رواية جرح الأيهم الفصل الثالث 3 - بقلم أيلان
"الجُــرح الثالث"
-مُبعثر و لا أعلمُ إلىَ أين يقودنيّ ضياعي .
اتجول بالممرات
خطيت خطوات بهدوء تام
دخلت ، دحگتلها كدامي
على اطراف شفايفها ضحكه
قهقة تصدر منها تسبب الازعاج
تقدمت عليها بهدوء
ابتسمت بطرف شفتي
رفعت ايدي مسحت على شعرها بخفة
دحگت للخصلات شعرها البني
يلي راح تتكطع بأيدي بعد دقايق
حولت ايدي على مؤخرة راسها
تعابيرها الي تبث الاستغراب توضحت
بلحظة شديت ايدي على شعرها
جريتها منه صرخت بألم ...
نور :- دخلت للصف فتحت الجنطة
طلعت دفتري ادحك الجدول
اثناء ما اقرا الجدول
رفعت راسي على صوت خطوات سريعه
دحگت لـ هلال يلي واكفه تتنفس بصعوبه
و تأشرلي بأيدها
نور : شكو؟
قطعت بالكلمة و نطقت : الحكي .. مُلاذ
فتحت عيوني بوسع
هديت الدفتر من ايدي
نور : شبيها؟؟؟
غمضت عيونها تحاول تتنفس
ركضت طالعه من الصف
رحت على صف مُلاذ
استمع لـ اصوات الصريخ العالية
رجت الممرات رج
على اثرها اتجمعت كل الشعب و كل الصفوف
دخلت من بينهم دحگت لـ مُلاذ
يلي لازمه شعر سُرى ، تجره بأيدها
تصيح عليها
ايد مُلاذ محاوطة فك سُرى
و منبته اصابعها
رحت عليها و احاول افك سُرى من ايدها
نور : مُلاذ ابوسسس ايدج عوفيهاا
مُلاذ رح تجي المديررررة
مُلاذ : خليهاااا تجيييي
سُرى : وخريييييي اخ شعرررري
جن جنونها و صرخت بوجهه سُرى
مُلاذ : اكطعيييي صوتججج
البنات اتجمعن كلهن وياي
بعد ما طاحت مُلاذ فوك سُرى و تضربها
اتوسل و اريد بس اخلص سُرى من ايدها
البنات كلهن وياي و ما كادرين عليها
استوقفنا الصوت الصاخب يلي اجا من ورانا
و الي نطق بـ اسم مُلاذ
استمرت مُلاذ تضرب سُرى بلا اي اهتمام
تقدمت المديرة ، رفعتها من زندها تسحل بيها
و تصيح عليها
كامت مُلاذ بكل هدوء ، ايديها حمر
سُرى بالكاع شعرها حاله حال
خراميش على طول رگبتها و وجهها
جرت المديره مُلاذ من زندها ، تصرخ بوجهها
المديرة : انتهتتتت بعد راح تنفصلين فصل تامممم
بلاء اسووود ، من يوم لفيتي لهالمدرسة احنا ما مرتاحين!
اخذتها للادارة دخلت مُلاذ
و انا اتوسل بالمديرة نخابر امها
رفضت رفض قطعي
دخلت و سدت الباب بوجهي
مُلاذ :- رفعت نظري للمديرة
يلي صايرة نار و شرار و صراحةً ما مهتمه
المديرة : رح احولج لـ لجنة الانضباط
هذاااا حدج و خلص
دخلت المعاونه
تدحگلي بنظرات غضب
المعاونه : ماما شبيج انتِ ؟؟؟ شوكت تعقليين
هسهه خطية امج كل يوم جاية تتوسلل!!
نطقت بـ هدوء : ما سويت شي
ضربت المديرة الميز بأيدها
و صرخت بوجهي : شنو الما سويتييييي!
عكدت حواجبي رفعت ايدي حكيت حاجبي
نزلتهم و تجتفت
المعاونه : ليش ضربتيها هالمره؟؟
هذيج المرة گلتي هي ضربتج
القبلها گلتي ضربت بت عمج
و القبلها گلتي باكت فلوسج و قبلها هواي
هالمره ليش ؟؟
المديرة : يمعوووده دعوفج كلها حجج !
رفعت نظري دحگتلها
رجعت دحگت للمعاونه
بنفس الهدوء و البرود : غلطت على ابوي
ضحكت المديرة ، هزت بأيدها
راح نظري على القلم طردت افكاري من راسي
و علت شفتي ابتسامة خفيفة
دحگتلي المديره فارت اعصابها
المديره : على شنووو تضحكين
على صخام وجهجج؟؟
رجعت كذلتي ورا اذاني
مُلاذ : الحمدلله وجهي ابيض
المعاونه : مُلاذ !
نفخت بضجر ، رفعت راسي
دحگت للـ سكف ، نزلت راسي
طكيت رگبتي شبكت اصابيعي ببعض و طكيتهن
المديرة قريبة سُرى
كم مره كانت شاهده على مساوئ سُرى
لَكن التزمت الصمت اتجاهها ، بس حاسبتني
بهالحالة لازم احد ياخذ حقي
سابقاً ابوي جان ياخذ حقي مربع
اما حالياً لا ابوي موجود و لا الاحد موجود
لذالك امشي على مبدأ
" اسند نفسك على نفسك
و اكتل الكدامك المهم تاخذ حقك "
المديرة : راح اخليها تتصافى وي لجنة الانضباط
المعاونه : على بختج ست تدرين بوضع امها
وين تتحمل المره هذا الهم بالله فصلوها و ما نقلوها ؟
المديرة : ما فكرت هييي!
المعاونه : ست بس اهدي ، اكو حلول اخرى
المديرة : وينها الحلولل؟؟ وينها
تشوفين بقت هي حلول ؟
دارت وجهها الي
و رفعت اصبعها تهزه بوجهي : جبتي نهايتج بنفسج
دحگت اصبعها و دحگتلها
المعاونه : ست خل ننقلها
المديرة : المدارسسس ما تقبلها انا متأكده
من يشوفون كله علامات اكس على اسلوبها
يغسلون ايدهم
حكيت ارنبة خشمي
و مسحته رفعت ايدي دحگت المعاونه : ست
المعاونه : كولي
مُلاذ : اكدر اطلع ؟
خزرتني المديرة ابتسمت : اريد اروح للحمام
المعاونه : اطلعي لا ترجعين روحي لصفج
المديرة : ام مصطفى !!!!!
المعاونه : ست رجاءاً
وكفت ، اتجهت للباب اطلع
صرخت وراي
المديرة : صدكيني افصلج
حتى ما احولج لجنة انضباط
و لا اخلي اي مدرسة تقبلج!
عرفت هي فاتحة و خسرانه
گلت ما اخليها بنفسي
-سوي الي تريدينه و لا تقصرين
تركتها خلفي تصرخ اسمي بـغضب و طلعت ..
لكيت نور كدامي
عيونها مورمة
اجت عليه بسرعه : شصار مُلاذ ؟ ها ؟ حاجيني
مُلاذ : عليمن تبجين ؟
نور : عليج
مُلاذ : نور
نور : ها
مُلاذ : انا بسيارة اسعاف؟
نور : اسم الله
مُلاذ : جاوبي
نور : لا
مُلاذ : انا بسيارة تابوت؟
نور : اسم الله ، لا
مسحت خشمها بايدها
عيونها مدمعه
مُلاذ : انا بالكبررر؟؟
نور : شبيجججج لتحجين هيج اسم الله!
مُلاذ : على شنو تبجين لعدد
نور : خاف يفصلوج
مُلاذ : عادي
درت وجهي امشي و تمشي هي يمي
نور : شلون عادي و الله خاله فيروز تموت
مُلاذ : بلا مبالغة ، محد يموت لان انفصل ابنه
نور : من قهرها!
مُلاذ : عليمن قابل بس هاي المدرسة
خلصت المدارس؟
نور : اذا تتعاركين بغير مدرسة
يفصلونج گبل
هنا صابرين عليج علمود امج
مُلاذ : رح يفصلوني اصلاً
و انا ما اتعارك هم يتعاركون وياي
نور : شنووووووو!
باوعتلها بطرف عيني : لا تبالغين
درت وجهي و طلعت للساحه
نور طلعت وراي تمشي و تدردم
نور : شنو الما ابالغ مُلاذ گلبي رح يوكف
مُلاذ دحگي و الله خاله تموت امشي اعتذري
وصلت للحمامات فتحت المي
غسلت ايديه ، مسحت المي يلي بأيدي على رگبتي
نور : مُلاذ .. مُلاذ
تفتر بمكانها تصيح مُلاذ و تكمز بخفة
و تبجي وكفت مسحت دموعها و رجعت تبجي
طلعت من الحمامات
فليت شعري ، سندت ظهري على الحايط
نور مستمرة تكمز بمكانها
مُلاذ : نور دخت كافي
نور : اذا فصلوج شلوووون ما تفكرين انتِ!
مُلاذ : لا
نور : مُلاذ ترا دتلعبين بحياتج !!
مُلاذ : ما سويت شي
نور : ضربتيها مُلاذ اخذوها للمستوصف تدرين؟؟
مُلاذ : عاشت ايدي
نور : رح اضرب راسي بالحايط
مُلاذ : اضربي
وكفت و صفنت عليه
مُلاذ : ههههههههه
نور : حبابه اعتذري
مُلاذ : شعتذر المديرة قفلت
نور : شهالبرود؟
مُلاذ : ادك و الطم؟
نور : مستقبلج حيروح مُلاذ
مو ردتي تصيرين محامية!
مُلاذ : امي ما تخليني اصير محامية
و انتِ گلتي مستقبلج ردتي تصيرين محامية
و انا مراح اصير عليمن بعد؟
دك الجرس دخلت الصف
نور على نفس الونه
شلت جنطتي و طلعت
و احنا نتجهه للباب الخارجي نور تسولف
نور : لا تگلين لخالة فيروز
مُلاذ : اول و تالي تدري
نور : رح اشوف بابا بلكي يحاجيها و تقبل
مُلاذ : ماكو داعي
وصلنا الباب
نور : تجين وياي ؟
مُلاذ : جؤ
نور : ليش؟؟
مُلاذ : مالي خلك اتحمل اسكندر و سوالفه هسه
نور : مُلاذ ترا خطية و الله
وكفنا يم سيارة اسكندر
دحگت لـ اسكندر من الجامه
و رجعت دحگت لـ نور
-نور
-كولي
-اتسرسحي
-مُلاذ
-يلا نور يلا روحي
درت وجهي امشي بسرعة لمن دحگلي
حظي السخيف خلاني ما لحك ابتعد
صاح وراي : مُلاذ
وكفت مكاني مسحت كصتي بـ كف ايدي
التفت دحگتله
مُلاذ : هلو
تقدم عليه ايده بجيبه : هلا بيج
سكتت هزيت راسي
اسكندر : شفتيني و ما سلمتي
مُلاذ : عندي مشكلة بالنظر
اسكندر : خيرج؟؟؟ خو مصاير شي ؟
مُلاذ : لا حول بسيط ينحل بعملية
اسكندر : حوليش انتِ يمتى حوله ؟
مُلاذ : حول داخلي اشوف الضيم مرتين باليوم
انفجر من الضحك
متجتفه و اباوعله ملامحي جامدة
ما ادري انا نفسية لو هو تافهه
اسكندر : و الله يا مُلاذ عدج سوالف
مُلاذ : اي و الله يا اسكندرعدي سوالف يلا مع سلامه
درت وجهي و مشيت بسرعه
وصلت كدام محل ملابس
دخلتله طلعت ملابس من الجنطة لبستهم
حطيت ملابس المدرسة بالجنطة سديتها
لبستها بظهري و طلعت
رحت لـ محل ورد
اخذت ١١ ورده فلوسي ماكفن
مشيت على الجسر لميت شعري كبايه
خليت الكلاو مال قمصلة على راسي
امشي و اقدم الورد لمن اشوف ازواج
بعضهم ياخذون و بعضهم لا
قدمت ورده لـ اثنين دحك لحبيبته بكل حُب
الولد : انا عندي وردة شسوي بالورد الباقي بعد
ابتسمت البنيه خجلانه
و صوتي الداخلي يكول
" بطل هالدروب و اشتري وردة "
مُلاذ : يعني؟
الولد : يعنننني ..
دحك للبنيه ساكت و هي تدحكله و انا منتظرة
عفتهم و مشيت صاح وراي : يـ بنيه دوكفي
التفتت اله اشترى وردة
درت وجهي و كملت مشي
بعت الورد باقصى سرعه
لان قرب وقت رجعتي للبيت
حطيت الفلوس بـ جيبي
و ركض من الجسر للبيت
وصلت للباب فحطانه و الهث
دخلت اتخنس سديت الباب بهدوء
تقدمت مديت راسي للمطبخ
لكيت امي واكفه بالمطبخ
عبرت بسرعة و طفرت لغرفتي
بدلت و طلعت من الغرفة لكيت امي بوجهي
دحگتلي بنظرات الشك
فيروز : شوكت اجيتي ؟
مُلاذ : قبل شويه
فيروز : ما سمعت الباب ؟
مُلاذ : طبيت من الشباك
عكدت حواجبها مفاهمه
صحكت و گلت : اتشاقة
مُلاذ : مشمش وين ؟
فيروز : هسه راح اطلع اجيبها
مُلاذ : انا طالعه اجيبها
فيروز : لااا ذاك اليوم كاتله الجاهل بالشارع
اسكتي و اكعدي
مُلاذ : ما كتلته؟
فيروز : لعدد تشاقيتي ويا؟؟
مُلاذ : بس ضربته راشديين و جلاق ؟
سويتوني كاتلته
فيروز : يمه مُلاذ شوكت تعقلين؟
مُلاذ : من تمطر صخول ، يلا فوفو انا رايحه
تنهدت امي ، رجعت للمطبخ
دخلت لغرفتها
حطيت الفلوس بـ جيب جاكيتها
طلعت لبست قمصلتي
رحت على مشمش للمدرسة
الجهال يلعبون طوبة بالشارع
انضربت ببطني خزرتهم ، خنسو
باوعت لـ بنية وكفت على صفحه تخاف مني
عبالك شايفه بعبع
هو بس مره صيحت عليها
لان سحكت رجلي بالبايسكل عفتهم و مشيت
وصلت للمدرسة
لكيت ملاك واكفه بالباب
شافتني فرحت واجت تركض عليه
مُلاذ : اشش لا تنجبحين
كمزت بفرح
ملاك : ميمييي
ابتسمت و كمشت ايدها
نمشي انا وياها و هي تجفص بالطين
روحي صارت بخشمي
تدمر روحها طين و تدمرني
عطت
مُلاذ : ملاك كافي دمرتي روحج!!!
سكتت و كامت تمشي بهداوه
اسمعها تناشغ دنكت عليها
منزله راسها و تبجي
ظليت امشي شوي و تنهدت
مُلاذ : مشمش
ملاك : امم
مُلاذ : لا تنوصين كولي ها
ملاك : ها
مُلاذ : ما يصير تطبين بالطين تتدمرين
ملاك : ليش تصيحين عليه
مُلاذ : ما صيحت
رفعت راسها باوعتلي
ملاك : صيحتي
مُلاذ : ما صيحت بس عليت صوتي ..
ظلت تسولفلي عن صديقاتها
طول ما احنا نمشي ، قاطعتها
مُلاذ : عندج يوميه؟
ملاك : اي
وكفت يم محل
مُلاذ : زين ضميها
هاج هذا الالف ادخلي اشتري
كامت تكمز فرحانه
مُلاذ : ملاك
سكتت و دخلت
ظليت انتظرها تاخرت كلش
حتى اليشتري عرصة ما يتاخر هيج
طبيت وراها : ملاك
دورت عليها لكيتها صافنه بالنساتل
مُلاذ : شجاي تسوين؟
ملاك : ها
مُلاذ : شجاي تسوين؟
ملاك : ماكو نساتل
مُلاذ : لعد ذني سمنت ؟
ملاك : مو طيبات
مُلاذ : ضايكتهن؟
ملاك : لا
مُلاذ : لعد شمدريج مو طيبات؟
ملاك : شكلهن مو حلو
مُلاذ : ملاك اكو مثل يكول
"لا تحكم على النستله من غلافها "
سمعت صوت وراي
- بس المثل غلط جان "لا تحكم على الكتاب من غلافه"
انداريت دحگت للطفل القزم دوم اشوفه
و اصيح اله شمشون
مُلاذ : شمشون
- اسمي صادق مو شمشون
مُلاذ : ليش مو كاذب ؟
- شنو؟
- سلامتك ، دحك المثل الگلته غلط
الصحيح لا تحكم على النستله من غلافها
انداريت على ملاك
مُلاذ : ملاك يلا هسه امي عبالها مخطوفين
اشتري مثل كاذب هو عايش بالمحل يعرف الطيب و المو طيب
صادق : انا مو كاذب
مُلاذ : انت شمشون
صادق : انا صادق
مُلاذ : و انا كاذب
خبلت الجاهل اخير شي
صارت الدمع بطرف عينه
يحلف و يتكفر هو مو كاذب
ما فاهم السالفة شنو
اشترت ملاك و طلعنا
وصلنا للبيت
لكيت امي واكفتلي بالطرمة
و متجتفته بوست امي مشمش
اجت عليه جرت الكلمة
امي : مُـــلاذ
مُلاذ : فَــيروز
خزرتني و طلعت الفلوس الحطيتهن مساع : شنو هاي؟
مُلاذ : فلوس
فيروز : مُلاذ
مُلاذ : بقشيش؟
فيروز : مُلاذ
مُلاذ : دراهم؟
عاطت بيه : مُلاذ شنووو هاي ؟
رجعتي تشتغلين مو؟
مُلاذ : اي عفية بس انا ما حطيتهم حتى تعرفين
انو رجعت اشتغل ، يلا حبل الكذب قصير
فيروز : مو منعتج اني ؟
مُلاذ : ما منعتيني كلتيلي ما تطلعين بعد
خزرتني و عاطت : كافي سخافة
مُلاذ : ما متساخفه
فيروز : مُلاذ راح تخبلينييي !!!
مُلاذ : لا تبالغين فوفو
محد يتخبل لان ابنه اشتغل
خزرتني و گالت بحده : طبي جوا
طبيت للبيت طبت وراي
فيروز : مو منعتج انااااا؟؟؟؟
مو گلتلج بعد ما تشتغليننن
و تركزين على دراستجج!
مُلاذ : ما عدي مدرسة بعد اكدر اشتغل
وكفت بوسط صياحها
مصدومة
فيروز : شنو!
مُلاذ : تعاركت و رح يفصلوني يمكن
اطلب الانتباه الى كلمة يمكن
دكت امي على صدرها و شهكت
فيروز : مُلاذ شوووووكتتت؟؟؟
شسويتييي ؟ ليششش تعاركتي ؟
احجيي ليش ساكته؟
مُلاذ : تعاركت وي سُرى و ضربتها
اخذوها للمستوصف و المديرة كالت
فيروز : يمه گلبي
كعدت على القنفة تدحگلي
عيونها نار صارن
رجعت كامت مره ثانيه تصيح عليه
فيروز : ليشششش هيج تسوين بيه؟؟؟
ليش ما تقدرين تعبي ليش هيج تاذينيي؟؟؟
المفروض تساعدينيي بغياب ابوج !
التزمت الصمت
فيروز : لـ شوكت تظلين بهذا العناد!
ما تشوفين تعبيي ؟ ليش تتعبيني اكثر ؟؟
لو ابوج موجود جان سويتيي هيج ؟
مُلاذ : جان سويت..
فيروز : و لاااا حجايه
تتعاركين بالمدرسة مثل الطفلة و تسوين مشاكل
استاااهل هيج تسوين بيههه جزاتي هاي و تعبيي
رحتي تشتغلينن بكيفج بشنوو مقصرة وياج؟؟
مو گلتلج اهتمي بدراستج عوفي المشااااكل
عدت و كررت عليج عوفي المشاكل ركزي بدراستج
بجت وهي تصيح
فيروز : هااااي جزاتيي
شوفي ايديه شوفيهن
شلون مزرفات من الابرررره
بس حتى اكدر ادفع الدين
حتى ترتاحين انتِ و اختج
حتى تشرق الشمس عليجن و انتن...
توقفت عن الكلام لمن لزمت ايديها بـ ايدي
دنكت بست جفوفها رفعت راسي دحگتلها
مُلاذ : انا شمسي غابت وي غياب إلياس
خل تشرق شمسكم
دمعت عيونها
لزمت ايديه
فيروز : مُلاذ ليش يمه ؟
ليش هيج تسوين بيه ؟
ليش ورا موت ابوج تغيرتي؟
ليش صرتي ما تسمعين الكلام ؟
مُلاذ : ما مسويه انا
هم يجبروني اسوي
فيروز : منو الي يجبرج ؟؟
مُلاذ : الناس ، تصرفاتهم
تجبرني اتصرف بالطريقة الي يستحقونها
فيروز : يمه سلميهم بأيد رب العالمين
شجاي تشتغلين ؟
مُلاذ : ابيع ورد
فيروز : مُلاذ !!
مُلاذ : زين هسه انا ما اشتغل و انتِ تخيطين
باليوم شكد ينطوج ٢٠ الف؟ شتجيبين بيهم؟
مسواك ؟ قرطاسية ملاك؟ ملابس ملاك؟
راتب ابوي يستقطعون منه و ما جاي تلحكين
شنو تدفعين بالضبط ؟
تدفعين الايجار ما تدفعين المولده
تدفعين المولدة ما تدفعين الكهرباء و المي
ما عدنا نفط احناا حتى تتدفى ملاك !
تريديني اظل متجتفه و كاعده؟؟
فيروز : شنو يفيدددد؟
شنو يفيد شكد تحصلين باليوم ١٠ الاف؟؟
مُلاذ : اشتغل شغلتين
سيد محمد يبيع كلنس ابيع ويا
دكت على وجهها
فيروز : ليشش ليش تبيعين كلنس بيش مقصرة ؟؟
مُلاذ : شبي الكلنس ؟ يبزز ؟ مو نستخدمه
فيروز : مُلاذ ما تشتغلين بعد و انتههههى
مُلاذ : اسوي كلشي و احصل فلوس
لا تتوقعين اعوف امانة ابوي تختض و تتخبط وحدها
عفتها و كمت مشيت خطوتين و التفتت الها
مُلاذ : لا تشغلين بالج بسالفة لجنة الانضباط
عادي انقل لغير مدرسة ، ما اشتهي غدا
درت وجهي و رحت للغرفة
دخلت سديت الباب بظهري
امي ما تخلي ملاك تنام وحدها
حولت جرباية ملاك يمها و ينامن سوا
و انا بقيت بغرفتي
كعدت بالكاع امسح كصتي بخفة
و يتسلل من البرده الضوا
جسمي احتر و ايدي امسح بيها على كصتي
احاول اهدي روحي
زحفت بالكاع كعدت يم جربايتي
فتحت الميز يلي يم الجربايه
طلعت الصندوق فتحته
دحگت بداخله ابتسمت بقهر
مُلاذ : يا كسرة ظهري الما بعدها كسره
طلعت ملابسي من الصندوق
يلي لبستهم بيوم وفاة ابوي قبلها كان حاضنني
و ريحته باقيه بيهن
رغم راح عطرة منهن
بعد مرور كل ذيج السنين
بقى بيهن ريحة شبهه باهته و مختفية من عطرة
اشمهن كل قوتي
بس حتى يوصل لنَفسي و لو شويه من ريحته
صار بيهن دم ابوي و لامات ريحته
حضنتهن لصدري تمددت بالكاع
طلعت صورة من الصندوق
ابتسمت ادحگلها بايس خدي حيل بيها
و انا مبتسمه بالصورة
رفعت نفسي من الكاع
مديت ايدي بداخل الصندوق
طلعت النستله دحگتلها : الچتال
من بعد يوم وفاة والدي
ما انمحى اسم الچتال من بالي
رغم وجدت صعوبة بتذكرة بالبداية
لكن الان الاسم يلي ما راح يفارق عقلي و ذاكرتي
مُلاذ : الكاك لو بعد عشر سنين
رفعت راسي مسحت وجهي
حطيت الاشياء بالصندوق و رجعته لمكانه
تمددت و ظليت صافنه بالسكف
لحد ما نعست و نمت
حسيت على ايد تمسح شعري
و الصوت يلي يتردد بأذني
: فيروزة إلياس و ملاكه بأمانتج
:انتِ تصونين الامانه
انمسح على شعري بأيد حنينه و انا مغمضة
همست : بابا
اجاني صوته : اروح فدوة و نذر للـ بابا
رجع اتردد صوته : مُلاذي بنتي الحلوة
دمعت عيوني و انا بوسط ظلمة : يابه ليش عفتني
صارت الفراشات تتطاير
و ايد مستمره تمسح على راسي سكنت روحي
-انا ما عفتج انا وياج يا لذة إلياس
فجأه انفجر صوت الرصاص و تكرر بأذني
شهكت و فزيت
كعدت العرك يصب من كصتي
نزلت ايدي دحگتلها ترجف
كمشت بالحايط رفعت نفسي من الجرباية
امشي و اعثر فتحت الشباك
اختنكت بس اريد اشم هوا
حطيت ايدي على شعري
اخذت نفس عميق زفرته
نفس كل مره احلم هالحلم اكعد روحي رايحة
لفحت نسمة هوا باردة بوجهي
مُلاذ : يا جَـرح مُلاذ ..
ثاني يوم بدلت و داومت
وصلت للمدرسة
اجت المعاونه للصف
المعاونه : مُلاذ تعالي
رحت وراها دخلت للغرفة دخلت وراها
المعاونه : اكعدي
تقدمت كعدت على القنفه
احترم المعاونه لان صديقة امي و تحبني
و اكثر من مرة گالت للمديرة كلامي صحيح
لكن المديرة انطتها الاذن الطرشة
المعاونه : ماما هاي اخر مرة
اطلب من المديرة تتهاون وياج
ابتعدي عن المشاكل ابتعدي عن سُرى
الي سويتي عليه عقوبة و عقوبة جبيره هم
لكن انا عاذرتج و اعرفج
بعدج صغيرة و متحملة مسؤولية اكبر منج
- ست انا من الاول ابتدائي لحد الان
ما فد يوم افتعلت مشكلة من وحدي
اي عركة تعاركتها وي سُرى
هي بسبب فعل صدر منها اتجاهي
المعاونه : تدرين اهلها مشتكين عليج ؟؟
الاهالي يريدون ننقلج لان عبالهم تاذين اطفالهم
و مدرستنا رح تنتهي بشكوة وحده للتربية
-حتى لو ما سويت شي سُرى رح تفتري عليه
و تجذب و محد راح يصدكني
-زين انا راح اتفق وي المديرة نخلي مراقبة
هاي المراقبة تفتر وراكم في حال انتِ مالج علاقة
و سُرى سوت شي هي رح تكون شاهده
-تمام
-يلا ماما روحي و طمني امج
خطية المرة اجت من الصبح تتوسل
غمضت عيوني و زفرت نفسي بغضب
ليش تتوسل !! استاذنت و طلعت
نور : ها شنو شكو گالو انتِ بالادارة ؟؟
مُلاذ : ماكو مراح يفصلوني
و لا يحولوني لجنة انضباط
كمزت نور بفرح
نور : ابوس اسكندرررر
دامشي و استوقفتني كلمتها : شنو؟
نور : هـ .. ها؟
قلصت عيوني و گلت : اسكندر شعليه ؟
نور : شنو منو كال اسكندر ؟؟
-نور !
-دحگي اهو الله ياخذ لساني دحگي
و الله ما سويت شي بس سئلني و جاوبته
و الصبح جاي محاجي المديرة علمودج
مُلاذ : عفوووواً ؟
-ترا ابن عمج و اذا ساعدج؟؟
مُلاذ : نور اسكندر يدور فرصه
حتى يگلي سويت فلان شي علمودججج !!!
و يريد مقابل مني هالشي عشته من قبل و شفتتت
-ليش تفكرين بـ اسكندر هيج؟؟
-لان هو هيج ، اخوج هيج
-مُلاذ جاي تجرحيني بكلامج و ظنونج هواي
عافتني و راحت صحت وراها : نور!
كملت نور مشي و طلعت للساحه
رحت للصف كعدت برحلتي ادحگلها
كاعدة وحدها و بايدها عود تمشي بيها ع الكاع
فززني صوت سُرى
سُرى : بفضلي ما رح تنفصلين ههههه
دحگتلها
مُلاذ : هاي طلعت بفضل الناس كلها مراح انفصل اسويلكم ثواب من تموتون عود
سُرى : مُلاذ ما تصحكين ابداً
مُلاذ : سُرى اني ما اريد اضحكج ابداً
كلت مستهزئه : هاي شنو وجهج شصاير بييي ؟؟
شنو متعوره ؟
ضحكت و رجعت گلت : ها تذكرت انا كتلتج
ظلت تكولب بعيونها
سُرى : على الاقل ابوي ما ميت
مُلاذ : شنو جلدج يحكج ؟
سُرى : ههههههههههه
كمت و وخرتها من كدامي
شلت جنطتي وياي و طلعت للساحه
كعدت يم نور
مُلاذ : دحگي
ظلت ساكته متحاجيني
مُلاذ : نور انتِ تدرين ترا !
اخر مره اسكندر سوالي فضل
طلب مني اكون حبيبته!
من رفضت ظل يعيرني لان بقاني بالمدرسة
و تدرين بهالشي
نور : مُلاذ اخوي هو ، كبر و تغير
مو مثل قبل هوَ !
مُلاذ : صدكيني الكل يتغير الا اسكندر
نور : شمسويلج ليش هيج ما متقبلته؟
مُلاذ : اخوج يريد يتحكم
و انا مو الشخص الي يتحكم بي
نور انا و اسكندر ابد ما نرهم
اتمنى يحب وحدة ثانية
و يشيلني من باله و يكطع الامل مني
نور : ترا هو حنين ؟
مُلاذ : وين حنيته ؟؟
ذاك اليوم اجيتي حاجبج مشكوك من ورا !
هاي حنيه ؟ هذا اسمه مرض
يشك بكلشي و يتدخل بكلشي و يتحكمم
نور : انتِ هسه دتراضيني لو تزيديها؟
مُلاذ : نور انا ما اكدر اگلج لا
و اخوج فعلاً حنين
و ماعرف شنو انا الاشوفه اكوله
نور : مُلاذ ترا الحب حلو ليش هيج كارهه الناس؟
مُلاذ : ما كارهتهم مجرد اكو ناس ما تدخل عقلي
انا وياهم نختلف
نور : يعني هسه حبي لـ اركان مرض؟؟
مُلاذ : ابداً حبج لـ اركان
يختلف عن حب اسكندر الي تماماً
اسكندر يريدني حتى يتحكم بيه
و يفرض روحه عليه ، يكون هو المنتصر
اما انتِ حبيتي اركان بكل هدوء
من دون ما تاذينه من دون ما تكرهي بعيشته
انا اسكندر شافني احاجي ابو المحل
راد يحركني ! و صدكيني ما مهتمه
لو شما يسوي لو مو يحركني ماله حق بيه
و لا راح يميل گلبي اله
مسحت وجهها و ظلت ساكته
دحگت لجنطتي : شتسوين جايبه جنطتج للساحه؟
-سُرى الفرخه تفتر على رحلتي
تريد تسويلها دكه و انا خصمتها و جبت الجنطه وياي
نور : ههههههه
نور:- مرت الدروس
طلعت من المدرسة ودعت مُلاذ
و هي راحت بسرعة صعدت بالسيارة
دحگت ل اسكندر
نور : هلو
بلا ميدحگلي و عيونه تراقب من الجامه
جاوبني : هلا بيج
نور : يلا خل نروح ليش بعدك واكف؟
-مُلاذ وين؟
- راحت من زمان
ضرب الستيرن فزيت و دنيت روحي
اسكندر : ليش ما خليتيها تجيي؟؟؟
- هي ما تريد
ظل يسب و يغلط و يمشي سريع
باوعت لايدي ترجف حطيتها تحت رجلي
بلعت ريكي و ظليت ساكته منطقت بحرف
وصلنا للبيت
فتحت الباب و نزلت من السياره
اول منزلت انفتحت باب بيت اركان
بعد ما ساعدتهم بيبي بجزء من فلوس ترميم بيتهم
اركان حاول يشتغل رغم عنده رجل وحدة
و بعض المبلغ يلي ضامه هو و مجمعه
طلعه و كمل بي ترميم البيت
رجف گلبي لمن شفته طلع من الباب
دحگلي و نزل عينه بسرعه
درت وجهي و دخلت جوا بسرعة
يسري بكل گلبي شوق اله
و لضحكته قبل يلي اختفت بعد القصف
و بعد ما خسر رجله و وحدة من اخواته بحادث
دخلت للغرفة و دخلت امي وراي تعيط عليه
-تعالي حضري الغدا وياي بسررررعه
-هسه جايه بس ابدل
بدلت بسرعة و رحت احضر الغدا وياها ..
مُلاذ :- وكفت ابيع ورد
و جمعت اكثر من البارحه
رجعت افتريت على المحلات
ما يقبلون الي بعمري
و الي يقبلون تكون نيتهم قذرة
رحت على سيد محمد
هو مو سيد بس انا اصيحله هيج
واكف بالشارع يبيع كلنس
لكيته كاعد ع الرصيف
رحت اشتريت باكيتات كلنس
انطيتهن اله حتى يبيعهم ، ما قبلهم بالبداية
بس بعدين اخذهم
مريت من يم محل اشتريت حلويات لـ ملاك
و الباقي حطيته بجيبي
رحت على ملاك اخذتها من مدرستها
رجعت للبيت هستوني فتت بفرعنا
دحگت لـ امي يلي واكفه بالشارع
حوليها الجوارين ، تبجي بصوت عالي
و غراض البيت مرميه بالشارع !
"أتنهَدُ
والعمرُ بي يتوقَدُ
وجعِي ملاذٌ آمن، روحِي به تتمدَدُ
دار الزمان مكانهُ وكأن موتي الموعِدُ
ماذا بقى في أضلعِي؟
لاشيء، كُلّي موصَدُ"
الكاتـِبه : أيـلان
حساب الانستا للتواصل : l.1ll8
مُلاذ :-
وكفت متجمدة و مصدومة بمكاني
ركضت ملاك على امي ، ركضت وراها
مُلاذ : شصايررر؟
الجوارين يواسون امي
و هي تبجي
مُلاذ : فهمونييي
فيروز : ابو البيت طلعنا
عكدت حواجبي
مُلاذ : شلون شلون ؟
اهتز جسم امي تبجي
نار شبت بصدري شهرين بس تاخرنا عليه
و جنت اجمع فلوس للايجار
كنبصت و كعدت كدامها
كمشت ايديها بين ايديه نزلت راسي على ايدها
باوعت لمعصمها صاير احمر
مُلاذ : ايدج ليش هيج؟؟
فيروز : عوفيها مُلاذ وين نروح ؟؟
دنكت تبجي و تهمس بادعية الفرج
مُلاذ : يمه حاجيني ايدج شبيهاااا!
فيروز : ابو البيت جرني منها يطلعني من البيت
لمن لميت الغراض و گلتله بس باجر و اطلع
فتحت عيوني بـ وسع
حسيت نار صارت تطلع من عيوني
و انا اشوف امي تبجي بسببه
و ايدها حمره و ماذيها
كمت وكفت : ابو البيت !
ظلت ساكته ، دموعها تصب
شمرت جنطتي بالكاع
و رحت مشي لـ بيته
فيروز : مُلاذ وين رااايحه؟
التفتت دحگتلها
درت وجهي ، كملت مشي
مشيت بكل سرعتي بس اريد اوصل اله
وصلت للبيت
دحگت امي تركض وراي تريد توكفني
و جيراننا يوكفون بيه
دكيت الباب ماكو جواب
رجعت دكيته اقوى
كمشت امي بزندي : ولج يمه مُلاذ عوفييي
مُلاذ : يمه اسكتي
تلزمني تريد توكفني ما ادك الباب
اخير شي دفعت ايدها و ضربت الباب برجلي
صار صوتها عالي
-منوو؟؟؟
-انااا
فتح باب البيت كشولت ملامح وجهي
طالع بس باللباس و الفانيله
مُلاذ : حضرتك مطلعنا من البيت ؟
و فوك ما مطلعنا جار ايد امي و مسويها حمره
-صارلكم شهرينن ما دافعين حذرتكم و ما دفعتو
-جاي اجمع بالفلوسسس
اصبر علينا و ندفع ايجارك
-لا اريد فلوسي كامله
-هيييي شنيههه فلوسك كامللله ؟؟
جاي اكلك جاي اجمع و راح ادفعهن الك
اكو طفلة وين تكعد بهالبرد!
-هذا العنددددي ما عايزكم
صارلي سنيننن ملفيكمممم
فارت اعصابي و ظل يغلط
- انا صوجي كعدتكم صارلكم سنين
تجرون بالايجار جر ناس استغلاليه
رفعت حواجبي : احنا ناس استغلاليين؟
- اي انتوا
عطت بعلو صوتي
-انعل ابو بيتتتتتك لابو حتى اليكعد بي
من حوررره على اساس عسى ينهجم عليك
و لك انت منو وتجر ايد امي و تبجيهاااا
فيروز :-
انفلت لسان مُلاذ فد فلته
اريد الزمها اسكتها
انا و الجوارين ما لحك عليها
حازم (صاحب البيت) يصيح و يغلط عليها
و انا ارده و هي هم ترجع ترده
حازم : ادبسزززز ما مرباييييه
مُلاذ : دمشيييي لك ابو ***
خليتتت التربيه الك بيك خير ما تخون مرتك
طلع من البيت و يريد يضرب مُلاذ
فيروز : حددددك ايدددددك نزلهاااا
التمو عليه الجوارين و مكمشين بي
مُلاذ : من حور بيتك الوصخ
كل يوميه طاكه علينا المجاري
لحد قبل شهرين ندفعلك
تطردنااا من البيت ما استحيت على روحك
ما عدك غيره
و الله الا اخليك تدفع عدال الفلوس الدفعتهن امي
ولكككك انت منوو تبجي امي
شالت حجاره ضربتها ببابهم
لزمتها : ولججج مُلاذذذذ
دفعت ايدي و ايدين الجوارين اللازمتها
شالت حجاره من الكاع
راحت تمشي من الطريق الاجت منه
و انا طاحت رجليه اركض وراها
الشارع كله يمشي وراها يريد يوكفها
و هي رعنه ما توكف
دفعت مُلاذ الباب لكته مقفول
اريد اكمشها تشلبت على الباب و طفرت
فيروز : ولجججج مُلاذ ولج اوكفييي
يمه عزه العزاني صخام الصخمني
كمت الطم على وجهي
و اسمع صوت التكسير الصار
رجليه ماتن اريد اوكف على حيلي بعد ما اكدر
طفر وراها واحد من الجيران
و يصيح بيها يريد يوكفها
دكيت الباب : افتحليي الباب
الولد : ماكو مفتاحح
اجا حازم فتح الباب بمفتاحه
دخل هاجم على مُلاذ
كمشه الولد يلي جوا و لوا ايده
اباوع لـ مُلاذ بايدها توثيه
الجام وي الكاع صاير
الباب مخسوفه
ادحك للنسوان التمن عليها ، انا وياهن
لازمه ايدها اريد اثبتها
هي تريد تهد على حازم
مُلاذ : امييييي محد يبجيهاااا
حازم : و الله لاشتكي عليكم و الجيران شاهديننن
مُلاذ : روح اشتكي انت زلمة
و طالع من ظهر ابوك اشتكي
ماكو ايدك الجريت بيها امي
الا اكسرها و اعلكها بركبتك حيوان سـ ...
سديت حلكها بايدي قبل لا تكمل
انا و النسوان نسحب بيها نريد نطلعها
كوه دخلتها لـ بيت جيراننا
فيروز : كاااااااافي مُلاذ !!
مُلاذ : محدددد يبجيج محد ينزل دمعه من عيونج
ادير نفط عليه و احركه خوششش؟
انا ابوووي ما جان يفرط بيج و يحب عيوني
انعل والديييين الي يبجيهن
فيروز : ولج طركاعه صوتججج
لا تفشرين يمه اخ گلبي كافي اسكتي
يمه مُلاذ بس اعقلي ولج هسه انا وين انطي وجهي؟؟
وكفت لحظات و عيوني تدور على ملاك
فيروز : ملاك !
صحت باسمها لعلها تسمعني
ماكو ما اجا صوتها
مُلاذ : شنوو شبيها ملاك ؟؟
طلعت من البيت
دورت من بينهم
و صرت ابجي : مُلاذ ملاكك ماهيه
خارت كل قوتي
و بجيت من كل گلبي
مُلاذ : شنووو ماهيه ؟
الجيران صارو يدورون عليها
و يصيحون اسمها مالها حس
طلعت مُلاذ تمشي و تدور عليها
انا وراها احتركت اعصابنا حرك
مُلاذ :- التفتت لـ امي
بدا يختل توازنها ، غراضنا بعدها بشارع
مُلاذ : اكعدي بس اكعدي على هاي الصبه
انا هسه ادورها
فيروز : مُلاذ ما اكدر اعيش بدون ملاك
مُلاذ
هي تبجي و مستمره تلحكني
اخاف تطيح و احنا ندور ملاك
و بالي يم ملاك اول مره اخاف هيج
بحيث ايدي و خطواتي و صوتي كلي ارجف
دورنا عليها بالشوارع و المحلات
ما لكيناها اكو متنزه قريب علينا
رحت دورتها هناك ما لكيتها
كمشت راسي بأيديه عصرته حيل
رحت على بيت حازم النذل
دورتها يم بيته و اصيح بـ اسمها
التفتت لمن سمعت خطف صوت بجي ناصي
فيروز : ملاااااك ملاااك
ماما اذا تسمعيني فدوة ارو...
رفعت ايدي بمعنى "اوكفي"
عكدت حواجبها تدحگلي
حطيت اصبعي على حلكي بمعنى "اسكتي"
بدا يتوضح صوت البجي
مشيت خطوات خفيفة اتجهه للصوت
امي وراي ، كل خطوة الصوت يصير اقرب
وصلت يم سيارة و الصوت واضح حيل
دنكت ادحك جوا السيارة
فتحت عيوني بوسع
مُلاذ : ملاك!!
رفعت راسها دحگتلي
اجت امي تركض كعدت بالكاع
دنكت جوا السيارة :ملاك ملاااك
ماما حبيبتي شتسوين هنا ، فدوة اروحلج اطلعي
زحفت ملاك من جوا السيارة
و هي تبجي طلعت
ملابسها كلها تراب عيونها مورمة
بسرعة حضنت امي
ظليت كاعده بمكاني
حاضنين بعض و يبجون
اما انا كاعده كدامهم
على ركبي ، ادحگلهم
متجردة من كل شعور
متناسية اصوات البجي الصادرة مني
لـ رُبما بسبب السنين
يلي صارت بيني و بين البجي
ما ذرفت دموعي
و لا حاولت ابجي ، دائماً منعت نفسي
حتى اوفي بـ وعدي لوالدي
ضلوعي و روحي من سنين
تفتقد شعور حضن الام
و تفتقد شعور الحضن بشكل عام
ما سمحت لـ اي شخص يحضنني
ما خليت اي شخص ايديه تحاوط ضلوعي
اخر شخص حاوطتها ايدية والدي
ردت هاي الضلوع تظل للابد عليها اثر ايده
دحگتلي امي بعيون مدمعة
كمشت زندي رادت تسحبني الها و تحضني
بس مقبلت وكفتها
سحبت ايدها مني بهدوء
رجعتها على ظهر ملاك
مسحت على ظهرها بخفة
ابتعدت عنها ملاك و امي مسحت دموعها
فيروز : خوفتيني عليج شلون تطلعين و ترحين وحدج بالله شغلو السيارة و انتِ جواها
رجعت حضنتها لصدرها
ملاك : رحتوا كلكم بقيت بس انا خفت
اكو عوعو هواي
قصدها اكو جلاب هواي
و هي خايفة منهم ، ظاله خاتله جوا السيارة
شالتها امي و كمنا نمشي
مُلاذ : بعد لا تعيديها
ناشغت و كالت : اخاف
مُلاذ : لا تخافين مشمش احنا يمج
وصلنا لـ بيتنا وكفت ادحك للغراض الطايحة
اجو علينا الجيران يركضون
و يحمدون الله لان لكينا ملاك
گالولنا نبقى يمهم بس ما قبلت
كعدت على قنفاتنا المشمورة بالشارع
مسحت كصتي و صافنه وين اخذهم هسه
رفعت عيني لمن صفت سيارة كدامنا
اسكندر نزل منها هو و ابو
دحگت لـ امي
فيروز : لا تدحگيلي هيج
انا وين اوديكم هسه خابرتهم شنو بـ ايدي
تنهدت ساكته ، كمت سلمت على عمي
و امي سلمت عليهم
احمد : خيركم خو ما صاير شي ؟
بعده ديحجي
ارتفعت اصوات سيارة الشرطة
دحگتلها وكفت ورا سيارة اسكندر
نزل منها شرطيين و نزل وياهم حازم
ياشر عليه و يدحگلي
خزرته
حازم : هاي سيدي كسرت جامات البيت بالحجار
و هدت على بيتي
دحگولي اسكندر و عمي مصدومين
اسكندر : هذا صدك يحجي؟ مُلاذذذذ!
عكدت حواجبي : اي كسرتهم و خسفت الباب هم
و مو بس بالحجار كسرتهم بالتوثيه هم
هو منو حتى يطردنا و يبجي امي تايهه الدنيااا؟
خزرني اسكندر رجعت خزرته
رجعت امي تبجي
فيروز : الله يخليكم بس اوكفو هي معليها
مُلاذ : يمممه لا تتوسلين
شتريد تسوي سوي
عمي : استهدوا بالرحمـٰن يابه خل نكعد و نتفاهم
ابو علي ما يصير هيج بت صغيرة و طايشة
احنا نحاسبها ما توصل للشرطة و المراكز
ابو علي : لااا بتكم ادبسز
خزره اسكندر وصاح بي : انجب لك
الشرطة ما سمعوا منهم و اخذوني
بعد ما شافوا حال البيت
اسكندر ، عمي ، امي حاولو يوكفوهم
بس كالولهم لازم ابو البيت يسحب شكوته
دحگت لـ ملاك من الجامه
تبجي بحضن امي
دحكت لـ اسكندر رفع تلفونه خابر
و السيارة مشت بينا
درت وجهي دحگت لسيارة اسكندر ورانا
ورا فترة طويلة و اللاسلكي يلي ما سكت
وصلنا للمركز ما اريد ادخل لهذا المكان
و اعرف انواع الناس يلي مو زينه هنا
بس ما ندمانه على افعالي ابداً
دخلت و اسمع صوت اسكندر وراي
حاجا الشرطة يلي يمي
اسكندر : بس خل احاجيها
هو احنا بالمركز قابل طايرين
الشرطي : ما يصير ال..
قاطعه صوت رجال : عوفهم
التفتت لـ اسكندر سلم على الرجال
و الرجال اشر بعيونه للشرطة بمعنى ابتعدوا
ابتعدوا الشرطة كم خطوة اجاني اسكندر
اسكندر : صديقي هذا
راح يطلب منهم هو الي يحقق وياج
كولي رحت احاجي صاحب البيت
و هو الي تهجم
جيرانكم راح احاجيهم
حتى يشهدون انتِ ما كسرتي الجام و راجعلج
مُلاذ : انا ما ندمانه على السويته
اسكندر : طبعاً راسج يابس
مُلاذ : انت راسك يابس
اسكندر : انا اعلمج اطلعي منا
شوفي وين طببتي روحج وين اكو كو**
فـ هو هنا انا اعلمج
اخذني الشرطي
امرهم صديق اسكندر يخلوني بغرفة التحقيق
امشي و بداخلي شعور قذر
على نظراتهم المتوجهه نحوي
خلوني بغرفة و طلعوا
مرت حوالي خمس دقايق
انفتحت الباب دحگت لصديق اسكندر
دخل ، كعد كدامي
-انا الضابط ضرغام
هزيت راسي ساكته
ضرغام : اجت شكوى من صاحب البيت
يلي كاعدين بي ، حسب اقواله مكسره جام البيت
و هاده على بيته
نزل راسه و ضحك
خزرته بس ظليت ساكته
مُلاذ : ما هديت على بيته
رحت حتى احاجي و افهمه انو الايجار جاي نجمعه
لكن قابلني بالصياح و الكلام يلي ماله داعي
اضافة لهذا هو جار امي من ايدها
و طاردها من البيت و هذا يعتبر تهجم
حتى و ان كان بيته يكدر يطلب و نطلع
الي تجاوز هو مو انا
انا مجرد انطيت مقابل لتصرفاته
ظل ساكت يستمع الي و يدحگلي
مُلاذ : اما بالنسبة للجام المكسر
رفعت اكتافي بمعنى مالي دخل بي
مُلاذ : دخلت لكيته مكسر
و تكدر تسئل الجيران
ضرغام : بس الشرطة يكولون انتِ اعترفتي كسرتي الجام
مُلاذ : سمعوا غلط
ضرغام : يعني الشرطه ثنينهم المشكله باذانهم مو بيج؟
مُلاذ : بالضبط
بلل شفته و ضحك هز راسه
كام وكف اندار وراي دنك يمي
همس باذاني
ضرغام : تنفعين محامية بالمستقبل خوش تفريها
اجيت الطمة على وجهه
شدعوة هلكد قريب بس سكتت
رفع راسه ، طلع و هو يضحك
ظليت بالغرفة ، شوي دخل شرطي
دحگلي مستغرب حط مي يمي و طلع
مرت فترة طويلة و انا بغرفة التحقيق
لا احد يطب و لا احد يطلع
رفعت راسي همست وي نفسي
مُلاذ : اللهي اهجم البيت على راسه
كون يحترك گلبه بقدر حرگة گلب امي و ازود
دنكت مسحت كصتي بجف ايدي
انفتحت الباب دخل ضرغام
ضرغام : يلا اتوكلي الرجال سحب شكوته
كمت اريد اطلع وكف كدامي
ضرغام : و الله و جنج تعرفين رح تطيرين منا
مُلاذ : اكدر اطلع
ضرغام : هههههه المركز كله كدامج
مو بس الطلعة
ابتعد عني وجهه ايده على الباب
كمت وكفت اريد اطلع صاح وراي
ضرغام : صيري حبابه لا تورطين روحج هنا
دحگتله
مُلاذ : اذا ظليت عايشه عود
عفته و طلعت
اسكندر اجاني بسرعة
دحگت امي هم جايه
و ثنين من جيراننا و عمي
لزمت امي ايدي و تهمس
فيروز : ادبسز مو كلتلج لا تسوين مشاكل لروحج
و الله كوه طلعناج مُلاذ يمه لا تسوين هيج بعد
و الله انهد ثلثين حيلي عليكم اليوم
مُلاذ : هاهيه يمه طلعت ماكو شي
صعدنا بالسيارة
يتحمدولي الجيران بالسلامة
اخذونا اسكندر و عمي لـ بيتهم
دخلت لكيت غراضنا حاطيها بالطرمة
سيارة محمله الغراض كدام الباب
نزلت دخلنا جوا
عمي : اتفضلوا اتفضلوا
فيروز : ما تقصرون تعبناكم ويانا
هز راسه ساكت
حسيته كوه طايقنا و بس ديجامل
انفتحت باب الطرمه
طلعت نور تركض عليه
رادت تحضنني و وكفت
لمن اتذكرت انا ما احب احضن احد
سلمت علينا ، طلعت بيبي وراها
بيبي : يمه بنيات الياس تعالن يبعد حيلي
رحنا عليها انا و ملاك
بوست ملاك و باست راسي شمت شعري حيل
بيبي : عمت عينه الي يبجي عيونجن
ابتسمت و ظليت ساكته
سلمت عليها امي و سلمت على مرة عمي
طبينا جوا اجت نور قدمت النا مي
هزيت راسي بمعنى ما اريد
عبرتني راحت لـ امي و ملاك انطتهن
بيبي : هذا السز صاحب البيت شني يطردكم
كلمن لهُ و الله ي باجر ادزن عليه الزلم
يطركعونه تطركع شني تايهين
اسكندر : ماكو داعي مُلاذ ما مقصره
ماده لسانها
عكدت حواجبي هذا شعليه
كمشت امي ايدي بمعنى اسكتي
التفتت اله بيبي
بيبي : شني؟؟
رجعت اندارتلي
عمي : رايحه لـ بيت الزلمة و متعاركه ويا
و مكسرة جامات بيتهم بالحجار و التوثيه
اسكندر : لان ادبسز
عمي : هي هاي هم سوايه بويه انتِ
شايخه فرد نوب و ترحين تعاركين و كلج هاطولج
دكت بيبي عوجيتها بلكاع
بيبي : و انت شني تحاسبها؟ مربيها صارف عليها؟
اسكندر : بيبي جا تروح تهد ع الرجال
ما مخليه النا اي اعتبار ما تعرف خالتي تخابرنا
و تكول نروح نعنع ضلوعه
بيبي : زين سوت يستاهل و حيل ويا
اسكندر : هو شنو الزين اشتكى عليها
و صارلنا من العصر لسا نركض بالمراكز
دكت بيبي على رجلها مصدومة : اشتكى عليهاا؟؟؟
عمي : اي
بيبي : شني يشتكي على طفلة !
اسكندر : هي طفلة لو بيها البلا كله
ردت احجي بس قاطعتني امي
فيروز : اسكندر اعتبرك ابني و احبك و احترمك
لكن مُلاذ ما مسموحلك تحجي عليها بهالطريقة
الي سوته غلط و انا ما قابلة عليه
بس هي من حركة گلبها تصرفت تصرف غلط
انا احاسبها و انا الالومها
محد يحق اله يحجي حجايه تخصها
اعتذر اذا حجيت بطريقة غير مناسبة
و انا بـ بيتكم و ضيفة عدكم و الكم فضل عليه
لكن ما اقبل بنتي ينحجي عليها
بيبي : عاش لسانج حسنه
هزت راسها امي و ساكته
اسكندر انخرس بعد ما حجا شي
سوو العشا كعدنا ناكل
كعدت نور يمي و همست
نور : شوكت تعقلين
همست نفسها
مُلاذ : من تمطر صخول
دارت وجهها و ضحكت
اسكندر : باجر انا اوصلكم و اوصل ملاك
عمي : انت احتاجك اخوك يوصلهم
دحگله اسكندر : لا يابه خلي عزوز يمك
و انا اوصلهم
عمي : من توصلهم تعال الي
اسكندر : خوش
كملنا اكل كمنا انا و نور لمينا الماعين
و طبينا للمطبخ
نور طردتني ما تخليني اغسل الماعين
دحگت لعمتي منارس ما متزوجة
كعدت يم امي و تسولف وياها هي و بيبي
و مرة عمي يمهم هم
ظليت واكفة يم نور
و هي تسولف وياي
نور : ملابسكم طلعتوها؟
مُلاذ : اي امي طابه و لامتهم بالبقج
نور : لعد ليش ما طببوهم؟
مُلاذ : هسه انا اطلع ادخلهن
نور : اليوم رح نسهر اناا وياج و نسولف
هزيت راسي ساكته
مُلاذ : بيت عمو غزوان شلونهم؟
صارلنا هواي ما جايين و لا سامعين اخبارهم
نور : سلطان و جسار بعدهم بالخارج
مُلاذ : امهم؟
نور : باقين ولدها الكبار يمها
عمي غزوان جان يحب عمو إلياس الله يرحمهم
دنكت و سكتت
مُلاذ : كسرة ظهرنا وفاته
رفعت عيني لمن اجا صوت اسكندر : الله يرحمه
نور : امين
مُلاذ : امين
اسكندر : نور
نور : ها
اسكندر : روحي شويه اريد احاجي مُلاذ
دحگتلنا نور و سدت المي
طلعت من المطبخ
تقدم اسكندر عليه
اسكندر : ضرغام حاجاج شي عدا التحقيق؟
مُلاذ : ليش؟
اسكندر : لان افرك حلكه
رفعت حاجبي ساكته تحمحمت و گلت : لا
دحك لـ باب المطبخ
و رجع دحگلي
اسكندر : تعالي وراي
مُلاذ : وين؟
اسكندر : تعالي
تنهدت ، مشيت ورا
طلعنا من البيت وكفنا بالحديقة
مُلاذ : شكو؟
اسكندر : ما نكدر نسولف براحه جوا
مُلاذ : على شنو نسولف؟
اسكندر : مُلاذ رح اخطبج
فكيت عيوني ادحكله : شنوو؟؟
اسكندر : انا احبج و هالشي من سنين
و تدرين انتِ
مُلاذ : اسكندر واعي انت شدتحجي؟
ترا انا بعدني ادرس بعدني ثالث متوسط
الاعدادية بعدني ما داخلتلها
و الاهم من هذا كله انا مراح اقبل
اسكندر: ليششش ما تقبلين ليشش!
كمش ايدي حيل عصرها بايده : منو تريدي غيريي!
صار يعصرها اقوى
و توجعني كمشت ايده
مُلاذ : عوفنييي
كز على سنونه : لو انا اخذج لو الله ياخذج
لغيري ما تصيرين خوووش؟
دفعت ايده
مُلاذ : انت شتريد مني ؟؟
اسكندر : حطيها ترجيه باذنج
اذا سمعت فد يوم واحد جايلج خطابة
اكتله و اكتلج و اكتل روحي وراج خوشش؟
مُلاذ : انت مالك اي علاقة بيه
سحب زندي و عصره بايده : منو ؟؟
-اسكندررر! ايديي وخر عوفنيي
-ليش ما ترديني ؟
-ما احبك ما احبك مو كوه هيه !!
-تحبيني يجي يوم تحبيني
-اسكندر عووووفني
نتر ايدي و ابتعد لمن انفتحت الباب
طلعت امي دحگتلها ، بلعت ريكي
فيروز : اكو شي ؟؟
اسكندر : لا خالة ، جنا نسولف انا و مُلاذ ماكو شي
خزرته دفعته من كدامي
عبرت امي و طبيت للبيت
رفعت رداني لكيت ايدي حمره دم صايرة
مُلاذ : مريض
بعدني لسا بملابس المدرسة
طلعت دخلت الجنط و امي وياي
شافنا اسكندر و اجا دخل الغراض الباقية
حطيناهن بغرفة دخلت بالغرفة بدلت ملابسي
اتذكرت الصندوق
مُلاذ : يمه الصندوق ويننن؟
فيروز : كلشي بالجنط
ركضت على الجنط ادور
لكيت الصندوق بي الصوره و النستله
بس ما لكيت التشيرت
دورت بباقي الجنط ما لكيته
دورت بالغراض لكيت التشيرت
وبي تراب حطيته على خشمي
اشمه كل قوتي بس اريد اشم عطر ابوي ماكو
كله ريحة تراب
كعدت بالكاع بـ ايدي الشيرت
حافظت عليه سنين بس حتى تبقى الريحة بي
و هسه اتبدل عطر ابوي بالتراب
شمرت التشيرت من ايدي معصبه
دخلت ايديه بشعري شديت على شعري حيل
مُلاذ : حتى ريحتك اخذوها مني
الم صار بگلبي بعد ما رح الكا ريحته التصبرني
كمت من مكاني شلت التشيرت نكثته من التراب
بس ما بي عطر شميته هواي
حاولت اوصل لبقايا العطر بس ماكو
كل الاشمه تراب
ضميته بالجنطة
طلعت من الغرفة دحكت ملاك نايمة ع القنفة
فرشت يم نور دوشك
ما قبلت نور انام بغير مكان و علمود نسولف
فرشنا بغرفة الحجيه دوشكين
شلت ملاك بحضني من القنفة
و نومتها على الدوشك
كمشت ايدي الحجيه
بيبي : عبالك إلياس و كاعد
دحگتلي امي
فيروز: كلش تشبهه
بيبي : تربايته
مُلاذ : تصبحون على خير
عفتهم و رحت يم نور
تمددت ع الدوشك حضنت التشيرت لگلبي
دخلت نور
كعدت يمي ظلت تسولف وياي
اخير شي غفت يمي
و انا هم غفيت
نفس الحلم
صوت ابوي يوصيني
ايدة تمسح على شعري ، ظلام ، فراشات
صوت الرصاص ..
فزيت على ايد تمسح كصتي
مُلاذ : شجاي تسوووي؟
اسكندر : حلمانه و عركتي جاي تدمعين
مسحت وجهي
مُلاذ : ارفع ايدك عني
ديربالك تعيد هالشي
ظل يمسح بوجهي عناد
دفعت ايده لزم ايدي و صار فوكاي
مُلاذ : اسكندرر وخر
بطل تستغل الفرص
اسكندر : اشش
خزرته و احس كل ذرة بجسمي ترجف
انفاسي ما منتظمة
كرهت الدنيا على المواقف التحطني بيها
رفعت ايدي الثانية ضربته راشدي
التفت الي خازرني
دنك بسرعه باسني
فتحت عيوني بوسع
رفسته برجليه
ضربته بكل قوتي على وجهه
و دفعته عني
ابتعد عني ظلمة و ضوا خفيف من الصاله
يمر من تحت الباب
فركت حلكي حيل لعبانه نفسي ، مصدومة
صحت بصوت عالي
مُلاذ : قذرررررر
تقدم بسرعه بالظلمة سد حلكي بايدة
رجعت ضربته و دفعته
مُلاذ : اطلععع برا
اسكندر : خل احاجيج
مُلاذ : اطلع براا ، نورر اكعدييي
اسكندر : نور مو بالغرفة
فتحت عيوني مصدومة
كمت بسرعة من مكاني ركضت على الباب
جرني من ايدي سد حلگي بايدة
اسكندر : اشششش راح اطلع لا تصيحين
المهم ضكت شفايفج عود اسف ههههه
رفست برجلي و تحركت ثبتني
اسكندر : اذا حجيتي شي محد يصدكج
بعد ما عليه بيج هسه ، اسكتي
ضرباتج احاسبج عليهن بعدين
طلع و عافني وكفت مكاني ارجف
و افرك شفتي حيل قرفانه
انفتح باب الغرفة اتلمست الميز اليمي شلت المقلمة
مُلاذ : اطلععع برا
نور : هاي اناا
فتحت الضوا دحگتلها
مُلاذ : انتِ شلونننن تطلعين و تخليني بس انا ويا!!!
نور : و الله م..
مُلاذ : غبيه انتِ؟؟ وخرييي من كدامي
دفعتها ، طلعت من الغرفة
رحت للحمام غسلت حلكي ، غسلت وجهي
رفعت راسي ، غسلت ركبتي
طلعت من الحمام لكيت نور كدامي
نور : مُلاذ شسوالج؟؟
اسفه مُلاذ و الله ما ادري
مُلاذ : وخريي عني
فتحت باب الغرفة
شلت التشيرت وسحبت الدوشك
نور : حبابه مُلاذ و الله ما خلاني احجي
و طلعني من الغرفة
مُلاذ : صوجي اناا كله صوجي
ادري بي مو امان بس امنت بيج
وخرتها عن الباب
سحبت الدوشك ، حطيته بغرفة بيبي
يم امي و ملاك فرشته
فززني صوت امي : مُلاذ
مُلاذ : ه .. ها؟
فيروز : شبيج؟؟
مُلاذ : مابيه
فيروز : مو جنتي نايمة يم نور؟
مُلاذ : الكاع بيها دود
فيروز : تعالي نامي يمي
مُلاذ : رح انام يم ملاك
فيروز : تمام
فرشت الدوشك يم ملاك
و تمددت رفعت راسها امي دحكتلي
فيروز : متغطية ؟
مُلاذ : اي
فيروز : شبيج صوتج يرجف
مُلاذ : مابيه شي جنت حلمانه و كعدت مخترعه
درت وجهي و غمضت عيوني
ايديه لسا ترجف
ما غمضت عيني لحد ما طلعت الشمس
صار الصبح كمت غسلت بدلت ملابسي
نور كعدت لبست
بدلت امي لـ ملاك
دحگت لـ اسكندر لمن ضرب جتفي و عبر
اندارلي دحگلي مبتسم و رافع حاجبه
مُلاذ : خفى لـ هالوجهه
كعدوا يتريكون و انا كوه جرعت لكمتين
اخذت جنطتي وطلعت
اجا هو يوصلنا للمدرسة
و طول الوقت يدحگلي بالمراية
وصلنا ملاك اول منزلت التفتت اله
مُلاذ : عيونك راح افكسها
اسكندر : لسانج
مُلاذ : انجب و نزلني
التفت الي بسرعة خازرني
نور : مُلاذ و الله اسفه
مُلاذ : نور صوتج ما اسمعه
اما انت النذل هواي شفت ما عدهم غيره
بس مثلك ما شفت
راد يحجي حطيت اصبعي ع حلكي
بمعنى "اسكت"
مُلاذ : حسك ما اسمعه قذررر
ترضى واحد يسوي بـ نور هيج
ولك كعدنا ببيتكم
المفروض تخاف علينا و تباوعلنا بنظرة الاخت
بس انت خايس
فتحت باب السياره و هي تمشي
بسرعة وكفها و نزلت
صاحو وراي و لحكوني
ما وكفت مشيت لحد ما وصلت المدرسة
دخلت اعصابي فايرة
و تلكتني سُرى
سُرى : اجت اليتيمه
مُلاذ : سُرى بالله العظيم
ما اهتم لا لـ فصل و لا لجنة انضباط
و اكسر سنونج بحلكج هسه
وخري عني و فوتي حالي
عبرتها و مشيت
دخلت للصف شمرت جنطتي
اجت غادة دحكتلي : شصايرر؟
-ما صاير
غادة : لا والله صاير شبيج احجي؟؟
فركت وجهي و طلعت من الصف
اجت غادة وراي ، لزمت ايدي نور
عيونها مدمعة
نور : مُلاذ اسفه والله حبابه والله بعد ما اعيدها
نترت ايدها و طلعت للساحه
سولفت لـ غادة يلي صار و هي مصدومة
غادة : الله ياخذه
مُلاذ : اميييييييين من حلكج لـ باب السما
غادة : تعالوا ظلو يمنا
اصلاً امي تحب امج حييييل
و بس احنا كاعدين وحدنا
اكو بيت على بُعد شارع من بيتنا
للايجار اكعدوا بي ايجاره زين هم
مُلاذ : اشوف امي على سالفة البيت
غادة : تعالوا اكعدوا يمنا
مُلاذ : لا يمعودة هي امج تعبانه
غادة : بالعكس و الله تفرح بجيتكم
ظليت ساكته
دك الجرس و طبينا للصفوف
انتهى الدوام رجعنا للبيت
و انا طول الطريق اتعارك وي اسكندر
هو يغلط مره وحده وانا اردها عشر مرات
و نور تهدي بينا
وصلنا للبيت دخلت شمرت جنطتي
بدلت ملابسي لبست ملابس واسعه و طويلة
غسلت وجهي سلمت على عمي و مرته
ردو السلام من ورا خشمهم
غلست و سلمت على بيبيتي و عمتي
وكفت بـ باب المطبخ اريد اخذ ماعين الغدا
احطهن على السفرة
سمعت مرة عمي تحجي بصوت ناصي وي عمي
-شنو انا مجبورة اتحملهمم
تعالي اطبخي و نظفي و اشتغلي
و هم كاعدين على الحاضرر
-اصبري يابه بس اصبري يعني وين اوديهم
-مشكلتهمم محد كاللهم يسوون مشاكل
هاي بنتها لسانها شطوله
و شكبرها و شكدها تفتر هيج
و اسكندر داك رجل يريد يخطبها
-اگلج ترا ما مكيف عليهم انا
بس ما تدرين بـ امي
-اي شوف صرفة اذا ما طلعوا انا اطلع
التفتت لكيت بيبي وراي
و تدحگلهم معصبة
دخلت للمطبخ
مُلاذ : الله لا يعوزنا لـ احد
و لا يخلينا تحت رحمة احد
احنا اجينا كعدنا وي بيبي مو لـ سواد عيونكم
عفتونا بوقت ابوي مات و ماعدنا احد
شنو اتوقع منكم هسه
على صوتي التم البيت
و اجت امي
عمي : عمي صوتج فضحتينا
مُلاذ : عود انت حاسب روحك عم؟؟
تاخذ نص راتب ابوي الك
و تحجي علينا بالطالعه و النازله
اخوانك ثنينهم توفوا لا وكفت النا
و لا وكفت لـ بيت عمو غزوان
صار الصياح و الحجي
و انا ما سكتت دقيقة اموت روحي
و لا اعيش روحي و اهلي بالذل
امي هم ما سكتت
و لا بيبي و گالت
بيبي : الي جايين جايين عندي
الي ما عاجبه يطلع من هالبيت
بنيات و مرة الياس ما يرحن لمكان
ما قبلت نظل و لا امي قبلت
بيبي : وين ترحون انتوا جايين الي
ما ترحون لمكان! كلمتي وحده ما اثنيها
مُلاذ : بيبي ماكو هذا حفيدج النكس
البارحه لكيته فوك راسي
و طارد اخته و انا نايمة تقبليهااا؟
و كاعد يدحگلي و انا نايمه لو مسويلي شيي!
دكت بيبي على صدرها
شالت العوجيه ضربته بيها
امي لمن درت ما قبلت نظل
و انا اساساً ما قابلة اخذتهم و اخذت غراضنا
و طلعت
مشينا بالشارع لحكنا اسكندر
رزلته امي و طردته
مشمش بنصنا تمشي
انا و امي كايديها
فيروز : هسه وين نروح طلعنا من بيتهم
وين نروح ماعدنا مكان؟
مُلاذ : اليوم غاده گلتلي تعالوا يمنا
و امها اصلاً تحبنا
اكو بيت على بُعد شارع منهم نأجره و نكعد بي
فيروز : عيب من المره
مُلاذ : يمه الغربه احسن
من الكرايب عود هذا عمي؟؟
لو سامعه السمعته واحد يرفع الثاني يكبس
فيروز : خل نوكفلنا تكسي و نروحلهم
نظل يومين و نشوف البيت القريب عليهم و نأجره
وكفنا تكسي
رحنا لـ بيت غادة
دكيت الباب فتحته ام غادة
اول مشافتنا انرسمت ضحكه على وجهها
و بوستنا دخلتنا للبيت و هي ترحب بينا
و صاحت لـ غادة اجت فرحانه تكمز
وسلمت على امي كرصت زندي و هي تضحك
غادة : كل الهلااا كل الهلا
دنكت بوست ملاك و تتشاقى وياها
و ملاك تضحك مكيفة عليها
جان استقبالهم النا عكس استقبال عمي تماماً
استقبلونا بوجهه بشوش ، ضحكه مرسومه على ثغرهم
ام غادة تعبر عن فرحتها بـ جيتنا
سوتلنا اكل بسرعة ، خلال ساعه و نص
فرشت سفرة كامله كدامنا
الضحكه ابد ما انمحت من وجوهنا
طول ما احنا كاعدين
نمنا انا و غادة سويه نسولف و نضحك
و هي فالته لسانها فد فلته
بحيث طلعت سوالفي كلها يم امي
و انا اكرص و اخزر و لا يفيد
و امي ما مصدومة لان تعرف سوالفي
ثاني يوم وصلت مشمش للمدرسة انا و غادة
و رحنا انا وياها للمدرسة
اول ما وصلت لكيت اسكندر بالباب
مُلاذ : اللهي مو چني عشت هواي ؟
غادة : شنو؟
مُلاذ : سلامتج
ردنا ندخل انا و غادة
عاق اسكندر حركتي وكف كدامي
ظليت ادحك للمدرسة و ما ادحگله
و غادة مستغربة مفاهمه
اسكندر : خل نحجي
انداريت اله و بنظرات باردة دحگتله
مُلاذ : انت ما عندك كرامه؟
كز على سنونه : تأدبي
غادة : مُلاذ ؟
مُلاذ : ادخلي راح اجي وراج
بس اوخر العثرة الي بطريقي
ابتسمت و كالت : تعجبيني
دارت وجهها و دخلت
دفعت اسكندر اريد ادخل
كمش ايدي و جرني للجهة الثانيه من المدرسة
مُلاذ : عوفنييييييي
اسكندر : صوووتج
مُلاذ : عوفني قذر حقير مجلوب ما شايف
اندار عليه رفع ايده و ضربني !
فتحت عيوني بوسع
صرخت بعلو صوتي بالشارع
مُلاذ : لك انت منو و تمد ايدك عليييييه!!!
رجعتله الراشدي و ضربته مرتين
دفعته عني رفعت اصبعي بوجهه اعصابي فايره
مُلاذ : ايدك اكسرهاااا و اعلكها بركبتك
مرة الثانية اذا شفتك كدامي افلش راسك بالطابوكه زيييين!
وخرت عنه اريد اروح رجع جرني
اسكندر : ما تتادبيييين انتِ مو ادمييييه
مُلاذ : انا مو ادميه و ما مؤدبة
عوفنننني اعتقنييي يا اخي اكرهك ما اريدك
اسكندر : ليش تكرهيني ؟
مُلاذ : اسكندر انت مريض زين؟
انت م ر ي ض
يعنيي شسوي بعد حتى تعوفني
اكبر مشاكلك الحب
و انا مشاكلي اكبر من هذا الشي
ما اريدك ما تمر بطرف بالي اصلاً !
شنو احجي و شنو اگول بعد حتى تعوفنيي
اسكندر : لا تعانديني لا تصدينييي
كل ما سويتي هيج يزيد شعوري ما ينقص
من ما تخليني احصل عليج بسهوله
يكبر حبج بداخلي اكثر
مُلاذ : رح تكرهني؟ اذا تعاملت وياك عدل تكرهني؟
لان انت مثل البزون اليحب خناكه
المعاملة العدل ما تفيد وياك
اسكندر : مستحيل اكرهج
مُلاذ : لعد يطبك ستين الف طوب
مره ثانيه لا تشغلني بسوالفك التافهه
دفعته و دخلت للمدرسة
اجت نور هم تريد تحاجيني
نور : و الله انا مالي دخل ليش هيج تعامليني
مُلاذ : تمام نور هاهيه ماعدي شي وياج
كافي تبجين
نور : و الله؟
مُلاذ : اي
نور : مُلاذ و الله احبج
مُلاذ : لا اله الا الله لا تكوليها مثل اخوج
نور : لا لا جذب ما احبج
ابتسمت : اي هيج احسن
ضحكت نور مشن وياي هي و غادة
دك الجرس للصفوف
دخلت الدروس ، صار الدرس قبل الاخير
دامشي بالساحه ، دنيا الظهر
الشمس تصگع بعيوني
الساحه فارغه لان الدروس بعدها مستمره
ما احب درس الرياضيات و لا اطيق مدرسته
و هربت من الدرس..
خطيت خطواتي
عيوني تتجول ع شبابيك الصفوف
نظري مشط كل الطلاب ، تركيزهم ع المُدرسين..
عادة بيه انتبه ع كل شي بلا قصد
فزيت من شرودي
لمن تمررت ايدين من بين ايديه
عگدت حواجبي
فوراً التفتت عليهن بـ راسي بفزع
ثنين مكمشات بيه و قابضات على زندي
يجرن بيه و يريدني امشي
عطت بنص الساحه : وخرن عني وخرنننننن شدتسوين وخريي عوفيني
كمت احرك جسمي و ايديه احاول افلتهن
بس مكدرت ثنينهن اضخم و اكبر مني
وكفت بمكاني اصرخ و اسحب ب ايديه
ماهدني ابداً ، دست ع رجل وحده
و الثانيه سدت حلكي بايدها
انا اعيط و اغلط عليهن
ثبتت خطواتي و مقبلت اتحرك
يحاولن حتى يسحبني ، دك الجرس
فوراً وحده دفعتني ب حركة سريعة
دفعة قويه دحگت على الحجاره الكدامي
و طحت بالكاع
حسيت راسي راح ينفطر من الالم
عيوني يتغاوش النظر بيهم ، الدنيا تدور
رفعت ايدي بـ تعب لمست راسي
شاغت روحي بـ ألم نزلتها لـ نظري
متغطية بالدم
عاينت ع الكاع أرجل تتجهه نحوي و تركض
لهث نَفسي و غمضت عيوني بـ انعدام مقاومة...
- يتبع الفصل التالي اضغط على ( رواية جرح الأيهم ) اسم الرواية