رواية جرح الأيهم الفصل الثاني و العشرون 22 - بقلم أيلان
"الجُــرح الثاني و عشرون"
ما اتوقع عندك اعز من عائلتك ؟
فيروز ذات الخصر النحيف و العيون البراقة
يتجمعون عليها ٣ من المتجوعين او ٤؟ ٥؟
رُبما اكثر المتجوعين هواي هههههههه
مُلاذ بنتك الصغيرة اللطيفة اممم
ممكن يصير بيها مثل فيروز و ممكن نزوجها
ممكن نبيعها او اربيها على انها بنتي هههه
و اتخيل تصير هي تقتل بدالي هههههههههه
الصغيرة اترك الخيال الك عن الي يصير بيها
٥ سنين ما تكمل و تتعلم على القتل و الدم ههههه
اختار إلياس عائلتك او الولد ،
خلينا الك ذكرى لطيفة بـ الظرف تكدر تحتفظ بيها.
انقطع الصوت ، دحگنا انا و جسار لـ بعض
و الحيرة تاخذ حيز من تفكيرنا
جسار : الولد منوو؟
مُلاذ : عيد الكلام
عاده جسار مره و مرتين و ثلاثه
و احنا نستمع و نحلل و انا ينعصر گلبي
كل ما اسمع كلامه و تهديده بـ امي و ملاك
مُلاذ : الولد منووو؟
شنو علاقته بـ ابوووي !
جسار : مادري مُلاذ بس هذا التسجيل رح يساعدنا
و رح يساعدنا هواي هم
مُلاذ : عن طريقة رح اكدر افتح القضية مره ثانية
بس يبقى كل شي مجهول و خصوصاً الي قتل ابوك
من اهلنا شلون رح نلكاه شلون رح نعرفه ؟
جسار : ما اعرف عقلي رح ينفجر
الولد منووو؟ ما ذكره الكم ابوج ابد؟
مُلاذ : لا ابد اصلاً كنت على طول يمهم
هو وامي و ماذكرلها اي ولد
و لا جاب طاري لـ هيج موضوع
شوف جسار الچتال مادام كان يريد الولد
معناها الولد مهم اله و يعرف شي و ابوي حماه منه
لان ماكو اي تفسير ثاني و مستحيل ابوي يأذي شخص
جسار : زين شنو ممكن يعرف ؟!
مُلاذ : الچتال قاتل ممكن الولد شَهد على جريمة
او اي شي ثاني يخص الچتال
او ممكن الولد قريب لـ شخص
الچتال يريد ياذي كل شي جاي اتوقع
و كل الاحتمالات جاي اخليها كدامي
جسار : شلون رح نوصل للـ الچتال شلوووون!
مُلاذ : الي بالسجن الي خطفوني
بس همَ يكدرون يوصلونا للـ الچتال
جسار : مو گلتي ما يعترفون عليه ؟
مُلاذ : زلة لسان منهم توصلني لـ كلشي
قاطع كلامي اتصال سلطان عليه
نذكرت هَم متصلين عليه هواي
مُلاذ : شبي سلطان؟
جسار : شبي؟
مُلاذ : هو مو بالبيت؟
جسار : لا
رديت على الاتصال بسرعة
مُلاذ : سلطان؟
سلطان : مُلاذ ويييينج وييينج
هاي المره الالف يلي اتصل بيها عليج
مُلاذ : شصااااير شكو؟؟
سلطان : ملاك مدري شصار بيهاا تعاااالي
و اسكندر الجلب ابن الجلب يرمي بـ بابكم
مُلاذ : شنووووو؟ ليييش؟
نزلت من سيارة جسار بسرعة
و جسار نزل وراي ، رحت لـ سيارتي صعدت
و انا احاجي سلطان و هو يستعجلني
يگلي همَ بالبيت ، صعد وياي جسار
شخطت السياره من الكاع
و رحت للبيت اتصل على امي ما تجاوب
رجعت اتصلت على سلطان يگول امي هم متخربطة
خابرت على اسكندر اريد افتهم هذا الحيوان شبي!
ما جاوب عليه ذبيت التلفون من ايدي
وصلت للبيت نزلت اركض
حتى بيبان السيارة عفتهن مفتوحات
ادحك لـ الباب مزرفة تزرف بالطلق
الجوارين متجمهرين كدام بابنا و الباب مفتوحه
صاح بيهم جسار و طلعهم ، دخلت للبيت
رحت على امي دحگتلها كاعده على الفراش
وجهها مخطوف اصفر
رجعت دحگت من الجهه الثانيه ملاك متمدده
و سلطان يضربها راجديات خفيفة حتى تصحى
و هي صافنه بالسگف و تدحك ، احتاريت
رحت لـ امي
مُلاذ : يمه بيج شي ؟؟ يوجعج شي؟
حاجيني دحگيلي
هزت راسها بـ رفض
گالت بـ روح رايحه : شوفي اختج
اخذت كاسة مي شربتها
و غسلت وجهها ، انداريت رحت لـ ملاك
كعدت ع الكاع رجليه ما تعينني
اضرب ع خدها راجديات و احاول اصحيها
ما تصحى كمت بسرعة ادور على قلم
درت علبة الاقلام لكيت و اخذت
خليته على اظفر اصبع ملاك بـ اصبعها الابهام
و اضغط بالقلم اذا تاذت بـ هاي المنطقة
ممكن تصحى بس ما صحت
اتخبلت متت من الخوف عليها
و امي من جهه تعيط و تبجي
سلطان : ولج الدكتووور مدري وين صار
بالبداية كانت تجاوبني و تحاجيني
هسه سكتت ما تتحرك اشتعل ابوك اسكندر
ظلينا نحاول نصحي ملاك
اخذت مي غسلت وجهها ،
خليت راسي على گلبها ينبض
رجعت اخذت القلم حفرت اصبعها حفر
بس اريد تحس عليه و تصحى
بعد محاولات فجأه صدر صوت شهكتها
رفعنا راسنا دحگنالها و انا لزمت بـ ايدها
و سلطان يمها امي لزمت بـ مشايتها و گامت اجتنا
ظلت صافنه علينا و متألمه من اصبعها
اجت امي يمها و ضمتها لـ صدرها و تبجي
من خوفها على ملاك حتى انفاسها كتمتها
عقل ما ظل بـ راسي كاعدة ع الكاع و صافنه
ملاك بدت تتذكر تدريجياً و كامت تبجي
بـ لحظتها التفتنا على صوت أيهم
يلي يصدر من الصاله
أيهم : سلطاان
كام سلطان و امي عدلت شالها
و ضمت ملاك لـ صدرها اكثر
دخل أيهم هو و سلطان دحگلنا و سلم علينا
راح لـ ملاك يشوفها و يفحصها
سلطان : دكتور ظلت صافنه بالسكف لـ فترة طويلة
و مُلاذ گوه لمن خلتها تصحى
دحگلي أيهم
رجع عيونه على ملاك
أيهم : شلون صحيتيها؟
مُلاذ : ضغطت بالقلم على اصبعها
بالبداية ما صحت بعدين ظليت اضغط اكثر
لمن صحت ورا فترة طويلة يعني
أيهم : زين سويتي
رجع يسأل ملاك اذا هي تحس نفسها زينه
يحرك بـ اصبعه السبابه كدام عينها
و هي تتبع اصبعه و تدحگله
لمن يسألها مره تجاوبه مره تصفن و تظل ساكته
احنا نكللها تجاوبه و نحاول وياها و ترجع تجاوب
بعد فترة تركها و اشرلي
گمنا انا و سلطان و جسار وراه
وكف بـ باب الغرفة و يدحگلنا
أيهم : البنيه ماره بـ صدمه
و هسه يلي صار وياها جانت تسمعكم
و تحس بيكم بس عقلها ما يستجيب
بالايام القادمه يمكن رح تشوفوها تصفن هواي
او حتى تتقوقع على نفسها
لان واضح الماره بي مو سهل
و جاي ياخذ حيز من تفكيرها
و يفوق حجم عقلها و عمرها
و انتوا لازم تساعدونها حتى تكدر تتخطى
ولو شويه من صدمتها
هزينا راسنا بـ قبول
أيهم : اكدر اسأل شنو الخافت منه هيج؟
مُلاذ : تخاف من صوت الرمي و الطلق
عكد حواجبه أيهم
اتنقل نظره بيناتنا مستغرب
جسار : اسكندر الي تعاركت ويا بالمستشفى
نفسه جاي يرمي بـ بابهم
سلطان : اخ الله لو اكمشه
كز على سنونه أيهم بـ عصبية
و بانت عضمة فكة و هو يضغط بـ اسنانه
ما سأل ليش او شنو السبب
ودعنا و راد يطلع وصلنا للـ الباب
بـ اللحظة يلي راد يطلع بيها أيهم
دخل اسكندر وراه دخل ابوه
انا و أيهم و جسار و سلطان واكفين
اسكندر كله تراب و مبين ذاك وينه سكران
بعدني اريد اروح اتعارك ويا ما شفت غير
جسار و سلطان و أيهم فوكا و ابوه يصيح
يريد يفكهم منه و اسكندر يهدد و يتوعد
شبعوه كتل خو أيهم شكك هدومه
و سلطان يصم ايده و يركعه بوكسيات
جسار يرفس بي و دخل عزيز و كملت
حتى عزيز يضوج من اسكندر
نزل عليه صلخه راجديات
عمو احمد واكف و يدك على صلعته
كلت اخذ المقسوم نزعت حذائي
و رحت على اسكندر ضربت على رجليه بـ الحذاء
رجعت ضربت ايديه كل قوتي و خرمشت وجهه
و خرو عنه شاله جسار من ياخته
كطفه بره بالشارع و ابوه يركض ورا ، سدوا الباب
رجعوا دخلوا جوه حتى أيهم وياهم
يدخلون يدخل وياهم يطلعون يطلع وياهم
تكول عايش ويانا مو رجال غريب
انطيتهم مي ، كعدوا و استراحوا شوية
و يشربون مي و انا كعدت كدامهم
و اسكندر اخذه ابو و راحوا
اتذكرت الصار و منظرهم
ما اتحملت كمت اضحك
و همَ شافوني اضحك كاموا يضحكون
عزيز : طبيت عليكم عود اجيت افزع
اريد اشوف شكو شفتكم تكتلونه
كمت كتلته وياكم ههههههههههه
ضحكت ضحك
حجيت و انا اضحك گوه احجي
مُلاذ : عود بعدني اريد احجي و ارزله
بعدني ...ههههههه... بعدني ما فاتحه حلگي
التميتو عليه هههههههههه
ضربت على رجلي و انا اضحك
رحعت ظهري لـ ورا
جسار : دخيولي ابن النعال
يروط على گلبي كتلني اريد افوخ گلبي
گالها و هو يضحك و وجهه احمر
سلطان يدك على رجله و يضحك
رفع ايديه خطيه مجرحه كد ما ضرب اسكندر
أيهم ساكت و يدحگلنا و يضحك اندارله جسار
جسار : زين انا اريد افتهم
احنا لايع جبدنا من عنده انت شبيك
ههههههههههه لو واحد غيرك يفاكك
دحگلي أيهم بـ نظرة
رجع دحك لـ جسار بسرعة
أيهم : هي بيها مفاكك كضيته كتلته وياكم
انه هم گلبي يروص من عده لعب روحي
عزيز اتمدد بالگاع من الضحك
الي يشوفه يگول هذا ما يعرف اسكندر
و لا عبالك اخو گال وهو ياشر عليه
عزيز : ملكة الجنانوه ضحكتيني وعلي
دحگتله مبتسمه و هو يحجي ويضحك
يحرك بـ ايديه يشرح حركاتي
عزيز : ادحگلها حذائها و هي و تكتـ....
ماگدر يكمل غمض عيونه
ضحك حيل و جسمه يهتز
سلطان : ولك عرس وجابه العباس
لـ هاي التلفزيون القديم
شلت الكوشه شمرته بيها
لزمها و هو يضحك و يدحگلي
كام أيهم وكف يحجي
و هو يعدل ياخة قميصة الاسود
أيهم : يلا انه اترخص
سلطان : جان ظليت شويه بعد دكتور
أيهم : لا كافي اكشن اليوم هههههه
ضحك سلطان و كامو يودعونه
كمت وراهم وصلوا للباب و هم يتسالمون ويا
صعد سيارته رفع ايده يودعنا شغلها و راح
دخلت لـ البيت فتت الصاله
دحگت تارك بـ مكانه تلفونه
دخلو الولد وراي اخذت تلفونه
و دحگتلهم رفعت التلفون
مُلاذ : هذا مالتكم ؟
هزوا راسهم بـ رفض
سلطان : لج مال دكتوور هذا نساه
مُلاذ : بس لااا راح ؟؟؟
جسار : اي راح
مُلاذ : اهووو خرب حظي
خل الحگه انطي تلفونه
جسار : عوفي انا اودي
مُلاذ : لا هسه اودي بسرعه و ارجع
اخذت سويجي و طلعت
صعدت سيارتي و رحت من الطريق الراح منه
ظليت اشغل اللايتات و ادحك بالطريق واركز
الدنيا ظلمه و گوه اشوف سرعت سيارتي
اخيراً لگيت سيارته كدامي
لان هذا الطريق مستقيم و لا بي فروع
دگيتله هورن و رمشت اله بالاضوية
وصلت سيارتي يم سيارته كلش
نزلت الجامه و اشرت اله نزل جامته يدحگلي
وكف سيارته على صفحة وكفت سيارتي وراه
نزل من السياره ينتظرني
و انا هم نزلت اتوجهت اله و هو واكف ويدحگلي
كـ العاده ايديه بـ جيبه ابتسامه علت ثغره
وصلت لـ كدامه نزل راسه دحگلي
أيهم : ها شو لاحگتني؟
مُلاذ : طبعاً دكتور بس انت تلحگني؟
اتوسعت ابتسامته
رفعت تلفونه و هزيته بـ ايدي
دحگله و رجع دحگلي
مُلاذ : نسيت تلفونك دكتور
قدملي ايده نزلت التلفون خليته بـ ايده
قلص عيونه و گال بـ هدوء
أيهم : خاف حاطتلي شي بي
رفعت رجليه و خليت ايديه ورا ظهري
ابتسمت احجي و انا اتداهر وياه گلت بـ همس
مُلاذ : اي دكتور خليتلك بالبطاريه سم
يطلع من سماعات التلفون انتبه و البس كمامه
الشيطان الي بداخلي يريد يقتلك
رفعت ايديه و خليتهن من جهتين راسي
و رفعت اصبعي بـ معنى "شيطان"
يدحگلي و مبتسم ، ضحك بـ صوت عالي
دنك الي و سوا مثل حركتي و گال
أيهم : انه هم
قصده هو هم شيطان
ابتسمت و ضحكت و هو يدحگلي
مُلاذ : انتبهه دكتور لا يبوكونك
بعدين تصير فلوسك حرام
أيهم : اييي يبيعون تلفوني و ياخذون فلوس
و يشترون مخدرات بـ فلوس تلفووني مو؟
مُلاذ : صحيح دكتور حفظت درسك
أيهم : جا شون اذا مُدرستي لَـذه
مُلاذ : دكتور منين جبت هاللقب
بس ابوي جان يصيحني بي
اختفت ابتسامته تدريجياً
و على اثر اختفاء ابتسامته اختفت ابتسامتي ويا
عكدت حواجبي و انا ادحگله ، لحظات وضحك
حسيتها ضحكه مزيفة بس غلست
أيهم : ليش ما جابوه واحد من الولد
او ما اعرف كان انتظرتي لـ باجر
هسه دنيا ليل
مُلاذ : انساه الصبح و باجر ما اطلع من البيت
لازم ابقى وي امي و ملاك و افتهم شبيهم
أيهم : مُلاذ
مُلاذ : اممم؟
أيهم : اسكندر ليش رمى بـ بابكم؟
مُلاذ : هذا حديثاً اخر نفسك ما اعرف
باجر اعرف ليش رمى بـ بابنا و اطلع خبالي
هسه لازمه نفسي و احاول اهدي روحي
علمود امي و ملاك
أيهم : انتبهي منه
مُلاذ : بدون ما تگلي
أيهم : وين تلفونج؟
مُلاذ : شتسوي بي؟
أيهم : انطينيا بس دقيقة
مُلاذ : غير افهم شنو تسوي بي؟
أيهم : انطينيا و تفهمين
طلعت تلفوني من جيبي انطيتهيا
اشرلي افتح الرمز ، اخذته فتحت الرمز
و هو كتب رقمه ، رفعت حاجبي
مُلاذ : عسى ما شر جنك رقمتني؟
أيهم : اي رقمتج
مُلاذ : اممم يحتاج لـ هالموضوع كَله
أيهم : ها رح تكضيني تكتليني؟
مُلاذ : جا شعبالك دكتور
ترا انا زينه وياك ما شايف من عدي شي بعد
أيهم : هذا كله و ما شايف ؟
مُلاذ : اي و الله دكتور
أيهم : شسوي حتى اشوف؟
مُلاذ : اذا لحيت وياي تشوف
أيهم : من عيوني ما طلبتي شي
قلصت عيوني ، درت وجهي رايده اروح
صاح وراي : مُلاذ
وكفت مكاني و درت وجهي
اجاني يمشي بـ هداوه الي يشوفه يگول
الشارع مسجل بـ اسمه و هو يمشي بـ ثقة
أيهم : خل اشوف شنو تسميني؟
طلعت تلفوني دحگت لـ رقمة
صفنت لـ دقايق اكرض بـ شفتي
افكر بـ اسم ما اريد اسمي بـ اسمه
رفعت راسي دحگتله ، ابتسامة ظاهره اسناني
نزلت راسي اكتب اسمه و هو منتظر
خلصت كتابة و انطيته رقمي كتبة يمه
اتصل عليه و ظهر اسمه ضحكت بـ صوت عالي
و هو مستغرب و يدحگلي رفعت تلفوني راويته
دحك للـ اسم وسع عيونه و ضحك بـ صدمه
أيهم : ام سوادي !!
درت وجهي عنه اضحك
و هو يضحك بـ صدمه وياي
حصرت ضحكتي و انداريت اله
أيهم : دشوفي شراح اسميج
طبكت شفتي حاصره ضحكتي
و ادحك لـ وجهه و هو يضحك
ما اتحملت و رجعت ضحكت
أيهم : دكي عليه
دكيت على رقمه دارلي التلفون
اتعالى صوت ضحكتي لمن شفت كاتب
"سوادي"
مُلاذ : هسه يعني انت ام سوادي
و انا سوادي بـ نفسه
هز راسه يضحك ضحكت اخير ضحكه
ابتعدت عنه و انا اسويله "باي"
سوالي نفس الشي صعدت بـ السيارة
رحعت للبيت و هكذا مر اليوم
ثاني يوم بقيت يم امي و ملاك
الي عرفته من عزيز اسكندر سكران
و بلا سبب جاي يرمي بـ بابنا
سلطان بوقتها كان يمنا و جاي النا
لمن جاي اسكندر وداك الباب طالع هو لـ اسكندر
اسكندر عباله سلطان جاي الي و ظال يرمي
ماخذ سلطان السلاح من اسكندر و كاتله
اسكندر ضابط نص ستاو ياهو الاجا و كتله
سلطان مخابر لـ ابو اسكندر
بعدين سلطان سامع صوت صياح
و كان هذا الصوت صوت ملاك الخ ...
جزعت من العرك وي اسكندر لعبت نفسي
كل يوميه جاي الي لو سكران لو مدري شبي
و يدور سوالف من جوا الكاع و انا ما اريدهم
الف مره من نتعارك نبهتهم
و گلتلهم ما اريد اشوفهم
و لا اريد يتعدون من كدامي
بس الحجي يدخل من هاي الاذان يطلع من الثانيه
ظليت على تواصلي وي نور
و عمتي منارس رغم اتقبلت وفاة امها
لَكن ما نستها و بقت تبجي عليها
و اساساً محد نساها محد يكدر ينسى امه
او محد يكدر ينسى احن انسان عليه
و كالعاده اتعاركت وي اسكندر
و رحت اشتكيت عليه و كل شي ما صارله
طلع منها مثل الشعره من العجين
التفتت لـ ملاك يلي كاعدة يمي
ابتسمت ادحگلها كاعدة هادئه
رجعت عيني على امي كمت صفكت بـ ايديه
حتى اجذب انتباههم الي
مُلاذ : كومن بدلن خل نطلع
فيروز : وين ؟
مُلاذ : كومي فيروز نطلع و نشوف
رحت عليها وكفتها رادت تلزم بـ المشاية
ما خليتها وخرت المشايه عنها
مُلاذ : لا فيروز يلا تعاليلي بلا مشاية
لزمت بـ ايديه تهز راسها بـ رفض
فيروز : ما اكدر مُلاذ ما اكدر بلا مشايه
مُلاذ : لا تكدرين تگولين هيج
لان اتعودتي ع المشاية ، شوفي رح تمشين
وخرت عنها بسرعة و فلتت ايديها مني
رفعت ايديه أشر الها تجيني "تعالي"
ظلت واكفه بـ صعوبه و تنزل راسها
تدحك لـ رجليها بـ رعب خايفة توكع
و ملاك مبتسمه و تدحگلنا
مُلاذ : يلا فيروز ، صفكي ملاك
ملاك كامت تصفك تشجع امي
ابتسمت امي تدحك الها و تمشي بـ ثكل
گوه تخطي الخطوه و انا أشر الها
ابتعدت اكثر و رجلها بدت تتعود رغم ثكلها
لحد ما وصلت الي و ذبت نفسها عليه هلكانه
مُلاذ : عفييييييه فيروووووز
صفكنالها انا و ملاك و هي تضحك بـ تعب
اخذتها كعدتها ع القنفه اشرت لـ ملاك تروح تبدل
و بقيت انا امرغ بـ كعب رجل امي لان تتعب
مُلاذ : شوفي كدرتي تمشين
فيروز : بس اتعب
مُلاذ : تتعودين فوفو
و يخف التعب تدريجياً
هزت راسها بـ قبول
اجت ملاك مبدله گمت انا هم بدلت
و اخذتهم و طلعنا فريتهم و تونسنا
اخذتهم لـ مطعم اكلنا و رجعنا للبيت
حسيت بـ راحه لمن شفت الضحكه على وجهه ملاك
و امي هم جانت مرتاحه بـ الطلعه
هذا الشي يغنيني عن الطلعة بـ كاملها
ابتسمت ادحگلهم و صفيت السيارة
نزلنا و دخلنا للبيت بدلوا و ناموا
كعدت انا بـ غرفتي ما انام هواي
لان بعدني اتحلم و الكوابيس تلاحكني
من كل صوب بس اقل من ذيج الفترة
نمت ، كعدت حسيتها رمشة عين
دك المنبهه مطيت روحي و فتحت عيوني
درت وجهي بين الكاعده و النايمه لمحت شي
ركزت عبالي حلم طلع صدك ، ركزت عاكده حواجبي
صرخت بـ صوت مو عالي ، كعدت على حيلي
گبل كممت حلكي و موسعه عيوني مصدومه
مُلاذ : ولك انت شتسوي هناااااا؟!
أيهم : ام سوادي بعد
مُلاذ : ولك أيهم شتسوووي بـ غرفتي
شجابك منين دخلت منين اجيت صخام الصخمني
خرطت خدودي و كمت افرك عيوني
مُلاذ : يا رب حلم يا رب حلم
أيهم : الله طلعتي تحلمين بيه ؟
مُلاذ : ولك
دورت بـ عيوني
جريت ساعة المنبهه و رفعتها بـ ايدي
مُلاذ : افشخك بـ هاي هسه منيييين دخلت؟؟؟
اشرلي بـ عيونه ع الشباك
دحگت للشباك مسدود رجعت دحگتله
رفع ايده بيها خاشوكه
مُلاذ : يا ربي دخيلك اخلص من اسكندر
يطلعلي هذااا ولكم وين انطي وجهي
أيهم : شبيج فضحتينا قابل شسويت
مُلاذ : شني شسويت شتسوي بعد؟
داخل عليه لـ غرفتي و انا نايمه مخبل انت؟
أيهم : اتادبي ولج انه ام سوادي ما اسمحلج
هياتني قبل ساعتين اجيت طفرت حايطكم
مُلاذ : شتسوووي جاي شتريد؟
أيهم : اجيت اكعدج اريد اروح وياج للجهال
مُلاذ : ولك يا جهال ؟
أيهم : جهالي
مُلاذ : ها؟
أيهم : يا جهال يعني ذوله التكضيهم تنطيهم اكل
مُلاذ : يابه بيش الساعه؟
أيهم : بالعشره
مُلاذ : شنوووو؟ موقته تلفوني بالسبعه !
أيهم : اي انه اجلت المنبهه
مُلاذ : ولك لييييييييييش؟
أيهم : گلت خطيه تنام
مُلاذ : خطاك بين و عزرايين
أيهم امشي كوم وخر عني فلتت اعصابي
أيهم : مو صوجج و علي
ديلا انه انتظرج برا
كام من كل عقله فتح الشباك
كمت وراه ادحك اله طفر الشباك
اتشلبى ع الحايط طفر الحايط و راح
تخصرت ادحك وراه
مُلاذ : لا المشكله بيه انا مخبله
و شكو مخبل يجيني غير هيج ماكو تفسير
درت وجهي اهز بـ ايدي
و رحت ابدل و هو يتصل
مُلاذ : رح اجي اصبرررلي
لبست تشيرت اسود نص ردن
و فوكاه قميص اسود و بنطرون كابوي
بس واسع اكبر من قياسي
خليت امي تصغر الخصر
نثرت شعري على متوني لبست مناظري
رفعتهن خليتهن على شعري
اخذت جنطتي و طلعت
دحگتله واكف بعيد عن الباب بـ مسافه
شلت الحراس من كدام الباب من فترة
لان امي طلبت مني و گالت ماكو شي
و الوضع امان طول ما همَ موجودين
من شلتهم رجعتلي المصايب
مُلاذ : أيهم انت خبل لو خبل
أيهم : خبل
مُلاذ : منيييين تندل غرفتي؟
أيهم : ما ادري دورت بالجامات
وكفت شويه سويت قالا بالا
طلعت العشره على شباكج و همزين ما غلطت
ظليت ساكته و صافنه
فتحلي باب السياره
أيهم : اتفضلي ست
مُلاذ : اروح بـ سيارتي
أيهم : ليش؟
مُلاذ : عندي شغل
هز راسه بـ قبول رحت انا لـ سيارتي
و هو صعد بـ سيارته رحنا للاطفال
انطيتهم اكل جبته وياي الهم و فلوس
اخذوها مني مبتسمين و يتشكرون
عودتهم يقرون الفاتحه لـ ابوي و بيبي
بحيث حتى بدون ما اجيب الهم يقرون الفاتحه
و يترحمون على ارواحهم و لمن يبيعون شي
يگولون للاشخاص يلي يبيعون الهم يقرون الفاتحه
عودتهم على هواي اشياء و علمتهم هواي اشياء
مثل مشمش بالضبط
علمتهم يحترمون المقابل اذا محترمهم
و يتشكرون الشخص اذا قدم الهم شي
يحمدون الله و يشكرونه على كل شي
علمتهم بـ نفس الوقت ما يكتمون بداخلهم
و يعبرون عن حزنهم و فرحهم
و يشوفون اصغر الاشياء يلي سووها انتصار عظيم
علمتهم يفكرون قبل لا يتخذون قرار
و رجعتهم للمدرسة و دوم كنت اروح لـ مكانهم
وين عايشين همَ اتطمن عليهم
لمن يتمرضون و يفتقدون بعض و يگولون الي
اروح للمريض بيهم و اشتري اله ادويه و علاج
كانوا سبب حتى اتعلم على ضرب الابر
و تشكيل الكانولات ، اتعلقوا بيه لـ ابعد حد
حتى بعضهم صاروا يصيحون الي "ماما"
و هالكلمه تنغز گلبي لان تحمل مسؤولية جبيرة
خفت اعوفهم بـ يوم و اكون اكبر خيبه الهم بالحياة
لذالك تمسكت بيهم و تمسكوا بيه
ثالث يوم من وفاة بيبي لگيت نفسي يمهم
و اطلب منهم يدعون لـ بيبي بالرحمه
لان دُعاء الاطفال المظلومين و البريئين مُستجاب
مثل ما گالوا "الاطفال احباب الله"
فما بالك بـ الاطفال المتروكين بـ الشارع
و الاذى بـ داخلهم يفوق كل شي
قاطع تفكيري أيهم يلي يمد الهم الالعاب
و يوزعها عليهم و الولد انطاهم سيارات
فرحانين و الفرحه ماليه گلوبهم و عيونهم
صاح طفل صغير ضحكني
رضوان : لك تؤبررررني شو حبيتك
أيهم : ولك انت الي تؤبرني
راح رضوان يضحك باس أيهم
ابتسامه ظاهره اسناني و انا ادحگلهم
عفناهم و رحنا نمشي لـ السيارات
أيهم : تدرين بالمستشفى اكو رجال جبير
يعني حجي خطية صارله هواي يمنا
و مريض تعبان حاله كلش
دوم يسولفلي عن حبه للجهال
مُلاذ : يعني انت هم عدك اصدقاء بالمستشفى؟
أيهم : يووووه شكثر خصوصاً هذا الحجي
صارله سنين يمي بالمستشفى و انا اعالجه
يوصل للموت و بـ فضل رب العالمين يرد للحياة
متعلق بي و احبه اكثر من روحي حتى احسه ابوي
مُلاذ : الله يحفظه و يخلي
أيهم : امين الله يسمع منج
وصلنا للسيارة رفع ايده يودعني
سويت نفس الشي و صعدت
الصبح اشتغل بـ محل ورد ابيع
و بالليل اشتغل بـ مطعم
مرات اقدم اكل مرات اغسل الماعين
اتوجهت ناحية محل الورد
و انا رايحة بـ اتجاهه اجاني اتصال
رفعت تلفوني دحگت لـ رقم ضرغام
رديت على الاتصال
مُلاذ : هلو ضرغام
ضرغام : هلا مُلاذ
مُلاذ : هلو گول
ضرغام : اريد انطيج شغلة
تگدرين تجين لـ ####
مُلاذ : شغلتيش ؟
ضرغام : تعالي و تشوفين
عكدت حواجبي مستغربة
بعد تفكير دام لـ ثواني جاوبت : تمام
سديت الاتصال ، رحت للمكان يلي گال اله
نزلت دحگت نفسها الحديقة
و بـ نفس المكان كاعد هوَ
سلمت عليه و وكفت كدامه
مُلاذ : اي گلت رايد تنطيني شي؟
هز راسه بـ قبول مبتسم
ضرغام : صراحه هواي فكرت
اذا انطيج شغلتج لو ابقيها عندي و احتفظ بيها
ظليت ادحگله عاكده حواجبي
و اغلي من جواي اموت من هالنظرات
ابتسم و دخل ايده بـ جيبه ، طلع من جيبه شغله
و ظل صام ايده و ضامها لحد مفتحها
و انا ظهر بـ عيوني الاندهاش لمن شفتها
"كلادة الرصاصة" اخذتها بسرعة
مُلاذ : وين لكيتهاااا؟
ضرغام : لمن جنتو مخطوفين و خابرتيني
لكيت هاي الگلاده واكعه عرفتها مالتج
اخذتها ظليت ضامها عندي
و هسه اجيت انطيها الج يعني لـ صاحبتها
ابتسمت فرحانه بـ عودة گلادتي
رفعت راسي دحگتله : شكراً
ضرغام : العفو
هزيت راسي و هو رجع گال
ضرغام : مُلاذ
مُلاذ : اممم
ضرغام : انا بـ كل وقت حاولت هواي حاولت
بلع ريكه و كمل يدحگلي بـ ارتباك
ضرغام : حاولت انسى اول لقاء بيننا
حاولت انسى تخبطاتج و انتِ صغيرة
حاولت اتجاهل قوتج
و المسؤولية يلي تحمليها على ظهرج
بس ماكدرت ماكدرت ابد انتظرتج هواي
انتظرتج تتخرجين انتظرتج تستقرين ...
غمضت عيوني بـ انزعاج من هالموضوع
و هو كمل كلامه يشرح مشاعره
ضرغام : ردت اسأل عدنا فرصة؟
هزيت راسي بـ رفض
مُلاذ : و اتمنى ما يتكرر هالموضوع
صداقتنا انا وياك كانت حلوه ماريدها تخرب
ضرغام : خلينا نحاول ؟
هزيت راسي رافضة
شددت ايدي على گلادتي
مُلاذ : شكراً ، اتمنالك الاحسن مني
تركته و مشيت و هو ظل بـ مكانه
شفت المشاعر و المعاناة بـ نور
شفت الحب من طرف واحد شيسوي بـ البشر
لذالك ما كدرت اغضب منه
المشاعر مو بـ ايد الانسان
و لا ردت افشله اكتفيت بالرفض و رحت
وصلت للمحل اشتغلت
و بالليل رحت للمطعم
وهكذا مر اسبوع كامل ، بـ يوم كمت نظفت الغرفة
و قبلها كنت منظفة البيت كله بـ مساعدة ملاك
امي بدت تمشي بلا مشايه بس مو مسافات طويلة
فتحت شباك الغرفة للـ تهويه ،
تمددت على جربايتي افكر بـ موضوع الكاسيت
سجلت الصوت بـ تلفوني
مخليه التلفون على المخده يم اذني
و استمع للـ تسجيل ، اعيد بي و اسمع ادور ثغرة
صحيح صوت الرجال بس اكو اصوات يمه
اصوات حجي على اصوات طقطقة
و اصوات عزف وصوته من بينهن
و انا اسمع و مركزه ، كمزت من مكاني
لمن طفر أيهم من الشباك ، ينكث بـ ايده و ملابسه
دحگتله كعد بـ الكاع و انتچى على الحايط
فوك راسة الشباك ، معلك الجكاره بـ حلگه
الي يشوفه يگول غرفته مو غرفتي
-انت شنو من بشر ما تگلي ؟
يعني انا افتح الشباك حتى تتهوى الغرفة
و انت تطفر من عنده عليه و بـ غرفتي !
أيهم : الله شكد حلو اتمنى تريديلها
نوب اشرع الشبابيك و اكابلهن ، ليل نهار
مُلاذ : ترضى واحد يدخل ع اختك هيج؟؟
أيهم : اشك حلگه
مُلاذ : لعد شلون تقبل تدخل عليييه!
-اشك حلكه اليدخل عليج
بس انه مسموحلي
خزرته : أيهم
تنهد و دحگلي : جرحه
مُلاذ : و الله كتلتني بهالجرح
هسه يا ليتني لو صدك مسويتلك شي
حتى ما اعرفك و لا تعرفني
أيهم : مسويتلي بس انتِ ما تدرين
و لا يهمج نتعرف
مُلاذ : دكوم اطلع منين ما اجيت
ما اريد اتعرف
-عيب بابا تطردين خطارج
-شايف امي اذا اجت و شافتك
تطرد خطاري و تطردني ويا
-صدك ؟
-و الله
عبالي رح يضوج و يطلع
شو هذا گلي : ديلا وينها خل اصيحها
من كل عقله كام يريد يطلع من الغرفة
يصيح امي گال بصوت عالي : خـا...
كمزت بسرعه تعلكت على ظهره
سحلته من ياخة قميصه ، سديت حلكه بـ أيدي
مُلاذ : لككك شدتسوييي صدك تحجي !!!
نزلت ايدي من حلكه
و انا صاعده على ظهره
الأيهم : غير تكولين تطردج ويا خطارج ؟
-اي ؟
أيهم : اي هاهي انه رايدها من الله
نفرفر الشوارع انه وياج و اغني الج
ويا محلاها من طرده
نزلت من ظهره انبطحت ع الگاع
ايديه على راسي
ادحك للـ البلاء الاسود يلي كدامي
-انت شلون دخلت الطب ؟
اصلاً شلون صرت دكتور
-قسمتي العوجه دخلتني طب و صرت دكتور
لو رايح تربية و تعليم اشرفلي
-انت ! ، تربيه و تعليم ؟
-اي نعم انه شبيني ناقصني ايد رجل عين
-حتى الطلاب بعد ميحضرون الدرس
و يرسب الصف كله و يسدون المدرسة
-ليش بوية شني شمسويلهم ؟
قابل اكرصهم لو جلب و امشي واعضعض
-و عود تصير مدرس شنو ؟
-عربي
كمت على حيلي كنبصت ادحگله
مُلاذ : اي و الحسن يلوكلك
گال ب لهفة و فرح
أيهم : صدك؟
-اي و الله بيك كل مواصفات مدرسين العربي
هم غثه و هم تتفلسف هواي و هم متنبلع
خزرني
أيهم : انجبي
-شهالميانه هااااي
فوك شينه كواة عينه لك بابا ..
بعدني ممكملة و قاطعني
بابتسامة جانبيه و نظرات مال ادبسزيين
-سودة عباتي لو هيج البابا لو متنراد
خزرته : ولبابا تلطك ع حلكك
مگلتها بالمعنى الحرفي
-ولج الفوصه مو اكوم ازوركج
-لا تحومرني خاف دروح بابا..
هم رجع قاطعني بـ نظره ، مبتسم
أيهم : ي عيون البابا
-يمه راح انجلط كوم اطلع كوووم
-دولي مالي خلك متعنيلج من ال####
و جايلج و تطرديني
-انت شنو من بشر
-انسان
-تافهه
-سخيفه
-ام سوادي
-سوادي
-سافل
خزرني و كام بسرعه دحگتله بـ استغراب
دور بـ عيونه دحك على جربايتي
سحل اللحاف و لزمني لفني بي
اريد اصرخ ما اكدر خاف تجي امي
-لك أيييييييهم شدتسوي ؟؟
ايهم : عود على بالج
ما اكدر اكضج لان حرام
لفني لف بـ اللحاف و صرت على بطني
و كام كعد على ظهري
-لك البغللللللللللللللل
-العرمه السافلة الفوصه ام شعر
-اخخخ يمه ظهري لكك كسرته
كسروك ان شاء الله كوووووم
-لا تدعين انجبي ، عادي اداوي
-داووك سبع جناونه كون
كوم يالمخبل كوم
زاد ثكله ، حسيته متمدد على ظهري
-لك وخر عني شدتسوي ؟؟
دحگت للمراية بـ صفي لكيته متمدد على ظهره
يعني صاير ظهره على ظهري و متمدد
عبالك جربايه و انا مطحوله طحل
-يلا العبي بيه شناو
هزيت راسي متوعدتله ، نَفسي يلهث
صرخت بصوت عالي : حراااااااااامي
سمعنا صوت ربده بالبيت
ما شفت غير ترابه ورا
كبل شبخ الشباك و طفر
اندار عليه سوالي حركة ب معنى "نعلعلاج"
و هز بـ ايدة بمعنى "اصبريلي"
انفتحت باب الغرفة و هو اختفى
دحگت ورا اضحك انداريت لگيت ملاك
بـ ايدها ماسحه شوكت لحگت ما ادري
ملاك : وين الحرامي؟؟؟
مُلاذ : اخ يمه مشمش طلعت حلمانه
تعاي بـ شرفج افتحي رولة اللحاف
ركضت عليه و تفتح بـ اللحاف
كعدت على حيلي لازمه بـ ظهري
و ادحك للـ شباك و حاصره ضحكتي
مُلاذ : مين لحگتي تجيبين الماسحه؟
ملاك : مادري لگيتها كدامي
انا قررت ما اخاف نوب اصير قوية
مُلاذ : عفيه مشمش
بعدني جاي احجي
صارت صوت طكه عالي من برا
صرخت ملاك مخترعه و ختلت بـ ظهري
هزيت ايدي و ملاك لازمه بـ ملابسي
مُلاذ : عود هاي صارت قوية
اجت امي وكفت بـ الباب تدحگلنا و خايفه
تصيح "شكو" مخترعةخطيه تمشي
گوه توصل النا و عل ما توصل
خرطانه روحها و رايحه و وجهها اصفر
اشرت الها ماكو شي كمت اشوف شكو
طلعت للطرمه لكيت الگلوب مال طرمه طاك
صحت لـ ملاك اجت شافت الگلوب
ملاك : يا و انا اخترعت
ما تسوه الخرعه
مُلاذ : دمشي جيبيلي الدرج
راحت جابتلي الدرج و جبت گلوب جديد
خليتها تسده و صعدت وخرت الگلوب القديم
و شديت الگلوب الجديد
مُلاذ : افتحي الضوه
انفتح الضوه و رجعت الطرمه تضوي
مُلاذ : اشتغل
نزلت و دخلت الدرج
و دخلت احاول انام لحد ما حل الصبح
و انا بعدني ما نايمه دك المنبه
اليوم عندي مقابله وي محامي علمود اتدرب يمه
نفسه اتدربوا يمه غاده و باهر و كان خوش محامي
كمت غسلت و بدلت ملابسي
و اتوجهت بـ طريقي للمحامي كان اسمه"هيثم"
التقييت بي و كان اكو متدربين ثانيين
قبلوني انا من بينهم بعد ما سألونا عدة اسئله
و كان اكو اجراءات ثانية طبعاً
و حددت مدة تدريبي يمه
رجعت هلكانه من التعب و رجليه تصيح الغوث
نزعت كعبي بـ الباب و فتحت شعري
دخلت و تمددت على الفراش انفخ بـ ضجر ...
بعد مرور اسبوعين ...
امشي مستقيمه بـ طريقي
وكفت كدام الباب فتحها الحارس
دخلت دحگت لـ الغرفة و جدرانها
نزلت عيني عليه ، حاط راسه ع الطاولة
اتقدمت وكفت كدامه خليت جنطتي ع الطاولة
ابتسمت بـ طرف شفتي و ندهت اسمه
مُلاذ : اركان ؟
رفع راسه بسرعة خلال لحظات
اتحولت تعابيره للـ استغراب و الصدمه
وسع عيونه قبل لا ينطق بـ اي شي
طلعت هويتي و خليتها كدامه ، گلت
مُلاذ : وياك المحامية مُلاذ إلياس .
- يتبع الفصل التالي اضغط على ( رواية جرح الأيهم ) اسم الرواية