رواية بنت الغير شرعية كاملة بقلم ياسمين عبر مدونة دليل الروايات
رواية بنت الغير شرعية الفصل السادس عشر 16
طلعت للبيت قلت نخمل حوايجي فالخزانة حتى طبطب الباب قلت ادخل دخلت وحدة من هذوك أربعة بنات نتاع البارح لابسة غوب نواغ سيغ طاي وميني مع هي بلوندا شعرها بليماش مكياج أنا بالي سامبل مين منعرفش للمكياج بصح مع الوقت كي شفتها واش دير تخلعت جايبة معاها طفلة تكون عندها 3 سنين هكاك قاتلي صباح الخير وردة أنا أميمة غير سمعت اسمي واسمها فشلت مالا هذي هيا مرتو والطفلة سيغ بنتو بصح تبان كلاس وشابة زعما علاه تزوجني عليها وزيد قاللها إسمي نتاع الخدمة سيغ حكالها كلش فيقني من تخمامي غير كي قاتلي وردة وين رحتي قتلها لالا هنا برك لقاتني نخمل فالحوايج قاتلي واش عجبوك الحوايج لي شريتهم لك قتلها واه شابين يعطيك الصحة قاتلي والله اسمحيلي شريتلك نتاع زربة راكي تعرفي يوسف كي يقول على حاجة لازم تمتمم تقضيها قتلها لالا شابين قاتلي نورمالمو جبت كلش وخملتو إذا ملقيتيش كاش حاجة سقسيني ونشوفو إذا نسيناها نشروها مع بعض من اليوم رانا صحابات ياربي هذي مريضة ولا تتمهبل جامي
شفت ضرة تستقبل ضرتها هكا ولا خوف منو زادت قاتلي هبطتي تعرفني على الجماعة لتحت قتلها لقيت غير الكبارات ضحكت قاتلي قصدك عجايزنا وماما استغربت قاتلي واش معرفتيهمش هزيت لها راسي لالا قاتلي شوفي هذيك لي سلم عليها راجلك يا لالة يماه نصيرة زربت قتلها والأخرى مرت باباه ضحكت قاتلي تقدري تقولي بصح هي يماه الحقيقية قتلها كيفاه قاتلي شوفي عمي تزوج يما نصيرة ومكتبش ربي باه يجيبو ولاد مالا عاود الزواج بماما زينب ووعدها إذا جابو ولاد أول طفل يمدوهلها وهذا لي كان يعني يوسف ولد زينب بصح رباتو نصيرة ويقوللها يما والأخرى كامل هي ماما أنا اسمها سليمة وهي مرت عمو فهمتني قوتلها مالا نتي تزوجتي ولد عمك قاتلي ايه أنا عشقت ولد عمي لي كبرت معاه وحتى هو عشقني وعشنا قصة حب روعة والحمد لله كملنا ربي تزوجنا وزاد فضل علينا برنوش (بنتها رنيم ويدلوها رنوش ) خلاص مبقاليش عقل قريب قتلها مين عشتو قاع هذا الحب علاه تزوجني حتى قاتلي محمد حب حياتي محال نتخيل حياتي بلا بيه ياه شراهي
تهدر محمد مالا هذي مرت خوه يا نندب قريب درت كارثة قتلها الله يدوم محبتكم قاتلي آمين حنا وياكم حنونتي مالا هذيك لي تحلفت فيا هي مرتو سقسيتها ولبنات قاتلي شفتي هذيك لي كانت لابسة سروال جين وبيل نواغ هذيك مروى ختهم ديجا تشبهلهم قتلها واه شكيتها ختهم قاتلي والآخرين. تكملة الجزء 16
قاتلي شفتي هذيك لي كانت لابسة سروال جين وبيل نواغ هذيك مروى ختهم ديجا تشبهلهم قتلها واه شكيتها ختهم قاتلي والآخرين لي بقاو خواتاتي الكبيرة آمال (لي تحلفت فيا )والصغيرة ريتاج قتلها ومرت يوسف قاطعتني قاتلي مين يوم تطلقت معاودناش شفناها ضوكا عندهم 5 سنين طلاق يا ربي وختها علاه تحلفت فيا مين مهوش راجلها يا ليكون تحوس عليه يا ربي تديه وتهنيني حتى قاتلي أميمة وردة وين رحتي قتلها اسمي بسمة مش وردة قاتلي ومحمد وش بيه قالي اسمها وردة قتلها عندي زوج اسموات ويوسف عجبو بسمة قاتلي ايه بسمة شباب كسرتلك راسك بالهدرة أنا ثرثارة قتلها لالا معليش ماذا بيا نلقى وحدة تونسني قاتلي مالا احكيلي على روحك على عايلتك معرفتش شا نجاوب مزية دخل يوسف
جبنا 15 يوم نفس الموال صباح نفطرو مع بعض هو يروح للخدمة وأنا نطلع لشومبرتي مرات تجي أميمة نجمع معاها مرات تكون خرجت نبقى وحدي حتى كي يجي يوسف للغدا تان نهبط نتغدا ونطلع منعاودش نهبط حتى للعشاء هوما مجاوني محوسو عليا وأنا مش باغية تكسار الراس ديجا كي نهبط يبقاو غير يشنفو عليا بصح ميهدرو والو خاطر يوسف ثما وباين مشربلهم الخل شا يخافوه ومعاه هو تان نفس الروتين بيناتنا غير السلام وخلاص وحاجة مزال ما صرات بيناتنا ديجا متقربش حتى مني وانا حلاتلي ، واحد اليوم فالليل كي جينا نرقدو قالي غدوة رايح لولايتك عندي خدمة قتلو تعيش نروح معاك نشوف ماما وخالتي قالي أوكي بصح الصباح نروحو بكري على 4 قتلو معليش تالمو توحشت ميمتي رقدت ونضت لقيتها 2 صباح مقدرتش نعاود نرقد نضت غسلت ولبست هبطت لتحت للكوزينة غير بالسكات طيبت قهوة وحليب لقيت بورتمونجي كبير فيه قاطو عمرت طبسي وجدت السنيوة الله الله وطلعتها للشومبرة مع دخلت سمعت تيليفون يوسف يصوني الرافاي ناض لقاني رافدة ذيك السنيوة ولابسة قالي على حساب مرقدتيش هزيتلو راسي ناض غسل ولبس وجا شرب القهوة قالي كون خليتي فالطريق وشربنا قتلو معليش بصح أنا مدمنة قهوة نبغي غير نحل عينيا نشربها قالي معليش هيا نزلت حطيت السنيوة
فالكوزينة غسلت الماعون ورجعت كل حاجة في بلاصتها دخل قالي واش ديري قتلو نخمل قالي خلي جدهم ممبعد كي جي الخدامة تخمل قتلو كملت خرجنا وديمارينا مزال الليل والنسمة باردة شوية نعست سقمت روحي ورقدت مفطنتش حتى قريب 7 طلع النهار قتلو صباح الخير قالي صباح النور عملت عليك تونسني فالطريق رقدتي قتلو شفتك متحكيش بزاف رقدت قالي معليش إذا تستقهواي نحبسو قتلو لالا نورمالمو قريب نوصلو نعاودها فالدار قالي كيما تحبي المهم باه مننساش الخرجة ممنوعة والمباتة تاني قتلو علاه حابة نبقى يامات قالي لالا نحطك ونفري شغالاتي كي نكمل نجي ليك وهاني نبه عليك مكاش المباتة ميشقاش ممبعد تحرجيني قدام يماك أوكي قتلو صحا شوية وصلنا عند الدار نزلت أنا دقدقت وهو نزل القضيان عندو مجاب بقيت داهشة ويتنا قضى سيغ البارح خاطر اليوم محبسش كامل فتحت خالتي الباب بدات تعيط لماما ارواحي تشوفي شكون جا سلمنا عليهم هو راح عياو معاه اشرب قهوة قاللهم لالا خدام لازم نروح وانا بقيت غير معنقتهم شحال توحشتهم بالزوج خاطرهم فالزوج ميماتي وهذي الحاجة لي ديما نشكر ربي عليها صح ممدليش أب بصح عوضني بزوج أمهات .
- يتبع الفصل التالي اضغط على ( رواية بنت الغير شرعية ) اسم الرواية