رواية جرح الأيهم الفصل الثامن و الثلاثون 38 - بقلم أيلان
"الجُــرح الثامن و ثلاثون"
طفرت من مكاني
كل جسمي يرجف سديت دگمة بنطروني
نزلت تشيرتي يلي جان مرفوع
و گلبي محترك حرك كل ذره بـ جسمي ترجف
ركضت على سلاحي اريد اخذه من الگاع
دفعه بـ رجله و جرني من بطني و هو وراي
مُلاذ : عوووووفني يا **** يا ****
عوفني الله لا يطيك العاافيه شتررريد منيييي!
خرمشت ايده الي على بطني
رجع جرني بـ الايد الثانيه
مخلي خشمه بـ شعري لعبت نفسي
ملت بـ راسي مكشوله ملامحي
رجعت رجلي دست على رجله
دفعني من ظهري طحت
انضرب راسي بـ ميز وراي
لزمت بـ راسي متاذيه نزلت ايدي دحگت للـ الدم
بعدني ادحك رفعت عيني لگيته يجيني
رفعت رجلي دفرته بين رجليه عاط متأذي
زحفت لـ السلاح بس اريد اوصل
انداريت لگيته بعده يصيح
وصلت يم سلاحي
بـ لحظتها صار صوت الدوريات
دحگت بـ وجهه المصدوم
اتلفت بـ مكانه ما يدري شيسوي
ركض لـ الشباك الي وراه
مُلاذ : اووووكف
جريت سلاحي بسرعه رميت عليه
بس ما طاحت بي لان بسرعه حمى نفسه و ابتعد
طفر من الشباج و طلع يركض
انكسرت باب البيت
زحفت اخذت عباتي خليتها عليه و شالي
دحگت لـ ضرغام يلي دخل يركض عليه
مُلاذ : ضرغاام شرد الحگه الحگه
هالمره مستحيل يخلص
ضرغام : مُلاذ شصاااير شكو؟؟ منو شرد
مُلاذ : اسكندر ضرغاام منا شرد منا
وسع عيونه و طلع يركض
وكفت بـ زاويه كل جسمي يرجف
ما اكدر اوكف حتى على رجليه
بس هاي الكم دقيقة لازم اصمد
لحد ما يلگون اسكندر
لبست عبايتي و شالي عدل
لزمت بـ الحايط دايخه
عيوني كل دقيقه يصير كدامهن ظلام
و ارجع اشوف اخذت تلفوني الشمره بـ الگاع
دحگت لـ رقم أيهم يلي يتصل عليه
جريت نفسي ما يكفي لـ صدري المخنوك
بـ كل مره اطيح بـ نفس الفخ
كل ما انذكر طاري الچتال كدامي
اركض و اركض بـ كل سرعتي
مثل يلي حصل جائزه و يركض يستلمها
بس انا ما جنت رح احصل جائزه
جنت راح احصل الي بسببه خسرت ابوي
جنت راح احصل اجوبة على اسئلتي
جنت راح يشفى غليلي و لو شويه
لمن اشوف الي قتل ابوي بـ السجن
او بـ اي جهنم ثانيه ما يهمني
المهم ما عايش حياته و مرتاح
و هو ذاب بـ گلبي جمره حرگت كل شي بيه
خلتني انسانه ثانيه بعد ما جان المفروض
تكون عندي حياة نظيفة و حلوه
تحت جناح ابوي اعرف لو ابوي موجود
جان رح تكون حياتي افضل و احلى منها ماكو جان الكل حسدوني على هيج اب ،
محد رح يفهم الحب الجبير بـ گلبي اله
محد رح يكدر يتخيل و لو جزء من ذكرياتنا
و حنانه و خوفه و حبه الي
صحيح هالشي مفروض على كل اب
بس إلياس حبه جان غير
إلياس الي جنت متمنيه اموت بـ مكانه
و لا اعيش و اشوف الشفته من بعده
كعدت على القنفه الوراي
رفعت ايدي خليتها على رگبتي من ورا
نزلتها دحگت للدم يلي بيها
دحگت لـ القنفه الـ انا كاعده عليها
كشت روحي ، كشولت ملامحي و گمت
انداريت لـمن اجاني ضرغام
راد يلزم متوني يهدي رجفتي
رفعت ايدي مستوقفته ، وخر ايديه بسرعه
ضرغام : ما لگينا
رفعت عيني دحگتله ساكته
حجا بـ هدوء حتى اهدء و ما انخبص
ضرغام : اهدي جري نفس
سوالج شي ؟
هزيت راسي بـ رفض
ضرغام : سمعنا صوت اطلاق ناري
ضربج لو شنو ؟؟
مُلاذ : انا ضربته
ضرغام : وين ضربتي ؟
مُلاذ : ما طاحت بي
ضرغام : الدم الي ع الگاع ؟
مُلاذ : انضربت بـ رگبتي
وسع عيونه
ضرغام : تمام اهدئي انتِ و اكعدي
رح تجي هسه سيارة الاسعاف
بعده يحجي اجاني صوت سيارات اسعاف
رفعت عيني دحگتلهم دخلوا يركضون بسرعه
رجع ضرغام دحگلي
ضرغام : كومي خل يشوفوج
مُلاذ : جسار شاف رسالتي؟
ضرغام : خابرني
ورا ما خابرتيني انتِ بـ ربع ساعه
گلي دازتله رساله گلتله اعرف و رايح هسه الهم
و هو گال جاي وراي ،
مُلاذ : ليش شغلتوا صفارات الانذار؟
ضرغام : واحد غبي شغلهن
عود حذرتهم و عدت عليهم اكثر من مره
هزيت راسي بـ هدوء
اتذكرت يلي صار قبل لا اوصل لـ هنا ....
بعد ما سديت الاتصال من سلطان
دزيت رساله لـ جسار گلتله بيها يلي صار
رحت على رقم ضرغام اتصلت عليه
مُلاذ : شوف لمن تقتربون
لا تشغلون صوت الدوريات
ضرغام : مُلاذ انتظررري خل اوصل
و نروح سويه لا ترحين وحدج
مُلاذ : لا يمكن الچتال صدك يمه
رح اروح و انتوا اتبعوني
ضرغام : يمكن يسويلج شي يمكن فخ مُلاذ !!!
مُلاذ : رح اوكف ع الطريق و انتظر
عشر دقايق تكونون قريبين عليه و اكمل طريقي
اول ما اوصل رح احاول ادزلك المكان وين
ضرغام : مُلاذ انتظريناا نوصل الج
مُلاذ : هيج رح يحس
ضرغام : ما يحس
مُلاذ : لا يحس هسه انتوا طلعتوا ؟
ضرغام : اي لاحكيج
مُلاذ : تمام رح اسد الاتصال
ظل ساكت نزلت تلفوني سديت الاتصال
حركت سيارتي و كملت طريقي لـ العنوان ...
رفعت عيني ماحية الذكرى من بالي
لمن دخلوا المسعفين ، دخل وراهم جسار
رفعت عيني دحگتلهم ركض الي جسار
يريد يفتهم شصاير و شبيه بس ضرغام وكفه
ظليت ادحك لـ جسار الي موسع عيونه عليه
اخذوني لـ سيارة الاسعاف ، كعدت بيها
ظليت صافنه بـ الفراغ عقلي حسيته متخدر
انداريت لـ جسار يلي مد الي بطل مي
هزيت راسي بـ رفض
انداريت لمن اجتني بنيه
تريد تشوف رگبتي لان ضرغام گايل الها
هزيت راسي بـ رفض
مُلاذ : عندج وصله او كلنس؟
- دقيقة اجيب الج بس لو اشوفها افضل
خاف يطلع الجرح عميق و لازمه خياط
مُلاذ : لا ماكو داعي
حاولت وياي ما قبلت
جابت الي كلنس مررت ايدي من تحت الشال
خليت الكلنس على رگبتي انداريت لـ جسار
جسار : اشربي مي حتى لو شويه
هزيت راسي بـ رفض
درت وجهي ادحك لـ گدام
جسار : لحظة الي گلج عن الچتال وينه؟
و شصار ؟؟
درت عيوني اله ، عبست شفتي ، رفعت اكتافي
گلت بـ هدوء عكس النار الي بـ داخلي
مُلاذ : هم اتغابيت و تصرفت بـ تسرع
جسار : شنوو فهميني !
مُلاذ : اسكندر
وسع عيونه مصدوم ، اكدر افهم من نظراته
يتمنى ما يكون الجواب الي هو متوقعه
بعد ما يسئلني " شبي؟" و فعلاً هيج صار
جسار : شبي ؟؟
مُلاذ : هو الدز الي من رقم غريب
گلي لگيت الچتال ...
ظل صافن و مصدوم
جسار : لا مستحيل ! هو كـ*** و ****
بس ما معقوله يوصل لـ هاي المووواصيل !
مُلاذ : كل شي يسوي
جسار : شمدري هو بـ الچتال؟؟
مُلاذ : قبل لا انخطف لحگتني سيارة
و رموا عليه شردت منهم انداريت لگيت اسكندر وراي گلي لحگتج ، هددني يتصل بـ امي
و يحجي الها الصار جبرني احجي اله
ضرب جسار على رجله بـ عصبية
جسار : يا عمممي اذا ما طلع اسكندرر وياهم
هاي ايدي ابترهااا منا
مُلاذ : جبان هذا ما يدخل وي الچتال
جسار : لييييش ما وكفتي ؟
ليييش ما انتظرتيني انا او ضرغام او اي احددد!
مُلاذ : اتصلت بيك و ما جاوبت
لو جنت بمكاني انت جنت رح تسوي نفس الشي!
ما جان گلتلي و لا گلت لـ اي احد اصلاً
لو دازلك واحد و گايل الك كدامي السمم ابوك
جان وكفت ؟ جان انتظرت ؟
مُلاذ : انتظارك كل ذيج السنين
ما جنت رح تستصعب تنتظر فوكاه كم دقيقه
ما رح تمر عليك كل دقيقة مثل السم
و بس تريد توصل توصل لـ شغلة ركضت الها
و تعذبت علمودها سنين !
جسار : غلللط تصرفج غلط !!
كل شخص يگلج لگيت الچتال رح تروحين اله؟؟
كل شخص يگلج الچتال كدامي رح تركضين اله؟
مُلاذ : اناا هيج ما اكدر افكر
ما اعرف افكر اصلاً
من كد الحقد و القهر الي بـ گلبي
اركض مثل المخبله على كل شي
انا هيج اتصرف بـ غباء و تسرع اعترف
بـ كل شي يخص ابوي و اكرهه روحي لان انا هيج
اكره روحي لان انا بـ هذا الضعف و الهشاشه
كدام موضوعه و كدام كل شي يخص القتله
درت وجهي عن جسار ، سكتت
رادوا ياخذوني لـ المستشفى ما قبلت
اجاني ضرغام
ضرغام : لگينا بصمات
ماكو اي شي بالبيت يثبت اسكندر جان موجود
الرقم الي دزلج مكسور و ما موجود
بس بصمات اكو و ان شاء الله لـ اسكندر
و ما تكون بصماتج
عكدت حواجبي ،
رفعت راسي دحگتله گلت و انا اتذكر
مُلاذ : جان لابس كفوف !
الله ياخذه الحقير الحيوان
حاسب حساب لـ كل شي
ضرغام : ليييش گلتلج انتظرينا !
مُلاذ : يعرف يعرف رح اجي وحدي
و يعرف رح يجون الشرطة بس مو وياي
جسار : صارت زحمه من فكرتي
دحگتله ساكته ، كام وكف
جسار : كومي يلا خل نروح
ضرغام : وين تروحون ؟
جسار : لـ البيت
ضرغام : شافوا رگبتج؟
مُلاذ : لا
ضرغام : ليش؟
مُلاذ : ما بيها شي وكف الدم الي بيها
ضرغام : خاف تحتاج خياط
مُلاذ : لا ماكو داعي
ضرغام : بـ راحتج
جسار : تسلم يابه تعبناك ويانا
انا اوصلها و ارجع الك
ضرغام : لا يابه ما سويت شي
لا ترجع انا اتصل بيكم و ابلغكم
مكان حادثة هذا ، مُلاذ
مُلاذ : ها
ضرغام : نحتاج الرسائل الي اجتج
مُلاذ : ادزلكياهن
ضرغام : ماشي و اذا تذكرتي شي
يوصلنا انو اسكندر الصار من اسكندر حاجيني
اومأت بـ راسي
اخذني جسار صعدنا بـ السيارة
شغل سيارته و طلعنا مناك
جسار : بس اريد اعرف شنو من گلب شايله
ما تخافين انتِ ! بالله لو مسوي الج شي
ظليت ساكته و جسار يحجي معصب
و گال هسه حتى مارح يلگون اله اثر
لان هو ضابط و حافظ هاي السوالف
عنده اسهل من شربة المي
رفع تلفونه لمن اجا اله اتصال
رد على الاتصال و حجا
جسار : ها سلطان ، انطينيا
ظل ساكت ثواني
جسار : شلون اخـ....
سكت ثواني و رجع حجا
جسار : شوكت؟ ، تمام ، رايحين لـ البيت
وين صايره ؟ ، خوش ، تمام
ظل يحاجي سلطان و گله الصار
نزل تلفونه و سد الاتصال
تجيت راسي ع الجامه و ظليت ساكته
استمرينا على هذا الهدوء لـ فترة
فزيت لمن انفتح الباب درت وجهي
دحگت لـ جسار النزل و أيهم الي صعد
مُلاذ : أيهم!!
اندار دحگلي نظراته توحي عصبيته
دمارات وجهه بارزه و عيونه ناطه عصبية
شغل السيارة و طلع بينا
مُلاذ : اوكف جسار؟؟
أيهم : راح
مُلاذ : وين راح ؟؟ اصلاً شلون خلاني يمك
جسار ما يقبل حتى لو انت صديقة !
أيهم : خطيبج
رفعت حواجبي مستغربة
مُلاذ : مو رفض عمي ؟
أيهم : قبَل بعدين
هزيت راسي ساكته
مستغربة من هدوئه
أيهم : شوكت ناويه تحجين؟
رديت عليه بـ نفس الهدوء الحجا بي
مُلاذ : شنو احجي؟
اندار دحك بـ وجهي
رغم هدوئنا بس اعرف الجو مشتعل بيناتنا
أيهم : مثلاً عن اسكندر الي ناهي عليج
لو لمن حاول يعتدي عليج و انتِ رايحه اله بـ رجليج؟ بـ شنو تحبين تبدين ؟
مُلاذ : ما اريد اجاوب
أيهم : ما تريدين تجاوبين! حلو
سكت لـ كم ثانية
دحگت لـ ايدة اليقبضها على الستيرن
اندار عليه ، دحك بـ وجهي بـ عصبية
ضرب ايديه بـ وجهه حيل
مرات متتاليه و هو يفرك وجهه بـ عصبيه
نزل ايدية گال بـ نفاذ صبر
يحجي بـ عصبيه ممزوجه بـ الهدوء
أيهم : احجي
مُلاذ : ما اريد احجي بـ شي
أيهم : احجججججي
مُلاذ : لا تصيييح عليه !
شخط السيارة شخط و ضرب الباب اليمه
اندار الي و هو يصيح و يحجي بـ اعصاب محترگه
دمارات وجهه نطت ، كز على سنونه
هسهس من بين اسنانه
أيهم : شتسوين رايييحه لـ هناك وحدددج شتسووووين؟
مُلاذ : گلي لگيت الچتال
أيهم ( بـ صياح) : گلج لگيت الچتال
و انتِ ترحين اله بـ رجليج
غبيه لان غبيه ما عدج عقل !
اسلوبه نرفززني
مُلاذ : احجي وياي عدل !!!
أيهم ( بـ صياح) : ما احجي عدل !!!
شلون ترحين اله شنو من عقل عندج
شلون كدرتي تخطين اصلاً هالخطوة وحدج
ادك عليج حرگت التلفون حرك
اسكندر الـگ**** يريد ياخذج مني
و يريد يأذيج بـ كل الطرق
شفكرتي من رحتي اله بس كليلي بس فهميني!!
مُلاذ : مااا رحت اله دزلي من رقم غريب
گلي الچتال كدامي و انا رحت !
اندار دحك بـ وجهي
أيهم : نوب فوكاها رقم غريب
نوب فوكاها رقم غريب
ضرب على رجله
احتار شيسوي و يمشي سريع بين السيارات
هم رجع يصيح
أيهم ( بـ صياح): و انتِ ياهوه اليگلج
النعال ابن النعال كدامي ترحين اله
ياهوه اليحاجيج و يطيج طرف خيط
ترحين اله ؟؟
مُلاذ ( بـ صياح): ما تكدر تلومني انت
مااا تعرف شـ ...
قاطعني و هو يرفع اصبعه بـ وجهي
أيهم : حسج اكطعي
نزل اصبعه و دار وجهه يحجي عليه
أيهم : فوكاها تصيح ! فوكاها ما قابله
الومج ! لان انتِ عندج عقل
لان انتِ جنتي تكدرين تفكرين
قَبل لا ترحين جنتي تكدرين تجين الي لو لـ اهلج
و ما تتصرفين بـ هاي عاطفتج السخيفه
لان لو عدج ذرة عقل جان فكرتي
شنو ممكن يسوي بيج اسكندر
او اي شخص غيره
مُلاذ : عاطفتي سخيفه !
أيهم : اي عاطفتج سخيييفه
لااان مااااا تفكررررين
مُلاذ : مالك دخل انت بيه
أيهم : بـ كوني خطيبج الي دخل
مُلاذ : خلص ما دام بعدنا بـ البداية
افسخ كل شي من هسه
أيهم : لعبه هي وكت اليعجبج تقبليين
و وكت الما يعجبج ماااا تقبلين؟؟؟
مُلاذ : مااا مجبوره انخطب من شخص
يقلل احترامي و يغلط عليه !
و لازم اسكت لان هو صار خطيبي
ما دام انا وياك هيج من البداية
كلمن بـ طررريقة افضل
وكف السيارة بـ نص الشارع
اندار الي جر زندي ، صرنا وجهه بـ وجهه
تجولت عيونه على ملامحي
و ايده ضاغطه على زندي
مُلاذ : عوووفني ، ايـ...
قاطعني قبل لا اكمل كلامي
أيهم : هالمووضوع ما ينعاد !
مُلاذ : انت ما الك اي علاقه
الي يصير ، يصير الي
أيهم : و انه اذا صار الج شي
و اذا هذااا الشي التحجين عنه اذاج
وكتها لا هم يبقون و لا انه ابقى !
أيهم : ما عاجبتج طريقة كلامي
بس ما فكرتي شصار بيه لحد ما وصلتلج
ما فكرتي شنو الافكار الي اجت بـ بالي
لحددد ما وصلتللللج ، اسكندر الـ*****
يريددد ياخذج مني بـ كل الطرق
و يريد ياذيج بـ كل الطرق عندج عقل فكري بي !
أيهم : مو بس تعرفين تفكرين تفسخين الخطوبة
مو بس تفكرين أيهم يغلط عليه أيهم ما محترمني
لان يحجي أيهم علمودج و لان يريدج ما تتاذين
و ما يريد واحد يلمسج صار گـ**** و ما يعجبج
مُلاذ : انت شفت نفسك من صعدت هاي السيارة لحدد هسه حاجيتني عدل ؟؟
لو خلصتها تضرب بـ الستيرن و صياح
أيهم : لااان سألتج من البدددايه
و گلتلج شصايرر گلتيلي ما اريد احجي
و تعاندين وياي و انه **** ***
مُلاذ : ما عاندت ما اريدد احجي
مو گوه هي ، ادري بس احجي
لو يطك خشمك دم لو مدري شيصير بيك
أيهم : طبني مرض فوووك مرض
اعرف من جسار و سلطان
اسكندر الـ **** يريد يعتدي عليج
منو گلج هيج كـ**** انه؟
و اعوفه بـ حال سبيله لو بس واكفه انتِ
لو بس مخابرتني لوو منتظررره
و ماا رايحه فكرتي شجان ممكن يصير الج؟؟
مُلاذ : منين اخابرك و انت هستوك
جان خشمك طاك دم و متخربط
و ماخذيك لـ المستشفى لمن ردت اجيك
اندزت الي الرساله و رحت
أيهم : عفتيني بـ المستشفى
و رحتي لـ شي ثاني و لـ شي ممكن ياذيج
مُلاذ : ما عفتك اناا ، جاي اگلك اجت الي رساله
گلولي لگينا الچتال و گلي انا ملثم جنت وياكم
ماكدرت اوكف و لا كدرت افكر و لا انتظر
و ما صدكت هم بـ كلامه بس ردت اروح
على امل يطلع صدك الچتال
أيهم : موضوع الچتال لـ هنا و ينتهي
مُلاذ : لا بالله ! كتل ابووك لو ابوي ؟؟
عشت العشته انا و شفت الشفته انا
حتى هسه تمنعني و تگلي هذا الموضوع ينتهي
أيهم : بعدج بعدج مستمررره
هسه لو يگلولج نعال بـ جهنم ترحييين اله
مُلاذ : لو اعرررف اخرررر يوم بـ عمري
هم ادور على الچتال و هم الگا
أيهم : انتِ فعلاً مااا تفكرين !
مُلاذ : بيييش ما افكر بيش؟!
أيهم : يكدددر ياذيج
مااا تفكرين بـ اهلج و بـ نفسج انتِ ؟؟؟
شكم مره خطفوج و شكم مره رموا عليج
شكم مره هددوج !
مُلاذ : كل شي ما يكدر يسوي
ضحك أيهم بـ استهزاء
هز راسه ساكت رجع يمشي بـ السيارة
مُلاذ : لا تستهزء !
انت منين تعرفه حتى تحجي ؟
دار وجهه عني ، ظل ساكن بـ مكانه
و وجهه لـ الشباك رجع حجا بـ عصبية
أيهم : و بعد ما ترحين لـ مكان وحدج
و اي شي تحصلينه تجين و تگليلي
و الچتال تعوفينه
مُلاذ : مو بكيفك هي
انساااان ما خلا بشر ما اذاه
بعده عايش و ياكل و يشرب
و خلا العالم تشبك الترررراب
لييييش حتى اعووفه ما عافنا هو!
اندار عليه صاح بـ نفس صوتي و اعلى
أيهم : انعل ابو لابو الخلفه
اكو قانون و شرطه يدورون وراه
ما بقى الج و لا وكع همه عليييج
مُلاذ : حقك مو ابوك الانكتل كدام عينك
أيهم : و عسى انكتل و عسى مات
ما تنهز شعره مني و لا يهمني
مُلاذ : مو الكل مثلك ما عدهم احساس!
أيهم : حلو صرت ما عندي احساس
لان ما اريد اذيتج صرت بلا احساس
مو كتلوه كدام عينج
مو كتلو الي بـ عرس غاده و باهر
كدام عينج و گلتيلي هو الچتال !
مُلاذ : مو هو الانكتل جان واحد ثاني
الچتال رئيسهم الي كتلوه بس انطاني الظرف!
أيهم : هيج هيج تعوفينه
مُلاذ : و انت ما تمنعني لا تهمني خطووبه
و لا يهمني شي كد ما يهمني الگا الچتال
ظلينا نتصايح و نتعارك
لحد ما عاط بـ صوت عالي
أيهم : تريددين تعرفين منو الچتال
همج و مهموج النعااال؟؟؟
مُلاذ : و ليييش ما يكون همي و مهمومي؟
أيهم : الچتال ..
راد يحجي سكت ، كز على اسنانه
وكف السيارة على صفحه
نزل منها ، سد الباب ، مشى لـ گدام
وكف كدامها ، تجى روحه ع السيارة
دخن جكاره رفع تلفونه يحجي منفعل
بحيث صوت صياحه يوصلني
أيهم : تلگاليااا لو يطير للـ السما
هم تلگاه الي ، انتظرك
نزل تلفونه سد الاتصال
اندار دحگلي و الجكاره بين شفايفه
بعدني كاعده بـ مكاني ما نزلت وراه
دار وجهه عني رفع راسه لـ فوك
ظل هيج كم دقيقة ،
نزلت راسي ادحك لـ ايديه و العب بـ اصابعي
رفعت عيني لمن شفته يجي ناحيتي
فتح باب الصدر ، كنبص
دحگتله و هو يدحگلي ، صدرة يصعد و ينزل
و عيونه الشرار يطلع منها
ظلينا هيج واحد صافن بـ وجهه الثاني
ثواني حتى گال
أيهم : لو تشوفين شكد احاول ما اطخج
كل شي بيه يريد يحضنج و يلمج
ظليت ساكته و هو كمل
أيهم : روحي كلش تحتاج
لـ لمسه من ايدج الباردة
تخمد النار المشتعله بيها
مُلاذ : ما سوالي شي
أيهم : جان يكدر يسوي
و هذا الاحتمال و الفكره جاي تدمر عقلي
مُلاذ تفتهميني؟ ما ظلت اعصاب عندي
مُلاذ : گلتلك من البداية
انا حياتي گوه عايشتها و گوه متقبلتها
انت شلون رح تكدر تعيشها وياي؟
أيهم : اعيشها وياج بـ كل الطرق و بـ كل اذيتها
بس ما اريد تتاذين بس اريد احميج
لان انتِ ما جاي تفكرين بـ روحج
جاي تذبين روحج بـ نص الاذية و التهلكه
اريد نعقد انه وياج اليوم قبل باجر
بس لازم كل شي بالتدريج
زفر انفاسه ساكت و يفرك بـ كصته
استغفر و كام من يمي
ردت انزل خفت عليه بس ما خلاني
أيهم : لا تنزلين ابد ابقي بـ السيارة
لا توصلين يمي تمام؟
مُلاذ : ليش؟
أيهم : لا تجين ابقي بـ السيارة
مُلاذ : خاف يصيرلك شي؟
أيهم : صارلي من زمان
اكعدي بـ السيارة لحد ما اجي
دار وجهه و راح ظليت ادحك وراه
كوه يمشي ، دخل لـ محل طلع بـ ايده علاكه
ظليت ادحگله ، طلع مي من العلاكه
وكف ع الرصيف شرب مي
غسل وجهه ، نكع شعره
رفع راسه يمسح بـ وجهه من الـمي
رجع شعره لـ ورا بـ ايده
كعد ع الرصيف و ظل يدخن
دحكت لـ الوقت اتاخر
استغربت من امي يلي ما اتصلت عليه
خابرت لـ ملاك
ملاك : الو مُلاذ وين صرتي؟؟
مُلاذ : هسه اجي ، امي وين؟
ملاك : غفت و هي تنتظرج
راسها جان يوجعها اخذت حبايه و نامت
مُلاذ : شوكت نامت؟
ملاك : صارلها هواي اكثر من ساعتين
مُلاذ : خليها ابد لا تكعديها
هسه شويه و اجي انا
ملاك : صاير شي؟
مُلاذ : من اجي نحجي
لا تطلعين صوت يمها و تكعدينها
ملاك : تمام بس جسار و سلطان اجو لـ هنا
گالو رادو يتطمنون علينا
مُلاذ : تمام ، هسه شويه و اجي
قفلي البيبان ابد لا تفتحيها لـ اي احد
ملاك : و انتِ شلون تدخلين؟
مُلاذ : ابقي كاعده من اجي اخابرج
بس افتحي الي الباب الجوا
لان ما شايله مفتاحها
ملاك : تمام
نزلت تلفوني سديت الاتصال
ما اتحملت ابقى كاعده اكثر
نزلت من السيارة دحگت لـ أيهم
بعده يحجي بـ التلفون ، رحت لـ يمه
رفع عينه دحگلي نهى مكالمته و سد الاتصال
أيهم : مو گلتلج لا تنزلين؟
مُلاذ : خفت عليك
أيهم : مابيه شي
مُلاذ : و اضح من حالة وجهك
كنبصت كعدت كدامه
جريت العلاكه انطيته مي
أيهم : شربت
مُلاذ : هم اشرب بعد
أيهم : المفروض انه الاداريج
مو انتِ تداريني
مُلاذ : مو دوم انت تداريني
شلون صرت؟
أيهم : بعد وكت
مُلاذ : من زمان اريد اسألك بس ما تخليني
أيهم : مو زين
مُلاذ : شسوي ؟ شلون تصير زين ؟
أيهم : خل نتزوج بسرعه و انه اصير زين
مُلاذ : لا تستهر
أيهم : و الله غير تريديني اصير زين؟
هيج اصير كلش زين
مُلاذ : مو صوجك
أيهم : طبعاً مو صوجي عقلج وصخ
قلصت عيوني ساكته
أيهم : نتزوج حتى انعل ابو اسكندر
و اي واحد غيره اذا رادو يطخونج
حتى تكونين كدام عيني و ما يصيرلج شي
مُلاذ : ما صارلي
أيهم : شكد تنرفزيني من تحجين هيج
عبالك انتِ صدك ما صارلج شي
و تحجينها بـ برود
مُلاذ : فعلاً ما صارلي شي
أيهم : صارلج و هواي هم لَـذه
اصلاً كعدتج هاي كدامي لو وحده غيرج
ما جان كدرت توكف على رجليها
مُلاذ : اتعلمت ما احبس روحي بـ موقف
شي صارلي بس راح
و رب العالمين نقذني و ساعدني
قبل لا يصير الي شي اسوء
و حتى يصير درس الي
ما اكدر اظل حاصره روحي بـ نفس الموقف
لازم اكمل حياتي و اتعلم من درسي
أيهم : عاد تعلمتي؟ عاد تبطلين تشلعين گلبي؟
مُلاذ : بس لو تفتهموني
أيهم : فاهمج لَـذه مثل ما متعلمه
ما تحصرين نفسج بـ موقف و لازم تكملين طريقج
لازم هم تتعلمين تحسبين حساب لـ كلشي
و لازم تتعلمين تتركين التسرع و القرارات العاطفية
مُلاذ : بعد امر خدمه؟
أيهم : تخدميني بـ بوسه
مُلاذ : مستهتر
ابتسم و ظل ساكت
كمنا صعدنا بـ السياره
و ظل يتطمن عليه خاف متاذيه
گلتله على رگبتي بس ما خليته يشوفها
راح يجيب معقم و كطن
و انا صورت الجرح اله
لمن رجع شاف الجرح
گلتله من نوصل لـ البيت اخابره
و يگلي شنو اسوي
أيهم : راسج متضرر؟
مُلاذ : لا
هز راسه ساكت
خابرني جسار يسأل عليه
گلتله رح ارجع لـ البيت
جسار : گلي لـ أيهم باجر امر اله
اخذ سيارتي لا يجيني هسه
خل يروح لـ بيته بيها
مُلاذ : تمام
سديت الاتصال منه
گلت لـ أيهم
أيهم : لا هسه اودي سيارته
و اخابر أيمن يجي ياخذني
مُلاذ : هو يگول روح بـ سيارتي لـ بيتك
أيهم : لا يابه شسالفه سيارة الرجال
صاحبك حلو لا تاكله كله
مُلاذ : لا تصير مؤدب هيج كلش
عادي هو گلك هاهيه ارجع بـ سيارته
و باجر يجيك ياخذها
أيهم : فوكاها هو يجيني
عمي شهالكرم هذا
مُلاذ : چا شعبالك ؟
أيهم : چا غير لسا ما نسيت
مُلاذ : اهو لحيت ترا
أيهم : لَـذه افتحي اذاناتج و اسمعيني
هالمره هالشي صار بعد ما يتكرر
و ما ترحين لـ مكان وحدج سمعتيني؟
مُلاذ : عود هو خطيبي عود
أيهم : لا تغيرين الموضوع
مُلاذ : أيهم ما احب امشي بـ راي احد
أيهم : قصدج تحبين تعاندين
بس و الله لَـذه اكضج انعل خير خيرج
اذا صارلج شي خوش لو لا؟
مُلاذ : اگلك أيهم
أيهم : ها
مُلاذ : ترا انا ما اخاف من التهديد
فـ لا تهددني ترا و الله ما اخاف
أيهم : شفتيلج فوصه تخاف؟
مُلاذ : لا و الله جديات ما اخاف
فـ حباب لا تهددني لان من واحد يهددني
تحصرني الضحكه عليه
دحگلي بـ طرف عينه
هز ايده
أيهم : انتِ متاكده من روحج بنيه؟
مُلاذ : ليش شبيييه؟
أيهم : اريد اتاكد انه هم شو خل اشوف
وسعت عيوني ضربت زنده بـ بطل المي
ضحك بـ صوت و دحگلي
مُلاذ : مستهتر
أيهم : شبيج غير نتأكد
مُلاذ : و الله انت صاير كلش مستهتر
انطيتك مجال هواي
أيهم : اي شوفي المجال
كلش جبير بيناتنا تدني عليه اكثر
مُلاذ : ام سوادي
أيهم : سوادي روحها و علة گلبها
قلصت عيوني ساكته
أيهم : لَـذه
حجا و فرك وجهه
أيهم : اسكندر شسوالج؟
مُلاذ : ما كدر يسويلي شي
ضربته و شردت و بعدين اجو الشرطه
أيهم : كل ما توكع عيني على شفتج
گلبي تكب بي نار
مُلاذ : ليش شبيها؟
سكت و فرك وجهه
الي انگلب احمر
نزلت الي تحجب الشمس
فتحت المراية يلي بيها
رفعت حواجبي بـ صدمه
لمن دحگت لـ شفتي الي متيبس عليها الدم
نزلت راسي ، سديت التحجب الشمس
هسه افتهمت ليش اتخربط وضعه
و ظل كاعد برا و ما قبل انزل يمه
جريت كلنس و مي ، نكعت الكلنس
مسحتها كل قوتي
لعبانه نفسي و أيهم يدور بـ وجهه عني
أيهم : شكد احاول اكون هادء وياج
بس ما جاي اكدر
مُلاذ : كافي غلط غلطته و خلص
أيهم : ما شفتي حنجج و شفتج
و ايديج شلون مخرمشه
خطوتج هاي و روحتج لـ هناك
اذتني كلش و اذتج
ظليت ساكته و هو يحجي بـ هدوء
بس مبين محروك گلبه
و گوه لازم روحه و ما يرجع يتعارك
لان ما يريد يزيدها عليه
حتى من ظل يتشاقى وياي
كل ضحكاته و طريقة كلامه مو حقيقية
و لا طالعه من گلبه بس يريد ينسيني و ينسي روحه
يعرف كلش زين اذا ظل الموضوع بـ بالنا
ثنينا نتاذى بعدين
حتى انا اكول ما احبس روحي بـ الموقف
بس الي صار الي مو سهل و كله غلطي
و جان ممكن يصير الي اكثر
كلام أيهم حقيقي بس ما اكدر اگله اي
و صحيح كلامك لان رح يظل يلح اكثر
و ما رح ينسى و يعبر الموضوع ابد
بـ الطريق نعست كلش
المكان كلش بعيد عن بيتنا
اتجتفت و غمضت ، غفيت
فتحت عيوني دحگت لـ أيهم يغطيني
رجعت غمضت ، و غفيت
فزيت مره ثانية على صوته
يحجي بـ صوت ناصي
أيهم : لَـذه
فتحت عيوني بـ ثگل دحگتله
أيهم : وصلنا
كعدت على حيلي فركت عيوني
دحگت لـ سترته عليه وخرته و انطيتهيا
جان لابس قاط علمود الخطوبه
مُلاذ : تنزل وياي ؟
أيهم : امج كاعده؟ حتى انزل احاجيها انه
مُلاذ : لا ما كاعده بس تعال اكعد شويه
صارلك هواي تسوق ارتاح و بعدين روح
أيهم : لا خل اروح انا أبيل نايم و هو ينتظرني
مُلاذ : بوسليا
أيهم : جؤ ماكو
مُلاذ : نحيس
أيهم : چا هو يحصل بوسه
و انه ما احصل شهالظلم و الاضطهاد
منا لمن نتزوج ماكو اله بوسه
مُلاذ : بس اشوفه اشبعه بوس
أيهم : ماكو اخيط حلگج
ماكو بوس بس الي
ابتسمت و ضحكت
دحگلي و ضحك ، نزلت من السيارة
قبل لا انزل وكفني
أيهم : لَـذه
مُلاذ : ها ؟
أيهم : انتبهي لـ نفسج
و ايالج و بالج تتصرفين وحدج بعد
مُلاذ : تمام
أيهم : من **** التمام هاي
يدخل الحجي منا يطلع منا
مُلاذ ما ترحين لـ مكان وحدج بعد فهمتي؟
مُلاذ : لا تلح اعرف شسوي
أيهم : كلش تعرفين نابغه اصلاً
مُلاذ : أيهم
أيهم : ها ها؟
مُلاذ : لا تلح
أيهم : لا تتفوصيين و انه ما الح
مُلاذ : اتفقنا
ابتسمت ودعته و دخلت البيت
فتحت باب البيت اتصلت على ملاك
ركضت فتحت الي باب المطبخ
شافت وجهي و حالي اتخبلت من الخوف
حتى ما ادري شنو اجاوبها و شنو احجي
ملاك : شصايرر؟؟
مُلاذ : اش صوتج امي رح تكعد
ملاك : شصاير شكوو؟
عبرتها و دخلت قفلت الباب و اجت وراي
دخلت غرفتي ذبيت شالي و العباية
رفعت عيني لمن دخلت الي ملاك
يلي تنقري نظرات القلق بـ عيونها
رجعت تسألني شصاير
ملاك : هاي ركبتج شبيهاا؟؟
مُلاذ : اسكندر
مسحت وجهي و كملت كلامي
مُلاذ : حاول يعتدي عليه
شهكت مكممه حلگها بـ ايدها
ملاك : شلووون شنو راد يعتدي علييج؟؟؟
مُلاذ : اسمعيني امي باجر لمن تكعد
اذا سألتج شوكت رجعت مُلاذ
تگليلها ورا ما نمتي بـ ١٠ دقايق
و ما ردت اكعدج ، فهمتي؟
ملاك : تمام ، بس شصار؟
مُلاذ : هسه گلتلج مختصر عوفي الباقي
و هالموضوع ما ينذكر كدام امي ابدد
افتهمتي ملاك؟
ظلت ساكته تدحك بـ وجهي
مُلاذ : افتهمتي ؟
هزت راسها بـ هدوء ساكته
مُلاذ : يلا روحي نامي
ملاك : بس ما جاوبتيني
مُلاذ : لا تخافين ماكو شي
و ها وين ما تشوفين عمي احمد
و اسكندر تحاجيني هسه رح انطيج تلفون
تاخذي وياج للمدرسة تخلينه يم الـمديرة
و بي رقمي تتصلين عليه من عنده
ملاك : ليش صاير شي؟
مُلاذ : ما صاير بس احسن
ملاك : ليش ما تحجين الي؟
ترا انا جبيرة و افتهم
مُلاذ : اعرف بيج جبيرة و تفهمين
بس لو صاير شي جان حجيت الج
انتِ لا تشغلين بالج هسه بـ هالسوالف
انا احلها ماكو شي
ملاك : اكيد؟
مُلاذ : اي اكيد
ملاك : مُلاذ انا اخاف عليج
مُلاذ : لا تخافين ما صاير الي شي
تعرفين بيه محد يكدر يسويلي شي
ملاك : مو خطفوج هذاك اليوم
مُلاذ : ولج يا هذاك اليوم
صارلها شكد سالفة الخطف
ملاك : بس خطفوج
مُلاذ : بس رجعت مو صحيح؟
هزت راسها بـ قبول
بعد كم دقيقة عافتني و راحت
اتصل عليه أيهم يگلي شلون اضمد ركبتي
مُلاذ : اعرف مو گلتلك دخلت دورات
أيهم : لو بدربج صايرة ضابط هم
و تروحين تشگين الدواعش قصرتي
مُلاذ : فكرت بيها
أيهم : انتِ شكيتي گلبي مو الدواعش
بطراكيعج هاي ولج تعبتيني
مُلاذ : أيهم لا تغثني
أيهم : انتِ لا تغثيني
سوي الاكوله عقمي ركبتج
و حطي فوك الجرح كلنس
و فوكاهن لزگة جروح
مُلاذ : ما اريد امي تنتبه الها
أيهم : ما مقهور على احد غير امج
نايمه و رجليها بـ الشمس بـ الفي
مو بـ الشمس حتى
مُلاذ : تادب مستهتر
أيهم : فوصة
مُلاذ : اكلك
أيهم : ها
مُلاذ : لمن جنت بالسيارة
ويامن جنت تحجي؟
أيهم : شوكت؟
مُلاذ : لمن گلت لـ واحد اريدك تلگاليا
يلگالك منو؟
أيهم : ما عليج
مُلاذ : شنو ما عليه؟
جاي تدور على اسكندرر مو؟
أيهم : هم ما عليج
مُلاذ : أيهم !
أيهم : لا تلحين ، باجر تروحين لـ شغلج؟
مُلاذ : ما عليك
أيهم : احجي
مُلاذ : هم ما عليك
أيهم : عود ترديلياها؟
جا هي هاي الصعبه
اجيج من الصبح اراقبج
مُلاذ : أيهم شتريد تسوي لـ اسكندر؟؟
أيهم : العب ويا
مُلاذ : لا تستهزء جاوب!
أيهم : ادغدغه
مُلاذ : لا تغثني ! احجي
أيهم : اش
مُلاذ : شبيك انت!
ترا بس تسويـ...
و هو يحجي سمعت صوت من يمه
مال واحد نعسان
-بابا
أيهم : ها حبيبي ليش كعدت هسه
أبيل : سمعت صوتك
ابتسمت اسمعهم شلون يحجون
حجي ابيل مكسر التاء يلفظها طاء
أيهم : تعرفني من صوتي انت؟
أبيل : اممم
أيهم : شو خشمك احمر؟
أبيل : بجيت لان ما اجيت
أيهم : شنو اتفقنا انه وياك
مو گلنا ماكو بجي و بابا يجي بس يتأخر
ليش تتعب بيبي و عمه؟
أبيل : ما يخابروك
أيهم : لا شلون خابروني
بس ما جاوبتهم جان عدي شغل
أبيل : ليش ما جاوبت؟
أيهم : غير گلنا عدي شغل
أبيل : ما تحبني
أيهم : انجب ولك شني ما احبك
أبيل : جا ليش ما تجيني
أيهم : باع رجع يبجي
ولك بابا والله جان عدي شغل
سمعت صوت أبيل يمه يبجي
و أيهم عايف التلفون و يسكت بي
أيهم : تعال خل اشيلك ولك
أبيل : مااااا
أيهم : لا تصيح خرب شرفك
الوادم نايمه
راح صوت أبيل
ثواني و سمعت صوت أيهم يحاجي
أيهم : تعال خل نسولف
أبيل : ما
أيهم : ولك بويه انت منين متعلم هالسوالف
نوب شلون متجتف تكول مرتي زعلانه مو ابني
اهتز جسمي اضحك على نبرة صوته
اتحمست اشوف شكلهم و أيهم شلون يراضي
أيهم : ولك دتعــال
هو انه وحده كافي تكمزها عليه
نوب انت شني تگلب على ابوك
أبيل : ما ولي
أيهم : ايا ادبسز اتادددب أبيل
رجع صوت أبيل يبجي
خوف الجاهل ظل هدوء
بس صوت أبيل يبجي ، دزيتله مسجات
بلكت يسمع صوت الاشعارات و يذكرني
لحد ما فعلاً سمعت صوته
أيهم : لَـذه
مُلاذ : زين من ذكرتني
أيهم : نسيت التلفون ذبيته
مُلاذ : شبي أبيل
أيهم : يتمزعل عليه عايز انه
بس هو بقى ، ازعل بابا ازعل بقت عليك
مُلاذ : خاب أيهم ما تدخل دورات ابوه
أيهم : انجبي
مُلاذ : يعني الجاهل يبجي عليك
و مشتاقلك و ضايج علمودك
تعيط بي و تخلي يبجي ؟
أيهم : و انتِ صارلج ساعه تتصنتين ي فوصه
مُلاذ : ما اتصنت بس سمعت بـ الغلط
كوم راضي أيهم خطيه اسمع صوت بجيه
ترا و الله يكوم يكرهك و اكرهك ويا
أيهم : انتِ دكاك الثوم بـ عجوسه
بـ كل عزه لطامه ، رابطج ع الفيشه تكرهيني ويا؟
مُلاذ : لا و الله أيهم صدك كوم راضي
گال بـ صوت ناصي
أيهم : اعرف قابل جايبه من الشارع
غير ابني بس ما يصير يحاجيني هيج
انه لا اخوه و لا صديقه ابوه انه
اذا يتعلم من هسه يگلي ولي
من يكبر شيحجي وياي؟
مُلاذ : صحيح بس خطيه
أيهم : اعرف هسه كم دقيقه و اكوم اراضي
حتى يحس هالشي غلط و انه ضجت منه
و ما لازم يسوي مره ثانيه
مُلاذ : جذب انا الي اريد ادخل دورات امومه يمك
أيهم : هههههههه انت بس تعال
انطيك عيوني ثنيناتهن
مُلاذ : ما اريد عيونك اريد اتعلم اصير ام صالحه
أيهم : يعني نسمي بتنا صالحه؟
ما توقعت هيج ذوقج لَـذه
من تكبر تكتلنا بـ الجنطه مالتج
مُلاذ : هم عيب على جنطتي
شبيكم وي جنطتي انتوا
أيهم : شبينا عيني شبينا
مُلاذ : اكلك
أيهم : ها اتفضلي
مُلاذ : كوم راضي الجاهل
أيهم : صار
مُلاذ : و افتح الكاميرا خل اشوف
أيهم : شتشوفين؟
مُلاذ : و انت تراضي أبيل
أيهم : دگولي مشتاقه لـ وجهك لا تستحين
مُلاذ : وين الحك اشتاق
اذا تطلعلي من جوه الكاع انت
أيهم : اطلعلج من المرگه
مُلاذ : شتسوي بالمركه؟
أيهم : ابقبق
ضحكت و گلت
مُلاذ : كوووم راضي أبيل و افتح كام
أيهم : غضب الله كمممت كمت
فتح الكاميرا دحگلها و سوا حركه بـ حلگه
ضحكت و ظليت ساكته ، ساده الكاميرا مالتي
ثبت تلفونه على مكان
دحگتله اتقدم و تمدد على بطنه بـ نص الجرباية
أبيل كاعد بـ زوية الجرباية
لام رجليه ، مغطي وجهه و فحطان من البجي
فد قهرني لو أيهم يمي اجتفه و اخلي أبيل يكتله
من يمي احترك گلبي
كعد أيهم عدل
شال أبيل من مكانه كعده بـ حضنه
و أبيل مستمر مغطي وجهه و جسمه يهتز
أيهم : شو كافي عاينلي
ظل أبيل منزل راسه
و مغطي وجهه وخر أيهم ايديه من وجهه
و أبيل رجعهن أيهم يوخرهن و أبيل يرجعهن
فددد عنودي
أيهم : رح اروح بعد ما تشوفني
رفع راسه أبيل و اعتلى صوت بجيه
أيهم : جذب ما اروح
بس تصير حباب و تسمعني
و لا تغطي وجهك ايديه كبار و ايديك صغار
ما اكدر الزمهن حيل و تتعور من وراي
و بابا ما يريد ياذيك زين؟
سكت أبيل بقى منزل ايديه عن وجهه
يدحك لـ أيهم ساكت
أبيل : ما ما تحبني
أيهم : شلون ما احبك
چا اذا ما احبك احبمن؟
أبيل : ماا تحب الحلوه
ضحك أيهم بـ صوت
ابتسم أبيل بس من دحگله أيهم
بسرعه رجع غندب ملامحه و سوا روحه ضايج
وسعت عيوني شلون بدل تعابير وجهه
ضحكت من كل گلبي
أيهم : قابل اجذبك انه؟ احبك و احبها
أبيل : لا ما ، تحبني انه بس
أيهم : خوش احبك انت بس
و انت ما يصير تگل لـ بابا ولي
أبيل : ليش؟
أيهم : ما يصير انه ابوك
عيب تگل لواحد جبير ولي
أبيل : اممم
أيهم : اي
رجع أبيل عبس ملامحه و بجى
أيهم : دخيلج يالزهره
ولك شبيك مو هستونا نحجي مثل البشر
فشلتنا بابا شبيك ؟
أبيل : صيحت عليه
دنى عليه اكثر و ظل يبوس بـ خده
بدون ما يوخر شفته عن خده ، بوسات متتاليه
و يشاوره و يسولف ويا لحد ما أبيل كام يضحك
ابتسم أيهم و ظل ساكت يدحگله
ابتسمت على نظراته لـ أبيل حسيته ارتاح
أيهم : ها اتفقنا ؟
هز أبيل راسه بـ قبول مبتسم
شال أبيل و تدنى على التلفون
كعده بـ حضنه كدام الكاميرا
أيهم : فنك منو هاي؟
رفع راسه إبيل دحگله ،
خلا طرف اصبعه بـ حلگه يفكر
رفع اكتافه بـ عدم معرفه ، ضحكت
هالولد حركاته تنكرط متعلم هاي الشيطنه من أيهم
أيهم : دفتحي كاميرا خل يشوفج
مُلاذ : ما لابسه شال
أيهم : اي البسي
مُلاذ : اهو أيهم
أيهم : تتأهوهين مني
ضحكت و گلت : شلون رهمتها
اخذت الشال الي مساع ذبيته ع الجرباية
و غطيت متوني بـ شال ثاني
رحت للتلفون ادحك لـ أيهم صافن
و أبيل يحوص بـ حضنه
أبيل : جوعان
أيهم : هسه حبيبي ننزل سوي اكل
اخذت تلفوني فتحت الكاميرا
مُلاذ : اجيت
دحگلي أيهم و گال
أيهم : ظهر علينا البدر من ثنيات الوداع
ضحكت ، أبيل بس شافني
طفر من حضن أيهم و اخذ التلفون
و هو يصيح فرحان
أبيل : الهلوووووووووه
فضحنا بـ العياط أيهم شاله وسد حلگه
أيهم : ولك انعل شيب الخلفك
شايفمن و هيج تصيح حتى الجيران درو
ضحك أبيل ، اخذ أيهم التلفون
رفعه على وجههم اندار لـ أبيل
يلي مخلي طرف اصبعه بـ حلگه
يضحك و يدحگلي
أيهم : شبيك متهيلك عليها مثل ابوك
مُلاذ : ولك أيهم الجاهل شيفتهم هسه
نوب تريده ما يغلط اذا انت تگله متهيلك
بالله اتعلم الكلمه
أبيل : الحلوه
أيهم : مرتي هاي
أبيل : ما الحلوه
أيهم : مرتي
أبيل : الحلوه
شاوره أيهم بس بـ صوت مسموع
أيهم : مرتي مالتي
أبيل : مااااا الحلوة مالتي
دحگله أيهم رافع تك حاجب
أيهم : هَلو
مُلاذ : مالت أبيل انا
ابتسم أبيل و أيهم اندار يدحگلي بالكاميرا
أيهم : تكيفين يالفوصه انه اعلمج
طلع من الغرفه مد راسه
شايل أبيل و التلفون و يمشي
گال بـ صوت ناصي
أيهم : لا تطلعين صوت
مُلاذ : رح اسد الكاميرا احتريت من الشال
أيهم : لا أبيل يظل يبجي
مُلاذ : أبيل لو ابو ؟
أيهم : ثنيناتهم يتگابلون و يبجون
ابتسمت و ظليت ساكته نزل أيهم الدرج
و أبيل ماد راسه بـ التلفون يسولف وياي
أيهم : بابا نصي صوتك
بيبي و عمه نايمات مو صحيح ؟
دحگله أبيل ، هز راسه بـ قبول
دخلوا المكان فتح أيهم ضوه خفيف
نزل أبيل كعده ع الكرسي و ثبت التلفون
صعد أبيل كعد ع الميز يم التلفون
گال بـ ضحكه
أبيل : كعدت يم الهلووه ههههه
أيهم : عفيه خوش انجاز
انه ما كدرت اسوي
شكد ضحكتني هاي المكالمة
اجا أيهم كدام الكام
خلا ايديه على جهتين الميز
رفع راسه دحك لـ أبيل
أيهم : شسويلك اكل ؟
رفع أبيل اكتافه ما يدري
و أيهم يدحگله
أيهم : بيض؟
كشول أبيل تعابير وجهه
هز راسة بـ رفض
أيهم : لا تكشول وجهك هيج
حرام بابا نعمة الله ، انت تعشيت؟
أبيل : لا
أيهم : ليش ؟ لان ما اجيت ما اكلت و عاندت مو ؟
أبيل : اممم
أيهم : ولك أبيل ولك
دار وجهه أيهم و راح للثلاجه
يدور ، سدها و دحك لـ التلفون
أيهم : هسه اجي
أبيل مو تظل تلعب بـ الطباخ
دقيقة و اجي و انزل تعال انزل من الميز لا توكع
أبيل : مااا
أيهم : من ارجع اصعد
عبس ملامحه أبيل
و أيهم شاله خلاه ع الكرسي
طلع من المطبخ كام أبيل
صعد ع الكرسي و رجع كعد ع الميز
مُلاذ : لا أبيل حبيبي اكعد ع الكرسي
أبيل : ما ، اريد يمج
مُلاذ : اخذني وياك و اكعد عالكرسي
أبيل : امم
هز راسه بـ قبول ابتسمت دحگتله
خل الكاميرا لـ جوا و ينزل راسه يدحگلها و يبتسم
وكف ع الكرسي و نزل ثبت التلفون ع الكرسي
و رجع كعد يمي
أبيل : هسه هلو؟
قصده "حلو المكان؟"
مُلاذ : كلش حلو
أبيل : بابا يسوي اكل و انه اكل
مُلاذ : عفيه ههههه
أبيل : ما يهبني
مُلاذ : لا يحبك
أبيل : يروه هواي ما يجي
مُلاذ : لان عنده شغل
بس هو يحبك دائماً يكلي
اشتاقيت لـ أبيل و يسولفلي عنك
أبيل : صدك؟
مُلاذ : و الله
ابتسم بـ رضا
سمعت صوت أيهم
أيهم : وين التلفون ؟
أبيل : كعدت الهلوه يمي
مد راسه أيهم دحك لـ التلفون
بـ نظرة ضحكتني
أيهم : گرة عينك أيهم
أبيل : عيونك بقبق
ضحك أيهم و اجا شاله
أيهم : تعيب على عيوني؟
و انت عيونك جق جق هاكدوتهن
أبيل : هلوات مثل مال الهلوه
أيهم : اي لان انت ابنها مو ابني
أبيل : ها؟
أيهم : ماكو شي بابا
بيبي مخليتلك اكل
أبيل : شنو؟
راح أيهم يشوف هو و أبيل
جابوا الاكل نزل أيهم إبيل
راح يحمي اله الاكل و هو يحمي صار صوت
مبين جان صوت أيمن
أيمن : هاي شجاي تسوون ؟
اخذ أيهم التلفون سد الاتصال
نزعت الشال وخرتهن عني
اخذت ملابس و دخلت سبحت
صار جلدي احمر دم كد ما ليفت
احس لمسات اسكندر الوصخ بعدهم عليه
اتنرفزت و ضجت رگبتي بي زلغات
و شكلي واضح صايرلي شي
شنو احجي لـ امي باجر ما اعرف
تنهدت و طلعت ادخل روحي بـ مصايب
ما الها لا اول و لا تالي
تمددت و انا لافه شعري بـ الخاولي
و غفيت على هالحال ،
كعدت الصبح على اتصال
درت وجهي ، دحگت لـ تلفوني
اخذت التلفون دحگت رقم ضرغام
مُلاذ : الو
ضرغام : هلا مُلاذ
اعذريني داك عليج من الصباحيات
مُلاذ : لا لا عادي لگيتو شي ؟؟
ضرغام : ما لگينا البارحه انفتح خط اسكندر
طلعنا اله انا و العميد و من وصلنا لـ هناك
گال انا جنت بـ بيت صديقي
لمن سألنا صديقة گال اي صحيح اجا يمي
فلان وقت يعني بـ اختصار هالمره طلع منها
مُلاذ : مستحييييل
شلون يكدر يخلص بـ كل مررره!!
ضرغام : كل اللمسات لمساتج
و الدم الي ع الكاع يعود الج
اما هو ف ما اكو اي اثر يدل عليه
مُلاذ : و بـ هالحالة ما رح يصير اله شي
ضرغام : انا اشوف اله صرفه
المهم انا خابرتج لان اسد هسه
اخذ سيارتج و جايج بالطريق
مُلاذ : تمام شكراً ضرغام
ضرغام : العفو ما سويت شي
نزلت تلفوني سديت الاتصال
الهم اكل گلبي اذا درا بي أيهم ما مسجون
مستحيل يعوفه بـ حاله
وخرت المنشفه يلي واصلة لـ نص شعري
طلعت لـ الهول ، سمعت صوت امي من المطبخ
دخلت دحگتلها
مُلاذ : صباح الخير
اندارت دحگتلي عكدت حواجبها
اجتني سلمت عليه
فيروز : شنو هاي ركبتج و شفتج شصاير؟؟
مُلاذ : ما صاير
تلمستهن امي ، ملت بـ راسي
ابتعدت عنها
فيروز : شنو هاي مُلاذ ؟؟
مُلاذ : ماكو شي البارحه
شفت بزونه بـ الشارع نزلت اريد اشيلها
طلعت متوحشه و مجلوبه و خرمشتني
عكدت حواجبها امي
فيروز : اكيد؟
مُلاذ : اي
فيروز : لييش تشيلين البزازين الي بالشاررع ؟! كلهن امراض و وصااخه ليش ما تكعدين راحه؟
مُلاذ : سبحت اصلاً
فيروز : بعد لا تعيديها ديربالج
مُلاذ : تمام
اندك الباب البيت
مُلاذ : انا اطلع هذا اسد اجا
فيروز : اطلعي و تعالي بسرعه
اريد احاجيج
هزيت راسي رحت اخذت شالي و عبايتي
طلعت لـ اسد انطاني السويج
مُلاذ : شكراً
اسد : العفو
فتحت الباب صعدت بـ السيارة
و دخلتها لـ الطرمة ، نزلت منها رجعت طلعت
مُلاذ : اسد
اسد : هلا گولي؟
مُلاذ : اريد اركب كاميرات
بـ الطرمة و كدام البيت
اسد : تمام هسه اشوف الج صاحبي
مُلاذ : تمام ، شكراً
هز راسه ساكت
دخلت لـ البيت رحت لـ امي
نزعت شالي و عبايتي
مُلاذ : ها فوفو شنو ردتي تگولين؟
فيروز : شصار على مشية الزلم البارحه؟
مُلاذ : هو أيهم رايح هو و اخوانه
و خاطبيني و عمي موافق و هاهيه
فيروز : هيج وافق؟
مُلاذ : اي
فيروز : شعجب
مُلاذ : مادري
فيروز : لو مسوين الخطوبة ببيتنا هنا
مُلاذ : نفس الشي
فيروز : اگلج مُلاذ
مُلاذ : ها
فيروز : انتوا غير بس خطوبة هسه؟
مُلاذ : اي اكيد و منا لـ فترة طويلة
هزت راسها ساكته
حسيتها اتطمنت اكثر
مُلاذ : كاعده على گلبج فوفو
ضحكت و كامت من يمي
هتان :-
اخذت اخير صورة
قبل لا اسمع جملة امي الشهيره
امي : الناس تكعد الصبح تتريك
يشوفون دربهم يذكرون الله
انه بتي التلفون ملزوك بـ ايدها و تصور
نزلت شعري يلي جنت رافعته بـ ايدي
كـ وضعية للـ الصورة ، التفتت لـ امي
هتان : يعني واذا صورت الصبح
شكلي حلو اليوم و صورت
امي : تعالي خل نسوي ريوك
مو بس طول لسان
هتان : ?mamy what is wrong with you
امي : عربي احجي عربي
بطلي هالكلمات ما افهمهن
هتان : Okey my soul
امي : عدل احجي عدل
رح اشيل نعالي و تعرفين شيصير اذا شلته
هتان : you are so bad
why you speak with me like this
mammmmy?
دنگت تشيل الي بـ رجلها
طفرت اركض من المطبخ طلعت اضحك
امي : ادبسززز باع التشنتر
هسه يجي أيهم يترجم الي حرف حرف گلتي
ضحكت ، وكفت بـ باب المطبخ
امي وكفت تسوي بيض
رحت وراها حضنتها ابوس بـ خدودها
امي : ولي ادبسز
هتان : داتشاقه وياج
امي : روحي عني
هتان : ماا
امي : وخري ولج خل اذب الگشر
رح يوكع بـ الطاوه
هتان : ما اوخر منا لمن تصالحيني
امي : صالحتج امشي كعدي اخوانج
خل يجون يتريكون فد مره
وخرت عنها ، حجيت بـ تضجور
هتان : شكد اكره اكعد أيمن
لو ينضرب مدفع يمه ما يكعد
مشيت و انه احجي و ادردم
داهمت غرفة أيمن فتحت الضويات
ركضت ع البردات فتحتهن ، عليت المروحه
رحت لـ غرفتي اخذت مناظر لبستهن
شديت قميص على خصري
رجعت لـ غرفة أيمن دورت بـ كنتوره
لكيت شفقته لبستها بـ المگلوبي
اخذت قميصه لبسته فوك قميصي
فتحت الديجي يلي بـ الغرفة
ربطت تلفوني عليه ، اخذت مراية أيمن
خليتها كدام الشباك ، شغلت اغنية اجنبية
بصوت عالي و وكفت اصور روحي بـ المراية
و انا اركص ، اسمع أيمن يشتمني
فحطت من الضحك ، درت الكاميرا عليه
هتان : كوووم اكعد من النومه
يا احمد حماديد يا احمد حماديد
كوم اكعد من النومه يا احمد حماديد
نصيت الاغنية
سمعت امي تصيح عليه من جوا
امي : ولج هتااااان گلتلج تكعدي لو تخبلينه
هتان : هههههه ماما ما يكعد غير هيج
أيمن : انتِ جلبة لو جلبة ؟؟؟
هتان : كوووووووم اكعد من النوم
يا احمد حماديد
شال مخدته شمرني بيها
طفرت و اخذت المخده رجعت هفيتها بي
و هفيته بـ طوبه اسفنج صغيرة
طاحت بـ عينه بس ما تاذي
بس يمكن انفكست عينه ما صارله شي
عاط بيه بـ صوت عالي
و كام يركض وراي صرخت بـ خوف
هتان : ولج يماااااااااااا
طلعت ركض من الغرفة
تيهت مشرادي منين دخلت على غرفة أيهم
اركض و اصيح
هتان : ولج يمااااااا
أيهم : شكووو؟
جلبت بـ ظهر أيهم و أيمن دخل وراي يركض
و اسمع امي تصيح من جوه
امي : ولج هتااااان سويتي حالة استنفار
بـ البيت لو مكعدتهم انه احسن الي
أيهم : شسويتي ولج؟
اندار عاينلي
و انه وراه خاتله ، أيمن يريد يجيني
أيهم : اصلاً ماكو داعي تگولين فهمت
ابتسمت بـ شر
انداريت لـ أبيل الكعد
أيمن : تعالي ولج جلبببه
اكووو واحد يضرب هيج ؟؟؟
وخر أيهم
أيهم : انجب اشكك اذا مديت ايدك عليها
أيمن : ولك ضربتني بـ عيني بالطوبه الجلبه
أيهم : تعال حبيبي تعال انفخلكياها
ختولي زعطوطه ما عليك بيها
أيمن : و الله اكتلها
أيهم : انجب أيمن تعال خل انفخها
أيمن : عمتني شتنفخ
أيهم : معليك هسه انه هم افكس عينها
بس تعال خل انفخها الك
حط تشيرته على عين أيمن
و ظل ينفخ بيها و ياشرلي اشرد
طلعت ركض نزلت جوه دخلت للمطبخ اضحك
امي : شسويتي من مصايب
هاي شلبستي
هتان : سويت فعاليات لـ أيمن
امي : هسه يجي يكتلج ما عليه
مو تختلين وراي
هتان : اختل ورا أيهومي قحط
امي : امشي صيحيهم رح اصب الريوك
هتان : ما اخاف من أيمن
امي : امشي ولج
قلصت عيوني درت وجهي و طلعت من المطبخ
نزعت الشفقة و المناظر ، عاين الي أيمن
هتان : اسفه أيموني
أيمن : انجبي
هتان : تاج على راسي
خزرني ضحكت و گلت
هتان : صبينا ريوك
أيمن : جاي
طلعت من يمه
رحت لـ يم أيهم لكيته يحجي بـ التلفون
أيهم : جان جبتها الك انه
ليش تتعب روحك ، تسلم ، تمام
هسه انت دخلت بـ الفرع؟ انتظرني طالعلك
سد تلفونه ، شال أبيل من الجرباية
هتان : منو جاي ؟
اندار و اجاني شايل أبيل
أيهم : جسار يريد ياخذ سيارته
عكدت حواجبي
هتان : يا جسار؟
أيهم : ابن عم مُلاذ اخذي أبيل غسلي اله
هسه اجي انه و ما عليج بـ أيمن
ظليت مصدومة جسار شجابه
خلا أبيل بين ايديه و طلع
أبيل : غسليلي
عاينت اله نزلته بـ الكاع
و ركضت لـ غرفتي ادحك من الشباك
شباكها يطل ع الباب مال شارع
شفت أيهم فتح الباب و طلع
ظليت واكفه و اكرض بـ شفتي
اتخوصرت كمت اكرض بـ اظافري
عدلت وكفتي لمن شفت جسار دخل الطرمه
و أيهم يسلم عليه ، ظليت جامده بـ مكاني
ادحك الهم يتسالمون و يسولفون
انطا أيهم سويج لـ جسار
ضحك جسار يهز بـ راسه
كتلني الفضول كتل
شتسوي سيارة جسار هنا
جريت كرسي كعدت مگابله الشباك
شويه وصعد جسار بـ السياره
طلع من يمنا و ودع أيهم ، ركضت اخذت تلفوني
خابرت لـ جسار ، ظل يرن بعدين جاوب
هتان : جسار؟
جسار : هلو هتان
هتان : هلو ، شسمه شفتك بـ الطرمه
من الشباك شتسوي هنا؟
جسار : سيارتي البارحه انطيتها لـ أيهم
و اجيت اخذتها هسه
هتان : ليش؟ يعني ليش انطيته سيارتك؟
جسار : ورا ما اجا هو و واخوانج
حتى يخطبون مُلاذ من عمي
صارت مشكله صغيره و اخذ سيارتي
هتان : لعد ليش ما اخذ سيارة أيمن و باهر؟
جسار : اتخربط اخوج و همَ اخذوا للمستشفى
بعدين رايحين يجيبون اله ادويه
و هو طلع وي سلطان و اجاني و اخذ سيارتي
هتان : شنو شنو اتخربط ؟
جسار : ما صار شي لا تخافين
بس ضغطه شويه گلتلج صارت مشكلة
و هو ضاج من عدها ف اتخربط شوية
هتان : ليش ما گللنا؟
جسار : ما ادري يمكن ما يريد يخوفكم
بس انا لساني ما يضم سالفة
هتان : لا عادي ، تمام
جسار : بعد رايده شي ؟
هتان : لا شكراً
جسار : اهلاً و سهلاً
نزلت تلفوني سديت الاتصال
يا ربي شبيه ايديه ترعش
نوب الحراره صعدت لـ وجهي
طلعت من الغرفة ، رحت لـ غرفة أيهم
لمن تذكرت أبيل ، لگيت أبيل ماكو بـ الغرفة
لطمت خدي و ركضت ، أيهم يطيح حظي
اذا درا أبيل نازل الدرج لان يخاف يوكع
شفته بعده بـ النص هرولت شلته
هتان : شلون تنزل وحدك؟
أبيل : صحتج و ما اجيتي
هتان : غير تنتظرني ابوك يطيح حظي
اذا نزلت وحدك
ظل ساكت نزلنا انه وياه
أيمن كاعد و صافن دخل أيهم من بره
التمينا نتريك ، خلصنا گمت اغسل الماعين
انداريت لـ أيمن و أيهم و هم يحجون
أيمن : اگلك انت تسوي قاعة عرسك مختلطه مو؟
أيهم : ليش بويه ؟ شني المناسبة؟
أيمن : و الله تسويها مختلطه
أيهم : خاب د كوم بكيفك هي
أيمن : خلينا نشوف بدائع الرحمان بـ النسوان
غمزله أيهم
أيهم : بـ النسوان مو؟
أيمن : اي
أيهم : النسوان اسمهن صـ....
طفر أيمن سد حلگه
أيمن : اشششش
وخر أيهم ايد أيمن من حلگه
أيهم : تذكر شسويت بيه؟
أيمن : يتراوى الك مو انه
أيهم : اي ههههههه انه اعلمك
أيمن : لا بـ شرفك
أيهم : انقهرت عليك يلا لا تخاف سرك بـ بير
أيمن : بير بي امي و هتان و مُلاذ
و 100 شخص اخر
أيهم : بس اخير وحده بـ البير
أيمن : بالله مُلاذ عادي بس الباقين استر علينا
ضحك أيهم و هز راسه
لزكت بيهم اريد افتهم شنو يقصدون
بس ما حجوا الي ابد و طردوني
صار الليل ردت اصيح أيهم يشد الي النشرات
بـ غرفتي لان ما الوح الزكهن
دخلت غرفته دورت لگيته ماكو
دورت جوا هم ما لگيته ، عاينت سيارته موجوده
أبيل كاعد يم امي يسفط و هي تسمع اله
هتان : يمه وين أيهم ؟
امي : ما ادري مساع طلع
هتان : سيارته هنا
امي : رجع يمكن ، شوفي بـ الحديقة
عبست شفتي ، هزيت راسي بـ قبول
طلعت من البيت ادوره ، عكدت حواجبي
لمن سمعت صوت جاي من الحديقة الخلفية
مشيت بـ هدوء ، مرتبكه
اتوضح الصوت ، التقطته مسامعي
"اتعنه المچان الكعدته وياك
ما الكاك بس رايد اثر منك"
مشيت اكثر وكفت بـ الزاوية
دحگت لـ أيهم يلي كاعد ع الكرسي
يلي بـ الحديقة ، منطيني ظهره
كدامه كيكه و مشعولة بيها شمعه
عكدت حواجبي بـ استغراب
"بلجن كلمة ظلت ما نگلها الريح
الكاها و تجاوب بالنشد عنك
لو ادور عطر منك بقى على الكاع
احط نَفسي عليه افيش اشمنك"
يسمعه و يعيد بي
سمعه فوك الخمس مرات
سد الفيديو
أيهم : عيدك بـ الجنه
گالها و نفخ الشمعه ، رجع ظهره لـ ورا
اكدر اسمع صوت شهگته لـ النفس
كوه يتنفس ، كام من مكانه لازم صدره
ظل صافن و خطواته تختل
راح لـ نهاية الحديقة ، وكع على ركبة بـ الگاع
ظل جسمه يهتز بـ طريقة غريبه ، عبالك يبجي
رفع راسه لـ السما ، اقتربت اكثر منه
ضرب ايده بـ الگاع
رفع ايده يلي بيها جكاره بين اصابعه
خلاها على محاجر عيونه ، يبجي
انداريت على صوت خطوات ، عاينت لـ أيمن
عاين الي و لـ الكيكه ، عكد حواجبه
أيمن : شتسوين هنا؟
هتان : ردت اصيحه ولكيته هيج
أيمن شبي خل نروحله ؟؟
أيمن : روحي انتِ
هتان : ليش شصاير ؟
أيمن : روحي ما صاير يلا
هتان : أيمن
أيمن : هتان امشي!
عكدت حواجبي عفته و مشيت
ابتعدت عنهم ، شويه و رجعت
الفضول ياكلني اكل ما يدخلوني بـ شي ابد
وكفت بـ نفس مكاني ضامه نفسي عنهم
أيمن : بس فهمني شبيييك شبيك
كل سنه بـ هذا اليوم هيج يتخربط حالك!!
قبل لا اروح انت جنت هيج منتبهه انه
أيهم هدء ، رافع راسة للسما
ساكت و بس يدخن
أيمن : الو ويامن احجي
أيهم : عوفني
أيمن : حاجيني شصار بهاليوم
هذا الكيك المن تجيبه ؟؟
أيهم : لا تلح وياي روح
أيمن : احجي اكو شي يخصنا مو؟
صار شي يخصنا بس انت تعرف بي مو؟
أيهم : كلشي ما صار لا تدور سوالف
أيمن : عليمن تحرك بـ روحك حرك
و تبجي رَماد انت ما تبجي على اي شي
كام أيهم نكث ملابسه و مسح وجه حيل
شال الكيكه من الميز ركضت دخلت جوه
سويت الدرج بايتين صعدت غرفتي
كم دقيقه و سمعت أيهم يصيح
أيهم : جبت كيك تعااالو
نزلت سويت روحي كل شي ما ادري
لان اعرف حتى اذا اسأل يرزلوني و ما يحجون
كعدت اقطع من الكيك و اكل
هتان : أيهم
أيهم : ها
هتان : اريد تشد الي النشرات
أيهم : يا نشرات؟
هتان : اضويه هيج ملونه
اشتريتهن اريد ازين الغرفة بيهم و اريد تلزكهن
أيهم : خوش
هز راسه و ظل ساكت
كل شوية يصفن على امي
من تنتبهله يظل مثبت نظره عليها
وظل هيج وضعه لحد ما كمنا و شدينا النشرات ...
ملاك :-
طلعت من مدرستي
خابرت لـ مُلاذ من بعدها انطتني تلفون
گلتلي اخلي يم المديرة حتى من اطلع اتصل عليها
اتصلت عليها ظل يرن كم ثانية و جاوبت
مُلاذ : الو ملاك
ملاك : هلو مُلاذ انا طلعت من المدرسة
مُلاذ : يمكن اتأخر
بس هسه اخلص شغلي و اجيج بسرعه
ملاك : هواي تتاخرين ؟
لان خاف المدرسة تفرغ و ابقى وحدي
مُلاذ : لا لا مو هواي هسه اجيتج
ملاك : تمام
سديت الاتصال
و ظليت واكفه انتظرها
دخلت لـ جوا
كعدت ع الكرسي الحاطينه يم الباب
كم دقيقه دخل الحارس و صاح
الحارس : يا هيه ملاك إلياس
اندارن البنات يدحگن
كمت و گلت : انا
الحارس : ينتظروج
جريت جنطتي و طلعت بسرعه
دورت بـ عيوني على سيارة مُلاذ ماكو
لحد ما وكعت عيني على سلطان
يلي يتقدم ناحيتي ، درت وجهي اريد ارجع
انداريت لمن لزم ايدي موكفني
سلطان : وين رايحه؟
ملاك : مُلاذ تجيني
سلطان : ما تجي
ملاك : خابرتها مساع گالت رح تجي
سلطان : و هسه خابرتها انا گتلها جاي الج
هو يحجي اجاني اتصال
فتحت الخط گلتلي مُلاذ سلطان اجاج
ردت اگلها اريد انتظرها بس سكتت
و سديت الاتصال
سلطان : يلا اصعدي
ملاك : اريد مُلاذ
سلطان : عدها شغل
ملاك : حتى لو انتظر
سلطان : لا تطلعيني عن طوري
ظليت ساكته اخذ جنطتي من متني
خلاها بـ السيارة ، اندار الي اشرلي
رحت صعدت بـ السيارة
اجا هو هم صعد و ظل يسوق
ورا تقريب ٥ دقايق من هالهدوء ، گال
سلطان : ليش ما ترضين اوصلج و ارجعج؟
و لا تقبلين تصعدين وياي ؟
ملاك : اروح وي مُلاذ و ارجع وياها
سلطان : و قبل ؟ مو جنتي ترحين وياي
و ترجعين وياي
ملاك : نفس الشي
سلطان : انتِ تخافين مني ؟
ملاك : ليش اخاف منك؟
سلطان : تخافين اذيج لو اسويلج شي؟
اتلعثمت بـ الكلام : لـ... لا
هزيت راسي بـ رفض
و حكيت حاجبي
سلطان : چا شنو التغير؟
ملاك : ما تغير شي
سلطان : لان گلتلج انا احبج؟
رفعت عيني ادحگله
لزمت ايد بـ ايد اخفي رجفتهن
ملاك : انت جبير
سلطان : انتِ هم جبيرة؟
ملاك : وين بعدني عمري ١٧؟
سلطان : اي و اني عشريني
حتى ما طاب الثلاثين بعدني يا الله
وكف السيارة على صفحه
اندار الي بـ كل جسمه
لمن يجيني دوم يكون مرتب لحيته
هالمره حالقها باقيه خفيفة
و مخفف شعره هم بحيث صاير يشبهه جسار
سلطان : و اذا احبج ؟
ملاك : مُلاذ ما تقبل
سلطان : شعليج بـ مُلاذ حياتج هاي !
ملاك : مادري
سلطان : زين گليلي شنو اليمنع
وين الغلط حتى ما احبج ؟
ترا الحب مو بـ ايد الانسان و لا بـ ارادته؟
سلطان : مو طلعت لـ الخارج سنين
جنت اكدر احب هناك
بس هناك و لا وحده عجبتني
رغم اشكالهن و كل شي بيهن
ممكن يجذب الرجال بس انا ما عجبني و لو ذرة !
سلطان : افهميني ملاك
اختج عبالها حبيتج علمود شكلج
و انا مو يم شكلج اصلاً لا علمود شكلج
و لا اي شي يخص المظهر
سلطان : انا من زمان
صرت اشوف قلة البنات المثلج
ما ادري اكو شي بيج يعجبني
سلطان : طريقة كلامج و هدوئج و تصرفاتج
كلها خلتني احس بـ راحه من احجي وياج تذكرين شكد اسولفلج و انطلق ؟
محد من قبل انطاني هذا المجال
و لا احد من سمعني جان منتبهه وياي
سلطان : انتِ سمعتيني و تجاوبتي وياي
و من تسولفين تسولفين بـ عقل بنية جبيره
ما تسولفين بـ عقل ١٧ سنه و اصغر
سلطان : تحجين عبالك الكدامي
انسانه عايشه صارلها فترة كلش طويلة
و تعرف الحياة و زينها و شينها
بحيث بـ كل مره تخليني مذهول بيج
سلطان: ما ادري ملاك ما ادري شنو احجي
اتمنى لو تشوفين نفسج من منظوري
و لو تحسين بـ شعوري شنو الج
احسج نقية نقية لـ درجة و بـ طريقه
ما رح تكدرين تفهميها
ظليت ساكته و هو يحاول يفهمني
من بعد صمتي يلي دام لـ دقائق گلت
ملاك : ليش ذاك اليوم
تعاركت وياي بـ بيت عزيز ؟
انا ما جنت مسويه شي غلط
سلطان : ملاك ما خليتي عقل بـ راسي
يعني بـ ربج تحجين صدك من مخليه وجهج
بـ وجهه عزيز و تضحكين و تسولفين ويا
بـ نص الكل ادحك لـ عمتي تغمز لـ امج
و امج على فطاريتها تضحك
ملاك : بس ما جنت منتبهه؟
جنت تكدر تنبهني
سلطان : نبهتج جا شسويت انا؟
ملاك : لا عطت بيه و ظليت تصيح
سلطان : ما عطت بيج بوية
شلون اعيط بيج انا
هو انا ما اقبل واحد يصيح عليج
ملاك : لعد انت مو صيحت؟
سلطان : ما صيحت و جنت متنرفز
ملاك : و الله صيحت
ظليت تجرجر بيه بالمرجوحه
سلطان : اسف ما تنعاد
ملاك : تمام
سلطان : اتصالحنا؟
ملاك : اي
ابتسم و هز راسة بـ قبول
وكفنا يم محل و نزل اشترالي
رغم ما اشتهي حلويات ولا اطلب
بس دوم يشتري الي ...
مُلاذ :-
اتصل بيه عمي محمد
و گلي نروح اله انا و أيهم
استغربت ليش و شكو؟
مُلاذ : صاير شي ؟
محمد : من تجون تعرفون
و اذا تريدين تجيبين امج و عمتج بعد
لو اكدر جان انا اجيتج بس ...
مُلاذ : زين نجيك بس شكو؟
محمد : تعالي بويه و تعرفين
عگدت حواجبي مستغربة
مُلاذ : تمام
نزلت تلفوني سديت الاتصال
خابرت لـ أيهم گلتله عمي يريدنا
اخذت امي و ملاك و رحت الهم
و أيهم اصلاً رح يجي
رغم عمي هذا هواي جفص وياي ورا ما انخطفت بس قبل فترة و من صارت سالفة عمتي
و لمن حبسهن ابو اسكندر هي و نور
من عدها انعدل عمي محمد
وصلنا لـ بيتهم و نزلنا دكينا الباب
ظلينا منتظرين و واكفين
رجعت دكيتها مره ثانية سمعت صوته
-اجيت اجيت
فتح الباب سلمنا عليه
گللنا ندخل سأل عن أيهم گلتله جاي وراي
استغربت وضعه تعبان
دخلنا كعدنا بـ الاستقبال
اجت مرته سلمنا عليها
دخلن بناته هم سلمنا عليهن
ورا نص ساعه من مواضيع عامه
و حجي و سوالف ، اندك الباب
كام عمي يفتح الباب شويه و دخل أيهم
سلم و كعد گبالي
أيهم : اي عمي خو ما صاير شي ؟
اتقدم عمي محمد بـ تعب كعد
اجت مرته قدمت النا جاي رادت تطلع
گللها عمي تبقى ، اجت كعدت يمي
محمد : عمي جبتكم اليوم
و جبت اهل مُلاذ حتى يصير عدكم علم
ردت بس انتوا اسولفلكم حتى تفتهمون الوضع
مُلاذ : شكو عمو صاير شي؟
مسح وجهه و گال
محمد : من يوم الرجعتن من الخطف
نزلت دموعه و مسحهن
اشرت لـ ملاك تكوم تطلع
لان بس ينذكر الخطف كدامها
تظل تتحلم و تخاف و يرجع كل شي
كامت هي هم بـ هدوء استاذنت و طلعت
كعدت يم بنات عمي ، كمل عمي كلامه
محمد : من يوم الوديتجن للفحص
و شكيت بـ مصادقيتج انا ما توفقت بـ حياتي
يبجي و يمسح بـ وجهه
محمد : حوبتج ما تعدتنا
الحق ينگال و الصدك ينگال
ماكو شي مخفي عن رب العالمين
كل شي يشوف و كل انسان ينطي جزائه
اجيتينا و جنتي مظلومه و ظلمناج اكثر
انتِ و اختج و حتى امج
و ما حافظنا على امانة ابوج
جر نفس و كمل بـ تعب
محمد : انا مريض و وضعي كلش تعبان
عكدت حواجبي بـ استغراب
درت عيني لـ مرته يلي بجت
و تمسح بـ وجهها
محمد : أيهم يعرف بـ مرضي
درت عيني لـ أيهم خزرته
ليش ما گال الي !
محمد : و هو الكتب الي علاجات
و هي يلي ساعدني و شفته فعلاً رجال
و بـ معنى الكلمة ينشد بي الظهر
عمي انا ما باقيلي هواي بـ الاكثر شهرين و نص
و انتوا صارلكم فوك الشهر مخطوبين
اذا تسرعون بـ زواجكم افضل
مُلاذ : اوكف عمي اول شي سلامتك
و ما بيك غير العافية و انا مسامحتك
ما عندي شي وياك ، ان شاء الله اكو علاج
او فد شي يساعدك و تطيب
مُلاذ : بس انا و أيهم جنا مقررين نظل مخطوبين
حتى لو فوك السنه لان انا لازم ارتب وضعي
ما اكدر اتزوج و اعوف اهلي بـ مكان
و اكعد بـ مكان منو الهم غيري ؟
محمد : عمي گلتلج انا وضعي خطر
هذا النفس گوه اجره و كبرت بعد
اذا اجا حد يومي و متت
من هسه اگلج عمج احمد ما يخليج تتزوجين
أيهم : و شعليه هو ؟
غير انه اجيتك و طلبتها منك
محمد : ابني احمد هو الاكبر من بعدي
عاداتنا احنا اذا البنيه عدها عمام
هم الي يوافقون على زواجها و خطوبتها
و كل شي يخصها و طبعاً بعد ما يسألوها
و انا من خابرت لـ فيروز گلتلي مُلاذ موافقة
لذالك وافقت و ما گلت شي
محمد : و احجي الك الصراحه ابن احمد
اسكندر من زمان هو رايد مُلاذ
اذا بقت السالفه يم احمد اعتبر مُلاذ لـ اسكندر
لان يسوي كل شي علمود راحة ابنه
هو اخوي و على عيني و راسي
بس اعرفه شيسوي و شنو ما يسوي
أيهم : عمي شنو مُلاذ لـ اسكندر
يدوسون جثتي يلا ياخذوها مني
محمد : احمد كل شي يسوي
ثق بـ الله يطلع الف سالفه من جوا الكاع
و اذا ساكت هسه هوَ فـ انا مسكته
احترمته يوم المشيه و گلتله يجي
و كدام عينك جاب ابنه و گال ناهي على مُلاذ
من ما قبلت بـ الخطوبه لان احمد حفر راسي
بعدين بـ كلامك و من تفاهمنا قبلت
محمد : انا گلتلكم و اريد امن على مُلاذ يمك
لان اسكندر دگاته چثرت هالفترة
ما اثق بي و لا بـ شنو يسوي
الي يقبل على حبس اخته و عمته شنو اتوقع منه
انا حطيت مُلاذ و ملاك بـ مقام بناتي
و محد يقبل على بناته يتزوجن واحد طايش
محمد : و وي كل هذا
اخير شي امي الله يرحمها وصتني
بـ بنات إلياس و گلتلي ما اخليهن يصيرلهن شي
انتوا فكروا بعد ، الاحل الانسب زواجكم
بـ اقرب وقت
دحگت لـ أيهم يلي ساكت و يدحگلي
ظلينا نحاجي عمي و طلع مريض بـ سرطان الدم بحيث حتى وجهه مبين عليه المرض
و بـ مرحله متقدمه ، كلش انقهرت
و ملاك من سمعت كامت تبجي
طلعنا من يمهم و ودعناهم
و گلتلهم اذا يحتاجون شي انا موجوده
انداريت لـ امي لمن ندستني و گالت
فيروز : مو گلتي گبل قبلوا؟
شنو هالحجي هسه اسكندر جاي لـ هنا
و گايل هو ناهي عليج ؟! و صايرة مشكلة
مُلاذ : بعدين امي خل اشوف أيهم و اجيج
هزت راسها بـ قبول
راحوا صعدوا السيارة
رحت لـ أيهم دحگتله
مُلاذ : ليش ما گلتلي عمي مريض
أيهم : هو ما خلاني اگول
مُلاذ : شلون عرفت؟
أيهم : من اجينا اصلاً
بـ مجرد عاينت اله افتهمت
و من سألته طلع فعلاً مريض و من زمان
حاولت اساعده بـ علاجات و دكاتره
بس ماكو فايده عمج منتهي
و هسه يگول اكثر شي شهرين
انه اگلج عمج اكثر شي يعيش شهر
هاي اكثر شي
مُلاذ : زين هسه شلون؟
أيهم : مال عمج احمد يتحكم بـ خطوبتنا لو زواجنا هاي ايسي منها و علي اكضج و اخطفج
و ما اظل اتناقش وي هذا الغثه الخايس
مُلاذ : اتفق بـ نقطة انو هو غثه و خايس
بس گلي شلون انا اهلي محد عدهم غيري
ملاك صغيرة و امي جبيره و ما تكدر تشتغل
و تدبر فلوس لـ البيت و لا تكدر تطلع و تتسوك
و هاي ابسط الاشياء انا بـ البيت
حتى المراوح اصلحها و كل شي اشتغل بـ البيت
أيهم : لَـذه النادره اندر من العناصر النبيلة
ضحكت و گلت
مُلاذ : عوف الشقه هسه
حاجيني شنسوي ، نفسخ؟
أيهم : حلولج دائماً تلعب الروح
مُلاذ : چا شلون ؟
أيهم : عايني انه اربعه و عشرين ساعه ادور
لكيت قبل كم يوم شقة فوك و شقه جوه
و قريبات على بيت اهلي هم
نشتريهن و نكعد هناك
مُلاذ : شني اوكف يمعود
جاي احسك كفختني راشدي
حتى بعد ما عدي مجال اتحجج
أيهم : هههههه شعبالج لَـذه الفوصة
مُلاذ : زين شني اوكف منين نشتريهم؟
منين عدنا فلوس ؟
أيهم : ولج انتِ شعبالج
غير عندي بيت ابيعه بـ مبلغ يجيب الشقتين
مُلاذ : اوكي شقتنا انت تشتريها
بس شنو تشتري شقة اهلي ؟
أيهم : لَـذه
مُلاذ : ها؟
أيهم : انجبي حبيبي
مُلاذ : لا أيهم شنو تشتري لـ اهلي شقة!
شنو السالفه نوب من فلوس بيتك
أيهم : مُلاذ رح نتزوج اهلج اهلي
مُلاذ : مادري بس ما احب هيج
أيهم : لا تتفوصين عليه
مُلاذ : اكلك اهلي ينتظروني خل اروح الهم
و من اوصل اخابرك و نشوف
أيهم : زين
ودعته و رحت صعدت بـ السيارة
دحگت لـ امي
مُلاذ : بشرفج مو هسه
فيروز : لعد شوكت؟؟ هم بعدج تضمين عليه
مُلاذ : يمه شبيج ما ضميت شي
اسكندر السافل جاي گايل ناهي ع مُلاذ
و أيهم كاتله و بعدين متخربط
و عمي محمد من شايف أيهم شلون كتل اسكندر
بطل و گال اله ما موافقين بعدين أيهم حاجاه
و وافق و ها اها كدامج رح نتزوج
فيروز : انتِ لا تفكرين بينا يمه
اتزوجي و عيشي حياتج
انا و اختج ما علينا شي
شغلت السيارة و گلت
مُلاذ : جؤ مالي حياة بدونكم
ما اريد تكونون بعيدين عني
أيهم لاكي شقتين وحده فوك و الثانية جوا
هنه للايجار بس أيهم يگول نشتريهن
فيروز : منين نشتريهن؟
مُلاذ : يريد يبيع بيته و يشتريهن ثنينهن
فيروز : لا شلون هيج
مُلاذ : ادري انا هم ما قبلت
فيروز : خل يشتري الشقة مالتكم
و مالتنا احنا ندفع ايجارها
مُلاذ : خوش فكره رح احاجي
هزت راسها امي ساكته
وصلنا للبيت نزلنا
دخلت لـ غرفتي احاجي أيهم
مُلاذ : دحك
أيهم : دحگت
مُلاذ : امي تگول خل يشتري شقتكم
و نأجر شقتنا
أيهم : انجبي لَـذه نشتريهن ثنينهن
مُلاذ : اهووووو لا نشتري شقتنا
و نأجر شقتهم و انا ادفع فلوس الايجار
أيهم : ماكو لو نأجرهن ثنينهن
لو نشتريهن ثنينهن و رح نشتريهن
يلا نجبي كافي لا تلحين
مُلاذ : شكد غثيث اغث من عمي احمد
أيهم : اش و لا حس
مُلاذ : لا بالله
أيهم : احبج ولج
مُلاذ : حبك برص امشي روح منا
أيهم : شكد فوصة اگلج
هسه شني؟
مُلاذ : شني ؟
أيهم : نرتب وضعنا و نشتري الشقق
و بعدين نتفق على موضوع عقد الشيخ و المحكمه؟
مُلاذ : مادري
أيهم : عايني نعقد عقد شيخ
و نعقد عقد محكمه
و بـ هالفترة نشتري الشقق
لحد العرس نحضر كل شي براحتنا
مُلاذ : شني يا عرس عرس منو ؟
أيهم : عرس أبيل ، عرسنا عرس منو يعني؟
مُلاذ : اگلك مادري شلون اصارحك
بس انا ما احب الاعراس و لا احب التهوس
و لا احب البس فساتين
أيهم : لَـذه لا تصيرين نحيسة
انتِ ما تحبيهم الناس تحبهم
خل نتونس
مُلاذ : چا شعليه بـ الناس
أيهم و علي ما اتخيل روحي بـ فستان
أيهم : زين عندي الج حل
مُلاذ : اي اسمعك
أيهم : انه البس البدله و انتِ البسي القاط
مُلاذ : الله اييييي
ضحك أيهم
أيهم : و يسوون بـ شعري گرون تسريحه
و انتِ لمي شعرج كباية و نكسر القاعده
نحطمها تحطيم
مُلاذ : أيهم كلش خوش فكرة
خرب جاي اتخيل روحي بـ القاط و بـ عرسي
يبوووووي الله حبيت
صفنت و اتخيلت شكل أيهم بـ البدله
متت من الضحك بحيث ما اكدر احجي
اضحك و اتخيل و أيهم منطيني على مايي
فعلاً من بعد هاليوم گمنا نركض ركض
و رجعنا خبر لـ عمي احمد احنا موافقين
جانت اكو نقطة كلش زاعجتني
الي هي الاثار يلي بـ جسمي و اثار الجويات
و فعلاً بعد فترة من تفكيري سويت عملية تجميل
غاده من يوم الخطوبة حاقده عليه
جانت رايده تذب حيلها بـ الرگص
و انا ما سويت حفلة خطوبه لان ما احب الحفلات
اتحلفت بيه بـ العقد و گلتلي تسوين
و رجليج فوك راسج جلطتني
أيهم دفع فلوس المهر بدون ما ينقص ربع
و جابوا النيشان و صارت خبيصه
لـ الليل قبل بـ يوم من عقد الشيخ
أيهم اتصل عليه
مُلاذ : ها يول
أيهم : اطلعيلي واكفلج بـ الباب
مُلاذ : ليش شكو؟
أيهم : اريد انطيج شغله
مُلاذ : شتنطيني ؟
أيهم : دتعاليلي مو عليتي گلبي
مُلاذ : اجيت
سديت الاتصال منه
لبست عبايتي و شالي طلعت اله
لگيته كاعد بـ السيارة
أيهم : اخ مرتي الصاكه
مُلاذ : شتسوي جاي هسه؟
أيهم : دسلمي اول فوصة
مُلاذ : هلو أيهم شتسوي جاي هسه
أيهم : اجيت انطيج هاي
اندار لـ ورا اخذ علاگتين
خلاهن بـ ايدي
مُلاذ : شنو؟
أيهم : من تدخلين شوفيهن
طلعتهن حجه حتى اشوفج ما جبتهن وي النيشان
مُلاذ : تمام
أيهم : تمامات
ابتسمت و نزلت من السيارة
سويت اله بيباي سوالي نفس الشي
دخلت البيت ركضت لـ غرفتي اريد اشوفهن شنو
فتحت العلاكه دحگت لـ فستان يجنن شكله لونه اخضر فاتح كلش و يوصل فوك الركبه بـ شويه
بس مصيبتي اكرهه الفساتين و اتقيد بيهن
لگيت أيهم دازلي
أيهم : البسي لـ خاطري
مُلاذ : ما احب الفساتين
أيهم : لَـذه لا تاذيني
مُلاذ : أيهم و الله ادري هالطبع مكروهه بيه
بس شسوي ما احب البس هيج
أيهم : جربي
مُلاذ : تمام اشوف
أيهم : احبچ
ابتسمت و ما جاوبت بعد
لگيته جايب الي حذاء كعب لون ابيض
و القيطان مالتها ينلف ع الرجل ، حبيت ذوقه
جايب وياهم تراجي و گلايد
يريد يطلعني انثى متكامله غصب
ضحكت و هزيت راسي
بـ الجنطة الثانيه هم جايبين هواي اشياء
احذيه و اكسسوارات و جنط و ملابس
لـ ثاني يوم امي تركض منا و تركض منا
البيت دخل حالة انذار واحد ينلطم بـ الثاني
عزمت غاده و امها و خالتي نيروز
و صافي ، كل القريبين علينا عزمتهم
أيهم دزلي مسج الصبح كاتب
أيهم : رح تلبسين الفستان مو؟
مُلاذ : ميخالف
من بعدها ما دزلي و لا دزيت اله
اجو اهل أيهم و غاده جايه وياهم
دخلت توقعتها تهوس بس جان العكس
مُلاذ : شكو يول شبيج؟
غاده : تعبانه كلش من الحمل
هاي اخير شهر گبل ولادتي
مُلاذ : يا عيني تعالي اكعدي
ضحكت و كعدت گالت و هي تضحك
غاده : تخيلي هسه اطلك عليكم
مُلاذ : و علي أيهم يعوفج تطلكين
و يكمل العقد هههههه
غاده : يذبني بـ الطرمه و يكمل العقد
ضحكت و انداريت لـ نور لمن دخلت
هم لازمه بطنها و تمشي بـ صعوبه
مُلاذ : شبيجن اليوم لازمات بطونجن
شنو ناويات الفرحه تصير ٣ افراح
نور : هههههه لا بس الطفل شبعني رفسات
مُلاذ : ياااا يروحي فدوه فدوه
غاده : شوف هاي تكول فدوة
من تصيرين حامل اراويج الفدوة
مُلاذ : يمه اسم الله ما اصير حامل ما اريد
غاده : من اول اسبوع تصيرين حامل بـ توم
مُلاذ : غااااده الادبسز غاده
شلت المخده هفيتها بيها
ضحكت و صدتها
اندارت الصافيناز يلي دخلت
صوفرت بـ اعجاب على شكلها
ابتسمت و ضحكت خجلانه
اجا أبيل يمنا و ظل يدحك لـ صوري
شلته و گمت ابوس بي بوسات متتاليه
گالوا الشيخ رح يعقد النا
طلعت لبسوني شال ابيض
خلوا القرءان كدامي
خليت رجلية بـ طشت بي مي و ياس
فتحت امي ايديه خلت بيهن حبات هيل
كعدوني يم غرفة الخطار
و الشيخ هو و أيهم داخل الغرفة
بدأ الشيخ يقرا ادعية و سور
بعدين بدا يلقننا كلام انا و أيهم
رديت عليه و انا اگول
مُلاذ : نعم و انت وكيلي
رجع كررها مرتين
و رجعت كررت جوابي رجع يسأل أيهم
جاوب أيهم و الرجفة بـ صوته واضحه
من ذاك الصوب
لمن خلصنا طشوا جكليت
و اعتلى صوت الهلاهل و الصلاة على محمد
سطروا راسي سطر بـ هالهلاهل
شكم دقيقة و گالوا رح يدخل أيهم
خلو عليه قطع قماش بيضه
لحد ما انكشف وجهي و دحگت لـ أيهم
ابتسم اخذ الحلقة و الذهب لبسنياهن
شميت عطر ابوي همين هالمره بي
گبل اجا صوت ابوي بـ اذاني
غمضت عيوني و گلبي يدك حيل
اتخيلته لو موجود وياي
زادت دگات گلبي من اتقرب أيهم و حضني
الكل كاموا يصفكون و يهلهلون
همس بـ اذني بـ صوت ناصي
أيهم : هسه انتميت لـ ملجأ و موطن
بعد سنين من الغربة
ابتسمت ابتسامة واسعه
بادلته الحضن ، ابتعد شوية
حجا بـ صوت ناصي
أيهم : بعد ما اكدر اوكف على حيلي
و اسيطر على روحي يمج
من يروحون الناس حاجيني
هزيت راسي بـ قبول و هو طلع
و بدا الركص و التهوس
لـ الليل و راحوا خابرت لـ أيهم
مُلاذ : راحوا
أيهم : جايج
مُلاذ : بشرفك صير مؤدب
أيهم : مو تدللين اليوم نتادب ثنيناتنا
گبل سديت الخط لو ما گايلتله احسن الي
گلت لـ امي رح يجي أيهم بس جسار و سلطان
و عمتي و نور بقن
و أيمن اخذ اهل أيهم
بقوا يمنا بدلت ملابسي و لبست الفستان
مال لبست الحذاء لان رجلية توجعني
نور : رح يجي أيهم ؟
مُلاذ : اي
نور : تعالي خل نرتبج شويه
مُلاذ : بشرفج عوفيني بـ كفشتي
خل اطلع اله هيج
نور : هههههه لاا
كعدت تعدل مكياجي و ترتبني
و اجت ملاك فوكاها اجيت اعيط
سمعت دكة الباب و جسار طلع يفتحها
سمعت صوتهم بـ البيت و راح أيهم للاستقبال
ضحكت من سمعت سلطان يگول
سلطان : انا گلت هسه أيهم طفر
استوعب الورطة الي تورطها
ضحكوا الكل برا ، اجتني امي صاحتني
لبست عبايتي و شالي طلعت لـ أيهم
كعدت بالاستقبال يمهم ادحك لـ أيهم
نظراته خرعتني اجيت اطفر
بس نور لازمتني ما تخليني اكوم
تدري بـ سوالفي
همَ يسولفون و أيهم عينه عليه
اترخصوا الولد و كاموا
و امي و نور و عمتي و ملاك راحن
سوو روحهم ما يدرون
مُلاذ : خل اروح اشوفهم خاف يحتاجون شي
ردت اكوم
سبقني قفل الباب
أيهم : مو عليه هالفواصه بعد
مُلاذ : دخيلج يالزهره
أيهم : اي و الله دخيلج
اليوم شطالعه ولج شني هيج كاشخه
مُلاذ : اكلك أيهم اريد اروح لـ الحمام
أيهم : ماكو
مُلاذ : أيهم حمام لازم اروح
أيهم : ماكو **** هنا
مُلاذ : دخيلج يالزهره قفل
صار عدي مغص بـ بطني
اتقدم عليه بـ هدوء ركضت
فلت شالي و طلع شعري
وكفت بيناتنا الطاولة ، رجع ركض الي
مُلاذ : يماااااا
أيهم : شبيج ما سويلج شي
مُلاذ : مااا وين امي اريد امي
أيهم : انه امج يروحي وليدي سوادي تعال
مُلاذ : ماريد
صعدت ع القنفه
اجاني فتح ايديه ثنيناتهن
أيهم : تذكرين الحلال و الحرام؟
اليوم اطلعهن كلهن
مُلاذ : بعده الحلال محرم
شمدريك انت ما تدري بـ سوالف الدين
أيهم : تعالي فوصة
جرني من خصري
شالني تك ايد
مُلاذ : بشرفك نزلني
أيهم : شمسويلك ابني شبيك تخاف
مُلاذ : ما بيه
أيهم : اي من صوتك اليرجف رجف
ما اعول الزمك ادبسز صارلي 8 سنين
فوك الـ 8 سنين اعاينلك من بعيد
شني انت ما عدك احساس
مُلاذ : كمل عليهن سنتين يصيرن عشرة
أيهم : لَـذه
مُلاذ : اممم
أيهم : نصيحة لا تتفوصين و انتِ بين ايديه
لان احير هسه شسوي
گالها و نومني ع القنفه
مُلاذ : شني خير عسى ما شر
ردت اكوم ، لزم ايديه طبكهن بـ ايد
خلاهن فوك راسي اتمدد على بطنه يمي
أيهم : ادري بيج تظلين تحوصين و تشردين
ما يفيد وياج غير هالحصرة
مُلاذ : أيهم حباب لا تتستهر
أيهم : شبيك ابني شراح اسويلك
اريد اوصل لـ هاي البراطم العذبني
و انت ما جاي تخليني موتتني
يحجي و هو يفتح سحابة العباية
لحد ما نزعتها و طلع الفستان
ابتسم منعجب بـ شكله عليه
جرني عليه اكثر كعدني بـ حضنه
مُلاذ : ما احب التمـ...
بعدني اريد احجي
جرني من رگبتي ،
باسني حيل من شفتي
حسيت بعد لا عندي ايد و لا رجل
رفعت ايدي على صدرة اريد ادفعه
لزمها و نزلها و انا كبل فلتت
رفع ايده من ركبتي لـ خدي
عض حنجي رفست رجلة متاذية
ردت احجي ، سد حلگي بـ ايده
تدريجياً رفعها و كام يمسح شفتي بـ اصبعه
سلل اصابعه بـ شعري
خلا وجهه بـ رگبتي
ضغط على ظهري بـ ايدة
أيهم : شكد متلهف عليج
مثل طفل متلهف على حضن امه
دحگتله عيونه ذبلانات
رفع وجهه دحگلي ، رجع باسني مره ثانية
و هالمرة جانت اقسى من القبلها
لزمت بـ ايده الي على ظهري خسفه خسف
أيهم : اتمددي لَـذه
مُلاذ : أيهم
أيهم : اتمددي ما مسوي شي
دحگتله زاح عني تمددت
و ظلينا على هالحال ، أيهم بي عطر ابوي قوي
الريحه ما تطلع من خشمي ، صار عندي غثيان
ابد ما اتحمل شخص هيج قريب مني
بس كتمت نفسي
لازمه بـ زنده و العطر صاير ترس خشمي
كمت بعد ما ابتعد راسي انسطر سطر
لزم ايدي : وين رايحه؟
مُلاذ : اشرب مي و اجيبلك وياي
جرني عليه طحت فوكاه
دارني خلاني ع القنفه
أيهم : ما اريد شي غيرج
مُلاذ : امي و ملاك و الكل هنا أيهم
أيهم : محد عليه رجلج صرت
بس لو افتهم شبي جسمج يرجف هيج
خايفه مني ؟ اكو شي ؟
مُلاذ : بيك عطر ابوي
دحك بـ عيوني ساكت
هز راسه و كعد على حيلة
كمت كعدت انا هم
مُلاذ : اكو شي ؟
ليش كل ما اگلك بيك عطر ابوي
احسك تضوج؟
أيهم : ابد مو هيج
بس احس هذا الشي يضايقج
يعني ريحته بيه ما اريد تتاذين عليه
مُلاذ : تدري دورت ريحة ابوي بـ كل مكان
و بـ كل ملابسه و ما لگيتها غير بيك .
اندار دحگلي ابتسم وحضن خصري
ظل يبوس خدي رجع ظهره انتجى ع القنفه
و شفايفه بعدها على خدي
مُلاذ : شكد بوست بيه
من طلعوا لحد هسه
أيهم : دصبريلي ما شفتي شي
حيف و قهر ال 8 سنين كله اطلعه
مُلاذ : شني انت منو ضاربك ع ايدك
و گايلك تعال حبني يمعود استر عليه
أيهم : بوسيني
مُلاذ : دروح شكد اكره البوس و المحاضن
ردت ادفعه عني
لزم ايدي و نزلها
أيهم : لا تحاولين تدفعيني
مصموغ بيج صمغ ترا
مُلاذ : أيهم
أيهم : روحه
انداريت اله گلت بـ ابتسامة
مُلاذ : يعني انا بعد مو جرح الأيهم؟
أيهم : جؤ بعدج جرحه ما تتداوين انتِ
مُلاذ : تطكني فد طاقة سلبية
من تگلي انا جرحك احس روحي ظالمتك
أيهم : جؤ مو انت ظالمتني
مُلاذ : لعد؟
أيهم : القدر ظلمنا انه وياج
عگدت حواجبي بـ استغراب
دحگت بـ وجهه ما منتبهه لـ قربنا
الي ناهي حرفياً كل مسافه بيناتنا
مُلاذ : ليش گلت هيج ؟
اكو شي انـ ...
هم بعدني ما مكمله و باسني
و ظل بـ حركاته مال مستهترين
گوه ملصت روحي منه
كمت ابتعدت عنه كعدت ع القنفه الثانية
دزيت لـ ملاك اسألها امي وين
ملاك : بالغرفة
مُلاذ : جسار و سلطان و عمتي راحوا؟
ملاك : اي من زمان
مُلاذ : تمام
انداريت دحگت لـ أيهم يحجي بـ التلفون
كمت يمه : ها جاي تخوني؟
أيهم : اي
اخذت التلفون من ايده
خزرني و جرني كعدني على رجله
أيهم : شهالفواصه هاي؟
مُلاذ : بكيفي و مره ثانية لا تجذب عليه هتان هاي
أيهم : عاجبج نرجع لـ وضعنا قبل شويه؟
مُلاذ : كافي وجهي كام يوجعني
باجر شلون اطلع كدام امي من وراك
أيهم : عادي انت ما قصرتي
السافله ام براطم
مُلاذ : شكد حيال و جذاب شسويت قابل؟
أيهم : و رگبتي المخرمشه ؟
هاي اظافرج الا اكرضهن
مُلاذ : اي عفيه كرضهن الي
مالي خلك اكرض
أيهم : اگلج لازم اروح
مُلاذ : ليش ما خليت أبيل يبقى وياك؟
أيهم : نعس و غفى بـ السيارة
مُلاذ : يروحي خطيه
أيهم : عمي ما اكعدج ويا
نعرس منا ازوجه منا
ضحكت و كمت عنه
مُلاذ : ما ازوجه
أيهم : انه ازوجه
مُلاذ : ما مو بكيفك
أيهم : جا بكيفج
حجاها و كام وكف
أيهم : شوفي اهلج خل اطلع
مُلاذ : اهلي اصلاً ماكو بـ الصالة
ملاك بالغرفة و امي بالغرفة
و سلطان و جسار و عمتي راحوا
أيهم : خوش
مُلاذ : افتح الباب القفلته
ضحك و اتقدم يفتح الباب
فتحت الباب اريد اطلع جرني و خلاني وراه
حاوطني بـ ايديه ، گال بـ ابتسامه
أيهم : لا عبالج ما انتبهت ع الفستان
لايگلج جنج طفلة تفتر
مُلاذ : طفله طولها 170
أيهم : طفله عدها زياده بالنمو
ضحكت و رجع گال
أيهم : طولج 170 و توصلين لـ صدري
و هم لازم ادنك الج
مُلاذ : غير انت من العمالقه مدري شكد طولك
أيهم :194 طولي هاي ضبط
مُلاذ : ما تشوف روحك تدنك لمن تفوت
أيهم : انتوا بيبانكم صغيرة
مُلاذ : اي صحيح الخلل بينا مو بيك
أيهم : طبعاً
مُلاذ : أيهم ترا رح اطب بـ نص الحايط
ابتسم و گال
أيهم : خو ما ضوجتك ابني؟
مُلاذ : لا
أيهم : عادي ضوج
دحگتله وخزرته كرصت زنده
مُلاذ : شكد مستهتر
جر زندي خلاني كدامه
أيهم : مو بكدج فوصتي
تعالي اطلعي كدامي تاكدي
طلعت كدامه و هو لازم ايدي
وصلنا لـ الباب مال مطبخ
أيهم : وين طالعه هيج؟
مُلاذ : نسيت اجيب عبايتي
أيهم : انه جبتها تعالي البسجياها
سكتت و هو لبسني العباية
دنك يسد سحابتها و خلا شالي على راسي
طلعنا من البيت وكفنا انا وياه بـ الطرمه
أيهم : انتبهي على نفسج
شوف براطمج ورمن
مُلاذ : شكد تنرفزني من تكول براطم
ضحك و وصلنا يم باب الشارع
خلاني بين الباب و جسمه
دنك باسني بـ هدوء ، ابتعد
مُلاذ : يمصخم يـ ملطم كاميرات
أيهم : غير بالشارع الكاميرات
انه وياج بـ الطرمه
مُلاذ : كاميرة بيت ابو رسل حتى نيتك تصورها
أيهم : هههههه لعد انفضحنا
مُلاذ : على نيتك لو على البوسة؟
أيهم : على نيتي
ضربت جتفه كرصني رجعت ضربته
رجع هم كرصني و ضربته
مُلاذ : رح نتكاتل بالطرمة
أيهم : تسويها انتِ
مُلاذ : وخر من يمي ولك أيهم
كافيي ياااااااا لا تكرصني لا تكررص
ضربت على زنده حيل
ضحك و طلع وكف بالباب
أيهم : فوتي جوه خل اروح
مُلاذ : مو جاي اوصلك للـ الباب
أيهم : ما اريد توصليني ادخلي
مُلاذ : شكد نحيس
أيهم : من حبيتج
دريت بـ روحي انحس من النحيس ، ادخلي
عفته و دخلت و هو طلع و سد الباب
سمعت صوت سيارته اشتغلت و راح
اول ما راح ركضت لـ الحمام الغثيان كتلني
ذبيت كل شي و روحي تلوب
دخلت لـ غرفتي دحگت روحي بـ المراية
ملخت خدودي شفتي صدك مورمة
و الطرف لونه ازرك صاير
ثاني يوم طلعت من الصبح
حتى ما تشوفني امي
قررنا العرس يصير ورا اسبوعين
و امي و ملاك يركضن بـ سوالف الزواج
و تجهيز البيت انا ما افتهم شنو لازم اشتري
جني اطرش بـ الزفة امي من جانت تحجي الي
عن الزواج اسد اذاناتي ثنيناتهن ما احب طارية
و هم صار الشغل لـ فوك راسي و اتراكم
رحنا انا و أيهم عقدنا عقد محكمه
بـ يوم كاعده دخلت صافيناز انطتني جاي
مُلاذ : شكراً صافي
صافي : ولِك اتركِ هالشكراً قديش ما بحبا
مُلاذ : تحبيها بس من أيمن صافيي
غطت وجهها و ضحكت
مُلاذ : اي و تضحك اي اي
ولج تعالي سولفيلي شسالفتكم انتِ و أيمن ؟
صافي : شو فينا؟
مُلاذ : مو اخير مره اعترفلج؟
صافي : اي
مُلاذ : اي و شصار؟
حكت راسها و گالت بـ ابتسامة
صافيناز : بلشا نُخرج من زمان
مُلاذ : شنو نُخرج؟ حاجيني بـ العراقي
صافيناز : شو شو يعني نخرُج
يعني ارتبطنا
غصيت بـ الجاي
اخذت بطل المي بسرعه شربت
مُلاذ : دخيلج يالزهره هاي شوكت ؟
صافيناز : من 8 او 7 اشهر
مُلاذ : دهر طكج ي صفيوووه
زين من ما تطلعون متزوجين من ورانا
ضحكت و طفرت من مكانها
مُلاذ : شني شني صااافي
استهدي بـ الرحمان
طلعت تركض
ركضت وراها
مُلاذ : ولج صافي متزوجيييين؟
هزت راسها بـ رفض و ضحكت
صافيناز : بمزح معك و الله ما سوينا شي
بس بلشنا نخرج سوا و بس
مُلاذ : جا شبيج تضحكين يبستيني
صافيناز : بمزح معك
مُلاذ : هسه اگل لـ رجلي عليج
صافيناز : ولِك اي صار عندا رجل
و تقولو عليي و تشكيلو مني كثرو خاينيك يا زمن
ضحكت و رجعت كعدت بـ مكاني
خابرت لـ أيهم لان ما خابرني
رن كم دقيقة و رد
مُلاذ : الو
أيهم : هلو حبيبي لَـذه
مُلاذ : گلت شعجب ما طل علينا أيهم اليوم
أيهم : ههههههه لا ولج فوصة
بس أبيل مريض
مُلاذ : يا شبي ؟؟
أيهم : مصخن كلش و تعبان
مُلاذ : يا عيني مستبرد ؟؟
أيهم : اي شوية
مُلاذ : هسه شلون صار؟
أيهم : متمدد كدامي و مخليله كمادات
سمعت صوت أبيل يكول
أبيل : منو هايه ؟
أيهم : الحلوه
اسمع صوته شلون متحمس
و هو يگول "الحلوووه"
اخذ التلفون من أيهم ظل يسولف وياي
ضحكت على سوالفه يريدني اروح الهم
كام يبجي و يتوسل اروحلهم
صوته مشحرج و مريض و أيهم يگله
أيهم : بابا عوف المره عدها شغل
أبيل : هباااب بس اليوم هباب
أيهم : زين انت شتريد منها شتسوي بيها؟
أبيل : اهبها هلوه
أيهم : گرة عيني
رجع يبجي بجيث صوته راح
يريدني اروح الهم و أيهم ما يقبل
أيهم : كااافي تحوص الكمادة توكع
رح انعل ابوك الكانولا لااا تحوص
مُلاذ : اوكف انت وين بيتكم ؟
رح اجي و شويه و اروح
أيهم : يجلب بيج
مُلاذ : لا انا اقنعه خطية صوته شحرج
أيهم : زين انه رح اجي اخذج
مُلاذ : خو انا اجي ؟
أيهم : اخذج انه افضل
مُلاذ : تمام بالمكتب انا
سديت الاتصال منه و بقيت انتظره
لحد ما اتصل عليه گلت لـ صافي رح اطلع
گلتلي تمام طلعت نزلت لـ أيهم ، صعدت ويا
مُلاذ : هلو
أيهم : هلا بيج مرتي
مُلاذ : لا تغثني اهفك بـ الجنطة
ضحك و شغل السيارة
عكد حواجبة دار وجهي اله اكثر بـ ايده
أيهم : شهالحمره؟
مُلاذ : شبيها ؟ حلوه
جر كلنس انطانياه
أيهم : خففيها
مُلاذ : ماا بيها شي
أيهم : لَـذه بطلي تحطين حمر طوووخ
امسحيها يلا
مُلاذ : ما اريد حلوه
جر وجهي بـ ايده
و مسح الحمره ظليت ارافس
دفعته عني
مُلاذ : شبيييك انت!
أيهم : بطلي تخلين هاااي الحمر
مُلاذ : شهالهمجيه هاي ؟
أيهم : صرت همجي علمود حمره؟
مُلاذ : مو علمود الحمره
شفت نفسك شلون جريت وجهي؟
أيهم : كلتلج تمسحيها
مُلاذ : هي لون قابل شراح يصير !
أيهم : مو لوون شفتج بارزه
لا تبرزيها اكثر بـ هاي الحمر
رجع يمسح شفتي بـ الكلنسه
مُلاذ : كافي وخر أيهم كافي راحت
شفتي كامت تحركني الكلنس خشن
ذب الكلنسه و عافني
ضجت من تصرفه كلش
و شفتي صدك كامت تحركني
لو ما أبيل جان نزلت و بطلت ما اروح
بس علمود أبيل بقيت
احس بـ أيهم يدحگلي
درت وجهي كلش لـ الجامه
فترة و وكفنا كدام بيت
دحگتله بيت أيهم الي بي اهله
ما جايه اله من قبل ، اشر للحارس فتح الباب
رجع صعد و دخل السيارة لـ الحديقة
بيت جبير و حلو مثل بيت شرف
بس بيت شرف ابد ما حسيته حلو
بسبب العذاب الجنت عايشته
اول ما وكف السيارة نزلت
و ما حاجيته اي شي ظليت واكفه منتظرته
اتقدم كدامي مشى فتح باب بيتهم الجوا
دخلنا انا وياه دحگت لـ امه و اخته
اجن سلمن عليه و وبوسني
ما سئلن شسوي هنا عرفت أيهم گايللهن
أيهم : أبيل نام؟
هتان : لا بعده كاعد ينتظرك
أيهم : خوش
دحگلي ، درت وجهي عنه
مُلاذ : هتان وديني اله
هزت راسها بـ قبول
و هي تتشاقى و تسولف وياي
صعدت دحگت لـ أبيل متمدد
معلكين اله مغذي صغير و على كصته كماده
لمن شافني راد يكوم يجيني بس ما خليته
رحت بوسته و كعدت يمه
مُلاذ : شوف هياتني اجيت
أبيل : اييي
دنكت بست كصته
ابتسم باس خشمي ضحكت
أبيل : اراويج رسمي
مُلاذ : راوييني
جر من يمه كراسه
كعد يراويني رسوماته وخرهن شوية
و رجع يراويني العابه و انا اسولف ويا
اجت ام أيهم قدمت الي عصير
مُلاذ : شكراً خاله تعبتي روحج
امي : لا يمه غير چنتنا
ابتسمت و اخذت العصير شربت
ظليت كاعده يم أبيل و ام أيهم و هتان
كاعدات يمي ، هو ما شفته بعد
ردت اروح ما خلاني أبيل و جلب بيه
مُلاذ : اذا تريدون تكملون شغلكم
ف على راحتكم انا بس اقنعه و اروح
ام أيهم : لا يمه شون نعوفج
اتغدي يمنا و روحي
مُلاذ : لا خاله و الله عدي شغل
ام أيهم : ميخالف هسه رح يصير الغدا
و اتغدي و روحي هسه نستعجل بي
مُلاذ : خاله و الله ماكو داعي
ام أيهم : لا يمه لـ خاطري
يلا انزعي شالج و ارتاحي انتِ مو غريبه
و هنا بيت رجلج لاتتقيدين و أيمن طالع
ما خلوني اروح و كامن هي و هتان يستعجلن
بـ الغدا ، أبيل كعد يراويني صوره و هو صغير
ما خلا شي ما راوانيا فد ضحكني و ونسني
ظليت كاعده يمه و هو يتابع فيديو بـ اليوتيوب
تعبت من الكعده وخرت الشال و تمددت يمه
ظل يراويني الي بـ الفيديو و يگلي شوفي هذا
و يراويني العابه بـ الجهاز
وخرت الكماده خليت ايدي على كصته
الصخونه خفيفة بس هم اكو حراره
شويه و انكطع صوته دحكت لـ وجهه غافي
عبست شفتي و ابتسمت على منظره
اخذت التلفون من بين ايديه
سديته عدلت نومته ، لزم ايدي
حضنها اله و ظل نايم
انداريت لمن انفتحت الباب
دحگت لـ أيهم دخل ، ردت اكعد
بس أبيل حاضن ايدي كل قوته
كعدت شويه احاول افك ايد أبيل مني
سكتت لمن حسيت أيهم وراي واكف
أيهم : ارجعي نامي
مُلاذ : ما اريد عندي شغل
أيهم : امي جاي تسوي غده
و تريدج تظلين للغده ما تخليج ترحين قبله
مُلاذ : عادي اگللها عندي شغل
أيهم : بلا عناد نااامي
مُلاذ : ما...
انداريت ساكته لمن أبيل اتحرك مزعوج
و جر ايدي اله اكثر
أيهم : اتمددي
درت وجهي عنه و تمددت ورا أبيل
رجع أبيل الي نام على صدري
راح أيهم من الجهة الثانيه وخر اله المغذي
و الكمادة صارت على رگبتي لمن أبيل اتحرك
اجا أيهم شالها من رگبتي
كعد وراي سند ظهره ع الجرباية
شوي و اتمدد وراي حاوط خصري بـ ايده
رجف جسمي غمضت عيوني
خليت ايدي فوك ايده اريد اوخرها
دنك راسه باس خدي حجا و شفايفه على خدي
أيهم : بعدج ضايجه؟
مُلاذ : تصرفك مو حلو
أيهم : و اذيتج الي مو حلوه
مُلاذ : ترا حمره بس حمره!
أيهم : حمرتج طوخ و شفايفج كبار
و من تخلين هيج تبرزيهن اكثر تموتيني
مُلاذ : بس ما تسوي بيه سوايتك بـ السيارة
أيهم : شسويت مسحتها؟
مُلاذ : شفتي لسا تحركني
لزم وجهي داره اله
أيهم : ابردها؟
مُلاذ : وخر بلا استهتار الجاهل نايم
أيهم : الجاهل لو اضرب مدفع يمه ما يحس
مُلاذ : على حظنا يحس و يكعد
أيهم : ما يحس
دنك الي يبوسني
دفعته عني اجر نفس
مُلاذ : هي هيج
أيهم : غير ابردهن
مُلاذ : من يوم العقد لسا كلش استهترت
أيهم : و رح استهتر بعد
و فعلاً رجع استهتر بعد
دفعته عني ، ما يندفع نوب انا انثول افهي
وخر من عندي و اتمدد وراي ظليت ساكنه
درت وجهي عنه و هو ظل محاوط خصري بـ ايده
أيهم : لازم نبدي نرتب بيتنا
مُلاذ : غير گلنا الجمعه نشوف
أيهم : اي
مُلاذ : اگلك
أيهم : ها ؟
مُلاذ : لينا
أيهم : شبيها ؟
مُلاذ : هم تكلك تريد أبيل لو تودي يمها
أيهم : لا طبعاً شهالبربوك اودي يمها
مُلاذ : احسن لا تودي ، زين تخابرك؟
أيهم : هسه انتِ شلج بهالاسئله؟
مُلاذ : تخابرك مو ؟
أيهم : عوفيها ختولي
مُلاذ : جاي اسئلك ، عادي اشوف مسجاتها؟
أيهم : عوفيهن بابا
انداريت دحگتله
مُلاذ : براحتك اذا ما تريد لا تحجي
درت وجهي عنه
دنك باس جتفي رفع راسه شاورني
أيهم : ما اريدك تضوج ابني
مُلاذ : براحتك
ظل ساكت شويه و گال
أيهم : تدزلي صورها و صور جسمها
درتله وجهي : صدك تحجي؟
أيهم : و الله
مُلاذ : انت مو گلتلي غيرت خطك؟
أيهم : على حساباتي تدز
و هاي حساباتي تخص الشغل
ما اكدر اسدهن لو اطلع منهن
مُلاذ : شهاللطلطه الشايلتها ايع
ظليت ساكته و مكشوله ملامحي
أيهم : ختولي محد يعجبني غيرك
مُلاذ : أيهم شنو تدزلك جسمها و الله لعبت نفسي زين شلون تدز الك يعني ؟
أيهم : كما خلقني ربي تدز
مُلاذ : عزززه العزاها ايع
عود شتفكر من تسوي هيج ؟؟
أيهم : عود تريد تغريني
مُلاذ : و انت تعجبـ..
أيهم : لاا شسالفه
جانت كدامي و تلعب نفسي من سوالفها
مو نوب تدزلي و انغري بـ منظرها بالعكس
تكش روحي منها بـ الزايد
مُلاذ : زين انت تحسها حلوه؟
أيهم : عايني هي حلوه ليش اجذب عليج
انداريت خزرته و هو كمل
أيهم : بس تصرفاتها
و كل شي بيها مدري شلونه
مُلاذ : يعني عاجبتك !
أيهم : لا بويه لا انتِ مو سألتيني هي حلوه
شكلها مو سيء بس الباقي كله لعبان نفس
مُلاذ : اي خوش يلا وخر
أيهم : شبيك غيور شوفني شلون لازك بيك
گبل جنت ما ادخل لـ الغرفة هاي
عايني هسه شلون لازمج رح تموتين بين ايديه
مُلاذ : ماريد تلزك بيه مشكور
أيهم : ماكدر مصبر روحي عليك گوه
مُلاذ : امك تصيحنا يمكن
اندار يسمع عدل
أيهم : اي جاي تصيحنا
كام وكف اجا يفك ايدي من ايد أبيل
كوه طلعنا ايدي من ايده خلينا مخدات حوله
لبست شالي و عدلته
أيهم : لذه اوكفي
مُلاذ : ها؟
أيهم : شفتج زرگه
تعالي خل نحطلج شي من هتان
مُلاذ : كله من وراك
طلعنا من الغرفة صاح لـ امه كللها جايين
اخذني لـ غرفة هتان ظل يدور بالحمر لون خفيف
أيهم : خو هتان ما عدها لون مال اوادم
كلهن طوخ تخليهن و تطلع من انه ماكو
مُلاذ : عوف البنيه
أيهم : لا محذرها انه
من اللبس الكصير و الحصر لو اكمامه كصيرة
و من الحمر الطوخ اتخبل منهن
سكتت و هو لكا حمره خلا نكطه على شفتي
و ظل يمسح بيها منا و منا
جر ايدي و نزلنا جوه
كعدت اتغدى وياهم أيهم ظل ياكل
و يخليلي اكل و يرجع يخلي لـ اخته و امه
اول ما خلصت غسلت و ودعتهم
اخذني أيهم و رجعنا لـ المكتب
هكذا مرت الايام بدينا نحضر لـ شقتنا
و نقلت غراض اهلي
و انا و أيهم اشترينا بس غرفتنا
و باقي الاثاث يلي مال بيته القديم
جان عاجبني و حلو فـ نقلناه كله
الشقتين الفوك و الجوه ثنينهم واسعات
أيهم جاي من قبل صابغهم و مكمل النواقص
خلصت الشقه قبل ٣ ايام من العرس
قبل بـ يوم من العرس سويت حفلة حنة
و طبعاً كل الحفلات يلي تصير بعد تهديدات غاده
و بالغصب يلبسوني الفساتين بعد ممالخ و عياط
طبعاً هم يطلعون و انا البسهن من ورا خشمي
و الهوسه و الدك و الركص جرني من ايدي
يريدني اركص عاد اذا كمت و ركصت
رح اسود وجهه امي ، شغلن اغنية مصرية
و غاده كومتني اركص
انفلتت طلعت كل مواهبي ما خليت هزه ما هزيتها
بـ النهاية كعدت فحطانه دحگت لـ امي
يلي تدحگلي مصدومه ، نظراتها تضحك
اهتز جسمي اضحك
أيهم اخوانه سوو اله حفلة
ثاني يوم رحنا للصالون
خلولي مكياج و سوت الي ام الصالون تسريحة
تسودنت من شفتها تخزي و مو حلوه
رجعت فتحتها مره ثانيه
سوت الي تسريحة ثانيه بسيطه ولاگت الي
زينت شعري بـ طوك بي شذرات ناعمه
لبست التخم مال گلاده و التراجي
الي اشتراليا أيهم
رحنا لـ البيت دخلت امي يمي حاجتني ع العرس
غطيت بـ هدومي و هي تضحك و تحاجيني
گوه يلا سدت السالفة لبست فستاني و البركع
البنات ظلن يعدلني و يرتبني
كل وحده بيهن تكول الزين يمي
كاشخات ع الاخير
غاده لابسه فستان بـ نفسجي
و مسويه شعرها كباية لـ فوك
و مكياجها نظيف و مرتب
نور لابسه نيلي و فاتحه شعرها
ملاك لابسه فستان وردي
و لامه شعرها من فوك
و منزله الشعر الباقي
صافيناز اجت لابسه اسود يلمع
و مسويه شعرها كيرليات طالعه تخبل
هتان لابسه فستان فوك ركبها
و لونه عنابي و رداناته خيوط
كلش طلع حلو عليها
الفستان مالتي خصرة ضيق
و منفوش من جوه
رداناته شفافه و واسعه
و مُزين بـ خرز بيض ناعمه من جوا
قاطع نظرتي لـ شكلي اخير مره بـ المراية
لـمن اجت امي گالت "أيهم لسا ماكو"
خابرت عليه ما يجاوبني
رجعت خابرت اكثر من مره هم ماكو
و ظلينا بـ النص ساعه احنا متأخرين
امه كلش قلقت و انا قلقت
خابرت على سلطان گال ينتظرونه
خابرت غاده على باهر گللها باهر ما يدري
راحن غاده و صافي و عمتي و نور للقاعه
بقينا بس انا و امي و ام أيهم ننتظر
و عمي كاعد بـ الصاله هو و جسار
رجعت اخابر عليه هم ماكو
انقلقنا عليه و ظلينا الف احتمال بـ عقلنا
شوية و صاحوا اجا أيهم
سمعت عمي يحاجي هو و جسار
طلعت من الغرفة دحگتله ، اجاني
أيهم : اتاخرت اسف
حجيت بـ صوت ناصي
مُلاذ : وين جنت ؟
أيهم : شغل حليته و اجيت
مُلاذ : و هالشغل ما طلع غير اليوم ؟
دحگت لـ امي و امه طلعن و عافونا
و جسار و عمي ابتعدوا من يمنا
دخلنا لـ الغرفة ، سد الباب
أيهم : جان لازم احله
مُلاذ : جنت تكدر ترد على اتصالاتي!
أيهم : ما جان تلفوني يمي
مُلاذ : تمام بـراحتك اطلع اريد اعدل ملابسي
جرني من خصري اله
أيهم : اول شي طالعه بـ منظر ما يتحمله گلبي
و گوه صابر على ما يخلص العرس
ثاني شي شبيج ؟
مُلاذ : يعني ما تعرف تخابر الي؟
تاخرنا ع الناس و عوفك من هذا اهلك قلقوا
أيهم : حسج لَـذه
مُلاذ : عوفني اطلع اريد اعدل ملابسي
أيهم : عدلات
مُلاذ : اريد اعدلهم عوفني
أيهم : لا تخبليني
مُلاذ : لا خاف ما تقبل؟
أيهم : شبيج لَـذه هياتني اجيت
باس طرف شفتي
أيهم : اعتذر خوفتج
سكتت و امي صاحتنا الناس ينتظرونا
طلع أيهم من يمي وكف جسار يوصي أيهم عليه
جسار : نعرفك و خوش انسان
ما شفنا عليك شي مو زين الحمدلله
بس هم ما نريد بـ يوم نشوف مُلاذ متاذيه
و تدري بيه انا حاطها بـ مقام اختي
أيهم : اخليها بـ عيوني
وكفت امي هم توصي عليه
صحيح هم جوانا بس تدري
اذا صار اي شي بيني و بين أيهم
ما رح احجي انا
فيروز : هي يمك بعد و اتمنى ما تاذيها
حاطتك بـ مقام ابني و لو ما شفنا منك وكفات
ما انطينا مُلاذ لان تعرف البنية عزيزه الابن عزيز
انت عدك ابن و تعرف ،
ابوها جان يحبها اكثر من كل شي
و لو اليوم موجود يوصيك نفس وصيتي الك
خليت ايدي ع صدري شعور ضيق صار بـ گلبي
دحگت لـ أيهم يلي يدحك لـ امي ساكت
ماكدرت افهم ليش هيج نظراته الها و هي تحجي
اختنكت كلش بس اتجاهلت
التفت دحگلي أيهم بـ عيون يمليها الحب
و اول مره احس بـ هذا الشعور
گلبي نبض حيل و نار حسيتها سرت بـ جسمي
زاد مغص بطني و ارتباكي
سلموني اله و زفوني للقاعه
و بعد هوسات بـ الشارع و هورنات
و دك و ركص وصلنا لـ القاعه
نزلنا دخلوا الكل قبلنا خلا ايدي بـ ايده
أيهم : ما جاي اكدر ازيح عيني عنج
مُلاذ : أيهم مو تروح زايد
أيهم : من عيني
دحگتله عيونه تلمع و ابتسامته واسعه
اعرفه راد يحجي هواي بس ما لحگنا
دخلنا القاعة و دخوليتنا خلت جسمي يقشعر
صوت الاغاني الي ارتفع و اصوات الهلاهل
و التصفيك دحگت لـ امي يلي تبجي و مبتسمه
و تذكرت ابوي لو موجود شلون رح اكون
أبيل اجا يركض يهفنا بالجكليتات
ضحكت و خلينا بـ نصنا و مشينا
وصلنا يم الكوشه ، باس أيهم كصتي و طلع
اعتلى صوت الهلاهل و التصفيك
و من بعد الركص و الهوسه
و التحيات لـ ام العروس و لـ اخت العريس
و لـ ام العريس و لـ العروس بقت على أيهم
رحت لـ ام الديجي گلتلها تحية لـ العريس
هي هم ما قصرت ضحكت و گالت
- تحية لـ العريس الدكتور أيهم ابو أبيل
دخلوا أيهم و الولد و النسوان لبسن عبيهن
غطيت راسي بـ الكبوس اكثر
سمعت ام أيهم تصيح
ام أيهم : يـ اهل القوووط ذبو القوط
أيهم لبس قااطه
كاموا يصوفرون و يصفكون
حسيت بـ أيهم يمي رفعت عيني دحگتله
اجت امه لبستني ذهب
ظلوا اصدقاء أيهم يهوسون و يركصون
القاعه اشتعلت شعل بـ الركص و الهوسة
أيهم ما قبل يركص وياهم
راد يركص وياي بس انا اتدنى شاورني
أيهم : خل نسوي مثل العرايس
اشاورج و سوي روحج خجلتي و اضحكي
ضحكت من كل گلبي ع هالسالفة
رجعت شاورته انا
مُلاذ : العالم تتغزل انت تضحك عليهم
شاورني بـ شي خلاني اغط بـ هدومي
مديت ايدي لـ ظهره كرصته و هو هم كرصني
ظلينا واحد يكرص بـ الثاني و مبتسمين للناس
خو ظهري حسيته انشلع شلع
طلعوا الولد لزم ايدي أيهم
و وخرت الكبوس ، لزم خصري
و دنك الي يركص وياي ، ضحكت و كلت
مُلاذ : زواج العمالقه
أيهم : رح نفلش الكاع بيهم
ضحكت اجا أبيل دخل بـ نصنا
أيهم : شلون بيه ما اخلص من الطروف الثالثه
مُلاذ : ههههه انت الطرف الثالث
جر خصري و شاورني
أيهم : لَـذه انعل ساسج
ليش هيج طالعه حلوه
مُلاذ : سر المهنه
أيهم : لَـذه
مُلاذ : ها
أيهم : شما تعرفين و شما يصير لا تعوفيني
من كد ما حبيتج صرتي بـ عيني وين ما اروح
اسمج و حرفج و صورتج تصرفاتج و عصبيتج
حفرتهن بـ كل مكان بـ روحي و عقلي
و انه هسه روحي مو الي و لا اكو شي الي
جاي احس نفسي مبيوك عقلي فارغ بس انتِ بي
مُلاذ : ليش تفاول؟
أيهم : اخاف اخسرج
اخاف اخسرج اكثر من كل شي
خسارتج تكسر ظهري كسر ، تخسرني روحي
مُلاذ : لا تفاول
أيهم : ما مفاول ، انسي لَـذه
دنك راسه و ظلينا نركص
شويه و طلع و هم رجع الدبج و الهوسه
شفت امي تبجي و تمسح بـ وجهها هي و ملاك
رحت عليهن بوستهن
مُلاذ : انتوا اساساً كاعدين جوانا
شبيكم تبجون؟
فيروز : من تصيرين ام تفتهمين
من عدج بنية و تتزوج دموعي دموع فرح يمه
ابتسمت و سكتت
طلعنا و زفونا من القاعه لـ البيت
بـ نص الاغاني و الركص مدري منو يرمي
عاط بيهم أيهم و گللهم ما يرمون
طلع أيمن من الشباك
صعد ع السيارة و حجا
أيمن : اخونه خوووش اخوووو يستاهل الهوسه
نزلوا الكل من السيارات و كاموا يهوسون
صعد أيمن سيارتنه مره ثانيه
دخل بـ النص يفحط بـ السيارة
بحيث الجو صار عباره عن دخان
نزلوا بـ الشارع و نزلوا أيهم
و هم ظلوا يهوسون و يشغلون اغاني
- لدبجلك دبج معداااان
و اوصل الطين لـ جتافي
-احنننه الطكينه اصبعنه
و حتى الحاكم وكفناه
كاموا يطكون اصبعتين بالشارع
كلهم وظايف و مهن جبيره و دكاتره
و مهندسين بس فد ضحكوني گلبوا الدنيا
و طبعاً كله من أيمن
أيمن : و الف عافية يا خيه يمزيونه
و خذتيلج سبع من فدووووة لـ عيونه
شويه و صعدوا يضحكون
كملنا طريقنا لـ الشقة لمن ردت انزل
ذبحوا يم رجلي دجاجه
لحد ما وصلت لـ الباب يطشون جكليت
وكفت غاده دكتنا بـ هلهوله ثلاثية
كاموا يصفكون و يصيحون
- حبها ولك حبها و لا تخاف من امها
دحكت لـ امي و ضحكت
بعدين اتطشروا و دخلنا انا و أيهم
بسرعه شالني من الگاع
مُلاذ : يول استهدي بالرحمان و نزلني
أيهم : هلووووو اليوم العب لعب
اليوم اطلع الضيم كله
و نوب الدنيا ظلمة و شموع
مُلاذ : يممممممه بطلت دخيلج يالزهره
ضحك و رحنا للغرفة
اجا اله اتصال نزلني بـ الگاع ، نزع سترته
وكف وفتح الاتصال يسمع المتصل
رحت فتحت الضويات
دحگت فارشين الفراش بـ ورد
و ناثرين بـ الگاع و شاعلين شموع
أيهم : اجو؟ هاهيه
سد الاتصال اندار الي
اجا عليه بسرعه جر راسي و باسني
ما لحگت افتهم شكو لزمت بـ قميصه كل قوتي
عصرني عصر بـ ايده وخر وجهه من وجهي و گال
أيهم : ما اكدر اروح
بدون لا احصل شي منج
مُلاذ : ويين تروح؟؟؟
أيهم : اش بادليني لا تسألين بادليني
اريد احجي رجع باسني
لزمت بـ رگبته و سويت مثل ما گال
و گلبي يدك بـ خوف وين رح يروح!
خليت ايدي على صدره
بديت اسمع اصوات من برا
دنك الي اكثر و ظل جاذب راسي اله
متت من وجع شفتي و هو لازم وجهي حيل
اريد ادفعه بس ايدية راخية حتى ما يندفع
ابتعد و دفعني بـ خفه لمن اندك الباب
مُلاذ : شكو أيهم ؟؟؟ شكو؟؟
جر سترته النزعها
اندار الي و انا اركض اله
خلا ايديه على خدي
أيهم : لا تخافين ماكو شي انتظريني
راد يطلع لزمت ايده
و الباب دكاته تزيد و تعلى
خليت ايدي على خده
مُلاذ : شكو؟؟
أيهم : مستعجل لذه
باسني للمرة الاخيرة
و طلع يمشي بسرعة يلبس بـ سترته
خليت البركع على راسي لحكته اركض
دحگت لمن فتح الباب
وسعت عيوني بـ صدمة
على شرطة و ضباط واكفين كدام أيهم
اتصنمت بـ مكاني لمن مد ايديه الهم
و بـ مجرد مد ايديه كلبجوه بـ الكلبشات
اخذوه و طلعوا ، بعد ما اكدر ارفع رجلي من الگاع
طلعت اركض ، شفت الدنيا مكلوبه بـ المكان
اخذوا أيهم و هو ينزل الدرج
يخطي خطواته بـ كل شموخ ، رافع راسه
نزلت اركض و امي طلعت تركض وياي
هوسه صارت برا و صوت الشرطة
دحگتلهم صعدوه بـ سيارة الشرطة
اندار لـ كدام و ملامحه يكسوها البرود
دحگلي بـ نظرة اخيرة ما عرفت افسرها
نظرة حب و لهفة و بـ نفس الوقت كسرة و اشتياق
مشت سيارة الشرطة بيهم و انا ادحك وراها ....
- يتبع الفصل التالي اضغط على ( رواية جرح الأيهم ) اسم الرواية