رواية جرح الأيهم الفصل الثامن و العشرون 28 - بقلم أيلان
"الجُــرح الثامن و عشرون"
خصوصاً انا عندي انياب ضغطت بيهن
على اصبعه لمن عضيته كل قوتي
رفع راسه و ضحك متجاهل وجع اصبعه
-بس انتِ ما تعرفين ويامن اندكيتي
مُلاذ : ويامن اندكيت؟ وي جلب اندكيت
قابل يرادلها علم الذره
خزرني و ضربني راشدي
انداريت اله و ابتسمت
مُلاذ : تعرف روحك جلب
رجع ضربني مره ثانية
اتعلمت ما ابين الهم ضعفي او اسكت
ظليت استفزه لا بد يجزع و يروح
مُلاذ : شبيك زادت جرعة الجلابيه يمك؟
صرخ بـ وجهي
-اشششش و لااااا حسسس
كشولت ملامحي
دحگتله من فوك لـ جوا
مُلاذ : د ولي
دحگت لـ الواكفين
واحد يدور بـ وجهه و الثاني يطبك شفته
الثالث يسوي روحه ما منتبهه و الرابع ضحك
دحگتله ، اشرت بـ راسي اله
مُلاذ : جاي يضحكون عليك
اندار دحگلهم عاكد حواجبه
وكفوا كلهم بـ استقامة ملامحهم جامدة
لَكن شفايفهم التبتسم لا ارادي تفضحهم
عاط بيهم ، راح عليهم كتلهم شبعهم بوكسيات
مُلاذ : اضرب ذاك ابو شوارب مبين غثيث
اندار دحگلي معصب اجاني بسرعة
- صاااااافيناز وين ؟
مُلاذ : و قزرقط لا تصيح
انهال عليه بالضرب اتسودن
طلع جكاره ورثها و انا ادحگله اتذكرت أيهم
اتصلت بي لمن رادو يخطفوني و ما اعرف اذا رد
أشر الهم يفتحون الحبال
ركضوا بسرعة فتحوهن
فتحوا ايدية ظليت ادحك مستغربه
- انت الزم ايدها لـ ورا و انت ثبتها
دحگت ما فاهمه واحد جر ايدي لـ ورا
الثاني ظل مثبتني من اكتافي كل قوته
رفعت عيني لـ رئيسهم جر ايدي الثانيه
رفع رادني ، طفى الجكاره بـ ايدي
من اول ما جر ايدي لحد ما طفى الجكاره
انا ادحك بـ عيونه ما رمشت حتى
عيوني جمرن من الالم ، بس مو مثل اول جويه
عكد حواجبه مستغرب هدوئي
اموت و لا اطلع وجعي كدامه
و اخلي يتلذذ بـ منظري كتمت كل حس الي
شمر ايدي من ايده و ظل يدحگلي
بعدني اريد افلت روحي منهم
جروا ايديه شدوها بسرعة
و شدوني بـ الكرسي مره ثانية
مُلاذ : هاهيه؟
-صافينااااااز وييييين؟
مُلاذ : سايكو دايكو؟
-احجيييييي
مُلاذ : منيه صافيناز؟
-لا تسوين نفسج ما تعرفييييها
مُلاذ : زين خل نگول اعرفها
انت منين عرفت انا اعرفها؟
-ههههههه تفكرين كيكي ما رح يحجي؟
مُلاذ : يااااا ابو كذله كرومي
الغسل ، انا هم گلت هو خُنثى
اجا عليه جر وجهي بـ ايده
لزم فكي ضغط عليه
-صافيناز وين ؟
مُلاذ : اگلك مكانها؟
- اي
مُلاذ : تعال اشاورك
عكد حواجبه قرب اذانه مني
مُلاذ : بـ جيبي
حجيتها و فوراً ضربت صفحة راسه بـ گصتي
لزم راسه متوجع مني ، اتخبل اجاني يركض
مُلاذ : انگلب ثور
دفع كرسيي طحت ع الگاع
ضربني على وجهي وكف ، كام يرفس بطني
غمضت عيوني حيل ، صكيت اسناني متوجعه
يضربني و يصيح "احجي" ، اتردد بـ داخلي
"نادي عليا مظهر العجائب
تجده عوناً لك في النوائب
كل هم وغم سينجلـــي
بـ ولايتك يا علي يا علي يا علي"
دائماً امي تذكره بـ اي شي يصير بيها
ابتعد عني و هو يزفر انفاسه بـ عصبية
تركني و طلع من المكان بسرعة
شي واحد خفت منه ، خفت يغتصبني ...
بـ هذيج المره هربت لان كان عندي تلفون
و كدرت اتصل و كنت ما مربطه
هسه شلون رح اهرب ؟
شلون رح اطلع من هالمكان؟
هتان :-
كعدت بدلت ملابسي ، وكفت اخلي مكياج
نزلت جوه ، اريد اتريك عاينت لـ أيمن
و لـ امي جريت كرسي و كعدت
هتان : ماما وين بابا شنو رجع سافر؟
التفتت الي امي و هي تصب الجاي
هزت راسها بـ قبول
امي : اي ، رجع سافر
قوست شفتي و هزيت راسي بـ قبول
اجا أيمن لـ يمي كرص خدودي
أيمن : هتانو
هتان : أيمنو
أيمن : شني ولج منين جايبه كل هالنمش
هتان : من السوق
أيمن : تحشش عود الفاهيه
ضحكت و هو ضربني ع راسي ضربة خفيفة
انداريت كمت اكرص بـ ايده
هتان : لا تضربني
أيمن : اش ولج اخوج الجبير
هتان : ننننن اكبر مني بـ سنه بس
أيمن : هم اخوج الجبير
قلصت عيوني ادحگله
التفتنا على دخولية أيهم الحارقة الغارقة
هتان : حريييييييق
أيمن : ناااااااار
ضحك أيهم
أيهم : انجبوا و كعدوا راحة
هتان : أيمن تلاحگلنا
أيمن : ما اكدر النار وصلتني
دحگنا لـ أيهم الي يضحك
ضحكنا على ضحكته ، رن تلفونه
طلع التلفون من جيبه دحگله ، صفن ثواني
أيهم : شهالمصباح الحلو
طلع من يمنا بسرعة
عگدنا حواجبنا ندحگله راح وكف بـ الحديقة
رحنا وراه ندحگله يحجي بـ التلفون
لـ ثواني نزل التلفون دحگله و رجع لـ اذنه
صوته مو واضح شنو يحجي
تقريب الـ ٣ دقايق التفتت لـ البيت
التلفون على اذنه
أيهم : الوووووو ، تسمعينييي الووووو
دحگناله مستغربين ركض اخذ سويج السيارة
طلع يركض من يمنا لحگه أيهم وراه يركض
ما افتهمت طلعت وراهم دحگت
وكف أيمن أيهم بسرعة
أيمن : شكووو؟
أيهم : وخر أيمن
صعد أيهم بـ السياره
أيمن ركب بـ الصدر بسرعة
انداريت دحگت لـ امي
وضعها مثل وضعي هم مستغربة و ما فاهمه
هتان : شكو؟
امي : يا رب خير
حجتها بـ قلق و هي تفرك رجلها
رحت يمها لزمت ايدها اهديها
هتان : اهدئي ان شاء الله ماكو شي
يمكن تخص شغل أيهم لا تخافين ...
فيروز :-
واكفه انظف المطبخ ، اغسل الماعين
رحت لـ غرفة مُلاذ نكثت جربايتها
فتحت كنتورها دحگتله
فيروز : اخيراً سفطت كنتورها
سديت باب الكنتور و وكفت انطف غرفتها
لميت حمرها و مكياجها المتطشر على الميز
التفتت على اثر صوت دكة الباب العاليه
لبست شالي و عباتي و الدك مستمر
استغربت دك الباب القوي ، منو هذا ؟!
ركضت بسرعه ع الباب فتحتها
دحگت لـ الدكتور أيهم بـ صفه ولد
دخلت غاده دخل وراها زوجها
فيروز : خيركم خاله شكو؟
دحگت لـ غاده تبجي و عيونها مورمه
فيروز : غاااده؟ شكو؟؟
أيهم : خاله مُلاذ وين ؟
فيروز : بالشغل
أيهم : شنوو بالشغل؟!!
فيروز : غير طلعت الصبح
أيهم : ما رجعت لـ هنا ؟؟
فيروز : لا ؟ شصااااير؟
شبيها مُلاذ؟ غاده شبيها بتي ؟؟
غطت غاده وجهها تبجي نزلت لـ الگاع
دكيت على رجلية اريدهم يحجون
تركوا البيت و طلعوا ركض كل شي ما افتهمت
اتخبلت عقل ما ظل بـ راسي
كعدت كدام غاده ، هزيتها كل قوتي
فيروز : ولج احجييييي ولج غااااااده
بتيييي شبيها غاده احجي
مسحت دموعها رجعن نزلن
بجت و هي كاعده بـ الباب ، باهر يمها يهديها
انداريت اله حجيت متخبله و ابجي
فيروز : ولكمممم احجوووو شبيها مُلاذ
شصااااااار شبيها بتي ؟؟؟
باهر : خاله بس اهدئي فدوة اروحلج
عطت بي
فيروز : احجيييييي
باهر : مُلاذ متصله بـ أيهم
سامع صوتها تصرخ و منغلق الاتصال
حالياً جاي نحاول نوصل الها و نلكاها
اتيبست بـ مكاني ، نظراتي جمدت عليه
الخايفة منه صار روحي راحت
بـ لحظتها صارت عيوني تشوش
الدنيا صارت سوده گدامي ...
ملاك:-
طلعت من المدرسة وكفت انتظر سلطان
درت بـ عيوني لگيته جاي من الطريق الثاني
بـ ايده كاسات ، لمن شافني سرع خطواته نحوي
انطاني كاسه ، اخذتها من عنده
سلطان : خو ما تاخرت عليج؟
ملاك: لا ، شنو هاي ؟
سلطان : گهوه حاره ، ضوكيها تحبيها؟
اخذت كمعه منها
ملاك : طيبه كلش
ابتسم و هز راسه بـ قبول
سلطان : نروح ؟
ملاك : يلا
ظلينا نمشي نحو سيارته
اتحمحم و احنا نمشي التفتت دحگتله
سلطان : ملاك
ملاك : اممم
سلطان : انتِ تعرفين بـ الحجاب مو؟
هزيت راسي بـ قبول
ملاك : اعرف
سلطان : شنو نظرتج عنه ؟
ملاك : كلش حلو بنات هواي يلبسنه ويانا
ماما گلتلي البسه بس نسيت ما اتعودت
اريد اجربه بس من مُلاذ تطلع اگللها تشتريلي
ابتسم سلطان و عيونه تلمع
سلطان : اشتريلج هسه منا؟
ملاك : شنو؟
سلطان : حجاب
ملاك : بس ما اعرف البسه
سلطان : انا البسجيا
ملاك : تعرف؟
سلطان : يعني حسب
ما شفت امي شلون تلفه
هزيت راسي بـ قبول فرحانه
صعدنا السيارة اكو محل على طريقنا
دخلناله انا و سلطان ظل يجرب الشالات عليه
ابتسامة واسعه على شفتي اخذت واحد و لبسته
دحگت لـ روحي بـ المراية المخليها صاحب المحل طلع الشال يجنن عليه
ملاك : هذا خل نشترري حلوو
سلطان : هاهيه
رحنا واشترينا ، طلعنا من المحل
وكفني سلطان گلي ابدي البسه من هسه
ملاك : لا مو هسه البسه
بعدين حتى من البسه ما يطلع شعري
و البسه عدل و مرتب
هز راسه بـ قبول
اتجهنا لـ السيارة ، گلت و احنا نمشي
ملاك : من نرجع انطيك الفلوس
اندار سلطان دحگلي بـ طرف عينه
سلطان : ما اجاوبج
سكتت و حكيت كصتي
ظلينا بـ هذا الهدوء لحد ما وصلني
نزلت بعدني توني نازله ، عكدت حواجبي مستغربه سيارات صافه بـ بابنا ، نزل سلطان مستغرب مثلي
اتقدمت بسرعة دخلت لـ البيت
دحگت ملتمين كلهم بـ الصاله
عمي احمد و محمد و عمتي منارس و نور
و اسكندر ، جسار ، عزيز
دحگت لـ عمتي و نور ، عيونهن مورمات
ملاك : شكو؟
رفعن راسهن شافني كامن ركضن عليه
اجن الي بسرعه احتضنني لـ صدرهن مفاهمه
ملاك : شكوووو؟
دخلت لـ الغرفة دحگت لـ امي
كاعده ع الجرباية تونون و دمعتها على خدها
يمها خالة جنات و من الجهه الثانية غاده
لازمات ايديها يفركن بيهن ، يهدأنها
ملاك : شكووو؟
دحگتلي امي يلي عيونها ذبلانه من كثر البجي
بجت اكثر ، جسمها يهتز ، التفتت دحگت بوجههم
عطت بيهم و انا اسألهم شصاير
ملاك : وين مُلاذ؟ شكووووو؟
حجت الي نور يلي صار ، اتهسترت تخبلت
كمت ابجي و اعيط ، نور و غاده يهدن بيه
كله بسببي انا خليتها تروح لـ هناك ...
غاده :-
قهرني حال اهل مُلاذ
متت بـ دمي و بس ابجي ما اكدر اسكت
و انا اتذكرها الصبح خابرتني
من بعدها اتصل بينا أيهم يريد يندل بيتها
استغربت ، وصفت اله مكانهم ماعرف
اجا اخذني انا و باهر ، دليته بـ بيتهم
لمن سولفلنا معصب بـ السيارة
اول شي اجا بـ بالي مُلاذ تاذت و صارلها شي
و لمن عرفت من جسار كل شي اتخبلت اكثر
لـ العصر احنا خابرنا الكل و تواصلنا وي ضرغام
أيهم راح لـ طريق المزرعه يشوف سيارتها
باهر و أيمن لحگوه رفعت تلفوني اتصلت بي ،
ما جاوبني ، اتصلت اكثر من مره يلا جاوب
غاده : وييييينك انت؟؟
باهر : ها عيني التلفون ما جان يمي
ما اتحملت بجيت
غاده : ما لگيتو شي باهر
باهر : لگينا سيارتها ع الطريق
بس أيهم ما خلانا نلمس اي شي
و هسه اتصل بـ ضابط ما اعرف شنو
اخذوا سيارتها و جاي يدورونها و أيهم لحگهم
انتوا ما عرفتوا شي؟؟
غاده : جسار سولف عن تهديدات واصله
باهر : تهديدات شنوو؟
غاده : جسار يگول مهددين مُلاذ
و مخلين قناصين على اهلها
گايله لـ ضرغام و متصرف بالموضوع
سوده عليه كل هذا صاير بيها و ما ندري
باهر : اوكفي هسه جايين و نفتهم منكم
خل اخابر أيهم
سد الاتصال مني ، خلال ساعه اندك باب البيت
طلعت فتحت الباب دخلوا أيهم و باهر و أيمن
باهر : صيحيلنا جسار
غاده : خو ادخلوا
باهر : لا يابه عيب اهل بيناتهم
غاده : ادخلوا عادي
هي اتصلت بـ أيهم ليش؟
عبرنا أيهم و دخل بسرعة
رحنا وراه ، دحگت لـ اسكندر الموسع عيونه
و جسار واكف يحاجي أيهم
جسار : شوكت اتصلت عليك بس فهمني
صارلي من الصبح منتظرك تجيي
أيهم : انت الفهمني يا تهديدات؟؟
جسار : گايليلها اخذتي بنيه من عدنا
و مخليلها ورد و بي بطاقة مال تهـ....
بعده جاي يحجي قاطعهم اسكندر
لمن گام وكف وهو يحجي
اسكندر : اوكف اوكف
انت شتسوي هنا و تفتر بين نسوانه؟
دحگله أيهم
دخلوا باهر و أيمن
أيمن : يابه شني السالفه
نفتر بين نسوانكم شني ؟ جايين احنا
علمود البت نعرفها و خوش انسانه
خطيه واكعه بـ مصيبة نريد نساعد
اسكندر : ما نريد منكم لا مساعده
و لا شي احنا نلگاها
اندار أيهم اله خزره
كز على سنونه
أيهم : انت اسكت
وين تلگاها بـ كعدتك هاي؟
اسكندر : ليش انت التلگاها؟؟
أيهم : الگاها و غصباً على اكبر شارب
انت ابقى اتختل و سد حلكك
گبت بيناتهم صار مصايح و هوسه
أيمن و باهر وجسار لازمين أيهم
و ذولاك لازمين اسكندر
اسكندر : شنووووو علاقتك بيها و تتصل بيك
و لو احنا تعودنا على سوالفها مال *****
وسعنا عيوننا مصدومين
گمنا نتلاطم ، حتى اهله عاطو بي
طفر أيهم عليه شبع كتل و الصياح صار اعلى
طلعن البنات مخترعات و دموعنا على خدنا
جروا أيهم جر من فوك اسكندر و طلعوه
لحگتهم اركض ، جسار حجا لـ أيهم كلشي
أيهم : يااااااا بننننننيه غير افتهم
جسار : شمدريييني انا يا بنييييه!
اتقدمت مشيت بـ خطوات سريعة
وكفت يمهم و انا افرك ايد بـ ايد
گلت و انا مخلية احتمال هـ الاسم
غاده : صافيناز
التفتوا ثنينهم دحگولي
بـ نفس اللحظة ، نطق أيهم مستغرب
أيهم : صافيناز؟
غاده : يلي كانت وياها بـ نفس المكان
لمن انخطفوا كانو ثنيناتهم بـ نفس المكان
أيهم : شعليهاا هي ؟؟
غاده : لمن خطفوها باعوها لـ شخص مهووس
و هذا كان يحبها و ياذيها و ياذي روحه
بعدين اطلق النار عليها و لگتها مُلاذ
شردتها من المكان الي هي كانت بي
و صافيناز گالت اكيد هسه هو يدور عليها
اتقدم أيهم بسرعة لـ السيارة
أيهم : وين بيتهاا؟
غاده : لازم ادليكم ما تندلوه هيج
باهر : تعالي ويانا
صعدوا جسار و أيمن بـ سيارة
و انا و باهر و أيهم بـ سيارة ، ادليهم بـ البيت
أيهم خبلنا يسوق طاير بين السما و الگاع
باهر و أيمن يتصل بي يتعاركون وياه ، خبلنا
وصلنا لـ بيتها نزلنا بسرعة
دكيت الباب عليهم ، انفتح الباب طلعلي ابوها
-اهلين بنتي
غاده : هلو عمو صافي موجوده ؟
-اي موجوده صاير شي؟
غاده : عمو كلش نحتاجها ضروري
لازم نحاجيها بـ شغله تخص صديقتنا
-اتفضلي اتفضلي يابا
رح ناديها و انتوا ادخلوا البيت
دخلنا ودانا لـ الاستقبال ، ظلينا منتظرين صافيناز
فتحت الباب دخلت لـ الاستقبال ، دحگتلنا بـ استغراب
صافيناز : شو صاير؟
گمت الها بسرعه ،سولفت الها مختصر
ظلت ترجف و تبجي روحها راحت
اتخبلت من عرفت هالشي بسببها
رغم هي مالها اي علاقه بـ الموضوع
أيمن : يابه بس اهدي و سولفيلنا
انهارت تبجي ، دحگت لـ أيهم عيون حمر
و عروك كصته ناطه عاط بيها
أيهم : احجي عاد وكت بجي؟؟
أيمن : شبيك أيهم على كيفك
فرك وجهه متنرفز
صافيناز حجت الهم عن خطفها و بيعها
و شنو يلي صار و ذكرت الهم مواصفاته و اسمه
لـ يا اماكن يروح و شنو لگت عنه
صار المغرب و هي تحجي النا كل شي عنه
بعد ما اخذ أيهم معلومات كافيه كام بسرعه
طلعت وراه هو و باهر ،
طلبت من جسار و أيمن يبقون يم صافيناز
بقوا جوه يهدئون بيها ، وكفت بـ باب الشارع
باهر لازم أيهم و أيهم يريد يعبره يروح للسيارة
يتدافعون بـ نص الشارع
باهر يحاول يمنع أيهم يروح لـ السيارة
باهر : ياااااابه شبييييك تخبلت ؟!!!
أيهم : وخرررر بااااااااااهر
باهر : شعليييك بيها يمعووود
ننطي خبر لـ اهلها و يروحون!
أيهم : وخرررر عني لا احرك والديك
باهر : انتتتت شعليييييك شدخلك بيهااا
شنووو تروح لـ مجرميييين سـ....
قبل لا يكمل باهر
عاط أيهم اعصابه تنتفض
أيهم : احبهاااااا ياااااا نقمممة الله احبهااااااا
روحي بيهااا لو اعرف اموت ارووووحلها
اتصنم باهر بـ مكانه مصدوم
حالتي ما تختلف عن حالته ، بلعت ريگي
دحگت لـ جسار و أيمن و صافيناز
الواكفين ، سمعوا كلامه
دفع أيهم باهر عنه ، صعد سيارته
ركض باهر ورا يريد يصعد ويا
حرك و طلع ع الطريق
ظلينا واحد يدحك بـ وجهه الثاني
غاده : مين رح يلگاهم؟
أيمن : يلگاهم
صافيناز : كيف ؟
أيمن : اذا خلاهم بـ راسه
لو يطيرون لـ سابع سما يلحگهم
و الاخ يحبهه طلع مهمد صلوات
خوش صدمة اكلنا
اتذكرت كلام هتان لمن حجت عن بنية يحبها أيهم عادت ذكرياتي لـ وقت يجي يغني بـ الكُلية
بديت اربط شوية شوية ، كل مره انصدم اكثر
صافيناز خبلتني تريد تروح تسلم روحها للخاطف
أيمن : شني انتِ مسويه هذا فد حل ؟؟
صافيناز : كيييف بدها تطلع
هو بدياني هي شو ذنـ....
أيمن : لا بدُياج ولا بدُجيا
لا تخوطين بـ صف الاستكان
حيوان مريض نفسي يا ذنب بعد ؟
ظلت ساكته تدحك بـ وجهه أيمن
عيونها انملت دموع
أيمن : عليمن تبجين ي حظي علييمن؟
صافيناز : رح يقتلها بـ سببي
أيمن : عمي شو خل اطلع
هاي سوت عندي جالي
و انتوا كلكم ساكتين و صافنين
اروح الحك أيهم اشرفلي
جسار : تعرف وين رح يروح
أيمن : احتمال رح اجرب حظي و اشوف
طلع و عافنا
باهر : كومي يلا خل نروح
كمت لـ يمه ، حجيت بـ صوت ناصي
غاده : رح ابقى يم صافيناز
شوف حالها خطية شلون اعوفها؟
باهر : يمعودة لا يرحون يهدون ع البيت
لو يسوون الج شي ؟!
غاده : لا تخاف ما يصير شي ان شاء الله
باهر : تمام اجيج بعد شويه
هزيت راسي بـ قبول
طلع جسار ، اتبعه باهر وكفنا بـ الباب
باهر : انتبهي لـ نفسج ،
اي شي يصير خابريني
هزيت راسي بـ قبول
باس كصتي ، راح صعد وي جسار
سديت الباب ، دخلت يم صافيناز
فحطت من البجي ، تلوم بـ روحها
تخابرني مناك نور تگلي ملاك اتخبلت
و تصيح "من وراي انا خليتها تروح"
خاله فيروز بس تبجي و گوه مخليها تنام
بـ الادوية و الابر يلا نايمه و البيت محروك
ذبيت نَفسي گلبي يوجعني صديقة روحي
مرت بـ كل هذا و ما ظهرت النا ...
مُلاذ :-
المكان بدأ يصير اظلم
فتحوا الحبال من الكرسي و خلوني نايمه ع الكاع
انعادت بـ ذاكرتي المشاهد لمن خطفوني
ظليت ساكنه بـ مكاني و راكده
ادحك لـ كل المكان و احاول اسوي خطة هروبي
استوعبت تدريجياً كل يلي جاي يصير وياي
عشت اشكال و الوان من الاشياء و بعدني اعيش
شلون رح ينتهي بيه المطاف مقتوله بـ يا طريقة؟
مرت فترة طويلة كـ العادة ما عرفت اقدرها
لَكن على الاغلب مرت يومين
يدخل رئيسهم يسألني ما اجاوبه
يدفر بطني و يظل يضربني و انا اغلط عليه
لحد ما يطلع و هو مأيس
دخل رئيسهم سألني اكثر من مرة
ما حصل جواب رفعت عيني دحگتله
كمت من مكاني كعدت على حيلي
شعري نازل على وجهي
دحگت لـ الـ سجينه تلهب من نارها
بلعت ريگي ، رجعت لـ ورا ازحف
انضربت بـ عمود وراي ، اتقدم الرئيس
-صافيناز وين؟
مُلاذ : ما اعرف صافيناز
رفع السجينه خلاها على رگبتي
غمضت عيوني صرخت بـ صوت مكتوم
جسمي اشتعل نار انفاسي ترتفع و تنخفض
ما گدرت اقاوم ، اغمى عليه
فزيت مره ثانية دحگت الدنيا ليل
ظليت ع الگاع صافنه و منتهيه
دحگت لـ رئيس هذي العصابة
دخل يمشي بـ هدوء ، دحگتله خازرته
- يلا سولفيلي وين صافيناز؟
مُلاذ : گلتلك بـ جيبي ما صدكت
-الظاهر الكتل ما يفيد وياج
مُلاذ : جؤ كل شي ما يفيد وياي
-بس الدكتور يفيد
دحگت بـ وجهه مصدومة
درت بـ عيوني ، دحگتلهم دخلوا أيهم
ردت اكعد عدل ، تاذيت كلش
مُلاذ : انت شتسووي هنا ؟
دحگلي أيهم مربطين ايديه
بسرعة فلت روحه من عدهم
ركض الي ، كعد كدامي
أيهم : مُلاذ !!!
نزل نظره على رگبتي
وسع عيونه بـ صدمة رفع عينه الي
مُلاذ : شنو تسوي هنااا؟ شجاااابك؟
دحك بـ عيوني عيونه خبطن دم صارن
ظل هادء لزموه الحراس كعدوه كدامي بـ مسافه
ايديه مشدوده لـ ورا ، شدو رجلين أيهم
الرئيس بيناتنا كاعد على كرسي بس بـ المگلوبي
-عبالج الدكتور راح من ايدينا؟
لا لا غلطانه هواي استخفيتي بينا
مُلاذ : حيوان ما عندك شغله و عمله
أيهم : اوافقج الرأي
عگد حواجبه يدحگلنا احتار يضربمن
اذا يتدنى يم أيهم يضربه أيهم كَله يموته بـ گاعه
اتقدم اخذ أيهم من مكانه خلا كدامي
كاعد على ركبه يدحك بـ عيوني
ادحك لـ المسرحيه يلي تصير ،
التفتت الرئيس لـ الحراس
-لمن اخذتوا اجد وراه جان لو شافكم ؟
- لا سيدي
-فتشتوه زين ؟
-نعم سيدي فتشناه
ابتسم بـ شر ، طلع سلاحه من خصره
سحب اقسام ، خلا السلاح بـ راس أيهم
بلعت ريگي عيني على أيهم ، صاكه اسناني
-وين مكان صافيناز ؟
مُلاذ : ما اعرف
-مكاااااان صافيناز وييين؟
كزيت على اسناني و صرخت بي
مُلاذ : ما اعرف
نزلت عيني لـ أيهم گلبي ينبض بـ خوف
شيسوي هنا شجابه لـ هنا !
-اخير مره مكان صافيناز؟
دحگت لـ أيهم ، بلعت ريگي
غمض عيونه بـ معنى "لا تحجين"
هزيت راسي بـ رفض ، وجهي صار نار
مُلاذ : عوفه هو ماله علاقه
أيهم : مُلاذ
ضغط بـ اصبعه ع الزناد
تدريجياً حسيت السلاح رح ينفجر
عطت بسرعه استوقفه
مُلاذ : اوكف اوووكف
دار عيونه دحگلي
مُلاذ : منطقة #### كاعده هي و ابوها
اسأل عنهم و راح تلگاهم
ابتسم بـ انتصار ، تركني و طلع
دحگت لـ أيهم يلي كدامي
طلعوا كلهم سمعته يگول لـ حراس يبقون بـ الباب
مُلاذ : شتسوي هنا شجابك ؟؟؟
أيهم : لَـذه استعجلي كدامنا بس ٧ دقايق
عكدت حواجبي
مُلاذ : ٧ دقايق لـ شنو ؟
أيهم : بعد هاي الـسبع دقايق
رح ياكلون طن وحل
مُلاذ : شلون ؟
حاول يوكف من مكانه
رجليه مشدوده اجاني يكمز
أيهم : لييييش انطيتي العنوان؟
مُلاذ : كذبت عليهم هذا مو عنوان صافيناز
أيهم : انتِ شگلتي ؟
عدت اله العنوان الي انطيته ، ضحك
وصل لـ يمي شمر روحه
مُلاذ : شتريد ولك وخر
أيهم : لَـذه و داعتج الا اكسر ايدين الاذاج
مُلاذ : راح بعد وين تكسر ايديه
رح تظل بـ نفسك
أيهم : وين يروح مني؟
اسمعي لَـذه رح اصير وراج
و اخلي حذائي كدام رجلج ، رجلي اليمنى
انتبهي اليمنى مو اليسرى ، نزعيها الحذاء
و نزعيها الجواريب
مُلاذ : شنوووو باقي بس انزعك حذائك
لا هاهيه كملت
أيهم : انعل ابو الفواصة
ولج نزعيني الحذاء ضام من جوه موس
وسعت عيوني مصدومة
مُلاذ : ما انلاميت من سميتك ام سوادي
خلا رجله بـ ايديه
حاولت اجر حذائه لحد ما طلعت
مُلاذ : دني رجلك ماااا الوح
أيهم : ولج يلاااا
نزعته جاروبته
أيهم : طااااح الموس
طاح بالگاع وراج بالضبط
بعده بـ غلافه جديد
مُلاذ : شيسوي الموس بـ رجلك
أيهم : جبته وياي اعرفهم ذولة الـ****
اخذت الموس بـ ايدي ، زحف أيهم لـ يمي
صار ظهره بـ ظهري
أيهم : انطيني الموس
مُلاذ : وين ايديك
أيهم : هياتهن
مُلاذ : وينهن هياتهن ؟
أيهم : ولج لَـذه ما اكدر الزم ايدج
مُلاذ : بيها جرب
أيهم : لا بس ما اريد المسها بالحرام
شمرت الموس بـ ايدة
ظل لحظات يسوي بالموس ع الحبال
فتح ايديناته و رجليه ، اندار فتح ايدية بسرعة
ابتسمت بـ فرح لزمت ايد بـ ايد
دحگت لـ رجلي المشدوده بـ سلسلة
جر أيهم السلسلة حاول يطلعها كمت ارافس
أيهم : مُلاذ رح اوكف يم الباب
اضرب على الحايط حيل و صرخي
مُلاذ : شنو ليش؟
أيهم : سوي الگلته
عكدت حواجبي ظليت بـ مكاني
اتقدم أيهم وكف ورا الباب
ضرب أيهم ضربات متتاليه ع الحايط
صوتهن حيل عالي و انا صرخت
انفتح الباب دخلوا الحراس مستغربين
أيهم واكف ورا الباب و انا اصرخ
هو وراهم دفر واحد بـ ظهره وكع يمي
و الثاني جر راسه ضربه بـ الحايط
ظليت ادحگله موسعه عيوني مصدومه
راد يكوم يلي يمي
رفعت ايدي على راسه ضربته بـ الگاع
لحظات فزينا على صوت الرمي
مُلاذ : شنو هذا الرمي ؟؟
أيهم : مال دوريات و الضباط
اشتباك بينهم و بين الخطفوج
مُلاذ : رح تفهمني الصاير بس نطلع مو؟
اتقدم يدور المفاتيح بـ جيوبهم
لگا اسلحتهم اخذها من عدهم
هز راسه بـ قبول ، لگا مفتاح قفل السلسلة
اجاني يركض فتح سلسلة رجلي
گمت بـ صعوبة ايديه توجعني من الحبل
افرك بيهن و مكان الجويه يحرگني
التفت الي أيهم ، عيوني غوشن غمضتهن حيل
گوه مقاومه و واكفه على رجلية
أيهم : لزمي بـ ملابسي
لزمت بـ ملابسه بسرعة
ظل يمشي و امشي وراه
وصلنا لـ الباب نريد نطلع
اجت النا طلقة تايهه طاحت بـ زند أيهم
مُلاذ : أيهم !!!!
أيهم : اشش اهدي من نطلع نعالجها
هسه انتِ ظلي هادئه تمام ؟
مُلاذ : أيهـ.....
بعدني اريد احجي ، دارت الدنيا
راسي صداعه اشتد ، فقدت وعيي
فتحت عيوني دحگت
فوكاي مُسعفين دورت بـ عيوني
دحگت أيهم كاعد و يضمدون بـ جرحه
مُلاذ : أيهم
دحگلي بسرعه قرب وجهه الي
أيهم : مُلاذي ، ها شتحسين ؟
يوجعج شي حاجيني؟ هسه رح نروح لـ المستشفى
هزيت راسي بـ رفض
مُلاذ : ليش نروح لـ المستشفى؟
أيهم : نعلگلج مغذيات
لان صارلج هواي ما ماكله
مُلاذ : أيهم شلون لگيتني ؟
أيهم : بعدين اسولفلج كل شي
هسه انتِ ارتاحي
مختنكه كوه اتنفس ، گلت لـ أيهم
علگولي اوكسجين ، رجعت غمضت
ماكدرت ابقى مفتوحه عيوني اكثر
فتحت عيوني لگيت نفسي بـ المستشفى
الكل ملتمين يمي و امي تبجي
أيهم واكف و متجتف لمن شافوني فتحت عيوني
اجو يركضون عليه ، يسألون عن حالي
بلعت ريكي هزيتلهم راسي بـ معنى "انا بخير"
اجت امي تبوس بـ راسي و تحضن بيه لـ صدرها
صحيت شويه كدرت احاجيهم
ضرغام اساساً يعرف كل الصاير
ما احتاج يعرف مني شي حتى
فيروز : بعد مستحيل تطلعين لـ مكان وحدج
ابتسمت تك خد
مُلاذ : ها تصيرين حماية الي فيروز
حجت و هي تبجي
فيروز : اش اش و لا كلمة
ظليت ساكته ، ملاك و امي
يبوسن بيه من الجهتين و ملزمات بيه
غاده تمسح على شعري نور و عمه
يعدلن بـ مخدتي و بـ الغطى و كاعدات يمي
لـ الليل و ما خلوهم الولد يبقون
بقت امي و عمة منارس يمي و اخذوا الباقين
كل نا ادحك لـ امي الگاها تبجي و تلوم روحها
بعد محاولات مني و انا اشوفها تغفي و تفز
اطلب منها تنام ما تقبل ، اخيراً نامت
لـ الفجر ظليت انا كاعده لان نمت هواي
دحگت لـ أيهم يلي دخل الغرفة
شاف عمتي و امي نايمين گام يمشي بـ هدوء
وصل يمي وكعد قدم ظهره گال بـ همس
أيهم : ليش كاعده؟
مُلاذ : نمت هواي
انت شتسوي هنا؟
أيهم : اجيت اشوفج
مُلاذ : ايدك شلون صارت؟
أيهم : تخبل كل شي ما بيها
مُلاذ : اكيد؟
أيهم : اي ، لَـذه
مُلاذ : ها
أيهم : تكدرين تگومين اريد احاجيج
مُلاذ : وين ؟
أيهم : لـ المكتب
مُلاذ : خاف يكعدون
و ما يلگوني و يخافون
أيهم : لا تخافين نرجع بسرعة
هزيت راسي بـ قبول
اريد افتهم شجان يسوي بـ نفس المكان
گمت على كيف و هو يحاول يساعدني
وخر الي المغذي ، خليت رجليه ع الگاع
هو واكف كدامي رفعت عيوني دحگتله يدحگلي
بلعت ريگي نظراته حلوه تخرع
مُلاذ : ها نروح لو نظل صافنين؟
أيهم : اريد اصفن بيج كل عمري
بس هسه ما يسمح الوضع اريد ارزلج
مُلاذ : ليش؟
أيهم : تعالي
وكفت على اطراف اصابيعي
مشيت بـ خفه و هو كدامي
فتحنا الباب ، انجفلنا على صوت عمتي
منارس : وين رايحين؟
مُلاذ : ها عمه شسمه؟
أيهم : اريد اشوف نسبة دمها
خاف تحتاج بطالة دم وجهها اصفر
منارس : بـ هالوقت ؟
أيهم : اي افضل
ضحكت عمتي بـ خفوت
ظليت عاكده حواجبي و ادحگلها
هزت راسها بـ قبول ما مقتنعه سمحت النا نروح
طلعت بسرعة من الغرفة انا و أيهم
مُلاذ : كله من وراك فضحتنا
أيهم : لَـذه ما تكدرين توكفين على رجليج
مُلاذ : مابيه شي هسه نوصل مكتبك
أيهم : تسندين نفسج عليه ؟
لزمت بـ ردانه و سندت روحي
وصلنا لـ مكتبة دخلنا و كعدنا
مُلاذ : بسرعة سولف شتسوي هناك؟
أيهم : انتِ السولفي اول شنو سالفة التهديدات
ليش ما اجيتي و گلتيلي ؟
مُلاذ : شنو يا تهديدات؟
أيهم : مُلااااذ
بلعت ريك ، حكيت راسي
مُلاذ : احجيلي شتسوي هناك
و احجي الك عن التهديدات
أيهم : ورا ما يومين ندور عليج
اتصل بيه ضرغام ماخذ رقمي من زمات
گلي اكو واحد يلحگني و يراقبني
سألته منين يعرف گلي على الحماية يلي وراي
مبلغين ضرغام بـ شخص يراقبني بـ كل مكان
بلغني لازم اخذ حذري لازم ،
حجالي عن التهديدات و عرفت من صافيناز
الي صاير بيها و الي خطفج نفسه الي يريدها
انه ردتها من الله سوينا خطة انه و ضرغام
طلعت على طريق فارغ خليت أيمن وراي
و ضرغام من جهه ثانية
شفتهم بدوا يسرعون عرفت صار وكتها
خليت موس بـ حذائي اعرف يشدون ايدينا
قابل يخلونا هيج سفردحي
وكفوني ع الطريق نزلوني من السياره
انه هم سويت روحي ما ادري
لفخت هذا و ذاك راشدي ، كتلتهم
كضوني غطوا وجهي و شدوا ايديه عود
هيج نجرين همَ اولاد الـ **** و جابوني الج
مُلاذ : بالله لو مسويلك شي ؟
أيهم : سولفي سالفة التهديدات
لا تضيعيها بـ الحجي و الاسئلة
مُلاذ : هددوني بيكم انت و امي و ملاك
أيهم : ليش ما گلتيلي؟
مُلاذ : ليش اگلك ؟ و شلون اگلك؟
أيهم : هسه انتِ شايفه الحجي الي بگلبي
اذا احجي ما تبقين دقيقة بعد يمي
انتِ ما تخافين على روحج؟
ما تركدين ما تتوبين ما تكعدين بـ مكانج؟؟
مُلاذ : شسوي مثلاً ؟
أيهم : الي ضربج الرئيس مو؟
مُلاذ : اي
أيهم : *****
مُلاذ : شسويتله ؟
أيهم : خليت ايديه جوا التاير و دست عليهم
مُلاذ : شنوووو؟ شوووكت؟
أيهم : قبل شويه
مُلاذ : تحجي صدددك انت؟
أيهم : اي ، نعم
مُلاذ : شنووو اي نعم
منين لگيته انت مو راح لـ صافيناز؟
أيهم : و أيمن المن مخلي يراقب
غير حتى من يطلع هالكلب يلزمه الي
ظليت موسعه عيوني و ادحگله
أيهم : الي يمسج اچوي بـ ناري
مُلاذ : أيهم شسووويت أيهم !!
أيهم : يا بعد اهل و عشيرة أيهم
مُلاذ : انت واعي لـ السويته؟
أيهم : كلش واعي ، ما متندم قيد شعره
اتقدم وكف كدامي اريد احجي ضيعت الحجي
صار وجهي كدام بطنه رفعت راسي دحگتله
أيهم : لَـذه
ظليت ادحگله
و هو كمل كلامه
أيهم : لـ هذا السبب گلتيلي ابتعد؟
ظليت ادحگله ساكته
كنبص كعد كدامي
أيهم : ها؟
مُلاذ : أيهم لازم اروح
أيهم : ما ترحين مُلاذ هالمره ما ترحين
جاوبيني لـ هذا السبب حتى لا اتاذى ؟
مُلاذ : لا ماله علاقة
أيهم : بـ داعة ابوج
خزرته و عطت : أييييهم
أيهم : جَرحه ، جاوبيني
بداعة ابوج احجي الصدك
مُلاذ : وخر أيهم لااازم اروح
أيهم : جاوبيني و اتركج
گمت بسرعه ردت اطلع
اتقدم قفل الباب و وكف كدامي
أيهم : جاوبي كافي تشردين
واجهي روحج و واجهيني مره وحدة
مُلاذ : أيهم افتح الباب
أيهم : ما رح ينفتح الباب الا بعد جوابج
انطيته ظهري لزمت بـ راسي
ضغطت عليه بـ ايديه ، انداريت اله دحگتله
حجيت و انا معصبة منه
مُلاذ : انت لييييش جاي تسوي بيه هيج؟
أيهم : شسوي ؟
مُلاذ : أيهم عوفني
أيهم : كافي تشردين مُلاذ
جاوبيني على سؤالي و اطلعي منا
مُلاذ : ما عندي اي شي وياك
اي شخص بـ مكاني رح يخاف
أيهم : محد رح يخاف
ضربت رجلي بـ الگاع
عطت بي : أيهم كااافي
أيهم : جاوبي ليش گلتيلي ابتعد؟؟
مُلاذ : انا مو روبوت انا ممكن تصير عندي مشاعر
انا احس و احتار و اتعب و احاول و ابتعد
انا مو حجاره و لا حايط حتى اكون جامده
و طول الوقت لازم اكون مثل الصنم
لازم اتصرف بـ جدية و انتبهه على كل تصرف
تعبت اكون انا الشخص الي يمنع الاغلاط
ما اريد اوووكع بـ غلط أيهم كافي تعبت
انا انسانه حسو بيه لا تخليني بـ هاي الدائرة
لان اكرهه الدوران بـ هاي الدائره
و ارجع لـ نفس النقطة ، نقطة الصفر
انا اصلاً ما اعرف الحب و المشاعر شنو
بـ عمري ما صار عندي شعور لـ شخص
ان كان كرهه او حب او اي شي ثاني
هدرت كل عمري علمود ملاك و امي
و ما متندمه قيد شعره هذا الجان لازم يصير
و افضل شي سويته من خليتهم محور حياتي
لا تجي هسه و تسألني عن شي انا اجهله
و حتى لو عرفته ما رح اسمح لـ روحي
حتى لو ما تريد مرتك عندك ابن منها
مستحيل أبني سعادتي على تعاسة شخص ثاني
مستحيل اخلي طفل يعيش شعور العائلة المتشتته
بسببي و لا اريد اعيش هالشي وي اي شخص
ظل ساند روحه ع الباب و يدحگلي
أيهم : ليش تصعبين الاشياء هلگد؟
مُلاذ : لان الاشياء التحجي عنها
مو سهله لـ انسانه مثلي ، انطي شعور و ثقة لـ شخص
هذا شي عظيم يمي ، مستحيل انطي لـ اي شخص
أيهم : شفتي غلط بدر من بـ يوم اتجاهج
لمسة ما المسج اخاف عليج من الحرام !
مُلاذ : انت تعرفني تعرف ماضيي شنو ؟
أيهم : ماضيج كله بـ ذاكرتي و اعرفه
مُلاذ : تعرف من خطفوني شصار بيه؟
و شنو السبب يلي خطفوني علموده ؟
أيهم : راضي بيج بـ كل الاشكال
و بـ ماضيج و حاضرج و مستقبلج
مُلاذ : تعرف انا شنو عشت هناك؟
أيهم : مُلااااذ كافي لا تخبليني
ما جان ذنبج و لا الج علاقة
مُلاذ : رح تبقى تحب قاتله ؟
أيهم : شنو ؟
مُلاذ : انا قتلت شخص ...
- يتبع الفصل التالي اضغط على ( رواية جرح الأيهم ) اسم الرواية