رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الرابع و الخمسون 54
هدايه / تفتكر مين اللى صورنا و عاوز ايه
حسام / ما يهمنيش اعرف بصراحه مش فارقه معايا
هدايه / يكون الواد زياد بتاع الكافيتريا
حسام / مراقبنى يعني بيعرف بقابلك فين و امتى
هدايه / هو مش كان بيحاول يوقع بينك و بين ندى باين دلوقت ندى لوحدها و انت هنا
حسام / انا واثق فى ندى
هدايه / يعني ايه تتصور عريان عادى
حسام / و هو انا متصور استغفر الله العظيم مع راجل دا انا معايا بطل
هدايه / ايه !!!
حسام / مزه يعني بطل بت حلوه يعني مالك فى ايه
هدايه / تمام خليه يبعتهم لندى بقي ما دام مش همك
حسام / هو مش هيعرف يوصلها لان رقمها الجديد مش مع حد غيرى يعني لو وصلها يبقي لازم يكون خد الرقم من موبايلى
هدايه / و اهلكوا
حسام / كدا كدا بيتكلموا فيديو كولز على النت و دا ما لوش علاقه برقم الموبايل و اصلا رقمها اللبنانى ما كانش مع حد من اهلها غيرى انا نفسي بيكلمونى نت مش هيدفعوا مكالمات دولى يعني
هدايه / امال مين مين كان عارف اننا هنتقابل فى الشقه دى
حسام / او فى الكافيه مرتين على العموم هو مش هيستفيد حاجه لما يوقع بيني و بين ندى اكيد اللى بيراقبنى ده عاوز حاجه تانيه
هدايه / يبتزك مثلا
حسام / عاوزنا نطلق فيتجوز ندى مثلا طب ما هى هتنزل مصر و بعدين انا و ندى عمرنا ما هنطلق عشان فى بينا حبيبه
هدايه / ازاى يعني
حسام / زى الناس
تليفون حسام يرن فيديو كول نور يقوم يلبس
حسام / هخرج ربع ساعه و راجع البيت بيتك
هدايه / ما ترد
حسام / هجيبلنا لقمه فى السريع
حسام ياخد الموبايل و يطلع بره و هدايه باين عليها الضيق
هدايه / و مين نور دى كمان
………………….
فى الشارع
حسام يرد
حسام / نونو حبيبه قلبي
نور / ما بتردش ليه
حسام / كنت بطلع من السوبر ماركت كنت بشترى خزين للبيت
حسام يلف الكاميره على يافطه سوبر ماركت
نور / تمام يا حبيبي لما تروح كلمنى
حسام / فى حاجه و لا ايه
نور / لا مش حوار مش هعطلك لما تروح بقي
حسام / انا لسه مستلم الشقه و يادوب نضفتها و نزلت اجيب حاجه اكلها و خزين للبيت و ممكن اتاخر
نور / انا مش مستعجله انا اصلا كنت عاوزه اطمن عليك و خلاص
حسام / تمام المهم كلكوا كويسين صح
نور / ايوه الحمد لله ما تقلقش
حسام / على كويس معاكى ؟ حد ضايقك
نور / ابدا احنا زى الفل الحمد لله ما تقلقش
حسام / تمام لما اروح هكلمك
نور / تمام يا حبيبي سلام
……………….
فى شقه نور
على و يس و نغم يدخلوا
على / احنا جينا
نور تطلع من جوه و باين عليها التغيير
على / مالك جينا بدرى و لا ايه لو ما خلصتيش احنا ممكن نساعد عادى
نور / لا خلصت دا حتى عملتلكوا كيك و بسكويت و حاجات حلوه كتير جوه هجيبهالكوا
نور تدخل المطبخ
على / على الحمام اغسلو ايديكوا و خشوا غيروا هدومكوا و استنوا فى اوضتكوا شويه
يس و نغم يجروا على الحمام على يدخل المطبخ نور بتقطع كيك
على / مالك يا نونو فى حاجه حصلت
نور / لا ما فيش عادى .. انتوا بس وحشتونى اوى
على / ماما بتسلم عليكي على فكره
نور / الله يسلمها هبقي اروحلها مره اشوفها لو محتاجانى فى حاجه
على / روحى بس ما تقلقيش هى مش محتاجه حاجه … بس انتى فعلا فيكي حاجه
نور / حبيبي ممكن يكون ارهاق بس
على / المهم انك كويسه … قلبي لو فى حاجه
نور / بقولك ايه روح غير هدومك و انا هعملك شاى مع الكيك و نشوف فيلم نسهر نتفرج عليه سوا ايه رايك
على / تمام … لو حبيتي تتكلمى فى اى وقت … انتى عارفه انى موجود
نور / ربنا ما يحرمنى منك ابدا
على يبتسم و يطلع بره نور تطلع اللبانه من التلاجه
………………….
فى شقه ندى بعد فتره
ندى / ايوه بس مش ده اللى اتفقنا عليه
حسام / هو انا قولت مش هيجي انا قولت نستنى شويه لحد ما اظبطله اموره هنا
ندى / يا سيدى هاته و انا هراعيه بنفسي انت شاغل بالك بينا ليه
حسام / يا سلام امال اشغل بالى بمين ان شاء الله
ندى / بهدايه مثلا ايه رايك مش فكره حلوه برده
حسام / ما بلاش الاسلوب ده معايا انتى مش خليتي نور تكلمنى كذا مره و افرجها الشقه و بعدين مش واثقه فيا تعالى معايا بدل ما انا بدفع ايجار شقتين
ندى تبص الناحيه التانيه
حسام / قولتلك الصور فوتوشوب انتى مش عاوزه تصدقى اعملك ايه
ندى / قول غلطه و عدت نزوه و تبت بس ما تبقاش بجح
حسام / ماشي يا ندى انا خنتك
ندى / يعني معترف
حسام/ مش انتى عاوزه اقول كدا اديني بقول
ندى / هو انا هقدر عليك
حسام/ انتى عاوزه ايه ؟ ايه اللى يرضيكي
ندى / عاوزه بابا
حسام / حاضر بس ما ترجعيش تقولى بابا حالته بتتاخر او غيره
ندى / ما لكش دعوه هاته و ما لكش دعوه
حسام / تمام يا ندى
ندى / هنشوف
………………….
فى شقه عمر فى اسكندريه بعد كام يوم
عمر يفتح الباب يلاقي على و نور و الاولاد و على شايل شنطه
عمر / ايه يا عم انت جاى من السودان
على / هو انا جاى من اول الشارع مش فى طريق
عمر / طب اتفضلوا اتفضلوا
عمر ياخد من على الشنطه يحطها جنب الباب على و نور يدخلو
عمر / البشوات الصغيرين اهلا اهلا عارفين انا مين
نغم / عمو عمر
عمر / ايه الشطاره دى دا احنا نجيب شيكولاته بقي
نغم و يس يضحكوا
نور / امال أية فين
عمر / فى المطبخ بتطلع اخر ابداعاتها المطبخيه
نور / طب هستاذن ادخل اساعدها
عمر / البيت بيتك عيشي … و انت يا اسطى خد العيال الاوضه جوه و رتب حاجتك فى الدولاب و انتشروا فى المكان كدا
على / اخبار الشغل ايه جبتلك ايراد المحل عندنا
عمر / والله جه فى وقته
……………….
فى المطبخ
نور و أية بيغرفوا
نور / الاسبوع الجاى ان شاء الله
أية / ان شاء الله بالشفا
نور / انا بفكر لو قالتلى نعمل العمليه ما استعجلش و اكمل العلاج شهر و لا اتنين كمان
أية / هو بمزاجك مش الدكتوره اللى بتقول
نور / اهو اقترح عليها اكيد لو استمريت فى العلاج فرص نجاح العمليه هتزيد مش كدا
أية / و الله يا نور ما اعرف بس ان شاء الله خير انتى عارفه انا قريت ان اللى بياخدوا حبوب منع الحمل شهرين مثلا لازم يقعدوا شهرين ما يحملوش حتى لو مبطلينها و انا بقالى ياما باخدها و سبحان الله بطلتها حملت
نور / ربنا يتملك على خير قولى ما شاء الله
أية / اللى اقصده ان وقت ما ربنا ياذن اكيد باذن الله هتحملى
نور / انا مش هكدب عليكي انا متوتره اوى و قولت اجلها شويه اكسب وقت بدل ما اعمل العمليه و تفشل و ازعل اكتر بس مش هنكر ان يس و نغم مخففين عنى جدا
أية / باذن الله هتنجح و ربنا هيكتبلك الخير كلو
نور / يارب يا أية ادعيلى
أية / والله بدعي لك من غير حاجه
…………………..
فى الشركه عند حسام
حسام بيراجع ملف تليفونه يرن حسام يرد
حسام / صباح الخير يا بابا ازيك
محمد / صباح النور الحمد لله انت عامل ايه
حسام / والله مفحوت فى الشغل
محمد / ربنا يعينك يا ابنى انا خلصت ورق عمك
حسام / حجزت التزكره و لا ابعتهالك
محمد / لا حجزت الخميس الجاى باذن الله بعتلك الحاجه على الواتس
حسام / ما شوفتش والله بس على العموم كويس هظبط امورى و استقبله
محمد /انا مش مرتاح انه يسافر لوحده
حسام / هعمل ايه عشان ست ندى ترتاح
محمد/ انا سالت الدكتور و قالى ان وجوده جنب بنته هيفرق جامد فى حالته النفسيه
حسام / اما نشوف
محمد / مش هعطلك عن شغلك
حسام / تمام يا بابا مع السلامه
حسام يقفل و يفكر ثوانى و يتصل بحد
حسام / ازيك يا هدايه
هدايه / ما رضيتش اكلمك قولت اكيد تعبان من الجرد
حسام / و انا هجرد بنفسي و لا ايه انا اخرى اراجع الكشوفات
هدايه / اخبار عمك ايه
حسام / حجزوله الخميس
هدايه / مبروك هتسافر الاربع
حسام / اه هخلص شغل و اطلع من الشركه على البيت
هدايه / توصل بالسلامه
حسام / لما ارجع هكلمك نتقابل
هدايه/ ما تقلقش هجبلك معايا حاجه حلوه و انا جايه
حسام / اهم حاجه تكون نضيفه
هدايه / ما تقلقش انا عمرى قصرت رقبتك
حسام / انتى هتقصفى رقبتى انا عارف
هدايه / نبقي نتكلم لما ترجع يلا سلام
حسام/ سلام
…………………..
فى شقه عمر
عمر / حلو النادى ده اسمع عنه
يس / الكابتن قالى انى هبقي احسن من محمد صلاح لما اكبر
عمر / محمد صلاح مره واحده و من اول تمرينه كمان
نور / المهم ايه بقي يا يس كمل الكابتن قالك المهم ايه
نغم / ياكل كويس اكل صحى و يواظب على التمرين
نور / برافو يا نغم
عمر / انا كنت بلعب كراتيه
يس / بجد !!!
عمر / اسال ابوك
الكل يبصوا لبعض
عمر / اقصد عمو على يعني
على / لا عمك عمر محترف و واخد بطولات
يس / هو انا ممكن اللعب كراتيه كمان مع الكوره
على / ممكن بس فى الاجازه
نغم / بس انت قولتلى السباحه فى الاجازه
على و نور يبصوا لبعض
نور / حبيبتي احنا لسه ما قررناش هتلعبوا ايه و مفيش مشكله اننا كل فتره نجرب رياضه جديده لحد ما نلاقى الرياضه اللى نحبها
عمر / بس دا غلط يا نور لازم يمشوا فى الرياضه شويه و الا مش هيحققوا حاجه خالص
أية / هو مين اللى اختار الكوره يا يس
يس / انا
أية / و مين اللى اختار السباحه
نغم / انا بس نونو قالتلى نلعب جمباز دلوقت و السباحه نخليها فى الصيف
أية / و انت عاوز سباحه يا يس و لا كراتيه احسن
يس / كراتيه
نور / اتحلت حد نفسه يلعب حاجه تانى
عمر / انا نفسي اللعب بوله بلايستايشن اقطعك فيهم شوفتنى و انا بقطع عمك على يا يس
أية / احنا بقي هنسيبكوا رجاله مع بعض و ندخل بنات مع بعض … يلا يا نغم … ندخل جوه
يس / انا هفضل هنا مع الرجاله
نور / ماشي يا حبيبي عن اذنكوا
نور و أية و نغم يدخلوا جوه و عمر يوصل البلايستايشن
على / تعال بقي يا ياسو اما اوريك الطريقه العلويه لتقطيع عموا عمر
عمر / اتكلم على قدك
على / انا مش بتاع كلام اما بقطع علاطول
……………..
فى شقه ندى يوم الخميس
حسام بينيم مصطفى على السرير
حسام / لبنان نورت يا عمى انا مش عاوز يكون عندك فكر باذن الله الاسبوع الجاى بالكتير هكون مظبطلك مع دكتور شاطر يتابع حالتك
ندى / انا عملتلك الاكل بايدي دوق بقي و شوف بنتك بقت شاطره ازاى
حسام / لا دا انت هتنبهر خالص دى بقت احلى شيف فى لبنان كلها
ندى تروح المطبخ تليفون حسام يرن يطلع الصاله
حسام / الو … ايه !! … امتى ده ؟؟ انا جايلك حالا … مسافه السكه … سلام سلام
حسام يدخل المطبخ
حسام / مخزن الشركه انفجر
ندى تبصله ببرود
حسام / لازم ارجع ادعيلى
ندى / ربنا يقويك
ندى تكمل غرف حسام يبصلها باستغراب يتنهد و يمشي تاخد الصينيه و تروح لباباها
ندى / حسام مشي و خليلنا الجو انا و انت و بيبو ما تقلقش هو ما عدش بيجي كتير الحمد لله لقاله لعبه جديده ينشغل بيها
ندى تاكل ابوها
ندى / انا بقي عوزاك تاكل و ترتاح شويه و بالليل هنقلك بالكرسي تقعد شويه فى البلكونه تغير جو … انا لسه ما خدتش على الشوارع و لا حفظتها فبلاش ننزل ممكن لما حسام يجى نبقي نخليه ياخدنا الجبل الهوا هناك حاجه تانيه
……………….
فى شقه نور
يس / انا مش فاهم احنا ليه بنزاكر فى الاجازه و دروس احنا المفروض نلعب بس
نور / و انت ما شبعتش لعب دا انت اتفسحت هنا و اتفسحت فى اسكندريه و بعدين دا فاضل اقل من اسبوع على الدراسه يعني يادوب تلحق تشد شويه فى المنهج بحيث لما تروح الكلاس تبقي فاهم و اشطر من صحابك
يس / مش عاوز
نور / ما تتعبنيش يا يس انت مش عمو على اتكلم معاك و خلصنا من الموضوع ده
نغم / انا هاخد الدرس و ابقي شاطره عشان عمو على يجيبلى دريس بينك و كراون و فايرى وينجز
نور / شوفت نغومتى شاطره ازاى
يس / انا مش بحب المزاكره
نور / و لا انا والله
الكل يضحك
نور / بس لازم نزاكر عشان نبقي شطار و كل ما كنا شطار اكتر كل ما خدنا حلويات و لعبنا اكتر و لا ايه
جرس الباب يضرب
نور / المس جت ارفعوا راسي
يس ينفخ
نور تروح تفتح الباب واحده تدخل و نور بتقابلها بابتسامه
……………………
فى شقه حسام
حسام يفتح الباب و يدخل يلاقى هدايه قاعده تقوم تقف
هدايه / ايه التاخير دا كله
حسام / اسمها حمد الله على سلامتك اتعلموها بقي
هدايه / ههههههههههههه حقك عليا
حسام / عرفتى توصلى للاستبن بسهوله
هدايه / طمنى عملت ايه
حسام / اخدوا اقوالنا كلنا و تسجيلات الكاميرات و ربنا يستر بقي جبتى الفلوس
هدايه تطلع ظرف من شنطتها مليان فلوس و تديه لحسام يقعد يعده
هدايه / ما تقلقش زى ما اتفقنا مش ناقصين دولار واحد
حسام / انا محتاج كل سنت فيهم عاوز اشوف مركز محترم اعالج فيه عمى
هدايه / انا لو منك ما اصرفهمش بسرعه لاننا هنخف الشغل فتره
حسام / اقعدى يا دودو
هدايه تقعد
حسام / هو حبايبك ليهم علاقه بنقلى هنا
هدايه تبتسم
هدايه / تؤ … الدنيا مش واقفه عليك على فكره
حسام / لا انا متاكد من ده
هدايه / احنا حبايبنا زيك كدا فى كل الفروع
حسام / و انتى بتقبضي من كل الفروع
هدايه / الجمال ده مش ببلاش يا سمسم
حسام / لا ما انا عرفت
هدايه/ هههههههههههههه
حسام / انا عاوز ارجع خلصنا العمليه هنا
هدايه / لحقت توحشك
حسام / هدايه
هدايه / تمام يا حسام … مفيش اخبار عن اللى صورنا سوا
حسام / لا حتى مستنى اشوف هيبعت رساله انك هنا و لا لا
هدايه / تمام انا همشي بقي عشان
هدايه تقوم حسام يسد السكه
حسام / الله الله بقي تضربى المشوار ده كله و تمشي كدا من غير ما تاخدى واجبك
هدايه / غصب عنى بس كلنا بنمر بايام صعبه و انت صممت على المعاد لو كنت استنيت يومين بس ما كنتش هبقي مضغوطه كدا
حسام / ااااااه طب قلبي عندك بقي
هدايه / هبقي اعوضك المره الجايه
حسام / ما اتحرمش من حنيه قلبك
هدايه / ههههههههههههههههههه
…………………
فى شقه على بعد فتره بسيطه
المدرسه / برافو يا يس حل بقي دى كمان و انا اديك
باب الشقه يتفتح و على يدخل المدرسه تقوم تقف و يبصوا لبعض
على / صفاء !!!
صفاء / ازيك يا على … هم دول اولادك!؟
نور تطلع من المطبخ
على / احم انتى المدرسه ؟
صفاء / لما اتخرجت انت عارف مفيش شغل بقيت بدى دروس و واحده واحده يعني
نور / انتوا تعرفوا بعض ؟
على / مدام صفاء كانت زميلتى فى الكليه
نور / بجد !! سبحان الله الدنيا صغيره اوى
على / احم انا مش هعطلكوا عن اذنكوا
على يدخل جوه و نور و صفاء بيبصوا لبعض
……………………
فى المحل عند ليلى
منال بتعد فلوس و تديها لليلى
منال / كدا دول مرتبك و دول نصيبك من ارباح الشهر ده
ليلى / بسم الله ما شاء الله حلوين
منال / الحمد لله
ليلى / البرنامج الجديد اللى عاملينه ده حلو اوى و مسهل علينا الحسابات خالص مش زى اللى قبليه خالص
منال / انتى بتقولى فيها التانى ده كان متخلف و كل شويه يطلع ايرور و بوظلنا الدنيا
ليلى / مش عارفه اشمعن على بختنا دا على بيقولى شغال زى الفل فى المحلين عنده جاى على بختنا و يخيب
منال / بقولك ايه صحيح تعملى حسابك بكره تتغدى معايا عامله كفته رز و عارفه انك بتحبيها
ليلى / انا كرشي ده على ايدك تصدقى الواد على بيحبها اوى
منال / ما هو نور اللى طلباها
ليلي / و هى نور ما بتعرفش تعملها لا هى و لا امها
منال / الله يعينها هتلاحق على ايه و لا ايه
ليلى / حد قالهم يجيبوا عيال من الشارع يربوهم
منال / اهو كله بثوابه حد يكره الخير
ليلى / و كلو كوم و الوليه امها دى كوم
منال / ما هى كمان مش موافقه على اللى بيعملوه مع انهم عيال تشرح القلب
ليلى / انا مش هقول حاجه بس الواحد برده … انا هسكت انا قولت مش هتكلم فى الحكايه دى تانى
منال / جدعه
ليلى / قوليلى بقي هتعملى ايه فى نصيبك
منال/ هعمل ايه يعني و لا حاجه هحطه فى البيت جنب اخواته ربنا يباركله على ما بيخلينيش اصرف جنيه لا اكل و لا فواتير و لا حتى علاج
ليلى / طب ما تعملى زيي و تحطيهم فى البنك بدل قعدتهم دول بيدوا فوايد حلوه اوى و لما تقفليهم مبلغ ابقي اشتريلك بيهم حتتين دهب و لا حاجه
منال / ههههههههههههههه انا دلوقت عرفت على جايب الدماغ النضيفه دى منين
ليلى / ما تكسفينيش بقي يا حجه
منال / ههههههههههههههههه
…………………..
فى شقه ندى
حسام يفتح الباب و يدخل يحط شنطته جنب الباب
حسام / انا جيت
ندى تطلع من جوه
ندى / نورت
حسام / نقلونى تانى و وزعوا كل الموظفين اللى فى الفرع لحد ما التوضيبات تخلص
ندى / و هترجع هناك تانى
حسام / مش عارف
ندى / اغرفلك تاكل
حسام / انتى زعلانه منى مش حاسك فرحانه انى رجعت
ندى / بالعكس دا بيتك
حسام / انتى ليه مصره ترجعينا لنقطه الصفر يا ندى انتى حتى ما اتصلتيش تطمنى عليا مره
ندى تقرب منه و تبصله
ندى / انت عاوز ايه يا حسام
حسام / انتى ما شوفتيش الاخبار فى التليفزيون يعني ما فكرتيش انى بيتحقق معايا انا و زمايلى و ان مكان اكل عيشنا اتحرق
ندى / شوفت
حسام / طب دا ما اثرش فيكي
ندى / لا فرحت انك هترجع لحبيبتك
حسام / انتى حبيبتي يا ندى
ندى / و هدايه
صمت
حسام / تمام … انا اسف
حسام يتنهد
حسام / ضعفت … بس اقسم بالله قاومت كتير اوى من اول يوم فى الشركه و انا بقاوم بتتكلم بدلع و بتلبس و تتحرك قدامك طول الوقت و انا … و انتى كمان
ندى / ايوه انا مستنيه و انتى دى من زمان
حسام / تنكرى يعني ان ليكى دور فى اللى حصل
ندى تبص لنفسها
ندى / و انا هاجى جنبها ايه
حسام / انتى احلى منها مليون مره
ندى / انا مش زعلانه انك خونتنى … انا بس مش فاهمه … تعبت كل ده عشان توصلى … انت اصلا ضامن وجودى فتحافظ عليا ليه
حسام / ابدا والله الموضوع مش كدا خالص
ندى / انت عارف انا جبت بابا هنا ليه
حسام يبصلها و يسكت
ندى / عشان تضمن وجودى اكتر ما ليش حد فى مصر ارجعله عشان انت تطمن اكتر و تاخد راحتك اكتر و تنبسط انا عوزاك مبسوط
حسام / انا بشر اقسم بالله قاومت اقسم بالله ما كنت عاوز ده بس هى … ندى انا بحبك انتى بس انا ليا احتياجات
ندى / انا طلبت منك تتجوز فاكر
حسام / اتجوز دى !!
ندى / اتجوز اى واحده تعفك يا حسام
حسام / و خليتيني اطلق اروى ليه ما دام كدا كدا هتخليني اتجوز غيرك
ندى / عشان جرحتنى وجعتنى و كان لازم اوجعها
حسام / اوعدك مش هعمل كدا تانى اوعدك هقطع علاقتى بيها
ندى / دى حاجه بينك و بينها و قبلها بينك و بين ربنا انا كدا كدا ههه ما ليش كرامه اصل المساجين و الجوارى ما لهمش حقوق
ندى الدموع تخونها
حسام / حقك عليا
ندى / و ايه الجديد ما كل مره تجرحنى و تعتزر اقولك الحقيقه اقولك اللى جوايا انا كنت بدات … الكتاب اللى زياد جابهولى كان بيناقش فكره اننا مش عارفين الخير فين… قولت يمكن الخير فى حسام و عشان كدا ربنا بعد كل اللى حصل جمعنا ببعض يمكن على كان شر ليا … بس كل مره بكلم نور بتحكيلى قد ايه على … و انت … انا بس عاوزه اعرف … صدقنى خلاص مش هتفرق
حسام بيبص لندى بحزن
ندى / كلكوا مبسوطين و انا اولع
حسام/ مش هكررها
ندى / المهم اعيش عشان بنتى المهم استحمل عشان بنتى … طب بالله عليك دى عيشه … طب تفتكر هقدر استحمل لحد امتى
حسام / مش هكررها و هعوضك والله لاعوضك … انا لقيت دكتور كويس هنا لعمى و خدت سلفه عشان اقدر اعالجه انا بعمل كل ده عشانك والله العظيم بعمل كل اللى اقدر عليه عشانك
ندى تمسح دموعها
ندى / كتر خيرك … هدخل ابص على حبيبه
ندى تيجي تدخل حسام يمسك ايدها
حسام / انا بحبك يا ندى كنتى بتتعبى بترجعى و انا ما كنتش عاوز اضغط عليكي لما كنت بكلمك كنتى بتتعصبى و تقولى كلام … و هى على الناحيه التانيه بتقول كلام تانى خالص … ضعفت بس والله ما هكررها
ندى / انا بتكلم على حاجه واحده انك تتجوز عليا دا حلال انك تزنى
حسام / لا لا والله الدنيا بينا ما وصلتش لكدا لما واجهتيني بالصور و حسيت انى هخسرك انقذتيني و يمكن لو كنتى واجهتيني بالرسايل اول مره ما كانش هيبقي فى حتى مره تانيه
ندى تبتسم باستهزاء
حسام / انا لو عليا مش عاوز غيرك فى حياتى
ندى / و انا كدا كدا معاك ما تقلقش … هروح اغرفلك … بابا محتاج يخرج و يغير جو لما ترتاح
حسام / نخرج و ماله حاضر انا فاضي ناكل لقمه و تلبسوا و ننزل
ندى / تمام
ندى تروح المطبخ و حسام ينفخ
حسام / هتعمل ايه فى الكلكعه دى كلها يا زفت … حلها من عندك يارب
……………..
فى شقه نور
على / و انا المفروض اقولك على كل البنات اللى كانوا معايا فى الدفعه فى تجاره اللى هى كليه الشعب
نور / لا بس
على / و بعدين انا اصلا مش فاكر اخر مره شوفت فيها صفاء دى كانت امتى اساسا انتى عارفه انا سبت الكليه من امتى اساسا صفاء اتجوزت فى الكليه يعني اكيد ما كانش فى بيني و بينها حاجه
نور / انا ما قولتش بينك و بينها حاجه انا بس اتفاجئت
على / ما انا كمان اتفاجئت بفتح الباب لقيتها قدامى هو انا اعرف انها هنا
نور / انت عارف ان المس بتاعتهم موجوده
على / و اعرف ان اسمها صفاء بس ايه احتمال انها صفاء اللى كانت معايا فى تجاره و عربى يبقي لما تدرس تجاره عربى تدى دروس للغات كمان
نور / ما اعرفش هم شكروا فيها جدا … طب الوضع دلوقت هيبقي ازاى
على / معلش مش فاهم … هو فين المشكله اساسا لو هى شاطره و شغاله كويس مع الاولاد يبقي فين المشكله لمجرد اننا دفعه يعني .. مالك يا نور فى ايه
نور / ما فيش انا بس مستغربه الوضع … مش عارفه يمكن أكون اوفر بس هى المفاجاه برده
على يبصلها و يحط ايده على خده
نور / ايه يعني لو دخلت فجاه لقيتني بتكلم مع راجل مش هتضايق و تسال
على / اكيد هسال و عشان كدا بجاوبك
نور / طيب و بعدين انا ما كنتش اعرف انها قدك انا كنت فكراها صغيره فلما لقيتكوا بتكلموا بعض اتخضيت
على / و انا عجوز يعني و لا ايه
نور / انت فاهم قصدى
على يبتسم بخبث
على / غيرتى عليا يعني
نور / انا رايحه اغرف الاكل
نور تمشي و على يضرب كف على كف
…………………
فى شقه ندى بعد فتره
حسام يدخل
حسام / نونو نونو
صوت ندى / فى المطبخ
حسام يجرى على المطبخ يلاقيها بتقلى بانيه
حسام / حزرى فزرى حبيبك عمل ايه النهرده
ندى / روحت الشركه
حسام / حجزت لعمى عند اكبر دكتور فى لبنان كلها بعتله الملف بتاع حالته و كلمونى قالولى ان نسبه شفاه عاليه جدا و روحت حجزتله و هيجوا ياخدوه النهرده يبداو معاه بروتوكول العلاج الجديد ايه رايك فيا بقي
ندى / هيجوا امتى انا كنت ناويه احميه
حسام / قالوا على تمانيه
حسام يبص فى الساعه
ندى/ معلش كمل انت الاكل على ما احمى بابا
حسام / لسه اربع ساعات
ندى / معلش يا حسام اكيد مش هنزله و لسه مستحمى يعني يستهوى
ندى تطلع من المطبخ
حسام / شكرا يا حسام تاعبينك معانا يا حسام انت احسن زوج فى الدنيا يا زفت
حسام ينفخ و يقلب البانيه فى الطاسه
………………….
فى النادى
نور بتلم حاجه يس فى الشنطه
نور / ناسيين حاجه
يس / انا مش عاوز اروح طب خمس دقايق بس اللعب مع صحابى
نور / حبيبي لسه ما حفظناش كلمات الانجليزى
يس / هو كل حاجه مزاكره كدا انا زهقت
نور / ما انا قولتلك احفظها الصبح انت اللى فضلت تتفرج على الكارتون
يس / و اشمعن نغم كانت بتتفرج و انا لا
نور / نغم خلصت مزاكرتها
يس / دا عشان هى بتاخد حاجات اقل منى بكتير انا منهجى صعب و الميس بتديني واجبات كتير جدا و انا مش سعيد
نور / يعني انت عاوز خمس دقايق تلعب يعني
يس / ايوه خمس دقايق بس
نور / روح اللعب بس ما تبعدش افضل شيفاك
يس يجرى تليفون نور يرن
نور / الو
على / انا بره
نور / يس مش عاوز يروح و فضل يزن عاوز يلعب قولتله اللعب
على / هشوف ركنه و اجيلك نقعد شويه
نور / انا ما عدتش قادره عليه خالص يا على
على / العيال كلها كدا زن و قرف بس ما تنكريش انهم عسل برده
نور / ايوه بس انا حاسه اننا ضاغطينه فى الدروس و التمارين دى
على / ما هو اكيد مش هيقضي يومه كله قدام التليفزيون يعني
نور / طب ركز فى السواقه و تعال هطلبلنا نسكافيه على ما تيجي نشربهم
على / قهوه دوبل لحسن مصدع
نور / حاضر
…………………….
فى مركز طبى فخم جدا
ندى و حسام شايل حبيبه قاعدين قدام اوضه كشف
ندى / المكان هنا شكله غالى اوى
حسام / ما يغلاش عليكي
ندى / شكرا
حسام يبتسم
ندى / اكيد مكان زى ده كلفك فلوس كتير اوى
حسام / بحاول اصالحك و بصراحه مش لاقى حاجه تعوضك اكتر من ده
ندى تهز راسها
حسام / انا بحبك و مستعد استلف من طوب الارض عشان اوفرلك اى حاجه تسعدك
ندى / انت استلفت
حسام / لا مش بالظبط الحمد لله مستوره يعني بس انتى عارفه انى كنت داخل فى كذا جمعيه و كمان الفتره اللى فاتت كلفتنى كتير مجيه عمى و سفر رايح جاى و ايجار شقتين انتى عارفه ان مرتبى معروف
ندى / بص لو الدنيا معجزه معاك انا دهبى
حسام / انا مش بقولك كدا عشان ابيعك دهبك انا ازودهولك بس اقسملك انى اتربيت و اقسملك ان ما عنديش اهم و لا اغلى منك
ندى / تمام
حسام / يعني صافيه لبن
ندى / خلاص بقي يا حسام
حسام يعدى ايده من ورا ضهرها و ياخدها فى حضنه و يبوس راسها و هى بتبص على الناس
ندى / الناس
حسام / احنا هنا فى لبنان هو احنا فى مصر و بعدين ما حدش له عندنا حاجه
ندى تهز راسها و تقوم تقف قدام الباب
ندى / هم اتأخروا كدا ليه
………………..
فى النادى
على / يا ستى قولي لصفاء تقلل الواجب من عليه شويه
نور / مش عارفه بقي بس هو فعلا بيضيع وقت طويل قدام التليفزيون و الموبايل
على / و نغم
نور / لا نغم شاطره عنه كتير بتخلص اللى وراها كلو و بعدين تلهب يس اللى ما بيقعدش مع انه اكبر منها يقعد يضيع وقت لحد ما هى تخلص الواجب و بعدين يقعد يزن اشمعن هى تلعب و انا ازاكر ما هى كانت بتذاكر و انت بتهنكر
على / هم الولاد كدا متعبين انا راخر ما كنتش أطيق اقعد على الكتاب بس الواد عمر ما كانش كدا من يومه دحيح
نور / ايوه يعني هتكلمه
على / ايوه طبعا هقعد اتكلم معاه و هشده جامد … هو فين صحيح
نور / مش عارفه كان بيلعب كوره هنا مع صحابه
نور و على يقفوا يبصوا يدوروا على يس عيل يعدي
نور / شادى شادى
الولد يبص
نور / ما شوفتش يس
شادى / كان عند الكافتريا هناك بيتخانق مع محب
على / بيتخانق !!!
……………….
فى شقه ندى
مصطفى قاعد فى البلكونه مع ندى شايله حبيبه حسام يدخل شايل صينيه عليها ساندوتشات كبده
حسام / الاسكندرانى … الف هنا
ندى / تسلم ايدك ريحتها حلوه اوى … حسام بيعمل الكبده حلو اوى يا بابا
حسام / عاوزين ننول الرضا بس
ندى / حبيبه نامت اهى هدخلها و اجى اكل معاكوا
حسام يحط الصينيه على الترابيزه و ياخد حبيبه من ندى
حسام / خليكي انتى بتحبى الاكل سخن انا هدخلها و فى ازازه سيفن فى التلاجه هجيبها و اجيب كوبايات
ندى / شكرا … تحب اكلك يا بابا
مصطفى يهز راسه لا و ياكل نفسه ندى تحطه منديل فى قميصه و منديل تانى على رجله
ندى / الحمد لله اتحسنا خالص بكره تخف و تقوم بالسلامه
مصطفى يبتسم ندى تمسحله بقه و هى ماسكه ساندوتش تانى بتاكل فيه حسام يدخل شايل تلت كاسات و ازازه يحطهم على الصينيه و يقعد و يصب و يوزع و ياخد ساندوتش ياكل فيه
ندى / هو انت هتسافر الفرع التانى تانى لما يتصلح و لا هتفضل هنا علاطول
حسام / والله مش عارف بس غالبا هسافر يعني بس ممكن اعتزر يعني
ندى / انا بقول كدا برده الزياده بتاعه المرتب هتضيعها سكن و مواصلات و انا بصراحه محتاجاك هنا الفتره الجايه
حسام يتعدل فى قعدته
ندى / اكيد جلسه النهرده هتتكرر و انا مش هعرف اتحرك بيه هنا لوحدى و اطلعه السلم و انزله و ان سندته هعمل ايه فى حبيبه
حسام / لا مش عاوزك تقلقي انا مظبط الحكايه دى على الاخر انا عمى عندى رقم واحد
حسام و مصطفى يبصوا لبعض
حسام / انا حتى الدكتور كان قالى انه ممكن يتحجز فى المركز و انا رفضت انتى طبعا متعلقه بيه و انا ماجبتوش من مصر عشان يقعد فى المركز هنا قولتله هنوديه و نجيبه و انتى كمان لازم تهتمى بمواعيد دواه و التمارين اللى الدكتور قالك عليها
ندى / لا ما تقلقش هاخد بالى منه طبعا
حسام / و انا هبقي معاكى برده مش عاوزك تشيلى هم و لا تقلقي
حسام ياخد ساندوتش كمان و يعزم على ندى
حسام / كلى كلى
ندى / شكرا
…………………….
فى النادى
على و نور يروحوا الكافيتريا يلاقوا يس بيعيط و العيال ملمومه حواليه
نور / فى ايه يا يس
على / انت كنت بتتخانق
يس / بابا محب ضربنى
على / نعم !! ضربك ازاى
ولد ١ / هو يس كان بيلعب مع محب على اللى اخدناه فى التمرين
ولد ٢ / بعدين يس وقع محب فى الارض
ولد ١ / محب نادى باباه
يس / مسكنى لمحب يضربنى
نور / ايه المتخلف ده … معلش يا حبيبي ما تلعبش معاه تانى و انا هتكلم مع الكابتن
على / كابتن ايه فين محب و باباه دول
نور / على
على / فين الراجل ده يا ولاد
ولد ١ / قاعدين هناك يا عموا
نور / على
الولاد يجروا ناحيه ترابيزه قاعد عليها راجل و مراته و وولد و بنت على يمسك ايد يس و يروح وراهم و نور تروح وراهم
على / حضرتك والد محب
الراجل يشوف يس يقوم يقف
على / علموك انك راجل لما تبقي طول بعرض كدا و تتشطر على عيل صغير
الراجل / ابنك
على / هيبقي شكلك ايه لما امسكك قدام عيالك و اخلى يس ياخد حقه منك
الست / انت بتتكلم ازاى كدا اصلا
على / انتى بتتكلمى مكانه ليه و … لا انت مش بتعرف تتشطر غير على العيال الصغيره
الراجل / احترم نفسك انا ساكتلك من الصبح
على / اعتزر ليس
الست / دا اتجنن باين عليه
على يضرب الراجل بالدماغ فى مناخيره الراجل يقع فى الارض مناخيره بتجيب دم الست تصرخ و نور تصرخ
نور / على
الست / انت اتجننت انا هحبسك انت ما تعرفش بتكلم مين
على / انتوا اللى اتجننتوا لما مديتوا ايدكوا على ابنى … يلا يا يس
على يشيل يس و يمشي و نور جنبه
نور / حد يعمل كدا
على / نتكلم فى البيت
نور / ايوه بس انت كدا بتعلمه ان العنف هو الحل
على يقف و يبصلها
على / الراجل ده لو كان بيفهم بلغه تانيه ما كانش عمل حركه زباله زى دى
نور / انا كنت هتكلم مع الكابتن التمرينه الجايه
على / و انا هقعد الواد مقهور للتمرينه الجايه طب دا لو كان الجدع ده روح كنت روحت ضربته فى بيته
نور / برده دا مش حل
على / نور
نور / يا على الراجل لو راح عملك محضر
على / حلو اوى ايه رايك بقي انى هروح اعمله محضر دلوقت
نور / و انت تعرف اسمه اصلا
يس / اسمه نبيل شكرى
على يبوس يس و نور تبص له
يس / اسمه محب نبيل شكرى
نور / و دا حل يعني بقى خناقه بين عيال تكبر بالشكل ده
يس / انا ما كنتش بتخانق كان بيوريني حركه جديده لما جربتها وقع فى الارض البنات ضحكوا عليه راح عيط لباباه جه زعقلى و شتمنى و مسكنى و خلى يس يضربنى
على / شوفتى يعنى راجل ناقص و ابن كلب
نور / ما تشتمش قدام الولد
على يقف و يبصلها و يفتح العربيه يس يدخل
على / انا هطلع على القسم و اعمله محضر
نور / ما تكبرش الموضوع يا على ما تنساش ان يس مش ابننا ما تعملش مشاكل نندم عليها كلنا
على / انتى بتتكلمى صح
نور / الحمد لله
على / انا هكلم استاذ ممدوح جوز عمتهم يسبقنى على القسم
نور / الصبر من عندك يا رب
……………….
فى شقه حسام
ندى بتغسل المواعين حسام يدخل يشمر و يساعدها
حسام / قولتلك هعدل عمى فى السرير و هعملهم انا
ندى / مش حوار يعنى انا تقريبا خلصت
حسام / تعرفى انك رديتي فيا الروح النهرده
ندى تبصله
حسام / لما قولتى انك محتاجانى جنبك ما طلبتى انى ما امشيش و اخليني جنبك حسيت ان لحياتى هدف
ندى / اكيد طبعا دورك في حياتنا مهم
حسام / و انا عمرى ما هخيب ظنك و لا اخليكي تتحوجى لحد
ندى / ربنا يقويك
حسام / بس تعرفى انك وحشانى اوى
ندى تحط الاطباق فى الرشاقه حسام يحضنها من ورا و يسند الاطباق و يمسك ايديها
ندى / حسام
حسام / وحشانى يا ندى هو انا مش بوحشك خالص
ندى / النهرده كان يوم طويل و تعبت اوى
حسام / انا محتاجك اقولهالك ازاى عشان تفهمى ما تجبرينيش على الغلط
ندى / قولتلك اتجوز
حسام / و هو الجواز ده مش محتاج مصاريف و الا اللى هتجوزها دى مش هتاخد نص مرتبى هكفيها و اكفيكي و اكفى عمى و حبيبه ازاى يا ندى دا لو اعتبرنا انها اتجوزتنى ببلاش من غير لا شبكه و لا مهر و كمان شقه و عفش و نيله و بعدين انا مش هقدر اعدل بينكوا انا قلبي معاكى انتى ازاى اقدر انام مع واحده تانيه
ندى / ما انا مش قادره اساعدك اعمل ايه
حسام / ما انتى قدرتى قبل كدا و اكتر من مره طب بصي حاولى حاولى عشان خاطرى احتسبيها لربنا يا ستى تعفى جوزك و تعفى نفسك حاولى يا نونو عشان خاطرى
ندى / بابا هنا
حسام / زمانه نام هقفل عليه الباب و اقفل علينا الباب و اشغل التليفزيون هو احنا يعني بنعمل فرح عشان خاطرى بقي
ندى / انت بتضغط عليا جامد
حسام يتنهد و يبصلها و يهز راسه
حسام / مش هضغط عليكي يا ندى بس لما يتعرض عليا الحرام بقي و ما اقدرش اقاوم ذنبى فى رقبتك
حسام يسيبها و يمشي تتنهد و تسند على الحوض و تروح وراه الاوضه
ندى / ماشي يا حسام
حسام / ماشي ايه
ندى / موافقه هروح اطمن على بابا و اقفل عليه الباب و اجيلك
حسام يبتسم جدا ندى تطلع بره
……………..
فى شقه امانى
امانى / ما ليك حق تتحرك و تروح و تيجي على مزاجك ما الداده قعدالك
نور / يا ماما
امانى / ما خلصت تمرين هات الواد و تعال انما تقعد و تتفسح ما حقك يا بيه حقك
على / انا اسف جدا انى بفسح بنت حضرتك غلطه و مش هكررها
امانى / بنتى هو سحلتك لبنتى فى تربيه العيال دى تسميها فسحه
على / انا اسف جدا اوعدك مش هنسيب نغم معاكى تانى
امانى/ انا مش قادره اصدق بقي ده على اللى جوزته لبنتى
على / تحبى اوريكي البطاقه
نور / على
على / معاكى حق … انا اسف جدا يا طنط … يلا ياولاد
على يفتح الباب و يس و نغم يجروا على فوق
نور / على فكره ما كناش بنتفسح كنا فى القسم حصلت خناقه فى النادى و روحنا عملنا محضر
امانى / الجدع ده بتاع مشاكل مش شايفه من يوم ما اتجوزتيه و انتى بقيتي عامله ازاى
نور / عامله ازاى يا ماما و بعدين على انسان محترم و بيحبنى مش حارمنى من حاجه والعيال اللى حضرتك رفضاهم دول ملوا حياتى حسسونى بالامومه اللى اتحرمت منها
امانى / امال بتاخدى الادويه دى ليه تقدرى تقوليلى لما تحملى هتعملى ايه هتاخدى بالك من اللى فى بطنك و لا من العيال دول هترموهم فى الشارع تانى بعد ما ياخدوا عليكوا و يتعلقوا بيكوا و تتعلقوا بيهم اصلا هتقدرى توفريلهم الرعايه و انتى حامل انتى اصلك ما جربتيش الحمل و قرفه و لا الولاده و تعبها لما تخلفى هتقدرى تهتمى بالاتنين و لا هتهملى دول على حساب ابنك و لا هتعكسي لو يس ضرب ابنك هتعملى ايه
نور / انا ما حملتش لسه عشان افكر فى كل الاسئله دى اوعدك لو ربنا كرمنى و حملت
امانى / هتكونى اتعلقتى بيهم
نور / اتعلقت من اول لحظه ناموا فى سرير حبيبه لما على جابهم اول يوم عرفت انى مش هقدر استغنى عنهم من اول مره ضحكوا عندى فى الشقه
امانى / عشان كدا ما عودتش طايقه على لانه بيدوس على وجعك
نور / على بيعالج وجعى مع على برتاح بفرح بحب بحس انى عايشه بيسمعنى و لما بيغلط بيعتزر بيخاف على مشاعرى و يتقى ربنا فيا انا بحب على و بحب يس و نغم
محمد يطلع من الاوضه
محمد / اطلعى غيرى هدومك و عشى العيال و ارتاحى يا نور
امانى / سكت دهرا و نطق كفرا
محمد / بنتك نهت الحوار و لو فضلتى تضغطى عليهم كدا مش بعيد ياخدها و ينقلوا شقه تانيه
نور / عن اذنكوا
نور تطلع و تقفل الباب
امانى / انا داخله انام
محمد / تصبحى على خير
امانى تدخل الاوضه محمد يبرطم
محمد / نوم الظالم عباده
…………………..
فى الشركه
هدايه / يعني ايه لقيت الورقه دى محشوره فى باب الشقه
حسام / قولتلك اللى بيبعت الرسايل اكيد ليه من وراها غرض
هدايه / و هتعمل ايه فى الفلوس دى كلها دا مبلغ كبير جدا
حسام / اديكي قولتيها دا مبلغ كبير جدا و انتى عارفه انى ما اقدرش عليه لوحدى
هدايه / و انت بقي متخيل انى معايا ادفعلك
حسام / و تدفعيلى انا ليه لا يا ماما انا مستعد اديكي نص الفلوس و تدفعيله انتى انا يهمنى الصور دى تموت انا ما صدقت علاقتى بندى اتحسنت
هدايه / انا ما عيش و لا حتى ربع المبلغ ده على فكره انا باخد كوميشن بسيطه جدا من الشغل ده
حسام / لا يا شيخه
هدايه / اقسملك يا حسام انا فعلا ما عييش
حسام / يعني مش بتاخدى نسبه من العمليات
هدايه / ما قولتلك انا واجهه لناس كتير اوى و كل واحد لازم يقبض عشان المصلحة تمشي
حسام / يعني واجهه لله و للوطن على العموم انا عملت اللى عليا اخرى اللم كل اللى معايا و اديهولك تديهوله بقي تضربيه فى جيبك و لا تصدقى انا اخلى الفلوس احسن اصل ما دام كدا كدا ما عييش يكمل اتفضح بقي بفلوسي احسن ما ابقي مفضوح و مفلس اهو على الاقل يبقي معايا قرشين لو ندى عرفت اعرف اراضيها بيهم
هدايه / طب بص سبنى يومين افكر و اشاور الناس فى عمليه جديده
حسام / اعملى اللى تعمليه الراجل مدينا مهله اسبوع و هيبعت الصور لكل نمر الشغل و طابعلك النمر كلها على ضهر الجواب و اول نمره مستر عدنان
هدايه / خلاص قولت هتصرف كان يوم اسود يوم ما جيتلك
حسام / والله كان نفسي اقولك اخص عليكي بس شرحه برده هكدب يعني
هدايه تسيبه و تمشي و حسام بيقوم يبتسم
………………
فى شقه على
ممدوح و نبيل و على قاعدين
ممدوح / يبقي نتصالح بقي و ما نكبرش المواضيع و لا ايه يا استاذ على
على / يا استاذ نبيل احنا مش بتوع مشاكل و زى ما حضرتك انفعلت عشان ابنك انا كمان انفعلت عشان يس
نبيل / بس مش لدرجه ان حضرتك تمد ايدك عليا يعني
على / و هو حضرتك عادى انك تستقوى على طفل
ممدوح / مش هنعيده يا جماعه خلاص وحدوا الله بصوا يا جماعه انتوا الاتنين غلطتوا بس الغلط بدا من عندك يا استاذ نبيل اعذرنى ما هو ما ينفعش تدخل بين العيال برضه
على / ولدين بيلعبوا سوا ولد ضرب التانى تروح لأهله او على الاقل تمنع ابنك يلعب مع يس تانى حضرتك فكرت لحظه انى ممكن امسك محب ابنك ليس يضربه ترضاها لمحب يعني
ممدوح/ خلاص يا استاذ على موقف و بيحصل الراجل انفعل و حضرتك برده ضربته قدام المدام و الاولاد انا شخصيا خلاص اتنازلت عن المحضر و حلينا الموضوع و الراجل جالك فى بيتك
على / على راسي طبعا
ممدوح / خلاص يبقي باذن الله نتقابل كلنا النهرده بالليل فى النادى
على / انا نفسي والله بس النهرده الاولاد عندهم درس ساينس و
ممدوح / يا راجل هم ثانويه عامه كنسل النهرده و خلينا نجمع الاولاد و نراضيهم على بعض
على يبص على ستاره الطرقه نور مداريه فيها تهز راسها اه
على / على بركه الله نتقابل بالليل فى النادى
ممدوخ / على بركه الله
…………………….
فى شقه ندى
حسام يدخل شايل اكياس كتير ندى تروح تشيل معاه
ندى / ايه ده كله
حسام / كل شهر وانتى طيبه القبض نزل فعديت على السوق و الهايبر و جبت خزين للبيت شوفى كدا فى حاجه ناقصه
ندى تاخد كيسين كبار على المطبخ و حسام يدخل وراها بكيسين تانين
ندى / ناقصه ايه دول كتير جدا
ندى ترص الحاجه فى مكانها
حسام / مفيش حاجه بتخسر شوفى كدا لو فى اى حاجه ناقصه قوليلى قوليلى اجبها بكره و انا جاى من الشغل
ندى / اغرفلك تاكل
حسام / ياريت والله واقع النهرده كان فى شغل كتير و ما فضيتش حتى اشرب بق ميه حتى هاكل لقمه و انام
ندى / مفيش مشكله هنقل حبيبه جنب بابا عشان ما تزعجكش
حسام يفتح فى الحلل
حسام / انتوا كلتوا و لا ايه
ندى / بصراحه اه بابا له معاد دوا و انت اتاخرت و الاكل كان سخن فكلت و انا باكله
حسام / طب ما تنقنقى معايا تفتحى نفسي انا عارف انى اتاخرت بس والله الاكل لوحدى ما لوش طعم
ندى / ماشي روح غير انت بس و انا هغرف
حسام يبوسها من خدها و يمشي
………………..
فى شقه نور
على قاعد على السرير و نور قاعده على التسريحه بتسرح شعرها
نور / كان ايه لزمته بقي من البدايه
على / ارتحت
نور تبصله و تبص الناحيه التانيه
على / ما كانش عندى اللى يدافع عنى
نور تبصله
على / لما كنت بتخانق مع العيال كان كل واحد بينادى ابوه و انا … كنت بقف بطولى اللى يهزا و اللى يزغد و لما اروح و جوز امى يعرف كان بيتخانق مع امى انى مش متربى و بتاع مشاكل حتى لو مش انا الغلطان و اتمنع من نزول الشارع و اللعب مع العيال الكل عرف انى هفيه ما ليش ضهر بطلت اللعب خالص حتى فى المدرسه بطلت انزل الفسحه و اول ما الجرس يضرب بتاع المرواح كنت اول واحد يجرى عشان ما يحتكش بحد
نور تقوم تقعد جنب على و تحضنه
على / انا مش بتاع مشاكل بس انا ان ما كنتش لقيت اللى يدافع عنى
نور / الوضع مختلف انا فاهمه اللى انت حاسه بس
على / بس ما حستيهوش يا نور … يس ما جريش علينا يس وقف يعيط مكانه يس عارف ان ابوه مات و ضهره انكشف يس حقه ما كانش ينفع يستنى للصبح حتى مش للتمرينه الجايه
نور / يا على انا بتكلم فى نقطه تانيه خالص
على / الراجل لو ما كانش انضرب ما كانش اتلم ما شوفتيش كان بيتكلم ازاى هو و العقربه مراته
نور / كدا يس اتعلم انه ياخد حقه بالعنف مع انه ممكن ياخده بالعقل و الهدوء
على / فى الزمن ده !!
نور / العنف مش هو الحل يا على
على / اتكلمى معاه و ربيه زى ما انتى شايفه صح بس انا لو اتحطيت فى نفس الموقف تانى هتصرف كدا برده عشان تبقي عامله حسابك و اى حد هياذيهم هعمل كدا حتى لو بكلمه
نور / نام يا على و خلينا نقفل الموضوع ده خالص
على ينام جنب نور و تفضل تلعب فى شعره
نور / حاول تفصل يا على انا فاهمه انت حاسس بايه بس انت كدا غلط يا حبيبي … انا ممكن اتكلم مع يس بس صدقنى هو مش هيسمعلى قدك
على / حاضر يا نور هكلمه الصبح اهو اكون فكرت هقوله ايه
نور / انت هادى دلوقت و تقدر تفكر بشكل عقلانى اكتر منه عاطفى
على يبصلها و يبتسم
نور / ايه ؟
على / كنت محتاج انا لجانب عقلانى فى حياتي
نور / لا مسنود على حيطه مايله
على / ما انا برضه مستغرب بس ساكت
نور / بس بقي ههههههههه
…………………
فى شقه أية
باب الشقه يخبط أية تروح تبص من العين تلاقي بنوته بالاسدال تتردد ثوانى و بعدين تفتح
البنت / انا اسفه اوى بس الشوربه على النار و ما لقيتش بصله عندى
أية / ثوانى
أية تسيب الباب متوارب و تدخل تجيب كيس فيه بصل و ترجع تلاقى الباب زى ما هو و البنت واقفه بره
أية / اتقضلى
البنت / ايه دا كلو هى بصله واحده بس لحد ما جوزى يجيب و هو راجع
أية / مش مشكله خليهم برده مش هيخسروا
البنت / انا محرجه منك اوى ميرسي جدا
أية تبتسم البنت تاخد الكيس و تطلع فوق و أية متبعاها تدخل و تقفل الباب
………………..
فى شقه ندى
ندى بتكلم نور فيديو كول
ندى / انتى شايفه كدا
نور / انا قولتلك كدا من الاول انتى بس اللى كنتى مكسوفه زياده عن اللزوم
ندى / انا ما ينفعش اتكلم فى الحاجات دى مع حد
نور / انا مش حد يا ندى
ندى / هو انا ممكن اسالك فى حاجه
نور / اسالي
ندى / خلاص خلاص … طب انا ليه مش مبسوطه
نور / دا سؤالك و لا كنتى عاوزه تسالي فى حاجه تانيه و غيرتى رايك
ندى / اوقات كتير الجهل فيها بيكون نعمه
نور / بتحصل بس فى حاجات الجهل فيها بيودى فى داهيه
ندى / المرادى مش منهم
نور / تمام وقت ما تحبى تتكلمى انا موجوده
ندى / انتى عمرك حسيتي باللى بحس بيه ده … لا استنى ما تجاوبيش مش عاوزه اعرف انا مش عاوزه اعرف
نور / هههههههههههه بيتهيالى كلنا بيجي علينا اوقات بيبقي عندنا فتور من كل حاجه
ندى / بس انا علاطول عندى
نور / يمكن عشان بدايتك كانت غلط يمكن عشان معظم الوقت فى البيت يمكن الروتين يمكن حاجات كتير اوى بس بصي لنص الكبايه المليان الدنيا بدات تظبط اهى حتى لو مش زى ما احنا عاوزين بس على الاقل فى تحسن السهم فى الطلع مش فى النازل
ندى / انا بقول كدا برده
نور / عموا عامل ايه
ندى / كويس و نفسيته حلوه بيقعد يبص لحبيبه و يلاعبها و بتضحكله حاسه انها عرفاه
نور / لا ما افتكرش تكون فكراه
ندى / المهم انى حاسه ان الكل سعيد حواليا صدقيني ده فارق معايا اوى
نور / مش مهم الناس قد ما المهم انت اللى مهمه
ندى / الحمد لله احسن كتير
نور / حسام رجع يشتغل مع هدايه
ندى / هو حر انا قولتله ما يعملش حاجه حرام و خلصت زمتى قدام ربنا و عملت كل اللى عليا الباقي يرجعله بقي
ندى / اقسم بالله يا نو ما بحس باى حاجه ناحيته هو كويس و بيعملى كل اللى عوزاه و مش ناقصنى اى حاجه و بطلب اى حاجه بيعملها
نور / طب امال ايه بقي
ندى / قلبي مات من كتر الوجع باين … لا ما ماتش لو كان مات ما كنتش اتوجعت بس انا لسه بتوجع
نور / حرام عليكي نفسك
ندى / مش قادره يا نور ما حدش حاسس بيا مش قادره
ندى تعيط
نور / لا اله الا الله يا بنتى انتى ناقصك ايه بس
ندى / الحمد لله … مش ناقصنى اى حاجه
ندى تمسح دموعها
………………….
- يتبع الفصل التالي اضغط على ( رواية سلف و دين ) اسم الرواية