رواية اسمي حياة الفصل الخامس و الثلاثون 35 - بقلم الاء اسماعيل
حسام بلجلجة – ح حامل !! ثم قال بصوت عالي : حااااامل !!
الناس اللي في الكافيتيريا كلهم التفتوا على صوته و هو قام و حضنني بكل قوته : بتقووولي حااامل !!
همست في وذانه بضحك: بس كفاية كدة اوعة يا مجنون الناس بتبص علينا ! ماهي الكافيتيريا دي بقت كفتيريا الفضايح خلاص 😂
قعدني و هو ماسك لي ايديا بحب : بالعكس …قلتلك ده بقى مكاني المفضل :مكان الاخبار السعيدة و المناسبات الحلوة ..
قرب مني و همس : بس مش لو كنتي قلتيلي الخبر ده في اوضتنا احسن !! ساعتها كان هيبقى ليا تصرف تاني معاكي
و بص لشفايفي برغبة ..
– معلش يا قلبي مكنتش قادرة استنى لحد ما ارجع من الرحلة الجاية و كمان انت الحق عليك سبتني نايمة و ما صحتنيش من امبارح..
– كنتي تعبانة اوي ماهانش عليا اصحيكي مع اني مشتاااق لك موووت ….
– ربنا يخليك ليا حبيبي و ما يحرمنيش منك أبدا
حسام بخوف – بس تعالي هنا !! هتقدري تشتغلي وتسافري ازاي و انتي كدة ! انا من رأيي تطلبي اجازة ..
– لا ماهو انا هأروح من هنا على عيادة الدكتورة نورا اطلع تقرير الحمل و على الأساس ده الشركة مش هتبرمج لي الرحلات الطويلة و اللي ارتفاعاتها عالية عشان خطر الاجهاض و كدة .. ما تقلقش يا روحي ساعات الخدمة بتبقى أقل للحامل …و بعد الشهر الثالث هيبقى عندي شغل في الخدمات الارضية مش هأطلع رحلات خالص و اول ما ادخل في الشهر السابع هتديني الشركة أجازة .
– طب يا روحي اذا كان كدة معلش بس انا هاروح معاكي عند الدكتورة بنفسي و اتأكد ان الحمل مستقر و انك هتقدري تسافري من غير خطر ..
– تروح فين مش كان عندك شغل متأخر ؟
– يتحر’ق الشغل باللي فيه معنديش أهم منك ..هأبقى أتصل على زميلي يبلغ المدير .
حياة بحب – ماشي يا قلبي .
-طب مش يالا بينا ؟
– يالا فين …انا طلبت كيكة بكريمة الفرولة مخصوص لاني من امبارح نفسي فيها
– بس كدة !! من عينيا ..هناكل الكيكة يا قلبي.. 🥰
رحنا للدكتورة و منها للمطار و ضبطت جدول رحلاتي حسب وضعي
اول ما بلغت بسملة اقترحت تطلع بدالي الرحلة مع أنه يوم اجازتها و اصرت اني ارجع احتفل بالمناسبة دي مع جوزي .
طبعا مكانش ممكن اروح البيت قبل ما افرح ماما إلهام بالخبر
– حياة !! ايه المفاجأة الحلوة دي !! وحشتيني اوووي يا روحي…. عاملة ايه طمنيني عنك و حسام اخباره ايه اومال ماجاش معاكي ليه ؟؟
– انا بخير يا ماما .. حسام راح يضبط شغل مع واحد زميله وكمان شوية و هيحصلني ….المهم انتي عاملة ايه…و وصلتي فين مع ترتيبات الفرح ؟
– كله تمام يا قلبي انا مجهزة كل حاجة ..مش فاضل غير الكروت بس و شوية تفاصيل صغيرة سند و حنان هيهتموا بيهم ..
ها قوليلي هي العقربة …قصدي حماتك عاملة معاكي ايه
– الحمد لله.. .. زي ما هي مفيش تغيير
– بس شكلك تعبانة يا قلبي مالك وشك أصفر كدة ؟؟
حياة بحب : باركيلي يا ماما …
حطيت ايدي على بطني : انا حامل ☺️
– حااااامل !!! ألف مبرووووك يا قلبي !!!!
زغرطت كثير و بعدين حضنتني و عيطنا كثير
– يا رب بس حماتك تتغير معاملتها ليكي بعد الخبر ده
– يا رب يا ماما …
– اعملي حسابك مش هتعملي حاجة في البيت .. مش كفاية شغلك متعب خصوصا مع السفر !
– ما تخافيش عليا برنامج الرحلات هيتغير
– ااه و كلمي حسام عشان عايزاكي تجي عندنا اسبوع قبل الفرح …هتشرفي على آخر اللمسات …معنديش ثقة ف حد غيرك
– حاضر يا ماما عيوني ليكي و لسند و بعدين احنا عندنا كام مجنونة اسمها حنان !! ☺️
الهام بضحك : وحدة بس و حياتك اجن من الجنان نفسه
تخيلي قال ايه ؟ بعد ما يخلص الفرح عايزة تخلد اللحظة و تروح هي و هو يعملوا جولة بالموتوسيكل بفستان الفرح !!قلتلها انا مش مستغنية عن ابني روحي لوحدك 😂😂😂
حياة بضحك- لا جنانها سيبيه عليا انا …هاعدلهالك ما تخافيش دواها عندي أنا …هأبقى أكلمها 😂
– دوا ايه ده
– لا ده سر بيننا بقى😁..ألا قوليلي يا ماما هو انتي هتعزمي عمتي نفيسة كمان ؟
– مش عارفة … بصراحة بفكر ابعثلها الدعوة و لو اني متأكدة
انها مش هتجي
حياة بمزاح : و ما تجيش ليه دي ما هتصدق …ما شفتيش جابتهم كلهم ازاي في فرحي و هات يا شقط في ولاد الاكابر ! 🙄😂
– اصلك ما سمعتيش اللي حصل !
حياة بقلق : خير ؟؟؟
– فاكرة الولد اللي حكيتلك عليه بعد فرحك ؟
– ولد مين مش واخذة بالي !؟
– الشاب اللي قلتلك كان بينه و بين إيمان نظرات استظراف و انا حذرتها منه ده
– اااه فاكرة و قلتيلي انك حذرتيها من واحد بتاع نسوان بس هي فكرتك غيرانة منهم و مش عايزاهم يئبوا على وش الدنيا زينا …
– ايوة هو ده …عمر النحاس
-و ده ماله ؟؟
– يا ستي اللي كنت خايفة منه حصل ..قال الواد اتعرف بيها و بعدين بقى فيه إعجاب و فسح و و خروجات قال ايه عايز يتجوزها بس محتاج وقت عشان يضبط اوراقه لأنه مسافر الكويت
– هاا …و حصل ايه ؟؟
– حصل اللي كنت خايفة منه يا ستي …ضحك عليها و اتجوزها عرفي قضى معاها شهر و لما قالت له انها حامل و لازم يعلن جوازهم قالها روحي العبي بعيد و الورقتين اللي معايا انا قطعتهم من اول يوم بيننا …و من يومها بطل يكلمها و غير رقمه .
– يا نهار اسود!! حااااامل ؟؟
– ايوة حامل …بيقولوا حاولت تسقطه بس فيه خطر على حياتها عشان كدة ابوها بعثها على بلدهم لحد ما تولد و بعدها يجوزها لأي حد هناك عشان محدش يعرف هنا .
-يا ساااتر يا رب !! طب انتي عرفتي منين ؟
– من مامته …هي اللي حكتلي بنفسها و قالت لي انهم حاولوا يضغطوا عليه هي و ابوه عشان يصلح غلطته و يعترف بإبنه بس رفض … قال انها واحدة رخيصة مستعدة تعمل اي حاجة عشان الفلوس و ايه اللي يضمنله أنه ابنه هو !!
– ربنا يستر علينا …زعلت عليها و الله
– اهي من يومها و عمتك عاملة المستحيل عشان محدش من العيلة يسمع ..ولا بتطلع و لا بتدخل لاي مكان .
– سبحان الله !! شايفة حكمة ربنا و عدله يا ماما ؟ اتدخلت و منعت ابوي يتجوزك و اهي الحكاية اتكررت مع بنتها ..فعلا ربنا يمهل و لا يهمل ان شاء الله ربنا يسترها و تلاقي حد يتجوزها
– يتجوز مين ؟!
التفتت لحسام و غمزت لي ماما عشان أسكت
– أهلا يا حسام …أهلا يا ابني
حضنته ماما بحب : ألف مبروك يا حبيبي …ربنا يتمم لكم على خير …تستاهلو العوض الحلو يا ابني انتو اتعذبتو كفاية .
حسام بحب – عقبااال ما سند يملى عليكي البيت يا ماما .
– يا رب يا ابني
حياة – طب احنا هنمشي دلوقت يا ماما
– تمشي فين ده كلام برضو ؟؟ انتو هتقعدو تتغدو معانا ده حتى سند هيفرح اوي لما يشوفك .. و اهو بالمرة يباركلكم
– معلش يا ماما هأبقى أعدي وقت تاني اصلا برنامج رحلاتي إتغير زي ما قلتلك يعني هتشوفوني كثير بعد كدة
قربت منها و همست بخجل : و بعدين احنا لسة ما لحقناش نحتفل بالخبر انا و جوزي جيت لك على طول
– إلهام بإستسلام : اللي تشوفيه يا بنتي
بصت لحسام ؛ خلي بالك منها يا ابني
– معقولة توصيني على روحي يا ماما ؟ و لو خايفة من ماما ف أنا متأكد انها هتتغير معاها خصوصا بعد الخبر ده .
– ان شاء الله يا ابني يسمع منك ربنا .
دخل حسام الفيلا الاول و انا كان معاي تلفون من نيرة وقفت معاها برة في الجنينة و بالمرة بلغتها بالخبر أصل حماتي حشرية بتتنصت على كل تلفوناتي
– انت جيت يا حسام ؟
– ايوة يا ماما ..
– طب يا ريت تروح المطار تجيب نوران طيارتها هتوصل كمان ساعة .
حسام بتوتر : معلش يا ماما انا مش هأقدر أروح بس هأكلم بابا يروح يستقبلها او يبعث لها سواق .
– سواق ليه و اخوها موجود ؟ عندك ايه أهم منها ؟
دخلت من وراه بأبتسم بحب :
– مساء الخير يا طنط ☺️
شهيرة بدهشة – انتي هنا !!! مش كان عندك رحلة ؟؟
حياة بإبتسامة : عوضتني زميلة ليا في الشغل و قررت اقضي اليوم مع جوزي ☺️
بصت شهيرة لحسام اللي كان ساكت : ااااه قل لي كدة !!! عشان كدة مش عايز تروح تجيب اختك هاا !!
حياة بإحراج: معلش يا حسام روح جيب اختك انا طالعة أنام لحد ما ترجع
– لا يا ماما انا تعبان و مراتي كمان تعبانة و احنا الإثنين محتاجين نرتاح هنتكلم بعدين …انا هأتصل على بابا مش حكاية كبيرة يعني !
شهيرة بلوية بوز- لا و على ايه تتعب نفسك 😏…انت ارتاح و انا اهأبلغه …انا بس شايلة هم البنت لتزعل 😥
حياة بثقة: لا ما تخافيش… نوران هتفرح لما تعرف السبب
شهيرة : سبب ايه ؟؟؟
حسام : فيه عندنا خبر يا ماما …أكيد هيفرحك
شهيرة بشك : خبر ايه ؟؟
حسام بحب : حياة حااامل يا ماما ☺️
بصت شهيرة لحياة بغموض و قالت بنبرة غريبة : حامل ؟؟
حياة بحب : ايوة يا طنط ☺️🥰..
شهيرة : مبروووك يا ابني …ربنا يتمم بخير
حسام : ربنا يبارك لنا في عمرك يا ماما ..يالا يا حياة انا طالع
– روح انا جاية وراك
طلع حسام و قربت منها حياة بهدوء و ابتسامة مستفزة
– و انا مفيش مبروك ليا ولا أنا بنت البطة السودا ؟؟
شهيرة : لا طبعا …مبروك 🙄
حياة بمرح- على فكرة انا رجعت من الشغل لان زميلتي اصرت انها تأخذ رحلتي عشان أعرف أحتفل انا و جوزي سوا بالمناسبة السعيدة دي .
قربت منها اكثر و همست لها
– اصلي قررت اعمل بنصيحتك و الزق له على طول و مش هسيبه خالص احسن ما يزهق و يبص لبرة …
و طلعت و سابتها بتجز على سنانها
– دي من غير حمل كأنها عاملاله غسيل دماغ ! و دلوقت حااااامل ؟؟ يعني بعد كدة مش هيتحرك حركة أو يتنفس نفس الا برضاها …لا يا شهيرة .. ابنك كدة بيضيع من بين ايديكي و انتي واقفة تتفرجي عليه !
- يتبع الفصل التالي اضغط على ( رواية اسمي حياة ) اسم الرواية