رواية جرح الأيهم الفصل السادس عشر 16 - بقلم أيلان
"الجُــرح السادس عشر"
"يُمر طَيفَك يناغينَي
ويردنَي ردوّد و أدري ، الطَيف ما يَنجاس
اگود السَهر بـَ عيونَي ، وترَد الـ ليُش بيهَ تعيّل
و اتمنانَي دوّن أحساس ."
....
ليِلَتُها ..
كان يؤدي عَمَلهُ المُعتاد
يَسكن الطوارئ بلا ارتياد
يُساعد الارواح التي تُصارع الأجساد
ليَلَتُها ..
كَان مُتَوجهاً نَحو جَسد تِلَكَ الفتاةْ
توقف الزَمَنُ في عَينيه و مات
تَدَحَرَجَت عينيه بين ثنايا وجهها مُستنكراً
هَبَتْ نَسمة الريـح حوله وكانت سبباً
في تفوهه بـ كَلماته الداله على اللهفةِ مُردفاً ..
-جَرح الأيهم
~نور ( أحد قارئين القصة🩶.)
نور :-
اخذوا ملاك للردهات
فزز الدكتور نظراته و صاح بالواكفين
أيهم : اتحركوا بسرعة
ركضوا الممرضين و الدكاتره
بـ مُلاذ لغرفة العمليات
التفتنا على صوت غاده الي اجا من ورانا
غاده : نووور
التفتت الها كنت منتظرتها
عمتي و بيبي راحن ورا ملاك
نور : غاده
دحگت لـ خالة فيروز
خالة جنات تدفع بالكرسي و هي تستعجلها
و دموع خالة فيروز على خدها
رحت ناحيتهم بسرعة ، لزمت ايدية خاله فيروز
ما مصدكه و تبجي الدموع ماليه عينها
حجت و هي تتلكئ
فيروز : بناتي ، بناتي وين ؟؟
دنكت الها و كنبصت كدامها
نور : ملاك اخذوها للردهات و مُلاذ ...
وسعت عيونها تدحگلي
فيروز : مُلاذ ؟؟؟
نور : رح يسوولها عملية
متصاوبة رصاصتين بـ بطنها
شهكت خالة فيروز بصدمة
و حتى غاده و خالة جنات انصدموا
بجت خايفة ، صارت تدك على راسها
حاولنا نهدأها بـ تذكيرها بـ ملاك
اخذنها الها و دخلنا يمها
لكيناهم لافين رجلها و مضمدين راسها
و هي تبجي بلا توقف و جسمها يهتز
فيروز : ملاك
التفتت فازه على صوت امها
شهكت خاله فيروز ، لهفة و شوك لـ بنتها
صار موقف يبجي الصخر
حركت رجلين الكرسي خالة فيروز
و راحت عليها ، و هي تبجي
كعدت ملاك على السدية بسرعه ،
متناسية المها يلي كانت قبل كم ثانيه
تبجي منه او تبجي لـ سبب ثاني ، محد يعرف
فتحت ايديها لـ خالة فيروز
تحاضنوا ملاك و خالة فيروز بـ شدة
يبجن بصوت مسموع
بحيث التموا كل الدكاترة و الناس
على صوت بجيهم
وكفنا كلنا على صفحة
عيوننا تدمع و نبجي على بجيهم
خالة فيروز تبجي بـ لوعة و تكول
فيروز : يمه بنتتتتي يمه
بوست بـ ملاك و مشدده ايدها عليها
و ملاك هم محاوطتها بـ شدة
كأنو خايفين يخسرون بعض مره ثانية
حضنوا بعض لفترة طويلة ، همَ هيج
الناس كلها تدمع على حالهم
اتقربت مني مرة كبيرة بالعمر
-ليش يبجون؟
نور : بناتها جانن مخطوفات
-ياااا
هزيت راسي ، ضميت شفتي
ابتعدن خالة فيروز و ملاك عن بعض
وحدة تدحك للثانية
بعد ما فقدنا الامل بـ عودتهن
انصدمنا بـ وجودهن
و بـ لحظة صار كلشي
ملاك : مُلاذ ، مُلاذ شصارلها؟
رفعت راسها خالة فيروز تدحگلنا
هزيت راسي بـ عدم معرفة
نور : دخلوها للعمليات
فيروز : اريد اشوفها
اريد اشوف مُلاذ
نور : ما يسمحون النا
دحگت خالة فيروز لـ ملاك
خلتها تتمدد تقربت منها و گالت
فيروز : لا تخافين انا هنا
بس اروح اشوف اختج
هزت راسها بـ قبول
حركت الكرسي خالة فيروز
رحت بوست ملاك و اتبعت خالة فيروز
غاده :-
دحگت ملاك من بيناتنا
و گالت بصدمة : صافيناز!!
تقدمت بنية ما شايفيها و لا نعرفها
على ملاك و حضنتها ، ملاك بادلتها الحضن
و بجن ثنينهن بـ حرگة گلب كلنا ما فاهمين
ملاك : عبالي متتي وين رحتي عني و عفتيني!؟
ابتعدت صافيناز عن ملاك
و باست گصتها كالت بهدوء
صافيناز : رجعتي لـ امك اخيراً
هزت راسها ملاك بـ ابتسامة
ملاك : انتِ هم رح ترجعين
صافيناز : ربي يسمع منك
ظلت كاعدة يمها
اتقدمت وكفت يم امي
غاده : منو هاي ؟
جنات : قبل لا تجين علينا و تگلليلنا
اندك باب البيت و طلعت اشوف
لكيت هاي البنية واكفة بالباب
صافيناز : انتوا بيت ام غاده؟
لهجتها غريبه و طريقة نطقها للكلام
هزيت راسي بـ قبول
تعابير الاستغراب بانت على وجهي
جنات : منو انتِ؟
صافيناز : انا بعرف مُلاذ و ملاك
وسعت عيوني بـ صدمة
جنات : شلون ، شلون ، منين تعرفينهم؟
صافيناز : خطفوني معهم
وسعت عيوني بـ صدمة ، دخلتها لـ جوا
لعل و عسى نلكانا اثر من هاي البنية
اول ما جابت طاريهم كدام فيروز
فيروز بسرعة فزت و دحگتلها
بدت تنطق بصعوبة
لان فترة طويلة كانت ساكته
متسائلة عنهم و تبجي ،
سولفت النا البنية و قبل لا تكمل
طلعتي تكولين لگو ملاك و مُلاذ .
هزيت راسي بـ قبول
غاده : ما انتبهت الها لحد ما طلعنا
جنات : كنا مستعجلين
أومات بـ راسي
رحنا يم ملاك ضعفانه كلش خطيه
عيونها الخضر ذبلانات
اسفلهم مخيم السواد و مكون هالات
بيبي و خالة منارس و الكل التمو
دخل سلطان و هو يدور على ملاك بـ لهفه
و اتبع دخولة ، دخول عزيز اجو ناحيتها ثنينهم يستائلون عنها و يتحمدون الها بالسلامة
طلعت و رحت اشوف مُلاذ
وصلت يمهم دحگت لـ خالة فيروز
كاعدة بالباب تبجي
رافعه ايديها تناجي رب العالمين
نور واكفة يمها من جهه
جسار واكف من الجهه الثانيه
كانوا واكفين بـ هدوء
لمن اشتد صوت خالة فيروز
جسار تقدم و حضنها لـ صدرة
جسار : الحمدلله رجعن بناتج
خواتي هنه و اخذ حگهن من عيونهم
ما اتسمى جسار و شاربي مو عليه
اذا ما خليت الاخذهم منج جوا رجلج
حضنت خالة فيروز جسار
و ظلت تبجي بـ حرگه على صدرة
مثل أم تحتضن ابنها و هي تعتبرة أبنها
طلعت ممرضة كلنا فزينا و دحگنالها
رحنا ناحيتها بسرعة
راحت و رجعت تركض ما افتهمنا شكو...
في غرفة العمليات :-
اتجهوا الممرضين ناحية الدكاترة
يساعدوهم بـ ارتداء مئزرهم الطبي
ارتدوا الكفوف ثم الكمامات
كانوا يرتدون بـ اريحية ، الا الأيهم
كان مستعجل لـ اداء عملية مُلاذه
اتجهه ناحية مريضته ، بدأو بالعملية
الأيهم مصمم هو يلي رح يسوي العملية
ناولة الممرض يلي بجانبة الادوات
بدأ بـ عمله و هو يصب كامل تركيزه
بعد مرور كم دقيقة ، نطق فرزدق
فرزدق : ايهم ايدك ترجف !
خليني اسوي انا العملية
اتكلم بـ حسم مصر على تنفيذ كلامه
الأيهم : انه الراح اسويها
فرزدق : أيهم المريضة
ممكن تفقد حياتها بسببك
اضافة الى ان وضعها خطر
الأيهم : انه الراح اسوي العملية
و المريضة ...
رفع عيونه دحك لـ مُلاذ
و كمل بـ تأكيد : رح تعيش
سكت فرزدق متنرفز من حالة أيهم
رغم تركيز أيهم لكن حياة حبيبته بين ايدية
سبب اله التعرق يلي يتصبب من جبينه
گلبه ينبض بـ جنون كأنوا رح يطلع من مكانه
وضع مُلاذ خطر زلة وحدة تموتها
فرزدق : أيهم !! الاعضاء متضرره
خليني اقوم انا بالعملية
التفت أيهم لـ فرزدق
عگد حواجبه خازر فرزدق و متنرفز
الأيهم : كلمتي ما اثنيها
التفت يكمل عملة بـ كامل هدوئه
فقط صوت نبضات قلب مُلاذ بالجهاز ينسمع
أيهم دكتور ناجح في عمله
بكل العمليات فرزدق يحاول
هو يلي يقوم بالعملية
لَكن الكل يفضلون أيهم هو يلي يقوم بيها
مهما كانت العملية صعبه و الحالة خطرة
تكون جملتهم "بس أيهم اليكدرلها"
و بـ لحظة من اللحظات
بدت نبضات قلب مُلاذ تضعف
و يصدر صوت الجهاز المزعج دلاله على ذالك
بسبب كلام فرزدق المستمر،
الي شتت انتباهه أيهم
فرزدق كأنما لزم زلة عليه و بدء يأكد كلامة
و انو هو لازم يسوي العملية
رغم الضجة يلي صارت بـ غرفة العمليات
فرزدق : ابتعد يا اخي مصر تموتهاا!
گال بـ نبرة هادئة مجروره
داله على نفاذ صبرة
الأيهم : دكتور فرزدق
كمل و هو يميل بـ راسة
الأيهم : اتوكل برا
شَخص فرزدق عيونه بـ ذهول
من طرد أيهم اله
فرزدق : مو بس انت دكتور هنا !
رفع عينه أيهم بـ انعدام صبر
دحك للممرض يلي كدامة بـ نظرة
اتسارع الممرض
حاول يطلع هو و فرزدق بـ لطف
كل الكادر الطبي يلي كان بالعملية
كانوا يحاولون وي الأيهم و يعالجون مُلاذ
لحد ما رجع النبض طبيعي
زفروا نفس دلاله على الراحة
مرت فتره على هذا الحال
و الأيهم رجفة ايده ما خفت و لا راحت
كان مركز كل التركيز بـ عملة
خصوصاً هو انسان دقيق بالعمليات
و يحاول فوك طاقته يعالج المرضى
و كم من مريض عاد للحياة
بسبب اصرار الايهم بالانعاش
اكتشف ايهم متروك قطع من الخيوط
داخل جسم مُلاذ و بطنها ناحية كليتها
مشرحة مرتين مره فوق الكلية
و مرة بـ مكان الكلية
رفع عينه يدحك للوقت الي يمر
انتهت العملية بعد فترة ، تمت بـ نجاح
رفع راسه الأيهم و ايدية مرفوعات
زفر انفاسة بـ راحة و تعب
اتقدم الأيهم على مُلاذ دنك الها
انتزع الكمامه من وجهه و نزلها
ابتسامة سرت على شفته ظاهره اسنانه
همس بصوت خافت
الأيهم : الحمدلله على السلامة فوصتي .
التفتت للكادر
و صفق أيد بـ أيد فرحان
الأيهم : تسلم ايديكم شباب .
ابتسموا الكل
و جاوبوا بـ اصوات متفاوته
-ايدك السالمة دكتور
نور :-
من بعد بُكاء خالة فيروز المستمر
و اجت يمها الحجية و على طول يدعون
انفتحت باب غرفة العمليات
و خرج من عدها سدية مُلاذ
و يمها نفس الدكتور
حركت خالة فيروز كرسيها بسرعة ناحيته
ابتسم و گال بـ هدوء
أيهم : العملية نجحت
بتكم قوية ما ينكدرلها هههه
ضحك و ضحكت خالة فيروز
و احنا هم ضحكنا وياهم ع الواهس
أيهم : وضعها ما نكدر نحدده
بس حالياً مستقر و اذا صارت مضاعفات لا سامح الله ، انه اتدخل لا تخافون
أومات بـ راسها
اتجهوا بـ مُلاذ لـ وحده من غرف المستشفى
و احنا نتبعها و الدكتور يمها و اسكندر وراه
اتقدم اسكندر من الجهه الثانية لزم ايد مُلاذ
بالخطأ دحگت لـ الدكتور
خزر اسكندر خزره بس اسكندر ما منتبهه
أيهم : ايدك الكانولا !
اسكندر : مو يمها
أيهم : حتى لو
مشوها اسرع و اسكندر وكف
يدحك وراهم بـ غضب
اسكندر : هذا شعليه !
ضرغام : الابرة تمتد
ف ممكن تأوت من واحد يلزمها
دخلوها للغرفة و نقلوها للسرير يلي بالغرفة
اتقدم الدكتور يعدل مغذيها و ما سمح النا بالدخول گال لازم ترتاح كم دقيقة
بقينا ننتظر برا ...
بعد كم دقيقة طلعوا الدكتور و الممرضة
سمحولنا بالدخول بس كم دقيقة
دخلنا بسرعة
قدمت الكرسي خالة فيروز ناحية مُلاذ
اخذتها ايديها تبوسهم و تبجي
و تبوس كصتها و شعرها
اجا الدكتور مبتسم
و مُلاذ بدت تحجي متبنجه
مُلاذ : انجب لك حيوان
رغم حزننا بس ما اتحملنا و ضحكنا
أيهم : شسمج انتِ ؟
مُلاذ : ها ؟
أيهم : شسمج ؟
گالت و هي تجر بالكلمة
بعدها مبنجه
مُلاذ : اسمي؟
أيهم : أممم
مُلاذ : اسمي فوصة
صفننا عليها
و الدكتور ماكدر يخفي ضحكته
بس غطينا عليه و ضحكنا احنا هم
مُلاذ : انجب اسويلك اكل شنو؟
انت شكول اكل ؟
أيهم : ما نريد عمي شبعانين
مُلاذ : اسمي فوصة ، وين مُلاذ ؟
ضحكتنا فحطتنا من الضحك
و هي تسب و نوب فتحت عيونها تدور بيهن
و جرت الدكتور من تشيرته و نوب الدكتور
ميكدر يسكت فحطان من الضحك عليها
مُلاذ : انت شني ؟
أيهم : شني ؟
مُلاذ : شو انت حلو ؟
يمه يمه خزتنا
خالة فيروز كامت تزلغ خدودها
انا اجيت ادخل بـ هدومي
نوب مُلاذ ما لكت غير هسه تتغزل
طول عمرها ما متغزله بـ رجال
و هي صاحية انوب مو هي مبنجه
ادحك لـ اسكندر صارت عيونه بـ كصته
أيهم : صدك ؟
مُلاذ : انجب
عافت تشيرته و دارت وجهها عنه
و خالة فيروز تتعذر من الدكتور
أيهم : لا عادي عادي ، ههههههههههه
سكتت شوية و گالت بصوت مشحرج
و هي متبنجه
مُلاذ : طفاج القدر يا شمعتي
خلاني اجر بحسرتي
شلي بهالعمر يا دنيتي
محسود على حظي و قسمتي
فص ملح و ذاب ، ما بين ايديه و راح
شباب و غاب ما اتهنى يوم و ارتاح
نزل الدكتور يحط مغذي ثاني
بأيدها و صار صوتهم سوا
أيهم و مُلاذ : يا شمس الدنيا و الگمر
انا ادفع شبابي و العمر
لو يرجع اضمه و اعتذر
و اشوفة شسوه بيه القهر
سكتت مُلاذ و رجعت
حجت مبنجه : بابا
قبل شوية جنا نضحك ، هسه گمنا نبجي
انا ما اتحملت جسمي يهتز و ابجي
و خالة فيروز حاطه كف ايد مُلاذ على حلكها
و دموعها تنزل بـ غزاره
اتحمد الدكتور النا بالسلامة و طلع
هو يريد يطلع ضرب جتفه اسكندر
خزره الدكتور و دحگله من فوك لـ جوا
و هو رد الخزره
بقى يدحگله بـ نظرات مليانه استهزاء
دار وجهه و طلع
اتقدمنا يم مُلاذ ، ظلينا ساكتين
اشكالهم متغيرة و ذبلانه و تعبانه
حتى خالة فيروز صح جانت يمنا
بس روحها جانت يمهم
اندارينا لمن انفتحت الباب
دخلت عمتي و وياها ملاك و وياهم صافيناز
غاده جانت يمنا و مدري وين راحت
فيروز : ليش كمتي؟
ملاك : بس راسي يوجعني
قلقت على مُلاذ
خليناها تكعد و ترتاح
مُلاذ مبنجة و تحجي بـ اشياء ما تنفهم
مُلاذ : الخايس شرف ابو النسوان
طاحظك و حظ اسمك و حظ الشرف وياك
الزمال ابن الزمال
دحگنا لـ ملاك ما فاهمين
ملاك : لمن خطفونا باعونا لواحد اسمه شرف
خالة فيروز مصدومة
و كلنا مصدومين اساساً
ما ردنا نسئلهم شي هسه
فكرنا نخليهم يرتاحون بعدين نسئلهم
التفتت لمن دخلت غاده
اتبعها جسار
غاده : ها كعدت ؟
نور : لا بعد
قدمت لفات الكل يلي متواجدين
بعضهم اخذوا و بعضهم ما اخذوا
نور : شنو هاي ؟
الحجية : لفات جبن
انا وصيتها تجيبلكم اكل
هزيت راسي ساكته
ظلينا كاعدين ننتظر مُلاذ تصحى
بس ماكو ما صحت اساساً
ملاك جانت تحتاج عناية طبيه
لان ضعفانه كلش و عدها التهابات
و جسمها يحتاج للتغذية و العلاج
مُلاذ حتى لو تصحى ينوموها
لان تظل تون و تتخبل من الوجع
البنية يلي جاية وياهم اسمها صافيناز
كتفها نزف فجأه بسرعة اخذوها عزيز و جسار
يشوفون كتفها شبي
دخل الدكتور بعد فترة
طلب من عدنا نفرغ الغرفة
لان اعدادنا هواي و الغرفة صغيرة
فيروز : عمه انتوا ارجعوا للبيت
الحجيه : ي فيروزة انحلت عكدة لسانج
بـ حلة بناتج عليج هسه عرفت لويش إلياس حبج
ابتسمت خالة فيروز بـ تعب
تقدمت بيبي باست كصتها
رادت بيبي تبقى بس محد سمح الها
لان هي اساساً تعبانة و مريضة
بقيت انا و عمتي منارس
و خلينا غادة ترجع هي و امها
حتى ثاني يوم يجيبون ملابس للبنات
فيروز : انا ابقى يم مُلاذ
اسكندر : انا هم ابقى وياج
أيهم : بس شخصين لازم يبقون بالغرفة
اسكندر : و هاي ياهو گال هالمعلومة؟
أيهم : انه
اسكندر : انا باقي هم
أيهم : فقط شخصين !
اسكندر : و ٣ اشخاص شيصير مثلاً؟
أيهم : تختنك المريضة يصير نفس بالغرفة
اسكندر : و شني فيل انا؟ حتى اذا فيل هم من يتنفس ما يسحب كل الاوكسجين
أيهم : هذا شي انت اعرف بي بعد
فيروز : اسكندر يمه روح انا ابقى
اسكندر : خاله بشرفج
يعني هسه انتِ مقتنعه بهالكلام
أيهم : و حضرة جنابك ليش ما مقتنع؟
اسكندر : ما معقولة تواجد ٣ اشخاص
ياثرون على المريضة!!
أيهم : انت شتصير منها؟
اسكندر : ابن عمها
أيهم : حلو يعني لا اخوها و لا ابوها
الست شتصير منها و البنية ؟
فيروز : امها و هاي البنية اختها
أيهم : هاهيه انحلت امها و اختها يبقن يمها
ماكو داعي لـ اشخاص زيادة بالغرفة
و خصوصاً انتوا جايين من برا
و ممكن تضرروها و غير معقمين
زفَر اسكندر بـ غضب
و طلع من الغرفة ، بس خالة فيروز وملاك ظلن يمها ، ظلينا كاعدين انا و عمه برا على الكراسي
كدام الغرفة ، حضنت عمه راسي و ميلته على كتفها
منارس : نورتي حبيبتي بنيتي
شصاير وياج يمه ، ليش ما تسولفيلي؟
حطيت راسي على كتفها مكسورة
دمعن عيوني و عبست شفتي
كل هالفتره ما نسيت بس قاومت
منارس : سولفي و الله اتفطر گلبي
انا امج اكثر من علياء و انتِ بنتي
همج و حزنج هذا جاي ياكل بگلبي
ما اتحملت اكثر روحي راحت
بجيت بـ حرگة و عيوني تصب
لزمت ايدها و حطيت راسي عليها
نور : عمه
منارس : سولفي ي بعد عمتج
سولفت الها كل شي من الالف للياء
الشهگه بـ صوتي و دموعي تنزل على ايديها
و هي مصدومة و تستمع الي موسعة عيونها
نور : عمه فدوة اخذيني اله
رح اموت اختنكت گلبي يوجعني
كل الصار ذنبي كل الصار انا السبب
ظلت عمتي مفزوعة و مفتحه عيونها بـ وسع
رغم صدمتها جرت راسي لـ صدرها
حضنتني و تبوس راسي و هي حاضنتني ناشغت و گلت و انا ابجي
نور : ابوس ايدج اخذيني اله
بعدت راسي عن كتفها تبجي
و تعتذر لان عافتني و طلعت
هزيت راسي بـ رفض
نور : عمه عمه لا تعتذرين
بس اخذيني لـ اركان الله يخليج
منارس : ليش ما سولفتي
ليش ما گلتي من البدايه؟؟
نور : ما جنت اكدر
الحيرة اتجسدت على ملامحها
نظرات القلق انبثت من عيونها
تسائلت اذا سوالي شي مثل اغتصاب
هزيت راسي بـ رفض
ثنينا دموعنا صارت ما توكف
اتقدم ناحيتنا جسار و سلطان
جسار : شبيكم ؟
مسحت دموعي بسرعة
و دحگت لـ عمة منارس
هزت راسها بـ رفض و گالت
منارس : ما صاير بجينا على البنات
حطيت ايديه على وجهي و جسمي يرجف
بجيت ما اكدر اسكت و الزم نفسي
مسحت دموعي ، عابسه شفتي
الدمعه بطرف عيني بس احد يحاجيني ابجي
راح سلطان يجيب النا مي
جسار و عزيز كعدوا يمنا
مسحت عمتي دموعها
منارس : شلونها البنية؟
عزيز : ما اعرف بقايا رصاصة باقية بكتفها
ما ادري شنو ، هسه راح ارد يمها
منارس : مو تعوفها خطيه
عزيز : هي هاي ياهي ؟
حجت عمتي مختصر اله عن البنية
زفروا نفس بغضب عزيز و جسار
عزيز : اولاد الكلب مدخلينهم ب فلم اكشن اولاد النعل ما يستحون يمدون ايدهم على بنية اذا ما اطلع مصارينهم بس اشوفهم ما اتسمى عزيز
گام معصب و راح يم صافيناز
شوية و شفنا الممرضين يدخلون سدية
و يتبعهم الدكتور ، گام جسار اتقدم عليه
جسار : ها دكتور المن هاي السديه؟
أيهم : علمود البنية المريضة الجوا
جسار : تسلم دكتور تعبناك ويانا
أبتسم و هز راسة
أيهم : واجبي
دخلوا السدية للغرفة
اتقدم علينا الدكتور
أيهم : اذا تريدون اكل او شرب الكافتيريا موجودة بس تستقر حالة المريضة و تصحى ابلغكم و اتفضلوا يمها
منارس : تسلم بعد عيني يمه ماتقصر
هز راسة الدكتور
و راح دخل لـ غرفة مُلاذ و وياه ممرضة ...
ملاك :-
دحگت للدكتور لمن دخل
و جايب سديه وياه
ساعدتني الممرضة اتمدد عليها
فيروز : تسلم يمه
هز راسه مبتسم
اتقدم جر كرسي كعد كدامي
أيهم : انطيني ايدج احطلج المغذي
ما انطيته ايدي ، متردده و اخاف
دحگت لـ امي هزت راسها بـ إيجاب
انطيته ايدي بـ هدوء حط الي المغذي
گال و هو يحط المغذي
أيهم : شسمج أنتِ ؟
ملاك : ملاك
رفع عينه دحگلي
و رجع دحك لـ مُلاذ هز راسة مبتسم
أيهم : يا صف ملوكه؟
دحگت ل امي ما اعرف شكد مر
و انا ما مداومة بس كنت ثاني متوسط
فيروز : المفروض هسه هي رابع اعدادي
أيهم : اها جميل ، يلا ننتظرج تصيرين دكتورة ويانا مبينه سباعيه
ابتسمت بـ حماس على كلامه
اومأت راسي بـ قبول
أيهم : تريدين تصيرين دكتوره ؟
لو شنو تريدين تصيرين؟
حجاها و گام ضرب ابره بالمغذي
ملاك : اريد اصير دكتورة اسنان
أيهم : حلووو ، يلا وعد مني
انه افتحلج العيادة و اكضلج وين العنده سن يوجعه و اجيبه الج
ابتسمت و امي ضحكت
هو هم ضحك ، راح على مُلاذ
وكف يمها
أيهم : الفو...
قبل لا يكمل كح و حط ايدة على حلگه
يكح ما انتبهنا لـ كلمته
أيهم : العفو
بلع ريگه و گال بصوت مبحوح
أيهم : المريضة يا مرحلة اعدادية لو متوسط؟
فيروز : لا ، كُليه المفروض هسه هي متخرجة
بس صارت ظروف بعد ان شاء الله تصير زينه
و ترجع تكمل
ضحك و گال
أيهم : اها ما جنت ادري
هزت امي راسها مبتسمه
أيهم : الحمدلله على السلامة مره ثانية
اذا تحتاجون شي الممرضين موجودين
كلولهم نريد الدكتور أيهم و همَ يبلغوني
هزينا راسنا بـ قبول
و طلع من يمنا الدكتور
اجت امي لـ يمي تمسح على ايدي
و ترجع تمسح على شعري
لحد الان ما مستوعبه تماماً
و خايفة يكون هذا حلم و اصحى منه
ماكو شي يفرحني كثر انا بين احضانها
لَكن الي وجعني هي مشلوله و عرفت قصتها
و انا بعدني ما ناسيه كل يلي صار
لكن الي معوضني عن كل شي
وجود امي بجانبي رغم هذا الشي
الخوف بعده متوسط گلبي
سولفت لـ امي كلشي ،
كلتلها شلون عذبونا و اذونا
و لمن حاولنا نهرب منهم بس ما كدرنا
بعدين فرقونا خلونا كلمن بمكان
امي تستمع الي عيونها مغرغرة بالدموع
كانت متندمه لان عافتنا و طلعت
رغم هذا الشي ما كان ذنبها ...
بعد فترة دخلوا نور و عمتي يمنا
اتقدموا عليه حضنوني و بوسوني
دخل ورا شوية سلطان و انطانا اكل
و اتبعه جسار ورا فتره اجو عزيز و اسكندر
و وياهم عمي احمد اتحمدولي بالسلامة
ظلوا ينتظرون مُلاذ تكعد بس ما كعدت
راحوا لان صارت الغرفة مزدحمه
بقت عمتي منارس و نور و سلطان و جسار
و الدكتور كل شوي يدخل يبدل مغذي لـ مُلاذ
سئلوا ليش مُلاذ لسا نايمة كال هذا الشي طبيعي و هي تحتاج راحة
عمتي منارس رفعت امي من الكرسي
و مددتها يمي سلطان و عزيز
راحوا بأمر من جسار
اكو قنفه صغيرة بالغرفة ،
اتمددت عليها عمه منارس
نور و جسار بقوا كاعدين
گالوا من نكعد احنا هم ينامون
جابوا كراسي و حطوها و كعدوا
فزينا الصبح على صوت مُلاذ
و هي تون بـ وجع ، رفعت راسي بسرعة
و امي فزت تريد تكوم ما تكدر
اجوا نور و جسار رفعوا امي
كعدوها على كرسيها ، راحت عليها امي
و هي تحرك بـ كرسيها ناحيتها
فزت عمتي منارس همين
راح جسار يصيح للدكتور
امي ظلت روحها تلوب على ونين مُلاذ
و انا هم خايفة عليها حيل
دخل الدكتور مستعجل و عيونه حمر
و هو يلبس بـ اللاب كوت
اتقدم على مُلاذ يفحصها اتبعته الممرضة
الدكتور يكللها اشياء تسويها
اخذ ابره تهدء الالم ضربها بالمغذي
ونت بـ ألم ، دارت عيونها ، دحگت للمكان
اتطلب منها دقايق حتى تصحى و ترجع لـ وعيها
مُلاذ :-
انرفع السواد مثل الستاره عن عيوني
غمضتهم بـ انزعاج على اثر ضوه قوي
اتغاوش النظر بيهم لـ ثواني
حسيت بـ ألم الرصاصة
كأنوا هستوه اخترق جسدي
ونيت من الوجع و روحي رايحة
مُلاذ : اخخخخ
لزمت بطني ، شفت ناس يتجهون نحوي
غمضت عيوني متوجعه و اسمع ضجة يمي
لـ مدة دقايق ما حسبتهم ، الألم بدا يهدء
درت بـ راسي متوجعه ، فتحت عيوني
احاول اشوف وين انا و منو يمي
شخصت عيوني بـ صدمة لمن شفت امي
تتجهه نحوي و هي على كرسي
حلگي حسيته اتخيط مكدرت انطق بـ كلمة
فرحة غمرتني هاي امي اجت الي !!
لَكن سرعان ما غابت فرحتي و فكرته حلم كالعاده اتقدمت ايدها على شعري ، ابتسمت بـ خفوت
حجيت بـ وهن ممزوج بالتعب ...
مُلاذ : يمه تعاليلي
فيروز : ها يبعد امج ها
اتصادر لمسامعي صوت بجيها
مُلاذ : شوكت اشوفج بالحقيقة؟
فيروز : هاي انا حقيقية
مُلاذ : لا حلم اعرف انا
فيروز : و الله حقيقية يبعد امج
مُلاذ : تعبوني يمه ، اريد ارد لـ حضنج
لزمت ايدي و بجت دنكت الي
فيروز : هاي انا يمج شوفيني
مسحت على خدي
و باست ايدي هالمرة فعلاً حسيت بيها يمي
اتطلب مني ثواني حتى استوعب هاي امي !!
انا مداحلم او اتخيل ، امي يمي
تدريجياً بديت استذكر كل يلي صار
نسيت وجعي و كل شي
نطقت مصدومة : يمممه !
بجت و هزت راسها
بمعنى " ها "
لزمت ايديها ما مصدكة
و عقلي حسيته متجمدد للحظات
دايخه كلشي و مداكدر اسيطر على روحي
حاوطت راسي بأيدها و دموعها تنزل عليه
ما مصدكة يلي كدامي امي
بوست شعري و كل وجهي
ظليت مصدومة و ادحك بالوجوه
معقوله هاهيه خلصنا ؟؟ لگونا و نفذنا ؟؟
بعد ما استوعبت
حسيت مي ثلج نزل على گلبي
دحگت لـ ضحكة ملاك يلي مختفية من زمان
رجعت بين اهلي رجعت لـ الامان يلي يم امي
حاولت تحضنني بس ما كدرت
اكتفت لازمه ايدي و تسئلني عن حالي
التفتت على صوت الدكتور
أيهم : ست مُلاذ
حسيت صوته بي رجفه خفيفة
او يتهيء الي ما اعرف
دحگتله و هو اردف مكمل
أيهم : شلون تحسين وضعج؟
مُلاذ : ألم ببطني
أيهم : هذا خياط العملية لا تخافين رح يخف
و رح اكتبلكم علاجات تخفف الوجع
لَكن بالاول لازم اوصيج ما تتحركين و ترافسين ...
رفعت حاجبي على كلمة "ترافسين"
و هو نطقها مبتسم و كمل بنفس الابتسامة
حسيته حاصر ضحكته گوه
أيهم : يعني بلا افراط بالحركة
مُلاذ : لا لتخاف ما ارافس
مو مطي انا الحمدلله و الشكر
أيهم : لا حشاج ست بس اقصد يعني
لا تتحركين هواي حتى ما تنفتح الخياطات
هزيت راسي و هو دار وجهه عني
درت وجهي لـ امي و ملاك و نور يضحكون
و من شافوني ادحگلهم سكتوا
حتى جسار يضحك وياهم !!
يعني هسه طلعت انا ارافس؟
طلع الدكتور اول ما طلع گلت
مُلاذ : هذا شكد غثيث
و انتوا عليمن تضحكون؟؟
ما اتحمل جسار و ضحك
خزرته ، سكت
مر اليوم على هالحالة
اخذوا ملاك للبيت و انا بقيت بالمستشفى
و روحي طلعت ما اكدر اسوي شي وحدي
اجا ضرغام و وياه ضباط ثانين
صاروا يسئلوني اسئلة عن الخطفونا
و شنو صار و شلون خطفونا
و منو شفت و منو ما شفت
و طبعاً اسكندر كان من ضمن الموجودين
حجيت الهم كل شي
لَكن اتخطيت موضوع الريس يلي قتلته
وصفت الهم شكل واحد من الملثمين
الي رفعت القناع عن وجهه
وصفت الهم شكل المكان
انطيتهم اسماء الملثمين يلي كدرت التقطها
سولفت عن النسوان يلي خاطفينهم و زينه
جابوا واحد يمي و خلوني اوصف شكل الملثم وصفت شكله تماماً بالتفصيل الممل
بعد عدة محاولات من الرسام
اتوصل للشكل المطلوب راسمه
مثل وصفي طبق الاصل ،
أومات الهم بـ راسي
حجيت الهم عن بيت شرف و الملهى
و الي يشتغلون هناك و شرف هو يلي مترأسهم
طلعوا من يمي و هم متأكدين راح يلقون القبض عليهم
خصوصاً لزموا شرف قبل لا يهرب
و لزموا وياه الحراس و الناس يلي عنده
لمن فتشوا بيته لكو عناوين ثانية
لـ اماكن ثانية و لگو مخدرات و عرك
و جنط من الفلوس لا تعد و لا تحصى
لگو صوري و صور ملاك و صور عائشة
و صور مريام و صور النا و احنا نايمين
و انا اركص و انا اكل و انا اتعارك
و انا اريد ابدل صور تشيب الراس
و كلهن عرضهن اسكندر كدامي
سئلني عن كل شخص بالصور
و صور ثانية لـ ناس ما اعرفهم
شرف المريض مصور نسوان دمهن بـ طولهن
ما اعرف يتلذذ بهالصور لو شنو ؟!!
و صور رقاصات كانوا ويانا
و منهن صورة لـ صافيناز و هي ترقص
هواي اشياء راواني اسكندر
و سولفلي و گال شرف ما اعترف لحد الان
لَكن رح يخلونه يعترف ...
اسكندر : ليش ما اتصلتي عليه
و اتصلتي على ضرغام؟؟
مُلاذ : ما جنت اتذكر رقمك
و ضرغام مره انباك بيتنا
و انطانا رقمة بقى عندي و حفظته
اتحول الشخص الطبيعي الجان كدامي
و انگلب جلب ، اي نعم جلب
اسكندر : اي رقمة تذكري بس رقمي ما تذكري
كاتلج ضرغام كتل شدعوه هلكد حافظة رقمة؟
لو مخابراتكم ما جانت تخلص
مُلاذ : انت حيوان؟؟؟ لو حيوان؟
هستوني كلت بدا هذا ينعدل
تالي رديت انجلبت ، شجاك ما تكلي شجاك ؟ الجلابية تمشي بـ دمك انت؟؟
وين اتذكر رقمك ؟؟؟ و نوب وضعي اخيس من الخيسة اكعد اخذ خيرة و انا اتذكرك؟؟
ظل يمسلت و انا منا وجع الخياط
اجيت اهفة بالمغذي لو ما داخلة امي
بعد ما راحت للصحيات بـ رفقة عمتي
خزرني اسكندر رديتله الخزره ، عافني و طلع
مُلاذ : حيوان جلب اثول مطي ثور
دحگولي ما فاهمين
التفتت عليهم قبل لا يحجون شي
مُلاذ : لحد يسئلني شكو
هدرت نفس هواي و انا احاجي هالحيوان
سكتن و هنه اصلاً ساكتات
ما حجن شي
اخذ حيز من تفكيري
شلل امي بسبب الجلطة
حسمت قراري اول ما اصير زينه
انا اخليها ترجع تمشي و اعالجها
الفرحة جانت غامرتني لـ رجوعنا ، لَكن ما نسيت انتقامي من شرف و الچتال بس هاي المرة راح يكون كل شي بالشكل القانوني و بـ عقلانية ، و القادم اعظم مني الهم
بقيت بالمستشفى لـ ايام
انتبهت لـ وجود شخص يوكف بـ باب غرفتي
لمن يفتحون الباب اشوفه
ما ارتاحيت ابد لـ هذا الشخص
غاده اجت الصبح و رجعت لان امها و ملاك
و صافيناز وحدهم وداها جسار ، و اخذوا امي وياهم للبيت تسبح و تبدل و يجيبون الي علاجات
بقت نور يمي و اشوف الحزن واضح بعيونها
مُلاذ : نوره
فزت من صفنتها و اندارت الي
نور : ها عيني؟ تحتاجين شي؟
مُلاذ : شصاير ؟
نور : شنو ؟
مُلاذ : شصاير ؟ من رجعت ما لكيتج مثل قبل
تنهدت بـ ضيق و هزت راسها بـ نفي
نور : ما صاير شي
مُلاذ : امج مضوجتج؟
نور : لا
مُلاذ : ابوج ؟
-لا
-اسكندر؟ او عزيز ؟
-لا
رفعت حواجبي و گلت بهدوء
-اركان؟
اول ما گلت اسمه
دحگتلي بـ عيون مملية بالدموع
و انفجرت تبجي بصوت مكتوم
ايدها على حلگها و ترجف مو بـ انصاف
عدلت كعدتي ما فاهمه
مُلاذ : نور؟؟ شصايرررر!؟
رفعت عينها دحگتلي تبجي
ما اكدر اكوم و اروحلها
مُلاذ : نور احجي ما اكدر اجي لـ يمج
احجي يمكن اكدر اساعدج
حطت ايديها على وجهها كلها ترجف
نزلت ايدها تشهك و تبجي و تفرك بـ رجلها
نور : ضيعت حياته بـ ايدي مُلاذ
عگدت حواجبي مستغربه كلامها
مُلاذ : شلون ؟؟
كامت تتمتم و بعد لحظات
سردت الي كل يلي صار وياها
بـ ذيج الليلة المشئومه حسب ما سمتها
و هي تتغصغص ظليت مذهوله
و مصدومة جربت شعورها شنو
يعتدي عليك شخص و حتى لو ما سوالك شي
بس تتمنى تموت الف مرة
و لا تعيش ذاك شعور الخوف و الفزع
من صدمتي كامت اطرافي ترجف
نور ما حصلت خبر عن اركان ابد
و لا تكدر تسأل احد
اول كلمة يگولوها اذا سألت
" و أنتِ ليش تسألين؟"
بعد ما اختفى اركان
اختفوا اهل اركان همين
يعني ما تكدر تحصل اي خبر عنهم
مسحت وجهي بـ حيرة
و هي تتنحب و تبجي اشرت الها بـ ايدي
مُلاذ : تعالي
دحگتلي ما فاهمه
رجعت كررت : تعالي عيني
اجت ناحيتي ، كعدت يمي
ضميتها لـ صدري و انا امسح على ظهرها
فرغت كل البجي يلي بداخلها و جسمها يهتز
و ضاغطه على ظهري كل قوتها فد انقهرت
يا ربي هاي البنية شوكت ترتاح ؟
منين تتلكاها؟
نور : مُلاذ جاي اموت و الله جاي اموت
روحي جاي تنسلب مني و الله
خفت و عيطت و لو ادري اركان رح يسمع
ما كان طلعت صوت ، شيصير بيه خل يصير
بس هو خل يظل سالم
منو لـ امه و خواته غيره ؟
منو يكدر يحميهن غيره ؟
منو سند الهن و منو يحبهن غيره ؟
بعَدت وجهه من ركبتي
حطيت ايدية على خدودها المختفيات
مُلاذ : متأكدة ابوه مات ؟
نور : ما اعرف
مُلاذ : اهله شلون اختفوا ؟
نور : ما اعرف دكيت بابهم شكد
محد فتحلي و هاي ام قاسم گالت راحوا منا
محد افتهم ليش و شنو السبب
مُلاذ : يمكن ابوه ما مات ؟!
نور : بس شلون ؟
شلون ؟ كدام عيني جان ينزف
مُلاذ : اذا انطعن بـ ظهره حتى لو نزف
ممكن يكون ما ميت اركان ما گال هو مات
و لا تخافين انا اشوفلج اركان و شنو وضعه
دحگتلي و مسحت خشمها
گالت بـ انعدام تصديق : صدك؟؟
مُلاذ : و الله
نور : شلون ؟
مُلاذ : انا اعرف لا تشغلين بالج هسه انتِ
بس انتظروا خل اطلع منا
تردلكم مُلاذ مثل قبل و احسن
حضنتني و هي تبجي و تتشكرني
مسحت على ظهرها ، ابتعدت و طلعت تغسل ...
نور :-
ارتاحيت لمن مُلاذ گالت
هي تشوفلي اركان وين
لان اعرف مُلاذ ما تحجي شي اذا ما تنفذه
رحت اغسل وجهي
و كفت بحديقة المستشفى اجر نفس
اختنكت كلش داخل المستشفى
هدأت نفسي و شربت مي
اخذت وياي كم شغلة لـ مُلاذ
و رجعت متجهه لـ غرفتها
و انا امشي و مرسومة ابتسامة على ثغري
حاسة و واثقة مُلاذ رح تحصل خبر
فزيت و طاح الاكل من ايدي ، اتجمدت بـ مكاني بعد ما اتصادر لـ مسامعي صوت صراخ عالي
يصدر من الغرفة يلي بيها مُلاذ ...
يتبع ...
______________
- يتبع الفصل التالي اضغط على ( رواية جرح الأيهم ) اسم الرواية