رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثالث و الخمسون 53
حسام / و عشان كدا عاوز اعرف انا بلعب مع مين مسنود على مين هو انتى بعد كل ده مش بتثقى فيا
هدايه / ههههههههههههه بعد كل ده !!!
حسام / دا انتى طماعه بقي عاوزه اكتر من كدا ايه
هدايه / و انا كنت خدت ايه اصلا
هدايه تقوم تلبس
حسام / على فين
هدايه / بيتهيالى تروح لمراتك و كفايا مؤتمرات لحد كدا
حسام / انا مش هيبقي عندى مؤتمر كل يوم ما تبقيش رخمه بقي
هدايه / لازم تتعلم ان لما تبقي فى فى ايدك نعمه تقدرها مش تحاول تستغلها انك توصل لنعم تانيه … النعم بتزول يا سمسم
حسام / بسم الله ما شاء الله دا عرق النكد الحريمي واصل حتى للبنانيات
هدايه تبصله و تضحك و تروح تعدل مكياجها حسام يقوم يوطى عليها و يحضنها
حسام / خليكي و هصالحك و وعد مش هنتكلم فى الشغل خالص
هدايه تحط الفرشه على التسريحه و تبص لحسام فى المرايه
هدايه / لو بس ما كنتش بحبك
حسام يبوسها من خدها و يطلع بره
………………………..
فى شقه نور
نور / طب انت ليه مضايق المفروض تفرح
على / الراجل ده مش كويس قفلنى
نور / الراجل صريح عنده مشاكل و ما صدق حد ممكن يهتم و لجاله
على / انا لو مكانه
نور / انت مش مكانه انت مش مكانه و ما دام انت مش مكانه مش من حقك تحكم عليه ما يمكن فعلا وضعه المالى ما يسمحلوش انه يصرف على الخمس عيال
على / انا احتكيت بناس كتير اوى و الجدع ده و افتكرى كلامى كويس الجدع ده مش سالك
نور / عشان الورد يا على عشان الورد
على / بس انا هعمل ايه فى حكايه المدرسين دى انا ورطت نفسي معاه عشان اى حجه اخد بيها العيال
نور / انت جيت فى جمل دا انا احلهالك بمكالمه تليفون
على / نور
نور / انت مستهون بيا و لا ايه انا ليا صحبات كتير مدرسات و اللى مش مدرسين اكيد يا عندهم عيال يا حد من قرايبهم عندهم عيال بقولك سبلى الحكايه دى … والله هشرفك
على / انتى علاطول مشرفانى من غير حاجه
نور / حبيبي انت
……………..
فى شقه ندى
حسام يدخل بالراحه و يقفل الباب بشويش يحط شنطته و يدخل يلاقى ندى نايمه و حبيبه صاحيه يلاعبها و يروح ينام جنب ندى بشويش تتفزع و تصرخ ياخدها فى حضنه
حسام / دا انا يا قلبي انا انا
ندى / خضيتني … ما كنتش اعرف انك جاى النهرده
حسام / ما قدرتش استنى للصبح وحشتيني اوى
ندى / و انت كمان
حسام يبتسم اوى
حسام / ايه ؟ قولتى ايه؟
ندى/ و انت كمان يا حسام … عملت ايه فى المؤتمر … اعملك حاجه
حسام/ لا يا قلبي ارتاحى شكلك مرهق و اكيد حبيبه تعبتك فى غيابى
ندى / لا العادى يعني الحمد لله كنت مرعوبه تسخن و لا يجرالها حاجه و انا لوحدى ما اعرفش اتصرف
حسام / و اديني رجعت يا قلبي نامى و ارتاحى و ما تقلقيش من حاجه خالص
ندى تهز راسها و تنام حسام يبعد بايده شعرها ورا ضهرها و هو مبتسم تبصله
ندى / المؤتمر كان حلو
حسام / انتى احلى
ندى / يعنى الحمد لله ربنا وفقك عرفت الحاجات اللى كنت عاوزها
حسام / مش كلها بس بنسبه مقبوله اه وصلت للى انا عاوزه
ندى / الحمد لله فى مؤتمرات تانى قريب
حسام / فى بس مش هروح
ندى / ليه ؟ بعيد ؟
حسام / مش الفكره بس انتوا بتوحشونى اوى مش ببقي مرتاح ببقي عاوز اكلمك و ببقي خايف تكونوا نايمين انا عارف بيبو و حركاتها فاكيد ما بتصدقى تنامى
ندى / لا عادى ابقي كلمنى عادى انا اكمنى مش مرتبطه بحاجه كنت مانتخه
حسام يبتسم
ندى / بيبو تصحى اصحى معاها ناكل اى حاجه و نلعب شويه نامت افرد ضهرى جنبها و كدا
حسام / طب الحمد لله
ندى / انت جعان اعملك اكل
حسام / هو جعان بس
ندى تقوم يبتسم و يقوم وراها على المطبخ بتقيد البوتجاز
ندى / هعملك بيضتين بالجبنه الموتزاريلا زى ما بتحبها
حسام يحضنها من ورا
حسام / انا بحبك انتى
ندى تفلت منه و تروح تطلع عيش
ندى / انا كمان جعانه هطلعلى رغيف انا كمان بلا دايت بلا بتنجان بقي
حسام / ههههههههههه احسن برده
ندى تسخن العيش و حسام متابعها
…………………
فى شقه سحر
سحر / هو مش قفلنا الموضوع ده و خلصنا بتفتحه تانى ليه
الراجل / الجدع بيستاذن يفسح العيال يوم الخميس فيها ايه دى
سحر / هبقي افسحهم انا
الراجل / و هتفسحيهم فين ان شاء الله هى الفسح دى مش محتاجه مصاريف و لا هو اقرع و نزهى
سحر / يا راجل افهم العيال دول امانه ما ينفعش اديهم لاى حد و لا اسببهم مع اى حد
الراجل / و هم دول اى حد
سحر / و انت تعرفهم منين بس
الراجل / الجدع لو كان عاوز ياذيهم ما كان اذاهم و بعدين انا سالت عليهم ناس محترمه و سمعتها زى الفل
سحر / انا الكلام ده ما ياكلش معايا
الراجل / يوووووه ربنا بعتلك واحد يساعدك انتى بقي بتتبترى على النعمه ليه و بعدين يا ستى بسيطه جربى و على ضمانتى
سحر / لا يعني لا
الراجل / خدى عيالك و روحى معاهم
سحر / و هو اخدانى العيال و مرواحى معاهم مش محتاج مصاريف
الراجل / اعملك ايه يعني بصي هى ميه جنيه اللى معايا اول عن اخر وريني بقي هتمشي البيت ازاى بقي لاخر الشهر انا داخل انام
سحر / تصبح على خير
الراجل / و لا هنشوفه فى البيت ده
سحر تنفخ و الراجل يدخل جوه يس يطلع من الاوضه
سحر / عاوز ايه انت كمان
يس / عاوز اروح لعموا على و طنط نور
سحر تقعد فى مستوى يس
سحر / عاوز تسيبنى يا يس
يس / انا مش بعرف انام جوه امير و شهاب بيزقونى و يوقعونى من على السرير
سحر / نام جنب فادى
يس / بيعمل على نفسه بيبي ما تخلى فادى ينام جنب امير و شهاب و لا خديه ينام جنبكوا
سحر / اخوك الصغير يا يس معلش استحمله بكره يكبر و يعرف يمسك نفسه
يس / عموا على عنده اوضه مكتوب على الحيطه حبيبه طنط نور بتحبنا و بتحكيلنا ستوريز قبل ما ننام
سحر / عاوزنى احكيلك قصه يعني بسيطه تعال يا سيدي انيمك و احكيلك الاستورى اللى انت عاوزها
سحر تقوم و تمسك ايد يس و يدخلوا جوه
……………………….
فى الشركه عند حسام
هدايه / يعني ايه هو لعب عيال
حسام / انا بس عاوز اجل معاد التسليم شويه مش اكتر
هدايه / ليه
حسام / عشان ما ينفعش انا كدا بثير الشبهات
هدايه/ اسمع يا حسام لو طمعان
حسام / اقسم بالله ما فلوس بصي انا تهمنى الفلوس بس انا مش غبى انا عارف امتى اوقف و امتى اكمل
هدايه / هى بقت كدا يعني
حسام / اهدى و اعقلى و فكرى فيها بالراحه هتلاقيني صح البضاعه هتكون فى المخزن فعلا بس هتتاخر شهر واحد
هدايه / قولتلك مش هتتاخد من المخزن
حسام / ما هو العربيه مش هتعمل حادثه مرتين ورا بعض و فى المرتين العربيه محمله نفس الاصناف و بنفس الكميات
هدايه / ما تخافش احنا بنغير الطريقه كل مره جهز انت الكميه و ما لكش دعوه
حسام / افهم الاول
هدايه / انت غاوى وجع قلب
حسام / وجع ساعه و لا حبس الف ساعه
هدايه / هنلعب فى الدفاتر
حسام / الله !!! يا حلاوتكوا هتلعبوا فى عهدتى
هدايه / يا سيدى الموضوع هيبقي بعيد عنك خالص
حسام / ازاى بقي ان شاء الله
هدايه / مش هينفع هنا خلينا نتقابل بره و
حسام / و لا بره و لا جوه انا بلعب اللعب ده كله عشان اوفر لمراتى عيشه تليق بيها مش عشان اخسرها
هدايه / و انا يهمنى ان علاقتك بيها تبقي كويسه بس تفتكر لما تدخل على مراتك و فى ايدك دبدوب فرو صيني هتفرح اكتر و لا لما تخش عليها بعقد سوليتير هتفرح اكتر
حسام / انتى ما تعرفيش ندى
هدايه / كل الستات بتضعف قدام الالماظ ما فيش استثناءات
حسام / قولت النهرده ما ينفعش هبقي اكلمك لما اظبط نفسي
هدايه / ما تتاخرش انا مش هسيب الشغلانه دى تفوتنى انت فاهم و لا لا مهما كان التمن … مهما كان التمن
حسام يبصلها و يبتسم و يمشي و هى واقفه بتغلى
……………….
فى المحل عند على
على قاعد فى المكتب الباب يخبط و الباب يتفتح نور على يبصلها و يتعدل
على / ايه المفاجات الحلوه دى
نور تفتح شنطتها و تطلع ورقه و تحطها قدام على يبص فيها مليانه نمر تليفونات
نور / ارقام كل المدرسين اللى صحابى يعرفوهم عربى انجليزى ماث و حتى الفرنساوى و الالمانى و سينس انا ما اعرفش هم بيدرسوا ايه فجبت كل مدرسين الابتدائي
على / بالسرعه دى !!!
نور / و انت فاكرنى بلعب و لا ايه دا انت من ساعه ما نزلت و انا برغى فى التليفون لما ودانى ورمت … بس الوقت سرقنى و ما عملتش اكل فقولت اسبقك و اجى اتلاجئ عليك
على يضحك
نور / اطلبلى اكل بقي
على / عيونى ليكي تحبى تاكلى ايه
نور / بيتزا سوبر كرانشي
على / بس كدا استنيني هنا ثوانى و راجع
نور تروح تقعد و على يطلع بره
………………
فى شقه ندى
ندى بتغسل المواعين و حسام بيشطف
ندى / و انا ايه اللى هيضايقني يعني
حسام / انا والله من اول ما جيت و انا كل مره بتهرب بحجه شكل
ندى / انت لو كنت قولتلى من الاول اكيد ما كنتش هعترض و بعدين انت اكيد محتاج تكون صداقات هنا
حسام / طب ما انتى هنا لوحدك
ندى / انا معايا بيبو و بكره تكبر و تروح الحضانه و التمرين و هتعرف على ناس برده
حسام / يعني تمام اقولهم اوك هاجى
ندى / اكيد لو عاوز
حسام / هو عاوز بس اكيد لو قضينا الوقت سوا هيكون احسن و احسن
ندى / عادى يعني مره انا و مره هم مش حوار يعني
حسام / تمام
ندى / انا خلصت هروح اللم الغسيل
حسام / هشطف الطبقين دول و احصلك
ندى / تمام
ندى تغسل ايديها و تطلع بره
………………
فى شقه نور يوم الخميس
نور بتلبس الباب يتفتح و على يدخل
على / نور انا جيت
نور تطلع من جوه
نور / اتاخرت كدا ليه
على / كنت بشترى شويه حاجات
نور / طب ادخل معلش شيل معايا الاكياس من المطبخ عملتلكوا شويه كيك و ساندوتشات هتاكلوا صوابعكوا وراهم
على / تسلم ايدك
على يدخل المطبخ نور تدخل تجيب شنطتها من جوه و يتقابلوا فى الصاله
على / يلا هنتاخر
نور / جاهزه اهو
على و نور ينزلوا
…………………..
فى شقه ندى
ندى قاعده بتتفرج على التليفزيون تليفونها تجيله رساله تاخد التليفون و تبص فيه
ندى / قاعده لوحدك ليه !!
ندى تستغرب و تبص حواليها البلكونه و الشبابيك مقفوله تنفخ و تعمل للرقم بلوك
ندى / ربنا يتوب علينا
ندى توصلها رساله تانيه من رقم تانى تفتحها
ندى / اعملى بلوك لمليون رقم مش هيغير حقيقه ان جوزك بيخونك !!
ندى تضايق و تتصل بالرقم تلاقيه مقفول تنفخ تتصل بحسام تلاقيه مقفول تحط الموبايل و تقوم تدخل جوه
……………………
فى مطعم فخم
هدايه / ها فهمت
حسام / مخاطره كبيره اوى و المرادى مش زى كل مره المردى انا فى وش المدفع
هدايه / و انا هرضالك الازيه يعني
حسام / معقول حبيتيني بالسرعه دى … ما تعدلى يا هدهد و انا ديتي ايه عندك اطير انا و ترسمي على اللى بعدى و اللى بعده و اللى بعد اللى بعده و هلم جره
هدايه/ تبقي ما تعرفنيش
حسام / شوفى سكه تانيه تخرجى بيها الشغل و انا معاكى
هدايه / شوف انت و انا اللى معاك
حسام / و انا لما اعمل كل حاجه حبايبك بيقبضوا ليه
هدايه / عشان يسيبونا نشتغل
حسام / والله !!
هدايه / فكر فى طريقه تانيه و اوعدك هكلمهم يظبطولك النسبه
حسام / ماشي
حسام يقوم و يطلع فلوس
هدايه / رايح فين
حسام / مروح انا وعدتها هسهر ساعتين تلاته اللعب بلايستايشن مع صحابى و بعدين احنا اتفقنا على كل حاجه القاعده بعد كدا ما لهاش لازمه
هدايه / اخص عليك
حسام / صحيح ياريت تحاولى ما تتكلميش معايا كتير فى الشركه بيتهيالى لفتنا الأنظار لعلاقتنا بما فيه الكفايه
هدايه / علاقتنا !!!
حسام / اه سورى … شراكتنا … البيزنيس اللى بنعمله سوا
هدايه / طب على الاقل وصلنى
حسام / اكيد اتفضلى
هدايه تقوم و تمشي مع حسام
…………………..
فى الملاهى
نور قاعده مع سحر و الراجل و على واقفين قدام الخمس عيال و هم بيلعبوا
سحر / و ما دام ماشيين فى سكه الدكاتره ليه مصره تاخدى يس و نغم
نور / الامل بسيط جدا دا غير ان على متعلق بيهم اوى … انا مش هخبى عنك يس و نغم بيفكروا على بطفولته على كان له اخت صغيره و اتوفت بسبب خلافات اسريه و كدا
سحر / بس الوضع عندنا مختلف
نور / انا متاكده من ده بس
سحر / و بعدين افرضي العيال بعد ما سبتهوملكوا و اتعلقوا بيكوا ربنا كرمك و حملتى
نور / دا احتمال ضعيف
سحر / قادر على كل شئ و بعدين هو حد يكره
نور / انا مش هاخدهم منك انا ما اقدرش اربيهم لوحدى اصلا و حضرتك ربنا يباركلك
سحر / انا مش مقصره معاهم
نور / عارفه انا بس بعرض مساعده فى تربيتهم اسمحيلى و اكسبى فيا ثواب
سحر / اكسب فيكي ثواب !!!
نور / ايوه انا والله نيتي خير و على كمان دخلى الروح لبيتنا و خلينا نساعدكوا فى تربيه الاولاد يومين تلاته عندى و الباقي عندك هجبلهم المدرسين فى الايام اللى عندى و اوديهم تمرين و الايام اللى عندك تبقي ايام راحه او نظبط مواعيدهم زى ما تحبى
سحر تبص على العيال
نور / فكرى انا مش بضغط عليكي و فى اى وقت الوضع ما عجبكيش ما فيش حاجه تجبرك و خدى الضمانات اللى تحبيها
سحر تبص لنور و ترجع تبص للعيال
………………………
فى شقه ندى
حسام يدخل يلاقي ندى قاعده فى الصاله و لا كان حسام دخل
حسام / السلام عليكم
ندى / كنت متوقعه انك هتتاخر عن كدا ايه هى القاعده ما عجبتكش و لا ايه
حسام / ما هو على راي المثل قاعده الراجل بميه ست بس ان جت الست يغور الميه راجل
ندى / يعني ما انبسطش
حسام / يعني اهو
ندى / طب الحمد لله تحب اعملك تتعشي
حسام / ياريت والله واقع
ندى تبصله و تبتسم و تقوم يروح وراها
حسام / عملتى ايه و انا بره
ندى / ابدا قلبت فى التليفزيون كان فى حفله لنانسي عجرم قعدت اسمع انت عارف انى بحبها
حسام / حبيبه ما تعبتكيش يعنى
ندى / ابدا … المهم بقي اتفقت مع صحابك هتتقابلوا تانى امتى
حسام / ما اتفقناش
ندى / تمام روح غير على ما اغرف
حسام يبتسم و يهز راسه و يمشي ندى تنفخ
……………………
فى شقه نور
على / ما قولتلك اكتبيلى الطلبات فى ورقه و انا هبعتهملك مع حد من العيال
نور / ما بيعرفوش ينقوا بيعبوا و خلاص الكرنبه المره اللى فاتت كانت فاضيه خالص
على / كرنبه !!!
نور / ايه ما نفسكش فى طبق محشي سخن كدا تبر بيه قلبك
على / دا العشق ده
نور / خلاص كلمنى قبل ما تيجي اعلق عليه عشان تيجي تلاقيه سخن
على / بصي عارفه اخر سطر كدا
نور / ماله
على / بحبه ملسوع مش شايط ملسوع بس
نور / طب و باقي الحله اكلها انا بقولك ايه انا اللى احطه تاكله و تقولى تسلم ايدك انا شكلى دلعتك باين
على / تمام يا فندم اتفضلى قدامى على السوق
نور / ثوانى هجيب الشنطه
……………………
فى الشركه
هدايه تدخل تحط لحسام مج
هدايه / حسيت انك مش رايق قولت اعدلك دماغك
حسام / و انا ايه اللى هيخليني مش رايق
هدايه / تمام يبقي انا فهمت غلط
حسام / على فكره واضح ان كلامى إمبارح ما وصلش
هدايه / ماشيه … صحيح خيرا تعمل شرا تلقي
هدايه تمشي و حسام يكمل شغل شاب يدخل
الشاب / مستر عدنان بده اياك دكتور حسام
حسام يحط القلم
حسام / ما تعرفش عاوزنى ليه
الشاب / لا والله
حسام / قال يا خبر بفلوس
حسام يقوم و يعدل هدومه و الشاب مبتسم
…………….
فى شقه نور
نور بتكلم ندى فيديو كول و هى قاعده على سريرها
نور / طب ليه ما سالتيهوش
ندى / لان فعلا مش فارق معايا بالعكس انا اتحايلت عليه يتجوز ما انتى عارفه
نور / يا دى الهبل يا بنتى فى واحده عاقله تقول كدا
ندى / ما انا تعبت يا نور ما كل حاجه على ايدك
نور / لا اله الا الله ما يمكن مظلوم و فى حد بيحاول يوقع بينكوا فى اى حاجه تخليكي ممكن تشكى حتى غير الرسايل دى
ندى / لا ما بركزش اصلا يعني قولتلك كدا كدا الموضوع مش فارق معايا
نور / ما يمكن حد ابن حرام بيوقع بينكوا
ندى / و ابن الحرام هيجيب رقمى منين انا ما ليش خلطه باى حد هنا انا حتى الجيران لسه ما اتعرفتش عليهم البيت مش بخرج منه غير مع حسام ما ليش نفس اكلم حد و لا اختلط بحد كفايا اوى اللى حصل فى الشقه القديمه
نور / ما كانش غلطتك
ندى / عارفه بس برده
نور/ ما انتى اكيد هتقابلى اشكال و اللوان اللى يعيش ياما يشوف يا نونتى
ندى / انتى وعدتيني
نور / يا بنتى عيب والله ما هقول لحد بس بجد حاولى تتكلمى معاه يمكن حد من صحابه اللى كانوا معاه امبارح بيعمل فيه مقلب او بيخزوقه عادى و هو بيلعب ياخد الرقم من موبايله و يغفله بتحصل حسام كان بيحكيلى على بلاوى ايام ما كان فى الامارات … طب والله افتكرت اول ما راح اتنين كانوا هيموتوا بعض معاه فى الشركه
ندى / فاكره الحكايه دى لما واحد كان بيشاغل مراه التانى
نور / شوفتى يعني الزباله فى كل حته كلميه
ندى / انا كدا كدا عملت بلوك و خلاص و ان كان حقيقه او كدب انا مش فارق معايا
نور / على الاقل ياخد باله من صاحبه الزباله اللى عمل فيه الحركه دى
ندى / و لما يعرفه و يتخانقوا و تقلب بغم مش بيت هنعزل منه ده شغله يا نور
نور / والله معاكى حق بس اهو اكيد هو هيعرف يتصرف
ندى / لو اتكررت ابقي افكر لكن دلوقت موقف و عدى
صوت على / انا جيت
ندى / انا هقفل بقي و ما تنسيش انتى وعدتيني
نور / يا بنتى انا حلفت
على يدخل الاوضه
نور / سلام
نور تقفل
على / ندى
نور تهز راسها بزعل على يمدد جنبها على السرير
على / دا الموضوع شكله كبير بقي احكى
نور / بعد اللى عملته المره اللى فاتت ؟ حلفتنى مليون يمين ما احكيلك حاجه دى بقت بتحكيلى بالعافيه
على / كنتى عوزانى اسكت يعني
نور/ لا يا على بس نفكر بالراحه و بهدوء انت اصلك ما جربتش الغربه و البلاوى اللى بتحصل فيها
على / بس جربت الوحده و انك ما يكونلكيش ضهر و لا سند و الكل يشوفك سهله و يطمعوا فيكي
نور تضحك
نور / و انت بقي كانوا بيطمعوا فيكي يا بيضه انتى يا حلوه
على / اه بيضه و حلوه و فيا الطمع طب دا انا واد مز و ما حصلتش
نور / ههههههههههههه على يدى
نور تقوم من السرير على يقوم وراها يروحوا المطبخ
نور / اغرفلك بقي شويه محشي عنب
على / احكى يا نور ما لها ندى
نور / فى حضره المحشي الصمت واجب يا على بيه
على / فى حضره الفضول
نور / انا وعدتها و حلفتنى
على يبص فى الارض
على / طب هى كويسه يعني البنت بخير اهم حاجه اخوكى عمل حاجه
نور / حسام معيشها فى اخر دلع كالعاده و مش بيخليها ناقصها حاجه و بيفسحها و يشتريلها كل اللى محتاجاه و اللى نفسها فيه هى و بيبو و اب و زوج زى الكتاب ما بيقول ما يتخيرش عنك و حبيبه الحمد لله زى الفل بتكبر بصحه و ندى الحمد لله كويسه و حياتها مستقره ارتحت كدا
على / و ما دام كل حاجه وردى كدا بتحلفك على ايه بقي
نور / الدنيا فيها بلاوى يا على عادى كلنا بنحتك بناس وحشه
على/ زياد تانى ؟
نور / و زياد هيعرف طريق ندى منين عادى معاكسات التليفون بتحصلنا كلنا عملت بلوك للرقم كلمها من رقم تانى عملت بلوك و الموضوع خلص اجرى انت بقي اتصل بحسام و كبر الموضوع
على يبص لنور باستغراب نور تغرف
نور / انا حلفت انى مش هقول و خلتنى اقول اصل انت اصلا ما بتصدقنيش
على / فضول مش اكتر
نور / حصل خير ممكن تروح تغير هدومك بقي
على / بتقولى بتحصلنا كلنا ؟ انتى فى حد بيعاكسك فى التليفون
نور تسيب اللى فى ايدها و تبصله باستغراب
نور / لا بجد كدا كتير فى ايه يا على
على / اعرف
نور/ ايه انت عمرك ما كلمك رقم غريب و لما سمع صوتك اتسهوك
على / و لا رقم معروف حتى انا ما حدش عمره يجرؤ يتسهوك عليا
نور تقرب من على و تمسك هدومه بدلع
نور/ امال حصل ايه للمز اللى فيه الطمع
على / ما تزنوقنيش بينك و بين المحشي عشان جعان
نور / اخص عليك اختارت المحشي
على / ما هو المحشي هيبرد و انتى تعبتى فيه بس انا بحبك والله الله بقي
نور / هههههههههههههه روح غير يا على
على / انتى شريره يا بت
نور / ههههههههههههههه امشي بقي خليني اغرف
على يخطف بوسه من خدها تتفاجئ يضحك و يمشي و هى تروح تكمل غرف
……………………
فى شقه سحر
الراجل / احنا خرجنا مع الناس و شوفناهم و عرفناهم قلقانه من ايه بقي
سحر / انت بتزن كتير ليه فى الموضوع ده
الراجل / عشان ده الصح و بعدين العيال هيبقوا بين هنا و هناك يعني راجعين راجعين و العيال كدا كدا متعلقين بيهم و هنتابعهم و مع اول غلطه هنسحبهم
سحر / فى غلطات ما بتتصلحش ما ينفعش تامن على عياك مع اى حد
الراجل / و هم دول اى حد
سحر / ابن عمك و انا ما اعرفش مثلا
الراجل / لا اله الا الله لا يا ستى مش ابن عمى بس الراجل شال العيال وقت ما كانلهمش حد و نضفهم و لبسهم و اكلهم لو كان عاوز ياذيهم ما كانش هيستنى اما نبقي احنا فوق راسه يعنى
سحر / برده مسؤليه نور دى ما تفهمش حاجه فى الامومه
الراجل / لا هترضع و لا تغير بامبرز اخرها تطبخ و تحمى مش حوار يعني اى واحده تقدر تعمله الصعب عدى
سحر / افرض حاجه حصلت هعمل ايه ساعتها
الراجل / ما هو اللى ممكن يحصل هناك ممكن يحصل هنا عادى العيال بلاويهم ما بتخلصش و انتى عارفه
سحر / اديك قولت
الراجل / يومين هنا و يومين هناك و اهو حد يشيل من على ضهرنا اى حاجه
سحر / و هيبقي ليك عين ازاى تكلمهم و هم اللى بيصرفوا على العيال
الراجل / اديكي قولتيها العيال انما انا ما حدش بيصرف على عيالي و لا عليا و بعدين هم ما حدش طلب منهم جنيه هم اللى عرضوا و اتحايلوا كمان
سحر / و انا مش مرتاحه
الراجل / لا اله الا الله يعني تكديس العيال فوق بعض فى سريرين ميه و عشرين مريحك الربع فرخه بتاع ابنك اللى بقيتى تقسميه على اتنين مريحك
سحر / ربنا يبعتلنا رزقهم
الراجل / لا اله الا الله ما هو بعت اهو و انتى اللى بتتبطرى
سحر / يا اخى اتقى الله بقي دول يتامى
الراجل / اتنين ما بيخلفوش كفلوا عيلين يتم فيها ايه دى
سحر / انا مش راده عليك
سحر تقوم و تدخل جوه و الراجل بينفخ
…………………….
فى شقه ندى
ندى / طب ما دى حاجه كويسه
حسام / التوقيت بس اللى قالقنى
ندى / عشان لسه راجع من مؤتمر يعني
حسام / لا يا ندى دى مش يومين وراجع ده نقل و يا عالم هرجع امتى
ندى / فاهمه اكيد بس برده ما تنساش انك هتبقي مدير فرع و فى حواز زى ما فهمتنى و بدل انتقالات يعني الموضوع جايب همه
حسام / انا كنت فاكر ان العلاقه بينا اتحسنت
ندى / ليه بتقول كدا
حسام / لانك ما صدقتى هبعد عنك و ارجع يوم فى الاسبوع
ندى / انا ممكن اجى معاك عادى على فكره تقدر تسافر يومين ترتب الدنيا و تبعتلى اجى دا مش دوله تانيه دى حياله منطقه تانيه
حسام يبصلها و يهز راسه
ندى / كانك فى مؤتمر عادى
حسام / مش عارف سبيني افكر
ندى / انت اكيد بتفهم فى شغلك اكتر منى ففكر و خد القرار اللى انت شايفه صح و لو تحب تسمع نصيحتى صلى استخاره
حسام / ربنا يقدم اللى فيه الخير
………………….
فى شقه نور
نور و على نايمين تليفون نور يرن تمد ايدها و ترد
نور / الو
سحر/ صحيتك ؟
نور / مدام سحر !! اهلا اهلا لا ابدا صاحيين صاحيين
نور تزغد على بالراحه يقوم يقعد و هو مستغرب
سحر / انا اتكلمت مع يس و نغم فى الموضوع بتاعنا
نور تقوم تقف و على متابعها باهتمام
سحر / انا مش شايفه مشكله انكوا .. يعنى … بصي انتى لازم تعرفى ان الموضوع ده صعب عليا جدا و مش مرتاحه و لا موافقه عليه بس لو فى حد هيقدر يوفر لعيال اخويا عيشه احسن من اللى هقدر اوفرهالهم انا مش هستخسرها فيهم
نور / مقدره طبعا و ده مش هيقلل ابدا من دورك ناحيتهم
سحر / هم عاوزينكوا ارجوكى توعديني انك مش هتخيبى ظنى و لا تندميني
نور / ابدا والله بالعكس احنا هنشيلهم فى عنينا
نور تبص لعلى و تبتسم
نور / تحبى اجى اخدهم
سحر / خليها بكره اكون لميت حاجتهم
نور / مفيش اى مشكله اعدى على حضرتك بكره اخدهم
على يبتسم
نور / تمام تمام مع السلامه فى حفظ الله
نور تقفل و تروح تقعد جنب على
نور / وافقت و هتلم حاجتهم و هنروح بكره الصبح ناخدهم كدا هنحتاج نشيل سرير بيبو و نجيب سرير كمان ١٢٠ و لا ايه رايك نغير الليفينج اللى ما لها لزمه دى و نجيب اوضه ليس و نخلى نغم فى اوضه حبيبه عادى
على / اللى تشوفيه
نور / يبقي نغير الليفينج و لا نستنى لما يكبروا شويه نبقي نفصل … انا بقول نفصل من دلوقت احسن
على / انا بقول كدا برده
نور / تمام اتفقنا … بس هنعمل ايه فى الليفينج
على / هشوفلها بيعه حلوه ما تقلقيش
نور / انا فرحانه اوى بجد ما كنتش متخيله انها هتوافق بالسرعه دى
على / مش هيجي يوم و تندمى لا ماما و لا مامتك هيسكتوا
نور / المهم انا و انت انت مبسوط انا مبسوطه انت راضي انا ما يهمنيش اى حد
على / و انتى يا نور مش بضغط عليكي
نور / انا بعشق الاطفال يا على يمكن ربنا بعتهملك عوض ليا
على / يعني هتبطلى الحقن
نور / مش هبطل سعى بس مش هبطل اهتم بيس و نغم برده و بعدين ما انا مش هكون لوحدى يعني انت هتكون معايا و هتساعدنى
على / هو انا المفروض اعرف ارد
نور تبتسم اوى على يبوس راسها و يحضنها
…………………….
فى الشركه
هدايه / والله مش عارفه اباركلك و لا اعزيك
حسام / هستناكى النهرده فى نفس المكان
هدايه / الكافيه و لا الشقه
حسام / الكافيه طبعا
هدايه / براحتك
حسام / لما اتنقل ابقي تعالى بصي عليا ما انا هبقي وحدانى
هدايه / و هتقدر تبعد عن ندى و تسيبها لوحدها الفتره دى كلها
حسام / اكيد هاجيبها معايا بس على الاقل لحد ما استقر شويه
هدايه / تمام اشوفك بالليل
حسام يبتسم هدايه تمشي
……………..
فى اوضه حبيبه
نور بترص هدوم الاولاد فى الدولاب
يس / ايوه بس احنا فى الاجازه
نور / ايوه ما احنا هنلعب برضه و نخرج و نروح الملاهى و نتفسح و كل حاجه بس لازم يبقي فى وقت للمزاكره برده
نغم / بس من غير هوم ورك
نور / احنا هنخيب و لا ايه
على يدخل
على / انا كمان كنت بكره الهوم ورك ده … مش هو ده الواجب و لا هيطلع شكلى عره فى الاخر
الكل يضحك
نور / شكرا على المساعده
على / و لكن … و لكن اللى هيعمل الهوم ورك بتاعه له منى مصروف يجيب بيه الحاجه اللى يحبها
نور / او يحوشه و برده يجيب بيه اللى هو عاوزه بس اكبر
على / و مش بس كدا كل اسبوع هنشوف مين حوش اكتر و اجبله هديه
نور / و نفسحه
على / طبعا
يس / بس الهوم ورك بيبقي كتير و ايدى بتوجعنى
على / انت ضعيف و لا ايه … الواد ده ما شربش اللبن بتاعه و لا ايه
نغم / شربناه كله
على / الله امال بقي … تعال وريني كدا
على يقعد على ركبه و يلاعب يس رست و يخسر و الكل يضحك
على / ايه القوه دى امال ايه بقي … اعمليلى كبايه لبن كبيره يا نور عشان اللاعبه بكره تانى
يس / هكسبك برده
على / بتحلم دا انا هقطعك
يس / انا اللى هقطعك
نغم تضحك
نور / طب ممكن ناجل الخناقه دى لبكره و ننام دلوقت عشان نصحى الصبح بدرى
يس / احنا لسه بدرى
على / قولنا ايه
على ينيم يس و جنبه نغم و يغطيهم
نغم / طب احكيلنا ستورى
على / تخصصك
نور تروح تقعد جنبهم و على يطفى النور و يلف الكرسي و يقعد عليه
نور / صلوا على النبى
الكل / عليه الصلاه و السلام
…………………..
فى شقه امانى
امانى / يا راجل ده انا لسه بقول الحمد لله خلصنا الاقيهم جايبينهم تانى
محمد / انتى شاغله نفسك ليه دا حتى انا و كافل اليتيم
امانى / هو انا لازم اكفله فى بيتي يعني
محمد / ما تسيبي البت تفرح
امانى / طبعا ما انت مش هامك و هيفرق معاك ايه بكره يقولها انا العيال فتحوا نفسي على الجواز و الخلفه و يروح يتجوز و يسيبها مدبسه فى ولاد الشوارع دول
محمد/ على ابن اصول ما يعملش كدا
امانى / غسلها مخها فى يومين و بقي ملففها على صباعه زى الخاتم لا تقدر تفتح بقها و لا تقوله تلت التلاته كام
محمد / و هو مخليها بتضحك طول الوقت و مبسوطه و مش حارمها من حاجه و لا مخلى فى جهده جهد
امانى / تعرف انت مفيش فايده من الكلام معاك انا هروح اتصل بامه تشوفها صرفه معاه
امانى تقوم و محمد بيضرب كف على كف
………………..
فى الكافيه
حسام / انا هستلم هناك الحد الحاجه هتبقي فى المخزن الخميس او السبت بالكتير
هدايه / كدا الدفاتر ما عادتش فى عهدتك
حسام / ايه رايك بقي
هدايه / طب و انا اديك نسبتك ليه ما اللى هيمسك مكانك اولى بيها
حسام / براحتك
هدايه / مش هتحاول تهددنى يعنى
حسام يبتسم
حسام / و انا فى ايدي ايه اعمله هبلغ عنكوا مثلا … ما انا برده هتلط معاكوا
هدايه / مش بقولك عاجبنى
حسام / بس هرجع لو مش النهرده بكره بعده بعد عشرين سنه الارض كرويه
هدايه / و اللى ما تحتاجوش النهرده بكره تحتاجله
حسام / دا انتى كدا اللى هتعجبيني
هدايه / اخص عليك هو انا كل ده و لسه ما عجبتكش
حسام يبتسم
هدايه / عشره فى الميه
حسام / و انا مش طماع
هدايه / يبقي اتفقنا تشرب ايه بقي
حسام/ تؤ انا مروح
حسام يقوم هدايه تمسك ايده
هدايه / خليك معايا شويه كمان بليز
حسام يوطى عليها
حسام / هسافر السبت الصبح تعالى معايا و نخلى الشويه كتير
هدايه / طب ما يبقوا شويه دلوقت و كتير يوم السبت
حسام يقعد هدايه تضحك
حسام / الجنتل مان عمره ما يرفض لليدى طلب
…………………..
فى شقه ندى
ندى بتكلم مصطفى فيديو كول و توريله حبيبه
ندى / كبرت صح
مصطفى يبتسم
ندى / حسام داخل على ترقيه و مرتبه هيزيد هكلمه تيجي تعيش معايا هنا
مصطفى يهز راسه لا
ندى / الشقه دى اكبر من التانيه و هتنبسط معايا هو بيسيب البيت معظم الوقت و ببقي قاعده لوحدى مستحيل يرفض
ندى توصلها رساله ما تفتحهاش
ندى / المهم خلينا فيك انت ناقصك اى حاجه
مصطفى يهز راسه لا
ندى / نور بتاخد بالها منك بتعاملك كويس
مصطفى يهز راسه اه
ندى / فى اى حد ييضايقك عمتى طنط امانى
مصطفى يهز راسه لا
ندى / لو احتاجت حاجه هتقولى صح انت مش ناقصك اى حاجه صح
مصطفى يبتسم و يهز راسه لا
حبيبه تزمزق
ندى / شكلها جاعت هقوم بقي هتعوز حاجه
مصطفى يحدفلها بوسه تبتسم و تحدفله بوسه
ندى / هكلمك تانى بكره تصبح على خير
مصطفى يبتسم ندى تقفل و تشيل حبيبه و تحطها على رجلها
………………
فى شقه نور
نور واقفه فى المطبخ بتتبل فراخ على يدخل
على / هو انا هنام لوحدى و لا ايه يا ماما
نور تبصله
على / بابا على على بابا هههههههههه
نور تبتسم و تكمل شغلها
على / انتى عارفه انى للحظه خفت
نور تبصله باستغراب
على / مش سهل انك تبقي مسؤله عن روح المشكله انها مش بس يس و نغم دا كل اللى هيحتكوا بيهم فى المستقبل
نور / التربيه مش سهله بس متاكده ان ربنا هيقدرنا ان شاء الله
على / بس هم بيحبونا صح
نور / انت ايه رايك
على / تفتكرى لما نوصل لمرحله المراهقه و الخناقات بتاعه المرحله دى هيفضلوا يحبونا برضه
نور / لسه بدرى اوى على المرحله دى عشان تشيل همها من دلوقت و بعدين اكيد من هنا لوقتها هنكون عملنا بوندينج كويس معاهم
على / اتمنى
نور تحط الفراخ فى التلاجه و تروح تغسل ايدها
نور / بكره بقي هدوك حته دين اكله تحلف بيها
على / انا بحلف من غير حاجه
نور تبتسم
………………….
فى شقه ندى
حسام يدخل يلاقي ندى قاعده ماسكه موبايلها بتقلب فيه
حسام / اللى شاغلك عنى
ندى تبصله
ندى / انبسطت مع صحابك
حسام / والله كنت مروح بدرى عن كدا بس مسكوا فيا انتى عارفه انى مسافر و ما حدش عارف هرجع امتى
ندى / طبعا طبعا
ندى تطلع بره الاوضه حسام يطلع وراها
ندى / صحيح كنت بتكلم مع بابا النهرده و بصراحه واحشني اوى ايه رايك نبعتله زياره
حسام / دلوقت ؟
ندى / اه دلوقت فيها ايه يعني احنا نقلنا شقه اكبر اهو الحمدلله و الاوضه اللى جوه فاضيه و انت مرتبك زاد و الحمد لله استقرينا بسرعه اهو
حسام / احنا مش عارفين الشقه التانيه اللى هقعد فيها كام اوضه و اكيد مش هدفع ايجار هنا و هناك يعني
ندى / يعني هننقل تانى
حسام/ ما هى كدا كدا شقق مفروش بنام بس شنطنا و حاجتنا يعني دا غير اننا بكدا بنوفر فلوس كتير اوى ايجار شقتين و مواصلات رايح جاى عشان نشوف بعض
ندى / ما انت هتوفر برده جلسات علاج و مرافقين قد كدا كنت بتدفعها فى مصر
حسام / و انتى لما تجيبيه هنا مش هتعالجيه مثلا
ندى / اه هعالجه و احطه فى عنيا كمان
حسام / هو انا معترض ؟انا مش معترض انا بس عاوزك تفكرى فى الموضوع بالراحه
ندى / فكر انت و اعمل اللى يريحك انا تعبانه و داخله انام تصبح على خير
حسام / هو انتى كل حاجه تتقمصى كدا مفيش لغه حوار عندك خالص كدا
ندى / انا لا بتقمص و لا ليا مزاج لخناق و لو كنت عاوزه اتخانق كان اولى اتخانق على كدبك عليا
حسام / افندم
ندى / كنت فين يا حسام
حسام / ما انتى عارفه كنت فين
ندى / ما كنتش مع هدايه يعني
حسام عنيه توسع
ندى / المره اللى فاتت جاتلى رساله بتقولى جوزك بيخونك و طنشت دلوقت مبعوتلى صوركوا سوا
حسام / صور ايه دى … دى اكيد فوتوشوب
ندى / و لا يفرق معايا ان شالله تتجوزها براحتك
حسام / انا مفيش بيني و بينها اى حاجه
ندى / حسام حسام … كبر مخك انت عارف كويس انى انا اللى كنت بتحايل عليك تتجوز
حسام / بس احنا الحمد لله حياتنا اتظبطت و المشاكل اللى بينا تقريبا اتحلت يعني
ندى / تصبح على خير يا حسام
ندى تيجي تدخل جوه حسام يمسك ايدها و يمنعها
حسام / استنى هنا بكلمك
ندى / عاوز تتكلم فى ايه يا حسام … الصور اللى جتلى فوتوشوب تمام هى فوتوشوب اقولك غيرلى رقم موبايلى ده عشان اى كان اللى بيبعتلى الحاجات دى يحل عنى عشان ده تالت رقم اعمله بلوك
حسام / هعرفه ابن الكلب ده و هجيبهولك و هثبتلك
ندى / اعرفه لنفسك و اثبت لنفسك انا كل اللى طلباه منك انك تجبلى ابويا ارعاه اكتر من كدا ما يهمنيش
حسام / بس انا يهمني يهمني تعرفى انى بحبك و انى ما خونتكيش
ندى تدخل الاوضه و حسام وراها و تجيب الموبايل و تديه لحسام
ندى / اعمل اللى تعمله
حسام يفتح الموبايل و يتفرج على الصور
ندى / مش هو ده نفس الطقم اللى انت لابسه دلوقت لحقوا ركبولك فوتوشوب
حسام يبص لندى
ندى / انا من اول ما شوفتها اصلا و انا فهمت انها اكيد مش هتعدى كدا مرور الكرام
حسام/ انا ممكن اشرحلك
ندى / هاتلى بابا و مش هتحتاج تشرح اى حاجه … تصبح على خير يا حسام
ندى تدخل السرير و تدى حسام ضهرها و تشد الغطا عليها و حسام واقف بيغلى
………………
فى شقه عمر
عمر بيكلم على فى التليفون
عمر / ما شوفتش فى حياتى حد اعند منك
على / طب والله كانت فكره نور و هى اللى خلصت الليله
عمر / و امها هتسيبك
على / عشم ابليس انا لقيت ماما بتكلمنى الصبح
عمر / ههههههههههههههههه
على / قولتلها و عملت متفاجاه و هتيجي تسلم عليهم و تقضي معانا اليوم و كدا
عمر / الله يعينك يا ابنى
على / بص انا فرحان و نور كمان و العيال فرحانين و الحياه فوللى و الصراحه مش ناوى اى حاجه تاثر عليا
عمر / حقك بصراحه المهم هتجيبهم و تيجي تعرفنا عليهم امتى
على / قريب ان شاء الله بنظبط شويه حاجات هنا و هجيبهم و اجى ان شاء الله اخبار أية ايه
عمر / عادى لحد دلوقت مفيش اى حاجه من اللى بنسمع عنهم حتى بتقعد تسالنى كتير و اخوك ميح طبعا
على / طب ما تقروا يا ابنى عمك جوجل ما خلاش
عمر / حصل يا رياسه و مستنيه شهور الوحم بفارغ الصبر
على / ههههههههههههه على البركه
عمر / بجد ظبط وتعال بالعيال دى عاوز اشوفهم و اتعرف عليهم هم بينادولك ايه صحيح
على / عمو لسه
عمر / ناوى يعني
على / والله مش عارف بس عادى
عمر / غريب غريب يعني
على/ بقولك ايه هو نصيب و كلنا بنلف فى دايرته
عمر / حصل
……………………
فى الشركه
هدايه / لقيتلك شقه حلوه اوى تقعد فيها
حسام / و مالها شقه الشركه
هدايه / صغيره و فى منطقه شعبى
حسام / هتفرق يعني
هدايه / الله طب و ندى
حسام / حمايا تعبان و شكلى هجيبه هنا
هدايه / هنا فين
حسام / ما لوش غيرها و ما لهاش غيره راجل قعيد بيحرك ايديه بالعافيه حتى ما بيتكلمش
هدايه / طب يعني عرضت ملفه على دكاتره هنا
حسام / هو كان فى مركز حلو اوى فى مصر بيتابعه بس واضح ان فراق ندى ماثر على نفسيته
هدايه / طب ما ده سبب اولى انك تاخد الكبيره اللى جبتهالك
حسام / و انتى هقابلك فين
هدايه تبص حواليها
حسام / خلى ندى و ابوها هنا و انا و انتى هناك
هدايه تبصله باستغراب
حسام / كنت متاكد على فكره هسافر و ابعد و انتى بقي تشوفى غيرى
هدايه / بالعكس انا بس اتفاجئت بالتغير المفاجئ هو انت و ندى متخانقين
حسام / ابدا طب دا انا حتى روحت امبارح قضيت حته ليله مش شايفه مزاجى رايق ازاى
هدايه تبصله باستغراب
حسام / انا شخصيا استغربت مش عادتها بس روحت لقيتها متزوقه و عملالى عشا و شموع و دلع ايه و حنيه ايه قولت يمكن حوار اكرف البت تحبك ده حقيقي و ان الفتره اللى انشغلت بيكي فيها عنها دى خلتنى اوحشها فقشطه ادلع بقي … هو انتى مش ناويه تدلعيني و لا ايه
هدايه / حسام احنا فى الشركه
حسام / و هو اللى بينا هيفضل سر لحد امتى
هدايه / ههههههههههه و هو ايه اللى بينا
حسام يبص فى الساعه
حسام / الكوفى بريك خلص اقابلك بكره فين نسافر سوا
هدايه / هبقي اظبط و ابعتلك
حسام / تمام
حسام يبتسم و يمشي و هدايه متبعاه و مستغربه
………………..
فى شقه نور
على / دى مسؤليه كبيره ندى مش قدها
نور / ايوه بس ده حقها
على / ايوه بس هتوفق ازاى بين ابوها و حبيبه و البيت هى مش كانت هتكمل دراستها و لا ايه
نور / لا ما افتكرش هتكمل بس هى بتقعد تسلى نفسها كتير فى القرايه و بتقعد تحكيلى اللى قراته
على / يعني هتفضل ثانويه عامه طول عمرها يعني ما تقدم على الاقل جامعه مفتوحه اونلاين او اى حاجه مش لازم انتساب يعني عشان لا تروح و لا تيجي
نور / انت شايل همها ليه دى حياتها و هى حره تمشيها زى ما هى شايفه
على / دى عيله اللى قدها ما شافوش الهم اللى هى فيه اخرهم بيروحوا الكليه و يرجعوا منها و خلاص على كدا
نور / ايوه بس ندى اتغيرت خالص ما عادتش زى زمان دى لسه مصورالى الكيكه اللى عملتها طلعت حلوه اوى و مش مضغوطه و لا اى حاجه بالعكس جميله جدا
على / طب يعني شطارتها دى هتفضل من غير شهاده يعني حبيبه لما تكبر كدا و يجيلها عريس هيقولوله امها معاها ثانويه عامه
نور / من هنا لحد ما حبيبه يجيلها عريس الدنيا بتتغير
على / ايوه حبيبه هتكبر و هتبقي وراها مدرسه و مزاكره
نور / انت شايل هم ندى ليه
على يسكت
نور / على فكره هى حره فى حياتها انت مش هتغير الكون كل واحد بدماغه
على / معاكى حق انا اسف
على يقوم نور تتنهد و تقوم وراه
نور / انا ما قولتلكش كدا عشان تزعل
على / انا مش زعلان
نور / امال قمت ليه
على / انتى معاكى حق انا مش هغير الكون و مش همشي الدنيا على مزاجى بس انا لما بشوف حاجه غلط
نور / مش ديما التصرف الصح بيكون صح يا على على الاقل فى اوقات بيبقي التصرف الغلط هو الحل الوحيد المتاح قدامك و ما دام الغلط مش حرام يبقي مش عيب انك تغلط احنا مش ملايكه احنا مش علاطول صح
على / معاكى حق
نور / انت نفسك خدت شهادتك امتى
على / مش عاوزها زيي .. مش عاوز اى حد زيي
نور /حبيبي انت ما لكش زي اصلا … انا هتكلم معاها
على / لا يا نور انتى معاكى حق سيبيها تنظم حياتها زى ما هى شايفه … و اكيد من حقها ابوها يبقي جنبها هم الاتنين ما لهم الا بعض و اكيد وجودها جنبه هيفرق فى علاجه
نور / و اكيد حسام مش هياثر انا متاكده انه زى ما صرف جنيه هنا هيصرف الف هناك و زى ما اهتم هنا هيهتم هناك انا مش عوزاك تقلق تمام
على يبتسم و يبوس راس نور
على / هو العيال هاديين كدا ليه
نور / هدخل ابص عليهم … هعملك شاى
على / ياريت
نور تبتسم و تدخل جوه و على يطلع البلكونه
……………………
فى شقه جديده
حسام يدخل شايل شنطه و هدايه وراه
حسام / الحمد لله نضيفه كنت خايف الاقيها متربه
هدايه / انزل بقي هاتلنا حاجه ناكلها على ما افضيلك الشنطه
حسام / انزل ايه و شنطه ايه احنا عندنا النهرده بس نطلب دليفرى و لا نبقي نخرج ناكل بره و نخربها
هدايه / عملت ايه فى حكايه عمك
حسام / كلمت بابا و هيظبط الدنيا فى مصر و بدور على مركز كويس هنا يتابع معاهم
هدايه / و هتوفق ازاى
حسام / انتى بجد بتكلميني عن عمى !! هو الشيطان جه على بختى و تاب
هدايه / ههههههههههههههههه
حسام / ايوه بقي فكيها كدا الله
هدايه / افكها
هدايه تدخل الاوضه و حسام وراها توصله رساله يطلع الموبايل من جيبه يبص فيه يلاقى رساله
حسام / جوزك بيخونك يا هبله
هدايه تبص لحسام
حسام/ تفتكرى مين الاهبل اللى بيبعت لمراتى الرسايل دى … العبيط ما يعرفش انها مغيره رقمها و ان الرقم القديم معايا
هدايه تبتسم باستغراب
حسام / هو انتى قايله لحد على اللى بينا اصل انا ما قولتش لحد خالص
هدايه / اكيد ما قولتش
حسام / يعني ما تعرفيش اى حاجه عن الصور دى
حسام يفتح صوره مع هدايه و يديها لهدايه تقلب فيها صورهم فى الكافيه و بعديها صورهم فى السرير سوا هدايه تبص لحسام
حسام / ما كانش العشم بتلعبى عليا انا
هدايه / انا ماليش اى علاقه بالصور دى بحلفلك هصورك ازاى فى شقتك يعني
حسام / انتى عارفه الصور دى لو وصلت لندى ايه اللى هيحصل ؟ الاسوء لو طلعت فى الشركه زمايلنا عدنان بيه
هدايه تبص لحسام باصصلها و مبتسم
…………………..
فى شقه ندى
ندى قاعده على السرير بتكلم نور فى التليفون فيديو كول
ندى / طب ما روحتيش معاهم ليه
نور / هو اصلا واخدهم عند مامته عشان يفضيلى البيت انضفه مش عاوزه اقولك انا ما بلاحقش بنضف هنا بيوسخوا هنا مع انهم والله بينضفوا وراهم اول باول بس الكركبه لا دين لها حرفيا
ندى / اطفال ما كلنا كنا كدا امال بقي انا اعمل ايه فى كيس الزباله اللى بيتملى بامبرز و ريحته بتطلع لو ما طلعش كل يوم
نور / ايوه بس حبيبه مش بتتحرك انما دول حاجتهم فى كل حته
ندى / لو تعبتى تقدرى ترجعيهم لعمتهم
نور / انا مش قصدى كدا بالعكس دول عملوا روح للبيت و فرحانين جدا بوجودهم انا بس بتكلم عن الكركبه انما والله تهون جنب ضحكتهم و دمهم الخفيف
ندى / بطلتى تروحى للدكتوره
نور / انا ماشيه على العلاج بس لسه بدرى على معاد الاعاده
ندى / و مامتك
نور / ماما ما بتطلعش هنا خالص انا بنزلها اشوف طلباتها و اطلع و طبعا لازم ترميلى كلمتين عن على و العيال و مامته ساعات بضايق و بزهق بس امى و متاكده انها خايفه عليا هعمل ايه
ندى / هو انا معطلاكى تخلصي اللى وراكى
نور / بالعكس بريح اخبار حسام ايه صحيح
ندى / سافر النهرده يستلم الوظيفه الجديده
نور / طب يا بنتى مش كنتى روحتى معاه توضبيله الشقه الجديده و تطمنى انه مش ناقصه حاجه
ندى / ما افتكرش ان كان ليا مكان معاه النهرده
نور / دا كلام برده …و لا انتى تقصدى انه مسافر مواصلات
ندى تضحك و تبص الناحيه التانيه
نور / كلمتيه عن حوار صاحبه اللى بيبعت الرسايل
ندى / غيرى السيره دى يا نور بليز
نور / يا بنتى كلميه واجهيه صدقيني
ندى / واجهته و بيخونى يا نور مع زميلته اللى فى الشركه هدايه اللى حضرنا عيد ميلادها اول ما جينا فكراها
نور / حسام اللى قالك الكلام ده
ندى / حد صورهم و بعتلى الصور و حسام ما قدرش ينكر
نور / انا مش عارفه اقولك ايه
ندى / ما تقوليش هو اصلا مش فارق معايا انتى عارفه انى عايشه معاه عشان حبيبه غير كدا هو حر فى حياته
نور / بس انتى لازم تدافعى عن بيتك يعني ايه اللى خلاه يعمل كدا اكيد هى لعبت عليه
ندى / و سقته حاجه اصفره و انا اكيد مقصره معاه انما هو فله شمعه منوره انتى اللى بتقولى كدا يا نور
نور / طب العلاقه بينهم لفين نوع الصور ايه ايه اللى خلاكى واثقه انه هيبقي معاها هناك انا لو منك كنت روحت هتسيبيهولها كدا بالبساطه دى
ندى / احارب ليه عشان حاجه مش عوزاها … انا بس بفكرك ان هو اللى حارب الدنيا عشانى عشان ما كونش لغيره مش العكس … انا معاه اهو … و مش بس معاه دا احنا كمان … احنا مع بعض … و راحلها … الحرب خلصت و هو كسب يشوف غيرى بقي
نور / مستحيل اصدق اكيد فى حاجه غلط مستحيل اصدق انتى فاهمه مستحيل
ندى تبتسم
نور / انا هكلمه و افهم منه اكيد فى حاجه غلط
ندى / حسام خد شريحتى و جابلى شريحه جديده على فكره اقولك فكره حلوه كلميه فيديو كول و خليه يصورلك الشقه الجديده و اتحداكى انها معاه
نور / طب اقفلى و هوريكي انك ظلماه
ندى / هههههههههههه يا بنتى براحته انا شخصيا اتحايلت عليه يتجوز
ندى / سلام يا نور
نور / سلام
ندى تقفل و تقوم تطلع بره
…………………
فى شقه حسام
هدايه / تفتكر مين اللى صورنا و عاوز ايه
حسام / ما يهمنيش اعرف بصراحه مش فارقه معايا
هدايه / يكون الواد زياد بتاع الكافيتريا
حسام / مراقبنى يعني بيعرف بقابلك فين و امتى
هدايه / هو مش كان بيحاول يوقع بينك و بين ندى باين دلوقت ندى لوحدها و انت هنا
حسام / انا واثق فى ندى
هدايه / يعني ايه تتصور عريان عادى
حسام / و هو انا متصور استغفر الله العظيم مع راجل دا انا معايا بطل
هدايه / ايه !!!
……………….
- يتبع الفصل التالي اضغط على ( رواية سلف و دين ) اسم الرواية