رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الرابع و السبعون 74
الشاب / المفتاح غلط اصلا هو فى حاجه
امانى تقلب فى الخزنه
امانى / امال فين الكتاب اللى هنا
الشاب / كتاب ايه يا استاذه مفيش هنا غير ورق الصيدليه الفلوس فى درج الكاشير افتحهولك
امانى / لا حسام قايلى فى كتاب هنا خزنه صغيره هنا المفروض فيها ورق مهم
الشاب / كتاب ايه بس والله ابدا طب كلميه يمكن يقصد خزنه تانيه كلميه اتاكدى
امانى تطلع التليفون و تتصل غير متاح
امانى / ما انا مش هرجع اسكندريه يعني و افضل واخده الطريق قياسه دور تانى
الشاب / اكيد يقصد خزنه تانيه بدليل ان المفتاح ما بيفتحش من اساسه
امانى / هو عنده خزنه فوق ؟
الشاب / و الله ما اعرف
امانى / صحيح جبتك يا عبد المعين
امانى تطلع من الصيدليه و تيجي تطلع فوق
السواق / يا مدام يا مدام
امانى / ثوانى ثوانى هى الدنيا طارت هو فى ايه يا لهوى
امانى تطلع تجرى على فوق و هى بتتصل بحسام غير متاح
…………………..
فى المستشفي
نور قاعده عينها على الباب على يناولها كبايه شاى تبصله و تاخدها و ترجع تبص على الباب يقعد جنبها
على / ليكي حق على فكره مش هقدر اتكلم
نور / مفيش داعى اصلا تتكلم
على / بس انا بحبك يا نور انا ما كدبتش عليكي فى حاجه انا عاملتك بما يرضي الله
نور / مفيش داعى قولت للكلام ده الموضوع منتهى خلينا دلوقت نشوف مصلحه ندى فين
على / نور انا مش هقدر اعيش من غيرك
نور / ان كنت خايف على الولاد فما تقلقش هيفضلوا بينا هنقعد و نرتب الايام و الوقت و ربنا يقدم اللى فيه الخير و ان كان على شقتك
على / نور انا بتكلم عليكي انتى انا محتاجك انتى
نور / الكل محتاجنى ندى و عمى و ابويا و امى و انت و العيال كلكوا محتاجيني انا بقي محتاجه ايه مش مهم انا و انا هناك دعيت ربنا كتير يصلح حال عيلتى لما رجعت لقيت الدنيا زى ما انت شايف اكيد دا بدايه الصلاح مش كدا فى حاجات لازم تتهد عشان تتبنى من اول و جديد على نضافه و يمكن ربنا عمل كل ده عشان يجمعك بحب عمرك
على / و حبى ليكي
نور / ما بنى على باطل فهو باطل
على / انتى ليه مش عاوزه تصدقى دا لو الدنيا كلها كدبتنى انتى المفروض تصدقيني انتى عشتى معايا و عرفانى اكتر من الكل لو عملت فيكي حاجه وحشه لو جيت عليكى مره لو ظلمتك او خونتك او
نور / انت مش بتاعى انت عمرك ما كنت ليا كنت فى حياتك فتره و هتعدى كدا كدا لو كان حسام طلق ندى فى اى وقت فات كنت هتسيبني حبك ليها لسه عايش و حبها ليك كمان بدليل انك جريت عليها يوم موت كرم
على / كنت بجرى على حسام عشان مش هقدر اقولك لوحدى كنت بجرى لحسام عشان خايف عليكي
نور / يعني ما حضنتهاش
على / كانت لحظه ضعف ما تتوصفش و ما اتكررتش و ندمنا عليها و ادينا بندفع تمنها اهو
نور / لحظه ضعف اه بس دليل قوى ان حبكوا لسه عايش و انا مش هقدر اجى على ندى اكتر من كدا مش هقدر اظلمها اكتر من كدا ندى اتحرمت من كل حاجه اللى فى سنها عايشينها ندى اتعذبت كتير يمكن … يمكن جه الوقت اللى ترتاح فيه بقي ترتاح فى حضن حبيبها اللى انا متاكده انه هياخد باله زى ما كان بياخد باله منى
نور الدموع تنزل من عنيها تمسحها و تشرب الشاى و تتظاهر انها كويسه
على / بس دا ما يمنعش انى محتاجلك و بحبك
نور / و انا ما عادليش مكان فى الحكايه دى و من فضلك ياريت تنهيها بشكل حضارى
على / ما تتسرعيش فى قرارك و تحمى علينا كلنا بلاش تدمرى قصه جميله بداناها سوا
نور / قصه جميله من انهى اتجاه من اتجاه انى بدوس على اختى فى كل مره بقولها قد ايه انت زوج مثالي و قد ايه بتحبنى و لا قصه جميله فى انى على راي أية اغمض عيني عن كل الحقايق دا مش أية بس دا ماما كمان ياما لمحت لمحت ايه دى قالتها صريحه انك فى بينك و بين ندى حاجه كنت بدافع عنك لانى كنت رافضه اشوف بس انا دلوقت شوفت انا شوفت و عرفت الحقيقه يبقي انكرها ليه عشان مصلحتى ما يمكن عشان كدا ربنا ما باركليش فى اولادى يمكن عشان انت اصلا مش حقى و يمكن عشان اقدر اتفرغ لندى و بنتها ما عادلهمش غيرى دلوقت
على / انا مش لاقى رد بس انا
نور / انت بتحبنا احنا الاتنين ما ينفعش يا على ما ينفعش تجمع بين اختين و اصلا لا انا هقبل اكون على دره و لا هقبل اعذب اختى اكتر من كدا عاوز ندى ساعدنى لحد ما تخف و انا مش هقف فى طريقكوا و صدقنى كمان انى مش هتخلى عنكوا … على فكره حتى لو اطلقنا احنا هنفضل اهل عشان يس و نغم هننهيها بشكل حضارى و تفضل علاقتنا طيبه عادى يعنى بتحصل
على / بس انا و انتى عمرنا ما هنكون سعدا بعيد عن بعض
نور / انا ما قدرتش انسيك ندى يمكن هى تقدر تخليك تنسانى و ان كان عليا فما تقلقش انا هشغل وقتى بالاولاد و الشغل مش اول مره اطلق يعني بالطريقه دى … بس على الاقل المرادى باختيارى المرادى عندى اللى يهون عليا
نور تشرب الشاى
نور / هقوم اجيب بسكوت او اى حاجه اكلها اجبلك معايا
على / خليكي انا هجبلك
نور / تمام شكرا
على يقوم و يمشي الدموع تنزل من عنيها و ما تقدرش توقفها
………………….
فى القسم
عمر / و بعدين الراجل المحامى ده لو كلامه صح يبقي حسام معاه حق و خربت على كدا
محمد / هنماطل لحد ما ربنا يفرجها
عمر / طب هنفضل قاعدين هنا لحد امتى ما يمكن راح قسم تانى
محمد / هو مش الظابط قالك استنى و بعت الناس يجيبوه
عمر / و هو احنا عارفين هو فين عشان يجيبوه
محمد / دى شغلتهم هم بقي احنا فى ايدنا ايه نعمله بس
عمر / طب ما تكلمه تانى انت ابوه و اكيد ليك عليه كلمه او اى حاجه
محمد يبص لعمر و يبتسم باستهزاء و يبص قدامه تانى
محمد / انا اسف على فكره
عمر / على ايه
محمد / اى حاجه عملها ابنى فيكوا فى الاول و الاخر غلطتى انا اللى ما عرفتش اربيه سبته لامه تعلمه الانانيه و اللؤم سبتها قال يعني بتنصحه عشان ما يطلعش خايب زيي كنت بفرح بنجاحه كنت بفرح لما بعرف انه بيعرف ياخد حقه و الغايه تبرر الوسيلة كانت حاجات صغيره بس ما كنتش فاهم ان الحاجات الصغيره اللى بعديها هتجيب بعدها حاجات كبيره مش هعرف اعديها كلو بسببى
عمر / و نور ليه ما طلعتش زيه
محمد / مش عارف الحمد لله اهى حاجه تشفعلى قدام ربنا لما اقابله
عمر / بس لسه فى وقت على فكره حضرتك تقدر تقرب من حسام و
محمد / انا جاى ابلغ عنه يا عمر الوقت فات من زمان اوى من زمان اوى يا عمر بس ما فاتش عليك تقدر تتعلم من غلطتى و تربى عيالك صح مع ان أية مش زى امانى أية زيك غلبانه و طيبه و بنت حلال
عمر / الغلب و الطيبه ما عدتش عارف بقوا صح و لا غلط
تليفون محمد يرن يطلعه رقم غريب
محمد / الو … مستشفي !! خير … ايوه انا ابوه هو كويس … لا انا جاى حالا انا فى الطريق اهو حالا ثوانى
محمد يقفل و يقوم عمر يقف
عمر / فى ايه مين فى المستشفي ؟؟ حسام؟؟
محمد و عمر بيجروا
محمد / بيقولوا العربيه اتقلبت بيه و لحقوه فى المستشفي و هيدخل العمليات و بيدوروا على حد يمضى
عمر و محمد يركبوا العربيه و يمشوا
عمر / و جابوا رقمك ازاى اذا كان تليفونه مقفول
محمد / والله ما اعرف ادينا هنروح و نعرف
……………….
فى المستشفي
نور و على واقفين مع شاب
الشاب / التليفون مدمر نقلت الشريحه فى موبايلى و جبناه على هنا والدته اتصلت كتير اوى
نور / بلغتها
الشاب / ايوه بس هى فى الطريق من مصر و المستشفي هنا كانوا مستعجلين و دى مسؤليه و لا مؤاخذه اتصلت بكل النمر اللى كانت فى السجل و باباه جاى فى الطريق
محمد و عمر يدخلوا
محمد / ماله حسام ايه اللى حصل
نور / فى العمليات جوه الحاله حرجه
محمد / ليه و ازاى ايه اللى حصل حد يفهمنى
على / العربيه اتقلبت بيه على الكورنيش كان سايق بسرعه و فرمل فجاه من غير سبب العربيه اتقلبت
الشاب / الطريق كان فاضي انا شوفت اللى حل لانه كان قدامى كان بيعدى العربيات بسرعه و فجاه فرمل و العربيه اتقلبت و طلعناه منها بالعافيه
نور / ربنا يكرمكوا يارب مش عارفه اقولكوا ايه
الشاب / ما تقوليش حاجه دا اقل واجب ربنا يطمنكوا عليه … دى شريحه الموبايل و انا هضطر استاذن بقي
على ياخد الشاب فى جنب
محمد / عملتوا ايه مع ندى
نور / الدكتور كدا كدا حاجزها على مسؤليته لحد ما حد يستلمها و بوضع حسام ياريت يا بابا تروح تخلص ورقها مش عاوزين ناذى الدكتور كتر خيره
محمد يبص لعمر
عمر / انا هاجى مع حضرتك
محمد/ هاجى علاطول خليكي جنب اخوكى
نور / ما تقلقش و هكلم حضرتك اطمنك لو فى جديد
محمد / تمام يلا يا عمر يلا يا ابنى
محمد و عمر يمشوا و على يرجع
على / ما رضيش ياخد ولا مليم
نور / الدنيا لسه فيها خير
على / هروح اشوف اى دكتور هنا يطمنى
نور / قلقان عليه
على / لا و ياريت يموت و يريح الكل من شره بس للاسف هتزعلى عليه
على يسيب نور و يروح الاستقبال و هى متبعاه دمعه تنزل من عينها تمسحها
……………………
فى اوضه دكتور فى مستشفي تانيه
امانى / يا دكتور ما تشيلش هم الفلوس نسفره بره و لا نجيبله دكاتره من بره
الدكتور / يا مدام مش هتفرق صدقيني لو كان هيفرق انا كنت قولت لحضرتك
امانى / يعني أية يعني ابنى اتشل خلاص هيعيش اللى باقي من عمره على كرسي انت بتقول ايه يا دكتور بتقول ايه
الدكتور / يا مدام ابن حضرتك نجى من حادثه خطيره جدا و الحمد لله انه نجى منها اصلا
امانى/ انتوا اللى ما بتفهموش كاجه دكاتره بالاسم ناجحين بالغش و شغالين بالواسطه انا هنقله مستشفي تانيه هنقله اكبر مستشفي فى مصر انا مش هسكت انا كمان هقاضيكوا و اتهمكوا بالاهمال انا هعرفكوا ازاى تشوفوا شغلكوا
الدكتور يبتسم و يسيب امانى و يمشي
امانى / انت رايح فين انا بكلمك انت يا .. انت يا دكتور بكلمك انا ابنى لازم يخف انت فاهم انت يا دكتور مش هجرى وراك
امانى تطلع بره و تروح اوضه تلاقى نور و محمد واقفين على الباب
امانى / انتوا بتعملوا ايه هنا ايه جايين تخلصوا عليه ما كفاكوش اللى عملتوه فيه حسبى الله و نعم الوكيل فيك يا محمد اشوف فيك يوم تتقهر زى ما قهرتلى ابنى و خليته سايق مش مركز
نور / ماما ممكن لو سمحتى تهدى
امانى / انا مش ام حد انا لا امك و لا اعرفك انتى تروحى تدوريلك على ام غيرى ام تمشي على هواكى و هوا المحروس سي على جوزك
محمد / يا شيخه ما تسكتى بقي دا وقتك ابنك راقد جوه و انتى نازله ردح درح
امانى / انت اصلا بتعمل ايه هنا انت مش روحت بلغت عنه و كتر خيره الظابط لما عرف حالته صعب عليه و حفظ المحضر دا واحد غيره كان حبسك بتهمه البلاغ الكاذب و ازعاج السلطات بس انت ربنا وقعك فى ظابط ابن ناس و قلبه طيب يا اخى حسبي الله و نعم الوكيل فيك اشوف فيك يوم يا شيخ … و انتى يا اختى اخيرا افتكرتى ان ليكي اخ تسالى عنه مش ده اللى بعتيه عشان خاطر ست ندى و عشيقها
نور / ماما لو سمحتى
امانى / يا اختى ما تتحمقى لاخوكى مره كدا زى ما بتتحمقى للغرب
محمد / انتى عارفه لو ما اتكتمتيش
امانى/ هتعمل ايه يا خويا هتطلقنى تانى و لا هتبلغ عنى انا كمان وسع كدا خليني ادخل اطمن على ابنى اوعى كدا حسبي الله و نعم الوكيل فيكوا
امانى تفتح الباب و تدخل
محمد / حسبي الله ونعم الوكيل فيكي انتى يا شيخه … ما تزعليش نفسك و لا تاخديش على خاطرك من كلامها انتى عارفه امك
نور / انا مش زعلانه من كلامها انا زعلانه على حسام و اللى جراله
محمد / قضا اخف من قضا و الحمد لله انها جت على قد كدا
نور / و نعم بالله
…………………
فى شقه عمر
أية بتغطى نغم نايمه فى سرير و تروح لعمر واقف فى الشباك
أية / ما كانش مات و ريحنا و ريح كل الناس
عمر / والله ما صعبان عليا غير عمى محمد و هو متشحطت بين المستشفيات طول النهار بالمنظر ده
أية / حقك رجع يا عم مصطفى حقك رجع عقبال حق ندى و حقنا كلنا
عمر / انتى بتقولى ايه
أية / ايه مش اتشل زى ما شل الراجل خلى بقي ست امانى هانم تتسحل فى خدمته اياكش تتلهى بيه عن اذيه الناس
عمر / جرا ايه يا أية يا شيخه قولى اللهم لا شماته
أية / و هو فى شماته فى مجرم زى ده دا ربنا بيشفيلنا غليلنا منه دا بركه دعايا عليا طول الوقت اللى فات طب تصدق و تؤمن بايه
عمر / لا اله الا الله
أية / ما فوتش سجده الا ما دعيت عليه دا انا كنت بستغرب هو ليه ربنا ما بيستجيبش اتاريه بيحوشهملى عشان يبرد نارى
عمر / انا مش عارف اقولك ايه انا هقوم اطمن على على
أية / قوم و انا هروح انام جنب طنط منال و العيال سبنالهم الشقه فوق فاضيه و جينا اتكربسنا هنا فوق بعض
عمر / حصيره الصيف واسعه و تساع من الحبايب الف
أية / ماشي يا خويا ماشي
………………
فى اوضه على
يس نايم و على ممدد جنبه و واخده فى حضنه و ليلى قاعده الناحيه التانيه
ليلى / تصدقنى لو قولتلك كان قلبي حاسس
على / كنت زى الغريق بيتعلق بقشايه كنت فاكر لما هتجوزها هنتقم
ليلى / هتناقم من مين
على / من كل اللى اذونى و اولهم نفسي ما انا كمان غلطت ما انا كمان مش ملاك يعني انا كنت فاضي اوى وقتها فاضي من جوايا زى للتماثيل الخزف الصيني دى اى لمسه تكسره
ليلى / انا سهل اوى اقولك انك ضيعت كتير من حياتك بتجرى ورا سراب لا ندى و لا نور ينفعوك بس انا كست و شايفه الحب فى عينيك كام عارفه قد ايه كنت سعيد مع نور و من اللى سمعته قد ايه كنت بتحب ندى
على / ما نابهمش من ورايا غير كل وجع
ليلى / اللى يقول كدا ظالم اللى يقول كدا ما بيفهمش انت استحملت مع نور اللى ما حدش غيرك بيستحمله دا كفايا امها و لسانها لو بتحبها يا على اكلمهالك نور بتحبك زى ما بتحبها
على / نور مجروحه منى اوى يا ماما
ليلى / هتسامح بتحبك و اللى بتحب بتسامح بس قولى الاول انت متاكد انك عاوز نور مش ندى
على يهرب بعنيه و يحاول يدارى
ليلى / طب تفتكر ندى دى هتخف هترجع طبيعيه تانى و لا هتقعد جنبها تغيرلها البامبرز و تحوط عليها لتاذى روحها و لا تاذى حد
على / انتى اصلك ما شوفتيهاش زمان … قبل ما يدخل بينا … ندى دى كانت … كتله تفائل كدا ضحكه منوره زى الشمس فى الشتا نور و دفا
ليلى تطبطب على كتف على
على / قالتلى ابعد ما عدتش ندى بتاعتك انا ام دلوقت و مش هقدر اخسرها … اسكت انا بقي اكيد لا طبعا اجبرتها ترجعله و قتلت أية فى السكه و دوست على عمر
ليلى / أية حكتلى دا ما كانش غلطتك
على / و انها تترجانى و اطردها مش غلطه و زى ما عملت فى أية عملت فى نور بس نور بقي … نور … طول الفتره اللى كنت فيها مع نور وانا خايف اليوم ده يجي هعمل ايه هختار طب و هو انا يعني دلوقت فى موقف يسمحلى اختار ما الاتنين ضاعوا منى اصلا و انا ضعت معاهم
ليلى / ما تفقدش الامل دلوقت انت لسه الوقت قدامك تقدر تصلح اللى فات و نور بنت عاقله و انت هتقدر تصالحها انا متاكده
على / طب و ندى
ليلى / هى مش قالتلك زمان سبنى اربى بنتى ان كنت تقدر تقدملها حاجه قدمها ان كان ليها و لا لبنتها بس ان كنت هتختار بين ندى و نور فندى ما تنفعش ابدا لا تكون زوجه و لا ام انما نور نور بقي فى امل و ان شاء الله المره الجايه
على يبص لليلى تسكت
ليلى / ما انت مش هتقدر تجمعهم مش هتقدر تعدل
عمر يخبط على الباب و يدخل
عمر / السلام عليكم
ليلى / تعال يا عمر تعال اقعد مع اخوك شويه هو بيحبك و بيسمعلك تعال
ليلى تقوم تطلع بره و تقفل الباب وراها
على / امى بتقولى مش هتقدر تجمعهم و لا تعدل بينهم قال يعنى ندى اطلقت خلاص و خلصت عدتها و خفت و طلعت من المستشفي و نور هترضي تبقي على دره و كدا يعني ماما ما شاء الله فى دنيا تانيه خالص
عمر / و ليه لا يا على
على / مش يومك انت كمان النهرده ابوس ايدك بقولك ايه اطفى النور خليني اغفل ساعه بجد مصدع و مش فايق
عمر ينام الناحيه التانيه
على / انت بتعمل ايه عم محمد هينام هنا
عمر / ما انا مش هفرش و انام فى البلكونه يعني … امك و نغم فى اوضه و طنط و أية و بيرين فى اوضه و عم مصطفى فى الصاله اروح فين انا يعني لما عم محمد يبقي يجي يا ينام جنب اخوه يا يطلع ينام فوق يعني مش كدا دا انا اخوك يعني
على / خلاص يا عم انت هتغنيلى نام نام هى سفريه ما يعلم بيها الا ربنا
عمر يتعدل
عمر / طب تصدق ان ما فيش خير بعد كدا انت بس اللى فقرى
على / نام يا عمر عشان ما طلعش اللى فيا فيك قال مفيش خير بعد كدا قال
عمر / نمت و ياريت تنام انت كمان يمكن تعرف تفكر عدل بدل ما كل اللى بتعمله فى حياتك انك تندب حظك و خلاص
على / ما تنام بقي هتخليني اقولك كلام ما يتقالش و لا اصحى الواد نام بقي نام
عمر / نمت اهو نمت دا ايه ده
…………….
فى المستشفي
نور تدخل و حسام ممدد فى السرير و امانى نايمه على الكنبه السرير جنبه
حسام / انتى لسه هنا ليه
نور / المفروض اسيبك
حسام / و انتى وجودك لحد دلوقت ممكن يعملى ايه روحى ارتاحى
نور تروح تقف جنبه
نور / على فكره بابا بره هو كمان
حسام / زعلانين منى صح
نور / زعلانين اه بس لما تقوم بالسلامه هتقدر تصالحنا مش كدا هتتغير عشانا مش كدا
حسام / ندى عامله ايه
نور / مش كويسه ياريت كنت اقدر اقول غير كدا بس ندى مش كويسه خالص يا حسام
حسام / ما كانش قصدى اقسم بالله عمرى ما كنت اتخيل ان الامور تبوظ منى بالشكل ده و على فكره انا بكره على بس بيحبك
نور / غير الموضوع
حسام / على بيحبك و لو ما كانش بيعاملك كويس انا ما كنتش سبته صدقيني يا نور صدقيني انا عمرى ما قبلت عليكي حاجه وحشه انا بحبك انتى اغلى عندى من الدنيا يا نور
نور / بس ندى اغلى
حسام / هتطلقيها منى و تجوزيهاله يعني هتحكمى علينا احنا الاتنين بالتعاسه اللى باقي من عمرنا هتحرميني منها هان عليكي عجزى
نور / انت اللى عجزتنا احنا الاتنين و اصلا لسه بدرى اوى على الكلام فى الموضوع ده لا ندى خفت و لا انت طلقتها
حسام / انا عمرى ما هطلقها لو حبيتوا تخلعونى اخلعونى و اوعى تفتكرى انى هسكت لا ندى و لا حبيبه هيكونوا غير ليا
نور / يعني لسه هتكمل فى السكه دى
حسام / عملها ايه اكتر من اللى عملته ممكن يعمل ايه اكتر من اللى بعمله حبها قدى ضحى عشانها قدى ازاى بتدافعى عنه بالشكل ده ازاى قادره تضحى بحبك و سعادتك عشان تسعديه اشمعن هو كلكوا بتحبوه كدا انا اولى منه انتوا اهلى انا
امانى تصحى
نور / من حبى فيك مش قادره اشوفك بتظلم غيرك مش عاوزه ربنا يحاسبك على اللى انت بتعمله
امانى / مش هاين عليكي تسبيه يرتاح يعني
حسام / انا اللى ناديتها يا ماما نامى لو سمحتى … لو بابا بره خليه يروحك ارتاحى و نامى و لما اخرج من هنا نتكلم
نور / فكر فى اللى قولتهولك
حسام / فكرى انتى تانى و ما تاخديش قرارات فى لحظه انفعال تندمى عليها العمر كله
نور تطبطب على اخوها و تبص لامانى تبص الناحيه التانيه نور تطلع بره
امانى/ كانت بتقولك ايه البت دى
حسام / نامى يا ماما نامى
امانى / منه لله اللى غسل دماغها و قلبها على اهلها كدا منه لله ابوك عديم الشخصيه حسبى الله و نعم الوكيل فيهم حسبي الله ونعم الوكيل
حسام يغمض عينه و يتنهد
……………………
فى المستشفي عند ندى
ندى حاضنه حبيبه و بتلاعبها و نور قاعده قدامها
نور / بيوجع
ندى / بتاخدى بينج كنت مرعوبه لما عرفت انى هاخد كهربا كنت خايفه اوى و فضلت اصرخ و اعيط هو انتوا هتفضلوا سايبيني هنا علاطول ارتاحتوا منى يعني
نور / ايه اللى بتقوليه ده بس احنا بس خايفين عليكى
ندى / حطيني فى مستشفي مجانين عشان مصلحتى يعني كلكوا عارفين مصلحتى و بتتحكموا فى حياتى و انا ما ليش اى لزمه صح
نور / هو انتى مش فاكره انتى عملتى ايه
ندى / هو حسام ما جاش معاكى ليه هو انا ما وحشتوش مش كان بيقول بيحبنى
نور / حسام عمل حادثه و فى المستشفي
ندى / عشان كدا عرفتى تجبيلى حبيبه
نور / حسام ما منعنيش حتى جه امبارح و كان عاوز يروحك
ندى / امال مين اللى منعه على صح على مش كدا
نور / لا يا ندى الدكتور انتى حالتك محتاجه متابعه و علاج مخصوص و خروجك فيه خطر على حياتك
ندى / انتى زعلانه منى صح
نور / كان المفروض تقوليلى الحقيقه
ندى / ما قولتلك الحقيقه بدل المره الف ما كنتيش بتصدقيني
نور / حقك عليا
ندى / هو انتى لازم تاخديها و انتى ماشيه
نور / انا و على هنطلق
ندى / و انتى فاكره انك بتقوليلى الخبر ده على اساس انه هيفرحنى مثلا
نور / هو حسام مش عاوز يطلق بس انا كلمت محامى
ندى / برده بتاخدى قرارات لحياتى من غير اذنى مش كدا هو انا للدرجادى رخيصه عندك
نور / انا عارفه ان
ندى / انتى مش عارفه حاجه خالص انتى مش فاهمه حاجه خالص انا و حسام عمرنا ما هنفترق انا لو بعدت عن حسام اموت هتحرم من حبيبه للابد انا ما اقدرش اعيش من غير حسام انا بحب حسام و هو بيحبنى انتى ليه مصره تفرقى بينا
نور / بتحبيه بعد اللى عمله
ندى / حسام ما عملش حاجه حسام بيحبنى و عمره ما يعمل فيا حاجه انتوا اللى عملتوا انتوا اللى بتعملوا كل حاجه انتوا اللى عاوزين تفرقوا بينا انتوا اللى عاوزين تحرمونا من بعض انتوا اللى بتكرهونا انما حسام حسام بيحبنى حسام هيخرجنى من هنا حسام بيحبنى و هيخرجنى من هنا هيخرجنى من هنا
ندى تجرى ترزع بايديها على الباب
ندى / خرجنى من هنا يا حسام انا بحبك يا حسام خرجنى يا حسام بحبك والله والله ما هعمل كدا تانى بحبك يا حسام بحبك
نور /اهدى يا ندى حسام مش بره اصلا
ندى/ انتى جايه ليه جايه و جايبه حبيبه ليه عشان تغيظيني بتقوليلى خدنا بنتك منك خدنا حبيبه منك انا عملت ايه لكل ده عملت ايه بتعملى معايا كدا ليه
نور / لو سمحتى ممكن تهدى
ندى / انا عمرى ما اذيتك بتعملى معايا كدا ليه
ندى تصرخ فى نور وتجرى تروح تشيل حبيبه
ندى / ما حدش هياخدها منى مش هتحرمونى منها مش هتحبسونى هنا
نور / بالراحه على البنت يا ندى … يا دكتور
ندى / بتناديه ليه بتناديهم ليه
نور / ادينى البنت يا ندى
ندى / دى بنتى انا مش هسمحلك تاخديها منى حرام عليكي بتعملى معايا كدا ليه انا عمرى ما اذيتك
نور / يا دكتور
ندى / انا بحبك بتاذينى ليه
نور ما تقدرش تكتم دموعها و تعيط
نور / انا مش باذيكي انا بحبك
للدكتور يدخل و اتنين ممرضات يكتفوا ندى و نور تشد حبيبه و ندى بتقاوم و تصرخ
ندى / سبيها حرام عليكي سبيها يا حسام يا حسام انتى وعدتنى سبونى
ممرضه تدى لندى حقنه ندى تبدا تهدى بالتدريج نور تديها حبيبها فى حضنها و هى بتنام
ندى / انا خايفه
نور / هتخفى ان شاء الله و هتروحى معايا انا و انتى و حبيبه احنا التلاته بس
ندى / انا خاي
ندى تنام نور تبص للدكتور و تمسح دموعها و تشيل حبيبه و تطلع بره
نور / هو ما ينفعش تتعالج فى البيت صح
الدكتور / مش المرحله دى على الاقل نطمن ان حالتها اتحسنت و مش هتاذى نفسها او اى حد خروجها دلوقت مسؤليه كبيره اوى
نور تبتسم بحزن و تمشي تقابل محمد قاعد فى الاستقبال
محمد / ايه الاخبار
نور / روحت للمحامى ؟
محمد / لا استنيتك نروح سوا اتاخرتى اوى جوه
نور تبص لمحمد و تتنهد و تهز راسها
نور / تمام يا بابا يلا عشان عاوزين نشوف لسه السمسار يشوفلى شقه قريبه هنا لحد ما ندى تخلص علاج
محمد / ما الشقه اللى احنا فيها حلوه
نور / بعيد عن المستشفي و غاليه جدا و انا اكيد مش مرتاحه هناك
محمد / مصره برده على الطلاق
نور / دا قرارى
محمد يبص فى الارض نور تطبطب على كتفه
نور / يلا يا بابا يلا
نور و محمد يركبوا العربيه و يمشوا
…………………..
فى شقه حسام
امانى تحاسب رجاله و حسام باين عليه الضيق
امانى/ ما نجلكوش فى حاجه وحشه كتر خيركوا تعبناكوا
الرجاله تمشي امانى تقفل باب الشقه
امانى/ نقضى اليومين دول كدا ترتاح و تتحسن شويه عشان تستحمل الطريق لمصر
حسام / كنت عاوز اروح لندى المستشفي و حضرتك برده روحتيني هو انا ايه اللى عاوزه مش مهم
امانى / هتروحلها تشمتها فيك و لا بجد ناوى تجيبها هنا بقي اسمع اما اقولك
حسام / ندى مراتى
امانى/ و دى تنفع زوجه دى هتفضل شايلها لحد امتى انا لولا انك دافع فلوس الشقه و انك مش هتستحمل الطريق كنت خدتك على مصر و بعدنا عن ولاد الكلب دول كلهم
حسام / انا مش هرجع من غير ندى
امانى / يا حبيبي انت عيان و محتاج اللى يخدمك و دى هتبقي عبئ عليك
حسام / هجيب ممرضه لينا احنا الاتنين هجيب خدامه هجيب اللى اجيبه ريحيني و اعملى اللى انا عاوزه
امانى / انت عارف اختك فين دلوقت اختك خدت البت و راحت تطمن على ندى و هتروح تطلق و تخلصنا من زفت الطين على و هتروح عند المحامى عشان تخليك تطلق ندى
حسام / مش هطلق و طول ما ندى على زمتى كل اللى نور بتعمله ما لوش تلاتين لزمه
امانى / يا اخى طلقها و ريح نفسك و ريحني بقي و ان كان على حبيبه هاخد انا حضانتها و
حسام / انا لسه ما موتش على فكره انا مش محتاج حاجه من حد كتر خيركوا كلكو و كفايا اوى تدخل فى حياتى لحد كدا
امانى / لا يا شيخ بقي دى اخرتها
حسام / طلبت اروح لندى المستشفي جبتيني هنا و جبتى ناس تطلعنى و حبستيني فى الشقه و كانى كرسي ما ليش راي و لا شخصيه نعم يعني يا ماما نعم
امانى/ انت عيان يا متخلف و محتاج ترتاح
حسام / و انا مش هرتاح من غير ندى انا عاوز ندى انا مش هخف من غيرها من فضلك بقي ارحميني و ساعديني
امانى / تمام خش ارتاح و انا كمان هرتاح من نومه المستشفي على الكنبه جنبك دى و ان شاء الله بكره انزلك تجيبها تمام على الاقل لما تيجي تقدر تاخد بالك منها و يمكن تكون حصلت معجزه من السما و اتحسنت هو انت مش عاوزها تتحسن و لا ايه
حسام / انتى بتاخديني على قد عقلى
امانى تزقه للاوضه
امانى / اخدك على قد عقلك ايه بس هو انت فى زى عقلك يا حبيبي دا انت عقلك يوزن بلد بس انا ست كبيره و تعبانه خدت الطريق كعب داير رايح جاى و بت فى المستشفي و من حقى افرد ضهرى شويه و انت كمان يا حبيبي تعبان و متكسر و محتاج ترتاح دا واحد غيرك كان فضل فى المستشفي شويه انما اقولك ايه مستعجل على الهم يا ضنايا
امانى تساعد حسام ينام فى السرير
امانى/ طب والله محسود يا ضنايا ربنا يهديك انت و اختك اقول ايه بس حسبي الله و نعم الوكيل فى الناس اللى ما بتتقيش ربنا اشوف فيهم يوم … ارتاح يا حبيبي و انا هعملك لقمه تأكلها ارتاح انت و ما تشيلش هم
امانى تمشي و حسام يتنهد
……………….
عند الماذون
الماذون / راجعى نفسك يا مدام ان ابغض الحلال عند الله الطلاق و الراجل شارى اهو
نور / معلش يا مولانا ما عادش ينفع
الماذون / يعني يا بنتى ما شوفتيش منه حاجه حلوه ابدا انا زى والدك و بنصحك لله و الله يا بنتى ما هى سهله و لا مستاهله
نور تعيط و تمسح دموعها و على قاعد قدامها متابع
نور / طلقنى لو سمحت خليني امشي
الماذون / لا اله الا الله للدرجادى
نور / ارجوك من فضلك
الماذون يبص لعلى و يرجع يبص لنور و يتنهد و يفتح دفتره
الماذون / اللهم بلغت اللهم فاشهد ماشي اللى تشوفوه ربنا يقدم اللى فيه الخير
………………..
فى شقه عمر
منال بتتكلم فى التليفون
منال / يعني ايه هتشوفى شقه تانيه و يعني ايه لو ما لقيتيش هتشوفى فندق انتى بتهرجى يا نور
نور / ما عادش ينفع يا طنط
منال / يا بنتى انتى من يوم ما جيتي من السفر ما ارتاحتيش و قراراتك دى هتندمى عليها صدقيني
نور / ندمانه والله يا طنط ندمانه على الوقت اللى فات كله ندمانه على غبائى و سذاجتى ندمانه انى … عشان خاطرى جهزيلى حاجتى ارجوكى مش عاوزه اطلع و لا احتك بحد و لا اتكلم مع حد
منال / دا امك جابت اخوكى فوق يا بنتى على الاقل اطلعى اطمنى عليه
نور / مش حمل اسمع اى كلام تقطيم الام المفروض تكون سند بس انا امى الفتره دى صعبه اوى و انا مش قادره استحمل كلمه من حد انا واقفه فى الشارع فى جنب بعيط و الناس عماله تبص عليا
منال / و جايلك ايه من دا كله يا ضنايا بس
نور / تعبت تعبت اوى يا ريتني ما رجعت ياريتها كانت ولعت بيا … استغفر الله العظيم
منال / ايوه كدا استغفرى ماشي هحاول ارتبلك هدومك لو قدرت
نور / لو ما قدرتيش مفيش مشكله هشوف اى محل هنا و اشترى منه بجامتين و طقم خروج و خلاص
منال/ طب ما تستني على يروح يساعدنى
نور / تمام و انا هلف شويه مع السمسار لحد ما حضرتك تكلميني و تبلغيني ان كل حاجه جاهزه
منال / تمام يا قلبي ربنا يهديكي و يصلحلك الحال كان مستخبيلنا فين بس دا كله يا ربى
نور / النصيب يا طنط كل شئ نصيب
منال / اهدى انتى بس و امسحى دموعك و روقى دمك مفيش حاجه مستاهله
نور / فى حاجات تستاهل يا طنط فى حاجات حتى الدموع قليله عليها
منال / لا اله الا الله
نور / قولى ليس و نغم انى بحبهم و هاجى اخدهم قريب قوليلهم انى ما سبتهمش انا بس مش هقدر اشيل مسؤليتهم هنا انا هاجر جنب مستشفي ندى عشان ابقي جنبها مش هقدر اسيبهم فى الشقه لوحدهم و انزل
منال / تحبى اجى اقعد معاكى
نور / لا بابا معايا و هيجيب عمى كمان انا خلاص أطلقت من على ما عادش فى اى سبب تشيلوا عمى عشانه انا اولى بيه و ان كنت سايبه يس و نغم الفتره دى فدا عشان على برده ابوهم و ليه فيهم زى ما ليا و اكتر
منال / والله انتى بتقولى اى كلام فى لحظه وجع و بكره كل شئ هيتصلح و الميه ترجع لمجاريها
نور / الميه اتعكرت خلاص يا طنط ما عادش ينفع
منال / اهدى و خلصى اللى وراكى و انا هجهز الحاجات و اكلمك
نور / ربنا ما يحرمنى منك
منال / مع السلامه مع السلامه لا اله الا الله مع السلامه
أية تدخل
أية / مفيش فايده برده
منال / اطلقوا خلاص دى حتى مش هتروح على هنا بتشوف شقه بره
أية / انا عاوزه ازور ندى
منال / لما جوزك يرجع ابقي كلميه و شوفي الدنيا هتمشي ازاى انا خلاص على تكه و اقع منكوا
أية / الله طب ما ترتاحى يا طنط و قوليلى عاوزه تعملى ايه و انا اعمل بدالك
منال / اقولك ايه بس يلا ربنا يصلح الحال و يقدم اللى فيه الخير افرجها من عندك يارب دول غلابه
………………..
على البحر
على و عمر قاعدين
عمر / والله انا بقول انها سفريه غم من اولها احنا نلم اللى باقي مننا و نرجع مصر و اهو نشوف اشغالنا
على ساكت
عمر / انا والله اتحايلت عليهم ياخدوا العيال و يخرجوا بس ما حدش له نفس للقمه حتى
عمر يبص لعلى
عمر / هو انت ناوى على ايه
على يبص لعمر
عمر/ بتكلم بجد تجربه و عدت و الحمد لله انها جت على قد كدا ايه المرحله الجايه بقي
على ساكت
عمر / انت كاتب لنور الشقه اكيد لما هتنزلوا مصر
على / هاخد حاجتى واعيش مع ماما
عمر/ طب و ندى
على / اقدر اعملها ايه
عمر/ خلاص يعني
على / انا غلطت يا عمر غلطت غلطه كبيره اوى … غلطات غلطه تجر غلطه تجر غلطه لما اطربقت فوق نفوخنا كلنا
عمر / مش شايف يعني اى نور فى اخر النفق
على / نور !!!
عمر / انت لسه بتحبها صح
على يبص لعمر
عمر / ما هو انا عمرى ما فهمت ازاى تكون بتحب الاتنين و مش عارف تختار مفيش حاجه اسمها كدا
على / كل واحده فيهم بتديني حاجات غير التانيه بتملا جوايا فراغ مرسوم على قدها بالظبط التانيه ما بتقدرش تملاه
عمر / و انت بتديهم ايه
على/ ما هى دى المشكله انا … شخص زيي ممكن يديهم ايه انا مش ضحيه هنا يا عمر انا الجانى
عمر يبص لعلى
على / عشت السنين دى كلها بقول اشمعن انا يحصل معايا كدا ليه بيحصل معايا كدا انا مظلوم انا ضحيه انا انا انا لما نسيت ان فى ناس تانيه غيرى بقيت شايف اللى انا عاوزه و بس دوست على ندى و نور و أية ما خليتش
عمر / و انت كان فى ايدك ايه و ما عملتوش
على / ابعد ابعد بعيد عنهم لما ندى قالتلى ابعد كنت بعدت و لما خسرت قدام حسام للمره التانيه كنت انسحبت لكن لت مش ندى بس اللى تنجرح لازم اخد نور كمان فى السكه
عمر / طب هتكمل فى الهبل ده يعني مش ناوى تصلح غلطتك و تعمل اى حاجه
على / هبعد … هبعد عنهم هم الاتنين بس هفضل اساعدهم من بعيد من الاول انا اللى كنت محتاجلهم مش هم اللى محتاجينلى مش هسمح لانانيتي تسيطر عليا تانى ياريتنى كنت فوقت من زمان
عمر / ما انت فوقت فى لبنان و خدت نور و بعدت
على / بس رجعت ضعفت كل ما بقرب بضعف يا عمر دلوقت الوضع غير وقتها كمان نور و ندى ما عادلهمش غير بعض ما ينفعش افرق بينهم لو ملت لواحده هكسر التانيه
عمر / طب على الاقل مش هتستني تطمن على ندى
على / من بعيد يا عمر هبقي قريب بس مش هيشوفونى
عمر / و هيعرفوا منين انك قريب يعني اقصد هتستفيد ايه ما هم كدا هيفتكروك طفشت دمرتهم و سبتهم و روحت عيشت حياتك عادى
على / يمكن ده الصح يكملوا حياتهم من غيرى و يتسندوا على بعض و ينسونى و ينسوا جراحهم معايا
عمر / انت بتقول اى كلام فى الحماده على فكره
على / قصدك تاثير الطلاق و الصدمه و كدا
عمر / لو ربنا كرم نور و قدرت تطلق ندى من حسام
على / وجودى هيزود الطين بله لا حسام هيرضي يطلق و لا نور هتستحمل تشوفنا مع بعض و ندى محتاجه نور اكتر من واحد عاجز و قليل الحيله زيي
عمر / يعني مش هيجيبك الشوق و لو مره
على / انت هتمنعنى
عمر / هو انت حد بيقدر عليك
على / لا والله كلهم قادرين الا انت
عمر / هههههههههههههه طلع العيب منى يعني اقولك حاجه انا اللى كلت الجبنه بقولك ايه بكاء الاطلال و نواح الحريم اللى انت عامله ده لا هيقدم و لا ياخر يلا يا خويا خلينا نروح هى سفريه غم اساسا و ابقي تف فى وشي ان سافرت معاك فى حته تانى
على يبص لعمر
عمر / ما تقوم يا عم قعدتك دى لا هتقدم و لا تاخر قوم روح اتشطف و اتوضي و صلى ركعتين و اقعد فكر تقدر تساعد ازاى قوم
على يقوم و يمشي مع عمر و عينه على البحر
عمر / هتفرج بس انت قول يا رب
على / يارب
………………..
فى شقه حسام
امانى تدى لحسام الموبايل
حسام / ما هى اكيد مش هتبات فى الشارع يعني … الو
نور / الو
حسام / انتى فين
نور / فى شقتى الجديده انا اطلقت و
حسام / انا مش جوزك انا اخوكى يعني تطلقى ما تطلقيش تروحى بيتك
نور / بابا هيقعد معايا هو و عمى
حسام / و انا ايه بقي
نور / بابا و ماما اطلقوا و ماما مش هتسكت و انا مش عاوزه على يشيل بابا و عمى
حسام / يشيل مين دول قاعدين فى الشقه اللى تحت بفلوسي انتى ناسيه و لا ايه و بعدين حبيبه فين
نور / حبيبه معايا
حسام / و يا ترى هتفضل معاكى للابد و لا ايه حبيبه وحشانى و عاوز اشوفها
نور / لحد ما مامتها تخرج بالسلامه
حسام / انا ابوها
نور / انت مش امين عليها
صمت
نور / انا مش هبقي مطمنه عليها معاك انت مش طبيعي
حسام/ انا اخوكى
نور/ و عشان كدا بحميلك بنتك
حسام / بتحميها من مين من ابوها لتكونى فاكره انك هتحبيها قدى انا بسيبهالك عشان ظروفك مش اكتر
نور / ظروفى !!
حسام / اوعى تنسي انها بنتى انا و انا اللى من يوم ما اتولدت و انا اللى بخدمها و بهتم بيها ما تزايديش على حبى ليها و ما تخلينيش ازعلك
نور / زعلنى يا حسام
حسام / نور
نور / انت محتاج تتعالج زى ندى بالظبط و اكتر
حسام / و انتوا خليتوا فيا عقل هاتى بنتى بدل ما اخدها منك بالقوه
نور / مع السلامه يا حسام
حسام / دى بنتى يا نور ما تخلينيش اعمل حاجات نندم عليها كلنا
نور / ندمت خلاص
حسام / الو الو … دى قفلت السكه
امانى / طب اهدى بس هتجيبها هى يعنى هتخطفها
حسام / تكلمى بنتك و تعقليها و تقوليلها انى ما عدش عندى اللى ابكى عليه و انها لو فاكره ان الحادثه عجزتنى تبقي غلطانه انا لولا عامل حساب انها اختى كنت
امانى / يا ابنى الموضوع غير كدا خالص هو انت هتوه عن نور دى هبله و مسكوها طبله و انا هكلمها
حسام / اطلقت ما اطلقتش بتخلف ما بتخلفش دى مش مشكلتى عاوزه تربى بنتى انا مش هلاقيلها ام بعد ندى احسن من نور بس بشروطى و بمزاجى مش تخطفها تربيها تحت عنيا مش تحرمنى منها
امانى / تحرمك منها ازاى بس ما عاش و لا كان اللى يفرق بينك و بين بنتك اهدى انت بس و هتلاقيها جيباها و جايه
حسام / و بابا ده كمان انهى اب ده اللى ما يخشش يبص على ابنه يطمن عليه حتى ده
امانى / و هو ابوك ده اب
حسام/ و فالح بس يقعد طول الليل على باب الاوضه طب ادخل مره كلمنى مره حسسنى ان ليا اب مره
امانى / يلا ربنا على المفترى … صحيح انا هكلم الست منال و اقولهم يسيبوا الشقه النهرده احنا خلاص الحمد لله ما عادش فى حاجه تربطنا بيهم و اهو بدل ما اختك اللى تاجر شقه بره و ياخد عمك معاه اهى الشقه دى اولى ما هم ما يتفسحوش على قفانا و احنا اللى ندور على مكان تانى بره لا هم فقره و لا محتاجين و الحمد لله ما عادش فى حاجه تربطنا بيهم
حسام / منك ليهم انا الحاجات دى مش فارقه معايا بس لا نور و لا بابا هيسكتولك ما تنسيش ان يس و نغم لسه مع على
امانى / قطعت و قطعت سيرتهم دا انا مفيش حاجه مفرحانى فى حكايه طلاق اختك الا انها خلصت من ولاد الشوارع اللى كان عريس الغبره باليها بيهم يا اختى هم و انزاح
حسام / نور كانت بتحبهم
حسام يبص لامانى بحزن
امانى / ما تزعلش نفسك انا هكلمها نور بتحبك قد ما بتحبها اهدى انت بس اهدى و ارتاح و انا والله لجبلك البت لحد عندك
حسام / كلميها عشان خاطرى خليها تجيبها انا محتاجلها اوى مش هتبقي ندى و حبيبه فى يوم واحد
امانى / هكلمها يا حبيبي والله هكلمها
……………….
فى شقه مفروشه
نور واقفه مع محمد شايله حبيبه و فى بواب واقف و محمد مش عاجبه الشقه مبهدله
محمد / بس دى محتاجه تنضيف جامد اوى يا بنتى
نور / ما تشغلش بالك انت بس على ما تروح تجيب الشنط و عمى من البيت هتلاقى كل حاجه بقت تمام
محمد / ما نشوف شقه تانيه احسن
نور / يا بابا الشقه مش محتاجه اكتر من وش نضافه و انا تعبت من اللف
البواب / يا باشا ان كان على النضافه فساعه زمن و نخليهالك فله بس ابقي شوف الجماعه اللى هينضفوا باى حاجه
نور / ماشي اتفقنا هنمشي كام ساعه نجيب حاجتنا على ما تنضفوها
البواب / عيني يا ست الكل
نور / تمام يلا يا بابا
نور تنزل مع محمد تليفون نور يرن
نور / دا حسام
محمد / يا بنتى ردى عليه مش وقت الكلام ده
نور تقفل السكه حسام يتصل تانى تكنسل و تعمله بلوك
محمد / دا مش الحل فى الاول و الاخر بنته
نور / مش هسمحله يخطفها دا مش فى وعيه انت ما شوفتوش فى المستشفي كان عامل ازاى
محمد/ يخطفها ازاى بس دا عيان و راقد فى السرير
نور / بابا لو سمحت
محمد / هو محتاجلها يا نور اخوكى عيان مهما غلط يا نور هيفضل اخوكى و مهما عمل هتفضل حبيبه بنته
نور / انا مش هبعد حبيبه عن عيني هتقولوا ظروفى هتقول اللى تقولوه انا مش هبعد حبيبه عن عيني
محمد / طب تعالى معايا تعالى اطمنى على اخوكى و هديه بلاش العند ده اخوكى عيان و ما لوش غيرنا
نور تبص لمحمد
محمد / افتكريله اى حاجه حلوه عملهالك دى بنته و الضنا غالي
نور / بس ماما
محمد / انا هاجى معاكى و مش هسكت لحد
نور / تمام يا بابا بس لو حسام اصر انا هعند و عند بعند بقي
محمد / ماشي يا ستى اتفضلى معايا
نور و محمد يركبوا العربيه
………………
فى شقه على تحت
منال / انا لميت حاجتها اللى هنا بس معظم حاجتها فوق و لما طلعت خبطت ما حدش فتح قولت يمكن نايمين
على / انا بقول اطلع انا و عمر واهو بالمره نلم حاجتى كمان من فوق
أية / بوز الاخص مش هتسيبكوا فى حالكوا
عمر / طب على الاقل لمى انتى الحاجه من هنا عشان ننجز وقت
أية / انا مش هرجع مصر و اسيب ندى
عمر / أية
أية / على الاقل لو مضطرين نسيب الشقه دى شوف شقه قريبه زى ما نور عملت
على / انا فعلا طلبت من السمسار يشوف شقه قريبه من المستشفي و شقه نور بس هقعد فيها لوحدى انتوا هتنزلوا مصر
أية / لا انا هاجى معاك و اللى عاوز ينزل مصر ينزل
عمر / تروحى معاه فين وبيتك و بنتك دا احنا ننقل ندى مصحه فى مصر اسهل
جرس الباب يضرب على يقوم يفتح يلاقى محمد و نور وراه شايله حبيبه يبتسم
على / اهلا و سهلا اهلا اهلا اتفضلوا
محمد / يزيد فضلك لميتوا الحاجه
منال / كل حاجتكوا اللى هنا لميناها فوق بقي
نور / انا هطلع اللمها
أية / تحبى اساعدك
عمر / أية
نور / ما افتكرش انها هتبقي فكره كويسه خليكي هنا احسن بابا هيساعدنى يلا يا بابا
يس يطلع يجرى من الاوضه هو و نغم يحضنوا نور
يس / عرفتك من صوتك
نغم / ما تسبيناش و تمشي عشان خاطرى
نور / هرجع اخدك بس طنط ندى تعبانه و محتاجانى اخد بالى منها اول ما تخف هاجى اخدك … خليكوا مع بابا على و اسمعوا كلامه لحد ما اجى
يس / طب ما نيجي معاكى هنبقي مؤدبين و هنسمع الكلام
نور / حقكوا عليا انا عارفه انى قصرت جامد فى حقكوا والله بس كان غصب عنى
نغم / طب اشمعن حبيبه خدتيها معاكى
نور / عشان مامتها تشوفها و عشان باباها عيان اسيبها مع مين
منال / بس بقي يا ولاد الله خشوا على اوضتكوا يلا خشوا
نور / انا هطلع اللم حاجتى و انزل اقعد معاكوا شويه قبل ما انزل
نغم / اجى معاكى
يس / لا يا نغم قولنا ما تطلعيش فوق
نغم / ما انا هطلع مع ماما نور
نور / خليكي هنا احسن يا نغم انا هنزلك تانى … يلا يا بابا
أية / تجيبي حبيبه عنك
نور / خليها معايا و اهو بالمره حسام يشوفها
أية تعوج بقها نور تمسح دموعها و تبص لعلى متابعها بحزن و تمشي و محمد يمشي وراها
محمد / عن اذنكوا
…………………..
فى شقه امانى
نور تفتح باب الشقه بالمفتاح مفيش صوت ثانيه و امانى تطلع من جوه تشوفها تبتسم
امانى / كنت عارفه ان مش هيهون عليكي اخوكى كدا تزعليه يا نور امال لو ما كانش عيان دا بدل ما تقفى جنبه
محمد يدخل
امانى / جاى ليه ان شاء الله و لا تكون اخيرا افتكرت ان ليك ابن
محمد / لمى حاجتنا بسرعه يا نور خلينا نمشي
امانى / بردو يا نور بردو
نور تدخل الاوضه فى صمت تلاقى حسام بيعانى انه يقعد نفسه على الكرسي تنزل حبيبه فى الارض و تساعده
حسام / شكرا
نور / انا مش جايه اجبلك حبيبه انا جايه اخد حاجتى و حاجتها
حسام / و انتى كدا بتعاقبيني و لا بتعاقبيها انتى اصلا بتفكرى قبل ما بتاخدى القرارات دى و لا هوبا يلا نفذ
نور / انت اخويا اه بس بجد مش قادره اسامحك
حسام/ فلقيتى العقاب المناسب ليا انك تحرميني من بنتى صح
نور / لا هجبهالك تشوفها وقت ما تحب فى اى وقت و اى مكان
حسام / كانك طليقتي اللى بتتكلم مثلا لا يا ماما فوقى دى بنتى و انتى عمتها مش امها انتى اصلا متخيله انك هتاخديها منى ازاى بقي ان شاء الله
نور / بالمحكمه لو حكمت
حسام / هتقفى قصادى يعني هتحاربيني هتحاربينى فى بنتى و متخيله انى هسكتلك اليوم اللى هتلغى فيه اعتبارات الأخوه اللى بينا انا كمان هلغيها و انسي انك اختى و ساعتها هتزعلى
نور / هتاذيني يعني هتاذيني انا كمان بص حواليك كدا مين فينا ما اتاذاش بسببك اصلا
حسام / يا شيخه دا مفيش حد فى الدنيا حب اخته زى ما حبيتك انتى بتنتقمى منى فى اللى عمله فيكي على فاكره ان عجزى هيخلينى البردعه بتاعه الحمار بتاعك
نور / و مفيش اخت حبت اخوها و دافعت عنه زى ما دافعت عنك خليتني شريكه فى جرايمك
حسام / جرايمي
نور / ندى و اللى عملته فيها
حسام / فوقى يا نور فوقى بدل ما
نور / هتعمل ايه
محمد يدخل
محمد / ازيك يا حسام
حسام / زى ما حضرتك شايف العجل وقع و كترت سكاكينه
محمد / بكره تخف و تقوم بالسلامه روحى يا نور لمى حاجتك
حسام / و حضرتك اخترت انك تاخد نور و تسيبونى فى ظروفى دى لا حقيقي انا مبهور بابوه حضرتك
محمد / امك معاك انا و هى اطلقنا و
حسام / طلاقك من امى مش معناه انك طلقت ابنك معاها
محمد يبص لحسام و يسكت
حسام / بيبو .. بيبو تعالى
حبيبه تروح لحسام و تطلع على رجله و هو يساعدها
حسام / كدا خدت اللى ليا و بكره هاتصل بالمحامى و اعمله توكيل يجبلى بيه ندى من المستشفي
نور / انت بتعند مع مين
امانى تدخل
امانى / لو ندى دخلت البيت ده انا مش هقعدلك فيه انت فاهم و لا لا مش على اخر الزمن هعيش مع المجنونه بنت المجنونه دى فى بيت واحد
حسام / سبيني سيبونى كلكوا يلا يا نور لمى حاجتك يلا
حسام / انا مش مجنون انتوا اللى عمالين تستفزوا فيا لما خرجتونى عن شعورى انتوا ايه ما بتحسوش
نور / يا حسام ندى محتاجه علاج و انت بتتصرف
حسام/ مش عاوزه تخدميني فى رقدتى ما تعذبينيش مش عاوزه تقفى جنبى فى مرضي ما ترمينيش فى مصحه نفسيه
نور / انا ما قولتش انى هحطك فى المصحه انا بس عاوزه اطمن عليك
حسام / انا كويس الحمد لله بصي يا نور انا عمرى ما هطلق ندى و انا حاليا الواصي عليها و على بنتى لو حضرتك حابه تساعدى اخوكى و بنته و ندى يبقي تتفضلي على اوضتك جوه و تلمى حاجه على بيه ترميهاله و تعيشي معايا
نور / انا مش ندى مش هتلوى دراعى عشان ما تحرمنيش من حبيبه
حسام / تمام يبقي ما ترجعيش تزعلى
نور / تمام
نور تيجي تشيل حبيبه حسام يمسك ايدها و يضغط عليها نور تبصله
حسام / المره الجايه هكسرهالك
…………………….
- يتبع الفصل التالي اضغط على ( رواية سلف و دين ) اسم الرواية