رواية يكفيني منك عقابا الفصل العشرون 20 - بقلم بقلم عبير سليم
الحلقه العشرون
يكفيني منك عقابا
💖💖💖💖💖💖💖💖
مساء الخير عليكم جميعا
قبل ما ابدأ الحلقه أتمنى ان التفاعل عالحلقه يزيد شويه يا ريت احس بوجودكم بلايك و تعليق و توقعات منكم للأحداث الجايه مش عاوزة حد يقوللي انا بتابع بصمت لأن ديه حاجه عمرها ما حتفرحني كده وجودك زي عدمه بالنسبه لي و ملوش أي قيمه فأي حد بيقرأ بصمت حقولله الله الغني عن متابعتك متشكرين مش لازمني في حاجه انا محتاجه دعم تشجيع كلمه حلوة تحمسني لكن الصمت ده انا استفدت منه ايه التفاعل يا جماعه ارجوكم لو بجد لية غلاوة عندكم انا مش عاوزاكم تنافقوني و لا تقولولي انتي كاتبه محصلتيش لا خالص والله انا عاوزه رايكم بجد حتى لو بالسلب انا موافقه وربنا احسن من السكوت ده اللي يسد النفس و اللا انا مستاهلش منكم ده انا عندي إحباط بجد و محتاجه دعم منكم طلبتها كتير و اللي استجاب قلة بس بردو حطلبها تاني و انا و غلاوتي عندكم بقى
بقدم شكر لكل حد قدرني بكلمه او ريفيو ربنا يخليكم لية و بجد بشكركم من كل قلبي بشكر Mona Hedia
Bobos RetOo Heba Mohamed توتا وبراء ومودى على ريفيوهاتهم الجميله ربنا يفرح قلوبكم يارب و بشكر Naglaa A. Amer على دعمها لية و اسفه لو طولت عليكم
و دلوقتى حبدا الكتابه و يا ريت أشوف منكم اللي نفسي فيه
لا تبقى حياتنا على وتيرة واحده و إنما تتغير تبعا لتقلبات الدهر و لا تظل ثابته بل تتحرك وفقا لما كتبه القدره و قدره لنا
فكلما مر الزمن تغيرت القلوب و تبدلت أحوال العباد و ها نحن الآن بعد مرور ثلاث سنوات نعم لا تأخذكم الدهشة فالوقت يمر سريعا و قد مر علينا و عليهم ثلاث سنوات نحن لا نعلم ماذا حدث معهم إبان تلك الأعوام و لقد حان المعاد ان نسافر إليهم مرة ثانيه و نتجول بينهم لمعرفة ما حدث لهم و ما يحدث معهم الآن
و ها نحن الآن في المحروسه بنت المعز القاهرة نتجول خلالها و نرى كيف حال أحبابنا عطر و يحي و ماذا جرى معهم و كيف حالهم الآن
يأخذها بين أحضانه بلهفه و شوق جوري حبيبة قلبي وحشتيني أوي
جوري : انت وحشتني أكتر يا بابي أنا كنت بقول لمامي بابي وحشني عاوزة أشوفه
_يحتضنها بشده خوفا من فراقها مرة أخرى : خلاص يا جوري من النهارده حنفضل مع بعض على طول و مفيش حاجه ممكن تفرق بيننا أبدا حعوضك عن كل اللي فات حاخدك و نسافر و نلف الدنيا كلها حجيبلك كل اللي انتي عاوزاه حعملك كل الحاجات الحلوة اللي ياما حلمت بيها و احنا مع بعض
_سيب البنت يا خالد و ملوش لزوم الكلام اللي بتقوله للبنت ده انا جبتهالك عشان تشوفها زي ما وعدتك لكن إياك تفكر و لو للحظه واحده انك ممكن تاخد بنتي مني جوري حتفضل عايشه معايا أنا و كونك تشوفها ده حيكون على مزاجي انا و في الوقت اللي أنا عاوزاه و اللي يريحني غير كده لاء
خالد و هو محتضن ابنته و يتحدث بكل قهر السنين : في إيه انتي عاوزة إيه مش كفايه السنين اللي انتي حرمتيني فيها من بنتي اخدتيها و سافرتي و خليتني أعيش سنين في ن*ار ن*ار حرماني من بنتي الوحيده ودلوقتى جايه تقوليلي أشوفها على مزاجك لا يا هانم ده مش حيحصل و مش حسمحلك تاني تفرقي بيني و بين بنتي و يوم ما تفكري تبعديها عني تاني حيكون آخر يوم في عمرك فاهمه
ستووووب
يصفق بيديه له : برافو برافو يا شباب كيان بجد انت أبدعت أنا صدقت إنها بنتك من كتر مانت عيشتنا في المشهد
كيان (يحي) و الدموع تجري بعينيه : صدقني يا عز لو قلتلك ان احساسي بالمشهد و بالبنت كان حقيقي مش مجرد تمثيل كنت حاسس بكل حرف بقوله و كل كلمه نطقتها كانت خارجه من قلبي مش من لساني قلبي اللي بيتعذب كل لحظه في بعدها عني هي و ابني و يمكن بنتي اللي انا مش عارف هما فين
عز : هون على نفسك يا كيان ان شاء الله حيرجعوا
كيان (يحي) : يرجعوا يرجعوا فين يا عز لو عطر عاوزة ترجع كانت رجعت من زمان تلت سنين يا عز تلت سنين عدوا و انا معرفش عنهم حاجه مش عارف إذا كانت عايشه و اللا لاء خلفت و اللا لاء و لو خلفت جابت بنت و اللا ولد انت فاكر إني مبفكرش فيهم يا عز أنا أصلا مبفكرش غير فيهم أنا كل يوم بحاول أهلك نفسي في الشغل عشان لما اروح أنام من غير ما أحس لكن لاء تفكيري فيهم بيخليني مقدرش أغمض عينيه أنا مبقتش بعرف أنام غير بمنوم
تعرف يا عز إن لو عطر ولدت يبقى ابني او بنتي عندهم تلت سنين
عارف يعني ايه تلت سنين يعني بيقول ماما و المفروض يقول بابا يا ترى يكون بيقول بابا لحد غيري يا عز
بس لاء مش ممكن يكون قالها لحد عطر بتحبني أيوة انا متأكد انها بتحبني و استحاله توجع قلبي بالشكل ده و تخليه يقول لغيري بابا
عز : كيان اهدى عشان خاطري مش كده اللي بتعمله ده مينفعش انت كده حيحصلك حاجه
كيان (يحي) : غصب عني يا عز مش بأيدي صدقني و الله ما قادر كل يوم بيمر و هما بعيد عني ن*ار بتنهش في قلبي و مش عارف حتهدى امتى قلبي واجعني أوي
معقوله مشافتنيش معرفتش إني بمثل ازاي مفكرتش تتصل بية و تحاول توصللي
بس ازاي حتفكر تتصل بية و هي أصلا زعلانه مني انا اللي قاهرني انها ماشيه و هي متاكده اني مبحبهاش و اتخليت عنها فاكرة اني رفضت ارد على مكالمتها و قفلت التليفون عشان مش طايق اسمع صوتها مش قادر يا عز مش قادر
عز : لا حول ولا قوة الا بالله يعني الشهرة اللي انت حققتها مقدرتش تعوضك عن غيابهم عنك
كيان : لا طبعا يا عز استحاله اي شهرة ممكن احققها تقدر تنسيني
عز : ادعي ربنا يا كيان ادعيه و ان شاء الله حيستجيب لدعاءك
كيان (يحي) و هو بيمسح دموعه : انا كل ما بشوف طفل في اي مكان بتخيله ابني كل ما بشوف بنوته صغيرة بتخيلها بنتي انا تعبان اوي يا عز
عز : كيان احنا فاضلنا كام مشهد و نكون خلصنا الفيلم إيه رايك تسافر أي مكان تغير جو يمكن نفسيتك تتحسن شويه صدقني ممكن تهدى شويه
كيان : ان شاء الله يا عز ربنا يسهل يحاول انه يغير الكلام : أمال فين نيللي خلصنا المشهد و اختفت
عز : تلاقيها مع جوزها بتواسيه زي عادتها
كيان : انا مستغرب إزاي معميه عن كل اللي القرف اللي هو فيه
عز : مراية الحب عاميه و هي حبها ليه عاميها مخليها مش شايفه عيوبه
كيان : يا ريتها عيوب عاديه يا عز كانت تبقى مقدور عليها لكن دي كوارث
عز : أنا كل اللي يهمني هيا خايف مستقبلها يتأثر بوجوده في حياتها إنت عارف إن المنتجين بقوا بيرفضوا اشتراكه في أي عمل و الهانم طبعا كالعاده بتطلب مني اتوسطله عندهم عشان يشغلوه
كيان : و ليه تعمل كده ليه تضيع نفسها معاه بالشكل ده
😴عشان محدش يقول عليك فاشل عشان انا كمان ما انضرش معاك عشان اقدر افضل فاتحه البيت ده
جاسر : طب سيبك دلوقتى من الكلام في موضوع الشغل ده و انك بتتحايلي على حد يشغلني
نيللي : امال انت طلبتني ليه و خلتني اسيب الاستوديو و اجي
جاسر : عاوز فلوس ضروري
نيللي : ههههههه فلوس كل اللي انت عاوزه فلوس و بس طبعا عشان تصرفه عالقرف اللي انت عايش فيه
جاسر : نيللي خلصي بعدين نبقى نتكلم انا محتاج دلوقتى فلوس
نيللي : معييش مفيش
جاسر : يعني ايه معكيش و ايه اللي مفيش دي امال لو مكنتيش لسه قابضه الأسبوع اللي فات عالفيلم الجديد اللي انتي عاملاه مع الزفت اللي اسمه كيان ده
نيللي : قبضت مقبضتش انت ملكش دعوة بية و لا بفلوسي و انا بقولك مفيش و أعلى ما فخيلك اركبه
جاسر : ايه اللهجه اللي بتكلميني بيها دي يا نيللي من امتى و انتي بتعللي صوتك علية كده و بترفضي تساعديني
نيللي : من دلوقتى و رايح يا جاسر عارف ليه عشان انا تعبت تعبت خلاص ربطني معاك في حلقة مش عارفه أخرج منها إيه يا جاسر ناوي توصلنا لفين أكتر من كده عاوز إيه فهمني أنا بحاول أساعدك بكل الطرق لكن انت اللي مش عاوز تساعد نفسك و لا تقوم تقف على رجلك و إياك تقوللي الغي*رة و الح*قد و الكلام اللي مش حقيقي و اللي انا زهقت منه و حفظته خلاص ده انا زمان حبي ليك كان عاميني مخليني ماشيه وراك و انا مغميه عينيه كنت مصدقاك اوي لكن دلوقتى خلاص كفايه بقى لحد كده
جاسر : انتي قصدك ايه بالكلام ده يا نيللي
نيللي : قصدي اني تعبت خلاص و قرفت من العيشه دي فرقت من غشك و كد*بك و خدا*عك يا جاسر عمرك ما قلتلي الحق طول الوقت بتكدب و بتالف حكايات و روايات عمرك ما وعدتني وعد و نفذته بس انا خلاص شفتك على حقيقتك اللي مهما حاولت تخبيها عني تاني مش حتقدر
جاسر : لا و الله شوف ازاي و إيه هي بقى الحقيقه ديه يا ست نيللي
نيللي : الحقيقه إنك أكبر غلطه في حياتي و انا مش حسامح نفسي على انك كنت اختياري في يوم من الأيام
و لولا اني مش عاوزة حد يشمت فية و يقوللي تستاهلي و الله ما كنت فضلت معاك يوم واحد
و اعمل حسابك يا جاسر من النهارده مش حتاخد مني و لا مليم تنزل تشتغل و تصرف عالبيت و تسيبك من القرف اللي انت فيه ده و إلا
يمسك دراعها و يلويه لورا : و إلا ايه يا ست نيللي حتعملي لي ايه ان شاء الله كان ممسك ذراعها بقوة حتى انه لم يهتم لصراخها من احساسها بأن ذراعها قد كسر : فلوسك دي فلوسي و حاخدها منك بالذوق او بالعافيه و اصرفها على كيف كيفي و وريني شطارتك حتعملي ايه انا ممكن احبسك في البيت هنا زي الكلبه ممكن ابهدلك و محدش يقدر ينجدك من ايدي فين الفلوس
نيللي بدموع تقطع القلب على ذراعها الذي حقا كسر : دراعي يا جاسر حرام عليك دراعي حينكسر
جاسر : فين الفلوس
نيللي : حاضر حاضر حديك اللي انت عاوزه بس سيبني
تسمع صوت كسر ذراعها : اااااااه
بعد مرور بعض الوقت
جاسر و عز يدخلان المستشفى و هما يجريان تحت أنظار الجميع الذين يرحبون بهم و بوجودهم في هذا المكان يسألون عنها في الاستقبال و يتوجهون إليها في غرفتها و يفتحون عليها الباب ليتفاجئوا بها تبكي في حضن زميلة عملها بوسي
عز بلهفه شديده عليها : نيللي في ايه اللي حصلك
بوسي : زي ما حضرتك شايف يا استاذ عز دراعها انكسر و اتجبس
عز : فهميني ايه اللي حصل مش انتي كنتي ماشيه من الاستوديو و انتي كويسه
نيللي : اهئ اهئ اهئ
كيان : جاسر هو اللي عمل فيكي كده
تهز له راسها و هي تبكي بمعنى نعم
عز : ازاي الحي*وان ده يعمل فيكي كده ده انا حخرب بيته و انتي ازاي تسمحيله يعمل فيكي كده ليه يا نيللي ليه
بوسي : دي مش اول مرة يعمل فيها كده يا استاذ عز
نيللي : بوسي الله يخليكي اسكتي
بوسي : لا مش، حسكت يا نيللي انتي ايه مش صعبان عليكي نفسك حرام عليكي كفايه بقى
كيان قولي يا بوسي في ايه و احكيلنا عن االي مخبياه عننا الهانم و محسسانا انها عايشه أسعد أيام حياتها
بوسي : مش، صحيح يا كيان نيللي من وقت ما اتجوزت جاسر ده و هو مستنزفها ماديا و مخلص على كل فلوسها و بيضربها و بيهينها و بياخد فلوسها يصرفها في الكباريهات و على الرقاصات و لعب القمار و القرف اللي بيشربه و مش بس كده و كمان بيخونها و انا بنفسي شفته و هو خارج من عمارة فيها شقق مشبوهه و النهارده وصلت بيه الجرأة انه يضربها لحد ما دراعها ينكسر في ايده و كل ده عشان ياخد فلوسها بالعافيه
عز : و انتي ازاي تسكتي على اللي بيعمله معاكي ده ليه يا نيللي
نيللي : مكنتش عاوزة أشغل حد بمشاكلي يا عز كل واحد فيه اللي مكفيه
كيان : و احنا من امتى اتخلينا عنك يا نيللي انا و عز و بوسي ياما نصحناكي انك تبعدي عنه ياما قلنالك انه مش الشخص المناسب ليكي و انتي اللي اصريتي عليه صدقتيه هو و كدبتينا
نيللي : قدر يخد*عني و يقنعني انه بيحبني و حيخليني اسعد واحده في الدنيا كلها و انا من خيبتي صدقته يا كيان
عز : و بعد ما عرفتي حقيقته بدل ما تقفي فوشه تقومي تقبلي على نفسك الذل و البهدله دي ازاي هانت عليكي كرامتك تهينيها بالشكل ده
نيللي : كان عندي أمل انه يتغير و يبقى كويس لكن للأسف خذلني المهم دلوقتي انتوا لازم تشوفوا حد غيري في الدور ده مع كيان عشان الدنيا متتعطلش و انا كمان نفسيا مش مستحمله اي حاجه دلوقتى انا محتاجه اقعد مع نفسي و اعيد حساباتي و بالنسبه لفلوس المنتج انا حرجعهاله ان شاء الله
عز : فلوس ايه انتي كمان المهم عندنا دلوقتى انتي و سلامتك
و الحيو*ان اللي اسمه جاسر ده حسابه معايا حيبقى تقيل اوي و ربنا لاندمه على اليوم اللي قرب فيه منك و كل دمعه نزلت من عيونك حيدفع تمنها غالي أوي
😭😭😭😭😭😭😭😭
تعمل بكل نشاط فيطرق عليها الباب و يدخل : يا للا يا عطر
عطر : يا للا فين يا عمي
مجدي : حنروح ايه غزل موحشتكيش و اللا ايه
عطر : طبعا وحشتني اوي بس انا لسه مخلصتش شغل
مجدي : مش مهم طنطك مشيرة أصدرت فرمانها إني أخدك و نروح حالا البيت
عطر : غزل حصللها حاجه
مجدي : لا يا بنتي بعد الشر عنها ده نديم جه و مشيرة حضرت الغدا و عاوزانا كلنا نبقى مع بعض
عطر : حاضر يا عمي
بعد قليل
يدق الجرس فتجري ندى لفتحه لهم و تفسح لهما الطريق : اهلا اهلا بأم العروسه اتفضلوا
تدخل عطر و تتفاجئ بالمنظر البلالين و الزينه ماليين المكان و أغاني أعياد الميلاد و الورود و سفرة كبيرة عليها تشكيله جميله من التورتات و الحلويات و تورتايه كبيرة عليها صورة غزل
تخرج مشيرة من اوضتها و هي ماسكه غزل في ايدها لابسه فستان أزرق منفوش و مطرز و عاملالها شعرها و لا بسه تاج كانت اميرة من قصص الف ليله وليله جمالها كان ياخد العقل
عطر مكنتش مصدقه اللي شايفاه قدامها و دموعها نزلت من عينيها
مشيرة : ايه رايك في الأميرة غزل
عطر : انا مش عارفه أقول ايه ده كتير علينا أوي
مجدي : مفيش حاجه تكتر عليكم ده انتوا ماليين علينا حياتنا و غزل بقت حياتنا كلها
مشيرة : غزل دي حبيبة قلب تيته من جوة
عطر : ربنا يخليكم لية يا رب
ندى : ايه رأيك بقى في الديكورات كل ده انا اللي عاملاه بايديه
عطر و هي تحضنها : يا حبيبي يا ندى ربنا يخليكي ليه يا حبيبتي يارب
يدق الجرس و هو داخل يغني و شايل علبة كبيرة اوي : كله يوسع
يفتح العلبه و يطلع منها عربيه كبيرة و يقعد فيها غزل و غزل فرحانه اوي و عماله تضحك
نديم : كل سنه و غزل طيبه يا عطر
عطر : و انت طيب يا نديم بس مكنتش تعبت نفسك اوي كده
نديم : اتعب نفسي ده ايه دي الأميرة غزل يعني الحب كله
ندى : يا للا الكل يتفضل السفرة جاهزة
يدق الجرس فتروح الخادمه تفتح الباب فيتفاجئوا بيونس جاي هو و والدته
نديم : ده الحبايب كلهم اتلموا و اللا ايه
عطر : مالك يا ندى
ندى : قلبي مبيستحملش يا عطر أول ما بشوفه بحس ان روحي راحت مني
عطر : ربنا يقرب البعيد يا رب
يسلم يونس و أمه على الموجودين و يقدموا هديتهم لعطر
الكل يتجمع و يغنوا اغنية عيد الميلاد و غزل و عطر يطفوا الشمع و كهم يقدموا لها الهدايا و عطر مش قادرة تمنع دموعها من انها تنزل من فرحتها
و بعد كده كلهم يقعدوا و كل واحد فيهم في ايده طبق الحلويات
مامت يونس : ايه رأيكم بالمناسبه الحلوة دي نخللي الفرحه فرحتين
مشيرة : فرحتين إزاي يعني مش فاهمه
مامت يونس : يونس
مجدي : ماله يونس
مامت يونس : بيتقدم لندى هاه إيه رايكم
ندى وقتها قلبها كان حيقف من الفرحه و قامت وقفت و قعدت تاني و بتتحرك عالكرسي
عطر مسكت ايدها
ندى : عطر الحقيني قلبي حيقف
مجدي : و احنا عمرنا ما حنامن على ندى مع حد زي يونس بس الأول اسمعها من ندى ايه رأيك يا ندى
ندى مش قادرة عماله تضحك و تبص ليونس بفرحه
الكل ضحك على شكلها
يونس : عمي بعد اذنك انا جايب خاتم بسيط ممكن تسمحلي البسه لندى
نديم : اتفضل يا سيدي
يقوم يونس. يقعد جمب ندى و يلبسها الخاتم
و يستئذن يونس عشان يقعد مع ندى لوحدهم
ندى : هو انا بحلم انا بجد مش مصدقه
يونس : لا صدقي يا ندى
ندى : طب كنت فين من زمان ده انا مستنياك بقالي كتير اوي انا كنت بقول انك مش حاسس بية و لا في دماغك من أساسه
يونس : مين قال كده بالعكس يا ندى انا عمري ما فكرت في حد غير فيكي انتي عارف اني اتاخرت عليكي بس انا كنت عاوز اتأكد من حبك لية و حبي ليكي قبل ما اخد الخطوة دي و أنه مش مجرد إعجاب و خلاص
ندى : و اتأكدت يا يونس
يونس : مكنتش حكون هنا دلوقتى لو مكنتش اتأكدت يا ندى
و اوعدك اني حعوضك عن غيابي عنك و كل لحظه انتظرتيني فيها حعيشك قصادها اجمل لحظات ممكن تعيشيها فحياتك كلها
مامت يونس : ياااه متعرفيش يا مشيرة انا كنت منتظره اللحظه اللي يونس يقوللي فيها انه نوى يرتبط بندى ازاي
مشيرة : كل شئ باوان يا منى
منى : ربنا يهنيهم و يسعد قلبهم يا رب و عقبال نديم لما ربنا يطمن قلبك عليه هو كمان
مشيرة : و الله ما في حد محيرني زي نديم لا عارفه ماله و لا ايه اللي شاغله
منى : مش يمكن يكون بيحب يا مشيرة
مشيرة : يا ريت يا منى ده هو ده اليوم اللي بتمناه ياريته يشاور لي على أي بنت في الدنيا كلها و انا كنت رحت خطبتهاله على طول لكن ده أنا كل ما احاول أفتح معاه سيرة في الموضوع ده يغير الكلام على طول بس انا قلبي بيقوللي ان في حاجه جواه و مخبيها علينا
بينما هو كان جالسا مع عطر التي كانت تجلس مع ابنتها و يتحدث إليها : عامله ايه يا عطر
عطر : الحمد لله والله بخير يا نديم انت اللي عامل ايه في شغلك
نديم : تمام التمام
غزل كبرت يا عطر و بقت زي القمر ما شاء الله عليها
عطر : ربنا يخليك يا نديم و عقبال كده مانت كمان تتجوز بقى و تملى لطنط و عمي البيت ولاد
نديم: اتجوز
عطر : ايوة تتجوز انت اتاخرت اوي في الارتباط يا نديم و طنط مشيرة منى عينها انها تفرح بيك
نديم : و انا كمان أكيد نفسي افرح بس
عطر : بس ايه يا نديم سكتت ليه و اللا انت بتعتبرني غريبه عنكم
نديم : غريبه عننا و الله عيب عليكي لما تقولي كده يا عطر
عطر : خلاص يبقى افتحلي قلبك و قللي مالك شكلك بيقول ان في حاجه هي شاغلاك اوي كده
نديم : هي مين دي اللي شاغلاني
عطر : اللي انت بتفكر فيها دلوقتى قللي و انا اروح اخطبهالك ايه رايك
نديم : يا ريت كان ينفع مكنتش انتظرت لحظه واحده
عطر : و ليه مينفعش يا نديم
نديم : خلاص خلاص يا عطر بعد اذنك
يقوم نديم و يدخل اوضته و عطر مستغربه رد فعله بس قالت لنفسها اكيد عنده أسراره اللي مش عاوز حد يعرفها تقعد مع مشيرة و منى والدة يونس لحد ما يمشوا و بعد كده تاخد عطر بنتها و تطلع الشقه و تحصلها ندى و يفضلوا يتكلموا و طبعا ندى كانت فرحانه فرح ملوش وصف انها اخيرا اتخطبت للي قلبها طول عمره بيتمناه
ندى : بقولك إيه بما ان بكرة مفيش شغل إيه رأيك نقعد سوا نتفرج على فيلم و اللا مسلسل
عطر : ما انتي عارفه يا ندى اني مليش في الأفلام و لا المسلسلات خالص
ندى : لاء بقولك إيه انتي من يوم ما جيتي هنا من ييجي اربع سنين و انتي مفيش مرة واحده فكرتي تشوفي معايا فيلم و اللا حتى برنامج
و سايباني بشوف كل حاجه لوحدي و انتي بتنامي يا اما بتشغلي نفسك بغزل
عطر : يعني بزمتك أقعد مع غزل و اللا ادام فيلم أنا مقدرش أشغل نفسي عنها بأي حاجه يا ندى شايفه اني وقتي كله من حقها هيا و بس كفايه الوقت اللي بقضيه في الشغل بعيد عنها يبقى كمان الوقت اللي فاضل حشغل نفسي عنها
ندى : يعني افيشات الأفلام و المسلسلات اللي ماليه الدنيا حوالينا دي ملفتتش نظرك لحاجه تشوفيها
عطر : افيشات ايه انا ماخدتش بالي من حاجه خالص ندى انا و انا رايحه الصبح الشركه اديكي بتبقي معايا و بتكلم معاكي مباخدش بالي و وانا راجعه يا اما بنكون سوا يا اما لو كنتي مشيتي انتي برجع و انا سانده راسي على شباك العرببه و بغمض عينيه لحد ما اوصل افيشات ايه دي اللي حشوفها
ندى : طب عشان خاطري الليلادي بس اعتبريها يا ستي بمناسبة خطوبتي
عطر : حاضر يا ستي عشان متزعليش و انا الليلادي عاوزاكي تكوني مبسوطه
ندى : اوبه بأه هو ده الكلام تعالي بقى اقعدي جنب اختك يا قلبي واو اما انتي حتشوفي حتة فيلم إنما ايه حاجه كده تاخدك لدنيا تانيه
عطر : ده فيلم ايه ده اللي انتي عامله عليه القلبان ده كله
ندى : فيلم اسمه حبيب عمري بس ايه مش قادرة اقولك
عطر : بتاع مين ده عبد الحليم حافظ
ندى : هههههه و ربنا عسل يا عطر
عطر : ما هي الرومانسيه انتهت بعد عبد الحليم يا ندى
ندى : لاء يا عطر الرومانسيه موجوده في كل زمان و مكان و عمرها ما تنتهي أبدا
عطر : ماشي يا ستي قوليلي مين اللي بيمثل يا اختي
ندى : حاضر يا خالتي البطل يا ستي ده بقى بطل لسه ظاهر من كام سنه كده ييجي من تلت أربع سنين بس إيه مكسر الدنيا كل شويه فعمل مرة مسلسل و مرة فيلم بس إيه مز المزاميز قمر قمر يا عطر حاجه كده مارون جلاسيه
عطر : ياااه للدرجه دي
ندى : و اكتر بكتير دلوقتى تشوفيه و تحكمي بنفسك
يبدأ الفيلم و تكون عطر بتنيم غزل في اوضتها و تخرج تقعد و ترفع عينيها للشاشه و تشوفه ادامها
لحظه يقف بيها الزمن مش مصدقه اللي عينها شايفاه
ندى : مالك يا عطر في حاجه
عطر : استحاله مش معقوله لا لاء مستحيل اللي انا شايفاه يكون حقيقي
ندى : عطر انا مش فاهمه حاجه في ايه يا عطر
عطر : يحي يحي يا ندى
ندى : يحي هو فين يحي يا عطر
عطر : اهوه اللي قدامك اهوه عالشاشه ده هو هو يحي يحي جوزي يا ندى يحي ابو غزل
ندى : حبيبتي سلامة عينيكي ده اسمه كيان عز الدين الممثل اللي بقولك عليه
عطر : لاء ده يحي أيوة يحي انا مش حتوه عن جوزي يا ندى جوزي اللي نمت فحضنه تلت شهور اللي انا خلفت منه يا ندى اللي نفسه كان في نفسي اللي عيشت معاه كل لحظه حلوة مرت علية و اللي انا لسه لحد دلوقتي عايشه على ذكراها هو يحي و الله العظيم هو أيوة هو هو يحي يا ندى صدقيني انا متجننتش يا ندى
ندى : طب اهدي يا عطر اهدي عشان خاطري خلينا نعرف نفكر و نركز ده ممثل جديد ظهر بعد انتي ما جيتي هنا عندنا و اسمه كيان و بيتكلم باللغه العاميه و انتي بتقولي ان جوزك اسمه يحي و كان بيتكلم صعيدي
تقوم عطر تجري على اوضتها و تفتح الدرج و تطلع صورها مع يحي و توريهالها شوفي هو ده يحي يا ندى هو و اللا مش هو يا ندى قوليلي انتي يمكن اكون انا عقلي تاه و اتجنيت من كتر ما بفكر فيه
ندى : الشبه فعلا بينهم كبير أوي أنا ازاي ما اخدتش بالي قبل كده بس يمكن لأني مشفتش الصور غير لما بعتيهالي اول جوازك و بعد كده نسيت و وقتها مركزتش اصلا فيه بس ده بردو مش دليل على ان يحي هو نفسه كيان احنا لازم نتأكد يا عطر
عطر : و حنتاكد ازاي
ندى : في حاجات كتير ممكن نتأكد بيها زي اهلك اللي في الصعيد اكيد يعرفوا حاجه زي دي و كمان الميديا دلوقتى مبتسيبش حاجه من غير ما تتكلم فيها بيتكلموا عن حياته كلها
عطر : طب شوفي كده يا ندى حاولي تعرفي اي حاجه
تفتح ندى النت و تبحث عن كل حاجه تخصه و لقاءاته اللي تمت معاه في البرامج و عالميديا
تعرف انه صعيدي الأصل و وقتها المذيعه ضحكت و قالتله معقوله الصعيد فيه شباب حلوين كده
و اتفاجئت و اتاكدت ان عطر بتتكلم صح لما لقت مكتوب انه اسمه الحقيقي يحي و انه اضطر يغيره بناءا، على رغبة والده و أن المخرج عز الدين هو اللي اختار له اسمه الجديد و أنه اداله اسمه لأنه هو اللي اكتشفه
عطر : شفتي يا ندى صدقيني يا ندى اتاكدتي اني مش بيتهيألي و لا بحلم ده اللي قدامي عالشاشه ده جوزي جوزي يا ندى ابو غزل يا ندى
ندى أخدت عطر في حضنها و عطر بقت تعيط بهيستيريه و هي مش مصدقه انها بعد السنين دي تشوف جوزها من خلال شاشة تليفزيون قعدت أدام الشاشه و بقت تلمس وشه اللي على الشاشه و دموعها مغرقه وشها كانت بتكلمه و كأنه سامعها و حيرد عليها : معقوله يا يحي معقوله بعد ما اشوفك بعد السنين دي كلها ابقى بكلمك من ورا سور فاصل بيننا بكلمك و انت لا شايفني و لا سامعني و لا ينفع ترد علية يعني انت سيبتني و خرجتني برة حياتك و حساباتك عشان تشتغل ممثل طب و ايه المشكله لو كنت عرفتني و شاركتني معاك في حياتك دي انت كنت شايفني ازاي وحده جاهله متعرفش حاجه في الدنيا غير انها تشاركك اوضة النوم و بس غير كده حتفضحك و تهد اللي انت بتبنيه كنت بتقول ان وجودي فحياتك حيسببلك مشكله عشان كده لما والدك قالك خد مراتك معاك رفضت طبعا ما نا مش اد المقام يا خسارة يا جوزي يا بو بنتي بس و الله لتندم يا يحي و الله لتندم على اللي عملته فية و الله لتندم على كل ليله نمتها و دموعي على خدي و انا اللي زي الهبله كنت اقول يمكن تكون زعلان عشاني يمكن اكون وحشتك زي ما وحشتني يمكن تكون حزين على فراقي ههههههه ههههههه اما انا هبله صحيح
ندى : عطر عطر حبيبتي عشان خاطري متعمليش في نفسك كده
عطر : اااه يا ندى اااه حسه بسك*ينه مغروزة فقلبي يا ندى اهوه يا ندى عايش حياته بالطول والعرض ممثل مشهور و اكيد ليه معجبات و ممكن يكون اتجوز وخلف و ليه حياته و انا اللي موقفه حياتي كلها عليه
ندى : عطر احنا بنشوف اللي أدامنا عالشاشه بس لكن احنا منعرفش حياتهم شكلها ايه و الله اعلم هو عايش ازاي و بعدين يا حبيبتي هو حيعمل ايه ما هو ميعرفش حاجه عنك يا عطر ميعرفش انتي فين
عطر : لا يا ندى متحاوليش تبرريله اللي عمله هو لو عاوز يعرف كان عرف أنا سألت عتاب كتير اذا كان حاول يسأل عني و اللا لاء حاول يتصل بيها بأي طريقه لأنه عارف عتاب عندي ايه و اني أكيد حطمنها علية لكن هو محاولش يا ندى هو نساني يا ندى نسى عطر مراته و تلاقيه نسى اني ماشيه و في حته منه معايا بس انا غبيه غبيه انا منتظره منه ايه مانا اتصلت عليه و مردش و قفل التليفون
بس و الله يا يحي و حياة كل لحظه عشتها معايا و كنت مبسوط فيها و انت جمبي لتندم يا يحي يا كيان يا ممثل يا مشهور انا و انت و الأيام بيننا يا يحي يا للي حييت الدنيا في عينيه بحبك لية المزيف و اللا اقولك يا كيان بس كيانك ده اللي انت بنيته السنين اللي فاتت بكرة انت اللي حتهده بايديك يا يحي لما تندم عاللي عملته فينا
😒😒😒😒😒😒😒😒
في صباح اليوم التالي
يجلس معها في احد الكافيهات على شاطئ النيل
كل سنه وانتي طيبه يا حبيبتي
رحمه :و انت طيب يا زياد
الله ديه حلوة جوي
زياد : بجد عجبتك
رحمه : عجبتني جوي يا زياد بس مكنش ليه لزوم تتعب نفسك أكده
زياد : تعبك راحه يا حبيبتي يا ريت كل التعب يبجى أكده و عجبال ما اجيبلك خاتم الخطوبه
رحمه : تفتكر يا زياد
زياد : و مفتكرش ليه عاد
رحمه : طول ما العداوة بين عيلة العشري و عيلة الطحاويه موجوده عمري اني و انت ما حنكون مع بعض يا زياد
زياد : مفيش حاجه بتدوم العمر كله و مسير حياجي اليوم اللي كل ديه ينتهي
رحمه : ما اظنش يا زياد اني ما عنديش امل واصل
زياد : يعني بت عمك مفيش أخبار عنها نهائي
رحمه : بص حجولك بس امانه عليك يا زياد متجيب سيرة لحد واصل من عنديكم
زياد : متخافيش يا رحمه
رحمه : عطر كل فترة بتتصل بعتاب تطمننا عليها و هي بخير الحمد لله
زياد : و مجالتلكمش حترجع امتى
رحمه : لا يا زياد كنها عجبتها الغربه و معاوزاش ترجع بتجول لسه مجاش الأوان
بس بردك حتى لو رجعت تفتكر ديه حيخللي العداوة تنتهي مظنش
زياد : كتله من اليأس ليه يا فجريه أكده بشروا و لا تنفروا
رحمه : بجي اني فجريه
زياد : أجمل فجريه في الدنيا كلها
رحمه : اني معارفاش انت بتحبني على ايه
زياد : نصيبي بجى حتجولي ايه حبك جدري و مكتوبي يا بت العشري
رحمه : ماشي يا بن الطحاويه اما اشوف اخرتها معاك ايه
زياد : رحمه الاسبوع الجاي عندنا امتحانات و عايزك تذاكري كويس
رحمه : متخافش علية
زياد : و اني لو مخفتش عليكي حخاف على مين يا همي الكبير
رحمه : همك الكبير بس على جلبك زي العسل
زياد : عسل و سكر كمان يا رب جرب البعيد
يعود إلى البيت و هو في حاله نفسيه جميله داخل يدندن و يغني و يلاقي والدته قاعده مع عائشه و يسلم عليهم و يسأل عن زينه
عائشه : و الله يا زياد معارافش مالها من اول اليوم جاعده في الأوضة بتاعتها معاوزاش تنزل
يطلعها و يخبط عليها الباب و تقوم زينه تفتحله
مالك يا حبيبتي انتي تعبانه
زينه : اهئ اهئ اهئ
زياد : زينه مالك يا اختي فيكي ايه هو حوصل حاجه بينك وبين زكريا
زينه من بين دموعها : لاء
زياد : امال فيه ايه طيب
زينه : خايفه يا زياد العمر بيجري و اني بكبر و لسه ربنا مأذنش لية بالخلف مجهورة يا زياد حسه اني اجل من الستات كلها و زكريا جلبي واجعني جوي عليه امبارح كنا في فرح اني و هو و الولاد الصغيرين كانوا بيلعبوا جدامنا عينه متشالتش من عليهم و فضل طول الليل سرحان مبيتكلمش و شكله مهموم و لما حاولت اهزر معاه زي عادتنا رمى كلمتين جالي هو ديه اللي انتي فالحه فيه و بس و اداني صهره و نام و عمي و خالتي حساهم متضايجين جوي و اكتر من مرة عمي يجول جدامي البيت زي الجبر و لو عطر كانت فضلت كانت ملت البيت عيال
ايوة هو عنده حج ماني أرض بور مبتطرحش عندهم حج و اني مش من حجي ازعل هما حاولوا معايا كتير و عملوا اللي عليهم
اني خلاص حجول لعمي و خالتي يجوزوا ولدهم و اني حمشي من اهنيه حروح أجعد مع امي و اللا اروح في اي مكان و ابعد عنهم
زياد : ايه اللي بتجوليه ديه يا زينه عايزة تجوزي جوزك بيدك و تمشي من بيت ابوكي و تسيبي جوزك اللي روحه فيكي و تسيبيني اني كمان يا زينه تسيبي اخوكي اللي ما صدج و لجاكي
زينه : طب اعمل ايه جوللي دلني يا اخويا اجوزه بيدي احسن و اللا استنى لما اعرف من برة امشي من اهنيه بكرامتي و اللا استنى لما يجيبها جدامي و اموت من جهرتي جللي يا زياد جللي اعمل ايه و اني اعمله يا اخوي
زياد : انتي محتعمليش حاجه الدور جه علية و اني اللي لزمن اعمل و محسيبكيش تخربي بيتك و لا تبعدي عن جوزك و ان شاء الله ربنا حيكرمك و حيفرح جلبك و حتشيلي عيلك على يدك
زينه : و رحمة ابوك يا زياد ما تعشمني و لا تديني أمل في حاجه اعيش عليها و بعد اكده اجع على جدور رجبتي
زياد : انتي واثقه فاخوكي و اللا لاء يا زينه
زينه : طبعا يا اخوي
زياد : خلاص ارمي حمولك على ربنا و جولي يا رب و ان شاء الله جريب جوي حتفرحي و تفرحينا كلنا
زينه : يا رب يا زياد يا رب بس فهمني حتعمل ايه
زياد : حجولك حظبط كل حاجه و اجولك متجلجيش و اطمني و دموعك ديه تمسحيها معاوزش زكريا يرجع يلاجيكي أكده
ياخدها فحضنه و يطبطب عليها فيفتح زكريا الباب
لا أكده محينفعش واصل مرة اظبطكم تحت و مرة في الجنينه و توصل بيكم الجرأة اني اظبطكم في اوضة نومي و على سريري طب و ملبستيهوش بيجامتي ليه بالمرة
زياد و زينه : هههههههه
زياد و هو بيقف لا يا سيدي لا بجامتي و لا بجامتك اني ماشي اهوه يا للا سلام
يخرج زياد و يقعد زكريا جمب زينه مالك يا حبيبتي انتي بتبكي
زينه : لا مببكيش اني زينه الحمد لله
زكريا : اني اسف يا زينه حجك علية لو كنت جلت كلمه ضايجتك
زينه : يالهوي عليك يا زكريا ديه انت حبيبي و نور عينيه و مهما تجول اني جابله و راضيه
زكريا : ربنا يراضينا يا رب
😒😒😒😒😒😒😒😒😒😒 في الاسكندريه
تنادي نورة على نسمه و هي بتصرخ من الألم
تجري عليها : مالك يا نورة
نورة : تعبانه جوي يا نسمه شكلي بولد اتصلي على مصعب جوام
تحاول الاتصال بيه تلاقي تليفونه غير متاح فتلاقي نفسها بتجرى على جيرانهم تخبط عليهم
بعد فترة فى المستشفى
نورة نايمه في السرير و نسمه قاعده و معاهم واحده جارتهم
يدخل مصعب و هو بينهج السلام عليكم
نسمه : و عليكم السلام ورحمة الله وبركاته
يجري على نورة
طمنيني ايه الاخبار نورة عامله ايه
نسمه : الحمد لله زينه و زي الفل
يسمع صوتها و هي بتعيط
يبص عليها و يشيلها و يكبرلها في اذنها و يبوسها من ايديها : حمد الله على السلامة يا جلب ابوكي وحشتيني جوي كنت مستنيكي على نا*ر نورتي الدنيا كلها
ام محمود : ألف حمد الله على سلامة مراتك و بنتك يا ابني
مصعب : الله يسلمك يا حاجه تعبناكي معانا
ام محمود : تعبكم راحه ده ربنا يعلم غلاوة نورة و نسمه عندي إيه
نسمه : اني لما لجيت تليفونك مجفول خبطت على خالتي ام محمود و هيا و محمود جم معانا على طول
مصعب : التلفون فصل مني و انشغلت في الشغل و محستش و اول ما روحت و ملجتكمش يا دوب حطيته في الشاحن و كلمتكم و جيت على طول
تفتح نورة عينها و هي بتتألم وتنادي على مصعب
مصعب : اني اهوه يا حبيبتي الف حمدالله على سلامتك يا ست الكل
نورة : الله يسلمك يا حبيبي بنتنا حلوة
مصعب : حلوة و زي الجمر
ام محمود : حتسموها ايه ان شاء الله
مصعب: بعد اذنك يا نورة اني حسميها زينب على اسم امي
نورة : اللي تشوفه ياحبيبي
نسمه : ربنا يخللي زينب و اسم زبنب يا رب
يطرق الباب عدة طرقات
فيفتح مصعب الباب : محمود
محمود : الف حمد الله على السلامه يا مصعب مبروك ما جالكم تتربى فعزكم ان شاء الله
مصعب : تسلم و تعيش يا محمود
ايه اللي انت حايبه معاك ديه
محمود : جايب اكل لأمي و لنسمه
مصعب : طب و لزومه ايه التعب ديه
محمود : طب و الله حزعل منك هو احنا اغراب و اللا ايه
مصعب : لا وربنا ديه انتوا غاليين عندينا جوي ياخد منه الاكياس و يديها لنسمه و والدة محمود عشان ياكلوا و هو ياخد محمود و ينزلوا تحت يقعدوا على اي كافيه
حتعمل ايه دلوقتي يا مصعب
مصعب : حعمل ايه فايه بس يا محمود
محمود : مش المفروض انك بعد ما مراتك تشد حيلها تاخدها و تسافروا البلد
مصعب : اني حجول لأبويا و أخويا لكن اني محجدرش اسافر دلوك بيهم معنديش استعداد لأي مواجهه تضيع علية فرحتي ببتي اللي استنيها كتير
محمود : و الله انا قلبي بيقوللي ان اول ما الست والدتك تشوف البنت اكيد قلبها حيحن و تتقبل وجودكم في حياتها
مصعب : مش عارف و الله يا محمود انى أهم حاجه دلوك عندي ان مرتي و بنتي جامولي بالسلامه و اي حاجه بعد اكده مش فارجه معايا و اني عايز افرح ومعاوزش حاجه تبوظ علية فرحتي
محمود : طب بمناسبه الأفراح بقى انا كنت عاوز اطلب منك طلب و عشمي انك مترفضش
مصعب : خير يا محمود جول
محمود : انا طالب ايد نسمه
مصعب : انت عاوز تتجوز نسمه با محمود
محمود: ايوةيا مصعب انا قلبي مرتاحلها اوي و أمي بتحبها و بتموت فيها و اللا انت عندك مانع
مصعب : لا طبعا مانع ايه احنا من يوم ما سكننا و مشفناش منكم غير كل خير و محلاجيش لنسمه احسن منك يا محمود الفكرة مش أكده بس في حاجات لزمن تكون جابلها عشان ميحصلش حاجه تزعلنا من بعضينا بعد اكده نسمه غلاوتها عندي من غلاوة رحمه اختي و محجبلش ان حد يزعلها واصل
محمود : قول اللي عندك يا مصعب
مصعب : انت متعلم و نسمه مكملتش تعليمها تجريبا معاها الاعداديه و اني خايف ان ديه ياثر في علاجتكم ببعض
محمود : لا اطمن يا سيدي لو على كده متقلقش خالص و بعدين انا معايا معهد سنتين مش خريج جامعه يعني انا اللي وصلتله ده مش بشهادتي لاء بشغلي و تعبي و مجهودي
مصعب : خلاص اذا كان اكده ييجي اني معنديش مانع
محمود : و انا الحمد لله يا مصعب زي ما نت عارف ربنا فاتحها علية و الورشه شغاله كويس الحمد لله بس هو طلب واحد بس
مصعب : قول يا محمود
محمود : انت عارف ان أنا و أمي ملناش غير بعض و انها اترملت علية و هي لسه في عز شبابها و رفضت انها تتجوز و مش حينفع اني اتجوز و اسيبها و امشي فانا كل طلبي اننا نتجوز و نعيش مع امي في نفس الشقه
مصعب : أصيل يا محمود و لو مكنتش عملت اكده اني نفسي كنت حجلج منك لكن انت كل مادا ما بتعلى فنظري اكتر و اكتر
اني حجول لنسمه و اشوف رأيها ايه و ان شاء الله خير يا محمود
🌹🌹🌹🌹🌹🌹🌹🌹🌹
بعد مرور عدة أيام
تجري عتاب وراء طفلها لتطعمه : يابني حرام عليك هديت حيلي و اني مجدراش
حفصه : مالك يا عتاب
عتاب : الواد ديه تعبني جوي يا عمتي
معارفاش جايب الشجاوة ديه كلها منبن
حفصه : من عمه يا حبيبتي مصعب كان زيه أكده بالظبط كان مجننا
عتاب: ديه حتى شبهه في الشكل كمان يعني ما سابش منيه حاجه
حفصه : طب هاتي اني حاكله انتي تعبانه يا حبيبتي و لساكي في الأول
عتاب : يارب تاجي بت المرة دي احسن اني بدر كرهني في الصنف كله
حفصه : هههههه طب ديه بدر عسل و سكر
تعالى يا بدر تعالى حبيبي عشان تاكل
يسيبها و يطلع يجري و تروح حفصه وراه
حسني و سكرة كانوا في الجنينه بيلاعبوا ابنهم نعمان الصغير
و فجأة تظهر عربيه كبيرة و تقف أدام البيت و تنزل منها سيده في غاية الجمال رغم أنها في أول الخمسين لكن جمالها طاغي على سنها اللي محدش يتوقعه
حسني : سكرة خدي نعمان و ادخلي جوة على ما اشوف مين اللي جه
يفتح لها البوابه و تخلع نظارة الشمس من على عينيها و تطلب إنها تدخل و يدخل معاها حسني و يطلب من سكرة تنادي حد من جوة
اما هي فضلت واقفه مكانها مش قادرة تدخل بتبص للمكان و كأنها بتفتكر كل اللي فات من سنين
تيجي عتاب و تشوف واحده واقفه فيها شبه كبير من عطر : أيوة حضرتك عاوزة مين
تبصلها و عينيها تقع على السلسله اللي في رقبتها و اللي اديتهالها حفصه يوم فرحها زي ما عملت مع عطر و كان منقوش عليها اسمها و اسم امها
عتاب : مين حضرتك
_ عتاب
عتاب : أيوة أني حضرتك تعرفيني
_تترقرق الدموع في عينيها و لا تعرف بما ترد عليها و كيف لها أن تخبرها بحقيقتها بالتأكيد عقلها لن يستوعب مثل ذاك الأمر
تأتي حفصه دون أن تنتبه لوجودها : بدر ابنك ديه يتفاتله بلاد جنني
فجأة تنتبه لتلك الواقفه و تقف مكانها قدماها لا تقوى على الحركه حلقة عيناها تتسع بشده لا تعرف ماذا تفعل لم تتوقع يوما بوقوفها أمامهم هكذا لقد مرت أعوام لم ترها و لكن ملامحها لم تختلف كثيرا عما سبق
تقترب منها دون النطق بكلمه عيناها تتنقل بينهما
عتاب نطقتها بقلبها قبل أن تنطقها بفمها
و تقترب منها : أنا ابقى
عتاب : تبجي مين حضرتك
حفصه واقفه مش عارفه تعمل ايه و لا تتصرف ازاي
_أنا أمك يا عتاب
عتاب : مفهماش أمي كيف يعني
_تكلمها و هي بتمسح دموعها اللي مش قادرة تمنعها من النزول : أنا أمك أمك اللي ولدتك أنا ناهد محمد الوكيل أمك يا عتاب انا عارفه إنك مش مستوعبه اللي بقوله لكن انا امك و الله امك يا عتاب
عتاب و هي بترجع لورا : لا لا إنتي مين إنتي و بتجولي إيه أني أمي ماتت ماتت من سنين طويله و من يوم ما وعيت عالدنيا و انى عارفه ان امي ميته تجومي تجوليلي انك امي هههههه حلوة و الله النكته ديه
اكيد حضرتك غلطانه في العنوان او تجصدي حد تاني
ناهد : لا يا حبيبتي انا مش غلطانه في العنوان و لا اقصد حد تاني انا جايالك انتي و عطر انتوا بناتي انا و انا امكم مش حد تاني
عتاب : عمتي انتي ساكته ليه شوفي مين ديه و عايزة ايه اني تعبانه و مجدراش
ناهد : قولتلك لاء انا مش غلطانه في العنوان و لا أقصد حد تاني انا امك و الله العظيم امك انا عايشه مموتش يا عتاب و انتي بنتي و عطر بنتي انتوا الاتنين بناتي يا عتاب
تضحك عتاب بشكل هيستيري و هي مش مستوعبه اللي بتسمعه
ناهد : حفصه انتي ساكته ليه يا حفصه قوليلها قوليلها انا مين فهميها
عتاب : تجوللي ايه و تفهمني ايه انتي مين انتي و مين جالك تاجي تجوليلي أكده حد وزك علينا
جال امي جال
ناهد : انتي ليه مش عاوزة تصدقيني انا فاهمه انك مش قادرة تستوعبي لكن هي دي الحقيقة
عتاب : اصدجك اصدجك ازاي و لما انتي امي امال مين اللي بجالي اكتر من عشرين سنه بجرالها الفاتحه لما انتي امي امال مين اللي خادونا فحضنهم عشان يعوضوني أني و اختي عن موت أمنا
لما انتي امي امال كنتي فين السنين ديه كلها
و لما انتي امي ازاي سيبتي الكل يعاملنا على اننا أيتام الأم و الاب
طب وسعي أكده يمكن يطلع من وراكي هو كمان و يجوللي بخ اني بدر ابوكي يا عتاب و كنت اني و امك بنلعبوا استغمايه ايه رأيكم بجى في المفاجأة ديه
عمتي خرجي الست ديه برة
ناهد تحاول تقرب منها و عتاب تبعد و تحط ايديها على ودنها عشان متسمعهاش : اسكتي اسكتي معاوزش اسمع حاجه
حفصه : عتاب اهدي يا عتاب اهدي ياحبيبتى
عتاب : لا اني محهداش مين دي يا عمتي مين اللي واجفه دي
تسكت حفصه و مش عارفه ترد بايه
ووقتها تنزل زينب على صوتهم : الله في ايه يا عتاب صوتك عالي أكده ليه
تتفاجئ هي كمان باللي واقفه
ناهد نطقتها بصدمه
تروح عتاب ناحيتها و تمسكها من ايديها
عتاب : الحجيني يا اما الحجيني واحده جايه تجول انها امي اني و عطر
تعالي خرجيها من اهنيه الست ديه
تقف زينب مكانها و متتحركش و لا قادره ترد على عتاب
عتاب بصريخ و سكرة و امها واقفين مش فاهمين حاجه : انتوا ساكتين ليه اتكلموا جولوا مين ديه
لا ما هي الست ديه اكيد كدابه اوعاكم تجولوا انها بتتكلم صوح اوعاكم تجولوا اني اتيتمت اني و اختي و أمنا عايشه لا
احب على يدك يا عمتي جوليلي مين الست ديه و اللي بتجوله ديه بجد يعني هي امي كيف ما بتجول
اصدجها و اللا اكدبها يا ناس حد يفهمني
حفصه : صدجيها يا عتاب دي امك يا حبيبتي
يا ترى عتاب حتتقبل وجودها بعد السنين دي و يا ترى هي كانت فين و ليه اختفت و عطر و يحي حيحصل معاهم ايه و ازاي ممكن يتقابلوا توقعاتكم بقى فرحوني و لو مرة الله يخليكم مش اكده
😒😒😒😒😒😒😒😒😒
•تابع الفصل التالي "رواية يكفيني منك عقابا" اضغط على اسم الرواية