رواية يكفيني منك عقابا الفصل العاشر 10 - بقلم بقلم عبير سليم

 رواية يكفيني منك عقابا الفصل العاشر 10 - بقلم بقلم عبير سليم 

الحلقه العاشرة من رواية

يكفيني منك عقابا

بقلمي : عبير سليم

😢😢😢😢😢😢😢

ﻗﺎلت له و هي تراوغه :

ﺃﻳﻬﻤﺎ أمتع و أروع؟ 

الحب الأول  .. ﺃﻡ الحب الثاني

ام حب يأتي في آخر الزمان

ﻗال لها مبتسما :

       ﺃﻭﻝ ﻣﺎ ﻓﻲ ﺍﻟﻜﺄﺱ .. ﺩﻫﺸﺔ ﺍﻻﻛﺘﺸﺎﻑ ..

        ﻭ ﺁﺧﺮ ﻣﺎ ﻓﻲ ﺍﻟﻜﺄﺱ .. ﻣﺘﻌﺔ ﺍﻻﺭﺗﺸﺎﻑ

قالت له : و أيهما انا  فيهما؟ 

قال لها : انتي متعة الحياة و نكهتها التي شعرت بها و تلذذت بمذاقها انتي شربه شربتها و لن اظما بعدها ابدا

وحشتيني اوي اوي يا عطر طبعا يا ست هانم ليكي حق تنسي صاحبتك ما هو من لقى احبابه نسى أصحابه يا عروسه 

عطر : هههههههه حبيبتي يا ندى طب و ربنا انتي على بالي على طول بس كنت مستنيه ارجع من الغردقه عشان اعرف اكلمك براحتي

ندى : ماشي يا ستي حعديهالك المرة دي المهم طمنيني عليكي عامله ايه و ايه اخبارك و جوزك عامل معاكي ايه مبسوطه يا عطر

عطر : ههههه يخرب عقلك دايما مجنونه كده اصبري يا بنتي علية شويه عشان اعرف ارد عليكي

اه يا ندى مبسوطه اوي اوي اوي حسه اني طايرة في السما طير و يحي كويس اوي معايا بيعاملني زي ما اكون ملكه مبلحقش اطلب منه حاجه الاقيه جاببهالي

ندى : حبيتيه يا عطر

عطر : حبيته اوي اوي يا ندى حسه انه بقى كل حياتي

ندى : و هو اكيد طبعا طول النهار عمال يقولك بحبك بحبك

عطر : يحي لا خالص ده مقاليش بحبك و لا مرة واحده

ندى : مقالكيش بحبك ازاي يعني امال بيقولك ايه

عطر : بيقول كلام كتير يعني مثلا بيمدح في شكلي فى أخلاقي في صفاتي لكن مقاليش بحبك بس كل تصرفاته بتقول انه بيحبني

ندى : يا واد يا تقيل هو من النوع ده ماشي عالعموم بكرة يتمكن حبك من قلبه و وقتها حيقولك بحبك اكتر ما بينطق اسمك

عطر : انا مش فارقه معايا و الله يا ندى يقولها او ما يقولهاش انا اصلا كننت خايفه و مرعوبه و انتي عارفه كل حاجه و فاهمه الليله من اولها انا كنت بقول يا رب بس يطلع ابن حلال عشان اقدر اعيش و خلاص اكتر من كده محلمتش و لا اتمنيت

ندى :  و ليه ده كله يا عطر و ايه اللي يجبرك على كده ده انتي يتمناكي احسن واحد في الدنيا كلها

ليه ترضي بالقليل و انتي تستحقي الكتير

عطر : عشان عتاب يا ندى عتاب تستاهل مني اني اعمل اي حاجه في الدنيا عشان تعيش سعيده

ندى : ربنا يطمن قلبك عليها يا رب بس قوليلي صحيح عامر ماخدش اي خطوة ناحية عتاب

عطر : لسه يا ندى مش بسرعه كده هو اكيد حيحتاج شوية وقت و انا متاكده انه حيشوف عتاب و حيعرف قيمتها و وقتها حيعشقها مس حيحبها بس

ندى : بقولك ايه صحيح اتكلمتي معاه بالعامي و اللا بتتكلمي معاه بلهجتكم

عطر : لاء طبعا بتكلم معاه صعيدي زي ما هو بيتكلم معايا

مينفعش هو يتكلم معايا بلهجه و انا ارد عليه بلهجه تانيه

بقولك ايه يا ندى معلش انا حسيبك دلوقتى عشان انا و يحي رايحين بيت عمي

ندى : بسرعه كده ده انتوا لسه جايين 

عطر : عتاب وحشتني اوي يا ندى اول مرة ابعد عنها الفتره دي كلها

ندى : ماشي يا قلبي سلميلي عليها

عطر : يوصل ان شاء الله

ترتدي عطر ملابسها و تنزل لتجد الحاج محمد و عائشه جالسين في الأسفل يتحدثان فتلقي عليهم

و تسألهم عن يحي امال يحي فين يا عمي

أنا موجود اهوه يا استاذ عز

عز : موجود فين يا برنس ده انت من يوم ما اتجوزت و انت و لا حس و لا خير شكله كده الجواز نساك كل حاجه دي حتى نيللي لما بسالها عنك بتقوللي انها متعرفش عنك حاجه

يحي : لا و الله الموضوع مش كده بس

يسمع صوتها من خلفه و هي تنادي عليه

استاذ عز معلش و الله

عز : ههههههه ماشي يا يحي على كيفك

يلتفت لها : ايوة يا عطر

عطر : مش يا للا بينا الوجت حيتاخر عايزة الحج اجعد معاهم شويه 

يحي حاضر يا عطر دجايج حطلع البس و انزلك

تقف عطر في الجنينه و تفتكر جنينة عمها و الزرع اللي بتهتم بيه عتاب و صوتها لما بتغني و هي بتروي الزرع

متعرفش ان في عين عليها بتتمنالها الشر

واقفه في شرفة اوضتها : اه يا ناري

تدخل اوضتها و تقعد على السرير و تخبط بايدها على رجلها : لا ما ني مينفعش اسكت و لا اجعد أكده و حتة البت ديه تبجى ليها جيمه في البيت لا و المصيبه كمان لو حبلت ديه اني وجتها حولعلهم في البيت

تخرج من اوضتها و تخبط على اوضة بنتها

تفتح بها زينه و هي بتتاوب : كل ديه خبط عالباب لحد ما تفتحي

زينه : في ايه يا اما كنت نايمه

صفيه : ان شالله تنام عليكي حيطه يا بعيده فين الموكوس جوزك

زينه : مخبراش هو جاللي انه حيتاخر الليلادي شويه

صفيه : حيتاخر فين ان شاء الله ليكون شافله شوفه تانيه

زينه : ليه يا اما بتجولي اكده زكريا بيحبني و عنيه مبتشوفش غيري

 

صفيه : لا يا روح امك دي تشوف و تشوف كمان طول ما نتي خايبه و لا عارفه تجيبيله حتة عيل

زينه : و هو بيدي يا اما

صفيه : خلاص خليكي جاعده اكده زي خيبتها لحد ما البت اللي اسمها عطر دي تخلف ووجتها حتبجى هي ست البيت و الكل حيشيلها على راسه و وجتها حتتشاطي بالرجلين

زينه : والله ديه نصيب يا اما و كل واحد بياخد نصيبه

صفيه: لا و اني محستناش لما المصيبه ديه تنزل فوج راسي

زينه : انتي عايزة ايه يا اما اني مفهماكيش

صفيه : و انتي من ميتى بتفهمي خليكي انتي بس ارجصيله. و دلعيه و في الاخر حيديكي الجفا المحترم و حتلاجيه داخل عليكي و في يده مرته و وجتها محدش حيعيبه و لا يتفتح خاشمه بكلمه ما هو حجه

زبنه : لا يا ما حرام عليكي متجوليش اكده ديه اني انجهر اموت فيها الا زكريا محدش ياخده مني ابدا ديه روحي من جوة

صفيه : ما دام اكده يبجى لزمن تحطي يدك في يد امك و تعمللي اللي حجولك عليه بالحرف الواحد

عشان تفضلي انتي اللي عالحجر و محدش ياخد مكانك ابدا 

زينه : ايوة بس فهميني انتي عايزة ايه

صفيه : اني حفهمك كل حاجه

🌿🌿🌿🌿🌿🌿🌿🌿

بعد مرور بعض الوقت 

تتجه نحو الباب لتفتحه للتفاجا بها أمامها و يا لها من مفاجأة جميله و لما لا و هي أول مره تأتي إليهم منذ زواجها تحتضنها بشده و تقبلها : ألف حمد الله على السلامة يا عطر

عطر : الله يسلمك يا نسمه وحشتيني جوي

نسمه : انتي اللي ليكي وحشه جوي يا حبيبتي ديه البيت نور و الله

تتوجه عطر بالحديث إلى يحي : نسمه يا يحي متربيين سوا و من احنا صغيرين

يحي : أهلا بيكي يا نسمه ازيك عامله ايه 

نسمه :  أهلا بيك يا استاذ يحي تسلم و تعيش يا رب

دول حيفرحوا جوي لما يشوفوكم

عطر : اني مش شايفه حد هما فين

نسمه : الحاج راح يصللي المغرب في الجامع و زمانه على وصول و رحمه و ست حفصه و الست زينب في اوضة عتاب

عطر: في أوضة عتاب ليه فيه حاجه

نسمه : هو انتي متعرفيش ديه اني فاكراكي جايه عشان أكده 

عطر : اعرف ايه الله هو في ايه مالها اختي يا نسمه

تسمع من خلفها صوت عمها : عطر ايه المفاجأة الحلوة ديه

ياخذها في حضنه و يسلم عليها و يسلم على يحي

عطر : اتوحشتك جوي يا عمي

نعمان : أني اللي اتوحشتك أكتر يا عطر

عطر : يحي خليك مع عمي و أني طالعه لعتاب

يحي : اتفضلي يا عتاب

نعمان : منور يا بني طمني عليكم عاملين ايه

في الأعلى

تفتح عطر الباب فجاة : أنا جيت

عتاب و قلبها يرفرف من السعاده : عطر

تجري عليها عطر و تحتضنها بشده : يا حبيبتي يااختي وحشتيني جوي جوي يا عتاب

حفصه : و احنا ملناش نصيب من الحضن ديه احنا كمان

عطر : حبيبتي يا عمتي

تسلم عليها و على زينب و على رحمه ثم تجلس بجوار أختها على الفراش و تتسال : انتي جاعده ليه أكده يا حبيبتي في ايه و نسمه تحت كانت حتجوللي حاجه

عتاب : مفيش يا جلبي أني زينه

حفصه : لا يا عطر متصدجيهاش بتضحك عليكي عتاب تعبت جوي و جالها غيبوبة سكر

تضرب عطر على صدرها : يا لهوي غيبوبة سكر ليه يا عطر أكده

حفصه : عشان اختك مكنتش بتاخد علاجها يا عطر

عطر : ازاي الكلام ديه يا عتاب ديه اني كنت بكلمك كل يوم و بأكد عليكي تاخدي علاجك حرام عليكي يا عتاب ليه تجهريني عليكي اكده

عتاب : خلاص يا عطر متوجعيش جلبي اكتر ما هو واجعني اني كان نفسي أموت و ارتاح و اريح كل اللي حواليه مني و من وجودي

عطر : ألف بعد الشر عنك يا حبيبتي عايزة تموتي ياعتاب عايزة تجهريني عليكي و الله مجدر اعيش من غيرك لحظه واحده

و مين ديه اللي حيرتاح منيكي دي الدنيا كلها بتحبك يا عتاب

زينب : ليه أكده يا عتاب ديه انتي غاليه عندينا جوي و تعبك تعب جلوبنا كلنا عليكي ديه انتي و اختك بناتي اللي ربيتهم و كبرتهم

تنظر إليها عتاب و عينيها مملوءه بالدموع و لا تتحدث

تجلس زينب بجوارها و تحتضنها : حجك علية يا عتاب حجك علية يا بتي أني خابرة إني جيت عليكي و حملتك ذنب مش ذنبك متزعليش مني يا غاليه ديه ربنا العالم غلاوتك من علاوة رحمه مجصدتش و الله يا حبيبتي اني اسفه سامحيني يا بتي

عتاب : لا يا اما  متتأسفيش انتي مجامك عالي عندي جوي كفايه اللي عملتيه معايا اني و عطر

رحمه : روجوا بجى يا جماعه أكده و الله كل حاجه حتبجى زي الفل ان شاء الله و بكرة تروج و تحلى

حفصه : ربنا يروج بالك يا رحومه اللا نتيجتك امتى صحيح

رحمه : و ليه السيرة ديه دلوك عاد يا عمتي اني معاوزاش افتكر

عطر : ليه بس يا حبيبتي ديه انتي شاطرة

رحمه : خايفه جوي يا عطر لو مجيبتش المجموع اللي نفسي فيه معرفش حعمل إيه

حفصه : ان شاء الله ربنا حيكرمك

رحمه : يا رب يا عمتي يا رب

في الأسفل

يتحدث نعمان إلى يحي و فجأة يرن جرس الباب فتذهب نسمه إلى فتحه حيث يدخل الاخوان معا عامر و مصعب يلقيان السلام و يسلم عليه مصعب اما عامر فظل واقفا لدقائق معدوده ينظر إليه و كأنه وحش كاسر ينظر إلى فريسته يود لو ينقض عليه و يفترسه بمخالبه و لما لا و هو من أخذ منه عشق العمر

نعمان : سلم على جوز بت عمك يا عامر

يحي : اهلا يا استاذ عامر

عامر : اهلا بيك يا استاذ يحي

نعمان : ايه أستاذ ديه اللي عمالين تجولوها لبعضكم انتوا بجيتوا اهل و نادوا بعض من غير ألقاب

عامر : معلش يا بوي اني حستئذنكم اطلع اغير خلجاتي عشان جاي تعبان

نعمان : اطلع يا ولدي بس انزل على طول عشان تتعشى معانا عايزين نتلم كلنا

يحي : أني مش حجدر أكون معاكم يا عمي الحاج ممكن نخليها مرة تانيه

نعمان : و لو جلتلك عشان خاطري

يحي : حاضر يا عمي

يصعد عامر إلى غرفته و يغلق الباب و يقف خلفه و يتنفس بصوت عال يشعر بغضب شديد نار مشتعله بقلبه بقدرتها إحراق الأخضر واليابس

 يتخلص من ملابسه و يقذفها أرضا ثم يدخل إلى الحمام و يقف تحت الماء و قد اختلطت دموع عينيه بتلك المياه المهنمرة عليه

بعد مرور بعض الوقت ينزل من أعلى فيتفاجا بها و هي جالسه بجواره و يده ممسكه بيدها و الكل يتحدث و يضحك

يحاول أن يتماسك حتى لا يضعف و يقوى على الموقف

تشعر برهبه و خوف شديد من اقترابه نحوهم تتمنى لو تنشق الأرض و تبلعها كانت تتمنى ألا تراه و الا تلتقي الوجوه حتى ينساها

يقترب منها و يسلم عليها دون أن يمد إليها يده : ازيك يا بت عمي

عطر : تسلم و تعيش يا واد عمي

كانوا جميعهم على السفرة ما عدا عتاب لم تنزل بعد

كانوا يتحدثون و هم يتناولون الطعام اما هو فكانت عيناه تزوغ نحوها من حين لآخر و يبعدها سريعا

لكنها كانت منتبهه له و لنظراته التي جعلتها تتمنى أن يأخذها زوجها و يمشي بها من أمامه سريعا

بعد مرور الوقت

يصعد إلى أعلى ليدخل غرفته و لكنه ينتبه لصوت ام كلثوم الخارج من غرفتها فيجد نفسه يطرق عليها الباب فتعتدل في جلستها ظنا منها أنه عمها أتى للاطمئنان عليها : اتفضل يا عمي

عامر و هو يطل عليها بوجه باسم : لزمن عمك يعني  مينفعش عامر

عتاب بدهشه : عامر

عامر : كيفك يا عتاب النهارده

عتاب : الحمد لله يا عامر

عامر : حاسه انك بجيتي أحسن

عتاب : الحمد لله

عامر : يا رب دايما خدتي علاجك

عتاب : اه اخدته

عامر : بالشفا ان شاء الله اياكي تنسيه تاني تاخديه في مواعيده و اني حتابعك بنفسي كل يوم احنا مش مستغنيين عنك عاد

كانت عتاب في دهشه مما يتفوه به من كلمات لا ترد عليه فقط تكتفي بهز راسها يخرج من غرفتها و هي في حاله من التعجب

يتجه نحو غرفته يتوضأ و يصللي صلاة العشاء و يبكي بشده و يدعو ربه ان يزيل من قلبه حب عطر و يساعده على نسيانها و ان يرشده للخير و الصواب ثم يتلو ما تيسر له من آيات الذكر الحكيم و يستسلم للنوم

🌿🌿🌿🌿🌿🌿🌿

بعد مرور يومين

سيبولي قلبي و ارحلوا

اسأل انا و لا تسألوا

قلبي خلاص من اليوم يا ناس لا حفرحوا و لا زعلوا

يقف وراءها و هو يستمع لصوتها العذب بكلمات لا تخرج من لسانها بل تخرج من قلب عاشق و فؤاد محطم

لم تشعر به خلفها حيث كانت  تسقي الزرع و هي تردد تلك الأغنيه 

و لكنها تلتفت على صوته و هو يحدثها : حلوة جوي الاغنيه ديه يا عتاب

عتاب و هي تتلجلج في الحديث إليه : دي اغنية مياده الحناوي

عامر : بس اكيد مياده الحناوي ديه مبتغنيهاش كيف ما بتغنيها بالحلاوة ديه

عتاب : لا  ديه بتغنيها احسن بكتير ديه صوتها حلو جوي

عامر : بس انتي صوتك احلى

عتاب بفرحه و خجل : تسلم و تعيش يا عامر

عامر : جوليلي الاول صحيح انتي ايه اللي نزلك اكده تتعبي

عتاب : زهجت من جعدة السرير و كمان الزرع وحشني جوي

عامر : و انتي كمان اتوحشتيه جوي اليومين اللي كنتي تعبانه فبهم كنت كل ما اعدي عليه احسه زعلان  و دبلان زي ما يكون بيسأل عنيكي

متستغربيش ما هو زيه زي البني آدم بيحس و بيفرح و بيحزن

عتاب : الزرع ديه أحلى حاجه في الدنيا كلها

عامر : جوليلي صحيح بتاخدي علاجك بانتظام 

عتاب : علاجي اه باخده

عامر : عارفه لو كنتي بتكدبي علية

عتاب  : لا وربنا باخده اني معاوزاش اتعب حد عشاني تاني اكتر من أكده

عامر : سلامتك من التعب يا عتاب ربنا ما يعيده تاني

بس جوليلي  انتي من ميتى و انتي بتغني ديه انتي صوتك و لا المطربات

عتاب : أني طول عمري بحب الغنا و كنت بغني من و اني صغيره في المدرسه انت عارف يا عامر

عامر : عارف ايه جولي

عتاب : لما كان يبجى عندينا حصة العاب كانوا زمايلي  يخلوني اغني و هما يصجفوا لي

عامر : حصة العاب مش المفروض انكم تكونوا كتوا بتلعبوا فيها

عتاب : لا بنلعب ايه دول كانوا يجعدونا و الأبله تجعد تتكلم مع صحباتها المدرسات و احنا نفرح جوي و نجعد بجى نتكلم و نضحك

عامر : و انتي تغني

عتاب : أيوة و لما كانوا يعملوا لنا حفلة  كانوا يخللوني اغني لحد ما فمرة و فجأة تسكت

عامر : في مرة ايه

 ايه ديه انتي بتبكي يا عتاب

عتاب : لا ابدا مفيش اصلي افتكرت حاجه

ياخدها عامر و يقعدها على الكرسي و هو يقعد قصادها : لو حابه تكملي كملي و لو مش عايزة خلاص معاوزكيش تتعبي

عتاب :اصلي افتكرت يوم حفلة عيد الام اللي عملتها المدرسه و اني في تالته اعدادي و جتها الأبلة جالتلي اغني و اني كنت فرحانه جوي و خصوصا انهم جالوا ان في ناس كتيرة من المسئولين حيحضروا الحفله و كان المفروص اغني اغنية فايزة احمد ست الحبايب

بس اول ما جيت اغنيها و بعد ما جلت يا رب يخليكي يا أمي شفت كل البنات جاعدين جمب امهاتهم واني معييش حد و معنديش ام اجولها يا رب يخليكي

مكنش معايا غير عطر الدموع غرجت وشي و الكلام اتحاش و مبجيتش عارفه انطج و لا كلمه

الابله فضلت تهديني و اني عيطت جامد جوي و طلعتلي عطر و خدتني فحضنها و جعدنا نعيط سوا

و مديرة المدرسه حضنتني و خلت المدرسه كلها تصجفلي و زعجت للابله و جالتلها المفروض مكنتش تخليني اغني و اني امي ميته

عامر : الله يرحمها هدى نفسك يا عتاب اني اسف اني فكرتك

عتاب : لا مفيش حاجه اني اصلا منسيتش عشان افتكر

عامر : عتاب هي امي جصرت معاكم في حاجه تخليكي دايما فاكرة امك الله يرحمها و حاسه انك محتاجاها اكده

عتاب : لا و الله يا عامر بالعكس اما زينب طول عمرها حنينه علية اني و عطر و عمرنا ما حسينا انها مش امنا بس احنا اتحرمنا من حضنها بدري جوي طب تصدج و تامن بالله

عامر : لا اله الا الله

عتاب : اني اوجات من كتر معاملتها الحلوة لينا كنت بخاف جوي ان رحمه تضايج و تاخد على خاطرها

عامر : رحمه لا طبعا مستحيل دي بتحبك جوي دي كانت حتموت عليكي و انتي تعبانه

عتاب : عارفه و الله ربنا ينجحها يا رب

فجأة يسمعان صوت زغاريد يأتي من داخل المنزل

عامر: ايه ديه هي الزغاريد ديه عندينا

عتاب : ايوة من جوة دي النهارده  نتيجة رحمه صحيح 

يدخل عامر و عتاب فيجدان نسمه و حفصه وزاهيه يطلقون الزغاريد العاليه

و رحمه في حضن امها تقبلها بشده و رحمه بتبكي من الفرحه : الف مبروك يا حبيبتي الحمد لله ان ربنا مضيعش تعبك يا ضنايا 

عامر : طمنيني عملتي ايه يا رحمه

رحمه : جبت تسعه و تسعين في الميه

عتاب : بسم الله ماشاء الله الف الف مبروك يا رحومه 

رحمه : الله يبارك فيكي يا عتاب

عامر: واه طب و لزمتها ايه الدموع ديه عاد 

زينب : ديه دموع الفرح يا عامر

عامر : و الله انتوا ناس غريبه تفرحوا تعيطوا تحزنوا تعيطوا

المهم دلوك ناويه على ايه يا عفريته

رحمه : طب ان شاء الله يا اخويا 

عتاب : ديه انتي حبتجي احلى و اشطر دكتورة في الدنيا كلها

رحمه : يا حبيبتي يا عتاب تسلميلي يا حبيبتي يا رب و عجبال ما ربنا يفرح جلبك و يرزجك بابن الحلال اللي يستاهلك و يستاهل الجلب الابيض و الضحكه الحلوة ديه و ينام و يجوم على صوت البلابل ديه

تنظر عتاب في الارض و لا ترد عليها و عين عامر عليها و كأنما يراها أمامه لأول مرة

ثم يوجه كلامه لرحمه :  جوليلي بجى يا ست البنات عايزة هديه ايه

رحمه :  هديه ايه معرفش الصراحه مجاش في بالي حاجه أكده

عامر : طبعا هديه و أحلى هديه كمان 

رحمه : فكروا معايه يا جماعه اخللي عامر يجيبلي هديه ايه

حفصه : هاتلها حاجه دهب

رحمه : دهب لا اني عندي كتير

زينب : جيبلها تلفون جديد

رحمه : لايا اما اني معايا تلفوني و لساته جديد

عتاب : طب ممكن اجول رأيي

رحمه : طبعا يا عتاب و اللي حتجوليه حوافج عليه على طول

عامر : و اني كمان حوافج عاللي عتاب حتجول عليه

تبتسم عتاب و تفرح : اني بجول يعني ما دمتي حتدخلي كلية الطب و حتبجي دكتورة محينفعش تروحي الجامعه غير بعربيه تليج بمجامك

رحمه : عربيه اني يبجى عندي عربيه

عتاب : و ميبجاش عندك عربيه ليه هو انتي شويه ديه انتي الدكتورة رحمه نعمان العشري

رحمه : و اجعد و اسوج اكده يا لهوي يا لهوي ديه حاجه مجاتش على بالي خالص

عتاب : ايه رايك بجى

رحمه : رأيي و ديه فيها راي طبعا موافجه طبعا بس

عامر : بس ايه

رحمه : بس اني مبعرفش اسوج

عامر : و لا يهمك يا حبيبتي ديه حاجه بسيطه اني حعلمك السواجه

رحمه و هي تحتضنه بشده : يا حبيبي يا اخوي ربنا يخليك لية بس اكده مش حيبجى كتير عليك

عامر : مفيش حاجه تكتر عليكي يا جمر هو احنا عندينا كام رحمه و بعدين اني جلت اللي حتجول عليه عتاب اني حوافج بيه على طول

رحمه و هي بتغمز لعتاب : اه جلتلي بجى خلاص يبجى اي حاجه حعوزها حجول لعتاب على طول ما دامت هي بجت كلمة السر

عامر : طبعا و احنا عندينا كام عتاب و بالمناسبه ديه بجى احنا كلنا بنطالب عتاب انها تغني لنا اغنيه بالمناسبة الحلوة ديه 

عتاب : اغني ايه لاء

حفصه : اه  غني يا عتاب

رحمه : عشان خاطري يا عتاب عايزاكي تغنيلي اغنية الناجح يرفع ايده

و امام اصرارهم جميعا

عتاب : ماشي حغني بس بشرط كلكم تغنوا معايا

بدات عتاب تغني وحياة جلبي و افراحه و هناه في مساه و صباحه ملجيش فرحان في الدنيا زي الفرحان بنجاحه

كلهم كانوا بيصقفوا و يغنوا معاها البيت كله كان فرحان عشان نجاح رحمه و قضوا كلهم ليله جميله و سكرة بنت زاهيه جت هي كمان و قضت معاهم الليله و عامر اتصل على مطعم  جابلهم اكل و كلهم اتلموا مع بعض حتى نسمه و نورة و زاهيه و سكرة و حسني كلهم قعدوا معاهم 

و رحمه طول الوقت واخدينها في حضنهم ابوها و امها و أخواتها كلهم فخورين بيها

بعد مرور الوقت

خليكم بايتين معانا الليله الوجت اتأخر

زاهيه : لا مينفعش لزمن نروح

نعمان : حسني عايزك توصل الست زاهيه و سكرة البيت عنديهم

حسني : حاضر ياعمي الحاج

زاهيه : ملوش لزوم و الله يا حاج احنا حنروح لحالنا

نعمان : تروحوا لحالكم كيف يعني الوجت اتاخر و انتي معاكي عروسه ربنا يحميها و يبعد عنيها ولاد الحرام

تخرج زاهيه و بنتها سكرة مع حسني و يوصلهم بالعربيه لحد البيت

ينزلوا و هو واقف مش عايز يمشي لحد ما يطمن انهم دخلوا و قفلوا الباب عليهم بس هما اتفاجئوا بخطيب سكرة قاعد عالقهوة اللي ادام البيت فييجي ناحيتهم

ما لسه بدري يا حماتي

زاهيه : رجب

رجب : ايوة رجب ينفع بردك ترجعوا البيت في نصاص الليالي اكده الناس تجول عليكم ايه دلوك

زاهيه : بكرة ان شاء الله حبجى افهمك

رجب : و اني لسه حستنى لبكرة لا اني محمشيش من اهنيه جبل ما افهم هي ايه الحكايه بالظبط و كمان ساحبه وراكي سكرة يعني مش كفايه حماتي بتخدم في البيوت كمان خطيبتي تخدم هي كمان

زاهيه : الشغل مش عيب و لا حرام يا رجب ما دام بنجيب لجمتنا بالحلال

رجب : اه بس اللي واعي عليه دلوك بيجول ان الموضوع مش خدمه و بس و انه اكتر من الخدمه و الا ايه اللي يخليكم ترجعوا في نصاص الليالي اكده و جايين مع واحد بعربيته لحد اهنيه كمان و لا عاملين اعتبار لحد لا اني محسكتش واصل

زاهيه : انت ايه اللي بتجوله ديه ما تعجل كلامك

رجب : اني بجول الحج يا حماتي

زاهيه : جاك كسر حجك اخرس جطع لسانك اني و بتي اشرف من الشرف و الا ما كنتش اتشحتفت لحد ما وافجت عليك

هنا ينزل حسني من العربيه عشان يشوف ايه اللي بيحصل : خير يا خالتي في حاجه

رجب : يا مرحب بالتلفزيون و انت ايه اللي موجفك لحد دلوك ايه مستني تطمن عالحبايب و يا ترى عينك على مين فيهم على حماتي و بصراحه تستاهل ما هي جمر و اللا على خطيبة الهنا جول جول ما تتكسفش

حسني : اجول ايه انت مين اصلا و ايه الكلام الفارغ ديه كنك شارب حاجه موعيش للي بتجوله

رجب : لا ديه اني واعي جوي و مش رجب اللي ينضرب على جفاه من حرمتين ملهمش حاكم

حسني : اما انت واحد مش محترم صحيح و انت اللي لزمن تنضرب و تتعلم الأدب

زاهيه : كفايه الله يخليكم معوزاش فضايح

حسني : ادخلي دارك و اجفلي بابك عليكم يا ست زاهيه و سيبينا بجى مع بعضنا

رجب : انت عامل نفسك راجل إياك طب اني حوريك

يمسك فيه و طبعا حسني ميسكتش و يبدءوا يضربوا بعض لحد ما الناس كلها تتلم و كل واحد بكلمه و يفضل رجب يشتم و يقول كلام ميصحش و الخناقه تنفض باعجوبه و يتصل حسني على نعمان عشان يبلغه باللي حصل و نعمان ميسكتش و يجيلهم هو و مصعب و عامر و يشوفوا حسني اللي اتبهدل. وشه جايب دم يمسكوا رجب و يينضرب علقه محترمه

اني اسفه يا حاج نعمان حجكم علية

نعمان : متجوليش أكده يا ست زاهيه بس اني مخبرش انتي ازاي تخطبي بتك لواحد زي ديه

زاهيه : و الله كان كويس و بيحب سكرة معرفش ليه عمل اكده

سكرة : لا يا اما هو من يوم ما عرف انك بتخدمي في دار الحاج و هو متغير و كل شويه بيلجح بالكلام

زاهيه : واه و انتي مجولتليش الكلام ديه جبل سابج ليه يا سكرة

سكرة : خفت تزعلى يا اما و تاخدي على خاطرك

بس اني و الله مكنتش بسكوتله حجك علية يا اما ديه انتي جذمتك على راسي و انتي تجعدي ترتاحي و اني اللي اشتغل و اللي اسمه رجب ديه اني خلاص معوزاهوش و محرجعلوش تاني

نعمان : انتي لا حترجعيله تاني و لا حتجعدوا اهنيه من أساسه 

زاهيه : امال حنروح فين يا حاج

نعمان : حتاجوا عندينا البيت و تجعدوا فيه كيف ما نسمه و نورة جاعدين

زاهيه : لا يا حاج كفايه لحد أكده اني خلاص حشوفلي شغلانه تانيه معوزاش الناس يجولوا ان كلامه على حج

و على رأي اللي جالوا الباب اللي يجيلك منه الريح سدوه و استريح

عامر : اللي جال اكده واحد جبان خواف مجدرش على المواجهه جام هرب

الكلام الصوح هو ان الباب اللي يجيلك منه الريح تجف جدامه و تصده بكل جوتك

زاهيه : اني و بتي غلابه و ملناش حد يا بني

مصعب : واه و احنا رحنا فين يا خالتي عيب لما تجولي اكده

سكرة : بس احنا خدامين عنديكم مش أكتر يا سي مصعب

مصعب : لا يا سكرة احنا عمرنا ما اعتبرنا حد بيشتغل عندينا غريب عننا كلنا اهل و احنا اكلين عيش و ملح مع بعض

نعمان : يا للا جومي يا ست زاهيه يا للا يا سكرة لموا كل حاجه ليكم اهنيه و اجفلوا البيت ديه و حتاجوا معانا

و البيت ديه محتعتبهوش تاني و اطمنوا محدش حيجدر يجيب سيرتكم بحرف اللي يستجري و يتكلم عنيكم كلمه بلسانه اني حجطعهوله

عنديكم كلام تاني عاوزين تجولوه

زاهيه : مفيش كلام بعد كلامك يا حاج ربنا يكرمك و يزودك من نعيمه يا رب 

🌿🌿🌿🌿🌿🌿

تمر الأيام و الكل عايش و راضي عطر مبسوطه مع يحي و فرحانه باختيار القدر ليها و عامر علاقته كل يوم بتتحسن اكتر من اليوم اللي قبله بعتاب وبقت موضع اهتمام من كل العيله لكن هو قلبه لسه مع عطر و دايما فاكرها و احيانا كتير بيقعد في الجنينه يفكر فيها و مبيقدرش يستحمل ان حد يتكلم عنها او يجيب سيرتها ادامه و هي كانت حريصه انها مترحش تطمن على اختها غير و هو في الشغل و تمشي قبل رجوعه و كانت بتدعي دايما ان ربنا يهديه لحب عتاب و يشوف حبها ليه و يحبها زي ما بتحبه

عتاب كانت مبسوطه من معاملة عامر ليها لكنها فاهمه كويس انه مجرد احساس بالذنب تجاهها او شفقه على حالها و ده كان بيخليها مش عاوزه تدي لنفسها امل في حاجه صعب انها تحصل

نورتنا يا حاج سليمان

سليمان : البيت منور بصحابه يا حاج نعمان

بص بجى يا حاج بجي خير في سلامه و سلامه في خير دلوك اني جايلك في موضوع و عشمي انك متردنيش و اني مكسور الخاطر

نعمان : كيف تجول اكده يا حاج سليمان ديه انت كبير البلد و كلمتك تمشي عالكبير جبل الصغير

سليمان : و ديه عشمي فيك بردك بجي من غير لف و لا دوران انت خابر اني ولدي الكبير ربنا فرحني بيه و شفت ولاده و دلوك جه الدور على ولدي الصغير البشمهندس كرم

 و اني استخرت ربنا سبحانه و تعالى و قررت اني اتجدم ليك و اناسبك لاني محالجيش نسب أحسن من نسبك

 طبعا اني خابر ان واحده من بنات بدر الله يرحمه اتجوزت

 و خابر ان لسه ليها اخت متجوزتش و اني جاي طالب يدها لولدي كرم هاه جلت ايه يا حاج نعمان

نعمان : و الله يا حاج سليمان اني محلاجيش نسب احسن من نسبك و ولادك البلد كلها تحلف باخلاجهم و تربيتهم بس دبه مش حيكون رأيي لوحدي لزمن اشور عليهم اهنيه و اخد رأيها

سليمان : و اني كنت عارف زين انك حتجول اكده لاني خابر ان نعمان العشري مفيش حد زيه في البلد كلها و ديه اللي مخليني رايد اناسبك

نعمان : خلاص يا حاج اديني فرصه يومين و ارد عليك

سليمان : و اني حستنى ردك يا حاج و الشبكه و المهر اللي انتوا عايزينها و كل اللي تطلبه عروستنا حيكون تحت امرها و حعملها فرح تلت ليالي تحلف بيه البلد كلها

نعمان : اللي عايزه ربنا هو اللي حيكون يا حاج سليمان و ربنا يجدر اللي فيه الخير

♥️♥️♥️♥️♥️♥️♥️♥️♥️♥️

 •تابع الفصل التالي "رواية يكفيني منك عقابا" اضغط على اسم الرواية