكد و شلون احبچ
مُلاذ : يلا لا تلح كافي
أيهم : خليني اشبع يومين
و انت ماكو ابني ليش هيج قابل بـ اذيتي
ما تشتاق انت شني من گلب عدك
هزيت راسي بـ رفض
ابتسم و همس : مقبوله منج
ورا فترة ، كدرت املص نفسي من عنده
و اطفر من بين ايديه
مُلاذ : كافي حباب ضجت شواربك جاي تدغني
أيهم : نوب شواربي شبيهم شواربي؟
مُلاذ : يبززن
أيهم : اوي يبززن
حجاها و كرص رجلي
مُلاذ : يااااااا
أيهم : اش اش و لا حس فوصة
مُلاذ : أيهم خلينا نرجع
و الله كرهت هاي السفرة ابد ما حبيتها
أيهم : اسمه شهر العسل حبيبتي
مُلاذ : استغفرالله اجتني كلمة
أيهم ترا ماكو هيج شهر عسل كله مصايب
لو ادري هيج الشهر عسل ما جان اجيت
أيهم : اعوضج
مُلاذ : ما اريد تعوضني اريد نرجع
امي ملاك غاده يلي جابت هنا ما نعرف احد!
أيهم : گليبي يومين و نرجع
قابل ظالين هنا لـ الابد؟
مُلاذ : ما حبيت هالسفرة
أيهم : ميخالف گليبي هنَ ذني اخير يومين
طول اليوم جنت مچلبه بـ أيهم
وين ما يروح اروح ورا ، طلعنا اكلنا برا
و هناك خابرنا اهلنا و طمنناهم علينا
حجينا الهم عن الشبكه و انقطاعها
رحنا لـ مكان بي احصنه
فد كيفت من شفتهم
خلاني أيهم اصعد واحد منهم
و هو وكف يصورني ، انداريت و صحت
مُلاذ : أيهم اخاف يوكعني
أيهم : اصعد وياج؟
مُلاذ : اي اخاف اوكع
حاجا الولد الي يمه اشرلي رح يجي
و شويه و فعلاً اجا ، صعد ورا
باس خدي ، درت وجهي دحگتله
كذلته نازله على كصته ، ضحكت
لزم بـ بطني و مدري شسوا لـ الحصان
كام يركض بينا و انا اضحك مكيفه
مُلاذ : أيهم الله حلووووه
أيهم : ههههههه هي شني الحلوه
مُلاذ : ركضة الحصان بينا حلوه
أيهم : اشتريلج حصان
و اركضي بي بـ البيت
مُلاذ : ههههههههه بس اتضوجني
اجي ركض انا و الحصان عليك و انت نايم
و اصعد بي على صدرك
أيهم : حبيبتي قصدي حصان لعبه
اذا حصان حقيقي يوم ما اطول و تطلع جنازتي
ضحكت من كل گلبي
و هو يضحك على ضحكتي
وكف الحصان و نزل أيهم
رفع ايديه و اشرلي
أيهم : انزلي
مُلاذ : حركات الافلام
أيهم : نسويهن ليش لا؟
ابتسمت ابتسامة ظاهره اسناني
مديت ايديه لـ أيهم
لزمني من خصري و نزلني
لگينا بـ طريقنا مدينة العاب
دحگلي أيهم و گال
أيهم : شوكت اخر مره صعدتي مرجوحه؟
مُلاذ : يووو من زمان من عمري 8 سنين
حتى شكل المراجيح ناسيته
أيهم : خل اذكرج بي لعد
جرني و ركضنا لـ المراجيح
خليت ايديه على حلگي و ضحكت
مُلاذ : ههههههه الله يخزيك
ولك محامية طول بـ عرض تصعد مرجوحه
لو موكليني يشوفوني
يركضون وراي و يصيحون المخبلة
أيهم : اصعدي اصعدي معليج
قابل اعوفج تركضين وحدج
اركض وياج و يصيحولي المخبل وياج
ضحكت و كعدت بـ المرجوحه
رفعت راسي لـ أيهم و ضحكت
و هو يدفعني بـ المرجوحه
ادحك لـ رجلية تطخ بـ الگاع جني لقلق
مُلاذ : أيهم ههههههه دحك رجلية
أيهم : الطول ماخذج انتِ
مُلاذ : لو امي تشوفني جان دكت ع راسها
عبالها من تزوجني اعقل
ما تدري رجلي خبل اكثر مني
أيهم : فداج رجلج ولج
من بعد يوم كله ونسه و ضحك
رجعنا انا و أيهم لـ البيت
دخلت فحطانه من الضحك
نزعت شالي و انداريت لـ أيهم لزمت بي
بدت تخف ضحكتي و انا ادحك بـ وجهه
و هو مبتسم على ضحكتي
ابتسمت ابتسامة واسعه
لازمه بـ ايده ، وخر شالي من شعري
خلا ايده على خدي يدحك بـ عيوني
أيهم : يا أول عشك
مُلاذ : انا اول حب الك؟
أيهم : و الأخير
ابتسمت و حجيت
مُلاذ : الرجال النادر بهذا الوكت
أيهم : اندر من العناصر النبيلة
ضحكت دايخة
ابتعدت عنه و رحت كعدت ع القنفه
ثاني يوم المغرب
جنت واكفه اغسل ماعين العشا
و أيهم يغسل ايديه بـ الحمام ، اندك الباب
عكدت حواجبي بـ استغراب
منو يدك الباب هسه ؟
لبست شالي ،
الباب انطرق اكثر من مره ، فتحت الباب
دحگت لـ اخر شخص توقعت اشوفه
صديق أيمن يلي واكف كدامي حي يرزق
و وياه ولد ثاني ،
ركزت عيوني عليه ما مسوي حادث !
حجا الولد يسأل عن أيهم
و انا بعدني بـ وسط صدمتي
انداريت دحگت لـ أيهم على اثر صوت خطواته
اتوقف لحظات يدحگلنا و انا ادحگله بـ غضب
من بعد ما عرفت هو كذب عليه !
اتقدم ، حاجا الولد طلع يريد سيارته
يحتاجها و بعدين يرجعها لـ أيهم
حسيت اذاني تطلع نار
ما كدرت حتى استمع لـ حديثهم
دخلت لـ الصالة امسح بـ كصتي
و ايدي على خصري
نار گبت بيه من العصبية
رفعت راسي دحگت لـ الغرفة
دقيقة وحدة ما كدرت اتحمل ابقى هنا
گلتله ما يجذب عليه و رجع و چذب
و خلاني بـ موقف غبي و استغباني
دخلت بسرعه لـ الغرفة اخذت جنطتي
خليتها ع الجرباية و خليت بيها كل ملابسي
لحظات دخل أيهم يعيط ما يقبل المهن
و يوخر بـ ايدية عن الجنطة
دفعت ايديه عني و سديت الجنطة
أيهم : مُلاااااااااذ
لزم ايديه رفست رجلة بـ رجلي
تركني بسبب الم رجله
عفته و رحت اخذت شاحنتي و تلفوني
و لميت كل غراضي الي بالبيت
أيهم يركض وراي و رجله توجعه
حرف واحد ما حجيت ، عسى ما اكعد بالشارع
حذرته ما يجذب عليه و هم جذب و ما بَطل
اخذت غراضي و طلعت من البيت
امشي بسرعه ، أيهم يصيح وراي
أيهم : و العباااس رح اركعج بـ الگاع
اسمعييييني جاي اگلج اوكفي
سرعت خطواتي اكثر و هو يركض و يلزم بيه
ادفعه لو اضربه و اكمل مشي سريع
لزمني للـمرة الالف من ايديه
و قيدني عن الحركه صيح بـ وجهي متنرفز
عطت بـ نفس صوته و اعلى منه روحي محترگه
مُلاذ ( بـ صياح): شتريد جذبت عليه
گلتلي صديق أيمن مضروب و صدكتك
صدكتك و انا احساسي جان يگلي جذاب
جذبت روحي و الأحس بي و صدكتك
وين جنت ويييين جنت تعرف شصار بيه
أيهم : اسمعيني انطيني مجال احجي الج
مُلاذ ( بـ صياح ) : وين جنت ؟؟
وين عفتني و رحت تعرف انا شصار بيه
تعرف انا شلون جنت راح اتخبل
من خوفي عليك طلعت ادورك بـ شوارع
مكان ما اعرفه وين جنت وين رحت ؟؟؟
انت عفتني و رحت و لمحت الي قبلها
بس هم جذبت روحي و صدكتك
أيهم ( بـ صياح) : عفتج اي انه عفتج
و عفتج هنا وحدج لان انه *****
لـ درجة اخاف ما احافظ عليج و يصيرلج شي
دحگت بـ وجهه مصدومة
حجيت بـ صعوبه و هو يقاطعني بـ استمرار
و انا استمريت احجي من دون انقطاع
مُلاذ : شنو جانت نيتك؟!
شلون كدرت تسوي هيج بيه !
شلون كدرت تعوفني هنا وحدي
لا اعرف احد و لا اعرف المكان الي هنا شنو!
ما فكرت بيه ما فكرت باللي ممكن يصيرلي؟
عفتني ما تكدر تنكر انت عفتني هنا
أيهم ( بـ صياح) : عفتج هنا
ردت ارجع و اعيش بـ هذاك الجهنم وحدي بدونج
و اجيب اهلج وراج بعد فترة !
جازفت بـ بعدج و كرهج الي
بس حتى ما يصيرلج شي
أيهم : ما جاي تفهمين خوفي عليج ما جاي تفهمين
انا ما اگدر اضحي بيج ما اگدر اخليج هناك
تحت تصرفاتج و تهورج بـ موضوع الچتال
ما اگدر اشوفج كدام عيني تروحين للتهلكه بـ رجليج
مُلاذ : انت منو حتى تتحكم بيه
و بـ حياتي و باللي اريده و الي اريد اسوي !
منو انت منوووو لان صرت زوجي
لان انا وياك بـ نفس المكان تفكر رح تمنعني!
أيهم : انتظرتج سنين
ما اخلي الانتقام العامي عيونج
ياخذج مني بـ لحظة !
مستعد كل شي اسوي حتى اخليج بعيدة
مُلاذ : و مستعدة كل شي اسوي
حتى ارجعك غريب مثل ما جنت .
دحك بـ عيوني ساكت
درت وجهي اريد اكمل مشي
انعتيت من ايدي بحيث حسيتها انشلعت من مكانها
شالي يلي جان على شعري فلت ،
ارتطم جسمي بصدرة ، رفعت راسي دحگتله
هسهست من بين اسناني بـ عصبية
مُلاذ :عوفني شلون ما عفتني و رحت
هسه هم عوفني ! لان هالشي مو غريب عليك
تكدر تسوي
أيهم : عفتج علمود مصلحتج
عفتج حتى ما تتاذين
عفتج حتى ما اخسرج
مُلاذ : عفتني حتى ما تخسرني ؟
دفعته ، نبرتي الهادئه
تغيرت للـ صياح و الغضب
مُلاذ : تعرف انت شكددد خفت انا ؟؟
تعرف الحيرة الظليت بيها !
تدمرت هنا من خوفي صايرلك شي
و انا بـ مكان ما اعرفه و لا اعرف احد بي
عفتني حتى ما تخسرني و لان خفت عليه مو؟
بس ما خفت يصير الي شي هنا وحدي
مُلاذ : خليتني حالي من حال هذا الجلب
المهم اكو اكل و شرب لان حيوان انا
شنو فرقي عن هذا الجلب گلي؟؟؟
هيج عفتني انت كانو غرض كأنو حيوان
تحكمت بـ كلشي و خططت لـ كلشي من وحدك
مُلاذ : و انا الغبيه هنا
جسمي يرجف من خوفي عليك
لگمه ما اكدر احط بـ حلكي من القهر و من القلق
مُلاذ : سويت ريوك الصبح و كعدت انتظرتك
اريد اغير من حالك اريد اخليك تحس نفسك احسن
و انت جنت تخطط شلون تعوفني و تخلص مني
سد حلگي بـ ايده مانعني احجي
أيهم : شتحجيييين شتحجييين
عفتج و تعرفين شلون عفتج ؟؟
كم عثره عثرتها و انه طالع من يمج
كم مره حسيت راسي رح يطك
بس لان فكرت بيج بـ هاي الطريقة
أيهم : وصلت للمطار و ما كدرت حتى
وكعت عليهم هناك جنت راح اموت
من الحسيت بي
لا هو ندم و لا هو شوك لا هو خوف
احتاريت روحي رادت تطلع بلاج
أيهم : فكرة انتِ مو يمي ما خلت عقل بـ راسي
و فكرة تلگين الچتال بـ يوم
و ياذيج و اكون انه ما موجود يمج خلتني اتخبل
أيهم : تكدرين انتِ تعوفين شخص
عندج استعداد تفدينه بـ روحج
و تروحين و تعوفي و تختفين من حياته
حتى تأمنين على حياته تكدرين ؟؟؟؟
مُلاذ : جنت تكدر تحاجيني !
لاگيه الچتال انا حتى تخاف عليه من عنده
عارفه هو وين ؟؟؟ كل ما احاول
ارجع الف خطوة لـ ورا و ما اعرف شي !
أيهم : اعرفج ما رح تكفين عنه
اعرفج رح تلگي و شلون اذاچ قبل يرجع يأذيچ
و انه ما رح اكون وياج لحظتها
مُلاذ : هذا تبريرك ! استغبيتني انت
تصرفت وياي مثل شخص يتصرف وي غبي
و انا مو غبيه بس اتغابيت و صدكتك !
أيهم : ما استغبيتج ما استغبيتج انه
حضني بـ كل قوته و انا ادفعه
خلا راسه بـ شعري
مُلاذ : عووووفني اكبر چذاب انت
بعد لو تموت ما اثق بيك و الله ارجع وحدي
و انت خليك هنااا وحدك و خلي يفيدك خوفك
جباااان انت ما تكدر تحمي المره التحبها
بس تكدر تعوفها وحدها بـ مكان غريب
وخر راسي من رگبتي
لزم بـ وجهي من الجهتين
شعره اتخربط وجهه صار احمر
قوى لزمته على وجهي و حجا
أيهم : احميييج من كل شي
انطيج روحي اذا ردتيها
بس افهميني افهميني
اخاف عليج يسوولج شي و انه مو يمج
أيهم : اخاف ارد بـ يوم و انتِ ماكو يمي
افهميني انه احبچ احبچ اكثر من كل شي
ما عندي گلب يگدر يتحمل أذيتج افهميني
احتار شيسوي يحضن و يبوس
و انا متنرفزه منه ادفع بي عني و يرجع
بـ النهاية حضني من خصري بـ اثنين ايديه
جسمه اهتز ، دموعه نكعت شعري
توقفت ما اتحركت بعد مصدومه منه
معقوله يبجي بس لان ما يريد يخسرني!
و لان يخاف عليه و يريدني افهمه
او يبجي بسبب احساس الذنب يلي حس بي
ما جنت اعرف دموعه و روحه المحروگه هاي
بسبب حيرته و وجع گلبه ...
حجا بـ هدوء
أيهم : روحي بيج انه
كل شي اسوي علمودچ ما افكر لحظة
مُلاذ : چذبت عليه
أيهم : اذا بـ نهاية الجذب مصلحتچ
افضل اچذب طول عمري ،
اكرهيني بس لا تتأذين
لا تروحين و تعوفيني ماريد اخسرچ
وخر وجهه من شعري دحگتله
دموعه مبلله وجهه و عيونه مغورگه
مُلاذ : تبچي عليه من كل عقلك؟
أيهم : ما هزني شي گدج
ما اذاني شي گدج
دار وجهه عني يمسح بـ وجهه
اندار دحگلي ، اتقدم لزم ايدي بسرعه
و سحبني وياه للبيت ما قبلت اتحرك
ثبتت خطواتي و ظليت اعيط ما قابله ارجع ويا
اندار عليه دحگلي خازرني
مُلاذ : ماااا اريدك وخر ما ارجع وياك
چذاب اكبر چذاب انت چذبت عليه
ولي و الله بعد لو تموت ما انطيك مجال
ولي ولييي و الله بعد حتى اذا اريد احبك بطلت
جرني بسرعه و شالني من رجلية
ضربت ظهره بـ ثنين ايديه عضيت اذانه
هو يصيح و انا اصيح ما يقبل ينزلني
مُلاذ : و الله الا اظل اجذب عليك
بعد ما احجيلك اي شي صدك
الا اتطلك منك الچذااااااااب اكبر چذاب
سد الباب بـ رجله و هو يحجي
أيهم : مو بس أكبر چذاب
من وراج صرت أكبر كـ****
من عرفتج لحد اليوم
مُلاذ : نزلني الا اتطلك منك انا اعلمك
نزلني ع القنفه و لزم ايديه بـ تك ايد
خلا ركبة رجله فوك رجليه مقيدني عن الحركة
و انا احوص و اعيط
مُلاذ : الا أگل لـ امي عليك
انا اعلمك
أيهم : اكبر تهديد عدج هذا ؟
مُلاذ : جنت خايفه عليك يا ما عندك احساس
خليتني هنا و انت مرتاح تعرفني ما بيه شي
و عفتني و رحت ما فكرررت بيه
يومين انا ما نايمة خاف انام و ترجع !
انتظرتك بـ الباب مثل ما جنت انتظر ابوي
بس انت ما عندك احساس
لزم ايديه اقوى و زاد ثگله على رجليه
أيهم : كافي صياح صوتج شحرج!
مُلاذ : بسببك كل شي يصير بيه بسببك
بقى هادء ، دنك عليه خلا راسه بـ رگبتي
نَفسه حار خلاني اقشعر
خفف لزمته على ايديه تدريجياً ، همس بـ اذني
أيهم : اهدئي بابا اشش اهدئي
مُلاذ : أيهم وخر عني كرهتك ع السويته عفتني
ما فكرت بيه ابد ما فكرت شنو رح يصير بيه
أيهم : ما عفتج ما عفتج و الله ما عفتج لحظة
دوم جنت قريب عليج
حاولت اعود نفسي على غيابج
ماكدرت انه ما الي وجود بدونج
مخبل و حَبج و انتِ احسبي !
تجولت بوساته على خدي و حنجي كل وجهي
رفع نفسه صار وجهه كدام وجهي خزرته
ابتسم تك خد على خزرتي ، دنك باس عيوني ثنينهم
أيهم : رح تطكطك عيونج من مكانها حبيبتي
مُلاذ : باجر نرجع لـ العراق
أيهم : صار
مُلاذ : يلا وخر عني
أيهم : وخرت
ابتعد عني كعد على القنفه
گمت متكسره ايديه توجعني من ورا
كعدت و هو كاعد يمي اندارلي دحگلي بـ نظرات مال ادبسزيين خزرته و رفسته بـ رجلي
مُلاذ : دور وجهك
رفعلي حواجبه : متأكده من السويتي؟
رجعت رفست رجله مره ثانية بـ رجلي
هز راسه ساكت دار وجهه ، زفر دخان الجگاره
مُلاذ : الچذاب
درت وجهي و گمت اريد اروح لـ الغرفة
جرني من بطني طيحني على رجليه
مُلاذ : شبييييك
جتفني بـ اثنين ايديه
و انا كاعده على رجليه دارني اله
دنك وجهه الي وحجا
أيهم : رفستي منو؟
مُلاذ : رفستك عندك مانع؟
تنهد ، رفع راسه
دخن الجگاره زفر الدخان ، دنك راسه دحگلي
أيهم : عندي قانون تعرفينه ؟
مُلاذ : ما اعرفه و لا اريد اعرفه
أيهم : مقابل كل ضربه ثمن
مُلاذ : مد ايدك عليه و شوف
أيهم : اذا نحسبهن عضيتي اذاني هاي واحد
ضربتيني و دفعتيني اكثر من مره
هاي بـ اعتبار 3
لان ضربه و احد و الدفعه ثنين
هسه رفستيني مرتين و هاي 5
و فوكاها تربيع معناها 25 مره تدفعين الثمن
مُلاذ : و الله خوش تحور المواضيع!
ولو هي هاي صفات الچذابين محترف انت
عندك كل انواع الچذب و الاستهتار و الفلسفه
أيهم : هسه غلطتي عليه و گلتي جذاب
هاي السادسه و رح يصيرن 36
اغلطي و اضربي بعد عسل على گلبي
كلهن راح اطلعهن
مُلاذ : مد ايدك عليه و تشوف
أيهم : هسه انتِ عرفتي عقابج شنو؟
مُلاذ : دوخر و علي اضربك راشدي
تدري بيه اسويها
أيهم : ما تگدرين تخافين
رفعت حواجبي : لا بالله؟
أيهم : و الله
مُلاذ : منين اخاف؟؟
أيهم : مني ما تكدرين تضربيني
صلخته راشدي خده صار احمر
لعب بـ لسانه ع طول اسنانه
و ضحك بـ صوت عالي
أيهم : السابعه
حجاها و هجم عليه بـ حركاته المستهتره
باسني حيل خرمشت ايده اريد يعوفني
ايديه كل جسمي كام يوجعني من ورا
عض اذاني بحيث اشتعلت نار بيها
كفخته راشدي و هو يعد ، بطلت ما ضربته بعد
دحگت لـ الجلب
عاض تشيرت أيهم و يسحب بي عني
مُلاذ : عضه ولك عضه
اندار أيهم دحك لـ الجلب
ضحك و رفع نفسه عني نزع تشيرته
ردت تكوم دفعني ع القنفه و لزم بيه تك ايد
يثبتني على القنفه
كَور تشيرته مثل الطوبه ، شمره يم الباب
ركض الجلب ورا التشيرت و عافني
اندار أيهم دحگلي و هو يضحك من كل گلبه
دنك عليه و گال
أيهم : مع الاسف حتى الجلب غدار حبيبتي
مُلاذ : مو اگول منين اخذت صفاتك
لزم فجي بـ ايده حيل
أيهم : ولج لسانج ولج تعبني لسانج طايحة الحظ
كافي هالفواصه هاي تعبتيني
مُلاذ : تربية إلياس
أيهم : اخ إلياس چا انت ربيت ربيت
تربيها على علعلة گلبي ليش ؟
مُلاذ : انت اهلك ربوك ع الچذب الچذاب
أيهم : و الله ما انكر اهلي ربوني ع الچذب
مُلاذ : وخر أيهم لعبت نفسي
أيهم : عفا عليج تلعب نفسج مني ؟
مُلاذ : أيهم صار عندي غثيان لان بستني
و بعده جاي يصير رح استفرغ
أيهم : تحجين صدك لو تشاقين؟
خليت ايدي على حلگي ، هزيت راسي بـ قبول
وخر عني بسرعه ، گمت وخرت ايدي من حلگي
انداريت اله و انا امشي لـ الغرفة حجيت
مُلاذ : بس انت تعرف تچذب؟
حجيتها و درت وجهي
دخلت الغرفة ، سديت الباب و قفلته
أيهم : ولج الجذابه افتحي الباب
مُلاذ : لو تموت خليك ع الچذب
ظل بالصالة بعد ما تنام يمي و لا احاجيك
خوش ؟ يلا روح منا الچذاب ابو الچذب
انت ما يصيحولك ابو أبيل يصيحولك ابو الچذب
حجيتها و انا امشي متجهه لـ الجرباية
صعدت عليها و رحت لـ جهتي و تمددت
أيهم بقى يدك بـ الباب ، خليت راسي و نمت
فزيت لمن حسيت على نَفس حار يلفح بـ ركبتي
بقيت مغمضه عيوني حجيت بـ نعاس
مُلاذ : شجابك
أيهم : الشوك
مُلاذ : الچذاب
أيهم : يلا صحيح چذاب ردي نامي
مُلاذ : وين انام و انت خانگني
الي نوم من وراك
فوك ما چذاب تخنك همين
أيهم : يا الفوصه يا ام البلاوي
حاضنج كل شي ما مسويلج هسه صرت اخنك؟
منيه ذاك اليوم كعدت لگيتها حاصرة روحها
بـ حضني
مُلاذ : هااااي شوووووكت ؟
أيهم : قبل كم يوم كعدت لگيتج شابگتني
حاصرة روحج يمي
و هاي الجرباية شكدها و شكبرها
مُلاذ : و حق هذا الله چذاب
وخر ما انام يمك امداني اذا نمت يمك بعد
أيهم : و حق هذا الله احجي صدك
حتى فزيت من وراج جنج زعطوطه
لازمه بـ هدومي بـ ايد و بـ ايد الثانية شابگه رگبتي
مُلاذ : چذاب ابو البلاوي
دفعته عني و گمت اخذت مخدتي
دحگتله يريد يجيني
رفعت اصبعي و حجيت بـ تحذير
مُلاذ : ديربالك
طلعت من الغرفة دحگت اكو من برا مفاتيح
عنده مفاتيح احتياطيه و فاتح الباب
رحت نمت ع القنفه بـ الصالة دحگتله
اجا نام يمي ، ردت اكوم لزمني بـ اثنين ايدية
ما يخليني اگوم
مُلاذ : دوخر لا تلزززك بيه لا تلزك
أيهم : كافي صيري عاقله خل نتصاحب
مُلاذ : دَولي الچذاب ما احاجي چذابين
ما خلاني اگوم لازمني بـ ثنين ايديه
و يبوس بيه و يعض خدي لو ركبتي
مُلاذ : كافي تبووووس كافي
مو لعبت نفسي رح استفرغ عليك
يكرم طاري الله
أيهم : تنامين يمي ما ابوسج بعد
مُلاذ : و الله ارفسك تكعد الصبح
تلگا روحك بـ الگاع
أيهم : احه انه اوگع ما عيب عليچ
زِلمة شكبرني شگدني توكعيني انتِ
مُلاذ : شكدك شكبرك و تجذب
دار وجهه لزم صدرة وحجا
أيهم : يا يمه رح اموت دخيلج ي الزهره
دار وجهه الي و حجا
أيهم : بابا انتِ شبيج ها حبيبتي ؟
انتِ من تلزگين بـ سالفة بعد ما تنسيها لو شنو؟
مُلاذ : شلون هسه انت ملزك بيه
فرك وجهه ساكت عني
گمت اخبث ما دام ما يعوفني اطلع روحه
خليت رجلي على بطنه و فرشت
بحيث صار كلش بـ الحافه انطيته ظهري
شمرت شعري على وجهه ، ما حجا
بـ العكس حضنني اكثر و ظل يلعب بـ شعري
فد اتنرفزت و لا يفيد ويا
استسلمت لـ النوم و غفيت
ثاني يوم الصبح كعدت لميت كل غراضي
أيهم كعد شافني الم الغراض
افتهم بدون ما احجي
خابر على صديق أيمن حاجاه و اجا يلم وياي
وقت طويل مر و سمعنا صوت هورن
اخذت شالي لبسته دحگت لـ نينو
ابتسمت و تدنيت عليه حكيت راسه
مُلاذ : تونست وياك نينو
دحگلي كل شوية يغمض عيونه و يفتح
ابتسمت و گلت
مُلاذ : جنت اوفى من بعض البشر
دحگت لـ أيهم الرفع حاجبة
هز راسه بـ قبول ساكت
بست نينو و گمت ، سحبت جنطي
انداريت لمن أيهم راد يشيلهم
خزرته و نترت ايده منهم ، فتحت الباب
سحبتهم و طلعت
نزل الولد الي بـ السيارة يركض
اخذ جنطه من عندي تشكرته
راح يصعدها بـ السيارة
أيهم واگف و خازرني اتقدم عليه
ياخذ الجنطة الي مخليه ايدي عليها
دفعت ايده رجع دفع ايدي
خزرني و حجا بـ حده
أيهم : كافي انعدلي
سكتت لمن اندار النا الولد
اخذ أيهم الجنطة صعدها
سلمت ع الولد لان اول ما اجا شال الجنط
و ما سلمنا عليه و رجع أيهم سلم عليه
صعدت انا لـ ورا و أيهم بـ الصدر
بدء تلفوني يلتقط الشبكه اخيراً
امي هواي دازتلي
خابرتها حاجيتها و گلتلها رح نرجع هسه
و بعد ما رحنا للمطار
أيهم راح هو و صديقة
انا كعدت انتظرهم
رجعوا بأيديهم كاسات جاي و اكل
فترة طويلة يلا اجت الطيارة
ودع أيهم صديقة ، گمنا صعدنا
و من بعدها بـ كم ساعه صرنا بـ العراق
اتلگانا أيمن من المطار
أيهم موصي ما يگول لـ اهله
لان يريد يسوي لـ باهر مفاجئه
أيمن : هلا بـ ريحة هَـلي
ضحك أيهم و اتقدموا حضنوا بعض
أيمن : شلونها مرة اخوي؟
مُلاذ : زينه اشتاقينالك
أيمن : و العباس انه هم
ضحكت اتقدم اخذ الجنط خلاهن بـ السيارة
صعدنا وياه و هو يسولف
أيمن : اي شونها تركيا
فلشتو بيتي و اجيتو مو؟
مُلاذ : بس اسألك سؤال
شون جنت كاعد بـ ذاك البيت
انت طبقت كلمة عايش بـ نهاية الكرة الارضية
أيمن : شبي يخبل بس انه و نينو جنا
اريد شي اطلع بـ سيارتي اجيب و اجي
لو اروح ع الكهوه القريبه و انرگل هناك
اشوف صاحبي و ارجع
مُلاذ : اگول ليش عدك صعوبة بالتواصل وي الوادم
أيمن : مُــنعزل
ضحكت ع طريقة لفظة لـ الكلمة
أيمن : أُحب الانعزال و الجلوس في مكانٌ هادءٌ
يحجي و يجر بـ الكلمه
عبالك طالع بـ افلام كارتون ،
كفخه أيهم على رگبته
أيهم : احجي عدل
أيمن : ماذا بكَ يا أخي هل انت منزعج ؟
أيهم : رح اطلعك من الجامه
أيمن : عنيفٌ جداً سوف يلقي بي من الشباك
دحگله أيهم بـ طرف عينه
أيمن : هل انت متشاجر مع زوجتك
أجب بـ كلمة نعم او لا
سوف يساعدك أيمن ابو اللبن
ضحك أيمن يلتفت يدحك لـ نظرته و يضحك
اجا اتصال لـ أيمن دحگلنا و اتحمحم
فتح الاتصال و حجا
أيمن : هلا ، اي ، أيهم و مُلاذ جايبهم و جاي
يلا زين ، اتفقنا ، هههههه ، لا يابه مو هيج
صدك جذب ، انه هم
نزل تلفونه و سد الاتصال
تدنيت من ورا و حجيت بـ همس
مُلاذ : ترا ادري بيها صافي
اندار دحگلي و ضحك
رجع دار وجهه يسوق
أيهم : أبيل شلونه ؟
أيمن : ابن الزفره كل يوميه ينصب النا مناحه
يعوف كل الاماكن يجي يكعد يم راسي
و انه نايم يبجي عليك و ينحب تگول ميت
أيهم : ولك الچلب شبيك ويا
أيمن : هو الي شبي وياي
عاف غرف الدنيا كلها و يجي يمي يلطم
أيهم : حيوان غير يحبك
أيمن : على عيني و راسي
بس مو يجي يبجي يمي و انه نايم
شني امه بـ الرضاعه انه
أيهم : چلب انت جنت مو بس تبجي يمي
اخير شي وصلت اله تنام مكاني و تكعد بـ غرفتي
و خليتني نايم بـ الصاله شهر
أيمن : قحط ؟
أيهم : چا قحط ابني يبجي يمك
أيمن : غير نايم
أيهم : چلب عمرك بالعشرين سنه
و كل ما تضوج تجي تكعدني تريد سيارة
أيمن : اي انه اريد سيارة
اكعدك على شي يستاهل
أيهم : قصدك انه ما استاهل أبيل يبجي عليه؟
أيمن : ما اسمع شگلت
أيهم : اكفخك على اذانك اعدل السمع يمك
أيمن : ما اسمع ما اسمع عَلي صووووتك
أيهم : من عيني
رفع ايده أيهم يريد يكفخه
لزم أيمن اذانه و گال
أيمن : اي اي رجعت اسمممع
اشكرك ما اريد تعدل سمعي
أيهم : خاف تريد سمعك يرجع گلي
انا اعدله الك بسرعه
ضحك أيمن
وصلنا لـ البيت لگيت الكل منتظرينا
امي و ملاك و صافي و نور
و جسار و سلطان و الباقين
خالة جنات و باهر و اهل أيهم
يم غاده لان هستوها جايبه
گلت ارتاح و بعدين اروحلها
سلمنا عليهم ، امي مسويه اكل و منتظرينا
مُلاذ : خل اصعد اسبح و ابدل و اجيكم
فيروز : يلا انتظركم
جسار : يول مليذه مو تتأخرين
ترا معدتي كامت تضوب دقلات من الجوع
مُلاذ : هههههه اراويك انا
اذا ما اجيت ورا ساعتين
جسار : يول اصعدلج اكفشج و العباس
خلصوا بساع و انزلوا
مُلاذ : يلا لا تبجي افتهمنا
جسار : يول توج جايه و بدا لسانج يثرم
مُلاذ : شعليه انت العلت
جسار : عمي ها اها سكتنا عاذريچ
ضحكت و طلعت من يمهم
صعدنا انا و أيهم لـ الشقة ما حاجيته ابد
ما حبيت تصرفه و لا گدرت اتقبل يلي سواه
حتى ما حسب حساب ممكن اتعرض لـ شي
و انا هناك وحدي كاعده
سبحت و بدلت ملابسي
أيهم هم سبح و بدل ، نزلنا جوا
ردت اكعد يم امي طردتني من يمها
فيروز : امشي كعدي يم رجلج ولج
مُلاذ : ما اريد عوفيني هنا
فيروز : عيب يمه اكعدي يمه
مُلاذ : ماكو عيب عوفيني
سكتت امي عني و كعدت اكل انا
سلطان : دسولفولنا جفتتو ع الاكل گبل
مُلاذ : اسأل و اسولفلك چنك على سوالف
سلطان : وين رحتوا ؟
مُلاذ : ما اعرف الاماكن الهناك
بس هو مطعم و البحر و محلات ملابس
سلطان : النسوان الي هناك يخبلن مو؟
اعترف أيهم لا تستحي
خزرته و خزرت أيهم
أيهم : يخبلن
رفعت حاجبي ساكته و هو يدحگلي بـ طرف عينه
دحگت لـ ملاك مقلصة عيونها
تدحك لـ سلطان و هو يحجي
سلطان : اويلي يابه غير يشلن الحال
عاطت ام سلطان بي و هو يضحك
مُلاذ : و الزلم هم يخبلون
خو واحد سمعت اسمه من صديقه اسمه اوموت
ها ملاك فددد يخبل يعني تخيلي
انا الما يعجبني خلقة رجال
عجبتني خلقته او يمكن جان الستتم عطلان عدنه
و حقي من ما تعجبني خلقه هنا
لان هناك خلقهم بيها خير و حلوه
ملاك : اي و الله يخبلون جنهم مودلز
سلطان : و انتِ وين شايفتهم؟
رادت تحجي ملاك جاوبت بدالها
مُلاذ : فتحت الها كاميرا من طلعنا و راويتها
سكت سلطان متنرفز
دحگت لـ أيهم انگلبت تعابير وجههم گلاب
حصرت ضحكتي و انداريت دحگت لـ ملاك
ابتسمت و ضمت شفتها ساكته ما تريد تضحك
جسار : انا جنت وين ماكو ثنين حبايب
انشمر يمهم يا بويه يالتلزيك
تلعب روحي اعوف المكان و ارجع لـ بيتي
مُلاذ : حقك
بقوا يسولفون و يتناقشون عقلي فاصل مو وياهم
نسفت الماعون الگدامي مشتاقه لـ اكل امي
الاكل يلي انا اسوي لو ماصخ لو مالح كلش
لو محروك و أيهم متقبل الموضوع
و ياكل يجبر خاطري
تذكرت من سويت اله تمن
طلع جنه عجين من فوك
و محروك من جوا و هو اكله ساكت
يكشول ملامح وجهه و يعدلها من يدحگلي
انا اكل و اطكها ركضة لـ الحمام
لعبانه نفسي من الطعم
خلصنا اكل و صافي راحت وي السايق
صعدت نمت شويه ، فزيت على حس أيهم يمي
أيهم : لَـذه اكعدي حاجيني
بقيت ساكته و مغمضه
أيهم : ترا ما رجعت بدونج ما جنت اكدر
عاينيلي خل احاجيچ لا تعلين گلبي
بقيت ساكته
أيهم : ترا اعرف بيج كاعده
هم ما جاوبته
أيهم : كومي زين خل نروح لـ باهر
ما شفنا الجاهل و لا اخذنا أبيل من اهلي
وخرت الغطى عني و گمت غسلت ،
لبست عبايه و شال
فتحت الباب و نزلت ، گلت لـ اهلي نروح سوية
كاموا يلبسون و جسار و سلطان موجودين يمنا
هم كاموا شغلوا سياراتهم
رحنا لـ بيت باهر نزلنا دگينا الباب
فتحها النا باهر طلع مصدوم يسلم علينا و يضحك
لگينا أيمن يمهم هو الگايل لـ أيهم اهله يم باهر
باهر : شوكت رجعتوا شو ما ادري ؟
أيهم : قبل كم ساعه ردينا
باهر : چا ليش ما خابرتوني اجي اشوفكم؟
مُلاذ : ردنا نسويلكم مفاجئه
باهر : احلى مفاجئه و الله
مُلاذ : ابن اختي وينه
ضحك باهر
باهر : عمي همزين اجيتي مالنا غيرج
مُلاذ : ليش شكو؟
باهر : غاده كاعده تبجي وي الطفل
مُلاذ : عزه العزاها المعزايه
صدك تحجي ؟
باهر : هههههههه و العباس روحي شوفيها
تگلي ليش يبجي شو ما يحبني و تبجي وي الولد
ضحكت ، دخلنا باهر سلم على اهلي
رحت گبل على غرفة غاده دگيت الباب
اريد افاجئها ، سمعت صوت الطفل يبجي
و غاده صوتها و اضح و هي تتغصغص و تبجي
ام أيهم : ما تدخل باهر منو اجا؟
فتحت الباب و مديت راسي
مُلاذ : اناااا
انصدموا بـ شوفتي دحگت لـ أبيل من صاح
أبيل : الهلوووووووه
اجاني طاير يركض فتحت الباب
و شلته حضنته و ابوس بي
خليت خدودة تصير حمر
مُلاذ : يممممه شلون مشتاقتلك
اول مره اشتاق لـ طفل هيج
ضحك و حضن رگبتي حيل
مُلاذ : شهالريحة الطيبه
ضحك بـ فرح
أبيل : وين بابا؟
مُلاذ : بابا برا روح شوفه
نزلته راح يركض يشوف أيهم
كامت ام أيهم سلمت عليه
سلمت عليه خاله جنات هم
ام أيهم : هاي شوكت اجيتو؟؟
مُلاذ : اجينا من العصر وصلنا
ردنا نسويلكم مفاجئه بس اهلي يعرفون
ام أيهم : يا ي بعد روحي
أيهم وينه؟
مُلاذ : برا
اجت هتان سلمت عليه حضنتني و بوستني
دحگت لـ غاده الدموعها مغركه وجهها
حجت و هي تبجي
غاده : ليش ما گلتيلي اجيتي
رجعت تبجي بـ حرگة
ضحكت بـ صدمه ادحك بـ وجهه ام أيهم و هتان
و خاله جنات ، هزن راسهن بـ معنى "هذا الوضع"
حجيت و انا اتقدم عليها و اضحك بـ صدمة
مُلاذ : ولج المخبله ولج ام عقلين
من صدك تبجين عود ؟؟؟
خلت ايديها على وجهها و ردت تبجي
و الطفل يبجي وياها اخذت ام أيهم الطفل تسكته
دحگت لـ الطفل يخبل ابيض على غاده
ضحكت ادحك لـ ايدية الصغار و عيونه
خليت ايدي على حنجه و گمت اسويله
مُلاذ : اغي اغي
و هو يدحگلي ، ضحكت
وصلت يم غاده حضنت راسها لـ بطني
و هي كاعده ع الفراش و مستمرة تبجي
تعابيري مصدومة و مبتسمه
عود صدك الهرمونات و فترة النفاس هيج تسوي ؟
مُلاذ : كافي حبي شجاج گولي يا الله
مو حتى الجاهل اذا ما يبجي بجيتي وياج
غاده : صارله من الصبح لسا يبجي
لعبانه نفسه مني و الله ريحتي طيبه ليش يبجي
حصرت ضحكتي گوه
دخلن امي و ملاك و البنات يمنا
شافنها و اخترعن و انصدمن مثلي
فيروز : شبيج يمه خيرج؟
حجتها امي و تقدمت تبوس بـ خالة جنات
و ام أيهم تسلم عليهم
جنات : من جابت الطفل لسا تبجي ويا
مُلاذ : زين انتِ دحگيلي بس اهدي
و طولي بالج
اندك الباب باهر مد راسه
باهر : أيهم يريد يسلم عليج غاده
مسحت دموعها و هدأت
انطينها شال لبسته
دخل أيهم شايل أبيل سلم عليها
أيهم : الحمدلله على سلامتج خويه
اي شي تحتاجين انه موجود
غاده : الله يسلمك ابو أبيل ما تقصر
دحگتلها و همست
مُلاذ : لو گايلتله ابو الچذب احسن
اتقدمن ام أيهم و هتان سلمن عليه
هتان حضنته و هو هم حاضنها حيل
ابتسمت على منظرهم ، نزل أبيل من حضنه
اتقدم شال الطفل من كاروكه ابتسم يدحگله
أيهم : شسميتوا؟
باهر : ما سمينا منتظريك تأذن بـ اذنه
أيهم : هلو ياهو گلك انه امام جامع؟
باهر : لا يابه چبيرنا انت انتظرناك
حتى تكبر بـ اذنه و نسمي
أيهم : دهر طرك اليسمعك يگول أيهم
حتى التسع اشهر الي ببطن امه قاضيهن صلاة
باهر : هههههه ديلا لا تتنحس علينا
دخلوا جسار و سلطان
نطقوا سويه
- السلام عليكم
ردوا الكل السلام ابتسم جسار
و اتقدم ع الطفل
جسار : تدرون ما شفته عدل
باهر : اي طلعت بسرعه من يمنا
قبل لا يجيبونه
هز راسه بـ قبول
دحگت لـ هتان تدحگله
عيونها مغوركه بلعت ريگها و حجت
هتان : خل اسويلكم چاي انه
عافتنا و طلعت
دحگت لـ جسار يدحك وراها ساكت
دار وجهه و رجع وكف يم سلطان
طلعت نور تصيح هتان
لان رح أيهم يأذن بـ اذن الطفل
اجت هتان وگفت ورا باهر ، دحگت عيونها حمر
زحت نظري عنها مغلسه
لمن رفع أيهم الطفل اله اكثر و وكف يأذن بـ اذنه
كلنا ملتمين عليه و محاوطينه
اذن بـ اذنه رفع راسه مبتسم و انطاه لـ ابو
ضحكت ام أيهم بـ فرح و گالت
ام أيهم : يوم الاشوف بي ابنك الثاني
ابتسم أيهم ، دحگلي ، درت وجهي عنه
رجعت كعدت يم غاده
خلوا الطفل بـ حضن غاده حجا باهر
باهر : نسمي ؟
هزت راسها غاده بـ قبول مبتسمه
غاده : انا و باهر مقررين اسمه من زمان
أيمن : اي ديلا مو عليتوا گلوبنا
باهر : اسمه أدهم
وسعت عيوني مصدومة
دحگت بـ وجه أيهم
و امه انگلبت تعابيرهم گلاب
جمدت تعابير أيهم ، باهر حجا
باهر : امي جانت تخربط بـ اسم أيهم
تصيح أدهم لان قريبات على بعض
و من گلته لـ غاده عجبها
دحگت بـ وجهه أيهم هز راسه بـ قبول ساكت
طلع من يمنا تحت اثر خطواته التايهه
رجعت عيني على ام أيهم ابتسمت بـ هدوء و طلعت
ردت اطلع اشوفه لزمتني غاده
انداريت دحگتلها و كعدت يمها
طلعوا كلهم يجيبون عشا
يغسلون لـ الطفل ، يسوون اله مميه ،
بعدين غفى بقينا انا و البنات
كاعدات يم غاده
مُلاذ : دحگي اعرف انتِ بـ فترة نفاس
و هالفترة صعبه حقج ما مربيتلج طفل من قبل
حقج من تستصعبيها و تنقهرين اذا الطفل يبجي
مُلاذ : بس شوفي الاطفال
٩ اشهر هم بـ مكان هادء
اظلم قابل الطفل عده ضوا بـ بطنج طبعاً لا
و متعوده اجسامهم ع الدفو و الهدوء
مُلاذ : لمن الطفل يطلع من بطن امه
ما تشوفي يصرخ و يدك و يلطم
اول ما ينولد تگول بايگه فلوسه
مُلاذ : بس هو لان شاف مكان ثاني
غير عن المتعود عليه
و يجوع هو جان بـ بطنج يتغذى على غذائج
طبيعي يبجي هواي بس مو تكعدين تبجين ويا
انداريت على ملاك من حجت
ملاك : هاي مُلاذ بس لا مخلفة من قبل
نور : هههههه اي و الله صدك جنها هيج
مُلاذ : ولج انتِ منو رباج ؟
غير انا جنتي تشلعين گلبي
انطيج المميه تهفيني بيها
ملاك : ههههههه عزه ليش؟
مُلاذ : و الله انا يمكن جان عمري 12
و انتِ صغيرة كلش و بعدج تشربين مميه
فـ انا ما جنت اعرف اسوي مميه عدل
اتعلمت من جيراننا و اجي اسويلج
مرات تصير باردة تظلين تبجين و تركعيها بالگاع
مرات ما عدنا حتى حليب اسويلج
غاده : لعد خاله فيروز وين؟
مُلاذ : جانت بـ فترة حزن على ابوي
ما اگلج ما جانت تعتني بينا
طبعاً تعتني بس دوم جانت مريضة و تعبانه
دوم اسمعها تبجي و لـ الصبح ما تنام
هي كاعدة و انا كاعدة وياها لحد ما تنام
نور : بس ابد ما اجيتو لـ بيبي
ولو هي هم صحتها جانت متدهوره
بس لو جايين الها افضل
مُلاذ : مره جنت ابيع كلينكس وي سيد محمد
و شفت ابوج مر من يمنا ذبيت الكلينكس
و رحت اله سلمت عليه رد السلام و گلي مستعجل
بـ وقتها شاف حالي و گلتله اريد حليب لـ ملاك
عافني و راح بدون ما يحاجيني
و هذا الشي ما حجيته لـ اي شخص
مُلاذ : وقتها استحقرت نفسي
و كرهت روحي لان حاجيته
حلفت من بعدها ما اطلب اي مساعده
من اي شخص قريب او غريب
مُلاذ : شما اشتغل اجيب الهم يلي يحتاجونه
المهم ما انزل لـ نفسي لـ هيج اشخاص
نور : هو اساساً تصرفاته دائماً جانت تفشل
مُلاذ : اكبر اناني و اسكندر طالع عليه
نور : بس لو جايه لـ بيبي ما جان ردتج
مُلاذ : اصلاً ما اندل مكانكم عدل
و بيبي وقتها دخلت غيبوبه
ولدها ثنينهم ماتو بـ فترة قصيرة
المن اروح بعد؟
غاده : الحمدلله هسه انتِ محاميتنا
مُلاذ : الحمدلله و انتِ هم محاميتنا
ف امسحي دموعج و لا تخبصين روحج هيج
باهر جاي يعتني بي وياج قابل رح يظل طفل
طبعاً يكبر و يصير اهدء من هسه
هزت راسها بـ قبول
دحگت لـ مكان هتان فارغ
گمت و گلت
مُلاذ : هسه اجي
هزوا راسهم بـ قبول
بقوا يسولفون بيناتهم ، طلعت من يمهم
دورت على أيهم ما لگيته
رحت ادور على جسار ، هم ما لگيته
رحت يم امي حجيت بـ تساؤل
مُلاذ : وين أيهم ؟
فيروز : طلعوا هو و باهر
و أيمن و سلطان يجيبون عشا
مُلاذ : و جسار؟
فيروز : ما قبَل يروح وياهم
مُلاذ : وينه؟
فيروز : بـ الحديقة يمكن
هزيت راسي بـ قبول و طلعت من البيت
دحگت ادور بـ الحديقة ، صار نظري عليه
كاعد على المرجوحه بـ الحديقة ، يدخن
اتقدمت كعدت يمه وحجيت
مُلاذ : چنها غرگانه مراكبك
جسار : من زمان حتى انا غرگان وياها
مُلاذ : شصاير؟
جسار : شصاير؟
مُلاذ : انا جاي اسئلك هتان شبيها؟
دحك بـ وجهي دار وجهه عني
جسار : ما بيها شي
مُلاذ : ولك احجي شمسوي لـ البنية
دمعتها بـ عينها و تفتر ذيج وينها مبينه
جسار : و الله ما مسوي الها شي
حتى انا ما اعرف شبيها عيونها مغوركه
مُلاذ : متأكد؟
جسار : اكوم الزكج بـ الگاع
من شوكت اچذب اناا
مُلاذ : اوي اوي عصب عود
ابو النسوان
جسار : انجبي ويني وين النسوان
مُلاذ : شريف
جسار : ليش عندج شك؟
مُلاذ : لا ماعدي ابن غزوان
جسار : خوش بت ألياس يلا اتسرسحي جوه
هسه تطلعين الجكاير من خشمي
ريحتهم مو طيبه
و شلون تشربونهن و يلعبن النفس
مُلاذ : و العباس هسه اجيت اگلك
شنهاي ريحتها تلعب النفس شلون تشربهن ؟
جسار : بدت القوانه وخري من يمي
مُلاذ : اعلمك انا تطردني ؟ خل يجي رجلي
جسار : رجلج راح ياكل كباب بعد ما يتذكرج
مُلاذ : جا ما رحت وياهم شمالك كاتلك الحزن
جسار : بويه ما تعوفيني
خليني حاير بـ روحي
مُلاذ : اشغلك معزوفه حزينه؟
جسار : انتِ لو باقية بـ تركيا مو احسن الج
مُلاذ : ايع اخيس سفرة
جسار : هاي ليش ؟
مُلاذ : ما حبيت
جسار : يعجبج العراق ابو الشط الاسود المخضر
بت الرافدين
مُلاذ : عراقي غيور و غيرتك حلوه
جسار : هههههه المُغنية مُلاذ الرسام
ضحكت و گمت
مُلاذ : من يوصل الاكل ضم الي الخبزه ام الدهن
جسار : شني مربيتج انا
مُلاذ : غير اخوي
جسار : استقاليت بطلت
مُلاذ : اروح ادورلي اخو ثاني
جسار : انجبي بس انا وياج اخوان غيري لا
مُلاذ : چا ضم الي الخبزه ام الدهن
جسار : هاهيه
ابتسمت و دخلت جوا
هتان :-
كاعدة بـ السطح لامه رجلية لـ صدري
بـ اذاني حاطه سماعه وحده و الثانية بدونها
ساكته ، ادحك لـ النجوم
الكل جوا متونسين و يضحكون
بس انا ما اعرف شبيه ، او اعرف بس اتناسى ...
مسحت دموعي و رجعت نزلت
خليت راسي على ركبات رجليه
اهتز جسمي ابچي و انا اتذكر
نظراته الها بـ المستشفى و كلامه وياها...
طلعت تلفوني دخلت الملاحظات
اكتب و ابجي اعبر عن مشاعري
حسيت اذا كتمت هالشي رح اموت من الخنگه
نزلت التلفون ، سندت راسي ع الحايط الوراي
مسحت عيوني ، رجعن دمعن ، حجيت بـ همس
هتان : كافي هتان كافي تبجين
رح ينتبهون اسكتي اسكتي
نزلت راسي امسح عيوني
ما اعرف ليش صارت عندي مشاعر اله
و شنو هذا القهر يلي شعل نار بـ صدري
لمن شفت نظرات جسار لـ نور بـ المستشفى
و فوكاها سمعت كلامه
ظل گلبي محروك من هالشي
و لمن شفته اليوم بچيت لمن اتذكرت ...
فزيت لمن سمعت صوت خشن من يمي
انداريت ، نزلت السماعه من اذني ، دحگتله
جسار : رمانه ؟
هتان : شنو ؟
اتقدم لـ يمي زحفت لـ ورا
انحشكت بـ الزويه ، دنك كعد ركبة ونص كدامي
هتان . شمدريك انه هنا؟
جسار : دورت البيت كله عليج
و اخير حل بقى الي السطح
سكتت ، هزيت راسي بـ قبول
جسار : شبيج؟
حجاها و مسح دمعتي
يلي باقية على خدي
بعد ايده بسرعه عني
جسار : ما قصدي المسج بس لان دموعج ..
اشر عليهم و ما كمل كلامه
مسحت وجهي بسرعه ، هزيت راسي بـ قبول
هتان : شتريد ؟
جسار : شبيج؟ ليش تبجين؟
هتان : ما بيه
جسار : رمانه بلا چذب
دحگيلي و احجي صاير شي زاعجج احد؟
هتان : رمانه منو؟
جسار : انتِ
هتان : شنو رمانه انه اسمي هتان
حتى اسمي نسيته؟
جسار : لا ، بس شكلج يذكرني بـ الرمان
عكدت حواجبي مفاهمه
جسار : النمش و كل ما اشوفج وجهج احمر
ما اعرف اتذكر الرمان من اشوفج
او من اشوف الرمان اتذكرج يعني نفس المعادلة
ظهرت ابتسامة خفيفة على طرف شفتي
هتان : بس الرمان يشبهونه لـ الشي الحلو
جسار : ليش انتِ شي مو حلو؟
هتان : ما اعرف
جسار : يلا ما دامج تگولين عن روحج مو حلوة
فـ مو حلوة بعد ما اشبهه الرمان بيج
ضحكت و حجيت اجر الكلمه
هتان : جَســار
ابتسم و حجا
جسار : شبيج؟
هتان : مابيه شي
جسار : مو عليه هالسوالف
هتان : ما اريد احجي
عگد حواجبه بـ استغراب
دحگت بـ وجهه ساكته
گمت بـ هدوء من كدامه ، ردت اطلع
هو ما يعرف انه شنو احس بـ داخلي اله
يعرفني كـ صديقة و بس
اما نور من كد ما يحبها من نظراته واضح
بـ المستشفى صار عدها ألم ركض الها
ظل حاير بيها ، تعابير وجهه لمن شافها متأذيه
انگلبت گلاب ظل خايف عليها
لمن نقلوها لـ الغرفة ترتاح
رحت اشوفها و اتطمن عليها لگيته يمها
و يعرض عليها يتحمل مسؤولية الطفل
اذا هي وافقت ، و طبعاً رفضت يلي گاله
اتوقفت بـ مكاني من سمعته يگول
جسار : هتان اوكفي !
دحگت بـ وجهه لمن اتقدم وكف كدامي
صدرة كدام وجهي ، رفعت نظري دحگتله
ما كدرت اضم غصتي اكثر بجيت
دموعي تنزل عشرة عشرة على خدي
ارتبكت نظراته الي ما فاهم ، قبل لا يحجي حجيت
هتان : الله يخليك عوفني
رجف صوتي ، بجيت بـ شوغه
هتان : انه ما ردت ما مر بـ طرف بالي
بـ يوم هيج رح ينحرك گلبي على شخص
جسار : شصاير بس فهميني
عليمن كل هذا البجي !
هتان : غلطت
جسار : بـ شنو غلطتي شصار ؟
فهميني شنو الغلطتي بي ؟؟
دحگت بـ عيونه جسمي يرجف
و عيوني تغوش من الدموع يلي بيها
حجيت اغبى كلام ممكن رجال مثل جسار يسمعه
هتان : غلطت و حبيتك ...
تعابير وجهه بقت ساكنه كم لحظه
و تحولت لـ الصدمة و الدهشه بـ كلامي
عبرته ، مشيت امسح بـ دموعي و ارجع ابجي
وصلت يم باب السطح ، انداريت دحگتله
على نفس وگفته ،
دار وجهه بـ هدوء دحگلي
تعابيرة نفسها توحي صدمته
مسحت دموعي النزلت على خدي ،
نزلت بسرعه من يمه ...
****************
- يتبع الفصل التالي اضغط على ( رواية جرح الأيهم ) اسم الرواية