رواية يكفيني منك عقابا الفصل الثاني عشر 12 - بقلم بقلم عبير سليم

 رواية يكفيني منك عقابا الفصل الثاني عشر 12 - بقلم بقلم عبير سليم 

الحلقه الثانية عشر من رواية

يكفيني منك عقابا

بقلمي : عبير سليم

😢😢😢😢😢😢

بعد مرور حوالي شهر 

كان العمل في بيت نعمان قائما على قدم و ساق و لما لا و قد حان زفاف عامر و عتاب هما قد تقربا من بعضهما البعض خلال الفترة الماضيه و أصبح الحديث بينهما مألوفا و كان الجلوس في الحديقه هو المكان المفضل لهما يتحدثان في كل شئ بعيدا عن المشاعر المسيطرة على كل منهما

و كان كل من حولهما في غاية السعاده لهما الجميع يتمنى لهما السعاده و الهناء يعملون بحب و ها هم جميعهم يهيئون لهم الدور المخصص لهما حيث تم شراء اغلى و أثمن الموبيليا و الأشياء القيمه

الزغاريد تعلو المكان طيلة الوقت تعبيرا عن فرحتهم و عطر لم تترك اختها فلقد استأذنت من زوجها ان تساعد في ذلك الأمر الذي طالما انتظرته طويلا

كانت تصنع كل شئ بيدها و تضع لمساتها الرقيقه عليه و لكنها كانت تتعمد ألا تجعله يراها فقد كانت تعود سريعا قبل عودته من العمل حتى لا تلتقي الوجوه

هي لا تريد أن يحدث اي امر يعكر صفو تلك الزيجه او يكون سببا في ادخال الحزن على قلب أختها

حفصه :متتعبيش نفسك أكده يا عطر

عطر : و هو اني حتعب لأغلى من عتاب يا عمتي ديه يوم المنى لما اتعبلها و اشوفها فرحانه و متهنيه

حفصه : أيوة بس بردك بلاش تشيلي حاجه تجيله على ضهرك عشان ربنا يكرمك

عطر : و الله يا عمتي اني محطاش في بالي الكلام ديه واصل

حفصه : انتي هبله يا عطر يعني انتي منفسكيش تبجي أم

عطر : لا أكيد طبعا يا عمتي نفسي بس يعني اني بجول لسه بدري احنا

لساتنا متجوزين

حفصه : بدري من عمرك يا حبيبتي و هي الواحده فرحتها في ايه غير انها تفرح بعيالها و هما بيلعبوا حواليها ربنا يديكي ما يحرمك يا بت اخوي

عطر : كل شئ باوانه يا عمتي

حفصه : طب جوليلي جوزك مفاتحكيش في الموضوع ديه

عطر : يحي لا خالص عمره من يوم ما اتجوزنا مافتح سيرة الموضوع ديه و لا جاب سيرته خالص لكن هي حماتي الحاجه عيشه هي اللي عامله زيك أكده و كل يوم تسالني تجوليش حنام بالليل حصحى الاجي نفسي حبلت

حفصه : معلش يا حبيبتي متزعليش منيها هي نفسها تشوف ولادكم

عطر: لا و الله يا عمتي اني مبزعلش منيها دي طيبه جوي و تحسيها في ملكوت تاني و اني خابرة زين انها نفسها تشوف حفيد ليها خصوصا ان زكريا لسه ربنا مكرمهوش و تحسي البيت فاضي مفيهوش حس

حفصه : و يا ترى التاخير من عند زكريا و اللا مراته

عطر : اللي فهمته ان زينه هي اللي عنديها مشاكل و بتتعالج

حفصه : و هي زينه ديه كويسه معاكي يا عطر

عطر : أيوة و الله يا عمتي كويسه معايا جوي على طول تجعد معاي و تتكلم

لكن بصراحه امها ديه اللي غريبه و عجيبه جوي و اني مبرتاحلهاش واصل

حفصه : جصدك صفيه

عطر : ايوةيا عمتي مترتاحيلهاش خالص تحسيها مش، صافيه اكده و نظراتها لية بتخليني مرعوبه منيها

حفصه : عارفه حتجوليلي عليها

عطر : انتي تعرفيها يا عمتي

حفصه : اعرفها اللا اعرفها عز المعرفه

و عارفه كل عمايلها السوده ديه ست ربنا يكفيكي شرها

المهم بس زي ما جلتلك خللي بالك من نفسك و بكرة لما ربنا يكرمك حتشوفي فرحتك حتبجى كيف ديه غير انك حتبجي ليكي مكانتك في البيت و تخللي يحي ميجدرش يبعد عنيكي لحطه صدجيني يا حبيبتي مفيش، حاجه بتجرب بين الراجل و مرته غير العيال

مهما كانوا بيحبوا بعض و روحهم في بعض لو مفيش عيال كل الحب ديه بيروح مع الأيام

تحتصنها عطر : يا حبيبتي يا عمتي ربنا يعوضك خير يا رب

حفصه : عوضني يا عطر الحمد لله و اني راضيه و الله راضيه

عوضني باخ زي نعمان و مراة اخ زي زينب عمرها ما اضررت من وجودي و فوج كل ديه عوضني بيكي انتي و اختك و ولاد عمك كمان كلكم ولادي يا عطر ولادي اللي ربنا عوضني بيهم ديه ربك حنين علينا جوي يا عطر

عطر : و احنا بنحبك جوي يا عمتي ربنا يخليكي لينا يارب

حفصه : و يخليكم لية و اشوفكم متهنيين يا حبايبي يا رب

يا حلاوتكم يا جمالكم انتوا جاعدين تحبوا فبعض و اني عماله ارص في الدولاب لما انجطم وسطي

عطر : لاه و ديه تاجي بردك يا ست الدكتورة عنك يا حبيبتي

رحمه : يا لهوي ديه أني بهزر يا عطر ديه يوم المنى لما افرش شجة عتاب و عامر ربنا يتمم فرحتنا على خير يا رب

عطر : يا حبيبتي يا رحومه عجبال ما نفرح بيكي يا ست البنات

رحمه : شهادتي الأول

حفصه: يا لهوي عليكي يا رحمه عايزة تجعدي لحد ما تخلصي دي كلية الطب حبالها طويله جوي ديه انتي تكوني اتجوزتي و خلفتي

رحمه : مستجبلي يا عمتي الجواز يستنى لكن مستجبلي ميستناش

حفصه : عارفه يا غاليه انتي حتجوليلي كفايه لوية البوز اللي كنتي لاوياهالنا دي الناس كانوا مفكرينك مش طايجانا

رحمه : هرمونات الثانويه العامه يا عمتي و بعدين خلاص اهي راحت و غارت الحمد لله

بعد مرور بعض الوقت تعود عطر إلى البيت بصحبة حسني الذي يقوم بتوصيلها حتى البيت

محمد : يحي جفل عالكلام دلوك مرتك جت

يحي : حاضر بوي حاضر اما نشوف اخرتها إيه

عطر : السلام عليكم

يحي و محمد : و عليكم السلام ورحمة الله وبركاته

محمد : ايه يا عطر فرشتوا شجة اختك

عطر : خلاص يا عمي فاضل حاجات بسيطه اكده و هما حيعملوها

يحي : مالك يا عطر في حاجه

عطر : لا مفيش حاجة بس رجة العربيه و هي في السكه وجعتلي راسي

يحي : طب تعالي اطلعك تستريحي

بس مش حتاكلي الأول

عطر : لا اني كلت هناك جبل ما اجي

محمد : خد مرتك و اطلعوا يا يحي ربنا يخليكم لبعض يا رب

ياخذها و يصعد بينما يقابلهم زكريا عالسلم فيسلم عليهم و ينزل

مالك يا بوي جاعد حزين ليه اكده

محمد : و هو في حد يشوفك و محيحزنش يا زكريا

زكريا : ليه أكده بس يا بوي هو اني عملتلك ايه بس حجول إيه انت دايما حاططني في الكفه الناجصه

محمد : شوف انت عمايلك و انت تعرف

زكريا : و الله مبعمل حاجه ديه أني من البيت للشغل و من الشغل للبيت ديه حتى خالتي مبجتش بتكلمني زي ما تكون استغنت عن خدماتي

محمد : انت جصدك من الشغل للبيت و بعدين ترجع تسهر على الجهاوي مع المشبوهين و السكارى ليه كده يا زكريا يا ولدي بجي هو ديه اللي ربيتك عليه يا ولدي

زكريا : لا يا بوي دول ناس كويسين جوي

محمد : انت عايز تشلني ديه كل واحد فيهم وراه مصيبه سوده

زكريا : متصدجش كلام الناس يابوي دول بيكرهوهم و بيطلعوا عليهم اوشاعات

محمد : الصبر من عندك يا رب

مخدتش مرتك و روحتوا للدكتور اللي جلتلك عليه و جبتلك عنوانه ليه

زكريا : مش فاضي لما افضى

محمد : مش فاضي ليه وراك ايه ان شاء الله عارف لو ما سمعتش الحديت حخللي وجعتك طين تاخد مرتك و تروحوا انت فاهم و اللا اجول تاني

زكريا : حاضر حاضر حتصل و احجز و اخدها اما نشوف حتجيب ايه يمكن تجيبلنا الديب من ديله

محمد : امشي غور من جدامي جتك الهم اني معرفش خلفتي السوده ديه اللا ما فيه حد فيهم مريحني ربنا يهديكم يا ولادي و يصلح حالكم يا رب

في غرفة عطر و يحي 

تخرج من الحمام بعد ما تكون اخدت دش و فاقت شويه تلاقي يحي  قاعد سرحان و مش حاسس بيها و هي قاعده جمبه

عطر و هي بتحط ايدها على وشه : ممكن اعرف جوزي حبيبي سرحان في ايه

يحي : ايه لا لا مفيش حاجة انتي عامله ايه دلوك

عطر : الحمد لله أحسن 

بجولك إيه يا يحي هو انت نفسك تبجى  اب

يحي : اب

عطر : ايوة اب يعني كل واحد بيتجوز أكيد بيكون نفسه يكون اب

يحي : اه طبعا أكيد يعني بس لزمته ايه السؤال ديه دلوك

عطر : اصل الحاجه والدتك كل ما تشوفني تسألني اذا كان فيه حاجه و اللا لسه

يحي : ماشي يا عطر اني حبجى اكلمها و اجولها متفتحش معاكي السيرة ديه تاني

عطر : لا يا يحي اوعى تجوللها اكده احسن تاخد على خاطرها اني بحبها و معوزهاش تزعل مني اني جصدي يعني ان ماداموا بيسالوا يبجى أكيد الموضوع ديه مهم ليهم

يحي : أكيد طبعا مهم عنديهم و خصوصا زي مانتي عارفه ان زكريا و زينه لسه ربنا مكرمهمش

بجولك إيه مش انتي جلتي ان الصداع راح

عطر : ايوة الحمد لله

يحي : طيب أني بجى ضهري واجعني

عطر : ضهرك واجعك يا لهوي الف سلامه عليك

يحي : جوي يا عطر بجولك ايه ما تعمليلي مساج

عطر : بس كده من عينيه

يحي : انتي رايحه فين

عطر : حجيبلك لوازم المساج

يحي : يا عم يا واعي

عطر : امال ايه ديه اني واعيه جوي و حتشوف دلوك حتجول و لا دكتورة علاج طبيعي

يحي : طب يا للا وريني الشغل

تجيب عطر الزيوت و ادوات بسيطه تساعدها و ينام يحي و هي تبتدي تعملله مساج على رقبته و ضهره و يقعدوا يتكلموا و يضحكوا

يحي : كده تمام جوي

عطر: ايه رأيك بجى

يحي : استاذ و رئيس قسم يا قمر

و الله تنفعي تبجي دكتورة علاج طبيعي

عطر : طب يا للا ايدي على كتفك

يحي : طب بجولك ايه انتي عملتي الواجب معايا و لزمن اني كمان ارد لك الواجب ديه

عطر : هههههه بس بجى يا يحي الله

يحي: بس بجى إيه و هو اني لسه عملت حاجه ديه اني لسه بجول بسم الله الرحمن الرحيم

تدوب عطر بين ايديه و لمساته اللي عشقتها و بقت أجمل حاجه في حياتها كلها

اما عند زكريا و زينه

زينه : اتصل تاني يا زيكو

زكريا : زيكو جرف من نفسه و من عيشته كلها ماني عمال اتصل اهوه و لا حد بيرد اكيد العياده جفلت ما هو مش معجول حيفتحوا لحد دلوك

زينه : معلش يا حبيبي جرب كمان مرة يا زكريا 

زكريا : حاضر حاضر جطيعه تجطع زكريا و سنينه

يتصل تاني او قصدي عاشر فييجي الرد

يااه اخيرا رديتوا ديه بجالنا ساعه بنتصل

كنتي مع الدكتور اه طيب و ماله لزمن طبعا تساعديه

بجولك ايه يا مدام

انسه

اه و ماله انسه آنسه بجولك يا انسه كنت عايز احجز عند الدكتور

لا مش اني اللي حكشف طبعا

زينه : هههههه هههههه

زكريا : اخرسي بدل ما اجتلك

لا مش حجتلك انتي جصدي يعني مش بكلمك انتي اني بكلم المدام اللي حتاجي تكشف عنديكم

عايزين نحجز معاد و اعرف تمن الكشف بالمرة

الحجز بعد اسبوعين ليه أكده

عنديكم زحمه

اه ديه بجى الدكتور عنديكم شاطر ماشي حنشوف

طب و تمن الكشف كام

ايه مش سامع

بتجولي كام سوتميت جنيه كشفه ستوميت جنيه ليه ان شاء الله حندخل عنديه حنطلع بالعيل على ايدينا و اللا ايه و اللا يكنش فاكر اني حجيب كريستيانو

حجول ايه احجزي و خلصيني

الاسم زينه الطحاوي

ماشي اما نشوف

يقفل معاها السكه : اديني اهوه حجزتلك اياكش تكوني مبسوطه

زينه : ربنا يخليك لية يا زيكو يا رب

يسمعوا خبط جامد عالباب

جومي افتحي اني عارف الخبطه ديه مفيش غيرها هادمة اللذات و مفرجة الجماعات

زينه : اخس عليك يا زيكو

زكريا : أخس عليكي انتي

بجولك ايه جومي افتحيلها و اني حعمل نفسي نايم و متجيبيلهاش سيرة عن الدكتور احسن هي لما بتنج فحاجه مبتفلحش

جومي افتحي حتكسر علينا الباب

زبنه : ايوة يا اما 

صفيه و هي بتبص على زكريا

هو المعدل نايم

زينه : ايوة يا اما نايم عايزاه فحاجه

صفيه : واني حعوز منيه ايه ديه و لا ليه لزمه عمره ما بيفلح فحاجه 

زينه : لا يا اما متجوليش على زكرورتي اكده

صفيه : جتك وكسه عليكي و عليه جوليلي يابت عملتي اللي جلتلك عليه

زينه : اه طبعا يا اما عملت اللي جلتيه بالظبط

صفيه : ايوة اكده شاطرة

ماشي روحي للفالح ديه اللي مش فالح في حاجه

تقفل وراها الباب و تكلم نفسها : عبيطه اني عشان اسمع كلامك و اطاوعك في اذية الناس ديه اني بجول يا رب اكرمني اجوم اعمل اكده ديه اني وجتها استاهل الحرج

ربنا يهديكي يا اما يا رب

 يقوملها زكريا : اني عايز افهم ايه الحكايه بالظبط

زينه: مفيش حاجه يا حبيبي ديه حاجه بيني و بين امي

زكريا :ماني مبخافش غير منيها اي حاجه بتبجى فيها مبيجيش من وراها غير المشاكل

زبنه : يا ربي عليك يا زكريا اني معارفاش اعمل ايه فيكم انتوا الاتنين

زكريا : طب بجولك ايه هو مش اني حجزتلك عند الدكتور

يا سنه سوخه يا ولاد سوتميت جنيه

زينه : في ايه يا زكريا انت بجيت بخيل اكده ليه مانت بتدفعهم مع شلة الأنس اللي بتسهر معاهم كل ليله مستخسرهم فية

زكريا : لا عيب عليكي يا مزتي ديه انتي حبيبتي

بجولك ايه جومي ارجصيلي

زينه : بس اكده من عينيه تشغل الاغاني و تبدا ترقص

صفيه و هي سامعاهم : كان عامل نفسه نايم ابن عيشه ماشي يا زكريا وجعتك معايا حتبجى زفت يا منيل

😂😂😂😂😂😂

بعد مرور يومين

ذبائح تنحر و يعلو أصوات ضرب النيران و الكل يعلم بالبلده بأمر ذلك الزواج

الموائده معده و مملوءه باشهى أنواع الطعام و الحلويات و الشراب و لما لا و اليوم هو موعد زواج عامر و عتاب

يجتمع كل أبناء البلده من صغار و كبار أغنياء و فقراء رجال و نساء لم يحرم احد من حضور ذلك الحفل

و يقف محمد الطحاوي بجوار نعمان العشري يتلقيان التهنئه

و كان الكل يقول سبحان الله بعد ان كانوا اعداء زالت بينهم العداوة و أصبحوا يدا واحده

بينما في الأعلى البنات يتزين لتلك الليله

كانت عتاب في قمة توترها و خجلها غير مصدقه انها ستكون الليله زوجة لمن عشقه القلب و تمناه الفؤاد

الكل سعيد لأجلها و الفرحه تملاء المكان

رحمه : البسي اللينسز ديه جبل ما المكياج

عتاب : لا اني معوزاش

رحمه : لا يا حبيبتي حتحطيها كل البنات دلوك بيحطوها ليلة فرحهم

عتاب : أيوة بس اكده شكلي حيتغير  و اني عايزة ابجى على طبيعتي

رحمه : اطمني محيتغيرش جوي اكده بس حينور وشك و حتحسي بتغيير يا للا بجى متتعبنيش

تستسلم عتاب لرغبة رحمه و الكل انها تحط لينسز و بعد ما تحطها و الكوافيرة تخلص لها المكياج يتفاجئ الكل بجمالها و انها بقت شبه عطر جدا لدرجة ان اللي مش حياخد باله حيفتكرها عطر

بعد مرور بعض الوقت

يصعد عامر و معه والده و معهما المصور ليلتقط لهم الصور التذكاريه و قد اعد لهم نعمان مكانا لالتقاط الصور

و بمجرد ان وقعت عينه عليها و للوهله الاولى ظن انها عطر فتفوه بما لم يستطع قلبه كتمانه نطقها بصوت خافت : عطر

لم يلاحط ذلك احدا و لكنها سمعتها بقلبها قبل ان تسمعها بذناها تحاملت الموقف حتى لا تعكر صفو فرحتها أقبل عليها و هو مبتسم قبلها من جبينها : الف مبروك يا عتاب

عتاب : الله يبارك فيك يا عامر

يحتضنها نعمان بقوة و يقبلها و يتمنى لها السعاده

يصطحبهم المصور و يبدأ في التقاط بعض الصور لهم و كانت عين عامر معلقة عليها بشده و كانه يراها  فيها

هي لاحظت ذلك و لأنها كانت تعلم جيدا بأنه هذا ما سوف يحدث كانت لا تريد وضع تلك العدسات اللاصقه تريد أن تكون عتاب التي يعرفها الجميع

تريده أن يراها بهيئتها التي عرفها بها و لا تتجسد في صورة امراه اخرى لتنال استحسانه

بعد الانتهاء من تصويرهما معا

بدأ الجميع يلتف حولهما لالتقاط بعض الصور كل من بالمنزل التقط معهم الصور حتى جاء وقت عطر و يحي

وقف يحي بجانبه بينما وقفت عطر بجانب اختها و التي اصبحت تشبهها لحد كبير  

بعد الإنتهاء من ذلك التصوير  اصطحبها عامر الى الاسفل تحت نظرات و أعين الجميع و أصوات الزغاريد تعلو البيت

عتاب قاعده زي الملكه و  الكل حواليها و تعلو الاغاني و الزغاريد و الرقص اما عند الرجال كان عامر يقف بجواره أخوه مصعب و بعض أصدقائه يتلقيون التهاني

و يرقص عامر مع أصحابه بالعصا كعادتهم في الأفراح

و نعمان سعادته ليس لها حدود فها ان الأوان أن يفرح بزواج أول ابن من أبنائه

و بعد مرور الوقت ينتهي الحفل و يدخل عامر  لاصطحاب عروسه إلى الأعلى

يدخلان جناحهما وحدهما دون رفقة أحد و لأول مرة يجتمعان سويا في مكان واحد

كان عامر لا يعرف ماذا يفعل و هي الأخرى كانت في حيرة من أمرها

عامر : عتاب اني حدخل الأوضة التانيه اغير هدومي

عتاب : ماشي

عامر : و انتي يا عتاب معاوزاش تغيري هدومك

عتاب : ايه لا اه حغير

عامر : طيب تحبي اساعدك في حاجه

عتاب : لا اني حغير لحالي

عامر : طيب اني حجفل عليكي باب الأوضة ديه عشان تاخدي راحتك و محدخلش غير لما تناديني

عناب ماشي

بعد دقائق

عتاب تنادي عليه : عامر

يخرج عامر يلاقيها لسه بالفستان

عتاب : معلش ممكن تفتحلي السوسته معارفاش افتحها لحالي

يلف عامر و يزيح شعرها جانبا ثم يفتح لها السوسته و بمجرد أن تلمس يداه جسدها يشعر برعشه قويه تسري في جسده فيتركها سريعا و يعود مرة أخرى للغرفه الثانيه بينما هي تكمل خلع ملابسها و ارتداء ملابس غيرها 

ثم تسمح له بالدخول ينظر اليها باعجاب شديد فها هو اول مرة يراها بتلك الهيئه مساحيق التجميل و شعرها المفرود  و الذي يصل الى اخر ظهرها بلونه الاسود اظهروا جمالها الذي لم يراه طيلة عمره

طلب منها ان يصليان سويا ثم دعاها للطعام و لكنها جلست معه دون ان تضع شيئا في فمها

عامر: عتاب انتي عارفه اننا مش زي اي حد في البلد و محدش ليه صالح بينا لو انتي تعبانه النهارده عادي متشغليش بالك بحاجه مفيش مشكله

عتاب و هي تقرر التحدث بما يدور داخلها : المشكله مش في كده يا عامر

عامر :"امال المشكله في ايه اتكلمي يا عتاب مالك في إيه 

تبتلع ريقها بصعوبه خائفه من رد فعله و لكنهما تعاهدان على الصدق تاخد نفسا طويلا

عامر اني

سامحني يا عامر

عامر: اسامحك على ايه يا عتاب

عتاب : اني عارفه ان ديه حجك و اني مجدرش امنعك منيه او اجولك لاء

لكن اني معاوزاهاش تاجي اكده

عامر : مفهمش جصدك يا بت عمي 

عتاب : عاوزاها تاجي بالحب يا واد عمي عايزاك تكون عايزني بجلبك و عجلك و كل كيانك عايزة و اني بين ايديك و معاك تكون شايفني اني عتاب مرتك حبيبتك متكونش شايف جدامك حد تاني

هنا يفهم قصدها و يعرف انها سمعته لما نطق اسم عطر اول ما شافها و حست باللي هو حس بيه

 لكنها للأسف صادقه في كل كلمه قالتها و عندها حق

محجدرش اغلطك يا عتاب و لا اجولك انتي بتجولي إيه

و حسيبك براحتك لحد ما تكون برضاكي و اني متأكد انها حتكون جريب جوي

عتاب : نفسي جوي يا عامر

عامر أني بحبك جوي بحبك لدرجة انت عمرك ما تتخيلها بحبك و نفسي تحبني ربع ما بحبك

عامر :  ربع ما بحبك هههههههه 

عتاب : كتير علية يا واد عمي

عامر و هو بيمسك ايدها و يبوسها : انتي الدنيا كلها مش كتير عليكي يا عتاب انتي تستحجي اكتر من اكده بكتير جوي تستحجي الدنيا كلها

عتاب : و اني معوزاش من الدنيا ديه كلها غير حته من جلبك

 حته اكده تبجى لية لوحدي محدش يشاركني فيها يتحفر فيها اسمي جوة جلبك

عامر : و اني اوعدك ووعد الحر دين عليه ان ديه و هو بيشاور على قلبه حياجي عليه اليوم اللي محيكونيش فيه مكان غير لعتاب و بس

و ديه حيكون جريب جوي ان شاء الله 

عتاب : ياااه يا عامر نفسي جوي ياجي اليوم ديه وجتها حبجى اسعد واحده في الدنيا كلها و محكونيش عايزة حاجه تانيه واصل

يتحدثان سويا و يضحكان من قلبهما حتى يغلبهما النعاس فينام و هو محتضنها بين ذراعيها داعيا الله ان يقوى على اسعادها فهي تستحق تلك السعاده و أكثر

♥️😘♥️♥️♥️♥️♥️♥️

بعد مرور يومين

الف الف مبروك لعتاب يا عطر

عطر : الله يبارك فيكي يا ندى عقبالك يا روحي

ندى : لا كلا و حاشا لما الاقي فارس أحلامي

عطر : يا بنتي و حتلاقيه فين بس فارس احلامك ده حنجيبهولك منين 

ندى : اكيد موجود طبعا بس لسه الزمان مجمعناش ببعض و انا حجيبه يعني حجيبه

عطر : مجنونه و ربنا بس احلى مجنونه في الدنيا

ندى : حبيبتي يا عطر بت يا عطر متيجي بقى عندنا في القاهرة انتي وحشاني اوي نفسي اشوفك

عطر : ان شاء الله لما الامور تتعدل كده حقول ليحي يجيبني عندكم القاهره و اكيد مش حيمانع

ندى : يا عم يا مسيطر

عطر : طبعا يا بنتي قدرات بقولك ايه حسيبك بقى عاوزة اطمن على عتاب

ندى : انتي كلمتيها امبارح طبعا عشان تطمني عليها

عطر : لا و الله مرضتش اكلمها امبارح مرضتش اضايقهم

ندى : دول زمانهم مسويين الهوايل

عطر : يا رب يا ندى

يا للا بقى سلام

تتصل على عتاب فتكون في الحمام و عامر قاعد بيتفرج على التليفزيون و التليفون ادامه اول ما يشوف اسم عطر لثواني يرتبك و دقات قلبه تزيد لكته يسيطر على نفسه و يرجع التليفون مكانه و عينه متعلقه على اسمها لحد ما يتوقف عن الرن

تخرج عتاب : هو تليفوني كان بيرن

عامر : اه عطر كانت بتتصل

عتاب بفرحه شديده : يا حبيبتي يا عطر تاخد التليفون و تتصل عليها بسرعه فيجيلها الرد من عطر

 شكلي اكده اتصلت فوجت مش مناسب

عتاب ببراءه : لا و الله ديه اني كنت في الحمام

عطر : حمام الهنا يا عروسه 

عامر : عتاب اني حنزل اشوف الجماعه حياكلونا ايه النهارده على ما تخلصي

عتاب : ماشي يا عامر

ينزل عامر عشان يسيبها تتكلم براحتها مع اختها

عطر : طمنيني عليكي يا حبيبتي عامله ايه اني مارضيتش اكلمك امبارح عشان مضايجكمش

عتاب : تضايجينا ليه يا عطر

عطر : يا ربي عليكي جصدي اتصل في وجت مش مناسب يعني

عتاب : لا يا حبيبتي اتصلي في اي وجت عادي

عطر : الله هو ايه الحكايه في ايه يا عتاب هو عامر مزعلك

عتاب : عامر لا و الله ديه كويس معايا جوي

عتاب : امال فيكي ايه احكيلي يا عتاب

تحكيلها عتاب كل حاجه و تعرفها هي اتفقت مع عامر على ايه في الاول عطر زعلت لكنها تفهمت موقف اختها و قدرت شعورها واحساسها كست و دعتلها ربنا انه يقف معاها و يهديها للخير و يهدي سرها مع جوزها

و دعت لعامر ان قلبه يحن على اختها و يحبها زي ما بتحبه و اكتر

 

💖مرت عدة أيام و كل يوم عامر بيتعلق بعتاب أكتر من اليوم اللي قبله بيشوف فيها كل لحظه حاجه جديده بقى بيشاركها في كل لحظات حياتها حتى الزرع اللي هيا بتحبه بقى بيسقيه معاها

كان بيحس بيها و هي صاحيه طول الليل عينها عليه و ايدها على شعره بتتأمل شكله و كأنه لوحه جميله ادامها كان بيسأل نفسه معقوله عتاب بتحبني الحب ده كله معقوله انا استاهل الحب ده كله

كان بيحس ان قلبه بدأ يحس بيها و يدق لها بقت شئ مهم جداً في حياته ميقدرش يستغنى عنه بس يا ترى ده حب و اللا احتياج

🌿🌿🌿🌿🌿🌿🌿🌿🌿🌿

في غرفة عطر

تخبط عليها الباب و تدخل

فرحه : كل ديه نوم يا جمر

عطر : معارفاش يا فرحه مالي عايزة أجوم من بدري بس حاسه اني دايخه و نفسي غمه علية

فرحه : منفسيكيش رايحه لحاجه حادجه

عطر : هههههه يخرب عجلك يا فرحه الظاهر الأفلام اللي بتتفرجي عليها مبوظه عجلك

فرحه : طب و الله اني بجالي يومين عايزة اجولك ان وشك اصفر و دبلان و حسه ان فيه حاجه

عطر : فرحه اني دايخه و حسه اني عايزة انام تاني

بجولك صحيح فين يحي أني مشوفتوش من جبل ما انام

فرحه : سي يحي كنت شايفاه في الجنينه بيتكلم في التلفون

و كنه كان بيتخانج مع حد عشان صوته عالي جوي

عطر : ليه أكده جلجتيني

فرحه : يا اختي كبري دماغك يعني انتي مخبراش الرجاله دول مجانين كل ساعه بحال

عطر : هههههه و ربنا ما في حد مجنون غيرك 

فرحه : بجولك إيه سيبك خلينا في حالنا عايزة أسألك عن حاجه أكده 

عطر : اتفضلي يا ست فرحه 

تقرب منها و تسألها عن حاجه

فترد عليها عطر : لاء تصدجي إني مااخدتش بالي من الموضوع ديه واصل فرح عتاب نساني

فرحه : طب ايه رايك بجى اجطع دراعي من اهنيه اما كنتي حبله

عطر : اني 

فرحه : امال اني

بصي اني حجولك اني حنزل بشويش من غير ما حد يحس بية واصل و اروح الصيدليه اللي على اول الشارع أجيب الشريط  ديه و تعمليه من سكات لو طلعتي حبله يبجى خير و بركه و لو لا جدر الله طلع مفيش يبجى و  لا من شاف و لا من دري

عطر : ماشي روحي و اني مستنياكي

بس يا ترى مالك يا يحي و اللا تكون البت فرحه ديه بيتهيجلها ما هي مخبوله

بعد قليل تخرج عطر من الحمام و هي ماسكه الاختبار في ايدها

فرحه : هاه طمنيني

توريها عطر

 فرحه : حبله انتي اكده حبله

الف مبروك يا حبيبتي ربنا يتمم لك بخير يا رب

عطر : انتي متاكده

فرحه : يا لهوي و اني حفهم اكتر منيكي يا متعلمه

عطر : اصلي مش مصدجه معجوله ديه اني حبله

فرحه : ايوة و الله اني خابرة زين ان الخط الواحد معناته لاء مفيش و الخطين معناتهم فيه

عطر : و انتي عرفتي منين يا مزغوده

فرحه :  من التلفزيون طبعا

عطر: طب بحولك إيه معوزاكيش تجولي لحد واصل

فرحه : و ديه حاجه بردك تستخبى

عطر : أني عايزة اجول ليحي الاول و اشوفه حيعمل ايه لما يعرف و بعد اكده اخليه هو بجوللهم

فرحه : ياااه ديه الفرحه حتبجى كبيرة جوي دول يا عيني نفسهم في عيل يجري في البيت

عطر : بس اني خايفه زينه تاخد على خاطرها

فرحه : زينه لا ديه طيبه جوي و جلبها زي البفته البيضه اللي ربنا يستر منيها لما تعرف و اكيد هي اللي حتضايج امها معلوم مش انتي اللي حبلتي و بتها لسه

ربنا يكفيكي شر عينها يا جادر يا كريم يا رب

تنزل فرحه و عطر السعاده ماليه قلبها تحط ايدها على بطنها و هي فرحانه اوي انها حامل و تكلمها يا ترى انتي بنت و اللا ولد نفسي جوي تبجي بت و تكوني صاحبتي و حبيبتي

يا ترى يا يحي حتفرح لما تعرف ايوة اكيد حتفرح لما تعرف انك حتبجى اب أني لزمن اجولك

تنزل بالراحه خايفه على نفسها و تبدا تدور على يحي عشان تقولله و تفرحه فتلمحه قاعد في الجنينه و معاه ابوه

فتقرب منهم من غير ما يشوفوها بس صوتهم كان عالى اوي

فوقفت لما سمعته بيقول ابوي الله يخليك اني بجالي ساعه مستنيك اهنيه عشان اعرف اتكلم معاك براحتي من غير ما حد يسمعنا

و يجطع علينا الحديت

في اللحظه ديه قالت لنفسها عيب تتصنتي عليهم لكن رجعت قالت لنفسها بس فرحه جالتلي انه كان بيتخانج مع حد و اني جلجانه عليه و عايزة اطمن مش جوزي

 

وقفت ورا الشجره عشان تسمعه عاوز يقول لابوه ايه

عشان بعد ما يخلص تفاجئه بخبر حملها 

يا ترى عطر حتسمع ايه و هل ده حياثر على علاقتها بيحي و خبر حملها حتعمل فيه ايه

ده اللي حنعرفه الحلقه الجايه ان شاء الله اشوفكم على خير

😢😢😢😢😢😢😢

 •تابع الفصل التالي "رواية يكفيني منك عقابا" اضغط على اسم الرواية