رواية شيزوفرينيا احاسيس بقلم حنين عادل عبر مدونة دليل الروايات
رواية شيزوفرينيا احاسيس الفصل التاسع 9
بيكونوا الرجالة محاوطة موسي وحماصة ورافعين عليهم السلاح
حماصة: استهدوا بالله يا رجالة احنا جايين نتفاوض اه والله
موسي بيكون ماسك في لياقة الراجل
حماصة: نزل ايدك يا موسي نزل ايدك
بينزل موسي ايده..
بيتكلم المعلم:
قولتلي جاي تتفاوض اشجيني يا خويا
موسي: التاكسي بتاعي عندكم
بيشد المعلم في الجوزه:
اه
موسي: اه ايه عاوزه
المعلم بابتسامة:
وماله هات عشرين الف جنيه وخوده
موسي بصدمة: عشرين ايه
المعلم بيرد:
لا حاكم بقولك ايه انا مش بحب الكلام الكتير قولتلك عشرين الف جنيه
حماصة: كتير اوي يا معلم
المعلم: ولا كتير ولا حاجة الدنيا غلت بقت نار دا كيلو الرز النهارده عامل 23جنيه جت علينا اما نغلي احنا خدماتنا
بيتكلم مجانص: هزها شوية يامعلم
بيضحك المعلم: شكلك ابن حلال وعشان كده هانزلها لعشرة
بيضحك موسي: شكرا يا معلم
في نفس الوقت بيجي واحد يجري:
كبســــــــــــــةكبســـــــــــة يا معلم
بيكون صوت سرينة البوليس وبيدخل بوكس الشرطة وموسي بيضحك
بيبُص له المعلم:
عملتها يا كلب
مجانص بيبُص لــحماصة
حماصة بخوف وبيرفع كتفه:
انا مالي بقا ها مالي!
بيهجم عليه مجانص
حماصة وهو بيتضرب:
ااااه مالي طب وانا مالي وانا مالي بالأحزان انا مالي
♕ــــــــــــــــــــــــــــــــــــــــــــــــــــــــــ♕
بيكون ايوب واقف وبيرقص وبيعمل حركات احمد سعد وهو بيشاور علي جسمه باداء حركي زي فيديوهات التيك توك
صدقيني لو بايدي
كنت اشيلك بين وريدي
كنت انور عشان تقيدي
كنت اشق لك حجر واعدي بيكي
كنت ازيح هموم الكون بيدي واخدك في حضني تستخبي تلقي خوفك امان
بتقف انجي علي السرير وتسقف وتصفر له فابينحني ليها وبيبعت لها بوسة عالطاير
بيروح ايوب ناحيتها:
يخرب بيت الهندي اللي لحس عقلك ده
انجي بضحك: انت وعدتني تحقق أحلامي وهاتسفرني الهند صح وناري ناري ناري من جماله
بيقرب ايوب منها وبيشدها تقعد جمبه:
من نظرة خدني دوبنا احنا سوا
انجي: حبيبي ده!
بيضحك:
احلامك اوامر ياروح قلبي الورق بيجهز
بتنزل من فوق السرير وبتتنطط في الأرض زي الأطفال
بيضحك علي ضحكها وعيونه بتلمع في نفس الوقت بيصحي من النوم علي صوت تليفونه
بيرد عليه:
ايوه يا بابا خير
بتتغير نبرة صوته بصدمة:
ازاي مش لاقيين نورهان!
♕ــــــــــــــــــــــــــــــــــــــــــــــــــــــــ♕
وفي الخرابة بيقف موسي يتفرج علي البوليس وهو بيلم المجرمين
والمعلم بيكون ماسكة اتنين عساكر وهايحطوه في البوكس بينده بصوت عالي:
موسي
بينتبه ليه موسي
المعلم بغضب:
وشرفي لأندمك
بيركبوه العساكر ومجانص بيكون بيضرب في حماصة بيشيلوه عنه وبيبُص مجانص ليه بعصبية
حماصة بيمسك ضهره بألم:
والله مالي دعوة صدقني بجد مالياش دعوة خالص
بيقرب موسي من الظابط لما شاور له علي التاكسي بتاعه
بيجري موسي عليه وبيحضنه..
حماصة بابتسامة:
أول قصة حب بين انسان وتاكس
♕ـــــــــــــــــــــــــــــــــــــــــــــــــــ♕
وفي النايت كلاب بيكون واقف سامح ومعاه بنت
_انت كده هتاخد وقت طويل اوي
سامح: وماله نتقل عشان الطبخة تستوي الرز يبقي مظبوط واللحمة بتدوب
_واثق انك هاتنجح
سامح: اكيد يا حبي اكــــــيد.
_ياخوفي بعد ما تحقق مرادك تنساني وترميني
سامح وهو بيشرب من الكاس:
عيب دا انا سامح انساكي انا عمري ما انسي اللي وقفوا معايا ابدا خليكي واثقة في حبيبك
♕ـــــــــــــــــــــــــــــــــــــــــــــــــــ♕
وعلي البحر بيوقف أيوب عربيته وبينزل بيلاقي نورهان قاعدة
ايوب: كنت عارف اني هلاقيكي هنا
نورهان: ايه ده ايوب
ايوب: اللي في البيت كله قلق عليكي انتِ عارفة الساعة كام الساعة عدت اتنين
نورهان بصدمة:
ايه ده بجد ماحستش بالوقت خالص
ايوب: انتِ مالك يا نورهان حاسس انك متغيرة
نورهان بتبتسم:
انا حاسة اني ضايعة
ايوب: ليه
نورهان: مش معقوله يا ايوب كل ده وماحستش
ايوب: حسيت ايه مش فاهم
نورهان بتقف وبتتنهد:
يلا يا ايوب كنت مخنوقة شوية وكالعادة بحكي للبحر رفيقي
ايوب: مخنوقة من ايه
بتضحك: هرمونات هرمونات بنات
ايوب: بتضحكي انا قلقت عليكي اوي انا خوفت يكون سامح عملك حاجة!
بتبتسم نورهان لما بتحس بخوفه وقلقه عليها
نورهان بشرود:
ياتري هاتحس بحبي ليك امتي
ايوب: ايه روحتي فين مش يلا
بتهز راسها وبتمشي معاه وبتركب العربية
♕ــــــــــــــــــــــــــــــــــــــــــــــــــــــ♕
بيروح موسي بالتاكسي ومعاه حماصة
حماصة: موثي انت هاتفضل ندل كده دايما
موسي بيضحك: ايه موثي دي هو مجانص عمل فيك ايه
حماصة: كثر ثناني بث انت معرفتك بقت تجيب ليا الضرب اعتقني بقا الغي رحلتي مخاثمك
موسي: واهون عليك يا صاحبي الوحيد
حماصة: جيت لي عالجرح خلاص مثالحك
بيدخل موسي الحارة بالتاكس وبيجرشه…
موسي: اجي اسندك يا صاحبي
حماصة وهو ماشي يعرج:
شكرا يا رجوله
بيبُص موسي عالتاكسي:
يا ما انت كريم يارب اللهم لك الحمد حتى ترضى ولك الحمد بعد الرضا ولك الحمد إذا رضيت
بيطلع وهو مبسوط
موسي بيحضن امه:
التاكسي رجع يازوز
بتزغرط زينات:
الحمدلله ده يوم الهنا
بيفرح الأطفال ملك وأدم الا روقا اللي كان بيحاول يرسم الضحكة
وفجأة بتمسك زينات بوقها وبتطلع تجري عالحمام
وبتقفل الباب
وبيبات انها بترجع دم
موسي بيخبط علي الباب فابتفتح الحنفية تخفي الدم وبتغسل وشها وتطلع
موسي: مالك ياما بترجعي ليه
زينات: ده تلاقيه برد في المعدة
روقا: لأ ياختي ماتسكتيش مش كل شوية يغمن عليكي ودلوقتي ترجيع فيه حاجة غلط
موسي: ايه بيغمي عليها كمان
ادم: هييييه اكيد حامل
موسي بصدمة: بتقول ايه يا ولا
ملك: اصل في المسلسلات كده اللي يغمي عليه ويرجع يكون حامل
روقا: انتم اطفال انتم بالذمة
موسي: زينات الصبح باذن الله هانروح للدكتور اعملي حسابك
زينات: مالوش لزوم يعني.
موسي: لأ يلا زوزو كلمة واحدة
بيدخل ينام وهو مرتاح ومبسوط لأول مره..
♕ـــــــــــــــــــــــــــــــــــــــــــــــــــ♕
في الصباح وفي قصر العامري
بيكون واقف ايوب في الدريسينج وبيحاول يلبس الجاكت من ايده المكسورة
بتدخل عليه رشا
رشا: صباح الخير علي فين يا حبيبي
بيرد وهي بتساعده يلبس جاكت البدلة:
رايح الشغل
رشا: طب كنت استني عشان دراعك المكسور ده شويه
ايوب: لأ كده كفاية
رشا: طيب هاروح اجهزلك الفطار علي ما تنزل
بيهز راسه
وعند نورهان بتكون قربت تخلص بتدخل عليها امها بكوباية شاي بلبن وبسكوت
*يلا يا نور افطري
نورهان بتبتسم وبتاخد منها الصينية
♕ــــــــــــــــــــــــــــــــــــــــــــــــــــ♕
بيكون موسي ماشي في الشارع ومعاه امه
زينات: مش عارفة انت مصر ليه انا كويسة اهو
موسي: اهو نطمن يا زوزو
زينات بقلق: طيب.. بس نروح المستشفى مش دكتور خصوصي
موسي: بس..
بتقاطعه: مابسش هي مصاريف عالفاضي
موسي: طيب اللي تشوفيه
بيدخلوا المستشفى اللي بتكون زحمة وبيقعدوا
وكأنهم في دنيا تانية.
اللي داخل وهو عامل حادثة وهدومه مليانة دم
واللي طالع تعبان ومسندينه واللي بيصوتوا عشان مريضهم مات
موسي: اما كل الناس دي تعبانة
زينات: الحمد لله اللي يشوف بلاوي الناس تهون عليه بلوته
بيعدي ساعة في التانية في التالتة لحد مابيجي دورهم واخيرا
بيقوم موسى وبيضحك:
ده انا ضهري خدل من القعدة
زينات: ومين سمعك يا خويا
بيدخلوا وبتكون دكتورة وشها سمح
بتبدأ تكشف عليها وتسألها شوية أسأله لحد ما بتقعد عالمكتب
موسي: ها يا دكتورة خير
بترد وهي مبتسمة:
خير وكل حاجة بس تعمل الاشعه دي انا كتبتها عشان نتطمن هي بره ب 700 جنيه لكن موجودة في المستشفى هنا ب100
موسي: تمام يا دكتورة هانعملها هاتطلع علطول ولا ايه
الدكتورة: ايوه وانا مستنياكم
بتقوم زينات وموسي لحد مابيوصلوا لقسم الاشعة وبيطلع انها رنين مغناطيسي
زينات بخوف: انا هادخل دي
موسي: الله ماتدلعيش يازوزو بقا اقراي قرأن
بتدخلها زينات وهي خايفة وموسي علي اعصابه
♕ــــــــــــــــــــــــــــــــــــــــــــــــــــ♕
بيبوس ايوب ايد ابوه اللي بيكون سعيد ان اخيرا ابنه رجع يشوف مصلحته
بيقابل نورهان في الجنينة
ايوب: صباح النور يلا
نورهان بابتسامة: يلا
بيركبوا العربية وكلامهم بيكون قليل كالعادة لحد مابتوقف العربية قدام شركة كبيرة علي شكل بناء هرمي
بيجي واحد وبياخد العربية من ايوب وبيدخل ايوب ونورهان الشركة والموظفين بيقوموا يقفوا وكلهم:
حمد الله عالسلامة يا ايوب بيه
♕ــــــــــــــــــــــــــــــــــــــــــــــــ♕
بياخد موسي الاشاعة وبيروحوا للدكتورة تاني اللي ملامحها بتتبدل وبتكتب لهم تحاليل
موسي بخوف: خير يا دكتورة
الدكتورة: بإذن الله خير بس تعملوا التحاليل دي وهاتطلع بكره تيجوا اشوفها
بيروح موسي وهو قلقان بس زينات بتطمن فيه انها كويسه
زينات بضحك: ما تحافش ياولا انا زي الفل
موسي: اوعي يازينات تفارقيني
زينات: لا متخافش قاعدة علي قلبك هههه
موسي: يارب العمر كله ههه
♕ــــــــــــــــــــــــــــــــــــــــــــــــــــــــ♕
بيدخل ايوب مكتبه وبيتفاجئ ان…..
- يتبع الفصل التالي اضغط على (رواية شيزوفرينيا احاسيس) اسم الرواية