رواية شيزوفرينيا احاسيس بقلم حنين عادل عبر مدونة دليل الروايات
رواية شيزوفرينيا احاسيس الفصل الثامن 8
بيتمشي موسي مع حماصة في الشارع
حماصة: افرح يا صاحبي
موسي بفرحة: ايه التاكسي رجع
حماصة بيضحك: لأ بس حاجة تانية
موسي: ايه ما تخلص
حماصة: انا قولتلك قبل كده ان عندي صاحبي وش الاجرام ده فــروحت له وحكيت له عن كل اللي حصل وكده وان يساعدنا ان نلاقي التاكسي وابشر بقا
موسي: ها كمل
حماصة: بص يا عم كان رايح بالصدفة يخلص مصلحة اجرامية مع زملاءه وزميلاته المجرمين وشاف مسؤول قسم السرقة عندهم فرع التكاسي ولقاه ودلوقتي بقا جاه وقت التفاوض
بيضحك موسي: ايه مسؤول قسم السرقة دي يا ياض هما عملولها اقسام
حماصة: طبعا السرقة تطورت عن زمان وبقت تخصصات تخصص محافظ شباشب وجزم من قدام الجامع تثبيت عربيات دي دنيا يابا دنيا!
بيقطع كلامهم واحدة تخينة جاية تجري عليهم بتصوت وشعرها منكوش
_يلاهويـــــــــــــــــــــــــــــــي طلقنـــــــــــــــي
بتخبط في حماصة وبتقع فوقه.
حماصة: ااااه حوشوها عني كح كح يا ساتر يارب
قامت الست بسرعه ووراها واحد بيجري ولابس الفنلة الحمالات والكلسون:
خيانة في الشارع يا كلبة!
بتقوم بسرعة والراجل عيونه بتطق شرار
بيبُص لحماصة بعصبية:
ايه اللي جابك تحت مراتي يا ولا
حماصة وهو عالأرض:
هي اللي جات فوقي
الراجل بغضب:
انت بتقول ايه نهارك شبهك
حماصة: ههه اوعي تكون فهمني غلط! ها ازعل
♕ــــــــــــــــــــــــــــــــــــــــــــــــــ♕
وفي بيت أيوب…
بيكونوا قاعدين عالسفرة بيجي يوسف يجري
يوسف: الاكل ريحته مفحفحة تسلم ايدك يا طنط
بتبتسم رشا: الف هنا يا حبيبي اتفضل
ايوب بيكون بياكل:
اومال زينة فين!
يوسف: مالهاش نفس بتقول!
ايوب بيمسك طبق وبيحاول يملاه بس مش بيعرف من ايده المكسورة بتساعده امه رشا
بياخد الطبق ويقوم.
ويوسف ماسك ورك ديك الرومي
يوسف: اوبااااا بيدوب دوب
ايوب بيمشي وبيروح لحد اوضة زينة وبيخبط
زينة: ايوه مين
ايوب: انا ايوب يا زينة.
بتفتح ليه زينة وهي بتقفل الروب وعيونها منفخة
ايوب وهي بيبُص علي عيونها:
جبت لك الغدا يوسف بيقول انك مالكيش نفس
زينة: ايوه مش جعانة
ايوب: مالك يا زينة..
زينة بتبسم: عادي زي ما انا ماتقلقش
ايوب: طب خدي يلا اتغدي
زينة بتبسم:
تعبت نفسك ليه
ايوب: انت اختي يا عبيطة تعب ايه ارجوكِ لو متضايقة من اي حاجة تقوليلي انا موجود
زينة: عارفة عارفة يا ايوب
ايوب: طيب يلا اتغدي كُلي الحقي قبل ما يوسف يجي
بتضحك زينة وبيمشي ايوب وبيطلع للجنينة بيلاقي نورهان قاعدة علي المرجيحة
بيقرب منها.
بتكون بتتكلم في التليفون بانفعال:
افهم بقا يا اخي انا مش بحبك انت حلو اوي والف بنت تتمناك بس مش انا
بيرد عليها: لو كان بيحبك او بيفكر فيكِي كان ارتبط بيكي من زمان ما كُنتي قدامه
نورهان: قصدك علي مين
بيضحك: ايوب باشا تفتكري هايحب بنت الجنايني
نورهان: خلصت!
بيتعصب: لو مش ليا مش هاتبقي لغيري!
بتقفل التليفون في وشه بعصبية وعالجمب التاني بيكون سامح اللي بيخبط التليفون في الارض وهو متعصب
بتقوم نورهان وبتتفاجئ بوجود ايوب
ايوب: هو مين ده! سامح مش كده
بتهز نورهان راسها وبتقول:
بيقول لو مش ليه مش هابقي لغيره الغريب في الأمر اني عمري ما خوفت في حياتي من حد بس سامح ده انا بترعب منه نظراته بتخوفني
ايوب: متخافيش انا معاكي لو فكر يقرب لك تاني انا هاعرفه مين هو ايوب العامري بعدي عن الشركة عاطيه قوة وكل حاجة هاترجع لوضعها الطبيعي
♕ــــــــــــــــــــــــــــــــــــــــــــــــــــــــــــــ♕
حماصة: ححححح براحة يا ام موسي براحة
بتكون زينات بتحط ليه تلج علي البونية اللي في عينيه والكدمات اللي في وشه
موسي: معلش اصاحبي
حماصة: عملوا عليا حفلة اهل الحارة ولاد الكل.ب ماشالنيش من ايدهم غيرك يا ام موسي والندل ابنك سابني
زينات بتضحك: ماحدش هوبلك غير الرجل المجنون ده بس هو لما ضربك في عينك شوفت الحاجة اتنين ههه
حماصة: حاسس انكم كاتمين الضحك طلعوه وارتاحوا
بيتفتحوا في الضحك….
بيكون روقا في المطبخ وبيحُط الدوا اللي عبارة عن نقط في كوباية الشاي وبيسيب فيها المعلقة عشان يميزها عن الكوبايات التانية وبيطلع
روقا: طقم الشاي اليومي من ايدي انا الاستاذ روقا
بيدي الكل شاي وبيدي لحماصة
موسي: مش ليا مزاج ليه
روقا بيمد ايده: ياعم اشربه يعدل دماغك
بيمسك الكوباية وبيطلع البلكونة هو وحماصة حاطط التلج علي وشه
حماصة: قبل ما الطور يهجم عليا انا كنت بقولك ان صديقي كلم اصدقائه واخدلك ميعاد بالليل
موسي: والمكان فين!
حماصة بيوصف ليه المكان وموسي وكأنه بيفكر في حاجة
بيقاطعه تليفونه اللي بيرن وبتكون شهد
بيطلع دماغه من البلكونة شوية وبتكون بعيده عنه بيتين
شهد: اخص عليك يا موسي يعني انا ان ماسألتش ما تسالش عليا
موسي: الدنيا ملبخة معايا اوي يا شهد
حماصة بيضحك: الله يسهل له يا عم
بيسيبه موسي وبيطلع عالسطح…
شهد: انا عرفت اللي حصل
موسي بإستغراب: عرفتي منين
شهد: وهي الحارة بيستخبي فيها حاجة موسي
موسي: نعم
شهد: انا جايلي عريس
موسي بيسكت وبيبُص للسما
شهد بتكمل كلامها: انا طفشت اللي فاتوا كلهم بس أمي المرة دي مصعبة عليا الأمور اوي
موسي: ربنا يوفقك ياشهد
شهد: انت بتقول ايه يا موسي
موسي بيتنهد: انا لو اخوكي ياشهد مش هارضي اجوزك لواحد زيي ماحيلتوش اللضا لا شقة ولا شغلة ثابتة
شهد: انا بحبك ومستنياك يا موسي
موسي: ارجوكي ياشهد ماتحسسنيش بالضعف أكتر من كده سلام
بيقفل التليفون قبل ما يسمع منها اي رد وهو بيبُص للسما:
عبدك الضعيف يارب طمعان في كرمك!
♕ــــــــــــــــــــــــــــــــــــــــــــــــــــ♕
بتدخل شهد من البلكونة والدموع مالية عينيها
وبتسمع صوت امها:
اه يا بختك المنيل في بنتك يا ستُهم متشعلقة في حباله الدايبة يابت فوقي وشوفي مصلحتك فين وسيبك من موسي الفقر ده مش لاقي ياكل
شهد: لا اله الا الله خودوهم فقرا يغنيهم ربنا
ستهم: يا سوادك يا ستهم يا مرارك نفسي اعرف عاجبك فيه ايه المقشف ده
شهد: بحبه ياما بحبه الله يرضي عليكي سيبيني في حالي بقا
ستهم: لأ انت لازم ابوكي يشوف لك حل أنا تعبت
♕ـــــــــــــــــــــــــــــــــــــــــــــــــــــــــ♕
وفي الليل وتحديدًا في قسم الشرطة
بيكون موسي قاعد قدام الظابط
موسي: انا كده حكيتلك عن اللي عرفته وعن وكرهم هتساعدني يا باشا
الظابط: انت متأكد من معلوماتك
موسي: ايوه يا فندم والمفروض اروح اتفاوض معاهم دلوقتي
الظابط: زي الفل انت تروح وتتفاوض معاهم عادى خالص واحنا هانهجم اول ما يوروك التاكسي
موسي: شكرل يا سعادة الباشا ربنا معاك
بيطلع موسي من القسم وبيروح لـحماصة اللي كان واقف مستنيه
حماصة: اعرفك بصاحبي وش الاجرام وحيد مجانص
بيضحك موسي وهو بيسلم عليه:
اهلا يا مجانص واضح من الشكل ماشاء الله هيئة جبارة بتلعب حديد انت شكلك
هو مش بيرد ليه
حماصة:
هو كده المجرمين مش بيحبوا الكلام الكتير الاجرام يابني افعال مش اقوال
موسي بيضحك وبيفضلوا ماشين وراه وبيركبوا معاه عربيته الربع نقل لحد ما بيوصل مكان مقطوع البيوت فيه قُليلة أوي زي الخرابة وهو اسم علي مسمي الخرابة
بينزلوا ويمشوا ورا الراجل لحد ما بيشوفوا واحد لابس جلابية وماسك الشيشة وقاعد وواقف حواليه رجاله كتيره
موسي بيجري علي واحد فيهم وبيمسكوا من رقبته:
اه يا حرامي التاكسي فين
بيرفع الرجالة كلهم عليه السلاح وبيحاوطوه هو وحماصة
حماصة: طب انا مالي بقا! حرام كده……
- يتبع الفصل التالي اضغط على (رواية شيزوفرينيا احاسيس) اسم الرواية