رواية شيزوفرينيا احاسيس بقلم حنين عادل عبر مدونة دليل الروايات
رواية شيزوفرينيا احاسيس الفصل الثالث 3
بيجري أيوب ورا البنت لحد ما بيطلع بره القصر
وبينده بصوت عالي:
انــــــــــجـــــــــــــــــي
بيقوم أبوه من علي السفرة فجأة:
دا صوت أيوب استرها يارب
بيمشي سعد علي عكازه بسرعة ورشا ونورهان وراه
بتيجي عربية ناحية أيوب وبتكون هاتخبطه بس بيعرف يتفاداها وبيقع علي الارض ودراعه بيتجرح
بيبُص عليها وهي بتمشي وهو مستغرب
بتجري عليه نورهان بلهفة:
ايوب انت كويس
بتمسك دراعه بخوف وقلق
أيوب: متقلقيش انا كويس
بيقوم أيوب وبينضف هدومه
بيجي ابوه بسرعة وبيساله بخوف:
ايه يابني انت كويس ايه اللي حصل
أيوب: ماتقلقش يا بابا بسيطة
رشا: ايه بس يابني اللي طلعك بره القصر؟
ايوب بيمشي ايده علي شعره:
أصل.. أصل شوفت واحدة شبه إنجي
بيضرب سعد عكازه في الأرض:
لا انت لازم يشوفك دكتور شكلك اتجننت رسمي
أيوب بعصبية:
أنا مش مجنون انا عاوز أبقي لوحدي بس سيبوني في حالي
ببسيبهم ويدخل القصر.. وبيطلع علي أوضته وبيقعد علي سريره
أيوب: انا متأكد إني شوفت انجي أو يمكن مش هيا بس لابسة نفس فُستانها الأحمر وأغنيتها اللي بتحبها
قام بسرعة من علي السرير وفتح الدريسينج روم
وبعدها قفله لما لقاه متعلق في شماعته
في نفس الوقت الباب خبط فــراح يفتح..
نورهان: جري ايه ياعم أيوب معقول اللي شوفته بتتعصب علي الحاج الكُبارة بركتنا!
بيبتسم: الكُبارة مش حاسس بيا…
بيسكت وبيبُص لها تاني:
في الواقع ماحدش حاسس بيا ولا بوجعي انا كنت طاير في السما ونزلت علي جدور رقبتي وسفيت الأرض
نورهان: أيوب دي مش نهاية العالم عارفه انك موجوع بس انت كده بتدمر نفسك وبتدمر اللي حواليك
ماشوفتش عمي لما سمع صوتك كان بيجري ازاي وكان هايقع كام مره وأمك اللي كانت بين نارين خايفة تجري عليك وفي نفس الوقت خايفة علي أبوك
بص أيوب في الأرض…
مسكته من ايده ووقفته قدام المرايه
نورهان: دا أيوب معقولة بدقنه دي والهالات السودا الل تحت عينيك الحمرا دي زي المدمنين وشعرك اللي مخليك زي الانسان القديم فوق لنفسك يا أيوب فووق.
بتمشي وتسيبه واقف قدام المراية بيمشي ايده علي دقنه..
ايووووووووب استني والنبي هاحلق لك
كانت انجي بتجري وراه وماسكه ماكنة الحلاقة
ايوب: لاااا المرة اللي فاتت شيلتي حاجب من حواجبي مُستحيــــــل
انجي قربت منه:
دا مُستحيل قلبي يميل وأحب يوم غيرك أو افكر فيه ابدًا ابدًا
لف ايده علي وسطها فكملت وبدأت تحلق دقنه:
اهو ده اللي مش مُمكن أبدًا او افكر فيه ابدًا أبدًا
فاق من شروده وابتسم وهو بيبُص في المرايه
♕ـــــــــــــــــــــــــــــــــــــــــــــــــــــــــــــ♕
بيكون موسي مشغل الكاست وبيغني معاه
قوم نادي عالصعيدي وابن اخوك البورسعيدي والشباب الاسكندراني اللمة دي لمة رجال
الا صحيح هو الأستاذ حسين الجسمي ما جابش سيرة القهراوية ليه ولا احنا قعر الحلة!
بيشاور ليه اتنين فابيقف لهم واحد بيركب جمبه وواحد ورا وبيقولوا له علي المكان اللي عاوزين يروحوا ليه
بيتكلم الأول فيهم:
تخيل كيلو الفراخ بــ 70 جنيه معقوله عشان أجيب فرخة تكفي بيتي عاوز 140 جنيه ده غير الرز والخضار والذي منه
بيرد عليه التاني:
ولا كرتونة البيض ب 130 جنيه تقولش الفرخة بيضاها في التكييف
بيضحك موسي:
الحمد لله احنا لا بناكل فراخ ولا بيض كفاية علينا الكولاسرين اللي في رجليها طب انت عارف كيلو الرجلين بكام دا ب30 جنيه يا مؤمن غليت خالص
بيتكلم اللي قاعد جمبه:
اتبطرنا علي عيشة ابو علاء وجالنا اللي يكدرنا
موسي بيتنهد:
منه لله هو حاسس بإيه احنا جوعنا دا كدر ابونا
بيرد عليه وهو بيطلع سجارة:
طب اركن لي علي جمب
موسي:
بس مش هنا المكان!
بيطلع الاتنين نضارات سودا يلبسوها ولاسلكي
موسي بخوف وبيبلع ريقه:
بس احنا مستحملين معاه عشان بلدنا أمانة في ايدينا نعليها مدام عايشين فيها ونحافظ عليها
بيفضلوا ساكتين.
بيبُص لهم تاني:
هو يا حبيبي مضغوط برده دا احنا 140 مليون برده هيلاحق علي مين ولا مين يعني
بيفضلوا ساكتين
بيرفع ايده للسما:
الهي ربنا يخليه دا مستحمل بلاوي ربنا يكون في عونه ايه….. ايه الدنيــــــــا
بينزل اللي راكب ورا وبيمسك موسي من قميصه:
انزلي ياض
بيفتح موسي باب التاكسي وبينزل وبيبلع ريقه بخوف:
ايوه يا باشا تحيا مصر ويحيا ريسنا وتاج راسنا
بيطلع من جيبه دفتر وبيكتب فيه وبيقطع منه ورقة وبيديها لـــموسي
موسي: ايه دي يا باشا!
بيرد عليه وهو بيهز فيه رايح جاي:
دي قرصة ودن عشان تتربي تروح القسم تستلم التاكسي بتاعك وتدفع الغرامة
موسي بيمسك ايديه وبيبوسها: سامحني والنبي يا باشا والنبي
بيشد ايده منه وبيزقه وبيركب التاكسي وموسي بيجري وراه بس بيمشي
بيقعد موسي علي الرصيف وبيحط ايده علي دماغه:
ما عمرك ساكت كان لازم تتكلم دلوقتي ااااه يابا علي المرمطة اللي بتمرمطها في الدنيا بتلسعني علي قفايا وتديني شلاليت وياريتها شلاليت عادية دي كمان تحت الحزام
بيشوف الغرامة اللي مكتوبة في الورقة
موسي:
هاجيب الف جنيه منين يا ربي وميعاد القسط بكره وناقص ألفين جنيه لا اله الا أنت سبحانك هو الغلبان مايعرفش ياكل عيش في الدنيا يارب
بيطلع تليفون نوكيا زراير من جيبه وبيرن علي حد
رصيدك خلص بس الكلام لسه ماخلصش كمل المكالمة لمدة تلات دقايق
موسي: اخلصي يا حاجة يارب ما يفتح عليا ااااه فتحت يابن المقشفة! اخص علي دي تربية
♕ـــــــــــــــــــــــــــــــــــــــــــــــــــــــ♕
وفي اوضة في جنينة القصر بتدخل نورهان وبيظهر ابوها اللي نايم علي السرير وأمها اللي قاعدة تحت رجله
بتبوس راسه:
عامل ايه ياحجيجة
بيكح وهو باين عليه التعب:
بخير يابنتي نحمده علي كل حال ونشكر فضله مش هاتريحيني بقا نفسي اشوفك عروسة قبل ما أموت
بتبتسم وبتبوس ايده:
بعد الشر عنك يا حبيبي وبعدين انت زهقت مني ولا ايه يا ابو نور
بيطبطب عليها وبيتشعلق فيها وبيقوم يتعدل فبتحط ورا ضهره المخده
ــ عاوز اتطمن عليكي وأشيل ولادك يا حبيبتي
بتدخل امها بصينية الأكل وبتضحك:
في القريب العاجل بإذن الله علي الله التساهيل
بتاخد نورهان منها الصينية:
هاتي اما اكله يا ماما ربنا يهديكي
♕ــــــــــــــــــــــــــــــــــــــــــــــــــــــــ♕
بتدخل بنت بيت قديم وهي تعبانة بتطلع السلالم وهي بتنهج وبتدخل البيت
*ماما يا ماما حُطيلي والنبي الغدا هاموت من التعب شغل الكوافير النهاردة هد حيلي
بترد عليها أمها:
ولحد امتي يا بنتي الشقا ده يا شهد خالتك ام محمد الخاطبة جايبه لك عريس زي الفل وشقته جاهزة ومقتدر وهايعيشك عيشة فُل ويعوضك عن الشقا ده
شهد وهي بتشد كرسي وبترفع رجلها عليه: يووووه يا ماما مش هانخلص من الكلام ده
*يا بت سيبك من الواد الكحيان موسي ده لو استنتيه يكون نفسه هاتشيبي جمبه
شهد: لا اله الا الله هاتي الغدا جعانـــــــــــــــة جـــعـانـة يا ولية
*طيب ما تزعقيش ايه هاتكليني!
♕ــــــــــــــــــــــــــــــــــــــــــــــــــــــ♕
موسي: عارف يا واد يا حماصة انت اللي طلعت بيك من الدنيا هادفع بس الغرامة وهارجع لك الفلوس في أقرب وقت
حماصة: عيب يا صحبي الكلام ده بس في حاجة غريبة ازاي ياخدوا التاكس ويمشوا كده
موسي: يلا كنت هاروح في كلبوش وبيقولوا دي قرصة ودن اديني هاروح القسم
حماصة: طب تعالي يلا هاروح معاك
بيمشوا لحد ما يدخلوا القسم وبيدخلوا للظابط
موسي: باشا مصر انا التاكسي بتاعي اتاخد وادوني الورقة دي وقالولي اجي ادفع الغرامة واستلمه الالف جنيه اهو
بيمسك الظابط الورقة وهو مستغرب:
ايه ده!
موسي بيبُص لحماصة بقلق:
الوصل
الظابط: فهمني كده ايه اللي حصل
بيحكي له موسي اللي حصل…
الظابط: يعني ماتاخدش في لجنة مثلا يؤسفني اقولك ان احنا مش عندنا حاجة ومافيش ظابط هايعمل كده ربنا يعوض عليك..
بيبُص له موسي بصدمة و…
- يتبع الفصل التالي اضغط على (رواية شيزوفرينيا احاسيس) اسم الرواية