رواية يكفيني منك عقابا الفصل الحادي عشر 11 - بقلم بقلم عبير سليم

 رواية يكفيني منك عقابا الفصل الحادي عشر 11 - بقلم بقلم عبير سليم 

الحلقه الحادية عشر من رواية

يكفيني منك عقابا

بقلمي : عبير سليم

😢😢😢😢😢😢

بردك مش عايز تجوللي الحاج سليمان كان جاي عايز ايه

نعمان : دلوك ياجي عامر و مصعب و حتعرفي كل حاجه

زينب : طول عمرك اكده متريحنيش أبدا

نعمان : ربنا اللي بيريح يا زينب

زينب : بجي اكده يا نعمان خلاص زهجت و عايز ترتاح مني

نعمان : ههههههههه بهزر معاكي يا ام عامر ديه انتي ست الكل و عمري ما ازهج منك ابدا

زينب : خابرة زين انك بتحبني و متجدرش تستغنى عني واصل

نعمان : ربنا يخليكي ليا و يباركلي فعمرك يا ست الكل يا رب

زينب : بس اني خايفه جوي يا نعمان

نعمان : من ايه يا زينب

زينب : العمر بيجري و احنا بنكبر خايفه العمر يخلص جبل ما افرح بعيالنا نفسي و منى عيني اشوفهم متهنيين و اشيل عيالهم 

نعمان : ان شاء الله يا زينب ربنا حيفرحنا بيهم و نشوف ولادهم بس انتي جولي يا رب

يعلن جرس الباب عن مجيئهم فتذهب سكرة  لفتح الباب يلقيان عليها التحيه و تعود مسرعة إلى عملها

يدخلان و يسلمان على ابيهماو أمهما

و ينادي نعمان على نسمه و يطلب منها أن تصعد لأعلى لتنادي على عتاب و رحمه و حفصه لينزلوا

بعد مرور القليل من الوقت

يجلسون جميعهم على المائده يتناولون الطعام

نعمان : اخدتي علاجك يا عتاب

عتاب : أيوة يا عمي اخدته

نعمان : ربنا يجعله بالشفا ان شاء الله

عتاب : تسلم يا عمي

نعمان : مبتاكلش ليه يا عامر

عامر : إيه لا يا بوي أني باكل اهوه أبوي

نعمان : أيوة يا عامر

عامر : هو الحاج سليمان كان عندينا النهارده بيعمل إيه

نعمان : و انت عرفت منين انه كان اهنيه

مصعب : حسني جال لنا و احنا داخلين

نعمان : و انت إيه اللي يشغلك في انه يكون جه عندينا

زينب : ديه اني بتحايل عليه من بدري عشان يجوللي و هو مش راضي يجول 

عامر و هو ينظر تجاه عتاب : يعني حتجول يا بوي و اللا هو سر حربي

نعمان : و لا سر حربي و لا حاجه نخلص لجمتنا و حجولكم على كل حاجه

عامر : اني شبعت يا بوي

زينب : خبرك إيه يا ولدي انت ماكلتش حاجه

عامر : الحاج سليمان جاي عايز ايه يا بوي

نعمان و هو بيبص لعتاب : جاي عايز عتاب

يقوم عامر من مكانه و هو متعصب : عايز عتاب كيف يعني ايه الكلام ديه

كل الستات يبصوا لبعض

نعمان : كيف الناس يا عامر عايزها لولده مالك في ايه

عامر : اني كان جلبي حاسس ما هو عنديه ولده ديه اللي اسمه كرم لسه ما اتجوزش بس هو كيف يفكر في حاجه زي ديه

حفصه : واه عليك يا عامر و ميفكرش، ليه هي عتاب مش جدها و اللا ايه

عامر : لا يا عمتي جطع لسان اللي يجول أكده ديه هو اللي مش جدها مين كرم الواد الملزج ديه اللي عايز ياخد ست البنات كلهم

نعمان : و الله الرأي رأي عتاب دي حاجه تخصها هي و هي اللي تجول موافجه و اللا لاء ايه رايك إيه يا عتاب كرم ابن الحاج سليمان بشمهندس جد الدنيا و الراجل شاريكي و جال اللي نطلبه من مهر و شبكه و حتبجي ست الكل

عامر : بيعه و شروة هي اياك

نعمان : استغفر الله العظيم تصدج اني غلطان اني اتكلمت جدامك ممكن تنجطنا بسكاتك

جوليلي يا بتي رايك إيه

عتاب و عنيها كلها دموع : اللي تشوفه يا عمي 

عامر : كيف يعني اللي يشوفه يعني انتي عايزة الجوازه ديه

عتاب : اني مبجتش عايزة حاجة يا ابن عمي و مبجاش فارج معايا حاجه من أساسه كله بجي زي بعضه و اللي حيجوله عمي اني حوافج عليه

نعمان : اطلعي اوضتك دلوك يا عتاب

عتاب : حاضر يا عمي

تطلع عتاب جري على السلم و هي بتعيط

يقوم نعمان و يقعد على كرسي : خبرك إيه يا عامر انت ازاي تتكلم أكده و لا عامل احترام لحد 

عامر : اني آسف يا بوي حجك علية بس يا بوي افهمني عتاب مينفعش تتجوز الجوازة ديه

نعمان : ليه ان شاء الله ناجصه ايد و اللا رجل

عامر : لا يا بوي انت خابر زين ان ديه مش جصدي

حضرتك نسيت ان عتاب عنديها السكر و لازملها رعايه و لزمن اللي ياخدها يخاف عليها و يراعيها و يحطها في عينيه 

ايش عرفنا احنا إذا كانوا العالم ديه حيحافظوا عليها و اللا لاء اديك شفت لما هملت في علاجها حوصللها ايه نفترض حصلت حاجه زي أكده حيبجى الحل إيه مش هي ديه الأمانه اللي خايف عليها

مصعب : بس لو كل عريس اتجدملها جلنا خايف لمياخدش باله منيها ييجى البت أكده حتعنس جارنا و ديه ميرضيش ربنا يا عامر

عتاب من حجها تتجوز و تفرح و يبجى ليها حياة زي كل البنته و بعدين هي بعد الشر معنديهاش حاجه عفشه ديه كل الناس عنديها السكر ديه حتى العيال الصغار عنديهم سكر

زينب : مصعب عنديه حج يا عامر

نعمان : الناس منتظرين ردنا الحاج سليمان و ابنه كل البلد تشهد بأخلاجهم  و عتاب موافجه يبجى خلاص الموضوع انتهى

عامر : لا يا بوي الموضوع منتهاش بسرعه أكده ايه هو سلج بيض إياك 

نعمان : حيفرج معاك إيه إذا كان ينتهي بسرعه و اللا لاء

اني يومين اكده و حرد عليه و اجولله إننا موافجين

عامر : لا يا بوي حضرتك حترد عليه دلوك و تجولله اننا معنديناش بنات للجواز

نعمان : يعني إيه معنديناش بنات للجواز و لما يسألني عن سبب رفضنا ليه و هو اي عيله في البلد تتمناه حنجولله ايه عاد 

عامر : حتجولله بنتنا مخطوبه

حفصه : عايز أبوك يكدب يا عامر و كمان عايز توجف حال بت عمك و تجول إنها مخطوبه ليه يا بني اكده

عامر : عشان هي مخطوبه يا عمتي

كلهم يبصوا لبعض

حفصه : مخطوبه ايه الكلام العجيب ديه و مخطويه لمين و احنا منعرفش ان شاء الله

نعمان و هو بيبصله و مستنيه ينطقها بلسانه

عامر و هو بياخد نفس و بيقرر ينطق بكلمه حيحدد بيها مصيره : أني يا عمتي

زينب : انت كيف يعني يا عامر

عامر : كيف الناس يا اما اني ابن عمها و أولى بيها من اي حد في الدنيا كلها

و اللا في حد عنديه رأي تاني

نعمان : أيوة فيه طبعا يا عامر صاحبة الشأن نفسها هي اللي من حجها تجول اه و تجول لاء

زينب : عامر يا بني انت ازاي عايز تتجوز عتاب و انت كنت بتحب عطر

عامر : الحب حاجه و الجواز حاجه تانيه يا اما

زينب : و يا ترى طلبك للجواز منيها ديه شفجه و اللا استخسار ما هو احنا كلنا عارفين انك مش شايفها غير انها زي رحمه و بس

حرام يا بني تظلمها هي ما نجصاش وجع جلب كفايه عليها اللي حوصللها جبل سابج

عامر : لا يا اما اني معاوزهاش شفجه  كيف ما بتجولي مش عتاب اللي تستحج مني أكده

و بعدين اني لا عمري حاجي عليها و لا اظلمها

اني اه لسه محبتهاش لأني لو جلت غير أكده ابجى كداب اني جلبي مش زرار ادوس عليه يغير المحطه و يحب حد تاني على طول

لا الموضوع ديه اكيد حياخد وجت بس اني محجدرش اشوفها مع حد ممكن يظلمها او ياجي عليها

مصعب : يبجى استخسار بجى زي ما امك جالت يا عامر انت مستخسرها تروح من يدك و متعرفش تعوضها صوح أكده

جلت لنفسك كفايه عطر راحت محتبجاش عتاب كمان

عامر : معرفش يا مصعب احسبوها كيف ما تحسبوها المهم إني أني اللي حتجوز عتاب و محدش أولى بيها مني و لا حيخاف عليها جدي

نعمان : و اني جلت عتاب هي اللي حتجول اه او لاء

عامر : ماشي يا بوي اتفضل اطلع اسألها و اني متأكد انها حتوافج

نعمان : ما تثقش جوي أكده يا عامر ديه ربك هو اللي بيغير الحال من حال لحالو هو اللي بيألف الجلوب

يصعد نعمان لأعلى ليجد عتاب تبكي و بجوارها رحمه تتحدث إليها و تهون عليها

رحمه : اتفضل يا بوي

نعمان : رحمه ممكن يا تسيبيني مع عتاب شويه

رحمه : حاضر يا بوي

تخرج رحمه و يقعد نعمان جمبها : هو فيه عروسه بردك تبكي أكده

عتاب : لا اني مببكيش يا عمي اني زينه جوي

نعمان : يا بتي اني عمري ما حغصب عليكي في جوازة

عتاب : عارفه يا عمي و اني و الله مفارجاش معايه حاجه و الحمد لله انها جت من عند ربنا عشان امشي من اهنيه

نعمان : و انتي عايزة تمشي من اهنيه ليه يا بتي

عتاب : كنك معرفش يا عمي

نعمان : اللي معارفاهوش انتي انه عايز يتجوزك و طلب مني اني اطلعلك دلوك عشان أسألك اذا كنتي موافجه تتجوزيه و اللا لاء

عتاب : مش فاهمه يا عمي هو مين ديه مش جصدك على اللي اسمه كرم ديه ماني جلتلك اللي تشوفه يا عمي و اني محجولش غير حاضر

نعمان و هو مبتسم لها : لا يا بتي مش كرم اللي طلب مني اطلعلك اللي طلب مني اطلعلك دلوك عامر ولدي هو اللي رايدك يا عتاب و عايز يتجوزك

عتاب : ايه عامر عايز يتجوزني اني

نعمان : ايوة و الله هو اللي طلب يدك مني دلوك

عتاب : ليه يا عمي ليه عامر عايز يتجوزني

نعمان : عشان هو ابن عمك و أولى بيكي من أي حد في الدنيا كلها

عتاب و هي بتمسح دموعها : و هو جالك تشوف رأيي إيه

نعمان : ايوة يا عتاب و دلوك هو جاعد مستني ردك

عتاب : و اني مموافجاش يا عمي

نعمان : مموافجاش على عامر يا عتاب

عتاب : مش من حجي يا عمي

نعمان : لا طبعا من حجك و اللا مكنتش طلعتك عشان اعرف رأيك لكن ممكن اعرف السبب خصوصا اني اني و انتي و البيت كله عارف انك بتحبيه و رايداه 

عتاب : اهوه حضرتك جولتها يا عمي إنى بحبه و رايداه اه لكن هو لا بيحبني و لا رايدني

نعمان : مكنش طلب يدك يا بتي

عتاب : حضرتك بتضحك علية و اللاعلى نفسك يا عمي عامر اذا كان عايزني فديه مش عشان بيحبني و لا رايدني لا لكن عشان اني صعبانه عليه مش اكتر عايزني شفجه يعني و اني محتجوزش شفجه و لا عطف يا عمي اني عايزة جوزي يكون عايزني كيف ماني عايزاه لكن غير اكده لا يا عمي

نعمان : بس انتي بتحبيه يا عتاب و لو اتجوزتي حد غيره حتكوني بتظلمي نفسك و بتظلمي الراجل اللي حتتجوزيه

عتاب : اني اذا كنت ظلمت نفسي فاني ظلمت نفسي يوم ما سلمت جلبي لواحد عمره ما شافني و لا حس بية

عمي الله يخليك جولله لاء، عتاب بتجولك لاء تشكر يا واد عمي عالجميل و الواجب اللي عايز تعمله معاي  مردودالك في الأفراح ان شاء الله

😍ايه هي جالتلك اكده يا بوي

نعمان : حكدب عليك اني إياك  انت كنت مفكر انها جاعده حطه ايدها على خدها و مستنياك لما تحن عليها و تجول انك عاوزها و هي تموت من الفرحه صوح اكده

لا يا عامر بت اخوي صحيح عشجاك و اني متأكد ان حبك مالي جلبها لكن كرامتها أهم اى حاجه

عامر : ابوي اني عايز اتكلم معاها

نعمان : بعدين مش وجته يا عامر

عامر : بعدين امتى يا بوي لما الاجيها بتتزف للي اسمه كرم ديه

نعمان : الصباح  رباح يا عامر تبات نار تصبح رماد و ليها رب يدبرها سببها دلوك و بعدين تبجى تتحدت معاها و محدش بياخد اكتر من نصيبه يا ولدي

ليل طويل يمر عليهما كمر السنين يمشي في الحديقه يحدث نفسه بينما هي تراقبه من شرفتها مثلما تفعل دائما

بعد مرور الوقت ينشق النهار من ظلمة الليل و تشرق الشمس بنور ربها لتعلن عن بدء يوم جديد

تطرق عليها الباب و تدخل : صباح الخير يا حبيبتي

عتاب : صباح النور يا عمتي

حفصه : مال وشك يا عتاب انتي منمتيش و اللا إيه

عتاب : لا يا عمتي اني صاحيه من امبارح

حفصه : طب و ديه ينفع بردك يعني دلوك لما عريسك ياجي يلاجيكي دبلانه اكده يجوم يرجع في كلامه

عتاب : عريسي

حفصه : أو عرسانك يعني ما هو على رأي المثل الفجي لما يسعد تجيله عشوتين في الليله

عتاب : عشوتين واحده معرفش مين اللي جابهاله و التانيه جاياله شفجه و عطف

حفصه : ليه بتجولي اكده يا عتاب

عتاب : مش هي ديه الحجيجه يا عمتي و اللا احنا حنضحك على بعض

حفصه : لا يا عتاب متحسيبيهاش اكده

عتاب : امال احسبها كيف يا عمتي و بعدين مش حضرتك اللي جولتيلي جبل سابج اعمل لنفسي كرامه و مخليش حد يجل مني و اديني اهوه حافظت على كرامتي

حفصه : و هو جوازك من عامر هو اللي حيبعتر كرامتك يا عتاب لا يا عتاب اسمعيني يا حبيبتي و بعد اكده اعملي اللي انتي عايزاه صوح عامر لسه جلبه محبكيش و لا عشجك كيف ما جلبك عاشجه لكن هو مبيكرهكيش و بيعزك جوي

عامر محدش غصبه على حاجه و لا طلب منيه انه يتجوزك

هو اللي جال عايزك بارادته و بمزاجه و اللي انتي جلتيه ديه كلهم جالوه جبلك لأن الكل بيحبك يا عتاب و سعادتك تهم الكل لكن هو جال لاء هو عايزك انتي و معاوزكيش تروحي من يده و لا حيجدر يشوفك متجوزه حد تاني

عامر لما حب عطر حب فيها الجمال و العينين الملونه حب شكلها و انتي متجليش عنيها انتوا الفرج بيناتكم لون العينين يا عتاب و الشعر يا حبيبتي

هو عمره ما سأل نفسه اذا كانت هي بتحبه و اللا لاء و لا سأل نفسه هو بيحبها ليه هو حبها كيف ما بنحب كل حاجه جميله حوالينا

لكن انتي بالنسبه ليه حتكوني حاجه تانيه خالص يا عتاب 

حتكوني الحب الحجيجي اللي لا بيحكمه شكل و لا جسم

انتي ما واعيتيلوش كان عامل كيف وجت ما عرف ان في واحد عايزك مشوفتيهوش و هو صاحي طول الليل منامش و لا عنيه غفلت من خوفه انك تروحي منيه

متخافيش يا حبيبتي عامر حيصونك و حيحميكي و حيخللي باله منيكي

و مع الوجت حيحبك كيف ما بتحبيه و يمكن أكتر كمان اديله الفرصه يا عتاب

اديه الفرصه انه يجرب منك و يشوف حبه اللي مالي جلبك ناحيته وجتها حيعرف انه عمره ما حب و لا حيحب غيرك يا نور عينيه

متظلميش نفسك يا عتاب و لا تظلمي حد معاكي انتي محتجدريش تحبي حد غير عامر حرام تظلمي جلب ملوش ذنب فحاجه

عامر مش حيترهبن و حيجيله يوم و يتجوز و يبجى ليه حياته و يا عالم يمكن اللي يتجوزها ديه تجدر تنسيه عطر و تنسيه اسم امه كمان

لكن انتي عمرك با حتنسيه و لا حتكوني مبسوطه و انتي شايفاه مع غيرك

دي فرصتك و جت لحد عنديكي امسكي فيها بيدك و سنانك على جد ما تجدري هي ديه معركتك في الدنيا يا عتاب و لازمن تتحدي نفسك و تكسبيها و يكون كل هدفك ان عامر يحبك و ميشوفش واحده غيرك وجتها حتحسي انك مالكه الدنيا كلها

حتاخدي وجت شويه عارفه لكن بعدها حتشوفي التعيم كله

اسمعي مني يا عتاب اسمعي من عمتك اللي تتمنالك خير الدنيا كله وافجي على عامر و خللي الفرحه تعرف طريج جلبك و ان شاء الله حيحبك و حينسى كل اللي فات و بكرة تجولي عمتي جالت

تظل كلمات حفصه تتردد في اذنيها نعم هي محقة في كل كلمه تفوهت بها

فهي لن تستطيع أن تعشق غيره مهما حدث فهو حب حياتها الذي لم تتمنى غيره

قلبها يحدثها ان توافق و عقلها يرفض الاحساس بأنها ليست إلا بديل لسواها

تدعو الله ان يدبر لها أمرها و يساعدها و يختار لها ما فيه خير لها

تقف امام تلك الورود الجميله التي قطفتها له من قبل و تتذكر كيف اهملها و لم يهتم بها

تتذكر هيئته و هو واقف أمام أختها و عيناه تفيض عشقاً و شوقا لها تلوم نفسها على انها لم تدرك حقيقة مشاعره تجاهها الهذه الدرجه حبه اعمى عينيها

لو لم تتحدث لأختها لتزوجها و أصبح سعيدا معها و هي كفاها ان تراه سعيدا و لكن هل كان باستطاعتها ان تتحمل رؤيته مع غيرها يداعبها و يلهو معها و يؤكلها و يصعدان و يهبطان سويا

هل كانت ستتحمل أن تراهما و هما يغلقان بابهما عليهما

يا ربي حقا ساصاب بالجنون كفاك يا قلب

ماذا أفعل يا ربي ماذا أفعل

يقطع عليها حيرتها صوته الذي طالما تستمع له و كأنه لحن عذب تطرب له اذناها و ينعم معه قلبها : عتاب

لم أكن أعي من قبل جمال اسمي و عذوبته فعندما تنطقه شفتاه يكون له مذاق أخر

تلتفت له و قلبها يكاد ان يشق صدرها و يخرج منه : عامر

عامر : واجفه اهنيه ليه

عتاب : مانت عالم ان هو ديه اكتر مكان برتاح فيه

عامر : ربنا يريح جلبك يا عتاب

عتاب : تسلم و تعيش يا ابن عمي

عامر :  ابن عمك رايدك يا عتاب و عايزك تكوني معاه

عتاب : اطمن علية يا عامر اني خلاص بجيت زينه و باخد علاجي بانتظام و باكل بسيط جوي عشان السكر ميعلاش علية اطمن ان شاء الله محيحصلليش حاجه تانيه متشغلش بالك يا عامر و شوف حياتك

عامر : و اني عايز حياتي تكون معاكي يا بت عمي

عتاب : معدش ينفع يا عامر

عامر:  لا ينفع يا عتاب

عتاب صدجيني لو جلتلك اني محتاجك اكتر مانتي محتاجاني بكتير جوي

اني تايه يا عتاب تايه و محدش حيوصلني لبر الأمان غيرك

انتي جلتي انك خايفه اكون عاوزك شفجه او عطف لا مش صوح يا بت عمي الصوح هو إني اني اللي عايزك تشفجي على جلبي و تعطفي عليه و تخليكي جاره

اني حاسس اني عامل زي العيل اللي اول يوم ليه في المدرسه و عمال يعيط و يجول اني عايز امي صدجيني لو جلتلك اني حاسس انك امي اللي عايزها و محتاجها جاري يا عتاب

عتاب : بس اني معوزاش ابجى امك يا عامر

عامر : عارف يا عتاب حجك مجدرش اجول حاجه بس واحده واحده الدنيا متبنتش في يوم و ليله اني حكون كداب في اصل وشي لو جلتلك إني نسيت خلاص اني معاوزش اضحك عليكي و لا على نفسي بس اني كل املي أني أجدر انسى كل حاجه و مفتكرش غيرك انتي يا عتاب

و لو نسيت حجطع عروج يدي و اشوف دمي و هو بيجري جدامي عشان اشوف دمك و هو مخلوط بدمي

و اللا نتي نسيتي ان دمك بيجري في عروجي

جولي موافجه يا عتاب جولي موافجه و اني اوعدك انك عمرك ما حتندمي

و ربنا يجدرني و اكون ليكي كل اللي تتمنيه

عتاب : خايفه اكون بحلم يا عامر و اصحى الاجيني جاعده لوحدي

عامر : عمرك ما حتكوني لوحدك يا عتاب من النهارده احنا حنكون مع بعض دايما

انطجيها جوليها كفايانا لحد اكده ساعديني يا عتاب مديلي حبل النجاة متسيبينيش اغرج اني محتاجك جوي مفيش حد حيجدر يخرجني من العتمه للنور غيرك انتي يا بت عمي 

يمد لها يده : هاتي يدك يا عتاب و اوعدك اني عمري ما حسيبها و حفضل ماسكها العمر كله

تنطر ليده الممدوده لها و تنظر بعينيه التي تتوسل إليه فلا تجد نفسها إلا و هي تمد يدها له لياخذها بين يديه و يحتضنها بقوة

و عيناهما بهما من الامنيات ما يسعى القلب لتحقيقها

معلش و الله الحلقه صغيره بس غصب عني و ربنا جوزي واقفلي و عاوز ياخد التليفون من ايدي وعمال يقوللي عاوز رز باللبن انا مش عارفه حبك دلوقتى خايفه اطنشه ياخد التليفون و يرميه في الشارع اه و ربنا يعملها سلام دلوقتي حبايبي و انتظروني الحلقه الجايه مع مفاجأت جديده لانج

حاضر جايه اهوه يا دي النيله على عبير و سنينها اه يا غضروفي يا ني يا اما

🌿🌿🌿🌿🌿🌿🌿

 •تابع الفصل التالي "رواية يكفيني منك عقابا" اضغط على اسم الرواية