رواية اميرتي كاملة بقلم سلمي تامر عبر مدونة دليل الروايات
رواية اميرتي الفصل الثامن 8
_هو انتِ تعرفي ياقمر ان لما بنت بتلف حوالين واحد مرتبط بنقول عليها ايه
قالتها ندى لأميرة بكره ونظرات نارية
اتصدمت اميرة شوية من تحولها المفاجئ لأنها كانت بتمثل قدام مؤمن انها لطيفه ورقيقه وبعد ما مشى بانت على شخصيتها الحقيقيه
_ايه سكتي ليه..تعرفي بيبقى اسمها ايه..ولا عيب أقولك لأخدش حيائك
_عارفه بيبقى اسمها ايه
وكملت بإحتقار
_لكن انتِ بقا تعرفي اللي تسيب الشخص اللي بيحبها في وقت هو مدمر نفسياً فيه بتبقى اسمها ايه برضو
انتِ سبتيه وهو محتاجك جنبه ومحتاج دعمك واهتمامك بيه وطبطبتك عليه
واول ما فاق ورجع لشغله وحياته ورجع زي ما كان واحسن جيتي جري ليه صح
هبقى معاه وهو مفرفش وكويس لكن اول ما ازمه تحصله هتسيبه وهرميه
ندى ببرود
_والله حاجه متخصكيش
طالما هو قابل ده انتِ مالك
اميرة بغضب
_لأن مؤمن صاحبي وزي اخويا
ومش هسمح لحد انه يلعب بيه
ندى بسخرية
_صاحبك!
وهو انتِ فكراني مش واخده بالي من نظراتك ليه
وابتسمت بثقه
_بس حتى لو بتحبيه، هو قلبه معايا انا وبيعشقني انا من واحنا لسه اطفال بنلعب مع بعض في الشارع
من وقتها وهو متعلق بيا ومبيقدرش يبعد عني
واكيد انتِ شوفتي كان عامل ازاي في بُعدي
عايزة تعرفي انا رجعتله ليه
قربت منها واتكلمت بخبث وابتسامه سمجه
_اصل عرفت من قريبته انه ورث من ابوه فلوس بالكوم
وانا الصراحه بعشق الفلوس زي عنيا ف علشان كده رجعتله
اصل واحد معاه فلوس وبيعشق التراب اللي ماشيه عليه وشكله حلو وفيه كل الصفات اللي بتحلم بيها اي بنت يبقى يتساب ليه
ده لقطه!
اميره بصدمه واستغراب
_علشان الفلوس!
يعني مرجعتيش علشان بتحبيه
ندى بجدية
_بيبي الحب مش بيأكل عيش
وابتسمت بوجع
_انا ابويا وامي كانوا بيعشقوا بعض
واول ما اتجوزوا المشاكل كترت بينهم والحب ده اتحول لكره بسبب قلة الفلوس ووصلت بيهم أنه قت.لها واتعد.م
قوليلي بقا الحب ده نفعهم في ايه
مش هنكر واقولك اني مش بحب مؤمن
بس بحب الفلوس اكتر
_يعني لو لقيتي حد معاه فلوس اكتر منه هتسبيه صح
فكرت ندى شوية واتكلمت بمكر
_بصي هو قبل ما مؤمن يبقى غني اه كان ممكن اعمل كده
لكن بما ان بقا معاه فلوس ويقدر يعملي اي حاجه انا عايزاها ف لأ مش هسيبه
_انتِ مش بتحبيه..انتِ بتستغفليه وبتضحكي عليه
وبقا دلوقت بالنسبالك بنك او حاجه زي مصباح علاء الدين يحققلك رغباتك
مؤمن ميستهلش واحده زيك
ابتسمت بثقه
_ملكيش دعوه ، وعلى فكره لو روحتي قولتيله اي كلمه من اللي قولتهالك مش هيصدق
لأن زي ماقولتلك بيعشقني
وانا بقيت بالنسباله كل حاجه وميقدرش يبعد عني
ف ابعدي عنه بقا يا عسل علشان اقسم بالله انا خلقي ضيق وهتصرف معاكي تصرف مش هيعجبك
سكتت لما لمحت مؤمن داخل عليهم وبيبتسملها بحب
_ها اتأخرت عليكم
ندى بإبتسامه ورقه
_لا ياحبيبي
بس شوف اميرة عايزة تمشي ومستعجله خالص مش عارفه ليه
بص لأميره بإهتمام وقلق
_مالك فيه حاجه حصلت
بعدت عنيها من على ندى وبصتله بشفقه ووجع وحسيت انها عايزه تصرخ في وشه وتقوله ابعد عن المريضه دي وبطل تحبها لكن عرفت ان لو عملت كده مش هيصدقها وهتطلع هي شريرة الحكايه بالنسباله
قامت واتكلمت بجمود
_لأ مفيش حاجه متقلقش بس ساره عايزاني ضروري
قام معاها واتكلم بجديه
_طب استني هوصلك
اميره برفض
_لأ يامؤمن شكراً
انا هروح خليك انت
باي
ندى بإبتسامه مصطنعه
_باي ياميرو
خلي بالك من نفسك
بصتلها أميرة بإحتقار مقدرتش تخبيه ومؤمن لاحظ ده وبصلها بإستغراب ورجع بص لندى اللي بصتله ببرائه مصطنعه
مشيت اميره من المكان ورجع مؤمن قعد مع ندى اللي بصتله واتكلمت بحزن
_هي ليه بصتلي بإحتقار يا مؤمن
هو انا ضايقتها في حاجه
عنيها دمعت واتكلمت بنبرة حزينه
_انا والله اتعاملت معاها كويس وداريت غيرتي عليك منها
مسك ايديها واتكلم بحنان
_حبيبتي متضايقيش
هي اكيد متقصدش
_ماشي يامؤمن يمكن انا فهمت غلط
ابتسم عليها واتكلم بهيام
_قلب مؤمن من جوا انتِ
هو فيه حلاوه كده ياناس
ابتسمت بخجل مصطنع
_بس يامؤمن بقا قولتلك متتكلمش معايا بالطريقه دي غير لما نتجوز
_طب وهو احنا متجوزناش ليه لغاية دلوقت
_قول لنفسك
_والله انا لو عليا يلا دلوقت
انا شقتي جاهزة ومش ناقصها حاجه غيرك
ايه رأيك نتجوز بعد شهر
فكرت سوية وهزيت دماغها بموافقه وهي بتبتسم بخجل مصطنع
ردلها الابتسامه بسعادة من موافقتها وحس انه اسعد واحد في الدنيا طول ما هي جنبه
_______________________
عدى اسبوع واميره بتتجاهل مؤمن تماماً ومبقتش تقف في البلكونه وهو لاحظ ده وحس بنقص بسبب غيابها وانه فقد حاجه كبيره في حياته وبقى محتار ليه حاسس ب ده رغم وجود ندى
_______________
في يوم اميرة كانت قاعده مع صاحبتها اللي لسه متعرفه عليها جديد في الكلية وبيتكلموا بإندماج
لمحت بنت داخله مع شاب وقعدوا على الترابيزة اللي قدامهم
ركزت في ملامحها وبرقت عينيها باستغراب
_ندى!!
- يتبع الفصل التالي اضغط على ( رواية اميرتي ) اسم الرواية