رواية انت عشقي وقسوتي (كاملة جميع الفصول) حصريا عبر دليل الروايات بقلم دينا قدري
رواية انت عشقي وقسوتي الفصل الاول 1
- بارت ١
فى احدى قاعات المحاضرات بكلية الهندسة جامعة القاهرة
كانت تقام انتخابات مندوب الدفعة للسنة الرابعة لقسم حاسبات بالكلية
وكان المرشحون كالتالى
ادم صلاح الشناوى وهو بطل قصتنا
من اوائل دفعته على مدار الثلاث سنوات الماضية الى جانب كونه المندوب الرسمى للدفعة ايضا
شاب وسيم طويل القامة ذو شعرا بنيا وعيون عسلية يتمتع بملامح رجولية وكاريزما جذابة
وقد اشتهر بأخلاقه والتزامه وغلظته احيانا وقسوته مع الفتيات رغم محاولة العديدات منهن التقرب منه الا انه لا يتجاوب مع ايا منهم ويتجاهلهم تماما
مروان كامل
طالب مستهتر لا يهتم بدراسته عاشق للفتيات و له علاقات عديدة معهن وقد تخلف عن دخول الامتحانات السنة الماضية نظرا لسفره خارج البلاد مع اهله
فاضطر لاعادة السنة الدراسية الرابعة فهو جديد على هذه الدفعة وغريب ايضا عنهم لا يعرف بها سوى صديق له قد تعرف عليه سابقا
ولأن مروان يحب الظهور والتفات الانظار دائما نحوه قد تقدم ليكون مندوبا للدفعة مما يسهل عليه الوصول لفتيات دفعته سريعا وايضا عمل علاقات مع زملاؤه الجدد والتعرف عليهم جيدا
وقد كان هناك مرشحات ايضا لتكون ممثلة لبنات دفعتها
فقد اتفقت فتيات الدفعة على ضرورة وجود مندوبة تكون ممثلة لهم حيث واجهوا صعوبة سابقا فى التعامل المباشر مع ادم والتواصل معه
فمنهم من يخجلون من التواصل معه او سؤاله عن اى شئ يخص دراستهم
ومنهم من يواجهون مشكلة فى التعامل معه حيث انه حاد فى طريقته معهم كما انه يتعامل بتعالى بعض الشئ او هكذا يظنون
لذا تقدمت ملك كاظم السيوفى للترشح كى تكون ممثلتهم وحلقة الوصل بينهم وبين ادم
فملك تتمتع بشخصية قوية جريئة ذات ذكاء شديد وهى ايضا من المتفوقين على دفعتها وتشتهر بالاحترام واللباقة
ملك فتاة جميلة بيضاء البشرة ذات عينين بزرقة لون البحر وشعر جذاب تتمتع بانوثة طاغية فجسمها ممشوق القوام ومتناسق وملامحها هادئة ورقيقة جدا
و ترشحت امامها مروة الشربينى
ايضا من المتفوقين على دفعتها وتهتم كثيرا بدراستها وقد ترشحت فقط للتقرب من ادم والتواصل معه دائما
فمروة ومنذ السنة الاولى تحاول التقرب لادم بشتى الطرق
فهى تعشقه وتتمناه زوجا لها حيث ترى به الرجولة والكاريزما التى تتمناها الى جانب تفوقه دراسيا ومستواه المادى الرائع فضلا عن بعض الاسباب الاخرى التى سنتعرف عليها لاحقا والتى بدورها جعلتها اكثر تمسكا به
لذا حين اتتها الفرصة لتكون حلقة الوصل بينه وبين فتيات الدفعة لم تتردد لحظة وترشحت على الفور املا فى الفوز بقلبه
بعد ادلاء الطلاب بأصواتهم تم اعلان النتيجة بفوز ادم كمندوب لدفعته للسنة الرابعة
وفوز ملك كمندوبة ممثلة للفتيات
شعرت مروة بخيبة امل كبيرة بداخلها وحقدت على ملك لفوزها بهذا المنصب
فهذا المنصب لا يعنيها بشئ ولكنه بالنسبة لها الطريق لقلب حبيبها وهى ما فشلت فى الفوز به
بعد اعلان النتيجة وانصراف الطلاب شعر ادم بان هناك من سيشاركه بادارة وتمثيل دفعته وهذا ما اغضبه داخليا ولم يرض كينونته ..فهو ايضا معتز بنفسه ومكانته كثيرا ويسعى دائما ليكون محط انظار الجميع خاصة الدكاترة والمعيدين بالقسم
هذا ما يرضى غروره وحبه لذاته .. ف الأنا عند ادم عالية الى حد ما .. فهو يعطى لنفسه دائما قيمة وقدر كبير وهذا ما يفسره البعض من حوله بالغرور والتعالى
ادم مناديا على ملك
ادم .. بشمهندسة ملك
ملك ردا عليه .. مبروك يا بشمهندس .. خير فى ايه
ادم باستفزاز .. الله يبارك فيكى ومبروك ليكى انتى كمان .. بس يارب تكونى ادها باة.
ملك وقد شعرت باستفزازه لها فردت منهية للحديث .. ربنا يسهل ان شاء الله دعواتك .. بعد اذنك
وما ان تحركت الا ان صدمها بكلامه
ادم .. اوعى تفتكرى انك تبقى مندوبة دى حاجة سهلة وتاخدى الموضوع بهزار واستهتار زى عوايدكم انتو البنات .. انا ادرى واحد بالمكان ده ومسئوليته الكبيرة اللى انتى مش مستوعباها واقدر اقولك انك هتتعبى اوى .. خصوصا ان الطالبات مش هيسيبوكى فى حالك وهيدوشوكى بطلباتهم واستفساراتهم .. انا بقيت اقدر اتعامل مع الكلام ده وانظم وقتى ومقصرش معاهم .. عشان كدة انا احق شخص بالمكان ده ومش مقتنع الحقيقة ان يكون معايا حد تانى
ونظر نظرة مقيما اياها واكمل .. و معتقدش انك هتقدرى تعملى حاجة وهتلبسى الدفعة فى الحيط وتضيعيهم لو اعتمدو عليكى
شعرت ملك بالغيظ من محاولة استفزازها .. ولكنها تفهمت انزعاجه كونها ستشاركه المنصب الذى احتله لاعوام بمفرده فحاولت تمالك حالها قدر الامكان وهى ترد عليه
ففى النهاية هم حاليا فريق عمل و ويجب ان تحاول كسب ثقته ومجاراته حتى يتسنى لها ان تفيد زميلاتها دون عرقلة منه
ملك بدبلوماسية واحترام .. اكيد طبعا انت احق حد بالمكان ده .. والحقيقة انا عمرى ماتخيلت انى اكون فى المكان ده اصلا واتحمل مسئوليته
ثم اكملت مفسرة .. بس لقيت بنات الدفعة عايزين ممثلة ليهم وانا للاسف مبثقش فى حد فيهم
كلهم بيهمهم دراستهم ونفسهم وبس وحتى اللى بثق فيهم رفضو يترشحو
عشان كدة قررت اترشح عشان افيد نفسي وزميلاتى فى نفس الوقت
بس ده طبعا ميأثرش على كونك المندوب الرسمى للدفعة وخبرتك اكبر منى بكتير
ونظرت بابتسامة ساحرة واكملت .. واتمنى متبخلش عليا بخبرتك دى وتساعدنى فى المسئولية الجديدة اللى شيلتها .. فى النهاية احنا الاتنين بنعمل لمصلحة الدفعة يعنى مصلحتنا واحدة .. مش كدة ولا ايه
انبهر ادم بردها المفحم له .. فلم يكن يتوقع هذا الرد الرائع الذى يرضى غروره وحبه لذاته
فقد توقع انها سوف تستاء وتنفعل وتسئ اليه بالكلام وتبدأ المشاحنات بينهم
ولكنه تفاجئ بلباقتها وشدة احترامها وتمالك اعصابها لاقصى درجة برغم استفزازه لها .. بل ووضعته فى موقف حرج ايضا بذوقها الرفيع
رد عليها مبتسما .. متشكر لذوقك وثقتك فيا .. واكيد طبعا مصلحتنا واحدة وانا هكون معاكى فى اى حاجة تحتاجيها وان شاء الله نقدر نخدم الدفعة بكل اللى نقدر عليه
شعرت ملك بالانتصار للنجاح فى امتصاص غضبه وكسب ثقته وشعرت انه هدأ من ناحيتها وتقبل الامر بصدر رحب
ردت عليه ناظرة بعيونه بابتسامة ساحرة منهية للحديث .. ربنا يكرمنا كلنا .. بعد اذنك يا بشمهندس
وما ان نظر بداخل عيونها ورأى تلك الابتسامة الساحرة حتى شعر بقشعريرة تسرى بسائر جسده
انصرفت من امامه ولكن ظل ينظر على اثرها متجمدا بمكانه لحظات .. ظلت عالقة بفكره بعض الوقت
ظل يتذكر حديثها الدال على احترامها لذاتها وللاخرين
تذكر كيف استطاعت ان تحوله من حالته الغاضبة والمشتعلة لمشاركته منصبه الى الهدوء والسكينة بل والترحاب ايضا بها للعمل معه وكأنه جمرة نار استطاعت تحويلها لقطعة من الجليد بلحظة
فكلماتها قد اثلجت قلبه بعد اشتعاله واعادته لصوابه
نفض تلك الافكار من رأسه سريعا متوجها للكافيتيريا لتناول فطوره
فهو ادم الشناوى .. لم يتأثر باى فتاة بسهولة
اما ملك .. فقد كانت تشعر بالنيران تأكل قلبها وقد ادركت كيف كان حديثه مهين لها ولقدراتها
كيف كان يقلل من شأنها بكل بجاحة واستفزاز
فقد حاولت قدر المستطاع اخفاء اشتعالها ذلك تجنبا للمشاحنات معه .. فهى ذكية بقدر كافى لتدرك انه يتعمد استفزازها حتى تصيح به وتتصادم معه فيظهرها امام دفعتها مخطئة ولا تستحق المكان التى فازت به
فقررت الرد عليه بحنكة وذكاء حتى تجد طريقة للتعامل معه
ولكنها حقا تشعر بالكره الشديد له من تعاليه هذا وتعامله بتلك الدونية والتقليل منها
اخذت تحدث حالها
ملك .. يبدو ان الامر صعبا كما ذكرت فتيات الدفعة ..انه حاد الطباع والعمل معه لن يكون لطيفا على الاطلاق
ولكن لما التشاؤم .. فانا كفيلة يا سيد ادم ان اجعلك تساعدنى بكل قوتك .. وبكل ود وترحاب كما حدث من قبل
وسأجعلك تريد نجاحى واثناء الفتيات على اكثر منى شخصيا .. وهذا وعدا منى
ثم اتصلت بصديقتها عاليا كى يلتقيان
بعد نهاية اليوم
توجه ادم الى مسكنه بصحبة صديقه المقرب ووزميله بالدفعة عمر والذى تعرف عليه ادم منذ السنة الاولى
فأهل ادم مغتربون بدولة الامارات اما عمر فهو من محافظة الشرقية لذا كانا يقيما معا فى المدينة الجامعية
حتى اصبحا من اقرب الاصدقاء وأخلصهم لبعضهما
و قد اتفق الاثنان على تأجير شقة يتشاركان بها معا نظرا لعدم ارتياحهم بالمدينة الجامعية
فعمر شاب مهذب ومحترم .. طيب القلب وحنون .. مرح ولكنه عقلانى وذكى جدا فهو يحكم عقله فى كل تصرفاته ويتمسك جيدا بعادات وتقاليد بلده .. وهو ما كان نقطة الالتقاء بينه وبين ادم
ففى فترة بقاءهم بالمدينة الجامعية .. اكتشفا مدى التقارب الفكرى والثقافى بينهم .. مع الشعور الداخلى بالارتياح الشديد لبعضهم البعض
حيث يحب ادم التحدث مع عمر فى كل ما يخصه وسماع اراؤه والعمل بها رغم انه نادرا ما يثق برأى احد ونادرا ما يفتح قلبه ويبيح بأسراره لمخلوق ولكن حقا كان يعتبر عمر اكثر من أخ فهو قريب لروحه وقلبه كثيرا
اما عمر فكان له الرفيق الصالح والوفى وايضا كان يخبره بكل ما يتعرض له من ازمات ومشاكل ويطلب نصيحته دائما
وصلا الاثنان لمنزلهم
دخل ادم حجرته ابدل ملابسه وخرج لعمر حتى يتناولا وجبة العشاء التى احضروها فى طريقهم
عمر .. ايه يا عم مالك عامل زى الست المتطلقة كدة ليه !
ادم وهو ينظر للطعام بشرود ويتلاعب به دون ان يأكل
ادم بتيهة .. انا ليه عملت كدة !
عمر .. عملت ايه مالك يابنى قلقتنى ؟
ادم منتبها بجدية .. انا زعلان من نفسي اوى يا عمر .. مش عارف ليه اتعمدت اضايق ملك واستفزها وأهينها كمان بالكلام
للاسف بعد نجاحها فى الانتخابات خرجت عن شعورى
وقلتلها كلام زى السم
عمر بضحكة سخرية .. متبقاش ادم لو معملتش كدة
ادم .. قصدك ايه
عمر .. قصدى انك غيرت على مكانك وحسيت انه بيتاخد منك .. ولانك ادم الشناوى اللى شايف انه هو بس اللى احق بالمكان ده واللى انا وانت عارفين انه بيحب دايما يكون محط الانظار لوحده .. خانك غرورك وروحت حرقت دم البنت المسكينة اللى ملحقتش ياعينى تفرح بفوزها وضيعت فرحتها
واكمل بمرح .. ياعينى عليكى يا ملك وعاللى هيجرالك الله يكون فى عونك يابنتى شكل امك كانت داعية عليكى فى ساعة مفترجة ومن حظك الاسود ان ربنا قبل دعاءها ووقعك مع ادم عشان تمسكى الدفعة معاه
نظر له ادم بغضب .. عمررر بطل استظراف انا حقيقى متضايق من نفسي .
عمر بجدية وقد احزنه حال صديقه .. احكيلى طيب ايه اللى حصل عشان نشوف هنصلح اللى نيلته ده ازاى
اخذ يقص عليه ما حدث بينهما وبعد انتهاؤه
عمر .. هى ازاى مدتكش بحاجة فى وشك بعد الدبش اللى رميتهولها ده .. جدعة البت دى والله قدرت تمسك نفسها وترد بهدوء عشان متثيرش المشاكل
ونظر له .. بس متفتكرش ان كدة خلاص عدت الموضوع
دى مرقدالك يا باشا
ادم بعدم فهم .. يعنى ايه
عمر .. يعنى هيا خلاص حطت فى دماغها انك مش طايقها .. حتى لو ردت بلطف ده مش معناه انها قصدت كلامها .. دى كانت بتحرجك بالذوق بس .. بتاخد حقها بس باحترام
لكن هتفضل شايلاهالك وهتحاول تتجنبك
ادم .. بس انا فعلا ندمان وكنت قاصد كلامى لما قلتلها انى هبقى معاها فى اى حاجة تحتاجها .. طب ازاى طيب اصلح موقفى ؟
عمر ..ادم هو ليه الموضوع فارق معاك اوى كدة لدرجة عايز تصلحه .. انت ياما صديت بنات واتكلمت معاهم بقلة ذوق وياما كنت عنيف معاهم .. اشمعنى الموقف ده اللى مضايقك اوى كدة واشمعنى ملك اللى فرق زعلها معاك
نظر له ادم بتفكير وحيرة دون ان يجد ردا على سؤاله
فهو نفسه لا يعرف لما كل هذا الضيق من موقف لا يعد شيئا بجانب مواقفه الحادة والسخيفة مع الكثير من الفتيات .. فلما اذا يقف عند هذا الموضوع
ادم محاولا التفسير .. يمكن عشان مضطر اتعامل معاها كتير الفترة الجاية وهيبقى بيننا شغل فمش عايز يكون بيننا اى ضغائن او حساسيات !!
عمر .. جايز برضو
بص انت عشان تصلح موقفك لازم تحسسها انك فعلا عايز تشاركها معاك فى كل حاجة بتعملها وان وجودها مش مضايقك
ادم .. واعمل ده ازاى يا فالح
عمر بعد تفكير .. شوف مثلا حاجة هتعملها قريب للدفعة واطلب مشاركتها .. شوف حاجة كنت هتعلن عنها وخليها هيا تعلنها
من الاخر حسسها انك عايزها تظهر ومش متضايق من ده
ادم بعد تفكير بكلام عمر وكأن لمبة اضاءت بعقله .. لقيتها
عمر باستغراب .. لقيت ايه !!
ادم .. عرفت خلاص هصلح موقفى ازاى .. شكرا يا عمر انت اللى اديتنى الحل .. وذهب لحجرته مسرعا قائلا .. ادعيلى
عمر .. ربنا معاك يا وحش
...
كانت تجلس امام اللاب توب الخاص بها تتابع اخبار الدفعة على موقع التواصل الاجتماعى (فيس بوك)
وجدت احد زميلاتها تبعث لها برسالة متسائلة عن موعد امتحانات الميدترم
لم تكن تعلم ملك بشأنها فاضطرت للتواصل مع ادم على مضض لمعرفة الموعد منه
ارسلت له رسالة عبر الفيس بوك تسأله مباشرة
وبعد فترة رأى رسالتها ولا يعلم لما شعر بسعادة داخلية
رد عليها سريعا وقد طلب منها الاعلان عن ميعاد الامتحانات على الجروب الخاص بهم
وبالفعل قد قامت بالرد على زميلتها والاعلان ايضا كما طلب منها
ثم وجدت ادم يكمل حديثه معها قائلا
ادم .. بشمهندسة ملك .. لو سمحتى عايزين نعمل اجتماع مع المعيدين نحدد فيه المواعيد المناسبة ليهم عشان لو حد من الدفعة عايز يسألهم على حاجة قبل الامتحانات
هما مش متاحين بصفة دائمة فعايزين نظبط معاهم مواعيد مناسبة وتكون بعيدة عن مواعيد محاضراتنا
ملك .. تمام يا بشمهندس امتى الاجتماع ؟
ادم .. بكرة بعد المحاضرات هنتجمع فى قاعة الاجتماعات
ملك .. للاسف معرفش القاعة دى فين
ادم .. استنينى فى الكافيتيريا بعد المحاضرات وانا هوديكى
شعرت ملك بالاشمئزاز والنفور كونها سوف تلتقى معه ويذهبان معا .. فهى حقا لا تطيقه ولا تريد التعامل معه الا فى اضيق الحدود وايضا لا يمكنها الذهاب معه بمفرديهما .. فحتى ان كان هناك عمل مشترك بينهم هذا لا يعنى تواجدهم سويا بمفرديهما
ملك .. لا خلاص انا هسأل عليها واجى لوحدى .. سلام عليكم
واغلقت دون انتظار رده
ابتسم ادم مدركا انها شعرت بالحرج كونها سوف تذهب معه للاجتماع رافضة هذا الوضع وقد فضلت ذهابها بمفردها
اعجب بتصرفها هذا الذى ان دل يدل على اخلاقها الفريدة فى زمننا هذا
....
فى اليوم التالى وبعد انتهاء اخر محاضرة
ذهب ادم لملك مسرعا ليلحق بها قبل ان تغادر القاعة
ادم .. ملك قاعة الاجتماعات فى الدور التالت تانى اوضة عالشمال جنب مكتب رئيس القسم .. الاجتماع بعد نص ساعة ولو معرفتيش توصلى كلمينى
تاركا ايها فى حالة ذهول مما حدث للتو
أحقا هذا هو ادم .. الشخص السخيف الذى تحدث معى امس بطريقة مستفزة وتحدانى
غريب انت ايها ال ادم
....
توجهت ملك لغرفة الاجتماعات .. طرقت الباب فأذن لها احدهم بالدخول
وما ان دلفت للداخل حتى سمعت من يقول
- ايه ده معقول بشمهندسة ملك !! انتى اللى بقيتى مندوبة للدفعة مع ادم .. والله ده اختيار موفق اكيد هتكونى اضافة عظيمة للدفعة
نظرت ملك للمتحدث وجدته مهندس شادى معيد مادة البرمجة ابتسمت له بخجل ثم القت السلام على المتواجدين بالغرفة ومن ثم شكرته وجلست
شعر ادم بالضيق من كلام المهندس شادى لا يدرى لما
اهى غيرة منها كونها اخذت الانظار منه كما قال عمر
ام لسبب اخر !!
تحدثت ملك فى البداية معرفة نفسها .. فليس كل الموجودين يعرفونها شخصيا
ثم رحبت بهم وشكرتهم على سعيهم الدائم لمساعدة الطلاب وتقديم العون لهم خاصة فى الايام العصيبة - ايام الامتحانات-
حاول ادم وملك الاتفاق على مواعيد مناسبة لكل معيد حتى يتسنى للطلاب تقديم اسألتهم
ولم تكتفى ملك بهذا الحل فقد انبهر كل من بالغرفة وحتى ادم بالحلول والاقتراحات الاخرى التى قدمتها حتى يكون الامر سهل للطلاب والمعيدين ايضا
وقد رحبو كثيرا باقتراحاتها وتم الاتفاق على تنفيذها
وقد اثنى عليها كثيرا مهندس شادى مذكرا اياهم قوله ببداية الاجتماع انها ستكون اضافة عظيمة واخذ يؤكد على كلامه
كانت ملك تتلاشى النظر او التحدث مع ادم اثناء الاجتماع وحتى ان وجه لها الحديث ترد عليه باختصار شديد دون النظر له غير مبالية به متجاهلة اياه ووجوده تماما
فهى ما زالت غاضبة منه وتراه شخص مغرور متعجرف ولا يستحق اهتمامها او احترامها له
وقد حزن ادم لشعوره بانها مازالت غاضبة منه وهذا ما يظهر فى تعاملها معه فتوقف عن توجيه الاحاديث لها حفاظا على ماء وجهه
ولكن لن ايأس ملك ولن استسلم حتى اجعلك تنسين ما فعلته معك
بعد انتهاء الاجتماع وانصراف المعيدين كانت تتأهب ملك للمغادرة
نظر لها ادم متحدثا .. برافو عليكى يا ملك كنتى هايلة فى الاجتماع كأنك مندوبة من زمان .. الافكار اللى قدمتيها حقيقى ممتازة وهتفيد الدفعة اوى
نظرت له بابتسامة صفراء .. متشكرة يا بشمهندس عن اذنك
ادم .. استنى يا ملك
ثم اكمل بارتباك .. كن كننن كنا عايزين نظبط مع بعض جدول الامتحانات بناءا على المعلومات اللى جمعناها انهاردة فى الاجتماع
ملك دون النظر له وهى تلملم اشياءها .. اعتقد حضرتك عندك خبرة اكتر منى بكتير تخليك مش محتاجنى فى حاجة زى كدة .. تقدر حضرتك تعمله لوحدك .. بعد اذنك
ادم وقد غضب كثيرا من معاملتها هكذا معه وايضا عدم اهتمامها بمشاركته الجدول ..
ادم بانفعال : بس انتى مندوبة معايا يعنى لازم نتشارك فى كل حاجة ده شغل مش هزار اظن انا نبهتك قبل كدة
شعرت بالغضب يعود لقلبها من جديد بعد تذكيره لها بكلماته السخيفة السابقة
فبدلا من ان يصلح ما افسده قد زاد الامر سوءا وسواد بينهم
فهذا هو ادم الشناوى الذى يستطيع ان يدهس اى شئ ولا يضع اعتبار لشئ مقابل عدم المساس بكبرياؤه ورجولته
ملك ناظرة له بتحدى .. مش ناسية يا بشمهندس زى ما مش ناسية برضو انك قلتلى ان خبرتك اكتر منى بكتير وانك احق واحد بالمكان ده ومش محتاجنى
فانا قررت اسيبك تشتغل براحتك وتعمل اللى انت عايزه ومضايقش بوجودى وافكارى
ادرك ما فعله وانه قد زاد الطين بلة واغضبها منه من جديد
فحاول تلطيف الجو بينهم .. بس ده كان قبل ما اشوف اقتراحاتك واسمع كلامك .. لكن الاجتماع ده خلانى اعجب جدا بارائك وافكارك وفعلا حاسس انك هتبقى اضافة .. دماغك حلوة وحابب تشاركينى الجدول وكل اعمال الدفعة
شعرت ملك بالانتصار للمرة الثانية عليه .. فهو الان يثنى عليها ويطلب منها ان تشاركه اعماله بعد ان كان يكره مجرد وجودها
ولكن هذا لا يمنع كونه مغرور ومتكبر .. وهذا ما لا يعجبها به وتجعلها تنفر منه دوما
لانت امامه وابتسمت له دون ارادتها قائلة برقة .. متشكرة لذوقك وثقتك دى
خلاص شوف مناسب معاك امتى وانا جاهزة
ادم سريعا .. مناسب معاكى نعد نجهزه دلوقتى ؟
ملك بحرج فهى لم تكن تعلم انها ستتأخر كل هذا الوقت ولم تخبر امها وتأخذ الاذن منها
ملك .. هو للاسف مش هينفع انهاردة لان مقلتش لماما انى هتأخر .. قلتلها ساعة واحدة على اد الاجتماع وهيا زمانها مستنيانى
واكملت بعد ان رأت الوجوم على وجهه .. بس لو يناسبك بكرة بعد المحاضرات تمام
اعجب ادم كثيرا باخلاقها والتزامها الذى يظهر عليها تلقائيا للمرة الثانية
فنادرا ما يجد فتاة بأخلاقها .. فكل من عرفهم كانو يتوددون اليه يريدون قربه متجاوزين الحدود غير مباليين بقيمهم واخلاقهم وهذا ما يجعله يصدهم .. اما هى فتبدو مختلفة تماما
رد عليها ادم بابتسامة .. اتفقنا معادنا بكرة ان شاء الله
....
بعد عودة ادم للمنزل وجد عمر ينتظره
عمر .. عملت ايه طمنى
ادم .. جيت اكحلها عميتها .. مش عارف اعمل ايه فى نفسي .
عمر .. يادى النيلة .. عملت ايه تانى يا موكوس
ادم بغضب .. هيا اللى استفزتنى .. اطلب منها تظبط الجدول معايا ترفض وتقولى اعمله لوحدك
عمر .. رفضت !! والله البت دى جامدة وبتعجبنى شخصيتها فى كل موقف
ادم .. عمرررر
عمر .. كنت عايز ايه يا ادم .. ماتصدق تطلب منها وتفرح وتقولك ماشي يلا دلوقتى .. طبعا لو معملتش كدة مش هترضى غرور وكبرياء سعادتك وساعتها هتقع فى شر اعمالها
ادم .. اهو ده اللى حصل وفكرتها بكلامى ليها كمان
عمر .. امال قارفنى واعد تقولى ندمان وبتاع
ادم .. مش عارف ليه لما بتعند معايا .. مبرتحش غير لما بحرق دمها
عمر .. يعنى انت دلوقتى مرتاح
ادم .. بالعكس .. انا زعلان من نفسي اكتر .. على فكرة انا صلحت كلامى ويعتبر صالحتها واعدت اشكر فيها وطلبت منها تانى انها تشاركنى ومرتحتش غير لما وافقت
عمر .. شكل البت دى هتطلع عليك القديم والجديد .. باة ادم الشناوى يطلب من واحدة تشاركه شغل ويتحايل عليها كمان .. عشان تصدقنى لما اقولك البت دى مش سهلة
ادم .. مفيش الكلام ده كل الحكاية انى حسيت بالذنب انى فكرتها بكلامى السم ده وزعلت من نفسي فقررت اصلح موقفى عشان شكلى مش اكتر
ثم نظر لعمر .. يعنى عشانى مش عشانها
نظر له عمر بضحكة .. مفهوم طبعا يا حبيبى مفهوم
ثم قال مغيرا الحديث .. يلا باة نقوم نتعشى احسن انا عصافير بطنى بتصوت من الجوع .. انا عارف ليه بستناك ومبيهونش عليا اكل لوحدى .. عليا من ده بايه بس يا عملى الاسود فى الحياه
ادم بغيظ.. والى هيفضلى لازقلك مش هتعرف تخلص منه يا حبيبى .. وضحكو سويا
....
عند ملك .. كانت تحاول تنظيم الجدول استعدادا للقاءها غدا معه
وكانت قد اخذت اراء بعض الطلاب وجمعت اكبر قدر ممكن من المعلومات التى سوف تفيدهم فى تنظيم جدول الميدترم
دخلت عليها ثريا والدتها وجدتها منهمكة فى العمل حتى انها لم تشعر بوجودها بالغرفة
ثريا .. يااااه للدرجة دى مشغولة ومش منتبهة للى بيحصل حواليكى.
نظرت لها ملك متفاجأة من وجودها وردت .. عندى اجتماع بكرة مع مندوب الدفعة اللى معايا عشان ننظم الجدول
واستطردت حديثها .. شغله معايا مخلينى حاسة دايما انى مضغوطة ومرتبكة كدة وعايزة اعمل كل حاجة مظبوطة اوى عشان اثبتله انى قدها
ثريا .. وليه تثبتيله هو .. انتى المفروض تعملى كل حاجة مظبوطة عشان نفسك اولا وعشان دفعتك وزمايلك مش عشانه هو .. هو ملوش علاقة بيكى ولا فى ايده يشيلك من مكانك ده عشان تعمليله حساب اصلا
نظرت لها ملك بحيرة وتفكير فوالدتها معها كل الحق .. لما تعطيه كل هذا القدر .. ولما تهلك نفسها هكذا كى تثبت نفسها امامه .. لما تعطيه اهتمام اصلا
ردت عليها ملك مفسرة وهى غير مقتنعة .. اتحدانى من اول يوم وقاللى مش هتقدرى .. عايزة اثبتله انى هقدر
ثريا .. مش ده لو كان مصدق كلامه اصلا ومقتنع بيه .. لكن احنا عارفين انه قال كدة مخصوص عشان يضايقك ويستفزك غيرة منك مش اكتر
ملك وهى تعلم ان والدتها على حق ولا حاجة لكل هذا المجهود .. عندك حق يا ماما كفاية كدة انا هدخل انام عشان اقدر اركز فى المحاضرات بكرة .. تصبحى على خير يا ست الكل
واحتضنتها مقبلة يدها
احتضنتها امها بحنان ام .. وانتى من اهل الخير يا روح قلبى
وتركتها تخلد للنوم
.....
فى صباح اليوم التالى
التقت ملك بصديقتها عاليا امام محطة مترو الانفاق
عاليا صديقة ملك المقربة فهم محببان لبعضهما كثيرا وقد تعرفا منذ السنة الاولى فى قسم الحاسبات ولكن بدأ التقارب يزداد بينهم بعد ان تشاركا العديد من المشاريع نظرا للكيمياء العالية بينهم
وقد زارت ملك وتعرفت على والدتها وقد احبتها ثريا كثيرا وشعرت بنقاء قلبها وصفاء نيتها واعتبرتها اخت ثانية لملك
فهم يقضيان معظم اوقاتهم سويا حتى انهم يتقابلان يوميا بمحطة المترو ثم يكملان الطريق لكليتهم سيرا على الاقدام وسط ضحكات ونمنمات وحكايات
وفى وسط حديثهم المرح :
ملك .. نمتى ٦ ساعات بحالهم وزعلانة ياختى امال انا اعمل ايه ده انا مكملتش ٣ ساعات على بعض ده انا نايمة بعد الفجر يا بنتى
واستطردت مازحة .. إحياة عيالك يا شيخة تركزى معايا فى المحاضرة لو لاقيتينى بنام على نفسى ازغدينى فى ذراعى او اقرصينى مش طالبة تهزيق
عاليا .. وايه باة اللى منيمش برنسيس ملك ده انتى خوم نوم اصلا
ملك .. عندى اجتماع مع ادم بيه عشان جدول الميدترم وكنت اعدة بحضر اقتراحات واراء الطلاب ومحستش بنفسى غير والفجر بيأذن
ثم قالت متذكرة .. بقولك صحيح يا لولو فكرتينى
عاليا .. طالما قولتى لولو يبقى عايزة حاجة الدلع ده مبيجيش لله فى لله
ضحكت ملك .. انا طول عمرى بدلعك من غير حاجة ولا هتنكرى
عاليا .. لأ طبعا وانا اقدر .. اخلصى قولى عايزة ايه
ملك بضحكة .. مفيش بس كنت عايزاكى تفضلى اعدة معايا انهاردة وانا اعدة مع ادم بعد المحاضرات .. متسبنيش معاه لوحدى
عاليا بدهشة واستغراب .. ليه ان شاء الله مقطوعالك موراييش حاجة غير سيادتك
ملك بتوضيح مترجية عاليا .. عشان خاطرى يا عاليا انا مش حابة نعد لوحدنا انتى عارفة محدش بيسيب حد فى حاله واللى هيشوفنا لوحدنا هيعد يعمل افلام باة ويطلع علينا كلام ملوش لازمة .. وزمايلنا فى الدفعة ممكن يفهمو غلط
عاليا باندهاش اكبر .. ازاى يعنى ما كلهم عارفين انكم شغالين مع بعض وطبيعى تعدو تظبطو الشغل سوا
ملك .. انا عارفة ده بس مش معنى اننا شغالين مع بعض ان نعد لوحدنا اولا الوضع محرج جدا بالنسبة لى ومش بلعاه ولا مرتاحة للاجتماع ده من اساسه بس مضطرة
واكملت بدلع .. فقلت مفيش غير لولو حبيبتى ومنقذتى هتحل المشكلة العويصة دى
عاليا .. اه ثبتينى ثبتينى منا هبلة اصلى وهتثبت بكلمتين
.. طب ولنفرض وافقت هعد انا اعمل ايه لحد ما تخلصو اجتماعكم العظيم اتفرج عليكم يعنى ولا اشتغل صبى مندوبة ههههههه
ملك .. لا يا حبيبتى انتى ممكن تعدى تذاكرى محاضراتك جنبنا عادى وكمان ممكن تدخلى معانا فى الاجتماع وتقدمى رأيك احنا اصلا بناخد اراء الطلبة فى كل حاجة
عاليا بتفكير ... لااااااا ابعدينى انا والنبى عن شغل الدفعة والمناديب والكلام ده كبير عليا مليش فيه
انا ليا الجدول يجيلى واظبط نفسي عليه وخلاص لكن الابعاد العميقة للجدول والكلام الكبير ده مش بتاعى
ملك بضحك .. خلاص يا ستى بدل كل ده ممكن تعملى التقارير اللى مطلوبة مننا وتستفيدى من الوقت
واكملت بغمزة : وادم شاطر ومن الاوائل لو احتاجتى حاجة ممكن تسأليه
ثم اختفت الابتسامة عن وجهها وكأنها تذكرت شئ ازعجها .. ولا بلاش احسن ده مغرور وهياخد مقلب فى نفسه اكتر
عاليا .. ليه بتقولى عليه كدة انا بحس ادم ده من اطيب الناس فى دفعتنا واكترهم احترام
ملك .. اسكتى يا عاليا الله يباركلك انتى متعرفيش حاجة .. لو اتعاملتى معاه هتتصدمى بجد زى ما انا اتصدمت كدة من اول يوم اتعاملت معاه فيه
عاليا .. ايه ده ليه عمل معاكى ايه ؟
قصت لها ملك كل ما حدث مع ادم وطريقة كلامه معها
عاليا .. مش عارفة حساها غيرة بس مش اكتر .. اكيد مش حابب حد يشاركه مكانه
ملك .. حتى لو كدة يا عاليا فيه اسلوب افضل ممكن يتكلم بيه او ميتكلمش اصلا محدش طلب منه كلام
هو اللى جه عمل نفسه بيباركلى عشان يبخ سمه ده .. وبعدين حتى بعد ما بدأ يتكلم كويس رجع تانى يعصبنى .. كان المفروض يحاول ينسينى اللى عمله عشان اصفى من ناحيته مش يخنقنى اكتر منه
ده مغرور ومتعجرف قال عشان مرضيتش اعمل معاه الجدول بقيت بهزر ومش واخدة الموضوع جد
انا هثبتله انى اقدر اشتغل افضل منه كمان
عاليا .. طيب يلا ياختى نروح نجيب الفطار قبل ما نطلع المحاضرة وانا هتكرم واتعطف واوافق انى اعد معاكى فى الاجتماع
واكملت بضحك مازحة .. حتى افض اى اشتباك او معارك تحصل بينكم
ضحكت ملك وذهبا لتناول الفطور
......
بعد المحاضرة ما قبل الاخيرة
كان عمر يتحدث مع ادم
عمر .. يعنى مش هتروح معايا انهاردة
ادم .. وليه متستنانيش ونروح سوا
عمر .. لا يا عم انا هموت وانام اصلا .. وبعدين لازم اخلص التقارير المطلوبة انهاردة وبكرة عشان يوم الخميس باذن الله هطلع من الكلية على محطة القطار
اهلى وحشونى اوى يا ادم وهقضى معاهم الاجازة دى عشان افوق باة للميدترم
ادم .. خلاص روح اتغدى ونام .. انا هاكل هنا قبل ما امشى متستناش باة
وفجأة تصاعد رنين هاتف عمر
عمر : ياست الكل وحشتينى اوى
تحدث بصوت قلق .. ايه يا ماما مالك فى ايه !
سعاد : الحقنى يا عمر .. كلمونى من شغل ابوك وقالولى جتله جلطة فى المخ ونقلوه عالمستشفى
عمر برعب .. بتقولى ايه يا ماما .. جلطة ازاى يعنى هو حد زعله ولا ايه ؟!
سعاد .. معرفش يا عمر انا رايحاله فى الطريق اهو وانت خلص محاضراتك وخد اول قطر وتعالى علطول
عمر .. محاضرات ايه انا جاى حالا واخذ يهرول متوجها لباب الكلية
ركض ادم خلفه لاحقا به متساءلا بقلق
ادم .. ايه يا عمر فى ايه
عمر وهو ينهج بقلق وارتعاب .. ابويا فى المستشفى .. جلطة فى المخ
ادم .. بتقول ايه انا جاى معاك
واستقلا معا الحافلة متوجهين لمحطة القطار
....
تفاجأت ملك بعدم وجود ادم فى المحاضرة الاخيرة مما استدعى قلقها ولكنها لم تعطى للموضوع اهتمام معللة لنفسها انه من الممكن انه لديه ما يفعله اهم من المحاضرة
بعد انتهاء المحاضرة ظلت جالسة بمكانها معتقدة انه سوف يأتى لبدء اجتماعهم
حيث انه لم يتبقى على الامتحانات سوى اسبوع واحد ولا وقت للتأجيل
ظلت تنتظر وتنتظر دون اى نتيجة حتى مرت ساعة بأكملها
وكانت عاليا فى هذه الساعة تحاول جاهدة تهدئة صديقتها حيث كانت تستشيط غضبا من ذلك الادم الخبيث الذى يتعمد فى كل مرة ان يستفزها ويقلل منها
تحدثت ملك بانفعال : شوفتى سى زفت مجاش فى الاخر ازاى .. مش انا قلتلك انه بنى ادم مغرور ومستفز .. زودى عليهم كمان انه قليل الذوق ومش محترم
عاليا .. اهدى بس يا .....
قاطعتها ملك قائلة بعصبية .. متقوليليش اهدى .. مش عايزة اهدى .. اللى يخلى واحدة تستناه كل ده وميعبرهاش وهو عارف انها مستنية جنابه ده يبقى ميعرفش حاجة عن الرجولة والاحترام
عاليا .. يابنتى مش معاكى رقمه .. كلميه شوفيه فين بسيطة يعنى متكبريش الموضوع
ملك .. الموضوع كبير اوى يا عاليا مش انا اللى مكبراه
وبعدين اكلم مين .. ده لو عنده ذوق كان عالاقل بعتلى رسالة يعتذر .. لكن هو قاصد يحرجنى ويضايقنى
واكملت بغيظ
انا اللى غبية.. كل مرة يغلط واعديله واقول نبدا من جديد ويرجع يغلط تانى واقول معلش ميقصدش .. لكن كفاية باة فاض بيا .. انا هوريه مين هيا ملك السيوفى وهندمه واحسسه انه فعلا مبقالوش لزمة .. هيشوف
عاليا بمزح محاولة اخراج صديقتها من حالتها هذه ..
عاليا .. ااااه من اللى هيجرالك يا كابتن ادم .. وقعت تحت ايد اللى مبترحمش .. انا بقول نقرأ الفاتحة احسن
واخذت تضحك
نظرت لها ملك نظرة تحذيرية ثم فجأة انفجرا بالضحك سويا ..
....
بعد عدة ساعات وصل ادم وعمر عند والده بالمشفى
بعد ان استقلا عربة خاصة لايصالهم نظرا لعدم توافر رحلة قطار فى هذا الوقت
عمر داخل المشفى بلهفة .. لو سمحتى فين غرفة الحاج حسن البدرى
موظفة الاستقبال باحترام .. الدور الثالث يافندم غرفة ٣١
لم يستطع انتظار المصعد وصعد السلم سريعا ليدخل غرفة والده مهرولا وبلهفة
عمر بقلق .. بابا حبيبى سلامتك الف سلامة عليك
ولكن لم يأته رد .. فقد كان مظهر والده وكأنه غائبا عن الوعى ولا يدرك شيئا مما حوله
نظر له برعب ثم وجه نظره لوالدته متسائلا
عمر .. ايه يا ماما بابا ماله ومبيردش ليه ؟
سعاد .. اتطمن يا حبيبى الحمدلله جت سليمة .. هو بس كان خارج من مكتبه فجأة وقع ونقلوه هنا
عملوله التحاليل والفحوصات اكتشفو انها جلطة فى المخ اللى خلته يقع وللاسف ده اتسبب فى كدمات فى ذراعه ورجله
فالدكتور اداله حقنة تدوب الجلطة وعلقوله محاليل ومسكنات عشان تخفف الم الكدمات وده اللى مخليه نايم ومش حاسس بحاجة
ادم .. حمدالله على سلامته ربنا يقومهولكم بالسلامة ويطمننا عليه
سعاد .. الله يسلمك يا ابنى .. تعبت نفسك ليه يا حبيبى وجيت كل المشوار ده .. وكمان ضيعت المحاضرات عليك
ادم .. متقوليش كدة يا أمى عمو حسن زى والدى بالظبط وقلقت عليه لما حضرتك اتصلتى وعمر كمان كان مرعوب مقدرتش اسيبه
سعاد .. ربنا يخليكم لبعض يابنى والله عمر دايما بيقولى ادم ده اكتر من اخويا وجدع اوى
ادم .. تسلمى ربنا يخليكى
عمر .. انا هروح اشوف الدكتور اساله ممكن نخرج امتى
ادم .. انا جاى معاك .. بعد اذنك يا امى
سعاد .. اتفضل يابنى
وبعد لحظات كان الطبيب يتحدث مع عمر عن حالة والده
الطبيب .. هى الحالة حاليا مستقرة الى حد ما عشان كدة نقلناه من الرعاية بس محتاج يتحط تحت الملاحظة ٢٤ ساعة عشان نتطمن اكتر وبعدها ممكن تخرجوه بس اهم حاجة الراحة التامة اسبوعين عشان رجله فيها كدمات شديدة
عمر .. تمام متشكر يا دكتور .. عن اذنك
ادم .. الحمدلله يا عمر عمو حسن كويس اتطمن واهدى باة شوية ده انت نشفت دمى ياشيخ
عمر .. انا اسف يا ادم لبختك وتعبتك معايا وعطلتك عن محاضراتك
ادم .. بس ياض بلاش كلام اهبل .. انا قصدى تهدى وتطمن قلبك انا كنت خايف عليك انت كمان من التوتر والرعب اللى عيشتهولنا
واكمل مغيرا الموضوع حتى يخرج عمر من حالته هذه يلا نروح ناكل حاجة باة احسن انا واقع من الجوع
هاااا .. هتعزمنى فين
عمر .. انا كمان اللى هعزمك .. بدل ما تقولى انا هجيبلك اكلة حلوة تفتح نفسك عشان تفرفشنى وتنسينى اللى حصل !!
ادم .. لالالا سيبك من الكلام ده بلا افرفشك بلا بتاع .. انا على ارضك يا معلم وفى بلدك يعنى لازم انت اللى تعزمنى امال فين كرم الشرقاوية يابنى
عمر .... ممممم انا ملاحظ انى اتدبست فى العزومة واللى كان كان .. يلا بينا قبل ما ارجع فى كلامى
....
فى المساء ..
كانت ملك تتحدث مع عاليا عبر الهاتف
عاليا .. ايه اللى عملتيه ده يخربيتك .. برضو عملتى اللى فى دماغك مفيش فايدة
ملك .. امال فاكرانى هعد اتفرج على اهاناته واحراجه ليا واسكت .. لازم اديله على دماغه عشان يحرم يدوسلى على طرف
عاليا .. مش كنتى فهمتى منه الاول ياموكوسة بدل اللى نيلتيه ده
ملك .. افهم ايه .. انتى عايزانى اروح اقوله مجتش ليه !! عايزانى اقلل نفسي اكتر يا عاليا
لا طبعا .. انا مستنية اشوف رد فعله بس .. كان نفسي يبقى ادامى دلوقتى واشوف تعبيرات وشه المغرور المتعجرف ده
ودينى لاندمه
...
فى نفس الوقت كان ادم يجلس شاردا بحديقة منزل عمر بعد ان اصر عليه بالبيات معه هذه الليلة ورفض تماما سفر ادم فى الليل
وكان ادم سيرفض عرضه ويسافر ولكنه وجد صديقه سوف يقضى الليلة وحده بالمنزل بعد ان بقيت والدته مع والده بالمشفى .. فظل معه حتى لا يتركه وحيدا فى هذا الظرف العصيب
ذهب اليه عمر حاملا كوبين من الشاى الساخن الذى يدفئ القلب ويريح النفس حيث كان الجو باردا قليلا
عمر متحدثا وهو يجلس بمقابل ادم .. كوبايتين شاى باة انما ايه يعدلو الدماغ ويدفونا فى التلج ده
لم يجبه ادم وكأنه لم يستمع اليه من الاساس
عمر .. ايه يا عم روحت فين
ادم .. هااا .. بتقول حاجة يا عمر
عمر بضحك .. لا يا حبيبى مبقولش كنت بكح بس
لم يرد ادم
عمر .. مالك يا ادم بتفكر فى ايه شاغلك اوى كدة
ادم .. كان عندى اجتماع مع ملك انهاردة .. وطبعا اللخبطة اللى حصلت دى خلتنى محضرش ولا حتى لحقت ابلغها قبل ما اسافر
واكيد طبعا اعدت استنتنى وافتكرت انى قاصدها ومش عايز اشتغل معاها
عمر .. بس هيا اكيد هتلاحظ عدم وجودنا احنا الاتنين فى اخر محاضرة
ادم .. وممكن برضو متاخدش بالها
عمر .. طب ومستنى ايه .. كلمها واعتذرلها وفهمها اللى حصل قبل ما تشيل منك تانى .. واكمل ناظرا له بحذر .. احنا ما صدقنا كانت رضيت عنك
ادم .. ما انا لو معايا رقمها يا اذكى اخواتك كنت كلمتها من بدرى
عمر ... ممم خلاص ابعتلها رسالة على الفيس
مش انتو بتتكلمو عليه
ادم .. اه صحيح ازاى نسيت الموضوع ده
خلاص هبعتلها رسالة قبل ما انام عشان اصلح الموقف
عمر .. والله انا مش عارف ليه دايما بينكم سوء تفاهم كدة والدنيا بايظة
هيا شايفاك مش طايقها ومش عايز شغلك معاها وانت على العكس بتحاول ترضيها وتصلح موقفك قصادها
ادم بتفاؤل .. ان شاء الله هيا هتتفهم موقفى ومش هتزعل ونبقى نعمل الجدول يوم الخميس باة هنعمل ايه
بعد وقت ليس بقليل صعد ادم الى غرفته التى اعدها له عمر
فتح اللاب توب الخاص به وكان على وشك ان يبعث برسالة اعتذار لملك
ولكن كانت ملك قد سبقته وفجرت قنبلتها بوجهه حتى اصابته بصدمة مما رأه .. ظل ناظرا لشاشة اللاب توب تتطاير من عيونه شرارات الغضب والحسرة معا
.....
ترى ماذا فعلت ملك لتجعله يغضب هكذا !!
والى متى ستظل العلاقة بينهم متوترة كعلاقة قط وفأر
هذا ما سنعرفه فى الجزء القادم
لو البارت عجبكم عايزة تفاعل بأة ومستنية تعليقاتكم عشان انزل بالجزء التانى
قراءة ممتعة 😘 دمتم بألف خير ❤️
•تابع الفصل التالي "رواية انت عشقي وقسوتي" اضغط على اسم الرواية