رواية يكفيني منك عقابا الفصل السابع عشر 17 - بقلم بقلم عبير سليم

 رواية يكفيني منك عقابا الفصل السابع عشر 17 - بقلم بقلم عبير سليم 

قبل معادها بيوم بحاله اهو يا شباب ، ياللا مين متابع و عاوز يشوف عطر و بحيى هيحصل معاهم ايه

الحلقه السابعة عشر من رواية

يكفيني منك عقابا

بقلمي : عبير سليم

😒😒😒😒😒😒

كم من محب قد فارق حبيبه طوعا أو كرها لا تفرق

تعددت الأسباب و الموت واحد

و كم من عاشق قطع أوصال عشقه

و كم من متألم يتجرع كأس حرمانه

يجري عليها و يأخذها بين احضانه: ياااه أخيرا لجيتك ديه أني جلبت عليكي الدنيا

عطر : جلجت علية

يحي : ياااه يا عطر ديه أني كنت حموت من الجلج عليكي كنت خايف جوي تكوني رحتي مني و محشوفكيش تاني

عطر : ماني كان لزمن اعمل أكده عشان أعرف غلاوتي عندك و اعرف إذا كنت بتحبني و اللا لاء

يحي : إذا كانت عالغلاوة فأنتي مش غاليه بس ديه إنتي أغلى حاجه عندي في الدنيا كلها 

و إذا كان عالحب فالحب ديه كلمه جليله جوي عاللي حاسس بيه أنا بحبك بحبك جوي جوي يا عطر

عطر : ياااه كان نفسي جوي تجولهالي و اسمعها منيك من زمان 

يحي : و ادينى بجولهالك أهوه و محبطلش اجولها واصل

عطر : حتمشي تاني و تسيبني يا يحي

يحي : لا محمشيش خلاص اني حجعد جارك اهنيه اني معدتش عاوز حاجه من الدنيا كلها غيرك انتي و بس يا حبيبتي

عطر و هي بتبعد عنه : بس اني اللي حمشي يا يحي اني اللي حمشي و محتشوفنيش تاني واصل لأنك متستاهلش حبي ليك 

يحي : لاء يا عطر متسيبينيش اني بحبك يا عطر يا عطر

عطررررررررر يقولها بصوت عال و هو يقوم من على الفراش و يتصبب عرقا و يدرك أنه كان يحلم 

 

يمسك بصورتها و يحدثها : اسبوع يا عطر فات و انا معرفش انتي فين خدتي ابني و رحتي فين يا عطر ياااه لو تعرفي وجع قلبي عليكي كنتي حتجيلي جري حتى لو كنتي فاخر البلاد

ينتبه على صوت هاتفه يعلن عن اتصال : أيوة يا عز

عز : عامل إيه يا يحي طمني عليك 

يحي : الحمد لله يا عز

عز : مفيش أخبار جديده

يحي : لا يا عز مفيش

عز : طب إيه يا يحي مش كفايه كده بقى

يحي : مانت عارف اللي انا فيه يا عز

عز : يحي أنا و الله مقدر حالتك النفسيه و عاذرك  لكن ده شغل و فلوس ناس و انت عارف اليوم تمنه كام 

يحي : أعمل إيه بس ما هو مش بأيدي 

عز : ترجع شغلك و تشوف حالك يحي انت كده بتخسر كل حاجه تعبت عشان توصللها

قعدتك عندك مش حتقدم و لا حتاخر انتوا عملتم اللي عليكم و زياده قلبتوا عليها الدنيا و نشرتوا صورتها في كل مكان و اعلنتوا عن مبلغ كبير لأي حد يساعدكم تلاقوها  حتعملوا إيه تاني أكتر من كده

يحي : مش عارف يا عز دي زي ما تكون الأرض انشقت و بلعتها

احنا مخليناش شبر و مدورناش فيه

عز : تبقى واضحه يا يحي مش محتاجه تفكير هي سابت البلد كلها و مشيت

يحي : انا السبب في كل اللي حصل ده لو

عز : يحي متقلش لو لأنها مش حتفيد بحاجه انت تنتبه لمستقبلك و بس لأنك دلوقتى انت بتضيع كل حاجه مش كفايه مراتك حتسيب شغلك هو كمان يضيع

انت لسه بتبدتي تطلع على اول السلم و يا اما تكمل طريقك اللي انت رسمته بايديك يا اما حتقف مكانك يا يحي بس وقتها حتكون خسرت من قبل ما تبتدي و في كتير اوي حيفرحوا فيك و يسرقوا منك نجوميتك اللي فاتحالك دراعاتها يا للا يا يحي تعالى اشتغل و ان شاء تلاقيها مفيش حد بيهرب العمر كله و مسيرها ترجع و تتقابلوا تاني

يحي : تفتكر يا عز

عز : افتكر أوي ياما ناس بعدوا عن بعض سنين و رجعوا تاني

و زي الشاعر ما بيقول :

قد يجمع الله الشتيتين بعدما

 يظنان كل الظن ألا تلاقيا

😒😒😒😒😒😒

حمد الله على السلامة يا عامر اسكندريه كلها نورت

عامر : منورة بيكم يا مصعب طمني عليكم عاملين إيه

مصعب : احنا الحمد لله بخير و الله و زي الفل طمني عليكم انتم عاملين إيه و مفيش أخبار تاني عن عطر

عامر : لا و الله يا مصعب مفيش أي أخبار بس الحمد لله إنها كلمت عتاب و اطمنا عليها إنها عايشه و بخير احنا كان كل خوفنا إنهم يكونوا عملوا فيها حاجه و بيدعوا إنها هربت لكن اتصالها بعتاب طمنا عليها الحمد لله

مصعب : يعني عتاب هديت الحمد لله طب كنت جيبتها معاك غيرت جو

عامر : لا طبعا عتاب مهديتش و لا حاجه دي حالتها ما يعلم بيها الا ربنا مبتبطلش عياط لا ليل و لا نهار و الله اني خايف عليها جوي يحصل لها حاجه

و اني اتحايلت عليها و الله تاجي معايا لكن هيا مارضيتش

 

مصعب : لا حول ولا قوة الا بالله طيب اني عايز أفهم هو مش انتم ممكن تعرفوا هي اتصلت منين

عامر : ديه لو كانت اتصلت من رقم لكن هي كلمتها عالنت و بعدها جفلت الحساب

 

مصعب : و عتاب معرفتش تستفسر منيها عن اي حاجه موجوده فين عايشه ازاي اي حاجه تدلكم على مكانها

عامر : لا يا مصعب هي مديتش فرصه لعتاب طمنتها انها بخير و حلفتها تخللي بالها من نفسها و بس ديه حتى عتاب حاولت تفهمها إننا الحمد لله بجينا كويسين جوي و إن وجودها محيعملش حاجه لكن هي بردك اللي فدماغها في دماغها

مصعب : عارف يا عامر مشيان عطر ديه و زي ما جلبي حاسس انه لا ليه علاقه باللي سمعته من العجربه اللي اسمها صفيه ديه و لا بإنها خايفه عليكم انتوا و عتاب تبوظ حياتكم

هي مجهورة من الزفت اللي اتجوزته كانت حطه أملها كله عليه وهو سابها و مشي و كيف ما فهمت منيكم و من الكلام اللي جالته البت اللي شغاله عندهم إن يحي ديه مكنش بيعبرها و لا بيتصل بيها حتى لما استنجدت بيه مجلهاش انتي فين هي هربانه من جهرتها و من جلة حيلتها هربانه من نفسها و من الدنيا كلها بس اللي اني متاكد منه انها ان شاء الله  حترجع عطر حترجع يا عامر

عامر :" يا رب يا مصعب يا خوي يا رب ترجع

مصعب : لساك بتحبها يا عامر

مصعب : اني دلوك مبحبش غير عتاب و بس

مصعب : يا سبحان الله فعلا الجلوب  ديه مش بيدنا

عامر : حبتها من غير ما احس لجيت معاها كل اللي كنت بتمناه جدرت تدخل جوة و تجعد و تربع عارف يا مصعب و هي معايا بحس اني طاير في السما و معاوزش حاجه تانيه واصل 

مصعب : ياااه يا عامر ماتعرفش كلامك ديه فرحني ازاي ربنا يخليكم لبعض و يديم بينكم المحبه

عامر : يا رب يا مصعب

مصعب : عامر امي عامله إيه اتوحشتها جوي

عامر : بخير يا مصعب

عامر : مجالتلكش سلملي على مصعب

عامر :..........

مصعب : فهمت خلاص

عامر : متزعلش منيها يا اخوي

مصعب : أني بردك أزعل من امك يا عامر ديه الود ودي اجعد تحت رجليها بس ترضى عني

عامر : بكرة تنسى و يوم ما تدخل عليها بولدك أكيد حتنسى كل حاجه اتجدعنوا انتوا بس

مصعب : و الله يا اخوي انى جايم بالواجب اللي علية و زياده هي بجى تتشطر

عامر : ربنا يحظك يا اخوي و يفرح جلبك

مصعب : طمني على حسني عامل ايه و الله اتوحشته جوي

عامر : طب و الله باعتلك السلام انت و نورة و بيدعيلكم ربنا يهنيكم

مصعب : ابن حلال جوي ربنا يرزجه ببت الحلال اللي تريح جلبه

عامر لو على بت الحلال موجوده و بتحبه و رايداه بس هو ربنا يهديه

مصعب : مين ديه

عامر : سكرة

مصعب : طب يا ريت و الله ديه كفايه دمها اللي زي الشربات و عامله كيف البطه 

نورة و هي تأتي على كلمته هي مين ديه اللي عامله كيف البطه يا حبيبي

مصعب : ايه لاء ديه اني بجول لعامر انك عاملالنا حتة بطه انما ايه حياكل صوابعه وراها

نورة : يا لهوي و اني فديك الساعه لما سي عامر ياكل عندنا و فبيتنا دي اسكندريه كلها نورت بس الصراحه نسمه اللي عملت الاكل اني كنت بساعدها بس

عامر : تسلم ايدكم و يفرحنا بسمه ان شاء الله عن جريب

طمنيني عامله ايه مع الأخ ديه اوعى يكون مزعلك فحاجه جوليلي و اني اشدهولك من ودانه

.

نورة : يا لهوي مصعب ديه نور عيوني و كل دنيتي ديه اني الود ودي اعمله خدي مداس و افرشله الأرض ورد ديه حبيب العمر و فرحة الجلب

عامر : هههههه يا عم يا جامد خلاص بكفايه ديه ايه الأشعار ديه كلها

نورة : انت لو عايز تسأل اسأله هو لاكون مجصرة معاه في حاجه و اني مش حسه

مصعب : انتي تجصري ديه انتي بتفهميني من غير افتح بوجي بكلمه ديه اني لو فضلت احب فيكي العمر كله محيكفيش

عامر بصوت عالى : الحجيني بالأكل يا نسمه الجماعه ودول حيرفعولي الضغط

نسمه و هي تحط الاكل : هههههه هما اكده علطول ربنا يهدي سرهم يا رب

تقوم نورة مع نسمه و يجيبوا الأكل  يا للا يا جماعه الاكل جاهز

عامر : ياااه اتوحشت أكلك جوي يا نسمه

نسمه : تسلم و تعيش يا سي عامر

بألف هنا و شفا على جلبك و ربنا يطمنا على عطر يا رب

عامر : ربنت يسمع منك يا رب يا جادر يا كريم 

😒😒😒😒😒😒😒😒

في القاهرة بإحدى الشقق الفاخرة التي تدل على رقي أهلها

تجلس معهم على المائده يتناولون الطعام

_ عطر يا حبيبتي مبتاكليش ليه

عطر : انا باكل يا طنط ربنا يخليكي

مشيرة : لا مبتاكليش يا عطر انا مراقباكي و كده مينفعش يا حبيبتي انتي حامل و لازم تاكلي كويس عشان البيبي صحته تبقى كويسه

ما تتكلمي يا ست هانم و اللا انتي صاحبتها عالفاضي

ندى : يا ربي بقى عاجبك كده يا استاذه اديكي جبتيلي الكلام من ست الحبايب اهوه اتفضلي كلي كل ده 

عطر : يا ربي لا ده كتير اوي

ندى : مفيش حاجه تكتر عليكي يا قلبي

عطر : ربنا يخليكي ليا يا ندى مش عارفه من غيرك كنت حروح فين و لا حيحصللي ايه

ندى : يا حبيبتي ده انتي منورانا

مشيرة : ندى بتحبك اوي يا عطر ده من كتر حبها فيكي احنا حبيناكي من غير ما نشوفك

ده انا لما لقتها داخله علية الصبح و  بتقوللي انها رايحالك عالمحطه تجيبك و الله ما كنت مصدقه اني اخيرا حشوف القمر ده بس الصراحه انتي في الحقيقه أجمل بكتير من الصور

عطر : ربنا يخليكي يا طنط ده من زوق حضرتك

تذهب الخادمه لتفتح الباب للطارق

السلام عليكم ورحمة الله وبركاته

الجميع :و عليكم السلام ورحمة الله وبركاته

يقبل على زوجته و يقبلها من خدها : عامله ايه يا حبيبتي

مشيرة : الحمد لله يا حبيبي

ندى : يا سيدي يا سيدي شايفه يا عطر اهم جوز الكناريا دول علطول كده لما تعبوا أعصاب الواحد

مجدي و هو يحتضن زوجته : شايفه يا مشيرة بنتك بتنوء علينا ازاي

ندى : عيب عليك يا بابتي ده انتوا حبايبي

مجدي : و القمر اللي منورنا عامل ايه

ندى : عطر بابا بيكلمك

عطر : ايه اه الحمد لله والله بخير يا عمي

مجدى : لا ده انتي مش معانا خالص اللي واخد عقلك

يطرق على الباب طرقات كثيرة و يرن على الجرس دون أن يرفع يده

ندى : اكيد ده البارد

مشيرة : عيب كده يا ندى ده اخوكي الكبير

تفتح له الخادمه و يدخل : السلام على أهل الدار

يقبل عليهم و يسلم عليهم بحرارة يحتضنه والده بشده : ألف حمد الله على السلامة يا حبيبي

نديم : الله يسلمك يا بابا وحشتني اوي

مشيرة و هي تقبله : وحشتني اوى يا نديم

نديم : حضرتك اللي وحشتيني أوي يا ماما

تقف له ندى و هي تضرب له التحيه العسكريه : اهلا يا سيادة الرائد 

نديم : تعالي فحضن اخوكي يا بت

تجري ندى فحضنه و يحتضنها بشده

مشيرة : مش هو ده اللي كنتي بتقولي عليه من شويه بارد

ندى : من ورا قلبي يا مامتي و بعدين هو حضرتك عاوزه توقعي بيننا و اللا ايه استحاله ده حبيب القلب

يضربها نديم على رأسها : ماشي يا بكاشه

ينظر لتلك الجالسه و التي لا تشاركهم الحديث

الله هو القمر نزل عندنا و اللا ايه مش تعرفونا يا جماعه

تشعر عطر بالحرج و تنظر أرضا

ندى و هي تحتضنها : اعرفك بصاحبتي و حبيبتي عطر

نديم : مش معقوله انتى عطر دي ندى ملهاش سيرة غير عطر عطر

يمد لها يده : اهلا و سهلا يا عطر القاهرة نورت

عطر : اهلا بحضرتك 

نديم : نديم اسمي نديم و بس

بس انا عاوز افهم بقى هو الصعيد فيه الحاجات الحلوة دي 

ندى : نديم و بعدين معاك عطر بتتكسف

نديم : ماشي يا ستي عالعموم نورتينا يا قمر

عطر : شكرا ربنا يخليك

نديم : لا كده كتير و الله ده لا كلام و لا شكل الصعيد قلبي الصغير لا يتحمل

مجدي : ولد احترم نفسك عطر زيها زي ندى يعني أختك

نديم : يا لهوي و انا أطول يبقى عندي اخت بالجمال ده كله طب ده انا كنت امسكها و امشي عشان اتفشخر بيها

ندى : بقى كده يعني انت قصدك إني أنا وحشه و اللا إيه يا حضرة الظابط 

نديم : ده انتي حبيبة قلبي يا نودي

يجلسون جميعهم و يتحدثون بينما كانت عطر تبعد بتفكيرها عنهم بين الحين و الآخر

مشيرة : مش ناوي تيجي القاهره بقى يا نديم بدل الشحططه ديه يا حبيبي

نديم : و اسيب اسكندريه استحاله طبعا

مجدى : يا نديم مينفعش كده انت اصريت تدخل شرطه و انا مقدرتش امنعك لكن الشركه محتاجالك يا حبيبي

نديم : مش انا لما باجي بروح يا بابا

مجدي : لا مينفعش يا نديم لازم تستقر معانا في القاهرة بقى و تشوف معايا الشركه انا كبرت يا بني و محتاجك جمبي

نديم : طب و الاستاذه دي مش اتخرجت خلاص و المفروض تكون معاك هي كمان

ندى : الله و انا مالي يا لمبي

مشيرة : نديم معاه حق يا ندى انا كل ما بفتح معاكي الموضوع ده بتتهربي مينفعش يا حبيبتي دي فلوسكم

عطر قوليلها حاجه يا حبيبتي عشان صاحبتك ديه حتجنني

عطر : طنط معاها حق يا ندى و بعدين انتي مزهقتيش من قعدة البيت

يبدأ الحوار بينهم يزيد و عطر تشاركهم و كأنها واحده منهم حست  معاهم بالدفء و الاحتواء كانوا بيعاملوها و كأنها واحده منهم بس كل شويه غصب عنها تسرح و تفتكر اي موقف ليها مع يحي مش قادرة تمنع نفسها من التفكير فيه غصب عنها مش بايديها 

بس لقت انها لازم تفتح معاهم الموضوع مينفعش تفضل كده

معلش هو انا ممكن اقول حاجه

مشيرة : قولي يا حبيبتي

عطر : انا لازم امشي من هنا

مجدي : ليه كده يا بنتي هو حد مننا ضايقك

عطر : لا و الله يا عمي بالعكس ده ربنا يعلم انا مرتاحه معاكم ازاي لكن مينفعش و الله حقكم علية لازم يكونلي سكن خاص بية و كمان انا محتاحه أنزل أشتغل

مجدي : انتي محتاجه فلوس يا بنتي

عطر : لا يا عمي مستورة الحمد لله انا معايا مبلغ كويس كانوا اهلي منقطيني بيه و انا عروسه و فلوس عمي كان بيديهالي مصروف و حمايا كمان كان بيديني دايما حوالي خمسين ألف جنيه و كمان أنا عندي فلوس في البنك بس ندى قالتي اني مينفعش أسحب منها عشان محدش، يعرف مكاني ده غير دهبي كمان انا معايا دهب ياما

نديم : انا مش فاهم حاجه هما مين اللي مش عاوزاهم يعرفوا حاجه عن مكانك 

مجدي : انا حفهمك كل حاجه بعدين يا نديم

مشيرة : طب بس يا حبيبتي احنا ما سألنكيش يا عطر و مينفعش تقولي كل حاجه كده ربنا يباركلك فيهم يا حبيبتي و متحتاجيهمش فحاجه وحشه ابدا يا رب

نديم لباباه : واضح انها على نياتها اوي 

مجدي : اصدك تقول انها بنت نقيه مش خبيثه و لا لئيمه

نديم : لاء و قمر كمان يخربيت جمال أمها هو في كده دي أجمل من الممثلات دي عايزة تتحط فتابلوه و الواحد يقعد يتفرج عليها

مجدي : نديم احترم نفسك و اتكلم بأدب دي مش واحده من الاديشك اللي سارح معاهم

نديم : ماشي يا بابا بس بشرط افهم كل حاجه الاول

مجدي : ماشي بعد الغدا حقعد معاك انا و ماما و نفهمك الموضوع كله

عطر : فهمتوني عشان خاطري متزعلوش مني و تقدروا موقفي

مجدي : بصي يا عطر احنا مش، حنغصب عليكي بس احنا مينفعش، نسيبك تمشي من هنا من غير ما نكون مطمنين عليكي انتي امنتي على نفسك معانا و امنتينا عليكي و احنا لازم نكون اد الأمانه دي

القاهره كبيرة لو سيبناكي منعرفش ممكن يحصل معاكي ايه لازم تكوني جمبنا و معانا

عطر : أنا فعلا مش حقدر أبعد عنكم لكن في نفس الوقت بردو مش حينفع أفضل هنا

مشيرة : خلاص انا لقيتها

مجدي : قولي يا حبيبتي

مشيرة : عطر تقعد في شقة نديم لحد ما ربنا يفرجها

عطر : في شقة نديم ازاي لا طبعا مينفعش

ندى : اصل انتي مش فاهمه يا عطر اصل دي شقه هنا في العماره بابا شاريها لنديم عشان لما يتجوز لكن هو الأستاذ مضرب عن الجواز فالشقه مقفوله محدش بيدخلها خالص

نديم : لا جواز ايه مش وقته خالص انا كده مبسوط اوي

مجدي : هي فعلا فكرة حلوة تبقي معانا فنفس العماره و ممكن كمان ندى تبقى تطلع تبات معاكي عشان نكون مطمنين عليكي

ندى : و انا حقدر اسيبها بردو 

عطر : بس بشرط يا عمي

مجدي : اتفضلي يا حبيبتي

عطر : ادفع ايجارها

مجدي : طب انا مش حتكلم ردوا عليها انتم

مشيرة : مينفعش ابدا يا حبيبتي انتي زي ندى عيب اللي بتقوليه ده احنا عارفين انك الحمد لله معاكي بس  انتي لسه وراكي مصاريف كتيرة اوي و احنا مش عارفين بكرة في ايه

خللي فلوسك معاكي دلوقتي 

عطر : بس ده كتير علية اوي يا طنط

مشيرة : مفيش حاجه كتير ولا حاجه الناس لبعضيها يا حبيبتي

عطر : طب انا عاوزة انزل ادور على شغل

مجدي : طب و تدوري ليه ما الشركه عندنا موجوده مش انتي معاكي معهد سنتين

عطر : أيوة معهد فني تجاري محاسبه

مجدي : خلاص كويس اوي تشتغلي معانا في الحسابات

ندى : و انا كمان حروح معاها يا بابا

نديم : يا سلام سرك باتع يا شيخه عطر اهي البرنسيس ندى حتنزل الشركه على الله حد يعبرها بدل ما هي قاعدالنا كده

ندى : يا سلام ده على أساس إني لسه مش رافضه عريس الاسبوع اللي فات

نديم : ده انتي عملتي فيه ثواب دي امه كانت داعيه عليه 

ندى : بقى كده ماشي يا بارد

مشيرة : بس بقى انتوا صدعتوني معلش يا عطر اصلهم متعودين على كده على طول

عطر : ربنا يخليهم لبعض يارب ده أجمل حاجه في الدنيا الأخ انا كان نفسي اوي طول عمري يكون عندي اخ بس الحمد لله ربنا عوضني بعتاب  هي كل حياتي

و تنظر لندى : و ندى حبيبة قلبي ربنا ميحرمنيش منها يا رب

مشيرة : بس بقولك يا عطر بالراحه على نفسك في الشغل يا حبيبتي  عشان الحمل

نديم : حمل

يشعر نديم ان هناك امور كثيرة غائبه عنه و لا بد أن يعلمها جيدا

ندى : يا ربي دي عطر أول ما حتدخل الشركه الكل حيتجنن عليها و على جمالها

عطر : إيه لاء أنا مش عاوزة حد يشوفني و لا يعرفني أصلا 

مشيرة: عطر اطمني يا حبيبتي انتي بعيد و صعب حد يعرف مكانك خليكي عادي و عيشي حياتك

عطر : لا يا طنط عمي و أهلي ليهم شغل في كل مكان هنا في القاهرة و اسكندريه و محافطات تانيه و انا مش عاوزة اي حد يشوفني و حضرتك عارفه ان ممكن تحصل صدفه تخللي حد يشوفني و يعرف مكاني

ندى : طب و دي نحلها ازاي بقى ان شاء الله

حنلبسك طاقية الاخفا يعني و اللا ايه

عطر : لاء انا حلبس نق#اب

نديم : حتتن# قبي يا عطر طب و الله حرام ان الجمال ده كله الناس تتحرم انها تشوفه

مجدي : بالعكس بقى يا نديم ده هيا عشان ما شاء الله عليها حلوة اوي و فعلا حتلفت أنظار كل في الشركه عندنا خصوصا ان كل الستات و البنات اللي معانا محدش في جمالها نظرهم حيروح ليها و حيبقوا عاوزين يعرفوا عنها كل حاجه ده غير الناس البارده اللي عندنا اللي ممكن يضايقوها و يخترعوا اى حاجه عشان يتكلموا معاها لكن هي لو عملت كده حتبقى فعلا صانت نفسها و كمان اطمنت ان حتى لو اى حد شافها مش حيعرفها

ندى : خلاص يا عطر  يا للا بينا اخدك و ننزل

تقوم عطر مع ندي عشان ينزلوا يشتروا الهدوم اللي عطر حتروح بيها الشغل

و يقعد نديم مع امه و ابوه و يحكوله كل اللي عطر حكتهولهم و يطمنوه إن عطر فرجتهم صور فرحها و كمان ورتهم البطاقه و قسيمة الجواز عشان لما تيجي تسجل البيبي لما يتولد كمان الباسبور بتاعها لأن عمها كان اخدها هي و عتاب اختها قبل كده و عملوا عمره

نديم : بس دول صعايده يا جماعه و طبعهم صعب اوي دول ما بيتفاهموش و ممكن تحصل مشاكل احنا مش قدها

مجدي:  انت اللي بتقول كده يا حضرة الظابط هو ده اللي ربيتك عليه من امتى و احنا مبنمدش ايدنا لحد محتاجنا كنت عاوزها تعمل ايه بعد كل اللي سمعته هاه

 لما تتصل على اختك دونا عن اي حد و تطلب منها تقف جمبها وتساعدها المفروض اننا نرفض و  نسيبها تضيع و اديك شفتها شكلها إيه يعني ممكن أي حد يستغلها و دي بنت ناس مش وش بهدله و لا مرمطه

كان الله في عون العبد ما دام العبد في عون أخيه 

و من فرج عن مؤمن كربه من كرب الدنيا فرج الله عنه كربه من كرب يوم القيامه

نديم : انا مقصدش و الله يا بابا عالعموم انا لية زمايلي في الصعيد

مجدي : انت مبتفهمش يا نديم مخلف ايه انا يا ربي عاوز تروح تقولهم عشان يبلغوا  أهلها

نديم : لاء يا برنس انا لية طرقي الخاصه اللي اقدر اعرف كل حاجه و نطمن الوضع عندهم عامل ايه و الأمور هديت و اللا لسه دي هربانه با بابا يعني حاجه مش هينه ديه تط#ير فيها رج#اب كيف ما بيجولوا

بعد مرور القليل من الوقت 

تفتح ندى الشقه و هما ما زالوا قاعدين

مشيرة : الله رجعتم بسرعه كده ليه انتوا ملقيتوش حاجه

ندى فين عطر  اوعي تكون البنت تاهت منك

ندى : ادخل يا سمسم

ينظرون إليها جميعهم هم منبهرون بها و بجمالها في تلك الملابس

مشيرة : بسم الله ماشاء الله تبارك الرحمن معقوله الجمال ده كله لا ده انتي حتخليني من بكرة البسه انا كمان

عطر : بجد عجبك علية يا طنط

مشيرة : عجبني  اوي يا حبيبتي ده

 منور عليكي بس عاوزه اقولك حاجه يا عطر بلاش تكون نيتك انك لابساه عشان محدش يعرفك بس عاوزاكي تحسني النيه مع ربنا و انك لابساه عشان ترضي ربنا و تمنعي حد إنك يتفتن بجمالك عشان تاخدي الثواب

عطر : اطمني يا طنط انا و الله حباه أوي و اصلا انا كان نفسي البسه بس مكنتش عارفه امتى و الحمد لله اهي الظروف جابته لحد عندي

نديم : طب بأمانه كده لو الظروف اتغيرت مش حتقولي اقلعه بقى

عطر : لا و الله ابدا ما حيحصل ده عهد بيني و بين ربنا حفضل لابساه لآخر يوم في عمري ان شاء الله

مجدي : ربنا يثبتك يا بنتي يا رب

مشيرة : بس مقولتوش بردو انتوا جبتوا حاجات كتير و فوقت قصير اوي ازاي 

ندى : عطر ما شاء الله عليها وشها حلو آول محل دخلناه لقينا فيه كل حاجه عاوزينها طبعا المقاس بالنسبه لها كان متوفر جدا اسكتوا مش صاحب المحل سألني عليها مرتبطه

 قلتله دي مرتبطه باتنين

الراجل اتخض اه و ربنا قاللي اتنين معقوله

قلتله اه و الله جوزها و البيبي اللي مستنياه بقولك ايه انا مش مرتبطه تحب ترتبط

قام ضحك و دفعنا الحساب و خرجنا

كلهم ضحكوا على كلام ندى و نديم قاعد مش قادر يشيل عينه من عليها خصوصا ان عينبها من تحت النق#اب بقت أوضح و احلى و أجمل دي بقت ملفته اكتر ما كانت من غيره

عطر اخدت بالها و قررت إنها مش حتبين حاجه من وشها حتى عينيها  حتحط عليها أي حاجه تساعدها على الرؤيه من غير ما تبان

🌹🌹🌹🌹🌹🌹🌹🌹🌹🌹 

 في إحدى المستشفيات الخاصه 

الدكتور : احنا دلوك اطمنا عليها الحمد لله و تجدروا دلوك تتفضلوا تمشوا 

زياد : يعني حتبجى بخير يا دكتور

الدكتور : ان شاء الله والدتك حتبجى زي الفل

محمد : خلاص يا بني تعالى نروح البيت  و بالليل ناجيلها تاني

زياد : بسرعه اكده ديه حتى حضرتك مجلتلهمش و لا خبرتهم بحاجه

محمد : اني فعلا كنت ناوي اجوللهم بس موضوع مرة يحي جلب كل الموازين و لخبطلي كل حاجه

زياد : و حضرتك حتعمل ايه في الموضوع ديه يا عمي

محمد : أني ما ساكتش يا بني اني مكلم كل اللي أعرفهم في كل مكان في مصر و اسكندريه و كل المحافظات مخلتش مستشفيات و ظباط و ان شاء الله حنلاجيها

زياد : عمي هو حضرتك زعلان عشانها و اللا عشان هي حبله

محمد : بص يا حبيبي صحيح انى فرحت جوي لما عرفت انها حبله و إني اخيرا حبجى جد و عندي أحفاد لأن زي مانت خابر أختك و زكريا لسه ربنا مكرمهمش لكن أني ربنا العالم بحبها جوي زي زينه بالظبط بت حلال جوي يا زياد بس ابن عمك هو اللي غبي و مش وش نعمه خسرها بغباؤه و دلوك بيعيط كيف الحريم ما كان من الاول ما انا ياما تكلمت معاه

 السكينه كانت سرجاه و دلوك بيجول يا ريت ما هو كده يا بني الإنسان مبيحسش بحيمة الحاجه غير لما تروح من يده

عمره ما حيعرف يعوض ضوفارها بس  اني ما حرتاحش لا حيهدالي بال غير لما الاجبها

زياد : ان شاء الله يا عمي تلاقيها

محمد : ان شاء الله يا زياد عارف اللي جاهرني ان بعد ما ربنا جربنا من بعض تاني احنا و عيلة العشري و رجعنا زي زمان و الحمد لله العدا#وة راحت رجعنا لنجطة الصفر تاني و رجعنا كيف ما كنا و دلوك نعمان ماشايفش غير إننا السبب في ضياع بت أخوه و هروبها بالشكل ديه و معارفش اعمل ايه بجي مش طايج يسمع صوت حد فينا ديه أني لما رحتله طردني من بيته بعد ما كان بيجول من دخل بيتك جاب الحج عليك طردني و شفت منيه وش عمري ما شفته فحياتي كلها اني خابر ان بنات اخوه غاليبن عنديه جوي لكن كنت فاكره حيجدر موقفي لكن اني بردك عاذره هو معاه حج و كل املي اننا نلاجيها و نرجع الميا لمجاريها تاني

زياد : ان شاء الله يا عمي ترجع

محمد : يا رب المهم انت دلوك حتاجي معايا

زياد : اني جلجان جوي يا عمي 

محمد : طول ما ني معاك اياك تخاف من حاجه انت فاهم تدخل و انت راسك مرفوعه للسما انت زياد سالم الطحاوي

و ليك  كيف ما ليهم و اكتر كمان 

يا للا يا زياد يا للا يا حبيبي

زياد : طب و مرة ابوي يا عمي 

محمد : صفيه لا يا حبيب عمك اطمن جوي ديه خلاص حف#رت جب#رها بيدها و هي اللي جن@ت على نفسها

بعد مرور القليل من الوقت

🌿الله دي الجنينه عندهم حلوة أوي دي عايزة عتاب تيجي تقطف كل الورد اللي فيها لحبيب القلب جتنا نيله فحظنا ده انا لو دخلت عليه بورده حيقوللي و هو ده الغدا اللي حناكلوه و اللا ايه

يا للا انا اقعد بقى اقزقز شوية لب و سوداني من اللي جبته من مطروح قال ايه مطروح اساس اللب طب و ربنا ده عندنا محمصة طأطأ عليها شوية لب و ارخص كمان بس احنا كده الشيخ البعيد سره باتع

ياللا ادينا بنتسلى و خلاص اما نشوف العيله ديه حيحصل فيها ايه

 الله ايه ده تعالوا شوفوا معايا مين اللي جه دي شكلها حتحلو اوي اما استخبى قبل ما حد يشوفني

يدخل مع عمه و ينظر  لذاك البيت الذي كان يعيش به ابوه يتأمله و يضع حقيبته على الأرض و يقف مكانه

محمد : مالك واجف اكده ادخل يا زياد حمد الله على السلامة يا بني

زياد : الله يسلمك يا عمي

محمد: البيت نور يا زياد

زياد : أيوة بس يا عمي

محمد : مالك يا حبيبي احنا جولنا ايه انت فبيتك و بيت ابوك الله يرحمه يعني تجعد و انت حاطط رجل على رجل

زياد : و امي يا عمي

زياد : أمك بتتعالج في المستشفى يا زياد و ان شاء الله أول ما تبجى بخير حتاجي تجعد معانا اهنيه

زياد : بس أمي اكيد محترضاش

محمد : مفيش الكلام ديه خلاص بكفايه لحد أكده و كل واحد لازم يعرف حجه و مستحجه

تنزل زينه من عالدرج و قد لفت نظرها ذاك الشاب الذي يقف مع عمها و عينها مسلطه عليه فهي لم تراه من قبل

فتقف مكانها 

ينادي عليها عمها و يحتضنها بشده بينما هي و زياد عيناهما معلقه ببعضهما البعض

زينه : مش تعرفنا عالضيف يا عمي

محمد : ديه مش ضيف يا حبيبتي

زينه : مش ضيف كيف يعني مفهماش يا عمي

محمد : ديه يبجى زياد يا زينه اخوكي

زياد سالم الطحاوي 

لم يتحمل عقلها تلك المفاجأة ليتفاجئوا بها و هي تنبطح أرضا محاولين افاقتها

محمد بلهفه عليها : شيل أختك يا زياد

يحملها زياد و يضعها على المقعد و يحاولون افاقتها و بمجرد أن تفتح عيناها

تفتح عيونها و كأنها تحلم و هي تنظر له بعيون تائهه كيف يكون لها أخ بعد كل تلك السنوات 

لا تعرف ما شعورها نحوه في تلك اللحظه نعم كم تمنت أن يكن لها اخا أو أخت و لكن كيف يحدث ذلك الآن

تشعر بصداع شديد يجتاحها

ينزل زكريا على السلم ليتفاجا بهذا المشهد

أبوي الله هو في إيه مالها زينه مين ديه يا بوي

تأتي إليهم عائشه 

زكريا : مين ديه يا بوي و كيف تسيبه يجعد جمب مرتي أكده 

محمد : ديه يجعد جمبها و ياخدها فحضنه كمان

زكريا : كيف الكلام ديه ليه هو مين عشان يحجلله أكده

كان جوزها و اللا يمكن يكون أخوها اياك

محمد : أيوة اخوها يا زكريا سلم على ابن عمك زياد

زكريا : إيه يا بوي سلامة عجلك ابن عمي ايه اني مفهمش حاجه

عائشه : ايه يا محمد الكلام ديه مين اللي أخو مين

محمد : زياد يبجى أخو زينه يا عيشه

عائشه : يا لهوي و ديه حوصل امتى و ازاي

تقبل عليهم بعد أن سمعت الحوار إيه يا محمد انت خرفت على كبر و اللا إيه جايبلنا واحد معارفاش منين و عايز تلزجه فينا و اللا ايه هو مين ديه اللي اخو زينه ان شاء الله زينه ملهاش اخوات يا محمد

محمد : لا يا صفيه زياد ييجى أخو زينه و ابن سالم اخوي و من صلبه

 عايزه تعرفي ليه لأن سالم كان متجوز عليكي و انتي متعرفيش ارتاحتي اكده

صفيه : لا لا اني محسمعش للتخاريف ديه و محصدجش واصل الهبل ديه

سالم كان بيحبني و عمره ما يعملها واصل سالم متجوزش حد غيري

محمد : لا يا صفيه سالم اخوي اتجوز عليكي تصدجي و اللا متصدجيش براحتك ديه شئ ميهمنيش واصل بس سالم عمره ما حبك و لا انتي كمان حبتيه و انتي خابرة اني بجول الحج

و لما لجي اللي جلبه مال لها اتجوزها و خلف منها زياد الدكتور زياد

صفيه و هي بتجري على صورته المعلقه على الحائط تأخذها و تقذف بها أرضا و تركلها بقدمها : خا& ين كد# اب يا خا# ين يا سالم اااه تقعد تك#سر في كل حاجه و الكل بيحاول يهديها و مش عارفين ما عدا محمد كان واقف يتفرج عليها و شمتان فيها

راح عليها و مسكها من دراعها بق#سوة و ش#ده

عمره ما اتعامل معاها قبل كده كان مراعي صلة الرحم لكن خلاص هو جاب اخره منها و من عمايلها

تعالي اهنيه جه الأوان انك تتحاسبي على كل عمايلك  اللي اذيتينا كلنا بيها

جه الأوان اللي اجول فيه كل حاجه كنت مخبيها السنين ديه كلها مش عشان حاجه غير عشان كنت لسه مراعي إنك أم زينه و خالة عيالي لكن خلاص لحد هنا و بكفايه

زمااان ز ماان جوي سالم اخوي و بدر الله يرحمهم كانوا أعز صحاب و انتي كنتي بتحبي بدر و نفسك  إنه يتجوزك كنتي بتروحي عنديهم و ترمي جتتك عليه لكن هو مكنش معبرك سالم مكنش يعرف حاجه  لكن اني كنت عارف لأن بدر بنفسه هو اللي طلب مني أكتر من مرة اني أفهمك بالذوج انه مبيحبيكيش و اني مكنتش عارف اجيبهالك ازاي كنت خايف على مشاعرك

خليتهم يسافروا هما الاتنين مصر يشتغلوا هناك و تبجى فرصه انك تنسيه و هناك جابلوا في الشغل ام عطر كانت جميله جوي لدرجة انهم هما الاتنين حبوها و اتعلجوا بيها لكن هي اختارت بدر و سالم بعد نفسه و هو من جواه حزين لأنه كان نفسه جوي يتجوزها لكن فضل صاحبه عليه

بدر اخد نعمان و عيلته و راح طلب يدها من أهلها و جابها الصعيد و اتجوزها و انتي وجتها كنتي حتموتي من الجهرة مكنتيش عارفه تعملي ايه  ملجيتيش جدامك غير سالم رميتي شباكك عليه و ربنا يسامحني  عاللي بليته بيه جلت يمكن تحبيه و تنسيه و تنسي بدر و اني اللي اقنعته انه يتجوزك و انك حتنسيه ام عطر مع ان الفرج بينكم كبير جوي سوى في الشكل او في الطباع 

سالم عاملك بما يرضي الله لكن انتي جلبك كان كله سواد و عايزة تنت#جمي من اللي سابك و معبركيش فضلتي توجعي بينهم و تكرهيهم في بعض و تزرعي جوى سالم ان بدر عامل نفسه صاحبه لكن هو بيغير منيه و مبيحبهوش الفتي حكايات و جدرتي بالاعيبك انك توجعي بينهم و تفرجيهم عن بعض جبتي ناس كدابين يجولوا لسالم ان بدر بيتفج عليه و بيشتغل من وراه و انه عايز يخسره في شغله و بعد ما كانوا اعز صحاب بجيوا أعداء

و لما سالم ربنا نور بصيرته و هداه للحج و عرف بكل عمايلك  مبجاش طايجك و لا طايج العيشه معاكي بس هو كان جلبه أبيض سابك على ذمته  جال معلش عشان خاطر زينه اللي كانت لساتها في اللفه

حاول يرجع علاجته ببدر لكن بدر كان واخد على خاطره منيه

وجتها سالم جابل ام زياد كانت بت من الشغيله اللي في الأرض غلبانه أهلها بعتوها تشتغل عشان تجدر تساعد في مصاريفهم  سالم حبها. حبها و جاللي انه عايز يتجوزها و اخدلها شجه في جنا عشان يبعدها عنيكي هو كان خابرك و خابر شرك وعشان أكده خدها بعيد عن اهنيه و فرح معاها و كان مبسوط و بجيت اشوف الضحكه على وشه اللي راحت من يوم ما عرفك و اتجوزك

ام زياد جدرت تنسيه كل حاجه و 

 بدر  بعدها ربنا رزجه ببناته و بعديها بشويه عمل حادثه و مات و وجتها هما ظنوا  ان سالم هو اللي عملها لكن سالم مكنش اهنيه عارفه كان فين يا صفيه كان في المستشفى مع مرته كانت بتولد زياد

و بعدها لما سالم حصل بدر هو كمان  انتي اتهمتي نعمان انه هو اللي عملها عشان ينت# جم لاخوه 

لكن لا سالم كان له يد فموت بدر و لا نعمان ليه يد فموت سالم راحوا هما الاتنين و عيالهم اتيتموا و من وهما لساتهم صغار

لكن مع ان السنين عدت لكن غلك و حجدك لساتهم زي ما هما

هما اللي كانوا ورا رغبتك في الانت#جام و ما هواش حب و عشج لجوزك كيف ما كنتي بتجولي و اني خابر ديه زين جوي لا ديه غل جوة جلبك و سواد

عياطك و يا حبيبي حبتك حية و اللا عجربه تريحنا منك و من شرك اني بس اللي كنت واخدك على جد عجلك لحد ما اسم عليه يكبر و اجدر اجيبه فبيته ينوره و اشم ريحة اخوي فيه

و لما اخدت عطر ليحي كرهتيها  من أول لحظه دخلت فيها اهنيه مش عشان حاجه غير عشان هي بت ناهد ناهد اللي خطفت منك بدر و أخدت مكانك فجلبه

بجيت هي بت عدوتك لكن اني مكنتش متخيل إن غلك يوصل لدرجة انك تبجي بترتبي لموتها هي و اللي فبطنها اللي هو حفيدنا اني و اختك اللي كان نفسنا نشوفوه بعنينا

انتي اللي زيك المفروض يعيش مع الشيا#طين  و الابالسه  مش مع البني ادمين و  من دلوك انتي ملكيش مكان بيننا اهنيه كفايه علينا أكده احنا انكوينا  منك بما فيه الكفايه اني جلت لاخوكي  ياجي ياخدك و اني أكده كريم معاكي جوي 

صفيه بغل : ايوة يا محمد اني بكره اي حد من ريحة بدر العشري و اللي حشوفه جدامي منيهم اني حشفي غللي فيه و محخليهوش يشوف الراحه و  اخويا ديه اللي بتجول انه جاي ياخدني ميحجدرش يمشيني من اهنيه  ديه بيتي و لية حج فيه 

و مفيش جوة حتجدر تخرجني من اهنيه

محمد : لا كنك ما تعرفيش حاجه البيت ديه بيتي اني و باسمي اني يعني انتي ملكيش فيه شبر واحد اني كنت مجعدك اكراما لزينه بس مش اكتر من أكده و كفايه عليكي جوي اني حسيبك عايشه بعد كل مصايبك اللي المفروض ترميكي مع الحرا#ميه والجت#الين

زينه :  لا و غلاوتي عندك يا عمي متطردش أمي 

محمد : معدش ينفع تجعد وسطينا بعد اللي عملته و ان بسببها رجعت العداوة بيناتنا و بينهم تاني

صفيه : و اني جلت مش ماشيه مفيش  محخرجش من اهنيه

محمد : حتخرجي يا صفيه ياللي اللي عمرك جلبك ما صفا

زينه ببكاء، شديد : عمي الله يخليك اني محجدرش اجعد اهنيه من غير امي سامحها الله يخليك هي غلطت ايوة غلطت بس سامحها ديه ربنا بيسامح

محمد :  لا يا زبنه اني سامحتها كتير جوي و عديت ياما لكن لما توصل للي هي عملته و كمان بتتهم البنيه فشرفها يبجى  جزاءها ايه جولي انطجي

الدين بيجول ايه في اللي يتهم الناس في أعراضهم مش ديه اسمه رمي محصنات  انتي ترضى ان حد يجول عليكي حاجه عفشه أكده

 

تبص زينه لأمها و هي مش عارفه ترد عمها معاه حق في كل كلمه بيقولها هي نفسها طلبت منها تحط مانع للحمل لعطر فالاكل  عشان متخلفش

طلعت تجري على اوضتها تعيط و زكريا طلع وراها يهديها

و عائشه بتبص لأختها بقهره عشان حرمتها من اول حفيد ليها

محمد و هو بيطبطب على ضهر زياد نورت بيت ابوك يا دكتور زياد

اما فرحه فكانت واقفه و شمتانه فيها و فرحانه ان ربنا جاب لعطر حقها بعد ما مشيت

🌹🌹🌹🌹🌹🌹🌹🌹

يطلع محمد اوضته و يطلع صورة اخوه من الدرج

ياااه يا سالم متعرفش فرحتي كيف و اني شايفك جدامي تاني فصورة ولدك زياد شبهك بالظبط صحيح اللي خلف مماتش

لا و كمان حيبجى دكتور جد الدنيا عارف انك كان نفسك تشوفه و هو راجل تتباهى بيه  اطمن هو بجي راجل جد  الدنيا و اني خلاص رجعته بيته و جبته لاخته

زمان لما جلتلي على امه انك حبتها و رايدها فحلال ربنا اني مجلتش لاء مع انها مش من مجامنا بس اني مرضيتش اكسر بخاطرك و جلت مش حرام انت محتعملش حاجه غلط لكن انت فاجئتني انك محتجوليش لحد من أهلها عشان هما محيرضوش لأنها بتصرف عليهم و جلتلي حتجولهم في الوجت المناسب و حتروح لهم و تفهمهم كل حاجه و هما ناس غلابه محيعملوش مشاكل و اني طاو عتك عشان مزعلكش لكن يا ريتني كنت وجفتلك و جلت لاء مكنش حوصل اللي حوصل

 

ايه يا خيري كيف تسيب اختك تمشي على حل شعرها أكده لما انتم مش جد الخلفه بتخلفوا و تجيبوا العار ليكم ليه

خيري : ما توزن كلامك يا منتصر و تجول عايز ايه و إيه الكلام اللي بتجوله ديه كنك شارب حاجه

منتصر : أختك زهيرة فين يا خيري

خيري : في اسيوط بتشتغل

منتصر : لا مش في اسيوط اختك عايشه مع واحد في شجة في جنا و اني شفتهم بعنيه و اتاكدت كمان وعيب عليك جوي لما تبجى راجل و تجبل على نفسك ديه عشان خاطر المليمين اللي بتبعتهملكم كل شهر

خيري و هو بيم#سكه من هدومه : انت اتجنيت بتجول ايه

منتصر : اني متجنيتش يا خيري طب خد التجيله بجى اختك مخلفه منيه يا فالح مخلفه في الحرام

شوف بجى حتعمل ايه يا ابو دم حامي

و ادي العنوان اهوه خده و شوف بعنيك يا خسارة الرجاله

تفتح زهيره الباب ظنا منها انه سالم فتتفاجا باخيها امامها و عيناه لا تبشر بخير

زاهيه : خيري اخويا

خيري : ايوة اخوكي يا فاجرة اخوكي اللي حطيتي راسه في الطين و خليتي اللي يسوا و اللي ميسواش يتحدت عليه

كنتي فاكرة اني معرفش اياك بجي بتبعتي فلوس لأمك و اخواتك من شرفك اللي بعتيه و فرطتي فيه

زاهيه : لا يا اخوي حرام عليك متظلمنيش اني مش خاطيه انت مفاهمش حاجه

ييجي سالم : اهلا باللي غوى اختي و معيشها معاه و مخلف منها في الحرام

سالم : انت بتجول ايه مين ديه اللي عايشه معايا في الحرام

زهيرة :اصبر يا اخوي حتفهم كل حاجه

خيري : لا معاوزش افهم اني جاي اغسل عاري بيدي

تنظر زهيره بر#عب مما يخرجه من جيبه  

سالم : لاء بعد عنيها

زهيرة و هي بتلطم و بتصوت: يا لهوووي جوزي حرام عليك يا خيري عملت ليه اكده فجوز اختك يا خيري

يتمت ابنه و هو لساته في اللفه حرام عليك يا خوي

اتصال يجيله منها و هي بتبكي بشده على اللي حصل لجوزها و انهم في المستشفى و أنه عاوز يشوفه بسرعه طبعا ميستحملش قلبه كان حيحقف و جرى عالمستشفى و هو بيدعي ربنا انها تعدي على خير

سالم بصوت ضعيف : محمد زهيرة و زياد أمانه فرجبتك تخللي بالك منهم

و بامنك أمانه ليوم الدين حتتحاسب عليها جدام ربنا ما تجيب سيرة لحد واصل عن اللي عمل فية اكده اني معاوزش زياد يكره خاله و اني مسامحه 

محمد : انت بتجول ايه

سالم : ديه مش غلطته ديه غلطتي اني اكتر منيه يا هو مكنش يجصدني هي جت فية بالغلط يا ريتني سمعت كلامك و جلت  لأهلها هو معذور اللي سمعه كان كتير عليه مجدرش يستحمله و اني مسامحه امانه عليك يا محمد ما حد يعرف بحاجه واصل جعده مع اخته يربوا ابني

 

يكمل سالم بتعب و كلام بيطلع بصعوبه : زياد يا محمد زياد ولدي امانه فرجبتك هو و أمه بعدهم عن صفيه  معاوزهاش تعرف حاجه عنيه

محمد : متجوليش أكده يا اخوي محدش حيربي ولدك غيرك يا سالم

سالم سالم رد علية الله يخليك سالم اخوي لاء، لأ يا سالم متسيبنيش يا اخويا متسيبش ولدك يا سالم

يمسح محمد الدموع من عينيه اطمن يا سالم محدش حيعرف واصل مين اللي عمل فيك أكده و امانتك حفضل حافطها و الحمد لله انها عدت زمان على خير و جدرنا نعديها على انها خناجه

ولدك حيفضل يحبه و يجدره وكفايه انه مرضيش يتجوز و جعد مع اخته يراعيها هي و ابنك لحد ما علمه و كبره وخلاه حيبجى دكتور جد الدنيا

و اني و ربنا العالم عمري ما جصرت معاه و كنت علطول عنديهم و كبر و اتربي فخيرك يا اخوي

و صفيه ديه خلاص انتهت من حياتنا و لو فكرت تلمس شعرة منيه اني اللي حتكون نهايتها على يده 

و من الليله كله حيعرف برجوعه برجوع الدكتور زياد سالم الطحاوي

🌹🌹🌹🌹🌹🌹🌹🌹🌹🌹طبعا كلكم عاوزين التركيز على عطر و يحي عارفه و الله بس في حاجات قديمه مكنتش واضحه و مبهمه و معظمكم كان بيخمنها زي اللي قالوا ان صفيه هي اللي قتلت واحد منهم و في اللي قالوا ان زياد اخو عطر و عتاب و ان سالم اتجوز مراة بدر و حاجات كتير عشان كده كان لازم كلنا نعرف الحكايه كلها عشان نركز بقى مع أبطالنا و نعرف بقية حكايتهم اللي انا قاعده متشوقه ليها زيكم

سلام يا احلى فانز في الدنيا كلها ربنا ميحرمنيش منكم و لا من دعواتكم لية

بجد انتوا اهلي و حبايبي و صحابي ربنا يخليكم ليا و يديمكم نعمه في حياتي يارب

🌹🌹🌹🌹🌹🌹🌹🌹🌹

 •تابع الفصل التالي "رواية يكفيني منك عقابا" اضغط على اسم الرواية