رواية هن (غرف مغلقة) كاملة بقلم ياسمين النحاس عبر مدونة دليل الروايات
رواية هن (غرف مغلقة) الفصل الثامن و الاربعون 48
سيف فتح الباب ولقي حماته في وشه ! .. بصلها وتنح لثواني قال جواه بحسره : يالهوي انا ملحقتش !!
اتفاجئ بيها بتحضنه بقلق : انت كويس يابني ؟!!
سيف جوا حضنها ومبرق بذهول !! حماته وبتحضنه !! لا دي حاجه غريبه
زقته عنها وهو لسا بشكله ونظرته ليها وقال بسرعه : اه اه الحمدلله كانوا يومين وعدوا ،، اتفضلي
بوسنه خبطته علي كتفه وداخله : طيب الحمدلله
دخلت وبصيت حواليها تشوف بنتها فين وبصتله : امال ملك فين ؟ وتليفونكم ماله انا قلقت عليك لما قريت امبارح اللي حصل وملك مبتردش وانت تليفونك مقفول
سيف قفل الباب وبصلها : حضرتك لسا عارفه امبارح
بصتله بأسف : اه انشغلت مع اختي الفتره اللي فاتت ومكنتش بمسك الموبايل غير قليل .. ملك فين ؟؟
ملك طلعت وسلمت علي مامتها بحضن طويل وقالت بحب وبتطبطب علي ضهرها : وحشتيني اوي اوي يا ماما
بوسنه ابتسمت ليها بزعل : وانتي اكتر يا حبيبتي (بصيت للاتنين ) كدا اسيبكوا شويه اعرف الاخبار السـ ودا دي
ملك اتنهدت : الحمدلله ربنا يسترها معانا
سيف وقف جنب مراته وحط ايده علي كتفها : الحمدلله اطمني كله زي الفل
ملك : تعالي اقعدي ياماما (رايحه ناحية المطبخ) كويس انك جيتي دلوقتي الغدا جاهز
غرفت الاطباق وسيف بيحط علي السفره وكل حاجه بقيت جاهزه وقعدوا التلاته او بمعني اجمل الاربعه .. !
سيف داق اول حاجه قدامه وبص لملك باستمتاع وما صدق ياكل حاجه في بيته ومن ايد مراته : الله .. الاكل ليه معني في بيتنا والله
ملك ابتسمت لسيف : طبعا
بوسنه متابعه نظرتهم وكلامهم لبعض وابتسمت غصب عنها .. حسيت باهتمام سيف بملك وكل حاجه يدوق منها يقول اشعار وكلام جميل ليها
بوسنه بسعاده : تسلم ايدك يا ملوكه .. الشطاره ظهرت هنا انتي مكنتيش بتعرفي تقلي بيض حتي
ملك ضحكت : المسؤوليه بقي
بعد الغدا قعد سيف مع حماته في الصاله وملك عملت لكل واحد اللي بيحب يشربه واخيرا قعدت معاهم ..
اتوجعت بصوت من غير ما تحس بنفسها وسيف مسك ايدها بتقدير وشكرها بصوت واطي
سيف قام وبوسنه قعدت جنب بنتها : كنتي في البيت ليه؟ جارتنا قالتلي الاسعاف خدت سيف من عندنا مش من هنا
ملك بثبات : كنت عايزه اطلع هدومي اللي مش محتاجاها لله وسيف كان معايا وتعب هناك
بوسنه : خير خير
قعدت ساعه معاهم وقامت وبصيت لسيف : ابقي رد علي فهمي عايز يطمن عليك
سيف ابتسم : عنيا ، هكلمه بنفسي
بوسنه سلمت عليهم وقبل ما تمشي بصيت ليهم بفرحه .. كانت متخيله تلاقي البيت وحش ومليان كآبه .. بس اتفاجئت بغير كدا البيت هادي .. ريحته حلوه , ملك زي القمر , الغدا جاهز , كل حاجه علي عكس توقعها والاهم ان سيف بخير و واقف علي رجله قدامها وبيعامل ملك كانها ملكه في مملكتها البسيطه ..
وقالت بحب : شغلي قران في البيت دايما .. ربنا يحفظكم ويبعد عنكم العين والشر
سيف فرح بكلامها وهدوءها المره دي : يارب دعواتك .. استني متنزليش انا هوصلك
بوسنه ردت بسرعه : لا لا توصلني ايه خليك مرتاح انا مش صغيره
سيف باصرار : ياست الكل استني هغير هدومي وانزل معاكي
بوسنه : والله ما هيحصل .. يلا سلام عليكم
هتنزل لقيت سيف سابقها وبيفتح الاسانسير ورفض كلامها : علي الاقل اركبك تاكسي
بوسنه معرفتش تتكلم بعد اصراره واحترمت اسلوبه معاها وفعلا نزل وركبها تاكسي وحاسب عليه وطلع
—–
نهي رجعت الفيلا وكان مجدي ومصطفي مستنينها .. قلقت من وجودهم وكانت طالعه علطول ومجدي وقفها : مبترديش علي تليفونك ليه ؟ وايه اللي عملتيه مع ملك دا
نهي نفخت : عادي مش سامعه وخلاص بقي مبقاش في غير ملك
مصطفي اتنرفز من طريقتها وسألها بنفاذ صبر : كنتي فين ؟
نهي بصتله من فوق لتحت باسلوب مهين : هتحاسبني ولا ايه !
مجدي دمه اتحرق ورفع ايده يضربها قلم علي وشها ومصطفي لحقه وهي خافت ورجعت لورا
مصطفي بنرفزه : اهدي يابابا , الضرب مش بيفيد (بصلها ) محدش مالي عينك
نهي ببجاحه : اكيد لأ .. انت هتعمل نفسك عليا راجل وانت ملكش كلمه وسطنا !
مصطفي بذهول : بجد ؟! طيب للمعلومه انا قاعدلك هنا وفايقلك وهما قالولي بكل اللي هببتيه ومش هتلاقيني غيري قدامك ولو فاكره ان فرق السن هيمنعك عني والمفروض احترمك والكلام المحترم دا .. انسيه مش معايا لانك اصلا مش محترمه ولا محترمه خصوصيات اللي حواليكي ! ولا ماشيه عدل حتي
نهي زعقت بعصبيه : نعم !! .. انت هتعملهوملي ولا ايه ؟؟ لا يابابا اتشطر علي مراتك مش عليا
مصطفي اتنرفز من اسلوبها وشد منها شنطتها وطلع مفاتيح عربيتها وهي صرخت : في ايه ؟؟
مصطفي بزعيق : اخرسي (مد ايده في الشنطه وحس بحاجه في ايده وطلعها وكانت ڤيب ! (شيشه الكترونيه ) شدها من شعرها بغيظ ونرفزه ) يانهارك *** بتشربي ايه وبتهببي ايه علي عينك !!!
مجدي شدها من مصطفي وزعق وضربها جامد علي وشها : انتي مشوفتيش ربايه !! .. السنين دي كلها معلمتكيش حاجه عدله !؟
شدها وراه لاوضه تحت السلم ورماها فيها وسط صراخها وعياطها وقفل عليها بالمفتاح وزعق : اخرسي مسمعش حسك .. انتي اخرك هنا .. مش اوضة الهوانم اللي فوق
نهي بعصبيه بتخبط علي الباب : دي اوضة الب**** اللي بتنضف
مصطفي ضرب ايده في الباب : اسكتي لاكسره علي دماغك ومحدش هيرحمك مني
مجدي : انتي ليكي عين تشتمي !! .. انا هطلع اللي بتشميها دي فوق مكانك وهخليها تنام مكانك وتستخدم حاجتك وتتمتع بيها وانتي هنا زي الكلبه
نهي بصريخ : بابا بس طلعني من هنا
منال ومها نزلوا علي صوتهم واستغربوا وقفتهم هنا والست اللي بتساعدهم في البيت طلعت من المطبخ وسامعه كلام مجدي ومش مصدقه
منال بخوف : في ايه ؟؟ حابسها هنا ليه ؟ دي اوضة ام صبحي
مجدي بص لام صبحي وزعق : سمعتي ولا لأ … اطلعي اوضتها من النهارده ومكانك فيها مش هنا ..
نهي برعب : لاااا .. انتي بتقولوا ايه ؟؟ بترموني هنا وهي تروح مكاني !!
مصطفي : اخرسي صوتك معصبني
مجدي بعصبيه : ايوه انا برميكي هنا لأنك مش قد النعمه ! ولا شايفك انك في نعمه ودايما بتتريقي عليها وتهينيها ورايحه جايه تضايقي في الناس وتتحامي فيا ! … وانا يا نهي اللي حطيتك هنا ! واعتبريه سجن ! مفيش طلوع ولا هتشمي ريحه الشارع ولا باقي الفيلا
بص للكل ومنال ومها مصودمين من كلامه وكمل بعصبيه : اطلعوا بتتفرجوا علي ايه ؟!! شايفيني بهزر ! (بص لام صبحي ) من النهارده نومتك فوق ولو قرفانه من مكانها غيري الملايات واي حاجه ليها ارميها في كيس زباله
الست خافت من عصبيته ومشيت ودخلت المطبخ ونهي لسا بتصرخ وبتخبط في الباب بأي حاجه تقابلها
مجدي راح ناحية الباب : ورب الكعبه لو كسرتي الباب ما هرحمك يا نهي وهعرفك انا مين .. مجدي الخيال هيعرفك هو مين بحق !
مصطفي قلق من عصبية باباه وخده بعيد عن الاوضه ومجدي متعصب علي اخره وحاسس ان الشياطين كلها قدامه
بص لمصطفي بحده : اسمع انت كمان .. انا لو لقيت كل واحد فيكوا في حته مش هعمر في الدنيا ! ودا تحذير ليك زيها بالظبط .. انا مش بتعب واشقي عشان كل حاجه تتهد وعمري يضيق عشان نفوس مريضه
مصطفي بضيق : حاضر يابابا اهدي لو سمحت
_______________________________
امير بالليل قعد مع عيلته وحكالهم حكايه محمود والاتنين اضايقوا وعليا اشفقت علي رقيه بكل اللي حكاه امير وقد ايه هي حموله ومتستاهلش اللي شوفته ..
امير قام : لو سمحت يابابا كلم عمي عبدالله واتفق معاه علي الخطوبه تبقي الاسبوع دا
مهدي : حاضر بكرا هكلمه
امير باصرار : خليها النهارده بعد اذنك لسا في وقت
مهدي ؛ طب هات التليفون
امير ابتسم : فين؟
مهدي : برا شوفه كدا
امير طلع برا ودور عليه وجابه لباباه وبيجري من برا للاوضه وهو ماشي رجله اتخبطت وباباه ومامته شافوه وضحكوا عليه جامد وهو اتوجع بيضحك : خد ياعم اهو
مهدي خده واتصل بعبدالله ومش بيرد وبص لامير برخامه : بقول نقفل ونكلمه بكرا
امير بسرعه : خليك وراه
مهدي ضحك : افرض نايم
امير بحماس : نصحيه
عليا ضحكت وضربت كف علي كف : الواد اتهبل
امير بصلها غمز : يا لولا رقيه دي بسكوته وقمر وحاجه كدا مخلياني عايزها دلوقتي
عبدالله فتح علي كلمة امير ومهدي عينه وسعت
عبدالله بضحك : مين دي اللي عايزها دلوقتي؟
مهدي عمل ميوت وبص لامير : منك لله
امير اتثبت مكانه باحراج ومهدي رد : لا دا التليفزيون يا حاج
ازيك طمني علي صحتك
عبدالله : بخير الحمدلله
مهدي : دايما يارب .. ايه رايك نعمل خطوبه امير ورقيه الاسبوع دا
عبدالله بص لاحمد جنبه يقول ايه واحمد برق بفرحه كان شويه وهيرقص وشاورله يوافق
عبدالله بفرحه : علي خيرة الله
مهدي ابتسم : الخميس تمام؟
عبدالله : الولاد يقرروا هما امتي ، بس اليوم كويس علي ما نعزم القرايب ونشوف العرسان عايزين الخطوبه فين؟
امير بهزار : اعملها في العياده بس نتخطب
عبدالله سمعه وضحك وكمل مع مهدي واتفقوا يعملوها برا وهما يقرروا فين
احمد قام بسعاده وراح علي اوضه رقيه وخبط عليها كتير لحد ما فتحت وهي مخضوضه : في ايه؟
احمد بفرحه : عندنا عروووووسه
رقيه بصتله وسكتت بفرحه واحمد كمل : ابوكي حدد الخميس للخطوبه
رقيه اتنططت بسعاده : بجدددد
طلعوا الاتنين لبرا ورقيه حضنت باباها ومامتها وفي ثواني كان احمد مشغل اغاني وهيصوا الاتنين سوا
احمد وطي صوت الاغاني وبصلها : بت يا روكا شوفي صحابك عشان فستانك ووالميكب والحاجات الكتير دي
رقيه مش مصدقه وعماله تتنطط كل شويه بفرحه
احمد موبايله رن وكان امير : ايوه يا عريس
امير ضحك : الله ايه الكلمه الحلوه دي
احمد : هقولهالك علطول.. الف مبروك
امير : الله يبارك فيك عقبالك بقي
احمد : هييح يا مسهل
احمد ضحك : اختك فين مش بترد عليا
احمد برخامه : بتتقل
امير ضحك بصوت : ولااا هاتها بقولك
احمد : تدفع كام
امير حط ايده علي راسه : انا موعود برخامتك يابني عايز اكلمها وحشتني
احمد ضحك برخامه : كمان بتقولها في وشي
امير بضحك: احمددد
احمد بيقلده : اميييير
الاتنين ضحكوا واحمد ادي موبايله لرقيه وكلمته والاتنين من فرحتهم مش مصدقين وكل واحد حاسس انه خد حاجه كبيره مستنيها من زمان
____________________________________
الصبح طلع وابتدي يوم جديد 🌻
رجاء قامت بنشاط ودخلت لشادن وصحيتها وقامت معاها
رجاء ابتسمت : بصي دلوقتي انتي وشك بيتحسن وانا كنت مستنيه اشوف تحسن شويه ونظبط حاجات شقتك ونبدأ بفرشها
شادن فرحت جدا : امتي ؟
رجاء : يلا دلوقتي وهكلم اسماء ام ابراهيم ولو ينفع تنزل معانا ونجيب اللي متفقين عليه من الاوا يبقي كويس
شادن كلمت ابراهيم وقالتله اقتراح مامتها وهو اعجب برد فعلها وقالها اسماء هتنزل معاهم وهو هيستعد لرحلته الجديده
شادن جهزت ونزلت رجاء معاها ومازن وصلهم واسماء قابلتهم وبدأوا يشتروا كل حاجه بذوق شادن وهي بس اللي بتقرر وهما بيساعدوها .. اشتريت اغلب الحاجات المهمه ولسا فاضل كتير
ميار جتلهم علي مكانهم بعد شغلها وكملوا بقيت شراهم ومازن راحلهم ، خدهم يروحوا و وصل اسماء لبيتها
بعد ما شادن روحت الشركه بعتولها رساله ان كل حاجه جهزت وفاضل الاعلان المبدئي عن المطعم ولازم تعمله بنفسها ..
خدت شاور واتغدوا .. حاولت تكلم ابراهيم وفهمت انه لسا في الرحله ولما يوصل هيكلمها
قعدت وسطهم وبتفكر هتعمل ايه؟ لازم الإعلان يبقي مميز ! ونفس الوقت حاجه بيبحبها الكل وموجوده في كل البلاد !
فكرت و وصلت لاكتر اكله محببه للكبار والصغار
المكرونه .. وخاصة الباستا وبطريقتها الخاصه ! ..
قالت لعيلتها علي اليوم المهم دا وفرحوا ليها من قلبهم ومش متخيلين شادن الصغيره كبرت وبقيت شخص مسؤول وعندها شغلها وكيانها الخاص
وجه اليوم الجميل ..
صحيت وشربت نيسكافيه وفطار بسيط وفكرت هتلبس ايه؟
اليوم مميز ولبسها هيعبر عن شخصيتها .. وقفت قدام دولابها وفضلت تقلب كتير لحد ما اختارت طقم قمة الرقي والشياكه والاحتشام .. مع حجابها الجميل وحطيت لمسات بسيطه جدا من الميكب .. صورت نفسها لابراهيم وبعتتله الصوره وهو انبهر بيها وبلبسها .. كان بسيط جدا ومش ملفت ! جماله كله في تفاصيله البسيطه المعبره عنها !
خدت بالها من جروب رقيه عملته وكاتبه رساله ” ازيكم يابنات انا خطوبتي الخميس الجاي ، هستناكم ودي مش عزومه انا حبيتهم وهحتاجكم جنبي “
انبسطت شادن وحسيت ان اليوم جميل وبدايته خبر مبهج
مازن استناها تلخص وطلعت و وقف بابتسامه : يانهار ابيض ! ايه القمر دا
شادن ابتسمت : بجد؟؟ وشي ايه ؟!
مازت قربلها واتفاجئ : انا مش شايف حاجه اصلا !! انتي متأكده ان لسا في جلسات؟
شادن بفرحه : رقيه قالتلي وشي بيتحسن و النهارده حاسه ان وشي مش باين عليه اوي ولما يصوروا هقولهم ياخدوا الجنب اليمين
مازن : لا مش باين حاجه بجد هو بس ابتسامتك مش كامله اوي
رجاء طلعت شافت بنتها وحضنتها ودعيتلها كتير
مازن وشادن نزلوا سوا وميار كلمتها هتستأذن في شغلها وتحصلهم ورجاء هتستنليها
وصلت والكل رحب بيها والترحيب كان اكبر من تخيلها شافت في عينهم فضول مين دي ؟ ونظرة حب واهتمام ولما اتعاملت معاهم بطبيعتها الكل حبها اكتر
بصيت علي المكان وكان جميل جدا والوانه زي ما طلبت بين الابيض والازرق وكل حاجه مظبوطه
بدأت تجهز ومازن شجعها بعينه ، شادن طلبت من مازن يكلم ابراهيم ويبقي معاهم فيديو كول .. مازن كان هيرفض بس فكر شويه وفهم ان تصرف ابراهيم نابع من حبه ليها وهو صح وخلي عينه تقع علي حاجات كتير مكنش شايفها وبالأصح اهله كمان مش شايفينها ..
شادن استنت ميار توصل وبدأو التصوير ومازن اتصل بابراهيم واتصافوا ..
التصوير خد وقت وكل شويه يقفوا ويوروا شادن الجزء المتصور وبتتأكد من وشها وتفاصيله
وبعد ساعتين خلصوا تصوير و قالولها هيظبطوه ويبعتوه ليها
_________________________________________
ملك كلمت نور وطمنتها عليها واتكلموا كتير مع بعض
نور بتساؤل : طب هتقولي لسيف امتي؟
ملك بتفكير : لسا مش عارفه .. لو قولت دلوقتي هيفرح وهيهتم بيا بس مش عايزه اهتمامه عشان حملي وانا عايزه اطمن الاول واحس انه مقدر وجودي في البيت وان الطلاق مش سهل ولا كلمه بتتقال من غير حساب .. لما اطمن معاه هقوله
نور : بصراحه كلامك منطقي ومش قادره الومك رغم انه هيفرح جدا
ملك : لما استقر الاول يانور واحس ان اهله مرحبين بيا وسيف تبقي الاوضاع معاه احسن من الاول وانا وهو نهدي هقوله علطول
نور كشرت : انتو لسا مش هاديين؟ انتي بتقولي مش بيستغني عنك وكويس معاكي
ملك بتوضيح : هو مش بيستغني عني ودا الطبيعي متخانقين او لا ! وهو فعلا كويس معايا بس دلوقتي احنا مبسطوين برجوعنا وانه احسن ومصطفي كمان بقي كويس معاه بس ممكن تحصل اي حاجه تخلينا نتخانق تاني ! افرضي بقي قولتله وفرح بحملي بس مفيش حاجه جديده ! وهو لسا متهور وعصبي ! او يقول حاجه تضايقني ! لازم اطمن واحس ان دا سيف اللي اختارته بقلبي وعقلي واقوله وانا مرتاحه وفرحانه بجد مش خايفه من اللي جاي
نور بتفكير : صح .. طب انتي كمان اعرفي ايه ضايقه ومتعمليهوش
ملك : عملت كدا وقولتله مش نازله المعرض تاني
نور شهقت : لييه يابنتي
ملك : عشان مش هرتاح في الشغل واكمل فيه وانا عارفه حصل بينا مشكله منه ! وكمان انا عايزه اركز في حملي وبيتي .. (اتنهدت) حاجات كتير اوي مش مريحاني دلوقتي واللي مش مريحني ببعد عنه ودلوقتي هبعد عن الشغل
نور : خلاص انتي ادري بنفسك ، ربنا يريح بالك .. طب هو مش ملاحظ حاجه عليكي
ملك : لا عادي انا بتعب من الحركه الكتير بس بحاول محسسهوش بحاجه
نور فكرت في حاجه وضحكت باحراج : طب ايه؟ هو مش معترض علي حاجه؟
ملك فهمتها وضحكت : لا بتحجج انه تعبان
نور : امممم طب بتفكري في ايه؟ هتقوليله ازاي ؟
ملك بتفكير : بصي يا ستي …
بعد كلام كتير نور اتفاجئت : فكره جميله جدا .. طب
سيف دخل وملك قاطعت نور : هكلمك تاني ياحبيبتي
قعد جنبها : دي نور؟
ملك ابتسمت : اه ،فرحت اننا رجعنا .. خدت بالها من البوست بتاعك علي الفيس وكلمتني تطمن علينا (مسكت ايده) شكرا علي كلامك عني
سيف بتقدير : انتي اللي عايز اقولك شكرا ! برغم اللي حصل مسبتنيش ثانيه وكنتي جنبي دايما ، وقفتي جنبي وحطيتي مشاكلنا علي جنب .. شوفت فيكي خوف وخضه وحب مشوفتهوش في حياتي مع ان اللي حصل قبلها كانت حاجه كبيره علينا اوي .. فضلتي معايا ومعابتنيش !
ملك اتنهدت : عشان بحبك ومعنديش اختيار وقت ما قلبي قلق عليك لازم ابقي جنبك ومعاك، قلقت عليك لدرجه اني عايزه اشوفك قدامي وبس ومش مهم اي حاجه
حطت راسها علي كتفه : ربنا يبعد عننا كل الوحش .. ويملي بيتنا خير وسعاده
سيف بأمل : يارب يارب
وصلتلها رساله بصيت فيها وقرأتها اكتر من مره و بصيت لسيف وبتفكر في المسدج ..
سيف بتعجب : ايه ؟!
ملك بعدت عنه شويه : رقيه باعته علي الجروب بتاعنا ان في سيشن مفتوح لعياده دكتور رشا
سيف هز راسه : دكتورة مها ؟
ملك : اه .. (بصيت في الموبايل وبتقرأ المسدج ) * اول سيشن مع دكتور رشا والدعوه فيه عامه
بدون تيكت او ترتيب للحضور من قبلها , السيشن بكرا مدته ساعتين في **** بعيد عن العياده والمكان جميل وهادي .. هنتعرف فيه علي بعض وهنقوي ببعض .. السيشن خاص للبنات والسيدات بعنوان ( هـن * غرف مغلقه * ) .. ليه هـن ؟ هـن هو ضمير جمع المؤنث في اللغه العربيه .. ليه غرف مغلقه ؟ لان جوا كل واحده فينا حاجه قافله فيها علي نفسها زي الغرفه المغلقه !
زي ما قولنا الدعوه عامه مش شرط يكون مع دكتور رشا في الجلسات .. *
بصتله : ايه رأيك ؟ اروح ؟
سيف بتشجيع : ليه لأ .. روحي انتي الفتره اللي فاتت كنتي مضغوطه وممكن السيشن دا يفيدك
ملك سكتت وبتفكر وسيف شجعها : اكتبي لرقيه انك رايحه وشوفي مها تروح معاكي
ملك كتبت لرقيه انها جايه واتواصلت مع مها وقالتلها وصلتلها الرساله وهتروح ..
و شادن طبعا جايه .. الفيديو بتاعها وصلها وبعتته علي جروب البنات والاتنين باركولها
ومنسوش رقيه وخطوبتها وبقيت بتفكر معاهم تعمل الخطوبه فين وفستانها يبقي لونه ايه ؟ وكان شات كله مليان اخبار سعيده وفرحه
النهار طلع وملك روقت بيتها وجهزت الغدا من بدري .. ظبطت الغسيل كمان وبتنشره وهي بتوطي حسيت بدوخه ورجعت لورا خطوات .. الرؤيه مشوشه في عينها ..
محسيتش بنفسها وهي بتقعد في الارض وبتحاول متوطيش راسها ومتدوخش اكتر
سيف في اوضتهم خلص لبس ونازل لمحها قاعده بالشكل دا وقلبه وقع وجري عليها
سيف : ملك ؟؟ قاعده كدا ليه ؟
ملك بصتله بتعب : دوخت وانا بنشر , متقلقش مفيش حاجه
سيف اتنهد بصوت وشدها بالراحه تقوم معاه وهي قامت ومسكت في في كتفه جامد من الدوخه : انتي مش مريحه نفسك اصلا ! .. لازم كل حاجه تعمليها النهارده ! وبعدين انتي طاقتك قليت ولا ايه مكنتيش بتتعبي بالشكل دا
ملك قعدت علي الكنبه وهو قعد جنبه وماسك ايدها بقلق : عادي يا سيف انا وطيت بس ودوخت
سيف : خلاص سيبي اللي يتعبك اعمله انا
ملك ابتسمت : والجيران يشوفوك بتنشر ! دي عيب في حقي
سيف ببرود : تولع الناس ! .. انا معنديش اغلي منك , خليكي قاعده هكمل انا
ملك وقفته بسرعه : لا انا كويسه هكمل
سيف مسمعلهاش وكمل هو وقفل البلكونه ودخل وبصلها : لو البيت متعب هجيب حد يساعدك
ملك بصتله بتقدير : لا ياروحي مش متعب .. انا حبيت يبقي البيت كويس قبل ما انزل
سيف بجديه : لو تعبانه اقعدي
ملك : لا لا انا عايزه اشوف البنات وكمان تجربه جديده عليا .. خلي بالك من نفسك انت
سيف بحنيه باس راسها : خلي بالك انتي من نفسك .. لو احتاجتي حاجه كلميني
ملك ابتسمت : حاضر
سمعت صوت موبايلها وكانت رساله من شادن
شادن : بنات .. صباح الفل , هتروحوا ازاي السيشن
ملك : هطلب اوبر , سيف نزل الشغل
رقيه : انا برا مع امير واحمد بنشوف مكان مناسب للخطوبه وهيوصلني حد فيهم
شادن بفرحه : ربنا يتمملك علي خير ياحبيبتي , طيب تمام انا هجهز من دلوقتي عشان المكان بعيد عني .. مها جايه يا ملك ؟
ملك : جايه اه .. السواق هيوصلها
رقيه : حلو اوي .. اشوفكم هناك متتأخروش
ملك : حاضر
شادن : عيوني
كل واحده فيهم بتخلص اللي وراها .. رقيه استقرت علي كافيه بجاردن وهتحجزه بالليل للخطوبه .. شادن لبست ونزلت وفي طريقها للسيشن .. مها عرضت علي ملك تنزل بدري وتاخدها في طريقها والسواق يوصلهم سوا وملك وافقت
وبعد مده طويله شويه وصلوا …
التلاته قابلوا بعض بشغف كبير وحب .. متخيلهوش انهم ممكن يحبوا بعض كدا ؟ بس المحبه جت مع مواقفهم الصعبه ويا بعض ! ..
مها بدأت تندمج معاهم وكلهم قعدوا وباقي البنات وصلوا واخيرا رشا ..
رشا دخلت والبنات كانوا قاعدين علي شكل حلقه وكانوا مجموعه كبيره بمختلف الاعمار
قعدت قدامهم وابتسمت : اهلا بيكم نورتوني .. دا مكان بتاعي الجديد هنعمل فيه سيشن من كل فتره للتانيه .. نخرج من جو العياده المقفوله والجلسات والعياط وكل اللي بيحصل فيها
اما فكرة السيشن نفسها ايه ؟! .. كل سيشن بفكره مختلفه , يعني النهارده هنتكلم عن نفسنا ! .. ايه الحاجه اللي كانت مسببه عائق لينا في حياتنا وقدرنا نتجاوزها ! وبنتعامل معاها ازاي دلوقتي ؟! .. في حاجه اتغيرت فينا للاحسن ولا لا؟ .. وبما اني دلوقتي مش دكتور بس انا واحده من هـن هبدأ بنفسي .. انا كنت بمر بفتره صعبه جدا .. فيها ميزه وعيب اني بدي كل حاجه من قلبي , للي يستاهلها واللي ميستاهلهاش ! .. مكنتش بعرف افرق ودايما باخد فوق راسي ! .. ودا في ظل ما انا دكتور نفسي يعني كبيره وناضجه بنسبه كويسه
لكن في مره حصل موقف مع اعز صديقاتي وقتها ! موقف خلاني اتعذـ ب نفسيا من كتر ما انا اديت كل حاجه واستحملت كل حاجه وفي الاخر ايه ؟ هوا ! والأصعب اني طلعت في نظر غيري غلطانه ومليش حق ! .. وقتها دخلت في عزله ! وقفت شغل ! اهتميت ببيتي بالعافيه ! حاجات كتير اتاثرت بنفسيتي ! .. وبعد مده بعد ماخدت وقتي في الزعل .. قولتي لنفسي انا ايه وصلني لكدا ؟ من امتي الشخص اللي بيدي ودايما لطيف مع غيره بيبقي مكسور ! الشخص دا المفروض يبقي قوي جدا لأنها صفه قويه ومش موجوده كتير في الناس ! .. وقتها اتعاملت مع نفسي بطريقتي كدكتور و مره بمره تجاوزت الجزء دا فيا ! .. بقيت بدي زي ما احب للناس وابقي لطيفه بس مش علي حساب نفسي ! ومش بدي لأي حد ! .. بدي للي شبهي وبس !
لحد مقدر وجودي زي ما انا مقدره وجوده ! .. حد عارف قيمة البشر عموما وعارف ان الدنيا مش دايما جميله والمفروض اني اسامح واعدي واخد فوق راسي علطول واسكت ! .. عارفين امتي اتحسنت بجد ! (كلهم منتبهين لكلامها ومبتسمين ) لما عرفت قيمتي .. !
البنات سقفولها بتقدير كبير وهي كملت بفخر : شكرا جدا .. خر حاجه .. انا مبقتش دكتوره شاطره غير لما بقيت انسانه افضل من جوايا .. (اتنهدت بحماس ) يلا نبدأ بمين !
الدور بدأ وبيمشي وكل واحده بتقول عن فشلها ونجاحها وتجاوزت محنتها ازاي ؟
لحد ما الدور جه علي رقيه وابتسمت لدكتور رشا بعرفان وتقدير : كانت مشكلتي اني ثقتي بنفسي قليله ! .. (بصيت للبنات ) انا كنت متجوزه وانفضلت بعد شهور ! .. السبب الاول في جوازي اني شوفت اهتمام بس ولاني ثقتي قليله جوايا قولت ليه لا اتجوز ! واتجوزت بقلة خبره كبيره ويعتبر تسرع شويه مني ! .. بس مش دا سبب طلاقي .. لكن طلعت من الفتره دي بتقل كبير علي قلبي وصلت لدرجه اني اكلم نفسي واقول لا انا مش غلطانه ! وبقيت عندي قلة ثقه فيا اكبر من الاول بمراحل وخوف (ابتسمت لرشا ) قابلت دكتور رشا وحاولت معايا كتير اوي اني اتنحسن وابقي افضل ومقفلش علي نفسي واتجاوب مع الناس واتكلم واهون علي نفسي اي موقف صعب ! .. وان دي مش نهاية الدنيا ! .. بعد جلسات كتير اتحسنت واشتغلت وحاليا بتعلم لغه جديده اون لاين ! (ابتسمت من قلبها ) واخيرا هتخطب الاسبوع دا علي اجمل شخص ممكن اشوفه في حياتي
بنات كتير بصوا لبعض واتفائلوا من حكايتها وخصوصا انهم داخلين في انفصال او منفصلين ومش عارفين يعدوا محنتهم دي !
جه الدور علي شادن والبنات متحمسين يسمعوها ومش متخيلين بنت بالجمال دا يبقي عندها مشكله !
شادن بتوتر : اااا انا حكايتي مختلفه شويه .. معيشتش طفولتي بشكل سوي .. كتومه مبتكلمش كتير، رغم اني حياتي تعتبر فيها رفاهيه كتير بس مستمعتش بيها ! اتعرضت لأذي نفسي لفتره كبيره .. ( اتنهدت) لحد ما فوقت لنفسي وحسيت اني اعرف احافظ علي نفسي واعرف ابعد وبعدت ! بعدت عن كل حاجه تضايقني، بدأت حياه جديده واعتمدت علي نفسي في كل حاجه بعد ما كنت مبشوفش الشارع ( البنات بصولها ومستغربين) كنت حذره اوي من الناس وتعبت نفسيا شويه لحد وقت معين ( اتنهدت بطمأنينه) لحد ما ربنا عوضني وكرمني باكتر ما كنت احلم ! صبرت كتير وكنت وحيده جدا بس ربنا عوضني في الاخر بحاجات كتير متخيلهاش ! .. شوفت بعيني آية ( ولسوف يعطيك ربك فترضي) .. ربنا عوضني لحد ما رضيت !! رضا السعاده والهنا مش رضا بقدر ربنا بس ! (بصيتلهم) مهما الدنيا قفلت ومهما كل حاجه بقيت صعبه علينا هيجي وقت وكل التعب يخلص المهم اننا نرضي ونتعايش ومنكملش بيأس كفايه ان ربنا هو المدبر لحياتنا
رشا ابتسمت : ونعم بالله (بصيت لملك) عرفينا بنفسك
ملك حسيت انها صغيره وسط تجاربهم و اتكلمت : انا حياتي الحمدلله كويسه ومتجوزه عن حب بس
رشا ضحكت : ايوه هي البس دي وبعدها بلاوي
البنات ضحكوا وملك كملت : اكتشفت مع الوقت ان الجواز مش سهل ومش حب بين اتنين وبس ! لا ممكن يختلفوا بسبب تافه لو مش متفاهمين .. حاجات كتير غلطت فيها واتصرفت فيها بشخصيه ملك بس مش ملك اللي ليها شريك حياه ولازم تقدر الجزء دا
رشا بتفهم : الحياه الزوجيه مبتنجحش بالحب بس ! ودي معلومه مش كتير يعرفها الا بالتجربه والخناقات
ملك هزيت راسها : فهمت دا بعد فتره ، جه وقت علينا وكل واحد اتصرف بتسرع وتهور كبير كإنه هو بس مالك حياته .. بس لما الدنيا خربت بينا حسيت اني تعبانه ومش مرتاحه ابدا
رشا : لانك بتحبيه وعايز حياه كويسه مابينكم
ملك : جدا .. بدأت اراجع نفسي في اخطائي واعرف قيمته في حياتي وقد ايه مفيش حاجه ليها معني من غيره .. ومن جوايا اعترفت في غلطي ومستحيل ارجع فيه تاني
وبعد ساعه كان السيشن خلص وكل البنات اتكلموا واتفاعلوا مع بعض وجه
رشا بصيتلهم باهتمام وابتسمت : للحقيقه الحياه صعبه وتقيله اوي وفيها ابتلاءات تشيب ومش سهله ، بس اللي بيهون ان ربنا شايفنا عالم بالمعاناه اللي بنعيشها كل يوم .. الازمات النفسيه مش بس ازمات عاطفيه ومشاكل للبنات بس ! كل انسان بيمر بأزمه نفسيه صعبه او معلمه جواه علامه مش ناسيها بس الاهم هنتعامل معاها ازاي؟ ودايما بقول في كل الجلسات الدنيا دنيا مش جنه ! الجنه نعيم وخاليه من الهم والمشاكل لكن الدنيا فيها كل حاجه ممكن تتخيلوها ! ، الدنيا مش نهايتها الطلاق او الخيانه ! ولا نهايتها التريـ قه والتنـ مر ! ولا نهايتها مشكله مع ازواجنا او اولادنا !
انا مقدره ان في وقت بنبقي خلاص تعبنا ومفيش اي امل قدامنا (ابتسمت) بس والله في امل وفي خير كبير متشال لو مكانش هنشوفه في حياتنا هنشوفه في الجنه ! هنشوف اخرة صبرنا وتعبنا .. مفيش حاجه ملهاش نهايه ..
ونصيحتي ليكم متسيبوش حد ينهش فيهم بكلامه ، ولا تسيبوا حد يتدخل في حياتكم بشكل مؤذي ، ولا نتجوز بسرعه لمجرد الجواز ولا كمان نتطلق لمجرد ان الطلاق بقي سهل زي ما بقيت موضه ! (اتنهدت) والجواز يا حبيباتي مش قايم علي الحب وبس ، الحب مبيعيش والحياه مبتكملش بسببه، الحب بند من ضمن بنود كتير الجواز قايم عليها ! ،
احنا ربنا خلق جوانا طاقه كبيره جدا للحياه يبقي منيأسش ، نطلب العون من ربنا وهيمدنا بيه، نطلب المساعده من الناس اللي بتحبنا .. نروح لدكتور نفسي يساعدنا نتخطي مراحلنا الصعبه علينا .. المهم اننا منرجعش لورا ونطلع لقدام بكل طاقه جوانا .. (ابتسمت) اتشرفت بيكم اشوفكم في السيشن الجاي
السيشن خلص وكل واحده روحت بيتها وهي مرتاحه جدا وحاسه بطاقه جميله وتفاؤل
ملك قررت تنفذ خطتها وكلمت نور ورتبت معاها كل حاجه وفاضل التنفيذ
بعد أيام …..
سيف وصل ليه رساله من ملك وفتحها
_ صباح الخير حبيبي ، هستناك الساعه 5 حاول متتأخرش
علي جروب البنات
_ صباح الخير ياقطاقيط ،انتو معزومين عندي في البيت النهارده الساعه 5
_صباح الخير ياعمو، هستني حضرتك وطنط ومها النهارده الساعه 5
_صباح الخير ياماما ، هستناكي النهارده الساعه 5
_صباح الخير يامصطفي ، هات مراتك وهستناكم في البيت عندي الساعه 5
~~~~~~
الساعه جت 5 .. سيف اول واحد وصل وطلع لفوق بسرعه والبواب وقفه : المدام مستنيه حضرتك علي الروف
سيف استغرب وضحك : هي كلمتك انت كمان ولا ايه
البواب ضحك وفتح الاسانسير يطلع
وصل للروف ودخل وانبهر !!
بلالين كتير لونها ابيض .. تربيزات كتير في النص وعليها ورد ابيض ! .. ديكور جميل جدا !
سيف وقف مستغرب جدا وحس ان فيه حاجه وثواني ولقي اهله طالعين ومصطفي ومراته !
ابتسم وسلم عليهم وكلهم مش فاهمين في ايه
ملك مستخبيه جوا ومعاها نور والمصور وبصتلهم بتوتر : انا خايفه سيف يزعق
نور بحماس : بالعكس دا هيفرح جدا وبعدين خايفه ليه مرات مصطفي حامل من فتره يعني لافي زعل ولا هي هتبصلك
المصور بصلها : العدد كمل برا وفي بنات دخلوا
نور بتشجيع : اطلعي يلا وانا هطلع من الباب التاني وادخل زيهم (بصيت للمصور) وانت يا كريم عارف هتعمل ايه صح ؟
كريم : متقلقيش يلا
ملك طلعت وكانت لابسه فستان اوف وايت هادي .. سيف ابتسملها وقرب ليها بحب : في ايه؟
ملك ابتسمت وبصتله وهمست : سيف
سيف : عيونه
ملك بحب : انت هتبقي بابا
سيف تنح وسكت ومش مستوعب ، ملك ضحكت وضغطت علي ايده : انا حامل ( سيف عيونه لمعت بسعاده) هتبقي اجمل وأحن اب في الدنيا
بصيت للكل وسيف باصصلها وقلبه بينبض بسرعه جدا من فرحته
ملك بسعاده : الفتره اللي فاتت كانت صعبه عليا وعليكم وربنا عوضنا بحاجه جميله اوي، هتنسينا كل اللي شوفناه
سيف جواه احاسيس كتير جميله واولهم انه عايز يضربها انها قالت الخبر دا قدامهم كلهم ومش واخد راحته معاها
بصلهم زيها وايده حاوطتها من ضهرها
ملك كملت : كل حد شاركنا الوقت دا لازم يبقي معانا
مجدي ومنال قلبهم حس ورقيه ابتسمت وعارفه وشادن متحمسه تعرف ومها عندها شغف تعرف ونفس الاحساس لمصطفي
ملك بسعاده وعليت صوتها : انا حامل
مجدي قام ومنال وبوسنه جريوا عليهم بفرحه وحضنوهم
مجدي الفرحه مش سايعاه ان ولاده الاتنين هيبقي جد لولادهم وبوسنه فرحتها كبيره جدا
بعد وقت طويل من الزقططه والفرحه كل واحد قاعد وبيتكلموا مع بعض وبيفكروا هيبقي ولد ولا بنت !
القعده الجميله دي خلصت واخيرا ملك وسيف اتقفل عليهم باب
سيف شدها ليه وحضنها بكل قوته وحاسس انه عايز يخبيها جواه من فرحته بيها وهمس : كل دا عارفه ومقولتليش؟ بتتشفي فيا
ملك خرجت من حضنته وبصتله بحنيه : مقدرش اعمل كدا، الفرصه مجاتش اقول .. كنت عايزه اشوف الفرحه اللي في عينك دي وتبقي مناسبه سعيده بجد ومهمه في حياتنا، لو قولت وقت ما عرفت مكنش في لحظه سعيده كدا كان هيبقي حاجه عاديه
سيف ابتسم : انتي صح، حبيت انك جيبتي مصطفي ومراته
ملك : انا عارفه سعادتك هتكمل بوجوده
سيف قربلها وباسها بكل حبه ليها كانها بعيده عنه من زمان
مشاعر كتير حس بيها لحظتها اولهم الفرحه ، ملك حاولت بكل طرقها تسعده وتوصله حبها ليه وكان وقت من احلي واجمل الاوقات ليهم ..
القدر كتب ليهم السعاده والعوض ..
النهارده خطوبة رقيه
البيت كله سعيد وفرحان، مليان بخالات رقيه الا سعاد اللي قاعده جنب ابنها بترعاه وبتصبره علي ابتلاءه
احمد حاسس انه طاير من الفرحه برقيه
البنات جنبها ومساعدينها وبيحاولوا ميتعبوش ملك وتبقي معاهم بس
وصلت الميكب ارتست واحمد نزل يجيب الفستان من الاتيليه
شادن شغلت اغاني كتير جميله ورا بعض والاجمل انها مش بتغنيها لرقيه بس هي لتغنيها لنفسها ماخلاص فرحها اتحدد الشهر الجاي ! يعني الفرحه فرحتين ♥
كل حاجه خلصت ورقيه وامير وصلوا الكافيه واهلهم معاهم وعملوا الفوتوسيشن قبل الخطوبه
سيف وصل ومها معاه وقعدوا علي تربيزه واحده
ملك وسيف ومها وشادن وابراهيم وميار
احمد وقف وقربلهم : محتاجين حاجه
مها رفعت راسها ليه وبصتله و سيف رد : تسلم يا غالي
احمد خد باله من مها وبص لابراهيم : محتاج حاجه؟
ابراهيم ابتسم وخد باله من نظرته لمها : اه تعالي ثانيه
ابراهيم كان جنب مها وهي بينه وبين سيف .. احمد وقف جنب ابراهيم وبقي جنب مها
ابراهيم غمز : البدله بتاعتك منين شكلها شيك اوي؟
احمد فهم ابراهيم واتكلم معاه شويه
سيف كلم مها : مبسوطه ياحبيبتي؟
مها ابتسمت : جدا .. رقيه زي القمر ماشاء الله
احمد سمعها وحس انه عايز يتعرف عليها اكتر وابراهيم همسله : وقعت ولا ايه؟
احمد ضحك : جميله بصراحه
ابراهيم : اممم طيب روح انت وانت هظبطلك سيف
احمد ابتسم : تبقي راجل جدع
سمع حد من صحابه بينادوه وراحلهم ..
رقيه شاورت للبنات يجوا .. قامت شادن وملك و وقفوا معاها وفرحوا ليها وابراهيم سيف قاموا وقفوا مع امير واحمد
اشتغلت اغنيه خليت التلات بنات يقربوا لبعض ويغنوا معاها
وسيف وامير وابراهيم واحمد بصوا لبعض وغنوا معاها وحاسين بكلامتها جدا
(شغلوا الاغنيه وتخيلوهم اسمها صاحبك ده من بختك)
انا واخويا وابن عمي وعمي والغريب اخوات
مانجيش على الغلبان أصحاب وجدعان
ولينا على الطريق حكايات
صاحبك ده من بختك
في المصلحة ياخدك
وان جت عليك دنيتك
تلقاه واقف جمبك
الرزق مش قرشين
الجدعنة رزقين
ياما عملنا فلوس
والاخره راحت فين
صاحبك ده من بختك
في المصلحة ياخدك
وان جت عليك دنيتك
تلقاه واقف جمبك
الرزق مش قرشين
الجدعنة رزقين
ياما عملنا فلوس
والاخره راحت فين
دا محترم ده
من بيت كرم ده
راجل علم صاحبي انا
قد الكلام ده
اسطورة جامدة
كاتب كتاب في الجدعنة
*شاوروا علي بعض وبيغنوا واتنططوا بسعاده وملك نسيت حملها واتفاعلت معاهم *
دا محترم ده
من بيت كرم ده
راجل علم صاحبي انا
قد الكلام ده
اسطورة جامدة
كاتب كتاب في الجدعنه
اعطل عليه زقة
ولا عمره قال لأ
وفي ضهري في الزنقة
راجل تمام لقطة
- يتبع الفصل التالي اضغط على (رواية هن (غرف مغلقة)) اسم الرواية