رواية جرح الأيهم الفصل السابع و العشرون 27 - بقلم أيلان
"الجُــرح السابع و عشرون"
"وصحت لــ إبعيد
يا نهر التعب لـ عيوني عبر إنعاس
نومني أريد أرتاح
بـ عيوني بچي
بگد الحچي المضموم عند الناس "
مُلاذ :-
خليت ايدي على صدري
اريد احجي و بـ لحظتها انسد الاتصال
صفنت لحظات ، اتصلت بـ ضرغام بسرعه
اتصلت ٤ مرات و ما جاوبني ، اتخبلت
ركضت تركت المكان و طلعت
اتصلت بـ جسار حجيت اله كل يلي صار
بـ هاي اللحظة و يلي اتصلوا عليه شنو گللولي
جسار : دزي رقمهم بسااااع مُلاذ بساااع
مُلاذ : لا جسار اوگف
رح نوصلهم عن طريق ضرغام
مدافهم يا بنية و شنو يريدون
جسار اسمعني ملاك و امي اخذهن
ضيعهن منهم وديهن بـ اي مكان ، تمام؟؟
جسار : مُلاذ منين لگو رقمج
منين عرفوج رح اتخبببل
ولج انتِ وين دخلتي روحج مُلاذ !
مُلاذ : انتبهه الهم و انتبهه لـ اهلك
ضيعهم عنك جسار لا تخليهم يلزمونك!
جسار : انتِ وين هسه؟
مُلاذ : ما ادري ما ادري وين اروح
جسار : منيـ...
بعدنا نحجي اتصل عليه ضرغام
گلت لـ جسار ضرغام يتصل عليه
و سديت الاتصال من عنده ، جاوبت ضرغام
حجيت اله بسرعة عن كل يلي صار
ضرغام : دزيلي الرقم مُلاذ
و هسه راح ادز حماية لـ بيتكم
و انتِ فوراً تأمنين على نفسج
و تتركين المكان الي انتِ بي و تلحگين اهلج
مُلاذ : ضرغام ذوله يسووها
ضرغام : اعرف مُلاذ لـ هذا السبب
انا جاي انبهج ترجعين و تأمنين على اهلج
الرسالة من وين وصلتج؟!
مُلاذ : محل الورد رحت اله
اجت مساعده وياي سلمتني بوكية
و گلتلي دخل رجال نقى الورد
و گلي انطيهه الج
ضرغام : ما وصفته الج؟
مُلاذ : لا
ضرغام : المكان بي كاميرات؟
مُلاذ : محل ورد ضرغام
الكاميرات شتسوي بـ محل الورد
ضرغام : تمام ، هسه اسمعيني
ارجعي لـ البيت و لا تطلعين الا من تضطرين
مُلاذ : القناص وين ممكن يكون؟
ضرغام : كدامكم عمارات لو شنو؟
مُلاذ : اي اكو كدامنا بـ الفرع مال صعدة
ضرغام انتبهه حباب و شوفهم
ضرغام : هسه همَ طلعوا من البيت؟
مُلاذ : لا ما طلعوا بعد
ضرغام : تمام انتظري دقيقة
كام يحجي يم شخص يمه
و انا ارد اله رقم الاتصل عليه
ثواني و رجع گال : ها مُلاذ
مُلاذ : الدكتور شلون؟؟
ضرغام : يا دكتور؟
مُلاذ : أيهم
ضرغام : أيهم شنو اله علاقة؟
مُلاذ : مخلين قناص عليه
ضرغام : شنو علاقتج بـ أيهم
حتى يريدون يكتلوونه!!!
مُلاذ : ما اعرف و الله ما اعرف
ضرغام : شنو الماتعرفي مُلاذ
لعد منو يلي يعرف اذا ما تعرفين
مُلاذ : أيهم خلي حماية لـ أيهم
ضرغام : تمام ، مُلاذ يا بنية ماخذتها؟
صفنت و انا احاول الگا جواب
يا بنية انا ما ماخذة اي شخص!
لـ لحظات اتطلب مني افكر
بـ كل الاشخاص يلي بـ حياتي
لحد ما اتوقف فكري على شخص واحد
مُلاذ : صافيناز!
ضرغام : شنو؟
مُلاذ : صافيناز الي جاي يقصدها
رح أسد الاتصال ضرغام دقايق و اتصل بيك
ضرغام : تمام
رجعت اتصلت على صافيناز
ظل يرن هواي تهسترت بـ مكاني
انفتح الخط ظليت ساكنه و هادئة
گلت بـ هدوء متمنية ترد عليه هيَ
مُلاذ : صافي؟
صافيناز : مُلاذ ؟ شو في ولِك
مُلاذ : صافي خو مابيج شي؟
صافيناز : لا ولِك شو في؟
مُلاذ : اجيتي لـ المكتب لو بعد؟
صافيناز : لا رح أُخرج هسه
مُلاذ : لا تروحين صافي ابقي اليوم
لا تجين لـ المكتب و لا تطلعين من بيتكم ابد
صافيناز : ليه ؟ لبست و خلصت؟
مُلاذ : لا صافي لا تجين اليوم
من اتصل بيج تعاليلي ، تمام؟
صافيناز : ليه؟ مُلاذ صاير شي؟
شو في ؟ ليه هيك صوتك؟
مُلاذ : مابي شي صوتي صافي
لا تجين اليوم ما رح اروح المكتب
صافيناز : طيب بس في شي؟
مُلاذ : لا
صافيناز : مُلاذ احكي بـ الله عليكِ!
مُلاذ : ولج لا امشي ولي كافي
خلص رصيدي
ضحكت صافي سديت الاتصال منها
رجعت اتصلت بـ ضرغام جاوبني
ضرغام : مثل ما توقعت
الرقم مغلق الي اتصل عليج
مُلاذ : طبعاً رح يسوون هيج
ضرغام : مُلاذ اخذي حذرج
هسه كل الي تهددتي بيهم
رح اخلي وراهم حماية و ناس بدون ما يدرون
الورقة يلي بيها التهديد اريدها و عنوان محل الورد
و اسم البنية الشافت الولد
انطيته كل المعلومات
سديت الاتصال منه اتصلت بـ اسد
بلغته بـ عنوان بيت صافيناز
و طلبت منه ياخذ معتصم وياه
يروحون يراقبون بيتها ، قبل طلبي
سديت الاتصال ، نزلت التلفون
و انا بـ السيارة ما اعرف وين اروح
شنو اسوي ، الحيرة اخذت عقلي
وكفت السيارة على صفحة ، بطني تلويني
سندت راسي على الكشن ، حلگي يابس
الاسئلة تتراطم بـ عقلي
منين يعرفوني و منين يعرفون انا اخذت صافيناز
منين لگو عنواني و بيتي و اهلي و الدكتور !
تنهدت و انا بـ السيارة
سندت راسي ع الكشن ، ظليت ساكنه
تعصف المواقف بـ ذاكرتي ، رمشت بـ هدوء
ضاك الهوا بـ صدري ، فتحت الباب
شمرت روحي خارج السيارة
وكفت على حيلي سندت ظهري عليها
نَفسي يصعد و ينزل ، تهت و احتاريت
ما اعرف شلون اطلع اهلي من هذا الموضوع
گلت و انا صوتي يرجف
مُلاذ : احتاجيت الجيه لـ كبرك
و النومه يمه هواي ، بس وعدي الك كسر ظهري
مسحت عرگي الي اتصبب من كصتي
رجعت صعدت السيارة
اشتريت مي من الطريق و شربت
اتصلت بـ جسار گلي اخذ اهلي
گلتله يطمنهم عليه لان ما رح اروح الهم كم يوم
ما اكدر اروح الهم يمكن يراقبوني و اكيد يراقبوني
اتصلت بـ ضرغام گلتله يطلعلي كدام المركز
وصلت صفيت سيارتي ، اتقدم ضرغام ناحيتي
سلمته الورقة يلي بيها الكلام و الورد
بقينا كم دقيقة نتناقش بـ الموضوع
شفت اسكندر طلع من المركز و دحگلنا
اتجاهلته ، رجعت عيني على ضرغام
مُلاذ : ضرغام الحماية خليهم
ورا كل واحد ذكرته الك
ضرغام : طبعاً بدون ما توصيني
هزيت راسي بـ قبول
اتقدم اسكندر علينا درت وجهي
ردت اصعد بـ السيارة اجا بسرعة سد الباب
دحگلنا انا و ضرغام ، التفتت اله خزرته
مُلاذ : وخر ايدك عن الباب
اسكندر : بـ شنو جنتو تدكون فچ؟
اعذروني قاطعت حديثكم المشوق
مُلاذ : وخر عن طريقي و فوت حالي
ضرغام : اسكندر
اسكندر : ههههههه ها رح تدافع الها؟
صايرين حبايب ما شاء الله ، ادفنكم بـ كاعكم
مُلاذ : اسكندر تدري شتذكر من اشوفك؟
دحگلي بـ اهتمام
مركز مسامعة عليك ، كملت كلامي
مُلاذ : الذبانه المعلوسة
تطير و توكف ع وجهه الواحد و تتحارش
لمن واحد يريد يضربها تظل تشرد
بعدين تنكتل تنكتل
دحگتله بـ طرف عيني
و هو موسع عيونه عليه و صافن
ضرغام مدنك يحك ارتبة خشمه و يضحك
تركته و صعدت بـ السيارة
رحت لـ البيت دخلت دحگت بالبيت
فارغ ما بي و لا حس
الوحشه تحاوطه من كل الجهات
اتقدمت و رحت لـ غرفتي
صفنت و دحگت بـ الغرفة على الغراض
بـ لحظة انهارت اعصابي كسرت كل الگدامي
صرخت كمزت بـ مكاني
عجزت عن التعبير عن غضبي
و كرهي لـ حيرتي
ما اعرف شكد ظليت هيج
بس الاعرفة الغرفة تحطمت تحت ايدي
كعدت ع الگاع ، طاقتي منتهيه
لميت رجلية لـ صدري
سندت ظهري ع الجربايه يلي وراي
مر وقت هواي گمت من مكاني
افتر بـ الغرفة كل دقيقة يتصل عليه شخص
لو الموكلين لو من محل الورد لو محل الحلويات
كل دقيقة شخص يتصل عليه
كتمت كل صوت بالتلفون ما اريد اسمع اي شي
حلت المغربية ايدي ع المكتبة
مخلية راسي عليها و صافنه ادحك
ظلام الغرفة ضوه خفيف يمر من الشباك
عيوني ترمش بـ هدوء و توجعني
ساعات من هذا الهدوء و التفكير المتواصل
ركزت على صوت رسالة واردة لـ تلفوني
بقيت على نفس وضعيتي ، اخذت التلفون دحگت
بـ لحظتها سمعت صوت الرعد القوي ..
نزل مطر غزير صوته واضح و استمر الرعد
دحگت لـ رسالة من "ام سوادي"
فتحت المسج ، ادحك لـ صورة دازها
مكتوب بيها شعر
"عودتني العيد يعني الناس ، وياهم اعيد
كتلي من يعتك جرح جرحين ، يتلاكه وجعها
وعودتني ، السفن من تصفح گبال الريح
تتمزك شرعها كتلي ماتبقى سفن
و الناس يعيروها خشب عادي و يغركها دمعها
كتلي يا سفان لو ضلع السفينه ينكسر
كل ضلع من عدنه ضلعها"
رديت عليه
-للـ الشاعر مظفر النواب
أيهم : تسمعين اله؟
مُلاذ : احياناً
أيهم : ليش كاعده لـ هسه؟
مُلاذ : اشتغل
أيهم : تمام انه هم اشتغل
ما رديت و تركت الرسالة ادحگلها
شنو ذنبه حتى يكون مستهدف بسببي؟
تركت تلفوني ع الميز و گمت
فتحت باب المطبخ كعدت بـ الباب
ادحك لـ المطر يلي ينزل ...
هتان :-
گاعده بـ المطبخ اكل و افرفر بـ حساب غاده
ياهوه الالگاه اسويله متابعة بس الي يعرفوها
لگيت حساب نور عرفتها من الاسم
كله تعلق لـ غاده و غاده مجاوبتها
دخلت على حساب نور هم اشوف بي
ما عندي لا شغله و لا عمله ، عطاله بطاله
كعدت على حيلي اعاين لـ حساب جسار
دخلت عليه ، بقيت اشوف صوره
منزل صورة لابس بيها مناظر و واكف يم بحر
بس الصورة مبينه قديمه
كاتب اشياء عن الغربة و الشوق
رفعت عيني على صوت سيارة
كمت من مكاني ، خليت تلفوني بسرعة
بـ جيب البجامه ، اتقدمت على الشباك اعاين
دخلت سيارة أيهم للـ الحديقة
انداريت لـ امي الواكفه
هتان : اجا ايهومي
امي : هم متأخر تمنيت هالولد
مره وحدة بـ حياته يرجع من وكت
اجت يمي شافته من الشباك
بعدنا نعاين لـ أيهم فزينا على صوت صريخ
و كان صوت أبيل طبعاً درت وجهي
عاينت لـ باهر يلي نزل من السيارة ورا أيهم
درت عيني لـ أيهم رافع راسه
عاكد حواجبه مستغرب الصوت ،
يعاين لـ الطابق الثاني
ماكدرت احسب غير ثواني
لگيته يركض لـ داخل البيت
لمن استمر صوت الصراخ
ركضنا وراه و باهر يركض
البيت كله تجمع ، صريخ أبيل مستمر
وي صوت بجيه
أيهم يشبخ بايه بايه
يصعد و يصيح بـ اسم أبيل دخلنا لـ الغرفة
عاينت لـ لينا واكفه بـ الزاويه
مرعوبه من صوت ايهم
أبيل كاعد ع الگاع و يصرخ من البجي
خده مطبع احمر ، ايده زركه
راح عليه ايهم يركض ، بس يريد يهدي
ايهم : شبيكك بابا أبيل
عاينلي أبيل بابا عاينلي
حضن رگبة أيهم يبجي
روحه رايحه گلبي انفطر عليه
ركضت عليه احاول اهدئه انه هم
لينا مكرفصه روحها بـ الزوايه
كل نظراتها تنطق بـ خوفها من أيهم
اشر أبيل على لينا وهو فحطان بجي
اصلاً قبل لا يأشر افتهمنا المصكوعه كاتلته
عاين ايهم لـ لينا بـ نظره من يمي يبست بـ دمي
رجع عينه لـ أبيل : يلا بابا روح وي عمو باهر
شهك أبيل يبجي ، باس أيهم راسه
كام وكف انطا أبيل لـ باهر اخذه
نزل بسرعة يسكت بي و يواسي
اشرلنا نطلع امي عارضت بسرعة تعرف نظراته
رح يخلص لينا خلاص على ايده
-يمه ايهم استهدي بالرحمـٰن
-اطلعوا برا
ايمن : ايهـ....
عاط بيهم بـ صوت زرف اذني
أيهم : اطلعووووووووو براااااااا
طلعوا بسرعه و ما حجو كلمه
هو كدام الباب واحنا بره منطينا ظهره
يعاين الها ركضت لينا من الزاويه
حتى تطلع من الغرفه بـ مجرد مد ايده
كمشها تك ايد من خصرها ، دفعها لـ داخل الغرفه
انه واكفه برا الغرفه بـ الباب
و هي تعاينلي بـ نظرات توسل
عاينت بـ المرايه لـ أيهم
فتح حزام بنطرونه
نزعه طوى بـ ايده ، اندار للـ الباب گبل نزلت
و علي اخاف منه صح مرات سبورتي
بس اذا عصب يشيل الواحد و يدكه بـ الگاع
سمعت طبكة الباب و قفلها ، اتبعها صراخ لينا
امي تدك بـ الباب و تتوسل بي يعوفها
لينا مستمره ترادده و تغلط علينا
و هو يجنزها و يغلط عليها
و يسب روحه و يسب شكو واحد يجي بـ باله
باهر و أبيل بعد ما لكيت الهم اثر
امي نزلت تتوسل بـ أيمن يسوي شي
گام صعد ، صعدنا وراه ، دك الباب
أيمن : أيههههم كافي عوفها ختولي
أيهم و العباس اذا ما فتحت الباب اكسره
صاح أيهم بـ صوت عالي معصب
أيهم : حتى انعل والد و الديك
وخر أيمن عن الباب
و رجع دفعه حيل بـ جسمه ما انفتح
مرتين هو يدفع الباب حيل ما ينفتح
و الصراخ واصلنا ، جنزها
ابتعد أيمن و دفر الباب من اول دفرة
انكسر الباب ، دخل أيمن جر أيهم
طلع ايهم يصب عرك ، دخلنا على لينا نركض
شلناها خليناها على الجربايه
امي : جيبيلي خاولي و مي دافي
رحت ركض لـ جوا أيهم واكف بـ الحديقة
ايد بـ جيبه و ايد يدخن بيها ، يمه واكف أيمن
گال بصوت هادء
أيهم : خليتو الدكتور يصير مجرم ...
فزيت على صوت امي يلي تنادي بـ اسمي
تركته و صعدت بسرعة الها
خلت على وجهها الوصلة يلي بيها مي دافي
و بدت تطبطب على وجهها
فزت لينا تونون متوجعه
فتحت عيونها عاينت لـ امي
استغرق منها دقايق حتى تبث سمها و حقدها
لينا : كون يصير بيج
مثل اليصير بيه و اسوء
اجيت اضربها على حلگها و امي لزمتني
طلعتني تجرجر بيه لـ برا و انه اكمز بـ مكاني
هتان : حيوانه مو صوجج و الله ما يغزر وياج
حيل بيج كون أيهم يمسح بيج الكاع ذهاباً و اياباً...
و انه احجي امي سدت حلگي
تسحول بيه برا الغرفه لحد ما دخلتني لـ غرفتي
دفعتني بـ داخلها وخرت ايدها من حلگي
هتان : شبيج شبيج
تسكتين لـ هاي الزعطوطه؟؟
امي : ولج اكعدي هسه يسمع اخوج
يرجع يكتلها و نوب يا طلابه الما تخلص
هتان : خل يكتلها تستاهل حيل بيها
ما شايفه هيج صلافه فوك ما تساعديها
و لا جاي ترضين أيهم يضربها
امي : يا يمه قابل نزيد النار حطب
هتان : نزيدددها حتى تتادب
امي : هتان الضرب بـ عمره ما جان حل
هتان : اذا المثل لينا تنضرب
فـ هذا اكبر حل الها
مو كل الناس يمشون عدل بـ الحجي!
امي : و بـ رايج الضرب صحيح؟
هتان : غلط بس صحيح وي الناس اليستاهلون
شوفيها هسه هي تفشر و لسانها ينمد
حتى كفار تكفر الله يشيلها و يركعها بالگاع كون
وين اكو بنية تكفر ما تخاف الله هاي
ما تشوفين حالها و شصاير بيها تستاهل
امي : الله يهديها
عكدت حواجبي ، كعدت ع الجرباية
جريت تلفوني من جيبي معصبة
حصرت روحي بـ الزاويه
عاينت لـ تلفوني مفتوح
وسعت عيوني مصدومة !!
ضربت كصتي لمن استوعبت
خليت التلفون بـ جيبي و هو مفتوح
جايتني رساله من جسار
كاتب "ها؟"
ظليت صافنه ، بلعت ريكي
غطيت وجهي بـ اللحاف
هتان : لا يربي لا
اخذت تلفوني اعاين لـ رساله
و اللايك الي مسويته بـ الغلط على صورته
ارجع اضم وجهي بـ الغطى و اكوم ارافس
اخذت التلفون و كتبت بـ هدوء
هتان : ها منو انت؟
دزيتها ما شافها
ظليت مثل الشوشه اروح و ارجع
و اطكطك بـ اصابعي و الله يا ربي
عود اسوي روحي ما اعرفه لو تموتين هتان
يعرف بيج تعرفي لطمت كصتي على غبائي
اصلاً شسوي داخله بـ حسابه و ابحوش
فزيت على صوت اشعار
جسار : هتان؟
هتان : ها منين تعرفني؟
جسار : مخليه صورتج على الحساب
هتان : ها اي ، انت منو؟
جسار : جسار انا
هتان : ها اي ، منو يا جسار؟
جسار : ابو المخضر
جاوبني هيج ردت اضحك
بس كتمت ضحكتي
هتان : ها زين ما نريد مخضر
جسار : هتان
هتان : ممنوع المراسله ع الخاص
جسار : غير انتِ السويتيلي لايك
هتان : منو شوكت شنو؟
انه ؟ انه سويتلك لايك؟ انت جذاب
رح احظرك
جسار : هياته اللايك موجود
هتان : الخاص ممنوع
جسار : ولج اوكفي خل احجي
هتان : انه لا اكسر شخص قد وثق فيني
جسار : منو الوثق فيج بالله؟
هتان : اخاني و امي
جسار : اخانج يوثقون فيج؟
هتان : نعم
جسار : منو درسج العربي انتِ؟
هتان : مادري ما جنت احضر الدروس
جسار : ها خوش لعد وضحت السالفة
هتان : شقصدك؟
جسار : لغتج العربية حلوه
بس انصحج ما تحجين بيها
هتان : هااااااا
جسار : اسمعي هتان
هتان : حظر
جسار : صارلج ساعة
تگولين حظر و ما حظرتيني
اسمعي اعتذر منج على ذاك اليوم
لمن عطت بـ وجهج بس جنت صافن
و من ردمتيني انجويت و خرعتيني
بحيث گام لساني يمسلت
هتان : تعرف روحك تمسلت
جسار : ولج هتان
هتان : ما مقبول اعتذارك
جسار : هو شنو سويت انا قابل
بس كلمتين بالغلط حجيتهن
نزلت دموعي لمن اتذكرت
ضغطت اتصال و خابرت عليه
بعده ما مجاوب عطت بـ وجهه
هتان : عميه ما تشوفين
انتِ شنو تشوفين اصلاً
انتِ تشوفين نفسج حتى تشوفين الكدامج
انه مو عمييييه و اشوف واعرررف
تقصد على لبسي انه لبسي هييييج
يعجبني هيييج عندي مراية اشووووف روحي
الحمدلله و الشكر
عاكده حواجبي و جسمي يرجف و عيوني تدمع
اصرخ و متنرفزه من كد ما ظاله بـ گلبي
جسار : يا هاي شمالها الفرخه ؟
ولج شمالج تصيحين اذاني راحت
حطيت ايدي على حلگي مرتبكه
نزلت التلفون و سديت الاتصال بـ وجهه
عفت التلفون ، حطيت ايديه على وجهي
حصرت روحي بـ طرف الجربايه
اريد اطم روحي ، لمن اعصب اطلع عن السيطرة
و لساني يظل يدردم اموت اذا تظل بـ خاطري
لميت ايدية و غميت روحي ...
نور :-
اجيت من دوامي عزيز أخذني
و انا داخله البيت ، سمعت صوت عياط امي
يلي رج البيت بعدها صوت ابوي
فتحت باب المطبخ و دخلت
دحگت لـ الماعين يلي صايرة طشار ماله والي
رفعت عيني دحگتلهم دخل وراي عزيز
و هو يخلي السويج بـ جيبه ،
درت وجهي تركتهم ،
دخلت بلا اي اهتمام يصدر مني
حتى عزيز تركهم و دخل كلمن راح لـ غرفته
و انا افتح شالي دخلت عمتي
منارس : ها نونه اجيتي؟
نور : اي عمه عيوني
فتحت الي ايديها رحت حضنتها
مسحت على ظهري بـ هدوء
منارس : يلا غسلي و انا رح اصب الغده
صيحي لـ عزيز هم وياج و تعالي ناكل
بـ غرفة الحجيه
نور : تمام عمه
هزت راسها تركتني و طلعت
بدلت ملابسي ، كعدت ع الجربايه و تنهدت
همست وي روحي اصبرها
نور : لوعتنا رح تنتهي عن قريب
ما بقى شي نور ما بقى شي
اتنهدت و گمت ردت اطلع من الغرفة
لَكن سرعان ما اتراجعت خطواتي
و اخذت تلفوني اتصلت بـ مُلاذ
نور : مُلاذ طمنيني اكيد رح يطلع؟
مُلاذ : وعد مني نور ، اركان رح يطلع
و رح يطلع و يرجع احسن من قبل
و وعدي راح انفذه نوره اتطمني
نور : تمام
نزلت راسي و سديت الاتصال
لحگت عمتي و بديت اصب وياها
امي : لمي الكزاز نور
التزمت الصمت و كملت شغلي
منارس : ما تلمه و لا الها علاقة
امي : انتِ الحيه السوده لا تتدخلين
منارس : حيه و لا بـ گد البقره
و بعدج ما راكده و هاجده بـ مكانج
شلت الصينيه دفعت عمتي امي
طلعتني عمتي كدامها و اتبعتني خطواتها
خليت الصينيه و صحت لـ عزيز
گعدنا ناكل و متونسين على سوالف عزيز ...
غاده :-
دخلت الغرفة اتقدمت لـ يم باهر
المتمدد لان جاي تعبان
خليت وجهي كدام وجهه
گلت بـ صوت شرير و خافت
غاده : باهر انا الجني باهر
فتح عيونه بـ نعاس يفركهن
دار وجهه ناحيتي و لحظلت استغرق
حتى اعتلى صوت صراخه و كمز
يدك على مخدتي و يدحگلي
باهر : ولج غااااده ولج اكعدي
يدك على المخده
يحاول يصحي غاده الي كدامه
نزعت القناع المخيف من وجهي
طحت ع الكاع اضحك بـ صوت عالي و ارافس
رفعت عيني لـ باهر المخلوس و كاعد
اتعالى صوت ضحكاتي و درت وجهي
دقايق ما حسيته غير جفت فوكاي
سحلني من رجلية طلعني من الغرفة
مسح الكاع بيه و انا اضحك
وصلني للصاله ، شمرني بـ الصاله
باهر : بعد ديربالج تدخلين الغرفة
شال المندر يلي بـ الگاع شمره عليه
صديته بـ ايديه و انا اضحك ماكدر الزم روحي
كمت على حيلي لازمه بطني
كامت توجعني گد ما ضحكت على تعابير وجهه
و غيرته العراقية ما تسمح اله يشرد بدوني
عباله نايمه يمه و يكعد بيه
ركضت جلبت بـ ظهره
صعدت على ظهره و انا اضحك
بست خده و وخرت شعري عن وجهي
غاده : استاز باهز انا اسف
باهر : ولي
غاده : هههههه اسفه
باهر اسمع اريد اروح لـ امي
باهر : ولج مو البارحه جنتي يمها
غاده : عادي بهوري ما تقبل تجي يمنا
فـ نروحلها احنا ها بهوري شتگول ؟
باهر: ولج ولج
غاده : ولك ولك
ضحك و نزلني من ظهره
اندار الي جرني باس كصتي
باهر : بطلي مقالبج السخيفة
ضحكت و خليت راسي على صدره
حضنته و حاوطت ظهره بـ ايدية
غاده : اسفه اخير مره
باهر : اممم صدكت
ابتسمت بـ وسع و ضحكت
و انا استمع لـ دگات گلبه ...
مُلاذ :-
لـ مدة ٣ ايام اعصابي مشدودة
ما شفت اهلي و لا رحت الهم
تواصلي وياهم يقتصر على اتصال
امي قلقت و خافت بَس ما گدرت احجي الها
كل الي گدرت اگوله البيت تعبان و جاي يخر مي
لمن سألتني ليش ما الحگهم جاوبتها
"غراضي هنا ما اكدر اتركهن
و اريد اكمل شغلي بعدين الحگكم"
صدگتني لَكن مو بـ شكل تام
و صار موعد محكمة اركان
قدمت طلب بـ احضار ابوه و تم قبول طلبي
و ضرغام طبعاً ساعدني بـ سالفة القبول
اتصلت بـ أيمن سألته اذا يجي
أكد الي راح يجي و يكون حاضر
رح يشهد لـ صالح اركان
دخلت نور وياي لـ المحكمه
و خلفي ضرغام واكف
نور : خاف اسكندر يشوفني؟
مُلاذ : اسكندر ماكو هنا لا تخافين
بس للاحتياط لبسناج هيج
هزت راسها بـ قبول ، رفعت البوشية تجر نفس
مسحت عرقها المتصبب بسبب توترها
التفتت لـ ضرغام دحگتله
مُلاذ : شوكت يجون؟
ضرغام : هسه ما يطولون
بقينا واكفين برا و ننتظر
دحگت لـ أيمن يلي اجا من بعيد ناحيتنا
سلم علينا دور بـ عيونه و گال
أيمن : اركان وين؟
مُلاذ : هسه راح يجيبونه
و يجيبون ابوه
هزوا راسهم بـ قبول
بلعت ريگي و ظليت بـ مكاني احوص
انتظر مُجيئ اركان و ابوه
حول أيمن نظره على نور الواكفه
أيمن : منو هاي البنيه؟
اتقربت عليه
و گلت بـ صوت ناصي
مُلاذ : نور
أيمن : يا نور؟
سكتت و دحگتله
فوراً لگف الموضوع و فهم
أيمن : اوكفي اوكفي شالسالفه شو صارت خبط
انتِ مين تعرفين اركان و مين تعرفين البت
و مين صاحبتج تعرف باهر؟
مُلاذ : نفس الاسئله و الله
قوس شفته ، هز راسه مستغرب
التفتنا على صوتهم ينادونا
مُلاذ : غير يوصل اركااان وين صار؟؟
ضرغام : اهدي هسه يجون
نور : يا رب يجون و يطلع منا يارب
لحظات دحگنا لـ اركان يل دخل الممر
اول ما وصل يمنا ، بسرعة دخلنا
نور نزعت بوشيتها ، دخلت وي ضرغام
وكع نظر اركان عليها وسع عيونه مصدوم
التفتت يدحك بـ وجوهنا عاگد حواجبه
اشرت اله يسكت
ضغط بـ فكه الفوك على فكه الجوا
يحاول يسكت
اتبع دخول اركان دخول ابوه من بعده بـ دقايق
دحگت لـ اركان يلي عيونه صارت بـ گصته
لمن شاف ابوه موجود ، دمارات وجهه نطت
رغم هذا وصيته طول الجلسة يبقى هادء
كلمة زايده رح تنحسب عليه نقطة خسارة...
نور :-
من اول لحظة شفته بيها
شهگت و كممت حلگي على منظره
غمضت عيوني حيل و عصرتهم
اشهك بـ غصاتي ما اريد يطلع صوتي
وجهه ضعفان سماره زايد ، التعب واضح عليه
دحگت لـ مُلاذ الي اشرتلي بـ عيونها
بلعت غصتي و دموعي تنهمر على خدي
جريت نفس بـ عمق صدري ، هدأت نفسي
بدء يتداول الكلام بين القاضي و مُلاذ
و اركان يلي واكف
اسئلة توجهت من القاضي لـ اركان
ما جاوب اركان لـ دقايق ، عرف بـ وجودي
مستحيل رح يقبل يحجي هالشي لان يخصني
اتمنيت اروح لـ يمه و اتوسل بي حتى يحجي
بس حتى يطلع منا و يخلص نفسه
التفت دحگلي هزيتله راسي بـ معنى "احجي"
اركان : بـ هذا ... هذاك اليوم
انكطع صوته حولت نظري لـ مُلاذ
يلي تأشر اله حتى يحجي و تخزر
اخذت موافقتي قبل كل شي و سألتني
اذا عادي هالشي ينذكر بـ المحكمه
اكدت الها عادي لان هذا الشي مو ذنبي
لف نظري على ابو اركان المبتسم بـ خباثة
اتذكرت الي صار ، جسمي صار يرجف
لزمت بـ ملابسي و شددت ايديه عليهن
اصبر روحي نهاية الاذية فرحة ...
اتردد هذا الشي بـ داخلي و هواي
رفعت عيني لـ اركان يلي كمل كلامه
اركان : بـ هذاك اليوم كنت انا طالع
اجيب احتياجات لـ اهلي بـ رجوعي لـ البيت
مريت من يم بيت جيراني و بـ هاللحظات
بلع ريگة التفت دحگلي
غمضت عيوني بـ معنى "احجي"
دار عينه بسرعه و رجعها لـ القاضي
اركان : سمعت صوت صراخ
شخص يطلب المساعدة
استغربت و اتجهت لـ بيت جيراننا
بسبب اختفاء الصوت السريع
ظنيت روحي توهمت شفت بابهم مردودة
دخلت اخذت سجينه من مطبخهم احتياط
لان ما اكدر اوهم نفسي و اكذبها اكثر
ناديت بـ اسم بنت جيراننا
بس جنت اسمع بس صوت البجـ ...
خلا ايده على صدره غص بـ كلامه و نزل راسه
ما كدر يكمل ، طلبت مُلاذ من القاضي
تكمل بدلاً عنه لان هالموضوع يصعب عليه
بعد لحظات وافق القاضي و مُلاذ كملت
الجزء يلي ما كمله اركان
اضافة الى وجود شاهدين على الحادثة
رفعت عيني لـ ابو اركان يلي مختفية ابتسامته
مفتح عيونه بـ وسع و مصدوم
كان يظن رح يطلع منها بـ كل سهوله
طلب القاضي نشهد
اتقدمت انا من ورا اشهد لـ صالح اركان
رفعت عيني لـ عينه نزلت دمعه حاره على خدي
مسحت وجهي و اتقدمت لـ القاضي
حجيت اله كل الي صار و روحي مفرفحه
احجي و اغص و دموعي تنزل
تحولت نظرات القاضي لـ الاسف اتجاهي
انا استمريت احجي و كل ذرة بـ جسمي ترجف
اركان كاعد على اعصابة ما يريدني احجي
كملت كلامي هز راسه بـ قبول القاضي
سألني كم سؤال و جاوبته بـ صوت يرجف
اجا الشاهد الثاني "أيمن" سود الحدث
من اجا لحد ما اكتشفوا ابو اركان هرب
دحگت لـ مُلاذ يلي وجهت نظرها لـ ابو اركان
انرسمت ابتسامة على شفتها رفعت اله حواجبها
ابو اركان ظل يخوزر و يعيط
بس القاضي ما سمح اله و عاط بي سكته
سمح القاضي لـ مُلاذ بـ الكلام گامت وگفت
مُلاذ : سيدي القاضي
بعد ما سمعت كلام الشهود و موكلي ،
كدامك نتائج لـ نسبة الكحول بـ دم والده
يؤكد النا كلامه الصحيح و ابوه يتناول الكحول
و المواد المخدرة و الممنوعه
بـ هذاك اليوم اعتدى على البنية
على الرغم من وضع موكلي الصعب
لَكن حاول مساعدة البنية و انقاذها
من بين ايدين والده المجرم
موكلي رغم ابوه ما مات
لَكن هم ما اخفى جريمته و اعترف بيها
و كانت دفاع عن شخص اخر
اضافة الى ان هو فوك السنتين ونص مسجون
اتوقع نال عقابة و ما ترك والده للـ موت
اضافه الى هذا والدة موكلي و اخواته
مالهن اي وجود بـ معنى اصح مفقودات
و المتسبب بـ فقدهن ابوه ...
كملت اله كلامها عن الدلائل يلي لگوها
و الاثار يلي اتبعوها و سايق التكسي
يلي اتقدم و حجا عن ابو اركان
و شنو شاف و شنو يلي صار
حسب ما سولفت الي مُلاذ عن الي گاله
لَكن الرجال ما حجا عن نزلته وي والد اركان
و مساعدته يدخل ام اركان و اخواته لـ البيت
لان ما يريد يدخل بـ المشاكل
استمع القاضي اله و عرضت مُلاذ اله
مشاهد السيارة بـ الكاميرات
دليل على خروج ابو اركان من المستشفى
و هو يركب السيارة من بعدها
اهل اركان فقدوا الهم كل اثر
نهت مُلاذ دفاعها بـ كلمة
"اطلب العفو على موكلي"
وضحت القضية مو قضية طعن و قتل عمداً
و انما قضية دفاع و مساعدة
أكدت على خطف ابو اركان لـ اهل اركان
القاضي استمع لـ كلام مُلاذ
و هي تطالبه بالعفو عن اركان
وضحت هو نال جزائة
بـ الاضافة الى عائلة اركان مفقودة
اتخذ من عند القاضي دقايق يتناقش بيها
ويا يلي يمه و يدحگون لـ ابو اركان منقرفين
انصدمنا بـ ابو اركان لمن سجب شكوته!
دحگت لـ ضرغام يلي واكف و متجتف
عرفت هو سبب
حتى خلا ابو اركان يسحب شكوته
ظليت انتظر وگلبي يدب بي الخوف بـ كل لحظة
رجعت عيني على مُلاذ يلي واكفه و تنتظر القرار
صارت القاعه محل لـ التوتر
يلي زاد التوتر هذا ابو اركان
رجع يحجي و يسبب الازعاج
عاط بي القاضي مسكته غضبان
بعد لحظات كأنما سنين ، نطق القاضي
بـ قرار العفو عن اركان
لحظات خلتني ما اكدر استوعب
و جسمي يرجف فرح و شعور ما اعرف اوصفه
خفت يكون هذا حلم و اصحى منه
بـ المعنى الحرفي طرت من الفرحه !
ابتسامة واسعة على ثغر مُلاذ ، كلنا فرحانين
ضرغام متدخل بـ الموضوع بحيث سَهله النا
رغم ضرغام و اركان ما يعرفون بعض
لَكن من فرحتهم اتحاضنوا
احس روحي توها تحررت ، التفتت اركان مبتسم
ابتسامة ظاهره اسنانه دحگلي
سكتت و ظليت ادحك اله بـ عيون مدمعه
طلعت مُلاذ ورانا مبتسمه
تتحمد لـ اركان بـ السلامة
سرعان ما اختفت ابتسامة
اركان و بدء يتسائل عن اهله
لَكن مُلاذ و ضرغام كان عدهم خطة ثانية ...
مُلاذ :-
بعد ما خرج اركان نفذت وعدي لـ نور
و وعدي لـ اركان انو رح اطلعه منا
كدرنا نقدم ادلة كافية و زايدة
لـ العفو عن اركان
اتفاجئت بـ سحب الشكوى
يلي بدرت من ابو اركان
رب العالمين لطف بينا
و كان القاضي انسان طيب و فعلاً عادل
شاف القضية قضية دفاع
و كان فعل اركان الخاطئ شي يمكن الغفر عنه
و قبلها ضرغام محاجي و شارحله الموضوع
بس ما انطانا جواب اكيد لذالك اتوترنا
لمن سجننا ابو اركان
و لـ عدم وجود تهمة ثابته عليه
طلع من الحبس اتعقبنا انا و ضرغام
بقينا نلحكه وين يروح و وين يجي و شنو يسوي
و لـ عدم كفاية وقتنا وكلنا ناس غيرنا يراقبونه
و ما حصلنا اي نتيجة من عدهم لحد الان
اركان : اهلييي وين ضرغاااام!
مُلاذ اهلي وين شصاير عليهم !
شلون ما لگيتوهم ضرغام مو گلت لگينا ابوك
ضرغام : لگيناه بس ما لگينا اهلك
اتيبس اركان بـ مكانه نظرة يتنقل بيننا
نور واكفة بعيد مسافة عن اركان و تدحگله
انگلب وجهه مطعون احمر
راد يرجع يدخل و يتعارك وي ابوه
بـ نفس اللحظة طلعوا ابوه الشرطة
قبل لا يهجم عليه جروه ضرغام و أيمن
أيمن سد حلگه بـ ايده و ضرغام قيده
اركان يتلاوى بينهم اخذوه لـ برا طلعوه
لحگناهم انا و نور نركض
اخذوه كدام سيارة ضرغام
رحنا وراهم بسرعة
مُلاذ : شبيك تريد ترجع تنسجن
و انت هستوك طلعت؟
اركان : وين اخذذذذذ اهلي
ويييييين اخذهم رح يحجي
راد يروح جره أيمن من ياخته
مشى بـ اركان و هو ساحل ياخته
اركان يغلط على أيمن متخبل
بعدهم يمشون و ضرغام اجاله اتصال
ابتعد عنا كم خطوة و ظل يحجي
اركان يتعارك وي أيمن و أيمن ما يجاوب
ظلينا نحاجي انا و نور و أيمن سطرنا راسه
سرعان ما سكتنا لمن اجا ضرغام
بلغنا الي يراقبون ابو اركان
عرفوا بـ مكان اهله فتحت عيوني بـ وسع
اركان : شلون؟ منو لگاهم؟؟
ضرغام : استعجلوا استعجلوا مو وكت اسئلة
خطينا كم خطوة نحو السيارة مستعجلين
وكفنا لمن سمعنا صوت اركان يحاجي نور
اركان : انتِ ما تجين
نور : ليييش؟
اركان : ماااا تجين لا تخبليني
هو اعصاب فايرة و نور خايفة عليه
لمن عاط بيها بـ هاي الطريقة خوفها
ظلت تدحگله و عيونها انملت دموع
ضعفت نظراته كدامها
اشرت لـ أيمن ياخذ نور لـ بيتها
هز راسه بـ قبول و صاحها راحت وياه مقهوره
اجا اركان ناحيتنا بسرعة
صعدنا بـ سيارة ضرغام
و انتقلنا لـ العنوان الي ذكروه النا
اركان ظل يلوب بـ السيارة
اتصلنا بـ الدوريات
دخلنا منطقة اسوء من الي دخلناها ذيج المره
بس شاف هيج اركان وسع عيونه مصدوم
بلعت ريگي خايفة من نهاية هذا الموقف
وصلنا لـ المكان المنشود وكفنا بـ الباب
وصلت الدوريات ، درت وجهي لـ ضرغام
يلي حرك راسه بـ معنى "ندخل"
سلمني سلاح في حال وجود شخص جوا
رفعت السلاح و مشيت بـ هداوه
درت لـ اركان يلي يريد يدخل استوقفته مانعته
بس هو اتخبل دك رجل الا يدخل
خايف على اهله و محد يلومه على قلقة
سنين صارله ما شايفهم
و بـ يوم خروجه من السجن لگا عائلته
دفر ضرغام و الباقين الباب
هجموا منتشرين بـ داخل البيت
ركضنا انا و اركان لـ جوا ، ضرغام سبقنا
دورنا بـ داخل البيت، ريحة المكان تخنك خنك
اركان يصرخ بـ اسماء اخواته ، ينادي امه
بـ ايدة عكازته و يدور
ردنا نفتح الباب استوقفنا ضرغام
رفع سلاحة و فتح الباب بـ هدوء
بقينا انا و اركان واكفين بـ مكاننا ندحك
لحد ما انفتح الباب و اتوضح داخل الغرفة
نزلت عيوني المتوسعه بـ صدمة
على اخت اركان الي ع الگاع
بطنها كلها دم و فاقدة الوعي
اختل توازن اركان وكع ، سنده ضرغام
تدريجياً نزله للـ گاع كاعد على حيله يدحك
ظل صافن على اخته و فاتح حلگه
و دموعه تنزل على خده
سمعنا صوت واحد يصيح لـ ضرغام
يگله لگو بعد اشخاص ، ظل اركان متصنم
دخلوا ضباط دحگو لـ اخته
اتوقفوا بـ مكانهم بلا اي ردة فعل
ركضت عليها جست نبضها
ظليت دقايق احاول اتحسس نبضها
نزلت راسي على صدرها
رفعت راسي دحگتلهم و صحت
مُلاذ : عايشه عايشه اركان و الله عايشه
بس نبضها ضعيف
ضرغام : اتصلتوا بالاسعاف؟؟
-نعم سيدي من قبل لا تجون
دحگلها اركان و رجع دحگلي
راد يگوم ما يكدر سنده ضرغام
جابه يمي كعد اركان يم اخته
حضنها لـ صدره و بجى بـ صوت عالي
تركتهم طلعت اركض لـ الغرفة
الي بيها ام اركان و اخته الثانية
دخلت دحگت الغرفة فارغه
دحگت لـ الضابط واكف بـ باب الحمام
اشر و گال هنا دخلت بسرعة
دحگت لـ اخته و امه المرميات ع الكاع
لَكن جسمهن يخلو من الدم ، بس مبين فاقدات
ركضت عليهن بسرعه اتحسس نبضهم
عايشات و هم نبضهن ضعيف
سمعنا صوت سيارات الاسعاف
لزم اركان بـ عكازته اجا يركض ناحية الحمام
شاف اهله راح عليهم يحضن بيهم لـ صدرة
و هم فاقدين يبجي بـ حرگة و جسمه يهتز
گلبي كام يوجعني ، ما كدرت ابقى اكثر
دخلوا المسعفين لـ الحمام
ضرغام جر اركان و طلعه من الحمام
اركان مفرفح و يبجي و عرگان وجهه احمر
شالوهم بـ سيارات الاسعاف
صعدت انا وي اخته المطعونه
و اركان صعد وي ضرغام
عبرونا و اتجهوا لـ المستشفى
بقيت يم البنية خايفه و قلقانه عليها
و هم يعالجون بـ جرحها سألت عن حالتها
جاوبوني خطره و نبضها ضعيف
ظلينا بـ هذا القلق گوه يلا وصلنا المستشفى
نزلت قبلهم بسرعة و نزلوهم كلهم
اجا ضرغام الساند اركان ناحيتنا
دخلناهم لـ المستشفى اخته ركضوا بيها عمليات
و امه و اخته الثانية اتجهوا بيهن لـ الردهات
اركان اتخبل عقل ما ظل بـ راسه و يبجي
ظلينا بـ هاي الدوامه ننتظر
و نهدي بـ اركان اهله شدولهم مغذيات
خلوا الهم اوكسجين متضررين كلش
اثار ضرب و كدمات على وجههم
مبين باقين بلا اكل لـ فترة طويلة
اخذنا اركان علگناله مغذي ، بقى يمه ضرغام
تركتهم و طلعت لـ الحديقة
اتصلت بـ امي طمنتها عليه
فيروز : مُلاذ صاااير شي
ليش ما جاي تجين يمنا ؟؟
مُلاذ : اجي و الله
بس اخلص شغلي بـ هاي الفترة
فيروز : تشوفيني طفله تجذبين عليه؟؟
شصاير مُلاذ احجي؟
مُلاذ : ما صاير لا تخافين البيت جاي يخر
و علمودكم حتى لا تتمرض ملاك
فيروز : و انتِ كاااعده بـ البرد؟؟
مُلاذ : لا لا افتح الصوبه
هي بس غرفتكم الي تخر
رح اشوف بيت جديد احسن
فيروز : و احنا ظالين كل يوميه بـ بيت
وين النا خلك كل يومية منظفين وشايلين غراضنا
مُلاذ : ما عليج فوفو انا احط الاغراض
و يتنظف و يتجهز كل شي و اجي اخذكم
فيروز : اريد اشوفج
صارلي شكد ما شايفة وجهج
مُلاذ : هاي هسه ادزلج صورتي
و شوفيني جنج على شوفتي
ضحكت امي و انا صورت صورة
دزيتها الها حجينا شوية و سديت الاتصال
اتصلت عليه نور ، طمنتها سديت الاتصال
حضنت نفسي بـ ردانه و واكفة بـ مكان وحدي
التفتت دحگت لـ أيهم يلي واكف قريب مني
أيهم : شتسوين هنا؟
مُلاذ : انت شنو تسوي هنا؟
كل ما اندار الكاك يمي
أيهم : شفتج تعبرين و طلعتي لـ الحديقة
هزيت راسي بـ عقلي يحفر التهديد
تركته و ردت اعبر سد الطريق عني
أيهم : وين رايحة؟
مُلاذ : ما يخصك
أيهم : شنو هذا الاسلوب؟
مُلاذ : اسلوبي
تركته و ردت امشي
مد ايده كدامي استوقفني
أيهم : صاير شي؟
مُلاذ : شتريد انت؟؟
يا اخي استحي على نفسك متزوج و عندك طفل
و تروح و ترجع وراي وين ما اندار الكاك كدامي
على شنووو كل هذاا الاصرار !!
دحگلي عاكد حواجبه
أيهم : ليش تدققين بـ سالفة زواجي!
مُلاذ : لان انت متزووج
احترم نفسك كافي عاد لا تحاجيني
و لا تقرب يمي ما اريدك !
دحگلي عاكد حواجبة
ضحك بـ استهزاء و هز راسه ، فرك وجهه
اتحولت ملامحه لـ الجديه انطاني ظهره
و هو يمشي يمه شجره
صم ايده و ضربها بيها
كانت ضربه قوية بحيث صوتها ينسمع
و مبين تعور بـ خشب الشجرة
بس كمل طريقة بلا ما يصدر منه اي اهتمام
لـ ايده يلي تنزف و يقطر الدم منها
غطيت وجهي بـ ايديه و بقيت مكاني
احتاريت احتاريت شسوي
لسا ما لگيت اي اثر الشخص الهددني
ما اريد أيهم يقترب مني اكثر
و لا اريد يطيح بـ مصيبة
بلعت ريگي و دخلت جوا
بقيت يم اركان و اهله و اخته و امه بدوا يصحون
حضنهم و بجى و هو حاضنهم و امه تمسد راسه
اخته طلعوها من العمليات و الحمدلله عايشة
بقيت يومين اروح و ارجع لـ المستشفى
سولفوا النا يلي صار
ابو اركان خطفهم و خلاهم بـ بيت
لالي و ليان باقيات يصرحن و يتعاركن
لحد ما الجيران بدوا يشكون
طلعهم من البيت و اخذهم لـ بيت ثاني
بـ مصباح يوم الجلسه
لالي متعاركه وي ابوها
و هو لازمها كاتلها ام اركان و ليان متدخلات
ماخذهن حابسهن بالحمام تاركهن
لمن لالي شايفه الحربه عنده جارتها
شاهرتها بـ وجهه ماخذ الحربه منها بسرعه طعنها...
اشوف أيهم و نعبر من يم بعض
يكمل طريقة كأنو ما شايفني
حسيت بـ الذنب على كلامي وياه اخير مره
بس حاولت ابعده حتى احمي
كعدت على الكراسي الي برا
مر أيهم من كدامي بلا ما يدحگلي
اتوقف بعد مسافة يسولف وي ممرضة
تركها و راح ، لا ارادي اتبعته خطواتي
دخل لـ مكتبه و انا ظليت مكاني
فركت كصتي و دخلت المكتب بسرعة سديت الباب
التفتت دحگلي عاكد حواجبه ، حكيت كصتي
أيهم : اتفضلي؟ تحتاجين مساعدة؟
مُلاذ : أيهم ...
أيهم : دكتور أيهم ، ست
رفعت حواجبي اتجتفت
هزيت راسي بـ قبول
مُلاذ : دكتور أيهم
أيهم : اتفضلي
نزلت ايديه و غمضت عيوني
رفعت ايدي حكيت كصتي
مُلاذ : اعتذر على البدر مني...
أيهم : اكو شي مهم؟
مُلاذ : تكدددر تسمعني ؟؟
أيهم : ليش اسمع؟
هاي ما تريدين اقترب منج ما رح اقترب
غلط و من البداية و هسه اصححلج هالغلط
مُلاذ : اسلوبي جان غلط وياك
اجيت اعتذر منك ع طريقتي بـ الكلام
و انتهى الموضوع الي جاي تسوي صح
لا تقترب مني صحح الغلط
درت وجهي اريد اطلع
فتحت الباب طبكها بـ ايده و هو وراي
أيهم : شوكت ما يعجبج تعتذرين
و شوكت ما يعجبج تجين و ترحين؟
لعبه بـ ايدج انه بـ كيفج تتصرفين بيها؟؟
دحگتله عاكده حواجبي
مُلاذ : اجيت اعتذر و اصحح كلامي
ما سويتك لعبة و لا سويت شي !
أيهم : ليييش اجيييييتي!
انداريت عليه
مُلاذ : لا تصييييح عليه!
أيهم : ليش اجيتي ؟ مو تريدين ابتعد
هاي جاي ابتعد شوفي حالي !
دحگتله صدك وجهه تعبان
و عيونه تحتها اسود و حمر
مُلاذ : اجيت اعتذر منك
أيهم : بس تعتذرين؟؟
على شنو تعتذرين على ياهيه منهن
كم مره هيج حجيتي !
اجيت ، اجيت و حجيت الج
حجيت الج على لوعة ضكتها سنين
تهت و لگيت روحي كدام بيتج
حجيتلج عن شعور و اشياء سويتها
بـ عمري ما كدرت اتخيلها وي غيرج
گلتلج سبب زواجي گلتلج ما رايدها
گلتلج ما لامسها و احلفلج بـ كل واحد
يوم الجانت يمي قبلها بديت افقد
و ما اتذكر اي شي من ذاك اليوم الاگشر
مُلاذ : تبقى مـ.....
بعدني اريد اكمل كلمتي صاح بـ وجهي
صار يسب بيها و يسب روحه اتخبل و اتعصب
صرخت انا هم بـ وجهه
مُلاذ : كاااافي تصيح علييييه
أيهم : افهمينييي مرة وحده
مرة وحده خل يفهمني شخص
لييييش هيج تسووين بيه لييييش!
كمل كلامه محروگه اعصابه
أيهم : بـ طرف عيني ما عاينت الها
انتظرتج و انتظرت جيتج
ردتج تمرين بيه و لو طيف صبرت
هسه انتِ كدامي و جاي تمردين بـ ذاك الصبر
مُلاذ : ليش ما تعوفني ؟
شوف حياتك وياها انا ما مصارحتك بـ شعور
لمن جنت تراقبني و شفتني
حتى ما حاجيتك ما تعرفني عدل ما تعرف طباعي
أيهم : اعرفج من ساسج لـ راسج انه
قبلت بـ كل شعور حسيته الج
ما اتندمت و لا لحظة قبلت بـ عصبيتج
و نفورج و هروبج و حدة طباعج كل شي قبلت
و راضي ، راضي على قبولي بيج هيج
مُلاذ : اضرك
أيهم : ضررج نفع الي
مُلاذ : ماضي و حاضري كله اذيه
قذر و ما تتخيل بيا طريقة
أيهم : مو اسوء من ماضيي وحاضري
و مستقبلي بس انتِ تجملينه
ظليت بـ مكاني بلعت ريگي
درت وجهي عنه حجيت و انا افتح الباب
مُلاذ : دكتور نفذ كلامك و ابتعد عني
تركته و طلعت
و هكذا مرت الايام بعد ما شفته
ضرغام لاكي كاميرات قريبة علينا
و شايف يلي يدخلون لـ محل الورد
سأل البنية الي وياي ، لحد ما لگا الشخص
الي داخل و مخليلي الورد
بقى يدوره لحد ما القوا القبض عليه
دخلت ويا ضرغام يلي يحقق ويا
بـ طبيعة الحال مو نفس الشخص الاتصل
صوته كان يختلف عن الاتصل بيه
استخدمنا كل الاساليب وياه حتى يحجي
بس ضرغام رفع ايده يضربه
استوقفه الولد و ذكر اله كل القناصين و اماكنهم
و الاشخاص يلي ويا
بس ما يعرف الشخص يلي يترأسهم وين
تم القبض عليهم كلهم و مداهمة اماكنهم
اجاني اتصال من الرئيس
لمن شفت رقم غريب ، ركضت لـ ضرغام
جاب يمنا شخص يطلع الموقع و انطا رقم المتصل
بعد ما سكننا بـ مكاننا فتحت خط
مُلاذ : الو
-بلغتي الشرررطة و دخلتيهم
بس لا تظنين تطلعين منها هيج
لو تطيرين و تحطين ارجع و الزمج
انتبهي مني انتِ الي راح تنتهين مو اهلج
سد الاتصال بسرعة
التفتنا لـ الولد الكاعد هز راسه بـ رفض
ما كادر يحدد الموقع مكالمة قصيره كانت
زفرت نَفسي بـ ضجر
لگيت بيت و شلت غراضنا
جبت مساعدات ينظفنه
اخذت امي و ملاك ورا ما امنت كعدنا بي
زال الخطر علينا بـ يوم اجت غادة
و التمينا احنا و نور و صافيناز و ملاك
غاده گالت تريد نروح لـ بيت المزرعة
و هاي المزرعة مالت باهر و رح يجيب اهله هم
لمن عرفت اركان طلع من السجن
صارله فترة اكثر من شهر و اهله بدوا يتحسنون
اتوسلت حتى نكللهم همَ همين و ناخذهم ويانا
اخواته يغيرن جو و لحت نگول لـ جسار
گالت بس احنا الشباب نروح و الامهات بعدين
گابلتنا و كعدت ٣ ساعات هي تقنع بينا
صفت وياها صافيناز و ملاك و تلاثتهن يحجن
و يصيحن "حبابه مُلاذ"
خبلني عطت بيهن ما قابله اروح
خصوصاً باهر هم رح يجيب اخوانه و اخته
ما اريد التقي بـ أيهم و لا اريد يجمعنا مكان
دخلت امي الغرفة و كملت السبحه
امي تنقهر علينا انا و ملاك لان كله كاعدين بالبيت
و انا افتر طول اليوم بين المحاكم و الشغل
صفت وياهن و هم بدت تلح حتى نروح احنا هم
گالو نروح يومين و غاده مخططه
غاده : يومين نبقى هناك و الله نتونس
و بيت بي غرف هواي و بالمزرعة يخبل
نجيب عمة منارس و ام اركان
و امي لـ بيتكم كلهم يكعدون سوه يتونسون
و احنا نروح نتونس بـ المزرعه
مُلاذ : غاده فوتي حالي
بعدني ما حاجيه رجع صوتهم يغطي صوتي
يتوسلن اروح وياهن و نتونس هناك ، خبلني
ما عافني لحظة لحد ما وافقت غصب
صفكت صافيناز ايديها
بـ ايدين غاده و ملاك منتصرات
هزيت ايدي و ضحكت
ثاني يوم الصبح حاجيت جسار و سلطان
طبعاً سلطان كَيف ، سوا مثل سواية غاده
بس وي جسار ، دگله رجل الا يروح ويانا
جسار ما يحب التجمعات و الهوسه
ظلوا يتمالخون و انا صافنه عليهم و ساكته
دحك لـ نور الي واكف يمي ثواني
هز راسه موافق على الجيه ويانا
اتصلت بـ اركان حاجيته بـ البداية هم رفض
گلتله علمود اخواته و غاده اصرت
اساساً باهر يعرف اركان و يعرفون بعض
قبَل علمود اخواته و گلتله امه تروح يم امي
لـ الليل حضرنا جنطة صغيرة انا و ملاك
خلينا بيها ملابس النا و غراض نحتاجهن
ما خلينا هواي اشياء لان هي يومين
ثاني يوم الصبح
اخذت ام اركان و عمة منارس
و خالة جنات اخذناهم يم امي
اتصلت بـ اسد و معتصم حتى يراقبون بيتنا
لمن اتاكدت همَ وصلوا يم بيتنا اتصلت بـ امي
بلغتها اي شي تريده تطلب من اسد و معتصم
رجعت اخذت اركان و اخواته و صافيناز
و ملاك وياي اتصلت بـ غاده سألتها عن مكانهم
وصفتلي الطريق يلي واكفين عليه منتظرينا
اتصلت بـ نور طالعين هي و عزيز
خابرتهم كلهم اتاكدت هم بـ الطريق
و سديت الاتصال منهم
عبرت من يمنا سيارة نزل شباكها
دحگت لـ جسار و سلطان
ضحكت و نزلت الشباك مالتي
سلطان يضحك و يدحك لـ ملاك
انداريت الها دحگتلها كاعده بـ الطرف
شلت المظللات خليتهن بـ شباك ملاك
رفع ايده سلطان غمني ضحكت و رديت غميته
وصلنا لـ يم غاده نزلت سلمنا على بعض
انتظرنا الباقين يوصلون
باهر گال أيمن بعده ما جاي
دحگت كدام سيارة باهر واكفة سيارة أيهم
درت عيوني بسرعة سندت نفسي على سيارتي
نزل اركان اتقدم وكف يمي ابتسمت دحگتله
مُلاذ : شلونهن اخواتك؟
اركان : احسن وضعهن الحمدلله بـ فضل الله
ثم بـ فضلكم انتِ و ضرغام
مُلاذ : لا تگول هيج ما سويت شي
انت اخونا و من صغرنا
اركان : تسلمين ما قصرتي
مُلاذ : الله يسلمك
اركان : هذا راح يطلع من السجن بعد؟
مُلاذ : يا هوه ؟
ظل ساكت يدحگلي
افتهمت من نظراته يقصد ابوه
مُلاذ : يتاخر ياخذ منه سنين يلا يطلع
تهمة هواي اعتداء و تحرش و خطف و محاولة قتل
و يتناول مواد ممنوعة هواي اشياء لكيناهن عنه
اركان : حيل بي عساه لا طلع
مُلاذ : انت هدي اعصابك
و ابقى وي اخواتك
اركان : ان شاء الله
نزلت عيني لـ رجلة الاصطناعية
يلي سوالها عمليه من بعد ما لگا اخواته فوراً
ابتسم و گال
اركان : همزين خلصت من العكازه
مُلاذ : فايدتك؟
اركان : طبعاً
مُلاذ : همزين ان شاء الله كل شي يتحسن
اركان : ان شاء الله
وخرت شعري يلي يتطاير على وجهي
رفعت عيني لـ أيهم المتخصر و يدحگلنا
لابس مناظره و مثل العاده كل ملابسه اسود
درت عيني عنه و خليتها ع الطريق
عاط بـ صوت عالي
أيهم : باااااااهر شوكت يجون ؟؟
باهر : شمالك تصيح بالطريق جايين
دار وجهه و فتح باب سيارته
صعد متنرفز بـ السيارة
اجوا كلهم ، رجعنا صعدنا بـ سياراتنا
اتصلت بـ امي اتطمنت عليها اركان هم حاجا امه
طلعنا بـ طريقنا للـ المزرعة لحد ما وصلنا
صفينا سياراتنا و نزلنا دحگت لـ مكان كله خضار
شكله يفتح النفس يتوسطه بيت جبير
سديت باب السيارة و نزلن اخوات اركان
و صافي و ملاك و اركان
درت بـ عيوني دحگت لـ أيهم
يلي نزل و نزلت وياه مرته و شايل ابنه
اتقدم يمشي من بين الزرع و مرته لازمه بي
أبيل يكرص بـ خدودة و يضحك هو وياه
تركتهم درت وجهي نزلت جنطتنا من السيارة
الكل نزلوا بـ ايدهم جنط صغيرة
اتجمعنا و دخلنا سويه و باهر يرحب بينا
باهر : اخذوا راحتكم ولكم
ذني اليومين نتونس ونسه الا بـ شده
ابتسمنا كلنا و دخلنا
اخذتنا غاده انا و البنات لـ غرفة
بيها جربايه ام النفرين ، الغرفة واسعه كلش
و همَ جايبين وياهم دواشك و غطى
انا هم حسبت حساب و جبت وياي
البيت نظيف يلمع لمع شكله حسسني بـ الدفو
غاده : طلع باهر البارحه ناس ينظفون البيت
حتى من نجي گبل نكعد ما ننشغل بـ تنظيف
مُلاذ : اي
غاده : انتِ و ملاك و صافيناز و هتان
و اخوات اركان و نور هنا
مُلاذ : اي
اخذتنا و طلعت تمشي تراوينا
فتحت باب غرفة بيها جرباية هم ام النفرين
غاده : انا و باهر هنا
هزيت راسي و هي كملت مشي
فتحت باب غرفة وسعت عيوني مصدومة
أيهم واكف بـ نص الغرفة منطينا ظهره
يريد ينزع قميصه صرخت غاده و سدت الباب
خزرتها و دمغتها
مُلاذ : شبيييج شبيييج!
غاده : يمه عزه شكد عيييب...
بعدها جاي تحجي ، انفتح باب الغرفة خلال ثواني
صار طشارهن ماله والي
خو غاده جانت يمي و بعيدين عن الدرج
لكيتها بـ اخير بايه بقينا انا و نور و صافي
وحده تدحك بـ وجهه الثانيه و أيهم يدحگلنا
أيهم : ها بنات رايدات شي؟
اذا تحتاجن شي گللي
ظلن يتمتمن خزرتهن و گلت
مُلاذ : لا بالغلط فتحنا الباب
غاده جانت تراوينا الغرف
دحگلي ساكت هز راسه بـ قبول
درت وجهي ردت اروح اجت لينا بـ وجهي
تخوزر بينا راحت على أيهم
دحگتلها جرت خده و باسته كدامنا
تعابير وجهه أيهم بقت على حالها
يحاول ينزل ايدها من خده ، انحرج كلش
اتحمحمت و أشرت للـ البنات ، نزلنا جوه
اخذت غراضنا رتبتهم كعدنا بـ الغرفة
ارتاحينا شوي اتصلت بـ امي بقينا نسولف وياها
دحگت لـ اخوات اركان كاعدات يم ملاك و صافي
اتقدمت مبتسمه عليهن
مُلاذ : ها يول تصادقتن
ملاك : اييي
ضحكت ، كعدت يمهن
صحت لـ نور اجت كعدت يمنا
لالي : هذا البيت المن؟
نور : يمكن لـ اهل زوج غاده باهر
ليان : بس حلو البيت حبيته
صافيناز : انا كمان
لالي : انتِ سوريه؟
صافيناز : اي
ابتسمن و دحگلها ، هزن راسها بـ قبول
فزينا على هجوم غاده علينا
غاده : ولجن جبتجن حتى تكعددددن
مُلاذ : ها ها خير
نكوم مثل القروده نتكامز لو شنو؟
غاده : ولج يبووووو يبو
كومنننن رح نصب اكل
كمنا وياها جبنا مفرش
فرشنا بالحديقة كلياتنا اتجمعنا
گمنا ناخذ الاكل من المطبخ و نودي لـ الحديقة
دحگت لـ أيهم يلي واكف بعيد
يدخن و منطينا ظهره ايده بـ جيبه
خليت الاكل على المفرش
دحگت لـ أيمن واكف يم صافي
و يرتبون الاكل و غاده و باهر واكفين على جهه
يركصون حواجبهم واحد للـ ثاني مكيفين
التفتت دحگت لـ اركان اتقدم
حضن اخواته لـ صدره
عزيز و نور يسولفون و يضحكون
رجعت عيني على جسار يلي يدحك لـ نور
هتان طلعت من المطبخ شافت جسار
دار وجهه جسار دحگلها ، ابتسم
حكت حاجبها و راحت بسرعه
تخلي الاكل على المفرش
شفتهم كلهم الا ثنين ما شفتهم
اخ ذولة الاثنين علو گلبي
ملاك و سلطان رحت ادور عليهم
لكيتهم كاعدين يم الزرع
سلطان ياخذ لـ ملاك صور
اتقدمت وكفت فوك راسهم
مُلاذ : ها سلطان صرت مصور؟
سلطان : اضحكي اضحكي خل اصورج
من تموتين و نراوي احفادج صورج
يگولون الله يرحمها جانت مرحه
ما يدرون ٢٤ ساعه تخوزر
رفع كاميرته صورني
مُلاذ : هههه ولك وخرها
شتسوي جايب كامرتك وياك
سلطان : أيمن جابها وخلاها يمي
مُلاذ : ي حظي جا تاخذ بيها صور
سلطان : هو انطاني الصلاحيه
مُلاذ : دگوم يالصلاحية خل ناكل
اخذتهم وياي و رحنا كعدنا
رفعوا راسهم يدحگولنا
اجا جسار بـ اتجاهي بسرعة
وكف كدامي
جسار : وين رحتي ؟
مُلاذ : جبت ملاك ليش؟
جسار : خرعتيني عبالي صارلج شي
هزيت راسي بـ رفض
اتقدمنا كعدنا ناكل
أيمن : أبيل تحبني؟
أبيل : لاء
ضحكنا كلنا عليه
أيهم مخلي بـ حظنه يدحگله و يضحك
أيمن اشر على جسار
أيمن : هذاك العمو شبي؟
أبيل : يهوف (يخوف)
ضحكنا و جسار يضحك
جسار : انا اخوف؟
حط أبيل طرف اصبعه بـ حلگه
صفن على جسار و هز راسه بـ قبول
أبيل : اي
بقينا طول الاكل نسولف و نضحك
غاده تضحكنا بـ سوالفها وي باهر
و هي تخرعه و تسوي بي مقالب
رجعت عيني على لينا
انتبه لـ تصرفاتها بلا قصد و الكل ينتبه
أيهم يريد يوكل أبيل وصل اللگمه لـ حلك أبيل
اخذت الاكل من ايده اكلته هي و كامت تضحك ،
أيهم صفن عليها كلنا صفنا عليها
حتى أبيل يدحگلها بـ طرف عينه
خزرها أيهم لمن سكتت و ركدت
نزلت راسي اكمل اكل
رفعت عيني دحگت لـ أيهم يدحگلي
زحت نظري عنه متلافية نظراته
خلصنا اكل لمينا الماعين اخذتهن انا اغسلهن
اجن غاده و صافيناز و نور يركضن
يريدين هنه يغسلن الماعين دفعتهن
مُلاذ : عمي دوووخرن صايرات مؤدبات
بعدين اغسلن انتن الي تجي يمي
لو تگلي خل اغسل انيم الماعون بـ راسها
التفتنا على صوت ضحك الولد
واكفين بـ الباب و يضحكون علينا
انسحبن من يمي بـ هدوء
و انا وكفت اغسل ، سمعت صوته يمي
أيهم : تحتاجين مساعده؟
مُلاذ : لا شكراً
اختفى صوته و انا كملت غسل
التفتت دحگتله واكف يم باب المطبخ
ايديه بـ جيبه و ساكت ساند راسه ع الباب
أبيل يلعب بـ المطبخ يمنا بس هادء
حتى ما سمعت صوته و هو يلعب
رفع راسه دحگلي و ضحك كزكزت عليه
مديت ايديه اله اشيله ، بسرعة اجاني
ضحكت ، ظليت ابوس بي
كد ما حلو و محبوب
أبيل : انتِ هلوه (حلوه)
مُلاذ : انت هم حلو
أبيل : بابا
اشر على ابوه
دحگتله و رجعت دحگت لـ أبيل كمل كلامه
أبيل : عيونه بق بق
ضحكت ما فاهمه كلامه
أيهم : قصده عيوني كبار
مُلاذ : هههههههه
نروح و نعوف بابا؟
أبيل : لاااء
مُلاذ : ليش مو انا احبك؟
أيهم : ولج !
رفعت عيني دحگتله خازرني
ابتسمت ابتسامة ظاهره اسناني ادحك لـ أبيل
أبيل : بابا يجيبلي حاجات
مُلاذ : انا هم اجيب الك حاجات
صفن يفكر شوية
هز راسه بـ قبول على الجيه وياي
ضحكنا عليه يونس و لطيف
اتقدم أيهم اخذ أبيل مني ، شاله على گلبه
شفايفه على خد أبيل و يحجي
أيهم : يعني هسه انت تعوف بابا؟
أبيل : امممم لاء
أيهم : هستوك تريد تعوف بابا
اشر عليه
أبيل : داده تجيبلي حاجات
أيهم : و انه ما اجيب الك حاجات؟
أبيل : تجيب
أبيل حضن رگبة أيهم و باس كصته
ابتسمت على لطافته اندارينا على صوت
لينا : شصاير هنا؟
تعابير أيهم يلي جانت قبل شوية تضحك
اتغيرت جذرياً اخذ أبيل دار وجهه وطلع
ردت اطلع انا هم من المطبخ
اتقدمت لينا كدامي مانعتني اكمل طريقي
لينا : شبي زوجي ؟
مُلاذ : ما بي شي "زوجج"
لينا : اممم ، طبعاً مابي
بـ وجودي و وجود ابننا
مُلاذ : الله يحفظكم اله
تركتها و طلعت عود تريد تبسمرني
صعدت يم البنات لكيتهم نايمات
انا هم حطيت راسي و نمت
كعدت على صوت غاده
غاده : جبتكم تنامووون
مُلاذ : شكو ؟
غاده : تعااالن
دحگت الدنيا ليل البنات كلهن كاعدات
و انا تعبانه كلش بقيت نايمه
نزلنا احنا و غاده الولد متجمعين بـ الصالة
مُلاذ : البيت بارد
باهر : هسه أيهم جاي يكسر خشب
رح نسويلنا كعده برا
نور : بس هسه بارده برا
ليان : بالعكس احس الجو حلو
عزيز : اي صح
اركان : لالي ، ليان
لالي : ها حبيبي
اركان : خو ما ضايجات ، مرتاحات؟
هزن راسهن بـ قبول
لالي : مرتاحات حبيبي ما بينا شي
نور :-
على طول اليوم ادحك لـ اركان و يدحگلي
بس ابد ما حجينا ، ما حاولنا نحجي اصلاً
حسيته خلا حواجز بيننا
بسبب يلي سواه ابو
فرحت لان كادر يخلي رجل اصطناعية
ما اعرف منين اجت اله الفلوس
حتى كدر يسوي العملية
تركتهم كاعدين طلعت برا
دحگت لـ أيهم فززني قسم الخشبه نصين
مشيت لـ وحدي الخضار حلو و المكان حلو
مو مهم صار عندي اي شي
ما دام طلع اركان من السجن هاهيه
بس يلي مضوجني طريقة معاملته وياي
فزيت على صوته
اركان : وين رايحة؟
اتصنمت بـ مكاني ، رغم شفنا بعض هواي
لمن حاجاني و بعد ذيج الحادثة
حسيت جلدي كزبر ، صوته
الي من فترة طويلة انا ما سمعته
و انتهى اخر لقاء بيننا بـ وعد وفيناه اليوم
التفتت دحگتله
نور : ما رايحة لـ مكان
اركان : الدنيا ظلمه طلعلج شي و خرعج؟؟
نور : ما يطلعلي شي المكان نظيف هنا
اركان : امشي ارررجعي لـ البيت
نور : ليش تنتر بيه و تصيح؟
دارلي وجهه دحگلي
عكد حواجبه اتقدم عليه
اركان : ما جاي اصيح
امشي ارجعي لـ البيت لا تفترين وحدج
نور : هسه صوتك هذا مو صياح؟
اركان : نوووور
عطت بـ وجهه
بـ لحظتها دموعي نزلت ما اتحملت
نور : شبيها نور شبيها؟؟
نور الي انتظرتك تطلع
نور الي اتخيلت لقائها بيك كل يوم و كل ليله
نور الي صبرت و التزمت بـ وعدها
شبيها نور؟؟
ظل ساكت يدحگلي
گلبي يوجعني و بـ صدري خنكه و غصة
نزلت دموعي و انا اعاتبه
نور : من اول لحظة شفتك بيها بالمحكمه
من اول لحظة لحد ما طلعت
لحد ما عرفت بـ اهلك ردت اجي وياك
ما ردت اخليك لـ وحدك ردت اسندك
عطت بيه بـ نص المكان ما همني المكان
الي همني تصرفاتك وياي و طريقة تعاملك
خلصت الايام كلها اسأل روحي
اذا ضايج و معصب مني لان بسببي انسجـ..
رفع اصبعه قبل لا اكمل كلامي
اركان : لا تكملين كلمتج هااي
انا ما انسجنت بسببج لا تخبليني
نور : لعد معاملتك هااااي شنو
نترك و صياحك و عصبيتك شنوو؟
تغيرك المفاجئ هذا شنوووو؟
اركان : ليش شهدددتي بالمحكمه
ليش اجيتييي و حجيتي شحجيت وياج
شگلت الج قبل لا اطلع من ذاك المهجوم
شگلتتتت جاوبييني !
نور : هذا همك؟ هذا همك و مهمومك؟
ليش شهدتي ؟؟ ليش حتى ما اشهد ؟
شفت اهلك شفت حالهم شفت تعبهم؟
شفت ابوك شنو سوا بيهم ؟
لو باقي بـ السجن جان هسه اختك ميته
و امك و اختك الثانية الله اعلم بيهن وين
اركان : شهادة أيمن و شهادة السايق
و كلامي و دفاع مُلاذ يكفن ليش دخلتي نفسج
ما خفتي على روحج و انتِ تدخلين المحكمه
يشوفج اسكندر يشوفج شخص
ما خفتي و انتِ بين اشكال و الوان الناس!!
نور : ما خفت ما خفت
لان اعرف نهاية هذا الطريق انت
طلعتي من هذاك المكان رح تكون وياك
لو رجع الزمن و جان لازم اجي و اشهد
رح اجي و رح اجي ركض هم
عبرته و ردت اروح
وكفت بـ مكاني لمن گال وراي
اركان : اكرهيني نور
بلعت ريگي لفيت عيني دحگتله
نزلت دموعي ، هزيت راسي بـ رفض
اركان : سببت الج اذيه هواي
اكرهيني ابعدي عني لا تاذين نفسج وياي
نور : ما اذيتني نقذتني
اركان : كم مره انضربتي بسببي؟
دخلت لاگيتج مثل طير مذبوح
و الي ذبح هالطير ابوي
نور : مو ذنبك لا تلبس كلشي بـ راسك
بلع ريگه اتقدمت عليه
نور : انت مو گلتلي الحب يبدي بـ اللوعات؟
اركان : و لوعتي عليج ما مثلها لوعة
نور : لعد ليش جاي تعاملني هيج؟
ليش جاي تاذيني بـ هاي الطريقة؟
ليش تخليني احس انا بـ مكان ما مرغوبه بي؟
اركان : ما اريد اذيج انا
نور : اذا ما تريد تاذيني عاملني عدل
انسى منظري ذاك من بالك انسى
اركان : لو ما شايفج بـ بيتنا
ما جان رح يكدر يسويلج شي
نور : قدر رب العالمين !
تريد تعترض على قدر رب العالمين؟؟
مقسوم الي اكون بـ بيتكم بـ ذاك اليوم
مقسوم الي اهلي يتاخرون
مقسوم الي ابوك هيج يسوي
هذا المكتوب النا انا راضية
بـ الي كاتبه رب العالمين
راضية بـ الصار بيه و راضية بـ الراح يصير
تعترض انت على قدره ؟ عندك اعتراض؟؟
اركان : حاشى
نور : خلص انتهى الموضوع
بلع ريگه هز راسه
وكفت قريب مني دحك بـ عيوني
گال بـ هدوء عكس نبرة صوته مساع
اركان : تعالي نرجع؟
هزيت راسي بـ قبول
اتقدم وكف يمي و دحگلي
اركان : امسحي دموعج
مسحت دموعي
ظلينا ساكتين و نمشي
نور : شلون سويت رجلك؟
اركان : الدكتور ساعدني
نور : يا دكتور؟
اركان : أيهم
نور : يا شلون ساعدك؟
اركان : انا اعرفهم من قبل
بس مو معرفة قوية بس أيمن اعرفه زين يعني
فـ هو الدكتور عرض عليه يسويلي عملية
بـ البداية رفضت بعدين گلي تسدد دينك و قبلت
نور : احسن الك من العكازه
اركان : اي
وصلنا لـ البيت دحگنالهم كاعدين
اجاني عزيز يركض يسأل وين رحنا
گلتله جنا نمشي و رجعنا
غاده : فحطتوني اجيب واحد يختفي الثاني
صارلنا ساعة منتظريكم
ضحكنا اتقدمنا كعدنا ع البلوكات الي مخليها
و بـ النص شاعلين نار
أيمن : ابو الهمم غني النا
باهر : لك ااااي
غاده : اي صوتك حلو بـ عرسنا غني
أيهم : اهو شني اتفعل وضع المسجل ؟
اركان : دشمرلنا اغنية من يمك
مُلاذ :-
طلع أيهم باكيت الجكاير
اخذ جكاره و گام يدخن
لينا كاعده يمه لازمه بـ ايده حيل
أيهم : شنو اغني الكم؟
باهر : بكيفك
كاعدة بـ ظهر جسار ، أيهم وكع نظر عليه
اتحمحم حك لحيته گال لـ باهر الاغنية
شغلها باهر بـ التلفون و نصى صوتها
اتوضح صوت الموسيقى ، من بعدها صوت أيهم
أيهم : آهٍ على قلبٍ هواهُ محكمُ
صعب الجوا منهُ فـ ظلماً يكتمُ
ويحي أنا، بحتُ لها بسرهِ
أشكو لها قلباً بـ نارها مغرمُ
ظل نظره عليه و رافع راسه
بلعت ريگي و هو كمل بـ صوت غنائي
أيهم : و لمحتُ من عينيها ناري و حرقتي
قالت على قلبي هواها محرمُ
كانت حياتي ف لما بانت بنأيها
صار الرضا أهٍ عليا أرحم
قشعريره صابت جلدي تحت اثر نظراته
حولت نظري ع كل الكاعدين
مرتبكه خاف يشوفون نظراته الي
رجعت عيني عليه و هو كمل الاغنية
نزل الجكاره من بين شفايفة و طفاها
شكد يدخن اربعه و عشرين ساعة يدخن
يريد يفلت ايده من لينا ماتقبل تهده
اركان : تعرف اغنية دروب السفر؟
أيهم : طبعاً
اركان : اشمرلنياها
أيهم : كله شمر
اركان :هههههههه
شغلوا اغنية دروب السفر
هم بـ صوت ناصي ، گمنا نصفك
و أيهم يغني
أيهم : صَغِيرَة كُنْت وَأَنْت صغيرون .
الحُبّ عَرَفْنَا بِـ نَظَرَات الْعُيُون
گالُوا تَرَى ذولا يُحِبُّون
و مِنْ الصِّغَرِ لِمَا يُكَبِّرُون .
مِثْل نَجْمَة وَالْقَمَر ، كَبَّر حُبّنَا وازدهر
بـ عيونك حَبِيبِي ، نَبْتَدِئ دُرُوب السَّفَر
دحگت لـ اركان و نور
ابتسامة على شفتي نظرات اركان الها
و هي تهرب عيونها منه و مبتسمه
صفكنا ايدينا ببعض تمايلنا و احنا كاعدين
-للاي لاي للاي لاي لاي للي لاي
اجواء لطيفة باردة
مكان مشحون بـ المشاعر و الحب
ظلمه تحتضنا و كل شخص هنا كاعد
يمتلك قصة من طفولته لـ هاي اللحظة
النجوم مضوية علينا و مجملة السما
ظلينا هيج كاعدين هواي
البنات يسولفن و التمينا سويه
و الولد هم نفس الشي التموا سويه وحدهم
أيهم ما كعد يم الولد كاعد وحدة
و لينا يمه تلعب بـ شعره و لحيته
ساكت و نظره على جكارته الي بـ ايده
جنت قريبه عليهم الباقين يسولفون و مندمجين
انا ساكته و صافنه لذالك سمعتهم بلا قصد
أيهم : لينا كافي
اتجاهلت كلامه باست خده
رفع راسه متنرفز
رجعت نزلت راسه بـ ايدها
أيهم : كافي لا تفلتين اعصابي
لينا : أبيل نايم
أيهم : نوم العوافي
لينا : تعال شويه وياي
أيهم : لينا
لينا : اتمنيت مره تجي انت و تگلي
شبيه شناقصني ؟؟ ليش ما تطلب منييي
أيهم : لينا صوتج عالي و كاعدين برا
سدي هالموضوع
لينا : جاوبني ليش
اكو فد غلط بيه شو ...
حجت حجي صفنتني
غميت روحي شكو اسمع صوتهم
بس المصيبه صوتهم ينسمع و انا قريبه
لينا استحيت بدالها فصلت روحها تفصال لـ أيهم
أيهم : لا تلحين
لينا : بس اليوم
أيهم : روحي نامي ما نعستي؟
لينا : لا ما نعست يلا أيهم
أيهم : لينا لا تلحين عليه بهالموضوع
صارلنا سنين و انتِ كل يوم تعيدين و تسقلين
انه ما اريد خوش؟ لا تلحين هاهيه
تريدين تطلكي و تنازلي عن ابيل و شوفيلج غيري
لينا : ليش بس تررريد تخلص مني
اريددددك انت ما اريد غيرك
أيهم : هسه صرتي ترديني؟
و الحارس؟ و يوم ١٠/١٤ ؟ لينا كومي عني
لا تخليني اطلع غضب الدنيا بيج
فتحت حلگي لان افتهمت قصدة شنو
او ممكن مو مثل يلي بـ بالي
دحگت لـ وجهها انسحب لونه
بلعت ريكها و كامت من يمه بـ هدوء
عافته و دخلت جوا اندار أيهم دحگلي
درت وجهي عنه
أيهم : هتانيزو
طفرت من يمنا هتان ركضت اله
هتان : يَممممم
ضحك و هي راحت كعدت يمه
حضنها لـ صدره و ظل يمسح على شعرها
باس كصتها باست خده و اجت يمنا
هتان : رح اروح يم ذيج المرجوحه
تجن وياي ؟
ليان : انا نعست رح ادخل انام
لالي : انا مالي خلك
مُلاذ : و لا انا
نور ظلت صافنه ما جاوبت
غاده : انا اجي وياج
راحن هي و غاده
ليان كامت دخلت البيت
عزيز : يلا شباب انا اترخص
سلطان : خل اترخص وياك
دحگت لـ عزيز وسلطان دخلوا وراها
كام اركان همين وبدأ المكان شبهه يفرغ
جسار بقى كاعد يم النار
غاده و هتان يم الشجره
صافيناز و ملاك دخلن قبلنا نامن
أيمن هم دخل جوا ، باهر يم جسار
نور كامت و دخلت هي هم
خلوني كاعده وحدي
انا و خيالي صافنين على بعض
بس طبعاً أيهم لازم يشاركنا الكعده
أيهم : ليش كاعده وحدج؟
مُلاذ : احسن
ظل واكف و يدحگلي
هزيت راسي اله بـ معنى "شكو؟"
أيهم : يلا كومي و اشردي مني
شعجب مرت دقيقة و انتِ بمكانج
نفخت بـ ضجر و كمت
دخلت لـ البيت بعدني ما داخله
رداني انجرت دحگت لـ أيهم
يلي يجر بـ رداني و يمشي
مُلاذ : شترررريد
أيهم : اش
مُلاذ : أيهم عوووفني
أيهم : حسج اكطعي
صعدنا فوك و انا اركض ع الدرج
و هو يجر بيه من رداني ، خاف واحد يشوفنا
فتح باب وحدة من الغرف : ادخلييي
دخلت فتح ضويات خافته
دحگلي و اتقدم نحوي عاكد حواجبه
أيهم : انتِ شسالفتج؟
مُلاذ : شسااااالفتي؟
أيهم : كل دقيقة الگاج يم جسار
لو يم سلطان لو اركان !
مُلاذ : انت شجاي تحجي
أيهم : مُلاذ لا تطلعيني من طوري
من الصبح لسا تفترين و كل ساع تحاجيلج واحد
اعصابي مردتيها مرد انتِ
مُلاذ : شعليييه بـ اعصابك
شبيك خبل انت؟؟؟
كز على اسنانه
أيهم : خبل الله مخبلني
عقل ماكو بـ راسي خوش؟
مُلاذ : على روحك
ردت اطلع وكفني
سوالي حركه بـ ايده بـ معنى "هلكد"
أيهم : ما صارلج شعور الي ولو هلكد ؟
بلعت ريگي حسيت لساني انبلع
اتذكرت كل لحظاتي وياه و اهتمامه
و كلامه و معاملته الي
شعور قذر مكروهه حسيته بـ داخلي
بـ عمري ما حسيت بـ هذا الشعور
و لا اريد احس بي
أيهم : ليش ما تجاوبين؟
مُلاذ : ما صار عندي اي شعور اتجاهك
أيهم : نظراتج ما تگول هيج
مُلاذ : انت متزوج كافي تحـ...
قاطعني قبل لا اكمل
أيهم : لو جنت ما متزوج رح ترضين بيه؟
دحگت بـ عيونه ريحة عطر ابوي الي بي
بـ كل مره احاجي اشمها بي مميزه و مختلفه
تصرفاته يلي تخليك تحس غصب
بـ الحنية و الامان
مشاعر حسيتها بس بـ وجود ابوي
و اتكررت بـ وجود أيهم كرهت هالمشاعر
بعد ما كنت اتمنى احس بيها مره ثانية
مُلاذ : لا ما رح يتغير شي
أيهم : نظراتج و عيونج و صوتج
كلهن ما ينطقن بـ اللي تنطقي
انه الحافظج تريدين اصدك جذبتج؟
مُلاذ : انت متخيل ابني حياتي
على تعاسة شخص ثااانييي؟
مستحيل أيهم لو اموووت مستحييييل
اضافة انا خالية من كل شعور اتجاهك
طلع هالشي من عقلك انساني
تركته و طلعت ، وكفت بـ مكاني اجر نفس
رحت لـ الحمام و غسلت وجهي بـ مي بارد
دحگت لـ روحي بـ المراية وجهي احمر
عصرت شعري بـ ايديه و همست
مُلاذ : ديربالج ديربالج مُلاذ ديربالج
بلعت ريگي مسحت وجهي
طلعت رحت لـ الغرفة تمددت يم ملاك
گلبي يدك حيل مسحت وجهي بـ ايديه ما اريد افكر
درت وجهي و ظليت اتگلب احاول انام
غاده :-
كاعدين و نسولف انا و هتان
انصدمت لمن عرفت بـ أيهم متزوج و عده جاهل
سألت هتان عن مرته لان تصرفاتها مو طبيعيه
هتان : انجبر عليها زواج تقليدي
غاده : يعني هو ما جان يريدها ؟
هزت راسها ب رفض : ابد ما جان يريدها
غاده : هاه ؟ و شلون تزوجها؟
-كل يوميه طلابه هو و بابا
البيت يگب بي العرك للستار
تالي طلع و عاف البيت
راح كعد ببيت وحده ، امي رجعته بالتواسيل
غاده :و بعدين؟
-تالي فد يوم طب نار و شرار صاير
عيونه حمر وجهه احمر دم
هالحجي ورا سنه و نص يمكن
من عركته هو و ابوي
صح كانو كل يوم يتعاركون
بس ذيج ما تتخيلين ايهم شصار بي
من اجا وضعه ما جان طبيعي ابد
گال وين امي گلناله بـ غرفتها
دخل يمها و طلع وجهه ما يكصه الطبر
گبل طلع من البيت طلعت امي ورا تهلهل
سألناها شكو گالتلنا ايهم قبل يتزوج لينا
كلنا انصدمنا شلون و ليش محد يدري
غاده : ابد معرفتو السبب؟
-ابدددد حرفياً جان رافض بـ شكل يتزوج
الدنيا حاركيها هو و ابوي ،
اصلاً من تزوجو رايح نايم بـ غرفة ثانية
غاده : يا لعد شلون خلف أبيل ؟
-كل يوم جان يكب عياطهم بليل و لحد هسه
هو ما يريدها و هي لازكتله
ظلوا فوك الـ ٤ اشهر على هذا الوضع
تالي ما تالي صبحنا مصباح نسمع صياحهم
متخبل يكلها انه ما متدنيلج
ما داخل غرفتج شجابني هنا و هي تصيح
منو واشم حرفها بـ صدرك
كضها كتلها ما خلا عظم بيها صاحي
غاده : و حيييييل من اغدي فدوة لـ طوله
-هههههه انجبي
غاده : و شصار بعدين ؟
-عرفنا بيها حامل
اتدهورت حالة ايهم كلش بـ ذيج الفترة
و گال خاينته و هي تحلف و تتكفر ما خاينته
خلاها بـ البيت و راح هو كعد بـ بيته
من ولدت يلا اجا و گام ايهم
سوا تحليل ابوه مدري شنو و طلع ابنه
غاده : من فلك طرها مو مره كارثة
جا شلون حملت شنو بـ التواصل البصري
خو ما بـ التواصل البصري ؟؟
هتان : ههههههههه ولج لا
هي هاي طايحة الحظ مشتريتله دوا
يخليج ما تدرين شتسوين
و تطيعين اوامر الشخص الكدامج
ما ادري منين جايبته و مشربته وي كاسة جاي
لطمت على وجهي مصدومة
احس رجليه بادن من هاي فرعون مو بنيه
غادة : يااااااااااا ، شلون عرفتو زين؟؟
هتان : لكيت عدها شريط الادويه
و انه انظف غرفتهم من بحثت عنه
عرفت اعراضه حصرتها و حجت
غادة : زين ليش ما گلتيله؟؟
هتان : توسلت بيه علمود أبيل
و جان ابيل صغير عمره ٧ اشهر يحتاج ام يعني
من گلت لـ امي هي هم سكتتني ما خلوني احجي
غادة : يمه گلبي راح يطك
الله يساعدك ايهم ، و هم ظلوا ع مشاكلهم ؟
هتان : صارت اقوى من قبل
هو بـ غرفة و هي بـ غرفة
مرات تطلع اصوات صياحهم من غرفته
لان تروحله هي و هو يتسودن ما يريدها
غاده : كرامتها منجطلة بـ الكاع و تلطم
-لج بس تلطم
غير كرامتها دتركع روحها بـ الكاع
غاده : زين ليش ما ظل كاعد بـ البيت الجان بي؟
-امي توسلت بي يرجع و يكعد يمنا
امي تحبه كلش شكم مره تتمرض و توكع
لان هو مو يمها و تظل قلقانه عليه
اخير شي رجع كعد يمنا و هم علمود أبيل
ما يكدر يخلي ما مستقر و كل يوم يودي و يرجعه
غادة : من فلك فلكها كون
ضحكت هتان
غاده : زين ليش هيج شجاه؟!
هتان : ما يتحملها ما اعرف ليش
بس اعرف ايهم گلبه معلك بـ وحدة
حتى هي بـ يومها جانت متخبله
شلون واشم حرف بـ صدره
هو انه مادري بـ الوشم التحجي عنه
غاده : يما منو هاي؟
هتان : انه اعرف من زمان
جنت اشوفه يتلوى تلوي على بنيه
يجي مرات للبيت ادخل للغرفة
الكا يعاين لـ فد صورة من ادخل گبل يضمها
غاده : خطيه احس متاذي بـ حياته
هتان : كلش
قاطع سوالفنا باهر
باهر : ما ناويت تنامن
غاده : و الله انا ناويه
باهر : يلا كومن خل ندخل
هتان : كمنا
دخلنا جوه و رحنا نمنا ...
مُلاذ :-
مر ثاني يوم كعدنا تابعنا افلام
و سوينا فعاليات كمنا نطبخ سويه
انا و البنات و الولد يشوون سمج برا ع الفحم
كان احلى من اليوم يلي قبله
أبيل يفتر بيناتنا و أيهم يسوي عود أبيل طياره
يشيله و يفره علينا نظل نضحك ع تصرفاتهم
مرة أيهم ايتمرت بـ تصرفاتها و انا عطبت
بس اغم روحي و اگول "شعليج انتِ مرته وحقها"
لعبنا دومنه سويه
و حجره ورقة مقص و الجوائز فلوس
أيهم بـ كل مره يفوز على الولد هو و أيمن
خلصوا فلوسهم و ذوله يدكون و يلطمون
نكعد و نسولف ساعات و نتناقش
و نكعد يم النار برا نصعد بالمرجوحه
ايام لطيفة حسيت صارت الها عطر خاص
كل ما اتذكرها ابتسامة تسري على شفايفي
خصوصاً لمن شفت ملاك متونسه لـ ابعد حد
اخوات اركان متونسات
و صافي الي كل دقيقة الگا أيمن يمها
نور الي فرحتني لان صارلها يومين ما بجت
بعد ذني اليومين رجعنا لـ بيوتنا
دخلت تمددت على فراشي تعبانه
دخلت ملاك غرفتي تركض
ملاك : مُلاذ
مُلاذ : ها؟
ملاك : نسيت تلفوني بـ بيت المزرعه
مُلاذ : تحجييين صدك؟؟؟
ملاك : و الله مُلاذ حبابه باجر جيبي
مُلاذ : خرب فهااااوتج ولج شيجيبه بعد
منين اجيب مفتاح البيييت ؟
ملاك : حبابه مُلاذ حبابه
زفرت نَفسي و انا معصبة منها
هزيت راسي بـ قبول تركتني و طلعت
غفيت كعدت ثاني يوم الصبح بدلت
رحت لـ محل الورد و محل الحلويات
شفت مخلصين اغلب البنيان و باقي اشياء قليلة
اتذكرت تلفون ملاك اتصلت بـ غاده
غاده : هلو ميمي
مُلاذ : ها عيني اگلج غاده
غاده : كولي
مُلاذ : ملاك ناسيه تلفونها بـ بيت المزرعه
اريد اروح اجيبه بس ما عندي المفاتيح
غاده : يااااا شجاها و نوب بيت المزرعه بعيد
مُلاذ : هاي بعد الثول صابها
غاده : البيت مفتوح اصلاً
لان اليوم طلعت مره تنظفه
البارحه باهر گاللهم و اليوم طلعوا ينظفونه
مُلاذ : ها يعني اكيد مفتوح
غاده : اي مفتوح اكيد
مُلاذ : تمام عيني
سديت الاتصال منها
اتصلت بـ صافيناز بلغتها اتاخر ع المكتب
صعدت بـ سيارتي و طلعت ع الطريق
لـ بيت المزرعه ، بعد فترة من مشي متواصل
دخلت بـ طريق فارغ كله خضار
و انا اسوق نظري ع الطريق
ركزت عيني على المرايات
دحگت لـ سياره تلحگني عكدت حواجبي
وخرت من كدامها حتى تعبر بقت وراي
تعلمت معناها لاحگيني و لازم اتصرف
جريت التلفون بسرعه اريد الحك اتصل
عبرت السيارة صفت كدامي
دحكت بـ المرايه صفت سياره ثانيه وراي
بلعت ريكي ، نزلت عيني لـ التلفون
بـ لحظتها نزلوا مسلحين من السياره
اتجهوا نحو سيارتي يركضون
اول اسم طلع كدامي أيهم اتصلت عليه بسرعة
رفعت ايدي اريد اقفل الباب
انفتحت باب الصدر و انفتحت باب السايق
عطت بيهم ما ادري منين اطلع
كمت ارافس و اصرخ بيهم و هم يثبتوني
حسيت ايد غطت حلگي و خشمي
ما استغرق الا لحظات عيوني بدت تنغلق
فقدت السيطرة تدريجياً ،
اتسلط الظلام مثل الستاره على عيوني
فقدت وعيي ...
- يتبع الفصل التالي اضغط على ( رواية جرح الأيهم ) اسم الرواية