رواية شيزوفرينيا احاسيس بقلم حنين عادل عبر مدونة دليل الروايات
رواية شيزوفرينيا احاسيس الفصل العاشر 10
بيدخل ايوب مكتبه وبيتفاجئ لما بيشوف سامح قاعد عليه
سامح بيقوم بسرعة بخوف
سامح: حمد الله عالسلامة يا ايوب باشا
ايوب: ايه اللي مقعدك علي مكتبي يا سامح
سامح: هااا اصل……..
بيقاطعه ايوب: كنت بتنضفه مثلاً
بيبتسم سامح وبيحاول يداري عصبيته:
ايوه يا باشا بنضفه
ايوب: طيب شوف شغلك
بيخرج سامح وهو بيجز علي سنانه وبيكلم نفسه:
بنضفه اه… ماشي ياابن الأكابر
بتقعد نورهان علي مكتبها وبتاخد الورق وبتدخل لـ أيوب:
يلا شوف شغلك يا مدير
♕ـــــــــــــــــــــــــــــــــــــــــــــــــــــــ♕
بيوصل موسي وزينات للبيت وبتقعد
زينات: والله ماله لازمة دكتورة وبتاع اهي هاتلتل لنا الدنيا وتعقدها
موسي: بإذن الله خير ونتطمن يازوزو
روقا: ها طمنونا
موسي: الحمدلله امي زي الفل
روقا: طيب يلا ياختي اطلعي اكلي الفرختين الحزاني اللي فوق دول اللي لا بيجيبوا بيضة ولا راضية تدوقينا منهم
زينات: اخص عليك دول بقوا عشرة وبعدين ماتعرفش كيلو الفراخ وصل كام دول بقوا ثروة
بيضحك موسي وروقا…
بتسيبهم زينات فابيدخل روقا المطبخ وبيعمل شاي كعادته كوبايتين وبيطلع الدوا وبيحط في واحدة وبيطلع لـموسي
روقا: يلا عملت لك شاي
موسي: اكتر حاجة مفيدة بتعملها في البيت ده والله
روقا بيضحك:
ها مش ناوي تحن بقا وتطلعنا من القرف اللي احنا فيه ده
موسي وهو بيشرب الشاي:
بالنسبة لايه.. اه ابقي ست انسي انا راجل من ضهر راجل وهافضل طول عمري راجل
بيحط كوباية الشاي بعد ما خلصها وبينزل بيحضن التاكسي وبيبوسه والناس مستغرباه وبتضحك بيمسك الفوطة ويمسح التاكسي
موسي: ايه اللي انا بعمله ده انا حاسس اني متغير لعله خير يارب صبحنا وربحنا وبين عبادك ماتفضحنا
بيركب التاكسي وبيبدأ يسوقه ويركب ناس وينزل ناس
لحد ما بيقف في اشارة والعربية اللي وراه بتخبط فيه
موسي: لا اله الا الله
بينزل من التاكسي بسرعة وبيروح يبُص عليه من ورا
موسي: نهار اسود نهار اسود ليه كده ياعم
بيروح موسي يخبط علي اللي خبط التاكسي بعصبية وعيونه بتنزل دموع:
حرام عليك ليه كده
*انا اسف والله
موسي: اصرفها فين دي هااااا
بيعيط موسي واللي حواليه مستغربين ان شحط طويل عريض بيعيط
اتلم حواليه الناس وهما بيحاولوا يهدوه بعد ما قعد في نص الشارع قدام العربيات وانهار في العياط
*طب والله ادفع التصليح بتاعه اهدي بس دي بسيطة مش مستاهلة كل ده
انهار موسي في العياط والعربيات بتزمر والطريق واقف
♕ـــــــــــــــــــــــــــــــــــــــــــــــــــــــــ♕
وفي مكتب ايوب بتدخل سكرتيره لبسها مبين جسمها اكتر ماهو مغطيه
بتقرب منه بمياعة وبتقول:
قلبي عندك يا ايوب باشا ربنا يكون في عونك الفراق وحش والوحدة اسوء واوحش بس هانعمل ايه دي سُنة الحياة والحي أبقي من الميت
بيكون ايوب بيشرب في السيجارة وبيسمع لها بيقف وبيقرب منها فتبتسم وبتقرب منه بدلع لحد ما بتقف قدامه
بتدخل نورهان كعادتها من غير ما تخبط فبتشوفهم
نورهان وشها بيحمر وبتقول بكسوف:
أنا أسفة
بتلف وشها وبتكون هاتطلع فبيوقفها ايوب:
استني يا نورهان
بيبُص أيوب للسكرتيرة:
اتفضلي خودي حسابك وامشي
السكرتيرة:ايه!
أيوب:ما بحبش اكرر الكلام مرتين بس الظاهر ان ماسمعتيش كلامي اتفضلي خودي حسابك وامشي انا مش بشغل عندي ناس شمال يلاااا
بتمشي السكرتيرة من قدامه وهي متعصبة…
ايوب بيبُص لنورهان:
ايوه كنتي عاوزه ايه؟!
نورهان: ولا حاجه قبضت النهاردة بقا وغنية وده وقت الغدا فقولت ليه يابت يا نورهان ماتعزميش ايوب باشا الغلبان عالغدا لانه لسه ماقبضش ومش هايقبض
بيضحك ايوب:
وماله انا اصلا جوعت يلا
بتمشي نورهان ومعاها ايوب وسامح مراقبهم
بيركب عربيته وبيسوقها وبيفضلوا ساكتين لحد مابيوصلوا للإشارة وبيلاقوا العربيات واقفة وبتزمر كتير
بينزل ايوب يشوف في ايه وبيلاقي موسي قاعد في نُص الطريق وبيعيط
والناس ملمومة حواليه بيسأل ايوب واحد من الواقفين:
ماله ده مجنون؟
بيرد عليه:
ده واحد التاكسي بتاعه اتخبط فقعد يعيط زي ما انت شايف كده
ايوب: للدرجة دي!
*الظروف يابني اللي الناس فيها تعمل اكتر من كده ربنا يهونها علينا
بيقرب ايوب من موسي
موسي بيبُص ليه ولسه بيعيط بيطبطب عليه ايوب وبيقومه وبيمشي معاه موسي من غير اي كلام
ايوب بيحُط ايده علي كتف موسي فا موسي بيحس وكأن جسمه قشعر
ايوب: اهدي كده بس مش مستاهلة كل ده لو عالخبطة سهلة انا متكفل بيها
بيطلع أيوب محفظته وبيدي له فلوس وبيمشي وموسي مش بيتكلم بيبتسم بس
لحظة ادراك وكأنه رجع للواقع بيبُص موسي للناس اللي حواليه وهو محروج وبيركب التاكسي وبيمشي
وايوب بيركب عربيته وبيمشي وبيحكي لنورهان عاللي حصل
نورهان بتفكير: شكرا ليه بجد لانه واخيرا خلاك تتكلم معايا وتفتح حوار شكرا!
♕ـــــــــــــــــــــــــــــــــــــــــــــــــــــــــ♕
موسي: ايه اللي انا عملته ده معقول اعيط قدام الناس زي الحريم وادبدب في الأرض طب ما الراجل قال هايدفع التصليح عقلي كان فين
ابتسم لما افتكر ايوب:
بس الراجل ده طيب اوي وحلو كده قيمة وواجاهه
اللي زيه يتجوز اربعة الله وانا مالي يتجوز اربعة ولا خمسة ايه اللي انا بقوله ده! لأ انا هاروح أرتاح
بيروح بالتاكسي وبينزل منه بيلاقي شهد بتشاور له
بيروح لها فبتتكلم بدموع:
انا جاي لي عريس النهارده يا موسي وامي حالفة لو ما قبلت بيه لا تتبري مني وتسيب البيت
موسي بيبُص في الأرض وبيتنهد:
ربنا يوفقك ويسعدك
شهد بتبتدي تعيط:
هو ده اللي ربنا قدرك عليه
موسي: طب أعمل ايه يا شهد في ايدي ايه اعمله
شهد بتمسح دموعها:
تعالي نهرب ونتجوز ونحطهم قدام الأمر الواقع
موسي: لأ انتِ كبيرة اوي عندي وماقبلش ان حد يتكلم عليكي نُص كلمة وابوكي راجل طيب حرام لما نعمل فيه كده واخوكي كمان
انا حياتي مش باين لها ملامح يا شهد ولا باين لها هاتتعدل اكيد العريس احسن مني ربنا يوفقك يا شهد
شهد بدموع: انت بتتكلم بجد طب لما هو كده علقتني بيك ليه من الاول ليه حببتني فيك خليتني ماتخيلش نفسي مع حد غيرك ليه خلتني اتخيل شقتنا وعيالنا وانا بفتح ليك الباب وانت جاي من الشغل وانا بحضر السفرة وباكلك بايدي وبشتكي لك من تعب وقرف العيال وتهون عليا بكلمة معلش اللي بضحك عليها دايما بس بتفرق معايا لييييه كدا
بيبُص لها موسي من غير ما ينطق اي كلام
شهد بتمسح دموعها:
انا اللي غلطانه اني حبيت واحد ضعيف سايب نفسه ملطشة للدنيا سلمت قلبي لواحد فاشل عمره ما حاول يفوز بحاجة بيخسر في كل سباق بيدخل له ربنا هايوفقني وهايسعدني فعلا لما ابعد عنك
بتطلع تجري وتسيبه واقف وبيحاول يمسك نفسه وحابس الدموع في عينيه
بيمشي وبيطلع البيت وبيدخل يقعد عالكرسي من غير ولا اي كلمة
بتلاحظه زينات:
مالك يا موسي فيك ايه
بيبُص لها وبيتنهد:
مافيش ياما مافيش
زينات: طيب جاي بدري ليه انت لحقت تشتغل
بيدخل اوضته من غير اي كلام وبيرمي جسمه عالسرير وهو بيتردد في دماغه كلام شهد
♕ــــــــــــــــــــــــــــــــــــــــــــــــــــــــ♕
بياكل ايوب ونورهان الأكل بدون اي كلام
نورهان وهي بتبُص ليه وهو بياكل من غير اي اهتمام بتفكر:
يارب انت عارف وعالم باللي قلبي يا تقربه ليا لو كان خير وتبعده عني وتريح قلبي لو كان شر ليا
بيبُص لها:
جاية تغديني كبده علي عربية وبتقولي غنية اومال لو فقيرة هاتغديني ايه فول
بتضحك نورهان: الفول بقا اسمه استاذ فول فخمه دا بقي بتاع الناس الأغنيا انما الفقرا ربنا يتولاهم
بس ماتنكرش انها حلوه
أيوب: فعلاً
بتشرب الكولا وبتشهق:
اوبا عالمـــــــــــــــــــــــــــي
بيضحك أيوب لما بيسمعها
نورهان: كلمتك دي صح ههه
بيخلصوا اكل وبيركبوا العربية وبيمشي بتبُص من شباك العربية وهي سعيدة لحد ما بيروحوا للبيت ومش بيتكلم ايوب كعادته
بقلم حنين عادل كاتبة الجيل
♕ـــــــــــــــــــــــــــــــــــــــــــــــــــــــــ♕
موسي بيكون باصص للسقف وبيعيط!
بيفكر ليه كل التعب ده مكتوب له في حياته وفي نفس الوقت بيفكر هو مُصير ولا مُخير يعني أنا مكتوب لي قدري مكتوب لي فيه خير وشر واني مثلا هامشي في طريق الشر ولا انا اللي بختار طريقي أسئلة كتير بتدور في راسه بسبب كلام شهد لحد ماقطع تفكيره زينات اللي بتخبط علي الباب
زينات: موسي قوم نتغدا احنا أغنيا عاملين النهارده فراخ!…
- يتبع الفصل التالي اضغط على (رواية شيزوفرينيا احاسيس) اسم الرواية