رواية انت عشقي وقسوتي (كاملة جميع الفصول) حصريا عبر دليل الروايات بقلم دينا قدري
رواية انت عشقي وقسوتي الفصل السادس عشر 16
- بارت ١٦
خرجت عاليا فوجدتها متجمدة بمكانها شاردة بملامح شاحبة غريبة
عاليا .. ده ايه ده .. مالك فى ايه
نظرت لها بصمت ودموع مع عيون مصدومة
عاليا .. فى ايه يا ملك بتعيطى ليه .. حصل ايه قلقتينى
لم تقوى على الكلام .. بل و لم تستطع فعل شئ سوى اعطائها الورقة بيدها دون اى كلام
عاليا باستغراب .. ايه الورقة دى .. ما تقولى حاجة يا ملك
امسكت الورقة من يدها برعب لتقرأ ما بها .. حين خرت ساقطة بالارض غير مصدقة ما يحدث ..
شعرت بانهيار قواها وانفلات اعصابها حين قرأت الرسالة التى تركها احمد لها قبل مغادرته ..
(( انا اسف يا عاليا .. حقيقى اسف مش قادر اكمل اكتر من كدة .. والله انا حاولت .. حاولت كتير اكون البطل اللى انتى عايزاه واحقق رغبة امى فى انى اكون امانك وسندك .. بس فعلا مش قادر حاسس انى بزق فى حيطة .. ولو كملت معاكى هبقى بظلمك وبعذبك مش بعوضك عن اللى شوفتيه فى حياتك زى ما ماما بتقول
صدقينى انتى غالية عندى اوى .. انا مش ناسي ابدا اننا كنا اصحاب وقريبين من بعض زمان .. عشان كدة لما ماما قالتلى اخطبك انا مترددتش لحظة ووافقت .. كان نفسي اعوضك عن فراق اهلك .. واكون ضهرك وحمايتك وسبب سعادتك فى الدنيا .. بس للاسف مقدرتش اكون اد المسئولية دى .. حاولت كتير انفذ كلام امى معرفتش
قلت يمكن لما ارجع من السفر وضعنا يتغير .. لكن للاسف بقى اسوأ من الاول مش شايفك غير اختى وصاحبتى بتاعة زمان .. مش قادر اشوفك زوجة وحبيبة
يمكن كلامى يجرحك .. وامتناعى عن جوازنا يعذبك ويحرجك .. بس صدقينى دلوقتى احسن من بعدين .. واحنا لسة عالبر احسن ميت مرة من لما نتجوز ونجيب اطفال ملهمش ذنب
عشان كدة انا هسافر وهبعد عنك خالص .. عشان معذبكيش بوجودى وتقدرى تنسينى وتعيشى حياتك .. هكمل الدكتوراه وهعيش برة مش هرجع مصر تانى ..
وبتمنالك السعادة بجد مع انسان يقدرك ويحبك ويكون هو عوضك وسعادتك فى الدنيا
اخوكى .. احمد ))
انعقد لسانها وظلت صامتة لفترة فى ذهول تام وصدمة .. دموعها تتساقط تلقائيا لا تصدق ما قرأته عيناها
اخذت تضحك وتبكى بنفس الوقت .. هستيريا ضحك اصابتها لتنتهى ببكاء وصراخ لم تستطع كتمه بقلبها
عاليا بضحكات مٌرة متقطعة .. اخوكى هههه .. هو اللى انا قريته ده بجد .. يعنى ايه .. هههه يعنى كل شئ انتهى .. ببساطة كدة !!
ثم امسكت بيد ملك تهزها بعنف
عاليا .. انا بحلم صح .. ملك قوليلى ان ده كابوس وهصحى منه .. قوليلى ان اللى قرأته ده مش صح
لم تستطع الرد عليها ولكنها احتضنت يديها بقوة مشفقة كثيرا عليها
عاليا بتساؤل مصحوب بالذهول .. طب مقالش ليه من بدرى !! مصارحنيش ليه وسيبنا بعض بهدوء واحترام !! ليه انهاردة .. جاى يوم الفرح ويعمل كدة !! ليه بعد ما حضرنا كل حاجة وعزمنا الناس
ثم بدأت باللطم على وجهها حين تذكرت الناس والفضيحة التى قد حلت بها
عاليا بحرقة .. الناس .. الناس اللى عزمناهم هنقولهم ايه .. واهلى وقرايبى اللى جايين من البلد كل دول هيقولو عليا ايه .. عريسها سابها يوم فرحها وهرب .. طب ليه !!
عملت ايه يخليه يهرب .. اكيد شاف عليها حاجة
واخذت تبكى وتنتحب وتلطم على وجهها بهستيريا .. يا نهار اسود ومنيل .. هتفضح وسمعتى هتبقى فى الارض .. انا ضيعت خلاص .. منه لله حسبى الله ونعم الوكيل
هنا لم تستطع ملك السكوت اكثر من ذلك وهى ترى صديقتها تنهار امام عيونها فامسكت بيدها بقوة لتشد من اذرها
ملك .. ما تولع الناس .. ناس مين اللى بتفكرى فيهم .. فكرى فى نفسك انتى وازاى هتتخطى الموقف ده .. خليكى فى اللى انتى فيه ومتفكريش فى حد
اللى يفكر فيكى وحش ولا يتكلم عليكى نص كلمة يغور ولا يفرقلنا .. واهلك وقرايبك اللى بتتكلمى عليهم دول لو بيحبوكى بجد هيقفو جنبك ويقدرو موقفك .. هيحسو بيكى ومش هيزيدوها عليكى .. هيعرفو ان العيب عليه مش عليكى .. بطلى تجلدى نفسك على حاجة ملكيش ذنبا فيها
عاليا .. انا قلتلك من الاول انى مش مرتاحة .. وان مينفعش نكمل .. كنتى دايما بتدينى امل وتشجعينى .. كنتى بتقوليلى اكيد بيحبك وده اللى كان بيخلينى اكمل
ملك بأسف وندم شديد .. انا اسفة يا عاليا .. بجد اسفة اوى انا السبب .. بس كنت فاكراه بيحبك وعايزك خصوصا انه فضل معاكى كل ده .. معرفش انه ندل وجبان كدة
عاليا .. انا مش قاهرنى غير انه استنى لانهاردة .. ليه مسابنيش من بدرى .. قاصد يذلنى ويهيننى قدام الناس .. قاصد يفضحنى !!
ثم تذكرت شيئا .. عاليا بذهول .. وخالتو !! ازاى خالتو تقلل منى اوى كدة .. ازاى تدوس على كرامتى بالطريقة دى
ثم اندفعت لخارج الغرفة بغضب مجنون ضاربة بابها بعنف لتقف امام خالتها بعصبية شديدة وتضع رسالة احمد بيدها وعيونها لا تبشر بالخير ابدا
اندهشت سميحة من منظرها وحالتها المزرية تلك لا تفهم ماذا يحدث .. انتقلت ببصرها لملك متسائلة ولكن لم تجد حالها بافضل منها فعيونهم مليئة بالدموع وتبدو على ملامحهم الحسرة
امسكت بالورقة لتقرا ما بها حين التمعت عيونها بالدموع وارتسمت على وجهها ملامح الحرج والخذلان تشعر انها على وشك الموت حالا
عاليا بقسوة .. انتى ازاى تقللى منى ومن كرامتى اوى كدة .. بتجبرى ابنك على الجواز منى !! ليه مين قالك انى عايزاه ولا محتاجاه فى حياتى !! مين قالك انى عايزاه يعوضنى عن حاجة !!
سكتت سميحة وما زالت غير مدركة لما حدث
عاليا .. ابنك ده ولا كان يفرق معايا .. ولا عمرى حبيته ولا اتمنيته جوزى .. وافقت عليه عشانك انتى .. قلت انك ادرى بمصلحتى .. وكتير كنت عايزة اسيبه
ثم اكملت بضحكة ومرارة .. بس كنت فاكرة انى بكدة هكسر قلبه واجرحه .. وبدل ما اردلكم الجميل هأذيكم
كنت خايفة اطلع ناكرة للجميل وقليلة الاصل .. تقومى تطلعى انتى فى الاخر اللى جابراه عليا
سميحة ببكاء وضعف .. والله يا بنتى ما جبرته ولا ضغطت عليه حتى .. ولا عمرى قللت منك ادام اى حد .. انا بس اقترحت عليه .. كان نفسى اتطمن عليكى قبل ما اموت .. كان نفسي اسلمك لانسان يحميكى ويسعدك وابقى متطمنة عليكى فى تربتى معاه .. صدقينى يا حبيبتى كل اللى كان هاممنى مصلحتك
عاليا بسخرية .. مصلحتى !! مصلحتى مع ابنك !! اللى مكنش بيتكلم معايا كلمتين على بعض وعلطول بيبعد عنى !! اللى محستش معاه بحنية ولا حب ولا اى مشاعر من يوم خطوبتنا !! مصلحتى فى ايه عايزة افهم مع واحد عديم الاحساس
سميحة بضعف .. قلت للى واثقة فيه يابنتى .. والله لو كنت حسيت بس انه مش عايز مكنتش خطبتكم لبعض .. بس هو رحب بالفكرة وكان فرحان وانا افتكرت ساعتها انه بيحبك .. والله يابنتى والله ما حسيت للحظة انه مش عايزك او مجبور .. استحالة اعمل فيكى كدة صدقينى
كل اللى كان هاممنى انى اطمن عليكى وعلى مستقبلك
عاليا بمرارة .. مستقبلى !! ما خلاص ضاع .. مبقاش ليا مستقبل ابنك ضيعنى .. وفضحنى ودمر سمعتى .. هودى وشى فين من الناس .. هقولهم ايه لما يسألونى عريسك سابك يوم فرحك ليه .. والاتهامات اللى هشوفها فعيون كل اللى حواليا وانا حتى مش عارفة ارد عليهم
منه لله .. منه لله
حاولت سميحة احتضانها بحنان ولكنها منعتها بقوة قائلة بغضب
عاليا .. ابعدى عنى .. متلمسينيش .
ملك .. اهدى يا عاليا طنط ملهاش ذنب
عاليا .. ملهاش ذنب !! دى هيا السبب فى كل حاجة .. وابنها المحترم اللى مهانش عليه حتى ينهى الموضوع من بدرى شوية .. واستنى لاخر لحظة عشان يفضحنى ويذلنى
سميحة بحسرة .. حقك عليا يا حبيبتى انا اسفة .. وابنى ده انا هربيه .. اهدى انتى بس ومتفكريش فى حاجة
عاليا .. انا مش حبيبة حد .. ابعدى عنى وسيبينى فى حالى .. ثم اندفعت لحجرتها مرة اخرى تتبعها ملك محاولة تهدئتها
بعد فترة
ملك .. اهدى يا عاليا .. خلينا نفكر هنعمل ايه
عاليا بسخرية .. هنعمل ايه يعنى .. دلوقتى الناس تبدأ تيجى وتعرف واتفضح
واللى مش هييجى دلوقتى هنكلمه ونعتذرله وهتفضح برضو
ملك باصرار .. لا طبعا مش هنسيب ده يحصل .. خليكى هنا ثوانى
ثم خرجت لسميحة فوجدتها غارقة بالبكاء
جلست بجانبها تربت على كتفها قائلة بهدوء ..
ملك .. اهدى يا طنط .. خلاص اللى حصل حصل .. المهم دلوقتى نحاول ننقذ ما يمكن انقاذه ونتصرف بسرعة .. حضرتك قلتى حاجة لحد ولا لسة ؟!
سميحة من بين دموعها .. لا لسة .. هو انا عارفة هقول ايه ولا هورى وشى للناس ازاى بعد عملة ابنى السودا دى
والبيه كمان قافل موبايله
ملك .. مش لازم حد يعرف اللى حصل خالص .. حضرتك قولى ان هما متفقوش وقررو ينفصلو بهدوء .. وان ده قرارهم هما الاتنين ومتعرفيش اكتر من كدة
سميحة بحزن باكى .. ازاى بس ما هيسألو ازاى وليه وعلى اخر لحظة كدة ؟!
ملك .. هنقول ان هما رافضين يقولو اى اسباب وشافو ان ده الافضل بالنسبة لهم
ده الحل الوحيد عشان ميحصلش فضيحة زى ما عاليا بتقول .. ومحدش يتكلم عليها ويقول عريسها سابها والكلام اللى هيا خايفة منه ده
بدأت تقتنع بكلامها فأكملت ملك ..
لو فعلا بتحبى عاليا وخايفة على سمعتها ومستقبلها لازم تقولى كدة .. ومتلوميش على احمد خالص قدامهم عشان ميفهموش حاجة .. متعرفيش الحقيقة لحد مهما كان قريب منك ارجوكى عشان سمعة عاليا
سميحة .. ربنا يعلم انا بخاف عليها ازاى وكل اللى عملته كان عشانها .. حاضر يا بنتى فعلا مفيش ادامنا غير كدة
ملك .. تمام .. حاجة كمان بعد اذنك .. كنت عايزة اخد عاليا تعد معايا يومين ترتاح و تهدى اعصابها .. حضرتك شايفة حالتها عاملة ازاى .. مش هتقدر تشوف حد ولا حمل انها تسمع اى كلمة .. فاحسنلها تبعد عن كل حاجة دلوقتى ومتشوفش حد خالص لحد ما تهدى
سميحة .. مينفعش يا حبيبتى نتقل عليكم كدة وبعدين هيا عمرها ما باتت برة قلبى هيبقى واكلنى عليها .. انا هسيبها فى اوضتها مش هخليها تقابل حد ولا انا حتى هدخلها عشان مضايقهاش بوجودى
ملك .. متقلقيش عليها يا طنط انا وماما اعدين لوحدنا بابا مسافر يعنى هتبقى براحتها ومش هتتقل عليا ولا حاجة دى اختى وماما كمان بتحبها اوى
وبعدين مهما فضلت فى اوضتها هتسمع الناس اللى هييجو وتسمع كلامهم وتنهار اكتر
فاحسن تبعد عن كل حاجة
سميحة باستسلام .. خلاص لو هيا عايزة كدة وده هيريحها معنديش مانع
ملك .. شكرا يا طنط .. عن اذنك
عادت لعاليا وجدتها منهارة بالبكاء .. احتضنتها بحنان حزنا عليها قائلة .. اهدى يا حبيبتى .. اهدى عشان خاطرى .. اكيد اللى حصل ده فى مصلحتك .. انتى نفسك مكنتيش مبسوطة بالجوازة دى وعلطول قلقانة .. الحمدلله انها جت من عند ربنا
عاليا ببكاء .. مش زعلانة عليه .. يغور فى داهية انا بكرهه بكرهه .. انا زعلانة على نفسي .. سمعتى اللى دمرها وقلبى اللى وجعه بعملته ديه .. دمر كل حاجة حلوة كانت ما بيننا .. كرهنى فيه بجد وفضحنى
ملك مطمئنة اياها .. مفيش فضيحة ولا حاجة .. محدش هيعرف حاجة .
عاليا بدهشة .. ازاى .. والناس !!
ملك بعجلة .. طب قومى بس اغسلى وشك وغيرى هدومك وفى الطريق هفهمك كل حاجة
عاليا باستغراب .. هنروح فين ؟
ملك .. هتيجى معايا .. مش هسيبك هنا .. لازم تبعدى عن كل حاجة .. يلا وفى الطريق نتكلم
انا مستنياكى برة
خرجت لتتصل بوالدتها هاتفيا
ملك .. ماما انا جاية وجايبة عاليا معايا البيت
ثريا باندهاش .. بيت ايه !! والفرح ؟!
ملك .. مفيش فرح يا ماما .. كل حاجة اتلغت
ثريا باندهاش اكبر .. اتلغت !! انتى بتهزرى اتلغت ازاى يعنى ايه اللى حصل ؟
ملك بحزن.. معرفش عاليا بتقولى قررو ينفصلو فجأة وده الافضل ليهم .. المهم انا هجيبها تعد معايا يومين لان نفسيتها تعبانة خالص ومش عايزة تشوف حد
ثريا .. لا حول ولا قوة الا بالله .. طبعا لازم تكون حزينة .. ماشي يا حبيبتى اطلعو عالبيت وانا كدة كدة كنت فى مشوار وهطلع على خالتك عشان تعدو براحتكم
ملك .. ماشي .. بس بعد اذنك لما ترجعى متتكلميش معاها فى حاجة خالص . ولا تجيبى سيرة الموضوع ده واتعاملى عادى .. انا عايزاها تنسى ومتفكرش كتير
ثريا .. اكيد طبعا انا فاهماكى مش هتكلم معاها فى حاجة
.......
خرجت عاليا من حجرتها وقد اعدت حقيبة صغيرة خاصة بها استعدادا للذهاب مع ملك
سميحة بقلب منفطر عليها .. هتسيبينى يا عاليا .. مكنتش عايزاكى تمشى وتسيبينى يا حبيبتى بس مدام شايفة انك كدة هتكونى مرتاحة اكتر مقدرش اتكلم
نظرت لها عاليا بقسوة ممتزجة بالحسرة قائلة بمرارة .. لما تكلمى ابنك المحروس .. ابقى قوليله انى عمرى ما حبيته ولا اتمنيت اتجوزه .. وانى وافقت على ارتباطنا بس عشانك عشان مزعلكيش .. ثم اكملت بسخرية .. رد جميل يعنى مش اكتر
سميحة بحسرة .. حاضر يا عاليا .. انا هربيهولك وهقاطعه خالص
عاليا .. اه .. وابقى قوليله انى كنت بتمنى اسيبه وانى اسعد انسانة فى الدنيا انها جت منه
جذبتها ملك بيدها .. خلاص يا عاليا يلا نمشى قبل ما الناس تبدأ تيجى
نظرت لها بحسرة وعتاب لائم ثم انصرفت من امامها
سميحة .. ملك ادينى رقمك عشان ابقى اتطمن عليها
......
ادم وهو يفتح نافذة حجرة عمر .. ايه يابنى انت هتفضل نايم طول النهار .. قوم يلا احنا بقينا العصر
عمر جاذبا الغطاء على وجهه .. سيبنى يا ادم نايم .. واقفل الشباك ده
ادم .. نايم ايه يابنى بقولك العصر هيأذن .. قوم الحق الظهر وبعدين نخرج زهقت من الاعدة
عمر .. انا مش رايح فى حتة وهفضل نايم كدة لحد ما اليوم الشؤم ده يخلص .. انا نفسى اليوم يخلص بأى طريقة
ادم .. يعنى هتفضل نايم طول اليوم .. قوم طيب نخرج ولا نروح سينما نعمل اى حاجة تشغلك
عمر ناهضا من الفراش ليتحدث بجدية .. ادم .. انا مش هقدر اعمل ولا اركز فى اى حاجة .. كل ما افكر ان انهاردة فرحها وخلاص هتروح منى بموت من جوايا .. انا بهرب بالنوم يا ادم .. بهرب من الدنيا كلها يمكن انام مصحاش وارتاح من حياتى باة
ادم بخوف .. بعد الشر عليك ايه الكلام ده بس .. يا عمر اكيد ربنا ليه حكمة فى اللى حصل ربنا مبيعملش حاجة وحشة .. خلى ايمانك بربنا كبير ان كل اللى بيعمله خير
عمر .. ونعم بالله .. ثم اكمل بضعف .. بس انا مش قادر استحمل بجد مش قادر .. عشان خاطرى سيبنى براحتى
ادم مستسلما .. حاضر يا عمر خليك برحتك .. وانا برة لو احتاجت حاجة
عمر .. اخرج انت متربطش نفسك بيا ولا تحبس نفسك بسببى
ادم .. وانا مجنون عشان اخرج واسيبك تتجنن تانى وتمشى .. انا مش هتحرك من مكانى
عمر بلا مبالاه .. انت حر .. اقفل الشباك باة هقوم اصلى وانام
بعد فترة
ظل يتململ بالفراش يمينا ويسارا محاولا السقوط بالنوم ولكنه لم يستطع ابدا
ظل ينظر لصورتها على احد مواقع التواصل الاجتماعى (الفيس بوك) بحسرة متحدثا معها بأسى قائلا ..
معقول خلاص مش هتكونى ليا !! ولا هيكون حتى من حقى اسأل ولا اتطمن عليكى !! طب ازاى هقدر اشوفك فى الكلية وامشى بعيد عنك .. ازاى هتعامل معاكى اصلا
يا ترى انتى مبسوطة فعلا زى ما بيقولو وانا اللى واهم نفسى !!
لالا استحالة .. اللى حسيته فى كلامك وعيونك لا يمكن يكون غلط .. قلبى بيقولى انك بتحبينى
شرد قليلا ثم قال يائسا .. بس حتى لو احساسى صح .. خلاص مش هيفيد بحاجة .. بقيتى لشخص تانى ومش من حقى حتى افكر فيكى
بس ازاى .. ازاى همنع نفسى عن حبك والتفكير فيكى طول ما انتى ادامى .. انا لازم ابعد بجد .. ابعد خالص ..
ثم اغلق صورتها بحسرة قائلا
هبعد ومشوفكيش ولا هخليكى تشوفينى تانى .. مهما كان التمن
......
قادت سيارتها متوجهة لمنزلها وبجانبها عاليا التى ما زالت تائهة حائرة تحاول استيعاب ما يحدث
ملك .. فهمتى باة .. لا فيه فضايح ولا اى حاجة من اللى فى دماغك دى خلاص
عاليا بحزن .. حتى لو معرفوش .. هتفضل الناس تسأل ايه اللى حصل وليه على اخر لحظة وعيونهم مش هترحمنى
توقفت ملك بالسيارة جانبا فجأة وقد استفزها كلام عاليا
فنظرت بعيونها بقوة وتحدى كى تستمد تلك القوة منها
ملك .. بصيلى يا عاليا .. انتى مغلطتيش فى حاجة .. انتى ضحية ابن خالتك اللى غدر وباع .. هو اللى غلط وهو اللى يستاهل الحرق بعد اللى عمله .. انتى لازم تكونى اقوى واشجع من كدة .. بطلى تخافى من الناس وكلام الناس ... مجابكيش ورا ولا اذاكى غيرهم .
كنتى عايزة تتجوزى وانتى لسة بتدرسى عشان كلامهم وبصاتهم ليكم وانتو فى بيت واحد
ولما حسيتى انك مش قادرة تكملى معاه وعايزة تسيبيه .. تراجعتى وضغطتى على نفسك تكملي معاه برضو عشان الناس ميقولوش انك وحشة وسبتيه وغدرتى بيه او انك ناكرة للجميل وقابلتى الاحسان بالاساءة
ودلوقتى باة وانتى فى عز جرحك وصدمتك فى صاحب عمرك واللى كنتى بتعتبريه اقرب الناس ليكى .. بدل ما تفكرى فى نفسك وازاى هتنسى اللى حصل وتكملى حياتك برضو بتفكرى فى الناس وكلامهم
ثم اكملت بانفعال .. انسى الناس يا عاليا انسييييهم
الناس مبترحمش حد فى كل الاحوال .. ومفيش حاجة بترضيهم
اللى بيحبك بجد ويهمه مصلحتك وبيقدر احساسك مش هيعد يتكلم ويفكرك ولا هيأذيكى بكلمة .. بالعكس هيفكر ازاى يقف جنبك وازاى يساعدك تخرجى من اللى انتى فيه .. وهيرد غيبتك لو حد مسِّك بكلمة .. هما دول اللى المفروض يهموكى .. هما دول اللى تعمليلهم حساب وتقدرى وجودهم فى حياتك
اما الناس الحاقدة الناقمة اللى بيدورو على اى حاجة يتكلمو فيها وينتقضوها .. اللى بيكرهونا وبيستنو اى وقعة لينا عشان يشمتو .. واللى بيشوفو اى موضوع يتكلمو فيه ويبقى لبانة فى بقهم .. دول ميهموناش فى حاجة .. يغورو من حياتنا ويبعدو عننا ونبقى احنا الكسبانين
ثم امسكت بكتفيها تهزها بقوة قائلة باصرار .. فهمانى يا عاليا ؟! فهمانى !!
عاليا .. فاهمة يا ملك .. عندك حق بس غصب عنى بخاف من كلامهم ده يلوث سمعتى ويدمر مستقبلى
ملك وقد ادارت السيارة من جديد .. الناس بتنسى يا عاليا محدش بيفضل فاكر حاجة .. ومستقبلك ده بايدك انتى .. انتى اللى قادرة تأمنيه بنفسك محدش غيرك
.....
صباحا .. تفاجأ ادم بعمر يخرج من حجرته وقد اعد حقيبته استعدادا للرحيل
ادم .. ايه ده رايح فين وايه الشنطة دى
عمر .. هسافر كفاية كدة .. هروح لاهلى الشرقية باة وحشونى ومحتاجهم اوى
ادم .. دلوقتى !! ما خلاص فاضل يومين وهنمشى مع بعض مستعجل ليه
عمر .. مخنوق .. مش قادر اعد اكتر من كدة .. محتاج اروح بيتنا واعد فى وسط اهلى يمكن اقدر انسى
ادم .. طيب استنى هحضر شنطتى واسافر معاك انت لسة تعبان
عمر .. مش هينفع انا حجزت تذكرة واحدة ومعادى بعد ساعة يادوب .. وبعدين انا بقيت كويس الحمدلله متقلقش عليا
ادم .. طيب يا عمر استنى ٥ دقايق بس اغير هدومى واوصلك على الاقل .. مش هتأخر
عمر .. ماشي
.....
دخلت ملك حجرة عاليا قائلة بمرح.. وعندك احلى فطار لاحلى عاليا فى الدنيا .. عمايل ايديا وحياة عينيا
عاليا بابتسامة .. تسلم ايدك .. بس مش قادرة اكل والله
ملك .. لا هنفطر سوا .. والا هعد كدة من غير أكل وذنبى فى رقبتك
عاليا .. والله يا ملك ما ليا نفس .. سيبينى على راحتى وكلى انتى
ملك مناولة اياها ساندويتش .. طب كلى ده بس عشان خاطرى .. انا هموت من الجوع واستنيتك تصحى نفطر سوا ونفتح نفس بعض
عاليا .. طيب هاكل عشان خاطرك
بعد انتهائهم من تناول الفطور ..
عاليا .. شكرا يا ملك انا تعبتك معايا وتقلت عليكى اوى
ملك .. والله هزعل منك لو قلتى الكلام الفارغ ده تانى .. انتى اختى يا عاليا ربنا يعلم انا بحبك اد ايه
عاليا .. وانا لو مش بحبك وبثق فيكى مكنش جيت معاكى .. بس مامتك ملهاش ذنب فى ظروفى
ملك .. ماما كمان بتحبك وزعلانة عشانك .. ونفسها تعمل اى حاجة عشان تفرحك .. ممكن متفكريش فى اى حاجة وتقومى تلبسى يلا عشان نخرج نغير جو
عاليا .. لا مليش نفس للخروج
ملك .. ليه كدة طب ده حتى فيه افلام نازلة حلوة اوى تعالى ندخل سينما ونتغدى برة
عاليا .. انا مخنوقة يا ملك .. مليش نفس اعمل اى حاجة ولا بقى عندى حماس لحاجة .. احمد ضيع منى فرحتى .. خلى اليوم اللى بتتمناه كل بنت اسود يوم فى حياتى .. عقدنى من الجواز والعلاقات كلها .. مبقاش عندى ثقة فى اى حاجة حواليا .. حتى خالتو اللى كنت بعتبرها امى التانية اتصدمت فيها صدمة عمرى .. مبقاش عندى ثقة فيها ولا فى اى حد .. بجد انا تعبانة اوى
ملك .. انا حاسة بيكى يا عاليا .. بس انتى مكنتيش مقتنعة بأحمد .. فاكرة لما قلتيلى احنا مفيش بيننا اى حاجة ولا اى كلام .. ولما قلتيلى انه بارد ومشاعره جافة معاكى .. كذا مرة كنتى هتنهى العلاقة دى
يعنى الحمدلله انها انتهت لوحدها
عاليا بمرارة .. انتهت نهاية بشعة .. اسوأ نهاية ممكن تنتهى بيها علاقة .. ده مهنش عليه حتى يصارحنى وجها لوجه .. واستنى لاخر لحظة عشان يرميلى ورقة ويجرى
ملك .. بس انتهت فى الاخر .. حتى لو بطريقة وحشة بس خلصتى من علاقة كانت مسببالك قلق واذى نفسى
فكرى لو كنتم كملتو .. لو كنتى اتجوزتيه بطبعه واسلوبه معاكى ده .. كنتى هتقدرى تتحملى !! اه كنتى هتعملى الفرح وتفرحى والناس تيجى وتتبسط وتباركلك واليوم الحلو اللى البنات بتستناه يعدى زى الفل .. لكن مجرد ما يتقفل عليكم باب .. ومتحسيش معاه بأى مشاعر هتكرهى حياتك واليوم اللى اتجوزتيه فيه .. وهيبقى طلاق ساعتها يعنى مستقبلك فعلا كان هيتدمر
احمدى ربنا يا عاليا ان الموضوع خلص كدة دى رحمة ربنا بيكى
عاليا .. الحمد لله على كل حال
رأت ملك اتصال من ادم على هاتفها الذى وضعته على وضع الصامت كى تراعى شعور عاليا
فأمسكت بهاتفها قائلة
ملك .. هسيبك ترتاحى شوية
وقامت بالرد على ادم وهى تغلق باب الغرفة بهدوء متحدثة بصوت منخفض
ملك بهمس .. ايوة يا ادم
ادم .. انتى فين يا ملك بقالى ساعتين بتصل .. يعنى امبارح طول النهار مبترديش وقلت مشغولة مع صحبتك
لكن ليه انهاردة قافلة موبايلك من الصبح ولما فتحتيه كمان مردتيش
ملك بهمس وهى تدخل حجرتها .. معلش غصب عنى .. مش عارفة ارد عليك عشان عاليا عندى من امبارح ومش عايزة اضايقها
ادم باستغراب .. عاليا مين اللى عندك ؟! .. هيا مش اتجوزت تبقى عندك بتعمل ايه
ملك .. لا متجوزتش .. انفصلو على اخر لحظة والفرح اتلغى
ادم باندهاش وسعادة لم يستطيع اخفاءها .. انتى بتتكلمى بجد يا ملك ؟ مفيش جواز وانفصلو فعلا ؟!
ملك .. ايوة يا ادم بجد .. بس عاليا نفسيتها وحشة اوى
ادم بحزن .. مقلتليش ليه من امبارح يا ملك .. ياريتك عرفتينى بدرى شوية
ملك باستغراب .. اعرفك ليه ؟؟ هو الموضوع يهمك فى ايه ؟!
ادم بارتباك معللا .. ها .. ازاى باة طبعا يهمنى عالاقل افهم مكنتيش بتردى عليا ليه
ملك .. ما طبعا الدنيا قايمة من امبارح والناس كلها مستغربة الفرح اتلغى ليه .. وهيا مش طايقة تشوف ولا تسمع كلام من حد .. فاخدتها عندى عشان تبعد عن كل الدوشة دى واعدة معاها مبسيبهاش
تذكر ادم حديث عمر معه وان يبدو عليها عدم رضاءها عن تلك الزيجة فسأل ملك بتسرع
ادم .. ليه هيا كانت بتحبه عشان كدة زعلانة؟
ملك باستغراب .. لأ مبتحبوش وكان نفسها تسيبه .. انا معرفش ان الموضوع ده يهمك اوى كدة .. لو اعرف كنت قلتلك
ادم بتوتر .. لا ميهمنيش فى حاجة بس لما قلتى عاليا متضايقة مفهمتش متضايقة ليه طالما دى رغبتها
ملك .. ازاى باة يا ادم .. يعنى حتى لو مبتحبوش الموقف محرج ووحش جدا بالنسبة لها .. يعنى يوم فرحها كل حاجة تنتهى الموضوع مش سهل
ادم .. عندك حق .. خلاص خليكى اعدة معاها وانا مش هتصل كتير عشان متضايقش
ملك .. هبقى اكلمك انا
ادم بتعجل .. طيب سلام هروح اكلم عمر كان عايزنى ضرورى
ملك .. عمر !! هو مش معاك فى السخنة ؟
ادم .. لا ده سافر انهاردة .. معلش يا ملك لازم اكلمه دلوقتى اقفلى وهكلمك تانى نكمل كلامنا
ملك .. ماشي .. باى
اغلق الهاتف معها وهو بقمة سعادته .. لم يصدق ان كل شئ انتهى حقا .. يبدو ان عمر كان على حق وقلبه لم يخونه حين حدثه انها لا تريد ذلك الزواج
اتصل به مسرعا بلهفة كى يخبره بل ويفاجئه بذلك الخبر الرائع .. ولكنه وجد هاتفه مغلق فلم يستطع الوصول اليه .. ظل يحاول ويحاول ولكنه لم ينجح ابدا بالاتصال به
....
لم تحتمل سميحة بعد عاليا عنها فهذه المرة الاولى التى تترك المنزل حيث واجهت ليلة صعبة جدا مليئة بالقلق والتوتر فى ظل وجود اختها معها والتى تركت منزلها بالبلد وسافرت كى تحضر زفاف عاليا .. ولكنها صدمت حين علمت بما حدث ومكثت مع اختها كى تهون عليها وتكون عونا لهم فى تلك الظروف الصعبة
منى .. برضو يا سميحة مكلتيش حاجة .. مينفعش كدة لازم تاكلى عشان تاخدى دواكى
سميحة .. مليش نفس .. اكل ازاى بس وعاليا بعيدة عنى .. هتجنن عليها يا منى حاسة انى هموت من غيرها
منى .. ايه الكلام الوحش ده بس بعد الشر عليكى .. انتى مش قلتى عايزة تغير جو وتهدى اعصابها بعد اللى حصل .. يبقى ليه مزعلة نفسك وتاعبة اعصابك اوى كدة
سميحة .. قلبى واكلنى عليها اوى يا منى .. اول مرة تسيب البيت .. اول مرة تبعد عن حضنى .. هتجنن عليها
انا مليش ذنب فى اللى ابنى عمله ليه بس واخدانى بذنبه ليه
منى باستغراب .. ابنك !! وهو كان عمل ايه !! ده قرارهم هما الاتنين وهما حرين يكملو ولا لأ انتى ملكيش دعوة ولا ليكى ذنب ليه بتقولى كدة
سميحة بتوتر .. ها .. اه .. اه فعلا قرارهم .. بس .. بس هيا من ساعتها لا طايقانى ولا طايقة البيت
عموما انا حضرتلها شنطة كدة فيها شوية هدوم هروح اوديهالها واهى حجة عشان اشوفها واطمن عليها
منى .. طيب بس قبل ما تنزلى لازم تاكلى حاجة .. مش هسيبك تنزلى الشارع من غير اكل هتقعى من طولك ولازم تاخدى دواكى عشان الضغط ميعلاش عليكى
يلا يا ياحبيبتى استهدى بالله وكلى حاجة
سميحة بضعف .. حاضر
....
فى منزل ملك
ملك .. اهلا يا طنط ازيك
سميحة بحزن .. الحمدلله يا بنتى .. امال عاليا فين وحشتنى اوى
ملك .. والله يا طنط لما كلمتينى كانت نايمة حاولت اصحى فيها بس انتى عارفاها بتنسى نفسها لما تنام
سميحة بتوسل .. طب حاولى كدة معاها تانى .. انا نفسى اشوفها بس واتطمن عليها ومش هضايقها خالص
ملك .. حاضر يا طنط .. ثوانى
دخلت حجرة عاليا قائلة
ملك .. عاليا .. قومى يا عاليا خالتك برة وعايزة تشوفك .. قومى طمنيها عليكى احسن دى حالتها وحشة اوى وهتتجنن عليكى
عاليا .. ملك لو سمحتى سيبينى برحتى .. انا مش عايزة اقابل حد ولا اكلم حد
ملك .. بس يا عاليا دى شكلها تعبان اوى وقلقانة عليكى .. قومى طيب سلمى عليها بس وامشى
عاليا وهى تعطى ظهرها لملك بتضجر .. قولتلك يا ملك مش هقوم ولو سمحتى اقفلى الباب وسيبينى انام
ملك بيأس .. طيب برحتك
عادت لسميحة فسألتها بلهفة شديدة
سميحة .. ايه يا حبيبتى هتخرج
ملك بأسف .. والله يا طنط انا حاولت معاها .. بس نايمة خالص ومش حاسة بالدنيا
سميحة بحزن .. طيب خلاص .. المهم هيا كويسة وبتاكل كويس ولا ناسية نفسها فى الاكل
ملك .. لا متخافيش انا بضغط عليها مبسيبهاش
سميحة .. ربنا يباركلك يابنتى تاعبينك معانا .. انا بس كان نفسي اتطمن عليها .. نفسي اخدها فى حضنى
عموما خليها براحتها .. انا بس جبتلها شنطة فيها شوية هدوم عشان هيا ملحقتش تاخد حاجة .. بس والنبى يا ملك تحاولى تهديها وتخليها ترجع البيت بسرعة .. البيت وحش اوى من غيرها
ملك .. حاضر .. معلش متزعليش منها اللى حصل مش قليل وهيا لسة فى عز صدمتها .. ان شاء الله تهدى وتيجى تعتذرلك بنفسها
سميحة .. انا مش عايزة منها اعتذار .. مش عايزة غير انى اخدها فى حضنى واطمن عليها .. وهعملها اللى يريحها كله
والله انا عمرى ما قللت منها ولا من كرامتها .. عمرى ما فكرت حتى اغصب حد عليها زى ما بتقول .
ملك .. ربنا يهديها وتفهم الكلام ده
سميحة .. طيب استأذن انا باة
ملك .. مع السلامة يا طنط .. نورتى
دخلت ملك لعاليا بغيظ ولوم شديد
ملك .. ربنا يسامحك يا شيخة .. ازاى هانت عليكى انتى ايه معندكيش قلب !
عاليا .. انا برضو اللى هان عليا يا ملك .. ولا هيا اللى قللت منى وراحت تحسس ابنها انه املة اوى وانى هموت عليه .. وهو اصلا مكنش فى دماغى ولا كنت بفكر فيه
هو اللى جه وعرض عليا الجواز .. ليه تعمل فيا كدة ليه
ملك .. يا حبيبتى هيا مكنتش تقصد تقلل منك ولا من كرامتك .. هيا كان كل هدفها تجوزك وتطمن عليكى .. لازم تقتنعى بالكلام ده عشان تقدرى تسامحيها
عاليا .. انا مش هسامحها .. انا خلاص قررت ابعد عنها نهائى ومش هكلمها تانى .. ولو انا متقلة عليكى انا همشى .. انا خلاص قررت اروح اعد فى بيتنا القديم
ملك .. ايه يابنتى الهبل ده .. متقلة ايه بس .. ما انتى شايفانى اعدة لوحدى علطول اهو ده انتى مونسانى ومسليانى وماما مش هنا .. انا بس خالتك صعبت عليا اوى حالها كان يصعب عالكافر
عاليا .. اه صحيح يا ملك .. هى ليه طنط بتروح لخالتك كدة علطول وانتى ليه مبتروحيش معاها
ملك .. عشان خالتو كمان جوزها علطول مسافر واعدة لوحدها .. فبتروح تعد معاها بترتاح هناك
وزمان كنت بروح انا كمان .. كنت بحب اروح معاها هناك بحب خالتو اوى .. بس من ساعة موضوع محمد ده .. وانا قللت زياراتى اوى هناك وبقيت اقولها عايزة تروحى روحى لوحدك .. وبروح انا كل فين وفين كدة عشان خالتو بس متزعلش
عاليا .. يعنى هيا مش متضايقة من وجودى ؟
ملك .. لا والله خالص يا بنتى ده الطبيعى .. هيا علطول هناك وانا اعدة لوحدى .. بس بوجودك مبقتش لوحدى
عاليا .. ربنا يخليكى ليا يا لوكا
.....
فى الشرقية
سعاد .. برضو يا عمر هتفضل اعد مسهم كدة .. من ساعة ما جيت وانت سرحان ولا بتاكل ولا بتشرب .. وبعدين دماغك مالها ؟
عمر بتعب .. منا قلتلك يا امى خبطة بسيطة وعدت .. والحمدلله انا كويس ادامك اهو
سعاد .. طب على الاقل كل حاجة .. ده انا عاملالك الحمام اللى بتحبه .. معقول متدوقهوش خالص كدة
عمر مقبلا يدها .. تسلم ايدك ياست الكل .. بس والله يا ماما ما قادر اكل حاجة خالص .. اصل انا واكل كويس قبل ما اجى
انا عايزك بس تاخدينى فى حضنك .. محتاج لحضنك اوى يا امى اوى .. محتاج احس بدفا قلبك وحنيتك
سعاد محتضنة اياه بحنان ام .. تعالى يا حبيبى فى حضنى .. تعالى اقرألك قرآن وارقيك شكلك مش عاجبنى خالص
عمر بضعف وخضوع لحزنه بداخل حضن امه .. ايوة يا امى احضنينى اوى .. انا تعباااااان تعبااااااان حاسس انى بموت من جوايا
سعاد بقلق .. لا حول ولا قوة الا بالله .. فيك ايه بس يا عمر .. ما تقلقنيش عليك يا حبيبى .. متوجعش قلبى
عمر مطمئنا اياها .. مفيش حاجة يا حبيبتى متقلقيش .. انا بس محتاجكم جنبى اوى .. بعدت عنكم كتير ومحتاج ارجع لحضنكم تانى باة
سعاد .. ياريت يا عمر .. ياريت تفضل معانا ده انا وابوك منقدرش نستغنى عنك والحبة اللى بتغيبهم عننا بنتعب فيهم من غيرك
عمر بعفوية .. شكلى كدة يا ماما مش هبعد عنكم تانى .. شكلها كدة مفيهاش سفر خلاص
سعاد مخرجة اياه من حضنها لتنظر له بقلق .. قصدك ايه بالكلام ده ؟!
عاد لحضنها مرة اخرى قائلا .. ولا حاجة .. سيبينى بس فى حضنك كدة واقرأيلى قران بصوتك الجميل ده عشان يريحنى شوية
سعاد .. تعالى يا قلب امك تعالى فى حضنى
.....
منى .. ها قابلتيها ؟
سميحة بأسف .. مرضيتش تقابلنى يا منى .. مرضيتش اشوفها .. ثم انهارت بالبكاء .. انا مليش ذنب .. مليش ذنب فى اللى حصل عشان تقسى عليا كدة
منى بشك .. هو ايه اللى حصل يا سميحة ؟! اللى انتى حكيتيهولى ملكيش علاقة بيه ولا يدينك فى حاجة .. ما تصارحينى وتقوليلى الحقيقة وليه البنت مش طايقة البيت ورافضة تشوفك
سميحة بارتباك .. هو .. هو اللى قلتهولك .. قررو ينفصلو فجأة .. بس عاليا شكلها محرج من اللى حصل ومش عايزة تيجى البيت .. وكمان .. كمان ممكن زعلانة منى بسبب احمد
منى .. وليه تزعل .. ما هيا كمان مكنتش عايزة .. عموما سيبيها تهدى وبكرة نحاول نكلمها
.....
صباحا بالشرقية
ذهب عمر الى جامعة الزقازيق تسيطر عليه رغبة شديدة لتغيير جامعته والمكوث بمنزله مع اهله
فقام بالتوجه لشئون الطلبة
عمر .. لو سمحت انا طالب فى سنة رابعة بهندسة القاهرة .. وكنت عايز اكمل السنة دى هنا .. ايه الاجراءات المطلوبة
الموظف .. لأ لو حضرتك عايز تكمل هنا يبقى هتخسر السنة دى .. لان مينفعش تكمل ترم لازم تاخد السنة من اولها فكدة هتخسر السنة دى
عمر .. ممم مش مشكلة .. اخسر سنة ماشي بس ده هيأثر عالتقدير ؟
الموظف .. حضرتك دخلت امتحانات الترم الاول ؟
عمر .. اه دخلتها
الموظف .. هنعتبر انك مدخلتهاش هنا وانك تغيبت عنها واجلت سنة فهتمتحنها من اول وجديد وبكدة باذن الله التقدير مش هيتأثر
كمان مشروع التخرج بتاعك هيعتبر لاغى وهتبدأ هنا بمشروع تخرج جديد
يعنى هتعيد السنة دى معانا فى السنة الجديدة بامتحانات جديدة
عمر .. ماشى اعيد مفيش مشكلة .. ممكن اعرف الاوراق والاجراءات المطلوبة
.....
ادم .. صباح الفل على احلى ملك فى الدنيا
ملك باستغراب تنظر للهاتف بشك .. ايه ده .. الو .. مين معايا ادم ؟
ادم .. يا سلام نسيتى صوتى يعنى
ملك .. ايه ده .. ده انت ادم فعلا .. حمدالله على السلامة
ادم .. ههههه تقصدى ايه يا مجنونة
ملك .. لا اصل الروقان ده انا مشوفتوش من الحملة الفرنسية .. كفارة بجد تعبت قلبى معاك
ادم .. سلامة قلبك يا قلبى ❤️ .. معلش يا حبيبتى انا عارف انى قصرت معاكى اوى الفترة اللى فاتت وكأبتك معايا .. بس انسى كل ده خلاص ادم بتاع زمان رجع وهيعوضك عن كل النكد اللى فات
ملك .. بس انا مش زعلانة منك .. انا كنت زعلانة عليك وقلقانة اوى .. وفعلا الدنيا كان ملهاش طعم وانا شايفاك حزين كدة .. مش هتقولى باة ايه اللى كان مزعلك
ادم .. انسى باة .. خلاص المشاكل كلها اتحلت ومبقاش فيه داعى للزعل
ملك .. ماشي يا ادم برحتك
ادم .. مش قلنا مفيش وقت للزعل !! والله انا هموت واحكيلك اصلا بس غصب عنى مينفعش اتكلم .. المهم طمنينى عليكى عاملة ايه يا حبيبتى
ملك بحزن .. والله شكلى انا اللى داخلة فى مرحلة اكتئاب عظيمة .. واضح ان النكد مش راضى يسيبنا
ادم .. ليه بس كدة ؟!
ملك .. عاليا واجعة قلبى اوى يا ادم .. حزينة ومكسورة وشايلة هموم الدنيا فوق دماغها .. بحاول افرفشها على اد ما اقدر بس مصممة تفضل قافلة على نفسها ومتتكلمش
ادم .. معلش اللى حصل معاها مش قليل .. كونها بتحبه او لأ ده مش هيمنع كلام الناس وتساؤلاتهم .. ولا صدمتها فى يوم فرحها .
ملك .. طب وبعدين .. هتفضل كدة كتير
ادم بثقة .. لا انا متأكد مجرد ما نرجع الكلية هتبقى كويسة .. وكويسة اوى كمان
ملك .. يا سلام ايه اللى مخليك متأكد كدة !
ادم .. عيب عليكى لما تشككى فى توقعاتى .. بكرة تقولى ادم قال .. ممكن باة نسيبنا من عاليا وعمر اللى خدو مننا كتير دول .. ونفوق باة لبعض شوية
ملك باستغراب .. عمر !! وايه اللى جاب عمر فى الموضوع ؟!
ادم بارتباك وقد خانه لسانه .. ها .. ايوة .. طبعا ليه دعوة ما زى ما انتى اتشغلتى بصاحبتك انا كمان اتشغلت بعمر .. ثم اكمل متحججا .. انتى ناسية انه عمل حادثة وكان تعبان هو كمان
ملك بتذكر .. اه صحيح نسيت .. معلش اللى حصل مع عاليا نسانى كل حاجة .. طب هو سافر ازاى وهو تعبان كدة
ادم .. معرفش .. حاولت اوقفه مفيش فايدة كان مصمم
ملك بغيرة .. وانت باة اعد بتعمل ايه اما هو مشى
ادم .. زهقان والله لولا حاجز تذكرة رجوع كنت مشيت من بدرى .. صحيح عندى ليكى مفاجأة
ملك .. مفاجأة ايه
ادم .. سيرين نازلة مصر الاسبوع الجاى
ملك .. لأ بتهزر .. بجد هتنزل .. دى وحشانى اوى
ادم .. يا سلام وانا ايه موحشتكيش
ملك بخجل .. احم .. طب وهتيجى امتى
ادم .. ردى عليا موحشتكيش ؟!
ملك .. مممم انت شايف ايه ؟
ادم .. مش شايف حاجة وعايز اسمعها منك .. ولا مستاهلش اسمعها
ملك .. ممم وحشتنى يا ادم .. وحشتنى اوى
شعر ادم بتسارع نبضات قلبه وكأنه قد عاد له النبض من جديد فرد عليها بعشق جارف لم يستطع التحكم به ..
ادم .. روح ادم انتى وعقله وحياته كلها .. انا اللى اشتقتلك اوى يا حبيبتى .. اشتقت لعيونك اللى عاملين زى البحر بيغرقونى فيهم .. ولابتسامتك اللى بتسحرنى وكلامك اللى بيدوبنى .. بجد مشتاق لكل حاجة فيكى يا ملك
خجلت ملك كثيرا لم تستطع الرد عليه ولكنها شعرت بضربات قلبها تدق بعنف شديد يكاد ان يخرج قلبها من مكانه
شعر ادم بخجلها فأكمل
ادم .. ووحشونى اوى الفراولتين اللى على خدودك دلوقتى .
ملك ......
ادم .. طب هتفضلى ساكتة قولى حاجة
ملك بصوت مبحوح .. مممم وانا هعرف ارد بعد كل الكلام ده !
ادم .. بس ده مش كلام .. دى حقيقة .. انا فعلا مشتاق لكل حاجة فيكى .. هتجنن عليكى يا ملوكتى
ملك .. احم .. طيب قوللى بتعمل ايه دلوقتى
ادم .. انتى ليه بتهربى منى يا ملك ؟
ملك بارتباك .. مش بهرب .. بس .. بس يعنى مش عارفة ارد .. وكمان الاحسن نأجل الكلام ده لما نتخطب رسمى .. لأنى بحس انى مش مرتاحة
انا حاسة بيك يا ادم لانى زيك ويمكن اكتر .. وبفرح اوى بكلامك ده .. بس بحس انه مش من حقنا نتكلم كدة دلوقتى .. لما نتخطب هنبقى براحتنا اكتر
ادم .. وانا قلتلك بدل المرة مية انى مستعد اجى اتقدملك انهاردة قبل بكرة .. انتى اللى رافضة
انا لو عليا عايز اتجوزك حالا .. مش عايز من الدنيا غيرك
ملك .. وانت عارف انى مش رافضة .. بس بابا مسافر والظروف مش سامحة .. خلاص كلها ٣ شهور وكل حاجة عايزينها تتحقق .. اصبر بس
ادم .. حاضر يا ملك .. هصبر .. بس مش هقدر اوعدك انى هعرف ابعد او امنع نفسى اعبرلك عن حبى ليكى
ملك .. وانا مش عايزاك تبعد .. بس برضو مينفعش نقرب اوى .. المهم باة قوللى هتعمل ايه دلوقتى
ادم .. ولا حاجة اعد فى الشاليه وكنت نازل اتغدى دلوقتى بس قولت اطمن عليكى الاول .
ملك .. طيب روح انت اتغدى وانا هروح اشوف عاليا مشوفتهاش انهاردة
ادم .. ماشي .. ملك انا بحبك .. ومش هبعد عنك مهما حصل .. وهستناكى انشالله العمر كله .. مش هتجوز غيرك
ملك بخجل .. ولا انا عايزة اكون لغيرك .. سلام
ادم .. باى يا حبيبتى
.....
منى .. لسة برضو مردتش عليكى
سميحة .. لا لسة .. مش راضية ترد خالص
منى .. انا كمان حاولت اكلمها كتير مبتردش
سميحة .. خليها براحتها باة انا تعبت من كتر ما حاولت
منى .. بس برضو مينفعش تفضل اعدة عند ناس غريبة كتير كدة .. مهما كان دى بنت واحنا منعرفش الناس دى
سميحة .. لا الشهادة لله ملك صاحبتها دى قمة فى الادب والاخلاق .. وبحس انها بتحبها بجد من قلبها وبتخاف عليها فعلا .. ومامتها كمان ست محترمة جدا انا عارفاها واتعاملت معاها كتير .. وكمان باباها مسافر يعنى مفيش حد غريب .. لولا كدة انا لا يمكن كنت وافقت تبات عندهم
منى .. حتى لو .. برضو مينفعش نتقل عالناس اكتر من كدة
سميحة .. عندك حق بس مفيش فى ايدى حاجة اعملها .. هيا مش راضية ترجع البيت وانا مش هغصبها
منى .. لا مش هنغصبها ولا حاجة .. بصى انا فكرت فى حل كدة هيخليها تمشى من هناك من غير ما تضايق .. المهم ادينى عنوان ملك صاحبتها وكلميها قوليلها انى رايحالها
سميحة .. هتعملى ايه
منى .. هحاول اخليها تيجى معايا .. ادعى بس اقدر اقنعها
سميحة بأمل .. يارب توافق يارب
....
فى منزل ملك
منى .. سلام عليكم .. انا منى خالة عاليا
ملك .. وعليكم السلام .. اهلا بحضرتك اتفضلى طنط سميحة قالتلى وكنت منتظرة حضرتك
منى .. اهلا بيكى حبيبتى .. عاليا عاملة ايه مبتردش علينا خالص وقلقت عليها
ملك .. معلش هيا تعبانة اوى ومش قادرة تتخطى الموقف اللى حصل .. بس بحاول معاها
منى .. طب ممكن ادخلها .. حابة اتكلم معاها شوية
ملك .. اكيد طبعا اتفضلى
ظلت تطرق باب حجرة عاليا الى ان سمعتها تقول من خلف الباب
عاليا .. قلتلك يا ملك مليش نفس للأكل .. سيبينى انام شوية
فتحت الباب قائلة
منى .. بس انا مش ملك
عاليا باندهاش .. خالتو منى !!
.....
سالم .. حمدالله على السلامة يا شادى .. فينك يابنى مبقيناش نشوفك خالص
اية بشقاوة .. راحت علينا باة يا والدى الجو خده مننا خلاص ومبقاش فاضيلنا
شادى قارصا وجنتها بخفة .. خليكى محضر خير يا سوسة بلاش البوتجاز يشتغل
هالة .. لأ بجد يا شادى فينك بقالك يومين مبتتغداش معانا وبترجع متأخر
شادى .. غصب عنى والله يا ست الكل عندى شغل كتير اوى الفترة دى ومطحون فعلا
اية برخامة .. شغل ايه ده باة ان شاء الله ياسى شادى واحنا فى اجازة
شادى .. يابت بطلى لماضتك دى وخليكى فى حالك شوية
هالة .. هيا كدة مترتاحش الا اما تولع الدنيا
اية بتمثيل .. بقيت انا دلوقتى الوحشة ياست ماما .. طبعا ماهو ابنك البكرى وانا اللى وقعت من قعر القفة .. بس خلى بالك انا اللى اعدالك هو كلها سنة ويتجوز ومش هيبقالك غيرى
هالة .. والله انك هبلة .. صحيح اللى قال عليكى مجنونة مغلطش ابدا
شادى .. مجنونة .. دى الجنان نفسه ههههههه
ضربته اية بكتفه بغيظ .. بتضحك على ايه بطل رخامة
جذبها لحضنه قائلا بحنان .. يابت هو احنا نقدر نستغنى عنك ولا عن لماضتك و جنانك ده .. ده انتى البونبوناية اللى محلية البيت
هالة بابتسامة .. ربنا يخليكم لبعض
سالم .. بس هيا برضو عندها حق شغل ايه ومفيش دراسة اصلا
شادى جالسا بمقابل ابيه مبتسما .. ما هيا دى المفاجأة اللى كنت عاملهالك يا حبيبى .. انا قررت اسيب التدريس فى الكلية وهنزل الشغل مع حضرتك .. وبسلم دلوقتى شغلى للمعيد اللى هييجى بدالى عشان كدة مشغول الفترة دى
سالم بسعادة مندهشا .. معقول .. يعنى اخيرا اقتنعت بكلامى وعرفت ان مستقبلك فى الشغل مع عمك كامل
شادى مستنكرا .. عمى كامل !! انا قلت هنزل شغل مع حضرتك فى شركتك انت مش شركة عمى .. انا لا يمكن هستغل علاقتى بماهى فى شغلى ومستقبلى
نظرت له هالة نظرة ادرك معناها فقال سريعا
سالم .. وانا قلت ايه عشان تضايق انا بفهم منك بس قررت ايه .. وطبعا الشركة مفتوحة ليك فى اى وقت خلص انت اللى وراك وقفل شغلك واول ما ارجع من السفر نعد نظبط شغلنا مع بعض
شادى .. هو حضرتك مسافر امتى ؟
سالم .. بعد بكرة ان شاء الله وهنعد تقريبا شهر ونص على ما نخلص الصفقة انا وكامل
شادى .. على خير ان شاء الله ترجعو بالسلامة .. هقوم انا باة اغير هدومى وانام احسن هموت من التعب
اية .. خدنى فى ايدك انا كمان عايزة اذاكر شوية .. عن اذنكم
هالة .. روحى يا حبيبتى ربنا معاكى
بعد تأكدها من انصرافهم تحدثت مع سالم قائلة
هالة .. برضو اتكلمت معاه فى نفس الموضوع يا سالم .. مش اتفقنا بلاش احنا نتكلم وخليها تيجى من كامل نفسه
سالم .. انا متكلمتش هو اللى فتح الموضوع من نفسه .. افتكرته عقل وعرف مصلحته كنت هعرف منين قصده
هالة .. ده ابنى وانا عارفاه .. استحالة هيوافق يحس انه بيستغلها هيا او ابوها .. خصوصا ان واضح انه بيحبها بجد .. انت شوفت اية قالت ايه
سالم .. عارف انه بيحبها .. بس ده مسموش استغلال ده بزينس فى الاخر الواحد لازم يشوف مصلحته فين ويجرى وراها .. يعنى تبقى قدامه شركة صغيرة وشركة كبيرة وليها فروع ومكانة فى السوق ويروح يشتغل فى الصغيرة .. ده منطق يعنى !!
هالة .. فاهماك .. ومتأكدة انه هيوافق بس انت خلى كامل هو اللى يعرض عليه وهتلاقى الوضع اختلف
سالم .. اما نشوف
.....
عاليا .. خالتو منى !!
......
قراءة ممتعة 😍 دمتم بالف خير ❤️
•تابع الفصل التالي "رواية انت عشقي وقسوتي" اضغط على اسم الرواية