رواية ميراث نور كاملة بقلم لينا بسيوني عبر مدونة دليل الروايات
رواية ميراث نور الفصل الواحد و السبعون 71
"نور"
يابن الكلب يا أيسر !!!
عمرو أديب عارض فيديو لواحد شبهى بالضبط وهو بيقتحم الشركة اللى انا شغال فيها وفى أيده رشاش آلى، قتل كل المهندسين اللى شغالين فى وردية بليل وبعدها أختفى !!
عمرو أديب كان بيعلق على الفيديو وعمال يعيد الحتة اللى أختفيت فيها !!
شوية ولمس (الاير بيس) السماعة اللى على ودنه وقال :
ومعانا مداخلة تليفونية من البشمهندس الدكتور ... رئيس قسم الكهربا بكلية الهندسة .
اهلا وسهلا بحضرتك يادكتور ... قولنا أيه الحكاية ؟!
الدكتور قال وهو بيعيط ومنهار :
اللى حصل يأ أستاذ عمرو جريمة بشعة .. أرتكبها نور ناير اللى فى الفيديو ده.
من 13 سنة نور ناير كان طالب عندى وبأكد لحضرتك أنه ساحر مخضرم و ...
الدكتور قطع كلامه وقعد يعيط ..
عمرو أديب كان مندهش وقاله :
ساحر مخضرم!! ... لآ أنا عايز حضرتك تهدى خالص و تحكلينا الحكاية بالتفصيل علشان السادة المشاهدين اللى فى المنازل ..
الدكتور قاله :
الحكاية ان ....
سمعنا صوت تخبيط ورزع تحت البيت , حنوش أختفى ورجع تانى وقال :
بوليس , لازم تهربوا من هنا حالا ... هاتوا أيديكم .
أدينا لحنوش أيدينا وأختفينا فى الوقت اللى البوليس كسر فيه الباب وهجم على البيت
أتنقلنا بيت حنوش فى ليبيا ..
حنوش قال :
أيسر أبن الكلب بعت حد يتشكل على شكلك ولبسك فى حيطة , قولتلكم من الاول خالص نخلص عليه !!
نصير قاله :
مش وقته ياحنوش ...المهم دلوقتى أنه بقى يلعب على المكشوف ... لازم نروحله وادى عبقر محدش يعرف هيعمل أيه تانى !!
قولتلهم :
هيعمل أيه تانى ؟!!.. خلاص أنا أتدمرت واتفضحت.
التحريات هتثبت أنى كنت شغال فى الدجل والشعوذة فى قرية النيارين ... العيلة كلها أتدمرت !!
أنا مش رايح فى حتة أنا هفضل فى مكانى ومش هسمح لايسر يتلاعب بيا .
مارو ونورا كانوا مشغولين فى التليفون بيتابعوا الاحداث.
فجأة مارو أتنفض من مكانه وقال :
الحقوا !!!
بصينا كلنا فى شاشة الموبايل , وأتصدمنا !!
فيديو تانى ليا و أنا بقتحم محل مجوهرات وبقتل كل اللى فيه، بعدها بروح عند الكاميرا اللى بتصور المحل وبحط ورقة فى وش الشاشة ... الورقة كانت مكتوبة بلغة الجن !!
حنوش ترجم وقال :
أيسر عايزنا نروح سوق لومى فودو !!
بصينا على التعليقات اللى على الفيديو كلها كانت هاشتاج القبض على نور السفاح !!
الدنيا أتقلبت والفيس كله بقى بيتكلم عن الساحر السفاح اللى عامل حالة زعر فى البلد !!
مارو قال :
لازم نروح ... أيسر هيفضل يلعب اللعبة دى لحد مانروح.
أصريت على رأيي وقولتلهم :
مش هنمشى على مزاجه ... كده كده خلاص أحنا أتدمرنا.
أتصدمنا كلنا لما ظهر فيديو تالت وأنا بقتحم مول تجارى وبقتل كل اللى فيه !!
نصير قال :
لازم نروح يانور ... ذنب الناس اللى بتموت دى فى رقبتنا !!
كلهم أنضموا لنصير ضدى!!
مكنش قدامى غير انى انصاع لرايهم و نروح سوق لومى فودو .
انتقلنا انا وحنوش ونصير ومارو , وسبنا نورا وسندس فى الكهف.
حنوش كان بيشرحلنا السوق وقالنا انه سوق مختص ببيع اى حاجة ليها علاقه بالسحر الأسود.
السوق كان كله حاجات غريبة بتستخدم غالبا فى سحر الفودو.
سحالى مجففة , رؤؤس ثعابين، أقدام فيلة، قلوب خيول، ايادى شمبانزى، رؤوس فهود احجار، لتحضير الجن واحجار للوقاية من الجن حتى دمى الفودو بتتباع جاهزة بالسحر بتاعها، يدوب بس هتحط عليها صورة اللى عايز تأذيه !!
نصير قال :
احنا هنفضل ماشيين كدا كتي..
قطع كلامه طفل افريقى كان بيشد فى هدومه وشاورلنا نمشى وراه.
مشينا ورا الطفل اللى فضل يدخل فى شوارع وحوارى لحد ما وقف عند بيت او بمعنى اصح كوخ.
الطفل شاورلنا على الكوخ ولسه هيجرى، نصير مسكه من قفاه وقاله :
تعالا هنا ياد .. بيت مين دا؟!!
الطفل مردش عليه لانه مكنش فاهم اللغة .. بس فهم من انفعالات نصير انه بيسأل عن صاحب البيت.
الطفل قال:
ماستر فودو..
فحنوش قال :
قصده يقولك انه بيت كبير السحرة فى المنطقة.
الطفل فلت من ايد نصير وجرى ..
قربنا من الكوخ وخبطنا على الباب ..
فتحلنا راجل افريقى عجوز , بحلق فينا وقال كلام غريب فى اخره اسم ايسر .
هزيناله رأسنا بالتأكيد فأبتسم وفتح الكوخ وهو بيرحب بينا!!
مدخلناش كلنا نصير ومارو فضلوا على الباب ودخلت انا وحنوش.
العجوز قال بانجليزية ركيكة :
فين الفلوس ؟!!
قلناله بأستغراب فى صوت واحد :
فلوس ايه ؟!!
قالنا :
حق الحجر !!
قلتله :
حجر ايه !! احنا مش عايزين احجار!! مش انت قلت انك تبع ايسر !!.. ِترجمله يا حنوش ِ
حنوش ترجم كلامى فالساحر اتعصب وعينه كانت بتطق شرار وبدأ يتكلم بعصبية.
قلت لحنوش :
هو ماله ؟!!
قالى :
معرفش بيهددنا وبيقول انه مش عيل صغير عشان نلعب معاه وانه ماستر الفودو فى المنطقة وكل السحرة اللى هنا تحت امره ولو مدفعناش حق الحجر واتمينا الصفقة الموضوع مش هيبقى لطيف .
قلت لحنوش :
قوله ان شكله فاهم غلط.. احنا الاتنين بيتلعب بينا!!
حنوش لسه هيشرحله ،لقيناه اتعصب ومسك ميكرفون صغير جنبه وقال كلام،. عرفت بعد كدا انه كان بينادى على حد!!
قلت لحنوش :
قوله بكام الزفت دا .. مش عايزين مشاكل !!
حنوش سأل الساحر وبصلى وقالى :
بيقولك عايز 10 الف دولار!!!
قلتله وانا مصدوم :
10 الف عفريت لما يركبوك انت وايسر .. بينا يا حنوش.
فتحنا باب الكهف عشان نخرج، لقينا مارو رافع عصايته ونصير رافع سيفه.
واندهشنا من كميه سحرة الفودو اللى واقفين قدام الكوخ.
حنوش قال :
بينا من هنا يا جماعة .. هاتوا ايديكوا بهدوء عشان نتنقل.
مسكنا ايده وجيه ينقلنا فشل!!
نصير قاله :
انت عايز تنقلنا فى مستعمرة الفودو دى.. انت مجنون يبنى !!
وبص لمارو وقاله :
هتبطل السحر اللى حوالينا بالعصاية ولا استخدم السيف؟!!
مارو قال :
لا خلى السيف هستخدم العصاية..
رفع عصايته فى السما وقالنا :
انا هوقف السحر و ارهبهم بس..
السحرة كلهم انتبهوا لمارو اللى رافع عصايته.
مارو تمتم بالتعزيمات واستنا يحصل حاجة بس للاسف محصلش اى حاجة !!
نصير قاله :
فى ايه يا مارو؟!!!
مارو قال :
المفروض السما... مفيش وقت استخدم انت السيف!!
نصير مسك السيف ووقفه عمودى وقال :
ننح !
ننح مستجبش ولا ظهر .. نادى عليه اكتر من مرة مستجبش برضه !!
السحرة كانوا بيتمتوا بتعزيمات وهما بيقربوا علينا!!
نصير قال :
ننح مش راضى يخرج، شكله مش هيخرج غير بالتعزيمة وللاسف ملحقتش احفظها !!
كلهم بصولى وقالولى :
القميص .. لف يا نور يمكن يشتغل!!!
حنوش قال :
بسرعة يا نور انا شايف انهم بدأو يحشدوا جن .. جرب القميص عشان لو كدا هنضطر نحارب بأيدينا .
غمضت عينى ولفيت لفة كاملة واتحولت لتنين.
كل السحرة رجعوا لورا فى اندهاش وانبهار..
حنوش قال:
يبقى مش باطلين السحر!!!.. اركبوا بسرعة على ظهر نور !!
ركبوا فوق ظهرى وهربت بيهم من المكان..
طرت فوق الصحرا..
نصير قال :
هو ايه اللى حصل فى الكوخ..الساحر كان عايز ايه؟!!
حنوش قاله :
كان عايزنا نتم صفقة ونشترى حجر جوهرة العقرب!!
نصير قال :
وتمتوها ولا حصل ايه؟!!
حنوش قال :
متمنهاش طبعا!!
نصير قال :
ليه متمتوهاش !! احنا كدا معملناش اللى جينا عشانه هو عايزنا نتم صفقة الحجر!!
حنوش قال :
ونجيب منين احنا 10 الف دولار !!
مارو قال :
يا جماعة انتوا مش واخدين بالكم من حاجة مهمة العصاية بتاعتى مش شغاله !!
حنوش قاله :
ما انا معرفتش اتنقل .. عادى يعنى احنا كنا وسط سحرة فودو.
مارو قال :
ما احنا بعدنا اهو ومش شغاله برضه !!
هبطت بيهم ف مكان هادى ورجعت لهيئتى.
مارو فضل يجرب فى العصاية بتاعته ، مشتغلتش !!
حنوش جرب قدراته اختفى ورجع تانى عادى !!
نصير حط السيف عمودى وقال :
يا ننح ..
ننح ظهر..
نصير قاله :
يا سلام انت جاى تظهر دلوقتى !! مظهرتش ليه من شوية لما استدعيتك ؟!!
رد وقال :
عشان انت غبى .. انا مظهرتش عشان كنت بحميك.
السحر اللى كان حواليكم سحر معقد ولو كنت فكيته بالسيف كان اللى عامل السحر هيقدر يتحكم فى السيف عن بعد مؤقتا .. انا شكلى وقعت مع هواة ولا ايه!!! .. دا ناير كان يفهمها قبل ما تطير .. برضه الشغل مع المحترفين يفرق !!!
حنوش قال :
اخخ... انا عرفت كدا العصاية ليه مش شغاله !!
بصيناله باستغراب فقال لمارو :
فاكر لما العصاية اختفت واتشعلقت فى الهوا بعد ما فكيت السحر فى جزيره الدمى!!
مارو خبط رأسه وقال وهو متوتر زيادة عن اللزوم :
يعنى أيسر كدا بدل العصاية لما اختفت... العصاية دى لازم ترجع ..نصير جرب قول لننح يجيب ايسر هنا.
نصير لسه هيقول لننح ، ننح قطع كلامه وقال :
مش هينفع !!
نصير قاله :
ليه ؟!!
بصيناله باستغراب فقال :
الراجل حامى نفسه .. محترف .. مش زيكم!!
نصير قاله :
بقولك ايه خش فى السيف... انت طالع تبكتنا .. خش يا عم فى السيف مش نقصاك .
ننح اختفى..فقلتلهم :
زى ما قلتلكم قبل كدا المفروض مكناش مشينا وراه ولعبنا لعبته، اللعبة خلاص وضحت، أيسر بينهكنا وبيحاول يجردنا من الاسلحة اللى معانا .
ركزوا معايا عشان المرة دى .. احنا اللى هنلاعب ايسر مش هو اللى هيلاعبنا..
************************************************
" زيجا "
جريت من بيت عيلة ناير فى المقطم ناحية المكان اللى قالى عليه ايسر فى الجيزة , كنت ببص فى الساعة وبحسب الوقت.
فاضل 6 دقايق اجيز يحضر , جريت باسرع ما عندى .
اتفاجأت بيا بقف مرة واحدة وصوت اجيز بيقول على لسانى :
رايح فين يا زيجا ؟!! كدا يا راجل تنيمنى؟!!
قلتله :
ازاى المفروض فاضل5 دقايق!!
اجيز طلع لسانى وبص عليه بعينى قال وهو مزعور :
اعععع وديت لسانى فين ؟!!
كنت لابس كاب ومغطى نص وشى بنظارة كبيرة سودا, الناس كانت واقفه بتتفرج عليا وانا بتخانق مع نفسى ( اجيز ).
قالى :
بتتحد مع ايسر ضدى ..
وخنقنى بايدى!!
روحى كانت هتطلع فشديت ايدى من حوالين رقبتى وقلتله :
افهم يا اجيز !!
قلتله :
مش هفهم .. احنا لازم نموت دلوقتى .
شيلت ايده وانا بقوله :
وسع يا اجيز خلينا نتفق على حاجة تانيه غير الانتحار لازم ننتقم من ايسر.
كعبلت نفسى ووقعت على الارض فأجيز حط رأسي فى التراب وهو بيقول :
ننتحر الاول وبعد كدا نشوف موضوع ايسر!!
الناس اتجمعت حواليا وبدأو يفتوا وهما بيفسروا حالتى!!
اللى بيقول دا ستروكس يا معلم، منهم لله ولاد الكلب بيدمرروا شبابنا.
ومنهم اللى قال دا مسعور، واللى قال دا ملبوس.
سمعت واحد بيقول انا هكلم الاسعاف محدش يقربله.
شوفت رجلين بتقرب عليا وسمعت صوت ايسر وهو بيقول :
كنت فين يا زيجا يخربيتك .. يا جماعة بعد اذنكم ادونا مساحة دا مجنون وهربان من العباسية.
وطلع كرنيه مزور وقال :
انا الدكتور المعالج بتاعه.
وقرب منى وشكنى بابرة...اغمى عليا
صحيت لقيت نفسى متكتف تانى فى سرير المستشفى!!
قلتله يعصبية :
انت بتستعبط يا ايسر!!! مكتفنى ليه؟!! مش انا عملت اللى انت عايزه؟!!
ضحك وقالى :
انت عبيط يا زيجا؟ مفكرنى هأمنلك تانى؟!! انت هتفضل محبوس هحررك بس لما احتاج ابعتك مشاوير... وحضر نفسك عشان عندنا مشوار.
قلتله :
مشوار فين ؟!!
قالى :
ليبيا.. كهف حنوش.. مرات نور وبنته لوحدهم هناك.
وسكت شوية وقال :
تفتكر نور هيختار بنته ولا مراته؟!!!
- يتبع الفصل التالي اضغط على ( رواية ميراث نور ) اسم الرواية