رواية ميراث نور كاملة بقلم لينا بسيوني عبر مدونة دليل الروايات
رواية ميراث نور الفصل الخامس عشر 15
“سمكه وقرد”
أعرفك الشيخ السمرى , ساحر زيك وهو اللى فصل عنك الجن بتوعك.
ودلوقتى نخش فى الجد .
وقرب على سندس وطلع سكينه وحطها على رقبتها وقال :
أيه هتقولنا على مكان القميص ولا أدبحهالك وأديلك رأسها ؟!!
وبالفعل بدأ يمشى بالسكينه على رقبتها …
Lina Basyouni
أتنططت وأنا مربوط وفضلت أصرخ بس بوقى كان متكمم .
طارق حط أيده على ودنه و قال:
أيه يانور بتقول حاجه !!؟ ها !!
وشاور لواحد من البلطجيه وقاله :
شيل اللزقه من على بوقه ..
البلطجى شد اللزقه من على بوقى , فقولت لطارق :
هقولك على مكان القميص بس سيبها , هى مالهاش دعوه بحاجة مشكلتك معايا أنا!!
ضحك وقال :
للدرجه دى خايف عليها , أوعى تكون بتحبها, نيللى تزعل منك أوى .
حسس على شعر سندس وهو بيقول :
عندك حق يانور , البت حلوة وتستاهل !!
صرخت وقولته :
شيل أيدك من عليها ياقذر …
واحد من البلطجيه كهربنى !!
طارق قال وهو بيبص فى ساعته :
أخلص فين القميص !!؟
قولتله وانا بفوق من الكهربا:
مش هقولك على مكانه ألا لما تفكها وتمشيها الاول !!
حط السكينه على رقبتها وقال :
يبقى أدبحالك دلوقتى على طول أحسن… الصراحه البت خساره فى الدبح , بس أعمل أيه , أنت اللى معصلج , كده كده هتقول على مكانه غصب عنك .
وبدا يدبح سندس بجد.!!!
Lina Basyouni
قولتله :
وقف … وقف ..
القميص تحت الترابيزه اللى قدامك , هتشيل الترابيزه و ترفع السجاده اللى تحتها , هتلاقى بلاط مخلوع , شيله هتلاقى القميص تحته.
طارق شاور للبلطجيه الى معاه فشالوا الترابيزه رموها ورفعوا السجاده , وشالوا البلاط المخلوع وطلعوا القميص .
طارق جرى عليهم وخطف من أيديهم القميص وبصله وهو مبهور من شكله .
لبس القميص وزرر كل الزراير بتاعته ……
Lina Basyouni
…………………………………………………………………………
فلاش باك (يوم حفلة عيد ميلاد نيللى )
خرجت من عند نيللى بعد ماشوفتها بتخونى وبتبعت رساله لطارق علشان يجيلها الفيلا حالا !!
دخلت العربيه وأستدعيت نصير ،اول ما حضر قال :
افففففف… ايه ريحة السمك دى؟ !!!!!! مش قلتلك يا عم خلى سندس تخف اكل في العربية، وكمان سمك!!! انت مش عارف اننا مبنطقهوش!!!
قلتله بزهق :
مش وقته يانصير ، عايزك فى حوار مهم
قالى :
خير يا نينو ؟!
قولتله وانا عينى بتدمع :
نيللى بتخونى تانى يانصير…..
وحكيتله علي كل اللي حصل.
قالى وهو متأثر :
أها منكم يابنى أدمين ومن طبعكم , بتخونوا بعض وبتاكلوا سمك في العربية !!
قولتله :
مش ناقصاك يا نصير، ركز معايا،انا لازم اعرف هتقوله ايه ؟
علشان كده أنا اللى هقابل نيللى مش طارق , هعمل تعزيمة الغيلان اللى فى القميص، وأغير شكلى لطارق .
قالى :
طيب وطارق مش أنت بتقول هيجيلها كمان شويه؟!!! , لو وصل الفيلا وأنت عندها هتتقفش !!
قولتله :
ما أنت هتروح تشتغل طارق ..
قالى :
هشتغله رعب يعنى؟!… اوهموا أنك بتقطع رقبته وكده؟ !!
قولتله :
لا طبعا… هيبان أنى سحرته ،و نيللى هتعرف أنها مقابلتش طارق الحقيقى ، لما يكلمها او يروحلها بعد كدا.
قالى :
امال هنشتغله أزاى !!؟
قولتله :
هتوهمه انه طلع بعربيته عادى ووصل لفيلا نيللى و أنه قابلها فعلا وقالتله نفس الكلام اللى هتقولهولى لما أدخلها كمان شويه على انى هو .
Lina Basyouni
انا عايز أعرف هى هتقوله أيه من غير الاتنين ماياخدوا بالهم أن في حاجه غلط , فهمت ؟!!!
قالى :
فهمتك يانينو.
قابلت نيللى كأنى طارق و نصير أشتغل طارق وأوهمه أنه قابل نيللى وانها قالتله نفس الكلام اللى قالتهولى .
طلعت من عند نيللى وانا مخنوق ومش طايق نفسى , وهديت شويه بسبب سندس اللى هونت عليا الصدمة .
بعد ماهديت أستدعيت نصير ونصحنى أخبى القميص , خبيت القميص بس بعد ما شيلت أخر زرار فى القميص علشان أعطل تعزيمة الاخفاء .
………………………………………………………………………….الآن
طارق لبس القميص وزرر كل زرايره ماعدا الزرار الاخير اللى شيلته.
وقال للساحر والبلطجيه اللى معاه:
ها أختفيت !؟
فقالوله فى صوت واحد ..:
لأ ….
طارق سكت شويه كأنه بيفتكر حاجه وبصلى وقال :
أفتكرت ….. نيللى قالتلى أنك لفيت لفه كامله وبعدين أختفيت.
وضحك وقال:
أصل نيللى مابتخبيش عنى حاجه خالص , واخد بالك يابتاع انت !!
لف لفه كامله بالقميص ,وقالهم :
ها أختفيت !!!
Lina Basyouni
قالوله فى صوت واحد :
لا ياباشا لسه ظاهر !!
فضحكت بصوت عالى وقولتله :
نيللى شافتنى وأنا بلف , بس ماتعرفش أنى لازم أفكر فى حاجه معينه وانا بلف علشان أختفى !!
Lina Basyouni
قرب السكينه على رقبة سندس تانى وقاللى :
حاجة أيه اللى بتفكر فيها وانت بتلف ؟!! قول والا المره دى هديك رقبتها فعلا !!
قولتله بلهفه :
خلاص خلاص هقولك .. جدى أجبر الجن بتوعه يعملوله القميص دا وكان بيعذبهم بالعزائم وهما بيعملوه، وبيجبرهم يكلوا اكتر أكله بيكرهوها .
عشان كده لازم وأنت بتلف تفكر فى أكتر أكله بيكرها الجن علشان التعزيمة بتاعت الاخفاء تشتغل ..
قاللى بنفاذ صبر :
أخلص أيه الاكله !!؟
قولتله :
أسال الساحر بتاعك اللى أنت جايبه , هو هيقولك أكتر أكلها بيكرها الجن؟
طارق بص للساحر , فالساحر قاله :
الجن بيكره عسل النحل والسمك , وأخلص ياطارق باشا علشان الجن اللى معاه أقوى من الجن اللى معايا، ومش هقدر أحجبهم أكتر من كده !!
Lina Basyouni
طارق مشى بالسكينه على رقبة سندس، فبدأت تجيب دم وقالى :
قول بسرعه أفكر فى أيه وانا بلف , العسل ولا السمك !!
قولتله بلهفه :
السمك … السمك أبوس أيدك شيل السكينه من على رقبتها .
شال السكينه من على رقبة سندس اللى أنجرحت وبدأت تجيب دم!!!
عينى غرغرت وبصيت لسندس اللى مكنش خايفه على نفسها , كانت بتبصلى وعينها بتدمع ,كأنها بتقولى بعينيها :
مش مهم أنا أعيش , المهم أنت تعيش !!!
وقف طارق وخد نفس عميق ولف لفه كامله وهو بيفكر فى السمك…
Lina Basyouni
فجأه أتحول لسمكه كبيره فى حجم جسمه .
أيده أتحولت لزعانف وجلده بقى قشر سمك , رجله بقت ديل سمكه وراسه أتحولت راس سمكه , وطلعله خياشيم وفضل يتلوى وهو بيتخنق علشان بره الميه .
وهو بيلتوى فى وسط الفيلا , خبط فينا وفى البلطجيه بتوعه ووقعنا على الارض بالكراسى , الدنيا كانت هرج ومرج والفوضى عمت المكان , لحد ماطارق (السمكه) بطل يتلوى وقطع النفس زى السمكه لما بتخرج من الميه !!!!
Lina Basyouni
كنا لسه مربوطين فى الكراسى وواقعين على الارض , الساحر اللى كان مع طارق قام من على الارض وقرب على السمكه الكبيره (طارق ).،
وقلع طارق السمكه القميص، وقرب عليا وانا على الارض وقال :
سحر الغيلان !! صح !!؟ القميص ده مش بيخفى بس!!! القميص بيعمل حاجات تانيه , هعرفها من قرينك لما أخدك معايا وأخدرك ، علشان الجن بتوعى مشغولين مع الجن بتوعك دلوقتى .
.
Lina Basyouni
وقال للبلطجيه :
خلصوا على البت , وهاتوا الواد معن……
قطع كلامه جرس الباب اللى بيرن، فقال لواحد من البلطجيه :
أجرى بسرعه شوف مين على الباب , قبل مايدخل ِ
البلطجى فضل واقف , فالساحر شخط فيه وقاله :
بسرعه ياغبى الباب مكسور .
البلطجى راح عند الباب وبص من العين السحريه :
مين بره على الباب !!؟
فمسعنا صوت واحد بيقول :
شركة فاست للشحن والتوصيل يافندم , معايا طرد لاستاذ نور .
البلطجى قاله :
الاستاذ نور مش موجود , تعالا يوم تانى .
المندوب قاله :
مش هينفع يافندم أرجع بالاوردر تانى , أى حد يستلمه وخلاص .
البلطجى قال :
طيب حطه جمب الباب , وأتكل على الله انت .
المندوب قاله :
أسف يافندم , بس لازم حد يمضيلى بالاستلام .
البلطجى قاله بنفاذ صبر :
يووه ده انت غتت أوى.
Lina Basyouni
وفتح الباب علشان ياخد منه الطرد , فجأه لقينا البلطجي بيرجع لورا وهو بيقول :
أفعى … أفعى كبيره !!!!
ووقع علي الارض وفضل يرجع لورا.
المندوب دخل من الباب .
حنوووووش !!!
أول مادخل من الباب والبلطجيه شافوه , البطجيه كلهم خافوا ورجعوا لورا.
فيه منهم اللى وقع على الارض وهو خايف ومنهم اللى طلع يجرى بعيد عن الفيلا.
سمعت واحد منهم قال وهو بيبص على حنوش :
ديب .. ديب كبير !!!
وواحد تانى قال :
شاكر … والله ماخونتك مع مراتك أنت فاهم غلط !!!
بصيت على الساحر لاقيته بيبص على حنوش وهو بيقول :
شنعان الجن!!!! أزاى ؟!!!! انا حرقتك قبل كده !!!
قرب حنوش منه , فالساحر أترعب ووقع على الارض .
حنوش مد أيده وخد منه القميص وقاله :
بخ !!
الساحر خد نفسه وطلع يجرى بعيد عن الفيلا مع باقى البطجيه اللى كانوا واقعين على الارض …
قرب عليا حنوش وفكنى , اول مافكنى جريت على سندس عشان افكها وانا بقوله :
بسرعه ياحنوش هات قطن وشاش ومطهر !!
شيلت اللزقه من على بوقها فأول حاجه قالتها وهى بتعيط :
الحمد لله أنك بخير ياسيدى .
فكيت الحبال اللى ربطاها فى الكرسى وخدتها فى حضنى وبكيت .
حنوش جاب القطن والشاش والمطهر , رفعت رأسها وبصيت على الجرح اللى فى رقبتها , الحمد لله الجرح سطحى بس بيجيب دم ,طهرته ولفيت رقبتها بالقطن والشاش وشيلتها وطلعت بيها على الاوضه وحنووش ورايا .
ريحتها على السرير , ولسه هبوس أيديها
حنوش قالى :
هو مفيش شكرا , مش كفايه أستحملت ريحة زفارة السمك اللى تحت وجيت , طيب حتى قولى رايك فى الخدعه اللى عملتها , شجعنى .
أبتسمت وقولتله :
مش عارف أقولك أيه ياحنووش ,كتر خيرك , أيه بقى الخدعه وليه كلهم جريوا لما شافوك !!؟
قالى بفخر:
لا أنا أعجبك أوى وزى مابقدر اخلى البنى أدمين يشوفونى أكتر حد بيشتهوه , أقدر أخليهم يشوفونى أكتر حاجه بيخافوا منها , أنا بس مرضتش أشغلها عليك أنت والدرويشه بتاعتك علشان كان فيكم اللى مكفيكم بس أنا الصراحه هموت وأعرف أنت بتخاف من أيه !!؟
ضحكت وقولته:
عليا الطلاق من قبل ما أتجوز أنت برنس !! صايع ياحنوش , وطبعا نصير بعتك علشان أنت مش فى خدمتى , أيوه صح هو فين نصير !!؟
قالى :
جاى كمان شويه , هيأدب الجن اللى كانوا حاجبينه عنك وهيرجع على طول , هيعلم عليهم علشان مايعملوهاش تانى .
قولتله :
أصلى .. نصير دا جن اصلى ..
قالى بخيبة أمل :
بعد كل اللى عملته , وبرده نصير هو اللى أصلى , طيب تمام , انا عايز عرقى فى الشغلانه دى , أنا جن فرى لانسر وبشتغل بالقطعه , مش فى خدمتك يعنى !!!
قولتله:
أيه المقابل اللى أنت عايزه !!؟
قالى :
بيتزا عائلى سوبر سوبريم وشاورما من عند أبوعمار السورى .
ضحكت وقولتله :
أنت بتهزر صح !!؟
وشه قلب وقالى :
أنا مبهزرش فى الحاجات دى !!؟
قولته:
من عنيا ياحنوش حاضر , قولى صح أنت روحت بلغت البوليس !!؟
قالى :
نصير كان قاللى أروح أبلغ بس لما حصل اللى حصل لغى المشوار وبعتنى ليك .
قولتله :
كويس , أصبر شويه بقى .
نصير حضر , ومكنش طايق ريحة طارق السمكه ,اطمن عليا وقالى :
ها هتعمل أيه دلوقتى ؟!!
قولتله :
هنبلغ عشان اهل البت اللى قالبين عليها الدنيا , بس كدا احتمال كبير اوى نيللى تطلع منها .
نصير قالى :
هتطلع منها ازاى ؟!!
بصيت على السمكه الكبيره وقولتله :
طارق بس اللى كان هيلبسها , بصماته على التمثال , ولو حللوا جثة رشا هيعرفوا انه أغتصبها , انما نيللى هتطلع منها لان التمثال معلهوش بصماتها..
قالى :
يعنى هتعمل أيه فى الاخر , هتسيبها ؟!!
قولتله :
على جثتى أسيبها بس أنا هخليها هى اللى تعاقب نفسها .
بصيت على حنوش وقولتله :
أنا عايزك فى طالعه كمان , وهحاسب على أى أوردر تطلبه لمدة شهر .
قالى :
أى أوردر !!؟
قولتله :
أى أوردر .
قالى :
الكلام على أيه ؟!!
قولتله :
هتروح لنيللى على أنك طارق …….
حنووش راح لنيللى على هيئة طارق وفى أيده القميص , اول ماشافته ,خطفت من أيده القميص وبصتله وهى مبهوره من ألوانه المتداخله فى بعضها , وقالت لحنوش :
برافو عليك ياطارق , جبتوا أزاى !!؟
قالها :
أجرت ساحر بالبلطجيه بتوعه , وروحنا على فيلا نور ودبحت البنت سندس قدام عينه فخاف وقاللى على مكان القميص وقالى أشغله ازاى قبل ما أدبحه هو كمان !!
قالتله :
قلبك بقى جامد اوى ياطارق .
وضحكت وقالت :
شكلك هتبقى سفاح العيله .
وقامت ولبست القميص ووقفت قدام المرايا وزررت كل الزراير ماعدا اخر زرار ولفت لفه كامله وهى مغمضه عينيها وقالتله :
ها ؟!! أختفيت !!؟
مردش عليها , ففتحت عنيها لاقيت نفسها لسه ظاهره فى المرايا .
فضحك طارق (حنوش ) وقالها :
اصلى كنت مفكر زيك كده ,أول ما ألف أختفى على طول , أتارى جد الواد نور عامل للقميص باسورد !!
قالتله بأستغراب :
باسورد أزاى !!؟
Lina Basyouni
قالها :
هو مش باسورد معين !!؟
قالتله بنفاذ صبر :
أخلص ياطارق بطل برود باسورد أيه :
ضحك وقالها :
أهدى طيب مستعجله على أيه .
قالتله وهى بتزعق فيه :
يووووه … أخلص ياطارق بيخفى أزاى !!؟
قالها :
بصى ياستى القميص بيختفى لما تلف لفه كامله وانت بتفكر فى أكتر حيوان بتكرهه.
قالتله :
مش فاهمه !!؟
قالها :
يعنى لازم تفكرى فى أكتر حيوان بتكرهيه وأنتى بتلفى بالقميص .
أنا فكرت فى الخنزير ولفيت فا أختفيت , فاهمه !!؟
قالتله :
أهااا فهمت , بس انا بكره تقريبا كل الحيوانات .
قالها :
لا يانيللى لازم تفكرى فى أكتر حيوان بتكرهيه فعلا .
قالتله وهى بتفكر :
أنا بكره الصراصير … لالا .. الصرصار مش حيوان ده حشره , أيوه أنا بكره القطط والكلاب لآ لآ انا بكره التعابين ….. مش عارفة ياطارق أنا بكره أيه بالظبط !!!
قالها :
ركزى يانيللى ولو مش عارفه , خلاص سيبهولى انا , أنا كده كده بقيت أعرف أختفى بيه .
ومد أيده علشان ياخدوا منها , فشديته من أيده وقالتله :
أنسى ياطارق !!سيبنى شويه بس أفكر , أصبر !!
فضلت تفكر فى أكتر حيوان بتكرهه , وبعدها فطت من مكانها وقالت :
عرفت أكتر حيوان بكرهه , أفتكرت لما كنت صغيره وفى حديقة الحيوان , أن قرد هجم عليا وهو فى القفص وخضنى جامد , تقريبا أنا بكره القرود اوى وبكره شكلهم الوحش .
حنوش قالها :
متأكده يانيللى !!؟
قالتله :
متأكده جدا , أنا بكره القرود أكتر من القطط والكلاب.
قالها :
يبقى تلفى لفه كامله وانت بتفكرى فى القرد اللى هجم عليكى فى حديقة الحيوان .
قالته :
ماشى !!
وقفت قدام المرايا وغمضت عينيها ولفت بالقميص وهى بتفكر فى القرد .
Lina Basyouni
وبعدين سألت حنوش :
خلاص أختفيت !!
قبل ماتفتح عينيها كان حنوش مقلعها القميص .
بصت وراها لاقت طارق ( حنوش ) أختفى .
بصت على نفسها فى المرايا وصرخت بصوت عالى لما شافت فى المرايا قرد !! و صرختها طلع صوت قرد!!
Lina Basyouni
نيللى بقت قرد وطارق بعته لمحل سمك وزمانهم دلوقتى عاملينه فيليه !!!
Lina Basyouni
وحنوش اتجسد للبوليس وراح دلهم على مكان جثة رشا ،ربنا يصبر اهلها ، كانوا منهارين جدا ، والتحقيقات بينت تورط طارق ونيللى فى الجريمه بعد مافرغوا الكاميرات اللى حوالين الفيلا وشافوهم وهما بيشلوها وبيحطوها فى العربيه ، ولحد دلوقتى مش لاقين طارق أو حتى نيللى
بعد مرور عام ……………
قرية النيارين …
خلصت السنه وأتخرجت بأمتياز , ورجعت قرية النيارين وانا فى أيدى سندس .
كالعاده البلد أتلمت عليا وكانوا بيبصوا على سندس وبيشبهوا عليها , أغلبيتهم ماخدوش بالهم انها سندس .
Lina Basyouni
خدتها وروحت لمعتز باشا بعد ماقررت أنه يكون أول واحد أعزمه على فرحى .
أول ماروحتله الفيلا أستقبلنى استقبال حار كالعاده وقالى :
غريبه يعنى !! أيه اللى رجعك البلد تانى !!
قولتله :
ما أنا أكتشفت أن حضرتك عندك حق , وقررت أجى أستقر فى البلد .
قالى بأستغراب :
طيب والهندسه والبعثه .
قولتله :
لا ماهو خدوا واحد تانى كان عامل ورقه بحثيه عن تطوير موجات الميكروويف !!!
قالى وهو بيضحك :
كوسه يعنى … البعثه أتكوست !!
قولتله :
لا طبعا يافندم هما أخدوه علشان أهميه بحثه طبعا مش علشان يبقى أبن رئيس الجامعه ولاحاجه !!
كمل ضحك وقال :
طيب يابنى مابلدك اولى بالاختراع ده .
قولتله :
لا مؤاخذه ياباشا بلاش الكلام ده والنبى .. بلدك أولى بيك , وتعالى وانا أوديك .
أنت عارف أخرتها أيه , الورقه البحثيه هتترمى فى الدرج زى كتير من الابحاث والاختراعات اللى أدفنت علشان ضعف الامكانيات والتكلفه .
قالى :
مش أنت بتقول تكلفة الجهاز صغيره !!
قولتله :
أها بس برضه محتاج اعمل مصنع وادرب ناس علشان نعمل خط انتاج , غير أن ده بحث ومحتاج يتطور , ده غير أنى محتاج مهندسين شاطرين ومحترمين علشان محدش منهم يسرق الفكره .
قالى :
بالنسبه للمصنع فأنت عندك أرض جدك, أبنى عليها مصنعك وانا هدعمك بالفلوس وأستثمر فى الفكره وبالنسبه للمهندسين , فأنا ممكن أوفرهملك لو حابب …
سكت شويه وقالى :
ولا أقولك أنت مش محتاج مهندسين أصلا , انا قريت فى مذكرات جدك انه أستعان بالجن علشان يبنوا معاه بيته , أيه رأيك ماتخلى نصير واللى معاه يساعدوك على الاقل هتضمن ان محدش يسرق الفكره ويروح ينفدها .
سمعت صوت نصير فى ودنى بيقول :
أوعى تسمع كلامه , ده راجل كبير فى السن وبيخرف , على جثتى يانور أنى أشتغل فى الكهربا .. ولو هتكهربنى لحد ما أموت .
Lina Basyouni
قولته :
فكره جامده جدا ياباشا والله … أنا موافق .
فرح وقالى وهو متحمس وانا هبعت أجيب مهندس معمارى يصمم مخطط للمصنع علشان نبدأ بنايه فى أقرب وقت .
قولتله :
حيلك ياباشا , انا أصلا جايلك علشان أعزمك على فرحى ..
بص على سندس وقالى :
شوفت خدتنى فى دوكه ونستنى أسلم على الانسه اللى معاك .
مد أيده وقالها :
أهلا وسهلا .. شرفتى القرية و الفيلا.
فهزلت رأسها .
غمزلى وقالى وهو مبتسم :
العروسه !!!؟
قولتله :
أها سندس !!!
رجع لورا وبص تانى على سندس وقالى وهو مستغرب :
هى دى سندس ال..
قولتله وانا بهز راسى :
أيوه سندس الدرويشه بتاعتى .
كتبت كتابى عليها قدام أهل القريه وكان فرح أتحاكى بيه أهل النجوع اللى حوالينا كلها , عملوا مسرح كبير فوق المنصه وأفراع النور كانت لحد أخر القريه .
وأهل القريه كلهم كانوا مختلفين على مين اللى جمبى فى الكوشه , أغلبيتهم مكنوش مصدقين أن اللى جمبى سندس وكانوا بيكدبوا أى حد بيقول أنها سندس .
حنوش احيا الفرح وبدع على خشبه المسرح عمل عمرو دياب , تامر حسنى , اصالة , انغام , وختم الفرح بدينا الرقاصة !!
خلصنا الفرح وروحنا على الكهف .
حفيد غداف ( غرابى ) كان واقف مستنينا فوق الكهف وهز راسه لما شافنى كأنه بيقولى :
ألف مبروك .
فقولتله :
الله يبارك فيك عقبالك .
فهز راسه .
دخلت الكهف واللى روقه نصير و خلاه ولا الفورسيزون .
طبعا اول فتره من جوازى بسندس قضيتها وانا بفوقها فيها , فضلت تقريبا ست شهور مش مصدقه نفسها وكل ما المسها يغمى عليها !!
فى يوم قعدت مع نصير جمب الكهف وناديت على حفيد غدااف فجه ووقف على أيدى .
نصير بصلى بأستغراب وقال :
ديجافو !!!
قولتله :
يعنى أيه !!!
قالى :
دى حاله بتيجى للبنى أدم بيحس فيها انه شاف مشهد معين قبل كده , معرفش أنها بتيجى للجن كمان !!!
قولته :
Lina Basyouni
مش فاهم !!؟
قالى :
قولتله :
أخ !!! مذكرات جدى , أنا نسيتها خالص .
سيبته وجريت على الكهف ودورت فى الدولاب على المذكرات لحد ما لاقيتها .
قرفصت على السرير .
فلاقيت سندس فى أيديها طبق ترمس وبتقولى :
بتقرأ أيه ياسيدى ؟
قولتلها :
بقرأ مذكرات جدى ناير ياسندس .
نطت قعدت جمبى على السرير وقالتى وهو بتأزأز فى الترمس :
لا يبقى أقعد معاك بقى وأنت بـتقرأ… أقرأ ياسيدى وسمعنى معاك والنبى .
Lina Basyouni
حطت راسها على رجلى فحركت صوابعى بين خصل شعرها وانا بقرأ مذكرات جدى بصوت عالى وبقول :
قصتى بدأت من 17 سنه لما قامت النارفى بيتنا فجأه وكلت البيت كله في..
- يتبع الفصل التالي اضغط على ( رواية ميراث نور ) اسم الرواية