رواية بنت الغير شرعية كاملة بقلم ياسمين عبر مدونة دليل الروايات
رواية بنت الغير شرعية الفصل التاسع و الثلاثون 39
جبنا 4 ايام نفس الروتين بصح ماما حالها ميعجبش تنفخت كامل في جسمها والطبيب يقول متتقلقوش ،اليوم غير رحنا نزوروها جات الفرملية ليوسف قاتلو مسيو البروفيسور يحوس عليك نضت قتلو نجي معاك قالي اقعدي وكي نجي نقولك قتلو لالا حابة نسمع منو قالي علاه راسك يابس قتلو مهمنيش جاية معاك جاية معاك قالي هيا برك دخلنا عندو بقى غير يشوف مع يوسف ويشوف معايا قالو غير اهدر يماها ومن حقها تعرف قالو يا سي يوسف واش نقولك والله درت قاع واش نقدر بصح مفادش الحاجة لازمها عملية متقدرش تستنى حتى نلقاوها متبرع قتلو انا نتبرعلها قالي ماتقدريش مراكمش متطابقين قالو يوسف صحا نتاع واش العملية قالو راح نديرولها بروتاز في رجلها الثاني هكا ترجع تدياليزي حتى بين لا لقيتو متبرع راك تشوف كيفاه تنفخت كي مهيش تدياليزي قالو يوسف ها صحا ديرها واش تستنى قالو العملية مكلفة شوية حبيت حتى نسقيك
قاتلو تعرفني منهتمش للدراهم اتكل على ربي قتلو استنى شحال تستقام قالي 40 مليون النفس نقطعت فيا شفت مع يوسف باغية نبكي قالو ديرها قالو خلاص غدوة نديرلها بصح مذابيا متخبروش الحاجة باه متطلعلهاش لاتونسيو ولا السكر خرجنا من عندو الوقاف مقدرتش نوقف شدني يوسف خرجني الجاردة لي تما قعدنا قالي بسمة واش بيك بداو دموعي يطيحو كي الشتا قالي علاه هذا قاع بقيت غير ساكتة ونبكي قالي متخافيش ضوك دير العملية وتريح وترجع خير من لي كانت قتلو كون مكاينش نتا واش ندير قالي اسمعي مليح هذا رزقها ربي بعثهولها عن طريقي متخمي في والو وتهدني باه ندخلو عندها راكي سمعتي مالازمش تفيق علينا صحا قتلو ان شاء الله مسحت عينيا ودخلنا عندها بقينا نحكو نحاولو منبينوش حتى قالي بسمة هيا نروحو قتلو تعيش حابة نبات معاها قالي بسمة والله لا بزاف قتلو تعيش والله مراه مهنيني خاطري نروح قالي هيا نروحو نتعشاو ونرجعو خرجنا تعشينا ورجعنا عندهم بقيت انا وخالتي وماما وجمعين ويوسف زعما
مجمع معانا حتى لقيناه راقد على الكرسي قاتلي ماما يا طفلة شوفي هذا يسمحو فيه بقيت غير نشوف معاه وساكتة قاتلي علابالي كي زوجتك بيه سيف مكيش متقبلاتو بصح والله على جال صلاحك راني كبر منك نعرف خير منك واحد كيما يوسف شدي فيه بيديك وسنانك وقليل صحا بنتي ارجعي معاه ونساي لي فات قتلها ان شاء الله ، عنقتها ورقدت عندها حتى للصباح فطنت لقيتهم كامل نايضين قتلهم صباح الخير ردولي حنا هكا دخلت فرملية قاتلها الحاجة جيت نديرلك الدوا قاتلها ماما مزال مجبتيليش قهوة كيما موالف بقات تضحك قالتلها ضوك نجيبلك ميكون غير خاطرك دارتلها تشكة (بيكورة) رقدت فالبلاص جاو داوها للبلوك وانا قلبي باغي يخرج من ضلوعي،بقينا غير نستناو قتلو يوسف طولت قالي لالا مزال متتقلقيش بقينا شحال قتلو يوسف والله لا طولت قلبي ضارني قاتلي خالتي بسمة متتقلقيش ضوك يجيبوها حتى دخلت الفرملية نتاع الصباح الدمعة متحجرة في عينيها قاتلو الطبيب يحوس عليك طرت ليها علاه يحوس عليه وينها ماما زربت خرجت بقى يوسف وخالتي يهدو فيا مكان والو واش بيك خوافة قالي يوسف باينة باه نخلص برك يا طفلة مالك قتلو نار شاعلة في
قلبي منيش مرتاحة نجي معاك قالي اقعدي هنا ضوك نجي طول حتى هو مجاش مقدرت نقعد مقدرت نوقف وليت فهاذاك الكولواغ رايحة جاية حتى شفتو جاي مع الطبيب جريت ليه قتلو ها وين ماما حضني قالي حنونتي بعدتو عليا قتلو نحوس ماما جيبهالي ضوك قالي بسمة حنونتي اتكالماي ارواحي ندخلو الداخل ونهدرو بديت نعيط قتلاك نحب على ماما متفهمش واش نهدر معاك نطق الطبيب قالي عظم الله أجرك يا بنتي وليت نعيط على طول صوتي وليت نصادي ونقطع في شعري قتلو ذوك جيبلي ماما الكلينيك هذي قلبتها الناس الكل تتفرج عليا عيا يوسف وخالتي يحضنوني ويهدوني والو مقدروش يا ماما عزيزتي ليمن خليتيني يا ماما حنونتي غير نوضي والله ندير لي تحبيها يا ماما متخلينيش وحدي متخليش كتافي عرايا يا حليمة نوضي شكون يلاقيني عند الباب ويقولي هاهو السبع نتاعي جا يا حليمة شكون يضربني يا حليمة علاه رحتي وظلمتي الدنيا عليا كثر ماهيا مظلمة…
- يتبع الفصل التالي اضغط على ( رواية بنت الغير شرعية ) اسم الرواية