رواية جرح الأيهم الفصل الثالث و العشرون 23 - بقلم أيلان
"الجُــرح الثالث و عشرون"
"عَاديّة ، وَلكِنها مُبهِره بِعاديتّها ✨."
مُلاذ آمن ذات العيون الكحلاء
ذو الملامح الجذابه و العيون السوادء
تصدر اصوات طرق كعبها على ارض المحكمه
تخطي خطواتها بـ ثقة ، رافعه راسها
تتوجهه الانظار نوحها بـ انبهار و عيون تلمع
يتنقل الحديث بينهم بـ همس عنها
لَكن اذانها صاغية الهم تلتقط اصواتهم الخاطفة
و همَ يستائلون بـ استغراب ...
-منو هاي المحامية ؟
-هذي المحامية مُلاذ .
مُلاذ :-
خرجت من المحكمه بعد ما نهيت دفاعي
اتأجلت القضية الى موعد اخر
اتجهت لـ سيارتي ، قبل لا اركب
استوقفني صوتها التفتت و وگفت بـ مكاني ادحگلها
تتجهه ناحيتي ابتسمت بـ خباثة و گالت
-ما عرفناج ؟
صرتي حديث المحكمة من البداية
مُلاذ : امم شي حلو عجبني
يا ترى كان الحديث لطيف او بشع؟
-بشع ما تتخيلين شگالوا
مُلاذ : اوباااا عود ردت اصادقهم
يلا خيرها بـ غيرها
-گالوا منو هاي المحامية التمشي هيج
داخلة المحكمه و مشيتها تهز الكاع
ضحكت و گلت
مُلاذ : غاده توبي من سوالفج
ضحكت هي هم
سلمنا على بعض
غاده : تمشين بسرعة شجاج
منو يركض وراج خالووو؟
اشرت الها بـ عيوني
مُلاذ : شوفي بـ نفسه اليركض وراي
اندارت و دحگت
كشولت ملامحها
غاده : هَم اسكندر ؟
ابتسمت و فتحت باب السيارة
درت وجهي الها ، گلت
مُلاذ : اكو غيره؟
غاده : امشينا داده امشينا
لا اركض وياج هسه
ضحكت و صعدنا السيارة
رفعت تلفوني ، اتصلت على ضرغام
مُلاذ : صباح الخير سيدي
ضرغام : اهلاً حضرة المحامية
ضحكت و كملت كلامي
مُلاذ : كدرت توصل لـ الشاهد
يلي حجالنا عنه اركان؟
ضرغام : جاي ندور و حاولت اتواصل ويا
و ان شاء الله قريباً الگاه لا تخلين بالج مُلاذ
مُلاذ : ان شاء الله اي تطور بلغني
ضرغام : من عيوني
مُلاذ : سالمات
ضرغام : الله يسلمج
نهيت محادثتنا ،
نزلت التلفون سديت الاتصال
التفتت لـ غاده يلي تخط حمرتها
و هي تدحك بـ مراية السيارة
التفتت الي و دحگتلي قدمت الي قلم الحمرة
غاده : تخلين ؟
مُلاذ : جؤ
شغلت السياره
طلعت بيها ، حجيت و انا اسوق
مُلاذ : شلونه باهر ؟
التفتت الها و هي ابتسامتها متوسعه
ابتسمت على ابتسامتها ، رجعت درت وجهي
ادحك للطريق و اسوق
غاده : ختشيبي زين بس...
مُلاذ : اي ؟
صفكت بـ ايديها و اندارت الي
گالت بـ حماس
غاده : البارحه حددنا موعد العرس
مُلاذ : سمعونا احلى هلهوله
خليت ايدي على حلگي و هلهلت
و هي تضحك و انا اضحك على ضحكتها
مُلاذ : اي شوكت خليتوه؟
غاده : يوم الخميس مو هذا الي بعده
مُلاذ : لا تگوليها
غاده : و الله لييش؟
مُلاذ : عندي سفر يول
يوم الخميس الي بعده اروح لـ تكريت
غاده : اهووووو شتسوين هناك؟؟
مُلاذ : اريد اشوف دكتور زين لـ امي
وجع راسها جاي يشتد
و هم اريد اشوف دكتور على مشيها و الشلل،
هاي الفترة انا كلها مشغولة بيها
بين محل الورد و بين شغلي
و هيثم مسفطلي جدول من الاعمال
بس الخميس يلي بعد هذا الخميس افرغ
غاده : اجليها مُلاذ فدووووه
مُلاذ : و الله ما اكدر و يوم الجمعة
واعده ملاك اطلعها و افرها و اوديها اشتري الها
و عندي طن اشياء اريد اخلصهم منا للخميس
غاده : مو رح نبدي التجهيزات ؟؟
مُلاذ : زين انتوا بيش الساعه تسوون العرس؟
اروح بـ نفس اليوم و ارجع
غاده : نسوي العصر اكيد
مُلاذ : اي لعد هاهيه
اروح بـ نفس اليوم و ارجع
غاده : و اذا تأخرتي ؟
مُلاذ : ما اتأخر لا تخافين
شفتيني بـ يوم تاخرت عن موعد
غاده : ابددددد
مُلاذ : عفيه عليج
غاده : اگلج شو باهر لسا ما راواني اهله
بس الي عرفته رماد اخوه و عرفني على امه
من اجت خطبتني الباقي اطرش بالزفة
مُلاذ : هو غير رح تطلعون گبل لـ بيت وحدكم؟
غاده : اي بس مادري تدرين بـ فضولي
مُلاذ : عليمن يمعوده متعرفة عليهم
و مدوخه نفسج فرد نوب اطلعوا لـ بيتكم و استقروا
شوية شوية تعرفي عليهم بعدين
هو كافي صدمتج و صدمتي لمن عرفنا أيهم اخو
غاده : هم صح
هزيت راسي ، وصلتها لـ بيتها
و طلعت لـ بيتنا ...
هتان:-
دخلت البيت متكسرة من التعب
بعد ما كنت وي باهر طالعين و متونسين
عاينت لـ امي يلي كاعدة بـ الصالة
ضامه ايديها لـ حجرها لمن شافتنا ابتسمت
-هلا بيكم يمه هلا بيكم
اتقدم باهر باس گصتها
رحت وراه بست خدودها
التفتنا على صوت ابوي يلي يرحب بينا
اجا ناحيتي ، ضمني لـ صدرة وهو يشدني اله اكثر
ابوي : تونستي ؟
هتان : اي
حضنته و حاوطته بـ ايدية
عاينت لـ امي يلي رغم ابتسامتها
القلق متوضح بـ نظراتها يلي تتنقل بيننا
ابتعدت عن ابوي لمن اتقدم
راح على امي و هو يحجي بـ خشونه
واضح بيها تَبدل احواله و عصبيته
ابوي : ما اتصلتي على ابنج!!
يعرف بـ وجودي هنا ، واحد طالع يلفي بالليل
و الثاني دايح بين البيوت و المحافظات !
ما عرفتي تربيهم و لا تكعديهم بـ مكانهم
باهر : يابه امي شعليها همَ غير عدهم شغل؟
شغلهم يتأخر أيمن الاسبوع الجاي يجي
انا البارحه خابرته و حاجيته
ابوي : اكطع حسك حديثي وي امك
انت تلتزم الصمت و تترك الدفاع
اذا كنت محامي وظيفتك بـ المحكمه مو بـ البيت !
دفع باهر عنه و طلع ، صك اسنانه باهر بـ عصبيه
تركنا و صعد فوك ، التفتت ع صوت ضحكة لينا
لينا : عائلتكم تونس كُلش
امي : لينا رجاءاً ضبي لسانج
ما نريد مشاكل اليوم شوفي ابنج وين ما وين؟
المسكين نام كعد ؟ اكل شرب ؟ جوعان عطشان؟
لينا : و شبي قابل شو ماكو شي عليه
ما تگلين لـ ابنج يهتم بي
امي : ابني مهتم بي و صايرله اب و ام
يا ريت تاخذين دورج و تقومين بي
اذا اكو بينكم مشاكل هو ماله علاقة بيكم
و بـ مشاكلكم بـ علاقتكم مو جنتي رايدة خلفة
لينا : ردت و يا ريتني ما ردت
شو ظل عاله على گلبي كل شي ما حصلت من وراه
هتان : هو طفل شنو وجهه الظل عاله على گلبج
بعدين شتحصلين مثلاً يصير وريث عائلتنا
الي يسمعج يگول كاعدين بـ عهد السلطان سليمان
شو امي الجاي توكله و تشربه و تنومه و تكعده
و كله امي ما فد يوم شفتج شلتي حضنتي بستي
نومه ما نومتي يمج من انولد لسا و بس تكتلين بي
ما ينسمع غير صريخة و صوته مشحرج
عمره ايام عفتي و رحتي صار عمره ٦ اشهر
يلا رجعتي و و لا عبالك هم اذيتي زايد
و مواقفج تشهدلج حطيتي ايدج بـ خوانيكه
و تريدين تموتي لان يبجي و لو ما متلاحگج أيهم
جان هسه ميت من وراج جان هسه انتِ كاتله ابنج!
ظلت ساكته و تكرض بـ شفتها
و تخوزر بينا شمرت المندر من حضنها
كامت صعدت فوك و هي تدردم و تحجي
هزيت ايدي حقه أيهم من ما يريدها
امي راحت تشوف شنو تسوي عشا
رغم عدنا مساعده بالبيت
بس امي دائماً هي يلي تسوي العشا
لان أيهم ما يحب الاكل غير من ايدهه
صعدت لـ غرفتي ، بقيت كاعده فوك اتمكيج
ابدل بـ ملابسي او اسوي اي شي يلهيني
جريت تلفوني و كعدت ع الجرباية
انرسل الي طلب متابعة دخلت ع الحساب
عاينت للـ اسم "غاده" لَكن الاسم بـ الانگليزي
ابتسمت و دزيت الها مسج "احلى من يتابعني"
ردت عليه خلال لحظات و كتبت "حياااتي"
ابتسمت تاركه رسالتها
طلعت من غرفتي اتوجهت لـ غرفة باهر
دخلت و هو اندار عاين الي
باهر : گولي هتانيزو
هتان : غاديزو دزتلي متابعة
ضحك و هز راسه
باهر : اي گلتلي
هتان : ايمن رح يجي علمود عرسك
مو علمود ابوي هنا مو؟
هز راسه بـ قبول
باهر : شوكت ينتهي هذا التشتت ما اعرف
هتان : اذا هذا الشي يخلي أيهم و أيمن مرتاحين
فـ من الافضل نبقى هيج
باهر : بس امي تشوفيها ما مرتاحه
هتان : لو اعرف السر بين أيهم و أيمن و ابوي
راح يرتاح گلبي و لو نتفه
باهر : جهل المواضيع احياناً افضل من معرفتها
ما دام رَماد صاير سد للموضوع حتى ما يوصلنا
معناها يلي جاي يسوي صحيح
رفعت اكتافي بـ عدم معرفة
ما دام هذا الهدوء الا لـ لحظات
اتصادرت النا اصوات الصياح
غلس باهر و دار وجهه يكمل شغله
گمت انه و طلعت من يمه ، نزلت
اسمع صوت الصياح من غرفة أيهم
أيهم : مااااا اريدج اطلعي من غرفتي
ما اريدج يا بشر گوه هي ؟؟؟
غلطت لينا و هي تحاجي أيهم
تتعارك وياه لان ما يريدها
همَ اساساً كلمن بـ غرفة
و هو ما يدخل لـ الغرفة الي هي بيها ابد
حاول يفهمها و يتطلكون بس هي رافضة
مچلبه بـ خوانيكه ما تقبل تعوفه
على الرغم اهلها زينين وياها و ابوها يعشقها
بس هي تريد أيهم و تخاف منه تشبع كتل
و ترجع و تحاجي و هو اجا وياها بالحسنى الف مره
كل شي سوه حتى تعوفة و هم ما عافته
بالعكس زادت ما نقصت خبلته خبال
بعده هستوه راجع للبيت تكمز تروح اله
و هو الدنيا طالعه من عينه
لو يسمع تكتل بـ أبيل و تغلط على امي و علينا
لمن تخابر اهلها تبسط بينا
تحجي حتى عن كم مره سبحنا و اكلنا و نمنا
وين طلعنا ، شسوينا ، تحجي كل شي لـ اخواتها
طارده ابنها من يمها و اصوات الدبج و الاغاني
اربعه و عشرين ساعه بـ البيت
امي من النوع التضوج من الاغاني و تشغل قرءان
لذالك تطلب منها تنصيهن
بس هي تنهال بالحجي و الغلط على امي
بـ كل مره يسمعها أيهم ، عنده امي خط احمر
يتخبل و لا واحد يحجي عليها لو يمسها بـ طرف
لمن كنا صغار اتذكر تصير مشاكل بين أيهم و ابوي تگوم الدنيا ما تكعد لان ابوي رفع صوته على امي
او لان يضربها كم مره و كم مره أيهم و ابوي
صار مطاحن بيناتهم يتخبلون من بعض
أيهم يكرهه ابوي كرهه العمى
بس من هو ما موجود يجي للـ البيت
فوكاها لينا خلوه يكرهه كعدة البيت
بالتواسيل من امي يلا يجي و يكعد ويانا
كل كعدته علمودنا انه و باهر و أبيل و امي
لمن كان صغير على طول أيمن وياه ما يتركه دقيقة
و بالنهاية خلاه يسافر حتى يحصل ع تعليم افضل
و قبلها سفرني انه هم و خلاني ادرس
بـ احسن المدارس ، من فترة انقطعت اخبار أيمن
بس أيهم يلي يدري بي وين و شنو يسوي
لمن اجا ابوي لـ هنا صار أيهم ما ينطينا اخبار أيمن دائماً بَعدنا عن ابوي و السبب مجهول ...
تنهدت و عيني على لينا
يلي طلعت من غرفته معصبة
و تمشي و تدردم ، امي ساكته ما تدخلت
أيهم يمنعنا نتدخل بـ مشاكلهم و هالشي افضل
عبرت من يمي و هي تريد تاكلني بـ نظراتها
صعدت الدرج و راحت فوك
عاينت لـ امي يلي گامت بـ هدوء الهم مالي گلبها
توجهت دخلت لـ غرفة أيهم
اسمع صوتها تحاجي و تهدي بيه
امي : ما يصير تتعامل وياها هيج يا ابني
هي الها حق مثل ما انت الك حق
لازم تقدرها و تفهمها و تضغط على نفسك
أيهم : يمه تحجين عبالك ما تعرفيني و لا تعرفينها
شفتيني شكد حاولت ايام اجبر روحي
بس ادخل يمها اجيت اركع راسي بـ الحايط
تخبلت من روحي ما اتحملها كعدت يمها بس كعدت
خبلتني سودنتني ما اريدها يمه مو هي الهاويها گلبي
امي : عليش قبلت؟
سكت أيهم و اختفى صوته
رجعت امي كررت سؤالها
امي : ليش قبلت أيهم
من بعد كل ذاك رفضك ليش قبلت؟
أيهم : هذا الجان لازم يصير يمه
عندي سببي و قبلت بيها و ساعة السودة
امي : ليش تاخذها بـ الصوت و الصايح
يا ابني بـ هداي بـ هداي حجيك وياها
أيهم : حجيت بـ البداية و گلتلها
يمعوده اطلعي و سدي الضوه خل انام
خل ارتاح صارلي مدري شكد ما نايم
و عندي وراي شغل بـ المستشفى ما تطلع
دحگت لـ أيهم من فتحة الباب
يحجي بـ حرگة اعصاب
أيهم : شوفيها شسوت؟ هاي تصرف بنيه !
هي گوه ما اريدها تجز روحي منها
تتصرف بكيفها بـ الغرفة و تغير
و تدور بـ غراضي و متمدد و ساكت
وكفت الي يشوفها يگول زعطوطه
تكمز ع الجرباية هم سكتت
طاحت عليه و سكتت ، تلزك روحها بيه و ساكت
ما اريدها يمعودين ما اريدها شسوي بعد ؟؟
كعدت و حاجيتها و كدام عينج
گلتلها نفقة و كل شي تريدين يجرالج
شتريدين گليلي و اسويلج بس خل نتطلك
جزعت روحي منها ما اريدها
كل يومية امها و خواتها جاياتني
شنو تكتل بتنا هي بتهم عرفوا يربوها ؟
ذاك اليوم ادخل المطبخ اعاين لـ حركاتها وي هتان
و اسلوبها وياها يخزي و هتان تعيط بيها و ما تبطل شنو هالهيلگه و الاستهتار هذا !
تلعب نفسي من هيج مخلوقات انه نوب مرتي ؟؟
و تعرفين باقي سوالفها
ماكو داعي اسولفلج و اطلع قذارتها
دگت امي على رجلها تلوب بـ قهر
امي : اوف اوف و تالي؟
أيهم : هذا التالي ما تتطلك خليها
تنكتل نتعارك نتصايح نگلب البيت
ما عليه انه سطرت الفرص كدام عينها
و ما استغلت هاي الفرص و راحت
هسه خل تتحمل الي يجيها مني
تركتهم و رحت للمطبخ ، اخذت كاسة مي شربتها
اجت امي وراي و طفت نار العشا
امي : اتعشوا يمه اذا تريدون
هزيت راسي بـ قبول و هي راحت
اخذت كاسة مي لـ أيهم قبل لا ادخل
وكفت بـ الباب اعاين اله
فاتح الشاشة يلي بـ غرفته و كاعد ع القنفة
الشاشة صايره بالطرف و مو واضح الي بيها
أيهم مشغل اغنية و معلي صوتها
يدخن و يعاين لـ الشاشه گال بـ صوت واضح
ما يعرف بـ وجودي بـ الباب
أيهم : يا لَـذة الأيهم ، يا جَرح گلبه.
ظليت اعاين اله و هو ساكت و يشاهد
مره يبتسم مره يعبس مره تعتدل ملامحه
درت وجهي ، رجعت كاسة المي للمطبخ
تركته بـ راحته و صعدت لـ غرفتي ...
غاده :-
مخبوصه خبص بـ تجهيزات العرس
اركض منا و اروح منا و مملحگه
صحيح ما گلت الكم
تطورت علاقتنا انا و باهر بـ مرور الايام
لمن اتقدم الي طبعاً بـ وجود مُلاذ
قبلت بي و انا مرتاحه راحه تامه
خصوصاً بعد ما تعرفت عليه كلش زين
عرفت ايجابياته و سلبياته
اگدر اگول السلبيات شبهه معدومه عنده
انسان خلوق و محترم و عنده نفس خبالي طبعاً
و هذا احد اسباب قبولي لان نتوالم
طلعت للسوك اكمل تجهيزات العرس
طبعاً جريت صافيناز وياي للـ السوق
مُلاذ عدها شغل ما كدرت تجي ويانا
نور و ملاك وحدة عدها امتحانات
الثانية ما تكدر تطلع من البيت
اتفقنا على غير يوم كلنا نطلع سوية
و حلفت ازعل منهن اذا ما اجن و وعدني يجن
صافيناز الوحيدة يلي فارغة اخذتها وياي
جسار و اهل مُلاذ شبهه همَ من عائلتنا
لذالك طلبت امي من جسار يوصلنا للـ سوق
ردت اختار وي باهر گلتله هو هم يجي
التقينا بـ جانب احد المحلات و امي ويانا
و ام باهر كذالك و اخته هتان و ولد ما عرفته
تسالمنا و جسار واكف ويانا
شايل كم علاكه ، امي اشترت اشياء
ما خلاها تشيلهن هي شالهن بدالها
باهر : اعرفكم على اخوي أيمن
دحگتله يشبهه باهر بس مو كلش
ملامح أيمن عصبيه اكثر حسيتها مثل أيهم اخو
اما باهر فـ شكله كلش طفولي
أيمن : شلونها مرة اخوي ؟
اعذريني ما حضرت الخطوبة
باهر : اصلاً ما سوينالها حفلة لو شي
اجلناه كله للعرس
أيمن : دللها بالخطوبة خويه ترا تكضك
تشمرك بـ الحديقة تنومك انه ما عليه بعد
ضحكت هزيت راسي
اوافق أيمن بـ كلامه
باهر : انطيتها فكرة هسه انت
أيمن : كيدهن عظيم اخي
بدون ما انطيهن افكار يفكرن
ضحكنا و هم راحوا يشوفون قوط و اشياء
مشينا انا و باهر بـصف بعض
غاده : رَماد ليش ما اجا؟
باهر : يضوج من سوالف المشتريات و الفره
طفرني انه و أيمن سرسحنا
ضحكت و التفتت لـ امي يلي واكفه يمنا
تكرص بيه و تمشي ، تجر بيه عليها
وكفت يمها ، قربت اذاني منها و هي تهمس
جنات : ولج حطي حجارات بـ جيبج
شرگتي حلگج الله يرحم ايام گبل
جنت اخجل احاجي ابوج هسه البنات فلتن
استمرت تحجي عن اخلاقي و ادبي
لحد ما وصلنا للـ محل سكتت من شافت دشاديش
دخلت تدور و نستنا انا و باهر برا
التفتت لـ صافي يلي واكفه ورانا
و وراها واكف أيمن و اهله و جسار
جريتها يمي حتى ما تضوج لـ وحدها
صافيناز : شوفي هذا كثير حلو
و الله بـ يطلع ياخذ العقل لما تلبسيه
رحت ادحك لـ ملابس يلي اشرت عليها
و فعلاً عجبني ، ظليت ادور الوان ثانية
التفتت لـ ام باهر و هي تعدل بـ شعر صافيناز
ام باهر : شسمج انتِ يمه شو اول مره اشوفج
شهالحلاوه هاي ما شاء الله
صافيناز : تسلمي خالِه ، اسمي صافيناز
ام باهر : يا يَ بعد وجهي
شهالأسم الحلو و نوب هي احلى
صافي صارت حمره من الخجل
و أم باهر تمدح بيها طلعت لـ يمهم
أيمن : شو لهجتها غريبة علينا؟
غاده : سوريه صافي
أيمن : ايبااااه طلع اكو سوريين بالعراق
ظلت صافيناز ساكته
باهر : موجودين اكثر من عدنا ههههه
ابتسمت صافيناز بـ هدوء
ام باهر : مبينه من هاي عيونها الحلوة
هي سوريه ذيج وينها تخبل
ضحكت صافيناز
گالت بـ لهجتها السورية : شكراً خالِه
ام باهر : يا يَ بعد الخالِه
اتنقل نظري بين صافيناز و أيمن
رجعت دحگت لـ باهر تدنيتله و گلت
غاده : هل تفكر في ما افكر؟
باهر : فكرت و الله انتظري نخلص العرس
و نشتغلهم شويه شويه هههههه
ضحكت و هزيت راسي بـ قبول
رجعنا نكمل مشتريات و مشي و فره ...
هتان :-
ابتعدت عنهم
رحت ادور على فساتين بـ محلات قريبة
دخلت ادور و عيوني تمشط الفساتين
ذوقي صعب كلش بـ هاي المواضيع
لذالك امي طلقت الي العنان اروح و ادور
بعدت شعري عن اكتافي لـ ورا
ضميت ايد بـ ايد و انه امشي و اعاين
طلعت من المحل و گمت امشي مسافة
عيوني تتجول ع كل الفساتين
استذكر المواصفات يلي اريدها
فكرت افصل فستان حسب ذوقي
بس ما اعتقد نلحك و فعلاً لمن شفت الفساتين
ايقنت لازم افصل فستاني حسب ذوقي
وصلت قريب الشارع
شهگت لمن انعتيت من ايدي
التفتت عاينت لـ ولد جار زندي
تذكرته نفسه يلي كان واكف هناك يم غاده
عاگد حواجبه و يخوزر گال بـ عصبية
جسار : انتِ وين تمشين عمياااوي؟
ما تشوفين السيارات شلون تخطف خطف؟
عگدت حواجبي مستغربة هذا شبي؟!!
و هو كمل كلامه بـ نفس النبرة
جسار : و رجليج طالعات و تفترين
ما تشوفين ولد السوك انتِ !!
دفعته عني
هتان : و انت شعليك عاد؟
جاي تصيح بـ وجهي و تحجي على رجلية
و تنتقدهن احترم نفسك !
جسار : ما تعرفين مصلحتج انتِ
شوفي نظراتهم الج من اللائق ينظرولج هيج؟
و نوب رحتي ع الشارع بالله اندعمتي؟؟
بالله ضعتي من اهلج شلووون ؟
هتان : شعليك انت؟
ابتعد عني گال بـ نفس الغضب
جسار : لـ مصلحتج بكيفج خليج هنا
تركني و استدار منطيني ظهره
يلي جنه درع مو ظهر شكبره
راح يمشي من الطريق الاجا منه
انه واكفه استوعبت ابتعدت عن اهلي
رفعت عيني لـ نظرات الاولاد على رجلية
فعلاً هسه استوعبت نظراتهم
جريت التنوره لـ جوه اكثر اغطي نص رجلي
طبعاً لان أيهم ما طلع وياي لبست هيج
لان أيهم ما يخليني البس هيج لبس يتخبل منه
اكو ملابس مشتريتها اضوج لان اخليها بـ الكنتور
قررت البس هذي التنوره و ليتني ما لابستها
ركضت ورا الولد الضخم هذا
صحت وراه لان ما اعرف اسمه
هتان : يَ الولد الضخم اوكف
اركض و اجر بـ تنورتي
و هو يمشي سريع ما يسمعني
انه اصيح و هو ما يوكف
صرخت لمن انجبحت ع الكاع
انضربت رجلي بـ حجاره عطت متوجعه
رفعت عيني ع الولد وكف و التفت
دحگلي لمن شافني ذب الغراض من ايده
ركض عليه و اجاني و كم شخص التموا علينا
لمن شافوني وكعت ، دخلت بـ نص هدومي من الفشلة
جسار : شبيج شصاااار ؟
رفعت تنورتي بـ خفة
دحگت لـ ركبتي تنزف و توجعني
دحگلها الولد و رجع دحگلي
جسار : شجاج يول شجاج شلون وكعتي ...
رفع عينه دحگلي و دموعي تنزل من الوجع
و هو يحجي سكت بـ نص كلامه ، ظل يدحگلي
جسار : لا تبجين هسه نعالجها
خو ما توجعج ؟ تكدرين توكفين؟
هزيت راسي بـ معنى ما اعرف
المناشغ بـ صوتي لان تاذيت بـ الوكعه
مد الي ساعد ايده لزمت بي
ركض واحد صاح لـ الولد گله يكعدني بـ محله
وكفت على رجلي و هي توجعني كلش
اخذ الولد الغراض و كعدنا بـ المحل
جر الولد كرسي ، كعد كدامي ، مسحت دموعي
التفتت الولد اخذ كاسة المي
من صاحب المحل لمن قدمها اله
خلاها بـ ايده و يعاينلي
هتان : من وراك وكعت
جسار : هلو؟ انا شعليه؟
هتان : صحت وراك
خليتني اركض و ما وكفت
جسار : شوكت؟؟ ما صحتيلي؟
هتان : لا والله صحت الك
گلت ي الولد الضخم اوكف
اركض و اصيح و ما وكفت
خلا ايده على وجهه و تدريجياً
انرسمت ضحكته و يهتز جسمه يضحك
وخر ايده عن وجهه و انه خازرته شنو يضحك؟
و رجلي يلي تعورت ؟
جسار : يعني هسه انا اسمي صار الولد الضخم؟
رفعت اكتافي و گلت
هتان : ما اعرف اسمك شمدريني
جسار : اسمي حميد
قلصت عيوني و گلت
هتان : جذاب شكلك مو مال حميد
رفع عينه عاينلي
رجع هز راسه بـ قبول يضحك
اخذ من الرجال كطن و معقم لان اشتراهن النا
عقم الي الگطنه و انطانياها اخذتها خليتها ع الجرح
غمضت عيوني متوجعه ، كشولت ملامح وجهي
گوه عقمتها و بعدين حطيت فوكاها كلنس و لزكتها
جسار : يلا نروح ؟
هزيت راسي بـ قبول
گمت ركباتي توجعني و اعرج
مدلي الولد معصم ايده لزمت بي
سندت نفسي عليه ، امشي بـ صعوبة
چني عجوز تايهه و اتبجبج
جسار : توجعج كلش؟
هتان : اي
جسار : توجعج يعني عبالك انكسرت
لو هيج ألم عادي من العوره؟
هتان : ألم عادي
هز راسة بـ قبول ظلينا نمشي ، شفنا اهلي
تركت ايده ، كمت امشي بـ هداوه و بـ صعوبة
قبل لا اوصل لـ يم امي سمعته وراي يگول
بـ صوت عالي
جسار : جسار اسمي
ابتسمت و درت وجهي
عاينت اله : هتان
درت وجهي رحت لـ امي لزمتني مخترعة
كعدتني لـ يمها ع الكرسي
تسأل شصاير سولفتلها بس لغيت البداية
و حورت الها شوية بـ القصة
ما ذكرت رزالة استاذ جسار الي ...
مُلاذ :-
اذا اگول هذا اكثر الاسابيع المتعبة اكذب؟
بعد ما افتتحت محل الورد اتكثف شغلي
طبعاً بديت اشتغل على مشروع محل حلويات
لان امي تحب تسوي حلويات و يطلعن طيبات
و الحمدلله اخذ فلوس زينه من محل الورد
و فلوس الموكلين و راتبي
ساعدوني ابدي بـ بناء المحل
دخلت غرفتي رميت جنطتي ع الجرباية
انتزعت الربطة يلي شاده على شعري
ساحبه عيوني ، مسببه صداع لـ دماغي
صفنت معدوم شغفي بـ الحياة
افكر بـ هواي اشياء و عقلي طاير
فزيت على صوت طرقات ع الشباك
كمت من مكاني فتحت البرده ، فتحت الشباك
أيهم : صباح الخير
مُلاذ : مساء النور
أيهم : شوفيني صاير حباب
ما افتح الشباك بـ خاشوكه ادكه عليج اول
مُلاذ : يا خاف صارت زحمه؟
أيهم : لا رحمه ي بويه رحمه
مُلاذ : زين هسه حلينا مشكلة الشباك
و لو هي ما انحلت ، الحايط شلون؟
اسوي قبضان حديديه مثل السكف
حتى ما تطفر لو شلون گلي؟
أيهم : عادي هو بس انه اطفر عليكم
مُلاذ : يا شكد حلو ، ما كنت ادري بس انت
لم المنطقة وياك يسوولك واهس
و اتطافروا ع البيت مثل الجريذية
أيهم : هههههههههه حبيت الفكرة
بس ما راح اسويها
هزيت راسي مأيسه
من توصيل فكرتي لـ هذا الكائن
أيهم : لَـذه جبتلج هديه
مُلاذ : عمي ما اريد هدايا
بس استر عليه حتى المو حرامي
و ما يعرف يطفر ع الحيطان اتعلم منك
عمي انت شني من دكتور ما تگلي؟
اشك بيك طفرت على مدرستك اخذت دفاترك الامتحانية غيرت اجوبتك و دخلت الطب
غير هيج ماكو اي تفسير ثاني
أيهم : امداك ي حظي ولج انه لو طافر على مدرستي
كان شككت دفاتري كلها و خليتهم يرسبوني
عمي انه كضيت السادس كله تربتي و سجادتي
افتر بـ البيت مثل الواويه ادعي اجيب معدل خمسين
بس ذني منعولات الوالدين (اشر على ايديه)
كاتبات الاجوبه بدون نقص كلها صحيح
ما اتحملت ضحكت عليه
العالم ما تعول تحصل الطب
و هو ضايج من عنده ما يريده
أيهم : اي مو ضيعتي سالفتي
اجيت انطيج هديه و اروح
مُلاذ : اي استاذ أيهم شنيه هديتك؟
طلع من ورا ظهره ورده مدها الي
مبتسم ابتسامة ظاهرة اسنانه
ظهرت ابتسامة على طرف شفتي
اتذكرت من جنت صغيرة جنت انا اوزع الورد
و اشوف الناس يهدونه لـ اعزازهم
مُلاذ : انا جنت ابيع الورد حتى يهدونه
ما توقعت بـ يوم بياعة الورد يهدوها وردة
اخذت الورده من عنده مبتسمه
مُلاذ : شكراً دكتور
أيهم : بياعة الورد اليوم صارت هي وردة
مُلاذ : هههههه ، أعددد
ضحك بـ صوت لمن صار عالي
و بسرعة سد حلگه بـ ايده
سمعت صوت حركه بـ البيت اشرتله يروح
دار وجهه و اتشلبى و طفر بسرعة
سديت الشباك و البرده التفتت على دخول امي
فيروز : مُلاذ سمعتي صوت؟
مُلاذ : صوتيش؟
فيروز : صوت هنا عبالك بالحوش
مُلاذ : لا ما سمعت متوهمه
فيروز : انا و ملاك سمعنا؟
مُلاذ : لا فوفو متوهمه حبيبتي
تعالي خل نطلع ، راسج شلون صار؟
اخذتها درت وجهي دحگت للشباك
التفتت بسرعة و طلعنا من الغرفة
اخذت امي لـ تكريت
و وديتها لـ دكتور زين و معروف
بسبب الصداع يلي مصاحبها على طول
شافها الدكتور و انطاها علاجات مال شقيقة
لان هي اساساً عدها شقيقة
و وضح الها اسباب الصداع
راجعت دكتور علمود رجليها
گال الي اكو تطور جبير بـ مشيها
و راح ترجع تمشي احسن من قبل .
رجعنا بـ نفس اليوم لـ محافظتنا
قبل لا نروح لـ تكريت اشترن امي و ملاك فساتين
انا اساساً ما احب البس فساتين اشتريت جام سوت
رجعنا للبيت ارتاحينا نص ساعة
بعدين گمنا خلصنا كل شغلاتنا
گلت نسوي مكياجنا و نرتب نفسنا بالبيت افضل
بديت بـ امي و ملاك مكيجتهن
متعلمة كم شغلة من اساور بـ المكياج
لمن كانت تمكيجني حتى اطلع ارقص
طبقتها على ملاك و امي
سرحت شعر امي رغم رح يكون مخفي تحت الحجاب لان حسب علمي القاعة مختلطة
بس في حال فرغت تنزع شالها
ملاك سويتلها تسريحة لطيفه
نزلت كذلتها من الجهتين وصل دوري
صفنت على روحي بـ المراية شسوي لـ وجهي
اتصلت عليه غاده كل شوية تسأل اذا رجعت
و اذا رح اجي للعرس حلفتلها رجعت لـ بغداد
و رح اروح لـ عرسها يلا سدت الاتصال
برمت خصلات شعري من النهاية
الفوك خليته ستريت عيوني اساساً مكحله
حتى اذا اضيفلهن كحله
على گولة عزيز اطلع "ملكة جنانوه" اصلية
خليت مكياج
عيوني ضفت الها ظل بي لمعه بـ الوسط
خليت حُمره لونها احمر يتناسب وي ملابسي
و مكياجي و ملامحي
لبست الجام سوت يلي اكمامه طويلة
لونه زيتوني غامق
لبست محبس فضي بي شذره سوده
زينت رگبتي بـ كلادة فضية
و تراجي فضية متدندله
رجعت شعري لـ ورا لبست كعبي الابيض
اخذت جنطتي ، صحت لـ ملاك و امي
طلعنا من البيت ، اتصلت عليه غادة
تدك و تلطم تكول اتأخرنا
و احنا كدامنا بعد ساعة
بين الازدحامات فعلاً اتاخرنا
لحد ما فك الازدحام تلفوني صار عرس
نور تدك و غاده و صافيناز و أيهم ، خبلوني
رديت على غاده
مُلاذ : و العباس ابو فاضل اوصل من وكت
بس انطوني مجال هياتني بـ الطريق جايه
غاده : مُلاذ عرسي ما تحضرينه ولج مُلااااذ
مُلاذ : اشتعلت روحها لـ مُلاذ يحظي
شبيج تبجين و العباس الحك هياتني اجيت شمالج
غاده : استعجلي مُلاذ حبابه
مُلاذ : و الله جايه ، اي اجيت
طلعت من الازدحام و بسرعة توجهت للقاعة
وصلت نزلت امي و ملاك و رحت اصف السيارة
دخلت بـ فرع صفيتها ، نزلت من السيارة لحگتهم
دخلت للقاعة رحت على غاده سلمت عليها
لمن شافتني ضربتني على زندي
غاده : كتلتيني خبلتيني عبالي متجين
مُلاذ : لا شون ما اجي لـ عرسج غدغد
هياتني كدامج ديلا امشي شوفي رجلج
هزت راسها بـ قبول
اتصلت على باهر و هو اجا
تركناها كلنا و دخلنا القاعة
و انا امشي ادور مكان اكعد عليه
التفتت دحكت لـ الباب
اتجمد نظري على أيهم
يلي لابس قاط اسود بالكامل ، رافع شعره
يدحگلي ، نزل حاجبي الرافعته تدريجياً
بلعت ريكي بـ هدوء درت وجهي
كملت طريقي ادور على مكان نكعد بي
فزيت على صوته من وراي التفتت دحگتله
أيهم : هذاك مكان حجزته الكم
عبرني و راح وكف يم الطاولة
اشر عليها هزيت راسي بـ قبول
ابتعد مسافه و سوا نفسه يحاجي صديقة
اتقدمت انا و اخذت امي و ملاك و كعدنا
و اجت لـ يمي نور ، اهلها ما جايين
عمتي منارس هم جاية كعدت يمنا
طبعاً بعد ما عدا على موت امها سنه
و هي لسا تبجي عليها ، ظلينا منتظرين غاده
طاح نظري على أيهم
يلي واكف و يحاجي بنيه ، عكدت حواجبي
استغربت شعوري المتضايق بـ هذا المنظر
نزلت راسي احاول اظهر عدم اهتمامي
اتذكرت السيارة عفتها مفتوحه ما قفلتها
گمت بسرعة طلعت من القاعة اتوجهت لـ السيارة
قفلتها اتاكدت منها مقفولة ، استداريت
شهكت و كتمت صوتي لمن شفت أيهم وراي
مُلاذ : شبيييك خرعتني !
أيهم : بالغلط
هزيت راسي بـ قبول
تذكرت قبل شوية لمن تضايقت من شفته
درت وجهي اريد اعوفه و اروح وكف كدامي
رفعت عيني دحگتله
أيهم : جاي نحجي؟
مُلاذ : اكو شي مهم نحجي بي؟
أيهم : لا بس جاي نحجي
مُلاذ : خلص اذا اكو شي مهم نحجي بي
اذا ماكو ليش حتى نحجي؟
أيهم : شبيج؟
مُلاذ : شبيه؟
أيهم : صاير شي ؟
مُلاذ : لا ما صاير
أيهم : مُلاذ شصاير احجي؟
مُلاذ : ما صاير أيهم وخر عن طريقي !
أيهم : ليش انطيني سبب؟
گلت بـ عصبيه : وخر أيهم اريد اروح
عبرته و ردت اروح
استوقفني لمن گال
أيهم : ليش دائماً تهربين ؟
دوم تهربين و من كلشي ما تواجهين اي شي
التفتت ادحگله عاكده حواجبي
مُلاذ : اهرب ؟ من شنو اهرب بالضبط؟
أيهم : من كل شي اريد بس يوم تثبتين
ما تهربين مني و من الحديث وياي
مُلاذ : ما اهرب من شي انا
مستعجله و لازم اروح؟
أيهم : مستعجله؟ على شنو مستعجله؟
على عرس صديقتج؟ اذا عرس صديقتج
فـ انه عرس اخوي و هياتني واكف كدامج
مُلاذ : شتريد أيهم ؟؟
أيهم : كلشي ما اريد
بـ عمري ما ردت منج شي
التفتنا على صوت رجال
يتقدم علينا ايديه خلف ظهره ، ابتسامه على ثغرة
-شنو يلي ممكن تريده منها ؟
عكدت حواجبي مستغربة
دحگت لـ أيهم يلي انگلبت تعابير وجهه
اتقدم عليه الرجال مصفف شعره بـ طريقة مرتبة
بـ ايده خاتم كبير و فخم ، يلبس قاط اسود قاتم
تحته قميص ابيض مزين بـ ربطة العنق
اتقدم عليه على ثغرة ابتسامة ، مد ايده يصافحني
- سيدتي انا ابو الأيهم اذا تتسائلين عني
صافحت ايده عاكدة حواجبي
درت عيوني لـ أيهم يلي واكف
ايديه ورا ظهره نظره على ايدينا
عاكد حواجبه بـ انزعاج
سحبت ايدي من ايد ابوه
عبرتهم و التفتت لمن گال ابوه
-فرصة سعيدة
هزيت راسي ابتسمت ابتسامة مزيفة
درت وجهي و مشيت التفتت دحگت لـ أيهم
يلي واكف كدام ابو توضح تعابيرة غضبه
و الراحة يلي بـ تعابير ابوه ، استغربت
رجعت للقاعة دخلت و بـ لحظتها
اول ما كعدت ع الكرسي دخلوا باهر و غاده
اتعالت اصوات التصفيق
الضحكه ظهرت على شفايفي بانت اسناني
واكفه و اصفك الهم ، اتقدموا كعدوا ع الكوشة
بدء عرسهم و الاغاني
اتفاجئت لمن سلموا المايك لـ أيهم
وكف يغني "شمسين" ما تخيلت صوته هيج
حرفياً عجبني الكل يستمع اله
نظرات الحب بـ عيون غاده و باهر
ابتسمت على نظراتهم رجعت عيني على أيهم
و هو يغني عيونه ترس عيني و يدحگلي
ما نزلت عيني ابد و ظليت ادحگله
و هو سوه نفس الشي
أيهم : اذا طلعت شمس فوت انت للبيت
لان شمسين معناها احترگنا
من احضنك احضن الدنيا بـ ايدية
حبيبي و غاليه عيونك عليه
بسرعة الوكت صاير يخلص وياك
الهوه انت و اذا رحت اختنكنه
دار وجهه و كمل يغني
درت وجهي دحگت لـ صافيناز يلي وجهها احمر
رجعت عيني على هتان يلي عرفتني عليها غاده
تبلع بـ ريگها و تدمع و تمسح دموعها بسرعة
ما فهمت هذول شبيهم؟! ليش هيج حالة وجههم؟
من بعد الرقص بدوا يقدمون اكل
گمت ادور على كاسة مي لان عطشانه
اخذت كاسه و انا واكفة
اجت بنيه اخذت كاسة عصير
لينا : سلام
مُلاذ : هلو
لينا : انتِ اخت العروسه ؟
مُلاذ : لا ، بس يعتبر هيج
هزت راسها بـ قبول
دخل ولد يركض و خطيه انجبح بـ مي طايح ع الكاع
بنفس الوقت صاحت البنية الواكفه : عمى العماك !
وسعت عيوني و ركضت ع الطفل
شلته من الكاع اتطمن عليه
و خطيه هو لا بجى ولا صاح طاح على ظهره
وكفته كدامي قلقانه لان وكعته جانت قوية
و عيونه دمعت فد انقهرت
مُلاذ : تعورت ؟؟؟
دحك لـ البنية و هي تخوزر بي
رجع دحگلي هز راسة بـ قبول
انقهرت عليه كمت امرغ ظهره بـ خفه
رفع نظره الضحكه انرسمت على شفايفة
تركني راح يركض صاح بـ صوت عالي
أبيل : بابااااا
التفتت دحگت وين الطفل رايح
اتصنمت مكاني و رمشت عيني بـ ثكل
لمن دحگت لـ أيهم يلي يدحگلي و شايله
بعدني ما مستوعبة صدمتي
حتى تقدمت البنية الي يمي دخلت ايدها بـ ايد أيهم
المتصنم و واكف حالة مثل حالي گالت بـ ابتسامه
لينا : اعرفج على زوجي أيهم
بلعت ريگي بـ صعوبة
شعور مكروهه بـ داخلي انا و أيهم ندحك لـ بعض
اتداركت الوضع كمت بسرعة ، تركتهم و طلعت
حتى ما حجيت و لا نطقت عقلي متجمد
اذا متزوج شيسوي كل يوميه بـ شباجي
واكف و يحاجيني !!!
مُلاذ : طبعاً طبعاً يخون مرته
قذر مثل الباقين حقييير
ما يملي عينهم غير التراب
الله ياخذج مُلاذ الله ياخذج و ياخذ غبائج
اتقدمت كعدت محروكة اعصابي
بعدني مصدومة ابد ما شفت حلقة بـ ايده
طبعاً ينزعها من يشوفني هو ما يهمني
بس كل هالفترة نعرف بعض ليش ما گلي متزوج!
استوعبت الطفل نفسه يلي شفته بـ الصورة
على طاولة أيهم يلي بـ مكتبة
و انا كاعدة ادحگلهم يركصون
درت بـ عيوني
بـ لحظة رجعت عيني على شخص لمحته
جمد نظري و اتصنمت بـ مكاني ، ركزت اكثر
ادحك اله و هو واكف قريب و شكله واضح
ادحك بـ عيونه الزرك ، تكرر المشاهد بـ ذاكرتي
أوهم نفسي بس ماكو فائدة كل ما اركز
اتاكد اكثر من احساسي ،
رفع اللثام مغطي وجهه ظهرت بس عيونه
مثل اللحظة يلي شفته بيها بالضبط ، اتجمدت
همست مصدومة
مُلاذ : الچتال !
- يتبع الفصل التالي اضغط على ( رواية جرح الأيهم ) اسم الرواية