رواية اميرتي كاملة بقلم سلمي تامر عبر مدونة دليل الروايات
رواية اميرتي الفصل السابع عشر 17
أميرة فتحت عينيها بتعب لقيت نفسها في بيت غريب وراجل واقف قدامها بيبصلها بحنان وحب
انتفضت بعنف وهي بتفتكر خطفها امبارح وبصيت للراجل بفزع واللي كان واقف وراه شاب صغير في السن وبيبصلها بتدقيق
_انتوا مين..وخاطفيني ليه
سلطان بهدوء ونبرة حنونه
_انا اسف جداً على الطريقة اللي جيبتك بيها دي
قولت لرجالتي يجيبوكي بهدوء لكن هما شوية اغبيه فهموا كلامي غلط
نظرتها المفزوعة متغيرتش واتكلمت بحده
_برضو انت مين..وعايز مني ايه
سلطان اخد نفس عميق واتكلم بهدوء
_انا سلطان المسيري..أبوكي الحقيقي يا اميرة
بعد جملته فضلت حوالي دقيقتين تستوعب هو قال ايه لحد ما بدأت تضحك بسخرية
_والله !
المفروض اصدق انا بقا واترمى في حضنك صح
سلطان بص للشاب اللي وراه اللي عطاه نظرة دعم وتشجيع
اتنهد وقعد قدامها على السرير واتكلم بندم شديد
_صدقيني يابنتي مبكدبش عليكي ونقدر بكل بساطه نعمل تحليل دي ان اي لو مش مصدقة
وسارة عارفه الحقيقه وروحي أسأليها
عز وهنا مكنوش ابوكي وامك
دول عمك ومرات عمك
وانا سيبتك معاهم وسافرت علشان تبقي في امان
لأن وقتها كان عندي أعداء بسبب شغلي وبسببهم والدتك اتقت.لت
وقتها خوفت عليكي واني اخسرك انتِ كمان ف اضطريت اني أسيبك عند عز اخويا ومراته الله يرحمهم
حسيت بصدمة شلت كل حواسها وهي بتبصله يدموع وعدم تصديق
قصده ايه!
ان كل حياتها كانت كدبة
كل اللي كانت عايشه في مش حقيقي وان عز مش ابوها وهنا مش امها وسارة مش اختها الحقيقيه
قصده ان امها ماتت مقت.ولة وابوها اتخلى عنها ورماها لأخوه
لاحظ صدمتها واتكلم بإحراج ودموع بدأت تظهر في عنيه
_انا اسف
عارف اني لو اقعدت اتأسف من هنا لبكرة على اللي عملته مش هتسامحيني
بس وغلاوتك عندي يابنتي انا عملت كده علشان احميكي
اميرة بسخريه وكره شديد
_تحميني!
انك ترمي بنتك اليتيمه اللي ملهاش غيرك لأخوك وتمشي يبقى انت كده بتحميني ولا بتدمرني!
وسرحت بحزن وابتسمت بسخريه
_علشان كده اللي المفروض امي كانت بتعاملني كده
سلطان بإهتمام
_كانت بتعاملك ازاي
دموعها نزلت واتكلمت بحزن
_مكنتش بتحبني
كانت دايما بتنصف سارة عليا حتى لو هي اللي غلطانه
كنت بفضل في اوضتي بليل اعيط بالساعات علشان امي بتكرهني!
فضلت طول فترة طفولتي ومراهقتي مستنيه الامومه والحب من واحده طلعت متقربليش حاجه اصلا !
حتى بابا..اه كان حنين عليا بس ساعات كتير كنت بحس ان معاملته جبران خاطر مش أكتر
انا مش قصدي اتكلم عنهم بالسوء الله يرحمهم
بس انت مش عارف انا حصلي ايه بسبب اللي عملته وشخصيتي بقيت ازاي
سلطان بدفاع شديد عن نفسه
_انا كنت طول السنين دي ببعتلهم فلوس ليكي وبزيادة كمان
انا مخلتكيش حمل عليهم بالعكس دول كانوا بيستفادوا منك
_وهو انت الابوة بالنسبالك فلوس!
وفين حنان الاب وحبه لبنته اللي بيخلوها رافعه راسها وسط الناس وثقتها في نفسها كبيرة
انا عيشت عمري كله حاطه في دماغي ان طالما ابويا وامي مش بيحبوني يبقى انا شخصيه متحبش
يبقى انا اللي وحشه علشان كده نافرين مني
ثقتي في نفسي بقيت في الارض وبقيت حاسه ان اي حاجه كتيرة عليا
وابتسمت بحزن ووجع
_حتى لما اتجوزت
اتجوزت من واحد انا اللي بحبه وهو مش بيحبني ولسه متعلق بحبيبته القديمه
عارف وافقت من الاول ليه
علشان كنت متربيه على اني متحبش وان مش من حقي استنى حد يحبني
دموعه نزلت بحزن عليها
_سامحيني يا اميره
بس انا فعلا مكنتش عايز اخسرك
مكنتش هقدر اني اشوفك بتروحي مني زي امك
اه ممكن تكون عيشتك كانت صعبه لكن على الاقل عيشتي
_انا عايزة امشي.. مش خلصت كلامك
لو سمحت بقا سيبني امشي
_حاضر يا اميرة مش هضغط عليكي
هجهزلك العربيه توصلك لحد بيتك
وبص للشاب اللي وراه واللي كان ابن مراته
_يلا ياشهاب
بص شهاب نظرة اخيرة لأميرة بتأثر من كلامها وطلع ورا سلطان بصمت
_________________________
رجع مؤمن بيته بعد ماقلب الدنيا على أميرة وموصلش لأي حاجه
وكانت عنيه حمرا من قلة النوم وشعره مش مترتب
وملامحه حزينه جداً ومجهدة
قعد عالكنبه ودموعه نزلت واتكلم بهمس
_يعني ايه!
يعني انا خسرتك خلاص يا اميرة
الباب خبط بخبطات ضعيفة
راح يفتح بيأس وتعب لكن ملامحه اتبدلت للأشراق والفرحه لما لقاها واقفه قدامه بتبصله بجمود
حضنها بلهفة وعدم تصديق
_اميرة!
انتِ كنتي فين..انتِ كويسه ياحبيبتي
رغم كلمته الاخيرة أثرت فيها لكن تجاهلت الشعور ده وبعدت عنه بهدوء ودخلت الشقة وقعدت على الكنبه وبصتله بهدوء
_انا جاية علشان تنفذ اللي اتفقنا عليه يامؤمن
لو سمحت طلقني
بصلها بغضب
_يادي ام السيرة دي!
انتِ اصلا كنتي فين
واختفيتي من قدامي امبارح ازاي
_كان سوء تفاهم..والموضوع يخصني ومش من حقك تعرف
_هو ايه اللي مش من حقي اعرف
انتِ مراتي وام ابني
_امم مراتك
طب بص يامؤمن طلقني علشان اقسم بالله ما قادرة اناهد
_ليه بتعملي كده!
هو انا عملت ايه اصلا لكل ده
انا مخنتكيش ما انتِ كنتي عارفه من الاول اني بحب ندى
ولما اتجوزتك قطعت علاقتي بيها وكنت بحاول انساها
_محترمتنيش
لما تبقى قاعد في مكان وتلاقي حد جاي بقولك الحق مراتك واقفه مع حبيبها القديم
وتيجي وتلاقيني على وشك اني ارجعله ساعتها هتفهم شعوري يامؤمن
_لأ كنت هترجعلها لولا ظهوري
_وانا طلاق مش هطلق يا اميرة
ملامحها اتحولت للغضب ووقفت قدامه بعياط
_ارحمني بقا
ارحموني كلكم
انا العلاقه دي أذتني ولسه بتأذيني
وفقدت فيها نفسي وسعادتي
ليه م…
قطعت كلامها وملامحها بتتحول للألم وبتمسك بطنها
مؤمن بصدمه وهو بيبص على رجليها
_اميرة..انتِ بتنزفي
- يتبع الفصل التالي اضغط على ( رواية اميرتي ) اسم الرواية