رواية انت عشقي وقسوتي (كاملة جميع الفصول) حصريا عبر دليل الروايات بقلم دينا قدري
رواية انت عشقي وقسوتي الفصل الرابع والعشرون 24
- بارت ٢٤
شادى .. ادم انا عايز اعترفلك بحاجة .. كلامى مع ملك وتسرعى ده كان سببه الاساسى مروة .. هيا اللى اقنعتنى ان مفيش بينكم حاجة وفضلت تزن عليا واستغلت اعجابى بملك عشان تخلينى اتقدملها وتفرق بينكم
رتبت معايا معاد المقابلة مع ملك وبعدت عاليا صاحبتها عنها عشان تسهل عليا الموضوع
عشان هيا بتحبك ومستعدة تعمل اى حاجة عشان تفوز بيك .. وتبعدك عن ملك
وانا متأكد ان هيا السبب ورا المشكلة اللى بينك وبين ملك
ادم بصدمة .. مروة !! هيا اللى خلتك تعمل كدة معقول !!
وبتحبنى امتى وازاى وانا عمرى ما اديتها وش ولا بتكلم معاها اصلا
ثم تذكر مشهدها مع سليم وكيف كانت بحضنه يضمها بقوة متمنعة عنه مطالبة اياه بفسخ خطوبته من سيرين كى تكون معه
فتحير بأمرها اكثر
كيف تحبنى وفى نفس الوقت ترتبط بسليم !! اذا هناك شيئا خاطئ
شادى معللا .. هيا فاكرة ان ده حب .. بس هو اعجاب وحب امتلاك وانا فهمتها ده مفهمتش .. انت عشان مش مديها وش وحاسة انك صعب عليها عايزة تخليك تحبها بأى طريقة .. عايزة تفوز بيك عشان ترضى غرورها .. ده اللى بستشفه من طريقة كلامها
ادم بتفكير .. لا بس اكيد ملهاش علاقة بسبب انفصالى عن ملك .. السبب ده يخص ملك
شادى بعدم اقتناع .. جايز .. بس عامة حرّص منها .. مروة ناويالك على مصيبة سودا وانا لازم اقولك كل حاجة وابرأ ذمتى ادام ربنا عشان ضميرى يرتاح
ادم بقلق .. مصيبة ايه عايزة تعمل ايه قلقتنى
شادى .. انا هحكيلك كل حاجة
فلاش باك
شادى .. حتى لو بتحبيه .. هو مبيحبكيش ومش هيحبك ابعدى عنه واحفظى قلبك وكرامتك
مروة باصرار وتحدى .. هيحبنى يا شادى .. صدقنى هيبقى ليا .. انا هخليه ليا بأى طريقة
شادى .. هتعملى ايه يعنى !!
مروة .. انا عملت خلاص .. وعشان تتأكد وتصدقنى وتسمع كلامى هفهمك كل حاجة
انا عرفت ان خطيب اخته معانا فى الكلية .. ولاحظت انه لعبى وخفيف اى بنت ممكن توقعه .. فاستغليت الموضوع ده وحاولت اتقرب منه واوقعه عشان اعرف عن ادم كل حاجة واقدر اتقرب منه واكسب ثقته .
وفعلا عرفت منه ان باباه رجل اعمال كبير اوى وسليم يبقى ابن اخوه يعنى ابن عم ادم .. فاجأنى ان عندهم شركات كتير هنا وبرة وده طبعا خلانى اتمسك بادم اكتر واتأكد ان اختيارى ليه كان صح من الاول
بس بعد كدة فهمت ان سليم حاطط عينه على شركاتهم اللى برة عايز يديرها ويسيطر عليها شوية شوية
فلقيت دى احسن فرصة انى اكسب ثقة ادم .. لما اروحله واقوله ان خطيب اخته خاين وندل وانه بيحبنى ولازقلى وانا بصده باستمرار
واوصله انه خاطب اخته بس عشان فلوسها وشركاتها وانه وعدنى يفسخ خطوبته عشانى بعد ما يتمكن من الشركة .
كان يستمع لها بذهول غير مصدقا ان تلك الفتاة من دمه .. تلك الفتاة ابنة عمته والتى تعد بمنزلة اخته تبدو شيطانا امامه .. تدبر المكائد وتخطط لها باتقان كى توقع الناس ببعضهم
فهى على استعداد لعمل اى شئ مهما كان ضد مبادئها للوصول لاهدافها
شعر بالغضب والقرف الشديد تجاهها وود لو خنقها بيده كى يريح العالم من شرورها ولكنه تركها تكمل حديثها ليعرف ما تحيكه للبشر من حولها
أكملت مروة بخبث .. وعشان اكسب ثقته اكتر ويحس انى قلبى عليه ومستعدة اعمل اى حاجة عشانه
استغليت حب سليم ليا وخليته يرفض شغله برة مع عمه واتحججت انى رافضة يسافر وعايزة اعيش فى مصر
ووعدته ان هخلى خالى (باباك يعنى) يشغله معاه .. طبعا هو مكنش مصدق اصلا مين يطول يشتغل من دكتور سالم الدمنهورى
شادى باستغراب مخفيا لغضبه الشديد .. كمان !! طب وليه عملتى كدة استفادتى ايه
مروة بخبث .. ازاى باة .. منا لما اخليه هو بنفسه اللى يرفض الشغل معاهم واقول لادم انى عملت كدة عشان انقذهم منه وانى استغليت حبه ومثلت عليه عشان ميوصلش لشركتهم ويسيطر عليها
اكيد ادم ساعتها هيعجب بيا جدا وهبقى فى نظره المنقذة ليه ولاخته وهكسب ثقته
ولما هتقرب منه شوية شوية هيلاقى نفسه اتشدلى غصب عنه
شادى ولم يعد يحتمل اكثر من ذلك يشعر بالاشمئزاز الشديد تجاهها ليقول بانفعال .. انتى ايه شيطاااان .. دماغك دى سم ده الشيطان يسقفلك على تفكيرك المسموم ده .. عملتى كل ده امتى وازاى
مروة بفخر ظنا منها ان شادى يمدح بها وبذكائها .. امال انت فاكر ايه يابنى .. انا مفيش حاجة تصعب عليا .. وادم اللى شايفلى نفسه ده بكرة هيجيلى راكع .. انا بقالى سنة اعرف ابن عمه وهو رفض خلاص يشتغل معاهم يعنى الخطة ماشية زى منا عايزة
ثم اكملت بغل .. هيا بس ملك اللى عطلتنى شوية .. لما ظهرت فى حياة ادم كان لازم اخلص منها الاول عشان الساحة تفضالى واقدر انفذ خطتى
واهى غارت فى ستين داهية
ثم اكملت بغمزة .. والدور باة دلوقتى عليك تقربها منك وترتبط بيها عشان اتأكد انى خلصت منها نهائى
وحلال عليك يا عم ملك حبيبة قلبك
شادى بذهول .. حتى ملك مسلمتش منك .. عملتى ايه معاها عشان تبعديها كمان
مروة .. معملتش هيا اللى وقعت نفسها وده من حسن حظى .. ها هتتكلم معاها امتى
شادى بشرود وقلب حزين بسبب صدمته ببنت عمته .. ربنا يسهل هشوف
مروة .. حاول تستعجل يا شادى .. احسن ممكن فى اى وقت يرجعو لبعض وتبوظ كل خططنا
شادى بانفعال مفرط .. خططك انتى .. قصدك خططك انتى .. انا استحالة اقدر افكر بالطريقة دى .. ولا عارف كمان انتى ازاى بالدماغ دى
مروة .. وماله خططى انا .. بس فى الاخر مصلحتنا واحدة ولا ايه
شادى بتفكير وقد عاد لشروده مرة اخرى .. مش عارف
مروة .. لا عارف يا شادى .. انت هترتبط بملك وانا هتقرب من ادم وارتبط بيه وتقفل بالنهاية السعيدة
فكر كويس ومستنية ردك .. سلام
شادى فى نفسه بعد انصرافها .. نهاية مهببة على دماغك يا شيخة .. منك لله كنت ما صدقت خرجت من القرف ده وبعدت عنه .. دخلتينى فى مستنقع قذارة مش عارف هخرج منه ازاى
باك ..
استمع ادم له بعيون مصدومة مصطبغة بلون الدماء من شدة الغضب والغيظ تكاد تشتعل لتحرق العالم باكمله
لا يصدق ان هناك شخص بكل ذلك الشر والحقد .. لم يستوعب تفكيرها او عقليتها الحقيرة تلك
اخذ يفكر .. كيف ابعدتنى عن ملك !! أيعقل ان يكون لها علاقة بمحمد ايضا !! لا فمحمد يعد من عائلة ملك وايضا كان على علاقة معها اذا لا علاقة لمروة بهذا الامر
ولكن كيف لها ان تفعل ذلك بأختى .. توقع بخطيبها وتسرق قلبه لتفوز بشخص اخر !! اية عقلية هذه
ادم بغضب شديد .. ده ايه كل الشر ده .. دى جبروت .. ليكمل بعدم تصديق .. هو انت متأكد انك بتتكلم عن مروة اللى معانا فى الدفعة ؟!
شادى بأسف .. للاسف متأكد .. عارف انا لو كنت سمعت من اى حد .. لو كنت شوفتها بنفسى حتى مع سليم كنت هكدب عنيا .. كنت هلاقيلها الف مبرر ومبرر ولا انى اشك فيها للحظة .. لكن دى حكتلى بنفسها .. كله بعضمة لسانها والله ما زودت كلمة على كلامها
ادم وقد انفلتت منه كلمة رغما عنه .. حقيرة
ثم نظر لشادى بحرج متذكرا انه ابن خالها .. انا اسف .. بس اللى تعمل كدة بصراحة تستاهل اكتر من كدة
شادى باسف .. انا عارف انت معاك حق .. انا مش طايقها بس من ساعة ما بخت سمها ده فى وشى وانا مش عارف اتصرف ولا اخد قرار
بس اللى اتأكدت منه انى لازم امشى .. خلاص مبقتش قادر استحمل المستنقع اللى اتدبست فيه ده اكتر من كدة .. العك هنا زاد اوى وبقيت حاسس ان ده مبقاش مكانى .. ومش طايق اشوف وشها
بس كنت لازم اقولك كل حاجة قبل ما امشى .. مكنتش هسامح نفسى ابدا لو سبتها تضركم وتعملكم مشاكل اكتر من كدة وانا واقف اتفرج .. رغم انها قريبتى بس فعلا مينفعش يتسكت عليها اكتر من كدة
كل اللى طالبه منك متأذيهاش .. خلى بالك منها بس .
ادم متذكرا ما حدث لملك بالامس .. لتكون هيا السبب كمان فى اللى حصل لملك
شادى بقلق .. حصل ايه لملك ؟!
ادم .. اتحبست فى الاسانسير وكانت هتتخنق .. كانت هتموت يا بشمهندس.
شادى .. كمان !! معقول تكون وصلت بيها لكدة ؟!
ادم .. بيتهيألى اللى تفكر بالوضاعة دى .. سهل اوى عليها تفكر تقتل .. بس ده معناه ان مروة بقت خطر علينا .. عليا وعلى ملك كمان
شادى .. ومتنساش سليم اللى طمعان فيكم ده كمان .
ادم .. انا عارف ان سليم شخص حقير من الاول .. وكنت حاسس فعلا ان عينه على فلوس سيرين وشركات بابا .. بس متوصلش لدرجة الخيانة .. انا شوفتهم بعنيا امبارح ولحد اللحظة دى مكنتش قادر اصدق ولا استوعب
شادى .. بجد شوفتهم ؟ .. سمعت كانو بيقولو ايه؟!
ادم بغضب .. الحقير .. كان بيقولها هيطفش سيرين عشان مش قادر يسيبها .. طبعا خايف على شراكة ابوه وابويا وخايف على منظره فى العيلة
بس انا مش هسكت .. لازم اربيه
شادى .. كل يوم بيعدى بتأكد ان كان قرارى صح يوم ما فكرت اسيب الكلية .. فعلا مبقتش قادر اتحمل
ادم .. وانت ناوى تعمل ايه بعد الكلية ؟
شادى .. هشتغل مع بابا فى شركته .. واكمل رسالة الماجستير لحد ما ربنا يكرمنى وافتح بيزينس خاص بيا
ادم .. ربنا يوفقك يا بشمهندس .. كنت انت اللى بتشجعنى اتعين فى الكلية فاكر.
شادى .. ومازلت .. مش معنى ان تجربتى كانت فاشلة انك تكون زيى .. انت ما شاء الله عندك شخصية قوية وكاريزما ومستواك الدراسى مفيش كلام عليه
ولو دخلت فى سكة التدريس هتنجح جدا .. مش عارف رافض ليه
ادم .. عشان انا كمان حابب اشتغل فى بيزينس خاص بيا .. وباذن الله قريب افتح شركتى انا كمان الخاصة
شادى بمزح .. لاااا ده كدة هنبقى منافسين لبعض باة
ادم .. يا خبر يا بشمهندس ده انا يبقى ليا الشرف والله ان نشتغل مع بعض
شادى .. ربنا معاك يا ادم .. واتمنى تكون مش زعلان منى قبل ما امشى
ادم .. لا خلاص حصل خير .. ده انا حزين والله انك هتمشى وتسيبنا
شادى .. اديك شايف بنفسك الوضع مبقاش متحمل
ادم .. عندك حق .. ربنا يوفقك انت كمان فى شغلك الجديد
شادى .. لو احتجت اى حاجة انا هكون سعيد جدا انك تطلبنى
ادم .. متشكر جدا
....
ظل شاردا طوال اليوم يفكر بما اكتشفه مؤخرا والذى لم يستوعبه عقله حتى الان .. يشعر بالنيران تحرق قلبه لأجل شقيقته التى تخدع امام عينه ولا يقوى على حمايتها
يشعر بالغضب والحقد الشديد تجاه ذلك الشخص الذى يستغل حبهم وثقتهم به لتحقيق اغراضه واطماعه
ولم يكتفِ بذلك بل وصل به الحال للخيانة .. خيانة خطيبته وابنة عمه التى وثقت به وسلمت له قلبها ومشاعرها وما يكن ليستحقهم يوما
ظلت الصدمة مسيطرة عليه تماما وقد ظهر عليه حتى لاحظت ملك
وكيف لا وهى دائما ما تحاول استراق النظرات له وتراقبه عن بعد رغما عنها .. ولكنها لم تره بذلك الحال من قبل
ملك .. هو ادم ماله شكله مبلم كدة ليه ومش على بعضه خالص
عاليا بلوم .. عايزاه يكون ازاى يعنى بعد اللى عملتيه معاه ... باة يامفترية الراجل يبقى لسة عامل فيكى جميلة ومرجعك من الموت وكان هيتجنن عليكى وفى الاخر تعملى معاه كدة .. لا وتتخانقى كمان معاه ادامنا .. حرام عليكى بجد
ملك بحزن .. اعمل ايه يا عاليا .. ببقى خلاص قررت اصفاله واسامحه ومجرد ما اشوفه واحاول اقرب افتكر اللى عمله وقسوته معايا وعنيه اللى كانت مليانة كره واحتقار .. بجد نظراته كانت صعبة اوى وصعب عليا انساها .. كل ما ببص فى عنيه بفتكرها وبتصعب عليا نفسى اوى .. فجأة بلاقى نفسى اتحولت وقلبت عليه تانى غصب عنى
عاليا .. طب وعايزاه يكون ازاى باة .. ما طبيعى يكون زعلان ومخنوق كدة امال عايزاه يكون مظأطط من الفرحة وانتى كل ما تشوفيه ترميله دبش فى وشه
ملك وهى تتأمله بالخفاء .. لا بس هو مش زعلان ولا حتى مخنوق .. فى حاجة فى ملامحه مش قادرة افهمها .. نظرات عينيه فيهم حاجة غريبة .. زى ما يكون مش مركز كدة تايه فى حاجة غلط
عاليا .. بقولك ايه بدل الحيرة دى ما تروحى وتسألى عليه .. واهو تصلحى شوية من العك اللى عكيتيه معاه
ملك .. انا اكلمه !! ازاى يعنى ده انا مبحاولش ابدأ معاه كلام ابدا
عاليا .. خليكى لحد ما يزهق ويفقد الامل .. ساعتها متلوميش غير نفسك
ملك .. قصدك ايه ؟
عاليا .. قصدى لو ناوية تسامحيه بس بتعذبيه شوية ممكن بعد فترة هو اللى يبعد ويزهق .. مش هيفضل طول عمره يعنى مستنيكى .. فلو ناوية فعلا ترجعيله متضيعيش وقت اكتر من كدة .. احسن يعمل زى صاحبه ويبعد هو كمان
ملك بعدم فهم .. صاحبه مين ؟!
عاليا .. عمر يعنى هو فى غيره !
ملك .. اه صحيح .. انا ملاحظة ان علاقتك انتى وعمر الفترة دى مش تمام .. مش كنتو اصحاب خصوصا بعد ما اتقابلتو فى البلد !
عاليا .. الموضوع معقد شوية يا ملك .. لا ده مكلكع كلكيعة مكعبرة اد كدة .. وملوش حل للاسف
ملك بشك .. مممم هو انتى بتحبيه يا عاليا ؟
اصطبغت وجنتيها بحمرة الخجل ليعتلى وجهها ابتسامة ملتمعة بالعشق رغما عنها بينما تسارعت نبضات قلبها حتى كادت ان تصل لاسماع ملك
ملك هاتفة .. طب والمصحف كنت حاسة .. بس كنت بكدب نفسى .. خصوصا لما كنتى مخطوبة كنت بقول لا اكيد انا احساسى غلط
عاليا بحرج .. مكنش فيه حاجة يا ملك .. صدقينى مكنش فيه اى حاجة ساعتها .. جايز كنت بحس منه هو حاجة .. بس ولا مرة جاريته ولا مرة اديت لنفسى الفرصة حتى افكر مجرد تفكير
كان كل تفكيرى وقتها فى احمد بجد
ملك باندهاش .. ايه ده يعنى هو كمان بيحبك ؟ وقالك انه بيحبك ؟
عاليا تومئ برأسها علامة الايجاب بحزن
ملك .. طب وفين المشكلة باة .. هو بيحبك وانتى بتحبيه يبقى ليه بتقولى الموضوع معقد !!
عاليا .. يا سلام ! .. طب ما ادم بيحبك وانتى بتحبيه ومع ذلك فيه كلاكيع برضو .. الحياة مش دايما وردية يا ملك للاسف
ملك .. طب انتى قلتيله ايه لما اعترفلك بحبه ؟
عاليا .. ولا حاجة .. قلتله انى محتاجة شوية وقت .. ومن ساعتها والنار قايدة بيننا
ملك .. طب ليه طلبتى منه وقت وجرحتيه كدة !!
عاليا .. غصب عنى مش بايدى .. ومش قادرة حتى افهمه.. وهو ده اللى مزعله منى وبعد عنى هو كمان بعد ما كان بيستغل اى فرصة عشان يقرب منى
ملك .. طب ما عنده حق .. من حقه يفهم عايزة وقت لايه
عاليا بانفعال وقد فقدت اعصابها .. انتو ليه مش مقدرين التجربة المهببة اللى انا مريت بيها !! .. ليه مش قادرين تحسو بيا ولا بمشاعرى .. انا اتجرحت يا ملك واتجرحت اوى .. حتى لو مكنش فيه حب كان بيننا اللى اكبر من كدة .. كان بيننا علاقة رسمية ادام كل الناس وفجأة نهى العلاقة دى بمنتهى السهولة .. ازاى هقدر اثق فى حد تانى واديله مشاعرى .. ازاى هحس بالامان مع حد من غير ما اخاف انه يغدر بيا زى اللى قبله
انا اتسابت يوم فرحى يا ملك فاهمة يعنى ايه .. يعنى اى علاقة هدخلها هفضل قلقانة تنتهى لحد يوم الفرح
غصب عنى مهما كنت متأكدة من مشاعره ناحيتى هفضل خايفة يسيبنى فى اى لحظة
وان كنت اتجرحت واتكسرت كدة وانا محبتش احمد
تفتكرى ايه اللى ممكن يجرالى لو عمر سابنى بعد ما اديته قلبى ومشاعرى !!
ملك بشفقة على حال صديقتها .. انا مقدرة اللى بتقوليه يا عاليا .. بس انتى برضو لازم يكون عندك ثقة فى نفسك وفى اللى حواليكى اكتر من كدة .. مش معنى ان واحد طلع ندل معاكى انه كله هيطلع كدة
عاليا .. لو كان الموضوع سهل كدة مكنتيش انتى كمان خوفتى ادم يسيبك تانى .. رغم انك عارفة ومتأكدة من حبه ليكى .. بس برضو مش قادرة تنسيهاله
ملك .. عندك حق .. بس ده نفس الشخص اللى جرحنى قبل كدة وطبيعى اكون قلقانة منه .. اما انتى خايفة من شخص معملكيش اى حاجة وبتاخديه بذنب واحد تانى .
لازم تحاولى تفصلى وتبطلى تقارنى بينهم
عاليا وقد بدأت بالانهيار .. عشان كدة طلبت شوية وقت .. عشان العقدة اللى جوايا دى تروح .. لان لو فضلت موسوسة وقلقانة كدة من ناحيته مش هقدر اسعده بالعكس هعيشه واعيش نفسى دايما فى شك ونكد وقرف .. عشان كدة بقول نخلينا صحاب احسن دلوقتى لحد ما احس انى بدأت اتعافى من العلاقة اللى دمرتنى دى وربت جوايا جرح وعقد مبتخلصش
وبعدين لو ارتبطنا دلوقتى علطول كدة الناس هتقول ايه !! هتقول انى سبت خطيبى وجوازنا اتلغى بسببه .. او الانيل لو تقول ان هو اللى سابنى لما عرف بعلاقتنا
ملك .. طب ما تفهميه يا عاليا .. جايز لما يفهم يصبر عليكى
عاليا ببكاء ودموع متساقطة رغما عنها .. افهمه ايه يا ملك .. اقوله انا مش واثقة فيك .. تفتكرى ينفع اقوله كدة !! ولا اقوله انا خايفة تبيعنى وتسيبنى زى خطيبى الاولانى ما سابنى .. ويحس ساعتها بضعفى وانكسارى ادامه !!
للاسف مفيش حاجة ينفع تتقال .. حتى مينفعش اقوله ان وجوده فيه خطر على سمعتى خصوصا دلوقتى .. مقدرش اجرحه بالطريقة دى .. عشان كدة هو لو بيحبنى لازم يصبر عليا من غير اسباب
ملك .. طيب اهدى وبطلى عياط .. تعالى ندخل الحمام تغسلى وشك بلاش حد يشوفك كدة
....
بعد انتهاء المحاضرات .. وجدته يجلس وحيدا شاردا على الدرج امام مبنى القسم ويبدو مهموما حزينا
فجلست بجانبه ولكنه لم يشعر بها ولم ينتبه لها من الاساس فقالت
ملك بتعجب .. ياترى ايه اللى شاغلك اوى كدة لدرجة متحسش بوجودى جنبك
انتفض ادم متفاجئا بوجودها بجانبه قائلا .. ملك !
ملك .. يااااه ده انت مش هنا خالص .. مالك يا ادم فى ايه ؟!
ادم ناظرا فى الفراغ .. مفيش حاجة
ملك .. ده على اساس انى مش عارفاك يعنى .. وعارفة عنيك بتبقى عاملة ازاى لما تكون مشغول بحاجة
نظر بعيونها بتمعن متأثرا قائلا .. تعرفى انى كنت محتاجك فعلا جنبى دلوقتى .. زى ما يكون ربنا بعتك ليا عشان ترحمينى شوية من اللى انا فيه .. كفاية بس ابص لعيونك شوية عشان انسى كل همومى
تلون وجهها بلون الدماء خجلا فازاحت عينها بعيدا عنه تحاول تدارك نفسها وعدم الانصياع لأوامر قلبها قائلة
ملك وهى تنظر بعيدا عنه .. وياترى ايه هيا الهموم دى .. احكيلى يمكن اقدر اساعدك
ادم .. يعنى اهمك اوى !! ولسة بتخافى عليا ؟!
ملك .. لو متهمنيش هاجى اسأل عليك ليه .. شكلك مش طبيعى وده قالقنى
ادم .. متقلقيش يا حبيبتى انا كويس .. شوية مشاكل بس هتتحل متشغليش بالك
هبت واقفة بضيق وقد انزعجت لشعورها بأنه لايريد ادخالها بتفاصيل حياته مرة اخرى
ملك .. طيب براحتك .. انا قلت اسال عليك بس .. عن اذنك
وتركته وذهبت بينما غرق هو بشروده واوجاعه مرة اخرى غير مدركا ضيقها
حتى اخذ يوبخ نفسه قائلا
الى متى ستظل مصدوما هكذا .. الى متى ستستسلم للامر الواقع تاركا الخطط والمكائد تدبر وراء ظهرك .. ألم تهتم لأمر شقيقتك .. ألم تخاف عليها من ذلك الخبيث الخائن الذى سيدمرها ويجرح مشاعرها بحقارته تلك
وملك .. حبيبة الروح ومالكة قلبك .. ستتركها تضيع من بين يديك مرة اخرى ... استفسح المجال لتلك الحقيرة كى تقضى عليها وتحرمك وجودها !!
فهى بالفعل حاولت قتلها .. قتل حبيبة قلبك والوحيدة التى استطاعت احتلال ذلك القلب .. وقد تحاول مرة اخرى واخرى فقط كى تتخلص منها
استتركها تفعل ما تشاء !!
لا ادم .. حان الوقت كى تستفيق من اوجاعك فورا قبل فوات الاوان .. يجب ان تفعل شيئا قبل ان تندم بوقت لا ينفع فيه الندم
ظل يفكر مساءا بغرفته كيف سيتصرف وكيف سيمكنه كبح جماح تلك ال مروة .. وصد اذاها هى و سليم عن اخته
فتلك الحقيرة تحث سليم ان يترك اختى بأسرع وقت .. اذا فلابد ان الحق به قبل ان يفعلها .. قبل ان يجرحها ويكسر قلبها
لن اتحمل رؤية اختى تصدم وتتألم بسبب ذلك الندل الخبيث .. لا يستحق دمعة واحدة منها
اذا لألاعبك بنفس طريقتك مروة .. سأكون المنافس الاقوى لحقارتك وقذارتك تلك .. ولنرى بالنهاية من سيكون الرابح .. صبرا وسأريكى الوجه الاخر لادم
يبدو ان لابد لقلبك ان يتنحى جانبا ادم .. لابد ان تخمد مشاعرك قليلا كى تستطيع حماية تلك الغاليتين لقلبك
سامحينى ملك .. سأتخلى عنك وعن حبك فقط كى احميكى حبيبتى .. لكى ابعدك عن الخطر الذى يداهمك سأتحمل بعدك وهلاكى .. سأحافظ على حياتك حتى وان فقدت روحى وحياتى لأجلك .
اعدك ملك .. من اليوم ستكونين بأمان .. ولكن سامحينى لن يبقى لنا فرصة الان كى نكون سويا حبيبتى
ولكن اعدك بعودتى لقلبك بأسرع وقت .. فقط انتظرينى
.......
بعد انتهاء المحاضرات
ظل يبحث عنها حتى وجدها وحيدة بالكافيتريا .. فتوجه اليها مباشرة قائلا
ادم .. بشمهندسة مروة .. لو سمحتى عايزك فى موضوع مهم .. فاضية نتكلم شوية ؟
مروة بذهول وقد تجمدت بمكانها لا تصدق ان ادم بنفسه قبالتها بل ويريد التحدث معها
مروة .. ا ا انا .. عايزنى انا
ادم .. ايوة انتى .. لو فاضية يعنى
مروة بتلقائية .. طبعا فاضية
ادم .. طيب ممكن نروح نعد فى اى مكان برة الكلية .. عشان نتكلم براحتنا
مروة .. كمان !! هنخرج برة الكلية ؟!
ادم .. يعنى لو ميضايقكيش .. اصلى مش هعرف اتكلم هنا براحتى وسط الطلبة وكدة
مروة .. اكيد ميضايقنيش .. انا بس مش مصدقة .. بس يلا انا جاهزة
ادم .. طيب مش هتكلمى مامتك تقوليلها عشان متقلقش عليكى
مروة .. لا عادى مش هتقلق هيا عارفة انى فى الكلية وبتأخر عادى
ادم .. طيب يلا بينا
.....
توجه بها الى احد الكافيهات والذى تعمد الا يكون نفس المكان الذى يتردد عليه مع ملك للعمل على المشروع
جلست تتأمله وتنظر له بعدم تصديق
مروة .. انا مش مصدقة انى اعدة معاك هنا .. وبنتكلم .. عمرى ما تخيلت ان ده ممكن يحصل
ادم .. بصراحة ولا انا .. بس الحياة مليانة مفاجأت .. المهم قوليلى تشربى ايه
مروة .. كابتشينو
قام بالنداء على الجرسون وطلب المشروبات ثم بدأ بالحديث
ادم .. بصى يا مروة .. انا عارف ان الكلام اللى هقولهولك ده صعب يتصدق .. بس هيا دى الحقيقة للاسف
واردف بكلمات مرتبة مدروسة بعناية .. انتى عارفة طبعا انى كنت مرتبط بملك .. وكنت بحبها
مروة بتبرم .. اه عارفة
ادم .. تعرفى سيبتها ليه ؟
مروة بارتباك .. ل ل لأ .. وانا .. وانا هعرف منين
ادرك ادم حينها انها بالفعل لها يد فيما حدث بينه وبين ملك كما توقع شادى
شعر بالغضب يكاد يمزقه اربا يود لو يخنقها بيده كى يشفى غليله ويريح العالم من شرورها
ولكنه تظاهر بالبرود وتجاهل ارتباكها هذا قائلا
ادم بكره مصطنع .. اكتشفت انها كانت بتخدعنى .. كانت بتمثل عليا وعمرها ما حبيتنى
تخيلى .. تخيلى ان الانسانة الوحيدة اللى اديها قلبى تطلع خاينة ومتستاهلهوش .. وانتى اكيد عارفة انى مدتش فرصة لاى واحدة قبل كدة تقرب منى
مروة .. اه .. طبعا .. دايما كنت بقول عليك جبل ما يهزك ريح
ادم .. تخيلى باة لما الجبل ده تضحك عليه واحدة وتفهمه انها بتحبه وهيا فى الحقيقة بتحب شخص تانى ولما سابته قالت تغيظه وترتبط بغيره
يعنى انا بالنسبة لها كنت مجرد واحد بتغيظ بيه واحد تانى
شوفى باة انا كارهها ازاى دلوقتى ومش طايقها
مروة .. غريبة .. مع انى بشوفكم كتير مع بعض
ادم بضيق .. غصب عنى معايا فى المشروع وكمان مندوبة الدفعة معايا .. مضطر اتعامل معاها ونشتغل سوا غصب عنى
مروة .. ممممم
ادم .. انا اتصدمت فيها اوى .. بس مسكتش مسحت بكرامتها الارض لما عرفت الحقيقة وقلتلها ان انا كمان عمرى ما حبيتها وكنت بتسلى بيها .. حسستها انها نكرة ولا تفرق معايا
كنت عايز انتقم لقلبى وكرامتى بأى طريقة .
مروة .. طب وانت بتقولى الكلام ده انا ليه دلوقتى .. انا فى ايدى حاجة اعملهالك يعنى ؟
ادم مبتسما .. طبعا .. انا .. انا محتاجك جنبى يا مروة
اتسعت عيناها باندهاش قائلة .. ايه ؟!
ادم .. انا جربت احب واتخدعت .. عشان كدة قررت ادور على اللى تحبنى من قلبها بجد واللى تخلصلى وتستحق اديها قلبى .. ولما دورت حواليا لقيتك انتى اكتر واحدة ممكن اقرب منها .. حاسس ان حبك ليا حقيقى وصادق من قلبك وده اللى بدور عليه .. عارف انك ياما لمحتيلى وكنت بتجاهل تلميحاتك
بس كنت غبى .. فعلا كنت غبى ان اضيع من ايدى واحدة بتحبنى اوى كدة.
مروة .. ادم انا .. انا .. مش مصدقة .. انا بحلم صح
امسك بيدها قائلا
ادم بابتسامة .. لا يا مروة مبتحلميش .. انا فعلا معجب بيكى و قررت اكون معاكى انتى .. انتى اللى هتقدرى تنسينى ملك وتاخدى مكانها فى قلبى .. وانتى اللى هتخلصيلى وهبقى متطمن معاكى
بس ياترى هتوافقى !!
مروة باندفاع .. طبعا يا ادم انت بتقول ايه .. ده انا بتمنى اللحظة دى من زمان .. لحظة ما تجيلى وتقولى انك عايزنى .. انا بجد حاسة انى بحلم
ادم .. حتى وانتى عارفة انى لسة بحب ملك ولسة مقدرتش انساها و احس بالحب ناحيتك
مروة .. انا هنسيهالك .. المهم عندى ان انت اختارتنى انا واخيرا حسيت بيا .. اخيرا حسيت بمشاعرى ناحيتك
واوعدك قريب اوى انت كمان هتحبنى وهتنسى ملك دى خالص
ادم .. بس عايزين نتفق على حاجة مهمة جدا .. مش لازم ابدا حد يعرف بعلاقتنا ولا يحس بيها .. يعنى هنتعامل فى الكلية وادام صحابنا عادى كأن مفيش اى حاجة بيننا .
مروة باستنكار .. وليه باة كدة ؟!
ادم .. عشان مينفعش ابقى لسة سايب ملك وتانى يوم يشوفونى مع واحدة تانية انتى عارفة وضعى فى الدفعة .. ثم اكمل بخبث
ادم .. وكمان ممكن يقولو ان انتى السبب فى اننا سيبنا بعض وانك وقعتى بيننا مثلا عشان تقربى منى
مروة بارتباك .. انا !! .. وانا مالى .. وانا هوقع بينكم ليه
ادم .. انا بقول ممكن يفهمو كدة .. ساعتها الكلام هيكتر علينا وهتبقى سمعتك وحشة اوى .. وانا خايف عليكى مش عايز حد يطلع كلام عليكى .. وبعدين كلها شهرين ونتخرج ونبقى براحتنا
مروة .. ممممم
ادم .. ده طلبى الوحيد وياريت توافقى وتفهمى انه لمصلحتك عشان ميحصلناش مشاكل
مروة .. ماشي يا ادم .. المهم نكون مع بعض
لمح الجرسون يتقدم نحوهم بالمشروبات فقال
ادم .. معلش ممكن اعمل مكالمة من تليفونك .. عشان موبايلى فصل وزمان عمر بيدور عليا فى الكلية مقلتلهوش انى ماشي
مروة .. اكيد طبعا اتفضل .. ثم فتحته وناولته اياه
قام الجرسون بوضع المشروبات الساخنة امامهم وانصرف حين قام ادم بالتقاط الكوب الخاص به بينما جذب احد اطراف مفرش الطاولة ليسقط عليها الكوب الساخن الخاص بها وتصيح صارخة
مروة .. اااااااه
ادم بتمثيل .. ايه اللى حصل مالك !!
مروة بتألم .. ااااااه اتحرقت .. رجلى مولعة ااااه
ادم بلهفة كاذبة .. طب الحقى روحى اغسليها بسرعة تحت المياه .. بسرعة يلا
ركضت مسرعة تتأوه بينما يضحك هو بداخله مستمتعا بتألمها متذكرا نفس المشهد والالم الذى قد تسببت به سابقا لمعشوقته ليشعر بالسعاده لثأره لها
ظل ممسكا بهاتفها وهو يراقبها بعيونه حتى تأكد من دخولها الحمام
اتصل برقم عمر واغلق سريعا ثم قام بفتح الرسائل بينها وبين سليم والتقاط الصور لها على هاتفه كى يستطيع قراءتها لاحقا ومعرفة ما يدور بينهم
حتى وجد اخر رسالة لها منه باعثا لها بموقع احد الكافيهات كى يتقابلا به .. استغل تلك الفرصة ليبعث له برسالة من هاتفها
( سليم عايزة اتكلم معاك .. قابلنى فى نفس الكافيه بعد ساعة ومتتصلش بيا لحد ما نتقابل )
ثم قام بمسح الرسالة وعمل حجب له كى لا يستطيع الرد مع وضع الهاتف على وضع الصامت حتى لا تنتبه مروة اذا اتصل بها
وما ان خرج من صفحة الرسائل بينهم حتى لمح اسم حبيبته باخر رسالة لها مع صديقتها
( وهيا ملك دى بتموت ابدا دى ....
انتفض قلبه مفزوعا ليفتح بالرسالة بسرعة قارءا محتواها
فوجد محادثتها مع رحاب كالتالى
رحاب .. مروة اوعى يكون ليكى ايد فى اللى حصل لملك انهاردة
مروة .. وايه اللى حصل لملك ؟!
رحاب .. متستعبطيش عليا يا مروة انتى عارفة كويس اقصد ايه .. انا شوفتك كنتى بصالها ازاى وادم شايلها وهيا مغمى عليها
مروة .. بصالها ازاى يعنى .. كنت مستغربة بس ازاى مماتتش بعد اللى حصل فيها
رحاب .. وانتى عرفتى منين اللى حصل فيها .. قولى الحقيقة يا مروة انتى ليكى ايد فى اللى حصل ؟
مروة .. ايوة انا السبب .. وانا اللى حبستها فى الاسانسير ارتاحتى
رحاب .. يا نهار اسود ومنيل انتى اتجننتى .. دى كانت ممكن تموت فيها حرام عليكى
مروة .. وهيا ملك دى بتموت ابدا .. دى عاملة زى القطط بسبع ارواح .. ياريتها كانت ماتت وخلصنا منها باة
هنا تجحظت عيونه مذهولة لتشتعل بنيران الغضب والكره الشديد لمروة .. لا يصدق ان تكون بتلك القذارة ليصل بها الحال لقتل روح بريئة فقط لتحقيق اغراضها .. وان كان عنده شك .. فالان قد تيقن من كل شكوكه تجاهها
شعر بغضبه الشديد يكاد يحرق كيانه ليضغط على هاتفها بيده بعنف شديد حتى كادت قبضته ان تمزقه اشلاء
ادم فى نفسه .. حسابك تقل معايا اوى يا مروة .. توصل بيكى تقتليها يا حقيرة .. الحمدلله ربنا نجدها منك ولحقتها فى الوقت المناسب
لمحها تأتى من خلفه يبدو عليها التألم الشديد فقال شامتا
ادم بكره شديد .. موجوعة اوى من حتة حرق صغير .. ده انتى مش تستاهلى الحرق ده انتى تستحقى الرجم والشنق يا قذرة .
ولكنه سرعان ما ابدل ملامح وجهه لابتسامة مصطنعة يشوبها بعد القلق قائلا
ادم .. ايه عاملة ايه دلوقتى
مروة بتألم .. ااه تعبانة اوى يا ادم . الحرق جامد اوى ورجلى كلها محمرة
ادم .. سلامتك .. طب روحى باة حطى كريم ولا حاجة وارتاحى
مروة .. لا هعد معاك شوية
ادم .. لا شكلك تعبانة خلاص روحى ونبقى نخرج يوم تانى .. لسة الايام جاية كتير
مروة .. اخيرا يا ادم حسيت بيا وفهمت انا اد ايه بحبك
ادم بكلمات موحية.. ايوة يا مروة اخيرا فهمتك صح .. سامحينى اتأخرت شوية بس كنت معمى ودلوقتى فتحت وعرفتك كويس
مروة .. انت مش متخيل انا سعادتى انهاردة اد ايه
ادم .. اه صحيح خدى تليفونك كنت هنساه
مروة باهتمام .. كلمت عمر ؟
ادم .. لا مردش .. يلا روحى باة عشان ترتاحى شوية وهبقى اتصل اتطمن عليكى
مروة بسعادة .. وانا هستنى مكالمتك .. سلام
ادم .. باى
وما ان ادارت ظهرها له حتى تحولت ملامح وجهه للحقد والكره الشديد متوعدا اياها بالانتقام لمحبوبته وشقيقته التى تخطط لكسر قلبها دون وجه حق
ادم .. ودلوقتى الدور عليك يا سليم الكلب .. انا هربيك يا حقير
.....
بعد فترة .. دخل ادم الكافيه فوجد سليم ينتظرها بلهفة
وقد قام باعداد الطاولة لها بانواع شتى من الحلويات الشهية والمشروبات المنعشة
نظر لهيئته تلك باحتقار ثم تقدم اليه ليفاجؤه بوجوده قائلا
ادم .. ايه مستنى حد يا سليم ولا ايه ؟!
سليم بارتباك متفاجئا بوجوده .. ادم !! .. لا وانا .. وانا هستنى مين يعنى
جلس بمقابله ليجول بنظره على تلك الطاولة الرائعة امامه قائلا
ادم .. امال ايه كل ده .. لو مكنتش سيرين مسافرة كنت قلت انك مستنيها .. بس سيرين فى الامارات انت عارف
ثم وضع يده بذقنه مفكرا قائلا .. تبقى مستنى مين يا ترى 🤔
سليم .. عادى يعنى ناس صحابى .. هكون مستنى مين يعنى !
ادم ببرود .. مممم ممكن تكون مروة مثلا
صدم سليم قائلا بارتباك .. م مروة مين دى ؟؟
ادم بحدة .. قبل ما تلف وتدور وتعمللى فيها عبيط لازم تفهم انى عارف كل حاجة .. وبالتفصيل
سليم بتوتر وقد بدأ العرق يتصبب منه .. عارف !! .. عارف ايه ؟!
ادم مستندا بظهره على المقعد بأريحية قائلا .. عارف مثلا علاقتك بمروة .. وخيانتك لأختى يا حقير .. وخد التقيلة باة .. كل اللى بيحصل ده من تخطيطى انا .. انا اللى عملت كدة
سليم بتعجب .. عملت ايه ؟! انا مش فاهم حاجة
ادم .. انا افهمك .. اللى انت متعرفوش يا سليم انى مرتبط بمروة من زمان .. ومتفقين عالجواز
سليم بذهول .. نعم !! انت بتقول ايه ؟!
ادم ببرود .. اصبر على رزقك بس ده لسة التقيل كله جاى .. انا طبعا عارف من الاول انك حقير وملكش امان .. سبحان الله يا اخى عمرى ما ارتحتلك ولا اطمنت على اختى معاك
عشان كدة اتفقت مع مروة تلعب عليك قلت اشوف هتطلع مخلص فعلا وانا اللى ظالمك ولا هتقع علطول
وللاسف مخدتش غلوة وسقطت فى الامتحان .. طلعت خاين بتريل على اى واحدة تقولك كلمة حلوة .. ومش بس كدة .. ده انت طلعت احقر مما كنت اتخيل
يعنى تخطب اختى وتتقرب منها عشان طمعان فيها وفى فلوسها وقلنا ماشى
لكن توصل بيك انك تفكر تسيطر على شركاتنا !! توصل بيك انك عايز تدمر ابويا .. ابويا اللى فتحلك بيته ووثق فيك وأمنك على بنته .. تكون جزاته انك تستغل طيبته دى وتستولى على املاكه !!
سليم بجنون .. محصلش .. الكلام ده كدب .. كله كدب
ادم .. للاسف مش هتقدر تنكر .. لأن الكلام ده انت قلته بنفسك لمروة .. وقلتلها اللى اكتر من كدة ولا نسيت .. نسيت انك قلتلها هتسيب اختى وتطفشها عشان تكون معاها !! هتكسر قلب اختى اللى حبتك وادتك قلبها بس عشان شهواتك ونزواتك الحقيرة
ثم نظر له باحتقار قائلا .. طبعا بعد ما عرفت كل وساختك دى كان لازم اوقعك فى شر اعمالك واحمى ابويا وارحمه من اللى ناوى تعمله فيه ..فخليتك انت بنفسك ترفض تشتغل معاه بره وتسيبه يعين واحد مكانك .. وده طبعا بعد ما مروة طمعتك وقالتلك هتشغلك مع خالها وهتبقى ماسك كل حاجة معاه .. وانت زى الاهبل صدقت ووثقت فيها
والنتيجة اهو لا طولت شغل ابويا اللى كنت بتجرى وراه .. ولا طولت شغل خالها لانها اساسا مكلمتوش عنك
وهتفضل زى ما انت كدة محلك سر
ثم نظر له بشماتة قائلا .. شوفت الطمع باة يا صاحبى وفراغة العين بيوصلو لايه
سليم بصدمة وذهول .. معقول مروة يطلع منها كل ده .. انا مش مصدق .. اه يابنت ال...
ادم بحدة ارعبته .. بقولك ايه مسمعكش بتجيب اسمها على لسانك .. دى فى حكم خطيبتى ومسمحلكش تتكلم عليها نص كلمة
وبعدين مش هيا السبب فى اللى حصلك .. انت اللى عملت فى نفسك كدة .. هيا بس ساعدتنى تتكشف على حقيقتك لانها بتحبنى ويهمها مصلحتى .. ماهى هتبقى مرات اخوك باة وطبيعى مستقبلى انا وعيلتى يهموها
سليم بيأس ... وانت بأة مش مكفيك انك دمرتنى وضيعت مستقبلى .. عايز ايه تانى ؟! عايزنى اسيب اختك وتفضحنى فى العيلة صح .. هو ده اللى انت عايزه
بس لا مش هيحصل .. انا بحبها ومش هسيبها .. ومروة دى كانت غلطة .. مجرد نزوة زى ما انت قلت عشان سيرين علطول مسافرة وبعيدة عنى فطبيعى ضعفت انا بنى ادم
ادم .. بتحبها !! عشان كدة كنت عايز تستغلها وتسرق فلوسها و شركاتنا .
سليم .. بس انا مكنتش بخطط عشان اسيطر على الشركة زى ما بتقول .. انا كان طموحى انى اشتغل مع عمى عشان اختك اصلا .. عشان اقدر اعيشها فى نفس المستوى اللى عايشة فيه .. يعنى كل اللى كان هاممنى مصلحة سيرين وسعادتها
ادم باستهزاء .. اه قلتلى .. عشان كدة قررت تتخلى عن طموحك ده فى لحظة .. لأ وكمان كنت عايز تسيبها بكل ندالة عشان لقيت مصلحتك مع واحدة تانية
سليم .. منكرش انى اتمنيت اشتغل مع خالها دكتور سالم لان طول عمرى بعتبره قدوة ومثل اعلى ليا .. وشغلى معاه كان حلم بالنسبة لى .. بس مكنتش هسيب سيرين صدقنى .. كله كان كلام بقوله لمروة عشان توصلنى لخالها بس
نظر له طويلا مرتكزا بعيونه بتمعن حتى اربكته تلك النظرات فحاول الهرب من نظراته تلك حين قال بهدوء
ادم .. تمام .. وانا هصدقك بمزاجى يا سليم .. وهكتفى انى بوظت كل خططك فمش هخليك تخسر كل حاجة
سليم بأمل .. بجد يا ادم !! يعنى مش هتقول حاجة لسيرين ؟!
ادم .. لأ مش هقول لحد حاجة .. تخيل بعد كل العك اللى عكيته ده هدارى على كل قذارتك ومش هفضحك
مش عشانك لأ ده عشان اختى اللى مش هاين عليا تتجرح وقلبها يتكسر بسببك .. وهيا متستحقش الا كل خير منك
فعشان خاطرها بس هعمل حساب لصلة الدم اللى بيننا والعيش والملح اللى اكلناه سوا واديك فرصة تتعدل وتحترم نفسك وتمشى صح بدل المشى العوج اللى انت ماشيه
هديك فرصة تبقى راجل بجد تحترم اختى وتحافظ عليها وعلى كرامتها وتحبها بجد زى ما بتقول
ثم نظر بعيونه بغضب محتقن قائلا بتهديد مرعب .. بس يا ويلك منى يا سليم لو فكرت تغدر ولا تلعب بديلك مرة تانية .. صدقنى ساعتها هتشوف ادم تانى غير اللى انت تعرفه .. ولا هعمل حساب قرابة ولا عشرة وقتها وهندمك ندم عمرك .. فأحسنلك تستغل اخر فرصة ليك عندى وتثبتلى انك اتغيرت وتخلينى اقدر اثق فيك واأمن على اختى معاك
سليم .. وانا اوعدك انى هكون قد ثقتك
ادم .. اه بس انا عندى شروط .. وهتنفذها غصب عنك
سليم بقلق .. شروط ايه؟!
ادم .. اولا شئ مفروغ منه كدة انك هتنسى مروة خالص ولا حتى تفكر بس مجرد تفكير انك تكلمها
ثم اكمل بتحذير افزعه قائلا بحدة .. وخليك متأكد انك لو حاولت توصلها بأى طريقة هعرف وساعتها مش هرحمك يا سليم
سليم .. وانا .. وانا هكلمها ليه .. ما خلاص كل حاجة طلعت كدب
ادم .. برافو عليك اديك فهمت اهو .. تقطع علاقتك بيها وبأى واحدة تانية كنت تعرفها على اختى
يعنى عايزك تنضف يا سليم .. فاهمنى تنضف من كله مروة وغيرها
و اعرف ان مفيش جواز من سيرين قبل سنتين . وده تانى شرط
سليم باستنكار .. نعم !! انت بتقول ايه ده احنا خلاص كنا هنتجوز الصيف ده .. وبعدين لو انا وافقت عمى وبابا مش هيوافقو
ادم .. لا ملكش دعوة انت انا هعرف اقنعهم بطريقتى .. لكن مش هسلمك اختى الا لما اتأكد انك فعلا اتعدلت وبقيت راجل حقيقى اقدر اأمنه على اختى
سليم .. وايه المطلوب تانى !
ادم .. ده اهم شرط .. مفيش سفر .. وشغلك مع ابويا تنساه تماما .. هتفضل هنا فى مصر وجوازكم هيبقى هنا .. ومتفكرش تتكلم مع ابويا فى الموضوع ده تانى انت رفضت وفضّلت شغلك فى الكلية وخلص الموضوع على كدة
سليم .. وانت فاكر بأة ان شوية الملاليم اللى باخدهم من الكلية دول هيقدرو يفتحو بيت !! .. ولا يعيشو اختك فى نفس المستوى اللى متعودة عليه !! اصلا عمى مش هيوافق عالكلام ده
ادم .. متقلقش يا سليم انا اكيد مش هسيب اختى يعنى .. عشان كدة انا فكرت انك تشتغل معايا فى الشركة اللى هفتحها هنا .. وتفضل هنا فى مصر
سليم .. وانا افهم ايه فى البرمجة والشغل بتاعكم ده !! انت نسيت انى تخصص كهرباء؟!
ادم .. لا أكيد منسيتش .. و فيه فعلا ملحق بيتنفذ للشركة هيكون تخصصك لانى حابب تكون شركتنا شاملة فهحتاج يكون عندى قسم كهرباء يكمل الشركة
واكيد انت انسب واحد يمسك القسم ده ويكون مسئول عنه قدامى
سليم بسخرية .. اه عايزنى افضل تحت عينك يعنى
نظر له ادم نظرات طويلة بصمت وتركيز كانت كفيلة لتسلبه انفاسه رعبا من جديد ثم قال بهدوء مرتكزا بعيونه
ادم .. هو انت اصلا يا سليم هتفضل تحت عينى .. سواء اشتغلت معايا او لأ هفضل ملاحقك زى ضلك مش هديك فرصة حتى تاخد نفسك
وعموما ده عرض .. وانت حر تقبل او ترفض
بس سفر برة لأ .. وكلامى منتهى
سيرين هتفضل جنبى وفى حمايتى ومش هتتغرب تانى
سليم .. ويا كدة يا اما هتفرق بيننا صح ؟!
ادم .. عليك نور احب انا الناس اللى بتفهم بسرعة ومبتحرقش كتير
سليم .. ماشي يا ادم .. بس يا ترى هيا هتوافق ؟!
ادم ناظرا له بسخرية .. تعرف يا سليم انا ساعات بستغرب انتو ازاى مخطوبين ومفيش ذرة تفاهم بينكم .. لان انت لو فاهم سيرين كويس وقريب منها كنت هتعرف انها كارهة السفر والغربة ونفسها تستقر هنا .. بس للاسف انت عمرك ما اهتميت بيها وبرغباتها ولا حاولت تقرب منها
ثم نهض قائلا .. اعتقد كدة وصلك كل اللى عايز اقوله .. وعرفت شروطى .. ثم مال عليه مستندا بيديه على المنضدة امامه قائلا بتحذير
ادم .. ومش محتاج اقولك لو خالفت اى حاجة من اتفاقنا ايه اللى هيحصل .. هتشوف وش منى عمرك ما كنت تتخيله ولا حتى فى احلامك .. انا لحد دلوقتى طيب معاك وصابر عليك .. فمتحاولش تختبر صبرى اكتر من كدة .. سلام
هم ان يدير ظهره له منصرفا ولكنه عاد اليه قائلا بنفس الحدة
ادم .. اه وحط فى اعتبارك انى هحطك تحت الاختبار كتير اوى
ثم نظر بعينه بتركيز قائلا .. ممكن مثلا اكلمك من رقم مروة واشوف هتعمل ايه .. او مثلا ازق عليك وحدة .. توقع اى حاجة منى يا سليم .. وادينى عملت اللى عليا اهو وحذرتك عشان مترجعش تزعل
تركه وانصرف بينما تحولت ملامح وجه سليم فجأة للغضب والحقد الشديد قائلا
سليم .. انت اللى مشوفتش لسة وشى التانى يا ادم .. انت تعمل فيا انا كدة .. تلعب عليا وتدمر كل حاجة بخططلها .. وصلت ان حتة عيل زيك لسة متخرجش حتى يأعدنى ادامه زى التلميذ ويدينى دروس ومواعظ لأ وكمان بيتشرط عليا .. وصلت انك تهددنى وقال ايه كمان عايز تحطنى فى اختبارات !!
ماشى يا ادم .. الصبر حلو
انا هندمك على كل كلمة قولتها وكل حاجة عملتها معايا .. اصبر بس عليا
.....
بعد انصرافه ظل يفكر بكلام سليم له والذى لم يصدق ايا منه .. يعلم جيدا انه كاذبا بكل كلمة فقد رأى بعيونه الغدر وعلم انه فقط يهاوده الان ويطاوعه كى يصل الى ما يريد
ولكنه لن يغفل عنه ثانية بعد الان .. وسيأخذ حذره جيدا حتى يستطيع ايجاد طريقة لتخليص شقيقته منه دون التسبب بأى جرح او اذى لها
وسط افكاره تلك استمع الى رنين هاتفه فوجدها ولتعجبه الشديد ملك .. والتى لم تفعلها منذ زمن
فقام بالرد سريعا بلهفة قبل ان تغير رأيها وتغلق الخط
ادم .. معقول ده ولا انا بحلم !
ملك بحرج .. احم ..انا .. انا كنت بسأل عليك بس عامل ايه دلوقتى ؟!
ادم .. بعد ما سمعت صوتك اللى بيجننى ده بقيت زى الفل .. ليردف بلهفة عاشق ..وحشتينى يا ملك .. وحشتينى اوى
ملك بحرج اكبر .. مممم بلاش الكلام ده لو سمحت .. انا بتصل عشان حاجة معينة
ادم .. انتى كدابة .. انتى متصلة عشان انا كمان وحشتك وعايزة تسمعى صوتى .. كفاية مكابرة باة وقولى انك اشتقتيلى زى ما اشتقتلك
ملك بضعف رغما عنها .. مش قادرة ... مش قادرة يا ادم .. حتى لو ده حقيقى فانا حتى مش قادرة اصارح نفسى بيه
ادم بحزن .. لحد امتى هتفضلى تعذبينا كدة .. انا محتاجك جنبى يا ملك كفاية فراق باة
ملك بحزن اكبر وقد التمعت الدموع بعيونها لتظهر بصوتها رغما عنها .. انا .. انا غلطت انى اتصلت .. مكنش لازم اطاوع نفسى .. انا اسفة سل...
ادم .. عشان خاطرى متعيطيش .. دموعك دى بتقتلنى وصوتك وانتى بتعيطى بيوجع فى قلبى .. كفاية دموع يا حبيبتى
ملك بانفعال وقد انهارت .. انا مش حبيبتك .. متقولهاش تانى .. مفكرتش ليه فى دموعى وعذابى ده قبل ما تعمل اللى عملته .. كسرت جوايا حاجة مش هترجع تانى ابدا يا ادم .. ابدا
ثم اغلقت الخط بوجهه وسقطت منهارة بالبكاء والنحيب وقد فقدت اعصابها تماما مستسلمة لانكسارها وضعفها الشديد
بينما شعر ادم بغصة بقلبه تكاد تمزقه اشلاءا لا يقوى تحمل صوتها بتلك الحالة ولكنه فكر انه من الممكن ان يكون ذلك الافضل لهم حاليا
فهو يريد ابتعادها كى يقيها شر مروة ويحميها من حقد تلك الماكرة
قرر حمايتها حتى ولو كان الثمن بعدها عنه وانكسار قلبه
لذا يجب الا احاول التقرب منها مرة اخرى .. حتى تنتهى تلك اللعبة مع مروة وامليها درسا لن تستطع نسيانه بحياتها
.....
مروة .. يعنى لازم اتصل عشرين مرة عشان تردى عليا ياست رحاب
رحاب بانفعال .. انا اصلا مكنتش ناوية ارد عليكى خالص .. انا كان عندى امل يا مروة تتغيرى وتفوقى من اللى انتى فيه .. كل حاجة كنتى بتعمليها كنت بديكى عذرك انك بتحبيه وادعيلك ربنا يهديكى .. لكن بعد ما عرفت اللى عملتيه مبقتش قادرة اسكت اكتر من كدة انتى بقيتى خطر على كل اللى حواليكى وعلى نفسك كمان
حاولت قطع كلامها ولكنها لم تعطها الفرصة لتردف قائلة
ازاى توصل بيكى تفكرى فى القتل !! لا وتنفذى كمان !!
انتى اتجننتى خلاص مبقاش فيكى عقل
مروة .. خلاص يارحاب باة ماهى زى القردة اهى مجرالهاش اى حاجة .. والنبى تفكك من الجو ده ومتضيعيش عليا فرحتى .. انا طايرة من السعادة وقلت لازم اقولك انتى اول واحدة
رحاب بتعجب .. وايه اللى مفرحك اوى كدة ؟! اوعى تكونى عملتيلها حاجة تانى
مروة .. ياستى لا انا خلاص مليش دعوة بيها تانى .. مبقتش تهمنى خلاص بعد ما ادم اختارنى انا مبقتش عايزة حاجة خلاص
رحاب .. ادم اختارك !! ده اللى هو ازاى يعنى ؟!
مروة .. مش مصدقة صح .. انا نفسى مش قادرة اصدق بس دى الحقيقة .. تخيلى .. تخيلى ادم بنفسه ييجى يتكلم معايا .. لا ويطلب كمان نتكلم لوحدنا برة بعيد عن الكلية
رحاب .. واتكلمتو ؟
مروة .. طبعا ده انا ماصدقت الحجر نطق .. وكنت فى منتهى السعادة وهو اعد ادامى .. اخيرا حس بيا وشاف اد ايه انا بحبه من قلبى .. قاللى انه عايزنى معاه .. عايز افضل جنبه .. قاللى ان انا اللى هقدر اسعده واستحق حبه يا رحاب تصدقى
اخيرا اللى حلمت بيه اتحقق .. وادم هيكون ليا
رحاب بتعجب .. ازاى يعنى .. لا طبعا مصدقش اكيد فيه حاجة غلط .. ده احنا لسة شايفينه من يومين اعد مع ملك وباين عليه جدا انه مهتم بيها يبقى ازاى
مروة .. ماهو بصراحة مضحكش عليا وده مفرحنى اوى انه صريح معايا جدا .. قاللى انه سابها اه وخرجها من حياته بعد ما خدعته وضحكت عليه .. بس لسة مقدرش ينساها وغصب عنه بيتعامل معاها عشان الدفعة والمشروع وكدة .. لكن هو مقرر مش هيرجعلها تانى وفضل يكمل معايا انا
رحاب .. لأ استنى بس عليا وحدة وحدة كدة عشان افهم .. خدعته ازاى يعنى !
•تابع الفصل التالي "رواية انت عشقي وقسوتي" اضغط على اسم الرواية