رواية يكفيني منك عقابا الفصل السادس عشر 16 - بقلم بقلم عبير سليم

 رواية يكفيني منك عقابا الفصل السادس عشر 16 - بقلم بقلم عبير سليم 

الحلقه السادسة عشر

يكفيني منك عقابا

😒😒😒😒😒😒

القدر تلك الكلمه تعني الإيمان بكل ما يكتبه الله لنا و يقدره علينا فقد يغير حياتنا فجأة و يأخذنا لعالم لم نسع له يوما و نلتقي بأشخاص لم ترهم أعيننا من قبل و تبدأ حكايات يسطرها الزمن لنا

أقف حائرة أمام ما يحدث لهم أود لو أغير حياتهم لما ترضونه و لكن ليس بيدي شئ سوى رؤية ما يحدث معهم و تسجيلها لكم ليس أكثر

ها أنا الآن أجلس في حديقة ذاك المنزل اشم رائحة المطر الجميله أقف على ذاك الثرى لأشاهد ما يحدث بداخله إنها هي بطلتنا تخرج برفقة خادمتها المقربه لها من غرفتها 

كم انا حزينه لأجلك يا عطر إلى أين انت ذاهبه في تلك الساعه المتأخرة نعم فلقد نسيت انك كنتي تتألمين و تريدين الشراب الدافئ في تلك الليله الممطره شديدة البروده و لكنهما يستمعان لصوتها تلك التي لها الفضل فيما ستقرره عطر

و هنا تقف فرحه فجأة

عطر : وجفتي ليه

فرحه : هس وطي حسك

عطر : ليه

فرحه : انتي مسمعتيش

عطر : لا مسمعتش حاجه

فرحه : سمعت صفيه بتنطج اسمك

عطر : سيبك منيها اني مفايجاش لحاجه واصل

فرحه : لا اني محتحركش غير لما اسمعها بتجول إيه عليكي و عايزة منك إيه 

عطر : عيب أكده يا فرحه حنتصنت عليها اياك

فرحه : ايوة نتصنت أصلي انتي طيبه و على نياتك و اني خابراها زين

أني جلت أكده اه ما ني مش عبيطه و لا هبله و انتي يا وليه انتي ازاي تخبي علية حاجه زي أكده كان لازم اجرجرك في الكلام عشان اعرف

 

فوزيه : حجك علية يا ست صفيه و الله ما اجصد و اني من ميته بخبي عنك حاجه

صفيه : أمال ليه خبيتي علية ان اللي متتسمى ديه حبله

فوزيه : أعمل إيه بس أصل فرحه حلفتني مجلش لحد و هي أصلا مكنتش عايزة تجوللي و كل ما اسألها تفضل تلف علية في الكلام لحد ما حلفتها و طمنتها اني محنطجش و لا حجول لحد واصل

صفيه : يعني معناته إيه الكلام ديه يعني دلوك البت ديه حبله و حتجش كل حاجه طبعا ما هي حتجيبلهم الولد اللي الهبله بتي معارفاش تجيبه

بكرة لما محمد و عايشه يعرفوا الدنيا محتساعهمش من الفرحه و حينططوها علينا و يخلوها فوج الكل و اني محسيبهاش تتهنى بأي حاجه بت ناهد 

فوزيه : و حتعملي إيه بس يا ست صفيه

صفيه : لا لو عالعمايل فأني حعمل كتير جوي و انتي حتساعديني

فوزيه : أساعدك في إيه

صفيه : حنخلص منيها و من اللي فبطنها

فوزيه : يا لهوي لا يا ست صفيه الله يخليكي بلاش الاذيه ديه غلبانه جوي و فحالها بصي بعدي عنها و خلاص 

صفيه : اخرسي يا وليه انتي اتجنيتي و اللا ايه حتجوليلي اعمل ايه و معملش إيه

إيه عايزاني اجعد و استنى لما بت ناهد تحط يدها على كل حاجه و تبجى هي الكل في الكل اهنيه و طبعا مش بعيد وجتها يحرضوا زكريا عشان يتجوز على بتي عشان يخلف هو كمان

لا أني حخلص منيها و محيطلعش عليها صبح

فوزيه : بس أكده ممكن نروحوا في داهيه

صفيه : لا متخافيش اني حرتب كل حاجه و دي فرصتنا محدش اهنيه لا محمد و لا يحي يعني نجدر نعمل اللي احنا عايزينه فيها

فوزيه : و الحكومه حتسيبنا يعني

صفيه : يبجوا يثبتوا بجى انى مش عيله صغيرة اني عارفه اني حعمل ايه

المهم دلوك تسمعيتي زين و اني حبجى معاكي و الصبح محيطلعش عليها غير و هي متكف#نه انتي فاهمه و اللا مفهماش

فوزيه بخوف : لا و النبي يا ست صفيه اني معاوزاش أعمل حاجه أكده اني عايزة افرح ببتي معايزهاش تتعاير بية

صفيه : لو انتي عايزة تفرحي ببتك كيف ما بتجولي يبجى تسمعي الكلام

فوزيه : الله يخليكي بعديني عن الاذيه ديه

صفيه : انتي فكرك اني محعرفش اتصرف لوحدي إياك لا تبجي لسه متعرفيش مين صفيه ديه اني الشيط# ان نفسه يجف و يتعلم مني لكن انتي عارفه لو منفذتيش اللي حجولك عليه اني حعمل فيكي ايه حخرجك من البيت اهنيه بفضيحه يا اما عالشارع يا عالسجن و تبجي تعالي جابليني لو حد طل في وش بتك انتي سامعه و اللا لاء

فوزيه بخوف : حاضر حاضر

😒😒😒😒😒😒😒

في أحد الفنادق الكبرى بالقاهرة يجتمع كل من عز و يحي و نيللي و جاسر و المنتج و معهم فريق العمل يتفقون على بقية تفاصيل العمل و الأجر الذي لم يتفقوا عليه حتى الآن

نيللي : مالك يا حبيبي متضايق ليه كده

جاسر : يعني مش عارفه و اللا بتستعبطي

نيللي : لا و الله مش واخده بالي

جاسر : مسمعتيش الأجر اللي حياخده يحي أد إيه ده انا مش حاخد ربعه ليه ان شاء الله هو أحسن مني في ايه عشان يبقى الفرق ده كله بيني و بينه

نيللي : لاحظ إن دور يحي في المسلسل أكبر بكتير من دورك يا جاسر و عالعموم متضايقش نفسك انا حكلم عز في الموضوع ده

جاسر : ماشي اما اشوف

نيللي :طب متكشرش بقى عاوزة اشوفك مبسوط

جاسر و هو بيمسك ايدها و يبوسها : و انا اقدر بردو ابقى متضايق و القمر معايا

كانت عز عيونه عليهم قلبه يتمزق من شدة حبه لها و لكن ليس بيده شئ 

بينما يحي كان في عالم آخر ممسك بهاتفه يقلب فيه و هو يشاهد صوره مع عطر يتذكر كل موقف التقطوا فيه كل صورة يبتسم و يشعر بالاشتياق الشديد لها

عز : بتعمل إيه يا يحي بتلعب في التليفون هو ده وقته

يحي : عز أنا عايز أرجع الصعيد

عز : نعم إنت بتهزر يحي متجنينيش ده مش وقته خالص

يحي : معلش يا عز صدقني مش قادر وحشتني أوى بفكر فيها طول الوقت 

عز : ما قلنا كده قلتوا اطلعوا من البلد

يحي : غصب عني يا عز انا بجد مكنتش متخيل إني أكون حبتها

عز : هههههه بردو مينفعش

يحي : مش حتاخر و الله هما يومين أطمن عليها و افهمها كل حاجه و ارجع

عز : يحي بلاش لعب عيال دي فلوس ناس مش هزار و بلاش تخللي حد ياخد عنك فكرة إنك مستهتر و بتخسر المنتج و انت عارف كله الا المنتج بلاش تخسر حد من أولها و انت لسه على أول السلم

و الوسط بتاعنا لو طلعت على حد اشاعه بتلزق فيه

يحي : طب اعمل ايه دلوقتى شوفلي حل 

عز : ما تكلمها يا يحي أمال التليفونات ديه لزمتها ايه

يحي : مانا قلتلك اللي فيها

عز : يحي بلاش حجج ملهاش لزوم ما هو بردو مش طبيعي إن واحد يسبب عروسته الفتره دي كلها من غير ما يطمن عليها أو حتى يسمع صوتها

يحي : اهو اللي حصل

عز : و هي ما حاولتش تتصل عليك

يحي : لاء و ده اللي حيجنني أكتر بس أنا عاذرها أنا سيبتها و مشيت فجأة و شفت حالتها كانت عامله إزاي و حتى ما هديتهاش و لا بردت قلبها بكلمه فأكيد هي زعلانه مني و مقدرش ألومها و لا اعتب عليها

عز : خلاص يا يحي يومين حخليك تصور عدد كويس من المشاهد و بعد كده تقدر تسافر بس هما يومين مفيش غيرهم و ترجع

يحي : متشكر اوي يا عز

عز : طب ممكن بقى تقفل تليفونك ده و اللا تعمله صامت لحد ما نمشي عيب كده يا يحي

يحي : حاضر يا سيدي حعمله صامت اهوه

اصلا هو خلاص قرب يفصل شحن

عز : احسن بردو

عند عطر

حاولي تاني يا عطر

عطر بدموع : مبيردش يا فرحه مبيردش علية رنيت عليه كتير اكتر من عشر مرات 

فرحه : طب حنعمل إيه دلوك لزمن نتصرف و بسرعه اني خايفه عليكي جوي من العجربه ديه و محدش اهنيه حيعرف يحوشك عنها و ما دامت حطتك في دماغها محتسيبكيش واصل و اني معايزاكيش تعيشي في رعب طول الوجت

عطر : حتصرف كيف اني معارفاش و لا فاهمه حاجه هو انى ليه بيحصل معايا اكده انى عملت ايه وحش في دنيتي يا ربي عشان يحصللي كل ديه

فرحه : نصيب يا حبيبتي معلش بجولك ايه مفيش جدامك غير انك انتي تروحي دلوك على بيت عمك

عطر : لاء بيت عمي لاء

فرحه : ليه بس يا عطر هما اللي حيعرفوا يحموكي منيها و من شرها

عطر : عتاب

 لا لا معاوزاش اخرب عليها ديه اني بجول ربنا يحنن جلبه عليها

فرحه : اني مفهماش حاجه مالها عتاب 

بصي يا عطر انتي خايفه على نفسك و على اللي فبطنك و اللا لاء

عطر :اني مخايفاش على نفسي و لا تهمني من أساسه لكن بتي

فرحه : هي بت

عطر : جلبي حاسس انها بت 

فرحه : يبجى لزمن تحافظي عليها 

عطر : أيوة اني لزمن أحافظ عليها مهمن حوصل و لآخر نفس في عمري ديه هي ديه اللي بجت فاضلالي من الدنيا و معنديش استعداد اني اخسرها أو تضيع مني نهائي

فرحه : طب اتصلي تاني يمكن يرد

تحاول تتصل كتير لحد ما فجأة تلاقي الرد : الهاتف الذي تحاول الاتصال به مغلق او غير متاح حاليا من فضلك حاول الاتصال به في وقت لاحق

تقذف بالهاتف على الفراش و تبكي بمرارة : جفل تلفونه يا فرحه جفل تلفونه عشان ميردش علية زهج خلاص من اتصالاتي و معاوزش يرد

بس اني غبيه اني ازاي مستنياه يرد و هو اصلا معبرنيش و لا فكر يتصل علية مرة واحده

يتصل... حيتصل يجول إيه يجول معلش اصلي اتجوزتك غصب عني أني غبيه و استاهل كل اللي يجرالي 

و زي ما هو معاوزش يرد علية  اني كمان ماحستناهوش يرد و لا ياجي يلحجني انى حعرف ازاي احافظ على نفسي و أحافظ على بتي اللي معادش لية غيرها في الدنيا 

فرحه الله يخليكي تعالي ساعديني بسرعه مفيش وجت 

😒😒😒😒😒😒😒

بعد مرور بعض الوقت 

ظلمات الليل تعم المكان جميعه و صوت نباح الكلاب الضاله و عواء الذئاب يشق ظلام الليل الحالك بينما هي تمشي بخطوات بطيئه خائفه من أن تسرع في خطواتها فتتعسر و تذل قدميها في ذاك الوحل من الطين الذي خلفته وراءه مياه المطر تحكم ذاك المعطف الذي ترتديه على جسدها لعله يحميها من ويلات البرد القارص الذي تشعر به تضع يدها على بطنها و كأنها تطمئنها على أنهما سيكونان بخير عندما يبتعدان عن ذاك المكان و ما فيه من عذاب

تأخذها قدماها إلى بيتها الذي عاشت به لسنوات تنظر إليه من بعيد بعينين تفيضان حزنا ودموعا و كأنما تودعه الوداع الأخير ترفع عيناها لترى عتاب تفتح شرفتها و تقف بها متأمله وجه السماء فتختبئ سريعا خلف الأشجار حتى لا تراها او تشعر بها 

يخرج إليها عامر فيحتضنها من ظهرها : حبيبتي واجفه في البرد أكده ليه

عتاب : حسيت اني مخنوجه جوي و مجدراش اخد نفسي

عامر : سلامتك يا حبيبتي بس انتي حرارتك نزلت الحمد لله

عتاب : معارفاش يا عامر خايفه يكون عطر فيها حاجه جلبي متوغوش عليها جوي 

عامر : خلاص الصبح ابجي روحيلها اطمني عليها و دلوك يا للا تعالي ندخل الجو برد جوي عليكي و اني مصدجت انك اتحسنتي

 يأخذها و يدخلوا و يغلق الشرفه بينما عطر تمسح دموع عينيها : يا حبيبتي يا عتاب حتوحشيني ربنا يسعدك و يهنيكي يا رب 

😒😒😒😒😒😒😒

يعود إلى منزله الذي يعيش به و هو لا يبعدها عن تفكيره لحظه طوال الطريق يفكر بها

ينظر لصورة زفافهم التي يضعها بجواره من وقت ان شعر بحبه لها : خلاص يا عطر اني راجعلك مبقتش قادر على بعادك اكتر من كده عارف انك زعلانه مني يا حبيبتي

حبيبتي ايوة انتي حبيبتي يا عطر و عمري ما حبيت و لا ححب غيرك حقولهالك بأعلى صوت و حطمن قلبك اللي انا عارف انه موجوع مني

يضع الصورة و يمسك بالهاتف و الذي قد فصل شحن دون ان يشعر و يضعه في الشاحن و يذهب للحمام ليأخذ حماما و ينام حتى ينهي المشاهد التي اتفق عليها مع عز ليعود سريعا إليها

يخرج من الحمام ليجده ما زال مغلقا فيقوم بفتحه و أثناء ارتداء ملابسه يسمع صوت الهاتف الذي يعلن عن كثير من الرسائل

يجلس على الفراش ليرى الكثير من اتصالات عطر و بعد ذلك يرى محاولات للاتصال به بعد ان فصل الهاتف من الشحن

قلبه يشعر بأن هناك خطب ما كيف لها أن تتصل عليه كل هذه الاتصالات

يجد نفسه يقوم بالإتصال عليها سريعا و لكن يجيئه نفس الرد الهاتف مغلق حاول الاتصال في وقت لاحق

يحاول الاتصال بها كثيرا و بعد فترة من الوقت و بعد ان أصابه اليأس قرر الاتصال على عز

 ايوة يا عز انت سامعني

عز انا بعتذرلك انا لازم اسافر الصعيد دلوقتى حالا 

عز : ليه حصل حاجه

يحي : مش عارف حصل حاجه و اللا لاء بس قلبي بيقوللي ان في حاجه

مش عارف بابا ماما او حد منهم او حتى هي

عز : يحي انا مش فاهم حاجه هو احنا مش لسه سايبين بعض امتى حسيت ان في حاجه

يحكي له يحي

عز : طب ما تتصل على مامتك او اخوك اوباباك ده إيه الذكاء ده عالاقل تطمن

يحي : لا يا عز انا مش حتصل على حد انا حاسس انها هيا اللي عاوزاني

يحاول عز تهدئته و لكنه يصر على السفر مهما كان الثمن فيراعي عز حالته و يسمحله على الا يتاخر و يعود سريعا

يقوم يحي و يرتدي ملابسه و يعد شنطة سفره استعدادا للرحيل إلى الصعيد

😒😒😒😒😒😒😒😒

ينهي صلاته ليجد ابن اخيه يحدثه : تقبل الله يا عمي

محمد : منا و منكم يا زياد

أجعد يا حبيبي أني عايز اتكلم معاك

زياد : اتفضل ياعمي اني سامعك

محمد : دلوك الحمد لله الست والدتك بجت صحتها أحسن شويه و الدكاترة جالوا اننا ممكن ننجلها أسيوط عندنا في مستشفى أكبر

زياد : يعني حناخدها من اهنيه

محمد : ايوة يا بني انتوا خلاص حتمشوا من اهنيه جه الأوان انكم ترجعوا بلد ابوك و تكمل حياتك وسطهم

زياد : أيوة بس يا عمي

محمد : مفيش بس يا زياد اني سيبتك السنين دي كلها اهنيه مش عشان حاجه غير انها كانت وصية ابوك الله يرحمه لكن دلوك خلاص بكفايه أكده انت حتدخل الجامعه عندنا و حتشوف أختك الوحيده و حتعرفها و تكون سندها و تعيش في بيت ابوك بيتك يا زياد

زياد : بس اني خايف يا عمي ما يتجبلوش وجودي

محمد : اللي مش عاجبه يخبط دماغه في الحيط انت ليك حج زي اي واحد فيهم و اكتر كمان و اني خلاص يا بني تعبت و مبجتش حمل السفر كل شويه لاهنيه و لزمن تاجوا معايا و تكمل حياتك وسطنا

زياد : اللي تشوفه يا عمي

محمد : اللي اشوفه انك تجوم دلوك تبتدي تحضر حاجتك و اوراجك اللي حتجدم بيها في الجامعه يا دكتور زياد

زياد : حاضر ربنا يخليك لينا يا عمي

محمد : و يباركلي فيك و يخليك لينا يا ابن الغالي

♥️♥️♥️♥️♥️♥️♥️♥️♥️

يقود سيارته متوجها إلى الصعيد يحلم بتلك اللحظه التي سيحتضنها فيها و يشعر بدفء احضانها و يشم رائحتها و يخبرها بكل شئ و يترك لها حرية الاختيار في اصطحابها معه للقاهرة أو بقائها في الصعيد

بعد مرور عدة ساعات

يستيقظ الجميع من نومهم بينما هي لا تريد أن تعلن عن استيقاظها بل انها لم تنم طوال الليل حزينه لفراقها و خائفه عليها لا تعلم إلى أين اتجهت و ما الذي ينتظرها

تسأل نفسها كيف ستخبرهم بما حدث و انهم على يقين بانها كانت اقربهم لها في هذا البيت

تطلب عائشه من فوزيه أن تصعد لتنادي عليها لتنزل و تتناول معهم الفطور و لكنها تنزل سريعا و تخبرهم بعدم وجودها يتعجبون من هذا الأمر يبحثون عنها في البيت بأكمله فلا يجدون لها اثرا يصعدون لغرفتها فيجدوها قد أخذت الكثير من ملابسها فأين هي ذهبت

تتصل عائشه على زينب لتسالها هل ذهبت إليهم و لكن زينب تنكر وجودها عندهم و انها لم تزرهم منذ فترة

 يزداد القلق و الخوف من إصابتها بمكروه

تتعالى الأصوات في البيت عن سبب اختفائها و عن طريقه للعثور عليها فإلى أين ستذهب و هي ليس لها مكانا سوى هذا البيت او بيت عمها

عائشه في حيرة ماذا تفعل : انتي فين يا عطر يا ترى رحتي فين يا بتي

تجلس بالقطار منتظره وصولها إلى القاهرة تعيش مع ذكرياتها منذ أول يوم دخلت فيه بيت يحي و حتى تلك اللحظه تضع يدها على بطنها بين الحين و الآخر و كأنما تطمئن جنينها أنهما بخير

تستند برأسها على زجاج النافذه تفكر ماذا سيحدث عند معرفتهم باختفائها حقا ستنقلب الدنيا و لكنها سرعان ما ستهدا و يعيش كل منهم حياته و لكن انت يا أختي يا رفيقة عمري كيف سيكون حالك اعلم انك ستتالمين و لكنني ساطمئنك فقط اطمئن على نفسي و على جنيني اولا

اجطع دراعي اما كانت طفشت مع حد

عائشه : عيب يا صفيه متجوليش اكده عطر بت ناس و متربيه

صفيه :متربيه و هيا في واحده متربيه تسيب بيت جوزها و تمشي و محدش يعرفلها مكان

اكيد حد غاواها و مشيت معاه البت ديه لزمن تعرفوا راحت فين و تغسلوا عاركم بيدكم

زينه : لا يا اما متجوليش اكده عطر متعملهاش واصل عطر مش خاطيه

صفيه : امال خدت خلجاتها و راحت فين تجدروا تجولولي ديه لا راحت عند أهلها و لا حتى عند جبر ابوها و امها تكون راحت فين عاد ايه راحت تتفسح إياك

دي بت ناهد جادرة و عينها بجحه تلاجيها مخططه و مرتبه لكل حاجه ياللا افرحوا بالنسب العرة اللي نسيبتوه و اتحملوا بجى اللي حيتجال عليكم في البلد و بكرة محتخلصوش من لسنة الناس 

خبط جامد على الباب

تفتح فوزيه الباب و يدخل هو و عامر و عتاب و جواهم نار قايده

فين بت اخويا وديتوا عطر فين

زينب : و الله ما نعرف يا حاج احنا صحينا من النوم ملجينيهاش و جلبنا عليها الدنيا ملهاش اثر 

عامر : يعني إيه ملجيتوهاش انتوا عملتوا فيها ايه

صفيه : و احنا حنعمل فيها ايه يا عامر شوف بتكم هي اللي طفشت مع مين و راحت على فين

عتاب : جطع لسانك ولية جليلة الحيا أني اختي اشرف من الشرف و مش بعيد تكوني عملتي فيها حاجه

أنا عايزة اختي هاتولي اختي

تنظر لفرحه التي تقف جانبا و تبكي لفىاق عطر : فرحه تعالي يا فرحه هو انتي بردك مش كنتي بتحبي اختي و هي و الله  بتحبك جوي و بتجول انك أجرب واحده ليها في البيت ديه اكيد انتي عارفه حاجه جولي الله يخليكي جولي اختي راحت فين

فوزيه : و هي بتي حتعرف منين بس يا ست عتاب بتي نايمه جاري من المغرب و ملهاش صالح بحاجه

نعمان : يعني انتوا مش عايزين تجولوا البت راحت فين لا ديه اني اجيب عاليها واطيها

انتوا فين رجالتكم واحد جاعد أهوه لا بيهش و لا بينش فين محمد الطحاوي فين جوزها اللي ائتمنته عليها مشي و سابها لشوية حريم يبيعوا و يشتروا فيها

زكريا : ليه بس أكده يا عمي الحاج ديه ربنا يعلم و الله احنا كلنا زعلانين كيف و اني لفيت و ملجتلهاش اثر ديه اني رحت الترب جلت يمكن هناك بردك ملجتهاش

 وابويا في جنا مهواش اهنيه من أساسه

نعمان : انى مليش صالح بكل ديه المهم دلوك اني عايز بت اخوي انتوا اكيد اذيتوها و اني محسيبكمش واصل 

صفيه : روح دور عليها تلاجيها عشجت واحد و مشيت معاه ما هو مش غريبه عنيكم و لو انت راجل صوح يا نعمان تغسل عارك بيدك

و اللي معملتوش زمان اعمله دلوك

يقدم عليها نعمان بالعكاز 

عامر: لا يا بوي من ميتى و احنا بنمد يدنا على حريم

نعمان : ماسامعهاش بتجول ايه من ميتى و احنا حد يجدر يتجرا علينا أكده كلامك ديه يطير فيه رجاب ربنا ينتجم منك يا صفيه ربنا يردهولك في اعز ما ليكي

اصل انتي فاكرة كل الستات زيك تجري ورا الرجاله اني بس افوجلك و اني حعرفك مجامك زين الله يرحمك يا سالم معرفتش تختار زين

عتاب بصريخ : حرام عليكم كفايه انى عايزة اختي عايزة عطر انتي فين يا عطر ردي على اختك يا حبيبتي 

دخل البيت يجري  على أصواتهم العاليه و على صوت عتاب و هي بتقول انى عايزه اختي هاتولي عطر

في ايه ايه اللي بيوحصل اهنيه و فين مرتي

يمسك نعمان بملابسه : تنك جيت يا يحي هي ديه الأمانه اللي اني وصيتك عليها بس اني المحجوج اني المحجوج اني وافجتها و جوزتها ليك ضيعت بت اخوي يا يحي سيبتها و هملتها و ضيعتها يا واد الطحاوي

يحي : ضيعتها اني كيف اني سافرت لشغلي و سايبها اهنيه مع أهلى فين عطر يا اما فين عطر يا خالتي فين مرتي 

صفيه و هي حاطه ايدها فوسطها : مرتك طفشت يا حبيبي خدت هدومها و فكت من اهنيه شوف بجى مين اللي غاواها و هربت معاه

يحي : ايه اللي بتجوليه ديه يا خالتي هي مين ديه اللي هربت

فرحه : لا لا متصدجهاش يا سي يحي اوعى تصدج حاجه زي اكده عطر مفيش أشرف منيها دي بتحبك جوي و كانت جاعده مستنياك تاجي عشان تفرحك انها حبله

يحي : ايه انتي بتجولي ايه عطر حبله  ميتى ديه و هي فين راحت فين عطر فين اني مش فاهم حاجه

صفيه : كمان حبله تبجى بانت اهيه زي الشمس تلاجيها عملت عملتها و خافت لتتفضح فهربت

عامر و هو ينقض عليها : أني اللي حخنج#ك بيدي دول لو جيبتي سيرة بت عمي على لسانك الزفر ديه

فرحه : حرام عليكي يا ست صفيه انتي ايه مبتخافيش من ربنا كيف تجولي على عطر اكده و انتي عندك زيها لا لا متصدجوهاش دي كدابه ايوة اني حجولكم على كل حاجه اني محخافش و معنديش حاجه اخاف عليها   كيف ما امي خافت منك و كانت حتنفذ اللي طلبتيه منيها صوح يا اما صوح و اللا اني كدابه جولي جولي الحج متخافيش وكيلك ربنا عشان اللي بتجوله ديه ظلم و ربنا ميرضاش بالظلم واصل

ايه يعني حيطردونا من اهنيه يبجى احسن بردك اني اصلا محجعدش اهنيه بعد ما حبيبتي مشيت

 اسمعني يا سي يحي و اسمعوني انتوا كمان عطر حبله و يوم ما عرفت انت تاني يوم سافرت و ملحجتش تجولك و هي حلفت علية اني مجيبش سيرة لحد واصل لأنها كان نفسها انك انت اللي تعرف اول واحد و كانت مستنياك تاجي و كل شويه تجول حيتصل و انت مكنتش بتتصل بيها خالص هي مكنتش بتبطل عياط و كنت واحشها جوي و اني و الله كنت بحاول اخفف عنيها على جد ما اجدر و هي يا حبيبتي كانت صابرة لحد ما ترجع لها 

و امبارح بالليل تعبت و اخدتها و نزلنا تحت عشان اعمللها حاجه تشربها و سمعنا الست صفيه بتتفج على اذيتها و جالت انها محتسيبهاش تتهنى بحبلها و لزمن تخلص منيها و ن اللي فبطنها جبل ما تعززوها و تكرموها

صفيه : البت ديه كدابه اني بردك حعمل اكده ليه ان شاء الله دفعتلك كام عشان تجولي الكلمتين دول و تداري على عملتها السوده

فرحه : لا اني مش كدابه و احلفلكم عالمصحف هو ديه اللي حوصل و امي كانت معاها صوح يا اما جولي انطجي يا اما متخافيش محتجدرلكيش على حاجه

يحي بغضب شديد و صوت يهتز له جدران البيت : انطجي

فوزيه برعب : ايوة حوصل الست صفيه كانت عايزاني اساعدها عشان تخلص منيها بس و الله اني مكنت حاذيها كيف ما طلبت مني

نعمان : كملي يا فرحه كملي

فرحه : اني جلتلها تروحلكم يا حاج لكن هي ما رضيتش. جعدت تتصل بيك كتير يا سي يحي عشان تاجي تلحجها لكن انت مردتش لحد تلفونك ما انجفل و هي يا حبيبتي مكنتش عارفه تعمل ايه و لا تروح فين كل اللي كان شاغلها هو اللي فبطنها و بس خافت عليه يحصلله حاجه

خلتني اساعدها و لمت كل خلجاتها و خدت اوراجها و مشت

عتاب و هي منهاره : و لما انتي بتحبيها اكده زي ما بتجولي عليها حبيبتك سيبتيها ليه تمشي لوحدها ليه مروحتيش معاها ليه

فرحه : كنت عايزة و الله و كان نفسي و اتحايلت عليها تاخدني معاها و رزجي و رزجها على الله لكن هي صممت تروح لحالها الظاهر كان جلبها حاسس باللي حيتجال عليها كانت عايزة حد يرد غيبتها ديه غير كمان انها سابتلكم معايا امانه

 

تجري على اوضتها و تخرجلهم : اتفضل يا حاج ديه ليك و ديه ليك يا سي يحي

سابتهم لي و حلفتني اديهملكم اول ما اتجابل معاكم

فتح عامر الجواب و قراه ادامهم و لقوا عطر بتعتذر لعمها عن اللي حصل

متزعلش مني يا عمي حجك علية مكنتش عايزة احطك في الموقف ديه واصل اني اللي ضغطت عليك و خليتك توافج على الجوازه ديه و يعلم ربنا اني كنت راضيه و حمداه لكن لما توصل للأذيه يبجى لازمن امشي 

مجدرتش ارجع عندك معاوزاش مشاكل و لا عاوزه اهد سعادة اختي جول لعتاب متزعلش مني انى بحبها جوي و محجدرش أكون سبب في اي حسرة تدخل جلبها و سعادتها عندي بالدنيا و ما فيها متخافش علية يا عمي اني حعرف اخللي بالي على نفسي زين

و حرجع ان شاء الله حرجع بس يوم ما حرجع محكونيش عطر الغلبانه المكسور جناحها لا حكون عطر الجويه اللي تعرف تاخد حجها و حج ولدها من كل اللي كانوا عايزبن يؤذوها ادعيلي يا عمي ربنا يكملي على خير و يجومني اني و اللي فبطني بالسلامه و يوجفلي ولاد الحلال في طريجي

مع السلامه يا عمي حتوحشني جوي و حيوحشني حضنك جوي سلملي عليهم كلهم و وصيتك عتاب 

😭😭تجلس بالقطار دموعها تنهمر على وجهها بينما يحي يجلس جانبا و يقرأ كلامها المكتوب

يري وجهها على الورقه و كأنما هي من تقرأ له و ليس هو من يقرأ 

ازيك يا يحي اني عطر مرتك محجوليش حبيبتك لأني خابرة زين اني لا كنت و لا حكون حبيبتك

 متستغربش اصلي سمعت كل حاجه و كل كلمه جلتها لابوك و عرفت انك اتجوزتني غصب يا ريتك كنت جولتلي كنت عليت في نظري و الله

عارف سمعت ديه ميتى و اني جايالك و جلبي بيرفرف من الفرحه عشان اجولك انك حتبجى اب ضيعت فرحتي باللي سمعته و بعديها مشيت و سيبتني انت محبتنيش اني كنت بالنسبه لك واحده حلوة و بجيت ملكك تعمل فيها اللي على كيفك و بعد اكده ترميها كيف ما بترمي هدمه لبستها شويه و زهجت منيها

لكن اني و الله حبيتك حبيتك جوي و كنت مستنياك و مكنتش ناويه امشي و لا ابعد حتى لو غبت سنين عني

اني حبيتك جوي يا يحي و على جد ما حبيتك على جد ما جرحتني اني جلبي واجعني منك جوي و عمري ما حنسالك اللي انت عملته فية ديه و ظلمك لية تعرف اني لحد آخر وجت كان عندي امل كنت بجول يا رب رنيت عليك كتير كنت متعشمه و كان آخر أمل لية اني أكدب وداني و اجول اللي سمعته محصلش و انك تاجي و تلحجني و تاخدني فحضنك حضنك اللي اني اتحرمت منيه بدري جوي لكن انت مهانش عليك ترد علية و لو بكلمه كلمه واحده تبرد ناري لاه ديه انت كمان جفلت تلفونك

مكنتش اعرف انك كارهني جوي اكده يا خسارة يا يحي يا خسارة يا ابو ابني

انا خلاص ريحتك من همي و مشيت و سيبتك للي انت هملتني و روحتلها اني مشيت و معايا حته منك حتكبر جوايا و ححافظ عليها و محفرطش فيها واصل مهمن حوصل حعلمه ازاي يحب و ازاي يخلص و ميخونيش و لا يغدر باللي اداله الأمان اني ممسامحكش يا يحي و عمري ما حسامحك واصل

يا عالم اذا كنا حنتجابل تاني و اللا لاء لكن يوم ما حنتجابل محتشوفيش عطر اللي عشت معاها و حبتك لا وجتها  حتشوف واحده تانيه جلبها بجي اسود كيف الطينه

اني معارفاش اذا كنت حتسيبني على ذمتك و اللا حتطلجني بس مفارجاش معايا اني اكده اكده حجعد اربي عيلي و افرح بيه و اعوضه عن ابوه اللي رفض وجوده من جبل ما ياجي

مع السلامه يا يحي و محجوليش اشوف وشك بخير لأني معاوزاش أشوفه تاني واصل

ينهي قراءته للخطاب و عيونه مملوءه بالدموع يبكي من قلبه على حب مات قبل أن يولد

 قلب ولد في الظلام و توقف عن النبض قبل ان تشرق عليه الشمس و يرى نورها

يطوي ذاك الخطاب بينما هي تمسح دموعها و تقوم من مكانها تمسك بحقيبتها و تستعد لتنزل من القطار

الحلقه صغيره معلش اعذروني حالتي متسمحش باكتر من كده و ان شاء الله انزلكم الحلقه الجديده في معادها يا رب تكون عجبتكم

😭😭😭😭😭😭😭😭

 •تابع الفصل التالي "رواية يكفيني منك عقابا" اضغط على اسم الرواية