رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثالث و السبعون 73
ندى/ انا مش عايزه اموت عاوزه اجوز حبيبه و افرح بيها انا مش عايزه اموت
حسام ياخد ندى فى حضنه اكتر و امانى متابعه اللى بيحصل فى صمت و تبص لمحمد
امانى / اللهم لا شماته
الكل يبص لامانى تسيب المكان و تدخل اوضتها
على / مش هنلحق ننزل مصر هناخدها للدكتور اللى هنا اللى قالوا عليه امبارح كان ممكن ما نلحقش ننزل مصر كان ممكن ما تتلحقش
نور / قومى يا ندى نلبس
ندى تبص لنور الكل بيعيط
ندى / هنروح فين
نور / قومى تعالى هناخد حبيبه معانا ما تخافيش
ندى تبص لحسام منهار
ندى / ممكن اروح
حسام يهز راسه ندى تقوم و نور تسندها و يدخلوا جوه و حسام و على بيعيطوا محمد قاعد على كرسي مش مستوعب
عمر / قوم يا على معايا تحت
على / رجلى مش شيلانى
عمر يدخل يحضن اخوه
على / ما كنتش هستحمل وقعه تانيه زى دى
عمر / الحمد لله عدت على خير عدت قوم قوم تعال
على / لا ما عدتش و ما عدش فى خير بعد اللى حصل
محمد / هتخف هتتعالج و تخف
عمر يقوم على و حسام منهار من العياط
……………………
فى المستشفي
الدكتور / دى اعراض جانبيه شائعه جدا للمهدئات التهيات و الهلاوس
على / يعني التبول اللاارادى سببه المنوم و الانتحار سببه المهدئات يعني لو قطعنا الادويه دى هترجع كويسه
الدكتور / اكيد لا لانها ما اخدتش الادويه دى من فراغ اكيد كان فى مشكله من الاول و محتاجه علاج و دا هيبان لما المهدئات و الادويه دى تتسحب تماما من جسمها
نور / و دا هياخد وقت قد ايه
الدكتور / ممكن يوصل لعشر ايام و فى الوقت ده هيبقي فى جلسات بشكل شبه يومى او يوم بعد يوم انا ملاحظ تعلقها الشديد بحضرتك و بحبيبه دى بنتكوا على ما اظن
حسام / هى ما لهاش غيرنا والدها مريض و والدتها متوفيه
الدكتور / امال مين على
الكل يبص لعلى
الدكتور / انا محتاج اقعد معاك عشر دقايق بعد اذنك لوحدنا
نور / خير يا دكتور
الدكتور / لا ان شاء الله خير بس انا هعمل ده معاكوا كلكوا بس هبدا بالاستاذ على
حسام عنيه رايحه جايه بين على و الدكتور
نور / طب نطلع بره و لا ايه
الدكتور / تمام يا ريت
نور تبص لحسام و يقوموا يطلعوا بره نور تقفل الباب و على باصص فى الارض
الدكتور / انا مش هقدر اصيغ مقدمات لسؤالى او امهد الموضوع بس اتمنى ان حضرتك تجاوب بصراحه و اى كانت اجابتك اوعدك انها هتفضل سريه
على / اتفضل
الدكتور / انت اتحرش بمدام ندى
على / ابدا
الدكتور / انا مش وكيل نيابه بحقق مع حضرتك ندى صرخت لما سمعت اسمك و قعدت تقول هو اللى لمسني هو اللى مسك ايدي انا ما عملتش حاجه و انها بتحب حسام
على / ندى متجوزه حسام غصب ندى مستحيل تكون بتحب حسام
الدكتور / عارف
على / انا ما اتحرشتش بيها انا و ندى قصه حب قديمه و النصيب فرقنا حسام اتجوزها غصب اغتصبها و بهدلها و فى الاخر لفقلها صور يا ترجعله يا ياخد منها حبيبه دا اختصار شديد لسنه من المعاناه و لما سافرت معاه لبنان
الدكتور / حادثه بنتها اللى اتخطفت ايوه حكيتولى عنها
على / بعدها نور زوجتى ولدت ولدين توأم اتوفوا ورا بعض فى خلال ايام نزلت اخبط على حسام عشان مش قادر ابلغ نور ندى اللى فتحت و فى لحظه ضعف حضنا بعض
الدكتور / و حسام جوزها شافكوا
على / بعدها بشهر و نص سافرنا عمره حسام صمم يوصلنا
الدكتور / ما عملش اى حاجه خالص بخصوص الحضن
على / نور و حسام بعد ما وصلونا موبايلهم اتقفل فتره و لما اتفتح ندى كانت واحده تانيه اختفت تماما بدئت المنومات و المهدئات و لما رجعنا من العمره امبارح كانت زى ما حضرتك شايف كدا هى بتاخد الادويه دى بالكتير من اسبوعين اللى احنا سافرنا فيهم العمره
الدكتور / ممكن اسال حضرتك سؤال تانى
على / لو هيفرق مع ندى اتفضل
الدكتور/ حضرتك بتقول انكوا قصه حب و جوزها فرقكوا طب و المدام مش تبقي اخت حسام برده
على / دى قصه طويله بس المدام تبقي اقرب واحده لندى وقتها كنت متخيل انى بقربى من ندى هقدر احميها من حسام لكن مع الوقت اتعلقت اكتر بمراتى و حبيبتها و حياه ندى كمان كانت ظاهريا هاديه و مستقره فانسحبت بهدوء و كل واحد فينا اكتفى بحياته و نسي الماضي لحد اليوم اياه
الدكتور / دا مدام ندى شافت كتير بقي على كدا
على / كل اللى اتحكى و اللى هيتحكى نقطه فى بحر
الدكتور / تمام يا استاذ على لو تسمح تنادى استاذ حسام اتكلم معاه شويه هو كمان على الاقل يدينى نقطه تانيه من البحر ده
على يهز راسه و يقف و يبص للدكتور
على / انا تهمنى سلامه ندى فوق اى شئ بس نور مراتى لو عرفت ندى حرفيا مش هيبقالها حد
الدكتور / ما تقلقش اى كلام بيحصل فى الجلسه بيكون سر بيندفن مع الطبيب المعالج
على يهز راسه و يطلع بره
على / عاوز يتكلم معاك
حسام / طب ادخل لوحدى و لا اجيب المحامى بتاعى
نور/ مش وقت هزارك ادخل
حسام / داخل حاضر
حسام يدخل و على يقعد جنب نور
نور / كان بيقولك ايه
على / كان بيسال على ماضي ندى و ازاى ارتبطت بحسام
نور / و قولتله
على / من غير تفاصيل
نور / مش يمكن التفاصيل دى اللى تعالجها يا على
على / لو كانت هتفرق كان سال
نور / انا اللى مش فهماه ازاى هيسحبوا المهدئات من جسمها اذا كانوا ادوها اصلا حقنه من شويه
على / دا منوم مش مهدئ
نور / طب ما المنوم كمان تاعبها
على / كان عاجبك صريخها يعني
نور / انا مش قادره اصدق ان كل ده بيحصل
على / بيحصل يا نور للاسف بيحصل و احنا كنا عارفين انه بيحصل بس كنا مغميين عنينا و بنقول ان شاء الله خير نمنا على شريط القطر و ربطنا ايدينا و رجلينا و قولنا ان شاء الله مفيش قطورات هتعدى من هنا
نور / ممكن تهدى
على / يا ريتني كنت قادر ما كانش ده حالى
على يقوم يقف و يبص من شباك و نور متبعاه يرجع يقعد جنبها
على / لو كنت اتاخرا شويه
نور / عارفه عارفه عبير كانت هتتكرر بس ندى مش زى عبير دى قصه و دى قصه تانيه خالص
على / نفس الوجع يا نور نفس الوجع
نور / شكلنا كلنا محتاجين جلسات فى المخروبه دى
على يبص لنور و ما يقدرش يمسك نفسه و يبتسم
…………………
فى شقه عمر
عمر يدخل شايل اكياس
عمر / انا جيت و جبت كل الحاجات اللى فى الليسته
منال / تسلم مجايبك
عمر / امال أية فين
منال / نزلت
عمر / أية
منال / ما قدرتش عليها قالت هتقعد على البحر هنا قدام البيت و فعلا طلعت بصيت عليها مره لقيتها قاعده على الكورنيش هنا بتقول مخنوقه حتى خدت البت فى ايدها تشممها يود البحر بتقول بيزود المناعه
عمر / انا هكلمها فى التليفون تروح بقي كفايا كدا لو حضرتك كنتى كلمتيني كنت جبتها فى ايدي وانا طالع
منال / معلش يا ابنى عقلى مش فيا عماله اتصل بنور و على حد يطمنى عملوا ايه كلهم غير متاح
عمر / ايوه مفيش شبكه عشان العياده فى الدور الارضي من المستشفي بس على خرج بره و كلمنى حجزوها و الدكتور قعد اتكلم مع كل واحد فيهم لوحده و لما كان بيكلمنى كان دور نور باين
منال / والله يا عمر انا لحد دلوقت مرهوقه من اللى حصل
عمر / الحمد لله قدر و لطف انا هكلم أية تطلع بقي عشان كفايا كدا اوى
منال تهز راسها عمر يطلع البلكونه يبص عليها و هو بيتصل تكنسل و هو مش شايفها ينفخ و يتصل تانى
…………………..
فى المستشفي
الدكتور / يعني هى كانت طبيعيه قبل رجوعكوا من العمره ارجوكى تركزى فى سؤالى التفاصيل بتفرق و كلام استاذ على و دكتور حسام متناقض بس الاتنين اجمعوا انك كنتى اقرب واحده ليها
نور تسكت و تفكر
نور / هى متغيره من فتره طويله من وقت رجوعها من الامارات
الدكتور / لما شالت الرحم
نور/ ندى قبل جوازها من حسام كانت نشيطه و مهيبره لكن بعد ما خلفت بقت هاديه اكتر بس برده كان بيجيلها وقت تبقي حماسيه برده لكن مش كتير
الدكتور / و علاقتهم كانت ازاى كانت بتشتكيلك من ايه
نور / من كل حاجه و اى حاجه
الدكتور يستغرب
نور/ فى حاجات ليها حق كان فى حاجات كتير ما يتسكتش عليها بس كانت بتسكت عشان المركب تمشي و عشان هى ما لهاش حد بس هو كان بيعوضها بس هى ما كانتش بتسامح و كل مادا كانت بتبقي نكديه اكتر … او مش نكديه كان … كان … برانويا باين
الدكتور يتعدل
نور / ديما فى ان حسام بيخونى عرفتى منين انا عارفه هو بيكدب عليا هى بتكدب عليا حاجات من دى
الدكتور / و اسف لما اولادك ماتوا
نور تسكت ثوانى
نور / ندى اتغيرت اكتر كانت جنبى طول الوقت بس علاطول متوتره
الدكتور / وجود جوزك كان بيشكلها مشكله
نور / بالعكس على و ندى جيران من زمان و معرفه و علاقتهم ببعض كويسه جدا
الدكتور / يعني ما كانتش بتحاول تتجنبه مثلا او لمحتلك باى حاجه بخصوص البرانويا دى
نور / هى البرانويا اللى قولت لحضرتك عليها دى كانت لحسام بس
الدكتور / و طبعا حضرتك ما كنتيش موجوده عشان تلاحظى اى اختلاف من يوم ما وصلتك للمطار
نور / لا لاحظت و كلنا لاحظنا من وقتها بدات الادويه اللى بتاخدها نايمه طول الوقت و لما بتصحي ملجلجه كدا و مش مظبوطه و لما رجعنا لقيناها انهارت خالص
الدكتور / ما حكتش خالص ايه اللى حصل ما حاولتش تتكلم فى اى شئ من ساعه ما رجعتى
نور / ابدا ما اتكلمتش خالص
الدكتور / تمام شكرا
نور / كلامى فرق فى حاجه هتتحسن
الدكتور / ان شاء الله هتتحسن
نور تبتسم و تبص فى الارض بحزن
………………….
قدام عماره اسماء
تاكس يقف و أية تنزل شايله بيرين على ايد و شايله شنطه على الكتف التانى تبص على العماره و تطلع تخبط اسماء تفتح تبص لأية تتفاجئ
أية / ازيك
اسماء / انتى ايه اللى جابك
أية / شوفتى بنوتى
اسماء / عن اذنك
اسماء تيجي تقفل الباب أية تمنعها
أية / ليه كدا انتى شوفتى منى ايه عشان تقلبي عليا بالشكل ده معقول اللى بينا كان مصلحه
اسماء/ انتى هتستعبطى هو ايه اللى بينا انتى هتجيبيلى مصيبه
أية / مصيبه !!
اسماء / ايه معقول مش فاهمه قصدى احنا عرفنا كل حاجه و لعلمك انتى لو ما مشيتيش من هنا دلوقت هطلبلك البوليس
أية تبصلها بصدمه
اسماء / كنتى فاكره انك لما هتتنقبى ما حدش هيعرفك اديهم عرفوكى انتى اصلا ازاى تكونى بالانانيه دى دا انا فتحتلك بيتي
أية / انا فتحتلك بيتي الاول و اكلت معاكى فى طبق واحد شوفتى منى ايه
اسماء / انا ما شوفتش بس مصر كلها شافت
أية / انا اتصورت فى اوضه نومى و انا مع جوزى عشان واحد حيوان دخل البيت و كشف ستر اهله و اتفضحت عشان ناس قليله الربايه بتتبع عوارات الناس و بيتفرجوا على مشاهد نجسه زيهم انا لا عملت حاجه حرام و لا هنكسف منها انتوا اللى المفروض تنكسفوا انكوا للدرجادى ظلمه و حسبى الله و نعم الوكيل فيكوا حسبي الله و نعم الوكيل فيكوا
أية تنزل و هى بتعيط و تحسبن تليفونها يرن تقف و تطلعه بصعوبه و حوسه و ترد
أية / الو
عمر / انتى فين و مال صوتك فى حاجه حصلت و لا ايه
أية/ انت ليه كدبت عليا ليه ما قولتليش الحقيقه
عمر / حقيقه ايه قوليلى بس انتى فين و انا اجيلك
أية / حقيقه اسماء حقيقه انهم شافو الفيديو حقيقه انى لسه بتعرى قدام الناس حقيقه ان الموضوع ما انتهاش و انك عارف انه ما انتهاش
عمر / انتى فين
أية / فى الشارع هكون فين يعنى
عمر / انا جايلك
أية / ما تجيش و ما تخافش عليا انا هركب و اجى
عمر / تمام مستنيكي قدام البيت ما تتاخريش
أية / مش هتاخر
أية تشاور لتاكس يقف تركب
……………….
فى شقه حسام
حسام يدخل اوضه نور تدخل وراه
نور / احنا محتاجين نتكلم
حسام يقعد على السرير و يبصلها بتعب و حزن نور تقفل الباب
نور / انت بتحب ندى صح
حسام / انتى رايك ايه
نور / انا بسالك بتحب ندى و لا لا
حسام / بحبها طبعا بحبها امال عملت كل ده ليه و لمين
نور / يبقي ما تخبيش عنى حاجه يبقي تساعدها على الاقل عشان البنت اللى ما لهاش ذنب دى بنتك اللى بتدور بعنيها وسطينا على امها مفيش حاجه هتعوض حبيبه عن ندى
حسام يقف
حسام / انتى فاكره ان غياب ندى او اللى جرالها على مزاجى انتى فاكره انى مش موجوع زيكوا واكتر انا بموت فى الثانيه مليون مره انا مش قادر استوعب انها اتحجزت هناك مش قادر اتخيل انها هتفضل طول الوقت ده بعيد عنى
نور / يبقي تصارحنى و تقولى الاعراض دى فعلا بدات لما سافرنا العمره زى ما الكل بيقول قولى فى حاجه حصلت يوم السفر فى حاجه حصلت لما تليفوناتكوا اتقفلت
حسام / هو فى ايه يا نور هو اى حاجه تحصل يبقي اكيد حسام عمل حاجه
نور / الدكتور قالى ان ممكن تكون عقدتها كانت مدفونه و اتعرضت لحاجه خرجتها
حسام/ و موت عيالك ما ينفعش يكون الحاجه دى صح
نور / كانت كويسه
حسام / اش عرفك
نور / كانت معايا طول الوقت اكيد كنت هاخد بالى
حسام / نور انا تعبان ومش قادر و مش طايق نفسي
نور/ ساعدنا نساعدها لو ما عرفناش ايه اللى حصلها مش هنقدر نعالجها
حسام / دا دور الدكاترة
نور / لو ساعدناهم هيوصلوا اسرع
جرس الباب يضرب
حسام / و انا قولتله كل اللى عندى
أية تدخل باندفاع و عمر وراها
أية / و قولتله اتجوزتها ازاى
حسام يقف يبصلها
عمر / يلا يا أية
أية / لا مش يلا يا عمر و يا انا يا الكلب ده النهرده
على / مش وقته يا أية
أية / لا وقته … و حقى منك هاخده دلوقت و يا قاتل يا مقتول
حسام / يبقى اقتلينى يا أية اقتليني و ريحينى و لو فاكره انى هقاوم تبقي غلطانه انا اساسا قاعد مستنيكي
أية / و انا هريحك
أية تطلع سكينه من تحت الاسدال نور تصرخ و على و عمر يمنعوها تعور على فى ايده و هى بتقاومهم و تصرخ امانى تطلع من تحت
أية / انتوا بتدافعوا عنه بتقفولى عشانه
على / احنا بنحميكي انتى
امانى / هو فى ايه هنا بالظبط مالها المجنونه بنت المجنونه دى
أية / مالى هيكون مالى يعنى ما تقولها مالى ما تنطق و تقول مالى
حسام / انزلى كملى اكلك يا ماما مفيش حاجه
أية / لا فى لا فى
نور / اهدى يا أية لو سمحتى
امانى / انتى تروحى تترمى مع صحبتك فى العباسيه و تريحينا
عمر / والله كنا مرتاحين لحد ما ابنك البيه دمرلنا حياتنا بوساخته و ربايته القذره
امانى / اخرس انا ابنى متربى احسن تربيه
أية / و لا شفها اللى يعيش مع واحده بتكرهه بالغصب ما يتقالش عنه متربى اللى يغتصب بنت عمه ما يبقاش متربى اللى يدخل بيوت الناس
حسام / امك اللى دخلتنى
نور / بس بقي بس اسكت
حسام / ما انا ساكت من الصبح و ما حدش مقدر اللى انا فيه
أية / و هو مين السبب مش انت يا واطى
حسام / لا مش انا هو
حسام يشاور على على على يتفاجئ
حسام / احنا كنا عايشين زى الفل بس لا لازم البيه يظهر و يبوظ حياتى
على / انت بجد عاوزنا نتحاسب
حسام / اه تعال نتحاسب كلو كان بسببك كل حاجه كانت بسببك انت
نور / و على ايه دخله مش انت اللى كان كل همك ترجع لندى
حسام / دافعى عنه كمان دافعى ما انتى هبله مش فاهمه حاجه
نور / و دلوقت الوقت اللى تفهمنى فيه
أية / و حتى لو قالوهالك عيني عينك برده مش هتفهمى لانك انتى اللى مش عاوزه تفهمى
نور تبص لأية
على / كفايا يا أية عشان خاطرى كفايا
أية / كلو كان عشان خاطرك يا على لكن انا فين خاطرى فين حقى منه سكتنى عشان ندى و عشانك كدبت عليا وقولت الموضوع انتهى كدبت عليا و قولت عشان تساعد ندى عشان ندى ما تتحرمش من حبيبه دوست عليا بالجزمه و سكت عشان ندى ما تتحرمش من حبيبه فين ندى يا على فين ندى
امانى / انا مش فاهمه اى حاجه
حسام يروح يقعد على السرير
امانى / هو فى ايه يا نور فى ايه بينكو مخبينه عليا
أية / قولى في ايه قايلينهولك
منال تدخل
منال / أية … بيرين بتعيط تحت
أية / جايه يا طنط
أية تنزل
منال / تعالوا يا ولاد كلوا لقمه و الاكل سخن تعالى يا اختى طبقك برد
امانى / انزلى انتى يا ست منال انزلى اما نشوف فى ايه انا قلبى اصلا كان حاسس ان فى حاجه مش مظبوطه
امانى تبص للاربعه كل واحد باصص فى حته و تلكل ساكت
منال / تعالى بس دلوقت و ان شاء الله كل حاجه هتتحل تعالى … انزل انت طيب يا عمر … نور حبيبتي … على
ما حدش يبصلها
منال / مفيش فايده يعني ما ليش خاطر عند حد فيكوا خالص كدا
نور / انزل اطمن على أية يا عمر
على / انزل مع طنط يا عمر
عمر / تعال معايا
على يبص لنور يلاقيها بصاله
على / هحصلك
عمر يبص على نور و حسام يبص لعلى و يرجع يبص للارض
منال / تعالى يا اختى تعالى
امانى / مش قبل ما اعرف اللى فيها انزلى انتى لو تحبى
نور / سبيها يا طنط انزلى حضرتك كملى اكلك
منال تتنهد و تنزل و عمر وراها
نور / حد فيكوا يتكلم
صمت نور تصرخ فى حسام
نور / انطق مخبى عنى ايه
حسام / ما تساليه هو بتكلميني انا ليه مش ده جوزك مش ده اللى وقفتيلى انتى و امك عشان تتجوزيه مش ده يا ماما على اللى كنتى بتقولى فيه شعر و كنتوا مستعجلين على جوازه من نور بتكلمونى دلوقت ليه
نور / لو كنت تعرف عنه حاجه وحشه ما كنتش سكت
صمت نور تروح لعلى
نور / طب قولى انت أية كانت تقصد ايه قولى مخبيين عنى ايه يا على .. الدكتور قالى على فكره
الاتنين يبصولها بصدمه
نور / قالى كلامكوا متناقض قالى انكوا مخبيين حاجه طب هو ممكن انت ايه يا على ايه اللى ممكن تخبيه عنى
امانى / قولتلك ما صدقتينيش قولتلك سحراله و مجرجراه وراها يدافع عنها
نور / انزلى يا ماما لو سمحتى
امانى / مش نازله الا اما افهم فى ايه ما تتكلم يا حسام كنت رافض على ايه و الكلام ده كله اساسه ايه ما تنطق يا حسام
حسام يبص لامانى و يبص لعلى باصص فى الارض
حسام / يوم موت كرم
على يبص لحسام
حسام / خرجت من الاوضه لقيت البيه المحترم حاضن مراتى
على / دا اللى ربنا قدرك عليه
حسام / ما حصلش
على / عملت انت ايه بقي لما شوفتنا
امانى / يعني حصل و لا ما حصلش
على / عملت ايه يا حسام بيه لما شوفتنى حاضن مراتك فى بيتك عملت ايه
حسام / عملت اللى اى راجل مكانى هيعمله لما يشوف مراته فى حضن عاشيقها
نور عنيها بين الاتنين مش مصدقه و الدموع بتنزل من عنيها
على / اللى هو ايه بقي عملت فى ندى ايه عملت فى ندى ايه وصلها للى هى فيه ده
حسام / انت مش فارق معاك نور و صدمتها فيك و فارق معاك ندى
على / انا عمرى ما قصرت فى حق نور و هى تشهد انى كنت بتقى ربنا فيها طول الوقت
حسام / و هو جوازك منها عشان تبقي جنب عشيقتك
على / غير و ابتكر … غير و ابتكر … لما سبتها بتنزف فى الصحرا و جيت مصر قولت نفس الكلام غلطت فى شرفها و سمعتها و عيشت دور الضحية و انت الجانى و دلوقت بتكررها تانى لا لا لا تالت فاكر اتجوزاها ازاى فاكر عملت ايه عشان تجبرها ترجعلك و تعيش معاك
حسام يروح يفتح شنطه من الدولاب و يطلع ورقه
حسام / دا اعتراف بخط ايدها و أمضتها انها كانت على علاقه بيك
حسام يدى لنور الورقه على يمسكه من هدومه
على / عملت فيها ايه عشان تكتبها حاجه زى دى انا ما حصلش بيني و بينها اى حاجه عملت ايه انطق اجبرتها ازاى تكتب حاجه زى دى تكتب ورقه ممكن تحرمها بيها من حبيبه العمر كله
نور / انا مش مصدقه اللى مكتوب
على / لانه كدب ما فيش حاجه حصلت بينا
نور / انت كنت بتحب ندى و حسام فرقكوا و اتجوزها غصب
على يسكت و يشد الورقه منها و يبص فيها
نور / انت كنت خطيب ندى … انت خطيب ندى
على يبص لحسام
على / بس اللى فى الورقه ده مش حقيقي انا ما حصلش بينى و بين ندى اى حاجه
امانى تشد الورقه و تقراها
نور/ لكن الباقي صح انت كنت خطيب ندى
على / انا حكيتلك كل حاجه
نور / انت استغليتني
على / اللى فى الورقه ده مش حقيقي
حسام / اتجوزت نور ليه يا على
نور / انت تخرس انت تخرس خالص انت كنت عارف كنت عارف انى بتجوز حبيب اختى كنت عارف كل حاجه و ساكت
حسام / كنتى متمسكه بيه حاولت امنعك شبطتى فيه انتى و امك
نور / ما قولتليش ليه ما قولتليش الحقيقه ليه ما انا طول الوقت و انا مداريه على بلاويك و قرفك كنت هدارى على دى كمان يا اخى ملعون ابو دى اخوه اللى تخلى الاخ يعمل فى اخته كدا
حسام/ لا لا لا ما تعيشيش دور الضحيه انتى كمان انا عملت كل اللى اقدر عليه عشانك انا حبست مروان عشان خانك و حبست الكلب التانى ده خال العيال اللى تحت دول عشان ضايقك و ما اتاخرتش عنك فى حاجه
نور / يعني مروان ما كانش بيكدب
حسام / و هو فى حد بيكدب فى الدنيا دى غيرى
نور تبص لعلى
على / شوفتى منى ايه وحش
امانى / يا خويا شافت من وراك ايه عدل دا انت سبتها يوم دخلتها و نزلت تجرى على حبيبتك
نور تعيط
نور / استغليتني
على / ما خونتكيش ما حصلش بيني و بينها اى حاجه اتقيت ربنا فيكي و حبيتك
نور / كنت بجرى احكيلها كل حاجه كنت بعذبها بايدي كنت بدوس عليها و اقولها ترضي تعيش مع اخويا الواطى عشان انا عايشه مع حبيبها انتوا ازاى تعملوا فيا كدا عملت فيكوا ايه
على / قوليلى موقف واحد منى موقف واحد بس جرحتك فيه جيت عليكي فيه انا و انتى اتفقنا هنبدا مع بعض من الصفر و هننسا ماضينا هنسي ندى و انتى تنسي مروان
حسام / و نسيت ندى يا على
على / نسيتها و سبتك تتجوزها لما حسيت للحظه انى ممكن احرمها من بنتها بعدت
نور / بعدت ازاى و انت قدامها طول الوقت
على / كان لازم حد يحميها منه مين فيكوا بيقف جنبها مين فيكوا مره دافع عنها
نور / يعني استغليتني فعلا
على / بس حبيتك و اتقيت ربنا فيكي عاملتك زى ما اتمنيت ان لو ربنا فى يوم كرمنى ببنت جوزها يعاملها بنفس الطريقه
نور / يارب خدنى بقي
حسام / ما حضنتهاش يا على ما كانتش فى حضنك يوم كرم
نور / سكت ليه شوفتهم فى حضن بعض و سكت ليه
حسام / عشانك … موت ابنك التانى و خيانه جوزك فى يوم واحد كنتى هتستحمليها يعني
نور / عملت ايه فى ندى يا حسام انتقمت منها ازاى عملت ايه لما سافرت لما كنتوا خارج الخدمه الكل قال فى حاجه بتحصل الكل كان قلقان و حاسس ان فى حاجه غلط
امانى / انتى بتسالي عن واحده خاينه ليه دى تستاهل قطم رقبتها الوطايه بنت الجزمه
على / مش هترد … هتكدب الكدبه و تصدقها مش هترد عن شرف مراتك
نور / عملت فى ندى ايه يا حسام رد عليا و ريحني خليني اعالجها و اكفر عن ذنبى ناحيتها
امانى / خليها تدفع تمن جريمتها
نور / اسكتى بقي اسكتى اسكتى ما تتكلميش عنها انتى ليه كدا ليه وحشه كدا
امانى / انا يا نور
نور / ترضي حد يعاملنى كدا
امانى / و انتى هتقارنى نفسك بواحده خاينه زى دى دا انا هروح للمحامى بالورقه دى و هحبسها بنت الجزمه
على / ما هى محبوسه فعلا طب ياريتها كانت فى سجن بجد على الاقل كنا عرفنا هتخرج امتى لكن دا دفنها بالحياه
حسام يبص لعلى بصدمه
على / طب ما كنت قدامك لو عاوز تنتقم ما انتقمتش منى ليه
حسام / عشان نور
نور / ما تدخلنيش فى قرفك
حسام / لا عشانك عشان بتحبيه و هتزعلى عليه عشان لو قربتله هتدافعى عنه
نور / فاتشطرت على اللى ما لهاش حد و كانى مش هزعل عليها
حسام / ما كنتش اعرف انها هتوصل للدرجادى اكيد ما كنتش قاصد اجننها يعني
نور / امال كنت تقصد ايه عملت ايه يا حسام عملت فيها ايه … طلقها بس ما تقتلهاش يا حسام
حسام / انا ما قتلتهاش و ما كنتش هسمحلها تموت
على / ما تنطق و تقول عملت فيها ايه
نور / اقسم بالله ان ما نطقت لاطلع انا دلوقت على القسم و احكى كل حاجه
امانى / هتبلغى عن اخوكى
حسام / هتقولى ايه يعني
نور / اللى عملته فى مروان و اللى عملته فى ندى و اللى عملته فى أية
حسام يبتسم
حسام / لو كانت الحاجات دى هتاذيني ما كانش اضطر يخبيها مش انت عارف برده ان القانون فى صفى يا على
نور تهجم على حسام تخربشه فى وشه و هى بتصرخ و على و امانى بيحوشوا
نور / انطق بقي انطق انت ايه شيطان انطق عملت فيها ايه انطق ربنا ياخدك ربنا ينتقم منك انطق
على يشد نور بعيد و هى منهاره
نور / حسبي الله و نعم الوكيل فيكوا كلكوا حسبي الله و نعم الوكيل فيكوا كلكوا
امانى / انتى اتجننتى انتى كمان و لا ايه اللى جرالكوا كلكوا هو فى ايه
نور تبص لامها و تبص لحسام
نور / مش عاوز تتكلم مش كدا … تمام يا حسام تمام
نور تقوم و تدخل المطبخ الكل يجرى وراها نور تغرز طرف السكينه على قلبها
على / نور اهدى لو سمحتى
نور / انت عملت كل ده عشانى مش كدا بتحبنى و مستعد تعمل عشانى اى حاجه دلوقت بخيرك
امانى / طب ارمى السكينه و خلينا نتكلم
نور / لو ما نطقتش هموت نفسي و انا كدا كدا ما عادليش اى حاجه اعيش عشانها فيا تخلبني اساعد ندى يا هتخسرنى للابد
نور تغرز طرف السكينه يعورها و الدم يبدا يبان
حسام / خلاص تمام هقولك اللى انتى عوزاه هعملك اللى انتى عوزاه
نور / عملت فيها ايه
حسام / اشتريت ارض فى الصحرا و خليتهم يبنوا كوخ هناك
صمت نور تصرخ
نور / و بعدين عملت فيها ايه هناك
حسام / ضحكت عليها فهمتها انى هدفنها عايشه
السكينه تقع من ايد نور
حسام / كان كل قصدى اخوفها بس احسسها انى ممكن احرمها من حبيبه ما كنتش اقصد
فجاه حسام يلاقى نفسه فى الارض و على فوقيه نازل فيه ضرب بغل و امانى بتصرخ و تحوش نور تقعد فى الارض بتعيط محمد و عمر يدخلوا يفصلوا بين على و حسام
على / سبنى يا عمر سبنى اموته سبنى
عمر / ما يستاهلش و الله ما يستاهل لو كان يستاهل كنت موته قبلك
امانى / غوروا من حياتنا داهيه تاخدكوا
محمد / عملت ايه المرادى كمان عملت ايه يا حسام
على / دفنها عايشه دفنها عايشه الواطى الدون
امانى / و كان المفروض يدفنك معاها يا ربايه الشوارع انا هفضحكوا فى كل حته
نور تشد الورقه من ايد امها و يتخانقوا تتقطع الورقه بينهم و نور تفضل تشد من ايد امها اى قطعه تمسكها لحد ما تتفتفت خالص
امانى / ضيعتي حق اخوكى يا متخلفه
نور / ما ليش اخ و اقولك حاجه كمان ما ليش ام … و ما ليش زوج .. و ما ليش حد
محمد / نور
نور / و لا حتى اب
نور تعيط و تقعد فى الارض مكانها
عمر/ على حبك بجد
نور / انا دلوقت بس فهمت حكمه ربنا ان العيال تموت عشان ما فيش حاجه تربطنى بيك عشان ما اتعذبش عذاب ندى فى انى اعيش غصب عنى مع واحد … حسبي الله و نعم الوكيل فيكوا كلكوا حسبي الله و نعم الوكيل
نور تتسند و تقوم
نور / من النهرده مش عاوزه حد فيكوا فى حياتى … انا هروح المستشفي تانى و هقول للدكتور كل حاجه
امانى / اللى بتبيعي اخوكى عشانها اول ما هتخرج هتبيعك و تتجوز جوزك يا خايبه
نور / يبقي رجعت كل حاجه لاصلها
محمد / انا مش فاهم حاجه
نور/ و هو حضرتك كنت عاوز تفهم ايه صوتنا ما كانش واصل تحت بس حضرتك كالعاده اخترت الحل السهل انك تكون سلبى
محمد / نور
نور / حتى لو عرفت حتى لو فهمت مش هتعمل حاجه مش هتعمل اى حاجه على العموم اديك عرفت ابنك دفن ندى عايشه و جننها وريني بقي حضرتك هتعمل ايه وريني هتقدر تعمل ايه
نور تعدى من وسطهم و الكل بيبص لبعضه على يجرى وراها يدخل الاوضه امانى تحاول تحصلهم محمد يمنعها
امانى / ما تلمسنيش
محمد / مش هموت عليكي يعني بس من حقى احمى بنتى من لسانك و سمك
امانى / الحيوان ده يبقي عشيق ندى
محمد / عمرى ما اصدق
امانى/ عشان قطعت اعتراف ندى عشان بنتك قطعت اعتراف ندى
حسام / كتبته غصب عنها كان لازم امن نفسي خليتها تكتبه عشان اضمن انها لا تحكى و لا تبلغ
محمد / ابن امك يلا ابن امك بصحيح
حسام / ما انا لو كنت لقيتلى اب كنت بقيت ابنه
محمد يضرب حسام بالقلم
محمد / حسبي الله و نعم الوكيل فيك حسبي الله و نعم الوكيل فيكوا
محمد يروح اوضه نور يلاقيها بتلبس بلوزه تانيه
على / بس انا مش هطلق يا نور
نور / هخلعك يا على هخلعك … اوعى تعيش دور الضحيه عليا انت ممكن تكون ضحيه حسام لكن انت الجانى بالنسبالى
على / ما ظلمتكيش
نور / استغليتني
على / حبيتك و اتقيت ربنا فيكي
نور / ما حضنتهاش يعني
على / كانت لحظه ضعف كنت منهار و مش فى وعيي غلطت بس
نور / طلقنى يا على انهيها بالمعروف و كفايا بقي لو ربنا كرمنى و قدرت اساعدها لو حبيتوا بعد كدا انا مش هقف فى طريقكوا تانى
نور الدموع تنزل من عينها
نور / لو جوازك منها هيساعدها هجوزهالك و حسام مش هيقف فى طريقكوا انا همنعه و ان ما قدرتش هقتله و حبيبه هتبقي معاكوا بس انا مش هينفع ابقي فى الصوره دى خرجنى منها عشان انا خلاص ما عدتش قادره استحمل يا على تعبت اوى و جبت اخرى طلقنى و انسانى
على / مش هقدر
نور / يبقي هخلعك عن اذنك
محمد / رايحه فين
نور / المستشفي لندى
محمد / انا جاى معاكى
محمد يمشي مع نور عمر يدخل
عمر / تعال ننزل عموا مصطفى تحت شكله تعبان اوى جوه و ربنا وحده العالم بيه تعال ننزل تحت و نبعد عن الشقه دى باللى فيها
على يبص لعمر
على / انا خسرت كل حاجه يا عمر
عمر / لو كانلك نصيب فيها ما كانتش ضاعت لعله خير
على / تعال اساعدك تنزله و هروح ابص على ندى ان كمان
عمر / بلاش يا على
على / مش بالبساطه دى يا عمر مش هينفع بالبساطه دى
عمر / تمام تعال ننزله و هاجى معاك
على يعز راسه و يطلعوا بره
……………………
فى المطبخ
امانى / انا مش قادره اصدق مش قادره اصدق ابوك و اختك اتجنوا خالص اتجنوا على الاخر
حسام قاعد فى الارض يعيط
امانى / ما عاكش ورقه تانيه من الورقه دى
حسام يبصلها و مصدوم
امانى / انت لازم تحمى نفسك باى شكل انت ممكن تتحبس يا حسام دول اتفقوا عليك باعوك عشان خاطرها لازم تحمى نفسك باى حاجه قولى لو شايل منها نسخه تانيه قولى مكانها و انا اجرى اجيبها
حسام / انا اللى اجبرتها على كتابتها
امانى / ما تولع دى خاينه ما اتربتش دى مش بس هتحبسك لو اتكلمت دى هتحرمك من بنتك و تديها للكلب على ده يربيها بدالك اكيد شايل حاجه كدا و لا كدا
حسام / انتى بتتكلمى جد
امانى / انت ابنى و من حقى ادافع عنك زى ما حبيبه بنتك و لازم تدافع عنها ما ينفعش تسبها لواحده مجنونه زى دى تربيها
حسام / فى فى خزنه الصيدليه كتاب صغير هو مش كتاب ده خزنه صغيره
حسام يطلع مفاتيحه و يدي لامانى مفتاحين صغيرين
حسام / مفتاح الخزنه و مفتاح الكتاب
امانى / حالا هاخد اى عربيه تنزلنى مصر و اجبلك الورقه دى و اطلع بيها على القسم لازم نتصرف قبلهم لازم نمنعهم
حسام / ماشي بس ما تتاخريش
امانى / مش عوزاك تقلق اهدى كدا و فكر و ان شاء الله ربنك هينصرك عليهم
امانى تبوس راس حسام و تمشي ثوانى و يسمع صوت الباب بيتقفل يقوم و يتمشي فى الشقه
///////////////
حسام / خلصت على كدا يا حسام … مفيش حاجه خلصت مش هتيجي دلوقت و تستسلم مش بعد التعب دا كله … لا نور هتسامحك و لا هتقدر تقف قدامهم ما عدش حد معاك … بس ما حدش فيهم قدى انا اقدر … هتحارب مين و عشان ايه … عشان ندى … و هى فين ندى دا حتى اختك و ابوك … و من امتى ابويا كان له موقف يطلع يطلع و ينزل على ما فيش … دا ما اتفاجئش كانه كان عارف او كان متوقع … طب ما ها ما عملش حاجه برده … و من امتى عمل … بس نور … نور اختى عمرها ما هتاذيني … بس عمرها ما هتسامحنى … و انا مالى انا حاولت … و ندى عمرها ما هتسامحنى … هعوضها … امتى و ازاى دى محجوزه فى المستشفي .. هتخرج اكيد هتخرج … انت بجد ناوى تكمل … و عمرى ما هستسلم عمرى ما هتخلى عن حبى
حسام يقف قدام المرايه
حسام / عمرها ما حبتك … حبتنى و ما حبتش حد غيرى كانت بتصرخ بحبك يا حسام طول الوقت … من خوفها منك كفايا كدب بقي كدبت على كل الناس حتى نفسك … انا ما كدبتش … انا حبيتها … انت ما حبيتش غير نفسك … و هو انا ما اتحبش … بص حواليك و انت تعرف انت مفيش حد طايقك اصلا … انجى كانت بتحبنى امى بتحبنى اروى حبتنى … و سبت مين فيهم من غير ما تاذيها و تستغلها … انا عمرى ما اذيت امى و لا استغليتها … طب و نور … هى اللى صممت انا ما عملتش حاجه فى حد هم اللى اذونى هم اللى استغلونى نور استغلتنى كل اللى كانت بتطلبه كنت بعملهولها و ماما و اروى و انجى كلهم استغلونى كلهم كانوا بيكرهوا ندى كلهم كانوا بياذوها انا ما اذيتش حد … و أية و عمر و على … انا كنت بحارب عشان حبى … و فين حبك … اخدوه منى … اخدوا ندى منى اخدوا روحى منى
حسام يقعد على الارض يعيط
حسام / انا عملت كل ده عشانها هم عملوا ايه بيزايدوا على حبى ليها ليه عملولها ايه انا اللى تعبت واتغربت و شقيت بوست الجزم و اتمرمطت هم عملوا ايه عاوزين فلوس يا حسام عاوزين هدايا يا حسام و فى الاخر انت وحش يا حسام حسام الشيطان و هم الملايكه هم بيحبوها باماره ايه مين دفع علاج ابوها مين فسحها و لبسها دهب و براندات مين غيرى اهتم بيها مين حبها قدى ابوها نفسه كان كل همه الفلوس لكن انا … انا كان كل همى ندى .. وراحت فين ندى دلوقت راحت فين و سابتنى راحت و سابتنى
حسام يعيط اكتر و فجاه يرفع راسه
حسام / ندى ما راحتش و مش هتروح مش هسمحلها تروح مش هسمحلهم ياخدوها منى مش هيحرمونى منها مش هيقدروا يحرمونى منها
حسام يقوم و يعدل هدومه و يروح الحمام يغسل وشه و يبص لنفسه فى المرايه
حسام / هتروح تكمل عليها … هروح ارجعها … هحارب لاخر نفس فيا عشان ارجعها … مش هيدوهالك و لو نور حكتلهم اول ما هيشوفوك هيقبضوا عليك … مش هيقدروا مفيش سجن فى الدنيا هيمنعنى عن ندى مفيش حد هيقدر ندى بتاعتى انا و مش هقعد اعيط هنا و اسيبها تروح منى … ما راحت خلاص و لا صدقت كدبك على امك لما قولت ان فى ورق فى الخزنه لا فوق انت قولت كدا عشان ما كنتش طايق تبصلها … بتكره ندى و بتاذيها و بتتكلم عنها وحش و انا مش بستحمل اى حد يتكلم عن ندى او يزعلها ما حدش يزعل ندى ما حدش يزعل حبيبتي ما حدش يحرمنى منها ما حدش يقدر يحرمنى منها
حسام يطلع علبه المهدئ من جيبه و ياخد حبايه
حسام / انا جوزها و انا الوحيد اللى اقول تتعالج او ما تتعالجش انا الوحيد
حسام يمسك الفرشه و يسرح شعره و يعدل هدومه
حسام / هروح اخدها و نهرب انا و هى و بس و هعالجها و لما تخف هنرجع نجيب حبيبه انا معايا فلوس كتير معايا فلوس تعيشنا ملوك فى اى حته نختارها هروح اخدها و نبعد … نبعد عن كل اللى بياذوها هحميها من الدنيا مش هسمح لحد يلمسها … بس الاول لازم اهدى لازم اهدى خالص
حسام يفتح العلبه و ياخد حبايه تانيه
حسام / اهدى عشان تعرف تفكر و ترتب كلامك اهدى خالص اهدى
///////////////
حسام يبص لنفسه فى المرايه و يمشي
………………
فى المستشفي
نور / حضرتك هتطلب البوليس
الدكتور قاعد ساكت و بيخبط بالقلم على الترابيزه
الدكتور / حضرتك رايك ايه
نور / حضرتك قولتلى ان فى قسم و شرف مهنه و كل الحاجات دى و دا اخويا
الدكتور / ما يستحقش العقاب يعني
نور / انا كل اللى يهمنى هو ان ندى تخف
الدكتور / و تفتكرى حضرتك ان واحد عمل كل ده ايه هيخليه يبطل ايه اصلا هيخليها تخف و هى عارفه انها بمجرد ما تخرج من هنا مش هترجع تعيش نفس المعاناه تانى
نور / مش هيحصل هيطلقها
الدكتور / انا والله مقدر موقفك و انه اخوكى بس اللى عمله جريمه شروع فى قتل و انا هنا بتكلم عن الجزء بتاع الدفن بس لكن لو جبنا من الاول فانا مش شاطر فى القانون بس اكيد فى بلاوى
نور تبص فى الارض و ترجع تبصله
نور / طب ما ينفعش تسالها
الدكتور/ ههههههههه اسألها اسال مين ندى فاقده الاهليه و مش مسؤله عن اى قرار ندى عماله تصرخ و تنادى على حسام جوزها و بتقوله روحنى انا بحبك ما تحرمنيش من حبيبه انا بحبك انا بحبك و طبعا دلوقت كلنا بقينا فاهمين هى بتصرخ بالشكل ده ليه … لان المسكينه متخيله انه بيعاقبها و بيحرمها من بنتها
نور / طب ممكن اتكلم معاها ممكن اشوفها ارجوك
الدكتور / اكيد تقدرى
الدكتور يقوم و نور ماشيه وراه يطلعوا بره محمد و على و عمر يقوموا يقفوا نور تبصلهم و تمشي ورا الدكتور يبصوا لبعض و يقعدوا تانى حسام يدخل التلاته يقفوا يعدى ما يسلمش على حد
عمر / هو ليه عين يجي هنا
على يروح ورا حسام و محمد يجرى وراهم هو و عمر على يوقف حسام
على / انت بتعمل ايه هنا
حسام / طب اللى جوه دى مراتى انت هنا بقي بصفه امك ايه
على يجي يضرب حسام محمد يحوش
محمد/ احنا فى مستشفي اطلعوا اتخانقوا بره
حسام / هطلع هاخد مراتى و نمشي
على / تاخدها فين انت اتجننت و لا فاكرها سايبه هو فى ايه سكتناله دخل بحماره و لا ايه
حسام / انا جوزها و انا الوحيد اللى ليا القرار سواء تتعالج او لا عاجبك عاجبك مش عاجبك اخبط راسك فى الحيط
تمرجى يعدى
التمرجى / الصوت يا اساتذه
الكل يبصله حسام يعدل هدومه
على / اسمع بقي لو فكرت بس فكرت قسما بالله
حسام / انا ما بفكرش انا بنفذ
حسام يخبط على مكتب و يدخل
حسام / حسام زغلول زوج ندى مصطفى زغلول لو سمحت كنت عاوز اقفل حسابها
محمد / هو فى ايه يا حسام هو مفيش احترام لحد خالص كدا
حسام / و ياريت تكتبولها خروج هنقلها مصحه خاصه فى مصر
على يشد حسام بره
على / احنا غلطنا لما سكتنالك و ما طلعناش على القسم
حسام / دكر اثبت و ندى بنفسها هتطلب تيجي معايا تحب تشوف
على / هقتلك يا حسام هقتلك
حسام / اللى بيعمل ما بيقولش … هو مفيش امن هنا و لا ايه … يا امن يا امن
الامن يدخل و يشدوا محمد و على بره و حسام يقعد على المكتب مع الموظف
………………..
فى اوضع ندى
ندى / عشان خاطرى يا نور ما تسيبينيش هنا لو بتحبيني ما تحرمينيش من بنتى
نور / انتى هنا عشان تخفى
ندى / انا مش عيانه انا كويسه انا هتعب بعيد عن بنتى هتعب هموت يا نور رجعيني لبنتى يا نور كلمى حسام قوليله انى يحبه قوليله هعمل كل اللى يقولى عليه قوليله يسامحنى قوليله يرجعنى لبنتى ابوس ايدك انا بحبك يا نور
نور / انا عرفت كل حاجه يا ندى عرفت اللى حسام عمله خفى و انا هطلقك منه و لو عاوزه تتجوزى على
ندى / لا لا على لا انا بحب حسام انا عاوزه اروح لبنتى بس انا بحب حسام انا بحب حسام اوى انا بحب حسام بس بحب حسام بس يا نور
الدكتور / مش عاوزه تساليها تحب تبلغ عن حسام و لا لا
نور تبص للدكتور و تبص لندى
الدكتور / معلش يا مدام ندى ممكن تحكيلنا اللى حصل يوم ما وصلتوا مدام نور المطار
ندى / ما حصلش حاجه ما حصلش حاجه ابدا دى الادويه ايوه هى الادويه اصل انا اخدت ادويه و صرفت ميه صح يا نور مش انا خدت ادويه عشان الحساسيه مش انا عندى حساسيه يا نور انا عندى حساسيه يا دكتور انا بحب حسام والله خرجونى من هنا بقي انا عاوزه اروح لبنتى
الدكتور / تحبى تخرجى لبنتك و تروحى مع حسام و لا نجبلك حبيبه هنا بعيد عن حسام
ندى تبص للدكتور و تبص لنور
ندى / لا لا انا اروح لحسام انا ما ابعدش عن حسام انا بحب حسام و ما اقدرش ابعد قوليله يا نور كلميه هو بيحبنى و اول ما هيسمع صوتى هيجي جرى ياخدنى من هنا كلميه عشان خاطرى كلميه بقي
الدكتور /مدام ندى … احنا هنروح نكلمه و حضرتك ارتاحى هنا لحد ما نرجع تمام
ندى / لا نور استنى ما تسبينيش
نور / هو حد بيعاملك وحش هنا
ندى / انا عاوزه اروح لحبيبه انا ما ليش غيرها
ندى تعيط نور تحضنها
الدكتور / على فكره حضرتك كدا بتعطلينا اننا نتصل باستاذ حسام
ندى تبصله و تبص لنور
ندى / هتاخديني من هنا صح
نور / هاخدك ان شاء الله هاخدك
………………….
فى شقه عمر
أية قاعده فى اوضتها بتعيط و منال قاعده جنبها ليلى تدخل شايله كبايات ليمون
ليلى / ممكن ادخل
منال تقوم تاخد منها الصينيه
ليلى / هو ايه اللى بيحصل يا منال انتى منعتيني اطلع اشوف فى ايه بس … انا عارفه ان فى حاجه كبيره
أية / حاجه واحده بس
منال / أية
أية / ابنك ما حبش غير بنت واحده اسمها ندى و عشان فقير طردوه و جوزوها حسام الكلب ده غصب و عمل فيها اللى ما يعمل و اطلقت و عشان يردها ركب كاميرا فى اوضتى و فضحنى و هددها يحرمها من بنتها و رجعتله و عذبها و بهدلها و فى الاخر رماها فى مستشفى المجانين زى ما انتى شايفه
ليلى تبص لمنال
ليلى / لو على بيحب ندى ما لقاش غير نور يتجوزها
منال / على بيحب نور و هى بتحبه
أية / نور ما تعرفش حاجه و لو عرفت نور علاطول فى صف اخوها ربنا ينتقم منه
ليلى / و ايه اللى هيحصل دلوقت
أية / ما عدش يفرق معايا اعرف
منال / ان شاء خير
أية / مفيش خير مفيش خير طول ما ابن الجزمه ده عايش عادى و لا كانه دمرنا كلنا بصي كدا لبيرين بصيلها تقدرى تقوليلى هقولها ايه لو جاتلى يوم و تقولى صورك يا ماما مع صحابى هرفع عيني فى عينها ازاى
منال / ان شاء الله مش هيحصل انتى ما عملتيش حاجه غلط
أية / عارفه بس هم مش فارق معاهم بيغلطوا و يلومونى انا
ليلى / انا مش فاهمه اوى بس حاسه بيكي سبيها على الله و ما تبصيش وراكى ما حدش بياخد اكتر من نصيبه
أية / و نعم بالله و نعم بالله
…………………..
فى المستشفي
الدكتور / على جثتى هى سايبه و لا ايه
حسام / انا حر اعالج مراتى فى المكان اللى يعجبنى و دا حقى للقانونى يا دكتور
الدكتور / اتفضلي يا مدام اخوكى اللى مش عاوزه تبلغى عنه
نور / و انا مش هسكت و مش هسمحلك تقرب منها
حسام / هاخدها بالقانون و غصب عن عين الكل
نور / تمام يا حسام و انا كمان هروح للقانون هاخد ابوك و على و نطلع على القسم و نقولهم انت عملت ايه
حسام / كلام فارغ و ما لوش اى اساس من الصحه المحكمه بتحتاج ادله يا نور و انا ما عملتش اى حاجه من الهبل ده
نور / انت ازاى حيوان كدا ازاى طلعت بالنداله دى
حسام / انا معايا اذن خروج لندى و هاخدها حالا
الدكتور / و انا الدكتور المسؤل و مش هسمحلك
حسام / انت انسان غريب جدا انتوا مش مضيتونى اقرار استلمها على مسؤليتي عاوزين ايه تانى
محمد و على و عمر يدخلوا
حسام / انتوا دخلتوا تانى ازاى هو مش الامن خرجكوا بره هى ايه المستشفي العجيبه دى فين مدير المخروبه دى فين المدير هنا فين المدير
الدكتور / اطلبولى الامن و طلعولى الجدع ده بره
حسام / ما تلعبش بالنار يا دكتور انت عارف كويس انى هاخدها يعني هاخدها بالزوق بالعافيه هاخدها
الدكتور / اعمل اللى تعمله و يا انا يا انت هنا النهرده
نور / اطلع بره يا حسام اطلع بره حرام عليك بقي اطلع بره هتعمل فيها ايه اكتر من كدا ما تسيبها تتعالج بقي سيبها ترجع لبنتها حرام عليك
حسام / انتى بتكلميني كدا ليه انا ما عملتلهاش حاجه انا عملتلها كل حاجه انا عملت عشانها المستحيل انا حتى مشروعها الوهمى انتى عارفه كويس ان انا اللى كنت بشترى منها و كنت ببعتلك الفلوس تبعتيهالها دا احنا طبيخينها سوا انتى عارفه انا بحبها قد ايه
الدكتور / لو بتحبها يبقي تسيبها تتعالج من فضلك دى مستشفي
الامن يدخلوا حسام يبصلهم
حسام / هى كدا تمام تمام
حسام يعدل هدومه و يمشي
الدكتور / هياخدها يا مدام انا بس حبيت ابلغك و القرار ليكوا دلوقت
نور تبص لمحمد
نور / لازم نتحرك احنا كمان لازم نروح القسم و نبلغ عنه حسام اتجنن و ما حدش هيقدر يوقفه يا بابا هيعمل فيها ايه اكتر من كدا
محمد / انا هطلع على القسم و انتى خليكي جنبها و ربنا يعمل اللى فيه الخير
على / انا هخليني مع نور يمكن يرجع خليك انت مع عمى يا عمر
نور و على يبصوا لبعض نور تبص الناحيه التانيه
عمر / يلا يا عمى بلاش نضيع وقت يلا
عمر و محمد يمشوا
الدكتور / هستاذنكوا دى مستشفي
نور / احنا فى الاستقبال تحت اى حاجه ناديني
الدكتور يهز راسه نور تمشي و على وراها و الصمت سيد الموقف
…………………….
بره المستشفي
حسام يركب العربيه و هو متعصب على الاخر يفتح العلبه و ياخد حبايتين
حسام / والله لوريكوا يا ولاد الكلب والله لاخد حقى منكوا دى مراتى مش هتقدروا تمنعونى عنها يا ولاد الكلب القانون فى صفى القانون فى صفى ياولاد الكلب
حسام يسوق و يوقف حد
حسام / بعد اذنك اقرب قسم شرطه من هنا فين
الراجل / مش عارف والله بس بيتهيالي
حسام يسيب الراجل و يمشي و هو بيلعب فى الموبايل على جوجل ماب و هو سايق
حسام / لقيته اهو تمام تمام
فى مصر
امانى تنزل من تاكس
امانى / استنانى دقيقه هنا هترجعنى تانى
السواق / تمام تحت امرك
امانى تدخل الصيدليه الشاب واقف مصدوم تحاول تفتح الخزنه ما بتفتحش
الشاب / اساعد حضرتك
امانى / المفتاح معصلج مش راضي يفتح
الشاب يفتحهالها بمفتاحه
الشاب / المفتاح غلط اصلا هو فى حاجه
امانى تقلب فى الخزنه
امانى / امال فين الكتاب اللى هنا
الشاب / كتاب ايه يا استاذه مفيش هنا غير ورق الصيدليه الفلوس فى درج الكاشير افتحهولك
امانى / لا حسام قايلى فى كتاب هنا خزنه صغيره هنا المفروض فيها ورق مهم
الشاب / كتاب ايه بس والله ابدا طب كلميه يمكن يقصد خزنه تانيه كلميه اتاكدى
امانى تطلع التليفون و تتصل غير متاح
امانى / ما انا مش هرجع اسكندريه يعني و افضل واخده الطريق قياسه دور تانى
الشاب / اكيد يقصد خزنه تانيه بدليل ان المفتاح ما بيفتحش من اساسه
…………………
- يتبع الفصل التالي اضغط على ( رواية سلف و دين ) اسم الرواية