رواية جرح الأيهم الفصل السابع عشر 17 - بقلم أيلان
"الجُــرح السابع عشر"
"شَنفضهن نَفض شو كلهن التَمن؟
لا عَطوة أِنطني وَ لا رِضن يهدن!
شكثر أسهام كلهن فد وكِت هَدن
سَهم أوداع ، سَهم أوجاع
و سَهم ذاك العَزيز الصار جوه الگاع ."
نور :-
فزيت و طاح الاكل من ايدي ،
اتجمدت بـ مكاني بعد ما اتصادر لـ مسامعي صوت صراخ عالي ، يصدر من الغرفة
يلي بيها مُلاذ
ركضت ناحية الغرفة
و انا اتعثر بـ خطواتي
نور : مُلاذ ، مُلااااذ
دخلت للـ غرفة دحگت مصدومة
الغرفة فارغه ، مُلاذ ما موجوده
شخص واكف و خلفه شخص ثاني يتلاوه وياه
لمن ركزت ، أنتبهت هذا الدكتور !
الدكتور ضرب الشخص حيل على وجهه
بـ ايده سجينه و الدكتور رافعها و صادها
و هو يريد يوصل ايده للدكتور و يصيح
الدكتور انهار بالضرب على المجرم
بحيث صوته رج الغرفة رج ، غطيت اذاني
نزلت دموعي و انا خايفة تهسترت
اندفعت من جتفي ، دخلوا الشرطة
دخل ضرغام ، يركضون ناحيتهم
بلا ما يفهمون اي شي القو القبض
على الشخص ، ظليت جامدة بـ مكاني
راح گلبي فكرت مُلاذ صارلها شي
بس استغربت اكثر لمن شفت الغرفة فارغة
من بعد ما اخذوا هذا المجرم
و طلعوه برا الغرفة دخل ضرغام
يتسائل و انا اتسائل منو هذا الشخص ؟!
أيهم : صارلي فترة من اجت مريضتكم لـ هنا
انه ملاحظة يوكف بالباب ساعات
تجي اتصالات ، و كم مرة راد يدخل للغرفة
بس تطلعون انتوا موجودين ، يخلي و يروح
البارحة دخل لـ هنا لحگته و الكل نايم
اسئلة منو انت يكلي اجيت زيارة ،
عرفت سالفته مو خالية هسه اخذت المريضة
لان ما ارتاحيت و الغرفة فرغت
خليت واحد مكانها ، اجيت لكيته داخل للغرفة
و بـ ايدة سجينه ، يريد يدج النايم هنا
شهكت و حطيت ايدي على حلگي
ظلينا مصفصفين و صافنين
نور : مُلاذ هسه وين ؟؟؟
أيهم : لا تخافين جاي نسوي الها فحوصات
ضرغام : تسلم دكتور احنا جنا ندور على الافراد المتبقية من شرف و انت لكيت النا واحد منهم
اتصافحوا هز راسة الدكتور
أيهم : واجبي
ضرغام : هسه المريضة وين شلون وضعها؟
أيهم : هسه رح اروح اشوفهم
هزينا راسنا ، انتبهت لـ ركبته متعورة بالسجينة
و خلف اذانه هم ، ردت اروح وياه اشوف مُلاذ
بس استوقفني ضرغام
ضرغام : من يجون لا تفتحين
هذا الموضوع الهم ابداً ، ام مُلاذ وضعها تعبان
و رح يخافون كلش خلينا نسده هنا
و نغير غرفة مُلاذ و اذا اضطر الامر نغير المستشفى
نور : تمام
دخل اسكندر ، اتبعه دخول خالة فيروز
دحگو بالغرفة بـ استغراب نطقوا سوه
-وين مُلاذ ؟
ضرغام : احنا هم اجينا سئلنا عنها
گالو ودوها يفحصونها و تحاليل
ماكو داعي نروح وياهم
فيروز : ليش فحوصات مال شنو؟
ضرغام : اشياء روتينية
فيروز : اكيد ؟
ضرغام : نعم
هزت راسها خالة فيروز ما مقتنعه
بس حاولنا نقنعها
ظلينا منتظرين مُلاذ و خفنا عليها كلش
خالة فيروز كامت تلوب ظلينا هواي ننتظر
لحد ما اجت ممرضة گالت
الممرضة : الضوه كان مقطوع بـ قسم التحليل
و الفحص و هسه كدرنا نصلحه
ما كدرنا نشتغل بدون ضوه
ف هسه رح نكمل لا تخلون بالكم على المريضة هي بـ امان يمنا
هزينا راسنا دحگت لـ خالة فيروز
ارتاحت ولو شوية طلعتها للحديقة
و ظلينا نفتر انا وياها لحد ما اتجمعوا الكل
رجعنا للغرفة ننتظر مُلاذ و نسولف ...
مُلاذ :-
درت وجهي الحيرة تتوسط گلبي
ورا ماطلعت نور من يمي
ما توقعت ابو اركان هيج ابداً!
صحيح كان يشرب و سكير
ولو شتوقع منه وين اكو سكير بي خير ؟
هزيت ايدي ، نزلت نفسي بصعوبة
نمت على السرير ، خليت ايدي على بطني
درت وجهي ناحية الشباك
ادحك للضوه الي يمر منه
احس بالهوه الي اشتمه
من بعد ما كنت بمكان يمر بي نتفة ضوه
و الهوه الي بي شبه رح ينتهي
من انباعيت جان الضوه عمى بالنسبة الي
و الهوه سم اتجرعه
بسبب الظروف الي عشت بيها
بس هسه احمد الله الف مرة ...
فزيت من صفنتي لمن انفتح الباب حيل
وسعت عيوني مخترعه انداريت ادحك
لكيت الدكتور دخل عليه و بـ ايدة مدري شنو
مُلاذ : دكتور شمالك كل شويه مداهمني
و تشربني العافية تكول داخلين عليه داعش
اتقدم عليه بسرعة بدون ما يحجي
تعابيرة واضح عليها "التوتر و الاستعجال"
أيهم : كومي بسرعه
مُلاذ : شنو ، شكو ، منو؟
اجا عليه وخر الغطى عني
بسرعة لزمت الغطى
مُلاذ : شبييييك؟؟؟
أيهم : وخري ايدج
بسرعه استعجلي
مُلاذ : شكو شبيك خبل انت؟
ما حاجاني سحب الغطى عني
هذا شماله الخبل المسودن
حط يمي شال و عباية ، وخر المغذي من ايدي
لبسني الشال ، انا صافنه هاي شصاير
شني متت و ما ادري و جاي اتوب بالبرزخ
مُلاذ : لك انا ما محجبه
أيهم : ادري بيج ام شعر
جر العباية لبسنياها
كل حركة يتحركها بـ استعجال
يا ربي استرني و ادركني
مُلاذ : ولك شتريد منو انت؟؟
شبيك يااااا وخررر
أيهم : اسكتي صووتج بس اسكتي
مُلاذ : يمه بطني
ولك ماكدر اصيح شكوو؟
أيهم : بس اوكفي هسه افهمممج
طركاعه سوده مصخمه ملطمة شلعتي گلبي
وكفني على رجليه
لف الشال عدل و سد العباية الاسلامية
لزم زندي و راد يجرني وياه و يمشي
ثبتت رجلية بـ مكاني
مُلاذ : شكووو خبلتني ترا ؟!!
جر زندي اكثر و مشى بيه
و انا احجي و ادردم
أيهم : ولج بس صوووتج صوتج موتتيني!
مُلاذ : يماااااا راح يخطفوني مره ثانية
كمت اعيط و اصيح بـ علو صوتي
سد حلكي بـ ايدة و يجرجر بيه
و انا اتلاوه ويا و بطني موتتني
أيهم : ولج طركاعه فضحتينا
انتِ منوووو يخطفج انتِ تخطفين اليخطفج
يا مخبل يخطفج ما تكليلي !؟
مرر ايده من ورا ظهري ، حاطها على حلگي
الايد الثانية لازم زندي ، صاير حاجز بيني و بين الناس
مُلاذ : انعل ابو الچتال انت من يمه مووو
تف عليك و على الي خلاك دكتور
يا ما تستاهل امداااك ، ولكم ديخطفووووووني
اتهسترت الناس تدحگلي مستغربة
رجع سد حلگي بـ سرعه
عود اسكت؟ لا اعيط بـ صوت مكتوم و احوص
أيهم : الخياطات انـ*** بيهن
مُلاذ : ولك عوووووفني يمااااا خطفوني
يماااا خطفوني مره ثانية بالعباس
اروف ببطنك اخنكك بـ جهاز الاعطاء
أيهم : اربطج بي هسه
اسكتي كافي فضحتينا
مروا ممرضين من يمنا
و احنا نمشي وخر ايدة عن حلگي و انا عيطت
مُلاذ : ولكمممم الحكولي ديخطفنيييي
وگفوا يدحگولنا بـ استغراب
شلت ايدي خرمشت خدة كام ينزف
اندار عليه و عاط بيه
أيهم : كاااافي
اجت وحدة من الممرضات ناحيتنا
بسرعة وخرت ايد الدكتور عن حلگي و صرخت
مُلاذ : انقذينيييي يريد يخطفني
اتجاهلتني الحيوانه عبالك حايط
حولت نظراتها للدكتور گالت بـ قلق ...
الممرضة : دكتور انت زين ؟؟
مُلاذ : ولج ديخطفنييي سم مابي
تعالي انقذينييي من هذااا
گال دكتور ثاني
-دكتور أيهم صاير شي تحتاج مساعده ؟
كمل مشي يجر بيه ، هز راسه بـ رفض
أيهم : لاا ماكو داعي اعذرونا هاي مخبله
-دكتور على بختك هاي مستشفى
شيسوون المخابيل داخلين هنا
غير مكانهم الشماعية !؟
أيهم : هو انه هسه ماخذها للشماعية
مكمم حلگي بـ ايده و ضاغط عليه
مُلاذ : ولك سافل نعال حيووووان
دعوفني بغل حمار رحل مخبل مسودن
انا مخبببببله؟؟؟؟ جلبببب
ضغط على حلكي اكثر
عضيت ايده و بعده مثبتها على حلگي
أيهم : خرب شرف شرفج
ولج انتِ تخطفين العالم مو العالم يخطفونج
وصلنا لـ غرفة فتح الباب ، دخلني بيها دفع
كان مكتب و اكو قنفه ، كعدني عليها
مُلاذ : بعدني ما مكملة تفكيرييي
بعدني ما حامدة رب العالمين عدل
يا ظلام يا جلاب طاحظك و حظ الچتال
أيهم : ولج طركاعة الله السودة
اكعدي هناا لا تطلعين
مُلاذ : عووووفني شتريدون من عندي
و الله ارجع و اهرب منكم عبالكم اخاااف؟!!
افكس عيون الچتال و الله افكس عيونه
دار وجهه مغلس عني راد يطلع
كمت اصيح اريد اطلع
دار وجهه عليه ، صاح بيه معصب
أيهم : اكعددددي گلت !!
مُلاذ : لاااا تصيح عليييه ! شتريد مني؟؟
رجع گال بـ نفس العصبية
و الصوت العالي و الخزره
أيهم : يا ام عقلييين واحد يراقبج
يراقبونج الله اعلم شمسويه
بحيث يريدون يطلعون روووووحج
انتظري هنااا و اكعدي ، خل اروح اطم ذاك العار
مُلاذ : منين تعرف انت ؟؟ شمدريك؟
ضحك بـ استهزاء
أيهم : لا تصيحين و لا تتحركين
تنفتح خياطاتج هسه ارجعج لـ مكانج
دار وجهه اخذ مفتاح الباب
و طلع قفل الباب عليه من برا !
اسمع صوته يحجي وي واحد
أيهم : اوكف هنا و لا تخلي كائن من يكون
يوصل هنا و اذا سألوك منو يصيح
گول صوت جاهل جايبه الدكتور وياه
اختفى صوته و انا اتخبلت
وكفت ادك بالباب و لازمه بـ بطني
دكيت لمن تعبت و صرخت لمن انهد حيلي
لَكن لا حياة لـ من تنادي
وكفت هادئة لـ كم دقيقة
عيوني تدور بالغرفة ، زفرت انفاس تلهث
رحت كعدت على القنفه ، طاقتي منتهيه
رفعت الشال عن راسي و خليته على القنفه
دورت عيوني بالمكان اتفحصه
مكتب فخم بالمعنى الحرفي ، من الطراز الحديث
الجدران كلها بيض الا جدار خلف المكتب اسود
تتوسط الجدار لوحة مخطوط عليها اسم "الأيهم"
بطريقة مُزغرفة ، خط عريض كأنوا يلي كتب الاسم و خطه كان بـ كل عناية و حُب
الخط ذهبي ، اللوحة سوده سواد قاتم ...
الجدار الثاني ، موضوعه رفوف مزينه بـ الجمام رسمة القلب الحقيقي و دماغ مثل اللعبة و اعضاء اخرى ...
بجانب الرفوف على طول الحايط صورة
تتضمن هيكل عظمي و شرح الاجزاء،
مع تأشيرات ، الجهه الثانية صورة الاعضاء
و اسمائهم و شرح عنهم ، مؤشر عليهم ايضاً
الشرح بـ الصورتين بـ اللغة الانكليزية
الرفوف ماخذة الوسط بين الصورتين
و هذا الشي ضايف جمالية للـ الجدار !
اتقدمت على المكتب بـ هدوء
دحگت على الأسم (د . أيهم )
يتبعها اسم ابوه
رحت على اللوحة تقربت منها
دحگت لـ اسمه الـمخطوط بـ شكل مثالي
نزلت عيني لـ طرف اللوحة
مكتوب بخط غير واضح
الا شخص يركز حرف "m"
رفعت حواجبي بـ استغراب
هزيت راسي بـ تعجب
ليش هيج الحرف صغير و بطرف اللوحة؟
لمن ركزت بـ اللوحة اكتشفت حرف "m"
موجود هووواي بـ اللوحة و بالزوايا
لـَكن كان الحرف بـ اللون الرمادي
اتغاضيت عن هالحرف
معقولة هذا الكائن الخبل يحب ؟
درت وجهي دحگت للـ المكتب
مرتب ، نظيف ، عليه اشياء تخص الطب
تتوسط المكتب سماعة اطباء
على المكتب صورة لـ طفل صغير
اخذت الصورة ، ابتسمت على شكل الطفل
شكد بريء شكله و ابتسامته بـ الصورة
مُلاذ : الخبل جان بريء و هو صغير
هزيت ايدي ، رجعت الصورة لـ مكانها
رحت يم الباب احاول اسمع
ما سمعت اي شي ، حاولت افتحها ما تفتح
رجعت كعدت على القنفه الي كدام المكتب
لونها اسود و قماشها جلد شكلها فخم
مثل الي يطلعن بالافلام ، كعدتها مريحة كلش
صفنت و الف حسبة ببالي
هم رح يرجعون يخطفوني ؟
مستحيل اصلاً يفكون ياخة عني ...
فكرت اذا رجع الدكتور
اوكف ورا الباب و اضربة بـ شنو احصل
و اشرد ما اريد انخطف مرة ثانية
اتراوى بـ عقلي سيناريو
هسه ديجهز ابر التخدير حتى يخطفني
و دينطي خبر للمجرمين الي وياه
حتى يلزموني و يخدروني و يخطفوني
و ياخذون كليتي الثانية و اموت !
و انا اتخيل فزيت على روحي
لازمه بـ ايدي وحدة من الجمام
ضغطت عليها قويه و ثگيله
شني هذا الخبل بس لا كاتل واحد صدك
و ماخذ جمجمته صرت كلشي اتوقع
هزيت ايدي ، رحت وكفت ورا الباب
رجلية تعبن من الوكفه و الانتظار
سمعت صوت خطوات و صوت الدكتور
حضرت نفسي و استعديت
شددت لزمتي على الجمجمة الي بـ أيدي
كتمت انفاسي و انا واكفة ورا الباب
انفتح القفل و انفتح الباب
دخل الدكتور يدور عليه
ادحك لـ ظهره شعرضه و اكتافه و
شطوله تگول تيل وكفت ورا بـ ايدي الجمجمة
راد يندار كمزت احاول اوصل اله
ضربت راسه بالجمجمة وكفت بـ ايدي الجمجمة حطيت اظافيري بـ حلكي صافنه عليه
صار هدووووء خلا ايده على مكان ضربتي
عبالي رح يطيح مثل الافلام
بس شو هذا يا جبل ما يهزك ريح ؟
التفت الي عاكد حواجبة
ايده على ركبته من ورا
انا ارمش و ادحگلة بـ هدوء
بدال لا اشرد بعده على نفس وضعه
گال بـ هدوء واضح بي الاندهاش
ألايهم : خرب العرامه .
بحلقت عيوني عليه و هو نظراته بارده
نزل ايده من ركبته بيها دم
رفع عينه خزرني جر الجمجمة من ايدي
شمرها على القنفه ، اتقدم وكف كدامي
نتر بيه بـ صوت عالي
أيهم : شبيييج مخبلة انتِ ؟؟
مُلاذ : و الله ما اخليكم تخطفوني
أيهم : منو خاطفج يا مخبل خاطفج؟؟
افتهمتيني شنو حجيت مساع لو لا؟؟
ظليت ساكته و هو كمل
أيهم : واحد يراقبج يا ام عقلين يا ام ٣ عقول
واحد يراقبج و دخل لـ غرفتج يريد يكتلج
لو ما متلاحكج بالليل جان هسه انتِ ميته
گال عود هو من اهلج و دخل يشوفج
و هسه حصل اله فرصة ثانية
حتى يدخل عليييج و يكتلج!! فهمتي؟؟
ظليت ساكته
رافعه عيوني ادحگله
مُلاذ : منين عرفت يراقبني ؟
أيهم : ما يخصج
خزرته و كمل : اهلج ينتظرونج
هزيت راسي بـ هدوء
مُلاذ : شكراً
ردت اطلع وكف كدامي
و حجز الباب عني دحگتله بـ استغراب
مُلاذ : شكو ؟!
أيهم : شمسوية ؟
منو ذولة ليش جاي يلاحكونج ؟؟
شسويتي الهم حتى ما يعوفوج بحالج!؟
مُلاذ : دكتور شكراً على مساعدتك
عدا هيج ما يخصك اي شي
أيهم : يخصني
خزرته ما فاهمه كلامه
و هو ما اتراجع بقى ساكت و يدحگلي
مُلاذ : ما يخصك ! ما اعرفك انا
أيهم : انتِ مريضتي و مسؤوليتج عليه !
مُلاذ : و هاي شدخلها بـ هاي ؟!
أيهم : الها دخل كلش جبير
سكتت و عيوني تخوزر بي
درت وجهي اريد اطلع صاح وراي
أيهم : برطمت ام براطم
انداريت عليه موسعه عيوني !!
وصلت حدها وياه كلش ، ماخذ راحته؟
رحت عليه معصبة ، مكان الخياط يوجعني
مُلاذ : انت ماخذ راحتك كلش؟؟
اعرفك تعرفني و تحجي عني هيج!
سد الباب يلي وراي
خلا ايده عليها و هو كدامي
دنك الي ، انسفطت بالباب
أيهم : جذبت؟
مُلاذ : دكتور!
أيهم : مريضتي ؟
مُلاذ : انت نازع المستحى فرد نوب ؟!
أيهم : من تلبسينه البسه وياج
مُلاذ : ما تضحك اولاً
ثانياً شوكت قللت ادب مثلك ؟
أيهم : قصدج شوكت ما قللتي ادب
اول ما حاجيتج زركتيني بـ "انجب"
كل ما احاجيج يطلعلي جعفر من داخلج
خو لسانج مترتين ينلفن لف على الواحد
شبعتيني عض و خراميش و ضرب
گلبتيني مخبل و خاطف و دكتور مسيء لـ مهنته ها بعد اعد ؟
مُلاذ : اولاً جنت مبنجة و ما ادري بـ روحي
و امي معتذرة منك عن كلمتي
ثانياً جعفر مو بداخلي انا جعفر بـ نفسة
ثالثاً غلطان لساني ٣ مترات مو مترين
رابعاً العض و الخراميش ردة فعل لا اكثر
خامساً انت ما فهمتني و انجبرت اگلبك مخبل سادساً اريد امي لا تعد بعد
مركز وياي و يستمع الي
لمن خلصت ، ضحك و هز راسة بـ قبول
الأيهم : زين نتصاحب ؟
عكدت حواجبي
الأيهم : لا تصيرين نحسه
جاي اطلب الصحاب
مُلاذ : يلا خوش اتصاحبنا
منو يسوي عمليتي انوب
ضحك و گال رافع حواجبة
الأيهم : بس انه اسويها
لان بس انه اعرف الج
قلصت عيوني ادحگله
قربت وجهي من وجهه اريد احجي
كفخني عطر مثل عطر ابوي بالضبط
اول ما صار بـ خشمي نزلت نظري مستغربة
عيوني تدور بالمكان على مصدر العطر
نسيت شجنت رايدة احجي
ركزت بالعطر و الله عطر ابوي !!
عبالك هو واكف كدامي
درت وجهي تركته و طلعت بسرعة
مثل شخص انهزم ، وهمت نفسي
حسيت شخص يمشي وراي
انداريت لگيته أيهم
مُلاذ : شتريد لاحگني؟
أيهم : غير اوديج لـ غرفتج!
وين تعرفين شلون اجيتي ؟
مُلاذ : لا شكراً انا اندل
رفع حاجبه بـ معنى "متأكدة؟"
مُلاذ : اندل
حط ايدية بـ جيبة ميل راسة
گال بـ هدوء و هو يرفع اكتافة : بكيفج
درت وجهي عنه و مشيت
هسه انا وين اتذكر الغرفة صارلي شكد محبوسة و هذا المخبل من طلعني جان كدامي
كلشي ما شفت من وراه
منين دخلنا منين طلعنا ما ادري
حكيت كصتي بـ حيرة
و كملت مشي وكفت ادحك ممرات ثنين
صفنت عليهن منين اروح هسه
مُلاذ : امشي ورا احساسج الما موجود مُلاذ
رحت يمنه و امشي و امشي
و ادور بالغرف اهلي ماكو
و انا امشي شفت ممرضات
من عابت كون ، يدحگلي بـ طرف عينهم
مشيت شوي بعد لكيت ممرضة ثانية
رحت عليها
مُلاذ : ي بنيه ي بنية
الممرضة : نعم
مُلاذ : وين نور؟ تعرفين نور؟ بنية اجت وياي
هيج گصيرة و لابسة شال و عباية سود
و دمعتها بـ عينها و تفتر
اسولفلها و اوصف شكل نور
و احرك ايديه ، اراويها طول نور
ارجع ايدي على عيني
و انزل بـ طرف اصبعي لـ خدي
بـ معنى "دموع نور"
دحگت الممرضة لـ مكان بعيد
انداريت ادحك وياها ما لكيت شي
ضحكت الممرضة ، دارت وجهها
و مشت ، صفنت عليها هاي شبيها !
صحت وراها متنرفزه
مُلاذ : على كيفج رح يدك خشمج بالسكف
هو سؤال منو ما يعرف نور يعني ؟!
ما اندارت و لا عبالك ، كملت مشي
مُلاذ : امداج اي والله و امداي همين
رجعت ادور و افتر كفشتي شكبرها
جني مخبلة اروح منا و اجي منا
الوادم تدحگلي مستغربة مني ، اخزرهم
يعوفوني و يرحون حتى الي يريد يساعدني يبطل ، كمت الطم على وجهي و ازلغ خدودي
مُلاذ : ضيعني الحيوان ضيعني
اجا صوته من وراي
أيهم : لا تخافين هسه الحيوان شخصياً يدليج
التفتت عليه خازرته
رحت عليه معصبة ، من وراه ضيعت اهلي!
مُلاذ : ضيعت اهلي من وراك
و هسه خياطاتي يمكن انفتحت
و رجلية راح تموتني من الوجع
اذا طحت هنا فـ بسببك لان ضيعتنييي
أيهم : اذا انفتحت خياطاتج اخيطهم من جديد
و اذا طحتي اسندج ، و اذا ضعتي ادليج
اصيرلج دكتور و سند و بوصلة
مُلاذ : بعد ما تصير سيارة؟
أيهم : مُمكن
رفعت عيوني ادحك بـ عيونه
گلت بـ نفاذ صبر ، كازه على اسناني
مُلاذ : رجعني لـ اهلي
أيهم : تعالي
مشى كدامي اندار عليه
حركلي راسة بـ معنى "يلا"
مشيت وراه بـ هدوء ونوب حافية
و كاع المستشفى عبالك ماسحيها بـ دهن
ظليت امسح رجل بـ رجل لعبت نفسي
مُلاذ : هاي العباية منين جبتها؟
أيهم : مال ممرضة ويانا
مُلاذ : عيع شبيك دجيب جديدة
بالله طلعت الممرضة الي وياكم
لا سامح الله مريضة و عدتني
شلون بيه شلون ؟؟
أيهم : شلون بيج شلون ؟
گالها بطريقة لطيفة و هو يدحگلي وضحك
سرت ابتسامة على شفتي فوراً تداركت الوضع
رجعت غندبت ملامحي
مُلاذ : اي يعني تجيب الي عباية ممرضة؟
أيهم : تعذريني جان لازم اكول لليراقبج
انتظر خل اشتريلها عبايه جديدة و اجيك
اخيك مو هسه تكتلها خل الحك عليها لا تفطس
طبكت شفتي ، فلتت ضحكه مني
ضحك وياي انداريت دحگتله ، خزرته
بسرعة سكت ، ردلي الخزره
مُلاذ : طبعاً انتوا الدكاترة فد قفاصين
أيهم : رحم الله والديج
و اشتعلوا اهلي اذا ساعدتج بعد
مُلاذ : يوووو سبيتني سباية
هو شسويت اجيت طلعتني من الغرفة
سودنتني و فتحت خياطاتي و هسه رح ترجعني
أيهم : اسكتي ام شعر
لسانج اذا انمد شيضمه بعد
و بعدين وين خياطاتج انفتحت
لو مفتوحات جان هسه هنا بحيرة دم
مُلاذ : معليك بـ لسااااني
أيهم : ينرادله جاره
عيبت عليه و درت وجهي
وكف فجأه و اندار عليه
اشرلي على الكراسي
أيهم : شو تعالي هناك
مُلاذ : ليش؟
أيهم : تعالي
مشى ، مشيت وراه كعدت على الكراسي
اتقدم فتح العباية لزمتها
مُلاذ : خيييير ؟
أيهم : بس خل اشوف
خاف انفتحن صدك
مُلاذ : مااا ما وخر عني
أيهم : ولج يابه بس اشوف مكان الخياط
مُلاذ : لااا !
أيهم : لا تتعبيني بس اشوفهن
هزيت راسي بـ رفض ما قابلة
زفر نفس بـ فحيح غضب و گام
دور بـ عيونه شاف ممرضة ، صاح عليها
أيهم : الممرضة أسيل
التفتت اله و دحگتله
بانت تعابير الفرح على وجهها
اجت ناحيتنا بسرعة
أسيل : اتفضل دكتور؟
أيهم : بس شوفيلي خياطاتها خاف انفتحن
دحگتلي و دحگتله بـ استغراب
كمل كلامة قبل لا تحجي
أيهم : ما تخليني اشوفها
لان ابوي الي سوا عمليتها !
أسيل : تمام دكتور لا تعصب هسه اشوفها
اجت ناحيتي گالت بـ هدوء
أسيل : اكدر اشوفهن؟
هزيت راسي بـ قبول ، اكو غرفة بـ صفنا
دخلتني بيها و دخل أيهم ويانا
أشرت بـ ايدها على السدية بـ معنى " اكعدي" كعدت ، حسيت رجلية اتگرمن من التعب
اجت ناحيتي و أيهم واكف
منتظر تشوف الخياطات
مُلاذ : دور وجهك
دار وجهه ساكت
اجت الممرضة نزعتني العباية
رفعت تشيرتي تشوف الخياط
ادحك للـ أيهم يرفع راسه و ينزله
و يهز رجله و متخصر و منطيني ظهره
أيهم : ها أسيل؟؟
أسيل : لا ما بيهم شي
اندار بسرعة و بطني بعدها ما متغطية
جريت العباية على السريع غطيتها
مُلاذ : شبييك؟! اصبر
استغفر بـ همس و وكف يفرك عيونه
نزلت التشيرت على بطني و ضميتها
دحگتلي الممرضة بـ نظرات قلقة
بعد ما شافت الاثار الي بـ بطني
أسيل : أنتِ زينه ؟
نزلت عيوني و انا اتذكر اسبابهم
بلعت ريكي ، رفعت عيني لـ أيهم
يلي منزل ايده عن عيونه
محاوط بيها خشمة و حلگه و واكف يدحكلنا
مترقب جوابي ، نظراته ينقري بيها شعور
ما عرفت اوصفة ، انداريت على الممرضة
همست بعد ما بلعت ريگي
مُلاذ : زينه
هزت راسها بـ قبول
رغم تعابيرها توضح عدم اقتناعها
ابتسمت بـ لطافة
أسيل : عندج العافية
مُلاذ : الله يعافيج
ردت اكوم اشرلي أيهم اكعد بـ مكاني
أيهم : اكعدي ، اكعدي
مُلاذ : ليش ؟
أيهم : أسيل تعالي شوي
راحت يمه الممرضة
وكف يحاجيها و انا صافنة عليهم
هي تهز راسها بـ معنى "اي"
غطاها اصلاً البنية بعد ما اشوفها من ورا
اتطلب كم دقيقة و همَ يتهامسون و البنية طلعت
مُلاذ : وين راااحت؟
التفت عليه و اجا ناحيتي
حاط ايدية بـ جيبة
أيهم : تبلغ اهلج نتأخر عليهم
و تسوي بعد شغلة
مُلاذ : شنو ، شنو ليش نتأخر ؟
ابتسم و ركص حواجبة
أيهم : رح اخطفج
مُلاذ : ادري بيك صوجي صدكتك
بس و الله اخنكك بجهاز الاعطاء
أيهم : ادري جهاز اعطاء لو حبل مشنقة
مُلاذ : حبل مشنقة
ابتسم و هز راسة
اتقدم الي اكثر : شلون صارت بطنج؟
مُلاذ : توجعني
أيهم : هسه اخذج ترتاحين
و اضربج ابرة تهدء الالم
مُلاذ : شصار على يلي جان يراقبني؟
أيهم : اخذوا الشرطة
مُلاذ : زين شصار بالضبط ما گلتلي
أيهم : لا تشغلين بالج بهاي السوالف
هسه المهم أنتِ زينه
مُلاذ : اريد اعرف
أيهم : بعدين اسولفلج
تدوخين هسه اصلاً وجهج احمر
وضعج كلش تعب لازم ترتاحين ، تمددي
على ما تجي اسيل و نروح
مُلاذ : انت ليش ساعدتني ؟
أيهم : واجبي هذا
هزيت راسي ساكته
أيهم : اتمددي يلا
مُلاذ : لا تكش روحي
أيهم : ليش؟
مُلاذ : ما ادري السدية احسها وصخة
أيهم : جا شلون جنتي نايمة هناك
مُلاذ : غيرولي فراش السرير ترا
و اهلي جابوا الي لحافي
و مسحولي السدية كلها بمنظف يلا كدرت انام
أيهم : لا تدققين هلكد ، تتعبين
مُلاذ : ما اعرف ما اتقبل كلشي
أيهم : لا تتقبلين كلشي بس لا تزيدينها هم
هزيت راسي ساكته
أيهم : كومي شوي
مُلاذ : وين ؟
أيهم : كومي
كمت نزلت من السدية و وكفت
نزع اللاب كوت يلي لابسة
فرشه على السدية و لـ جوا فرش العباية
الأيهم : يلا تمددي
دحگتله ما ردت اظل ما قابلة على كل شي
اشوف شلون يحاول يخليني ارتاح
ما ردت افشلة او اعيب التصرف اتجاهه
هزيت راسي بـ قبول و تمددت بـ صعوبة
أيهم : ها مرتاحة ؟
هزيت راسي بـ قبول : شكراً
أيهم : العفو
اخذ كرسي ، حطه يمي و كعد
جتف ايدية ، تجى ظهره على الكرسي
ظل ساكت و يدحگلي ادحگله بـ نظرة خاطفة
ارجع ادور وجهي ، احس بي يدحك لكل ملامحي
ما تحملت اتوتر من احد يدحگلي
مُلاذ : وترتني
دار وجهه مشتت نظراته
أيهم : بالغلط ، اعذريني
كام من يمي ، طلع من جيبه باكيت جكاير
فتح الشباك وكف بـ الشباك ، دار الي وجهه
الجكاره معلكه بـ حلگه
أيهم : خو ما باردة؟
هزيت راسي بـ رفض
مُلاذ : لا مو باردة
ما استمع لـ كلامي
خلا الشباك على النص ، وكف كدام الفتحه
بحيث صار سد للـ هوا و ما يوصلني
ورث جكارته و هو واكف بالشباك
الغرفة هدووووء ، قاطع هذا الهدوء
صوت رنين تلفونه ، فتح الاتصال فوراً
حطه على اذنه ، اسمع مقتطفات من كلامة
أيهم : هلا ، اي ، عندي شغل ، ما اكدر
بالله العظيم اذا رجعت يصير الحجي
مو خوش حجي ، خل ارجع و يصير خير
شمر كطف الجكاره ، سد الشباك
طلع جكاره ثانية ، التلفون على اذنه
عگد حواجبه معصب ، ورث جكارته
طلع من الغرفة ، و هو يحجي بالتلفون
سد الباب
ظليت كاعدة وحدي
بالله هاي أسيل وين راحت
نوب هسه اهلي اكيد قلقانين عليه
زفَرت نَفس بـ تعب ، مرت دقايق طويلة
بـ هذي الغرفة وحدي و الهدوء محاوطني
انفتح الباب عكدت حواجبي ، دحگت لـ أيهم
دخل وجهه مگلوب گلاب مو مثل قبل كم دقيقة
لحد ما نزلت نظري لـ جف ايده ينزف !
فزيت بسرعه من مكاني ، كعدت على حيلي
لزمت بطني متوجعة بس تغاضيت
مُلاذ : شبيها ايدددك؟
أيهم : ما بيها اتمددي
اريد احجي عافني ، راح جاب شاش
و مادري شنو بعد وي الشاش
اجا كعد على الكرسي يلي يمي
يعالج ايده ، ادحك لـ وجهه ابد ما متوجع
حتى نتفة تعابير عن الوجع ماكو
لفها و هو ساكت
مُلاذ : شبيها ايدك ؟
أيهم : ما بيها
مُلاذ : خل اشوفها
أيهم : لا عوفيها ، تمددي ارتاحي
نزل راسه حط ايده على كصته
يهز رجلة بـ استمرار ، ظليت ساكته
ما اعرف شنو اتصرف بـ هيج مواقف
انفتح الباب دخلت أسيل ، رفع عينه أيهم دحگلها كام الها اخذ علاليك من ايدها
أيهم : عشتي
أسيل : اعتذر دكتور اتأخرت
أيهم : ما صار شي ، حاجيتي اهلها؟
هزت راسها بـ قبول
أيهم : شگالو؟
أسيل : كلتلهم دنسويلها فحوصات
و هم گالوا تمام منتظريها
أيهم : عفيه
ابتسمت الممرضة
أسيل : دكتور تحتاج شي بعد ؟
أيهم : اي تعالي
طلع الها كاسة سفري ما اعرف شنو بيها
انطاها الها و انطاها خاشوكة بلاستك و لفة
و صمونه ، رفضت أسيل تاخذهم بس أيهم اصر عليها كلش ، اخذتهم و هي خجلانه منه
تشكرته و راحت و الابتسامة على وجهها
اندار الي
أيهم : هسه نجي الج ست فوصة
العفو ست مُلاذ
مُلاذ : شبيييك شبييك بالغلط حجيتها
يعني انا متبنجة احسب كلامي؟؟
أيهم : هههههه يلا هاهيه ما احجي
لا تضوجين ست فوصة
خزرته و هو ضحك
سحب الكرسي الكدامي
أيهم : فنج شجبت الج ؟
مُلاذ : مخدرات ؟
أيهم : تؤ شني دكتور لو نعل ؟
مُلاذ : هههههه ، كلور ؟
أيهم : اي اغسلج بي
مُلاذ : حلويات ؟
أيهم : ماكو داعي أنتِ موجوده
مُلاذ : اهووو بطل هالدروب
ضحك و طلع من العلاكه علبه
مُلاذ : شنهاي جبتلي الماس ؟
حط العلبة بـ حضنه
و دحگلي بـ نظرات فطستني ضحك
ضحك على ضحكتي و فتح العلبه
دحگت حذاء بالعلبه
مُلاذ : يااااا
قلد بـ نفس نبرتي
أيهم : اييييي
مُلاذ : شسوي بيها هاي ؟
أيهم : تاكليها
مُلاذ : طوختها انت ترا !
أيهم : شتسوين بيها يعني غير تلبسيها
مُلاذ : ما اكدر اقبل شي منك
أيهم : اش
مُلاذ : لا تگلي اش
أيهم : اسكتي ما اسمع كلمة
مُلاذ : ما اريد
أيهم : بعدين رجعيها عود
رفضت البسها و ما ردت اخذها
بس اصراره يكتل الواحد كتل
دنك و انا احجي لبسنياها ، ظليت صافنه
و كعد يشد القيطان
مُلاذ : دكتور شبيك ما اريد
لا تلبسني وخر ياا؟!!
أيهم : بعدين انزعيها لا ترديني
مو اشتريتها علمودج ؟
مُلاذ : اهوووو دكتور
هسه شبيك هيج حباب
أيهم : ههههههه
كام كعد على الكرسي مره ثانية
جر طاولة متحركة ينحط عليها الاكل
دور على معقم و رشة عليها و مسحها بالكلنس
حط عليها علاكه و كاسة شوربه و خاشوكة
و يمها صمون حجري
أيهم : جبتلج هم لفة ثانية مال كص
بس اول اكلي شوربة ، صارلج هواي مماكله عدل و معدتج ما تتحمل اكل دسم گبَل
مُلاذ : دكتور ؟؟! ما اريد
أيهم : مُلاذ ، رجاءاً !
مُلاذ : ما جاي ارتاح هيج ترا ...
قاطعني قبل لا اكمل
أيهم : لا تفكرين هذا الشي بس وياج
انه وي كل مرضاي هيج و اسئلي عني
و رح يجاوبوج ماكو داعي ما ترتاحين
جسمج جاي يرجف و أنتِ اساساً ما ماكله
ما تريدين ترجعين لـ صحتج أنتِ ؟!
هسه اذا نطلع منا تطيحين و الله
يلا اكلي
اكلني و شربني بالحجي
اريد احجي ما يخليني و يقاطع
و نوب انا جوعانه صدك
حطيت الخاشوكة و كعدت اكل
بس ايدي ما اسيطر عليها ترجف
احس بـ أيهم كل شوي يريد يسوي شي
و متردد ما يكدر يحجي ، لمن اكلت لگمه بعد
زفر نفس عالي ، مال راسه
گال بـ عيون تتمنى القبول
أيهم : خليني اوكلج؟
دحگتله و دحگت لـ ايدي
نزلت الخاشوكه خجلانه
مُلاذ : دكتور ما احب احد يشفق عليه
أيهم : ما شفقان عليج ابد بس...
مُلاذ : بس؟
أيهم : الشوربه حاره اشوفها جاي توكع عليج
و جاي تنصلخين بس ما تحجين ، خليني اوكلج؟
بلعت ريكي ، صدك كم مرة انصلخت
بس بلعتها و سكتت ما حجيت
ما اعرف هو شلون مركز انتبهه من وكعت
ظليت ساكته اتقدم كعد كدامي
أيهم : يلا اوكلج ؟
بلعت ريگي ادحگله
اومأت بـ راسي بـ هدوء
اخذ كاسة الشوربه بسرعة
و اخذ الخاشوكة و يشربني الشوربة
ايده تحت حلكي و هو يوكلني
حتى اذا طاحت الشوربة
تطيح على ايده و ينصلخ
أيهم : عفيه بالحبابه
ابتسمت على نبرته ما تحملت وضحكت
ضحك وياي و هو مستمر يوكلني
أيهم : اش يلا لا تغصين
اومأت بـ القبول ، قدم الخاشوكه
وكلني ، عاف الخاشوكه اخذ صمون
و يغمسه بالشوربه و يوكلني
أيهم : خلي مجال لـ لفة الكص
حجيت و اللكمة بـ حلكي
گوه احجي : لا دكتور لا
حطيت ايدي على حلكي
كملت اللكمه ، بلعتها و كملت كلامي
مُلاذ : دكتور كافي بس شوربه
و ترجعني لـ اهلي
أيهم : لفة الكص هم تاكليها
مُلاذ : لا
أيهم : اكليها
مُلاذ : لااا دكتور لا تخليني اطلع جعفر
أيهم : هذا كله و ما مطلعه جعفر
مُلاذ : جعفر مو ياهو الجان
جعفر اذا ظهر جان هسه انا ما اكل
أيهم : لا دخيلج خلي مضموم
بطلنا عمي ، عوفي لفة الكص
ابتسمت فتح بطل اللبن صغير و شربني
و رجع يغمس صمون و يوكلني
لحد ما انتخمت
مُلاذ : دكتور عليك الله كافي و الله رح اطك
هاي الشوربه انمسحت مسح
أيهم : بس هاي اللكمة بعد
مُلاذ : بداعة امك كافي شـ ....
بعدني داحجي و حطها بـ حلگي
مُلاذ : يباوو ولك كافي شبعت
ضحك و كام نكث ايديه
شال الكاسة و بطل اللبن و كلشي
شمره بالعلاكه و شدها
طلع من علاكه ثانية كلنس رطب
انطاني كلنسه مسحت حلكي بيها
ابتسم و گال بـ صوت لطيف : عَفيــه
هزيت ايدي ، درت وجهي و ضحكت
فتح الشباك حتى تتهوى الغرفة
رجع الغراض لـ مكانهن اجاني گال بحماس
أيهم : يلا نروح لـ مامااا
مُلاذ : دكتور و الله مو صوجك
الا اطلعلك جعفر من داخلي
أيهم : دطلعي رح يموت اذا بقى بـ داخلج
راح اخذ العباية و اللاب كوت
مُلاذ : ما اريد العباية
عض اصبعه گال ممثل العصبية : اااخ اخ
اخذ اللابكوت و العباية
حطهن على ساعد ايدة
مُلاذ : يلا دكتور رجعني لـ اهلي
كافي هواي تعبت اليوم
أيهم : امشينا بوية امشينا
طلعنا من الغرفة دحك بـ عيونه و گال
أيهم : انتظري
راح دقايق و رجع الي
مُلاذ : شنو هاي؟
ماخذ كرسي متحرك و جاي الي
أيهم : يلا اكعدي حتى نوصل اسرع
مُلاذ : و الله ما اكول لا
ابتسم ، كعدت مشى بيه يدفعني
رفعت راسي دحگتله ، نزل راسه دحگلي
و هو يمشيني بالكرسي المتحرك
مُلاذ : دكتور عود انتوا ليش قفاصين ؟
أيهم : بويه شبيج كارضه ملحتنا
هاي ياهو گلج احنا قفاصين ؟
مُلاذ : دكتور يعني هسه انا علاج ابو الخمسمية يفيدني ، انتوا تكتبون طن علاجات و ما نصير زينين
أيهم : وين اكو علاج بخمسمية اولاً
ثانياً مجربة علاج من العلاجات الي كتبناهم
و ما فاد وياج؟
مُلاذ : دكتور ما جربت بس يعني و الله هواي
نوب اكلك دكتور ؟
زفَر نفس ، ضحك و گال
-كولي
مُلاذ : انتوا ليش خطكم يلعب النفس؟
يعني 12 سنه تدرسون ، كمل عليها دراسة الكُلية كل هذا انتوا تكتبون و متعلمين ع الانكليزي
ليش عود خطكم ما ينفهم و يلعب النفس
و يسبب دوخة و احنا نقراه ؟
أيهم : يا يمه يا حبيبه هذا كله بـ خطنا؟
مُلاذ : و الله دكتور تحس الورقة
مكتوب بيها مادة مخدرات مو علاج
الخط شاطح و الواو شاده حيلها صايره نون
و الزاي نقطتها شاطحه شمالكم دكتور
اكو واحد يركض وراكم؟
أيهم : طركاعة مو لسان فصلتينا تفصل
بس باعي يعني هسه انه من اكتب
اكون مستعجل لان عندي مرضى
و لازم اشوفهم و استعجل بـ شغلي
ف اكتب بسرعة مرات هذا خط الشخص
هو هيج يكتب يعني متعود ع السرعة
مُلاذ : زين ابو الصيدلية شلون يفتهمكم؟
أيهم : يتعودون بعدين على خطنا
و يفتهمون الدوا الي يحتاجة المريض
من يشوف الحالة شنو
مُلاذ : ها زين ، دكتور
أيهم : ها ها
مُلاذ : شبيك دكتور ما تتحمل
أيهم : عمي انه المسكين حاجي
مُلاذ : اسمع دكتور
أيهم : يلا جاي اسمع
مُلاذ : يعني هسه انتوا
تطبقون النصايح الي تنطوها لـ مرضاكم؟
أيهم : بالنسبة الي بعضهم اطبقهم
بعضهم لا
مُلاذ : يعني مثل شنو ما تطبق ؟
أيهم : يعني مثلاً ما انصح بالتدخين
و امنع المرضى و الناس من التدخين
و ابين الهم اضراره ، بس انه ادخن
مُلاذ : يعني يعلم ع الصلاة و ما يصلي
أيهم : ههههههه ، بالضبط
وصلنا لـ غرفة غير غرفتي القديمك
لكيت الجماهير متجمعة
بس انفتح الباب كلهم دحگولي
حكيت حاجبي و سندت كصتي على ايدي
مُلاذ : سلام عليكم
- و عليكم
يجاوبون و يدحگولي بـ طرف عينهم
و نوب يرجعون يدحگون للدكتور
اجت امي عليه بـ كرسيها
فيروز : ليش كاعدة على كرسي؟؟
مُلاذ : تعبت شوي و الدكتور جابلي كرسي
ابتسم بـ طرف شفته يدحگلي
و هو وراي صارت اصابعه
على خصلات شعري ، بسرعه وخرهن و اتحمحم
أيهم : التحاليل باجر تطلع
هزيت راسي بـ ايجاب
اسكندر : و هاي الفحوصات
صارلها فوك الساعتين ؟؟
أيهم : اي ، اكو مشكله ؟
اسكندر : ابد ماكووو طراطير احنا هنا!
من الصبح لحد هسه ندور على الخانم
تالي طلعت تسوي فحوصات شلون سالفه
المطي ما يقتنع بيها
اتقدم أيهم من وراي
بـ خطوات رزنه على اسكندر
أيهم : انت شنو مقصدك من كل هذا؟؟
كام اسكندر من مكانه
راح على أيهم گال بـ عصبيه
اسكندر : تعرف مقصدي كلش زيييين
أيهم : لا بالله؟ لازم ناخذ اذن منك؟!
احتدوا كلش بيناتهم
و حتى ضرغام كان كاعد
كام صار بيناتهم : اهدوا شباب
كامو سلطان و صفاء همين يفرقونهم
و هم واحد يخزر الثاني
أيهم عيونه تريد تطلع من محجرها
كمت بـ صعوبة ايدي على بطني
امي لزمت ايدي هزيت راسي
بـ معنى "مابيه شي" اتعديتها و مشيت
نور همين كامت اجت ناحيتي هي و عمه منارس
مُلاذ : مابيه شي
رحت عليهم دخلت بيناتهم
وجهي لـ اسكندر : شبيك انت ؟
اسكندر : مُلاذ باحلامج ترا
بس باحلامج تخلصين مني زين ؟
مُلاذ : ليش تحب تحرج روحك؟
و تخليني افشلك كدام الناس
الف مره كلتلك و ارجع اكولها
انا اشرف منك انت ما توصل لـ شعرايه مني
عكد حواجبة اسكندر
الدم صعد بوجهه رغم هالشي
ابداً ما اهتميت ، عت زندي حيل
كلهم كاموا يصيحون على اسكندر
بيبي : اسكندررر عوف البت ، ماكدر اكوومن
تعالي منارس لزميني ماكدر احرك جدمي ...
نور :-
صارت عيطة و هوسه
و أيهم يدفع بـ اسكندر عن مُلاذ
اتخبل يريد يهجم على اسكندر
كلنا مستغربين ردة فعلة هاي؟!
بس اتجاهلنها بسبب المشكلة يلي دتصير
مُلاذ : انت شنووو و تمد ايدك عليه؟؟؟
لا تجي و تستشرف بـ راسي
ما سويت شي غلط و لا اسوي الكل يعرفوني هنااا و يعرفونك انت شنو !
كز على سنونه الدكتور گال بـ حدة
أيهم : مُلاذ وخري من النص
جره سلطان و اندارت مُلاذ لـ الدكتور
مُلاذ : شكراً دكتور باجر اخذ الفحوصات
ظل يدحگلها معصب
و مشخص عيونه على اسكندر
مُلاذ : دكتور رجاءاً
نزل عيونه الها تدريجياً نظراته الشاخصة
الي توحي العصبية ، بدت تذبل
تتحول الى نظرات مليانه كلام
بلع ريكه و هو يدحك بـ عيون مُلاذ
اسكندر يصيح ، ضرغام يصيح بـ اسكندر
بيبي ما قابلة على اسكندر مكان جوه مليء بالمشاحنات الصارت
بس همَ كانوا بـ عالم وحدهم
نهاية حرب النظرات دار وجهه أيهم
طلع بسرعة و هو يمسح بـ كصته
اتبعه سلطان ، راح وراهم صفاء
ظلت مُلاذ تدحك وراهم لـ ثواني
بدأ يختل توازتها تدريجياً لزمت بـ راسها
بـ لحظة وكعت من طولها على الكاع فاقدة
دحگت لـ مكانها عليه قطرات من الدم ! ...
يتبع ...
- يتبع الفصل التالي اضغط على ( رواية جرح الأيهم ) اسم الرواية