رواية جرح الأيهم الفصل الحادي عشر 11 - بقلم أيلان
"الجُـرح الحادي عشر"
فيروز : فرات وينه؟
نيروز : طالع شوي و يجي
هزيت راسي
راحت زمرُد للغرفة
نيروز : بنياتج وينهن؟
فيروز : ملوكه عدها امتحان و بقت مُلاذ يمها
نيروز : ياا مُلاذ ، داده شكد مشتاقتلها
فيروز : هههه ، حبيبتي هي هم مشتاقتلكم
نيروز : يا صف صارن؟
فيروز : مُلاذ مرحلة رابعه قانون
و ملاك ثاني متوسط
نيروز : كبرانات فدوة
مُلاذ بعدها وكحه لا؟
فيروز : بعدها بعدها على خبالها
كل يومية مطلعتلي سالفة شكل
تخليني اشيط و انركع ههههه
نيروز : ههههه اي هي وكيحه
ابو طبع ما يتغير
فيروز : بعد بزرج لا تكدرين تغيري
و لا تكدرين تجبرينه يتغير
ولا تكدرين تذبي
تضمينه بوسط گلبج بكل طباعه
نيروز : اي و الله صدگتي
غيث : ها يمه منو البارحه
تصيح الا اهج و اخليكم
نيروز : انتوا حاله استثنائية
فيروز : ههههههه
ضحكوا كل الموجودين
قاطعنا خروج زمرُد من الغرفة
شايلة طفلة صغيرة
ابتسمت جابتها الي كمت اخذتها
شلتها بين ايديه تخبل صغيرونه
فيروز : يا بعد بيتي هالوجهه
الله يحفظها و يجعلها من الابناء الصالحين
تتربى بعزكم يبعد بيتي
بست راس زمرُد
زمرُد : عمري خالتي تسلمين
طلعت فلوس حطيتهن بالكماط
ما قبلوا عليه بس لازم واجب هذا الشي
ظليت اناغيها و كاعدة يمها ،
كاموا يحضرون العشا
رغم ما جنت اريد و متعشية
بس ماردت اكسر بـ نيروز
و هم جانو منتظريني ع الاكل
خلصنا عشا و ما خلوني اروح للبيت
و شرطوا عليه الا ابات يمهم
فيروز : البنات وحدهم و الله
نيروز : داده مُلاذ جبيرة على بختج
قابل بعدهن بالكماط و وحدهن
هاي صارلي شكد مشايفتج
اجيتي ساعتين و تروحين ما يصير هيج
فيروز : غير مرة اجيج و الله
نيروز : لا لا ما اقبلها عليج
ظلي اليوم و باجر من الصبح ارجعي
بعد اصرار منها
قبلت
فيروز : زين بس خل ادك عليهن
اكللهن رح ابقى خاف يظل بالهن
نيروز : تمام
اخذت تلفوني اتصلت على مُلاذ
ظل يرن يرن و ماكو جواب
ظليت اتصل هواي ما جاوبت
نغزني گلبي ما مرتاحه
مُلاذ هواي تلفونها يطفى شحن
لو تكون مشغوله ما تجاوبني
كلت بعدين تدك عليه
حاولت اتغاضى عن شعوري السيء
تركت التلفون على جهه
و كعدت بالصالة يم نيروز و زمرُد و جنتهم
انفتح الباب دخل فرات
فرات : سلام عليكم
ابتسمت ، دحگلي باستغراب
شويه شويه تفككت عقدة حواجبه
و ابتسم تقدم علينا بخطوات خفيفه يدحگلي
فرات : هاي اليوم منو يمنا
فيروز : شتكول انت؟
فرات : هاي فيروززز
ضحك و اجا باس كصتي
ضربته على جتفه
فيروز : بعدك ارعن
فرات : ههههههه ، شبيج خالتي
شنو مشتاقيلج وين ما وين لا تسئلين لا تكولين
هاي عود انا جنت صغير اصيحلج يمه
كبرت بعد مو ابنج
فيروز : انت وليدي ابني
حتى لو مو من بطني و لا انا الولدتك
ابتسم ظاهر اسنانه
بست شعره ظل كاعد يمنا شوية
كام بعدين لـ غرفته راحت مرته وراه
فرشنا بغرفة نيروز
ظلينا كاعدين نسولف
بس لازمة گلبي و لا عرفت ارتاح
دكيت اكثر من مره على مُلاذ ماكو جواب
صار نص الليل
لا اكدر ارجع و لا اكدر اسوي شي
بقيت كل الليل اتصل
ناموا هم و انا ما اكدر ما مرتاحه
ياما يجيب الصبح و اروح اشوفهم
كضيت عمري انا يم بناتي
ما نفترق لحظة و بكل مكان هنه وياي
يمكن لان ما متعودة بدونهم
هيج انا ما مرتاحه
سميت عليهم و دعيت ربي يحفظهم
قريت سورة الفلق و غمضت عيوني ...
مُلاذ :-
صرت اصرخ بكل صوتي
و احرك نفسي بـ هستيريه
حلكي مسدود و ايدية مربطات
دحگت للواكف فوك راسي
صرخت بصوت مكتوم
مُلاذ : ملااااك
اتلفت عليهم واحد واحد
و اهز بروحي اريد اروح لملاك
اريد اشوف شبيها روحي فرفحت عليها
دنك الي فوك راسي فتح حلكي
بسرعة صرخت : ملاااااك
-و قزرقط
-بكلبببك قذررر ، منو انتم؟؟
شتريدون من عدناا !؟؟؟ حقراء انذال
غضب الله عليكم ، افتحنييي الله ياخذكم
بس عيونه مبينه
دحگلي بنظرات قذرة
گال بـ نية اقذر منه
-تريدين افـ***؟
بحلقت عيوني عليه
خزرته ، تفلت بوجهه
فك عيونه بوسع ، ضربني بسرعة
مُلاذ : قذرررر شيل ايدك عني
رجعت تفلت عليه
راد يضربني وكفه واحد من الواكفين و شاوره
سكت يدحگلي بـ غضب ، هز راسه بتوعد الي
فتح ايديه و رجليه
دفعني على الكاع ، صرخت متوجعه
انداريت ، كمت بسرعة
زحفت على ملاك حطيت ايدية على خدها
مُلاذ : ملاك ، ملاكي
بعدت القماش عن عيونها
فتحت اديها و رجليها من الاحبال
جست نبضها ، عايشة بس فاقدة الوعي
جسمي احسه متكسر ، عقلي ثكيل
بس احاول اسيطر على روحي
رفعت راسي الهم ، عطت بيهم بكل صوتي
مُلاذ : ليششش مدتصحى شسويتولهااا؟
-مخدره
مُلاذ : منو انتممم ؟
شتريدوووون من عدنااا شتريدون؟
انداريت على الي كاعدين
و اشكالهم اشكال اسرى
مُلاذ : جاوبوني منو ذووووله
انتوا شتسوون هنا ؟؟ ليش هيج اشكالكم؟
كال الملثم باستهزاء
-غبيه ، خطفناج كل الي هنا تابعين النا
ارواحكم بأيدنا
-انت الغبي حيووان مجلوب
طبعاً خطفتوني لان انذال
منو دزكم الچتال؟؟ الچتال دزكم طبعاً
جر شعري الملثم
و كال بتحذير
- لا تظلين تهوبزين على راسنا
اذا صوتج ما انكطع ، نكطع لسانج
مُلاذ : اكل خـ** ما تخوف جلبي
اعلى ما بـ خيلك اركبه
ضربني على وجهي ، دفرته بـ رجلي
راد يرجع عليه ، لزمه نفس الولد يحاجي ،
دحگلي بطرف عينه و طلع
اول ما انفتحت الباب حاولت اشوف شي
بس بسرعة انسدت
رغم جنت خايفة ، مصدومة ، تايهه
بس ما جنت اكدر اظل صافنه و احلل
لازم اتصرف بـ ردة فعل سريعه اتجاههم
حتى اعرف شنو يريدون و منو همَ!
كل الي كاعدين على عظمهم بس جلد
و مكرفصين من البرد
الاطفال يبجون بصريخ
الامهات دمعها ينزل على بجيهم
طلعوا الملثمين كلهم
حتى لو اريد اشرد ما اكدر بلا ملاك
و هواي حرس واكفين
و لمن لمحت المكان جان ممر طويل
جريت ملاك و كعدت بزاوية
ضميتها يمي
لو اجمع خوف العالم كله
ما يعادل خوفي على ملاك
ظلينا هيج ما اعرف شوكت جابونا
اكو جامه كلش صغيرة
يمر منها ضوا خفيف
بيها ضوا يعني دنيا الصبح
لزمت ايد ملاك متجمده من البرد
اللفاف يلي جان على متوني بعده موجود
ما اعرف شلون ما طاح
اخذته حطيته على طول ملاك
مر وقت بحدود الربع ساعة
عيوني تمشط كل الموجودين
ناس نايمة ناس كاعدة
كلهم يرجفون من البرد و اكو مريضين
ريحة الدم دمرتني
و بقع الدم بكل مكان
حسيت على ملاك تشد بتشيرتي
دحگتلها بسرعة ، فتحت عيونها
دحگتلي بالبداية صفنت ثواني
فزت و دفعتني رجعت للحايط
لمن شافت المكان و احنا وين
ظلت تتلفت للمكان
كل مرة ترجع روحها للحايط
لحد ما انضرب ظهرها بالحايط
بعدها مستمره ترجع روحها
ملاك : م ... مُلاذ شنسوي هنا؟؟
مُلاذ شنو هذا المكان؟؟
بدت تبجي بخوف
رحت عليها بسرعة اهديها
مُلاذ : اشش ملاك دحگيلي ملاك
درت وجهها بأيدي
مُلاذ : دحگيلي انا مُلاذ اختج هنا يمج
لا تخافين تمام لا تخافين انا موجوده
ملاك دحگيلي
ملاك : شنو هذا الدم مُلاذ
منو ذولة الناس ، امي ويييين؟
بلعت ريگي شاجاوبها ما اعرف
مُلاذ : ملاك بس ساعديني و اهدئي
انا يمج بعمرج صارلج شي و انا موجوده؟
ناشغت و هي تبجي
هزت راسها برفض
گالت بخمول : مُلاذ وين احنا؟
مُلاذ : ما اعرف بس رح نطلع منا
اكيد رح نطلع منا
ملاك : شيريدون من عدنا ؟
مُلاذ : ما اعرف ، ملاكي بس ابقي قوية
ابقي وياي زين؟ انا احميج من كلشي
لا تخافين
هزت راسها ، دموعها تنزل عشرة عشرة
ترجف مو بانصاف ، ترجف بخوف
تبجي و تناشغ
ملاك : اريد امي
بلعت ريكي ، ضميتها لصدري
من سنين ما حضنت احد
هسه حضنت ملاك حتى اهديها
مثل ما جان ابوي يهديني
لمن جنت ابجي خوفاً من فقدانه
يلمني بحضنه و يدخلني بين ضلوعه
وقتها جنت فعلاً احس بالامان
هسه اتمنى اكدر اوصل هذا الامان لـ ملاك
تنهدت سندت راسي على الحايط
همست ملاك : منو ذولة؟
مُلاذ : مخطوفين مثلنا
ملاك : شيريدون من عدنا شيريدون؟؟
مُلاذ : نفس السؤال ببالي
اكيد رح نعرف بس اصبري
مستمره تبجي و ترجف بحضني
رغم اريد اركف رجفتها بس ما اسيطر عليها
البرد بالمكان يدك بالعظم ...
فيروز :-
كعدت الصبح على صوت نيروز
و هي تسولف وي بنتها
نيروز : لمي الفراشات من تكعد فيروز
انا اروح اوصي اخوج يجيب صمون
هزت راسها زمرُد
كعدت على حيلي
فيروز : صباح الخير
دحگتلي نيروز
صفكت ايد بأيد بأسف
نيروز : يا باع كعدت المره
فيروز : لا يمعوده انا اصلاً كل يوم
اكعد هجي وكت
طلعت تحاجي ابنها يجيب صمون
و انا غسلت و رجعت اتصل على مُلاذ
يرن و ماكو جواب اختنكت
گلبي ما مرتاح ابد و احس صاير شي
وين تلفونها عنها معقوله ما تسمعه!
من البارحة انا اتصل
اتصلت على الحجية ام إلياس
سئلتها اذا صايرة عركة بين اسكندر و مُلاذ
گالتلي لا
الحجية : ليش وين انتِ حبوبه؟
فيروز : اختي نيروز
الحجية : اي ، شمالها؟
فيروز : جايه لـ بغداد و بنتها جايبة طفلة
اجيت الهم و ما خلوني اروح بتت يمهم
و بليل دكيت على مُلاذ ما حصلتها
لحد هسه ماكو ادك و ما تجاوب
الحجية : يا شمالها الفرخة
خل اروحن اشوفنها
فيروز : لا ماكو داعي
هسه انا رح اروح للبيت
الحجية : خابريني من توصلين
ترا طك الضيج بصدري
تنهدت
فيروز : ان شاء الله عمه
ان شاء الله ماكو شي
سديته منها اتريكوا و اكلت وياهم كم لكمة
اخابر على مُلاذ بعدها خطها مغلق
كلتلهم ، كام فرات يوصلني لـ البيت
نيروز : لا تخافين تلكيهم نايمات
لو تلفون مُلاذ ضايع
فيروز : ان شاء الله ماكو شي
بوستها و ودعتهم
طلعت وي فرات نروح لـ بيتي
اتصل و ماكو جواب
خابرت على جنات
جنات : هلو عيني فيروز
فيروز : جنات فدوة ودي غادة لـ بيتنا
خل تشوفلي مُلاذ وين
جنات : خو ما صاير شي
صوتج مو طبيعي؟
سولفتلها الي صار
جنات : خوش خوش
هسه انا و غادة رايحين نشوف
فيروز : فدوة بس توصلين خابريلي
انا بالطريق جاية
جنات : خوش
سدته مني
فرات : اهدي خالة يمكن مبايلها ضايع
فيروز : ما اعرف ما مرتاحه
فرات : هدي يابه ماكو شي ان شاء الله
قابل شيصير الهم بنات كبار
فيروز : ناسيات الغاز مفتوح
صاير شي بالكهرباء
عايفات الصوبة مشتغلة و نايمات
و صاير قدر لا سامح الله
فرات : هوب هوب خالة وين طرتي
مُلاذ نبهه من هي و طفلة
ما تنسى هيج شغلات
فيروز : نبهه بس شلون نبهه تشيب الگلب
اذا طلعت نايمة و مضيعة التلفون
و الله ادكها بالكاع ، ضغطي علك
فرات : هههههه ، لا ان شاء الله ماكو شي
دكت عليه جنات
فتحت خط بسرعة
فيروز : ها جنات؟
جنات : فيروز اجيت لكيت باب الشارع مفتوح
و باب المطبخ مسدود بس الشبابيج مفتحه
و محد بالبيت
عركت و ايدي البيها التلفون ترجف
حسيت راسي ثگل : ش .. شلون يعني؟
جنات : دخلت غاده من الشباج
لا مُلاذ و لا ملاك موجودات
البيت فارغ و كله طين و لا بي كهرباء
روحي انسحنت سَحن
ما ظل عندي عقل ،
الف حسبة اجت ببالي
كلت لـ فرات يستعجل
وصلنا للبيت
دخلت بسرعة فتحت الباب
ادحك للزولية بيها تتن
ارجع ارفع عيني ادحك اثار طين واضحة
رحت على غرفة مُلاذ فارغة
رجعت على غرفتنا انا و ملاك
لكيت بالكاع تحفية مكسورة
رجعت ادور تلفون مُلاذ ما موجود
دورت بكل مكان ماكو ، اتصلت عليه
رحت ادورة لكيته طايح ورا الصبة بالحديقة
اخذته من الكاع ما مفتهمه شصاير!
دخلت جوا ، اتقدمت بخطوات ثگيله
كعدت على القنفه
حيلي مهدود و رجلية صارن خيوط
غاده :-
من بعد ما رحنا انا و امي
شفنا حالة البيت و فارغ
، اجت خالة فيروز
دورنا و شفنا البيت وضعه مو طبيعي
جاي رجال وي خالة فيروز
مستغرب الوضع ويلي صاير
بقينا واكفين واحد يدحك بوجهه الثاني
و عود انا عندي دوام بس ماكدر اروح
عقلي صار وي مُلاذ و ملاك
جو متوتر ، يصب الحيرة بـ گلب الانسان
فزت خالة فيروز من مكانها فجأه
كامت تركض على غرفة مُلاذ
رحنا وراها انا و امي
شفتها تضرب بميز مُلاذ
تريد تفتح الميز كامت و هي تبجي
تدور ما اعرف على شنو
لزمتها احاول افتهم
غاده : خاله فدوه حاجيني شصايرر؟
خرطت وجهها بأيديها
بجت تدك على رجلها
طاحت بالكاع و انا لازمتها
فيروز : هددو بنتي شفت التهديد بعيني
شلون عفتهن و رحت شلووون!!!!
دكت على رجليها تبجي
ملخت روحها تملخ شخطت خدودها
نريد نسيطر عليها ما نكدر
انا مداكدر استوعب كلامها
لزمت خالة فيروز بأيدية تبجي و تتوسل
فيروز : انتِ صديقتها
صديقتها تحجيلج كلشي
احجيلي غادة الله يخليج
ابوس ايدج احجيلي
بنتي وين بنتي شصاير وياهاااا؟؟
اخذت ايدية تبوسهم و تبجي
بعدت ايدية و حضنتها
غاده : و الله ما اعرف شيي و الله
لو اعرف اگول الج بدون ما تگولين
امي تعرف بيبية مُلاذ
اتصلت عليها و حجت الها الصاير
خاله فيروز گلبت الدنيا بالصياح
نزل دم من وجهها كد ما شخطت بي
كمت ابجي وياها ، احاول اثبتها
بنفس الوقت كلشي ما مفتهمه
شصاير؟ وين مُلاذ؟ وين ملاك؟ شكو؟!
ربع ساعة لكينا اسكندر و اهله كدامنا
سئلوا خالة فيروز شصاير
حجتلهم و هي تنحب و تبجي كوه تنفهم
و حجت الهم عن التهديد الي لكته عد مُلاذ
الكل مصدوم و الحجية لازمه گلبها
عمام مُلاذ مصدومين و يسئلون
شوكت صار هذا الحجي
دحگت لـ اسكندر يلي صافن و منزل راسة
يقبض بايدة و يفتحها رفع راسه دحگلهم
ندس ابو و شاورة
خالة فيروز دحگتلهم بتركيز
قبل ليكومون و يطلعون
وكفتهم لمن لزمت ايد اسكندر
و كعدت يم رجله تتوسل بي يحجيلها
اذا يعرف شي
عم اسكندر لمن شافهم
كال لـ اسكندر يكعد ، لحد ما كعدوا
بدا يحجي عن السيارة
يلي لاحكة مُلاذ و الرمي يلي صاير
و هو لاحكها و كادر يخلصها منهم
بعدين حجا عن الچتال
يلي تدور عليه مُلاذ
كلنا مصدومين و مبحلقين عيوننا
دموعي تنزل عشرة عشرة
سوده بوجهي
كل هذا صاير بصديقة روحي و ما ادري
قبل لا اوصل لمرحلة اهضم الموضوع
و يدخل يلي صاير براسي
بوسط صفنتي ع الكاع ، دموعي تنزل بهدوء تام
فزيت على صرخة امي
دحگتلها لازمه فك خاله فيروز
و تريد تفتح حلكها
هلعت من مكاني ناحيتهم بسرعة
دحگت لخالة فيروز
اصطكت اسنانها منتهيه
طاحت بالكاع و كلنا نتراكض عليها
و الحجية اغمى عليها
ما ندري بعد المن نروح و بمنو نحير
شالوهم للسيارات يركضون بيهم
صعدت وي خالة فيروز و اسكندر
و امي راحت وي الحجية
خالة فيروز راسها بحضني
متجمدة عيونها مفتوحات و ما ترمش
هبطت من الخوف
اتوسل بيها تصحى و ابجي
فجأه صار يطلع شي ابيض من حلگها
صرخت بخوف ، سودة بوجهي
لو مُلاذ موجودة و تشوفها تتخبل
اسكندر التفت شافها اتخبل
داس للسيارة وصلنا للمستشفى
نزلناها نركض
اجا دكتور يحاول يصحيها
و هي ماكو فاقدة
طلعونا لبرا و سحبوا البردة
بقيت اروح و ارجع
اسكندر راح يشوف بيبيته
امي اجت تركض عليه لمن شافتني
جنات : ولج يممه شبيها فيروز ؟؟؟
حجيت و انا ابجي : ما ادررري ما ادري
كام يطلع من حلكها شي ابيض
و ما رمشت ابدد
دكت امي على رجليها بصدمة
و تصيح سودة بوجهي
مرت عشر دقايق اجانا الدكتور
الدكتور : صحت الحمدلله على السلامة
انطيناها منوم حتى ترتاح شوية
جنات : زين دكتور فدوة اروحلك شبيها
شنو طلع شي ابيض من حلكها؟؟
الدكتور : هذا قيء ، خلوها ترتاح شوية
هزينا راسنا ساكتين
و الدكتور راح رحنا يم خالة فيروز
لكينالها معلكيلها المغذي و نايمة ...
مُلاذ :-
مرت فترة كلش طويلة
صبح و ليل يمرن ما اعرف الوقت
بس اذا اقدر يكونن يومين مرن
ما دخلوا الملثمين ابد
و لا انا و لا ملاك اتقربنا يم احد
يدخلون ماعون تمن يحطونه بنص
يصير المراكض عليه يهجمون كل الموجودين
ياكلون بايدهم و ما يلحكون
و يتدافعون ع الاكل
ما اتقربنا من الاكل ابد
بس لمن يجيبون مي انطي لـ ملاك
اكو بنات ثنين كل شوية يتعاركن
و يصير المضارب بيناتهن
وحده تركع راس الثانية
الناس من كد ما محبوسة
بدت تستوحش على بعضها ...
وحدة من البنات صغيرة
يطلع عمرها ١٣ سنه
تفتر و تروح و ترجع تدحگلنا
من تشوفني ادحگلها تنزل عينها بسرعة
انفتح الباب دخل واحد ملثم
ما لحكت اشوف شكو برا
و لا لحكت اكوم حتى
لمن شافت البنيه الباب انفتحت
ركضت ناحية الباب تريد تطلع
دفعوها لـ جوا ،
كمت بسرعة
قبل لا اخطي خطواتي
شفت اسوء منظر بحياتي
لزمها الملثم ، ضرب راسها بالحايط
البعض صارو يصرخون
و البعض ساكتين عيونهم مغرغره دموع
ضامين ايديهم لـ حنكهم
يشاهدون المنظر الكدامهم بعيونه خايفة
و گلوب مرعوبة و جسم يرجف
ملاك متجمدة بمكانها
رجعت عليها بسرعة
غطيت عيونها بايدي
مستحيل اسمح لـ هيج منظر ينحفر بذاكرتها
ظليت ساده عيونها بأيدي
ادحك الكل كاعدين
البنيه تنضرب من حايط لـ حايط
و تبجي بصريخ شعرها تكطع
الدم صار بكل مكان
انداريت لملاك ، شاورتها
مُلاذ : غمضي عيونج و سدي اذانج
ابد لا تفتحين عيونج
و لا توخرين ايديج عن اذانج تماممم؟
هزت راسها بقبول تبجي
ابتعدت عنها و هي مغمضة عيونها
سادة اذاناتها بايديها كل قوتها
ركضت على البنيه
الي صارت لعبه بين ايديهم
حاولت ادفعهم و اوخرهم
صرت سد الها و الضرب طاح كله بيه
جرني واحد منهم
دفعني على صفحة طحت بالكاع
التموا مجموعة عليها
اريد اكوم ما اكدر ،
ضربوها خلصوها خلاص بايديهم
رجعوا عليه يدفرون ببطني
ادحك لملاك تصرخ و تبجي تريد تجيني
صرخت بيها حتى ما تجي
جروني من شعري
ضربوا راسي بالكاع
حسيت راسي اتفطر ، عيوني كوه افتحها
سبيتهم و غلطت عليهم
صارت مجموعة عليه و مجموعة عليها
يدفرون بينا بلا انصاف
من بين ركلاتهم المتجهه نحو بطني
و تركت عندي الام قوية
استجمعت قوتي و صحت
مُلاذ : سفللله قذررررين كدرتكم ع النسوان
رجال واحد ما شفت هنا غضب الله عليكم
رجعوا يضربوني اقوى
دخل واحد ملثم
شاور الي يضربون بالبنية
بوسط المكان شگگو ملابسها مثل الحيوانات
و طلعوها يسحبون بيها
و هي تصرخ من البجي
مصدومة بكل لحظة
و بكل حركه تزيد صدمتي
عيوني صارت نار
دم احسه جمر ينزل من راسي
وخروا عني ،
طلعوا كل الملثمين مره ثانية
ياربي اذا كابوس صحيني منه
مستحيل هذا واقع!
مستحيل اكو هيج شي ؟؟!
منو ذولة ؟ شنو هالوحشية و القذارة !
شفت ملاك اجت تركض عليه
انعلقت عيوني ، رجعت فتحتهم
فقدت الوعي ، ما كدرت اقاوم اكثر
صحيت لكيتهم مضمدين راسي
مخليني بالزاوية و ملاك يمي
ادحگلها دموعها عشرة عشرة
حضنتها ساكته ، احس روحي رح انفجر
الى متى رح ابقى اتصرف بهذا الهدوء!
ما ادري انا ليش ما مدركه انا مخطوفة
انا بوضع خطر ، اختي بوضع خطر
كل خطوة ممكن اخطيها
تؤدي بينا الى الخطر
همست
مُلاذ : منو ضمد راسي؟
اشرت على وحدة
حجت و هي تناشغ
ملاك : ذيج المره تكول هي دكتورة
جابو الها غراض ضمدت بيهم راسج
ملاك طول ما هي كاعده تبجي
و لا ماكله صارت نحلانه
رغم تحاول ما تبين الي هالشي
كلساع تصير زركة نيل
اكول خلص ماتت من الخوف و گوه اهدئها
انفتح الباب دخلوا البنية نفسها سحل
مغمي عليها و يجرون بيها
رجليها انكردت بالكاع و همَ يجرجرون بيها
وجهها مشوهه تشوهه
عرفتها من كم قطعة ملابس الباقية عليها
و الباقي مشكك ، تركوها بالكاع و طلعوا
دحگت للنسوان
تقدمت من بينهم مرة جبيره
نفسها الكالت عنها ملاك
اخذت البنيه لـ زاوية و وياها مره ثانيه ساعدتها
ركزت بعيوني عليهم
رفعوا ملابس البنية
دحگت المره الجبيرة للـ مرَة الثانية
هزت راسها بأسف ،
رغم وجع راسي كمت بسرعة اتجاههم
مُلاذ : شبيهاا؟
-اغـتصبوها
صاعقة ضربتني ، نملت رجلية
كعدت بالكاع ارجف
مُلاذ : ش ... شنو اغتصبوها؟؟
تدرين بنفسج شدتحجين؟
-كل يلي تعارضهم يغتصبوها
انتِ شعبالج النسوان الي هنا الساكتات
راضيات بعيشتهن؟؟
صارلي سنه هنا ، كُلشي سويت
حتى اهرب انا و اطفالي و انقذ نفسي
بس ما كدرت
كملت المره الثانية و هي تكول
- جابوا ٣ بنات
و اغتصبوا هذني الـ ٣ كدامنا
كدام عيننا لان ٤ مرات هربوا و مسكوهم
يلي يسمعون حسها هيج يسوون بيها
حسيت الدنيا اسودت بعيني
بلعت ريكي ، احس روحي رح تطلع
مُلاذ : مستحيل هذا واقع مستحييييل
انا داحلم مو؟ كابوس هذاا !
- مو كابوس احنا هم مثلج بالبداية
ما جنا مصدكين عيوننا و الي نشوفة
وي الايام تعودنا
من صرنا نشوف اشياء اسوء
بس هاي الطفلة ماكدرت تتعود
من شهرين جابوها و لسا مصرة تشرد
هاي ثالث مرة تحاول تشرد
شكل البنية موتني من القهر
النسوان اخذن عبايه غطنها بيها
ما اتحملت ركضت للزاوية و تقيئت
اسمع صوت ملاك يمي
احس صدري مختنك خنك
و بكل مره اتقيء اكثر
نقطة مي ماكو
ظليت اتنفس گوه
و اسمع ملاك تنحب من البجي يمي
لزمتها و رحنا كعدنا بالكاع
اجر النفس كوه ...
امي ما غابت لحظه عن بالي
اتمنيت ارجع ابوس ايديها
اعتذر منها على كل لحظة تعبتها بيها
اتمنيت ارجع و اضمها بگلبي
اتمنيت ارجع و اخليها تضربني
اتمنيت ارجع و اشكي الها و ابجي بحضنها
تنهدت مخنوكه
ملاك تبجي و تحجي
ملاك : ضربوج هواي
وجهج كله احمر و مجرح
مُلاذ : مابيه شي
ملاك : مُلاذ و الله جاي اخاف منو ذوولة؟؟
شهكت تبجي و حاطة ايديها على عيونها
سكتت ما اكدر احجي شي
انا بنفسي ما اعرف منو ذولة
من الچتال لو ناس ما اعرفهم و لاحكيني
لو شنو بالضبط انا بنفسي ما فاهمه
اجت بنية اتجاهنا
ضميت ملاك لصدري اكثر
وكفت البنية يمنا
دنيت نفسي عنها و خزرتها
ما واثقة بأي شخص هنا
ممكن تريد تاذيني
مُلاذ : شتريدين؟ منو انتِ؟
حطت ايدها كدامها تهدأني
نزلت كعدت يمي
صافنياز : ما تخافي مني
مُلاذ : منو انتِ؟
صافيناز : خطفوني مثلك
كلنا هون مخطوفين
ظليت ساكته و ادحگلها
و هي شفايفها صارت ترجف و بجت
صافيناز : جابوني هون من شي شهر
حاولت اهرب بكل طريقة بس ماعم لاقي فرصة
مُلاذ : و شمدريني انتِ مو وحدة منهم
و مجاي تجذبين عليه ؟
صافيناز : فيكِ تسألي كل يلي هون
ما معقول الاطفال يكذبوا كمان
اساساً ما اجيت اطلب المساعده
بس اجيت اهديكِ
مُلاذ : انتِ منين شو كلامج مو مثلنا؟
صافيناز : انا سوريه
مُلاذ : و شجابج ع العراق؟
صارت تبجي خنك و تحجي
صافيناز : من شي ٦ اشهر
اجينا لـ هون ع العراق
بابا افلس و لما اجينا هون
كنا نحتاج مصاري قام بابا
اخذ من واحد و تاخر بالدفع بعدين
ما كنا بنعرف مين هذا الواحد
و لا بنعرف بابا اخذ مصاري
بعدين اجا بابا متصاوب لما عرفنا
و بيوم من الايام بالليل
بلشوا يرموا رصاص على بيتنا
مر يومين بابا و ماما
راحوا على الشرطة بدهم يبلغوا
و انا بقيت لوحدي رن الجرس
قمت افتح الباب لسا مو قادرة صرخ
خدروني و خطفوني
عكدت حواجبي معقول هذا الچتال!!
طلعت مو بس انا اعاني منه
مُلاذ : شلون اصدكج؟؟
صافيناز : ليش حتى اكذب؟؟
شوفي شو عملوا فيني لما حاولت اهرب
رفعت ردانها ايديها عبارة عن جويات
تبجي و كوه تتنفس
رغم هالشي ما ثقيت بيها
فزيت على شهكات ملاك دحگتلها
تدحك لـ ايد صافيناز و تشهك
وجهها صار ازرك و ما تتنفس بس تشهك
صرخت بـ فزع : ملاااااك !!!!
فركت صدرها احاول اهديها
ركضت صافيناز ع الباب تدك بيهه
و تكللهم تريد مي
كعدت ورا ملاك ظهرها على صدري
سندت راسها على كتفي بـ هدوء
لازمه بـ ايدها و اهمس بـ اذنها
مُلاذ : ملاك ملاك تسمعيني؟؟
ملاك اتنفسي ،
اذا تسمعيني اضغطي على ايدي
بس صوت شهكتها ينسمع
ضغطت على ايدي كل قوتها
تنفست براحه
كاموا التموا علينا
دخلت من بينهم صافيناز انطتني مي
شربته لـ ملاك ، كوه كدرت اشربها
المي يخر من حلكها
رجعت وراها كعدت
حطيت ايدي على شحمة اذانها
افركها بايدي اشتت انتباهها
و اهمس بـ هدوء
مُلاذ : ملاك اهدئي انا منو؟
انا مُلاذ مو ؟ مُلاذ اختج ما اخليج تتاذين
انا يمج ملاكي ، اضغطي على ايدي
ضغطت على ايدي حيل
كملت كلامي
مُلاذ : احنا بنات إلياس و فيروزته
همست بصعوبه
ملاك : إل .. إلياس
هزيت راسي : اي إلياس
احنا بناتهم بنات إلياس الشجاع
و فيروزة المره القوية ، أُمنا
ابد ما رح نضعف ما يصير نضعف
لازم نظل بخير حتى نرد لـ امنا بعدين زين؟؟
زين ملاك ؟
بلعت ريكها بصعوبة و هزت راسها
لزمت ايدها حيل
مُلاذ : منو انا ؟
گالت بروح رايحة
ملاك : مُلاذ
مُلاذ : اسمح يصيرلج شي؟
ملاك : لا
مُلاذ : وعد ملاك وعد اطلعج منا
لا تخافين انا يمج تمام؟
اتذكري زين احنا بنات إلياس و فيروزته
و لازم نصمد مثلهم و نقاوم
حتى نرجع لـ حضن امنا
هزت راسها ساكته
و بدأت تهدء تدريجياً
لحد ما نزلت راسها و غفت على رجلي
كعدت يمي المرة الجبيرة الدكتورة
وياها المره نفسها الساعدتها
و صافيناز يمنا ، بدت تحجي الدكتورة
مُلاذ : منو انتوا؟
-انا زينه و هاي كميله
انا دكتورة
هزيت راسي ساكته
- مو سئلتي شنسوي هنا؟
مُلاذ : اي
- احنا مخطوفين مثلج
هذولة الي خطفونا
اكو جان عدهم عداوة وي رئيسهم و خطفوهم
و بعضهم مالهم اي ذنب مخطوفين ،
من اول ما اجيت لـ هنا
و همَ كل يوم ياخذون شخص
ركزت بعيونها و گلت بهدوء
مُلاذ : منين تعرفين؟
- زوجي جان يدور وراهم لان هو ضابط
جان يجي يسولفلي كل شي عنهم
خطفوني انا و ابنائي
و هددوا زوجي بيه و بـ ابنائي
بعدين قتلوه كدام عيني
گلوله تعال لفلان مكان
نسلمك مرتك و جهالك
اخذوني و رحنا رموا عليه ٣ طلقات كدامي
رجعوني لهنا و هددوني بارواح ابنائي
مُلاذ : غضب الله عليهم
ربي عسى الچتال بمرض ما يشفى منه
هو و كلمن وياه ،
شنو يريدون من الناس المالهم ذنببب؟؟
-ياخذون البنيه علمود ليله
مقابل فلوس الهم
و يبيعونا لـ اشخاص مجرمين وياهم
حتى يحصلون فلوس بينا هم
و يتاجرون باعضائنا ...
يتبع ...
- يتبع الفصل التالي اضغط على ( رواية جرح الأيهم ) اسم الرواية