رواية جرح الأيهم الفصل الرابع و الثلاثون 34 - بقلم أيلان
"الجُــرح الرابع و ثلاثون"
لحد ما وصلنا شالوا ام أيهم
خلوها على السدية و راحوا بيها للـ الردهات
باهر و أيمن يسألون الدكتور شبيها
جاوبهم و گللهم انتظروا افحصها
وصلنا لـ الردهات وكف الدكتور يفحص ام أيهم
الدكتور : اغمى عليها
ما بيها شي لا تخافون
علگلها مغذي ، گاللهم لازم تستراح
أيمن وصى باهر يبقى يمها و هو يرجع يم أيهم
وافق باهر ، طلعنا انا و أيمن رايحين لـ يم أيهم
نركض ركض بس نريد نلحك
وصلنا لـ ممر ، ظلينا واكفين ننتظر
كم دقيقة طلعوا الدكاترة من غرفة أيهم
ركضنا عليهم انا و أيمن ، گال بـ خوف
أيمن : هاااا دكتور؟؟؟
- دخل بـ غيبوبه
أيمن : شنو دخل بـ غيبوبه
شلووون يعني؟؟؟
-ما يصحى حالياً
وضعه استقر بس ممكن تصير مضاعفات
تراجعت بـ خطواتي
كعدت ع الكرسي الوراي
دحگت لـ أيمن يلي مصدوم ، يدحك لـ الدكتور
تركونا الدكاتره و الممرضين و راحوا
دحگت لـ ايدي يلي ترجف
لزمت بيها بـ الايد الثانيه ، اثبتها
رفعت عيني لـ أيمن ، اتقدم كعد بـ قلة حيلة
مرت تقريب الـ ٣ دقايق
على صفنتنا هاي ، گام أيمن من يمي
اتوجهه لـ باهر يبلغه بـ الي گاله الدكتور
بقيت كاعده وحدي ، تجيت راسي ع الحايط
بـ گلبي يتردد الدعاء يطلع سالم معافى منا
و ما يصيرله شي
قاطع صفنتي رنة تلفوني
دحگت لـ رقم صافيناز جاوبت عليها
سألتني عن أيهم گلتلها دخل غيبوبه
انصدمت و حزنت دعت يگوم بـ سلامة
نزلت تلفوني سديت الاتصال
دحگت لـ رقم امي داكه عليه
ما ادري بـ التلفون و لا سمعته
اتصلت عليها ، جاوبتني
گلتلي شصار و وين انا حاجيتها
فيروز : مُلاذ شتسوووين يم اهل الولد؟؟
مُلاذ : شعليه انا بـ اهل الولد
انا هنا علمود أيهم
فيروز : مُلاذ ...
مُلاذ : اعرف هو ما يعنيلي شي
بس هو صديقي و وكف وياي بـ وقتي الصعب
ليش حتى هسه انا اتركه و اروح !
فيروز : لان عيب من اهله !
مُلاذ : مو جان وياي و يمي لمن تمرضت
شفتوا هالشي عيب؟؟ شفتوا غلط؟
فيروز : هو دكتور و جان لازم يعالجج
مُلاذ : و انا جنت مريضته و متفضل عليه هواي
و هسه لازم ادعي اله اذا هو عالجني انا ادعي اله و اساعده بـ اي شي يريدونه بـ المستشفى
فيروز : تعالي ادعي اله بـ البيت
مُلاذ : و شنو ضرري اذا اجنت بـ المستشفى
يمه شبيج انتِ هاي الايام ؟؟ تحجين صدك؟؟
فيروز : ااااخ مُلاذ ااااااخ
انتبهي لـ نفسج و ترجعين من وكت
مُلاذ : تمام
سديت الاتصال منها
اجا أيمن لـ يمي ، رفعت راسي دحگتله
لمن اتقدم كعد يمي ، گال
أيمن : تعبتي ويانا
مُلاذ : شسويت قابل
شو جني حايط بس واكفه
أيمن : أيهم لمن يصحى
ما رح ينسى هاي وكفتج وياه
مُلاذ : خل يصحى اول
هو وكف وياي هواي و بـ اصعب وقت
ضغط حيل على محاجر عيونه
من خبصتي ما شفت وجهه عدل
دحگت خده مشخوط
كصته مخلي عليها لاصق جروح
عيونه حمر و ايده ترجف ، استغربت حالته
مُلاذ : صاير شي ؟
أيمن : وياي ؟
مُلاذ : اي
أيمن : شصاير ؟
مُلاذ : خدك مشخوط و كصتك؟
دارت عيونه ، غمضهن حيل
هز راسه بـ رفض
أيمن : لا ما صاير
طاحت عيني على رگبته
مجرحه و مشخطه ، عگدت حواجبي
داخل معركه ؟ لان شكله ابداً مو طبيعي
بـ طبيعتي الاحظ و انتبه هواي ، صفة بيه
و بـ كل محامي يركز و ينتبهه على كل شي
دحگت لـ ياخة قميصه
عليها شي مثل الطحين ابيض
ازدادت العقدة يلي بين حواجبي
زحت نظري عنه لمن گام و گال
أيمن : رح اجيب مي و اجي
مُلاذ : تمام
ظليت صافنه و مستغربه
اتذكرت ابو أيهم يلي اختفى
قوست شفتي بـ استغراب
طلعت من يمهم بعد فترة
وديت سيارتي لـ المصلح
شاف الباب اخذ صفنة عليها
لحيت عليه يخلصها الي اليوم
گلي باجر العصر ارجعيلي
خليت و رجعت لـ البيت بـ تكسي
هكذا عدت الايام صلحت سيارتي
امر على أيهم اتطمن عليه
و اروح اكمل شغلي بـ المكتب
خليت عمال بـ محل الحلويات
امي تسوي كيك اخذه و نعرضه هناك
و كل يوم الصبح اخذها تسوي حلويات
و تخلص ، الناس تجي بـ قلة وهذا الشي طبيعي
محل الورد كان ايجار
صرت احس نفسي ما محتاجته
بس مع ذالك هم خليته مفتوح لـ فترة
ضرغام دائماً مخلي وراي حماية
و التهديدات تجيني من كل صوب
من الناس الي عدهم عداوه وي موكليني
و من جماعة الچتال و الملثم
يلي صار فص ملح و ذاب و محد لگاله اثر
حتى من سألوا ابو اركان منو شردكم
و منو ساعدكم ما قابل يعترف
مموتينه كتل و هم ما معترف
رفعت مناظري من عيوني خليتها على شعري
واكفه بـ الازدحام و صافنه ، منتظرة يفك الازدحام اخيراً بعد ما عبرت السيارات انا هم عبرت
و انا اسوق ، مرت سيارة واحد كدامي ضبط
دست بريك بسرعه ، انضرب ظهري بـ الكشن
منزله شبابيك السيارة ،
سمعت صاحب السيارة الگدامي يصيح
- حماااااره حماااره ما تشووووفين
هيييي هاااي منطين السياره لـ الثولات
نار اشتعلت بـ دماغي فتحت تلفوني
و هو مستمر يغلط سجلت صوته و صورته
سديت التصوير ، نزلت تلفوني
راد يعبر شخطت سيارتي
وگفتها كدام سيارته مانعته يكمل طريقه
داس بريك بسرعه و وكف ، نزلت من السيارة
ظل يدحگلي صافن ، رحت على سيارته
بعده بـ السيارة ما نزل ، دنكت دحگتله من الجامه
مُلاذ : عن منو گلت حماره انت؟
-ما تشوفين انا اريد اعبرر!
شغلت التسجيل مره ثانيه
- غبيه انتِ لو عميييه ؟
مُلاذ : احترم نفسك !
-مجذب قابل ابوج و اهلج وين عنج
مطلعين بت وحدها
شنو ذوله يردون يجيبون مصيبة لـ روحهم
مُلاذ : احترررم نفسسسك
انت منو و تغلط عليه !
- مااا شفتيني من مريت؟
مُلاذ : شفتك و انت هم شفتني
- اهلج مسيبيج بـ السيارة
وما تعرفين تسوقين طبعاً مبينه انتِ سالفتج
رفعت حاجبي صرت استفزه بـ كلامي
بس بـ طريقة محد يلومني بيها
و هو استمر يحجي و يغلط
انطيته مجال هواي
و انا على اعصابي ساكته ، سديت التسجيل
مُلاذ : و تگول عني هيج؟
انت الغلطان اولاً ،
ثانياً انا الجنت لازم اطلع و انت تعبر بعدين
ثالثاً تدري هسه على كلامك هذا
راح اوديك تسعه بـ اسود؟
- و منووو انتِ بت الوزيررر
كلج خلك بنيه
طلعت هويتي رفعتها راويتها اله
رفع حواجبه و سكت
مُلاذ : نشوف خلك البنية و العميه شتسوي !
تركته ، اتجهت لـ سيارتي
سمعته وراي يصيح : يا بنيه بس اوكفي
وصلت يم السيارة التفتت ، اجاني بسرعه
اتخصرت وكفت ادحگله
- اعتذر خويه
ضحكت تك خد
مُلاذ : هسه صارت خويه ، اعتذارك ما مقبول
النسوان مو عبيد عدكم
و لا الكم الحق تنتقصون من عدنا
انت رجال هسه معتبر نفسك؟؟
قلة احترامك هاي و سبك و كلامك كله
تتعاقب عليه حتى تتوب
- انتِ عرضتي كدامي
رفعت اصبعي حجيت بـ عصبية
مُلاذ : رح تتعلم تحترم نفسسسك
رح تبطل العربده هاي مو الكل يسكت الك
و تحترم النسووووان و تحترم الشااارع
لا شارع الخلفوووك و لا شارع فارغ
حتى انت تسوووق بـ هااي السرعه!
و كلامك هذا تتعاقب عليه
فتحت باب السياره و صعدت
حفظت رقم سيارته ، رحت لـ المحكمه
اذا تركت هالموضوع هيج رح يكرر هالتصرف
و مسوي من قبل و الواضح ساكتين عليه
بحيث من سكتت اخذ راحته بـ الكلام عبالك متعود
هاي النماذج ما يفيد وياها العيني و غاتي
و استمر يغلط و يتجاوز و لزمت اعصابي
حتى لا اطلع غلطانه انا بعدين
و ان اجا و اعتذر ما يهمني حتى يبطل
رفعت دعوى عليه بـ الفيديو العندي
اهانه هاي للناس و يتعاقب عليها
ذكرت الهم رقم سيارته
عندي جلسه بالمحكمه
لـ واحد من موكليني
خلصت كل شغلي و طلعت
رجعت رحت لـ المكتب اخذت اوراق ناسيتها
طلعت اتوجهت لـ المستشفى ..
نور :-
لفيت شعري ، گمت طلعت من غرفتي
لمن سمعت صوت عمتي تناديني
نور : ها عمه
منارس : تعالي نويره
نروح انا وياج ننطي لـ بيت اهل اركان
هاي الحلاوه هستوني سويتها
نور : تمام البس عباتي و اجيج
منارس : يلا استعجلي
ركضت ركض ركض لبست عباتي
و لفيت شالي رحنا انا وياها لـ بيت اهل اركان
دكينا الباب ، طلع النا اركان ورا دقايق
دحگلي ابتسم ، رجع عينه على عمتي
سلم علينا و گللنا ندخل بس عمتي ما قبلت
لح عليها ندخل و طلعت امه همين اصرت
دخلنا يمهم انطيناهم الحلاوه
امه ظلت تتشكر من عدنا
سوينا حلاوه ثواب لـ بيبي و ردنا نوزعها
بس اول شي انطينا لـ بيت اركان
لان قريبين علينا
دخلت دحگت لالي و ليان
گامن هنه هم سلمن عليه و كعدت يمهن
ظليت اسولف وياهن و اتطمن عن حالهن
لالي باقي الاثر مال جرح بـ رگبتها
ذكرني بـ اثر الچوية مال مُلاذ مو مثل قبل
بس هم مبين اكو خط بـ رگبتها
يحترك گلبي من اشوفه
التفتت على اركان يلي سد الباب و طلع
بقينا كاعدين يمهم لـ فترة
لالي و ليان بقن يسولفن وياي
لالي : بس لو اعرف شلون كدر يشرد
نور : يمعوده المهم بعد ما يتدنالكم
ليان : و الله انا لسا قلقانه الليل ما انامه
لالي : حتى انا اظل كاعده كل الليل
ما اكدر انام
نور : يا عمري لا تخافن
ان شاء الله ماكو شي و هاهيه سجنوه
لالي : مو انا هالعاده بيه من طفولتي
نور : شلون؟
لالي : دائماً جان يضربني و ياذيني
يعني من دون الكل فـ اتعودت ع الكعده هاي
نور : يا لييش؟؟
لالي : ما اعرف
ليان : اي صح جان شاد وياها كلش
نور : زين ليش ؟
لالي : مو انا من طفولتي جنت اعانده
يگلي روحي يمين اروح يسار
و يفرض عليه فرضيات اموووت منها
فـ هو ما يحبني
نور : يا عيني يتلگاها من رب العالمين
لالي : اميييين كون ما يشوف النور
كون هيج يصير جنه سلبوح سيان
هاي صلعته المكطفه كون تنطبر طبر
امييييين يا رب العالمين
صدمتني ظليت صافنه
و هي تدعي عليه بـ حرگة گلب انقهرت عليها موصلها لـ حالة بحيث تدعي عليه من كل گلبها
گامت ليان لمن امها صاحتها
كاعدات هي و عمتي منارس يسولفن
لالي : اگلج شي
بس ما يدرون بي لا ليان و لا اركان
نور : شنو؟
لالي : قبل بـ يوم من لا تموت اختي الجبيرة
الله يرحمها
نور : اي ؟
لالي : اجت لـ يمي بـ الليل
نور : ايي؟؟
لالي : جانت تبجي نامت يمي و هي تبجي
ما فهمت ليش تبجي شكد توسلت بيها تحجي
بس ابدد ما حجت و ثاني يوم ماتت الله يرحمها
نور : شنو يعني ؟؟
لالي : اتوقع اختي انتحرت
لان لگيت شغله ...
نور : شنوووو؟؟؟ غير ماتت بـ حادث ؟؟
شنو شغلتيش؟؟
سكتنا لمن اجت ليان كعدت
و انا عقلي وكف شنو انتحرت!!
گالوا ماتت بـ حادث و ما عرفنا اي شي بعد
ظل الموضوع يدور بـ عقلي
اجا اركان و گامت امه خلتلنا عصير
جبرتنا نظل كاعدين ، شربنا العصير
و انا اشرب عصير غصيت بي
گمت اكح و كلهم يدكون على ظهري
بلعت ريكي ادحگلهم و رجعت اكح
رفعت عيني ، لمن اركان مد الي كلاص مي
اخذت و شربت ، رجعت اله الكلاص
اركان : ها صرتي احسسن؟
نور : اي
اركان : اكيد؟ تريدين بعد مي ؟
نور : لا شكراً
دحگنا لـ اهلنا و نظراتهم ، عافني راح كعد بـ مكانه قدم ظهره ، شبك ايديه رفع عينه دحگلي ساكت
كم دقيقة مرت ، گمنا من يمهم طلعنا
رحنا لـ بيتنا ، اخذت باقي الصواني
وزعت على البيوت مال جيراننا
وكفت كدام واحد من بيبان جيراننا
ظليت ادك الباب محد طلع رجعت انا و صينيتي
دحگت لـ اركان لمن طلع
اركان : وزعتي ؟
نور : اي بس بقت هاي الكاسه
ذولاك الجيران ما فتحوا الباب
اتقدم وكف كدامي
اركان : ليش ما گلتيلي؟
نور : شنو اگلك؟
اركان : رح توزعين جان طلعت وياج
نور : نصير حديث المنطقة
و احنا ما مسوين شي
اركان : و خل نصير ؟
نور : و اهلي و اهلك ؟
اركان : ما عليهم شي
نور : صحيح بس احنا العلينا
تاخذ الحلاوه ؟
اركان : غير جبتوا النا
نور : عادي هي ثواب تريد؟
اركان : نوره ولج نوره
نور : ها
اركان : هاي ابتسامتج و انتِ تحجين بطليها
نور : ليش؟
اركان : شمدريني حلوه
ضحكت و انطيته ماعون الحلاوه
اركان : مأجورين
ابتسمت و هزيت راسي بـ قبول
اتقدمت اريد ادخل البيت
اركان : نور
التفتت دحگتله
نور : ها
صفن ثواني يريد يحجي
رفع راسه دحگلي و گال
اركان : انسي
نور : شنو؟
اركان : بعدين تعرفين
هزيت راسي و دخلت لـ البيت
بقيت افتر و انظف وي عمتي
امي نايمه ، ابوي و اسكندر و عزيز طالعين
لـ الليل اخذت ملابسي ، دخلت سبحت
طلعت من الحمام رحت لـ غرفتي امشط
فزيت على صيحة ابوي بـ عصبية
-نوررررررررررررر
انهبطت بـ مكاني ما يناديني هيج
الا اذا صاير شي و عصبي مني
رفعت عيني دحگتله لمن دخل الغرفه
نور : بابـ...
بعدني اريد احجي
اجا عليه جر شعري كل قوته
الا شويه ينكطع من جذوره !
و اتمنيت من بعد هاليوم ميته
و لا اعيش و اشوف الشفته ...
"ما هيَ سوى فَتاة بريئه من كُلِ الذنوب
تَوقدت شمعةٌ تتوسط عائلتها
لـ تُنيرهم لَكنها تَذوب
سَكبوا عليها الأنينِ و الحزنِ سكوب
ذات الشكل المحبوب و الصوت العذوب
قد بان على شكلها الشحوب
غابت الابتسامةِ من أطرافِ ثغرها
كـ الشمسِ عند الغروب
أُنها المُسماة بـ النورِ المَحجوب ."
مُلاذ :-
دخلت المستشفى ، اتقدمت لـ المكان مال أيهم
دحگت لـ ام أيهم متجيه راسها و غافية
محد موجود بس هي وحدها
حكيت راسي ، دحگت بـ المكان
مبين بردانه لان متجتفه كلش
مكرفصة نفسها ، دحگت عباتها
و هي لابسه جبه و اكو عباية مال راس
اخذتها خليتها عليها ، غطيتها
درت وجهي اريد اروح
فزيت على ايدي يلي انلزمت
انداريت دحگت لـ ام أيهم
هستوها تفتح عيونها
مُلاذ : اتفضلي؟
-تعالي اكعدي يمه
اتقدمت بـ هدوء كعدت يمها
مستغربه منها جانت تخزرني و لا تحاجيني
- شنو اسمج؟
مُلاذ : مُلاذ
-انتِ الي يحبج أيهم ؟
بلعت ريگي ادحگلها شوف السمعه
اذا يريدون يعرفون أيهم منو يگلولي يلي يحبج
و اذا يريدون يعرفوني انا منو
هم يسألون نفس السؤال
الحمدلله و الشكر انفضحنا ، ظليت ساكته
- انتِ؟
مُلاذ : اي
- من شكد تعرفين أيهم ؟
مُلاذ : خاله الموضوع معقد
لو ننتظر أيهم يصحى و يسولفلج افضل
- لا سولفي انتِ اسمعج
مُلاذ : انا ما جنت اعرفه بس هو يعرفني
- شلون؟
مُلاذ : شافني بـ الكُلية و حبني
-انتِ دكتوره؟
مُلاذ : لا ، محامية
- شافج بـ كلية باهر؟؟
مُلاذ : اي
- شوكت شافج؟
مُلاذ : من اول مرحله
- انتِ نفس عمر باهر؟
مُلاذ : اي
وسعت عيونها مصدومة تدحگلي
- يعني من اتزوج هو جان يحبج؟؟؟
مُلاذ : مادري
حكيت كصتي
انا الما اعترف بـ حب واحد
كاعده اشرح لـ العالم شلون حبني
ظلت تسألني و اجاوب على كد السؤال
- و شوكت حاجاج و صارحج؟
مُلاذ : ما صارحني
-شنو ما صارحج؟
مُلاذ : ما صارحني لمن جنت بـ الكُلية
-لعد؟؟
مُلاذ : اول مره شفته من تصاوبت
- انتِ ليش تصاوبتي ؟؟
صفنت شنو اگللها جانو خاطفيني
و عبالها ادخل ابنها بـ مصايب
گلت خل اكول هي خربانه خربانه
مُلاذ : جانو خاطفيني
و بـ يوم الردت اطلع
انضربت بـ رصاصتين بـ بطني
وسعت عيونها مصدومه
ظلت هيج مفزعه عيونها عليه
- منو خطفج؟
مُلاذ : ما اعرف
-شنو ما تعرفين؟
مُلاذ : ناس جانو معادين ابوي و خطفوني
- اعذريني يمه سألت هواي
بس استغربت !
مُلاذ : لا عادي
بقيت ساكته و هي تسألني
عن علاقتنا انا و أيهم و قبولي و رفضي
عقلي عطل و انا اجاوب ،
التفتنا على صوت غاده
اجت سلمت عليه و جاي وياها باهر
راحت لـ يم امه تسولف وياها و تهديها
و ظلينا ننتظر يصحى أيهم
راحت غاده اجت هتان وجهها احمر و ضايجه
مُلاذ : شبيج؟
هتان : أبيل گطع روحه تگطع بـ البجي
و ما يقبل يهدء يريد ابو يمه گلبي جاي ينعصر
حطت ايديها على وجهها ازداد بجيها
ضميت شفتي بـ حزن ما اعرف اواسيها
راحت لـ يم امها و امها حضنتها
رفعت تلفوني اتصلت بـ امي
سألتها اذا يحتاجون شي و عن ملاك
گالت ماكو شي و حذرتني اتاخر
سديت الاتصال منها بعد كم دقيقة
اتصل بيه ضرغام
سألني عن اذا اجاني تهديد لو صار شي
گلتله ما صار شي بعد
ام أيهم عيونها ورمت من البجي
و گامو يرجعونها لـ البيت ما يخلوها تبقى
اصروا باهر و أيمن ننقل أيهم
من هاي الـمستشفى لـ مستشفى افضل
و فعلاً نقلوا أيهم لـ مستشفى ثانية اهلية
گالو جان أيهم يشتغل بيها هم
لحگتهم بـ سيارتي و اظل هواي يمهم
بـ يوم و انا كاعده اجا أيمن
أيمن : ما صحى؟
مُلاذ : لا
كعد ع الكرسي
اجا باهر بـ ايديه لفات و ببسي
قدم الي و لـ أيمن
مُلاذ : ما اريد
باهر : لا اكلي يمعوده لا تستحين
مُلاذ : مو قصة استحي ...
و انا احجي سكتت
اتذكرت لمن أيهم يعرف بيه شنو اكل
و شنو ما اكل
و السبب يلي ما اقبل اكل علموده
في الماضي :
أيهم : اذا نفسيتج حلوه و ما ضايجة
تاكلين ٣ مرات شتشوفين تاكلين
اذا ضايجة ما تاكلين غير وجبه وحده
انتِ من احد يقدم اكل الج ترفضينه
مو لان تستحين
بس ما تحبين تاخذين اكل من احد
اضافة الى تخافين الاكل يكون مو طيب
و يصير عندج غثيان لان معدتج ما تتحمل
اي اكل و اساساً عندج جرثومه
ظليت موسعة عيوني عليه
هو سفطني تسفيط يحجي أدق تفصيله
مُلاذ : يبو صخام الصخمني
ولك انت كاعد وياي بالبيت شني السالفة
أيهم : لا يابه بس ...
مُلاذ : مركبلي كاميرات مراقبه؟
أيهم : لا ....
مُلاذ : تسأل المطعم الاكلت بي
بعد ما خلصت اكل؟
أيهم : لاا...
مُلاذ : تراقب تقلبات معدتي و مزاجي؟
أيهم : ولج فوصه خليني امخرط
مُلاذ : لعد شلووون تعرف؟
أيهم : عمي اذا انه ما اعرفج منو يعرفج
حالياً :
ابتسمت و انا اتذكر شلون يعرفني
اكلت لگمه دحگت لـ باهر و أيمن
باهر : تذكر من تعارك وي ابو الكص
أيمن : ههههههه اي
مُلاذ : شنو ؟
أيمن : لمن جنا صغار
رحنا تلاثتنا لـ محل مال ابو الكص
صمونه يابس و احنا فحطانين من الجوع
أيمن : اكلنا اول لگمه انكسر نص سني
من كد ما الصمون يابس ف أيهم
گال لـ صاحب المحل
"حجي شنو السالفه الصمون صاير كزاز"
أيمن : ابو المحل عاقج وجهه و من ورا خشمه
و أيهم نابغه يكوم يدردم من ما يعجبه شي
ابتسمت و اكلت من اللفه
كمل أيمن يسولفلي الموقف
أيمن : ابو المحل روحه بـ خشمه
گال "ما عاجبكم روحوا لـ غير محل"
و احنا صغار يعني أيهم جان بعده بـ عمر مراهقه
گله أيهم "و المن تبيع اذا صمونك يابس
غير لازم تتقي الله بـ الناس
و ما تبيع شي ياذيهم بالله تسممنا"
أيمن : حسبت ضبط ٣ دقايق هو يرزل بـ الرجال شال ابو المحل الحذاء مالته و احنا أركض
شلنا نعولتنا و طگيناها رگضه
أيمن : طاحت الحذاء وحده بـ ظهري
و الثانيه اجت ترس بـ اذان أيهم
ابو المحل لازملج دشداشته و يركض ورانا
هيج من الخلفوكم ، يندار أيهم يغلط عليه
و يكمل ركض و ابو المحل يشيل بـ الحذاء و يشمر
وكف أيهم اخذ الحذاء مالته خلاه تك و تك
أيمن : من المحل لـ الجسر احنا نركض
بس يابه غير نمت اسبوع بـ الفراش
كل حذاء و الثانية تجيني بـ نص العمود الفقري
و أيهم يون من اذانه طاحت الحذاء ترس بيها
غصيت من الضحك
اتخيل أيهم و هو يغلط و يشرد
و همَ يتذكرون و يضحكون
باهر : حذرته يصير حكيم بعد
مُلاذ : أيهم الحكيم
أيمن : ههههههههه
سكتنا شويه دحگت لـ باهر
يمسح عيونه ، باهر حساس
و متاذي هواي على أيهم
مرت اسبوعين على هذا الحال
أيهم ما كعد و مرات يدخلون اهله لـ يمه
يلبسون لبس طبي و يتعقمون و يدخلون
ابو أيهم من اخير مره
انفقد كل اثر اله
دحگت لـ أيمن لمن گال
أيمن : مُلاذ
مُلاذ : نعم
أيمن : تريدين تدخلين لـ يمه؟
مُلاذ : لا ، ماكو داعي
أيمن : ادخلي عادي
مُلاذ : لا ماكو داعي
انا ما اقرب اله بـ شي
أيمن : عادي حتى لو ما تقربين
هزيت راسي بـ رفض
گال هو رح يدخل لـ يمه
گلتله تمام و راح يتعقم و يلبس لبس طبي
ظليت كاعده بـ مكاني و ساكته
نزلت نظري لـ ايدي العب بـ اصابعي
مشاعر بـ داخلي مضطربه
مرات اگول خل ادخل و اذا
مرات اگول لا تمادينا هواي وين كاعدين احنا؟
و ارجع اتذكر هو هسه بـ وضع مو زين
صارلي شكد ما شايفة شكله و لا سامعه صوته
بس ما اكدر هم انكر هالشي غلط و ما يصير
اجا أيمن يمسح بـ وجهه
باهر خلينا يرجع لـ يم غاده لان حامل و تقلق
انا ما اقبل اعوف أيهم لـ وحدة
كل يوميه اجي اتطمن و ابقى يمه
ارجع لـ البيت اشوف اهلي
ادرس ملاك لان مرات ما تفهم شي تظل تبجي
اسبح و انام ثاني يوم اروح لـ الشغل
و اظل افتر بين المحاكم و الاجتماعات و المكتب
وراها اروح لـ أيهم و هذا روتيني
حصلت على رخصة سلاح
و هذا الشي بـ طلب من ضرغام
لان ممكن احتاج السلاح و لو كان لـ التهديد
و خليت السلاح بـ السيارة
بـ يوم ظليت بـ المستشفى كاعده لـ وحدي
گمت بـ هدوء دحگت لـ الغرفة يلي بيها أيهم
دحگت لـ الدكتور رحت اله
سألته اذا عادي ادخل يم أيهم
گال عادي بس ما يصير اتأخر
هزيت راسي بـ قبول ،
لبست الاشياء الطبيه يلي انطوها الي
عقمت نفسي و دخلت ،
بعدني هستوني داخله وكفت مكاني
دحگت لـ وجهه صارلي شكد ما شايفته
اتدنيت على كيفي لحد ما وصلت قريب عليه
طن كلام جان بـ حلگي بس ضاع كله
بلعت ريگي ، اتجولت عيوني على ملامحه
مُلاذ : أيهم
دحگتله و كعدت لـ يمه على كرسي
حضنت ايد بـ ايد
مُلاذ : أيهم شوكت تصحى؟
وجهي اذا ضجت و اذا حزنت من شي
يشتعل يصير احمر و احس بـ حرارة بي
مُلاذ : ابنك أبيل خطيه ينتظرك ...
يگولون الي يدخلون غيبوبه يسمعون
ما ادري اذا انت تسمعني ...
رفعت راسي ، غمضت عيوني
ما اعرف شـ احجي
مُلاذ : اكعد و فرح اهلك
بعد هواي اشياء ما سويناها
ابتسمت و گلت بـ صوت ناصي
مُلاذ : بعد تخطبني و ارفضك
و اخليك تنجلط
لطمت كصتي هاي عود اريد اصحي
نوب حتى اذا يريد يصحى يبطل
مُلاذ : جذب ما ارفضك بطلت
حكيت كصتي اجفص هواي
هواي كلام بـ گلبي و ما اعرف اعبر
مُلاذ : أيهم تعبت ما عندي طاقة بعد
حجيت بـ صوت تعبان
و لـ اول مره احجي بـ هاي النبرة
و بـ هذا التعب و احس بـ نفسي
مُلاذ : تعبت هواي من الركض
تعبت من قلقي و خوفي هذا
مالي طاقة اركض للـ مشاكل اكثر
مالي طاقة اخسر ناس اكثر
و تعبت و انا ازيد هاي الطاقه و احمل نفسي
حتى لو ما احبك مثل ما تحبني بس انت عزيز عليه
مسحت گصتي بـ كفى ايدي
مُلاذ : وكفت وياي هواي و دوم جاي اتذكر
دينك جبير و ما اكدر اسده
على الرغم من كل خبالاتك و طراكيعك عليه
بس أيهم اول مره اصدك اكو انسان يحبني
اول مره اصدك اكو انسان ينطي روحه علمودي
مسحت و جهي و انا احجي بـ صوت هادء
ايديه ترجف ، الدموع تتحجر بـ عيني و ما تنزل
اجتت ممرضة گالت ما يصير ابقى اكثر
هزيت راسي بـ قبول ، انداريت لـ أيهم
مُلاذ : اكعد و صير زين
و ارجع مثل قبل و احسن
انا واثقة رح تكعد و تصير زين
لان مو أيهم المطركع ام سوادي يعوفني
ابتسمت و انا احجي
مُلاذ : رح اروح ويمكن اجي مره ثانية
طلعت من يمه
انتزعت الكمامه و الاشياء الطبيه
دحگت لـ أيمن كاعد ، حكيت راسي
ابتسم عرف انا دخلت
مُلاذ : انا رح اروح
أيمن : تمام
مُلاذ : اذا صار شي اتصل بيه
أيمن : ماشي
اخذت جنطتي شفت اتصالات من امي
حاجيتها و گلتلها راجعه لـ البيت
هالفتره كلش اتشددت وياي
صارت حدية وياي و ما تقبل اعاند
رجعت لـ البيت دخلت سلمت عليها
بدلت ملابسي ، رحت اغسل
دخلت سديت الباب وكفت فتحت المي
رفعت راسي ، دحگت لـ روحي بـ المراية
انتبهت لـ وجهي صاير احمر كلش
عيوني محاوطها خط احمر داير ما دايرها
تحت عيني هالات واضحه فراغ بـ بداية شعري
نزلت راسي غسلت وجهي
اخذت منشفه امسح بيها وجهي ، ادحك لـ المراية
وجهي مطعون طعن احمر ، احس نار بيه
تنهدت ، طلعت من الحمام ، دحگت لـ امي
اجت سولفت وياي
فيروز : أيهم شلون صار؟
مُلاذ : بعده على وضعه بـ غيبوبه
فيروز : خطيييه و ابنه؟
مُلاذ : يبجي عليه يريده
فيروز : يا خطيه سودة عليه
متعلق بـ ابو يمكن
مُلاذ : اعرف احساسه
لمن تتعودين على شخص و من اهلج
بـ لحظة ما تلگينه يمج و لا وياج
دحگتلها دمعت عيونها
مُلاذ : فوفو لا تبجين
مسحت عيونها و سكتت
مُلاذ : عدج الدمعه مثل شربة الـمي
و انا عيوني طاكها جفاف مشفوطه الدموع
ضحكت امي
ابتسمت ادحگلها
فيروز : يلا كومي نامي ارتاحي
مُلاذ : انتِ هم نامي
فيروز : هو رح اكوم
هزيت راسي گمت لـ غرفتي
دخلت ، تمددت على بطني
من اول ما خليت راسي ع المخده غمضت
طبعاً من طلعت من يم الخطفوني
لحد الان الجثه بـ كوابيسي ما تفارگني
من كد ما اتعودت صرت افز
افتح عيوني ، ارجع انام و اغفى
مرت ٣ ايام ، داخله اجتماع
اجاني اتصال اكثر من مرة
اخذت تلفوني و گمت على جهه
دحگت لـ رقم باهر ، جاوبت
مُلاذ : الو
باهر : مُلاااذ
مُلاذ : هلو باهر شصار؟
باهر : أيهم صحححى
مُلاذ : صدددددددك؟
باهر : و الله
مُلاذ : شووكت؟
باهر : قبل سااعه
مُلاذ : تمام جاية
سديت الاتصال من عنده
نزلت التلفون رفعت ايديه و سويت حركة "yes"
ذبيت نفس بـ راحه و انا احمد الله و اشكره
درت وجهي ، رجعت لـ الاجتماع
اتحمحمت و حاجيت استاذ هيثم
سألته اذا اكدر اطلع
لان صارت عندي شغلة عاجله ، وافق
تركتهم و طلعت بسرعه
اتصلت على امي گلتلها أيهم صحى
فرحت مثل فرحتي و يمكن اكثر
رحت بـ وجهي لـ المستشفى
اول ما دخلت وصلت لـ الممر
دحگت لـ اخر واحد توقعت اشوفه
التفتت هو هم دحگلي ، گلنا بـ صدمة سويه
-هَلوووو هَلوووو
جسار : ولج انتِ شتسوين هناا؟
مُلاذ : هو انت الي شتسويي هنا ؟
جسار : سألت اول
مُلاذ : گالو أيهم صحى
جسار : انا هم گالو أيهم صحى
قلصت عيوني
اتقدمت بـ خطوات خفيفة
مُلاذ : ولك جسااار منو يوصلك اخبار؟
دحگت من ورا جسار
لمن اجا صوت ينادي اسمه
هتان : جسار
دحگتلها واكفه قريب علينا
رفعت حاجبي ، ابتسمت
گلت بـ صوت ناصي لـ جسار
مُلاذ : كضيتك
جسار : انجبي انا كضيتج
شتسوين هنا ولج اطلعي منين ما اجيتي
مُلاذ : ولك جسار الزلمه كعد خل اشوفه
جسار : ولي ماكو شني تشوفي
امشي طلعي كدامي ولج
مُلاذ : ولك جسار
جسار : ولج اطلعي كدامي
مُلاذ : انت اطلع كدامي بعدين احقق وياك
جسار : هياتني طلعت تعالي طلعي انتِ هم
بس احاجي هتان و اجيج
مُلاذ : اي حاجيها عيني ليش لا
خزرني ضحكت ، راح يحاجي هتان
رحت ختلت بـ ممر ثاني
جسار ما يخليني اشوف أيهم
مشاعرة الاخوية ما تسمح اله
مديت راسي دحگت لـ جسار
طلع من الممر الكدامي يدور عليه
ظل يتلفت و يدور طلع برا
ركضت دخلت الممر الكدامي
بعدني اريد اكمل ركض انلزمت من ياختي
جسار : ولج السحليه تتسحبين
مُلاذ : دوخر خل اشوف الولد خطية
جسار : امشي طلعي كدامي
لا الفج بـ طراخ ينسيج الولد
مُلاذ : جسار صاير غثه
هتان غيرتك عليه
جسار : انجبي و امشي كدامي
مُلاذ : شكد خبيث
جسار : اتحركي
مُلاذ : لا صدك جسار
خطية أيهم خل اشوفه
جسار : ششايفنتي انتِ ولج
شفتيهن على راسي شطولهم؟
مُلاذ : شننه؟
هز ايده ساكت ما عاجبة
مُلاذ : لا جسار صدك لازم اروح
جسار : و انتِ بصفتج شنو ترحين ولج؟
مُلاذ : غير صديقي
جسار : مُلاذ
مُلاذ : لا تلح
جسار : امشي سحليه امشي
مُلاذ : انت السحليه
رحنا انا وياه لـ غرفة أيهم
دحگت كدام الباب فارغ
فتحت باب الغرفة ، مديت راسي
دحگت لـ أيمن كاعد يم أيهم و الغرفة فارغة
وسع عيونه أيهم دحگلي
سرعان ما اندار لـ أيمن ، گال بـ صوت مبحوح
أيهم : أيمن طكني راشدي
هاي من الغيبوبة گمت اتخيل
ضحك أيمن ، ضرب رجله بـ ايده
هز راسه و گال
أيمن : ااااخ ااااخ لو تعرف
أيهم : شني شكو؟
دخلنا انا و جسار لـ داخل الغرفة
أيهم عينه عليه ، دنك أيمن يشاوره و يدحگلي
ابتسمت ، درت وجهي دحگت لـ جسار
رافع حاجبه يدحگلي بـ تك عين
ضحكت ضحكة ظاهره اسناني
اندار أيهم لـ أيمن گال مصدوم
أيهم : عليك العباس ؟
أيمن : و العباس
أيهم : تعال دنك خل ابوسك
الله يفرح گلبك مثل ما فرحتني
ضحكت جسمي يهتز
صدك أيمن دنك و باسه أيهم
سلم جسار على أيهم و اتحمدله بـ السلامة
وكف گال و هو يبسمر
جسار : اي جبت اختي و اجيت
أيمن : ياهي اختك؟
جسار : مُلاذ
أيمن : انت مو ابن عمها ؟
جسار : اي اخوها همين
افصم ظهر اليضوجها
أيهم : جزاك الله خير افصمه وياك ؟
جسار : لا انا افصم وحدي
أيهم : هاهيه اتفقنا
ضحكوا ، اتقدمت انا
نظرات أيهم و ترتني
مُلاذ : شلونك؟
أيهم : زين بـ شوفتـ...
قبل لا يكمل رفعت اله حواجبي
اشرت بـ عيوني لـ جسار
بـ معنى "لا تحجي كدام جسار هيج"
كمل كلامه و هو يگول
أيهم : زين بـ شوفت جسار حبيب روحي
جسار : ابن عمي غالي و غالي
أيهم : حبيبي خويه حزام الظهر
جسار : اي انا حزام ظهر مُلاذ
أيهم : جا ظهري شبي جرب؟
جسار : عدك حزامين طلابه
أيهم : ما اريدهم خيولون
أيمن : لا يا سكط تخلى عنا منا لـ هنا
ضحكنا گام أيمن من يم أيهم
أيمن : جسار شو تعال خل احاجيك
جسار : لا حاجيني هنا
أيمن : لا تعال برا
و هم يحجون اجا اتصال لـ جسار
جاوب على التلفون وكف يحجي شويه
عكد حواجبة و گال
جسار : تمام جاي
ثواني سد الاتصال
مُلاذ : شكو؟
جسار : صايره مشكلة بـ البيت
مُلاذ : مشكلتيش؟
جسار : باسط و سلطان متعاركين
خل اروح اشوفهم شبيهم
مُلاذ : تمام گلي بعدين شصاير
جسار : ميخالف
ودع جسار أيهم و أيمن
و طلع كم ثانية اجتني رسالة
رفعت تلفوني دحگت جسار دازلي
جسار : لا تطولين و ديربالج على نفسج
مُلاذ : تمام
سديت تلفوني
درت عيوني بـ الغرفة دحگت أيمن ماكو
مُلاذ : وين أيمن ؟
أيهم : طفر
ابتسمت و گلت
مُلاذ : شلون صرت؟
أيهم : زين كلش
مُلاذ : اهلك وين راحوا؟
أيهم : باهر اخذهم رجعهم
رح ينقلوني لـ البيت بعد اسبوع
مُلاذ : شفت أبيل؟
أيهم : لا ماريده يشوفني هيج
انه بعدين من اروح لـ البيت اخذه يمي
مُلاذ : بس انتبهه لا ياذيك
انت كلش متضرر
أيهم : من عيني ، تعالي اكعدي
اخذت الكرسي كعدت
أيهم : سمعت باقيه ٢٠ يوم يمي
مُلاذ : الصديق وقت الضيق
أيهم : يعني هسه انه صديقج؟
مُلاذ : اي
أيهم : عسل مو صداقة هاي
مُلاذ : عود هستوك كاعد
أيهم : من اگلج بـ شوفتج
صرت زين ما تصدگين
مُلاذ : ديلا صدكت
أيهم : شسويتي بدوني ؟
مُلاذ : اتزوجت و صار عندي جهال
أيهم : انجبي
مُلاذ : هههههه
أيهم : هاي عود انه توني كاعد
و هيج تتعبيني ولج لَـذه
لا ارادياً گلت بـ فرح
مُلاذ : الله لَـذه
اندار أيهم رفع حاجبه
سكتت اضم بـ جفصتي
أيهم : جنج مشتاقتلها
مُلاذ : لا منو گال ؟
أيهم : انتِ گلتي
مُلاذ : بـ الغلط طلعت
أيهم : انتِ مُلاذي و لذتي و لذة گلبي
سكتت مبتسمه
گلت بـ تساؤل
مُلاذ : صدك انت زين لو تجذب عليه؟
أيهم : و الله زين
مُلاذ : شلون انگلبت السيارة
أيهم : ما اذكر عدل
بس جنت اسوق و انا اسوق
طلعت مره جبيرة كدامي اريد ادوس بريك
البريك ما يشتغل ادوس ماكو
لفت سيارتي بسرعه ، افترت و انگلبت
وراها ما اذكر شصار بيه
مُلاذ : زين البريك ليش ما اشتغل؟؟
أيهم : بي مشكله يمكن
مُلاذ : يا جا شلون طلعت بـ السيارة
بدون لا تشوفها ؟
أيهم : ما اشوفها انه قابل شبيها
قوست شفتي بـ استغراب
مُلاذ : أيهم
أيهم : لذته؟
مُلاذ : ترا امي و امك عرفوا
اصلاً الكل يعرف
أيهم : شنو؟
حكيت شعري
مُلاذ : انت تحبني
أيهم : منين يعرفون؟؟
مُلاذ : لمن انضربت و خابرت لـ باهر
گلي انگلبت بيك السيارة
ردت اجيك ، امي ما اخلتني تعاركنا انا وياها
لان تريد تعرف المن رايحة و جذبت عليها
بس تعرف جذبت فـ بعدين انفجرت و گلتلها أيهم
أيهم : اي ؟
مُلاذ : و ما خلتني اطلع
غير بـ شرط احجي الها كل شي
و حجيت الها
أيهم : شگالت؟
مُلاذ : ما اعرف مگالت شي واضح
أيهم : و امي شلون عرفت؟
سولفت اله عن امه شلون عرفت
ظل ساكت يدحگلي
مُلاذ : مادري احس اكو شي غلط
أيهم : لَـذه
مُلاذ : ها
أيهم : ليش متوتره ؟
عرفوا بيه انه احبج مو انتِ تحبيني
سكتت و دحگتله رجع گال
أيهم : لَـذه انه مشتاگلج
و الله ما ظل صبر بيه ، لا تخافين انه ما اذيج
حبيني لَـذه حبيني لا تخافين من حبج الي
انه اذي الدنيا و ما اذيج
مُلاذ : ما اكدر اتقبل هالشي
أيهم : اتقبلي وياي صارلج شكد تعرفيني
و شكد عرفتي عني اشياء
ننخطب و اعرفيني اكثر
مُلاذ : ولك هستوك كعدت
شوكت لحگت تفكر بـ هالمواضيع
أيهم : لَـذه مو جاي نحجي
مُلاذ : أيهم انا اذيك تشوف حياتي هادئه؟
لحد ذاك اليوم رمـو.....
سكتت لمن استوعبت جفصتي
عگد حواجبه أيهم بـ استغراب
أيهم : شنوو ؟؟ كملييي !
مُلاذ : ماكو شي نام ارتاح
رح اطلع انا
أيهم : لذه تعاي و الله اكوم وراج
و هسه انا مكسر تكسر و هذا حالي
ردت اطلع و صدك راد يكوم
رجعت ركض : اووووكف اوكف تمام
أيهم : احجي شصاير؟؟
مُلاذ : بس ما تكبر الموضوع
أيهم : احجي
مُلاذ : ثاني يوم الك و انت بـ المستشفى
طلعت اشتم هوا ف وكفت يم سيارتي
مرت دراجة من كدامي و رموا بـ اتجاهي
بس ابوك حماني جان واكف ..
أيهم : شنووو؟؟ اوكفي اوكفي
ابوي شنو شيسوي يمممج؟؟
مُلاذ : اجا يشوفني
لان طلعت لـ برا و هو موجود
ف شافني و اجا يتطمن
استغربت تعابير وجهه أيهم
انگلبت گلاب عن قبل شوية
أيهم : و انتِ منييين تعرفين ابوي؟؟
مُلاذ : غير شفته بـ العرس مال غاده و باهر
و اتعرفت عليه ؟
أيهم : اييي؟ بعد التقيتوو؟
مُلاذ : اي و شفته بـ مطعم
طلعنا انا و صافيناز نتغدا شفنا صدفة
اجا سلم عليه و سلمت عليه ...
عاط بـ صوت عالي
بحيث بلاعيمه شحرجن
أيهم : انتِ شلووووون ما تگليييلي ؟؟؟
مُلاذ : شنو اگلك
اوكف نصي صوتك خيررر؟
نزل راسه ع المخده ، لزم بـ كصته
خفت وضعه يتخربط
أيهم : بعد شفتي ؟؟
مُلاذ : بس اهدء لا يصير بيك شـ..
أيهم : ماا بيه بس احجي موتتيني
احجي شفتي بعددد؟؟؟
مُلاذ : هو من اجيت لـ المستشفى
جان يعني يصيحني و يتشكرني
لان واكفه وياكم بـ هيج وكت
يعني ما گال شي بس جان يتشكرني هواي ..
أيهم : عاينيلييي اتذكرري زين
بعد شفتي ؟؟
مُلاذ : لا من فترة ما شفته
أيهم : شصار من رموا عليج
يلي بالدراجة سولفي
مُلاذ : أيهم ترا بعدك اليوم صحيت
حتى صوتك تعبان ما يصير هيج تضـ...
قاطعني بـ عصبية
أيهم : عوووفيني سمم مابيه
بس احجيلي شصار من رموا عليج
مُلاذ : هو گال ست مُلاذ صاحني
الي بـ الدراجة من رموا هو جر ايدي
و ركض بيه ورا سيارتي
و ظل ضامني عن الرصاص
أيهم : شنو ضامج شلووون ضامج
حضنننج ؟؟؟؟
مُلاذ : لاااا لااا يعني اقصد
صار هو سد الي يعني حماني
فرك وجهه حيل رجع ايده على شعره
ضغط على شعره و جره لـ وره
اندار حجا بـ حسم و عصبيه
أيهم : عاينيلي و افتحي اذاناتج
اسمعيني كلش زين
و تسوين كل الاگوله بـ الحرف الواحد
أيهم : هسه ترجعين لـ البيت
لا شغل و لا صخام وجهي گبل لـ البيت
ابوي اذا تشوفينه كدامج تدورين وجهج
و ترجعين من الطريق الاجيتي منه
و قبل لا ترجعين تخابرينيي و تگليلي
بـ نففففس اللحظة
بـ نفس الثانية التشوفينها بي تخابريني
أيهم : حسابج بعدين
لان ما حاجيه هاي السوالف كلها
و هسه اطلعي صيحي أيمن و انتظري بـ الباب
يطلع و ياخذذذج ديربالج تتحركين وحدج
مُلاذ : أيهم شكوو؟؟
أيهم : ماكو سوي الگلته
مُلاذ : ما اسوي
أيهم : ولج مُلاااااذ
وخري خل اگوم انه انعل ابو المرض
لابو حتى الـ ****
مُلاذ : اكعددد اتمدد أيهم
تمام رح اسوي الگلته
أيهم : وخري ما تسوين
مُلاذ : و الله اسوي نام اتمدد
أيهم : مُلاذ لا تحرگين اعصابي
تنفذين الگلته بـ الحرف الواحد
مُلاذ : تمام اتمدد
نام و لزم بـ راسه ، كرر اصيح اله أيمن
طلعت من يمه صحت أيمن ، دخل يشوفه
أيهم : تعال أيمن سد الباب
مُلاذ انتظري أيمن برا
عكدت حواجبي ضايجه
كل شي ما يقبل يفهمني
و ضاج متخبل من موضوع ابو
سدوا الباب ، ظليت واكفه انتظر
صار عندي فضول عجيب
خليت اذاني ع الباب احاول اسمع
كل شي ما افتهم بس صوت أيهم عصبي
بس ما واضح شنو يحجي
لان يحجي بـ صوت ناصي
خليت اذاني اكثر ع الباب سمعت أيهم يگول
أيهم : أيمن اكووو لعبه اكو لعبه
جاي يلعبها و مستغل وجودي هنا
أيمن اكشف هاي اللعبه قبل لا تتنفذ
أيمن : تمام
وخر اذاني من الباب مستغربة
عاكده حواجبي ما فاهمه شنو يقصدون
ابو أيهم شنو اله علاقه بيه؟؟
ليش هيج أيهم خاف و ارتبك من هالموضوع!
ابتعدت ، اتجتفت سندت ظهري على الحايط
وكفت يم الباب عدلت تعابير وجهي المستغربة
سويت الوضع طبيعي ، طلع أيمن دحگتله
أيمن : تعالي خل اوصلج
مُلاذ : لا انا اروح بـ سيارتي
أيمن : تمام بس قبل لا ترحين أيهم يريدج
مُلاذ : تمام
فتحت باب الغرفة ، دخلت
مُلاذ : صحتني ؟
أيهم : سدي الباب و تعالي
مُلاذ : هيج احسن
أيهم : مُلاااذ
كام بـ صعوبه و هو يسب روحه وكف المغذي
سديت الباب بسرعه خبلني
بس ما اقبل اسوي شي يكوم على حيله
مُلاذ : اجيييت عووووفه
أيهم : وخري لا تخليني اطلع عن طوري
ضاج و عصب كلش
غميت روحي ليش اضوجه
بس ضوجني و هو يطرد بيه
شال المغذي من الكانونه
غمض عيونه حيل لزم بـ السدية
مُلاذ : أيهم شبييييك هاي موو اجيت ؟؟؟
أيهم : انتِ تستغلين وضعي هيييج
تستغلين اكلان النعل الـ انه بي و تعانديني
انعل ابو المرض لابو حتى هالوضع الخايس
مُلاذ : بس ارجع اتمدد ما تكدر توكف
لزم بـ الحايط
ما يكدر يوكف صارله هواي ما واكف
و نايم و هو گبل كام على حيله و وكف
لزم بـ الحايط ادحك لـ رجلية ترجف
خليت ظهري ع الحايط الوراي و هو كدامي
رفع اصبعه يحجي بـ تحذير
أيهم : ايالج و بالج تتعرضين لـ شي
و ما تخابريني و تگليلي
مُلاذ اذا عرفت صاير شي و ما ادري انه
نجوم الظهر اراويجياها
مُلاذ : انت شو تهددني !
أيهم : لان ما تسمعين الكلام غير هيييج
مُلاذ : و شنو منو گلك اخاف اناا من تهديد !
أيهم : تخافين ما تخافين انه حذرتج
ابوي وين ما تشوفي تخابررريني فهمتي؟
مُلاذ : ليش ابوك شعنده وياي؟
دحك بـ عيوني بلع ريگه
مسح وجهه و انا ادحگله بـ استغراب
مُلاذ :احجي !
أيهم : مااا عنده بس انه من طفولتي اكرهه
ما اطيقة و ما اريد تلتقين بي لو تحاااجي
مُلاذ : كافي تنتر تدري بيه اكرهه هالاسلوب!
أيهم : ما جاي انتر جاي اگلج تگليلي
و ما تضميين عني اصغرررر شي فهمتي ؟
مُلاذ : هسه اتمدد كافي
أيهم : فهمتي مُلاذ ؟؟؟
مُلاذ : فهمت اتجفنتتت افتهمت
كافي اتمددد راح توكع
لزم بـ الميز يلي يم السديه
راح شمر روحه و كعد
أيهم : و باجر لا تجين
مُلاذ : من البداية گول ما اريد تجين
انا لان انت جنت واكف وياي بـ وقت صعب
اجيت لا تفكر علمود غير شي
أيهم : ازرفي لـ گلبي بعد
ادري بيج ما جايه محبةً بيه
قابل حابتني و جايه لو علمود سواد عيوني
كزيت على سنوني متنرفزه
يفتهمني دووووم غلط
مُلاذ : صحيح كلامك
عكد حواجبه يدحگلي
صاح بـ صوت عالي متنرفز
أيهم : ايممممممممممن
مُلاذ : هاااي عود هستووووك كاعد!
صوته شحرج
دخل أيمن يركض
أيهم : اخذها لا اتخبل
أيمن : تمام بس على كيفك
أيهم : انطيني باكيت الجكاير
أيمن : مو زين عليك
أيهم : انطيني لا انعل الخلفوك واحد واحد
طلع أيمن باكيت الجكاير ينطي
مد اله باكيت الجكاير ، جريته من ايد أيمن
و انا اخزر بـ أيهم و هو يخزرني
أيهم : تعالي انطينييي لا تسودنيني
مُلاذ : ما انطيك
لو تتمرغل هسه هنا بـ الگاع
امشي أيمن
طلعت أيمن كدامي
و اسمع أيهم يغلط على روحه
أيهم : انعل الخلفوني
لابو حتى گلبي النعال ابن النعال
انه كله صوجي
سديت باب الغرفة و طلعت
انداريت لـ أيمن
مُلاذ : انتتت شبيك؟؟
أيمن : يا ستار يا رحمان يا رحيم شكو؟
مُلاذ : شنوو تنطي جكاير
كل شي يگلك انطيني تنطييي؟
أيمن : غير عصبي ما يتحاجه
مُلاذ : و اذاا لان عصبي تنطي شي ياذي
أيمن : ياخذهن غصباً عليه ادري بي
مُلاذ : ياخذهن منك ترجع تاخذهن منه
و هذا السم لاا تشربونه حتى ريحته تلعب النفس
أيمن : هسه انتوا اخذتوني طحاحه
مُلاذ : ما يصير تنطي جكاير
و انت شفت وضعه حاله متدمر دمار
فوكاها تنطي جكاير شيصير بي ؟
أيمن : ترا هو قوي
مره هم سوا حادث و كام ثاني يوم و لاعبالك
مُلاذ : جسممم هذا اله قدرة تحمل
ماله دخل بـ القوة و الضعف يحتاج راحه
يحتاج اشياء صحيه موو جكاير !
أيمن : بعد ما انطي
مُلاذ : احسن ،
خل نشوف اله ممرض يوكف يمه
هسه شلع المغذي و مدري شسوووه رح يخبلني
أيمن : هاي الممرضه خل اصيحها
مُلاذ : لااا ممرض
أيمن : جا شبيها الممرضه
مُلاذ : لا ممرض عوف الممرضه
دحگت لـ أيمن حاصر ضحكته
عفته رحت صحت ممرض دليته بـ غرفة أيهم
راح اله بسرعة لمن شفته دخل الغرفة يلا رحت
أيمن : جدر اتدهده و لگه غلگه
مُلاذ : شنو؟
أيمن : سلامتج
غلست و كملت مشي
ولو انا فهمت قصدة
صعدت بـ سيارتي و رحت لـ البيت
دحگت بـ الـمرايه لگيت أيمن يلحگني
عود مخلي مسافه حتى ما اشوفه
وصلت لـ البيت دحگت وكف سيارته بعيد
سويت نفسي ما شفته و دخلت لـ البيت
مرت الايام و انا اخابر لـ هتان
اتطمن على أيهم ، حذرتها تگله اسأل عليه
و هي گالت لا ما اگول
مرات و انا طالعه اروح لـ المستشفى
اشوف يمشونه لو متمدد لو يضربونه ابر
بس هو ما يدري بيه ، اطلع بسرعه
مر اسبوع و انا ما متلقية بي و لا دزيت اله
دحگت اجتني رسالة من رقم غريب
فتحت الرسالة شفتها
"شكد تحرگين گلبي بعد؟"
جاوبت على الرساله مستغربة
مُلاذ : منو؟
- أيهم
- صاير شي؟
- صحيح نسيت
لازم اكو شي حتى احاجيج
- مو انت طردتني ؟!!!
مو گلتلي لا تجين
دك عليه جاوبته
أيهم : شووووكت طردتج انه؟؟؟؟
مُلاذ : مو گلتلي باااجر لا تجين؟؟
تنتر و تصيح عليه و ما تفهمني شكو
أيهم : گلتلج بس ما گلتلج لا تتصلين
ما گلتلج لا تسألين گلتلج لا تجين
بس ما گلتلج انسيني !
مُلاذ : تريد تطردني و ارجع ادك بابك!
حلوه هاي
أيهم : ما طردتج يالاسلام مااا طردتج
انتِ ليش تفهيمن المواضيع من ****
ليش تحرگين اعصابي!
مُلاذ : لان طردتني
أيهم : انه كلب دزيت
مُلاذ : زين
أيهم : خرب ، هتاااان
حسيت التلفون انترك
و اسمع أيهم يصيح لـ هتان
مُلاذ : شكووو؟ الو؟؟
ما اجاني اي جواب
و اسمع صوت هتان خايفة بـ الاتصال
خفت ما مفتهمه شصاير و شكو!
سديت الاتصال من أيهم اتصلت بـ هتان
ظل يرن يرن و ماكو جواب
رجعت اتصل بـ أيهم هم ماكو جواب
دقيقتين و هتان اتصلت عليه
مُلاذ : هتان ؟؟
هتان : الو
مُلاذ : شكو؟
هتان : دقيقه اوكفي
سمعت أيهم من يمها يگول
أيهم : منو هاي ؟
هتان : صديقتي فَي
أيهم : تمام
هتان : ها فَي اوكفي خل اصعد
مُلاذ: تمام
اسمع صوت خطواتها
و طبگة الباب
مُلاذ : شكوو شبي أيهم ؟
هتان : طك خشمه دم
مُلاذ : صدك؟؟؟
هتان : و الله ، انتِ شمدريج؟
مُلاذ : جان يخابرني من صاحج
لسا خشمه ينزف ؟؟
هتان : لا يگول وكف
مُلاذ : انتبهي عليه
هتان : تمام
ودعتها و سديت الاتصال
رجعت اتصلت بـ أيهم جاوبني
مُلاذ : شبيك؟
أيهم : مابيه
مُلاذ : لا صحت لـ اختك
و سمعت صوتها خايفه شبيك؟
أيهم : گلتلج مابيه
مُلاذ : ظل هيج نتر
أيهم : منو الجاي ينتر ؟
مُلاذ : أيهم يعني انا اجيت
بعدني احجي وياك عصبت
و كمت تغلط على نفسك
و تگلي لا تجين شتتوقع يعني؟؟
أيهم : كم مره گلتيلي ما اريدك
و طردتيني بكل وضوح من يمج
بس بقيت لان جنتي متأذيه و كل ما تتاذين
على الرغم اعرف بيج ما تريديني يمج
أيهم : ادوس على روحي و اجيج و ما متمنن عليج بالعكس انه اتخبل اذا صارلج شي و ما اجيتج
و لا متفضل عليج غصباً عليه اجيج و اوكف وياج
أيهم : بس انتِ من اول كلمه و حتى ما قاصدها
عفتيني و رحتي و ما اجيتي بعد و لا سألتي
مُلاذ : و انت شمدريك ما سألت؟
أيهم : وينج اتصلتي ؟
دزيتي رسالة على الاقل ؟
مُلاذ : البارحه جنت نايم طول اليوم
و تعبان مالك خلك و مصخن هم
قبلها بـ يوم فتحوا مال رقبه من رگبتك
و قبل ٣ ايام اجا الدكتور و شافك
و تحتاج بعد عناية و علاج و هم اكو قبلها
سكت لـ ثواني
أيهم : منين تعرفين؟
مُلاذ : اعرف مو بس انت تسأل
و لا بس انت تخاف عليه و تريد اكون بخير
أيهم : منين تعرفين مُلاذ ؟
مُلاذ : ما راح اگول
أيهم : ليش ما اجيتي و دزيتي الي !
مُلاذ : ما دزيت انا اعصبك و اضوجك
خليني بعيدة عنك منا لمن تصير زين
هسه هم عصبت و ضجت مني
انا هذا اسلوبي مو بـ ايدي
ما اعرف شنو احجي و شنو اسوي
اول كلمة تجي على لساني اگولها!
أيهم : مُلاذ تعبتيني و انتِ ما تفهميني
انه ابوي واحد **** ما اريد توصلين يمه
لو يوصل يمج انه يم هتان ما اخلي يوصل
مُلاذ : و ليش شبي؟؟
أيهم : هاي انا من الطفوله اكرهه
مُلاذ : قابل رح يسوي الي شي ؟
أيهم : ما يسوي و شحده يسوي
اجرم بي احط ايديه بـ خوانيگه و اموته
بس گلتلج ما اريدج توصلين اله
مُلاذ : تمام
أيهم : و هسه شنو نظل متعاركين لو شلون؟
مُلاذ : لا خل نتصاحب
أيهم : يلا اتصاحبنا
ابتسمت : شلون صرت؟
أيهم : زين
مُلاذ : مساع شبيك؟
أيهم : طك خشمي دم
مُلاذ : عزززززه انرفع ضغطك؟؟
أيهم : ما ادري بس وكف
مُلاذ : شوف دكتور من وراي
أيهم : انتِ ترفعين ضغطي اكثر من الملح
اذا واحد يريد ينجلط و يموت يحاجيج
مُلاذ : يا يا يا
أيهم : اي اي اي
مُلاذ : دكتور ظالمني
أيهم : اي مظلومة سودة بوجهه أيمن
مُلاذ : هههههه أيمن شعليه؟
أيهم : مادري بس سوده بوجهه و وجهي
مُلاذ : صدددك عرفت غاده حامل؟
أيهم : من يا زمان
مُلاذ : تدري انا عرفت اول وحدة
أيهم : و ليش ما گتيلي
مُلاذ : هي رادت تسوي مفاجئه لـ باهر
تذكر يوم دزيت الي صورتك بـ الشماغ
هي بـ نفس اللحظة گلتلي و لمن گلتلك سر ما اكول
أيهم : يا فوووصه
مُلاذ : هههههه
ظلينا نحجي شوي
بعدين سديت الاتصال منه
مرن يومين ، دنيا ليل و نايمه
قاطع نومتي صوت دك قوي
فزيت رفعت نفسي من الفراش مستغربه
اسمع الباب يدكونها حيل جريت تلفوني
دحگت الساعه ٣ الفجر ، عكدت حواجبي
دخلت امي غرفتي تركض و مستغربه
منو يدك الباب بـ هذا الوكت و هيج !!!
جريت جاكيتي من على الميز
و امي تلزم بيه ما تخليني اطلع
فلتت ايدي منها طلعت سمعت واحد يگول
-اكسروا الباب
فتحت القفل بسرعه و فتحتها
ادحگلهم مستغربه
كدامي ضابط و وراه شرطه
مُلاذ : اتفضلوا ؟؟
- مُلاذ إلياس؟
مُلاذ : اي ؟؟
-لازم تجين ويانا لـ المركز
مُلاذ : يا مركز ؟؟
-مركز الشرطه
مُلاذ : لييييش؟
-متهمه بـ جريمة قتل
وسعت عيوني مصدومة ادحگلهم
سمعت دگة امي على صدرها و شحطتها ...
- يتبع الفصل التالي اضغط على ( رواية جرح الأيهم ) اسم الرواية