رواية محل ثقة الفصل الاول 1 - بقلم نشوة عادل

الصفحة الرئيسية

  رواية محل ثقة كاملة بقلم نشوة عادل عبر مدونة دليل الروايات 

رواية محل ثقة الفصل الاول 1

الله يخربيت الشغل ع الاسترونج اندبندد انا كان مالى ومال ده كله ما كنت سمعت كلام الحاج وقعدت فى البيت معززة مكرمة واخدت مصاريفى منه انما لا ازاى لازم اشتغل واحقق اسم وكارير والاخر اخد فلوس الدروس اتعالج بيها من الضغط اللى العيال جابوه ليا
كنت نازلة من السيشن بتاع ولد وبنت توام وكعادة كل يوم بمشى اكلم نفسى من الصداع اللى بيعملوه ليا كنت خارجة من الاسانسير ومأخدتش بالى من اللى قدامى فلبست فيه
+ مش تفتحى ي انسة
-هو ايه اصله ده ع فكرة بقا حضرتك اللى غلطان انت اللى واقف ورا الباب هشوفك ازاى انا؟!
+ ده بجد ما انتى لو باصة ادامك كنتى شوفتينى ولا الطول بالعرض ده مش شيفاه
– والله حضرتك انا فعلا مش شايفاك وبعدين كويس ان لسه عندى شوية نظر انا العيال جابولى صداع مزمن وبعدين انا واقفة ببرر ليك ليه ها ها انت تعرفنى عشان تقف تتساير معايا
+ لا انتى مش طبيعية وربنا
– وسع عدينى وانت شبه الحيطة كده ما شاء الله
نزلت مشيت وانا متابعها بابتسامة هى مجنونة بس جميلة ودمها خفيف ركبت الاسانسير ووصلت الشقة
_ مراد حبيبى حمدالله ع سلامتك
مراد: الله يسلمك يا قلبى امال الولاد فين؟!
_ لسه مخلصين السيشن دلوقتى ودخلوا يعملوا الواجب بتاعهم تحب احضرلك الغدا؟!
مراد: لا يا قلبى انا شبعان الحمدلله بس اسكتى قابلتنى واحدة تحت باين عليها مجنونة
_ ليه ايه اللى حصل؟!
حكى ليها مراد ع البنت اللى قابلها ع الاسانسير وكمل بضحك: بس بالامانة جميلة وروحها حلوة
_كانت لابسة دريس اسود وطرحة زيتى وعيونها رمادى؟!
مراد: انتى تعرفيها؟!
_دى ميس نيرمين مدرسة كيان وكنان
مراد: المجنونة دى مدرسة! تيجى ازاى بس يا ملك دى عيلة دى تقريبا فى اولى جامعه
ملك بضحك: هى شكلها صغير فعلا بس هى عمرها ٢٥ سنة وع فكرة شاطرة جدا جدا والولاد بيحبوها اوى وبيفهموا منها كويس وحبوا الرياضيات بسببها
مراد: كويس
ملك : مالك يا حبيبى حاسة ان فيك حاجة؟!
مراد: اتخانقت مع نيرة
ملك: يووووووه تانى هو كل يوم خناق كده والمرة دى ع ايه ان شاء الله ؟!
مراد: ع لبسها يا ملك مش عاجبنى ابدا حوار انها تسيب شعرها وتلبس ضيق ومكشوف انا راجل دمى صعيدى ومهما اتمدنت فانا اصلى صعيدى ودمى حامى
ملك: بس انت من اول ما عرفتها وهى كده ويا اما قولتلك ونصحتك انها مش مناسبة ليك لكن انت مسمعتش انت اخدتها عند مش اكتر بس يا ترى بقا بتعند ع مين علينا ولا ع نفسك!
مراد: لو سمحتى ي ملك غيرى الموضوع احسن انا بحب نيرة لا واخدها عند ولا مش عند
ملك: طالما بتحبها اتقبلها زى ما هى ومتجيش تشتكى
مراد: انتى صح انا غلطان انى بحكيلك انا داخل انام
مراد اخو ملك الاصغر وكيل نيابة اصلهم من المنيا وعاشوا فى القاهرة من فترة طويلة ملك منفصلة عن جوزها وعندها ولد وبنت توأم ومراد من بعد وفاة والده ووالدته عاش معاها فى شقتها
عند نيرمين اللى وصلت ع البيت وهى مرهقة من الشغل دخلت لقت مامتها مستنياها
زينب: حمدالله ع سلامتك يا بنوتى
نيرمين: الله يسلمك يا ست الكل ها قولى عاوزة ايه بسرعة بقا كده
زينب بضحك: جرى ايه يا بت الحق عليا انى بدلعك؟!
نيرمين: لا بس انا مش متعودة ع الدلع ده كده من الباب للطق فأكيد هناك سبب قولى يا حبيبتى؟!
زينب: بصراحة كده متقدملك عريس
نيرمين: وانا مش موافقة يا ماما طرقيه بقا بمعرفتك
زينب: يا بنتى هو عشان تجربة خطوبة فاشلة عدى عليها اكتر من ٣ سنين هتوقفى حياتك
نيرمين: انتى شايفة انها كانت مجرد خطوبة عادية ده اول حب بحياتى واللى ع ايده فهمت معنى كلمة حب وامنت ليه ووثقت فيه وفى الاخر خانى وكسرنى يا ماما
زينب: يبقى مينفعش نوقف حياتنا عليه لانه ميستاهلش وصوابعك مش زى بعضها
نيرمين: تمام حضرتك عندك حق بس انا مش جاهزة حاليا لاى علاقة
زينب: طيب عشان خاطرى انا ابوكى عطى ميعاد للشاب واهله بكرة الساعة ٧ متصغريش ابوكى وقابليه ولو مرتاحتيش خلاص محدش هيغصبك ع حاجة اتفقنا
نيرمين بقلة حيلة: حاضر يا ماما هقابله وووووووووو………..



google-playkhamsatmostaqltradent