رواية جرح الأيهم الفصل الثالث عشر 13 - بقلم أيلان
"الجُــرح الثالث عشر"
"مابية حيل اخذ نفس
ماعندي واهس للحجي
من برا تلكاني أبتسم
بس جوا أطُگ من البجي
مابيه أكمّل هالدرب
تعبان خلوني أنتچي.."
البؤبؤ تارةٍ يكبر ، تارةٍ أُخرى يصغر
احتمالين لهذي الحالة
بسبب الخوف أو بسبب الضوه
و الاحتمال لاول هو الاحتمال الاقوى
تراجعت بخطواتها متمسكه بأيد اختها
و بالأيد الاخرى الروح يلي لازم تنقذها
نزلت عينها بخذلان ناحية زينه
يلي اشتد بُكائها و نحيبها
استمرت تتراجع بخطواتها
همست : اركضن
التفتت .. هي و الروحين يلي وياها
ركضوا مسافة ما تقل عن ال ٣ خطوات
حتى ارتطموا بصدر الـمُلثم الاخر ! ...
مُلاذ :-
حاوطونا من كل الاتجاهات
بلعت ريگي ادحك لـ الـملثم يلي كدامي
جر شعري ، كتمت صوتي متوجعه
نهايتي او عقابي بألاصح؟
اغتصاب أم قتل أم بيع؟
توالت الضربات على وجهي
لَكن الي فززني صوت ملاك يلي صرخت
لزم ايدي بقوة الـمُلثم ، جرني منها وكفني
مُلاذ : ملاك لاااا تخافين
صافيناز ...
قبل لا اكمل اجت ضربه قوية على وجهي
دارني الملثم ، لازم ايديه و يحاول يثبتهن
- بت الكلب بعدها تووووصي
وسعت عيوني ، الشياطين تتلاعب كدام عيني
بينما ما الـمُلثم وراي و لازمني
رفعت راسي بـ حدة و سرعه
ضربت وجهه بـ مؤخرة راسي
بعد ما سمعت عيطته ، تيقنت ضربتي نجحت
مُلاذ : مااااكو غيرك كلب ، حيوووان
توالت الضربات عليه ، طحت بالكاع
اتصادر لمسامعي صوت صريخ البنات
بدأو يضربونا راس بـ راس ، جرو شعرنا
اماطلهم مماطل
اضرب هذا ، يرجع يضربني
و ارافس بس حتى امنعه
اغلط على يلي يضرب ملاك
ارجع اغلط على يلي يضرب صافيناز
يعوفوهن و يجون عليه
حسيت كليتي و بطني تفلشن
ما بقى بيه عظم صاحي ،
أيدي صارت توجعني كلش
طاحت گلادة الرصاصة بـ جف أيدي
شددت لزمتي عليها ، ما تركتها ابد
و انا ملتمين عليه الف واحد
يتفننون بطرق تعذيبي
لَكن الاهم ما اسمع
صرخات عذاب ملاك أو صافيناز
جرني الـملثم و صاح بيهم
يجيبون البنات وراي
رغم جنت گوه امشي و ميته من الوجع
لَكن عيني تعلكت على ملاك و صافيناز
كل دقيقة التفت الهن
اتطمن اذا شفتهن وراي ،
الگلادة بجف ايدي ضامتها
جرونا لزنزانه ثانية
شمرونا داخل الزنزانه بس احنا الـثلاثة
بيها شباك بي حدايد ،
قفلوا الباب علينا متحلفين بينا
كعدت بالكاع أنيت بوجع
دحگت لـ ملاك وجهها مورم
رجعت دحگت لـ صافيناز نفس الشي
اجت الي ملاك تتطمن عليه
هزيتلها راسي بمعنى "انا تمام ما بيه شي"
مُلاذ : و انتن ؟؟
صافيناز : وجهي عم بيوجعني
كسروا سني بظن
مُلاذ : شو تعاي اشوف
اجت يمي فتحت حلگها ، دحگت
مُلاذ : طار السن الجوا
مبروك صرتي ثرمه ، ههههههه
استغربن من عندي لان ضحكت
گالت صافي بتساؤل ،
تدحك بوجوهنا مستغربه
صافيناز : شو يعني ثِرمه؟
مُلاذ : لا بشرفج ثِرمه شني؟
ثَرمه بويه ثَرمه
صافيناز : شو يعني؟؟
مُلاذ : صدك ما تعرفين معناها؟
صافيناز : اا و الله
مُلاذ : يعني هذا الي يكول "ث" بكلامه
مثلاً ، ثلونج ، ثدك ، ثوكت ..
انا احجي و هنه يضحكن
فحطن من الضحك
و لا تگول هستونا كاتلينا و حالنا حال
مُلاذ : تعالي ملاك اشوفج
خو ما متوجعه؟
ملاك : لا بس خرمشوا وجهي
و ايدي توجعني و خشمي يمكن كسروه
مُلاذ : چا شبقيتي دگولي مرمطوني
ملاك : هههههه
مُلاذ : بشرفجن هسه هاي شكولات واحد هستوه كاتلينه
ملاك : انتِ الضحكتينا اول
مُلاذ : دضحكن اووووي
كافي بس نلطم بوجهه الحمزه
صافيناز : الحمزه مين؟
مُلاذ : هاي اذا ارفسها احد يگلي ليش؟
صافيناز : ايه شو ما بعرف ؟
مُلاذ : اكلج انتِ شني ديانتج؟
صافيناز : ما فهمت
مُلاذ : ولج !
صافيناز : كيف يعني ديانتي؟
مُلاذ : يعني مسلمه ، مسيحيه ، يهوديه ، شني السالفة ما تعرفين الديانات؟
صافيناز : فهمت فهمت
مُلاذ : الحمدلله و الشكر
صافيناز : انا مسلمه
مُلاذ : لعد شلون متعرفين الحمزه؟
صافيناز : انا عائلتي مش كتير يحكوا بالدين
يعني ما بعرف كثير
مُلاذ : ها خوش وصلت
هزت راسها
درت راسي لـ ملاك دحگتلها وجهها كله دم
غلطت لمن طلعتهم او ما غلطت بس انغدرت ...
همست : يا ربي ساعدنا
شفت ملاك تغفي
جريت راسها لـ رجلي ، فزت دحگتلي
هدأتها و نومتها على رجلي بـ هدوء
ظليت ادحگلها و هي نايمه على رجلية
دكنت بست شعرها ، تنهدت و همست
مُلاذ : امانة ابوي
اخذت اللفاف الي ما طاح من عندي ابد
انطيته لـ صافيناز لفته و خلته جوا راسها
سندت ظهري على الحايط
البرد يكص كص ، جسمي صار ثلج
ظليت ادحك للبنات
و ارجع عيني اثبتها على ملاك
شلون احميج؟ شلون اطلعج منا؟
يابه وصايتك صعبة كسرت ظهري
و هدت ثلثين حيلي ...
غمضت عيني كم لحظة
و فزيت على انين ملاك
فتحت عيوني ، دحكت الدنيا صبح
ما حسيت على روحي لمن غفيت
نزلت عيني دحگت لـ ملاك
متعرقة ، تون بوجع ، عيونها تدمع
و تهمس بصوت خافت : يمه بردانه
رفعت عيني دحگت لـ صافيناز
يلي فزت تدحگلها وياي
حطيت ايدي على كصتها
تجوي من الحراره تجوي جوي
ضربت خدها ضربات خفيفه
محاولة اصحيها ، فتحت عيونها بخمول
ملاك : يمه
بلعت ريگها ترطب بلعومها
وجهها احمر دم ،
مُلاذ : ملاك
رجعت اضرب خدها
بس اريدها تصحى
اجت صافيناز يمي بسرعة
مُلاذ : اذا ظلت على حرارتها تنشمر و الله
صافيناز : وقفي
كامت تدك بالباب تطلب منهم يساعدونا
و لا احد جاوب علينا ، لفيت ملاك لف باللفاف
صافيناز لابسه قمصلة خفيفة
اخذتها و لبستها لـ ملاك
فزينا لمن انفتحت الباب
شلت راس ملاك من رجلي
صرت كدامها لو اعرف اموت هالمرة
ما اخليهم ياخذونها
دخلوا الملثمين ، دحگولنا
بـ لحظة رفعوا السلاح بوجهنا
صرخت صافيناز لمن شافت السلاح
غطت حلكها بأيديها
اخذتها و ضميتها وراي
اتوجهه السلاح عليه
دحگتلهم ، عيوني ثبتتها على السلاح
رفعت عيني دحگت لـ الـملثم
اتقرب من عندي
صافيناز كضبت ملابسي بأيدها
مشدده عليهم ، تبجي وراي
فتحت ايديه مكونه حاجز بين صافيناز و الـملثم
حط الـملثم المسدس براسي
-منو بيجن الي خططت للهروب
و قتلت الريس ؟
مُلاذ : انا
رفع حاجبه و هز راسه متحلف
مُلاذ : كسرت الجامه و اخذت الكزازه
و من اخذوني للريس نبتت الكزازه بركبته
و كتلته و بعدين خططت حتى نشرد
جر شعري ، گال بفحيح غضب
-حظج كعد وياج هالمرة
ما رح اكدر اكتلج و اشرب من دمج
لان محجوزه و تجيبين خوش سعر
خزرته ما فاهمه عت شعري اقوى
و كمل بصوت حقير ..
-بس ما يمنع نعذبج
تحسبين جريمة الريس هينه؟
و الله لنشوفج نجوم الظهر
دحگت بـ عيونه ، جر ايدي
غمضت عيوني متاذيه
لان احتمال ايدي انكسرت
صرخت وراي صافيناز خايفه
التفتت الها بصعوبة
اشرت على ملاك بـ عيوني
هزت راسها بقبول فاهمة قصدي
تبجي وراي و تصرخ بـ اسمي
كعدت صافي يم ملاك حضنت راسها
شدوا ايديه و لزكوا حلكي
ربطوا عيوني ، طلعوني يجرون بيه
بكل مره تجيني ضربة بظهري
تكون اقوى من الي قبلها
اسمع كفارهم ، فشارهم
ادعي عليهم و اتحسب
الـملثم مخلل اصابعه بين شعري
و يدفع بيه ، امشي كدامه
ما اعرف بـ شنو انجبحت ، تكومت بالكاع
روحي فرفحت من الوجع
احس شي حار ينزل من راسي
عفية راس ، ما ظل شي ما انفشخت بي
جرني من شعري ، وكفني على رجلية
كملوا مشي بيه لـ فترة
انشمرت بالكاع عيوني مشدودة
رفعت راسي ، ادور على مصدر صوت
تراجعت بجسمي و انا كاعدة
انضربت بـ شي وراي ، بـ قوة
حاولت اشوف ، رفعت راسي
شفت رجلين تقترب مني
واحد لزم وجهي نترت وجهي منه
انرفعت الربطة عن عيوني
غمضت عيوني متوجعه من شدة الضوه
فتحت دحگت لمكان فارغ كدامي ملثم
و يلي وراه واكفين هم ملثمين
- ههههههههه ، استعدي لـ عذابج
دحگت بالوجوهه ما فاهمه
انرفعت عن الكاع
حاولت افلت روحي منهم
و اتصارع وياهم بس مداكدر عليهم
ثنين لازمين ساعد ايديه من الجهتين
و يرجعوني لـ ورا ، كعدوني غصب على كرسي
ردت اكوم ضربني الكدامي ببطني و ثبتوني
كمت اصرخ بصوت مكتوم و اضرب رجلية بلكاع
يلي كدامي لازمني كل قوته
، يثبتني على الكرسي
ربطوني بالكرسي ، دحگتلهم باستغراب
جابوا سطل ماي
و همَ رابطين رجليه رفعوهن
حطوهن بـ سطل المي
حركت الكرسي احاول اطيحه ما يطيح
و اكف واحد وراي و مثبت الكرسي ،
جابوا واير اسلاك الحار و البارد طالعات
بحلقت عيوني عليهم ، حطوا السلك بالمي
دحگلي الـملثم ، عيونه يوضحن هو مبتسم
جدح بشغلتين بايديه مربوطات بالاسلاك
سرت الكهرباء برجلية ،
انتقلت الى كامل جسمي
صرخت من الوجع بصوت مكتوم
رفعت راسي للسكف كرروها مره ثانية
صرخت بصوت عالي
لمن حسيت ازداد التيار
جسمي ينرج رج و يرجف كله
يخترق مسامعي
اصوات ضحكهم
ما اعرف شكد كرروا هذا الشي
بس كل مرة جنت اصرخ صريخ يفحطني
انا ملزوك حلكي ، رجلية يرجفن ،
بكل مرة تطلع روحي و اوصل للموت
ارجع و اعيش ، اشوف الدنيا كدامي تدور
انصعق جسمي
صرخت اناجي بصوت مكتوم : إليييييياس
نزلت راسي الهث ، فوراً رفعت راسي مرة ثانية على اثر صعقة جديدة سحبت روحي
صرخت هم بصوت ما ينفهم
مُلاذ : يممممه ساعدينيي
كل صعقة انصعقها
اناجي و اطلب المساعده
تدريجياً بديت ما احس باطرافي
كهربوني مرة و مرتين و عشرة
لحد ما خارت كل قوتي
انقطع كل صوتي ، ما اكدر حتى اصرخ
الالم يلي تخلل جسدي وكتها
بس الله يعلم بيهه
اتردد باذاني اصوات اهلي
و الذكريات
إلياس : دهر طرني ي بابا
اذا اسمي صار لوسي
إلياس : مُلاذ ، مُلاذي
فيروز : بَـطه تعالي اكلي
إلياس : ليش تتعاركين بابا؟
غمضت عيوني سرت دمعه على خدي
استمرت الاصوات بـ اذني
فيروز : مُلاذ اعقلييي
إلياس : مُلاذي الحلوة
البنات البنات عشرة و اگول گليلات
فيروز : مُلاذ ماما تعالي
إلياس : مُلاذ نمتي ؟
تعالي بابا نامي يمي اذا خايفة
فيروز : خو ما بردانه؟
انهلك جسمي من الصعقات
و انا اعيش بألم الذكرى
اذا الصعقة تهز جسدي
الذكرى تهدم روحي .
انصعقت اخير صعقة
انغلقت عيوني ، مُعلنه انتهاء طاقتي
فتحت عيوني بعد فترة
تجولت عدسة عيني ع الكاع
رفعت عيني ، دحگت لـ ارجاء المكان
فارغ و انا مشدودة ايديه لـ ورا
و ممدديني بالكاع
حسيت رجلية مشلوله
حاولت اكوم ما كدرت
رجعت غمضت عيوني بـ تعب
و احتل السواد رؤيتي
هم رجعت فتحت عيوني
لكيت ملثم واكف كدامي
ظليت ادحگله بـ تعب
دفرني ببطني و طلع
شاغت روحي متوجعه
حسيت رجليه تلزك ببعضها
رفعت نفسي عن الكاع
وسعت عيوني لمن شفت كمية الدم بالكاع
دحگت لـ ملابسي كلها دم
رجعت راسي على الحايط الهث بـ تعب
ما اعرف شكد صارلي انام و اكعد
رجعت عيني ع الدم
غمضتها و درت وجهي
بلعت ريگي اتغصغص و احس زردومي يتكطع
و بلعومي مشخط بموس عبالك
مرت فترة دخلوا الملثمين واحد يعقب الثاني
لمن شافوني كاعده ، دحگت بعيونهم واحد واحد
جروني بـ الكاع اريد ارافس برجلية ما اكدر
رفعت عيني دحگت لـ جنگال فوك راسي
فتحوا ايديه من الحبال و علكوهن بالجنگال
طاقتي منتهيه ما اكدر ادفع احد
و لا اكدر امنعهم ، عباره عن جثة عايشة
يحركون بيها باتجاهات مختلفة و يعذبونها
من بعد ما رفعوني عن الكاع
و ظليت معلگه بالجناگل
اتقدم من بينهم اثنين ملثمين
بأيديهم خيزرانات و يفرون بيهم
اتقدموا عليه واحد وكف وراي
واحد وكف كدامي
ضربوني بالخيزرانات
على ظهري و على بطني
كالعادة صرخت بصوت مكتوم
فرفحت روحي من الوجع
الكاع صارت بحيرة دم
و رجلية خطوط حمر
فوك ألم الشهرية
توالت الآم الضرب و التعذيب و الصعق
ما كدرت ابجي حتى من الوجع
رجعت الدموع تتحجر بعيني
و اتغصغص بوجعي و تشوغ روحي
ضربوني على رجلية
لحد ما حسيت رجلية بعد ما اكدر ارفعهن
توالت التشجيعات الصادرة من الملثمين الثانين
على ضربي بطريقة اقوى
سلموا الملثمين الكدامي
الخيزرانات لـ غيرهم
كرروا ضرباتهم على بطني
بواسطة الخيزرانات
و النزيف يزداد كل مرة و تتضاعف الآمي
ظليت لـ فترة طويلة اناشغ من الوجع
و التف بمكاني
كل مرة يدوروني من واحد لـ واحد و يضربوني
تركوني معلگه بالسكف
و طلعوا و همَ يضحكون
تغاوش النظر بـ عيني
و غلقت عيوني بـ تعب
صحيت على ضربة قوية ببطني
دحگت للملثمين رجعوا اتجمعوا
ويضربون بيه
ايديه شددتهن على السلاسل
ارفع راسي متأذيه ، منهلكه من الألم
حرموني من الاكل و الشرب
يحطون قطرة مي بحلگي
يخلوني افحط لان اريد مي
و ما ينطوني الباقي ، قطرة حرفياً قطرة
تطيح بـ حلگي تحسسني بنعمة الـمي
و العطش يلي مزك بلعومي
ما اعرف شلون كدرت اعيش
كل مرة جان يغمى عليه و انا معلگه بالسكف
بعدين فروني علكوني من رجلية
و راسي لـ جوا و الدم يتجمع براسي
يصير الصداع عندي مو طبيعي
و عيوني تتگلب ، يرجعون يعلكوني من ايدية
كل يوم جنت اعيش انواع من التعذيب
بيوم نزلوني ما اكدر ارفع لا ايد و لا رجل
واحد منهم فتح تلفونه يصورني
و انا ادحك بالوجوه ما فاهمه
اتصادر لمسامعي صوت المكينه
وسعت عيوني ، لمن المكينه سرت على راسي
نزلت عيني دحگت لـ شعري ، دمعت عيوني
خصلات شعري تناثرت على الكاع
بعد ما جانت امي تمشطهن بأيديها
و تعتني بيهن و تظفرهن ...
شعري يلي ملاك جانت تتمنى لونه و طوله
شعري يلي ابوي يبوس ظفيرته و يشمه ! .
حاولت اوخر من جوا ايده بس ثبتوني
گلت بصوت يُكاد يختفي من كثر الصراخ
مُلاذ : عوووف شعري غضب الله عليكم
عوفوووووووني
يقهقهون باصوات مزعجة
تخترق مسامعي و تسببلي الضجيج
و انعدام الراحة
اتقدم الملثم يلي بأيدة التلفون
راواني الفيديو يلي صورة الي
و شلون زينو شعري و صار حفر
و جزء بي شعر و جزء ما بي
نزلت عيني ادحك لـ وجهي مصدومة !
اثار الضرب وجهي ضعيف مطبوك طبك
عيوني ذبلانه ، تحتهم هالات سوده غامقة
عظام خدي مبينه ، شفتي يابسه و بيضة
اما جسمي صاير عبارة عن هيكل عظمي
و ايديه على طولها اثار
بسبب كل يلي تعرضت اله
اقتربت الف خطوة من الجنون
صارت اصوات الضرب تدور براسي
كل لحظة صوت الصراخ و صوت التعذيب
حفظت كل بقعة دم بالمكان يلي كاعدة بي انا
حفظت عدد المرات يلي تعذبت بيها
و عدد الضربات بديت احسبهم وحدة وحدة
شلون تحملت ؟ شلون عشت ؟
بنفسي ما اعرف
و من بعد ما عذبوني و لـ فترة طويلة
بدا الملثم يجيب اكل و يخليني اكل غصب
حتى لو ما اريد
بس اكل اصير اتقيء
لان من فترة طويلة ما ماكله
و اكل اشياء دسمه ما تتحملها معدتي
استجمعت قوتي
گلت برفض و اصرار
مُلاذ : ما اريددددد وخر عني
-ما ميت عليج الشراي رح يجي
يدفع فلوسج ما يريد يشوف هاي الخلقة الزفرة
مُلاذ : شسويتوا باختي ؟؟
-بجهنم الحمره
تفلت بوجهه ضربني
رفعت ايدي بسرعة جريت اللثام من وجهه
شفت وجهه حفظت ملامحه بعقلي كلش زين
سحب اللثام معصب ، نبت الجطل بأيدي
رفع الجطل من ايدي ، متلوث دم
دحگتله ببرود ، طلع من يمي و ايدي تنزف
احس دمي خلص ، بس وصلت لمرحلة
بعد ما احس بالوجع
فتحت ايدي الثانية
دحگت للگلادة الرصاصة
مقاومة كل هذا علمود ملاك و امي
ذكرتهم تحييني ، وصاية ابوي تحييني
اوصل للموت و تطير روحي
و ترجع لجسدي باصواتهم و صورهم
مع انو بديت تدريجياً انسى ملامحهم
لكن هيهات انسى ملامح الألم
محفورة بگلبي قبل عقلي
بعد كم دقيقة انصدمت بشوفة زينه كدامي
و الملثم دخل وراها ،
وسعت زينه عيونها عليه
اتصنمت بـ مكانها
ابتسمت باستهزاء ادحگلها
-امشي ولي عالجيهاا
شوفي شبيهااا و كلمة وحده اذا سمعت
طلقتين وحدة براسج و الثانيه براسها
دخلت بسرعة وبايديها ادوات الضماد
اخذت ايدي تريد تضمدها
نترت ايدي منها
بجت و اندارت للـ ملثم
زينه : ما تنطيني ايدها
اجا الملثم عليه جر ايدي
ما صرخت ، تعودت على الوجع
اساساً داموت على البطيء
حاولت اجر ايدي ما كدرت
لزمها كل قوته عبالك رح يفصمها
و ثبتها خلا زينه تضمدها و هي تبجي
عطت بيها
مُلاذ : وخرررري
ما اريد اسمع صوتج القذر
كله بسببج ...
قاطعني الملثم : تسكتين لا ...
قاطعته قبل لا يكمل
مُلاذ : تحط طلقة براسي؟
- زين تعلمتيي
مُلاذ : طبك مرض هاي الطلقة عندك و يلا كوم و نبت الطلقة براسي عبالك خايفة؟
خزرني ساكت
ابتسمت و گلت
مُلاذ : طبعاً ما تكدر تكتلني
هههههه ما تكدر لان ما تحصل فلوس
ظل ساكت و انا استفزيته
حط المسدس براس زينه
دحگلي يظن رح يخوفني
-كلمة بعد و تموت كدام عينج
مُلاذ : شعلية ؟ موتت الجلاب السود
دحگتلي زينه موسعه عيونها
و تبجي بـ نحيب و تتوسل
دحگتلها ببرود : مو سلمتينا الهم؟
زينه : و الله مجبورة جنت
ضغط الملثم بالسلاح على راسها
-كملي شغللللج
حط السلاح بخصرة
لمن شاف روحه بعد ميكدر يخوفني
مُلاذ : شوفي اثرج زين
دحگيلي زين لا تطلعين منظري من بالج
اشتد بجي زينه
دارت وجهها لـ الملثم و گالت
زينه : اريد معقم
-منيين اجيبلج هسه !!
زينه : اذا ما عندي معقم
ايديها يصير بيها جراثيم و تصير بدمها
و تنتفخ ايدها و تستوجب القطع بعدين
و ممكن ما تنفعك لمن تبيعها
لان منظر ايدها رح يكون مُخزي
دحگلها الملثم بـ غضب
گال بتحذير
- رايح اجيب المعقم و اجي
ارجع اذا الكاجن مسوياتلجن شغلة وحدة
موتجن على ايدي و حق الحق
هزت راسها بقبول ،
طلع الملثم وقفل الباب
اتقربت الي و همست : ملاك بأمان
دحگتلها بـ استغراب ما فاهمه : ش ... شلون؟
زينه : بنفس المكان حطونا
احنا و ملاك و صافيناز
مُلاذ : ههه و تكول بامان
و احنا يم ذولة المجرمين
زينه : لا تخافين تحت حمايتي
مُلاذ : شفنا حمايتج شلونها !
زينه : جنت مجبورة
مُلاذ : حطوا السجينة على ركبتج؟
گالت بعيون مدمعه
زينه : لا ، حطوا السلاح بـ راس اطفالي
بلعت ريكي ساكته
و هي مسحت دموعها
مُلاذ : لا تگلين لـ ملاك عن وضعي
گليلها كل شي ما بيه و راجعه الها
و رح اطلعهم هي و صافيناز
مهما صار و لو كان الثمن روحي
هزت راسها ساكته
دخل الملثم انطانا المعقم و يدحگلنا بـ شك
اخذت زينه المعمقم و ضمدت ايدي ،
اخذها و راحوا ،
رجع الملثم بعد فترة كنبص كدامي
مُلاذ : و خر عني گلت
- اتسممي
مُلاذ : اتسمم انت ماريد
- باقي قليل ويجي ياخذج شرايچ
اتسممي خل يصير بوجهج لون
مُلاذ : شنو شعورك و انت تعذب الناس؟
-شعور حلو تستاهلون
مُلاذ : مريض شاتوقع منك؟
ضربني رجعت انداريتله
و گلت بهدوء
مُلاذ : كسر بأيدك
رفعت ايدي و خرمشت عيونه
ضرب ايدي كل قوته و لزمها
نفسها يلي نبت الجطل بيها
-افصمهاااا الج
مُلاذ : لا عفية خوفتني
كمشت ايده لمن رفعها
مُلاذ : مهما كان الوضع يلي انا بي
لا تظن اخليك تضربني و اسكت
اردلك الضربه ب عشرة
شدد لزمته على ايدي و لواها
ظليت ادحگله ببرود
مُلاذ : شنو ذنبي ؟ عيشتوني كل هذا؟
- شردتي و قتلتي الريس
مُلاذ : هذا ذنبي؟ انقاذ روحي؟
-تستاهلين محد گلج تشردين
اساساً لو ما مبيوعه جان شفنا شغلنا وياج
مُلاذ : عساكم بمرض ما تشفون من عنده
و الله اطلع منا بيوم من الايام ما اتسمى مُلاذ
اذا ما سجنتكم واحد واحد و خليتكم مثل الجلاب
- طبج مرض لا تتسممين
- طبك مرض انت
عافني و طلع ، اتوالت الايام
و بيوم اجو شمروا بنية بداخل المكان
يلي انا بيه ، دحگت للبنيه
دخل وراها الملثم و بلا اي مقدمات
رفع السلاح و اطلق النار عليها
تحديداً براسها ، شهكت بـ صدمة ،
تناثر دمها على الحيطان
و على وجهي سقطت على الارض ميته
بمسافة قريبه عليه و وجهها الي
اتجمدت بمكاني من الخوف
و عيوني جاحظتها
صرخت بصوت عالي
مُلاذ : غضبببب الله عليكم
شسوووووويت شسوويت!!!!
- صوتج ما اسمعه
قبل لا احجي
عافونا و طلعوا ، ظليت بصدمتي
نزلت راسي بهدوء تمددت بالكاع
حطيت ايدي تحت راسي
و كرفصت نفسي مثل الجنين
دحگتلها
اتجمد نظري على الدم المتدفق من راسها
ما يفصل بيننا الا مسافة كم اصبع
تسللت ريحة الدم للـ خشمي
امتلئت رئاتي بيها ، مما سبب الي غثيان
الجثه كدامي هامده
بياض بشرتها بسبب البرد
عيونها يلي مفتحتهم ،
اشتد سواد البؤبؤ بيهم
تدحگلي بشكل مُرعب
رغم هي جثة خاليه من كل روح
لكن قتلها كان عن طريق رصاصة اخترقت دماغها
تركت عيونها مفتوحات على الحياة
بلعت ريگي ، روحي حسيتها تطلع
شكل الجثه يرجف كل ذره بـ جسمي
معقوله رح تكون نهايتي هيج و هنا؟
شنو ذنبها ماتت بهذا العمر و بهاي الطريقه ؟
كمت من مكاني كعدت على حيلي
دموعي نزلت بهدوء و شفايفي ترتجف
تقربت منها ايدي ترجف
حطيتها على عيونها و مسحت عليهم
بلعت غصتي و رفعت ايدي
دحگت لعيونها ، انغلقن
كمت من مكاني كعدت بزاوية الغرفة
ادحگلها و ايدي على اذاناتي مثل المجنونه ...
ملاك :-
من بعد ما فتحت عيوني
و افتقدت وجود مُلاذ ،
عرفت من صافيناز اخذوها
بجيت رغم جانت الصخونه
ماخذه حيل من حيلي
صرخت و جنت اريد بس مُلاذ
دخلوا الملثمين و من شافوني مصخنه
ودوني يم زينه انا و صافيناز
حاولت اعرف شصار عن مُلاذ
بس ماكو كل يوم اشكال الضرب اشوفها
من الملثمين للـ البنات يلي يحاولن يشردن
و الدم يصير بكل مكان
اخاف و الكوابيس تلاحكني
و من جهه عقلي يم مُلاذ
لا جابوها و لا عرفت خبر عنها
اكعد ساعات نبجي انا و صافيناز
اختفت كل ذرة فرح من وجهي
اصوات الرصاص بكل مكان
و كل يوم نسمعها و تكون قريبه من عدنا
صرت اخاف من اي صوت رصاصة يصدر
كم مرة اتحرشوا بيه الملثمين
و جنت افرفح اريدهم يعوفوني
و خالة زينه تنقذني منهم
بيوم اخذوا زينه
و لمن رجعت كلتلي اخذوها لـ مُلاذ
كعدت بحلگها بس اريد اعرف شلونها
سئلتها عن حالها و اذا ماذيها او لا
و الحمدلله عرفت مُلاذ بخير
ما جنت مصدكه ، بس اكدت الي زينه
ملاك : ليش حطوها بغير زنزانه لعد؟؟
زينه : لا تخافين ما بيها شي
حاطيها بغير زنزانه لان شردتكم
و حتى ما تحاول تشردكم مره ثانية
هزيت راسي و اتطمنت مُلاذ بخير
استمرت ايامي السوداويه
و اتمنى ارجع لـ امي
خالة زينه تحاول تحمينا
انا و صافيناز و تمنعهم ياذونا .
كل ليلة نكعد انا و صافيناز
ننتظر الفرج و دموعنا على خدنا ...
نور :-
بعد كل يلي صار
جنت اكعد يم بيبي طول اليوم
نبجي لحد ما ننهلك ...
لا بأيدنا شي و لا نكدر ننقذهم
و بهالفترة عمامي الثانين يلي بغير محافظات
اجو النا بعد ما وصلهم الخبر
كانت الصاعقة يلي سقطت على عائلتنا
سلطان و حسن و جسار و صفاء
و كل اولاد عمامي الثانين موجودين
و ابهاتهم موجودين هم طبعاً ...
اسكندر استمر يدور على اثر
و احد الجيران گايل
" سمعنا صوت بنيه تصرخ بالليل
من بيت ام مُلاذ يوم خطفهم "
مرت اشهر و احنا على وضعنا
لا ليلنا ليل و لا نهارنا نهار
نمر على خالة فيروز نشوفها
احياناً نروحلها نلگاها مكابله الشباك
و كاعده بكل هدوء
بس عيونها ينحجي بيهن التعب
و الهم و الحزن و الدموع
غاده تاركه الدراسة و ما رايحة للجامعه ابداً
حياتنا صارت سوداويه بشكل مو طبيعي
الي فقدناهم مو اي ناس
فقدنا اقرب الاشخاص النا " مُلاذ و ملاك"
ما ندري بيهم عدلين لو ميتين
انا گلبي مفطور و الحيرة ماكلتني
فما بالك بخالة فيروز؟
تكول غاده مرات تروح للحمام
نسمعها تبجي من كل گلبها
و مرات تستوعب و تنفجر
و مرات لا تظل صافنه
قاطع تفكيري
دخول جسار : السلام عليكم
- و عليكم السلام
جسار : شنو ما حصلتوا خبر ؟
احمد : لا
همست امي الكاعده يمي
امي : اذا ما طلعت مهزومه هي و اختها
وي فد واحد هاي ايدي اكصها
طككت عيوني عليها
هاي امي صدك تحجي!!!
الدنيا محروكه حرك و الا شوي نتخبل
و هي تدخل بـ النيات و تسوء الظن !
سمعتها عمتي منارس
كامت و عاطت بصوت عالي
منارس : خاااااافي الله يا ما عدج مستحه
ولج شمسووووياتلج شمسوياتلج
بكد بنتج ولج و اصغر من بنتج !!
جسار : شكو؟؟
احمد : منارس شبيج؟
امي : يا شحجيت انا ؟؟
منارس : هستوج تگولين مهزومات
و رايحات وي واحددد لج شنو من بشر انتِ !
امي : انا گلت ؟؟؟؟ و الله تتبلى عليه
نور : لا ما تتبلى عليج انا هم سمعتج
دحگتلي امي مبحلقه عيونها عليه
كامت بيبي و تعاركن هي و امي
كمت اخذت بيبي للغرفة هي و عمه منارس
احاول اهدئهن ، اسمع من برا اصوات الصياح
بيبي صعد سكرها و احتارينا بيها
ظلت خاله منارس يمها
لحد ما تحسنت بيبي و نامت
طلعت من الغرفة
هجمت امي عليه شبعتني كتل
صرخت بصوت عالي متاذيه
على صوتي طلعت عمتي ،
جرت امي من شعرها
كمت كعدت ايدي موتتني وجع
لازمتها و كاعده ، عمتي تغلط على امي
رجعت امي جرت شعري ، صرخت و بجيت
سمعت صوت جسار يصيح ، صوته هز البيت
جسار : هااااااي شنو هذااااا الصوت !
دخل للصالة و دحك لـ امي
صارت عيونه بـ كصته ،
تقدم عليها و ضربها راجدي!
شهكت و حطيت ايدي على حلكي
اندارلي دحگلي جرني من زندي وكفني
و طلعني من الصاله دخلني للمطبخ
نتر بيه بصوت عالي
جسار : لا ترحييين يمها
عافني و طلع ، عيوني مدمعه
حطيت ايدي على شعري ، اتلمس شالي ماكو
كمت غسلت وجهي ، لبست شالي
طلعت للحديقة مخنوكه من البيت
دحگت لـ جسار كاعد على الصبة
منزل راسه و يدخن الجكاره بين اصابعه
تحمحمت ، رفع راسه دحگلي
اتقدمت ، كعدت على صبة الحديقة
انصى من الصبه الي هو كاعد عليها
ظل يدخن و منزل راسة
كال بصوت خافت : اعذريني
نور : على شنو؟
-ضربت امج
-ليش ضربتها ؟
-ضربتج .
- و اذا ضربتني انا بنتها
هز راسه ساكت ، زفر دخان الجكاره
رفع عيونه دحگلي و هو منزل راسه
جسار : گلتلج اعذريني .
ظليت ساكته ،
مسح على راسه من ورا
جسار : تدرين لو ما راجع
جان مُلاذ هنا؟
نور : ليش ، شعليك انت؟
رفع عينه دحگلي
و بدا يسولفلي عن تخطيطاتهم
الظرف ، الكاسيت ، العنوان
و ما اتبعها من كل يلي صار
ظليت موسعه عيوني و صافنه
بلا اي كلمه ، حتى ما اعرف شحجي
جسار : گلتلها لا تروحيين
گلتلها خطر ، بس ما سمعتني و راحت
نور : شلوووون تضمووون هيج شيي!
رفع عينه دحگلي گال بهدوء : صوتج
انتبهت لـ نبرة صوتي
گلت بصوت اهدء
نور : جان المفروض تكولون!
او على الاقل تبلغون الشرطه ؟!
جسار : جنت ناوي ابلغهم
لكن مُلاذ ما استمعت الي
رفع راسه متنهد
بعدني بـ صدمتي
جسار : دورت ، دورت هواي عليهن
ما لكيتهن و لا لكيتلهن اثر !
نزلت راسي ما تحملت و بجيت
جسار : زاجل ، لا تبجين
رفعت عيني دحگتله ، عيوني مدمعه
نور : ما يستاهلن و الله ما يستااهلن !
جسار : اعرف
نور : تدري مُلاذ صح عصبية
صح الكل يخاف منها صح تبين بارده
صح تتعارك و ما تسكت و تصيح
بس هي بالحقيقة حنونه ، حنونه كلش
ماكو احن منها و الله ، جانت اختي
و ملاك ! ملاك ، حرفياً ملاك
هادئه ما ينسمع صوتها
ما تجرح احد و لا عليها بـ احد
ابتسامتها متفارك وجهها ، تطيب الجرح ملاك
رفعت عيني لمن سمعت صوت بجي
دحگت لـ سلطان ، شعره مخربط
كاعد بنص الحديقة
ايدة على عيونه و يبجي و ينحب !
نور : سلطان !
دحگله جسار وياي
كام جسار اتجهه لـ سلطان
جره من قميصه ، شم ملابسه
اتگلبت عيون جسار ، صارت دم حمر
عكد حواجبه ، كشول ملامحه
رفع ايده ، كفخ سلطان على وجهه ترس ايده
ردت اصرخ بـ فزع
اندارلي جسار ، حط اصبعه على حلكه
بمعنى " اسكتي" ، جسمي يرجف ،
عيوني انملت دموع
جسار اتخبل ، جر سلطان من ياخته
سحبه و فتح باب الشارع دفع سلطان برا
و طلع وراه ، ظليت متصنمه بمكاني
ليش ضربه ؟!!
كمت بسرعة طلعت وراهم
دحكت لـ جسار حاط سلطان على بنيد السيارة
جاره من ياخته و هو فوكا كاز على سنونه
و يحاجي بفحيح غضب ،
يمهم اركان واكف ، لازم زند جسار
يحاول يبعده عن سلطان
دحگولي جسار و اركان لمن طلعت
و ثنينهم بنفس الوقت خزروني و گالو
- ادخلي جوه
دخلت جوه
بلا ما احجي اي شي
و ثنينهم يخوزرون و واحد يدحك للثاني
رحت على بيبي لكيتها بعدها نايمة
و عمه منارس كاعده تصلي و تقرا قرءان
دخل عزيز من برا
عيونه وارمه و حمر و عروك كصته ناطه
نور : عزيز
دحگلي ، و دخل لغرفته
دخلت وراه ، كعد على الجرباية مهدود حيله
عزيز : اطلعي نوره
نور : شبيك ؟
رفع عينه دحگلي بـ ضعف
نزل راسه و عيونه دمعن
كعدت يمه ، مسدت على راسه
حضنته لـ صدري ، صار يبجي
صارله فترة هيج من خطفوا مُلاذ و ملاك
سلطان هم مثل حالة ، اعصابهم شايطه
و ما يكعدون دقيقة
وخر عزيز راسه من صدري
و همس : اطلعي نور
ما حجيت شي كمت و طلعت
نص طالعين و نص هنانه
اخذت جهازي اتصلت على غاده
غاده : الو
نور : الو ، هلو غاده
غاده : هلا عيني
نور : خابرتج اسئل عليكم
ظل بالي يم خالة فيروز ، باجر نجيكم يمكن
غاده : على حالها و الله
بس نور و الله انا خايفة تنجلط مرة لخ
لو يصير بيها شي
نور : يارب نلكاهم
غاده : اذا بعدهن عايشات
نور : اسم الله عليهن
عايشات ان شاء الله
غاده : گلبي رح يطك
كل ما اصفن اتذكر و ابجي
نور : و الله حالي من حالج
اتمنى اكدر اسوي شي جان سويت
تتهدت غاده ، كملت كلامي : داومتي؟
غاده : لا
نور : غاده ميصير هيج !
لازم تداومين ترا ؟
غاده : ولج ما اكدر و الله ما اكدر
تعرفين مكانة مُلاذ يمي
و ملاك من صغرها و انا يمها
مداكدر اكمل حياتي طبيعي
نور : يا ربي ساعدهم وين ما جانو
غاده : هاي صار اشهر !
زين اذا خاطفيها ليش ما يتصلون
يطلبون فدية يطلبون فد شي
معقولة خاطفيهم و مخليهم هيج !
نور : غاده السالفة مو سالفة فلوس ابد
السالفة سالفة ثارات ، نفسهم ذولة الكتلو عمي
مو بعيدة اذا هسه كاتلين مُلاذ و ملاك
حجيتها و بجيت مقهورة
مدايجي ببالنا غير هالاحتمال
غاده : يا ربي احفظهن لـ امهن
خالة فيروز هدرت گلبي عليها و الله
نور : الله يصبرها يا روحي هي
خلصت عمرها تركض شوكت تشوف الراحه..
و انا داحجي ، صار الخط يطوط
مُعلن عن انتهاء رصيدي
تركت جهازي
استغفرت ابعد الافكار يلي دتجيني
كمت توضيت و رحت اصلي يم عمتي
بالي كله وي سالفة جسار
يا ربي دخيل اسمك
كل هذا صاير كدام عيننا و ما ندري !
دخلوا مره ثانية كلهم التموا
جسار : عمي رح تصير سنه
و انتوا تدورون شنو بلعتهم الكااع !
احمد : غير منتظرين شنسوي ؟
جسار : من ط*** اذا عايشات هسه
على هل رهاوه هاي
زمخ اسكندر : و انت شعلييييك ؟؟
جسار : صوتك نصي
لا ادحس النعال عرض بحلكك
اسكندر : شنو شنو گلت شو عيد ؟
جسار : ادحس النعال عرض بحلكك !
كامو واحد للثاني
و صاروا يتضاربون و واحد يعت بالثاني
و دك بوكسيات انگلب البيت بالصياح
اندكت باب البيت حيل ، ركضت اشوفها
فتحت الباب طلع اركان بوجهي
اركان : هاي شكوو؟
نور : اسكندر و جسارر
يتضاربون و مدنكدر نفكهم
عفيييه ادخل شوفهم
دخل بسرعة كوه يحاول يوصل
ما يكدر من ورا رجله
دخل لزم بساعد ايدي استند عليه
و ذب العكازه جتف جسار تك ايد
رفعه من فوك اسكندر
و كلهم ضخمين جسار و اركان
بحيث انا اختفي بيناتهم
اركان : عكازتي
انطيت العكازه بسرعة
اشرلي بعيونه على الغرفة
خزرني ، دخيلك ربي كلهم يخزروني
عفتهم و دخلت للغرفة
دخلت وياي عمتي و بيبي
يلي فزت من وراهم
اما امي مالها صوت
مرت كم يوم و بيبي دكت رجل
تريد تروح للزياره مرت على خالة فيروز
و راحت عليها هي و عمتي منارس
غاده :-
مرت الايام و خالة نيروز
كل يوم تجي تتطمن على خالة فيروز
تسئل اذا اكو تطور و جاوبنا "ما ندري ، لا"
خالة فيروز اساساً عدها شقيقة
لذالك لمن تبجي و الضوا يتسلط عليها
تتاذى كلش تظل تون من الوجع
و الدوا گوه يلا تاخذه
اندك باب بيتنا
كمت فتحت الباب دحگت للحجية
سلمت عليها اتبعتها خالة منارس
دخلوا لـ جوا
اتجهت الحجيه لـ خالة فيروز
كعدت كدامها
الحجيه : يلا كومي وياي
دحگتلها عمه فيروز ساكته
ضعفانه بشكل على عظمها بس جلد
الحجية : اطلبي بناتج من امير المؤمنين
ما يقصر وياج ان شاء الله و حشاه من التقصير
دحگتلها عمه فيروز بعيون مدمعه
كامت سبحت ع السريع ، بس بكل هدوء
اشرت النا الحجية نلبس عبينا
رغم لا مخططين و لا ندري شون نروح
بس الحجية اصرت نروح وياهم
لبسنا ركض ركض
اخذنا جسار و طلعنا متوجهين للنجف ...
مُلاذ :-
اسحل بروحي سحل
رجلية مموتاتني من الوجع كلهن اثار ضرب
رفعت تشيرتي تلمست بطني
عباره عن ندبات الچويات
رفعت عيني دحگت للجثة
زحفت يمها دحگت لـ جف ايدها ابيض ثلج
همست مخنوكه : اگلج اكعدي
حجيت وياها كانو راح تسمعني
ما جنت بوعيي اساساً ، دنكت راسي يمها
مُلاذ : اگلج انا اخاف
رفعت راسي حكيت شعري المحفر
زحفت و رجعت للـ زاويه لميت رجلية و كعدت
ظليت ادحگلها بدون ما ارمش
رجعت زحفت يمها و كنبصت
مُلاذ : اگلج انا اخلصج منا ، اكعدي
بلعت ريكي نزلت راسي تمددت يمها
دحگت بوجهها ملامحها باهته و شاحبه
وجهها ثلج ابيض و ايديها ما بيها لون
الريحة صرت ما افرق بيها
تعودت على ريحة الدم
مُلاذ : تدرين انا جان عندي بابا إلياس
و امي فوفو و اختي مشمش و صديقتي غاده
و صديقتي نور و الحجية
حاولت اتذكرهم واحد واحد
خوفاً ينفقد واحد منهم من ذاكرتي
دنيت راسي يمها و شاورتها
مُلاذ : تدرين اگلج سر ؟
وخرت عنها ضحكت و دنكت
گلت بـ همس : انا احب الناس
حطيت ايدي على حلگي و ضحكت
ما اعرف شلون جنت اتصرف
بس جنت مقتنعه هي جاي تسمعني
و هي تمثل عليه انو هي ميته
مُلاذ : انا اسمي
صفنت اتذكر اسمي
فزيت من تذكرت و گلت : مُلاذ ، مُلاذ اسمي
انكرصت بـ رجلي صرخت و فزيت
دحگت للجثة ، استوعبت انا وين
درت عيني لـ رجلها عليها دود فارسي
ياكل بـ رجليها اكل
دحكت لـ اصبعي عليه دوده فارسيه
صوخت بصوت عالي مفزوعه
طفرت من مكاني و رجعت للزاوية
ادحك لـ منظر الدود ،
حطيت ايديه على راسي
صرخت صراخ عالي من المنظر
كل شي بدا يفوق طاقتي
على اثر صوتي دخل ملثم
صرخت من شفته يجي ناحيتي
ظليت اصرخ هوواي و بلا انقطاع
حسيت راسي شَيب من الجاي اعيشة
- صووووووتج لسانج اكطع اذا صرختي بعد
رجعت اصرخ بصوت عالي
و عيوني تحركني بس ما تدمع
صاح الملثمين الثانيين ، تخبلت
اجو كلهم عليه و يجرون بيه
حشكت روحي بالزوية ماريد اكوم
سحلوني بالكاع و رجلية تكردت
علكوني بالجناكل ، رجلية مدندله
ضربوني على بطني صرخت مفرفحه
مُلاذ : فيروزززز
ضربوني مرات عديدة بالخيزرانه
مُلاذ : فيروزززز ساعديني يمااا
نزلوا على رجلية يضربوهم بالخيزرانه
رفعت راسي ، همست بـ تعب : عينيني يمه
اتوالت الضربات عليه
و انا اصرخ بـ كلمة "يمه"
نزلت راسي لمن سئلني الملثم
- شكد رقم امج ؟
مُلاذ : م .. ما انطي
ضربوني طلعوا روحي
ضربه تجيبني و ضربه توديني
انغلقت عيوني بـ وجع و تعب
حسيت روحي ع الكاع
مادري شيحجون يمي
همست بـ اشياء ما اتذكرها
و سحبني الظلام بـ احضانه ...
غاده :-
وصلنا للنجف بعد وقت طويل
نزلنا من السيارة لابسين العبي
توجهها للـ تفتيش ، دخلنا فتشونا
عبرونا رحنا للحمامات توضينا و غسلنا
و رجعنا دخلنا للـ الامام علي نزور
خالة فيروز اول ما دخلت بجت
اخذناها انا و الحجية للشباك
نتداخل بين النسوان نريد نلوح الشباك
خالة فيروز دمعتها على خدها
وكفت تبجي بـ نص المكان
و تكول بصوت واضح الكل يسمعه
فيروز : طالبه بناتي منك يا علي دخيل اسمك
طالبه بنياتي منك ترجعهن الي
انا ام يا ابو الحسنين و انت اعرف بـ حالي
نخيتك اريد بنياتي يردلي سالمات
و انت ما تقصر ، بناتي مالي غيرهم يا امير المؤمنين ، وين ما جانو احفظهم الي
فقدت زوجي ما عدي طاقة بعد افقد روحين
طلعن من صلب گلبي
دنكت تبجي بحرگه و جسمها يهتز
النسوان لمن شافوها هيج
فسحوا المجال الها و دخلت من بينهم تبجي
و هنه يمسحن على ظهرها و يدعن الها
وحده منهن حطت بـ ايد خالة فيروز علك
اخذته خالة فيروز ، لزمت الشباك
تبجي و تنحب ، جسمها يرجف
النسوان يدعن الامام علي ( عليه السلام)
ينطيها مرادها شدت العلك بالشباك
باست الشباك ، حطت راسها عليه
دخلنا وراها زرنا و هي لازمه بالشباك
تبجي بحرگه ، سودة عليه اتكطع گلبي عليها
اخذناها ، رحنا صلينا و اندعينا
و طلعنا ، صعدنا گبل وي جسار و رجعنا
خالة فيروز ايدها ع گلبها و تبجي بهدوء
رجعنا للبيت منهلكين من التعب
اول ما دخلت نمت .. من بعد هذا اليوم
مرت كم يوم ، خالة فيروز حاولت تقوي روحها
بس كل مره ما تكدر و ترجع گلبها محروك على بناتها
و انا واكفه اطبخ العشا
فزيت على صوت صريخها
تركت الي بايدي و ركضت على صوتها
دخلت دحگتلها بالصالة و منهاره بالكاع
تدك و تلطم على وجهها و تلفونها يمها مفتوح
ركضت عليها اريد افتهم شبيها
كعدت يمها اهدي بيها و ماكو
اسئلها شصاير متجاوب
نزلت عيني اخذت التلفون ، دحگت
يبست بـ مكاني نسيت اصوات خالة فيروز
نسيت صريخها نسيت طرقات الباب
ظليت متصنمه
ادحك لـ صورة بنيه وجهها حاله حال
وجهها مألوف بس مداعرفها
ظليت صافنه بالصوره ادقق بملامحها
لمن تعرفت عليها بصعوبة شهكت
و همست مصدومة
- مُلاذ!!!!!!!!
دحگت لـ خالة فيروز بالكاع
و مفتحه عيونها و امي فوك راسي
تدك و تلطم ، ما مفتهمه شصاير
طاح التلفون من ايدي
فزيت على صرخة امي
ركضنا بـ خاله فيروز للمستشفى
اول ما دخلناها للمستشفى
ركضوا عليها الاطباء يشوفوها
ما اكدر اركز بـ شي
لسا مذهوله من يلي شفته
و الدموع متحجره بـ عيوني
رفعت راسي فازه على اثر صوت الدكتور
دحگتله يحجي وي امي ،
وكعت صاعقة على راسي لمن سمعته يگول
- مع الاسف الجلطة سببت الها شلل !
دحگناله مصدومين
نزلت عيننا على خالة فيروز يلي نايمه !!
ملاك :-
فزيت و انا جنت نايمة بالكاع
على صوت صراخ عالي
دحگت لـ صافيناز يجرون بيها
ركضت عليها : صاااافييي
صافيناز : اتركووووني
جروها جر و هي تبجي
و خالة زينه تركض وراها و تبجي
تريد توكفهم متكدر ، كمت ركضت عليها
لزمت بيها احاول اوخرهم عنها
صافيناز : ملاك الله يخليك اعملي شي
لا تتركووووني
جرني الملثم ، ضربني طحت بالكاع
رفعت راسي ، ادحك للناس صرخت بيهم
ملاك : ما عدكمممم رحمة انتوا
شوفووا جاي يسلبون روووح كدامكممم
الكل يريد يخليهم يعوفون صافيناز
و هم ماكو ميعوفوها
كطعت روحي بالبجي
طلعوها يجرجرون بيها
و سدوا الباب دكيت و لطمت
ياربي شنو ذنبي ؟!
بالبداية مُلاذ اخذوها لـ غير مكان
و هسه صافيناز ، بجيت بحرگه
كعدت يمي خالتي زينه تهديني
و انا ادك على رجلية و ابجي
تعبت بعد ما اتحمل
دعينا ترجع شلون ما رجعوني
رجعت لـ زاويتي و كعدت ادحك للباب
و عيوني الدموع متكومه بيها
و ينزلن عشرة ، عشرة
گلبي حسيته انشلع من صدري
تعذبت هواي ، تاذيت و بكلشي مالي ذنب
اشتاقيت لـ امي و لـ ريحتها
اشتاقيت لـ بيتنا و مكاني و مدرستي
و صديقاتي و حياتي القديمة
ما جنت اتوقع بـ يوم
رح اوصل لهاي المواصيل
ما جنت اتوقع رح اكون بـ هيج مكان
كل الي ببالي رح اكمل حياتي مستقرة
ما جنت ادري القدر رح يلعب لعبته
و يسحبني من داخل الحياة الهادئة
الى حياة كلها ضجيج و قهر
انتظرنا ساعات
لا احد يروح و لا احد يجي
كعدت يم خالة زينه ادري بيها تعرف شي
من حاجت الملثمين و هي مو على بعضها
ملاك : احجي خالة فدوة احجي شكووو ؟
بجت محروك گلبها : الى رحمة الله
اتصنمت بـ مكاني : شنوو؟
اهتز جسمها تبجي
ضمت اولادها لـ صدرها و سدت اذاناتهم
زينه : قتلوا صافيناز و اخذوا اعضائها
تيبست بمكاني : شنووووو!!!
ظليت لا اخذ و لا انطي
هي تبجي و انا صافنه
و الدموع مغركه عيني
بجيت و صرخت : لاااا تجذبين لا تجذبين
كمت وكفت و صيحت : انتِ هم تشتغلين وياهم موو؟ گولي انتِ هم تشتغلين وياهم دتجذبين عليه!!
بحت محروك دمها : و الله ما اجذب
ملاك : شمدررريج لعد شمدريج؟؟
زينه : هسه سئلتهم
بحلقت عيوني عليها
و طحت بالكاع لا ايد و لا رجل
هم رجعت گوه اجر النفس مثل كل مره
اتذكر كلمات مُلاذ
يلي جانت كل ما هيج يصير بيه
تكعد وراي و تفرك شحمة اذاني و تهمس
مُلاذ : احنا بنات إلياس و فيروزته
انتِ ملاك إلياس و انا لذته
إلياس الرجال الشجاع
و فيروزه المرأه القوية ، ذولة اهلنا
انا ما اعوفج انا يمج
لازم نتحمل و نكون مثلهم
حتى نطلع منا و نرجع لـ حضن أُمنا
جريت نفس قوي ، همست اهدء روحي
و دموعي على خدي
ملاك : انا بنت إلياس و فيروز
لازم اصير قوية مثلهم حتى ارجعلهم
مُلاذ ما تعوفني مُلاذ تحميني
مُلاذ راح توفي بوعدها الي
اهدي ملاك ، اهدي ملاك
جبرت نفسي اهدء
اجر النفس و خالة زينه تمرغ صدري
خنكة الدنيا كلها توسطت صدري
و دموعي ما وكفن دقيقة ، فقدت صافيناز ...
مُلاذ :-
مرت فترة طويلة
الجثه بدت تتعفن و تتحلل لمن اشوفها
اصير اتقيء بدون انقطاع ، رغم هالشي
جنت اكعد اسولف لـ هاي الجثه كل شي
كأنو هي عايشة
الـملثم يدخل يوكلني غصب
حتى ترجع صحتي و يبيعني
يدحس الاكل دحس بـ حلكي
عيني ع الجثة يلي شكلها يسحب الروح
صارلها هواي يمي
صرت اسولف كلشي لـ هاي الجثه
مثل المخبلة اكعد يمها و اضحك يمها
و انام يمها ، ما جنت واعيه
لزمت بالحايط سندت روحي عليه
جريت روحي و رحت للزاوية
اخذت خشبه صغيرة واكعه بالكاع
حفرت بيها اسماء اهلي ع الحايط
ظليت اكتب اسماء ،
اسماء ما اعرفها هم كتبتها
تعبت و طحت بالكاع ظهري ع الحايط
تذكرت اغنية مره سمعتها
رغم مرات انسى و فجأه ارجع اتذكر
و اتذكر هواي اشياء مرة وحدة
مُلاذ : طفاج القدر يا شمعتي
خلاني اجر بـ حسرتي
شلي بهالعمر يا دنيتي
بلعت ريكي المشخط و كملت
مُلاذ : محسود على حظي و قسمتي
شلي بهالعمر يا دنيتي
محسود على حظي و قسمتي
فص ملح و ذاب ما بين ايديه و راح
شباب و غاب ما تهنى يوم مرتاح
يا شمس الدنيا و الگمر
انا ادفع شبابي و العمر
سندت راسي على الحايط
و لامه رجليه ، سرت دمعتي على خدي و كملت
مُلاذ : لو يرجع اضمه و اعتذر
و اشوفه شسوا بيه القهر
ظليت اكررها بهمس
و جسمي يرجف ، لامه روحي
انفتح الباب
رفعت راسي دحگت لـ الـملثم
دخل حط الاكل كدامي
- اتزوحري
درت وجهي عنه ، دار وجهي و لزم فكي كل قوته
عصر فكي عصر حتى اكل و افتح حلكي
مقبلت و ظليت ادور وجهي بـ كل مره
مُلاذ : عوووووفني ما اريد زوحارك
كام يكفر ، انداريت اله
مُلاذ : اشوف بيك يوم ان شاء الله
- اذا ما اكلتي ....
قاطعته قبل ليكمل : شتسوي؟
تجويني؟ تعلكني و تضربني؟ تكهربني؟
شتريد تسوي ؟ يلا اكتلني مثلها
خليني جثه هيج ، ما اخاف منك لا تهددني
درت وجهي منه
گال بـ تهديد و هدوء
-ابيع اختج بدالج
هي هم حلوة و بيها خوش فلوس !
انداريتله بسرعة ،
شخصت عيوني عليه مصدومة
مُلاذ : شقصدك ؟؟
- اي طلب ما تنفذي اختج الثمن
رفعت اصبعي بوجهه
گلت بفحيح غضب
مُلاذ : اكتلك و الله اكتلك
المس ملاك انت و حق لا اله الا الله
اخلي دمايتك تترس المكان
لا تظن لان شكلي هيج و لان عذبتوني
معناها اخضع الكم لو تموت
-ههههههههههههههههه
دحگتله قرفانه من اصوات ضحكاته
صوته مقزز ، نزل راسه دحگلي
تحولت نظراته للـ جمود ، گال
-و اذا اگلج امج شافت حالتج هيج
فز جسمي
دحگتله مصدومه : ام .. امي؟؟ وين شافتني ؟؟؟
شسويتوا لـ اميييي ؟ امي شسويتو الها !
لزمت بي من ملابسه اعت بي
دفع ايديه و كمل كلامه
- مع الاسف طلعنا ناسين فرد من عائلتكم
وقت الي اخذناكم عبالنا كلكم
بس ما ندري امكم ماكو
جان هسه طابكه وياكم ههههههه
مُلاذ : امي شسويتووو الها؟؟؟
-دزينالها صورج
فتح تلفونه و دارلي تلفون
بي صوره الي وجهي عبارة عن كدمات
و صايرة شكل ثاني تماماً
رفعت عيني مبحلقتهن عليه
-ما قصرتي انطيتينا رقم امج هههههه
ظليت ادحگله ساكته
ما اكدر اتخيل حتى ردة فعل امي !
امي الي تخاف عليه من الهوا
اذا شافت حالي هيج شيصير بيها؟
خلاني اكل غصب
اول ما طلع اتقيئت كل الاكل الي اكلته
درت وجهي رحت للزاويه
اخذت كلادة الرصاصة
ضامتها بالزاويه خاف ياخذوها مني
كارهه روحي ، جسمي ، شكلي
احس روحي رح تطلع
بالي وي ملاك خايفة عليها
بس اعرفها يم زينه دعيت تكدر تحافظ عليها
و ما تاذيها و لا تنطي بيها
صارت الدنيا ظلمه ، عرفت صار الليل
سمعت اصوات الصراخ
يلي تصدر من الزنزانات الثانية
نمت بالكاع ، خليت ايدي جوا راسي
اسمع اصوات الصريخ و البجي
اغمض عيوني كل قوتي
رفعت ايدي اتلمس شعري
مشيت اصابعي عليه جهه فارغ
و جهه المسها بيها شعر بس قليل
همست بصوت ناصي
مُلاذ : يا شمس الدنيا و الگمر
انا ادفع شبابي و العمر
لو يرجع اضمه و اعتذر
و اراوي شسوه بيه القهر
سكتت و ما كملت
مرت الايام ، تجيني ايام انگلب مخبله
و ايام اصحى بيها على روحي
افكر بـ حل يطلعني منا
و اخذ ملاك و صافيناز وياي
المكان الي انا بي
شباكه صغير كلش و بي حدايد
و ماكو اي شي يوصلني اله
شكد حاولت ادورلي على مفر
بس ماكو كل الحلول منتهيه
دنكت راسي للكاع و ظليت صافنه
دخل الملثم حط الاكل و طلع
عفت الاكل و ما اكلت
مصيري مجهول ...
منو راح يبيعوني اله؟ شراح يصير بيه؟
ملاك شلون راح اخذها وياي ؟
شلون رح اخلصها و اخلص روحي ؟
اشتاقيت لـ امي اشتاقيت لـ وجهها
اشتاقيت لـ صوتها اشتاقيت لـ حنيتها
اشتاقيت لكل شخص احبه
اشتاقيت لـ ملاك يلي ما ادري شصاير بيها
عرفت انا بيا نعمه جنت
و هسه فقدت هاي النعمة
تندمت لان ما جنت الابنه الباره لـ ام مثل فيروزه
جريت الگلاده من الكاع
شديت السلسلة بـ رگبتي عكدتها
دخل واحد من الملثمين ما اعرفه
جر ايدي يريد يوكفني
مُلاذ : شتريدد! وخر عنييي
دخل الملثم الثاني اجالنا
-ها شنو وين ماخذها؟
اتقرب عليه و شاوره
دحگله الملثم الي يجيني دوم و گال
- غير محجوزه ؟
-الامر هيج اجاني
-شوكت ؟
-قبل كم دقيقة
-ليش؟
-عرفوا بالريس
-مو جانو يعرفون ؟
-الحجي ما جان يدري
-هذا عقاب ؟
-استفاده و عقاب
-و لمن نبيعها ؟
-عادي مو مهم قابلين
-خوش اتوكل
صافنه عليهم ما فاهمه حوارهم!
شكو ؟ حسيتهم ديحجون عن لعبه ؟
مُلاذ : وين ماخذيني؟؟؟
ربطوا ايديه و انا اتلاوه وياهم
لزكوا حلكي و شدوا عيوني ، گلت بصوت مكتوم
مُلاذ : ويييين ماخذيني؟؟؟؟؟
مشوني همه و انا كل شويه اوكف
يدفعوني و يخلوني اكمل مشي
حسيت رجليه تنغرز بيها سجاجين
صارلي هواي ما ماشيه عليهن
دوم يضربون رجليه لحد ما تعبن
امشي و اتعثر كوه ادوس عليهن
صار صوت قوي مثل باب انسد
و اسمع اصواتهم يمي
-دكتور بلش
فز جسمي ، يا دكتور شكو؟؟؟
كمت اتحرك بمكاني بـ هستيريه
احاول افلت روحي منهم
حسيت على شي كرصني برگبتي
فوك الظلام يلي مغطي عيوني
بسبب العصابه يلي حاطيها على عيوني
ازداد الظلام اكثر و فقدت ...
نور :-
واكفه اشر هدوم
اندك الباب ، اتقدمت وكفت ورا
نور : منو ؟
جسار : انا
فتحتله الباب
دخل هو و دخل وراه سلطان و صفاء
بعدهم توهم جاي يدخلون جوا
فزيت على صوت صراخ بيبي العالي و مفجع
دخلت ركض لـ جوا ، اركض و ما الحك
شفت بيبي كدام عيني تدك على رجلها
تلفونها بـ ايد عمه منارس و على اذنها
عمه منارس مصدومه ، تستمع للمتصل
عزيز و امي واكفين يدحگون ما مفتهمين
و احنا اتسطرنا بالباب صافنين
اتقدم جسار من بيناتنا
راح لـ بيبي يستفسر عن يلي صاير
جسار : شكو حجيه ؟؟
بيبي تدك على رجلها و تون
الحجية : يا يمه شنشوف بعد ؟
تعال ي وليدي و شوف شصار بـ هَلك
تعال و شوف طشارهم من بَعدك
سلطان : شكوو يمعودين ؟؟
كام جسار ، عاف بيبي يلي تنحب
راح على عمة منارس سدت الاتصال و صافنه
صاح بيهم جسار بصوت فززني من صفنتي
جسار : شكووووووو!
منارس : فيروز انشلت
شهكت ، حطيت ايدي على حلكي مصدومة
دحگت لكل الواكفين
صدمتهم مالها فرق عن صدمتي
جسار : وين هسه همَ؟؟
منارس : بالمستشفى
فاحصيها ما تحس برجليها
عبرنا جسار و طلع ، راح سلطان وراه
اتبعهم عزيز ، بيبي و عمتي لبسن عبيهن
ركضوا وراهم ، عمتي صاحت على جسار ينتظرهم
ظليت متصنمه بـ مكاني ، الغصة واكفه ببلعومي
الدموع غرغرت عيني ، تدريجياً بديت استوعب !
اتجهت گبل للغرفة
فرشت سجادتي و بجيت بحرگه
على يلي ديصير بيهم
اسمع امي و ابوي من برا يتعاركون
لان امي تتشمت بخالة فيروز
اتجاهلت اصواتهم ، رفعت ايديه ادعي
ربي يبرد گلوبهم و يرجع البنات سالمات
و امهن توكف على حيلها و يرتاحون
من يمي تعبت الله يساعد گلبهم ، همَ شلون؟
كملت صلاتي ، اتصلت على غاده من تلفون الحجيه جاوبتني و الهَم بصوتها
غاده : هلا نور
نور : شصاير يمعودة
و الله رح اموت بيوم من الي جاي يصير بينا
غاده : شحجي و شخلي
حسبي الله و نعم الوكيل بمنو جان السبب
و الي وصلهم لكل هذا
نور : ليش هيج صار بيها ؟؟
غاده : ولج شحجيلج؟ دازين لـ خالة فيروز
صورة مال مُلاذ و وجهها مشوهه من الضرب
گوه يلا عرفتها و شعرها مزين
وجهها صاير عباره عن عظام فوكها جلد
اذا اراويج الصورة و الله تشحطين و تموتين
امي شافت الصورة و هبط ضغطها
نور : عزه بعيني يمه سوده عليه
شو دزيلي خل اشوف
سدت الاتصال مني ، دقايق و وصلتني صورة
هي مصورة الصورة ب تلفون خالة فيروز و دازتها
شحطت من صدك شحطت !
هاي مُلاذ ؟ شصاير بيها شمسوين بيها
گلبي ورم من شفت الصورة ظليت متصنمه
اجاني اتصال من غاده ، كعدت ع الجرباية
رجلية صارت خيوط من الي شفته
نور : عزه بعيني يمه يا ربي دخيلك
لج شمسوووين بيها يمه گلبي ورم
غاده : رغم الصورة و حال مُلاذ بس
معناها عايشات المهم عايشات
نور : و ملاك ؟
غاده : مالها لا صورة و لا شي
نور : يمه سودة عليه بس لا مسوين شي للطفلة
يمه ملاك حلوه و خدود سودة عليه يا ربي دخيلك انت احميها و احفظها و استر عليهن
رفعت عيني على صوت سلطان
الي عيونه مگلوبات حمر
سلطان : شبيها ملاك؟
نور : مابيها
صاح بصوت عالي معصب
سلطان : شبيها ملاك احجيي!
نور : غاده بعدين احاجيج
سديت الاتصال و سلطان اتخبل
يسأل عن ملاك ، كعدته و هدأته
سولفتله عن الصورة و راويتها اله
بسرعة رفع تلفونه اتصل على اسكندر
و رجع اتصل على جسار
سلطان : ها جسار اسمع
اسمع لا تكفرنا ما شارب
روح على تلفون فيروز تلكا يمها صور
شوفهن و اسكندر جايك للمستشفى
و اني جايكم بالطريق يلا
سد الاتصال و كام بسرعة
يريد يطلع طلعت وراه دخل عزيز
عزيز : وين رايح ؟
سلطان : دازين صورة مُلاذ ل فيروز
عزيز : صدددك؟
عبره سلطان مستعجل
و هو طلع يركض وراه
رجعت دخلت لـ بيبي ، جابوها و راحوا
لكيتها تنحب و تبجي و تحط هدومها بـ جنطه
گوه واكفه على حيلها على ساعه يصير بيها شي من القهر
نور : ها بيبي وين رايحة ؟
الحجيه : رح اظلن يم بيت جنات
اچم من يوم لحد ما تصير فيروز زينه
نور : شبيها بيبي ؟؟ ليش ما جبتوها لهنا؟
الحجيه : امج هسه تقهر المره فوك قهرها
خل اروحلهم انا ما ارتاح اظلن هنا الوب
نور : شلونها شلون وضعها؟
الحجيه : المره صارت سكتاوي
اخ يمه يا گلبي تعال شوف شصار ببنايتك إلياس
نور : الله يرحمه لو موجود جان مات من القهر
بجت بيبي بحرگه
لميت ملابسها انا و اجا صفاء اخذها
لـ بيت خالة جنات هي و عمتي منارس
غاده :-
اجا جسار يمي
دحگتله مستغربة مد ايدة و اشرلي
جسار : انطيني تلفون خالة فيروز
وين يا صورة تحجون عنها؟
طلعتله الصورة و انطيته التلفون
ظل موسع عيونه و صافن
يدحك للصورة يدور فد اثر ، فد شي يلكا عليهم
رجع يتصل على الرقم يلي دز الصورة
ماكو الرقم مغلق
اجا اسكندر و التموا كلهم
اخذ اسكندر التلفون و طلع و هم لحكوه
اجت خالة نيروز همين
خالة فيروز بعدها نايمه
قبل لا تنام وغزوها بالابر برجليها
ما حست بأي الم ، لمن سئلها الدكتور
اذا جاي تتوجع هزت راسها بالرفض
من كد ما تعبانه و حزنانه على بناتها
من كد ما هي مصدومة بكلشي يصير
حتى ما استوعبت هي انشلت
ظلت ساكته ، انطوها منوم و نامت
كعدت يم امي تبجي عليها
نيروز يمها و ثنينهم يبجون
فرات كاعد و ساكت يدحگلهم
طلعنا خالة فيروز من المستشفى
رجعوا الولد و الخط مغلق ، كلشي ما لاكين
تعابيرهم يحتلها اليأس و التعب
وكف جسار بالباب مال بيتنا
جسار : اي شي تحتاجون خابروني
منارس : جسار امي ناسيه حبوب الضغط
جبيهن النا فدوة
هز راسه و طلع
خالة نيروز بقت و ابنها فرات هم
و منارس و الحجية ...
نور :-
طلعت كعدت بالحديقة
البيت خنكه و امي تدخل و تطلع تغلط عليه
و تتشمت بـ خالة فيروز ، كلشي و لا الشماته حوبة المظلوم تكسر الظهر ، بس امي ما تتقبل كلامي
تنهدت و رفعت راسي ساكته
اندكت باب البيت ،
اساساً جنت لابسه شالي و صايه
لان ما اكدر اطلع حتى للحديقة بدونهن
اخاف احد يشوفنا من السطح او شي
كمت فتحت الباب دحگت لـ اركان
و عيوني ماليها التعب
نور : اتفضل
اركان : اعذريني كل شوي داك بابكم
نور : لا عادي گول
اركان : شصار ؟ ماكو شي جديد؟
نور : لا و الله كل شي ما لگينا
هاي منتظرين الفرج
اركان : لتخافين يلگوهم ان شاء الله
نور : و الله اكو احساس بداخلي
واثق ميه بالميه راح يرجعن
و هنه الحمدلله عايشات
اركان : صدك عايشات ؟ شلون عرفتي؟
سولفتله عن الصورة الدازيها لـ خالة فيروز
و هو يستمع الي بـ تركيز
اركان : ما طالبين شي فلوس مثلاً او شي؟
نور : لا
اركان : لعد ليش دازينها؟
نور : ما اعرف و الله انا هم فكرت
بس مدالكا جواب كلشي مجهول
رب العالمين وحده يلي يعلم شنو منتظرنا
اركان : خليج واثقة باحساسج
يرجعن ان شاء الله يرجعن
نور : من حلكك لـ باب السما
فزينا على صوت جسار
جسار : الله بالخير
اركان : هلا بيك جسار
جسار : خيركم خو ما صاير شي ؟
اركان : دكيت بابكم اسئلكم اذا لگيتوا شي جديد و طلعتلي نور و كالت ماكو
جسار : خوش
اركان : يلا حبيبي جسار اي شي تحتاج انا هنا
ظل بالي يمكم و احيت اتطمن
جسار : حبيبي ما تقصر
رجع اركان لـ بيته ، وكف بالباب اركان
دحگلي حركلي بـ عيونه "لـ جوا"
انداريت و دخلت ، رجعت كعدت مكاني
حتى ماكدر افرح لان داحجي وي اركان
حب طفولتي و مراهقتي و شبابي
كدرت اشوف بعيونه المشاعر ناحيتي
رغم هالشي الحزن مخيم على روحي
من كل النواحي من الوضع الي احنا بي
و لان اعرف نهايتنا انا و اركان مو لـ بعض
دحگت لـ جسار يلي اتقدم كعد كدامي
على الصبه بايده ورقة من الاشجار
يدحك للـ ورقة و ينتف بيها
جسار : من شوكت تحبينه لـ اركان ؟
صدمني و ظليت صافنه
رفع عينه و گال : زاجل
نور : شنووو!
جسار : من شوكت تحبينه لـ اركان ؟
نور : مـ ... مـ.. ما احبه
اريد الكلمة تطلع من حلگي
كمت امتمت ، گوه احجي
جسار : ما لا ينطقة اللسان تنطقة العيون
نور : فهمت غلط ...
جسار : زاجل ما احب الجذب تدرين بيه
سكتت و بلعت ريكي
جسار : شنو حبيتي بي؟
شنو العجبج شنو الجذبج اله ؟
يا ربي استرني و ادركني
هذا منين يعرف
نور : فهمان غلط
جسار : ليش حبيتي اركان ؟
كمت بسرعة : ما اريد احجي بهيج موضوع
درت وجهي ، مشيت كم خطوة
اجاني صوته
جسار : الزاجل كسر ظهري
و انا الجنت ما اقبل يكسرون جنحه .
ظليت ساكته و صافنه و متصنمه مكاني
حسيت بي واكف وراي
جسار : شنو السوا و ما سويته ؟
نور : جسـ...
گال بـ هدوء
جسار : اششش
عافني و دخل جوا
دخلت انا هم بسرعة و رحت لـ غرفتي
بعد ما طلعت منها
مُلاذ :-
فتحت عيوني ، غواش كدامي
حركت ايديه حسيت ما يتحركون
و صار صوت سلاسل
الم فضيع يحتل منطقة كليتي
نزلت عيني ادحك انا بمكان ثاني تماماً
فزيت بسرعة
صرت ادور بعيوني ، تذكرت اخير شي
لمن جانو يحجون يمي و بعدين فقدت
المكان فارغ ، رفعت عيني دحگت معلكيلي مغذي ، رجعت دحگت لـ ايديه مكلبجيهم بالسدية
و رجلية كذالك ، رفعت نفسي احاول اكوم ما اكدر و يحتل بطني وجع مو طبيعي
مُلاذ : منووووو هنااا؟
صرخت رجعت بطني تاذيني
صرت اتلوى بمكاني ، لحد ما شفت الملثم دخل
- ها صحيتي ؟
مُلاذ : شسويتوليييي وين جبتوني؟
-مبروك بقت عندج كليه وحده
وسعت عيوني بصدمة عليه
مُلاذ : شنوو!
-ديلا يمعودة مو زين ما اخذنا كلياتج ثنينهم
ههههههههههههه
ظليت مبحلقة عيوني عليه مصدومة
اتجمد نظري ع الفراغ و ظليت صافنة
وين وصلت ؟ شراح اشوف بعد ؟
غلط صدر مني بوقت حقد و غضب
كلفني حياتي و حياة اختي
و لو بس حياتي ما اهتم
صرخت و غلطت عليهم
بس كل مرة جنت اتوجع
رافست برجلية و ايدية احاول افلتهم
مُلاذ : طلعوووووونييي منااااااااا
طلعوووني ما سويت شي انااا
انتوا كتلتوا ابويييي ما سويت شي انا
بديت تدريجياً افقد وعي
و احس شي غزير ينزل من بطني
انغلقت عيوني و احتلني الظلام
ومضات من الضوه خفيفة
اصوات البجي و الصياح
ايد امي على خدي همست
فيروز : انا انتظرج
گلت بصوت تعبان اناجيها : يمه
بجيت و گلت : يمه تعبت
مسحت على راسي بأيد حنونه
و همست : الخالق القادر وياج
مُلاذ : يمه انا اريدج
فيروز : انا يمج يبعد امج
شلت ايدي اريد احطها على ايدها
اندارت و عافتني و راحت
بجيت بحرگه وراها ، رجعت دخلت بالظلام
ورا فترة فزيت لكيتني بنفس المكان
و الملثمين كاعدين يسولفون
و انا ادور بـ عيوني مكان يخنك و قديم
بطني بيها الم خفيف ، جسمي بردان
عرك يتصبب من كصتي
ظليت ادحك للسكف و ساكته
رحت لـ عالم ثاني عالم الوجع و التعب
عالم التساؤلات "ليش انا هيج صار وياي؟"
صارلي شكد هنا ما اعرف
معقولة امي ما حست؟ معقولة امي عافتني؟
تخليت عن نفسي و عن كلشي الي
عشت علمود ملاك و علمود اطلعها منا
انتهيت و انكسر ظهري الف كسرة
ظليت ايام بذاك الفراش و المكان القذر
يغيرون الي مغذيات و ايديه مكلبجيها
و يسدون حلگي بـ لاصق حتى ما اغلط عليهم
انجبرت اكل حتى اظل عايشه و اطلع ملاك
بس شلون اطلعها؟ انا بنفسي ما ادري
التفتت لـ الملثم الي كاعد بصفي
- ف اي يحلوة هذا الي اشتراج
رح يجي بعد فتره قليلة و تودعين
مُلاذ : و ليش لسا مخليني يمكم؟
-ها مستعجلة على رزقج؟
خلاج يمنا لان عنده شغل و رح يرجع يشتريج
مُلاذ : الله ينتقم منكم
-عيب عليج
مُلاذ : تعرف العيب انت قذر خايس
ابن الـ *****
-بهاي صدكتي بس هسه اضرب كليتج
اخلي الخياطات تصيح الغوث
مُلاذ : بيك خير سويها ، جبان
تفلت عليه و درت وجهي
بس اريد اطلع حرگتي بيهم
ليل و نهار ادعي عليهم و اتحسب
و هم ما يرتاح گلبي
بس اعرف حوبتنا تطلع بيهم ان شاء الله ...
نور :-
واكفه بالمطبخ اسوي عشا
انداريت دحگت لـ امي لمن دخلت
تصيح و هي تتعارك وي ابوي
امي : هسه على اساس مدري شحجينا
گلبت الدنيا الي يسمعك يكول حاجين عن الملكه
هي كلها فيروز
احمد : تسواج و تسوه عشيرتج
لا تظلين تتشمتين اكلي *** و ضبي لسانج
امي : طبعاً ما يعجبك نحجي ع الخانم
من عمايلها السوده هيج صار بيها
سبحانك اللهي و سبحان العداله الي عندك
دخل عزيز للمطبخ
و عاط : كافيييي انتِ ما تملين
ما تخافين يصير شي بواحد من عدنا
امي : ولك اركعك على حلكك بالجفجير هسه
تأدب و لا تعلي صوووتك !
عزيز : اسكتييي كافي النهار كله تتشمتين
و تحجين ع الناس خبلتيناا كرهت العيشه بهذا المهجوم من ورا دعاويج الناس تدمرت و تطشرت
دخل اسكندر و صاح
اسكندر : و انت شنووو تصيح على امي ؟
عزيز : حاجي امك كافيها دعاوووي
اسكندر : اشكك حلك لك
راد اسكندر يضرب عزيز
ابوي صار بيناتهم و انا هم
عزيز يفشر على اسكندر
صارت مضارب ، هوسه و صياح
شال عزيز الجدر الي ع النار
ضرب اسكندر بي
اسكندر انصلخ و طاح الجدر بالكاع
رجع اسكندر يريد يكتل عزيز
و امي تغلط على عزيز تكول عدوها
و تتحسب عليه و تزيد الطين بله
ركضت دكيت على جسار ما عندي غيرة
مرت ربع ساعة و الصياح و الهوسه ما هدت
صار المشامر و اتكسرت الماعين
اتعورت رجلي بالكزاز
نسيت وجعها من الهوسه
اجو جسار و صفاء ، دخل سلطان وراهم
يفاككون بين اسكندر و عزيز
الي صارت بينهم الدمايه للركب
فاككوهم و خلو كل واحد بمكان
سلطان و جسار راحوا يم عزيز بالحديقة
و ابوي و صفاء كعدوا يم اسكندر
اسكندر : وحق الحسين الا ادخله للسجن
اذا ما اخلي يتهجول بالسجون
ما اتسمى اسكندر و هذا شاربي مو عليه
احمد : اسكت كافي شو ايدك خل اشوفها
نتر ايده من ابوي و تجى راسه ع القنفة
حطيت الكلنس على رجلي
و اغمض عيوني حيل
دخل جسار من برا يرعد
و صاح امي : عليااااااء
دحگوله كلهم فازين و اسكندر خزر جسار
وكفت امي بسرعة و هو راح عليها
كمت انا صرت بـ نصهم خفت عليها
من اخير مره ضربها ،
رفع اصبعه يحجي بـ تحذير
جسار : اذا ما تفكين ياخه من فيروز
هنا امدج و ارفس بـ بطنج
اسكندر : لك انت منو تهددد؟؟
كام اسكندر و جسار عاط
جسار : گول لـ امك تفك ياخة من فيروز و بناتها
لا و حق هو العباس احطك انت وياها جوا تاير السيارة و اسحككم و زلمة طالع من ظهر ابو الي يطلع وراكم و يحجي الا اسحكه فوككم
رجعوا اسكندر و جسار يتعاركون
و صارت مطاحن ،
جسار ابد ميقبل على بيت خالة فيروز
و من جان صغير جان كله وي عمي إلياس
و يعتبرة من اعتبار ابوه
اصلاً ابو جسار و عمي إلياس
جانو هم الاقرب لـ بعض
و ظهر بـ ظهر ما يتفاركون
دخل سلطان من برا
فرقهم واحد عن الثاني
گوه واكفه على رجلي و الدم ينزل منها
بس محد منتبهه و انا ساكته
اندكت باب البيت بـ همجيه
عافهم ابوي و طلع يشوف منو
سلطان جر جسار طلعه برا
شوي وسمعنا عيطتهم من برا
كل شوي يصير صياح
و افز اكثر من المره الي قبلها
كل شوية تصير مشكلة و تتعبني اكثر
بحيث بهاي الفترة اذا مر اليوم بدون صياح
الزم گلبي و اگول يمكن هذا يوم القيامة
فزيت و رحنا بسرعة اتجمعنا بالباب
دحگت لـ مره واكفه تبجي بالطرمة
و ابوي يصيح بيها
-انتِ شتحجييين؟؟؟؟
اسكندر بسرعة عبرنا و طلع لمن شافها
جرها من ايدها و هي تبجي و تتوسل بي
و احنا متصنمين مكاننا كل شي مفاهمين
صدمتني لمن گالت
-اناا جنت مرته و الله طلكني و انا حامل منه
حاجو فدوة اروحلكم عمي انا اريد هالطفل هو ابو
ابوي ظل ساكت و متصنم
امي طلعت تصيح و تكللها جذابة و تتعارك وياها
ضرب اسكندر المره بكل قوته
و هي گبل خشمها و حلگها صبن دم
هم رجعت الهوسه انهارت كل قوتي
كمت گوه اوكف على رجلية
صدمة فوك صدمة متزوجها و متطلك
وفوكها حامل من عنده؟؟ احنا كلشي ما ندري
الباب مال شارع مفتوح
و الجيران التمت علينا
و اسكندر يضرب بالمره و يريد يطلعها
جسار صار بنصهم و يحامي المره
و هي متحاميه بي و لازمه بـ ظهره
و ابوي يتعارك وي اسكندر
تغاوشت عيوني صرت گوه اشوف
و الكزاز لسا بـ رجلي كوه صامده
طحت بالكاع ، حسيت على صوت اركان
فتحت عيوني بخمول و انا بالكاع
اجو اركان و سلطان سندوني دخلوني جوا
دخل وراهم جسار ، دحك اركان لـ رجلي
اركان : هاي شصاير برجلج؟؟
دحگلي جسار و زمخ : شبيج انتِ ما تحجين؟؟؟
اركان : جسار لا تصيح على كيفك وياها
خزره جسار و اركان هم ردله الخزره
صحت من وجع رجلي
جابو ملقط و كعد جسار يطلع الكزاز
اباوع لـ اركان صار وجهه احمر
اذاني جسار و هو يطلع الكزاز و صحت
اركان : يمعود على كيفك شجااااك!
جسار : شوف الضوا شلون ناصي
و هي تحوص وين اشوف اناااا؟؟؟
اركان : وخر اسويها انا بدالك
جسار : لا بالله؟
اركان : جسار ترا رابي وياكم
مالها داعي تعابيرك هاي
جسار : هسه انا اطلع الكزاز من رجلها
دخل عزيز دحگلي
مرعوب : نوره شبيج؟؟؟
نور : رجلي بيها كزاز
دحگلي و دحك لـ قدم رجلي
يلي بايد جسار و اركان يدحگلي
عزيز : اطلعوا انتوا خل اسوي رجلها
جسار : مو جاي اسويهاا
عزيز : انا اسويها اطلعوا شوفوا شسالفة المره
جاي وراكم انا خل اشوف نور
انطا الملقط و طلعوا
و كعد هو يسوي رجلي و لفها
عزيز : نوره لا تطلعين تمددي و ارتاحي
معليج بـ ذولة هسه تخف الهوسه
هزيت راسي و هم طلعوا
و انا تمددت تعبت من المشاكل و الهوسه
بس بعدني مصدومة من قصة زواج اسكندر!
مُلاذ :-
بعد فتره طلعوني من المكان الي انا بي
و هم جانت عيوني مشدودة و ايديه و حلكي
رجعوني للمكان الي جنت بي
بس الجثة شايليها و باقي دود ع الكاع
كعدت بالكاع و ظل هذا حالي
تمر الايام لمن اسئل الملثم على ملاك
يجاوبني بـ كلمة
"زينه نفذي الي نريدة و تظل زينه"
مُلاذ : و شمدريني ملاك صدك زينه؟؟
شمدريني ما جاي تجذب عليه؟
راواني صورة بتلفونه لـ ملاك
ظليت ملزمه بالتلفون و هو بايده
و ادحك لـ ملاك
زينه بس ملامحها تعبانه
زينه بس الكسره بـ عيونها
زينه بس متدمرة نفسيتها
زينه بس بعيدة عني و عن امها
و ما عاشت شعور الاب
نتر ايدة الي بيها تلفون مني
دار وجهه و طلع
رجعت لمكاني ، حطيت راسي على رجلية
و اليأس ياكل بيه اكل و يلتهم روحي
مر وقت همين بالايام ما اعرف اقدره
بس اشوف من الشباك الصغير صبح و ليل جابولي زينه تفتح الخياط
مُلاذ : شلونها ملاك؟ خو ما ياذوها؟
زينه : لا هي زينه ما يتدنون الها
دائماً لمن يدخلون اغطيها بعباتي
اخليها وراي عبالهم واحد من جهالي
مُلاذ : گليلها ما بقى شي رح اخلصها منا
هي و صافيناز و انتوا هم اذا باعوني احاول اشتكي عليهم
زينه : صافيناز ...
گالت اسمها و نزلت دموعها
مسحت وجهها ، بلعت غصتها
عگدت حواجبي : شبيها؟
زينه : صافيناز قتلوها
اخذوا اعضائها و قتلوها
وسعت عيوني بـ صدمة
ظليت ادحگلها مصدومة
مُلاذ : مستحيييل ، منو گال؟
زينه : سئلت الملثم گلي ودعتكم
مُلاذ : شنو ودعتكم؟
اصلاً شلون تصدكين بكلامهم؟
زينه : هو گال هيج
مُلاذ : گال ماتت؟
زينه : لا گال ودعتكم
مُلاذ : گال اخذوا اعضائها ؟؟
زينه : لا
مُلاذ : لعد شلون تحللين من كيفج؟؟
زينه : يعني اذا ما ماخذين اعضائها
و لا مموتيها لعد وينها؟؟
مُلاذ : يمكن باعوها صخموا لطموا؟
چا انتِ گبل گلتي ماتت
زينه : ما ادري مُلاذ رح اتخبل هنا
شوف شمسوين بيج اتندمت لان حجيت
مُلاذ : نطلع منا فد يوم بأذن الله
اصبري الصبر مفتاح الفرج
هزت راسها ساكته
فتحتلي الخياط دخل الملثم من برا
اخذها و راحوا
هم مرت يومين او اكثر ما اعرف
دخل الملثم و بلا سابق انذار
شدوا عيوني و ايديه و حلكي
و طلعوني من مكاني
بعد فترة طويلة من المشي ،الاصوات بدت تتعالى ، حسيت الهوا كفخ بوجهي ، ظليت اتلفت بـ راسي ادور ع الاصوات منين تجي ، سمعت صوت باب ينفتح ، ما حسيت غير لمن انشمرت
ع الكاع بـ حده ،
اتلفت براسي اسمع اصوات خطوات
ادور ع مصدر الصوت ، وين اخذوني ؟
شراح يسوون بيه؟ رفعت راسي لمن واحد گال
-هاي الي تريدها باشا
و هو يحجي سمعت صوت انين يمي
ظليت مركزه وي الصوت
حسيت اكو وحدة مسوين بيها مثلي
فزيت على لمسات تتجول على راسي
و تحولت على ركبتي ظليت ادور بروحي
و اتراجع لـ ورا و انا كاعدة
تحولت اللمسات على جسدي
رافسات برجلي و صرخت بصوت مكتوم
توالت اصوات الضحك العالية اصوات قذره تتصادر لـ مسامعي ، تخليني اشمئز
بلعت ريكي ، كعدوني على ركبي
ايديهم فوك متوني مثبتيني
رفعوا القماش عن عيوني نظري تغوش لـ لحظات
لحد ما اتوضح المنظر يلي كدامي
رفعت راسي دحگت لـ رجال لابس قاط
سمين و اصلع ملامحه مقرفة مبين مجرم
و اكف كدامي و يضحك بـ شر
-رحبي بـ شرايچ
خزرته و هو ضحك
ياشر عليه : و الله لطيفة هاي
ضحكتني اكثر من هاي ...
ابتعد من كدامي
توسعت عيوني بـ صدمة و انا اشوف
ملاك مكعديها نفسي ، تدحگلي و تبجي
الرجال يأشر عليها بـ ايده ...
- يتبع الفصل التالي اضغط على ( رواية جرح الأيهم ) اسم الرواية