رواية ميراث نور كاملة بقلم لينا بسيوني عبر مدونة دليل الروايات
رواية ميراث نور الفصل السادس و الثلاثون 36
” ماتش كورة”
” نور ”
روح الحيوان فضلت مسيطرة عليا , كنت مجرد تابع ومتفرج فى الخلفية مكنتش قادر اوقفه ولا حتى اوجهه عشان ارجع للكهف ولنصير .
الحيوان فضل يجرى فى الصحرا لحد ما وصل لغابة , فضل يتوغل فيها ويدور على اى فريسه يصطادها , لحد ما لقى غزاله , اصطادها وبدء ينهش فيها .
فجأة شفت سهم بيرشق فى رجل الحيوان !! وشوفت شاب مفتول العضلات واقف فى وسط الغابة وفى أيده قوس !!
الحيوان جرى على الشاب اللى اطلق السهم وبدأ يهاجمه بس الشاب كان قوى جدا وقدر يتغلب على الحيوان بعد ما صوب عليه سهم تانى صاب رجله التانيه .
فجأة الحيوان غاب عن الوعى , وفضلت انا موجود وفايق .
شوفته وهو بياخد الحيوان للكوخ بتاعه و بيحطه فى قفص , شوية والحيوان فاق وحاول يخرج من القفص , بس الشاب رمى عليه مخدر تانى بتعزيمة .
الحيوان هدى وروحه بدأت تضعف, فالشاب قرب من الحيوان وحط ايده عليه , أتفاجئت لما حسيت أن روحى بتسيطر تانى على الحيوان فصرخت وأستنجدت بالشاب وقولتله :
– أنقدنى ارجوك !!
الشاب شال أيده من فوق الحيوان وبص يمين وشمال , فأندهشت انه سمعنى !!
حط أيده تانى فقلتله :
– أنت سامعنى !!؟
بص بتفحص للحيوان وقال بأستغراب :
– اها … أنت مين !!؟ وايه اللى دخلك جسم الحيوان ؟!
مصدقتش نفسى وبكيت من الفرحة وانا بقول :
– أنا أسمى نور ناير و روحى محبوسه فى الحيوان دا!!
قالى وهو مندهش :
– ومين اللى حبسك ؟!!
قولتله :
– ساحره رمت عليا سم متعزم عليه , كان قصدها تقتلنى وانا متشكل فى شكل الحيوان , بس روحى اتحبست فيه.
قطع كلامى وقال :
– متشكل فى شكل الحيوان أزاى !!؟ أنت بنى أدم ولا جنى !!؟
قولتله :
– انا بنى آدم , بس بتحول لاى حيوان بفكر فيه عن طريق قميص سحرى.
قالى :
– قميص سحرى !!!!
قولتله :
– الموضوع كبير أوى .
قالى :
– وأيه اللى يضمنلى أنك بتقول الحقيقة , مش ممكن تكون مثلا ساحر شرير وحد لعنك.
قولتله :
– لالالالا أبدا انا كنت بحارب مع الجن المؤمن فى حرب الميجوانا.
قالى :
– مع أبن القاف ؟!!!
قولتله وانا مش مصدق نفسى من الفرحة :
– أنت تعرف أبن القاف !!؟
قالى :
– ومين فى عالم الجن مايعرفش القائد … حرب الميجوانا حديث عالم الجن.
أنا كنت هنضم للحرب بس للأسف مالحقتش القلعة قبل ماتنهار.
قولتله :
– أنا صديق أبن القاف.
قالى وهو بيهز رأسه :
– هنشوف … هنشوف.
قولتله :
– أنت تقدر تعالجنى !!؟
قالى :
– مش متأكد , بس حتى لو متأكد مش هعالجك الا لما أتأكد مية فى المية أنك بنى أدم لانى مش شايف قرينك.
شد الاسهم اللى راشقه فى رجل الحيوان , وحط على الجرح خليط أخضر وهو بيقول :
– على العموم انا هوصل لابن القاف بمعرفتى وأتأكد منه !!
شال أيده من عليا , شوية والحيوان بدأ يفوق ويسيطر تانى , ورجعت تانى فى الخلفية .
الشاب راح ناحية باب الكوخ , وخد قوسه على كتفه وقالى قبل مايمشى :
– مش هتأخر عليك !!
مصدقتش نفسى لما شوفته بعد شوية راجع وجنبه أبن القاف ونصير واللى أول ماشافنى جرى عليا وهو بيدمع من الفرحه , وقالى:
– نينوووووووووووووووووووووووووووووووووووووووو
أول ماقرب من القفص , الحيوان هجم عليه , فنصير رجع لورا ولف علشان يلمس الحيوان وسمعته بيقول :
– نينو !!
قولتله :
– نصير !!!
بس ماسمعنيش !!
فقالى :
– لو كنت نينو أدينى علامة , فما أديتوش علامة لان الحيوان هو اللى كان مسيطر.
بص بأستغراب , وقال للشاب بشك:
– أنت قلتلنا أنك عرفت تتواصل معاه!!! أزاى اذا كان انا نفسى مش عارف أتواصل معاه؟!!!
الشاب قرب عليا,حط أيده على جسمى وقالى :
– قول أى حاجه؟ !!
قولتله :
– قول لنصير أنه أنا اللى فى الحيوان , بأمارة الهبهاب النازف اللى أكله !
الشاب قال :
– بيقولك أنه نور بأمارة الهباب النازف اللى….
نصير قطع كلام الشاب وقاله :
– هوه … هوه.
أبن القاف قالى من بعيد :
– حمد الله على السلامة يانور كان نفسى أحضنك بس أنت شايف الوضع .
نصير كان بيبص على الشاب فى تفحص وأستغراب وقاله :
– أنت أنس ولا جن ؟!!
الشاب قاله وهو مبتسم :
– أشمعنى !!؟
قاله :
– أصلى مش شايف ليك قرين !!
قاله :
– أنا نص بنى آدم ونص جن !!
نصير بص عليه بتفحص أكتر وقاله :
– أبوك جن وأمك بنى أدمه يعنى ؟!!
قاله :
– لا العكس أبويا بنى أدم وأمى جنية!!
نصير قاله :
– أبوك مين من الانس ؟!!
الشاب قاله :
– معرفش حاجة عن أبويا , كل اللى أعرفه أنه كان ساحر !!
قاله :
– طيب وأمك !!؟!!
حسيت الشاب بدأ يتضايق من أسئلة نصير الكتيره فقاله بنفاذ صبر:
– أمى الله يرحمها !!
فنصير قاله :
– أنت عندك كام سنة ؟!!
الشاب قاله :
– خير فيه حاجه ؟!! أصلك بتسأل أسئلة شخصية كتيره !!
نصير تجاهل سؤاله وسأل سؤال تانى !! وقاله :
– فيه نداهه ندهتك وانت صغير !!؟
قاله بعصبية :
– ممكن تفهمنى ..أيه لازمة الاسئلة دى ؟!!
نصير قاله :
– جاوب عليا بس أرجوك !!
الشاب قاله وهو جايب أخره :
– عمرى الحقيقى 11 سنة ومفيش نداهه ندهتنى وانا صغير .
أتصدمت لما عرفت نصير بيفكر فى أيه , وبصيت على الشاب وركزت فى ملامحه , معقوله يكون أبن الجنية اللى أتشكلت على شكل فردوس !!
معقولة يكون أبنى !!!
نصير قاله :
– معاك صورة أمك وهيا متشكلة أنسية !!!
الشاب أنفعل على نصير ورفع القوس وشد السهم فى أقل من ثانيه ووجه ناحية نصير وقاله :
– أنت عايز أيه !!؟
نصير قاله بهدوء :
– أهدى … اهدى خالص ،أرجوك جاوب على أسئلتى ,
أمك أسمها أيه ؟!!
الشاب قال لنصير وهو شادد وتر القوس وبيهدده:
– فيه أيه ياجنى!!! بتسأل عن أمى ليه !!؟
نصير قاله :
– أمك أسمها فردوس ؟!!
الشاب نزل القوس وقاله :
– عرفت أسم أمى منين ؟!!
أتصدمت زى نصير بالضبط , نصير فضل متنح فيه وقاله :
– أمك حجبتك ؟!!
الشاب حسيته بيتوتر وبيقوله :
– أنت عرفت منين أنى أمى حجبانى , أنت مين ياجنى !!؟
قاله :
– علشان لو مكنتش حاجباك كنت هحس بيك من اول يوم اتولدت فيه , وكانت نيللى عدوة أبوك هتناديلك بالنداهه !!
قاله بأندهاش :
– أنت تعرف أبويا مين ؟!!
قاله :
– أبوك يبقى نور ناير .. اللى روحه محبوسة جوه الحيوان دا
الشاب رمى قوسه على الارض من الصدمة , وفضل يبص على أبن القاف اللى كان مندهش زيه بالضبط , ويبص عليا وعلى نصير .
فضل فترة بيستوعب الخبر اللى رماه عليه نصير، وبعدين قال :
– لا أنت ممكن تكون بتقولى كده علشان أعالجه !!
أبن القاف ونصير قالوا بلهفة وبصوت واحد :
– أيه ده هو أنت ممكن تعالجه ؟!!
قالهم :
– أقدر أفك التعزيمة اللى عليها , بس السموم هيبقى صعب أعالجها , لسه مكملتش دراستى فيها.
نصير اتنطط من الفرحة وقال :
– الحمد لله … على الاقل معانا نص العلاج !!
الشاب قرب عليا وحط أيده على الحيوان , فسمعنى وأنا بعيط من الفرحة فقالى :
– أنت أبويا فعلا !!؟
قولتله :
– بنسبه كبيره انا أبوك.
قالى :
– أنا هبذل قصارى جهدى علشان أعالجك وأتأكد بنفسى .
وقال بصوت عالى :
– بس لو بتخدعونى هقتلكم كلكم حتى أنت يا أبن القاف.
نصير قال :
– عنيف أوى !!
أبن القاف هز رأسه وقاله :
– هو انا مش متأكد اذا كنت أبنه أولا لآ …. بس واثق أن نصير ونور مش من المخادعين .
فقال :
– هعمل تحليل للسموم اللى على جلده وأحاول أعمل تركيبة علاجية ليها , بس الصراحه انا أول مره أعمل حاجه زى كده , ومش ضامن النتيجة فالموضوع هيبقى فيه مخاطرة كبيره , أما بالنسبة للتعزيمة فأنا واثق أنى أقدر أفكها .
مكنتش مصدق نفسى ونصير جرى وحضن الشاب وباسه وقاله :
– أنت أسمك أيه !!؟
قاله وهو مبتسم :
– ماهر.
قاله :
– أنا واثق ياماهر أنك أبن نور ناير .
قاله :
– هنشوف !!
نصير بصلى وقالى :
– أنا هروح أفرحهم فى الكهف يانينو , ماشى !!؟
فمردتش عليه ولا أديتله اى اشارة.
فقال :
– هعتبرك قلت ماشى !!
نصير قال لابن القاف , خد بالك منه على ما أجى .
أختفى نصير !!
ماهر جاب مقص صغير وأناء من الخشب ,قرب على الحيوان , وقص خصل من شعره اللى ملزق فى بعضه من السم , وحطها فى الاناء..
أبن القاف قعد قدام القفص اللى محبوس فيه وقالى :
– وحشتنى ياتنين !!
وأتلفت يمينه وشماله وقال وهو بيهمس :
– بس أيه الشقاوة دى… هو أنت صحيح أتجوزت جنية ؟!!
مردتش عليه والحيوان زأر بصوت عالى، فقاله :
– خلاص ياعم هتفضحنا , أبنك دمه حامى أوى ولو عرف أنى بتكلم عن أمه ,هيرفع عليا القوس.
أتفاجئنا بنصير رجع بسرعه وفى أيده قارورة زجاج ونادى على ماهر وقال :
– خلاص يا مارووو.
ماهر قاله :
– مارو !!
قاله :
بدلعك يا مارو ياوش السعد … أنا معايا نص العلاج التانى .. معايا العلاج من السموم…. وأيه من المصدر …. من ناير جدكم نفسه.
كلنا بصينا عليه بأستغراب فقال :
– لا ده موضوع كبير أوى بطلته تبقى بنتك نوشه يانينو …
وبص لماهر وقاله :
– اللى هى أختك يامارو.
ماهر قاله بأندهاش :
– أيه ده هو أنا كمان ليا أخت ؟!!
قاله :
– ليك عيلة كاملة مستناياكم تتجمعوا تانى.
نصير مد أيده وأداله القارورة , خدها منه وقرب عليا ,
لمسنى و غمض عينيه وتمتم بكلمات مش مفهومة , بعدها فتح عينه فبقت مشقوقة بالطول زى الجن … غمض عينه تانى وفتحها فرجعت طبيعية.
شال أيده من عليا وقال :
– أنا قريت وعرفت التعزيمة والطلسم اللى اترمى عليه من الساحرة , هحتاج ساعه بالظبط أكتبها فى ورقة و أفك طلاسمها .
قعد على مكتب فى اخر الكوخ الكبير وبدء يكتب التعزيمة فى ورقه وخد نقطة من السائل اللى فى القارورة اللى ادهاله نصير ورماها على الورقة , فطلع بخار لونه غريب .
مسك الورقه والقارورة و قرب عليا وهو بيتمتم من الورقة التعزيمات اللى بتفك الطلسم.
نبرت صوته عليت وهو بيصب عليا السائل الازرق اللى فى القارورة لحد أخر قطرة …
وصبرنا شوية .
حسيت أنى برجع أسيطر تانى على روح الحيوان تدريجى ,حسيت روحه بتتكتف لحد روحى ما رجعت سيطرت تماما , زأرت بصوت عالى و سيطرت على الحيوان بس ما أتحولتش وفضلت حيوان زى مانا !!
كلنا أستغربنا وماهر قال :
– أزاى !!! المفروض اللعنه تتفك !!
أبن القاف قال :
– يمكن التركيبة العلاجية اللى جابها نصير مش شغاله !!!
نصير ماردش عليهم علشان كان بيفكر , قرب عليا فى القفص وقالى :
– حاول تلف لفه كامله يانور !!
لفيت لفه كامله وفكرت فى نفسى وانا بنى أدم …
القميص ظهر على جسم الحيوان.
الشعر اللى جسمى بدأ يقع لحد ماظهر جلد الحيوان .. عضمى بدأ يتكسر ويكش , حوافرى دخلت فى جلدى وخرج مكانها أيدى .
نابينى رجعوا يصغروا ووشى بدأ يظهر … جسمى أنهك من التحول و رجعت هيئتى البشرية تانى وانا لابس القميص وبترعش على الارض .
نصير وأبن القاف هللوا وحضنوا بعض , نصير جرى على القفص علشان يخرجنى منه , بس أتفاجأ بماهر رافع القوس وبيهدده وبيقوله :
– لو فتحت القفص هرمى السهم فى قلبك !!
نصير بص ليه , فماهر قاله :
– مش هيطلع من القفص الا لما أتأكد انه أبويا وانكم مكنتوش بتخدعونى .
نصير أبتسم ورفع أيده وقاله :
– حقك يامارو … حقك يابن الغالى !! بس قرين نور ظهر اهو تقدر تسأله على كل حاجة.
ماهر قاله :
– انا سألت قرينه على كل حاجة بس مضمنش لازم اتأكد بنفسي انه أبويا ..
قرب عليا وهو ماسك القوس بأيد واحده وموجهه ناحية أبن القاف ونصير ..
مد بأيده التانيه فى جيبه وطلع منديل ورق وقالى :
– مد صوباعك من القفص !!
مديت صوباعى , فشكنى بسرعه فى أيدى , وخد نقطة من دمى على المنديل , شك صوباعه هو كمان وحط نقطة من دمه على نفس المنديل , وتمتم بكلمات .. ورمى المنديل فى نار الدفايه اللى فى الكوخ .
المنديل وقع فى النار.. ومتحرقش !!
رمى القوس من أيده ,بصلى وعينه بتدمع وقال :
– ابويا !!
حط أيده فى جيبه بسرعه ,طلع مفاتيح القفص و فتحه بسرعه ,دخل جواه وحضنى جامد وهو بيعيط وبيقول :
– أنا مش مصدق نفسى … انا ليا أب وعيلة من البشر !!
حضنته وقولتله وانا ببكى :
– أنا اللى مش مصدق نفسى أنى ليا عيل بغل زيك .
ضحك وهو بيعيط وقالى :
– دمك خفيف يا أبويا !!
نصير قرب علينا وقال :
– أيه يامارو!!؟ مش هحضن أنا كمان !!
ماهر مسح دموعه وقاله وهو مبتسم :
– أها تقدر تحضن دلوقتى.
نصير فتح دراعاته وقالى :
– نينو التنين رجع تانى !!
حضنى جامد وهو بيبكى من الفرحة …
أبن القاف كان واقف ورا وهو متأثر .. فقولتله :
– أبن القاف !! مش هتيجى تحضنى ولا أيه !!؟
قالى وهو مبتسم:
– لا هستنا لما تطلع من القفص !!
قلت لنصير اللى لسه بيحضن فيا :
– كفاية يانصه .. نكمل أحضان بره القفص طيب .
طلعت بره القفص ووقفت على رجلى ورفعت رأسى لفوق .
رجعنا كلنا على الكهف بتاعى أنا , نصير , أبن القاف و أبنى ماهر !!
أول ما دخلت الكهف , سندس جريت عليا وحضنتنى جامد وهى بتبكى وفضلت متبته فيا وماردتش تسيبنى .
قولتلها :
– وحشتينى أوى ياسندس !!
قالتلى :
– ودموعها مغرقه عينيها .. ألف شكر وحمد ليك يارب أنك رجعتلى بالسلامه , روحى كان غايبه ورجعت تانى .
نورا قربت عليا بالكرسى المتحرك وقالتى وهى بتبكى :
– أنا أسفه يابابا.
حضنتها وقولتلها :
– نصير حكالى على اللى عملتيه .. انتى أنقذتينى , بس ماتعملهاش تانى.
قالتلى وهي بتبكى :
– وعد ما أزعلكش منى تانى … انا حتى مارضتيش ألبس الحذاء تانى الا لما ترجع بالسلامة .
أتفاجئا كلنا بحنوش داخل الكهف وفى أيده شنطة السوق!!!
رمى الشنطة على الارض وجرى عليا حضنى وهو بيقول :
– نييييييينوووووووووووووو
فضل يحضن ويبوس فيا وقال لسندس :
– مالقتش كزبرة خضرا , جبتلك بقدونس !! وحشتنى يانينو !!
شوية وكلهم خدوا بالهم من الشاب اللى واقف جمبى.
فقلت لنورا ولسندس وانا بشاور على ابن القاف :
– أعرفكم بأبن القاف صديقى ..
وقربت ناحية ماهر وقولتلهم :
– اما ده بقى يبقى ماهر … الشخص اللى عالجنى من اللعنه وانقذ حياتى….. وابنى !!!
نورا قالت وهيا فرحانة :
– أيه ده هو انا ليا أخ !!؟
فماهر قالها :
– أنا برده فرحان زيك كده ..
فقالتله وهو بتغمزله :
– بتعرف فى السحر ؟!!
ابتسم وقالها :
– أها..
قالتله :
– قشطه مع بعض بقى !!
وبصيت على سندس اللى كانت فاتحه بوقها ومش فاهمه حاجه وقولتلها :
– أبنى من الجنية اللى عاشت معاكى على انها فردوس ياسندس.
أتفاجئت بماهر بيقول بأستغراب :
– سندس !!!
قلت لماهر بأندهاش :
– أيه ده هو أنت تعرف سندس ؟!!
قالى :
– أمى دايما كانت بتحكيلى على صديقة ليها أسمها سندس , قالتلى أنها أطيب بنى أدمه قابلتها فى حياتها , تقريبا مكانتش بتحكى غير عليها !!
أزيك ياخالتى سندس !!
سندس بصت على نورا بخيبة أمل وقالت :
– الجنية عرفت تربى !! بس هو ازاى بغل كدا يا سيدى مش المفروض يبقى عنده تقريبا 10 سنين ؟!
ماهر ضحك وقالها :
– ما هو انا عشان نص جنى بكبر ضعف الانسان العادى .
بصتله وقالت :
– نورت يابن الغالى والغالية , أمك كانت جنية اه , بس طيبة وبنت حلال وانا حبتها لله فى لله … ربنا يسترك يابنى وينصرك دايما , زى مانصرتنا ورجعت سيدى لينا تانى .
قولتلها :
– أنا لسه ما أنتصرتش ياسندس ومش ههدى ألا لما أتنقم من نيللى وأخلص العالم من شر…..
حنوش قطع كلامى وقال :
ممكن نأجل الكلام عن الحرب دلوقتى .. أرجوكم ماتبوظوش لم الشمل , تعالوا نتعرف على بعض كلنا فى ماتش كوره .
بصينا ليه كلنا بأستغراب وقولنا فى صوت واحد :
– ماتش كوره !!
قالنا :
– أها كفاية أم دراما بقى بقالنا كتير أوى مافرحناش , أحنا هنقسم الفرق كالاتى .
أنا ونصير وأبن القاف فى فريق .
وأنت يانينو ونورا وأبنك الجديد ده !! فى فريق .
وسندس هتحكم وتجيبلنا الكوره لما تتشاط بعيد !!
حسيتهم كلهم أتحمسوا للفكرة حتى سندس!!
نورا قالت بمكر :
– بس أنا مش هينفع ألعب كده !!
وبصت على نفسها وهيا قاعدة على الكرسى , فروحت ناحية الاوضة ورجعت بالحذاء ونزلت على الارض ولبستهولها فى رجليها وانا بقولها :
– نجرى ونلعب بس .. انما نسافر بالزمن , ونطلع ناس منعرفهمش من البير لا … فاهمه !!؟
حضنتنى جامد وقالت :
– أبدا أبدا.
قامت من على الكرسى وقسمنا نفسنا فرقتين ..
حنوش كان لابس فانلة كريستيانو رونالدوا واقف جمب نصير وأبن القاف، واللى كانوا لابسين زى لاعيبة الكورة ..
سندس كانت معلقة صفاره فى رقبتها وواخده الكورة تحت دراعها..
مارو وقف حارس مرمى.
ونوشا كانت بتتنط و بتسخن فى الملعب !!
أنا وقفت فى نص الملعب ولفيت لفه كامله بالقميص وتخيلت نفسى..
ميسى !
- يتبع الفصل التالي اضغط على ( رواية ميراث نور ) اسم الرواية