رواية جرح الأيهم الفصل الثالث و الثلاثون 33 - بقلم أيلان
"الجُــرح الثالث و ثلاثون"
عزيز : منا لمن يصيرن زينات نرجع
صعدنا بـ السيارة
اسكندر ظل يغلط على عزيز معصب منه
فتح باب السيارة من جهتي گلي اصعد ورا
صعدت و هو صعد بـ الصدر
اسكندر : حرك يلا
اتجهنا لـ المستشفى نلحكهم
وصلنا نزلنا نركض فتحنا باب السيارة
شال اركان لالي و ام اركان لازمه بـ ليان
دخلنا لـ المستشفى بيهن على وجههن كدمات
اخذوا لالي يشوفون جرحها
و ليان اخذوها يضمدون وجهها
لان خدها مشخوط هم و ينزف
لحگت لالي گالوا الحمدلله
الجرح مال سجينه مو عميق و الا جان ماتت
خصوصاً الجرح قريب من مكان النبض
لَكن مو كلش و لا بـ مكان النبض
دحگت لـ اركان يلي كعد ع الكرسي
نزل راسه مهدود حيله ، ظل صافن بـ الگاع
بـ لحظة رفع راسه عاگد حواجبه ،
گام من مكانه ، مشى بسرعه لـ الباب
راد يطلع من المستشفى
ركض وراه ضرغام و عزيز لزمه
اتخبل صار يصيح و يتعارك
شلون ابو يكدر يشرد ، يريد يروح اله
اركان : الممممن الممن مخلي بـ السجن
اذا يكدر يشرد و يطلع و يجي يتهدد علينا!
ضرغام : مااا ادري اركان
مو بس هو يلي شرد شخص ثاني وياه
اركان : و شنووو هو سجن
لو سوك يطبون يطلعون بـ كيفهم !
ضرغام : انت فاهمني
يعني بـ مساعدة اشخاااص شرد
منو ذوله الاسخاص و ليش ساعدوه
رح نحاول و مو بس نحاول رح نعرف
اركان : ضرغام انت مفتهمني!
اختي الي جوه اخواتييي و امي
سجنته و ما عولت ينسجن حتى يبتعد عنهن
هسه جايني يلولح بـ ايده و شارد !
ضرغام : زين انا شنو بـ ايدي؟؟
اكدر اسوي شي و ما مسوي
اركان : المن ساجنينه اذا يتعرض الهن
و اذا يجي وياذيهن المن مخلي بـ سجن
عزيز : هدي بالك ابقى يم خواتك
اسكندر : قابل ضرغام شعليه
شني هو الشرد ابوك هو ابوك يحوص
جنه جريذيه هاكداته طلعله من زرف و شرد
اخذ عزيز اركان يهدي بي
و اسكندر يصنف على ابو اركان
رحت وراهم دحگت لـ ضرغام
اتقدم كعد يم اركان و اخواته
لالي بلشت تصحى تدريجياً
فتحت عيونها
خلت ايدها على رگبتها متوجعه
بعد ما صحت و لـ فترة
بدء ضرغام و وياه ضابط يسألوهم
عن يلي صار ، حجت ام اركان و هي تبجي
ام اركان : اندكت باب البيت
فتحتها طلع بـ وجهي ناصر (ابو اركان)
بعدني اريد اصرخ و احجي
سد حلگي و خنكني طلع سجينه
خلاها على رگبتي و ضربني على وجهي
بجت و غطت وجهها
كملت لالي بـ صوت تعبان
ليان : طلعت من الغرفة شفت امي
و هو لازمها صرخت طلعوا اركان و لالي
دفع امي جر لالي ردت اجرها من ايده
شمر بـ السجينه كدامي شخط خدي
و بقى يهددهم ينطونه فلوس
اركان : انطيته كل يلي عندي
راد اكثر و انا ما عندي ما اعرف منين اجيب
ضغط بـ السجينه على ركبة لالي
اتحول تهديده صار يريد امي تسحب شكوتها
لحد ما اجيتو انتوا و تعرفون الباقي
ضميت ليان يلي تبجي لـ صدري
هز راسة ضرغام بـ قبول
اخذت ليان و رحت اشتريلها مي
اجا عزيز ويانا و الباقين بقوا يم اهل اركان
بندت من البجي انقهرت عليها
موقفها صعب و خافت
نور : اهدي حبيبتي
ليان : جان رح يكطع راسها
نور : بس ما صارلها شي الحمدلله
خلت ايديها الترجف على وجهها
ظليت امشي بيها و حاضنتها
اشتريتلها مي و حاولت اهديها
رجعت لـ مكاننا طلع بـ وجهي اركان
اركان : وين رحتن؟؟!
نور : اشتريت الها مي
دحگلها اركان اخذ ليان من يمي
حضنها و ظل يمسد على شعرها
دخلنا لـ يم اهله
ضرغام : لو ترجعون لـ البيت افضل
راح اركان لـ يم لالي
كعد يمها و حاضن ليان ، كامشه بـ ايدي
رحت وياهم لـ يم لالي
دنك يحاجيها بـ صوت ناصي
اركان : لالي بابا نرجع لـ البيت
لو تحسين نفسج
بعد تحتاجين تبقين بالمستشفى
هزت راسها لالي بـ رفض
لالي : خل نرجع احسن
التفتت لـ ليان و امه
هزن راسهن بـ قبول
راح اركان هو و عزيز يشوفون الدكتور
اتقدم ضرغام لـ يم لالي
ضرغام : شلون تحسين نفسج زينه لو لا؟
لالي : زينه بس رگبتي
ضرغام : يخف وجعها شوية شوية
تبقى بس اثر
لالي : انت ضابط ؟
ضرغام : اي
لالي : متعود على هاي الاشياء
ضحك و حك ارنبة خشمه
ضرغام : اسأل مجرب و لا تسأل حكيم
ابتسمت لالي ساكته
دخلوا عزيز و اركان وياهم الدكتور
شاف لالي و حاجاهم ، شوية و طلعنا ...
مُلاذ :-
كعدت على الجرباية
رجلية احس الدم وكف بيهن
بعد ما اكدر اوكف
حجيت بـ صوت يرجف ، مصدومة
مُلاذ : شنو باهر شنو السيارة صايرة علج؟؟
باهر : ما اعرف اتصلت عليه
جاوبني واحد گلي صاحب التلفون
مسوي حادث ماخذينه بـ اسعاف لـ المستشفى
ظليت ساكته احس عقلي اتجمد
سديت الاتصال من باهر
بقيت ادحك لـ كدامي
اتذكر كلام الدكتوره و اتذكر أيهم
انصدمت و هواي انصدمت
جسمي يرجف خوف و قلق
رفعت تلفوني اتصلت بـ باهر مره ثانية
سألته عن اسم المستشفى ، جاوبني
سديت الاتصال منه ، گمت اخذت السويج
اتوجهت لـ باب الغرفة طلعت
دحگت لـ امي يلي سألتني
فيروز : وين؟؟؟
مُلاذ : يمه لازم اطلع
فيروز : ماكو طلعه اكعدي بـ مكانج
مُلاذ : يمه مستعجله و الله ارجع من وكت
فيروز : ماااااكو طلعه مُلاذ
حسيت وجهي اشتعلت بي نار
جسمي كله يرجف كلام باهر خوفني
مُلاذ : يمه لازم اروح ارجع بسرعة
فيروز : وين تروحين؟؟
مُلاذ : لـ المستشفى
فيروز : شتسوين بـ المستشفى؟
مُلاذ : وحدة اعرفها بـ المستشفى
متمرضة و واكعه اريد اروح اشوفها
فيروز : منيه هاي؟
مُلاذ : ما تعرفيها
فيروز : ماكو طلعه
مُلاذ : يمممه !! جاي اگلج ارجع
ارجع بسرعة و الله ارجع بسرعة
فيروز : لااا ماكو طلعه هالوكت
مُلاذ : شبيييج اليوم شبييج
جاي اگلج بـ المستشفى يمه خليني اروح
رحت على الباب اريد افتحها قافلتها
رحت عليها دحگتلها : وين المفتاح يمه؟
فيروز : ماكو طلعه مُلاذ
بالليل و بـ هالوقت ماكو طلعه
مُلاذ : هستوهااا صارت بـ ثمانية
يمه الله يخليج اطلع بسرعه و ارجع
فيروز : منيه صديقتج؟
مُلاذ : ما تعرفيها
علت گلبي ما تقبل تنطيني المفتاح
وجهي صرت احسه نار اشتعلت بي
عيوني اذاني ، اتصل على باهر ما يجاوب
رحت على الباب احاول افتحه ما يفتح
اتوسل بـ امي تنطيني المفتاح ما تقبل
تخاف يصيرلي شي قافله الباب
وكفت ورا الباب الوي بـ المقبض و احاول افتحه
اتصلت على باهر ما يجاوب
امي كاعده و تشوف حالي ما تخليني اطلع
ضربت رجلية بـ الكاع گمت اعيط بـ غضب
مُلاذ : خلييني اطلع
فيروز : منييييه صديقتج؟
غير اعرف منيه اطلعج هيييج؟
رحتي و صارلج شي شلون گليلي
شوفي الاخبار جاي يطلعون اشكال و الوان
و احنا مو قليلين هم يصيرلج شي و افرفح؟؟
مُلاذ : ظلي ع الاتصال وياي
بس اطلع بسرعة و ارجع حبابه
فيروز : منيه صديقتج؟؟
مُلاذ : غاده
فيروز : مو غاده لا تكذبين
هستوها جنات جانت تحاجيني
و گلتلي غاده يمها و نايمه !
فوك ما مو مهتمه لـ كلامي و تردين تطلعين
جااي تكذبين عليه !!
وگفت بـ استقامه
دحگتلها گلت بـ هدوء : أيهم
فيروز : شنو ؟
مُلاذ : أيهم يلي بـ المستشفى
انگلبت السيارة بي اريد اروح اشوفة
زادت العقده الي بين حواجبها اكثر
و زاد استغرابها
فيروز : يا أيهم ؟؟
مُلاذ : اخو باهر
اتقدمت مديت ايدي الها
مُلاذ : اكدر اخذ المفتاح هسه
فيروز : و انتِ شنو علاقتج بـ أيهم ؟؟
مُلاذ : خليني اروح
بس ارجع احجيلج كل شي و الله
دحگتلي على نفس عكدة الحواجب
رفعت اصبعها گالت بـ تحذير
فيروز : كل شي تحجين
ما تضمين عني حرف واحد
هزيت راسي بـ قبول
مُلاذ : كل شي
نزلت اصبعها دارت وجهها
راحت كم دقيقه و رجعت انطتني المفتاح
انداريت اريد افتح الباب لزمت ايدي
فيروز : بس تشوفي مُلاذ و ترجعين بسرعه
تخلين تلفونج مفتوح و ما تبعدينه من يمج لحظة
هزيت راسي بـ قبول
تركت ايدي فتحت الباب بسرعه و طلعت
فتحت باب الشارع دحگت ثنين واكفين كدامه
مُلاذ : منو انتوا ؟
-الـ&&&& ضرغام دزنا حماية
هزيت راسي بـ قبول
وصيتهم على اهلي
- اربعه رسلنا ثنين واكفين ورا بيتكم
و احنا منا واكفين
مُلاذ : تمام
مشيت ناحية سيارتي
انداريت دحگت واحد منهم يلحگني
مُلاذ : وين؟
-الـ&&&& ضرغام امرنا
نكون ويا كل شخص يطلع منا
مُلاذ : ماكو داعي
-امر الي هذا ماكدر اطلع عنه
رفعت تلفوني اتصلت بـ ضرغام
گلتله ماكو داعي يكون اكو شخص وياي
رفض و بعد محاولات قبَل و حاجا اليمي
صعدت بسرعه بـ سيارتي
توجهت لـ المستشفى
اول ما وكفت سيارتي اتصلت بـ باهر
نزلت بسرعه ادور عليه بـ عيوني
انتظرته يطلعلي لحد ما شفته رحت ناحيته
دحگتله عيونه حمر و وجهه احمر
مُلاذ : شبي أييهم ؟ شلون اندعم
و شلون وضعه؟؟
باهر : ما ادري اتصلت عليه
جان رايد يروح لـ الحله خابرته
ردت اگله ينتظرني حضرت غراضي
وديت غاده يم اهلها
باهر : جاوبني واحد
گلي صاحب التلفون مسوي حادث
رحت اركض اشوفه لمن وصلت
طلعوا الاسعاف هم هستوهم و اصلين
و يحاولون يطلعونه من جوه السيارة
صايره طحين و مگلوبه بي
جبناه لـ المستشفى الدكتور يكول متضرر
رح اتخبل مُلاذ رح اتخبل لسا بـ العمليات
جر ياخة قميصه ، يريد ياخذ نفس
رجع يبجي ، اختنگت كلش
دخلنا و وصلنا دحگت لـ اهله
كلهم ملتمين و يبجون حالهم حال
واكفين كدام غرفة مال عمليات
ادحگلهم حتى أبيل وياهم جايبينه
ما مفتهم السالفه شنو بس يدحگلهم يبجون
بلعت ريگي ، اتوقفت بـ مكاني
اتجولت عيوني على اهله
أيمن لابس قاط ، گاعد بـ الگاع
هتان كاعده تبجي و تمسح بـ دموعها
دحگت لـ امه تون من القهر و تدك على رجلها
مشكله بـ ايدها كانولا و مغذي
التفت أبيل دحگلي ،
ابتسم اتوسعت ابتسامته اكثر
ضحك و صاح بـ صوت عالي
أبيل : الهلووووه
التفتو كلهم عليه
اجاني يركض حضن رجليه
نزلت راسي دحگتله ، بلعت ريگي
رفعت راسي دحگت لـ اهل أيهم
يلي انظارهم متوجهه الي و عليه
دحگت لـ ام أيهم
عاگده حواجبها تدحگلي
شلت أبيل من الگاع
و هو يكرص بـ خشمي ابتسمت ادحگله
ظليت شايلته و هو يلعب بـ وجهي
فرحان يسولف وياي ، نار بـ گلبي
ما يعرف و لا يفهم ابوه بـ اسوء وضع هسه
اجت هتان لـ يمي و هي تبجي
عبالها أبيل يزعجني او ما يعرفني
هتان : انطيناه ما يعرف هو صغير
مُلاذ : لا خليه انا اعرف أبيل
ما يزعجني لتخافين
سكتت هزت راسها بـ قبول
وكفت يمي و استمرت تمسح عيونها
ترجع تدمع ، بقينا على هذا الحال ننتظر
امي تتصل عليه كل عشر دقايق
و أبيل ضاج يريد ينام
- شصاير ؟ وين أيهم ؟
رفعت راسي دحگت لـ ابو أيهم
التفتت لـ اهله يلي كلهم دحگوله
و هو واكف كدامهم يسأل بـ هدوء
فزيت على صوت أيمن العالي
گام من مكانه و هو يصيح
أيمن : انت شتسوووووي هناااااا؟!!
أبيل خاف ضميت وجهه الي اكثر
ظل لازم بـ ملابسي
دحگت لـ باهر و هتان طفروا لزموا أيمن
و هو يصرخ و يتعارك وي ابو
ابو أيهم واكف كدامه بـ كل هدوء
و ام أيهم بس تبجي حتى ما تكدر تكوم
أيمن : اطلللللع ارجع منين ما اجيييت
ابو أيهم : اخفض صوتك احنا بـ مستشفى!
أيمن : دمشي لك *****
تعرف مستشفى انت ؟؟؟
مسووووي روحك اب و جااي اطلع منااا
اجو الدكاتره و كم شخص
يحاولون يهدئون أيمن اتخبل على ابو
و كلهم لازمين بي و ابو يستفزه
يدحگله بـ كل هدوء مبتسم
ازدادت العقدة يلي بين حواجبي
جر باهر أيمن طلعه لـ برا
ظلينا ندحك وراه ،
اتقدمت هتان سلمت على ابوها
لحظات و اتوقفنا كلنا
لمن طلع الدكتور من غرفة العمليات
گمنا نتراكض اله
- شتصيرون من المريض؟
هتان : اهله
- رگبته متضرره بسبب الحادث
ظهره مشكوك هواي متضرر
وحدة من كزازت السيارة داخله بـ بطنه
كذالك رجلة مكسوره گلت راسه متضرر
رح ننتظر لـ فترة حتى يصحى
و ممكن تصير مضاعفات
لكن وضعه حالياً مستقر
طلعوا أيهم من غرفة العمليات
رحنا كلنا وراه دخلوا باهر و أيمن
لمن شافوه ركضوا عليه اخذوه لـ غرفة ثانية
ادحك لـ وجهه و اتغصغص
ممنوع احنا ندخل للغرفه ، شكلوله اجهزه
رفعت تلفوني يلي اجاله اتصال
دحگت اسم امي رديت عليها
گلتلها طلعوه ، اصرت ارجع لـ البيت
دحگتله اخير مره عبست شفتي
غصة خانكه بلعومي ، اتقدمت من يمهم
حاجيت باهر و گلتله اي شي يصير يبلغني
و باجر ارجع يمهم ، نزلت لـ أبيل بوسته
طلعت من يمهم ، اتوجهت لـ سيارتي
بعدني توني فاتحه باب السياره
التفتت على شخص ينادي اسمي
- ست مُلاذ
دحگتله ابو أيهم
اتقدم ناحيتي بـ خطوات خفيفة
ابو الأيهم : عرفت اسمج من باهر
مُلاذ : اتفضل؟
ابو الأيهم : ردت اتشكرج على وكفتج ويانا
انتِ فعلاً انسانه صاحبة اصول
هزيت راسي : ما سويت شي
ابو الأيهم : مجرد سؤال
شنو سبب تواجدج هنا؟
قوست شفتي
مُلاذ : أيهم صديقي
اتصلت بـ باهر علمود شغلة
بلغني أيهم مسوي حادث و اجيت
ابو الأيهم : اشكرج تعبناج ويانا
مُلاذ : عفواً ما سويت شي
ابو الأيهم : باجر رح تجين؟
مُلاذ : ان شاء الله
ابو الأيهم : ادعي يكون بخير
مُلاذ : يطلع منها سالم ان شاء الله
انت اعلم بـ ابنك و قوته
ضحك و هز راسه
ابو الأيهم : طبعاً
مُلاذ : لازم اروح
ابو الأيهم : طبعاً طبعاً اعذريني اخرتج
اخذي راحتج اعتذر عن تاخيرج
مُلاذ : لا بس امي تنتظرني
هز راسه بـ قبول ، ودعته ، صعدت السيارة
رديت على امي يلي تتصل گلتلها جايه
طول الطريق صافنه و عقلي مو وياي
اختنكت كلش وكفت ع الطريق
صفيت سيارتي على جهه
عقلي مخربط ما اعرف بـ شنو افكر بالضبط
ليش هلگد خايفة؟ و ليش كل اطرافي هيج ترجف؟
مو اسكندر و ضرغام اعترفوا
ليش ما رفضت أيهم بـ صريح العباره مثلهم
ضحكت على نفسي بـ شنو حايرة
و أيهم هسه بين الحياة و الموت
اتصلت عليه امي شغلت سيارتي و جاوبتها
كملت طريقي لـ البيت بس اريد اوصل
بالي مو وياي و امي كل دقيقة تدك عليه
سيارات و هوسة الشارع و ازدحامات
حسيت اسوء ليلة تمر عليه من بعد ليلة وفاة ابوي
هي هاي الليلة ، رجعت لـ ذاك اليوم
رجعت لـ مشاعري بـ ذاك اليوم برودي و هدوئي
على الرغم من خوفي و قلقي من داخلي
دخلت البيت وصلت لـ الصالة دحگت لـ امي
كاعده بـ الصاله ، منتظرتني
لمن شافتني دخلت جرت نفس مرتاحه
فيروز : تعالي مُلاذ
اتقدمت ناحيتها كعدت يمها
اخذت راسي خلته على رجلها ، كرفصت نفسي
امي تمسح على شعري
فيروز : سولفي
مُلاذ : منين ابدي؟
فيروز : من البدايه
رمشت بـ ثگل
ما اعرف منين ابدي الها
مُلاذ : لمن خطفوني و تصاوبت بـ بطني
وكتها أيهم يلي سوه عمليتي
فيروز : اعرف
مُلاذ : ما اعرف جانت تصرفاته وياي
اهتمامه اسألته غريبه
قوست شفتي
رافعه اكتافي بـ عدم معرفه
مُلاذ : التقينا صدفه كم مره
صرنا انا و أيهم اصدقاء عاديين
و بـ وحدة من هاي الصدف عرفت شغله
فيروز : شنوو؟
مُلاذ : أيهم يعرفني قبل لا اعرفه
فيروز : شلون يعني؟؟
مُلاذ : بـ مرة لمن جنت بـ الكُلية
امتحانات السادس اعدادي اخير امتحان
اتصلت بيه خاله جنات بس اسم ملاك گلتلي
انغلق الاتصال جان مطر صيف و حار
التلفون اتبلل مشيت اريد اروح لـ الباب
انضربت بـ ولد بسبب المطر
و الجو يلي صار شبهه اظلم ما شفته عدل
عطت بـ وجهه لان الجهاز انكسر
فيروز : جان أيهم ؟؟
بلعت ريگي ، هزيت راسي بـ قبول
تنهدت كملت كلامي
مُلاذ : جان أيهم ، جاي ياخذ باهر
امتحانه ويانا بـ نفس المركز الامتحاني
طاحت ماشتي اتبعني ينطينياها
بس جنت تعبانه وكتها و هو شافني
لمن طلعت من الكلية لحگني
رايد ينطيني الماشه طلعت وي اسكندر
رحت لـ ملاك يلي بـ المستشفى
ما كدر ينطيها الي ، بقى سنين الماشه عنده
و بـ هاي السنين أيهم جان يحبني
استمعت لـ امي يلي گالت بـ صدمة
فيروز : شنوو؟؟ شلون يعني يحبج؟!!!
مُلاذ ؟؟؟
مُلاذ : يحبني و مو حب عادي
من انخطفت ما لگالي اثر
و لمن تصاوبت طلعت صدفة كدامه
عالج جرحي و قبل فترة اكتشفت كل هذا
اعرف انتِ هسه مصدومه مثلي او اكثر
اتجول نظري على ارجاء الغرفة
احجي بـ هدوء غريب و اسولف الها
مُلاذ : بس ...
فيروز : مُلااااذ هم مثل اسكندر ياذيج
و يسوي نفس سواياااته حرام يمه حراااام
مُلاذ : لـ اول مره اكون متأكده
اكو شخص ما رح يأذيني و هو أيهم
لا تخافين ما صار بيننا اي شي
ما عندي اي شي اتجاهه و جاي يبتعد
فيروز : و مرته و ابنننه ؟؟؟؟
مُلاذ : فكرني اتزوجت
اتصرف بـ تسرع راح و اتزوج
ما جان يريدها و لـ الان ما يريدها
بس هي حاولت و مو حاولت فقدته وعيه
ما اعرف شلون او شي يخصهم
بس هو ما جان يريدها ...
فيروز : و ابنه مُلاذ و ابنننه !
مُلاذ : يممممه شمدريني اناا
شمدريني كاعده وياهم بـ الغرفة
شربته شي فقدته كل وعيه
بحيث حتى هو ما يدري
فيروز : و انتِ صدگتي هالكلااام ؟؟
گمت من مكاني
گلت بـ عصبيه ، و انا اگوم لـ غرفتي
مُلاذ : ما صدكت اي شي
ما اصدك بـ احد انا
دخلت سديت الباب
افور من الغضب و العصبيه
كعدت ع الجرباية لميت رجليه لـ صدري
غطيت وجهي بـ ايديه
ضغطت حيل على محاجر عيوني
رفعت راسي دحگت لـ الشباك
شفتي ترجف ، الغصه خانكتني
بلعت ريكي ، مسحت وجهي حيل
رفعت راسي دحگت لـ امي
دخلت يمي ، كعدت
فيروز : شلون وضعه؟؟
مُلاذ : مستقر هسه بس ما ندري
اذا تصير مضاعفات بعدين
و ما يصحى هسه متضرر هواي
فيروز : و مرته و ابنه؟
مُلاذ : طلكها مرته و ابنه يمهم
فيروز : طلكها بسببج؟؟؟
مُلاذ : لااا لا انا شعليه
لاگي رسائل الها تحاجي واحد
تريد من عنده دوه مال هلوسه
دكت امي على رجلها مصدومة
مُلاذ : يمه أيهم ما يكذب
و تدرين بيه انا ما اصدك اي شخص
بس هو فعلاً مرته هيج ، أيهم ما جان رايدها
سكتت مقهوره على أيهم
كعدت تدعي اله يگوم بـ السلامه
تدنيت لـ يمها
مُلاذ : شلون شسوي
اذا اريد يصير واحد زين ؟
فيروز : شنو؟
مُلاذ : يعني شنو ادعي
شنو اگول ؟ ما اعرف ادعي عدل
فيروز : رب العالمين يعرف يلي بداخلج
بدون ما تحجين و بدون ما تحاولين تعبرين
فقط اتمني و اطلبي من رب العالمين يحقق دعائج
مُلاذ : اريد أيهم يصير زين
فيروز : يصير ان شاء الله
لا تخافين ادعي اله
مُلاذ : بس انا ما اصلي
يعني رب العالمين يمكن ما يستجاب دعائي
لان انا ما اصلي او ما البس حجاب
فيروز : يمه رب العالمين حنون علينا
ينطينا هواي فرص بـ الحياة حتى نتوب
و نرجع اله و يستقبلنا
فيروز : دعائنا صحيح مو كل مره يستجاب
لَكن شكد دعيت انا و ربي استجاب دعائي
ابواب السماء مفتوحه دائماً
و ممكن بـ لحظة يستجاب دعائج
فيروز : انتِ ادعي اطلبي من رب العالمين
يستجاب دعائج اذا ما استجاب لـ دعائج
ف اعرفي هالشي بي صالح الج او لـ غيرج
فيروز : انا من جنت صغيرة و بـ عمرج
هم جنت مثلج لا شال و لا اصلي
اهلنا ما علمونا عدل و لا علمونا ع الشال
بس هسه انا شكد علمتج؟ شكد سولفتلج؟
انتِ هسه بـ عمر من زمان وجب عليج الحجاب
و من زمان انفرضت عليج الصلاة
و بعد عندج وقت
حتى تتوبين و ترجعين لـ رب العالمين
فيروز : شوفي اختج شمحلاها
الله هداها و بدت تصلي و لبست شال
الله يهديج انتِ هم يمه
ظليت ساكته و هي مسحت على شعري
و گلتلي رح تدعي لـ أيهم و كل شي تسوي
حتى يصير زين ، هزيت راسي ، بقت يمي كاعده
مُلاذ : جاي تغفين نامي
فيروز : و انتِ؟
مُلاذ : ما بيه شي ...
هزت راسها بـ قبول تركتني و طلعت
تمددت و بداخلي يتردد الدعاء لـ رب العالمين
و بـ عقلي يدور كلام امي وياي
يمكن لان انا ما البس شال و لا اصلي
رب العالمين غضب عليه
و ابتلاني بـ حياة خالية من الاستقرار
نفضت هالفكرة من عقلي
لمن اتذكرت جملة امي "رب العالمين حنون"
يحب عباده و يبتلي يلي يحبهم و يختبرهم
و هذا الكلام گالته الي امي قبل سنين
لـ الصبح ما كدرت انام
ظليت كاعده و ادحك بـ السكف
و لا كدرت اتصل بـ باهر خاف نام
جريت نفس عميق و زفرته
دك المنبه جريت التلفون طفيته
كمت اخذت ملابسي دخلت سبحت
طلعت بدلت ، لميت شعري
ما خليت شي على وجهي ، مالي طاقه
كعدت امي شافتني اريد اطلع
وصتني انتبه على نفسي
هزيت راسي بـ قبول ،
طلعت صعدت بـ السيارة
اتوجهت لـ المستشفى
اتصلت بـ صافيناز گلتلها ما اجي اليوم
صافيناز : ليه ولِك صاير شي؟
مُلاذ : أيهم سوه حادث
صافيناز : شوووو؟ اي أيهم ؟؟ يلي بحبك؟
مُلاذ : اي
صافيناز : كييف ؟
مُلاذ : السياره مگلوبه بي
بقت تحجي شويه و تفتهم مني
گلتها رح اروح لـ المستشفى ، سدت الاتصال
اتصلت بـ باهر سألته اذا اكو شي جديد
گال لا ماكو و بعده على حاله و وضعه خطر
وصلت لـ المستشفى نزلت ، رحت الهم
لگيتهم بعدهم على كعدتهم
بس أيمن و هتان و أبيل ماكو
ام أيهم و باهر موجودين
اتقدمت على باهر سألته
شنو گال اخير شي الدكتور
باهر : ما گال بعده أيهم على حالة
منتظرين يصحى و ماندري
اشرلي ع كرسي
باهر : اكعدي
دحگت لـ امه تدحگلي
هزيت راسي بـ رفض
مُلاذ : لا هيج احسن
ابتعدت من يمهم
سندت ظهري ع الحايط
لميت ايديه اتجتفت
اجا لـ باهر اتصال
جاوب و بدء يحجي
باهر : هلا غاده
ابتعد عنا و راح يحجي
دحگت لـ ام أيهم لمن گالت
ام أيهم : انتِ شايفتج بـ مكان
مُلاذ : صديقة غاده جنت موجودة بـ عرسها
عكدت حواجبها هزت راسها بـ قبول
ام أيهم : منين تعرفين أيهم ؟
مُلاذ : هو سوه عمليتي
ام أيهم : عملية شنو؟
مُلاذ : اتصاوبت بـ بطني
هو سوه عمليتي و عالجني
وسعت عيونها بـ صدمة
ام أيهم : اتصاااوبتي؟؟
هزيت راسي بـ قبول
دارت وجهها و سكتت
رجعت دحگتلي مره ثانية
-انتِ نفسج الحجا عنج أبيل مو؟؟
گال الحلوه و لمن اجيتي صاح الج نفس الشي
مُلاذ : ما عندي شي وي أيهم
-لعد شتسوين بـ بيته هذاك اليوم؟؟
كلنا ما جنا نعرفه وين بس انتِ!
مُلاذ : فاهمه الموضوع غلط
- و شنو الصحيح؟!
مُلاذ : اعتقد لو كعد أيهم و فهمج افضل
سكتت و هي تدحگلي بـ خزره
تركتها و رحت وكفت بـ مكان ثاني
التفتت لمن اجا ابو أيهم ، شافني اجاني
-السلام عليكم
مُلاذ : و عليكم السلام
- تعبناج ويانا بنتي
هزيت راسي بـ رفض
مُلاذ : أيهم صديقي واجبي هذا
وكف و ظل واكف يمي
دقايق و گال
-ليش واكفه هنا؟
مُلاذ : افضل
-احد من اولادي او زوجتي
زعجوج ست مُلاذ ؟
مُلاذ : لا ماكو هيج شي
-جيد
عكدت حواجبي ادحگله
يحجي بـ هدوء و راحه عجيبه
كأنوا مو ابنه يلي بـ الغرفة جوه
انا قلقانه و خايفه اكثر منه على أيهم
اتذكرت البارحه أيمن و ردة فعله
قوست شفتي مستغربه
و انا صافنه اركان و اهله و ضرغام
ضربت كصتي و خابرت بسرعه
بعد وكت مُلاذ لو ما متذكره احسن
اتصلت بـ ضرغام سولفلي الصاير البارحه
حذرني و نبهني اكثر من مرة
اجا أيمن شاف ابوه عكد حواجبه
راح باهر بـ اتجاهه لزم ايده يهدي بيه
و اتجهوا ثنينهم كعدوا على واحد من المقاعد
بـ جانب امهم يلي تدحگلنا انا و ابو أيهم
لـ الظهر احنا هيج كاعدين و منتظرين
اجو هواي ناس گالوا همَ اصدقاء أيهم
و عارفين الموضوع من باهر ،
حسب ما عرفت أيمن ماخذ هتان و أبيل يم غاده
اتقدمت بـ هدوء وكفت كدام جامه
تجولت عيوني على ملامح أيهم
يلي مشكلين اله اجهزه و نايم
اتذكرت كل مواقفه وياي و اتذكرت ابنه
الف شي اجا بـ عقلي و انا ادحگله
استغربت شعور الخوف الي بگلبي اتجاهه
اتغاضيت الخوف بـ الفطره موجود
اجا أيمن وكف يمي دحگتله
سند راسه ع الحايط يدحك لـ أيهم وياي
أيمن : ادعي يصحى
مُلاذ : دعيت و بعدني ادعي
أيمن : لا تاذينه مُلاذ
عكدت حواجبي دحگتله
مُلاذ : شنو؟
أيمن : لا تاذين أيهم
مُلاذ : بس انا ما ماذيته
أيمن : أيهم اقرب الي من هتان و باهر
اعرفه من نظرة ، لمن اختفى ذنيج الكم يوم
عرفت ليش و عرفت السبب بدون لا يحجي
و بـ نفس هاي المدة القصيرة العرفتج بيها
عرفت انتِ ما تنطين مجال لـ اي شخص
أيمن : أيهم متأذي هواي فوك ما تتصورين
لا تزيدين اذيته عليه انطي مجال يخليج تعرفي
مُلاذ : المهم عندي يكعد و يصحى
ما عرفتوا شنو سبب الحادث؟؟
أيمن : طالعه كدامه مره جبيرة
و هو داير الستيرن يوخر عنها
و منگلبه السياره بي الي شهدوا ع الحادث گالوا
مُلاذ : جان يكدر يوكف السياره؟؟
أيمن : گالو سيارته جانت سريعه كلش
بحيث خطف خَطف من كدامهم و هو يلوف
مگلوبه السياره و من مگلوبه
انشمرت لـ مكان بعيد عنهم
وسعت عيوني مصدومة من كلامه
بقينا دقايق واكفين هيج
تعبت رحت كعدت خليت راسي بين ايديه
گلبي متروس هم ، اتجمعت الدموع ب عيوني
بلعت ريكي و مسحت وجهي
رجعت ظهري لـ ورا اختنكت و انا بـ المستشفى
طلعت وكفت يم سيارتي اخذ نفس
فتحت السياره اخذت بطل مي منها ، شربت
ظليت حوالي دقيقتين واكفه بره
درت وجهي دحگت دراجه مرت من كدامي
التفتت على صوت ابو أيهم
-ست مُلاذ ...
دار وجهه دحك قبل لا يكمل كلامه
صار صوت رمي ، وسعت عيوني مفزوعه
انجريت من ايدي ، دحگت لـ ابو أيهم
رفع سترته و هو وراي يغطي بيه عن الرصاص
لازم بيه و يركض ، صرنا ورا السياره مالتي
صوت الرمي استمر
دحگت لـ الشرطه طلعوا يركضون
و بـ ايديهم اسلحتهم ، وخرت ايديه عن اذاني
اختفى صوت الرمي رفعت نفسي وكفت دحگت
الشرطه يحجون بـ اللاسلكي مالتهم
الناس اتجمعوا و منهم يصرخون و شردوا
التفتت لـ ابو أيهم و هو يسألني
- خو ما صارلج شي؟
مُلاذ : لا و انت؟؟
ركضت عليه اشوفه
هز راسه بـ رفض : ما بيه شي
رفع نفسه وكف ينكث بـ ملابسه
-منو ذوله اجو سيده عليج
و رموا عليج لمن عاينت الهم
مُلاذ : تكدر تگول ناس يردون اموت
نكثت ملابسي ، اجونا الشرطه يسألونا
لان الكل انتبهه
الرصاص اتوجهه على سيارتي و الي
گلتلهم انا محاميه و ذوله مستهدفيني
گالو دراجة يلي رموا عبرت بسرعه
و ما كدروا يلحگوها بس حفظوا اوصافها
حجينا وياهم كم دقيقه بعدين راحوا
مشيت دحگت لـ سيارتي
يلي اتزرفت بـ ٣ رصاصات
عكدت حواجبي و دحگت وراهم
انداريت لـ ابو أيهم لمن گال
-تحجين عن الموضوع طبيعي
المفروض تخافين؟
مُلاذ : متعوده ، شكراً لان حميتني
لو ما انت جان هسه انا متزرفه بدلاً من السيارة
ضحك و هز راسه بـ رفض
-ما سويت شي
واجبي الانساني هذا هههههه
ابتسمت ، رفعت تلفوني
اتصلت بـ ضرغام بلغته بـ اللي صار
اكد عليه لازم ارجع لـ البيت رفضت
ما اكدر ارجع و لا اروح اي مكان
قبل لا أيهم يصحى
گال رح يرسل حرس لـ يمي ، وافقت
سديت الاتصال و انداريت لـ ابو أيهم
مُلاذ : ما اعرف شلون اشكرك
-لا ما سويت شي
اولاد شوارع هذوله زين انتبهت الهم
خلا ايديه ورا ظهره و مشى
اشرلي بـ راسه : ترجعين جوه؟
هزيت راسي بـ قبول
مشيت وياه گلت بـ استغراب
مُلاذ : شنو جنت رايد؟
-شنو؟
مُلاذ : لمن ناديتني گلت ست مُلاذ
- اهاا شفتج و ردت اسألج اذا انتِ بخير
مُلاذ : تسلم شكراً ما قصرت
الله يردها الك اضعاف
شكراً على حمايتك الي
ضحك بـ صوت عالي و هز راسه
هسه عرفت أيهم منين متعلم يضحك هواي
اتوجهنا لـ مكان أيهم
و انا قريبه من الممر يلي بي غرفة أيهم
سمعت صوت صراخ عالي ، ركضت لـ الممر
دخلت و انا اركض
دحگت لـ ام أيهم تصرخ و تدك على رجليها
ثبتت خطواتي حسيت رجليه انغرست بـ الگاع
جسمي جمد ، صعد الدم بـ راسي
و انا اسمع صوت صراخها العالي
بـ اسم أيهم و بجيها ...
- يتبع الفصل التالي اضغط على ( رواية جرح الأيهم ) اسم الرواية