رواية جرح الأيهم الفصل الخامس و العشرون 25 - بقلم أيلان
"الجُــرح الخامس و عشرون"
"ياهوه الگالك عوف اهلك و روح
تراب المگبرة بالليل بارد
حضن امك الدافي بـ جمرة العوز
يفكر بيك وين اليوم گاعد ."
مُلاذ :-
اتقدمت عليه ادحگله
مد ايده يسلم ، سلمت عليه
مُلاذ : أيمن مو؟
أيمن : اي
مُلاذ : انت مو اخو أيهم و باهر ؟
شفتك بـ العرس
أيمن : اي صحيح
مُلاذ : منين تعرف اركان؟
قاطعنا ضرغام الواكف
ضرغام : لو نكعد و نسولف مو افضل؟
مُلاذ : اي ، اتفضل
اشرتله على القنفة ، اتقدم كعد
دخلت صافيناز تقدم اكواب الجاي
دحگت لـ أيمن يلي عينه عليها
التفتت الها و گلت
مُلاذ : شكراً
هزت راسها بـ قبول مبتسمه ، طلعت تاركتنا
رجعت نظري على أيمن كعدت على القنفة الكدامه
ضرغام كعد على القنفة الثانية
مُلاذ : ضرغام
ضرغام : نعم
التفتت و بـ ايدي قلم افر بي
مُلاذ : اذا حجينا هنا اشياء
ممكن تنجبر تسكت عنها رح تسكت عنها؟
ضرغام : قبل لا تحجين جنت ناوي اروح
صحيح اريد اساعدكم بس ما اريد اخون شغلي
أيمن : لا تخافون كل يلي صار
ما رح يخليك بـ موقف تنجبر بي تخون شغلك
او يخليك تنجبر تسكت رح احجيلكم كل شي
مثل ما هوَ
هزينا راسنا بـ قبول
مُلاذ : منين تعرف اركان؟
أيمن : جمعنا موقف يخص والده
مُلاذ : اكدر اعرف الموقف؟
أيمن : ابوه و ابوي يعرفون بعض
معرفة سطحية او قوية ما اعرف
حضر وي ابوه بـ مرة و جنت موجود
تعارفنا على بعض وقتها و تبادلنا الارقام
مُلاذ : شنو علاقة اركان بـ ابوك؟
أيمن : اجهل السبب مثلج
مُلاذ : زين شنو سبب حضوره ؟
أيمن : ابوي كان عازمهم بـ مطعم
و شدد على ابوه يجي ابنه وياه
مُلاذ : سبب العزيمه ؟
أيمن : محهول
مُلاذ : ليش رحت؟
أيمن : بـ طلب من ابوي
حتى أيهم و باهر كانوا موجودين
عكدت حواجبي مستغربة
بـ كل لحظة انصدم بـ وجود أيهم
طلع اخو باهر و هسه أيمن اله علاقة بـ اركان
أيمن : هم ما اتعرفوا على اركان
بس انه اتعرفت عليه و قويت علاقتي بي
مُلاذ : حلو ، شصار بعد ما اتصل عليك
بـ الليلة يلي قتل بيها ابو او حاول قتله
و اتوقع تعرف السبب او لا؟
أيمن : بعد ما اتصل رحت الهم
و شفت ابو اركان رفعناه و اخذنا للسيارة
و طلعنا بي للمستشفى و حتى أيهم العالجة
لَكن ابو اركان دخل غيبوبة اركان اجو اله الشرطه
اعترف بـ نفسه هو يلي طعن ابوه و اخذوا
بقيت يم ابو في حال يصحى بـ يوم طلعت و رجعت
لگيت ابو ماكو سألت أيهم ما يعرف وينه
دورنا بالكاميرات لگينا طلع من المستشفى
هو يحجي و انا اكتب
رفعت عيني دحگتله
مسح على لحيته و كمل
أيمن : صورت فيديو راويته لـ اركان
مُلاذ : شلون راويته اله و هو بالسجن؟
أيمن : دخلت تلفوني بدون ما يدرون
ضرغام : شلون دخلت تلفونك؟
أيمن : طرقي الخاصة
مُلاذ : اممم ، حلو اريد اشوف الفيديو
بس قبلها ليش راويته لـ اركان؟
أيمن : حتى اراوي ابو عايش
لان ظن انه اكذب عليه
حجا و طلع تلفونه يدور بي
درت وجهي دحگت لـ ضرغام
ضرغام يدحگله بـ استغراب
فتح الفيديو و داره النا
قدمنا ظهرنا نشاهد الفيديو
دحگنا لـ الفيديو
ضرغام يريد يشوف رقم السيارة
بس مو واضح كلش لذالك اخذ اوصافها
و اتصل بـ شخص و بدء يوصف اله
اخذت التلفون من أيمن ، مدنكه و مركزه
لحد ما كدرت اقرء رقم السياره
و الباقي ما كدرت اقراه بـ وضوح
گلت لـ ضرغام ، گال للمتصل رقم السيارة
اكد عليه حتى يلگونها سد الاتصال
رفعت عيني لـ أيمن
اخذ تلفونه و رجع كعد بـ مكانه
مُلاذ : ليش اتصل اركان عليك؟
أيمن : يثق بيه يمكن لان علاقتنا قوية
ضرغام : بس تبقى جريمة سكتت عنها
أيمن : ما سكتت عنها و لا شاركت بيها
كل السويته نقلت والد اركان بـ سيارتي
مُلاذ : رح تشهد لـ صالح اركان؟
أيمن : لا
دحگتله مستغربه ، ضجت
انداريت لـ ضرغام يلي اندار الي و دحگلي
بـ نفس النظرات و نظرات اليأس
فزينا على ضحكة أيمن بـ صوت عالي
أيمن : ههههههههه شبيكم رح تبجون
يابه طبعاً اشهد لـ صالحه هذا هم سؤال
حكيت راسي و ضحكت
ضرغام هم ضحك ، بس نريد نبلع خرعتنا
بلغت أيمن بـ موعد المحكمه الجايه
اكد الي راح يجي و راح يشهد لـ صالح اركان
اتشكرناه و ودعناه تركنا و طلع
وكفت بـ مكاني و تخصرت رفعت راسي
ذبيت نفس دلاله على الراحة
ضرغام : اتقدمنا خطوة
مُلاذ : و رح نتقدم بعد الف خطوة
لحد ما يطلع اركان من السجن و نلگا اهله
ضرغام : شنو غاية ابوه من سوا هيج؟
مُلاذ : الناس السيئين هواي بـ الحياة
مثل وجود الناس الزينين اكو مو زينين
ابوك ، امك ، اخوك ، اختك ممكن يكرهوك
هاي مشاعر ما يكدرون يتحكمون بيها
ممكن يحقدون عليك بلا سبب
ممكن يغارون من صفاتك الزينه و يتمنون امتلاكها رغبتهم هاي تعمي عيونهم عن منو انت!
اتقدمت كعدت على الكرسي
كملت و انا اقدم الكرسي على الطاولة
مُلاذ : اركان واحد من الناس الزينين
كل جيرانهم و احنا من ضمنهم مدحوا اركان
بس ما مدحوا ابوه حَبوا اركان بس ما حَبوا ابوه
حزنوا و فرحوا لـ اركان
بس ما سوو نفس الشي وي ابوه
حس بـ النقص و يمكن الغيرة من هذا الشي
حاول يخلي اركان بـ وضع سيء
كرهه يكون اركان مرتاح و الناس كلها ويا
راد هو يكون ضده و يكون سبب بـ اذيته
و هسه كل فعلته هاي حتى يأذي اركان .
ضرغام : خوش فسرتيلي الموضوع
كلامج صحيح ١٠٠٪
العائلة مرات تكون مصدر اذيتك
على الرغم همَ المفروض يحتوونك و يحبونك
و يبعدون كل اذية عنك لَكن المشاعر و الغيرة
ما تعرف لا ابوه و لا امومه و لا القرابة
مُلاذ : بـ الضبط
گام ضرغام وكف لبس بيريته ، دكلي تحيه
ضحكت ضحك وياي ، گمت من مكاني
هو طلع ودعته و رجعت دخلت كعدت
رفعت عيني لـ صافيناز يلي دخلت
مُلاذ : شمالج اختفيتي
صافيناز : ما بعرف بس كعدت هناك
مُلاذ : ههههه يول صايره تحجين عراقي
صافيناز : تعلمت عاد خالتو
مُلاذ : يولي يولي فداوي هههههه
ضحكت و راحت لـ المطبخ
مكاني هذا مو دائم و ادور على مكان زين
حتى اخلي صافي مساعدتي بي
اجت صافي تحجيلي عن الموكلين و مواعيدهم
هزيت راسي بـ قبول و هي كعدت يمي
هكذا مر اليوم رجعت بالليل لـ البيت
خليت المسواك ع الكاونتر
دخلت لـ غرفتي بدلت ملابسي
لميت شعري ، دحگت لـ وجهي بـ المراية
"و في صبحٍ.. وقفت امام مرآتي
و قد بانت على وجهي خساراتي
آرى شخصاً على المرآة يكرهني
وما اقساه كره الذات للذات .."
درت وجهي كارهه شكلي
كارهه ملامحي و انعدام الشعور الي بداخلي
افتقد نفسي القديمة لَكن بـ داخلي شي
يگلي ظلي هيج لا ترجعين و تحاولين
كانت المحطة الاخيرة من التعب و الخيبه
دخلت سبحت ظليت جوه المي صافنه
تنزل قطرات المي البارد على جلدي
تزيد من برودة جسمي بـ هذا الجو
مسحت وجهي ، رفعت راسي
نزلت قطرات المي الغزير على وجهي
كملت سبح ، طلعت من الحمام
رحت لـ امي دحگتلها كامت كعدت على حيلها
فيروز : شوكت رجعتي؟
مُلاذ : ما صارلي هواي
فيروز : شعرج منگع ؟
مُلاذ : سبحت
فيروز : باردة عليج نشفي
مُلاذ : هو رح انشفه
اجيت اشوفج خاف تحتاجين شي
فيروز : لا يمه رايده سلامتج
مُلاذ : الله يسلمج فوفو ، ملاك شوكت نامت؟
فيروز : قبل شويه غفت
مُلاذ : باجر اذا ما كعدت من اول مره
اخرطها من الجرباية و علي
فيروز : هههههه لا تكعد تكعد
مُلاذ : زين فوفو يلا تصبحين على خير
فيروز : اجمعين عيني
تركتها و طلعت امشي گوه على رجليه
فتحت اللفاف منهن و كل اليوم افتر بـ الكعب
ظلن يوجعني و نزف كم جرح بيهن ، دحگتلهن
ما ادري شسوي ، ظليت صافنة و ادحگلها
لفيتها بـ باندج و عفتها ، تمددت
ثاني يوم حاجيت ضرغام
گال بعدهم يدورون ع السيارة
بـ نفس اليوم اجونا اهل اسكندر
هم اتقدموا الي و اشوف امه شلون ما عاجبها
هو چنه راس بصل كاعد بـ نصهم
و يحاولون يقنعون بـ امي بلا موافقتي
مُلاذ : عمي شكم مره اگول
ابنك انا رافضته هاي المره الـ13 ترا
تعبت من كد ما رفضت
اسكندر : انتِ سدي حلگج
اعرف كلش زين تريديمن !
مُلاذ : اريدمن اريددددمن ؟
اموت اسكندر اموت و ما اتزوجك
لو يصبوك من ذهب لو تنزل بيك ايه
ما اقبل بيك و لا اريدك اعتقني
علياء : شلون لسان زفر
مُلاذ : مثل لسان ابنج
فيروز : مُلاذ روحي لـ غرفتج
مُلاذ : ما اروح لـ غرفتي
ماااا اريدك شسوووووي بعد
عوفني اعتقني كافي عااااد !
ملاك :-
طلعت من غرفتي ادحگلهم
و اسمع صوت صياح مُلاذ بـ عصبية
فد انقهرت عليها شكد ترفض
اسكندر منطيها الاذن الطرشه يرجع يتقدم الها
امي الف مرة فشلتهم و گلتلهم رافضين
هم رجعوا و اجونا ، قَبل كانت تجي بس امه
هسه هو و امه و ابوه و اخوه
اعرف عزيز جاي غصب
حتى ماله خلك يحجي و لا يجادلهم
عمو لازم اسكندر ، مُلاذ تصيح و هو يصيح
كل ما علا صوت اسكندر علا صوت مُلاذ اكثر
مُلاذ : انت ما الك اي علاقة بية! انت م..
قبل لا تنهي جملتها
رد عليها بـ صياح
أسكندر : الي دخل و اكسر راسج!!
اتقدمت صرت بينهم اسكندر و امه
يفشرون على مُلاذ و امي تعيط بيهم
مُلاذ اتجننت اتقدمت رافعه ايدها و تصيح
رايدة تروح عليهم لازميها گوه
و هيه لازمه بـ ايد امي تريد تفلتها
انا شبعت رفسات و كفخات
كل كفخه و الثانيه تجيني منها بلا قصد
هي تحرك بـ ايديها منفعله ، ابلعها و اسكت
هسه تحطني تكتلني و علي ، ابد ما بيها مجال
رجعت ردت هي تصيح و هو يصيح
اذاني صار بيها ارتجاج
مُلاذ : تكسر راس منو؟؟؟
مصدك روحك انتَ؟؟
جاي تشستشرف بـ راسي !
صاحت بـ صوت اعلى فززني
رافعه اصبعها تحجي بـ ثقة
مُلاذ : ما ولدته امه الي يمد ايده عليه
عبر اسكندر ابوه ، نريد ندفعه
بـ حركه سريعة ضرب مُلاذ راشدي !
انا هنا انصدمت ،
عرفت القيامة رح تقوم على راسه
و الطلابه راح تكبر اكثر
رفعت راسها نار تتطاير من عيونها
ايدها على خدها اعرف مُلاذ
ما تظل هيج مفهيه و مصدومه
تتصرف بـ ردة فعل سريعه
لذالك اخذت حذري ابتعدت من كدامها
لان كفخه زايده ما اتحمل
فيروز : اسكنددددر اطلع برا
رجعت عيني على مُلاذ
قوة شخصيتها و تصرفاتها تخوفني مرات
اقوى المواقف ما تبجي بيهن
هذا الي يخليني مصدومة منها
انا لو احد رفع صوته عليه بجيت
بس هي مستحيل تنزل دمعتها !
اذا ما طلعت حرگة گلبها ..
و اذا ما ردت الاذية اضعاف
هسه اذا وكفت كدامها يأنبني ضميري
لان ما طلعت حرگتها بـ اسكندر
اموت من حرگة گلبي اذا ما شفت مُلاذ تدوفه
رفعت نظري الها مبتعدة خطوات لـ ورا
هي هجمت ع اسكندر تصيح بـ حرگة اعصاب
رفعت تحفيه من يمها شمرت اسكندر
وخر بسرعة طاحت بـ الحايط
امي و عزيز لازمينها
دحگت لـ عزيز خطية ، اندمغ دمغه معدله
ذيج الي تردلك ذاكرتك اذا فقدتها ،
او تفقدك الذاكرة اذا ما فاقدها
اجيت اضحك و تذكرت جدية الموضوع
حصرة الضحكه اصعب من حصرة البجيه
طربتني مُلاذ بـ غلطها ع أسكندر
مُلاذ : لك اكسرهاا لـ ايددددك
انت منو نكره، طايح الحظ ، ابو العرك
منو انت تضربني ، حثالة !!!
ابو اسكندر جر اسكندر يريد يطلعه
ذاك عكد حواجبه رد على مُلاذ سحل شعرها حيل
نبتت اظافيرها بـ ايده و بـ ايدها الثانية
ضربته راشدي خدي كام يوجعني من يمي
كمزت الوح شعره ملخته مثل ما ملخ اختي
عمي : لج ملاااااك عوفي شعره
انداريت عليه مبتسمه ، گلت بـ برود
صوتي ما ينسمع من صياح مُلاذ على اسكندر
ملاك : شبيك عمو غير اوخره
عمي : اييي وخري وياي بنيتي
ملاك : من عيني
كمزت لزمت ياخته و جريته منها
شبعته تصفك على علباته عود اوخره
هو يتعارك وي مُلاذ و انا اصفك بي
عزيز ساندني لزمنا بـ ياخته
هو يحجي و اسحل ياخته حيل
بحيث القميص يخنك بلعومة و يختنك
بس هو صامل يكمل عرك عاط بـ ألم
لمن مُلاذ عبرت امي و خرمشت وجهه
من حلكه لحد حنجه
ابتعدت خطوات لمن انكسرت مزهريه
ما ادري منو الكسرها
رحت وكفت الزم مُلاذ لان حيل تاذت
اعرف هذا صياحها وجهها صار احمر دم
صوتها راح و شحرج تحول نظري على ايدها
الي تصب دم ، كلنا فزعنا بـ خوف
هي حتى ما مدركه لـ نفسها ،
تاركه ايدها تجري دم بـ غزاره
ملاك : مُلاذ مُلاذ ايدددج
مُلاذ كافي اهدئي حبابه
ادحگلها على فد صيحه و علياء خبلتها
امي تلزم بـ ايدها ، تريد توكف الدم
مُلاذ تعت ايدها حيل و يزيد الدم
فيروز : ولج مُلاذ ولج يمه ايددددج
كامت امي تلطم على وجهها
دموعي تصب من خوفي عليها
مُلاذ : انت مالك علاقه بيه
انت ما تكدر تدخل بيه !
اسكندر : ادحس النعل بـ حلكج
اطلعلج گلب ثاني و الله اربيج على ايدي
مُلاذ : اكسرها لـ ايدك قذذذذر
ابو الـ**** ترباية ألياس تشرفك
و تشرف عشره مثلك ، ربي روحك اووول
لو تموت لو شما تسوي ما اقبل بيك
صاحت امي على اسكندر
فيروز : كافيييي كافي اسكت
ايدها راح تموت ، يمه اروحلج فدوة اوكفي
الشك قريب على الشريان يمه مُلاذ لا تصيحين
انتبهه اسكندر لـ ايدها ، فتح عيونه بـ وسع
ركض يثبت مُلاذ ، يريد يحط وصله ع ايدها
دفعته و ضربته راشدي حيل خده صار طبع احمر
شبعته راجديات و هو يتغاضى يرجع يخلي الوصله ابصم بـ العشره خاف يصير بيها شي
و تطيح بـ راسه ، ما خايف عليها و لا علمودها
مُلاذ : قذرررر وصخ انت منو تضررربني !
منو تمد ايدك عليه اطلع منااااااااا
اسكندر : كافيييي اسكتي
ايدج لج ايدج كافي
عتت ايدها حيل صاحت بي
مُلاذ : عووووووفني
دفعت صدرة انضرب ظهره بـ الحايط
انتبهت الها شلون دارن عيونها ، غمضتهن حيل
نزلت نظري لـ ايدها التنزف قبضتها قوي
نَفسها الي يتسارع وجهها احمر
كل الدم اتجمع بـ وجهها عبالك
ركبتها مشخطه و تجري دم ،
كصتها بيها جرح واضح مال قبل اسبوع
راحت عليه بـ خطوات ثكيله
كالت بـ حرگة دم توضح النار الي بـ گلبها
مُلاذ : عساك ينحرك گلبك ، عسى الله ياخذني
و لا اكون بـ يوم الك كون تشوف تابوتي كدام عينك
گالت هالكلمات بـ كل صمود ، تدحك بـ نص عينه
انا وراها اريد اثبتها ، اخلي وصله على ايدها
اريد اشوف شبيها بس ما جاي تخليني
كل مره تبعد ايدها و تنزعج و تعيط بيه
ابتعدت مُلاذ عن اسكندر ركضنا وراها
سحبت سويجها من الميز
فيروز : مُلاذ يمهه وين رايحه
ولج يمه شجاي تسىوين بـ روحج اووووكفي
قبل لا نلحگها طلعت من البيت
حتى حافية بلا اي شي تلبسة بـ رجلها
راحت سريع على السياره
صعدت و قفلت باب السياره
وخرنا اسكندر
وكف يدك جام السيارة عليها
اسكندر : مُلاذ بلا خباااال انزلي
لا تخليني انزلج گوه
فيروز : مُلاذ يمه بنيتي ايدج دتنزف
يمه انزلي علمودي يلا فدوة اروحلج مُلاذ
امي تبجي و تدك بالجامه ، تتوسل بيها
يحاولون يفتحون الباب ، يدكون الجام
يحاجوها و انا من ضمنهم
شغلت السيارة بلا اهتمام ، طلعت بيها
كل بالي ويا ايدها انضربت قريب الشريان
ركض اسكندر و عزيز على السيارة يلحكوها
طلع اسكندر ناسي السويج جوا
دخلت ركض ادوره ما موجود گلبت البيت
دخلوا وراي يدورونه و لا لگينا
علياء كاعدة بـ مكانها و لا عبالك
اخذت تلفوني اخابر مُلاذ و مترد
جسمي كله يرجف
قطرة دم ما بقت بـ جسمي
طلعت مره ثانيه دحگت لـ اسكندر
لمن خمش السويج من ايد امه
طلعوا هو و عزيز بسرعه
بقينا احنا نلوب و عمو ما يقبل ياخذنا
اتخبلنا خابرنا لـ جسار
كعدنا منتظرينه امي طردت علياء و عمي
بس ما راحوا و گلولها يروحون من ترجع مُلاذ
خبلونا ماكو هيج لزكه افعالهم تفشل!
اجا جسار و گبت العركه بينه و بين عمي
مُلاذ اخابر عليها ما ترد
عزيز و اسكندر نتصل عليهم يگولون ما لگوها
اتخبلنا ظلينا نلطم انا و امي گلبي راح كد ما بجيت
امشي و ادعي ترجع جسمي كله يرجف
و جسار لعب بيهم لعب خلا طشارهم ماله والي
ظل عمي لا ياخذ و لا ينطي ساكت
اجا سلطان اتبعوه صفاء و اخوان سلطان
كعدنا كلنا ننتظر ، طلعوا جسار و صفاء
بقى سلطان و الباقيين بقوا يمنا
اتقدم سلطان على امي يهديها
انطاها كلاص مي ما قبلت تشرب
رجع انطاه الي هم رفضت ...
مُلاذ :-
ما ادري وين اروح وين اشرد اريد اخلص
اريد اخلص منه ، كرهت حياتي بسببه
من انا و صغيرة و هو ملاحكني ما تركني
كلشي سويت حتى يكرهني ما كدرت اتقبله
ما اكدر مو بـ أيدي ، كلشي بيه رافض يتقبله
اسلوبه ، شخصيته ، تصرفاته المالها معنى
كلها ما توالمني و لا اريده
مُستحيل اتخيل حياة ويا هادئه مستحيل
مستحيل اتخيل احبه و اتقبلة و اغير نفسي علموده
هاي انا بـ عصبيتي ، بـ عنادي و بـ نفوري
بـ مقاومتي و هروبي و تعبي و قوتي هاي انا
محد يقبل يتقبلني على هذي الهيئه !
نزلت نظري لـ ايدي يلي تنزف
رجعت ظهري على الكشن
اطلع من شارع ادخل بـ شارع
ايدي يزداد احساسي اتجاهها بـ الالم تدريجياً
جسمي احتر عيوني تشوش
لفيت السيارة ب استدارة
رجعت راسي ع الكشن ، متألمة من ايدي
غمضت عيوني بـ ألم ، طاقتي تنتهي تدريجياً
حسيتني خلص رح افقد تلاصقت رموشي
لمن شفت نفسي رون سايد
وسعت عيوني مصدومه ،
دحگت من الجامه الي يمي
لـ سيارة اجت سريعه عليه
رفعت ايدي ع الستيرن اريد الزمه
صابني الهلع ، طاحت ايدي
بعد ما اندل البانزين عيوني تشوش كلش
رجعت راسي ع الكشن فتحت عيوني الذبلانات
لكيت سيارة كدامي درت بـ عيوني
لكيت سيارة من جهة السايق ، ثنينهم سريعات
دست بانزين ولفت بـ سرعة
نزلت راسي على ايدي
صار صوت ضربات قويه ، غمضت
فتحت عيوني بـ صعوبة
دحگت الدنيا ظلمة ، السيارة يطلع منها دخان
مضروبه بـ حايط ، الباب مخلوع
شمرت روحي من السياره ، طحت ع الكاع
لزمت بـ مادري شنو ، گمت على حيلي
دايخة و افتر بـ مكاني ادحك
رحت على سيارتي اعرج ، امشي بـ صعوبة
رگبتي توجعني ، جريت تلفوني من السياره
دخلت على الاتصالات اتصلت على اول رقم
ما اعرف منو يلي اتصلت عليه لَكن اتصلت
تمتمت بـ اشياء ما اتذكرها و عيوني بدت تنغلق
صحيت لگيت نفسي بـ المستشفى
ايدي ملفوفة و رگبتي ثگيله
درت بـ عيوني دحگت لـ امي و جسار
رجعت غمضت ونمت ، كعدت مره ثانية
دحگت لـ أيهم كاعد يمي امي و جسار
كاعدين بـ الجهه الثانية بس غافيين
دحگلي أيهم لمن گلت
مُلاذ : شتسوي هنا؟
اتقدم عليه بسرعة يسألني
وجهه احمر و ايديه مجرحه
ظل يفحصني و يتطمن عليه
گلي ركبتي تاذت و ايدي لفوها
كصتي انجرحت فوك الجرح الاول
ما ادري شلون اظل عايشة
من بعد كل مصاب يصيبني!
طلعت ثاني يوم من المستشفى
مالي طاقة ابقى بـ مستشفى و هوسه
رجعت لـ البيت ركضت عليه ملاك
تتطمن عليه و تبجي ، هدأتها
دخلوا أيهم و جسار وراي ، امي ساندتني
اخذوني لـ الغرفة ، تمددت علگولي مغذي
و رجع أيهم يضربني ابر بـ الكانولا
هكذا مرت فترة امي معتنية بيه هي و ملاك
أيهم كَونه دكتوري و يعرف حالتي
بقى يروح و يرجع عليه و يضربني ابر
ما حجينا و لا نطقنا كلمة وحدة عدا لمن يفحصني
بعدين شالوا الي بـ رگبتي
و فتح الشاش من ايدي ، فتح الشاش من راسي هم
ضربني اخير ابرة بالكانولا و شالها
جسار دز سيارتي لـ التصليح
و حسب الگالته ملاك الي
امي طردت بيت عمي من بيتنا
و جسار هددهم اذا يدخلون لـ بيتنا
محد يطلع صاحي من البيت
كلهم يدرون جسار گول و فعل
امي سولفتلي بالمستشفى
صايرة هوسه و معارك و مستغربة
لمن دخل اسكندر للـ المستشفى
علمود يجيني و يشوفوني
أيهم هاجم عليه و كاتلهالشرطه رايدين ياخذونه
بس ضرغام مانعهم و ما خلاهم يتدنون اله
مرت ايام رجعت لـ صحتي تقريباً
انشلت نشله قويه و على طول اعطس و اكح
أيهم اتعود يتصل عليه و يسأل عن حالي
اجاوبه على كد سؤاله و اسد الاتصال منه
بـ يوم خابرني گلتله مريضة
أيهم : رحتي لـ طبيب؟
مُلاذ : لا نشله عاديه
أيهم : نشله عاديه و هذا صوتج؟
انتظري جايج ساعتين و انه يمج
مُلاذ : وين جايني أيهم !
سد الاتصال مني
كمت اخذت كانولا عدنا هواي و ضاميهن
شديت ايدي و كعدت ادور وريد
بعد كم دقيقة دخلت الكانولا بـ ايدي
صحت لـ ملاك ، اجتني ، دخلت دحگتلي
اخترعت لمن شافتني شاده لـ روحي كانولا
گلتلها تكطعلي بلاستر گطعتلي بسرعة
شديت الكانولا بـ ايدي ،
طلعت جبت علاجات و ابر و رجعت
كعدت على الجرباية ادحك لـ ايدي
صار نص الليل ، أيهم بعده ما اجا
امي و ملاك ناموا
التفتت لمن سمعت طقطقة على الشباك مره ، مرتين گمت من مكاني اتقدمت على الشباك مالي حيل
جسمي احسه بايد ، عيوني يطلعن نار
فتحت البرده ، دحگتله واكف يتلفت
اندار دحگلي فزز عيونه عليه ، فتحت الشباك
نطقت بخمول
مُلاذ : شتسوي هنا؟
تجولن عيونه على عيوني
نظرات الخوف عبالك تنطق من عيونه
أيهم : مُلاذ شبيج!؟ ليش مريضه؟
سحبت نفس راسي مسطور سطر
مُلاذ : فلاونزه
ظل يدحگلي نزل راسه ضايج
رفع ايده بيها علاگه
أيهم :جبتلج علاجات
-ليش تعبت روحك ؟
-ما تعبت روحي من جبتلج علاج
بس هسه تعبت من شفتج هيج وين امج و اختج ؟
-موجودين
-ليش ما مخلين بالهم عليج و مداريج؟
- مخلين بالهم و امي تروح و ترجع عليه
بس انا ما احب احد يظل فوك راسي
انا اعالج روحي بـ روحي
-ماكو هيج كلام بـ قاموسي وخري
-شنو ؟
-وخري
ابتعدت دنك شويه مديت راسي من الشباك
اشوف شديسوي لكيته ينزع احذيته (تكرمون)
رفع روحه ، كمز من الشباك دخل للـ الغرفة
- أيهم هسه يدخلون علينا
-مُلاذ اكعدي بس انطيج علاج و اروح
- ما اريد اشتريت
أيهم : لا ، اكلتي؟
رحت كعدت على الجربايه
أيهم واكف رفعت راسي دحگتله
-بلاعيمي تاذيني ما اتقبل الاكل هسه
-ما ماكله؟
هزيت راسي بـ قبول ، نزل نظره لـ ايدي
گال بـ استغراب : مو ما رحتي للصيدليه؟
-اي ما رحت ليش؟
-الكانولا؟
نزلت نظري عليها
مُلاذ : انا شكلتها
فتح عينه مندهش من جوابي
أيهم : وحدج!!؟
هزيت راسي بـ معنى "اي"
مُلاذ : دكتور كدامك انسانه متدربة
شسوي رايحة للـ الصيدلية بعد
-ما يصير تركبيها لـ روحج فوصة
-انت الفوصة مالي خلكك
ابتسم ب حزن ، كنبص كدامي
أيهم : لَـذه ليش هيج ترجفين ؟
-بردانه
-اتغطي لفي روحج باللحاف
سحبت اللحاف لفيت روحي بي
يدحگلي ، تنهد و اخذ من العلاكه لفه
مُلاذ : شنو هاي؟
أيهم : اكل ادري بيج ما تاكلين
مُلاذ : ما اريد بعدين شنو تشتريلي بـ فلوسك
دكتور انت متزوج اكرهه هاي التصرفات
أيهم : مُلاذ سالفة زواجي طلعيها من عقلج
زين ؟ انه ما احبها و لا اكو اي علاقه بيننا
تمام ؟ فهمتي وصلت ؟
مُلاذ : اناااا ما اريد وجودك وياي
و بـ نفس المكان انت انسان متزوج و هذا غلط!
أيهم : لا تريدين
نزل نظرة عني
فتح اللفة دحك بنصها
ايهم : نعلعلا ابيك احسان
عود كلت لا تحط طماطه
-شنو؟
-جبتلج لفه و ادري ما تحبين الطماطه وي الكص
گلتله ما يخلي و طلع مخلي
بس عايني ما جبت بس لفة كص جبت تكه وياها
و معلاك خليت المعلاك قليل
ادري بيج ما تحبينه ف جبتلج تكه اكثر
كلامه بـ كل مره يصدمني و يدهشني
شمدري انا شنو احب و شنو ما احب
-ايهم شمدريك ؟! ترا دمرت عقلي
و انا افكر منين تعرف عني كل شي
تجاهل كلامي و قدملي اللفه
رفضت ما قبلت اكلها
هو يريدني اكل و انا ما اقبل
ضغط و بانت عظمة فكة و هو معصب
-أيهم رح تجاوبني لو شلون!
-اكلي و اسئلي و اجاوبج
-و الله هسه تجينا امي و خوش اكل
ما اريد اكل أيهم جاوبني
- و داعة امي اجاوبج بس اكلي
اخذت اللفة من عنده ، اكلت لگمه
مُلاذ : يلا جاوب منين تعرفني؟؟
- كملي اكل و انطيج الادوية
مُلاذ : منين تعرفني ؟
-مو مهم
-مو گلت اجاوب ؟
-شنو الي يهم اذا عرفتي ؟
-ايهم !
-ماعليج مُلاذ اعرفج من مكان
-منين تعرفني و من شوكت؟
اكلت لگمه ، ظليت اسئل و ما يجاوب
بطلت اكل لمن بطل يجاوبني
أيهم : هاهيه اكلي و الله اجاوبج اكلي
رف گلبي على نظراته و اهتمامه
غمضت عيوني خايفه و مرتبكه من الشعور
يلي متكون بـ داخلي
رجعت وجهت نظري على اصبعه يلي بي الحلقة
رفعت راسي استوعبت كل الي جاي يصير
-ايهم كوم روح !
دحگلي مستغرب
گال ب هدوء : ليش ؟
-شجاي تسوي ايهم!
شجاي تسوي انت متزوج كوم روح منا
-مُلاذ بوجهها ما اعاين
ما توالمني و لا اوالمهااا شوكت تفهمون !
-بيناتكم طفل ! بيناتكم عشره و سنين
جاي تلاحظ روحك شنو جاي تسوي ؟
-شذكرج هسه انتِ ؟؟
شذكرج ؟؟؟ حظي ذكرج!
-ما نسيت انا أيهم كوم اطلع منا
المره الي جنت وياها هي الي تستاهل
تسويلها كل هذا اصـ...
قبل ما اكمل قاطع كلامي
كام وكف و هو يحجي معصب
أيهم : ما تستاااهل ما تستاهل
-فنت عمرهاا وياك جابتلك طفل
بالنهاية تكول متستاهل؟؟ أيهم انا ما اريدك
حجه بـ حده و غضب
أيهم : تعرفيها انتِ؟؟
هزيت راسي ب رفض
أيهم : بعد شكوو تحجين؟
تعرفين اذا انه جنت قابل بيها لو لا؟؟
تعرفين اذا انه جنت رايدها ؟
ما تعرفين شي مُلاذ ما تعرفين شي
-ما جاي تنطيني فرررصه اعرف
اسئلك ما تجاوب كل يوم تصرفاتك تصدمني
حجيك كل حركه تتحركها تصدمني
انا وياك ما بيناتنا شي
بس ما اريد مرتك تتاذى بسببي بعدين
لان انت تعاملك مو عادي وياي
و شكد ما حجيت و شكد ما گلت
ثنينا نعرف تعاملك و تصرفاتك مو عاديه
شحرج صوتي و انا احجي ، كحيت گحه قويه
سكت ، ظليت اكح هواي راد يجي عليه و وكف
لان ما يكدر يلمسني ، دور مي بـ الغرفة ما لگا
أيهم : اكعدي اكعدي
خل اشوفلج مي لا تبلعيها كحيي
فتح باب الغرفة على كيف و مد راسه
اريد انطق و اگله يوكف لا تشوفه امي
ما كدرت الگحه مانعتني
امي نايمه و غرفتها لمن تنسد بابها
بعد مينسمع شي بيها و ملاك هم نايمة
حطيت ايدي ع صدري حسيتني رح اموت
ايديه يرجفن ، بلعت كحتي اختنكت
رفعت عيني دحگت اله
دخل يركض عليه انطاني مي اخذت و شربته
-اشش اهدئي اشربي على كيف
شربت خايفه تجيني الكحه و انا اشرب المي
اغص بي و اموت ، سويت سيناريو كامل بـ راسي
وخرت المي و انطيته اله اخذه و دحگلي
أيهم : شلون صرتي؟
-احسن
هز راسة وظل ساكت
كعد بـ الگاع ، سند ظهره على الحايط
-أيهم عوفني روح مرتك خطيه
-كافي تگولين عن ذيج الـ*** مرتيييي!
غمضت عيوني بـ نفاذ صبر
مُلاذ : أيهم بـ اعتبار هاي خيانه
-مو خيانه
-خيانه
-مو خيانه ما عندي شي وياج!
ششفتينا شمسوين لمسه ما المسج
و اخاف عليج من الحرام
اذا احاجيج و اذا اسوي اي شي
اسوي طبيعي و اتصرف طبيعي
- و جرحك؟ كل ما گلت أيهم
جاوبتني جَرحه ؟ اكتشفت انت تعرفني!
-مُلاذ كافي
مُلاذ : شكراً ايهم على مساعدتك الي
تكدر تروح لـ مرتك
أيهم : جاي تطرديني
عدتيها اكثر من مره و جاي تأذيني
لان گلبي النعال ابن النعال ما يخليني اعوفج هيج
مُلاذ : أيهم راح اتخبل احجي كافي احجي
دحگلي بنظرات واهنه
لم رجليه ، ظل ساند ظهره مد ايديه ع ركبة رجلة
بـ ايده سيم يعوج بي دحك لـ السيم و گال
-ما خنتها وياج ، خنتج وياها
-شنو؟؟
-خنتج وياها
عكدت حواجبي مستغربه
كمل كلامه
أيهم : بـ امتحانات السادس اعدادي الوزارية
دفعتكم ... كنت جاي اشوف باهر
امتحانه بـ نفس الكُليه يلي تمتحنون بيها
رفع عينه دحگلي و انا استمع اله
رجع نظره ع السيم ، كمل كلامه
أيهم : لمن مطرت مطر الصيف
كنت امشي ادور على باهر
اتصلت عليه گلي هو طلع من زمان
مشيت بـ سرعة اريد اطلع انه هم
يدحك لـ الفراغ ابتسم و گال
أيهم : صدفتي الحلوة ، انردمت بيج
عطتي بـ وجهي و انا ادحگلج اعتذرت منج
بس ما حاجيتيني اخذتي غراضج و رحتي
ظليت اعاين وراج مشيتج عصبيتج صوتج
شكلج كل شي بيج خلاني صافن وراج
رفع ايده فرك عينه
انا مصدومه و متجمده بـ مكاني اسمع اله
أيهم : نزلت عيني على الكاع
ضحك و كمل : لگيت ماشتج طايحة
اخذتها حجه و لحگتج ردت انطيها الج
وكفت بـ مكاني لمن شفتج كاعدتلج بـ زويه
خانكه روحج ما تبجين اشوفج و واكف
تبللت و تبهذل حالي بردت من المطر
بس دموعج النزلن يحرگن خدج حرگني قَبله.
سكت لحظات
مُلاذ : كمل !
أيهم : لحكتج من طلعتي ، لحد ما وصلتي لـ بيتج
شفتج تدخلين البيت آمنت ردت اروح
وكفت بـ مكاني لمن شفت سيارة دخلت فرعكم
نزل منها اسكندر فكرته اخوج
اخذج و رحتوا ، بقيت انه بـ ذاك الركن واكف
و عيوني تلحك السيارة الصعدتي بيها
ودت انطيج ماشتج الوكعت
اترددت هواي على بيتكم ايام اوكف كدام بابكم
يطل وجهج عليه من تطلعين
بـ ايدي ماشتج ما فاركتني و لسا عندي
تصرفاتج و كلامج و عصبيتج ، ضحكتج
عركاتج و لسانج شعرج عيونج المكحله
قوتج و مسؤولياتج و تعبج ...
سكت متنهد عاجز عن الكلام
بلع ريكه و كمل كلامه
أيهم : عدت الايام دخلتي الجامعة
اعوف كل شي اترك كل شغلي
و اجيج ادحگلج من بعيد لـ بعيد
اتخبل من الي يمر من يمج
اركز على كل حركة
حفظتج حفظ من راسج لـ جدمج
أيهم : صارت حفلة تعارف
رحت ويا باهر بس حتى اشوفج
وكفت و غنيت الهم
و بين كلمات الاغنية انطق اسمج بـ داخلي
و انتِ ما تدرين و انتِ ما فاهمه
رحتي و بـ وسط اغنيتي الكانت تقصدج
غيرتها و غنيت الهم غير شي
كل شي سويت حتى احاجيج
من ثولي و صدمتي سألته
مُلاذ : شسويت ؟
أيهم : صرت سايق تكسي
وكفت ابيع شعر بنات
صرت اشتغل وي محل السيارات
الي تروحين اله حتى تصلحين سيارتج
صرت كاشير صرت نادل اشكال و الوان
كمت اتنكر عود رجال جبير اشتري منج
لو اسوي روحي شاب و اشتري
وكفت و لفيت وجهي و كمت ابيع وياج
استوعبت شغله قاطعته و گلت
مُلاذ : انت ابو الرسائل!
ابتسم تك خد
هز راسه بـ قبول
أيهم : يا طفل الگا اكضه و ادزلج بـ ايده ورقه
خلصت الخردة ع الجهال
كل شوية كاضلي واحد ماكدرت احاجيج
و لا كدرت اوصل خطوة يمج ، الوثج انه
ورقتج البيضه الطخها بـ سوادي
مُلاذ : شلون صرت سايق تكسي ؟؟
شنو صرت نادل ما جاي افهم؟
أيهم : افشش تايرات سيارتج
اخذ التكسي من صديقي و اوكفلج ع الشارع
بس اشوفج تطلعين و تشوفين تايراتج مفششه
اجيج و تصعدين وياي اوصلج ملثم ما تدرين بيه
وسعت عيوني
مُلاذ : يا مصخم الوجهه الله يصخمك
و انا ادفع فلوس على تايراتي و ماكو
عبالي الجهال يفششووهن!!!
كل يوميه اروح اتعارك وي ام أوس
عبالي أوس الي يسوي هيج بـ سيارتي!
أيهم : جنج ما مستغربة لمن كم مره
تلگين فلوس طايحة بـ سيارتج
مُلاذ : انت المخلييييهن؟
أيهم : اي ، تدخلين لـ مطعم
اغطي وجهي و اجي اخذ طلبج
تروحين لـ كاشير البس شفقه و كمامه
سويت عملية امج انه
لحد ما اجا ذاك اليوم الاگشر صديقتج
غادة جانت كاعدة گالت خطبوج و قبلتي
بلع ريگه و فرك وجهه بـ عصبية
أيهم : اتخبلت ، عقل ما ظل بـ راسي
طلعت من مكاني و باهر يلحگني
جنت رايد اجيج صارت شغلة ما كدرت اجي
من حرگة گلبي من الصار بيه ذاك اليوم
رحت شربت غلط و اعترف بي
بس الصارلي بـ يومها مو قليل
أيهم : اجيت لـ بيتكم بـ الليل
ما ادري شصار ما ادري شسويت
فزيت الفجر لگيت روحي بـ نص طرمة بيتكم
شلون دخلت شلون اجيت و شسوي ما ادري
أيهم : طلعت بسرعة گوه امشي رحت لـ بيتي
قبلت بـ لينا بـ هذاك اليوم الاگشر
كلما تاهه دربي الگا روحي كدام بابج
تعبت و انه الگاج ملجئي بـ ضياعي
و من اوصل ما احصل اثر منج
فتح باكيته طلع جكارة بعد ما خلصت الي بـ ايده
شمر الباكيت ، ورث الجكاره
يحجي بـ حرگة اعصاب
يوصف الموقف كانو هسه جاي يصير
أيهم : كعدت كدام باب بيتكم ايام و ليالي
انتظرج تطلين عليه و اشوفج
بس ماكو عتمة البيت مثل عتمة روحي
سموني رَماد من صغري ينادوني بـ هذا الاسم
بس لمن رحتي الكل عرفني رَماد
كل اليسألني عن اسمي اگله رَماد
رَمادج انه و انتِ اخ انتِ النار الي حرگتني
ظليت صافنه لا عرفت اجاوب
و لا عرفت استوعب تعبت تعب عقلي
من كد الصدمات الي انصدمتها
مُلاذ : لـ ... ليش ما حاجيتني
ليش ما گلتلي ... ليش اتنكرت دائماً؟
أيهم : ما اگدر شجاعة العالم الأكبر
خليتها بـ گلبي و هسه انه كدامج
مُلاذ : بـ مرة ... بـ مرة من المرات
استوقفني ضابط اجا اله طفل
بلعت ريگي
كملت بـ صعوبة
مُلاذ : اجا اله طفل و انطاه ورقة
الضابط وكتها دحك لـ جهه و هز راسه
انت ...
رفع عيونه الي متحجرات الدموع بيها
قاطعني قبل لا اكمل
أيهم : انه ، انه سويت عملية لـ هذا الضابط
عالجته و ساعدته هواي طلبت منه يعبرج
ما رد طلبي و عبرج
انطويت على نفسي ، لزكت روحي يم الحايط
حسيته انسان مهووس
ما عرفت اوصف احساسي اتجاهه
فهمني من نظراتي
گام بسرعه وكف ، اجا ناحيتي
خليت ايدي كدامي مستوقفته
كعد على ركبه بـ الكاع كدامي
و انا كاعدة ع الجرباية
استغربت صوته يلي يتغصغص
أيهم : مُلاذ ... مُلاذ لا تسوين بيج هيج
لا تأذيني هيج ما حجيت الج و لا ردت احجي
بس لازم تعرفين كل شي
و الا رح تظلين تسألين طول حياتج
و ما رح اعرف اجاوبج
مُلاذ : أيهم عوفني روح
تعبت تعب عقلي كافي كل يوم احد يصدمني
و خصوصاً انت أيهم من يوم العرفتك
كل يوم انصدم بـ شغلة تخصك تعبببت
أيهم : بس اسمعيني مُلاذ
مُلاذ : روح أيييهم
أيهم : رح اروح هذا اخير لقاء بيننا
بس اسمعيني خليني احجي
ظليت ساكته و هو كمل
أيهم : لينا ما دخلت گلبي و لا لحظة
نفرت من عدها و ما تقبلتها
و الله و داعة امي و عيونج
ما اتقربت الها و لا لمستها و لا حتى محاجيها
أيهم : اشهر انه ما شايفها عدل
كعدت بـ يوم لگيتها يمي
شصار و شكو ما اعرف مُلاذ اتجننت
ما لمستها و حق الحق ما لمستها و لا اتذكر الصار
أيهم : اتخبلت عليها بـ ذاك المصباح ،
فترة و طلعت حامل سويت الف تحليل مال ابوه
كل مره التحاليل تثبت أبيل ابني
بس انه ما قبلت بيها
و لا اتقبلتها كـ زوجة حاولت و ما گدرت
أيهم : كنتي و بعدج كدامي و بـ كل لحظة
مستحيل اتقبلها كـ زوجة و لا رح احبها
ايدي ما رح تلمس غيرج
و عساها تحترك اذا لمست غيرج ...
أيهم : زين ؟ انه رح اروح ما اريد اتعبج اكثر
ريحي بالج و فكري زين اكلي و اخذي علاجات
بس صيري زينه و لا تهتمين لـ شخص
اذا بـ يوم ردتي شي اذا بـ يوم دورتي شخص يمج
رح تلگيني يمج حتى لو بعيد ، تمام؟
دحگلي ثواني رفعت عيني
دحگتله دمعت عينه
أيهم : محد رح يريدج بـ خير بگدي
اتمنى اذيتج هاي و مرضج و تعبج كله بيه
تركني و طلع من الشباك
انا بـ مكاني صافنه و ادحك
و اتذكر كل موقف حجاه
ما كنت اعرف هذا المنتصف من كلامه!
مرت ايام هواي أيهم فعلاً ما شفته بعد
بـ كل لحظة ظليت صافنه و افكر
يرجع كلامه و ينعاد بـ اذني
عقلي تعب تعب لـ درجة لا تصدق
تمنيت اكدر افرغ عقلي من كل شي
طلعت من شغلي رحت لـ الاطفال
دحگت لـ حزن يلي كاعدة وحدها
و الاطفال يمسحون جامات و يبيعون بـ الشارع
ابتسمت و انا ادحگلها
شلون مبتسمه و هي صافنه
مُلاذ : حزن
رفعت عينها دحگتلي ، اتوسعت ابتسامتها اكثر
كامت وكفت ، كنبصت بـ الكاع و اشرتلها
بـ معنى "تعالي" ابتسمت ابتسامة ظاهره سنوني
اخذت وردة من ورداتها الي على الرصيف
اجت ناحيتي تركض فرحانه و تضحك
صاحت و هي تضحك
حزن : ماما مُلاذ جبتلج گلاده هديه
لان عرفتيني على عمو الدكتووور
تركض تحجي و تضحك فرحانه
صرخت بـ فزع لمن سيارة سريعه دعمتها
وسعت عيوني مصدومة ، فتحت حلگي
طارت حزن لـ فوك و انضربت بـ الگاع
نزلت عيني لـ دمها يلي ترس الشارع
صرخت بـ كل صوتي و ركضت عليها
مُلاذ : حزززززززن
رفعتها من الكاع ضميتها لـ صدري
كمت اصرخ و الدموع متحجره بـ عيني
فتحت عيونها دحگتلي همست
حزن : ماما مُلاذ
مُلاذ : بنتي روحي حزززن
دحگيلي حزن دحگيلي فدوه لا تغمضين
رفعت ايدها ع الگلاده
غمضت ، طاحت ايدها
صرخت بـ لوعة بـ كل صوتي
مُلاذ : حزززززززن !!!
يتبع ...
لا تنسى التصويت بـ نجمه +
التعليق بين الفقرات 🩶
***************
- يتبع الفصل التالي اضغط على ( رواية جرح الأيهم ) اسم الرواية