رواية جرح الأيهم الفصل الرابع عشر 14 - بقلم أيلان
"الجُــرح الرابع عشر"
مُلاذ : ها مشمش ضجتي وحدج؟
ملاك : اي كلش جنت منتظرتج
بست كصتها ، كعدت يمها بالكاع
حضنتها لـ صدري
مُلاذ : هياتني اجيت
ملاك : وين جنتي؟
مُلاذ : بالشغل
ملاك : هم اجوج نسوان اليوم؟
مُلاذ : اي
ملاك : شنو مناسبتهن؟
مُلاذ : عدهن عرس و مكيجتهن
ملاك : جانن هواي ؟ لان تاخرتي
مُلاذ : اي كلش هواي گوه خلصتهن
هزت راسها مسحت على شعرها
كمشت ايديه باوعت الهن
ملاك : ايديج حمر ؟
مُلاذ : هاي الحُمره ثابته كلش
و انا من امكيجهن تدرين بيه الوص
و ادمر روحي عبالك زعطوطة
ف ظلت الحمرة بيهن شكد غسلتهن ما راحت
ملاك : يا
هزيت راسي ساكته
وجعت حجيت
مُلاذ : اكلتي ؟
ملاك : لا
مُلاذ : ليش؟ ذولة الجلاب ما جابولج؟
ملاك : تدرين ما اكل منهم بس منج اكل
مُلاذ : خوش هسه اكوم اسويلج
ملاك : مُلاذ
مُلاذ : ها مشمش
گالت بصوت يرجف و متوتر
ملاك : عليه الشهريه
وسعت عيوني : ليش مكلتيلي جايتج؟
ملاك : ما جنتي موجودة منتظرتج حتى ابدل
مُلاذ : تمام كومي وياي
اخذتها لزمت ايدها ، كامت بـ صعوبه
نزعت قمصلتي الخفيفة و لفيتها عليها
لزمت ايدها ، دكينا باب الغرفة حتى نطلع
سمعنا صوت القفل ينفتح ،
فتحت الباب ، طلع بوجهي الحارس
-وين ؟
مُلاذ : لـ شيب الخلفوك
عبرته و مشيت اخذتها للحمام
و انطيتها الاشياء يلي تحتاجها
و اخذت الها ملابس حتى تسبح
ملاك : عفيه لا تروحين
مُلاذ : هياتني واكفة بالباب
ملاك : اخاف
مُلاذ : شحده اليوصل الج و انا هنا
هزت راسها ، سديت باب الحمام
و وكفت بالباب انتظرها تخلص
مرت من كدامي عائشة
مُلاذ : عائشة
عائشة : نعم
مُلاذ : تسوكتي اليوم بـ فلوسمن؟
عائشة : ابني غسان دزلي فلوس
لان الاستاذ ما انطاني هاذ الشهر
مُلاذ : غسان فلوسه حلال مو؟
هزت راسها بـ معنى "اي"
مُلاذ : تمام ، حضريلي الغراض الجبتيهن بالمطبخ
عائشة : تمام خانم
مُلاذ : لا حول و لا قوة الا بالله
لج عيني كم مرة اگلج انا مو خانم
و حالي من حالج و هنا كاعدة اجباري!!
عائشة : اعتذر خانم
مُلاذ : لا اله الا الله
امدا الخانم و امدا حظها
عائشة خلت و راحت
تدري اذا ظلت واكفة شوية
اظل ادردم و بعد ما اسكت
خلصت ملاك ورا فترة طويلة
طلعت من الحمام
اخذتها للغرفة مشطت شعرها و ظفرته
رجعت كعدت على الدوشك المفروش بالكاع
مُلاذ : اروح اسويلج اكل تجين وياي؟
هزت راسها بـ "رفض"
عفتها على راحتها و دكيت باب الغرفة
فتحوا الباب و طلعت
مُلاذ : كم مرة اكلك تبطل تقفل الباب!!
-الامر هيج
مُلاذ : طاحظك و حظ الامر
عفته و رحت للمطبخ
شفت عائشة مسفطه المواد
وكفت اسوي اكل
دجاجه صغيرة نظفتها عائشة و غسلتها
اي شي بي سجاجين و اشياء حادة
ما يخلوني استخدمة ، يشيلوهن يضموهن
لان سبق و شهرت السجينه بوجهه شرف
و صارلهم درس بعد ما يحطون شي حاد
كملت عائشة ، رحت انا حطيت على الدجاجة صلصة ، دخلتها للفرن انتظرها تنشوي
بهالاثناء وكفت اسوي حلاوة لـ ملاك
انا ما اكلها ، بس ملاك تحبها كلش
انا اهوس و عائشة تلم وراي
رغم اكللها تكعد و تعوفهن المهن انا
بس ما تسمعني و تظل تلملم
اذا ما اشتغلت تظل تحوص
خلصت الدجاجة فلستها لـ قطع صغار
سويتها حميسة وكفت عائشة تثرم الفلفل
و الطماطه ، درتهن وي الدجاج و حطيت بهارات
خلصت الحميسه
حطيتها بـ صمونه كهربائية جبيرة
حطيت عليها صلصة تحبها ملاك
سويتلها لفتين و سويت وحدة الي
صبيت الحلاوة بماعون صغير
حاطين خواشيك بلاستك
حتى الخواشيك الحديد شالوهن
جنها الخاشوكة انگلبت سجينه و انا مادري
اخذت لبن حطيتهن بـ صينيه
و رحت لـ الغرفة بـ أيدي الصينية
-ذني المن؟
مُلاذ : الك
صدك الحارس و راد ياخذهن
مُلاذ : شكد قشمر انت ، دفتح الباب
صدكت الك و هيج انا مابية خير
اسوي لـ اشكالكم الا تخبلت
شبيكم مگرمين لو عميان سوو لـ رواحكم
مبارك جنكم جلاب تحرسون بالبيان
ابتلى على روحه لان صَدك
فتحلي الباب و دخلت ، حطيت الصينية
مُلاذ : يلا ملوكه اركضي تعاي
اجتلي بسرعة كعدت يمي
انطيتها اللفتين
ملاك : ليش دوم تسوين الج قليل؟
مُلاذ : ما احب الاكل الهواي انا
يلا اكلي ، عوافي
هزت راسها مبتسمه
و كعدت تاكل مبين عليها جوعانه كلش
صارلي هواي مشغولة عنها المجلوب شرف
ما يخليني اروح يمها
الا يشوفني اسر انظار يلي بالملهى
يلا يخليني اروحلها
كعدت اكل وياها و هي تاكل و ساكته
خلصت اللفة گلتلها تاكل اللفة الثانية
ملاك : شبعت
مُلاذ : ما يصير مشمش انتِ مريضة
تحتاجين اكل وجهج اصفر لازم تاكلين
جبرتها تاكل لان تتاذى كلش
لمن تجيها الشهريه تصير صفرة
كملت اللفة الثانية گوه و اكلت حلاوة
خلصت اخذتهن وديتهن بالمطبخ
وكفت عائشة تغسل بس الصينية
لان الباقي كله بلاستك و لفات
اخذت ملاك للحمام تغسل
غسلت انا هم و رجعنا للغرفة
نمت انا ع الدوشك و ملاك نامت بحضني
ظليت افلي شعرها و ساكتين ندحك للسكف
لا بالي الصافي و لا بالها
ملاك : شوكت نرجع لـ امي ؟
مُلاذ : نرجع بـ يوم من الايام اكيد
ملاك : هي تتذكرنا هسه؟
مُلاذ : الام ما تنسى اطفالها
ملاك : ابد ؟
مُلاذ : ابد
ملاك : ليش ما دورت علينا ؟
مُلاذ : دورت بس ما لگتنا
ملاك : شمدريج ؟
مُلاذ : اعرف امي
هزت راسها ساكته
بدت تدريجياً اسمع صوت بجيها بحرگه
لا هي متقبله الوضع و لا انا
بس داحاول امشي الحياة لحد ما نطلع منا
ظليت امسد شعرها
و هي ترتجف و تبجي و غصة
حضنتني كل قوتها لازمه بملابسي مثل الطفلة
ظليت ادحك للسكف و نايمة على ظهري
ايدي بـ شعر ملاك
احك فروة راسها بـ اصابعي بـ هدوء
گلت بـ فصيح اللغة العربية بـ صوت هامس
مُلاذ : و أن نافسك الموت و أخذني منكِ
أعلمي ان روحي تداخلت مع روحك
و لا يُفرقهم سوى الكُره المستحيل
ان يبدر من قلبك الرقيق نحوي ، ملاكي .
رجعت كملت بـ هدوء
مُلاذ : احد نصوص إلياس
ملاك : ما تعوفيني مو؟
مُلاذ : ابد
هدأت ، تدريجياً بدت تغفى
نامت بـ هدوء مثل كعدتها بـ كلشي هادئة
نعم ، انا مُلاذ إلياس
يلي كانت رح تصير محامية ، شائت الاقدار
و خلتها رقاصة بـ احد ملاهي بغداد
بعد ىا انباعيت و اليوم عدت ٧ اشهر
على بيعي و شغلي كـ رقاصة
اما على اختطافي فـ عدت اكثر من سنه
زيفت صورتي لـ ملاك ما گلتلها اختج رقاصة
گلتلها انا امكيج البنات و هم يجون لـ هنا
اذا تسئلون ليش بعدج باقية بهذا المكان
و انتِ تگدرين تطلعين و تشتغلين كـ راقصة
و تكدرين تسنتجدين بالناس و تنقذين نفسج
راح اجاوبكم ، لان انا مهدده بـ اختي
سبق و حاولت اهرب و اهربها
لَكن النتيجة كانت
تعذيب ملاك كدام عيني
ضربوها لـ درجة كطعت النفس
و بـ معجزه ردت الي ،
اما انا كلشي ما سوولي ،
عرفوا نقطة ضعفي وين
و اكتفوا يشوفوني اتعذب على عذابها
شرف استغل الفرصة صار يهددني بيها
و هسه انا انتظر اقرب فرصة
حتى انقذ ملاك و روحي منا
اما عن صافيناز ما سمعت عنها شي
لحد الان و ما نعرف اذا عايشة او ميتة ؟!
غاده :-
بعد الايام الصعبة يلي لساتهن مستمرات
لوعة گلبي على صديقتي و اختها و امها
خالة فيروز صارت مشلولة تماماً
بس تكدر تحجي مع ذالك ما تحجي
مكعديها على كرسي متحرك
و صافنة طول اليوم ، شكد ما نحاول وياها
ما تحجي و لا تسوي شي ، بس صافنه
امي اعتنت بيها بـ اكمل شكل
ما اتفضل عليها ابداً ، بالعكس هذا واجبنا
اتمنى اكدر اسويلها الاكثر
تكسر خاطري كلش لمن تسمع الباب انفتحت
تتلهف على شوفة منو الفتح الباب
عبالها بناتها ، بعدين يخيب ظنها و نطلع احنا
بـ يوم بارد يگطع الجسم من البرد
و الدنيا مطر ، دخلت يم امي بالمطبخ
دحگت لـ خالة فيروز
امي مخليتها يم الشباك
تدحك على المطر و امي تطبخ
و تسولف وياها
جنات : لكيت فد دشداشة بالسوك
نيلية تخبل و مطرزه بس غالية ي دادة
ب١٥ الف ؟ الله يسامحهم
يعلون بالاسعار و ماكو
ظلت تتطرق لـ مواضيع مختلفة
و تسولف وي خالة فيروز رغم ما ترد
بس تحاول تغير الها جو و تسولف وياها
خالة فيروز كاعدة و تستمع الها
لَكن وجهها يخلو من كل التعابير
جانت الحجية يمنا ، قبل فترة رجعت لـ بيتهم
ما متعودة غير على مكانها و فراشها
و ظلت ما مرتاحة
السنه راحت عليه و ما داومت
دخلت امي عليه بالسنه الجديدة
و خلتني البس ملابسي غصب عني
جبرتني اروح للـ كُلية و اداوم تحت عصبيتها
و اذا ابزها تنفجر
مشيت الطريق كله دمعتي بـ عيني
و مستصعبة اداوم بلا مُلاذ
الاحساس بالذنب يكتلني
لان تعاركت وياها باخير فترة
و لا رديت على اتصالتها
دخلت المحاضرات و طلعت منها بدون نفس
باهر كذالك رسب بهاي المرحلة و ظلينا نتلاطم
حاولنا نساعد بعض و نشد حيلنا و نعدي هالمرحلة
كاعدين انا و مجموعة بالحديقة
يسولفون و يضحكون و انا مالي نفس
عيوني تدور على باهر و اثر اله
لحد ما شفته دخل هو و يوسف و غياث
اتقدم من بينهم بخطوات ثكيله رجال ضخم
نظري تجول على كل يلي كاعدين
لمن رفعو نفسهم و وكفو بـ احترام اله
يصفكون و يصيحون : حيووو حيوو الرماد
وكفت وياهم اصفك
و يتداور بعقلي تساؤل "اسمه رماد !"
رفع ايده حطها عَ صدره بـ امتنان
حنى راسه بـ حركة "شُكر"
اتقدم ، كعد على صبة بالحديقة
باهر و غياث يمه كلهم كامو و راحوا يمه
انا صافنه مثل الاطرش بالزفة
ذولي شبيهم ليش التمو عليه
يلي ما لگه مكان كعد بالكاع
فزيت من صفنتي ، سحلني باهر من ايدي
اخذني يمهم كعدت بالكاع يم باهر
صاح غياث : حيو حيوو سبع السباع
صاحو كلهم ، بصوت واحد
-يا جثيرررر الهلاا بـ اليحرك گلوبنا و يچويها
ضحك رماد
- ما عاش اليحرك گلبكم
كامل : عمييي عجل عجلل اغنية رايدين
رماد : شني ولك شايفني مسجل ؟
كامل : لاه لاه حبالك الصوتيه يلفن على گلبي
غياث : رح الفهم على ركبتك
اهتز جسم رماد يضحك
كامل : انت حبالك الصوتيه
حبل يشرون عليه الهدوم ما يصيرن ، اسكت
غياث : ولك...
قاطعهم رماد بنبرة هادئه : اششش
باهر : هلااا هلاااا ، هاي كلمة السر
ضحكو و انا ضحكت وياهم رغم ما فاهمه
دحگت البنات عيونهن يلمعن و يدحگن اله
ندست باهر
غاده : شبيهم ذولي يدحگون هيج ؟
باهر : مو بعينج طول و شخصية
و صوت و جمال و مهنه و فلوس
شيريدن بعد لو انه رماد
ما اخليهم يحاجوني الا بـ فلوس
ضحكت و هو ضحك على ضحكتي
غمض عيونه رماد بـ ذبول
و نطق بـ نبرات غنائيه
رماد : صدك مخطوبه ي فلانه؟
ذب نفس : صدك باجر يزفونج ؟
عسى لا يجي باجر و اشوفن دمعة عيونج
عبر جزء و گال
رماد : لبست الخاتم بـ ايدي
و يَ ايدي حيل حزنانه
رفع ايده محاوط اصبعه الحلقة
و نزل راسه بـ قهر مبتسم
ادحك الكاعدين كلهم وجوههم حمر على صوته
و النبرة يلي بيهه اكو بنات دمعن
عبالك كاعدين بفاتحة ، هم عبر جزء و كمل
-لي سنتين و انا صابر گالولي يجي باجر
رفعوا ايديهم يصفكوهم ببعض
و تصدر اصوات الطنين المتناغمه وي الاغنيه
-شيخلص الليل؟
رجفت كلماته و كمل
رماد : و ظنوني على جيتك على باجر !
-لي سنتين و انا صابر گالولي يجي باجر ، يخلص الليل و ظنوني
رفع راسه صار يغني
بـ صوت اعلى مغمض
-و انا .. على جيتك على باجر انا صابر !
تسللت دمعه من عينه
يلي مغمضها و ترتجف ، سارت على خده
ندست باهر : ديبجي!
باهر : الرماد تعبان خلي يبجي
هلبت تطفى نار گلبه بـ رشة دموع !
استمروا يلي كاعدين حوالينا يغنون
و دموعه تنهمر بقوه بلع ريگه
-اطالع صورتك .. وابد ماترمش عيوني
باجر لو اشوفك اجيت .. صدك ينخطف لوني
انا صابر على باجر على جيتك على باجر انا صابر
فتح عيونه و سحب نفس عميق لـ داخله
رفع ايده سلم عليهم كام ،
انطانا ظهره و مشى بـ خطوات ثگيله
رزنه طلع من الحديقة ظليت صافنه مدهوشه
معقوله اكو هيج شخص !
من كد الحب يبجي ؟
قاطع صفنتي ندست باهر : كومي يلا
غاده : وين ؟
باهر : نروح نشتري من النادي
غاده : ما اشتهي انا
باهر : امددج هنا هسه و اكعد على بطنج
ميتين من الجوع تاكلين مثل الحبابة
ضحكت و رحنا لـ النادي
باهر غيرلي جو كلش ...
نور :-
رجعت للبيت من الدوام
دورت بجنطتي ما لگيت المفتاح
تذكرت انا ناسيته الصبح
دكيت الباب حتى يطلعولي
محد فتح الباب
ظليت واكفه و ادك بالباب
و ماكو اي صوت و لا احد يفتح الباب
اخذت جهازي اتصلت على اهلي ما يجاوبون
لحد ما ابوي جاوب سئلتهم هم وين
گال طالعين كلهم و شوية و يرجعون
و انا منا ناسية المفتاح ، ظليت مشتولة بالباب
انفتح باب بيت اركان
درت وجهي بسرعة للـ باب مالتنا
التفتت نص التفاته دحگت لـ ام اركان
طلعت تذب الزبل (حشاكم)
سكتت ، رجعت درت وجهي
صاحت عليه ام اركان
ام اركان : خالة منو انتِ ؟
درت وجهي دحگتلي وتفككت العگدة يلي بين حواجبها و ابتسمت گالت بصوت حنون
ام اركان : يا هاييي نويرة
ابتسمت و سلمت عليها
رحت بوستها و هي هم بوستني
ام اركان : شتسوين واكفة بالباب؟
نور : نسيت مفتاح البيت بالبيت
و ما ماخذته وياي و اهلي كلهم طالعين
ف منتظرتهم
ام اركان : ياااا
هزيت راسي ساكته
ام اركان : تعالي ادخلي يمنا على ما يجون
نور : لا خالة هسه يجون گالوا ما يطولون
خل انتظرهم انا هنانه
ام اركان : يا ولج مخبلة انتِ؟
تعالي ادخلي يمنا تظلين واكفة بالشارع؟
بـ طبعي خجولة كلش
و اذا واحد يبزني ابجي من الخجل
هي ظلت تمدحني
و تگول ما يصير تظلين بالشارع
و ما شاء الله عليج حليوة
بحيث كمت ما اتتفس من الخجل
و دخلتني گوه لـ بيتهم
دخلت مرتبكه ، صارلي هواي مشايفة بيتهم
من فاتحة بنتها اخير مرة اجيت الهم
، رغم بنتها ماتت و رجلها مو زين
لَكن هي فد انسانة خلوقة و صبورة
لا اشتكت و لا گالت و رضت بقدر رب العالمين
كعدت بالصالة
منزلة راسي و مستحية عبالك زعطوطة
نوب نسيت اسئلها اذا اركان موجود لو لا
و ظليت بـ حيرتي خاف يطلع و ينصدم بيه
اجت خالة تقدم الي مي و عصير
اخذتهم من ايدها حطيتهم على الطبلة
فزيت لمن انفتح باب البيت
ظليت گوه لازمه روحي ، سمعت صوت اركان
اركان : يمه ، يمه
ولج غندوره وينج فحطتيني؟
ضحكت امه و طلعت من المطبخ
وي طلعتها دخل اركان الصالة
و انصدم بشوفتي ، رجعت دنكت
و هو صافن و انا عيوني تروح منا و تجي منا
خالة ام اركان تضحك على اركان و تگله "خزيتنا"
اركان : هلو
نور : هلو
حكيت رگبتي بـ بلاهه
خالة ام اركان سولفت لـ اركان عن سالفتي
اتخصر و خزرني
اركان : ولج نويره عود شني ما تطبين يمنا؟
ابتسمت بـ خجل : مو انتظر اهلي
اركان : جا تظلين بالشارع تنتظريهم؟
هزيت راسي بـ رفض
راحت خالة ما اعرف شتسوي
اركان كعد بـ طرف القنفة و يدحگلي
اركان : شلونج؟
نور : زينه
اركان : رجلج شلون صارت ؟
نور : هم زينه
اركان : مُلاذ ما عرفتوا عنها شي ؟
نور : لا
هز راسه ساكت
اركان : شمالج منزله راسج ارفعي دحگيلي
تراني و الله ما اكلج
ضحكت و رفعت راسي دحگلته
اول ما دحگتله صارت عيني بـ عينه
ثنينا سكتنا ، ظلينا واحد يدحك بعيون الثاني
اختفت ابتسامتي و عيوني ظلت أسيرة بـ عيونه
رفعت عيني لـ كصته ، اتصبب العرك منها
رفع ايده مسح كصته دار وجهه بـ توتر
دنك راسه يلعب بالجداحه يلي بـ ايدة
اركان : جسار
نور : ها ؟
رفع عينه دحگلي ، و انا ادحگله بـ فهاوه
امداج نور اول مرة تشوفين الولد عبالك
اركان : جسار شيريد منج؟
نور : ما يريد ؟
راد يحجي و سكت لمن امه اجت
و بأيدها كيكة مسويتها
اكلت كم لگمة لان عيب منها و لحت عليه اكل
اركان ظلع كاعد و عينه عليه وترني كلش ،
رجعت امه هم راحت مرة ثانية
اركان : انعلهم و اشعلهم
نور : منو ؟
ضحك و حك حاجبة : اهلي
نور : يا ليش ؟ عيب ما يصير
ضحك و ظل ساكت
اشرلي بعيونة على الكيكة "اكلي"
هزيت راسي و اكلت مثل الحبابة
دخل ابو اركان و يصيح بصوت عالي
ماليته العصبية ، طاح الجطل من ايدي
و ظليت مفزوعة على اثر صوته
-اركااااااان
بسرعة اركان كام صار كدامي و حجزني وراه
و ابوه دخل و هو مستمر يصيح و يفشر!
غاده :-
طلعت من المحاضرة
لحگني باهر و هو ينادي الي
باهر : غاده
غاده : ها ، هلو
باهر : هلا بيج
ابتسمت و هو كمل كلامة
باهر : عندج شي ؟
غاده : لا ، ليش؟
باهر : فكرت نطلع ناكل ،
اذا ما عندج شي ؟
غاده : لا ما عندي بس..
باهر : بس ؟
كنت تعبانه و مالي خلك اطلع
بس ما ردت اكسر بـ خاطرة
غاده : خل اخابر امي اگللها
هز راسة بـ قبول
اتصلت على امي ، گلتلها رح اطلع وي البنات
وافقت بس بـ شرط ما اتأخر
طلعنا انا و باهر
راح لـ سيارته صعد بيها و صعدت ويا
اول ما صعدت السيارة بيها ريحة تجنن
و دافية بما انو احنا بالشتا
ظلينا طول الطريق انا و باهر ساكتين
و هو يسوق و كل شوية يرمقني بـ نظرة
لحد ما انقطع هذا الصمت بـ مبادرته
باهر : شلون امج؟
غاده : زينه
باهر : المره الي جانت وياج هذاك اليوم خالتج؟
غاده : لا ام صديقتي بس اعتبرها خالتي
كلش قريبين علينا جانو و كلش نحبهم و يحبونا
باهر : اذا ماكو مانع اكدر اسئل ؟
غاده : اي عادي ، اسئل
باهر : ليش هيج جانت حالتها؟
غاده : بناتها
باهر : شبيهم ؟
غاده : انخطفوا
باهر : شلون ؟!!
حجيت اله رؤوس اقلام عن الموضوع
و هو ظل مصدوم و يستمع الي
باهر : لحد الان ما لكيتوهم؟؟
هزيت راسي بـ رفض
غاده : فص ملح و ذاب
باهر : اذا تريدين مساعدة او اي شي
تعرفيني انه موجود و بكل وقت
غاده : ما تقصر ، تسلم
باهر : لا يمعودة شيلي الرسمية هاي
و لا تخافين ان شاء الله يلگون البنات
غاده : ان شاء الله و الله عندي احساس
يرجعون ، بس خالة فيروز حيل خطيه
باهر : ضناها طبعاً ما تتحمل فرگاه
غاده : هم صحيح الله لا يحط احد بموقفها
باهر : امين
قاطعنا صوت روين تلفون باهر
ابتسم يدحك للشاشة و جاوب
باهر : هلا يمه ، گولي عيوني
من گال " هلا يمه " ظليت صافنه عليه
گالها بصوت رجولي و حلو ما اعرف اوصف
بس گالها بـ طريقة تخلي الواحد يتمنى يكون امه
انرسمت ابتسامة على اطراف شفايفي
على اثر حديثه وياها و شلون مملي بالاحترام
ظليت ساكته و استمع الهم بلا ادراك مني
سد الاتصال ، اندار الي و گال
باهر : عندج مشكلة اذا اخذنا اختي ويانا
هي على طريقنا
غاده : لا يمعود بالعكس اخذها اكيف
بس خاف عيب منها و انا هيج صاعدة وياك
باهر : لا خايبه ، اصلاً ما تفهم هيج
عدها السالفة عادي و تعرف عندي زميلات بالكُلية
هزيت راسي ساكته
و هو راح اخذها من كُليتها
كُلية هندسه ، ردت انزل اصعد ورا
ما خلاني باهر
باهر : بالعكس هي تحب تنام ورا
دوم تصعد بالورا و تمدد رجليها
ما حجيت شي
ظليت ساكنه بـ مكاني
شوية و طلعت بنية من الكُلية
صعدت بالورا بسرعة
هتان : هلاووو
باهر : هلا بيج
غاده : هلو
صرخت صرخة فززتني
هتان : يمممممه
ظليت مصدومة ، شكو؟!
حتى باهر اخترع و اندارلها
باهر : ولج شكووو؟
مدت راسها دحگتلي
و روحها رايحة
هتان : عزه ، يمه
رجعت لـ ورا لازمة گلبها
و انا صافنه مثل الاطرش بـ الزفه
باهر : ولج شبيج؟
هتان : و العباس اسفة
بس اخترعت من گلتي هلو ما شفتج
ضحك باهر و هي تضحك وياه بـ خرعه
و انا صافنه ، تالي استوعبت يلا ضحكت
اتقدمت هتان من بين الكشنات مدت روحها
باست خدي ، ضحكت على لطافتها
نوب وجهها كله نمش و هي تخبل
وجهها فد لطيف وحلو
هتان : هاي بوسة اعتذار
غاده : حبيبييي
دحگلنا باهر و ضحك
ساق السيارة ، متجهه لـ المطعم
انتبهت لـ هتان تحركله بـ حواجبها و عيونها
و تتغامز ويا و هو انتبه الها بالمراية
ظل متلبك من حركاتها و يمسح بـ كصته
كل شوية يضحك
هتان : اي شسمج ي بنيه ؟
غاده : أسمي غاده و أنتِ؟
هتان : هتان ، بس الله اسمج حلوو
غاده : انتِ هم اسمج حلو مثلج
هتان : يعني اذا اريد ادلعج
اگول غدو؟ لو غدغد لو غديوه
غاده : هههههههههه
باهر : غديوه شنو ؟ ههههه
القابج تلعب الروح
هتان : لوتفان استاز باهز
نو يتكلم وذ مي لايك ذس
( الترجمة : رجاءاً استاذ باهر
لا تحجي وياي هيج)
ضحكت من كل گلبي على طريقة كلامها
و هو يتجاوب وياها عبالك عدهم لغة وحدهم
باهر : نو هتانيزو اي سبيك وذ يو هو اي وانت
لوتفان رسبيكت ماي سبيكز
(الترجمة : لا هتان احجي وياج مثل ما اريد
رجاءاً احترمي كلامي)
هتان : نو نو نو
يا ربي يخبلون ، كلشي ما افهم عليهم بس اضحك ، تمنيت عندي اخ و هيج علاقتنا
اتقدمت هتان من بين الكشنات ، دحگتلي
هتان : غدوز واي يو ار بيوتفل؟
( الترجمة : غاده انتِ ليش حلوة؟)
غاده : حبيبي انتِ البيوتفل
هتان : اوف اوف غدوز
انه طاح في حبك
غاده : ههههههههه
ظلينا طول الطريق هيج
فحطوني من الضحك عليهم ، هتان تمددت بالورا
لحد ما وصلنا للمطعم ، اندار باهر كعدها
نزلنا ناكل ، خلصنا و وصلوني للبيت
نور :-
ظليت خاتله ورا اركان
التفت اركان لـ امه مادري شسوا بـ عيونه
لزمتني خالة تريد تطلعني
و لازمه بـ جف ايدي و اركان يمنا
ابو اركان صار بوجهنا
اتغيرت تعابير وجهه لمن شافني ،
خفت كلش وجهه حيل شراني
ابتسم ابتسامة شر ، بلعت ريكي
الخوف غطى على كل جزء بيه ،
ابو اركان گال بطريقة مو حلوة
-هاي منو الحلوة
اتقدم اركان صار كدامي
كز على سنونه ، منزل راسه لـ مستوى ابوه
اركان : ضيفه و رح تروح
دحگله ابوه بـ تحايل
و لسانه يمشي على اسنانه
-عيب تروح بلا مانقدم الها شي
اركان : قدمنالها و هسه تريد تروح
گال بصوت هادء
لكن يبين بيه التهديد
-اركان ، هاي نور ؟
دحگت لـ ايد اركان القبضها
و بالايد الثانية لازم ايدي و مخليني ورا
دك تلفوني دحگت رقم بيبي
اندارلي اركان و دحگلي بـ نظرة
ما عرفت اوصفها بس حسيته شكد منقهر
طلعت انا و امه من البيت
و ظلوا اركان و ابوه
ام اركان حاولت تسوي الوضع طبيعي
و ظلت تتعذر مني و تگول مو بـ وعية ابو اركان
طلعت من يمهم و ودعتهم
لكيت بيبي بالباب مال بيتنا
رحت الها
الحجية : وج وينج مو ادكن عليج؟
سولفتلها جنت يم بيت اركان
لان همَ أتاخروا بس ما سولفتلها عن ابو اركان
و الي صار اخير شي
دخلنا جوا و دخلت وراي عمه منارس
سئلتهم وين جانوا گالت ، من جنت انا بالشغل
طلعت بيبي متخربطه و ماخذيها للصيدلية
حتى يشوفون ضغطها
خصوصاً هالفترة بيبي كلش تعبت
گوه تدوس على رجليها و تمشي
بسبب كبر عمرها دتتعب و صحتها تتدهور
اسكندر ملتحق
عزيز يطلع من الصبح يرجع نص الليل
اهلي يقفلون الباب عبالهم عزيز راجع
اطلع انا افتح اله الباب و ادخله
و كل يوم نفس الروتين
البنية يلي جانت حامل من اسكندر
اندعمت و مات الطفل لَكن هي بقت عايشة
گطعت گلبي لمن اجت تتحسب على اسكندر
رغم هذا الشي ، اسكندر ما برر لـ اي واحد من عدنا على يلي صار ، ابوي ما سكت عنه اتعارك وياه لَكن ما اتلقى اي جواب من اسكندر
بـ هذيج الفترة لمن عرفنا بـ البنية
بيبي جانت بـ بيت خالة جنات ،
ما تدري بالموضوع قرروا اهلي
يسدون هذا الموضوع
و ما يحجون لـ كائن من يكون
لان اذا درت بيبي
مستحيل تخلي اسكندر كاعد ويانا
تحت هاي افعالة
امي دافعت عن اسكندر بـ شكل خلاني صافنه
انا لمن صارت سالفتي انا و اركان
اكلتني بـ سنونها و لسا تتذكر و تعير بيه
رغم ما كان الي اي ذنب و ما سوينا اي شي!
بس اسكندر؟ على الرغم هو مذنب
لَكن دافعت اله و وكفت بـ صفة
بالي ما صفى ابداً
اتذكر ابو اركان و ليش هيج دخل يصيح ؟
شنو ممكن يكون بينه و بين اركان ؟
لـ درجة اركان هيج ما طايق ابوه
و هذا الشي واضح على وجههم
واحد ما طايق الثاني ، نظرات الكرهه بـ عيونهم يلي يشوفهم مستحيل يعرف هذولة اب و ابنة
رح يفكرهم غربة
لَكن مع ذلك سكتت عن الموضوع
جمعتنا انا و اركان هواي صدف
بس ابد ما حجينا
لمن اطلع من شغلي اشوفة صدفة
لمن اروح اشتري شي الي هم الكاه
اذا طلعت لـ اي مكان الكاه متواجد
ما اعرف يلاحگني او هاي صدف ؟
اتغاضيت عن الموضوع
و ما اكدر اكذب لمن جنت اشوفة افرح
و يتدفق من داخلي شعور الحب ناحيتة
من و هو طفل كان رزن و ثكيل
ما يخاف من احد و اخواته يستقون بي
و هو سند الهن يلبي الهن احتياجاتهن
و هذا الكلام لمن جنت صغيرة
كانت وحدة من اخواته صديقتي
تسولفلي عنه ، لذالك كل مرة كانت تسولفلي
كان اركان يتوسط گلبي و احبه اكثر
حبيته من و انا طفلة و كبرت و كبر حبه وياي
و لحد هاي اللحظة احبه
ارجع مثل اول مرة
اركان شافني بيها و شفته ،
شلون جنت اخجل من عنده
و هو يضحك و يروح
بمرور الايام ، جسار صارت تصرفاته وياي
ما اعرف شلون ، بس يهتم الي كلش
سمعته مره و هو يهدد امي
اذا اتقربت الي و ضربتني رح ياذيها
ظليت صافنه رجعت لغرفتي
مثل ما رحت يمهم و همَ ما يدرون بيه
جسار انقطعت اخبارة بـ فترة من الفترات
عرفت امه حالتها تعبانه
هم رحنا و زرناها انا و بيبي
و هي جانت توصينا نعتذر من خالة فيروز
لان ما راحت الها و هي تعبانة من فترة طويلة
لَكن كانت ساكته عن روحها و ما تكول لـ احد
و قبل فترة لاگينها واكعة بالبيت
صاير عدها حالة اغماء من شدة التعب
و تحتاج راحة لـ فترة طويلة
كل هذا يصير و سلطان ما يعرفون وينه
سئلت جسار گال
- سلطان الله خبله تسودن
طالع يدور على ملاك صبح و ليل
طبعاً جسار ما سامح اله هيج ياذي روحه
و متعاركين سلطان عايف البيت و طالع
هنا جانت صدمة جديدة
سلطان و عزيز نفس العلة عدهم "حب ملاك" جنت خايفة لا تخرب صداقتهم
بسبب هذا الشي بس البنية هم مالها ذنب
اكذب عليكم اذا اگول انا ناسية ملاك و مُلاذ
دائماً هنه بـ لساني و ادعي الهن
متربطة و ما بأيدي شي
صرت افقد الامل بـ رجوعهن ...
بـ يوم تخربطت بيبيتي
طلعوا كل يلي بـ البيت بقيت لـ وحدي
ظليت بـ قلق و امي اصلاً يم اهلها
ابوي و عمتي اخذوا بيبي و راحوا
لا اسكندر و لا عزيز موجودين
ظليت افتر بالبيت و ادعي بيبي ما بيها شي
اندكت باب البيت لبست صايتي و شالي
طلعت وكفت ورا الباب : منو؟
-ابو المولدة
فتحت الباب و طلعت دحگتله
-اريد الحجية
نور : و الله ما موجودة بس انا بالبيت
-زين من ترجع حاجيها عليه
نور : تمام
راح ابو المولدة و انا سديت الباب
دخلت جوا ، اتصلت على عمتي ماكو متجاوب
ظليت كاعدة بالصالة و انتظر
سمعت صوت ربده صارت من برا
ظليت مستغربة و اندك الباب
رغم الخوف مالي گلبي بس ردت اشوف منو
طلعت وكفت ورا الباب گلت "منو" ماكو جواب
رجعت كررتها هم محد جاوب
فتحت الباب ع النص ما لكيت احد ،
رجعت ادور بالطرمة على مصدر الصوت
وكفت بالحديقة ادحك ماكو اي احد
الدنيا ظلمة ، تأكدت ماكو شي
التفتت اريد افوت لـ جوا شهكت و صرخت
لمن شفت ابو اركان وراي ، مبتسم
اول ما صرخت فوراً حط ايدة على حلكي
اتحول ، صار وراي ، اصرخ بصوت مكتوم
لحظات خلت روحي تطير من الخوف
لازمه بـ ايدة يلي على حلگي
و هو يجر بيه لـ داخل البيت
ضربت صدرة و هو يضحك و ما يهدني
دخلني لـ جوا و اتلاوى وياه ملاوه
اريد احد ينقذني من ايده ،
اول ما دخلنا اخذني لـ غرفة عزيز
شمرني بالكاع ، ابجي و اصرخ و اتوسل
طلع حربه ، شهرها بوجهي
صار يهددني اذا صرخت يكتلني
حط السجينة على رگبتي
و هو فوكاي بجيت بصوت مكتوم
حسيت غصتي كطعت بلعومي
و اذا اتنفس يكتلني
ما اتحملت لمن حاول يفتح الصاية
و رفع شالي عن شعري ، شمرة
نور : عووووووفني الله يخليك عوفني
انا ما اعرفك ما سويت الك شي !!
ريحته قذرة و مقيد ايدية
عيوني ينزل منها جمر مو دموع
حاول يبوسني و يعتدي عليه و ايدية تدفعه
و ادور بوجهي لـ اتجاهات مختلفه
رفعت راسي و صرخت بصوت عالي
نور : ساااااااااعدونيييي
لـ لحظات و حسيت روحي رح تنسلب مني
لمن بدأ يرفع دشداشتي
ايدية تتلمس رجلي ، فرفحت روحي
اريد اوخره عني ما يوخر
اضخم مني و سمين ، اكبر مني بـ هواي
فزيت لمن زاد ثگله و اتوقف عن الحركه
دفعته عني طاح من فوكاي على ظهره ،
ابتعدت من جواه لـ ورا ادحگله مصدومة
الدموع على خدي ، عاگدة حواجبي
ظليت متصنمه ، رفعت راسي
انصدمت اكثر لمن شفت اركان
بـ ايدة سجينه يقطر منها دم ابوه ...
مُلاذ :-
مشيت بصفي الحارس
الكبوس على راسي ، مغطية وجهي
دخلت لـ غرفة التبديل و المكياج
نزعت الكبوس ، ظهرت كدمات وجهي
ظلت اساور مبحلقة عيونها عليه
رغم مو اول مرة اجيها و هذا حالي
اتقدمت كعدت على الكرسي
وكفت اساور تمكيجني
غزاله و فُلة من اسبوع ما يجن
وحدة ايدها مكسورة
الثانية وجهها مصلوخ
حطتلي المكياج اساور
و انا روحي طالعة بس اريدها تخلص
خفت الكدمات يلي على ايدي
اتحولت تخفي الكدمات الي على ظهري
و اثار الحزام ، خلصت كمت لبست ملابسي
وكفت كدام المراية ادحك لـ نفسي
اريد يتمرر بداخلي شعور ، حزن ، خوف
لَكن ماكو متجردة من كل شعور
حسيت روحي انسان آلي
ارتديت الكفوف حتى
اخفي شكل اصبعي المكسور
و انا ادحگله ، تذكرت قبل يومين شنو صار
قبل يومين :
دخلت البيت ، من بعد جولات الرقص
التعب ماخذ ثلثين حيلي
صفحتي تاذيني ، لا ايد و لا رجل
استقبلني شرف
جر ايدي ، يمشي بسرعة و انا وراه
كلشي ما فاهمة و ليش هو معصب؟
مُلاذ : شتريدددد؟؟ وخر ايدك عني
اندار عليه ضربني راشدي
طحت بالكاع و انجرحت شفتي
رفعت راسي ، دحگتله
دورت بـ عيوني اريد شي اضربه بي
دحكت للمزهريه كمت ركضت اهذت تحفية
شمرتها عليه بس ما طاحت بي
اجا عليه و هم رجع ضربني ، طحت مرة ثانية
اجوا الحراس عليه جروني من الكاع وگفوني
لزمني شرف من زندي اخذني للغرفة
اضرب بـ جتفة كل قوتي
ايدي طاحت كد ما ضربته
دخلنا للغرفة ، انهال عليه بالضرب
تحت كلمات "فشلتيني"
-ماخذج رقااااصة لو مصاررعه؟؟؟
كسرتي ايدها موو؟ كسرتي ايدها؟
رفعت عيني دحگلته
صار فوكاي ، لزم فكي
شرف : اذا ما تنعدلييييين ادفنج بكاعج
و قبلج ادفن اختج و اخليج تشهدين على موتها
رفعت راسي ، تفلت بـ وجهه
ضربني على وجهي
جر ايدي ، لوا اصبعي السبابة
ظل ضاغط على اصبعي و يلوي بيه
لحد ما اصبعي طك و انكسر
صرخت بوجع اصبعي انشلع من مكانه
ظليت اتلوى بـ مكاني و هو راد يطلع
كمت كامشه ايدي متوجعه
ادور شي اريد اضربه بي
لَكن طلع قبل لا الگا
كعدت على الجرباية ، لازمه ايدي
اون من عدها بـ وجع و روحي رايحة
رفعت ايدي دحگتلها ترجف
انفاسي صارت تتسارع
شعري نزل على وجهي ،
العرك يتصبب من كصتي
بلعت ريك ، رفعت راسي دحگت وراه
و انا متحلفة بيه ، يجي يوم
اطلع كلشي سوا بيه...
الان :
رفعت راسي فازه من صوت اساور
ايدها تلوح كدامي
اساور : يلا مُلاذ ديصيحونج
هزيت راسي و طلعت
ظهرت من خلف الستائر
رقصت كالعادة
لَكن الفرق زبائن جدد
نظرات اقذر من الي قبلهم
فريت شعري و نزلت للارض اهز شعر ،
رفعت راسي
دحگت لـ واحد كاعد يصورني
سمعت بـ فترتها اكو نت من كلام اساور
دائماً تسولفلي شنو ينشرون و شنو يحطون
لان ما عندي جهاز ما اعرف هالشي
رغم ما اريد اطلع بهذا المنظر القذر
بس تمنيت ينشرني و و احد من اهلي يشوفني
و يعرفون مكاني ، و ينقذوني منا
سرعان ما خاب آملي
لمن اتقدم واحد من النوادل
و منع الرجال من التصوير
خلصت درت وجهي رايدة اروح
وكفني واحد من الي يشتغلون
اشر الي على وحدة من الطاولات
حتى اروح اشوف الزبون
موتني هذا الزبون كتلني كتل
كل يومية يريد يشوفني و بكل مرة ارفض
اخير شي قررت اروح اريد اشوف شنو يريد
رحت ، سحبت الكرسي كعدت كدامه
حطيت ايديه على الميز
مُلاذ : اي گول ؟
-و اخيراً شرفتي ؟!
رغم جنت مأيس تجين
مُلاذ : اريد اعرف شنو سبب اصرارك؟
-حبيت اتعرف
مُلاذ : و هاي الرقاصات كلهن
ما لكيت غيري؟
-لا انتِ تختلفين جذابه كلش
ملامحج و كذا
مُلاذ : و الحاصل؟
-ليش معصبه ؟
مُلاذ : ما معصبة بالعكس
بـ قمة هدوئي
- الليلة مقابل شكد ؟
لان مبينه انتِ صعبة
رفعت حاجبي مصدومة
حكيت كصتي ، بللت شفتي و ابتسمت
مُلاذ : بگد ما تاخذ امك
فزز عيونه عليه ، مصدوم مني
درت وجهي ، گلبي يترسة الحقد
على شرف و على الچتال
و على يلي خطفوني و باعوني
و انا امشي دحگت اكو ظل وراي
انداريت لگيت الحارس يمشي وراي
هزيت ايدي و كملت مشي
رجعت للغرفة بدلت ، مسحت مكياجي
طلعت ع السريع ، اخذني الحارس
طبعاً مرافقني على مدار ٢٤ ساعة
ما يخليني اتحرك حركة وحدي ،
تحت تعليمات شرف و تشديده على اوامره
رجعني للبيت بـ وجهي رحت يم ملاك
و ظليت يمها و سويت اكل الها
و تمددنا و كل يوم هذا السيناريو
كعدت الصبح على صوت عائشة
عائشة : خانم ، خانم
فتحت عيوني بـ نعاس
دحگتلها و انا اتمغط
مُلاذ : شكو؟
عائشة : اجت مدام مريام
مُلاذ : هاي شتسوي هنا؟
مو گلتلها بعد ما احتاجها لا تجي
رفعت اكتافها بـ عدم معرفة
عائشة : يمكن الاستاذ گال الها
فزت ملاك تدحگلي مخروعه
ملاك : شكوو؟
مُلاذ : ماكو
ملاك : منو اجا شكو؟
رح ياخذونا؟ وين ياخذونا؟
مُلاذ : اشش محد ياخذنا
و لا رايحين لـ مكان وحدة اجت حتى امكيجها
هزت راسها بـ قبول
رجعت نامت ، كمت من يمها
طلعت للصالة دحگت لـ مريام
مُلاذ : مو گلت ما احتاج دروس بعد ؟
كامت و هي تطقطق بـ كعبها على الكاع
مريام : انا اطيع اوامر الاستاذ
مُلاذ : شلون اوامر فدوة لـ الله
الي يسمعج يكول هذا مدير شركة
و لا چنه مدير ملهى و الله غاسلة
مريام : رجاءاً اتجهزي حتى نبدأ
مُلاذ : ما اريد ما رح نبدي بـ شي
تعلمت رقص و هاهيه !
مريام : و الاستاذ يريدج تتعلمين اكثر
مُلاذ : اذا ما عاجبة
روحي انتِ ارقصي بدالي
درت وجهي اريد اروح
لزمت ايدي و استوقفتني
نترت ايدي منها و خزرتها
مريام : رجاءاً لا تخليني بـ موقف صعب
وي الاستاذ !
مُلاذ : يكصب راسج ؟
مريام : بليز مُلاذ
دحگتلها من فوك لـ جوا
هاي صدك تحجي؟!
لا و نوب عرفت تحب شرف؟
على شنو تحبه ؟ على صلعته؟ لو كرشه؟
لو ريحة العرك الي ما تطلع من عنده؟
صدك من گال الناس اذواق
و هي عود تخبل شعرها مجعد و اشكر
بيضة و عيونها وساع و خضر
و خصرها و جسمها و شكلها يخبلون!
و تحب هذا المملطخ !؟
تنقهر اذا ما نفذت اله امر واحد
و اذا ضوجته يصير همها و مهمومها
اول مرة شفتها دخلت تتوسل بيه
علمود ما اضوج " الاستاذ"
و اسمح الها تعلمني الرقص؟
هزيت ايدي
مُلاذ : الحمدلله و الشكر على نعمة العقل
بدأت تعلمني حركات جديدة بـ الرقص
جسمها مرن و تتحرك بـ اريحية
انا اضلاعي تتكسر يلا اسوي الحركه
و هم قسيت على روحي و تعلمت ، مجبورة
لـ الليل رحت للملهى ،
كعدت بغرفة المكياج
اساور : شبيج داده؟
مُلاذ : شبيه بـ نص الخير؟
اساور : اف لتصيحين عليه
تدرين انا اخاف من الاصوات عالية
هزيت ايدي
مُلاذ : انا شلون بيه وي النازوكيين
اساور : اوف اوف مومو
لو تدرين شصار البارحة
مُلاذ : ما اريد ادري
اساور : لا لا خل اسولفلج
مُلاذ : لا حول..
سبقتني و صارت تحجي
عن الحدث يلي استصعبته البارحه
اساور : الادبسز مرسى تدرين شسوت؟
ما جاوبتها و هي كملت
اساور : راحت وي هذا الحليو
الي دوم يجي ابو عيون وساع
عرفتي مو ؟
مُلاذ : و انتِ منو گلج انا قناص؟
كل يومية جايبتلي واحد جديد
اساور : اهووو هسه شبيج مو داحجيلج
ف اي شنو جان تجي و تتبختر كدامي
و تگلي هيج سوا و هيج سوا
و الله ظليت بـ عازتج ردت واحد يكتلها
و يفوخ گلبي بيها بس ماكو
رفعت راسي دحگتلها رافعة حاجبي
اساور : اوي هسه و اذا كتلتي وحدة علمودي
هزيت ايدي و انداريت
يلا بالله هاي شحاجيها
اساور : لج عيني الزلم صايرة متنجرع من حلاوتهم
مُلاذ : اساور تخلصين المكياج و انتِ ساكته
لا تدرين شسوي ؟
اساور : شتسوين؟
مُلاذ : الزكج بـ علبة الظل
اساور : اوف مُلاذ يعني اجي افضفضلج
هيج ترديني ؟ و انا ما اعول اجي
الجهال ماكلين راسي و اجي اسولفلج
حكيت كصتي ساكته
و هي سكتت ، رجعت گلت
مُلاذ : ليش هيج تسوين؟
اساور : شسوي ؟
مُلاذ : تعيشين اطفالج هالشكل؟
تظنين ما رح ينطبع هالشي بـ عقلهم؟
اساور : شسوي الهم
شو داوكلهم و اشربهم و عدهم بيت
مُلاذ : بس ماعدهم ام حنينه
ما عدهم احد يسمع الهم
ما عدهم احد يواسيهم اذا اتعورو
ما عدهم احد يمسح دموعهم اذا بجوا
لا تخلين الاكل و الشرب و البيت
من ضمن التربية و الاحتياجات
لان هاي الاشياء واجب عليج توفريهم لـ اطفالج
شلون ما قررتي تخلفينهم لازم تتحملين
اساور : اهوووو مُلاذ شنو دترزليني؟؟
مُلاذ : لا مجرد جاي اگول الحقيقة
اساور ، ازرعي الحب بـ گلب اطفالج
اساور : يمعودة هو انا اهلي ما حبوني
تريديني اسوي شي ما متعلمة عليه وي اطفالي على گولتج؟
مُلاذ : واو ! يعني اهلج ماحبوج
و عشتي شعور انعدام الاهتمام و الحب
و مجربة الاذية و الدمار الشامل الي يصير
و دتخلين اطفالج يعيشون نفس الشي ؟!!
اهنيج صراحه و هواي هم ، بدال متعوضيهم؟
اساور : مُـ...
مُلاذ : يكفي اساور ،
اول شي فكري بكلامج ؟!
هذا الكلام منطقي برأيج؟؟
انتِ بنفسج ما مقتنعه باللي داتحجينة
تريدين انا اقتنع ؟؟
عفتها و كمت بدلت و طلعت
خلصت رقص ، رجعت دخلت
بالممر مال غرف مكياج و بعضهم غرف هيج
دامشي و وكفت بـ مكاني
لمن اتصادر لـ مسامعي اغنية
"طفاج القدر يا شمعتي
خلاني اجر بـ حسرتي
شلي بهالعمر يا دنيتي "
كعدت بالكاع ، لميت رجلية لـ صدري
بلعت ريگي ، گوه اجر النفس
الدموع تحجرت بـ عيني لمن گال
"يا شمس الدنيا و الگمر
انا ادفع شبابي و العمر
لو يرجع اضمه و اعتذر"
ظليت كاعدة ، كل كلمة بالاغنية
تنحفر بـ روحي
سمعت اصوات من وحدة من الغرف
ردت اكوم و اروح لـ غرفة المكياج
لحد ما صار صوت قوي كلش
مثل صوت الضربة ، ركضت اشوف شكو
دحگت للغرفة مردود الباب
درت وجهي تراجعت ردت اروح
بس سمعت اصوات تواسيل و بجي
درت وجهي و رجعت للغرفة
دحگت من الفتحه مال باب
رجال واكف و مقابيله بنية ما واضح شكلها
رفع مسدسه و رمى عليها؟!!
شكو و ليش و شصاير ؟؟ محد يعرف!
ظليت متصنمه بـ مكاني ، مصدومة
و سكنت جسمي متجمد و الدم صعد بـ راسي
لمن رمى عليها كان المسدس كاتم
و اصوات الاغاني عالية
طغت على صوت الاطلاق الناري
طاحت البنية على الكاع ، فاقدة
اتلطخ القاتل بالدم ! دارت وجهها البنية
ناحية الباب ، شهكت ،
حطيت ايدي على حلگي كاتمة صوتي
ادحگلها ، همست متيبسه بـ مكاني
مُلاذ : صافيناز !!! ...
يتبع ...
_________________
- يتبع الفصل التالي اضغط على ( رواية جرح الأيهم ) اسم الرواية