رواية جرح الأيهم الفصل العشرون 20 - بقلم أيلان
"الجُــرح العشرون"
"إن نمت ستنتهي الليلة
و إن لَم تنم ستنتهي أنت"
مُلاذ :-
مُلاذ : أيهم !
أيهم : جَرحه ؟
ازدادت العقدة يلي بين حواجبي اكثر
ادحك بـ عيونه و هو ينطق الكلمة بـ جدية
ابتعدت بـ خطواتي لـ ورا
مُلاذ : انت شتسوي هنا؟؟
هز راسه بـ رفض و اردف
أيهم : ما اسوي
مُلاذ : دكتور ! ترا من اشهر
انا حاسه اكو احد وراي و اتجاهلت
و هسه لكيتك انت هذا الشخص
شتسوي هنااا! شدلاك بـ بيتنا
ابتعد عني بـ هدوء ، راح كعد على جهه
بالشارع سند روحه ع الحايط
طلع باكيت الجكاير من جيبه
ركزت نظري على الجكاره يلي بـ ايده
رفعها حطها بين شفافيه سحب دخانها حيل
نزلها زفر الدخان من خشمه
اتقدمت عليه وكفت كدامه ، گلت متسائله
مُلاذ : دكتور احجي شتسوي هنااا؟!
منين تعرف بيتنا ؟
رجع جر نفس من الجكاره
نزلها مد ايده على ركبة رجله
زفر الدخان من خشمه مره ثانية
أيهم : اجيت اتطمن عليج
مُلاذ : ليش حتى تتطمن؟
رفع اصابعه الاثنين السبابه و الوسطى
اشر على بطني بيهن
أيهم : علمود جرحج
مُلاذ : صارلي اكثر من ٣ اشهر
من طلعت من المستشفى بـ رايك
رح يظل جرحي لسا ما ملتئم؟
أيهم : بعض الجروح ما تلتئم
لو يمر دهر ، تبقى مفتوحه و تلچم الگلب
رفعت حواجبي ، حنيت ظهري
صار وجهي كدام وجهه
مُلاذ : دكتور منين تعرف بيتنا؟
و ليش تراقبني من اشهر!؟
زفر دخان الجكاره بـ وجهي
كشولت ملامحي و غمضت عيوني مزعوجه
رفعت نفسي و وخرت الدخان ، امسح بـ وجهي
مُلاذ : شجااااااي تسوووي انت؟
أيهم : صوتج لَـذه
مُلاذ : تدلع بكيفك و تراقب بكيفك
و تأمر بكيفك ، سلامااات؟ منو انت؟
أيهم : متوهمه
مُلاذ : متوهمه و انتَ تراقبني من اشهر؟؟
أيهم : ليش اراقبج؟
مُلاذ : شي انت اعلم بي بعد !
أيهم : متوهمه لَـذه
مُلاذ : ليش من صحت وراك هسه
مشيت بسرعه و ما التفتت؟؟
أيهم : ادري ردة فعلج هيج رح تكون
مُلاذ : تريدني اصدكك هسه؟
ليش دتراقبني ؟؟
أيهم : ليش حتى اراقبج؟
مُلاذ : انا اسئلك عن السبب ؟
أيهم : لان احبج
عكدت حواجبي
و توسعت عيوني مصدومة
قبل لا احجي كمل كلامه
أيهم : و انه ما احبج؟
بس يلي يحب يراقب
و انه ما احبج حتى اراقبج
زفرت نَفس مرتاحه ، درت وجهي عنه
وكفت افرك صدري و اجر نفس
بلعت ريكي و گلت
مُلاذ : سالمين ترا احنا بـ بغداد
خاف عبالك كاعدين بـ تركيا لو امريكا
بعدين انت كل مريض تروح لـ بيته تتطمن عليه ؟
أيهم : اي ، نعم
مُلاذ : شنو الي يثبت ؟
أيهم : ليش حتى اثبت؟
مُلاذ : حتى اصدكك
كام من مكانه ، نزل الكلاو من راسه
طلع جكاره ثانية ورثها ، بعد ما خلصت ذيج
اتقدم عليه صار كدامي ، نزل راسه الي
قلص عيونه و بَعد الجكاره ، گال بـ هدوء يوتر
أيهم : كلش حلوه انتِ ؟
گالها بـ طريقة تساؤل
حسب يلي فهمته يقصد بـ كلامه
"هلكد انتِ حلوه حتى الكل يراقبج و يحبج؟"
نظرات القلق اتوضحت بـ عيوني
عدم الفهم و الاستغراب خزرته و گلت
مُلاذ : شارب شي انت سكران ؟!
ابتسم بـ هدوء مال راسه
أيهم : اي شارب
رفعت حاجبي متفاجئه
مبتسم و يحجيها
مُلاذ : ششارب ؟!
تقربت عليه اشم ريحته
قربت خشمي من قميصة
بلا ادراك و بيناتنا مسافة حيل قليله
اشتميت ريحته و گلبي دك حيل
نفس ريحة ابوي و عطر ابوي
ما اكدر انكر و لا اكدر اكول متوهمه
اقسم بـ كل شي نفس الريحة بالضبط!
عطره يلي دورت عليه سنين بـ ملابسي و ملابسه دورت عطرة بين كل الناس و لا لكيتها ،
فزيت مبعده راسي ، لمن همس أيهم بـ اذني
أيهم : كاس الندم
دحگتله بـ استغراب
مُلاذ : شنو؟
-مو گلتي ششارب ؟
-اي؟!
- انه جاوبتج كاس الندم !
كشولت ملامحي دفعته عني ، درت وجهي امشي سمعته وراي يصيح بـ صوت مو كلش عالي
أيهم : بجامتج حلوه
نزلت راسي ادحك لـ بجامتي
مرسوم عليها ميكي ماوس
درت وجهي اله ، ظل ساكت و يدحگلي
نزل نظرة على بجامتي ، ابتسم خانك ضحكته
مُلاذ : همزين گلتلي
حتى بعد ما البسها
درت وجهي للبيت ،
كرضت شفتي بـ اسناني معصبة
دفعت باب البيت ، دخلت
اتقدمت على باب المطبخ و انا احجي بـ عصبية
مُلاذ : حيوان ، دكتور سافل
ما يستحي على نفسه شعليك بـ بجامتي !!
لا و نوب يگول جاي اتطمن عليج
رفعت راسي و قلدت عليه
مُلاذ : كلش حلوه انتِ؟
مُلاذ : مو حلوه العب النفس شعلييييك؟
دفعت باب المطبخ مينفتح طلع مسدود
رجعت ادفع اريد يفتح ، ميفتح
دكيت الباب : الوووو يمعودين
ملاك : منو ؟
مُلاذ : الجيرررران ، شكو قفلتوا الباب ؟؟
اسمع ركضتها
اجت بسرعة فتحت الباب
ملاك : ما ادري بيج برا
و سديته معبالي
نزعت حذائي يلي ما لابستها عدل
دخلت و انا احجي
مُلاذ : شلون بـ فيروز الثانية
ملاك : شبيج؟
مُلاذ : مابيه
ملاك : مُلاذ
وكفت مكاني و التفتت الها
ندهت اسمي بـ نبرة حيره و حزن
عگدت حواجبي متسائله عن سبب
تَكون هاي التعابير على ملامحها
مُلاذ : گولي ؟
ملاك : رجعت احلم
مُلاذ : مثل شنو رجعتي تحلمين؟
اتقدمت كعدت على القنفه ، اشرت الها تجي يمي اتقدمت كعدت يمي گالت بـ هدوء
و هي صافنه بالفراغ
ملاك : احلم بالاطفال و الناس يلي هناك
دائماً اسمع صوت الرصاص انا اخاف
اخاف من صوت الرصاص اخاف منهن
اخذن ابوي اخذن هواي ناس
رفعت راسها دحگتلي
عيونها مملية بالدموع و الخوف
ملاك : انا ما احب صوت الرصاص
مُلاذ : لا تخافين ما رح تسمعين هالصوت
و لا رح يصير شي هسه انتِ بامان
ملاك : مُلاذ داتعذب و الله
داتحمل شي فوك طاقتي
ما اريد اشرح للدكاتره ، ما اريد اسولف
انا مو مريضة نفسياً و الله انا مو مخبله
مُلاذ : ملااااك ! كم مره اعيد و اكرر
انتِ مو مريضه نفسياً و لا مخبله
مجرد تحتاجين لـ دكتور يساعدج تعدين هالفتره!
ملاك : لمن حجيت لوحدة من صديقاتي
گالت بس المخابيل يروحون للاطباء
رمشت بـ عيوني ، غمضتهن بـ نفاذ صبر
و هي فوراً طاحت دمعتها ورا كلماتها
شفايفها صارت ترجف و عبست ملامحها
مُلاذ : انا كم مره اگلج
لا تشاركين حياتج وي صديقاتج
و لا وي احد!!! تريدين تسولفين شييي
تعالي و سولفي الي لو لـ امي !
ملاك : هي صديقتي ...
قبل لا تكمل قاطعتها بـ عصبية
رافعه اصبعي ، كازه على اسناني
مُلاذ : ماكو اي شخص امان !
افتهمتي ؟؟ الصديقة يلي تگولين عنها هسه
باجر راح تطلع عليج سوالف من جوا الكاع
السر الي امنتي الها اليوم باجر تسمعي من الكل الموضوع يلي خفتي تشاركينه وي احد
ثقيتي بيها و شاركتيها باجر راح تعيرج بي
ملاك ، الناس مو امان لا تنطين ثقتج لـ اي شخص كائن من يكون
هزت راسها بـ قبول و عيونها مدمعه
ملاك : بطلتي تحضنيني رجعتي مثل قبل
مُلاذ : ملاك و الله ما اكدر ما اعرف !
هذيج الفتره جنت لازم اضغط على روحي
جنا نحتاج لـ بعض و بعدنا نحتاج لـ بعض
بس مداعرف و الله انا ما اعرف احضن
دوم او اكون عاطفيه ، انا ما اكدر احضن احد
مسحت دمعتها و گالت بـ هدوء
ملاك : عادي
مُلاذ : يلا كومي نامي
ملاك : تصبحين على خير
مُلاذ : اجمعين
دارت وجهها و راحت لـ غرفتها هي و امي
دوم و بكل بيت لازم اكو غرفتين
و حده منهم المفروض تكون خطار
بس نسويها غرفة نوم
ينامن بيها امي و مشمش و انا انام وحدي
امي رادت تخلينا بـ نفس الغرفة
بس دائماً اقترح عليها
نكون كاعدين بالغرفتين الموجودات افضل
تنهدت و گمت ، بعدني توني اريد ادخل غرفتي
سمعت صيحة ملاك
ملاك : مُلااااااذ
رحت بسرعه لـ غرفتها ، دخلت
دحگت لـ امي فازه من نومها ، مخترعة
تدحك لـ ملاك و تسأل شكو
مُلاذ : شكوووو؟؟
رفعت اصبعها تأشر بـ خوف
و عيونها مدمعه و شفتها ترجف
ملاك : ابـ ... ابو بريص
رفعت راسي ادحك لـ اصبعها وين ياشر
طلع ابو بريص (تكرمون) بالسگف
انداريت عليها و خزرتها
طن كلام صار بحلگي ، سكتت
مُلاذ : امشي جيبي الماسحه و القاصر
ركضت جابت الماسحه و القاصر
اجت انطتنياهن و راحت لبدت ورا امي
مُلاذ : شمالج ما تگليلي
شني اسد خو ما اسد؟
ملاك : اخاف
مُلاذ : حسابج بعدين على هاي صرختج
عبالي شو شصار
درت وجهي و هفيت
ابو بريص بـ الماسحه ركض بسرعة
و انا اركض وراه و بايدي القاصر
ملاك تصرخ و انا اعيط بيها
امي ما تكدر تكوم و هي تعت بـ هدوم امي
ملاك : يمااااااا اجاني
مُلاذ : ويييين اجاج ويييين ؟
انت اوكف ابن الجلب منو گلك تطب للبيت
نوب الدنيا شتا شتسوي هنا حيوان !
فريت الغرفة وراه انا و ماسحتي
و اغلط عليه و اسب
مُلاذ : انت اسميك أيهم تركض مثله
لك أيهم اووووكف اشتعلوووو خل الزمك
هفيته حيل و مات ، ملاك جرت نفس مرتاحه
خلصت و نظفت مكانه ، انداريت لـ ملاك
مُلاذ : بالله العظيم اذا صرختي مره ثانية
علمود هيج سالفة اكتلج انتِ مو الابو بريص
ردت نامت بـ مكانها و امي هم نامت
رحت غسلت لعبانه نفسي
غسلت ، رحت لـ غرفتي ، دخلت
لميت شعري لفوك كبايه
نزعت تشيرتي ، كعدت ع الجرباية
حنيت ظهري ، شابكه ايديه
عيوني ع الفراغ ، صداع يحتل عقلي
اخذت جهازي ، لگيت نور متصله
رجعت اتصلت عليها
نور : الو مُلاذ
مُلاذ : ها نوره ؟
نور : مُلاذ فدوه اريد اشوفه تعبت
مُلاذ : مدايقبل
نور : اقنعيه ، مُلاذ و الله گلبي ديحترك
مُلاذ : تمام احاجي ضرغام
نور : اقنعي الله يخليج
مُلاذ : ان شاء الله
نور : تمام ، اسفه ازعجتج
مُلاذ : لو يمي اطكج دفره
اطلع معدتج من حلكج شني ازعجتج
امشي ولي عني
ضحكت بـ خفه و سدت الاتصال
نزلت الجهاز دحكت للتلفون اريد اتركه
اجتني مسج تتضمن "شلونج؟"
وجعت اخذت التلفون و كتبت
مُلاذ : زينه
-اكيد؟
-اكيد
-رح تكدرين تنامين اليوم؟
زفرت نفس ، نزلت راسي
فركت كصتي بـ حيرة
بـ هاي الاثناء اجاني اتصال
جاوبت ، خليت التلفون على اذني
مُلاذ : الو
-صفنتي؟
-ما اعرف
-رح تكدرين تنامين من دون كوابيس؟
-رُبما
-من كم يوم ما نايمه؟
-ما اعرف ما عديتهم
-ابداً ما نمتي ؟
-اغفى ساعه و افز
-لـ نفس السبب؟
-اممم
-ليش ما تراجعين طبيب نفسي مثل اختج؟
-ما اريد
-ليش ؟
-عاجبتني نفسي بهذا الوضع
-رح تتعبين اكثر بـ الايام الجاية
-هذا مبتغاي
-بس ما رح ينفع هيج؟!
-جسار ، روحي ما اتغذت غير من التعب
جسار : بس هيج روحج جاي تدمريها!
مُلاذ : مو اكثر من ما جاي تدمر روحك
جسار : ما جاي ادمرها
مُلاذ : ما منتبهه انت
جسار : مثلج انا اتغذى من التعب
مُلاذ : يمكن هيج افضل النا
جسار : صح ، ما نعيش بـ غير طريقة
مُلاذ : اممم
جسار : نامي ، حاولي
مُلاذ : ان شاء الله
نزلت التلفون ، سديت الاتصال
رجعت بـ ظهري لـ ورا شمرت نفسي متمدده
شوكت راح انتهي و ابدي ؟!
محد رح يعرف معنى هالكلمة غيري
حاولت ما انام ، بقيت افتر بالغرفة
رجعت اتمددت على الجربايه ، غمضت عيوني
گلت بـ هدوء ، صوت شبه مختفي ، ادندن
مُلاذ : طفاج القدر يا شمعتي
خلاني اجر بـ حسرتي
غمضت عيوني انتقلت لـ الظلام
اتسلطت الاضواء على الجثه المرميه بـ الوسط
صوت صدى يغني الاغنية
-شلي بهالعمر يا دنيتي آاااه
محسود على حظي و قسمتي
ارتفع صوت الاطلاق النار
ثم صوت الصراخ ، الدم لون الارض
استمر صوت صدى الاغنية بـ الارجاء
اندفع الباب ، دخل الملثم
انصعق جسمي بـ الكهرباء
صرخت بـ اسم ملاك ، رفعت عيني
ادحك لـ ابوي يلي واكف بعيد و متجتف
و يدحگلي ، عيوني ما انزاحت عنه
انضربت بقوه على ظهري بـ شي قوي
شهكت ، فزيت ، فتحت عيوني
دحگت لـ سكف الغرفة ، كعدت على حيلي
مسحت وجهي بـ كف ايدي ، ضربت راسي
مُلاذ : غبيه لا تناميين لا تنامين
كمت من مكاني ، طلعت لـ الصالة
ظليت كاعده بـ الصاله للـ الصبح
كعدت امي ، اخذت ملاك وديتها لـ دوامها
رجعت انا يم امي
فيروز : ليش ما رحتي لـ دوامج؟
مُلاذ : بعد شوي اروح
هزت راسها بـ قبول
مُلاذ : اليوم عندج جلسة علاج مو؟
فيروز : اي
مُلاذ : تمام تعاي خل نطبق كم تمرين
انا وياج هسه
فرشت الها فراش ، مددتها على ظهرها
كعدت يمها بـ الكاع
مُلاذ : يلا رح نبدي
هزت راسها بـ قبول ، بلعت ريكها
رفعت رجلها بـ ايدي ، بديت اسويلها تمارين
رجلها ارجعها لـ ورا ناحية صدرها و احركها
ظليت اكرر بالتمارين بـ رجليها ثنينهم
كومتها سندتها عليه جبت المشايه
خليتها تلزم بيها و تحاول تمشي
و انا اساعدها گوه تخطي بـ رجلها
تعبت صارت تلهث كد ما تعبت
فيروز : تعبت
مُلاذ : يلا هاي اخير شي
ابتعدت عنها مسافة
رفعت ايديه و اشرت الها
مُلاذ : يلا فيروز تعالي
فيروز : تعبت مُلاذ
مُلاذ : يلا هسه تعالي هاي اخر مره
قدمت خطواتها بـ ثكل و صعوبه
و مشت لحد ما وصلت الي
مُلاذ : عفييييييه
ابتسمت بـ تعب ، اخذتها كعدتها على القنفه
استراحت شويه ، رحت بدلت ملابسي
لبست بنطرون كابوي و قميص ابيض
و فوقهم كوت بيجي اخذت گلاده رايده البسها
اتلمست عنقي يلي طاحت منه گلادتي
ما لكيتها مره ثانية ، ما اعرف وين وكعت حتى
تنهدت ، لبست كلادتي
فتحت شعري فردته ، رشيت عطري
اخذت السويج ، طلعت من الغرفة
اتقدمت كعدت بـ الباب لبست كعب بيجي
اخذت جنطتي ، اجتني امي
فيروز : مُلاذ انتبهي لـ نفسج
مُلاذ : من عيوني فوفو
هسه رح اجيب يمج جوجو
فيروز : عوفي المره مبتليه بيه؟
مُلاذ : لا فوفو حبايب انتوا
من اخابرك تحضري اخذج للدكتورة
فيروز : مُلاذ انتبهي ، و اختج ...
قاطعتها قبل لا تكمل
مُلاذ : لا تخافين ملاك سلطان يروحلها
قبل خروجها بـ ساعه و انتِ تعرفين
هزت راسها بـ قبول
فتحت الباب و طلعت : باي فيروز
فيروز : بيباي
مشيت كم خطوة الشارع بيهه نزله
و السياره موكفتها قريب ، رفعت تلفوني اتصلت
مُلاذ : وينكم؟
-هنا قريبين بالفرع يلي يصعد
مُلاذ : خل اشوفكم
انداريت ادور بـ عيوني
لحد ما شفتهم رحت الهم
اسد : سلام
مُلاذ : هلو
رجعت شعري لـ ورا
حطيت ايدي على خصري و كملت كلامي
مُلاذ : انتبهوا لـ امي و للبيت
أي شي تشكون بي اتصلوا عليه و اتدخلوا
مراويتكم الاشخاص الي احنا نعرفهم
غيرهم اذا دك بابنا و شفتوه يحاول يدخل
اتدخلوا ، تمام؟
اسد ، معتصم : تمام
مُلاذ : اذا تحتاجون شي
دكوا الباب و اطلبوا مثل كل مره اوصيكم
هزوا راسهم بـ قبول مبتسمين
درت وجهي ، رحت للسياره ، صعدت
اتوجهت لـ خالة جنات ، اخذتها
وديتها لـ بيتنا ، رجعت رحت للـ الكُلية
خلصت دوام ، طلعت بسرعة ، صعدت السيارة
فتحت تلفوني دحگت امي داكه عليه ،
اتصلت عليها حطيت الهتفون بـ اذني
و انا اسوق
مُلاذ : ها يمه گولي
فيروز : ملاك لسا ماكو
مُلاذ : سلطان ما جابها ؟
فيروز : لا هي المفروض طالعه من زمان
مُلاذ : ها ، لا تمام يمكن وداها تشتري
و تاخروا ، لا تخلين بالج
فيروز : شوفي و رديلي خبر
مُلاذ : خوش
اتصلت على سلطان
سلطان : هلا مُلاذ
مُلاذ : ها سلطان اگلك
سلطان : گولي
مُلاذ : انت رحت لـ ملاك مو؟
سلطان : اي بس طلعت من وكت
مُلاذ : ليش ؟؟ صاير شي؟
سلطان : بالمدرسة صايرة مشكلة وياها
من ال٩ انا هنا اجيت للمدرسة انتظرها
بعدين عرفت صايرة مشكلة
و هي منهاره اعصابها و مغمي عليها
اخذتها للمستشفى
مُلاذ : صدددك تحجي ؟؟ ليش ما خابرررتني!
سلطان : ما فضيت و الله
مُلاذ : ويين يا مستشفى ؟
سلطان : نفسها الجنتو بيها
سديت الاتصال فريت الستيرن
رجعت من طريقي ، اتوجهت للـ المستشفى
اول ما وصلت اتصلت على سلطان
مُلاذ : وينك؟
سلطان : بالردهات احنا
مُلاذ : تعال الي بسرعة
سديت الاتصال دقايق و شفته كدامي
اجاني و گلي " يلا امشي" مشيت وياه
اتسائل عن يلي صاير
مُلاذ : شبيها شنو منهاره شكوو؟
سلطان : وحده مصرخه بالمدرسه على ملاك
و گايلتلها انتِ مخبله و ترحين لـ دكتور نفسي
و البنات ظالات يبسبسن عليها منهاره اعصابها
و گامت تصيح و المدرسات وحده ضاربتها
وكفت مكاني موسعه عيوني
صحت بـ صوت عالي : شنووووو! ضاربتها؟؟؟
سلطان : اعرف اعرف راجعلهم و عيونها
اذا ما افرك حلگهن وحده وحده
بس اريدها تتحسن انا اعلمهن ذني البرابيك
ضربت رجلي بالكاع معصبه
ما اكدر اروحلهم هسه بالي يم ملاك
رحت للـ ردهات وكفت بمكاني لمن دخلت
شفت ملاك نايمه على السديه ،
أيهم واكف يمها و يسولف وياها
رحت ناحيتها وكفت يمها
مُلاذ : ملاك
اول ما شافتني بجت ، وجهها صار احمر
دنكت عليها خليت ايدي على شعرها
مُلاذ : اشش اش اهدي انا يمج
مسحت دموعها ، دنكت بست كصتها
هي ترجف و عيونها تدمع
مسحت على خدها ، عيونها مطككه
وجهها احمر دم ، الغصة واضحه عليها
مُلاذ : شصار ؟
بلعت ريگها ، رجعت مسحت دموعها
حسيت على صوت أيهم وراي
أيهم : اكعدي
التفتت اله لكيته مخليلي كرسي
هزيت راسي : شكراً
أيهم : العفو
سحبت الكرسي ، كعدت
لزمت ايدين ملاك بـ اثنين ايديه
مُلاذ : سولفي
بدت تسولفلي عن صديقتها
لمن جانت تريد ملاك تمشي وياها
صديقتها مانعتها و گايلتلها
"ما امشي وي مخابيل"
ملاك : صارت تگول عني مخبله
و خلت كل البنات يعرفون و يحجون عني
و يگولون عني مخبله صيحت عليها و دفعتها
اجت المدرسه ضربتني ، صرخت عليه
گلتلي تادبي و غلطت عليه گالت انا ما متربيه
و ما اعرف شصار وراها ، ما اتذكر
هزيت راسي بـ قبول ،
احس نار تطلع من اذاني
عيوني تريد تطلع من مكانها
التفتت لـ سلطان گلت بـ هدوء ،
متمالكه اعصابي
مُلاذ : انت منين عرفت ؟
سلطان : الحارس سامع الهوسه
دخل عليهم من شايف ملاك يعرفني انا اخذها
اجاني جنت كاعد يمه گلي البت التاخذها
متخربطه بـ الاداره و تبجي رجل بالكاع
و رجل بالاداره ، اخذتها و جبتها لـ هنا
هزيت راسي بـ قبول
رجعت انداريت لـ ملاك
مُلاذ : اسم صديقتج و المدرسة الضربتج؟
ملاك : ليش؟
مُلاذ : احجي استعجلي يلا
بلعت ريكها ، دموعها مستمره تنزل
ملاك : صديقتي اسمها هاله
و المدرسه اسمها منور
مُلاذ : زين يلا امسحي دموعج
و لا تبجين محد يستاهل
انداريت لـ سلطان ، كملت كلامي
مُلاذ : سلطان ، اخذها للبيت و قبلها
وديها اشتريلها شتريد ، امي لا تخليها تعرف
و انا لاحگتكم عندي شغل هسه جايه وراكم
ملاك : وين رايحة؟
مُلاذ : عندي شغل
سلطان : انتظريني نحل هالشغل سويه
مُلاذ : سوي الي گلتلك عليه سلطان
سلطان : مُلاذ !
مُلاذ : ما اعيددد كلامي
اجا سلطان الي ، وكف كدامي
گال بصوت ناصي
سلطان : انا اريد اعاقبهم !
مُلاذ : و انا اريد توصل ملاك للبيت
سلطان : مُلاذ نروح انا وياج!
مُلاذ : انتهى النقاش اذا ما توصلها گلي
حتى هسه انا اوصلها بـ دربي
سلطان : تمااام تمام انا اوصلها
مُلاذ : مفهوم كلامي؟
سلطان : تمام
سحبت جنطتي و طلعت
مشيت بسرعه فتحت السياره و صعدت
داشغل بـ السياره ، فزيت على فتحة الباب
دحگت لـ أيهم و هو يصعد السيارة وياي !
مُلاذ : انت شتسوي هنااا !
أيهم : السلام عليكم و عليكم السلام
مُلاذ : شكووو؟
أيهم : ماكو سلامتج رايح وياج
مُلاذ : انت شتريدد من عندي !!!
اندار عليه دحگلي
أيهم : ما اريدد
مُلاذ : شتريددد شكو صاعد وياي ؟؟
أيهم : ما اخليج ترحين وحدج
مُلاذ : شعليك يا اخيييي شعليييييك؟
أيهم : عليه زين ؟ يلا حركي السياره
مُلاذ : شتريد من عندي انت ؟
اعرفك تعرفني؟؟؟ منو انت و شنو هالجرأه هاااي البارحه الكاك كدام بيتي و اليوم بـ سيارتي
باجررر وين ؟
أيهم : بـ بيتج .
خزرته و عطت : انززززل من السياره
أيهم : ما انزل
مُلاذ : انززززل
أيهم : لو تحجين منا لـ باجر
لو مو تطرديني سالفة اخليج وحدج ترحين
هاي ايسي من عدها كطنه و شيليها من اذانج
ضربت الستيرن حيل بـ ايدي
و صحت بي : شعليييك بييييه !!!
رجع هو هم صيح بـ صوت اعلى
أيهم : علييييه مو انا السنين اتلوع عليج
تالي اخليج هسه ترحين مره ثاااانيه !
سكنت بـ مكاني عاكده حواجبي
ما فاهمه كلامه ، ادحك بـ عيونه
مُلاذ : شجاي تحجي ؟
مسح وجهه حيل ، طلع جكاره يدخنها
رفع ساعته و گال
أيهم : اذا تاخرتي بعد مارح تلگيهم
بلعت ريگي ، درت وجهي
رجعت بـ ظهري لـ ورا ، شغلت السياره
اتجهت للـ المدرسة ، الهدوء سيد المكان
احس بي يدحگلي اندار ادحگله ،
يدور وجهه ظلينا على هالحال
لحد ما وصلت
وكفت السياره بـ باب المدرسة
نزلنا انا و أيهم ، مشينا يم بعض
دخلنا المدرسة سويه
أيهم : مو تكضيهم تكتليهم
ترا مالي خلك افاكك
مُلاذ : محد كلك تجي انت عزمت روحك
أيهم : عادي عاجبني صارلي هواي
ما شايف نسوان تتمالخ اريد اشوف
انداريت عليه ، قلصت عيوني ، ادحگله
ابتسم تك خد و هو يمشي يمي ، أردف
أيهم : بس عيونج المكحله كافيه تحرگهم
كملت مشي مبتسمه ، دخلنا لـ مكتب المديرة
دحگت مو مديرتهم يلي موجودة
مديرة المدرسة الثانيه يلي دوامهم ظهري
مُلاذ : السلام عليكم
-اهلاً
مُلاذ : تعرفين مديرة المدرسة
يلي داوموا قبلكم؟
هزت راسها بـ قبول متررده
-نعم اعرفها ، تفضلي ؟
مُلاذ : عندج رقمها؟
ظلت ساكته تدحگلنا بـ ارتباك
التفتت على أيهم لمن گال
أيهم : نحتاج مكانها ، لان بنتنا صايرة مشكلة وياها هنا و نريد نحاجي المديرة
دحگتله مستغربه ، عاكده حواجبي
اجا طن كلام بحلگي بس سكتت
لمن شفت المديرة اقتنعت ، انطتنا رقمها
سجلته يمي اتشكرتها و طلعت
اول ما طلعت انداريت لـ أيهم
مُلاذ : انت شنو تگللها بنتنا خيرر!
أيهم : حتى تنطينا الرقم ، قل اعوذ بالله
تخيلي عدي بت منج ما اطب البيت
اروح انام بالشارع اشرفلي
مُلاذ : الحمدلله و الشكر لا اعرفك و لا تعرفني
و لا تصير عدي بنيه و لا ولد
وفر احلامك لـ نفسك
أيهم : ما احلم انه لان احلامي كدامي
انداريت عليه و خزرته : شتقصد انت؟؟؟
أيهم : لا تصدكين روحج حبيبه
اقصد السياره هايه انتِ كابوس ما اخليج
مو النوب حلم
انداريت على السياره الاشر عليها
دحگتلها صدك حلوة و فخمه
درت وجهي و رحت للسياره ، اجا وياي صعد
اتصلت على المديرة ، رن رن ، جاوبت
مُلاذ : الو
-اهلاً ، منو؟
-مديرة مدرسة #### وياي؟
-نعم اتفضلي منو؟
-انا مُلاذ اخت ملاك ألياس
حسب ما عرفت صايرة مشكلة اليوم
و احد الطالبات مقلله الادب بـ كلامها
و وحدة من المدرسات رافعه ايدها على اختي !
-نعم صار هيج شي انا جداً اعتذر ...
قاطعتها قبل لا تكمل
-اعتذارج مقبول ، اريد عنوان الطالبه
و عنوان المدرسة
- ست مُلاذ انا اعتذر منج جداً
بس من غير المسموح الي انطي هيج معلومات
انا راح اتصرف بهالموضوع و الطالبات بيناتهم
لا بد تصير مشاكل و كلام مو حلو و انا باجر
رح استدعي اهل الطالبة الاخرى و ما يصير خاطرج الا طيب
- عزيزتي اتفهم كلامج و اشكرج
بس اريد عنوانهم ، اتركي عنوان الطالبه
اريد عنوان المدرسة الموضوع يلي صار
من غير الممكن السكوت عنه ، نهاااائياً
التفتت على أيهم يلي كاعد يمي
و يحركلي ايديه بـ معنى "عفيه ، عفيه"
خزرته و رجعت كملت
مُلاذ : او يصير الحجي غير حجي
و انا غير مسؤوله عن يلي يصير بعدين
- ست مُلاذ ...
مُلاذ : ست رجاءاً اريد عنوان المدرسة
او راح انجبر اروح اشتكي عليكم بالتربية
اختفى صوتها و استغرق ثواني
حتى انطتني عنوان الـمُدرسة ، غلقت الاتصال
رحت على العنوان و انا ادور و اسأل
لحد ما وصلت ، نزلت من السياره
نزل ايهم و صار وراي اتقدمت ادك الباب
أيهم : رح ينكسر
مُلاذ : معليك
اجاني صوت مره : منووو؟
همس أيهم مجاوبها
أيهم : صكارتج
و انا ادحك بـ عيونه
گلت بـ صوت عالي : انا
انفتح الباب على النص
مدت راسها مره من الباب ، دحگتلي
گلت بـ هدوء و انا رافعه حاجبي
مُلاذ : انتِ منور؟
منور : نعم اتفضلي منو؟
مُلاذ : مُلاذ ألياس
اخت الطالبه ملاك ألياس
يلي رفعتي ايدج عليها اليوم !
منور : ما اعرف هيج شي
عكدت حواجبي ، دفعت باب البيت
أيهم دفر الباب بـ رجله گبل انفتحت
كامت تصرخ و انا دخلت عليها
منور : انتِ بـ اي حق تدخليين لـ بيتي ؟؟
قبل لا تحجي شي زايد
رفعت ايدي ، صفكتها راشدي قوي
صرخت بصوت عالي و على اثر صوتها
طلعوا يلي بالبيت و كانوا ولد جبير
و بنية صغيرة كلش
-منوووو انتِ ؟
اتقدم عليه و منور تصرخ
منور : انتِ بأي حق تضربيني؟
مُلاذ : و انتِ بيااا حق تضربين اختي !!!
تايهه الج هيييَ مخليها تدرس
ما مخليها حتى تضربينها و لا عبالج
لـ هنا و خلصت رايحة اشتكي عليج يم التربية
الولد : شنوووو ضربتج!!!
اتقدم عليه لمن وصل الي خزرته
بـ لحظتها جره أيهم من ياخته و هو وراه
همس بـ اذنه بـ صوت مسموع
أيهم : بلا تصرفات رجولية مالها داعي
افتهم الموضوع لو مسيت شعره منها
ايديك اكسرهن و اكسرك فهمت؟
- منوووو انتوا شنو طابين تتهددون علينااا
و الله اتصل بـ الشرطه هسه عليكم
مُلاذ : اتصل على الشرطة تخوفني؟
و انا رح اروح للتربية اشتكي على هاي الحيوانه
ظلت ساكته و عيونها مدمعه
اتقدمت عليها لزمت فكها حييل
كزيت على اسناني و گلت
مُلاذ : لا تنسين اسمي مُلاذ
احفري بـ عقلج حتى تعرفين على منو تماديتي
نترت وجهها من ايدي ، أيهم دفع الولد بعيد
اجا عليه و گال بـ تساؤل
أيهم : نروح؟
هزيت راسي بـ قبول
طلعت من بيت منور و انا اخزرها
و ما سمعت الها صوت
التفتت على أيهم لمن گال مبتسم
أيهم : ارتاحيتي هسه؟
مسحت وجهي ، ابتسمت
هزيت راسي بـ قبول
اتقدمت على السياره و انا احجي
مُلاذ : انت هم طلعت مو قليل
أيهم : بلا شك
گالها و ركب بالصدر گولبت بـ عيوني و انا مبتسمه ، صعدت بالسياره
رفعت تلفوني و اتصلت
مُلاذ : الو سنار
سنار : هلو مُلاذ گولي
مُلاذ : انا ما اجي اليوم على الشغل
سنار : تمام
سديت الاتصال نزعت الهتفون
انداريت لـ أيهم لمن گال
أيهم : شنو تشتغلين ؟
مُلاذ : نادلة بـ مطعم
أيهم : اها يا مطعم ؟
مُلاذ : ####
أيهم : عرفته ، ليش تشتغلين؟
مُلاذ : ونسه ما متونسه گلت اتونس
اشتغل بـ مطاعم
أيهم : مو جاي نسولف مثل الاوادم
مُلاذ : غير اجيب فلوس ليش اشتغل يعني؟
أيهم : انتِ مو متخرجه و عندج وظيفة؟
هزيت راسي بـ رفض
مُلاذ : هاي اخير سنه الي
أيهم : اها زين
هزيت راسي بـ قبول
مُلاذ : وين اوصلك؟
أيهم : ماكو داعي نزليني اركب تكسي
مُلاذ : خل اوصلك بـ دربي
أيهم : لا عدي شغل اريد اروح لـ مكان
مُلاذ : تمام بـ راحتك
وكفت السياره و هو نزل
رحت على امي اخذتها للدكتوره
لان هي محدد مواعيدنا تكون قريب العصر
رجعت رحت لـ ملاك اتطمنت عليها نايمة
و يمها خالة جنات باقية
رجعت طلعت و رحت اشتريت غراض
رحت اخذت امي من يم الدكتورة
و رجعت للبيت و عدا اليوم و انا يم ملاك
ثاني يوم وديت ملاك و نزلت وياها
دخلت للمديره گلتلها تستدعي الطالبه
و اتصلت على اهل الطالبه و استدعتهم
دخلت هاله و هي ما فاهمه شكو
و اتبعها دخول اهلها
مُلاذ : بنتكم حاجيه على اختي!
غالطه عليها و متهمتها بالخبال
اهلها خزروها و هي بسرعة بجت
بقوا يتعذرون مني و يطمون فعل بنتهم
و انتهى الموضوع بمحاوله اهلها
بـ نقلها من المدرسة لـ مدرسة ثانيه
مر اسبوع من بعد هاليوم و البنيه انقلت
و المدرسه رحت عليها للتربية عرفت من ملاك
انو المديره متعاركه وياها و منور تركت المدرسه
اتقدمت ، لبست لبس الشغل استلمت الماعين
كل شويه يجيبون الي مواعين و اغسلهم
الصداع دياكل بـ راسي اكل
اتصلت على سلطان يروح ياخذ امي
سديت الاتصال و خليت التلفون بـ جيبي
بقيت لـ الليل اغسل الماعين
ايديه تجرحت كد ما غسلت
-سلام عليكم
فزيت و انداريت ، دحگت لـ ايهم
مُلاذ : بسم الله الرحمٰن الرحيم
شتسوي هناااااا ؟
دخل وراه ابو المطعم دحگتله
و هو يوصيني
صاحب المطعم : انتبهي عليه
لازم يغسلهم كلهم
طلع و خلاني انا و أيهم
نظرات الاستغراب و التساؤل تنقري بـ عيوني
مُلاذ : ولك شجااااابك !!!
أيهم : شني اجيت اكل حرام؟
مُلاذ : شتسووووي هنا؟؟؟؟
شنو هالصدرية شيريد ابو المطعم منك؟؟؟!
أيهم : مو شنو هذاك هذا...
مُلاذ : شنو هذاك هذا احجي عدل
فهمني شكو؟ شجابك هنا ! أيهم تراقبني؟؟
أيهم : اهوووو كل شي صاحت تراقبني
عمي انه رجال اجيت اكل و بالغلط
طلبت نص المنيو و صار الحساب هواي
و انه ما عدي فلوس انطيتهم حل افضل
و هو اغسل الماعين
ظليت موسعه عيوني عليه
و هو يحجي بـ جدية ، ابتسامه على وجهه
مُلاذ : تحجي صدك ؟
أيهم : و داعة براطمج هاي
عضيت شفتي حيل بـ عصبيه
دورت بـ عيوني لگيت سجينه
سحبتها و حطيتها بـ وجهه
مُلاذ : من تحجي وياي تادب
أيهم : هنه براطم قحط؟
مُلاذ : ابو بريص
أيهم : ام براطم
دفعني عن المغسل و اتصرفن
وكف يغسل الماعين و انا صافنه
كل شويه يگلي "ها نظيف؟!"
اهز راسي و بـ عقلي الف سؤال
أيهم : مُلاذ مُلاذ عاينيلي
دحگتله و هو صم مي بـ ايده شمره عليه
شهكت و عطت اخذت جفجير ، اركض وراه
الطباخين و النوادل صافنين علينا
هو يضحك عليه رجعنا للمطبخ وكف مستسلم
أيهم : يلا اخذي حقج
ما جذبت خبر رحت عليه هطرته بالجفجير
عاط و كام يفرك ايده
أيهم : فوصه ، ام براطم
مُلاذ : ابو بريص
أيهم : انكتمي
مُلاذ : انكتم انت
دحگلي بـ طرف عينه
رجع يغسل الماعين لحد ما خلصن
و انا من الجهه الثانيه انشفهم
فرغ المكان و الكل انتهى دوامهم
الدنيا ليل ، طلعوا و انا بقيت و هو هم
دخل صاحب المطعم
أيهم : خلصنا
-يلا رح اقفل المطعم
هزينا راسنا نزعت الصدرية
يلي على ملابسي
خليت الاكل الباقي بـ سفريات
أيهم يخلي وياي و يعزل و مخلية اكل جديد هم
طلعت و هو لحگني بـ ايدينا الاكياس
كال متحمس
أيهم : شلون جان غسلي ؟
لبست كوتي و دحگتله
منزعجه من يلي سواه انا اعرف و هو يعرف
ما اجا صدفه و لا ما عنده فلوس
مُلاذ : حلو
طلعت ، تركته صاح وراي
أيهم : مُلاذ ، مُلاذ
التفتت اله واكفه مكاني
اجاني وكف كدامي
أيهم : شراح تسوين هسه؟
مُلاذ : عندي شغل
أيهم : اجي وياج؟
مُلاذ : بـ كيفك
تركت سيارتي مكانها
اجاني اتصال اخذت تلفوني
دحكت لـ رقم امي ، تسأل عني لان تاخرت
بلغتها رح اجي و غلقت الاتصال
مشينا انا و أيهم ، لحد ما وصلنا
لـ مكاني المعتاد دحكت لـ الاطفال
يلي يلمون بـ غراضهم و عينهم ع الطريق ينتظرون جيتي ، ابتسمت الهم
رفعت العلاكه يلي بـ ايدي ، صحت عليهم
مُلاذ : منو منتظرني ؟
ركضوا عليه حاوطوني ، وزعت عليهم الاكل
و همَ يضحكون ، يتشكروني مبتسمين
مُلاذ : لمن تاكلون و تخلصون
اقروا الفاتحه لـ ألياس و اترحموا اله
زهره : انا دائماً ادعي اله
حتى من ماتجيبين النا اكل
ابتسمت مسحت على شعرها
گلت مشجعتها
مُلاذ : عفيه
كل الاطفال يلي موجودين
صاروا يساندوها بـ نفس الكلام
و يگولون هي تذكرهم حتى يقرون الفاتحه
شوق : منو عمو؟
التفتت دحگت لـ أيهم يلي واكف وراي
على ثغره مرسومه ابتسامه يدحگلهم
مُلاذ : هذا ...
دحگتله و هو دحگلي
منتظرني اكمل ، ما عرفت اوصف
مُلاذ : هذا العمو دكتور
صاحوا الاطفال
مُعجبين بـ مهنته : ياااا
اتقدم يسلم عليهم و يسولف وياهم
ابتسمت ادحگلهم ، كنبص و التمو عليه
دحگت لـ "حزن" كاعدة وحدها
اتقدمت عليها ، حاضنه نفسها ،
تدحگ للـ الكاع الدموع ماليه عينها
مُلاذ : حزن؟
اتقدمت كعدت يمها
رفعت راسها دحگتلي ، نزلت دمعتها
مسحتها بـ اصبعي ، ميلت راسي الها
مُلاذ : شصاير؟
گالت معبسه ملامحها
دموعها مستمره بالنزول
حزن : ماما ...
مُلاذ : ما اتحسنت؟
هزت راسها بـ رفض
حزن : سمعتها تحجي هي و جيراننا
گالت ماما هي راح تموت
ردت احجي قاطعني صوت أيهم
رفعت راسي دحگتله
أيهم : شبيها امج مريضه؟
رفعت راسها حزن ، دحگتله
هزت راسها بـ قبول ، دموعها ماليه عينها
كنبص ايهم كعد كدامها يمسح دموعها
أيهم : شبيها؟ شنو مرضها ؟
بجت ، جسمها يهتز من البجي
تبجي بـ حرگه و تحجي
حزن : عدها دوده بـ بطنها
و يكولون اذا تنفجر تتسمم و تموت
مُلاذ : زائدة دوديه
أيهم : لا تبجين انه اعالجها
رفعت راسها من ايديها ، دحگتله
حزن : شلون تعالجها ؟
رجعت ضمت وجهها تبجي بـ صوت
وخرت ايديها و دحگتلنا لمن گال أيهم مجاوبها
أيهم : انه دكتور
حزن اندارت الي تتأكد ، هزيت راسي بـ قبول
رجعت دحگتله و هو كمل
أيهم : انه اعالج امج لا تخافين
حزن : بس ما عدنه فلوس
أيهم : بدون فلوس اعالجها
حزن فززت عيونها ما مصدكة
مصدومة ، مستغربة
الاطفال يلي يقضون طفولتهم بالشارع
همَ اكثر اطفال ما يثقون بـ اي شخص
لو قَدم الهم احد مساعدة رح يفكرون هواي
رح يتسائلون هواي ، رح يحاولون يطلعون غلط
يخافون من الثقة و يخافون من الكسره
أحد الاطفال يلي يعرفون هذا الشعور ، انا
مُلاذ : لا تخافين حزن هسه تكدرين تفرحين
لان عمو خوش دكتور و هو يلي سوا عمليتي
ابتسم ايهم يدحگلي
رجع نظره لـ حزن يلي نظراتها تحولت للفرح
صارت تسأله اذا صدك يحجي ، ما مصدكه
شفت نظرات الكسره بـ عيون أيهم لمن سألته حزن
حزن : عادي احضنك عمو؟
ابتسم يدحگلها : طبعاً عادي
كامت حضنته حيل و هي تبجي
و انا كاعدة ع الرصيف ادحگلهم
التمو الاطفال يمنا گلنا لـ حزن تلعب وياهم
هزت راسها الفرحه غامرتها ،
الهم انزاح عنها راحت تلعب وياهم
و تكمز فرحانه عكس قبل شوي
كمت تمشيت شوي ، كعدت بـ الجهه المقابله الهم ادحگلهم و هم يلعبون وراي سياج
سندت نفسي عليه ادحگلهم ، اجا أيهم كعد يمي
أيهم : منين تعرفينهم؟
مُلاذ : دائماً اشوفهم
أيهم : محد رح يكدر يفهمهم
مُلاذ : وجعهم و قلة حيلتهم
ما رح يفهمها بس يلي مجربها
أيهم : اهلهم وين؟
مُلاذ : بعضهم متوفين
بعضهم ذابين جهالهم هيج
أيهم : شعورهم صعب
مُلاذ : ماكو شعور اصعب من شعور الموت
لمن تفقد شخص عزيز عليك قلة الحيلة
ما رح تكدر تصدك و لا تتقبل
رح تتمنى بس تكدر ترجع عزيزك للحياة
كثرة الفقدان رح تغيم بالبرود على گلبك
أيهم : الاطفال ما يستاهلون هيج يصير بيهم
مُلاذ : محد يستاهل اطفال او كبار
الحياة تجبرنا على اشياء تخلينا ننضج و نكبر
نزلت راسي ، لعبت بـ اصابعي
أيهم منتظر اكمل كلامي ، رفعت راسي
دحگت للـ السما ، تنهدت ، اردفت مكملة
مُلاذ : انا جنت وحدة من هذول الاطفال
نزلت عيني لـ أيهم
يلي عاكد حواجبه مستغرب
أيهم : شلون يعني؟
هزيت راسي بـ رفض
نافضة افكاري : انسى مو مهم
ردت اكوم راد يلزم ايدي
بَعد ايده بسرعة
أيهم : سولفي مُلاذ لا تخافين مني
او مو مني بس لا تخافين من الثقة بيه
درت بـ عيوني دحگتله
رجعت سندت نفسي على السياج
رغم ابد ما اسولف يلي عشته
بس اجتني رغبة احجي ،
نظري يتراوح ع الاطفال يلي يلعبون
مُلاذ : بعمر عشر سنوات
نزلت نظري للكاع ، رفعت ايدي مسحت وجهي
كملت كلامي بعد ما رجعت سندت راسي
مُلاذ : اتوفى والدي ، مات بـ حضني
على رجلي مات و هو ينطق الشهاده
ما اعرف لحد هاللحظة كل ما اتذكرته
كل ما اتذكرت طريقة موته
ترجعلي نفس القشعريره و هوسة عقلي
ابتسمت تك خد و انا الذكريات
محفوظة بـ ذاكرتي ، ذكرى ، ذكرى
مُلاذ : امي دخلت بـ صدمة
ملاك صغيرة عمرها سنه او سنتين
ما اعرف ، جانت طفله يلزمها عناية
يلزمها الحب و الاهتمام هواي اشياء
وصية ابوي قبل لا يموت
ملاكه و فيروزته بـ امانتي و اصون الامانه
انداريت دحگتله و ضحكت
گلت و انا اضحك بـ هدوء
مُلاذ : اتخيل طفلة بـ عمر عشر سنوات
بعدها ابتدائي ما مكملة اكو امانه برگبتها
ما جنت اعرف الوصية شنو و لا الامانه شنو
كل يلي فهمته انا اليوم مسؤوله عن اهلي
انا رح اصير اب و سند و اخت و بنت الهم
امي بصدمتها ما تطلع من الفراش
كل الوقت نايمة و تبجي
عمي غزوان مات ورا ابوي
حسب ما گالو من قهره كعدوا لگوه ميت
ورا كم يوم من وفاة ابوي
بيبي دخلت غيبوبه من صدمتها و حزنها
الكل احتار بيهم ، نسونا انا و ملاك
حتى عمتي يلي هي احن شخص احتارت
نست الدنيا و ظلت تركض و تواسي
ما جان النا احد و لازم ندفع ايجار
و لازم نتسوك و لازم ملاك عدها حليب و حفاظات لازم عدها ملابس تدفيها و مكان دافي
كل هذا خلاني اطلع يوم ابيع ورد
يوم ابيع كلنس يوم اشتري بطالة مي
و افتر ابيعهم شفت انواع و اشكال من الشارع
صارت بيه مصايب تجسرت
صرت ما اخلي احد يحاول يتقرب الي
كرهت البشر و كل شي
امي كل ظنها أتاخر بـ دوامي
بس انا جنت لا اطلع و اشتغل و ابيع
و اخلي فلوس بـ جيبي و امن حليب ملاك
و اكل لـ امي لمن ارجع للبيت
اشتغلت بالمحلات بكل مكان
اشتغلت قريب السنتين هذا وضعي
انا ربيت ملاك ما اكلك امي ما جانت تتحرك
لا طبعاً جانت تحاول بس ينتهي بيها المطاف
و هي نايمة بالفراش حرت و احتاريت
اتجنن و لا احد يحاول يقرب من عندي
و يخليني اتكئ عليه مستحيل
كبرت ملاك على ايدي و اعتنيت بـ امي
لحد ما يوم رجعت من المدرسة
و اشتغلت و رحت للبيت
دخلت لكيت الكل ملمومين و ناس تصيح
و ناس ترفع و ناس تكبس
شايفيني و انا اشتغل ، راحوا يگولون لـ امي اسكندر يلي شايفني ، امي اتجننت
شلون اشتغل و شلون ابيع كلنس
بـ يومها بجت بجي محد باجي
ساعات هي تنحب و تبجي
هددوها بينا اذا ما رجعت لـ وعيها
و وكفت على رجليها ياخذونا انا و ملاك منها
اتعاركت وياهم و طردتهم
انا اتعلمت لازم يكون عندي كلمة
لازم احط حد لـ كل شخص
سنين محد يدري بينا
و لمن شافوني ابيع ما خافوا عليه
خافوا غيرهم يشوفني و يحجون عليهم
استمريت اشتغل جنت مثل طلقة تايهه
كل يوم زارفتلي گلب شخص و بالاخص امي طايشه ما اعرف شسوي وين اروح
شلون احتوي ملاك و شلون اكبرها
وصاية ابوي رنت كل ليلة بـ اذني
حتى عن امي ابتعدت جنت خايفة ،
خايفة اتعلق بيها اكثر و اخسرها
حسيت ابوي بسببي مات
ما كدرت اكون الابنة الباره
و لا كدرت اكون الاخت السند
المهم عندي اعيشهم المهم يعيشون
جنت و بعدني نار تحرك يلي ياذي اهلي
جانت ناري تلسع بيه لان اكثر اذيتهم مني
دموع امي تنزل عليه و مني
جانو الكل يسألوني
مُلاذ انتِ ليش هيج؟
مُلاذ ليش ما تحبين الناس ؟
مُلاذ ليش هذا الطيش؟ مُلاذ شوكت تعقلين؟
محد شاف مُلاذ محد عرف شنو بيها مُلاذ
محد سمع لـ مُلاذ محد انتبهه لـ حيرتها ...
دحگت بـ عيون أيهم الي يستمع الي بـ تركيز وجهه احمر و عيونه رجيج الدموع بيها
دار وجهه و مسح عيونه بسرعة
انزعجت من نفسي لان حجيت اله
لَكن منظر الاطفال كدامي اخذني لـ عالم ثاني
ابتسمت و رجعت شعري كلت متغاضية
مُلاذ : سطرت راسك مو ؟
ابتسم و دحگلي هز راسك بـ رفض
أيهم : اذا السطره منج قابل
مُلاذ : خوش رح تنسطر هواي بعد
ابتسم و اردف
تحت نظرات ماكدرت اوصفها
أيهم : كل الهلا
مُلاذ : تاخرت كلش
أيهم : الاطفال راحوا
مُلاذ : اي انتبهت
كمت من مكاني نكثت ملابسي
و هو كام وياي ينكث بـ هدومة
أيهم : رح ترحين بالسيارة غير؟
مُلاذ : اي
أيهم : وين موكفتها ؟
مُلاذ : هناك
اشرتله
أيهم : نمشي الها؟ لو ها ما تقبلين؟
اخاف اطلع مراقبج لو اريد اخطفج
انداريتله و قلصت عيوني
مُلاذ : بلا شك انت مراقبني
أيهم : شلون بـ سندرله
مُلاذ : شني ؟
أيهم : سندرله
مُلاذ : خالي اسمها سندريلا شني سندرله؟
أيهم : نفس الشي ثنينهن حذائهن ضاعت
و كضها الامير و يركض وراهن
ي سندرله دوكفي يـ ام المروه
سندرله مسويه روحها خفاش الليل
تركض و ذاك الاغم يركض وراها
دكضها و اشمرها بالحذاء شمالك هي اثول
مُلاذ : شني يشمرها بالحذاء
انا بـ مكان سندريلا انبت الحذاء بـ راسة
أيهم : عمي انتِ مرندله مو سندرله
همزين ما كضوج و حطوج اميره
مُلاذ : عوووووع
قلد عليه و هو يگول : عووووع
ابتسمت و ضحكنا
أيهم : اختي دوم تتابع و تكضني
أيهم الا تتابع وياي ما عندي حل اكعد اتابع
مُلاذ : عندك اخت؟
أيهم : اي
مُلاذ : الله يحفظها
ابتسم و دحگلي
أيهم : و يحفظج
هزيت راسي ساكته
صعدت بالسياره اريد اروح
الدكتور ماقبَل اوصلة ، رجعت للبيت
مرت الايام أيهم ما شفته بعد
و لا تصادفنا اساساً ، ما اهتميت
و بـ يوم صار شي مو بالحسبان ...
اتصلت عليه نور بالليل تبجي
نور : مُلاذ
كمت من مكاني بسرعة
خفت و اتوترت : شكوووو؟!
نور : مُلاذ بيبي ...
مُلاذ : شبيهاا؟
شهكت تبجي
مُلاذ : احجي شبيهاااا نورررر!
نور : ما اعرف ما اعرف
اتخربطت اخذوها للـ الـمستشفى
مُلاذ مواته و الله مواته
صرخت بيها : شنوووو مواته لا تخبليني !!!
كامت تبجي اكثر ، سديت الاتصال منها
ادك عليهم محد يجاوب ، رحت ابدل ملابسي بسرعة و انا احط غراضي بـ الجنطة
امي و ملاك اخترعن على صوتي
اجن الي بسرعة امي اجتني تمشي بالـمشاية خايفة ، مخروعه و ما فاهمه شكو
فيروز : شكووو؟
مُلاذ : بيبي متخربطة كلش رايحتلهاا
اخذت جنطتي و انا امشي
امي صاحت وراي
فيروز : خل اروح ويااج مُلاذ
مُلاذ : ما الحك يمه انا اتصل عليج
اقفلن الباب وراي و انا اتصل لا تتصلن عليه
طلعت بسرعة و امي توصيني
صعدت السياره اتصلت بـ نور متجاوب
شغلت سيارتي و حركت بسرعة
وصلت للمستشفى و انا دايسه للسيارة
بس اريد اوصل اتصلت ع الباقين
لحد ما جاوبني جسار گال هو هم بالمستشفى
اجاني بسرعة و اخذني من باب المستشفى
مُلاذ : شصايررر!
جسار : واكعه فد مره ، صارلها هواي تعبانه
الدكتور حجيه ما يبشر بـ خير
لسا ما طلعوها و لا طلعوا
شفتهم كدامي اتصنمت مكاني ،
جسار راح عليهم ، گوه اخطي الخطوة
ما اريد اوصل لـ يمهم ، خوف اتوسط صدري
الكل نظرات الانتظار و الخوف بـ عيونهم
تشرح و تعبر عن مدى حبهم الها
وصلت لـ يمهم ، انفتحت الباب
طلعوا الدكاترة و الممرضين واحد ورا الثاني
درت وجهي ناحية الغرفه ، ادحك
بلعت ريكي و انا ادحگلها ع السديه
ايديها مرميه ع الجوانب ، مغمضة عيونها
الضوه متسلط عليها ، بلغنا الدكتور بـ وفاتها ...
اتوالت اصوات الصراخ الرنانه
داله على لوعة گلوبهم ، صوفرت اذاني
رفعت ايدي بـ هدوء حطيتها على صدري
احاول اتنفس گلت بـ صوت مشحرج ، مصدومه
مُلاذ : بيبي !!!
- يتبع الفصل التالي اضغط على ( رواية جرح الأيهم ) اسم الرواية