رواية يكفيني منك عقابا الفصل الرابع و العشرون 24 - بقلم بقلم عبير سليم

 رواية يكفيني منك عقابا الفصل الرابع و العشرون 24 - بقلم بقلم عبير سليم 

الحلقه الرابعه و العشرون

يكفيني منك عقابا

عبير سليم 

😥😥😥😥😥😥

انا وعدتكم في اقتباس امبارح و حنفذ وعدي شيماء قطرة ندى هي اللي تخمينها صح و حتكون هي ضيفة الحلقه و حبيبة القمر ده

بعد مرور عدة أشهر

يقود سيارته بسرعه كبيرة بينما هي تجلس بجواره و هي تبكي

بتعيطي ليه بس دلوقتي يا حبيبتي ما احنا رايحين اهوه و ان شاء الله حتطمني عليها هي و البيبي و ربنا حيقومهم بألف سلامه

ناهد : يا رب يا مراد على اد ما نا قلقانه عليها على اد ما نا مش قادرة أصدق نفسي اني ححضر ولادة واحده من بناتي

مراد : يا حبيبتي يا ناهد عقبال ما ربنا يجمعك باختها كمان يا رب

ناهد : يا رب يا مراد يارب و يقومك بالسلامه يا بنتي يا رب انا خايفه عليها اوي يا مراد

مراد : ان شاء الله حتقوم بالسلامه

في المستشفى

حبيبتي الدكتور عايزك تدخلي أوضة العمليات كل حاجه جاهزة

عتاب : لا اني حستناها عايزة أشوفها جبل ما ادخل هي لسه مكلماني و جالتلي إنها خلاص على وصول

عامر : توصل بالسلامه ان شاء الله لكن كل دجيجه بتمر خطر عليكي يا عتاب

تدخل الممرضه مش ياللا بجى يا جميل الدكتور مستعجل عنديه ولادتين بعدك

حفصه و هي بتساعدها : يا بجى يا عتاب ربنا يجيبها بالسلامه و تخرجي تلاجيها ان شاء الله موجوده تضطر عتاب انها تسمع كلامهم

و بعد دخولها أوضة العمليات

الدكتور : الجميل اتاخر علينا ليه اكده

عتاب : كنت مستنيه امي تاجي مكنتش عايزة ادخل جبل ما اشوفها

الدكتور و هو بيحضر ابرة التخدير : هي ساكنه بعيد

عتاب :، ساكنه ف.....

لم تكمل الكلمه و قد غابت تماما عن وعيها

تدخل المستشفى و هي تجري سريعا و تسأل في الاستقبال عن مكان العمليات و تذهب لتجد الجميع موجود نعمان و زينب و حفصه و عامر تسلم عليهم و تعرفهم على زوجها و يسلمون عليه

ناهد :، هيا دخلت امتى

عامر :، لساتها داخله حالا هي مكنتش عايزة تدخل جبل ما تشوفك و احنا دخلناها بالعافيه

ناهد : يا حبيبتي يا بنتي ربنا يخرجك لينا بالف سلامه يا رب

بعد قليل تخرج الممرضه إليهم لتبشرهم بمجئ مولود لهم

ناهد : بنتي عامله ايه يا حبيبتي

الممرضه : بخير الحمد لله الدكتور بيخيط الجرح و حتخرج على الأوضة ان شاء الله

عامر : يعني هي فاجت

الممرضه :، لا طبعا هي لسه تحت تاثير البنج بس ان شاء الله دجايج و حتفوج

حمد الله على سلامتهم و ألف مبروك

 يعطيها عامر مبلغا من المال و تفرح به بشده و تدخل مرة ثانيه الى داخل العمليات

بعد دقائق في الغرفه

عتاب غائبه عن وعيها و ناهد جالسه بجوارها تمسح على شعرها و تقبل يدها

عتاب : عطر عطر عامر امي امي

ناهد : انا هنا يا حبيبتي انا جمبك يا عتاب كان نفسي اشوفك قبل ما تدخلي يا حبيبتي ياللا فوقي يا روحي عشان تشوفي ابنك ماشاء الله عليه زي القمر يا نور عينيه

حفصه : حتسميه ايه يا عامر

عامر : اني و عتاب متفجين نسميه آدم

مراد : يتربى فعزكم ان شاء الله

عامر : ربنا يخليك يا عمي

بعد مرور القليل من الوقت تفوق عتاب و تبدأ تتألم و تشعر بالوجع و امها جمبها مش عاوزة تبعد عنها لحظه

عتاب : ابني كويس 

عتاب : كويس يا حبيبتي و زي القمر عتاب : امي حمد الله على سلامتك

ناهد : حمد الله على سلامتك انتي يا نور عينيه

عتاب : تعبتك معايا و جبتك على ملى وشك حجك علية يا أمي

ناهد : هو فين التعب ده يا حبيبتي ده انا اجيلك من آخر الدنيا و الله عمك مراد كان طاير بالعربيه عشان الحق اشوفك بس بردو ملحقتكيش المهم انك قمتي بألف سلامه

عتاب الله يسلمك يا أمي

متشكرة جوي يا عمي ربنا يخليك

مراد : حمد الله على سلامتك يا بنتي

عتاب : الله يسلمك يا عمي

عايزة اشوفه يا أمي

تجيبه زينب من سريره و تاخده منها ناهد و تنيمه فحضنها و عتاب تبوسه و تاخده ناهد مرة تانيه و ترجعه سريره

و كلهم حواليها بيباركولها و يطمنوا على صحتها 

🌹🌹🌹🌹🌹🌹

في الجامعه

بجولكم ايه اني عايزة اخلص المحاضره الجايه ديه بسرعه و اروح على طول

روان : اشمعنى يعني

رحمه : عتاب ولدت و اني حموت و اشوف النونو

هنا : و جابت ايه يا رحمه

رحمه : آدم

فتون : ألف مبروك يا حبيبتي ديه زمانهم فرحانين بيه جوي

رحمه : طبعا يا بنتي ربنا يخليه هو و اخوه

روان : و حتعزمينا عالسبوع زي المرة اللي فاتت

رحمه : و دي فيها كلام طبعا بس نطمن عليهم الأول و عامر حيعمل سبوع ما حصلش و كلكم معزومين طبعا

فتون : امال حبيب الجلب فين مش باين من وجت ما خرجنا من المحاضرة اللي فاتت 

رحمه :، جالي انه رايح يصللي في الجامع و حيريح ضهره شويه و ياجي

فتون : يريح ضهره ليه هو كان بيعمل عمليه إياك

رحمه : لا يا ذكيه ديه كان سهران جمب اخته كانت تعبانه و كان جلجان عليها جوي

اهوه جيه اهو

زياد : واجفين ليه اكده يا للا عالمحاضرة

رحمه : زياد اني خايفه جوي

زياد : في ايه هببتي ايه يا همي الكبير 

رحمه : يا ربي عليك دايما ظالمني أكده

زياد : و الله شوف ازاي عالعموم جوليلي خايفه من إيه

رحمه : مش الدكتور صالح جال انه حيعرفنا نتيجة الامتحان اللي عملهولنا النهارده و اني خايفه جوي اصلي عكيت فيه

زياد : ربنا يستر امشي انجري جدامي يا آخرة صبري

في داخل المحاضره 

الدكتور ينادي على اسم كل طالب و يقولله درجته و رحمه قاعده مرعوبه

الدكتور : رحمه

رحمه انتي يا بنتي مش بنادي عليكي

رحمه و هي بتقف : و هو حضرتك بتنادي علية أني

الدكتور : امال حكون بنادي على مين غيرك

رحمه : و اني حعرف منين ان حضرتك تجصدني ما احنا كذا واحده رحمه

الدكتور : لا يا فقيقة عصرك و اوانك أني لما بنادي على رحمه من التانيين بجول اسمهم بالاب

رحمه : و هو اني يعني اللي معنديش اب 

ديه أني رحمه نعمان العشري

الدكتور : عارف و حافظ اسمك أكتر ماني حافط اسم ولادي لكن انتي بالذات اسمك لوحده كفايه لما اجول رحمه بس يبجى أكيد اجصدك مانتي اصلك ما شاء الله عليكي مانتيش محتاجه حاجه جمب اسمك

رحمه :، و الله ديه شهاده اعتز بيها يا دكتور صالح

الدكتور : جوليلي يا رحمه اني في سؤال عايز اسئلهولك

رحمه : يا دي النيله عالاسئله  اللي مبتخلصش

الدكتور: بتبرطمي ليه عالعموم متجلجيش أني حسالك سؤال خارج المنهج

رحمه :، كمان خارج المنهح يا وجعتك المطينه يا رحمه و هو اني بعرف أجاوب عالاسئله اللي من جوه المنهج لما حجاوب عاللي من براها ديه اني بخاف من الكلب يطعلي أسد

كل الطلبه : هههههه هههههه

الدكتور : أسد لما ياكلك و يريحني منك

رحمه : ليه بس اكده يا دكتور في ناس عايزني

الدكتور : و انتي مين يعوزك ديه كفايه لسانك اللي أطول منك طولك شبر و نص و طول لسانك مترين

مازن و هو بيبص ناحيتها و هي بتبصله بقرف : دكتور بعد اذن حضرتك رحمه دي العسل بتاع الدفعه و منجدرش نستغنى عنيها

رحمه : يا بو تجل دمك

وقتها زياد كان عاوز يقوم يجيبه من رقبته لولا انهم في المحاضرة

و بصله بصه كلها شر

الدكتور : جوليلي يا دكتورة رحمه هو انتي لو مكنتيش جبتي مجموع الطب اللي اني و الله ما عارف جبتيه ازاي المهم يعني كنتي حضرتك و سموك حتدخلي كلية إيه

رحمه : كنت حدخل  كلية الشرطه

الدكتور : كلية الشرطه لا وربنا ديه على أساس إنك ذكيه جوي و حتعرفي تتعاملي مع المجرمين ديه مش بعيد بدل ما نتي اللي تمسكيه هو اللي يمسكك

كل الطلاب يضحكوا

رحمه : دكتور الله يخليك متوجعش جلبي أني عاوزة أعرف المجدمه دي كلها ليه جلبي مش مطمن و الفار بيلعب في عبي

الدكتور : فار ايه و عبك إيه انتي فاكرة نفسك في الغيط لا ده كتير جوي الصبر من عندك يا رب اني شللي حيكون على يدك

رحمه : هو كل دكتور يجوللي اكده ليه ديه اني حتى غلبانه دكتور هو اني عملت ايه في الامتحان و الله يخليك  بلاش تجول درجتي جدام الكل

الدكتور : ليه ان شاء الله على راسك ريشه الدرجات بتتجال جدام الكل و انتي بالذات لزمن الكل يعرف درجتك يا رحمه اللي جبتيها

رحمه بصوت واطي : إلهي تنفضح يا بعيد 

الدكتور : جبتي خمسه من عشرة يا رحمه

 درجة النجاح يا دكتورة رحمه و اني كارمك كمان و ربنا

رحمه بفرحه : معجوله بجد يا دكتور يعني اني نجحت الحمد لله

الدكتور : انتي فرحانه و اني اللي افتكرتك حتتاثري و تعيطي 

رحمه : لا يا دكتور اتأثر إيه و اعيط ليه بس بعد الشر اصلي أني حجولك اصل و الله مكنتش مذاكرة و معرفتش أجاوب كويس فالحمد لله اني نجحت و خلاص و اوعدك حعوضها المرة الجاية ان شاء الله

الدكتور : جايه اه ان شاء الله تعرفي بجالك كام سنه بتجوليلي حتعوضيها

رحمه : ياللا حيجعد بجى يهزج فية زي كل مرة يارب عدي اللي فاضللي على خير بجى أني تعبت كان يوم مهبب لما جلت ادخل كلية الطب اني إيه بس اللي دخلني فيها ياربي

هههههههه عشان نعرف بعض و احبك يا مجنونه

رحمه : بس اني زهجت من التهزيج اللي كل شويه اتهزجه ديه

مناجصش غير انهم يحطوا صورتي جدام باب الكليه و يكتبوا عليها المهزجه اهيه

زياد : لا يا حبيبتي متجوليش، على نفسك اكده و بعدين إيه رأيك بجى إن الدكاترة بيحبوكي و بيحبوا يناغشوكي و اللا محدش، فيهم كان عبرك أصلا يعني هو انتي لوحدك اللي مش شاطرة ما فيه كتير غيرك لكن انتي مميزه عنهم

رحمه : هبله مش أكده

زياد : هبله ديه إيه ديه انتي حبيبة جلبي انتي فيكي حاجه حلوة يا رحمه بتخللي الكل عايز يتكلم معاكي

رحمه : حاجه واحده بس يا زياد 

زياد : لا يا جلب زياد كلك على بعض حلو يا ملكة جلبي

رحمه : زياد أني خايفه جوي

زياد : يا دي النيله خايفه من ايه تاني

رحمه : خايفه أهلي و أهلك يفرجوا بيننا

زياد : رحمه احنا مفيش حاجه حتفرج بيننا غير الموت أنى لا يمكن حكون لحد لحد غيرك يا رحمه و انتي يا رحمه تجدري تكوني لغيري

رحمه : زياد اني لو مكنتش ليك مش حكون لغيرك و يوم ما يوحصل حاجه زي اكده محعيش في الدنيا ديه يوم واحد و حيكون اخر يوم في عمري

زياد : اطمني يا حبيبتي ان شاء الله مفيش حاجه حتفرج بيننا و حنكون لبعض نخلص الكليه و حاجي اخطبك على طول

رحمه : امتى بجى احسن هما في البيت عايزين يجوزوني و حججي اللي بجولها كل مرة يجيلي فيها عريس اني معاوزاش حاجه تعطلني عن دراستي

.

زياد: آخر يوم في الامتحانات حكون متجدملك و خلاص هانت مفضلش كتير

رحمه : يا رب بجولك إيه أني ماشيه دلوك

زياد :، ماشي روحي و انى حبجى اديكي بكرة المحاضره و حشرحهالك كمان

رحمه :ربنا بخليك لية

زياد :، و يخليكي لية يا تاعبه جلبي خللي بالك من نفسك انتي رايحه المستشفى مش اكده

رحمه : أيوة كلهم هناك

زياد :، أول ما توصلي المستشفى رني علية

رحمه : بس انت حتكون جوة المحاضره 

زياد :، رني رنه صغيرة و اجفلي المهم اطمن إنك بخير و وصلتي بالسلامه 

رحمه :، حاضر

تمشي رحمه و زياد يدخل المحاضرة اللي بعدها و مش عارف ليه حس ان قلبه مش مطمن و بص ناحية المكان اللي بيقعد فيه مازن و للأسف لقاه فاضي وقتها قلق أوي و سأل نفسه معقوله يكون خرج و راح يمشى وراها ديه يبجى ناوي على موته و مش حسيبه لو جرب منيها

رحمه سايقه العربيه و هي فرحانه انها حتشوف آدم لقت اللي لف بعربيته و قطع عليها السكه و نزل من عربيته و راح لها

رحمه : انت عايز إيه مني و جاي ورايا ليه

مازن : عايز أتكلم معاكي ممكن تنزلي نتكلم مع بعض شويه

رحمه : مش حنزل يا مازن و امشي من اهنيه بدل ما اصرخ و الم عليك الناس انت عايز مني إيه 

مازن : أني بحبك و عايز اتجوزك 

رحمه : و اني مبحبكش جلتهالك جبل أكده و جلتلك مليون مرة تبعد عني و إنت مبتفهمش

 افهمهالك ازاي اني مش عارفه

مازن : جولي اللي تجوليه يا رحمه بتحبيني مبتحبنيش ميهمنيش المهم اني بحبك و عايز اتجوزك

رحمه :  تصدج إنك بني آدم بارد و معندكش دم و لا كرامه يعني أني بجولك مبحبكش يا بني آدم انت و انت تجوللي ميهمنيش يعني ترضى على نفسك و كرامتك انك تاخد واحده مبتحبكش

مازن  : اني حعرف إزاي اخليكي تحبيني المهم تكوني معايا و ملكي و بس 

رحمه : اللي انت فيه ديه مش حب يا مازن لا استحاله مفيش حد بيحب يجول أكده

ديه عشان أني جلتلك لاء لكن لو اني كنت طاوعتك كان زمانك زهجت مني و سيبتني زي البنات اللي انت كل يوم تمشي  مع واحده منهم و بعد اكده تسيبهم و تروح لغيرهم و اللا فكرك اني معرفش فضايحك

مازن  : كل ديه حينتهي لما نبجى مع بعض و اني أوعدك إن محيكونيش في حياتي غيرك

رحمه : لا توعدني و لا أوعدك الله يخليك بعد عني و الا مش حيحصل خير و يكون في علمك لو مبعدتش عني أني حشتكي عليك

مازن :" محدش حيعملك حاجه و اللا انتي ناسيه اني جريب دكتور صالح و كمان انتي ماتعرفيش ابويا يبجى مين ديه عميد الجامعه ذات نفسه بيعملله حساب

رحمه : مازن بعد عن طريجي اني عايزة امشي

مازن : ماشي يا رحمه على كيفك حسيبك تمشي بس يكون في علمك انتي محتكونيش لحد غيري سوى برضاكي أو غصب عنك و حتجوزك

رحمه : ديه عشم ابليس في الجنه

مازن : حنشوف يا رحمه و اللي لزمن تفهميه كويس ان اللي انتي شاغله نفسك بيه ديه ممكن في لحظه ميكونش موجوده في الدنيا كلها

رحمه : وسع من طريجي بجولك

مازن : اللي حيجف بيننا اني حدفنه بالحيا

يرجع لعربيته و يوسع لها الطريق و تمشي و هي قلبها بيدق من الخوف ايوة تهديداته ليها بقت كتير كل شويه يلمحلها انه يقدر يؤذي اي حد عشان يوصللها

اخيرا وصلت المستشفى و رنت على زياد و قفلت بسرعه عشان تطمنه انها وصلت لكن زياد مش قادر يستنى لما المحاضرة تنتهي استئذن من الدكتور انه محتاج يروح الحمام  و اتصل عليها بسرعه

رحمه : انت بتكلمني ازاي

زياد : رحمه جوليلي و متخبيش علية

هو مازن خرج وراكي كلمك اتعرضلك

رحمه : لا

زياد : رحمه انتي مبتكدبيش علية صوح

رحمه : لا طبعا و اني حكدب عليك ليه بس

زياد : أمال هو محضرش المحاضرة ليه

رحمه : و هو يعني عشان محضرش المحاضره يبجى مشي ورايا

زياد : ديه اللي اني حسيته عارفه يا رحمه لو كنتي بتكدبي علية اني حعمل فيكي ايه

رحمه : و اني حكدب ليه زياد اني لزمن ادخل جبل ما حد يوعالي و اني بكلمك

زياد : ادخلي يا رحمه 

تقفل معاه المكالمه : حجك علية كدبت عليك من خوفي من اللي حتعمله و اني معنديش استعداد ان تحصل لك اي حاجه بسببي يا حبيبي

 

عتاب قعدت يومين في المستشفى و طبعا مراد رجع القاهرة أما ناهد فضلت مع بنتها لحد ما رجعت البيت و كمان فضلت جمبها بتراعيها و بتاكلها بايديها و مش، بس كده دي  كانت بتنام معاها في نفس الأوضة و عامر كان بينام في أوضة مصعب لحد ما عتاب بدات تقدر تتحرك و اطمنوا عليها انها هيا و البيبي بقوا كويسين

عتاب : ربنا يخليكي لية يا امي

ناهد و هي بتبوس ايديها : و يخليكي لية يا نور عين امك

عتاب : تعبتك معايا

ناهد : كل تعب الدنيا يهون ما دمتي فحضني ياااه يا عتاب لو تعرفي انا مبسوطه اد ايه و انا قاعده جنبك و بخدمك

عتاب :و اني كمان و الله سعادتي و انتي جاري بالدنيا و ما فيها ربنا ميحرمنيش منك يا رب

ناهد : عتاب هي عطر لسه مش عاوزه تعرف حاجه عني و لا اعرف حاجه عنها

عتاب : معلش يا امي متزعليش منيها هي معذوزة و الله اللي شافته مش شويه هي ضحت كتير عشان سعادتي عشان تشوفني سعيده و متهنيه رمت نفسها لجوازه لمجرد انها تخليني اعيش و افرح لكن لجت تضحيتها ديه راحت هدر و كمان تلاجي امها ظهرت فجأة صعب عليها تتجبل كل ديه لكن اني متأكده انها يوم ما حتشوفك محتجدرش تمنع نفسها من حضنك دي اختي و اني اعرفها اكتر من أي حد في الدنيا كلها

ناهد : طيب هيا حترجع امتى

عتاب : بتجوللي لسه مجاش الأوان

ناهد : ربنا يردك لية يا قلب امك يا رب

عتاب : امي هو اني ممكن أسألك سؤال

ناهد :، اسألي يا حبيبتي خير

عتاب : هو انتي ليه مخلفتيش تاني بعد ما اتجوزتي و اللا جوزك هو اللي كان معاوزش يخلف

ناهد : لا ابدا بالعكس هو كان نفسه يخلف أوي و على فكرة عمك مراد ماتجوزش قبلي أنا أول واحده أدخل حياتي

لكن للأسف هو طلع مبيخلفش و أنا مكدبش عليكي الموضوع ده مفرقش معايا نهائي بالعكس أنا حسيت ان دي رحمه من ربنا بية لأن في غيابكم عني و حرماني منكم مكنتش حقدر ادي حبي لحد و انتم محرومين منه

بعد كام يوم يعملوا السبوع و ييجي مصعب و نورة و نسمه يحضروه و كل صحاب رحمه تعزمهم و كل الأهل و الأقارب و عامر كان عامل سبوع فخم جدا و دبح فيه و عمل وليمه كبيرة لكل أهل البلد ده غير اللحمه اللي وزعوها عالفقرا و المحتاجين 

و زينب طول الاحتفال و هي شايله زينب الصغيره على دراعها خايفه عليها و كل ما حد يقول عليها انها جميله تفضل تقرا المعوذتين : نورة

نورة : نعم يا اما

زينب : خدي زينب و اطلعي بيها على فوج

وقتها نورة زعلت و الدموع نزلت من عينيها و افتكرت انها عاوزاها تطلع عشان مستعريه منها و مش عاوزه حد يعرف انها مراة مصعب

زينب : يا حمارة اني عاوزاكي تطلعي بيها عشان خايفه عليها من العين كل الستات عينهم عليها ما هيا اسم الله عليها زي البدر المنور و اني خايفه عالبت تتحسد دي هيا البت الحيله اللي عندنا اجولك نيميها و انزلي بس نيميها الأول يا اما تخللي حد يجعد بيها فوج المهم البت محدش يشوفها اني جلت أهوه

تطلع بيها نورة تنيمها و تصمم نسمه انها تقعد جمبها عشان لو صحيت و عيطت و تنزل نورة و تقعدها زينب جمبها عشان تأكد لها انها لا مكسوفه و لا مستعريه منها زي ما فهمت

اما عند الرجاله ييجي جمال و هو شكله حزين

نعمان : مالك يا جمال هو في حاجه

جمال : لا مفيش

نعمان : مفيش ازاي لا في حد ولادك تعبان و اللا حاجه

جمال : لا الولاد بخير بس أمهم هيا اللي تعبانه شويه

نعمان : ليه بعد الشر عنها مالها

جمال : مش عارف و الله يا نعمان تعبانه جوي و اخدتها عند كذا دكتور و كل دكتور يجول حاجه و اني حجزتلها عند دكتور حنروحله بكرة ان شاء الله

بس هيا ممبطلاش عياط و العيال جاعدين جمبها بيعيطوا على عياطها و اني خايف جوي

نعمان : خير يا جمال ان شاء الله متجلجش ان شاء الله تكون حاجه بسيطه

جمال  : يا رب يا نعمان

ييجي عامر و يسلم عليه و يجيبله آدم و جمال يحطلله ظرف فيه مبلغ كبير

عامر : ديه كتير جوي يا عمي

جمال : مفيش حاجه كتير على الجمر ديه الف مبروك يا عامر يتربى فعزك يا رب

عامر : الله يبارك فيك يا عمي عجبال ما تفرح بولادك يا رب

يستئذن عامر و يمشي عشان يرجع لمراته

عامر : ماله يا ابوي حاسه فيه حاجه

نعمان :" مرته تعبانه شويه و جلجان عليها

عامر : ربنا يطمنه عليها ان شاء الله 

🌹🌹🌹🌹🌹🌹🌹🌹

واحشني أوي و الله يا مراد إيه يا عم أنا قلت مادمت رجعت حنرجع أيام و ليالي زمان

مراد : حبيبي يا عز معلش و الله أنا عارف إني مقصر معاك بس المدرسه أخده كل وقتي خصوصا إن ناهد لسه مرجعتش من الصعيد و كل حاجه علية لوحدي 

عز : ربنا يرجعها بالسلامه ان شاء الله بس أنا مستغرب أوي من موضوع المدرسه ده ليه مفكرتش تعمل اى مشروع تاني بدل وجع القلب ده

مراد : تقدر تقول عاوز أعوض مع الأطفال اللي حيدخلوا المدرسه إحساس الابوة اللي اتحرمت منه

عز : و دكتورة ناهد وافقت ده تعب و مسئوليه كبيرة

مراد : أيوة طبعا دي هيا اللي شجعتني

عز : ربنا يوفقكم يا رب

مراد : حبيبي يا عز ربنا يخليك ليا و انت بقى يا باشا مش عاوز تفرحنا بيك و اللا إيه عز انت مبقتش صغير يا دوب بقى تتجوز

عز : الظاهر لسه مجاش الأوان يا مراد

مراد : ليه يا عز طيب و الممثله اللي انت قلتلي عليها أخبارها إيه 

عز بتنهيده : نيللي

مراد : هي دي نيللي بتاعة الفوازير و الف ليله و ليله

عز : هههههه فوازير و الف ليله وليله إيه بس يا مراد دي ممثله لسه صغيره أنا اللي مكتشفها

مراد : طيب إيه مشكلتكم دلوقتى انا مش فاهم

عز : هي لسه منفصله من كام شهر و كلمتها و قلتلها كل اللي مخبيه في قلبي من سنين لكن هي قالتلي إنها لسه خارجه من تجربه صعبه و محتاجه وقت تفكر كويس عشان متاخدش قرار و ترجع عليه تاني عاوز لما تقرر حاجه تكون مقتنعه بيها

مراد : متزعلش يا عز هيا عندها حق هيا فعلا محتاجه وقت لأن ممكن دلوقتى تسيطر عليها مشاعرها و بعد كده تفكر و ممكن تندم و الله أعلم العواقب حتكون ازاي خليها تاخد وقتها و ان شاء الله تحس بحبك ليها و تقدر مشاعرك ناحيتها و أهم حاجه انك اعترفتلها بالحب اللي جواك

عز : أديني مستني يا مراد مفيش في أيدي حاجه تانيه

مراد : عز طب انا عاوز افهم حاجه انت حواليك ممثلات و عالم تاني ليه هيا اشمعنى هيا ليه ما اتشدتش لأي واحده تانيه

عز : و انت ليه ناهد يا مراد مع انك بردو كان حواليك كتير و كمان انت مكنتش اول راجل في حياتها 

مراد احنا مبنختارش القلب هو اللي بيختار

مراد : معاك حق يا عز ربنا يختارلك اللي فيه الخير

يطرق الباب و يدخل : سلام عليكم

مراد و عز : و عليكم السلام ورحمة الله وبركاته

يسلم عليه : أهلا بحضرتك يا دكتور

مراد : اهلا بيك يا كيان

مراد و هو بيقف : تمام أنا بقى حمشي دلوقتى

كيان : هو انا جيت مشيت حضرتك

و اللا ايه يا دكتور

مراد : لا و الله يا كيان انا عندي شغل و ان شاء الله نقعد مع بعض مرة تانيه

يسلم عليهم و يمشي و يقعد كيان أدام عز : خير يا عز في إيه

عز : يعني مش عارف

كيان : و انا حعرف منين ادخل في الموضوع على طول من غير لف و لا دوران

عز : مش عاوز كارما تشاركك المسلسل الجديد ليه

كيان : عز انت عاوز تشلني انت عاوزنا نجتمع في عمل تاني إذا كان أول عمل اشتركنا فيه طلعونا بنحب بعض و حنتخطب أمال لو اشتركنا فعمل تاني حيعملوا ايه حيجوزونا و يقولوا إن احنا خلفنا مش كده

عز :" كيان إنت لا أول و لا آخر . واحد يطلع عليه اشاعات إذا كنت أنا اللي عمر ما في واحده دخلت حياتي و أخرى ضحك و هزار بس و ياما قالوا علية متجوز و مخلف و بلاوي متلتله

كيان يا ريت تفصل بين الشغل و بين حياتك الخاصه لو كل ما تطلع عليك إشاعه مع واحده حترفض تشتغل معاها يبقى اعتزل أفضل ليك

كيان : انت شايف كده

عز : أعملك إيه انت السبب

كيان : نيللي  تمثل ادامي الدور

عز : أولا نيللي متنفعش للدور ده ثانيا هو كل عمل حتاخد معاك نيللي كده حيتقال إنك بتستقوى بيها و هي بستقوى بيك و ده مش حلو ليكم لازم تنفصلوا عن بعض ثالثا بقى و ده الأهم انت ناسي ان نيللي ارتبطت بمسرحيه و انت عارف يعني إيه مسرح يعني مينفعش تشغل نفسها بأي حاجه معاه

كيان : خلاص هات أي ممثله تانيه غير اللي اسمها كارما دي

عز : ليه بس يا كيان ده حتى البنت جميله و كاريزما و بصراحه خطفت الأضواء بشخصيتها و الله انت فقري

كيان : عز

عز  بيبص في الساعه

كيان : انت وراك حاجه معطلك

عز : لا ابدا

يلاقي السكرتيرة بتخبط أستاذ عز آنسه كارما السعيد بتستئذن عشان تدخل 

عز :، خليها تدخل

كيان يبصله بغيظ

نيللي : صباح الخير

عز و كيان  : صباح النور

عز : ماشاءالله مواعيدك مظبوطه

يطرق كيان على المكتب دون النظر إليها

عز :" انا حسيبكم مع يعني شويه و راجع

كيان يبصل له بغيظ فعز يبصله بمعنى عيب كده

يخرج عز و يسيبهم مع بعض

كارما :  ازيك يا كيان

كيان :، أهلا يا كارما 

كارما : ممكن ادخل في الموضوع مباشرة

كيان : يا ريت عشان عندي مشوار و الله و مستعجل

كارما : أولا أنا اللي طلبت من أستاذ عز إنه يديني فرصه اني اقعد معاك و اكلمك

كيان : اه مفهوم

كارما : كيان هو أنا ضايقتك فحاجه في الفيلم اللي اشتغلناه سوا صدر مني أي موقف ضايقك مني

كيان : لاء أبدا

كارما : تمام و إذا كان عالاشاعات اللي طلعت فهي مكنتش عليك انت بس هي كانت علية أنا كمان بالعكس انت راجل الإشاعات مش حتضرك في شئ لكن انا بنت و أكيد الإشاعات دي حتضرني أنا و مع ذلك أنا قدرت اتخطاها و قلت مادمت متأكده من نفسي ميهمنيش حد خاللي اللي يقول يقول ما دمت واثقه من نفسي كويس

كيان : كارما انا عارف ان المقدمه الطويله دي بسبب رفضي للعمل معاكي صح و اللا انا غلطان 

كارما : ايوة يا كيان

كيان : معلش ، يا كارما انا معنديش اي استعداد يحصل أي كلام تاني

كارما : و أنا إيه ذنبي

كيان : عارف إنه مش ذنبك بس أنا مش حقدر بعتذرلك

انتي ماشاء الله عليكي موهوبه و حتلاقي غيري كتير يحبوا انهم يشتغلوا معاكي

كارما : بس انا عاوزة اشتغل معاك انت ارجوك يا كيان أنا محتاجه اقف على رجلي محتاجه يبقى لية مكان بينكم 

كيان اللي عاوزة اقولهولك و مقولتهوش لحد قبل كده ان ظروف اهلى بتجبرني على اني لازم اشتغل و اجيب فلوس تساعدهم

كيان : و هو يعني الشغل معايا هو اللي حيجيبلك الفلوس انا مش فاهم الصراحه 

كارما : لاء، طبعا الأرزاق بيد الله زي ما بيقولوا لكن الشغل معاك حيديني فرص بعد كده انت بتقول ان في يحبوا يشتغلوا معايا ده ممكن يكون صحيح لكن أنا مش عاوزة اشتغل مع أي حد و السلام انا عاوزة ابدا صح من الأول

كيان : اه و الصح يبقى معايا و بكده توصلي للي أعلى مني عايزه تاخديني سلم يعني

كارما : لا لا و الله مقصدش أنا ممكن يكون التعبير خانني لكن مقصدش و الله أنا قصدي انك ماشاء الله عليك برغم إنك مبقالكش كتير في الويط لكن سيرتك و سمعتك كويسه جدا و معروف انك مبتختارش اى حد يمثل ادامك و لما أنا أكون واحده منهم ده حيلفت نظر المخرجين و المنتجين لية كيان أرجوك أوعدك اني مش، حضايقك نهائي مش حتشوفني غير وقت التصوير بس و لا حسهر معاكم في أي مكان عام و لا حتى ححاول اتكلم معاك خارج نطاق العمل لكن أرجوك وافق على اني اشترك معاك في العمل ده انا محتاجاه أوي اهئ اهئ

كيان : لزمتها إيه الدموع دي دلوقتي

كارما : انا تعبانه أوي يا كيان انا بحاول أظهر بشكل مش حقيقي بظهر بشخصيه مش شخصيتي الحقيقيه برسم الضحكه على وشي مع اني جوايا وجع الدنيا كله

كيان انا بابا مطلق ماما سابنا وراح اتجوز بنت أصغر مني و رافض يصرف علينا انا اللي متكفله بمصاريف اخواتي و علاج أمي

امي مريضة كانسر و جلسات الكيماوي و العلاج تكلفتهم كتير اوي و لما رحتله قاللي أنا طلقتها و مش ملزم بيها انا عاوزة اشتغل و أكسب فلوسي بالحلال انت عارف يا كيان انا بعد الفيلم اللي مثلته معاك جالي عرض من رجل اعمال انه يتجوزني لمدة شهر و يديني مبلغ كبير لكن انا رفضت برغم ان المبلغ ده انا محتاجاه جدا لكن انا لا يمكن مهما حصل أبيع نفسي بالفلوس عشان كده كل أملي اني اثبت نفسي كممثله و أقدر اكمل المشوار مع امي و اخواتي

كيان انا و الله ما كنت عاوزة اقولك

كل ده لكن انا اضطريت اقولك عشان متفهمنيش غلط 

بعد فترة ليست بقصيرة و بعد حديث دام أكثر من ساعه تخرج كارما و هي تمسح دموع عينيها بينما كان عز يتحدث عبر الهاتف نيللي انا حقفل معاكي دلوقتي أشوف إيه اللي حصل

عملتوا ايه

كارما : الحمد لله يا أستاذ عز خلاص وافق انى أمثل معاه الدور

عز : و الله طيب كويس جدا عالعموم كده نقدر نتفق مع المنتج على المعاد اللي نوقع فيه العقود و نشوف حنبدا التصوير من امتى

يدخل : كانوا بيقولوا زمان ما يجيبها الا رجالها هي الآيه اتقلبت و اللا إيه

كيان  : لا يا عز بس فعلا في حاجات كتير مكنتش أعرفها عنها و لما عرفتها حسيت بجد اد ايه هي فعلا انسانه كويسه

عز : و الله طب كويس

كيان : عز متخليش عقلك يروح بعيد انا بتكلم عن مجال شغلنا و بس غير كده لاء

عز :، و لاء، ليه بس يا كيان مش يمكن

كيان : عز أنا ماشي عن إذنك 

🌹🌹🌹🌹🌹🌹🌹🌹

يجلس في مكتبه فيستمع لصوت خناقه بالخارج و يجد الشاويش يدخل عليه ويقدم التحيه له : تمام يا باشا

نديم : في إيه مين دول و إيه حكايتهم 

الرجل : بص حضرتك انا حقولك البنت دي قليلة الأدب و عاوزة تتربى يا باشا

البنت : قليلة الأدب فعينك أما انت راجل مش محترم صحيح انت اللي قليل الأدب 

نديم : بس اخرسوا انتم الاتنين في ايه

الرجل : انا حقولك يا باشا

البنت : لاء انا اللي حقول

نديم : استغفر الله العظيم انتوا وقعتوا علية منين انتوا كمان انا كنت ناقصكم اتفضلي قولي يا هانم البنت: أنا كنت سايقة العربيه حضرتك و رايحه بجيسي للدكتور

نديم : جيسي مين دي بنتك

البنت: بنتي إيه حضرتك انا آنسه دي الكلبه بتاعتي حضرتك يا ربي ده انا نسيتها في العربيه ممكن اروح اجيبها و اجي

نديم : تروحي فين هو انتي فاكرة نفسك في النادي

البنت: لاء حضرتك مانا مش حقدر اكمل كلامي  و انا متوترة أخاف عليها حد يخضها و هي في العربيه لوحدها

نديم :، يخض مين

البنت : جيسي

نديم : يا مثبت العقل يا رب بت انتي هو انتي هبله

البنت : لاء بص حضرتك انا مسمحش لحد يهزئني

نديم : تسمحي لمين و متسمحيش لمين بت اتكلمي عدل و خلصيني انا مش فايق للهبل ده عاوزين نروح

الرجل :  يا باشا هي هبله و ربنا انا يادوب لمست العربيه نزلت و فضلت تعيط و تقوللي حرام عليك العربيه عليها أقساط و لمت علية الناس و هي اصلا اللي غلطانه

البنت : لاء انا مش غلطانه انت  كداب

الرجل : اثبت عندك يا باشا سب و قذف

نديم : اخرسوا انتم الاتنين انتوا صدعتوني

انتي ايه حكايتك بالظبط 

البنت : بص حضرتك انا كنت برجع بالعربيه لورا و الراجل ده دخل في العربيه و خدشها و انا كلمته بأدب و قلتله اللي كسر حاجه يصلحها

غلطت كده حضرتك

نديم : لا مغلطيش عداكي العيب

الرجل : لا ياباشا أصلح مين البت دي كدابه و ربنا هي اللي رجعت فجأة و انا خبطتها من غير قصد

البنت : حتدفع غصب عنك

الرجل : مش دافع

نديم : اسمعوا بقى انتوا الاتنين يااما تخلصوا الموضوع ده و توروني خطوتكم الجميله و يا اما ححولكم للنيابه و يتفتح محضر و يبقى فيها حبس ليكم انتم الاتنين

البنت :، لا حبس ايه حضرتك خلاص قلبك ابيض انا مش عاوزة منه حاجه

الرجل : يعني امشي

نديم : اتفضل

يخرج الرجل و تظل هي واقفه

يرفع نديم رأسه فيجدها واقفه :انتي لسه عندك بتعملي ايه

البنت : عاوز اقولك ان هو اللي غلطان على فكرة مش انا

نديم و هو بيرجع شعره بايديه لورا: ايوة يعني انتي عاوزة ايه دلوقت 

البنت :و لا حاحه بس انا مش هبله

نديم :ماشي يا انسه

انتي اسمك ايه صحيح

البنت : شيماء حضرتك 

نديم : اتفضلي يا شيماء مش كنتي قلقانه عالكلبه بتاعتك 

شيماء : يا ربي جيسي ده انا نسيتها عن اذنك

تيجي تخرج بسرعه و الشاويش داخل بالقهوه راحت خبطه فيه و القهوه وقعت عالصينبه

انا اسفه بجد اسفه

نديم : امشي يا شيماء امشي و زعلانه اني بقول عليها هبله دي مجنونه رسمي اقسم بالله

🌹🌹🌹🌹🌹🌹🌹🌹🌹🌹

حبيبتي الف حمدلله على سلامتك وحشتيني اوي

ناهد : إنت اللي وحشتني أكتر احكيلي بقى عملت إيه من غيري

مراد : أكيد كنت حاسس بالوحده طبعا يا حبيبتي أنا من غيرك بحس اني تايه يا ناهد 

ناهد : يا حبيبي يا مراد ربنا ميحرمناش من بعض ابدا يا رب و يخلينا لبعض قللي بقى أخبار المدرسه إيه

مراد : تمام يا حبيبتي كل حاجه ماشيه زي الفل 

مالك يا ناهد شايفك كل شويه تمسحي عينيكي هي وجعاكي يا حبيبتي

ناهد : حساها واجعاني يا مراد تقريبا جو الصعيد وجعلي عينيه او عمللي حساسيه فيها

مراد : و ممكن تكوني اتحسدتي يا قلبي

ناهد : هههههه اتحسدت ليه بقى

مراد :هو معقوله العينين الحلوه دي متتحسدش دي هيا اللي وقعتني على ملا وشي و لففتني وراكي لحد ما حنيتي على قلبي المسكين

ناهد : هههههه حبيبي يا ناس

مراد :حبيبتي يا ناهد ربنا ميحرمنيش منك يا رب

🌹🌹🌹🌹🌹🌹🌹🌹🌹🌹

في منتصف الليل حيث الهدوء الذي يعم كل البيوت يستمع لطرقات على الباب يذهب ليرى من الذي يطرق عليه

ايوة حاضر

يفتح الباب ليتفاجا أمامه بفتاه ترتدي بيجامه عليها رسوم كريكاتيريه شعرها أسود طويل إلى حد ما

نعم عاوزة حاجه

البنت و هي بتبص له تتفاجئ به و هو كذلك يتفاجا بها أمامه

مش انتي البنت بتاعة الخناقة اللي كنتي عندي في القسم النهارده 

البنت :حضرتك الظابط اللي قلت علية هبله صح

نديم : هههههه شيماء صح كده انتي ايه اللي جابك هنا و بتخبطي علية ليه حد خبطلك العربيه تاني

شيماء : لاء حضرتك انا ساكنه هنا في الشقه دي

نديم :ساكنه هنا ازاي

شيماء : زي الناس انا هنا بقالي اسبوع

نديم : انا مش بقولك أمتي بقولك ازاي دي سقة بشمهندس أنور

شيماء : ايوة ما هو خالي و سافر من اسبوع و قاللي اجي اقعد فيها لما عرف اني جيت اسكندريه اشتغل

نديم : اه اهلا بيكى

شيماء : يا ربي شفت اديك نستني كنت بخبط عليك ليه

نديم : خير قولي

شيماء : شغف تعبانه أوي و عاوزة أوديها للدكتور

نديم : شغف و دي مين دي كمان كلبه بردو و اللا قطه

شيماء : لاء كلبة إيه و قطة إيه حضرتك دي أختى الصغيره

نديم : أختك الصغيره  مالها

شيماء : سخنه أوي و اديت لها خافض مش نافع و انا معرفش هنا اي دكتور و لا مستشفى فقلت اخبط على اي حد اسأله مكنتش اعرف اني حقابل حضرتك بجد صدفه يعني و لا في الخيال

نديم :اه فعلا بس انتي ازاي حتنزلي بيها لوحدكم دلوقتى و اللا انتي في حد معاكي جوة حينزل معاكم 

شيماء : لا مفيش انا عايشه هنا انا و شغف لوحدينا انا حوقف تاكسي المهم هو في حد حلاقيه دلوقتى موجود

نديم :، اه في مستشفى الشروق قريبه من هنا بس بردو مش حينفع تنزلوا لوحدكم الوقت اتأخر

شيماء : ما هو انا مش حينفع استنى للصبح و كمان العربيه لسه مصلحتهاش فأنا مضطرة انزل بيها

نديم : طب اتفضلي روحي هاتيها على ما البس حاجه و انزل معاكم

شيماء: تنزل معانا فين لا و ربنا ما يحصل مش كفايه عليك دوشتك بالنهار كمان بالليل ده كتير عليك ضربتين في الرأس بتوجع

نديم  : هههههه دمك خفيف بجد ياللا بقى هاتيها هي اسمها ايه قولتيلي

شيماء : شغف

اصلهم سمونا

نديم : سموكم و لسه عايشين

شيماء : لاء سمونا مش سممونا

نديم و شيماء  : ههههههه

نديم :، بس يخربيت فقرك الجيران حيفتكروني شاقط واحده

شيماء : شاقط واحده واضح ان سمعتك ما شاء الله 

نديم : نعم بقولك ايه خلصي ياللا

بعد شويه يدخلوا المستشفى و نديم شايل شغف اللي تقريبا في نفس عمر غزل و يكشفوا عليها عند دكتور الطوارئ و يكتبلها العلاج و نديم يصمم انه يدفع الكشف و العلاج و يشيلها لحد باب الشقه و يديها لها و يدخلوا الشفه و يطلب من شيماء رقمها عشان يطمن على شغف

يدخل اوضته عشان ينام بس يلاقي نفسه تلقائي بيفكر في كل اللي مر عليه طول اليوم و ازاي الصدفه تخللي بنت زي دي تطلع ساكنه جمبه معقوله دي صدفه و اللا القدر هو اللي حطها في طريقه لا بس هو مصمم لازم يعرف كل حاجه عنها يصحى الصبح و يروح مكتبه و اول حاجه يعملها يتصل عليها عشان يطمن على شغف

وهي تطمنه و تقولله انها بقا احسن و طلب منها انه لما يرجع يطمن عليها بالتليفون بردو لانه عارف انه مش ممكن يدخل شقه فيها بنتين لوحدهم 

بعد الضهر يدخل الشقه و يتصل عليها و يطمن انها بقت احسن : انتي منزلتيش شغلك النهارده صح

شيماء  : لا طبعا منزلتش اتصلت بالشركه و عملت النهارده اجازة

نديم  :امال انتي بتسيبيها فين لما بتروحي الشغل

شيماء :بوديها الحضانه اللي في العماره اللي جمبنا

نديم :طيب كويس اوي

مقلتليش بقى ايه حكاية اسمها الغريب ده

شيماء : أصل ماما الله يرحمها 

نديم : هي مامتك متوفيه

شيماء : أيوة اتوفت بعد ما ولدت شغف بشهر

نديم : لا حول ولا قوة الا بالله العلي العظيم ربنا يرحمها انا اسف

شيماء : الله يرحمها يا رب هي تعبت أوي بعد الولاده عشان كان عندها القلب و المفروض ما كانتش تجيب ولاد بعدي و بعد ما جابت أختي قلبها مااستحملش فضلت في العنايه المركزه فتره و بعد كده حالتها ساءت و اتوفت هي ماما كان اسمها شيرين و بابا اسمه شريف عشان كده قالوا حنسموا ولادنا بحرف الشين بس هي دي الحكايه فسموني شيماء و اختي شغف 

نديم : و بابا مش عايش معاكم ليه

شيماء : احنا اصلا من القاهرة

نديم : بجد تعرفي اني انا كمان من القاهرة انتي منين في القاهره

شيماء : من المعادي

نديم : طيب و ايه اللي حصل

شيماء : بعد وفاة ماما بابا طبعا زي اي راجل مصري أصيل قرر يتجوز لكن المشكله مش في انه اتجوز المشكله ان مراته مش عاوزانا سابنا مع تيته كانت بتراعينا انا و اختي لكن عشان حظنا الجميل تيته هي كمان اتوفت من كام شهر و انا قدمت في شركه اشتغل

فالحمد لله اتقبلت بس هنا في فرع اسكندريه خالي فرح جدا و قاللي تعالي عيشي في شقتي انا كده كده مسافر عندي شغل بره بس و جبت اختي و جينا

نديم : و بابكم ازاي يسيبكم تيجوا تعيشوا هنا لوحدكم

شيماء : ماهو سبنا قبل كده مع تيته  بنت عندها عشرين سنه و طفله عمرها تلت شهور حتفرق معاه حاجه لما نيجي هنا 

نديم : هو اتجوز بعد وفاة مامتك بشهرين

شيماء : مش بقولك أصيل

نديم : هههههه و انتي بتشتغلي إيه 

شيماء : انا خريجة السن و بشتغل مترجمه 

نديم : بس انتي مش حسه انك متحمله مسئولية انتي المفروض مكنتيش تتحمليها لوحدك

شيماء : قصدك شغف

نديم : أيوة

شيماء : شغف دي مش اختي دي بنتي اللي مقدرش استحمل انها تبعد عن حضني لحظه واحده

نديم : و لما تتجوزي

شيماء : معايا و قبلي كمان اللي ربنا حيكتبله الهنا طبعا و تبقى مامته داعيه عليه قصدي داعياله و ياخدني يا اما ياخدنا احنا الاتنين يا مع السلامه

نديم :حتى لو كنتي بتحبيه

شيماء :حتى لو بموت فيه انا اختي و بعدها الطوفان

نديم : و الكلبه

شيماء : جيسي دي حبيبتي هي كمان 

نديم : ربنا يخليكم لبعض كلكم

شيماء : ههههههههه 

فضل يتكلم معاها اكتر من ساعتين اتكلموا في حاجات كتير و تقريبا عرفوا عن بعص حاجات اكتر

شيماء : هو احنا بقالنا اد ايه بنتكلم 

نديم :  بقالنا حوالي ساعتين و نص بنتكلم

شيماء : معلش انا اسفه انا اصلي رغايه

نديم : بالعكس انتي ماشاء الله عليكي الكلام معاكي ممتع جدا ميتشبعش منه

شيماء : طيب حسيبك بقى عشان اقوم اعمل حاجه سخنه لشوشو تأكلها

نديم : ماشي بس ممكن تسمحيلي ابقى اكلمك اطمن على شغف

شيماء : ايوة طبعا

يقفل التليفون معاها و هو مبسوط اوي من المكالمه ليه ميعرفش بس هو حاسس انه مبسوط اوي فرحان

🌹🌹🌹🌹🌹🌹🌹🌹

بعد مرور يومين

ايه يا حبيبتي مصممه بردو تنزلي و انتي عينيكي وجعاكي كده

ناهد: ايوة طبعا يا حبيبي النهارده أول يوم في استقبال اولياء الامور اللي جايين يقدموا لأولادهم و لازم أكون موجوده

مراد :و عينيكي يا حبيبتي

ناهد : حلبس النضاره حعمل ايه

عشان محدش يفضل يقوللي عينيكي مالها

مراد و هو بيبوس ايدها :سلامة عيونك الف سلامه عليها يا حبيبتي

تنزل من الشقه و هي في ايدها : صباح الخير يا تيته

تاخدها مشيرة و تحضنها :حبيبة قلب تيته يا ناس اللي كبرت و حتروح المدرسه

هو انتي لازم تاخديها معاكي و انتي بتقدمي لها

عطر : أيوة يا طنط هو النظام عندهم كده

مشيرة : تقدميلها و ترجعوا على طول

عطر  : حاضر يا طنط

بعد مرور القليل من الوقت

تستئذن و تدخل : السلام عليكم

ناهد : و عليكم السلام ورحمة الله وبركاته اهلا وسهلا

عطر : اهلا بحضرتك يا افندم انا بنتي عمرها أربع سنين و كنت عاوزة اقدملها هنا في المدرسه عندكم الصراحه الكلام اللي سمعته عنها شجعني إني اجى اقدم لبنتي فيها

ناهد :_اهلا وسهلا بيكي حبيبتي طبعا ده شرف لينا انتي بقى يا قمراية اللي حتنورينا في المدرسه

تضحك الصغيره

ناهد : بسم الله ماشاء الله اسمك ايه بقى يا قمرايه انتي

عطر : قولي اسمك يا حبيبتي للميس

غزل : غزل

ناهد : غزل الله اسمك حلو اوي يا غزل و كمان ما شاء الله عليكي زي القمر

عطر : متشكرة اوى لذوق حضرتك ممكن اقدر اعرف التفاصيل

ناهد : هو حضرتك دلوقتي حتروحي للسكرتاريه حتملي استمارة طلب التحاق و ميس ساميه حتبلغك بكل اللازم و الأوراق المطلوبة و حتقولك عالمصاريف و طرق السداد

عطر _انا متشكرة اوي لحضرتك يا ميس

_انا ميس. ناهد 

🌹🌹🌹🌹🌹🌹

 •تابع الفصل التالي "رواية يكفيني منك عقابا" اضغط على اسم الرواية