رواية جرح الأيهم كاملة بقلم أيلان عبر مدونة دليل الروايات
رواية جرح الأيهم الفصل الاول 1
في بعض الأحيان
تمتلئ الارواح في الجروح
أن كُنت زجاج فـ اما تَخدش أو تُخدش
و في أحيان أُخرى
يحدث كلاهما معاً تُجرح و تَجرح
لـ غايةً ارادتها الحياة
تلك الغايه ان تأخذ درس ، جيد ام سيء!
الطريق واحد و نهايته ان "تتعلم"
تُجرح الروح و ليس لـ هذا الجُرح
طبيب يشافيه او دواء يعالجه ..
تنويه (مُهم):
*رجاءاً لا تقطعون الاحكام على القصة من اول بارتات الاحداث شوي شوي تبدء فقط انتظروا رح نبلش القصة تدريجياً حتى تكون واضحه .
__________
قراءة مُمتعة 🤍
بَـغداد
عام 1993/9/4
في احد المنازل
الساعة 11:30 ليلاً ...
صرخت صرخة وجع تنهش بجسمي
القابلة : ادفعي المصكوع
قلصت نفسي و عصرت اعصابي و صرخت
التفتت ادحك لعمتي الي تمسح على ايدي ، تحولت ايدها على شعري تمسده
عمتي : يلا حبيبه ادفعي الجاهل
كضبت الفراش و شددت اصابعي عليه
تتصبب قطرات العرك من كصتي
و تسير على رگبتي ، تختلط وي دموعي
همست اناجي ..
- يا علي ، يا علي يا علي
ايدي على الفراش عصرته عصر شلت راسي من الوجع و ركعت روحي بالمخدة ، بحلگي خاولي ملفوف
استمرت القابلة تصيح عليه بعصبية
و انا روحي فارت
-الياسسس وينننن!
عمتي : هسه يجي هسه بس يلا قوي روحج يلا بنيتي يلا يمه
همست عمتي بـ ايات و ادعيه فوك راسي
تسكن روحي دقايق من ادعيتها و ارجع اتألم
صرخت الياس بصوت عالي كأنو اناجي
القابله : راس المصكوع طلع
رخيت جسمي ، حسيت روحي اتنفس الصعداء
رفعت نظري يلي يتشوش غمضت ، عصرت عيوني بوجع من الضوا
فتحت عيوني مره ثانية
دحگت لعمتي نظراتها تبث القلق
كامت من يمي تقدمت على القابله
رجعت ادحك القابله ساكته و بايدها الطفل تباوعله
اتصبب العرك من كصتي و اطرافي يلي ترجف
بلعت ريكي ارطب بلعومي المشخط : بنيه لو ولد؟ ، ليش ما يبجي ؟ عمه؟
نطقت عمتي بملامح باهته و وجهه شاحب
عمتي : بنيه
ابتسمت و ضحكت بس ليش ما فرحانين!
القابله تتهامس وي عمتي عكدت حواجبي مستغربة
گلبت القابلة الطفله على ايدها و دكت على ظهرها
الطفلة مالها حس و لا صوت ، ليش تدك على ظهرها و ليش ما تبجي و ليش همَ خايفين
روحي رايحة : شبيها؟
دحگتلي عمتي بعيون حمر
رجعت دحگت بالقابلة و الطفلة
-عمه بنتي ليش مدتبجيي!!
اخذت عمتي الطفله و ضربت ع ظهرها
و هي صغيره حيللل بگد جف الايد
القابلة رجعت اخذتها و نومتها على رجلها و تضغط على صدرها باصبعها الابهام عيوني تراقبهم التفتت الها عمتي و هزت القابله راسها بيأس دمعت عيوني
-عمه بنتي شبيها ؟
باوعتلي بنظرات حزن و قهر
على وشك افقد وعيي بس مقاومه
ضمتها لصدرها القابلة و لفتها بمنشفه بيضه
-حاجووونيي
اجر النفس بصعوبة و روحي مشتعلة نار
صار وجهه عمتي احمر و عيونها دمعت نطقت بحزن : طير من طيور الجنه ان شاء الله
باوعتلها بصدمه : شنوو!
اجت لـ يمي تهدأني و تحاول تثبتني
و انا تجننت اتوسل يخلوها تبجي بس خل تعيش
فجأه و انا اتوسل بيهم .. رن ، رن صوت صريخها و بجيها ، فززن دموعي بفرح بجيت فرحانه متلهفه عهالصوت ، رنات صريخها و عمرها يلي كم ثانيه ، اتخيل فرحة إلياس بيها ، نسيت كل وجعي نسيت كل شي و اكتفيت بدموع الفرح
هلهلن عمتي و القابله فرحانات
انولدتي يا قرة عيني الاولى يا لذة إلياس
غمضت عيوني ،عضيت شفتي على صوت بجيها و اضحك ، سكنت روحي و هدأت ابتسمت بتعب ، يتردد بداخلي الحمد و الشكر لـ رب العالمين
قربتها القابلة مني و علت ثغرها ابتسامه : تتربى بعزكم
ضحكت و رفعت ايديه اخذتها من القابلة
شفتها بخير و الهم انزاح عني خليتها على صدري
الهث و اضحك بخفوت
مع كامل الاسف ..
مع كامل الاسف ! ما جنت اعرف ..
الطفلة الي عمرها كم دقيقة الان
على صدري منومتها و محتضنتها بروحي ، و عيوني يلي بجت بفرح لـ ولادتها بسلامة ، رح يجي يوم من الايام و تشوف عذاب الدنيا ، تنضج و تكبر بعمر المفروض تكون بي طفلة و عيوني وقتها رح تبجي قهر و حزن عليها ..
غمضت عيني باستسلام
و تفززت مسامعي
على صوت مليان فرح و سعادة
همس بصوت مرتجف ..
إلياس : يا اول فزة گلب لـ إلياس و فيروزته ..
______________
بين زوايا تبث الدفو بـ جو بارد
يجمد كل جزء بـ جسمك
برودة الاجواء ، نومة الشتا يلي تعجز تصحى منها
تداخل لمسامعي و خرب نومتي العميقه
اسمي يلي تكرر لمرات عديده حتى اكعد
فتحت عيوني بـ ثگل من النعاس ، رمشت لـ ثواني موضحة نظري يلي متشوش و رموشي متلاصقه
دفو محاوط كُل جسمي و محتل صدري
بـ هالايام الي يتجمد بيها الانسان من البرد
باوعت لـِ أمي مكمشه بـ أيديه
و تسحبني منهن باقي تجيب كرين حتى تشلعني من الفراش
فيروز : بطه كومي تعبتيني خامس مره اكعدج
گلت متذمرة كلمه تنفهم مني و كلمة تصير طلاسم
-ماما لا تصيحين الي بطه
عبست شفتي و رجعت اريد اغمض
فتحتهن مره ثانية لمن امي عاطت : بـَطه
-لا تصيحيلي بَطه
فيروز : لا عيني انتِ بطتي
كلت بـ نبرة زَعل : ماما
فيروز : لمن تكومين من الفراش ابطل اصيح الج بطه
رفعت ايدي و اني فاتحه خمس اصابيعي : بس انام هلكد
فتحت اصابعي و سديتهم
بـ معنى العدد
هزت راسها رافضه جرت بالكلمة و گالت : بَطـــه يلا كومي حبيبتي ابوج منتظرنا خطيه يريد يتريك يكول ما ياكل اذا ما تاكلين ويا
قلصت عيوني : تبطلين تصيحين الي بَطه اذا كمت ؟
هزت براسها : أحلفي؟
فيروز : والله
فتحت عيوني گوه احسني حاطه اعواد و مثبتتهن
مثل توم لمن حط الاعواد بـ عيونه شديت اللحاف تحت حنجي : و الجذاب؟
فيروز : ههههه ، الله يذبه بالنار
-صحيح
فيروز : ام لسان كومي
ابتسمت ابتسامه ظاهره سنوني
بعد ما طاحن و رجعن طلعن الي
غسَلت و فرشت و اني اسوي حركات بوجهي
امي واكفه بالباب صافنه عليه ضحكت على نظرتها
دخلت للمطبخ ركضت على أبوي يلي جان يصب الجَاي و حضنت رجله
إلياس : ديربالج ديربالج لا يطيح الجاي عليج
وخرت عنه مبتعده مسافه قليله
صب الجاي
و اجاني بوس خدودي و شبگني
شبگته و اني مِبتسمه إبتسامه واسعه
وخرت عنه :البارحه انتظرتك بس امي نومتني گوه
دخلت أمي للمطبخ و گالت : و الجذاب؟
- ههههه الله يذبه بالنار
فيروز : بس ابوج تشبكي و تبوسي
و اني ما الي شبكه لو بوسه؟
إلياس : هاي أمج تغار
انداريت عليه و هزيتله ب راسي : ايي
إلياس : خطيه بوسيها لا تبجي
رحت عليها مبتسمه وهي متكتفه
و تباوعلي ، حضنت بطنها
فيروز : لا ما عجبتني هاي الشبگه شو احسها جذبيه
حضنتها اقوى ابتسمت ابتسامه حنونه
و نزلت باست راسي
فيروز : يلا بَطه تعاي اكلي بسرعه راح الوكت
تخوصرت و خزرتها : مو گلتي بعد ما تكليلي بَطه
فيروز : اعتذر يلا تعاي ناكل
كعدنا نتريك ، خلصت ، غسلت رحت للغرفه أمي اجت وراي بدلتلي طلعت لابسه جنطتي و أبويه شافني
إلياس : شهالظفاير الحلوه تعالي خل ابوسهن
رحت اله باس ظفايري حيـل لَحظة مستحيل أنساها و هوَ يبوس ظفايري من كل داخله ، بگلب حنين و رهيف
إلياس : مُلاذي بنتي الحلوه
ابتسمت بـ وسع ، شعور لطيف يتدفق بداخلي
داهمت غرفة امي و ابوي
اركض على مشمش
اختي الصغيره امي دخلت وراي تركض
فيروز : مُلاذ ولج تعالي لتكعدين اختج ولج مُلاذ ماكدر اركض يا فوصه
بست خدها بسرعه و امي بس تريد تلحك تكمشني تخاف مشمش تكعد متنحسه من وراي و تكوم تبجي
فيروز :- شلت مُلاذ من بطنها و طلعتها من الغرفة
و هي تضحك و تحرك بـ رجليها
اضحك على ضحكتها
نزلتها يم إلياس و هو يغنيلها و يصفك ع كيف
إلياس : البنيات البنيات عشرة و اكول گليلات
رفعت اصبعها و فرته بوكاحه: وحده
إلياس : ههههههههه دمشي امشي هي وحدة و هيج فارتنا لو عشرة شلون؟
مُلاذ :- اخذني ابوي للمدرسة
نزل نفسه الي انطاني يومية
إلياس : مو تتعاركين زين بابا ؟
-تمام
بست خده و هو رفع ايديه باسهن ابتسمت
و دخلت المدرسة...
فيروز :- طلعوا مُلاذ و إلياس
انا بقيت انظف البيت
خلصت و سمعت صوت ملاك تبجي
رحت عليها دخلت الغرفة شلتها بين ايديه
فيروز : مشمش حبيبتي
دنكت بست راسها طلعت من الغرفة شايلتها
شربتها حليب و نومتها على الجودليه و انا اشاقيها
ظليت كاعده شوي احوك جاكيت لـ مُلاذ
خليته على الجودلية لمن شفت الساعه
حطيت ملاك بمكانها و رحت اسوي الغدا
التفتت لمن اندكت الباب طلعت وكفت ورا الباب
فيروز : منو؟
-انا
فيروز : مُلاذ؟!
فتحت الباب بسرعه ادحك لـ مُلاذ
دخلت مغندبه و مجتفه ايديها
و قميصها مخربط قراصتها طايحه
دخلت للبيت بلا متباوعلي و تحجي حرف..
كاعده كدامي و انا واكفه
كل شوي ترفع عينها تدحگلي تشوفني ادحگلها
ترجع تدحك للكاع بسرعة و متجتفه
تسائلت بـ شك
-مُلاذ شمسويه ؟ تعاركتي مو ؟
حكت راسها عاكده حواجبها
ملاذ : ماما يعني هاي الادبس..
صحت بصوت عالي : اشش و لا كلمة شنو هاي الالفاظ انا مو گلتلج بعد ما تتعاركين و لا تحجين هيج كلام؟؟
مُلاذ : و الله من وراها
فيروز : مُلاذ بكل مره تكولين هي التضوجني نحاجي اهلها و يكولون البنيه فقيره و هسه ماطول غلطتي عليها روحي للغرفة و عقاب ما تطلعين منها منا لحد ما يجي ابوج
كامت وكفت خازرتني
مُلاذ : يعني ما اروح للحمام؟ اظل بالغرفة يعني ما يصير ادخل للحمام يعني..
غمضت عيوني بـ نفاذ صبر
تدري عادي تروح للحمام
و كل مره اعاقبها ما تطلع من الغرفة
تسئلني هالسؤال حتى تعصبني او تخليني انقهر عليها
فيروز : مُلاذ
ضمت شفتها لداخل حلكها و سوت نفسها فقيره
شالت جنطتها من الكاع
و راحت للغرفة ، تمشي بكل هدوء و ع كيف
تنتظر انقهر عليها و اصالحها ، وصلت قريب الباب
و انا ساكته ما صحتلها
سرعت خطواتها، دخلت سدت الباب
انداريت على باب غرفتها متخوصره
اعرفها شرح تسوي و منتظرتها
فتحت الباب مدت راسها باوعتلي
و صاحت تحجي بسرعه : سرى الادبسز كله من وراها الجلبه الحقيره ال..
واكفه متخوصره و صحت قبل لا تكمل : مُلاذ
تحجي كلشي بگلبها بسرعه بسرعه
حتى تلحك قبل لا اعيط ، سدت الباب و دخلت
فتحت الباب مره ثانيه مدت راسها و صاحت : سرى المطيه ، الحماره ، ال.. ال
نست الباقيات خزرتها
و قدمت رجلي بـ معنى جايتلج
سدت الباب بسرعه
اسمع صوت ركضتها بالغرفة
نزلت راسي ايدي على عيوني جسمي يهتز اضحك
ما تبقيها بـ گلبها درت وجهي ، رحت اشوف الغدا
شوي و سمعت انفتحت باب البيت
دخل إلياس مبتسم بايده مسواك اخذته من ايدة
حطيته بالمطبخ
تقرب شال ظفيرتي بين ايدية و باسها
التفتت مبتسمه اله كمش وجهي بين ايديه
و تقرب باس كصتي
إلياس : فيروزتي ، وين مُلاذ ؟ رحت لـ مدرستها گال الحارس طلعت
زفَرت نَفس سندت ايدي على الكاونتر
-هم تعاركت
إلياس : بالمدرسة ؟
هزيت راسي بـ معنى اي
فيروز : مُعاقبة بالغرفة كاعده
إلياس : تمام ، بس لو اعرفها ليش هلكد تتعارك
تنهدت و انداريت صبيت اكل : ما اعرف تعبتني
إلياس : رايح اصيحها
-تمام ، إلياس فدوة حاجيها
هز راسه
راح إلياس صاحها و اجت
كعدنا ناكل
إلياس : مُلاذ
مُلاذ : ها بابا
رفعت عيني دحكتلها و هي تدحكله
بـ ارتباك من نبرة صوته
إلياس : سمعت متعاركه ؟
التفت و گالت بـ ضوجه و تذمر
مُلاذ : مامااا ليش تگولين..
قاطعها إلياس قبل لا تكمل
إلياس : ملاذ عوفي امج مو هي الي گلتلي العصافير شاورتني و گلتلي
نزلت راسها ساكته
إلياس : دزو علينا مو؟
هزت راسها بـ"اي"
إلياس : مُلاذ كم مره حجينا؟
مُلاذ : اكدر احجي ؟
إلياس : اكلي اول بعدين تحجيلي
هزت راسها و اكلت ، كملنا اكل غسلت الماعين ، كعدنا و اني شايلة مشمش ، اسمع الهم
إلياس : ليش تعاركتي ؟
حكت كصتها و حجت : شوف بابا انا رحت اشتريت من الحانوت
إلياس : اي
مُلاذ : طلعت من الحانوت اريد اروح للصف اجت سرى الحقيره ..
قاطعها إلياس : مُلاذ ما مسمحولج تنطقين هيج كلمات احنا شحاجين هالكلمات ينطقوها بس الي ما متربين انتِ بنيه متربية هالكلام عيب
رفعت راسها مُلاذ تهمس وي روحها
بصوت ناصي حتى لا نسمعها : الادبسز الحقيره الحيوانه ..
كملتهن بصوت انصى خزرها إلياس
إلياس : ترا جاي اسمع
نزلت راسها : اسفه
إلياس : كملي شسوت سرى ؟
مُلاذ : اجت طشرت جبسي و نستلتي طاحت اخذتها و شردت
إلياس : حاجيتي المعلمات؟
هزت راسها
إلياس : شسون؟
ملاذ : كل شي ما سون و انا رحت كتلتها
حط ايده على وجهه فرك وجهه
إلياس : هسه حتى المدرسة الي انا ادرس بيها مدرسة ولد و متوسطة ماكدر انقلج وياي
ملاذ : بابا سرى جلب..
خزرها و گال بـ نبرة غضب و صوت عالي : مُلاذ
سكتت فلا تتوب لازم ترد تغلط
ما اعرف منين متعلمة الغلط هيج و احنا حتى ما مخليها تخالط اطفال مو زينين و لا نغلط كدامها بس هي لسانها يمه يكطع الواحد و يثرمه ثرم خلال ثواني
دارت وجهها دحكتلي
اجت كعدت على رجليه
ظليت دايرة وجهي عنها
ما احاجيها
هي تكرص بخدودي
تسد و تفتح بـ عيوني گوه حاصرة ضحكتي
اباوع لـ إلياس طابك شفايفة و يضحك بسكته
طبگت شفتي حتى ما اضحك
تمسح بنهاية خصلات كصايبها على خدي : اسفة
مُلاذ : بعد ما اعيدها و الله و الله و داعت مشمش مو بابا؟
إلياس : لا گلتي هيج من قبل و عدتيها
مُلاذ : بابا انا ما عليه بيها هي تجيني والله
إلياس : مُلاذ لا انا و لا امج نغلط كدامج و لا فد يوم تعاركنا كدامج بس گليلي ليش هيج تسوين ؟ منين متعلمة هالاشياء ؟
نزلت عيونها تلعب باصابيعها : و الله ما متعلمه بس بابا انا ما اتعارك هي تتعارك
إلياس : باجر اروح احاجي اهلها بس ايالج بعد تتعاركين نتزاعل اني وياج زعال كلش قوي و بعد ما نتصاحب ابددد
هزت بـ راسها و باوعتلي بـ نظرة توسل
ابتسمت و صالحتها
مُلاذ :-
ثاني يوم امي بدلتي و ابوي اخذني للمدرسة
كالعاده وصاني ما اتعارك
و دخل يحاجي المديرة لان استدعته
و انا رحت لصفي ، اول مدخلت باوعت على رحلتي سرى الزعطوطه كاعدة بمكاني
رحت وكفت يمها : وخري خل اكعد
ابتسمت بخباثة
اباوع وجهها بي شخطات مني البارحه خرمشتها
سرى: ما اكوم رحلتي هاي
خزرتها و تذكرت ابوي بعد ما يحاجيني اذا تعاركت هزيت راسي ابتسمت بهدوء و رحت كعدت برحلتها
سرى : كتلوج امج و ابوج ههههههههههه
كامن يصفكن هي و الي وياها
سرى : كتلوها ، كتلوها ، هيههه هيه كتلوها
باوعتلها مبتسمه و ساكته
سكتن بسرعة لمن دخلت المعلمة قرتنا
خلص الدرس دك الجرس و طلعن
طلعت سرى و الزعطوطات الي وياها
كمت من مكاني و رحت لرحلتها او بالاصح رحلتي
الي هي كعدت بيها ابتسمت بخباثه و نفذت خطتي ..
بعد ما خلصت الفرصة طبت سرى
و كعدت على رحلتها
طبت معلمة القراءة
فتشت الدفاتر على كتابة موضوع القراءة
فتحت دفتري راويتها خلصت من سرانا اتجهت للسرة الي كاعده بي سرى
حطيت ايدي تحت حنجي مبتسمه
اباوعلها طلعت دفترها للمعلمة
و انطته الها گلبت المعلمة الدفتر و رجعت باوعتلها
المعلمة : وين الواجب ؟
سرى : ست هذا
اخذت الدفتر گلبت الاوراق ما لكته
ابتسمت بخباثه و عفست اوراقها مال واجب يلي شكيتهم بأيدي
المعلمه عصبت منها
لان اكثر من مرة ما تكتب الواجب
گالت خازرتها : كومي اوكفي قصاص !
غركت عيون سرى بالدموع : ست و الله كتبته
صرخت عليها المعلمة: كومي
الطلاب منهم خايفين و منهم يضحكون عليها
و طبعاً انا من ضمن الي يضحكون
ظلت طول الدرس سرى تباوعلي بحقد
و انا اضحك بالسر و اطلع لساني اعيب عليها
ركصت حواجبي لـ سرى
صحيح طفلة بس عقلي يشتغل لمن واحد يخبث وياي..
تمر الايام و الاشهر ، مشمش تكبر كدام عيني صرت اخاف عليها اكثر من خوفي على روحي
بين اهلي الي متعلگه بيهم و الحرب يلي دمرتنا
حيل صغيره بس عقلي يلقط كلشي و افتهم
لميت رجليه و كعدت بالكاع
امي تباوع على الاخبار و بايدها مشمش
ابويه طالع جو سوادوي و كئيب يتخلل حياتنا
و لحظاتنا و عمرنا و ذاكرتنا
مع نغزات گلوبنا كل ما صدر صوت الغارة ..
اجت امي لـ يمي و ضمتني لـ صدرها
مشمش تبجي جوعانه و احنا ما عدنا حليب
گلبي طك عليها و لا نكدر نطلع و نخطي
الصواريخ تتطاير فوك روسنا
على الرغم من صغري بس جنت افهم
و افهم صعوبة الوضع يلي احنا بيهه
هالشي هو الخلاني اعرف
دائماً لازم اكون فطنه و نبهه على كلشي يصير
صار صوت الصواريخ و احنا گلوبنا ترجف
ركضت امي علينا اخذتنا انا و مشمش رفعت الدواشك و دخلتنا جواهم و كعدت يمنا ، مشمش تبجي بصريخ و امي لازمه گلبها و تبجي و انا ساكته حرف ما نطقت حاضنتنا لصدرها ، الكهرباء مطفية الوضع مُرعب ..
مرت الساعات هدء الوضع
انفتحت الباب انتفضت امي
دخل ابوي ، ركضت شبكته و تحمد الله
و انا طلعت وراها شفت جدتي و عماتي
و عمي و اطفاله كلهم جايين
إلياس : فيروزه لمي هدومكم على السريع
باوعتله امي بـ نظرات الحيرة و التوسل
و دموعها تلالي بـ عينها : و اهلي؟
إلياس : سمعت راحوا لـ غير محافظة و آمنوا على رواحهم
فيروز : اكيد ؟
إلياس : و داعة عيونج الي دوهنني
امي شعرها يعبر خصرها لونه بُني
عيونها خضر من ذاك الصوب تشوف لونهن
لمن توكف بالشمس يصير لونهن يجنن
و باختصار حقه ابوي من حبها .
بيبي وجهها اصفر و مهدود حيلها من التعب
عمامي الباقين اغلبهم راحوا لـ غير محافظات
فيروز : ادخلوا عمه استريحوا
مسحت بيبي على راس امي
و دنكت راسها امي بيبي باست راسها
بيبي : - رب العزه و الجلال ويانا القادر الخالق ويانا لا تخافين حبيبه احنا بحفظ الرحمـٰن
غمضت امي عيونها مبتسمه و هزت راسها : و النعم بالله
اخذت بيبي مشمش و اجت لـ يمي
مسدت شعري و باست كصتي
راحت كعدت على القنفة
دخل ابويه بـ هيبته و طوله
بياضه إلي ياخذ الگلب
رموشه الكثيفات شعره الاسود فحم
شواربة سوده لحيته خفيفة
اتمعن بـ ملامحة و جمالهن
و الكل يشبهني بي
ابتسم يدور عليه بـ عيونه
كاعده يم الباب الدخل منه
نطق بصوته الحنين : مُلاذي
مُلاذ : بابا
ابتسم و التفت إلي اجا
إلياس : ليش كاعده بالكاع؟
رفعت اكتافي بـ عدم معرفة
إلياس : كومي بارده الكاع
شالني و حطني بحضنه و كعد هو بالكاع ظليت مخليه راسي على كتفه و صافنه شويه و طلعت امي بايدها الجنط
اخذ ابوي كصيبتي باسها :كومي حبيبتي
كمت من على رجله و كام راح لـ امي
طلعنا ابوي بذيج الليله من البيت لمن هدء الوضع
باردة برد يكص كص
و ملاك تبجي بـ صريخ
بـ ايدين امي ابوي من اجا جاب حليب
رغم شربتها امي بس هي مبينه بردانه
رفعت نظري لـ ابوي لمن رفع قبوطه
وضم ملاك بداخلة
إلياس : اش يـ بعد ابوج
يمسح بـ دموعها التفت الي حضن راسي لرجله
مسح بـ خفة على عضد ايدي : بردانه؟
هزيت راسي بـ نفي
وصلنا ردنا نشرد نطلع من منطقتنا هاهيه
و ابوي گال بتساؤل : حيدر وين؟
حيدر ابن عمتي الصغير
و عرفنا ناسينه عمتي گلبت الدنيا بالبواجي ماكدر ابوي يجي ويانا
إلياس : رح ارد و اخذة والحككم
جدتي و امي كطعن رواحهن
لمن كال لازم يرجع و رفض يروحن ويا
الصواريخ و الانفجارات منطقتنا
اكثر منطقه تطيح بيها الصواريخ
و انا هم خفت وياهم وعدنا يجي
ورا فترة و هو يقنع بيهم و يهدء بـ عمتي
قبلوا يشردون بس بشرط ما يتاخرعلينا
و يجي ورانا بسرعه
اخذنا عمي مهند و بذيج الليله شردنا من مكاننا
و كعدنا يم بيت عمي الثاني محمد
صوت الساعه يطن بـ اذننا
و الاخبار مفتوحه و عيننا على الباب
ننتظر ابوي بيبي دمعتها بـ عينها و تسبح
و امي بيدها مشمش نايمة
و هي تهز بيها و دموعها تنزل
و انا گلبي يرتج رج خايفة على ابوي
عمتي تنعي و عمامي و عماتي يهدون بيها
و هي تفرك رجلها بـ قهر و تون لايمه روحها شلون نست ابنها
فيروز :- اباوع لـ مُلاذ و ارد اباوع لـ مشمش
و ارجع نظري للحجيه إلهي لا تختبرني بيهم
گلبي يدعي يردلنا إلياس بسلامة
ما كدرت اغير عنادة و شجاعته
و قوته كدام المواقف الصعبه
ما كدرت اغير لمن يذب روحه بالتهلكه
لاجل يلي يحبهم
همست وي نفسي
و دمعتي على خدي : بحفظ الرحمـٰن انتَ
رفعت مشمش بست راسها
كمت و مديتها على الجربايه نومتها
حاوطتها بالمخدات حتى لا توكع
طلعت من الغرفة ، باوعت لـ مُلاذ كاعدة يم الصوبة و الجهال يمها كلهم يسولفون و يلعبون بس هي مو يمهم اصلاً ، لامه رجليها و تدفي بـ ايدها كعدت يمها بهدوء وخرت كذلتها عن عيونها
فيروز : يلا كومي تنامين
-لا خل يجي بابا
فيروز : لا مُلاذ نامي حتى يجي بابا
عبست شفتها : حبابه
التفتت للـ حجيه و منارس
الحجيه:عوفيها خطيه
منارس : انا بعدين اقنعها تنام تعاي كعدي
منارس اخت إلياس
رجعت التفتت الها : تريدين تجين يمي ؟
مُلاذ : لا بردانه كاعده يم الصوبة
هزيت راسي و كمت
عفتها وكعدت يم عُلا الي نسينا ابنها
عيونها مورمة مسحت على ظهرها
دنكت حطت راسها على متني
عُلا : گلبي وجر نار شلون لو صارلهم شي يَ خيه الله ياخذ عقلي شلون نسيته و عفته
اهتز جسمها تبجي غمضت عيوني بـ تعب
و مسحت على ظهرها : يرد يـ بعد عيني يرد تدرين إلياس ما يعوفه و رح يجي و يجيبه ويا
عُلا : ان شاء الله ربي همَ بامانتك لا تحرك گلبي باخوي و وليدي
مُلاذ:- كمت من يمهم
رحت اشرب مي دخلت للمطبخ
اريد الوح الكاونتر و افتحه ما الوح
رحت اريد اسحب الكرسي و سمعت صوته يمي
-هههههههه ما تلوحين الكاونتر ؟
التفتت عليه ساكته تخوصرت و ظليت واكفه
اسكندر : تريدين كلاص ؟
باوعتله هو اطول مني ويوصل للكاونتر
درت وجهي عنه بـ انعدام تقبل و كرهه
هزيت راسي بـمعنى اي من لا جاره
ابتسم و فتح الكاونتر اخذ كلاص مدليا
ردت اخذه و رفع ايده باعدة عني
نظرت اله بـ استغراب عاگده حواجبي : انطيني
اسكندر : بشرط
خزرته و فوكها يتشرط وجهه الجريذي
نزل روحه الي كعد كدامي قرب خده الي
و نطق طالب مني بكل صلافة عين
اسكندر : بوسي خدي !
فتحت عيوني بوسع
و رجعت خزرته : ما ابوس قروده
رفع حواجبه و انا دفعته
اخذت الكرسي صعدت اخذت الكلاص
اسكندر: ادبسز طالع لسانج
التفتت اله : انجب والله اگول لـ بابا عليك
فك عيونه و عصر ايدي حيل : ادبسز شنو تغلطين!
اكو كلاص ستيل اخذته
و ضربت بي اسكندر على راسه
وهو صاح متاذي و ابتعد عني
فزيت لمن اجا صوت امي : ولج مُلاذ
دخلت خازرتني : شلون تضربين اسكندر ! اكبر منج شحجينا احنا ليش تعصبينيي!!
مُلاذ : مام..
عاطت بيه
فيروز : اشش ولا كلمه
هديت الكلاص ايدي ترجف
و اسكندر يدحگلي مبتسم ، رافع حاجبه و متجتف
تدنت امي عليه ولوت اذاني
فيروز : بعد دربالج تعيديها
ما خلتني احجي و اني نزلت من الكرسي حتى مي ما شربت وكفت بباب المطبخ ودمعت عيني مهضومه
مسحت دمعتي و التفتت لـ اسكندر
متحلفة بي بگلبي : اني اعلمك وجهه القرد
طلعت كعدت بالغرفة اجت نور لـ يمي
بت عمتي اكبر مني ب ٣ سنين
مُلاذ : بابا يرجع مو ؟
نور : اي اكيد يرجع يلا انتِ نامي ان شاء الله من تكعدين تلكينه موجود
مُلاذ : الجلب اخوج تف عليه اني اعلمة
ضحكت نور تباوعلي : ليش شبي ؟
مُلاذ : القرد يكلي بوسيني بخدي
حطت نور ايدها على حلكها متفاجئه : صدك والله؟
مُلاذ : والله
نور : اسكندر ترا يحبج
مُلاذ : ما احبه خل ينجح اول
نور : هههههه
مُلاذ : و امي لوت اذاني ما خلتني احجي
نور : انا احاجيها يلا نامي انتِ
مُلاذ : و بابا؟
نور : من يجي اكعدج
باوعتلها و ظليت ساكته حطيت راسي على المخده
نعست كلش و غفيت يم مشمش ..
نور:- نامت مُلاذ طلعت من الغرفة و رحت للصاله كعدت اندك باب البيت و هلعوا كلهم للباب و اني وراهم
البجي و الصياح صار اعلى فتح الباب عمي
و انا وراهم ما اشوف شي عمتي عُلا كامت تضحك
ابتسمت عرفت اجا عمو إلياس و جاب حيدر
بس فجأه ارتفع صوت بيبي و فيروز يصيحن بخوف ..
مُلاذ :-
فتحت عيوني اباوع لسكف الغرفة
انداريت لكيت جدة نايمه يم مشمش
من الجهه الثانية التفتت لكيت نور نايمة يمي
فركت وجهي و تذكرت ابوي
اول ما استذكرت فز جسمي
كعدت على حيلي بسرعه فركت عيوني بنعاس
كمت مشيت ع اطراف اصابعي ، البيت اظلم و الغرفة ممليه بالنايمين ، عماتي و اطفالهم و اطفال عمي و زوجته
ركزت كل قوتي من بين الظلام بيهم
احاول اشوف وجهه امي
رحت لـ باب الغرفة فتحته
و فتحت ضوا الصاله كدام الغرفة
لمن طاح ضوا خفيف ع جهة الغرفة
توضحت وجوههم ، من بينهم كلهم امي ما موجودة
طلعت من الغرفة و رحت ادور عليها
دخلت للمطبخ امشي ع كيف
رجعت للممر يلي بين الغرف وكفت بـ حيرة ، دايره وجهي صافنه فزيت مخترعه و جسمي جمد
لمن اجا صوت يخوف من وراي يهمس : عليمن تدورين؟
درت وجهي باوعتله اسكندر
خزرته و ضربته على صدرة : خرعتني
ضحك و تدنا الي و اني خازرته
تراجعت لـ ورا و هو مبتسم
أسكندر : عيونج حلوات
عاگده حواجبي و ادحگله
اسكندر : ما نسيت من ضربتيني مساع نتصالح ببوسه
دفعته و ركضت على الشحاطه شلتها و انداريت عليه
اجا عليه بخطوات سريعه ابتعدت و گلت : وين ماما؟
ابتسم بخباثه
أسكندر : عافتج هي و ابوج و راحو
غوركت عيوني بس اعرفه جذاب
هديت الشحاطه ، عبست شفتي ، الغصة حنكتني
-انجب جذاب وين ماما ؟
حجيت كوه مختنكه بغصتي شوي و ابجي
أسكندر : راح اكسر راسج لا تغلطين
-ولي
رفع ايده و لوى اذاني حيل
و گال معصب : منو يولي ولج؟
ادفع بـ ايده بس ما يوخرها حسيت اذاني انعصر الدم بيها : وخر انت تولي عوفف اذنييي
ما الوحه هو اطول مني
كمشت بايده و نبتت اظافيري بيها
اسكندر : لا تخرمشين حيوانة
مُلاذ : انت حيوان
ابتعد بسرعه لمن انفتحت باب وحدة من الغرفه
كمشت اذاني تاذيني و عيوني تغركت دموع
رفعت نظري لـ امي طلعت من الغرفة
رحت بـ خطوات سريعه عليها بداخلي شعور ابد مو حلو ، حضنت بطنها
درت وجهي دحگت لـ اسكندر
و راسي على بطنها
فيروز : شتسوون هنا؟
ابتعدت : ماما لوه اذني
فكت عينها بوسع حطت ايدها على حنجي رفعت راسي الها ، دارت وجهي بايدها باوعت لـ اذني
اسكندر : خالة خرمشتني
دحگت اني لـ اسكندر و خازرته
گالت بـ نبرة تخوف ، ممليه بالعصبيه
فيروز : و انت شنو تمد ايدك عليها؟ اذا سوت شي تجي تگلي و اني اعاقبها ما تمد ايدك عليها !
نزل راسه متفشل من امي
فيروز : ديربالك بعد اسكندر ديربالك تمد ايدك ع مُلاذ اذا تكرر هالشي اگول لعمك هو يتصرف وياك
كمشت ايدي ، دخلنا للغرفة دحگتله مبتسمه بخباثه
على منظرة ظل ساكت لا ياخذ و لا ينطي سدت الباب
اكو شمعه محطوطه على ماعون استكان على الميز و مضويه الغرفة ضوا خفيف
باوعت ل ابوي متمدد و ركضت عليه
بسرعة ابتسم و همس : مُلاذي بنيتي الحلوة
-بابا حبيبي
بسته و هو كعدني على بطنه
رفع ايدي يبوس اصابيعي
إلياس: شوكت كعدتي؟
مُلاذ : هستوني كعدت
إلياس : خوش تعاي نامي بحضني
كمت من بطنه تمددت يمه و حطيت راسي ع كتفه
راحت امي جابت مشمش
لان سمعتها تبجي و اجت يمنا
إلياس : فيروزه حبيبتي تعالي منا
فيروز : لا رح انام من جهة مُلاذ
إلياس : لا تعاي الاصابة بـ جف ايدي مو يمج تعالي
دحكتله مستغربه : بابا اصابتيش؟؟
رفع ايده الي تحت ظهري
داعب خصلات شعري ب اطراف اصابعه
وحك فروة راسي بـ حنان
باس كصتي و انا راسي على كتفه
-ماكو شي حبيبتي نامي
التفت لـ امي رجعت نظري على ايد بابا ملفوف جف ايده اخذ مشمش من امي ، حطها على صدره نومها
انا من جهه نايمة ع كتفه
و من الجهه الثانية امي ، مشمش نايمه على صدره
الكاع صبه فارشين جودليه خفيفة
نايمين عليها تلاثتنا
رغم برودة الجو
الوضع يلي احنا بيهه
و صوت الصواريخ و الانفجارات يلي ميروح من بالي
بس الدفو جان بـ ضلوع ابوي
لمن يلمنا بـحضنه من بعدها تحس الدنيا امان يمك
مرت دقايق رجعت نعست و نمت
قاطعت نومتي العميقة اصوات خارجيه
على الرغم من بعدني مغمضه
اسمع اصوات ناصية يمي
من ضمنها صوت امي تهمس بخوف
فيروز : إلياس تريد تخبلني ؟ گلي تريد اتسودن ؟
إلياس : لا تخافين ما يصير شي
فيروز : الوضع خطر و انت صاعد ع دبابه و تكبر و الله ما يرحموك اذا لزموك انت ما تخاف ؟؟
إلياس : فيروزه الخوف ما يتراهم وي گلبي ، انا ما اعرف اخلي گلبي يرجف مو بـ ايدي
فيروز : هذا الي تعبني إلياس
انت مجاي تخاف ما اعرف شنو من گلب عندك
هذا ابو حنين رجال ميعبر الباب من طوله و هيبته
و هسه ما ندري بيا سجن ودوه و شلون يعذبونه
إلياس والله اخاف عليك گلبي حاطته ب شيشة
و انت ما موجود
اسمع ابوي گال بـ فصيح اللغة العربيه
بـ نبرة حنينه مع بحه لطيفه بصوت شاعري : و أن نافسك الموت و أخذني منكِ
اعلمي ان روحي تداخلت مع روحك
و لا يُفرقهم سوى الكُره المستحيل
ان يبدر من قلبك الرقيق نحوي ، فيروزة قلبي .
امي بجت كـ عادتها
من خوفها على ابوي
فيروز : لتگول هيج و الله اموت اتدمر بلاك
إلياس : امي انتِ لا تخافين
ما صايرلي شي انا اطلع من حلك الموت لأجلكم
انتِ و مُلاذ و مشمش انتوا نجاتي و نَفسي
انا روحي تحارب لاجل روحكم
فتحت عيوني دحگت مشمش يمي
تحرك بـ ايديها بعشوائيه ابتسمت
تدنيت بست خدها ، ريحتها كد ما حلوه تخلي رئاتي ترفرف كمت من يمها رحت لـ امي و ابوي
امي مسحت دموعها بسرعه
و ابتعدت عن صدر ابوي
إلياس : صباح الخير مُلاذي
فيروز : صباح الخير ماما حبيبتي
فركت عيني و ابتسمت : صباح النور
كعدت بنصهم وهم يحضنون بيه و يبوسوني
إلياس : بليل شبعتينا رفسات خو انا اجت وحدة بخشمي
ضحكت و ضميت حلكي بايديه : خشمك ازرك
إلياس : لا صدك راح جمالي من وراج
تقرب عليه و همس : اكل رجليج ؟ اكلهنن؟
كمت ارافس بمكاني اضحك و هو ياخذ رجليه بايده عود رح ياكلهن و امي تضحك ويانا
سمعنا بيبي تصيح لامي : حسنه كومي تعاي ماكدر اطبن الغرفة
إلياس : ههههههههههه
فيروز : رح نطب السنه العاشره و عمه تصيحلي حسنه
إلياس : يعني بشرفج من اجيت اخطبج اگللها اسمج فيروز تگلي نيروز خفت لا تروح تكول كدامكم نريد نيروز و عبالهم نريد اختج المتزوجه سترت على روحي و گلتلها اسمج حسنه
فيروز : يعني ما لكيت غير حسنه
راد يحجي ابوي و قاطعه صوت بيبي : ولج حسننننه وينج
فيروز : اجيت عمه
كامت امي تحضر الريوك وي نسوان عمامي
و عماتي و بيبي
دحگلي ابوي
إلياس: يعني هسه شبي اسم حسنه لو مسميج حسنه مو احسن؟
كشولت ملامح وجهي ما عاجبني
إلياس : مو حلو مو؟
هزيت راسي بمعنى "اي" و ضحكت
إلياس : تعالي حسنه نامي على رجلي .. لا لا مو حلو تعالي مُلاذي نامي على رجلي احلى
نمت على رجله و بابا يكرص خدودي لو خشمي بحيث حسيتهن صارن حمر
مُلاذ : لا بابا
قلد عليه : لا بابا
مُلاذ : بابا
إلياس : ها حبيبتي
مُلاذ : رح تروح و تعوفنا ؟ بابا حباب لا تعوفني
رفع حواجبه ب استغراب
و انا اتوسل بي ، كلام امي خوفني
شبكني و احتضنني لـ صدرة
إلياس : لا بابا منو كال هيج
مُلاذ : هسه مو امي كالت
إلياس : لا بابا ماكو هيج شي تعاي لا تبجين
مسح دموعي و باس كصتي حط ايده ع خدي و باوعلي باستغراب: تعالي نطلع للحديقة؟
باوعتله و هزيت راسي بـ معنى اي
طلعنا من الغرفه غسلت وجهي
و رحت اله طلعنا كعدنا بالحديقة
إلياس : لا تظلين تفكرين بهاي السوالف باباتي حبيبتي انا موجود دوم يمكم
مُلاذ : چا ليش امي تخاف و تبجي ؟
ضحك و مسح على شعري : امج خوافه معليج بيها بس انتِ قابل خوافه ؟
هزيت راسي ب رفض
إلياس : شجاعه انتِ گلبج گوي مو؟
مُلاذ : شنو گوي؟
إلياس : يعني قوي
مُلاذ : اي مثلك بابا
إلياس : اروح نذر و فدوة لـ البابا
ظلينا شوي بره نكطف نبك
شالني ابوي حطني على صبه عاليه
و انطاني ظهره ضحكت بـ فرح
إلياس : يلا كمشي برگبتي
كمشت بركبته و حاوطت رجليه بطنه
و شالني على ظهره
مُلاذ : حمال باشي حمال باشي
إلياس : صايرة ثكيله ولج كبرانه بعد ما اشيلج
مُلاذ : لا لا خفيفه
شايلني على متونه و يفتر بيه بالحديقه
ورا شوي نزلني حط النبك بجيوبي
إلياس : تعالي خل نطب هسه امج تظل تدردم علينا
طبينا جوا و رجع شالني
باوعت بيبي النا و اجت علينا بابتسامة ظاهره اسنانها
بيبي : لا توكع البت دربالك
إلياس : لا يمه ما اوكعها لا تخافين
مسحت بيبي على ظهري
بيبي : سبحان الخالق تتشابهون كثيرر
نزلني ابوي : دام مُلاذ تشبهني انا مأمن على جمالي
ضحكنا كلنا لمن امي گالت : شقصدك انا مو حلوة؟
ابوي : لا فيروزة انا ما الحكج بالجمال
ابتسمت امي بخجل
و بيبي تدحك لـ ابوي و امي مكشوله ملامحها
بيبي : مدار الدنبك شني يمه بس مريتك حلوه
إلياس : ههههههه حجيه هسه حيرتوني بيمن اتغزل بس كصايبج يرادلهن عشر سطور شعر
بيبي : تريدن تغشمرني امشي ولك امشي
دكته ع جتفه و هو طلع يضحك من المطبخ
إلياس : بس لا انتِ هم تريدين ارد اتغزل بيج
مُلاذ : لا لا انا حلوة ادري
قلدته : دام اشبهك مأمنه على جمالي
ضحك بصوت عالي و نزل يبوس خدودي
رحنا كعدنا كلنا على الكاع متجمعين بالصالة
اني كاعدة بـ حضن ابوي على رجله
و هو يمسح على ظفيرتي و يحجون هو وعمامي
ما استذكر حوارهم ب الضبط
لكن جان يخص ابوي
و الدبابه يلي صاعد عليها و مأذن
باوعت طب اسكندر يصيحني : مُلاذ تعالي جيبي وياي الغراض
خزرته و درت وجهي
إلياس : كومي بابا شوفي ابن عمج يلا
مُلاذ : ما احبه خيولي يجيبهن وحدة
ابوي : لا عيب يلا كومي
صاح عمي على ابنه : صفاء روح جيب الغراض وي اسكندر
إلياس : يلا بابا عيب كومي
كمنا انا و صفاء و اسكندر خزرني
طلعنا برا لكينا گواني
طلع محمد ورا حسن وراهم سلطان
يشيلون الگواني ويانا
مُلاذ : شنو هاي ؟
حسن : گواني طحين و شكر
تقدمت اريد اشيل وحده و هي بطولي
اسكندر : لج شتشيلين هاي بوزنج
درت وجهي باوعتله
و كمشت بالگونيه احاول اسحبها
ثبتت رجلية و حاولت اجر الگونيه بس مكدرت
ضحك حسن يباوعلي : عوفيها حبيبتي اني اشيلها
ابتسمت اله و ابتعدت
اسكندر خزر حسن
اسكندر : وخر ما عليك انا اشيلها
التفت عليه خزرني و شال كونيه الجنت رايده اشيلها حركلي بعيونه بمعنى طبي جوا ما طبيت بقيت برا
حسن : وخري عيني خل اشيل الغراض
وكفت على جهه و ضميت ايديه لصدري
تجتفت اباوعلهم ، ابتسمت ابتسامة واسعه ميلت راسي
و سندت خدي ع كتفي دحگت لـ اسكندر اضحك عليه
دخلت جوا و همَ دخلوا الگواني
دكت بيبي ع جتاف سلطان و ضغطت ع زنوده
بيبي : عفيه وليدي ذني مو بس تخليهن حت تقلصهن كدام بت ام ساره و تسوي روحك عدك عضلات و هنه عطلات
سلطان : حجيه شبيج وياي هاي لان ما عدج منهن
ضحكت بيبي و گالت : مدار الدنبك طب ولك طب
عفتهم و رحت ادور مشمش لكيتها بالغرفة وحدها اصبعها بحلكها و نايمه ابتسمت على شكلها
انفتحت الباب درت وجهي لكيته اسكندر
دخل و سد الباب اجا عليه و لوى اذاني : من اكلج طبي ليش ما تطبين؟
كمشت ايده مثل البارحه و هم نبتت اظافيري بيها
مُلاذ : وخر حقير و الله الا اگل لـ بابا عليك معليكك
دست على رجله و خرمشت ايده من الطول للطول
هدني هو بسرعه و انا طلعت ركض ل ابوي
إلياس : لا توكعين بابا
انتبهه لوجهي و گال خايف
إلياس : شبيج ليش تبجين ؟
و انا اناشغ اذاني توجعني
مُلاذ : بابا باع اذاني
شاف اذاني : هايي شبيهااا هيج حمرررره؟؟ مُلاذ بابا جاوبيني
مُلاذ : اسكندر البارحه لواها من كعدت ادور عليكم و هسه لوى اذاني لان گلي اطب من برا و ما طبيت
بسرعه عكد حواجبه و گال بعصبيه : وينه؟
مُلاذ : بالغرفة البيها مشمش
-روحي لـ امج اكعدي يمها يلا حبيبتي
كام و عافني و انا رحت لـ امي
فيروز : شبيج تبجين يمه حبيبتي مُلاذ شكو؟؟
مُلاذ : اسكندر لوى اذاني و گلت لـ بابا
فكت عيونها : وين ابوج؟؟
مُلاذ : راح ل اسكندر بالغرفة النايمه بيها مشمش
فيروز : هسه اجيج غسلي وجهج حبيبتي ماماتي و اكعدي هنا
كامت و عافتني هي هم و راحت
فيروز :- دخلت للغرفة
لكيت إلياس كدام اسكندر
و لاوي اذانه حيل عاصرها عصر بايده
و خد اسكندر احمر مطبوعه اصابع إلياس عليه
إلياس : ايدك اذا مديتها على مُلاذ اطيح حظك افتهمتتت؟
فيروز : تمام الياس كافي عوفه
رحت يمه و اريد يس اخلي يهد اسكندر
و ذاك يعتذر و الياس عيونه حمر شايط كلشي و لا احد يلمس مُلاذ
اسكندر : عمي بتك وكحه اگللها طبي ما تطب
إلياس : ولك حلكك اشكه افتهمت لو لا؟؟ وكحه مو وكحه انت ما عليك بيها اسكندر اذا شفتك يم مُلاذ بعد اشك حلكك زين لو لا؟
اسكندر سكت ما نطق كلمة علط بوجهه إلياس : افتهمت؟؟
هز راسه ساكت نتر إلياس ايده
و طلع اسكندر من الغرفة
إلياس : حيوان يلوي اذانها و انا اخاف اكمش ايدها
فيروز : فدوة اروحلك اهدء البارحه حذرته عود
إلياس : وين مُلاذ ؟؟
فيروز : بالمطبخ
عاط بيه : ليش اجيتي وراي ما ظليتي يمها !
فيروز : إلياس صوتك
إلياس : ما عاجبجج صوتي ؟؟ البارحه لوى اذانها و انتِ تدرين و ما گتيلي
سكتت و درت وجهي اريد اطلع كمش ايدي
إلياس : فيروز
فيروز : عوفني إلياس
وقت تهدء و تعرف شلون تحاجيني عود تعال
إلياس : اسف فيروزة ، ليش تضمين عليه ؟ ليش ما تگليلي سوا فلان شي انا عزيزتي محد ياذيها و يبجيها
فيروز : جنت تعبان و انا حاجيته و ما ينعاد هالشي دام حذرته
احتضنني و باس كصتي
رجع حضنني مره ثانيه مسح على شعري
إلياس : اسف
مسحت على ظهره : عادي بس لا تعصب
طلعنا من الغرفة و رجعت لـ مُلاذ لكيتها كاعده هي و نور يلعبن وي البزونه
عمتي : ولجن ما طلع ريوك لو مسوين باچه هم جان خلصتنها
منارس : خلصنا يمه بس نصب جاي
جابوا الريوك حاطين وي البيض طحين
حتى تكبر البيضة اكثر و تكفينا
التمينا و كعدنا تريكنا
خلصنا غسلت لـ مُلاذ
و اخذتها لبستها قميص ابيض
و فوكاه بنطلون حمالة ، احمر
اباوعلها و اسمي بگلبي عليها
شعرها اسود و عيونها سود بيضه مثل ابوها
رموشها كثيفات على ابوها
لميت شعرها سويتلها ذيل حصان
و نزلت غرتها القصيرة
مُلاذ : ماما اسكندر ادبسز
فيروز : ولج مُلاذ ولج كُتلة الوكاحه بطلي تغلطين عيب
مُلاذ : خيولي ما احبه
فيروز : عيب ماما مثل اخوج حباب هو بس يحب يتشاقى وياج
مُلاذ : و الله حسن و سلطان و جسار و كلهم حبابين الا هو
كملتلها و كعدت كدامها : معليج بي من يضوجج تعالي و گليلي لا تغلطين و لا تحاجينه
كرصت خدودها و بستهن
فيروز : مو توصخين ملابسج
هزت راسها و اجت نور و طلعت هي و نور
ظلينا بين الغدا و العشا
و التنظيف طبيت هستوني للغرفة
بس اريد اكعد رجلية راحت من الشغل
حطيت ملاك بحظني
رفعت راسي لمن سمعت صوت عالي
من برا و هوسه ، همست : يا ربي استرنا
شلت ملاك نومتها على الفراش
و طلعت بسرعة لـ برا
دحگت مستغربه
لـ اخو إلياس واكف كدام الباب
و إلياس كدامه
إلياس : وخر يا خويه و داعة عيونك منا اروح و ارد
غزوان : و الله على جثتي تطلع انت منا ، يطلعون كل الوادم بس انت تحرم اخليك تخطي من هالباب
إلياس : عندي شغل يمعود خل اكمل و اجي
تدخل اخو إلياس الثاني احمد
احمد : إلياس انت تريد تجيبلنا المصيبة لين بابنا
التفت اله إلياس
اعرف نظرته هاي معناها عصب
غزوان : انا مو على المشاكل إلياس ما يجيب مصيبة بس يطيح الاذى بي بعدين انا ما عندي گلب يتحمل اخسر اخوي
إلياس : راجع بس عندي شغل
محمد : إلياس بويه هيد و اكعد لخاطري انا اخوك الجبير اسمع كلامي
بيبي : إلياس و الله الذي لا اله الا هوَ
رب السماوات و الأرض ، اذا طلعت منا يلساني من المستحيل يدورن على لسانك بعد ، و لا ارضى عليك اغضب عليك لـ يوم الدين
نهت كلامها بـ نظرة باردة
و نبرة تحذيريه خلت إلياس يوكف : اذا انت قابل ، ما ارضى عليك لـ يوم الدين اخطي من هين للشارع
دكت صدرها و گالت تنهي جملتها
مخليه إلياس بين اختيارين : اذا طلعت لا انا امك و لا انت ابني
دارت وجهها بعد مگالت كلماتها الاخيره
و دخلت جوا سانده روحها على عوجيتها ، فرك وجهه و غمض عيونه
دخلوه كوه و هو يتطافر نار من عيونه
ظلوا مكعدينه يمهم بالصالة لحد الليل كام راح للغرفة
نومت البنات و إلياس كاعد يشخبط بدفتر
طلعت و رجعت للغرفة ، إلياس ما موجود
رحت بسرعة على باب الشارع
لكيتها مسدودة و مقفوله
رجعت ادور عليه ما لكيته
رحت للبيتونه لكيت باب السطح مفتوحه
همست وي نفسي : لا إلياس لا شهالعناد!!!
ركضت صعدت الباب مفتوحه
طلعت للسطح ، دورت عليه ما لكيته
تقربت ع سياج السطح رفعت رجليه
دحگت لـ گفاه و هو يمشي بالشارع
ينكث بـ ملابسه ، طفر من السطح و شرد
تنهدت سحبت نَفس عميق
درت وجهي و مشيت لـ باب السطح
بخطوات ثگيلة دخلت و رديت الباب
نزلت من السطح كلي خيبه شكد توسلت بي
دخلت للـغرفة نظري يتجول ع البنات
فركت ايدي بـ رجلي بحيرة ، وگلب ممرتاح
رجف صوتي و انا اكتم بـ روحي
نزلت راسي حطيت ايديه ع وجهي
و مسحت دموعي الي تدفقن على خدي
ظليت عيني على باب الغرفة
طر الفجر و عيني ما غمضت انفتح باب الغرفة
و فز من شافني كاعده دار نفسه سد الباب
و انا اباوعله بـ برود
گلت بـ تساؤل و ببرود
ع رغم البركان يلي بداخلي..
-حققت مرادك؟
ظل ساكت يدحگلي
-صوبوك طعنوك ضربوك شسوولك هالمرة ؟
اجا كعد كدامي : ما سوولي شي ، حيٌ أُرزق كدام عينج
فيروز : إلياس تعبت كافي انت اذا ما تفكر بينا طلكني!
فك عينه بصدمة: شهالكلام ! ديربالج تعيدين هالكلمة!
-خليني ارجع ل اهلي و اكعد يمهم
احافظ على بناتي و انت روح اتصوب انضرب
انطعن ، اتكاتل واجهه الظلم و العدو
خلي روحك رخيصة لان انت مستثكل هالروح
على نفسك الرايح و الجاي يكتلها
ما جاي تفكر بـ اهلك و لا بيه ، عوفك من اهلك و مني
إلياس ما تفكر حتى بـ بناتك بعدهن اطفال ، اطفال
باجر عكبه يكبرن تجيهن قسمتهن للباب من منو يطلبوهن؟ باجر عكبه يكبرن ، و يدورن ريحة ابوهن
راح تظل وياهن ل ذاك الوكت ؟ ، ابوي ما انطاني الك
الا لمن عيونك خضرت ، ليش كل هالتعب
تريد تنهي بـ رصاصه تايهه لا سامح الله
ظل ساكت و منزل راسه
حاضن ايد بـ ايد و حاطهن بحجره
رفعت ايديه و جفوفي ضغطتهن كل قوتي
ع محاجر عيوني حتى لا يدمعن
زفَرت نَفسي و بلعت ريكي
- هاهيه إلي تريدي يجرالج
رفعت راسي بصدمة : تطلكني !؟؟
-بعد ما اطلع ، ما اطلكج انا ماكدر بدونج
-اوعدني بعد ما تطلع
-ما اكدر اوعدج بس بالوقت الصعب اطلع
- و انا اخاف من الوكت الصعب حتى لا تطلع !!
-هاهيَ وعد ما اطلع بعد .
نزلت كعدت كدامه على ركبي
كمشت ايده بثنين ايديه
نزل راسه سنده ع كصتي و مسح ع خدي بابهامه
إلياس : فيروزه و حق هو الحق انا ما متجاهل وجودكم انا افكر بيكم كل لحظة بس ماكدر اسكت و اتغاضى
رفعه ايديه ثنينهم و فتح قبضة ايده : بكفة انتوا ، و بالكفة الثانيه الحق و الوطن ضمن الكفة الثانيه انتوا موجودين اخاف عليكم ياذوكم و ترحون انتوا بالرجلين
سندت كصتي ع كصته : إلياس ، دامنا وياك احنا بأمان ، انت روح مُلاذ ، و جناح ملاك ، و گلب فيروزه ..
ابتسم و گال بصوته الحنين
إلياس : مُحاط بثلاثة مؤنسات ، الفيروزه و المُلاذ و الملك .
علت اطراف شفتي ابتسامة اخذ ايدي و كمنا نمنا
محتضنين البنات و بعضنا بأيدينا و گلوبنا ..
نور :- واكفه ارش الزرع و اغسل الطرمه
بيبي كاعده و خالة فيروز و عمه عُلا يمي ينشفن
و مُلاذ واكفه يمنا
اندكت باب البيت
بيبي : نويره روحي شوفي ياهو بالباب
انطيت لمُلاذ الصوندة ترش الزرع
رحت ورا الباب : منو
-انا
اول ما سمعت صوته حسيت گلبي رح يطلع من مكانه و ايديه رجفن حيل بلعت ريگي وفتحت الباب
مديت راسي دحگت اركان
نور : هلو.. العفو اقصد اتفضل
اركان : هههه
ابتسمت ع ضحكته و ظليت ساكته
اركان : نونه
ظليت ساكته ادحكله و گلبي يدك حيل
و ابتسامته لمن گال نونه خلتني افهي
اركان : صيحيلي سلطان
هزيت راسي و طبيت ركض جوا
صحت ل سلطان و طلع يحاجي اركان
طفرت كعدت بالمطبخ ادحك من الشباك
لظهر سلطان و هو واكف بالباب
نسيت حتى الطرمه و الغسل و التنظيف
دخل اسكندر للمطبخ
اسكندر : شبيج؟
نور : شنو شبيه مابيه؟
اسكندر : وجهج احمر
نور : ها .. جنت برا اغسل وياهم حاره
اسكندر : منو دك الباب ؟
نور : ماعرف مادري
اسكندر : نور شبيج تجاوبين جوابين مو راح اهطرج براشدي تندلين دربج
ظليت ساكته مجاوبت
اسكندر : اكلج
نور : ها
اسكندر : مُلاذ وين؟
نور : ما اعرف
رفع راسه دحك من الشباك دحكت ويا مُلاذ واكفه يم سلطان بالباب و سلطان يشاقيها
اسكندر : باع بت ال***
طلع بسرعه وراها و سلطان طلع من البيت قبل لا يروحلهم اسكندر و اصلاً ما شاف اسكندر مُلاذ واكفه مكانها و هو راح يمها جرها من ايدها طببها للطرمه
طلعت وراهم اندارت خالة فيروز الهم و راحتلهم كمشت ايد مُلاذ و اسمعها تحجي وي اسكندر
فيروز : صاير شي ؟
اسكندر : لا خاله ماكو
فيروز : مُلاذ اكو شي
هزت راسها مُلاذ برفض
اسكندر : خل تطب جوا خطيه
ههه حاره شوفي وجهها صار طماطه
ضحكت ع خزرة مُلاذ اله
بيبي : ولك الخرنكعي وين الحر
شو احنا بالشتا اتجمدن عظيماتي من البرد
اسكندر : طبن جوا حجيه شسون كاعدات برا
بيبي : ومني ينشف الطرمه *** الخلفوك
اسكندر : حجيه صوتج و علي فضحتينا
نشفنها بسرعه و طبن
بيبي : شني ولك شو انت تتأمر
اكوملك اخزوعك بعوجيتي
اسكندر : شبيج حجيه شوكت تامرت ؟
بيبي : انجب خرنكعي
و عوف الجاهله لا تضوجها
رفعت عوجيتها و حركت بيها : ترا ابوها سولفلي اخافن عبالك انا مادري عوف البت
اسكندر : صارت قضية رأي عام
هو شسويتلها بس لويت اذانها لان وكحه
بيبي : اكل تبن اذاناتك املصهن خوش يو لا؟
اخذت مُلاذ الصونده من الكاع
و ترش بالزرع و بيبي ترزل باسكندر
فجأه اسكندر صار كله مي من الطول للطول
بيبي : ولج لويذه ولج نكعتي الوليد
مُلاذ : فلتت الصونده من ايدي
اسكندر : مُلااااااذ
بيبي : و قزرقط سرسري شني طفلة ما تدري
امشي بيبي طبي جوا انتِ و نويره خلصنا الطرمه
اجت مُلاذ ليمي تضحك و طبت جوا
اسكندر : حجيهه
كامت بيبي وسندت روحها على العوجيه : اسكندر عوف الجاهله لا انعنع ضلوعك
عافته و اجت ليمي
بيبي : تعالي نويره بس انتِ ادميه اهلج كلهم مجلوبين
ضحكت و طبيت وياها
ركضت على مُلاذ و كعدت اسولفلها على اركان و شلون ضحك الي
مُلاذ : اي شفته سلطان صاحني يمهم
نور : يجنن مُلاذ
ظلت ساكته و تسمع الي
و انا كل شويه اعيد نفس السالفة من فرحتي
فيروز :- صار الليل
الكهرباء مطفية و الدنيا ظلمه بايدي اللايت
و افتر بالبيت سمعت عمتي تكول
عمتي : صيحن حسنه و اخذن الدواشج و اهجعن فوك بالسطح هم الجو بي بروده و افرشن الي وياجن
منارس : خوش يمه
بيبي : و اخذن ارجيلها وياها ما ينام هالمكموع بدونها
ضحكت و دخلت للصاله
بيبي : تعاي يبت الحلال هساتني ذكرتج اخذي إلياس و البنات و نامو فوك و افرشولي انامن انا هم
فيروز : تمام عمه
صعدنا الدواشك كلنا فوك و فرشناهن
الجو حلو و بارد و جبنا بطانيات
صعدو اخوان إلياس و نسوانهم تمددو
احنا نمنا بالنص و نور و مُلاذ وبقية الجهال
فرشنالهم بزوية و ناموا
حاطه مشمش بحضني نايمه و امسح على راسها
رفع الياس ايدي باسها..
نور:- متمددين انا و مُلاذ نباوع النجوم تجنن
و الهوا بارد و حلوو
الحجيه : ولكم نعنع ضلوعي البرد
رفع راسه سلطان
سلطان : حجيه انام يمج ؟ ادفيج و علي
عاطو كلهم بصوت عالي : ولك سلطان
شالت الحجيه و ابو سلطان نعالهم( تكرمون)
و قبل ما يلحك يشرد طاحن بظهره ثنينهم
فحطنا من الضحك لف روحه سلطان بالبطانيه
طلع راسه سلطان من البطانيه
سلطان : شني شبيكم همج خما همج ما لحكت اكمل حجايتي
اسكندر : ولك سلطان ضم راسك اجاك النعال الثالث
قبل لا يكمل كلامة انشمر سلطان بكصته
و كلهم فحطانين من الضحك
نور : ههههههههه
الحجيه : خرنكعي تربيه سز
سلطان : شبيج حجيه شو نيتج شادتلها جنوحه و محلقة بالهواء الطلق
إلياس : ياهو الدرسك عربي ؟
سلطان : ليش عمي شني تريد تدرس مُلاذ يمه
إلياس : لا اريد اشتكي عليه
سلطان : يا ريت عمي و علي جواريبه ريحتها تعط
حسن : ولك سلطان التنكه لا تحلف بالامام علي على جواريب
سلطان : اسكت حسن كربله
اسكندر : سلطان باع تشوفمن منا
و اشرله بعيونه على السياج
سلطان : هلوووووو
كمز سلطان على السياج و يباوع منه
و يريدون ينزلونه ما يقبل ينزل
تالي طفر و كام يطك اصبعتين و يهز بالنص
سلطان : ياهو اقترح فكرة النومه بالسطح
الحجيه : انا
راح سلطان عليها باس كصتها حيل
و هي تسب و تنعل بي و تدفع بايده و هو يضحك
سلطان : عمي شني من حجيه عقلج مورد خنبوسه
الحجيه : مدار الدنبك هذا كله لان راح تشوف السليته ساره
كل الولد كام يصيحون ها ها
و سلطان يسكت بيهم
مُلاذ : اركان تكدرين تشوفي منا ؟
هزيت راسي برفض : ما ينشاف
ورا شوي سكتنا كلنا و انا و مُلاذ نسولف بهمس
التفتت على اسكندر لمن دغ جتفي
نور : شنو ؟
اسكندر : گلي لـ مُلاذ تنام
لا اطيح حظها شعدها كاعده لـ هسه؟!
انداريت لمُلاذ
مُلاذ : هذا عليه يحجي ؟
نور : لا مو عليج
مُلاذ : لا عليه عليه
نور : لا والله مو عليج
رفع راسه اسكندر من وراي
اسكندر : اي عليج نامي لا اطيح حظج
كامت مُلاذ و كعدت على ركبها رفعت اصبعها : صير حباب و لا تغلط و الله اگل لبابا عليك
اسكندر : اصبعج نزلي حيوانه
مُلاذ : انت حيوان
انا بنصهم نايمه و هم واحد خازر الثاني
و مُلاذ تحاجي اسكندر بعصبيه
و هو صافن عليها يدحگلها
و هي الوكاحه بلسانها بحيث فرته فر خلال ثواني
اسكندر : لسانج ادبسز
مُلاذ : انت ادبسز و الله اصيح لبابا عليك
اسكندر : صيحي ادبسز وكحه
مُلاذ تخوصرت تباوعله و خازرته
دارت وجهها تريد تصيح ابوها و انا سديت حلكها
نور : مُلاذ حبابه و الله بعد ما يخلوج تنامين يمي
مُلاذ : اخوج خل يسكت
التفتت لـ اسكندر
نور : اسكت
اسكندر : انجبي
درت وجهي لـ مُلاذ
نور : يكول انجبي
مُلاذ : انت انجب
انداريت لاسكندر : تكول انت انجب
اسكندر : رح افرك حلكج
انداريت لـ مُلاذ : يكول رح افرك حلكج
مُلاذ : انجب اگول لبابا
نور : تكول رح اكول لبابا
اسكندر : انعل...
قاطعه جسار
جسار: و قزرقط شبيكم انجلبتو و هاي الفطيره صايره زاجل انخمدو ثنينكم لا انعنع ضلوعكم بعوجية الحجية
خزرته مُلاذ : جسارر
جسار: حبيبتي نامي معليج بهذا الخبل انتِ عقلج اكبر منه خطيه انطي على كد عقله
تمددت مُلاذ
جسار : الزاجل انتِ هم اسكتي و نامي
اسكندر : ولك شعل..
جسار : انجب و انخمد انت هم شعليك بـ مُلاذ
اسكندر : انجب و لا تقارن
جوري : دكافي اريد انام شكد تغلطون
اسكندر : مكعب التربية اسكتي
جوري : هسه انا ساكته انتوا جاي تحجون و واحد يسكت بالثاني
ظلينا ساكتين كلنا و نمنا بعدين ..
فيروز :- انداريت ع إلياس نايم
غمضت عيوني غفيت محتضنه مشمش لصدري
و ما سمعت غير صوت صاروخ فوك راسنا
و ضربه قوية ، اشتغل صوت الغاره
اصوات القصف ، الهوسه
احترك الجو خلال لحظات
صوت الصياح و الصريخ و اصوات الصواريخ
و الضربة القاضية كانت لمن شفت الصاروخ يتجهه لسطحنا ...
- يتبع الفصل التالي اضغط على ( رواية جرح الأيهم ) اسم الرواية